رواية بواقي روح الفصل الخامس 5 - بقلم نسمه عبدالله

رواية بواقي روح

الفصل الخامس5

بقلم نسمه عبدالله

قالت لي و لشنو تخت القروش الكتيرة دي عندك و دي منو هي اصلا ، قلت ليها دي وحدة شغالة معانا في الفندق حامل و ح تلد قريب ساكنة مع نسابتها ..و...و راجلها في ولاية تانية رسل ليها القروش دي تجهز للولادة و في مشاكل بينها و بين نسابتها و ممكن يشيلو منها القروش و هي مسكينة م تقدر تحكي ل راجلها فعشان كدا ختتهم معاي و ح تسافر ترجع لأهلها بكرة، قالت لي انتي متين اشتغلتي لمن تأمنك، قلت ليها امي انتي شايفاني حرامية كل مين بشوف الناس بعين طبعه و عشان هي طيبة شافتني كدا برضو ، لوت خشمها و قامت طلعت ، خايفة تكون م صدقتني اودي القروش دي وين انا ، رجعت اتصلت ل صاحب القروش و سالتو اذا يقدر يجي يستلم القروش حاليا و قال م عندو طريقة ، اتنهدت بضيق و انا بفكر اوديها وين ، شفت رنيم طالعة ل فوق قلت م عندي غيرها. طوالي لحقتها. قلت ليها رنيم ممكن طلب ، قالت لي جدا ، قلت ليها عندي أمانة حقت ناس خايفة تضيع ممكن تخليها معاك لحد بكرة ، قالت لي م عندي مشكلة ، اديتها ليها و قلبي في يدي نزلت تحت و انا بدعي م يحصل شي بس الليلة دي تعدي كيف ..

تاني يوم و بما اني شلت اذن و م شغالة ولا عندي غسيل ولا مكوة نمت نومة طويلة صحتني امي للشاي ، جهزت شربت الشاي قلت لأمي ح امشي اودي الأمانة و اجي ، قالت لي م تتأخري، شلت الكيس من رنيم و اديتو نظرة من فوق ياها ربطتين القروش و الملابس في محلها ، قلبي قال لي كان على الاقل تحسبي القروش اسي يمكن امي شالت منها و انتي المبلغ اساسا م عارفة كم... شلت شنطتي و طلعت... وصلت و كانت سبعة و حاجة اتصلت للراجل و عشرة دقايق و جا كان معاه مرا و طفلة صغيرة عمرها يمكن ستة شهور يمكن الملابس ليها ، فرح شديد و اتشكرني و اصر هو و مرتو يعزموني اشرب حاجة معاهم ..

دخلنا مطعم قريب اتعرفت عليهم مرته اسمها غادة و بتو اسمها منن ، قالت لي يلا عايزة تشربي شنو ، عاينت للقائمة و كلها عصاير بأسعار كبيرة و هم شكلهم ناس بسيطين و قروشهم دي م جات بالساهل ارخص شي كان كباية القهوة ف طلبتها شربت بسرعة و شكرتهم على القهوة و ودعتهم ، اول م عتبت باب المطعم اتنفست براحة كبيرة و فرحانة انو خلاص دا هم و انزاح و فجاءة عيني وقعت على العميلة الكانت لابسة بنطلون جينز اليوم داك كان ايمها شهيرة اظن ، ي ربي الراجل الكان عايز يعرف رقم غرفتها منو و عايز شنو ، عاينت ليها المرة دي لابسة بنطلون ابيض مع قميص بعد الركبة ابيض فيهو الوان فاقعة و طرحة ملونة بالوردي و نظارات كبيرة ، واو ، دي اول كلمة طلعت من خشمي صحي في ناس عايشة دنيتها و دا كلو و دايرة غرفة رخيصة لو عندها قروش كان عملت شنو ....

ي سعد احسب القروش قلت ليك يمكن شالت منها ، قال ليها ي غادة هي لو عايزة تشيل م كان جابتها لينا اصلا ولا كان تعبت نفسها و فتشت عني ، قالت ليه و لو برضو يمكن قالت اشيل منها كم الف م ح يحسو ولا يحسبو ، قال ليها خلي تشيل ...لمن لقتو رافض الفكرة شالت القروش حسبتها براها اول م خلصت قالت ليه م قلت ليك تكون شالت منها هدا القروش ناقصة خمسين ألف، قال ليها يكون وقعو ولا حاجة ، قالت ليه سعد خليك جادي قروش مربوطة كدا ح تقع ب وين ، قال ليها والله لو شالتهم انا عافيهم ليها و كتر خيرها الرجعت الباقي ، سكتت لانو عندو وجهة نظر هم محتاجين القروش دي و بشدة و لو م كان رجعتها كان يعملو شنو ...

عند إسراء

رجعت بيت خالتي و كان خلاص زمن الفطور الناس حتفطر و تجهز عشان عاملين الحنة في الصالة ، البيت كان ملان و الضيوف اغلبهم وصلو الليلة ، ناس بتاكل و ناس بدت تجهز ، قعدت اكلت و مشيت اجهز و اللبس طبعا من امي بس مالي م شايفاها نهائي ، سألت رنيم و قالت انهم مشو الصالة بدري في حاجات لازم يعملوها براهم و قالت لي خالتي قالت ليك البسي الفستان الأبيض عشان دي الحنة البيضاء و الناس كلها ح تلبس ابيض ، قلت ليها طيب مشيت لبست و اتمكيجت و طلعنا بعد الضهر طوالي ...

عندي تلاتة خالات و كل وحدة فيهم متزوجة زواج مرتب ، يعني رجالهم مرطبين و امورهم واضحة ، م عدا امي ، كل م تتذكر انو ابوي غشاها و عاشت معاه قصة حب فيها رشة احتيال تنكد علينا بدون سبب و تتشاكل مع البيت كلو و تزعل يومين و ترجع طبيعية و كل م نجي نزور خالاتي ترجع البيت نفسياتها تعبانة من البتشوفه و مُنى عينها تزوجني واحد من اولا أخواتها و محرزة على من اولاد أعمامي لانو حالهم م احسن مننا بكتير ..

وصلنا الصالة و انا قادرة اشوف كمية العز العايشين فيه خالاتي، يعني صالة فخمة شديد الأشجار و توزيع الورود واضح انو متعوب على شغلهم دخلنا جوا ..و برا حكاية و جوا حكاية تانية ، للان م قادرة اشوف امي ، كل الفي القاعة لابسين ابيض ي اما ب احمر ي اما ب دهبي و دهب كمية من النسوان للبنات يمكن انا الوحيدة و معاي امي م لابسين دهب بس وينها امي، قعدت ورا م عايزة اختلط بيهم بحسسوني دايما بنظراتهم المتعالية اني ولا شي و م ناقصة وجع قلب و تفكير مفرط و ليه نحن م زيهم و الكلام دا ..انتبهت ل صوت الاغاني و التصوير اشتغل معناته العروس وصلت أخواتها على يمين الباب و خالاتي و عمات العروس على الشمال ، دخلوها دخلة ملكية و بدو الحنة و انا لسه بفتش على امي وقفت بخلعة لمن امي ظهرت على وحدة من الشاشات تضحك و تبشر و تشتت القروش في العروس بكمية كبيرة، امي جايبة الدهب دا من وين ، لا لا اكيد فالصو مستحيل يكون حقيقي ، اكيد اكيد م حقيقي و القروش دي ، كانت من فئة الالف جديدة و باين انها جديدة ، امي جابت القروش دي من وين ، غلبني القعاد و انا مستنية انها تجي بس هي من جنب العروس م اتحركت و تشيل و تشتت في القروش تقول لاقين ناكل نحن لمن نجدع ، لمن فاض بي مشيت براحة سحبتها من نصهم و طلعت بيها برا الصالة ، قالت لي مالك ي بت الحفلة شغالة ، قلت ليها امي جايبة القروش دي من وين ، قالت لي بتردد واضح قروش شنو ، قلت ليها الشغالة تشتتيها دي و نحن م لاقين ناكل ، حمرت لي و قالت وطي صوتك دا ، قلت ليها و انا بهبش الاساور الدهبية و قولي لي دا فالصو و طمنيني مع انو م ح اطمن لانو قروش نجيب بيها فالصو زاتو م عندنا ، قالت لي يبت هيي انتي قايلة نحن معدومين ولا شنو ، قلت ليها اي معدومين و الحمدلله ،لوت خشمها و صلحت سلسل الدهب في رقبتها و قالت ابوك كسبهم اول امبارح ، قلت ليها بصدمة دا من القمار ، رجعت حمرت لي وقالت والله ي إسراء لو م لميتي لسانك دا م كويس عليك ، سكت وانا بضرب يد فوق يد ، قالت لي انتي م تكوني نكدية عيشي اللحظة و بعدين لا حرام لا شي ابوك خسر ثروة ورا القمار دا فلما يكسب يبقى دا حقو ، حقو!!! قلت ليها امي اقول ليك شي بدون زعل ، قالت لي قولي ، قلت ليها م تحرفي في الدين عشان يقيف قي صفك انتي و ابوي و امشي تمي حفلتك، قالت لي اصلك فقرية ، عاينت ليها و انا بقول ليها اي اصلي كدا و مشيت خليتها ، قالت لي لحظة ماشة وين ، م رديت عليها و واصلت طريقي و قلبي ماكلني بقول قروش الراجل انا م حسبتها ي ربي معقول امي شالت منها ولا يمكن رنيم ، لا لا رنيم بت عز تعمل شنو بالقروش بس الا امي دي شالت لانو وين ح تجيب قروش جديدة ، لا معقول ي إسراء تلقيها شافت للنساوين في بيت العرس مستقبلهم و شالت منهم قروش ، اي اي اصلا هي بتشيل قروش من الناس ، اتمنى يارب امي م تكون هبشت قروش الأمانة يارب يااااارب ..قطع دعائي صوت سااخر بقول

بتتكلمي براكي ؟؟؟ جنيتي انتي