رواية بين العقل و الطريق الفصل الحادي والثلاثون 31 - بقلم غزوان علي

للكاتب غزوان علي
البارت الاخير الجزء الثاني

أحيــانا يغمــرنا الإشتيــآآآق
لشخــص معيــن
فنــرى
وجهـــه فـي كــل الوجــوه
ونسمـــع صــوتــه فـــي كــل الأصــوات
ونشعر بــه يجلــس قريبا منــا
ونـتذكــر موآقــف كانت بيننــا
فنبتـــسم .. فيظــن مــن حولنــا
أننـــا بـحالــة جـــنـووون
ولا يدركـــون اننــا فقـطـ
اشتقنـــآ لاحد حنون
اشتقنا له حــتى الجــنووون...

صحت غيث غيث
غيث .. هااا حبيبي
موج .. اوووف وكعت گلبي
غيث .. ابتسمت امووت على الي يخاف عليه
موج .. ليش سكتت وغمضت والله خوفتني
غيث .. اريد بس اسمع صوتج وانفاسج اريد اعيش بيهم ممصدك انتي يمي ممصدك لامسج ودااحسج اخاف حتى اترك ايدج وتروحين
موج .. تدري انت احلى شى صار بحياتي وبعدك علاوي
غيث .. علاووي منوو يمه
موج .. ههههههههه شبيك ابني نسيته
غيث .. هاااا اي اذا ابنج ميخالف اني بالاول تره اغاااااار
موج .. هههههه يمه فدووه لحبيبي الي يغار

وراها حضني بقوه ويكولي انت اول نبضه بعمري واخرها ابقي هيج نايمه على صدري لتكومين اريد اعيش ليله وانتي بحضني ويشهد الله انتي زوجتي كدام الله ومستعد حتى اصيح اهلي يشهدون
موج .. نمت على صدره واني اسمع دكات گلبه الهادئه وايده تلامس ايدي الخوف الي بگلبي مسيطر عليه وادعي ياارب يصير تطابق بالانسجه وبقيت للصبح مره على صدره مره على جتفه جان كل شويه يفز يخاف اعوفه واروح مثل الطفل الي مجلب بأمه وراها الفجر كعدت وهو نايم توضيت وصليت وهو بعده وفتحت القران يم راسه واقرا
غيث .. فتحت عيوني على صوتها وهي تقرا قران وصافن عليها بس شافتني كعدت صدقت
تدرين كمت احب مرضي
موج .. لا عفيه شون تحبه

لو ما هو جان ولا شفتج بعد ولا جان شفت عيونج الي انطي عمري الهم بس اشوفهم
لزمت شعره عيوني وروحي وكولي فدووه الك بس صير زين
صار ساعه ٨ الصبح واندكت الباب واجه الطبيب اضطريت اطلع ومن طلعت شفت اسيل وشهد جاايين تفاجأو بوجودي والصدمه بينت عليهم وبالاخص اسيل الي احس گلبها يريد يوكف بهاي اللحظه مهتميت ودرت وجهي بس شهد اجتي تسلم وتبوسني
ممصدكه ولا توقعت بعد اشوفج
شونج ام حسن
تعالي اكعدي من شوكت اجيتي
دنجت مستحيه من البارحه
شهد .. وشافج غتوو موو
موج .. اي .. كروب قصص غزوان علي
لعد هذا زيد ولا كال كل ما اسأله يكولي وحدي
شبيج موج ليش ترجفين
موج .. مستحيه من الموقف اعرف مالي صفه وجودي غلط بينكم بس شسوي موبيدي
شهد .. والله اذا اكو احد يستاهل يوكف ويه غيث فهو انتي لان انتي اكثر وحده قريبه منه
موج .. ضليت متفاجأه بكلامها شغيرها
واجه زيد وكال التحاليل مطابقه
شهد .. ياتحاليل
زيد.. موج راح تتبرع لغيث وراح يحضرون العمليه بعد ساعتين
شهد .. رحمتك يارب وحضنت موج  ومنشوف غير اسيل تجي تركض اني اتبرع لغيث

زيد.. شكراً مقصرتي
اسيل .. اني زوجته واحق بهذا الشى
زيد.. وين جنتي وانتي ايام تشوفي يتلوه من الالم والغسل والادويه
موج .. اني انتي ماكو فرق المهم يكوم بالسلامه
اسيل .. لا اكو فرق اني زوجته وام ابنه وانتي شنو صفتج هنا
ابو زيد.. اسيل احترمي نفسج وصوتج ليطلع لو ترحين تكعدين وتحترمين لوترجعين للبيت يله

اسيل .. عمي يعني انت راضي على هاي المهزله

هاي المهزله الي تكولين عليها هي فدت رجلج بالوقت الي المفروض انتي تفدي مو وحده غريبه
اسيل .. واني جايه اتبرعله
ابو زيد.. بعديش ام ايهم يامرة ابني هاي الايام كلها تشوفيه يتلوى ويعيط للستار وانتي تتفرجين عليه وتبجين ولا كلتي هذا زوجي ابو ابني عفتينا مثل المخابيل اندور دكينا باب باب حتى يطيب كعدنا نتوسل بالعالم حتى نشتري لحياة لأبنا وانتي تتفرجين
اسيل .. نزلت راسي وحسيت بغلطي وعرفت الكل عرف بسالفه اني مااقبل اتبرعله

موج .. شفت الوضع تأزم والكل اعصاب سكتت طلع الطبيب وبلغوا غيث اكو متبرع وهو فرح اووف فرحته جانت عندي تسوه الدنيا
عمي مقبل احد يدخله بس اني صح استحيت بس لازم اشوفه قبل ليدخل
غيث .. ادعيلي ارجعلج مباشره اتزوجج وتبقين بحضني
موج .. دنجت عليه وبسته من خده الايمن وراها بسته من خده الايسر وهو مغمض وبسته من شفايفه بهدوء وهمست اله حط هذا الكلام بعقلك واحفظه زين ودوم ردده موج تحبك اكثر من روحها وراح تبقى طول عمرها الك وبس وكل نبضه بهذا الگلب الك وكل هوا اشتمه بأسمك واتذكر اكو وحده حبتك بجنون وتبقى تحبك بجنون لأخر يوم بعمرها
غيث .. ابتسمت على كلامها وبنفس الوقت قلقت امواجي انتظريني .. بيج قصص غزوان علي
لا اله الا الله
موج .. محمد رسول الله وبست راسه وهو باس ايدي واخذوه
اني اخذت التلفون واتصلت بخالتي وكتلها وكامت تعد وتصف يامعزايه ويمصخمه اريد اسكتها ماكو تالي كتلها اذا صار شى عليه وصيتج ابني اذا متكدرين عليه رجعي لعمتي هي تحبه وراح اداريه
الحجيه .. ليش يابنتي تلعبين بحالج
موج .. لتخافين عليه راجعتلج ياغاليه

الحجيه ..
يمه شراح تستفادين من اتذبين نفسج بلنار وتنطين من صحتج
موج .. خاله استفاد بأن اكدر استمر بحياتي واني مرتاحه لان هذا الانسان اذا صار شى عليه مااتحمل مااكدر اعيش وهو جوه التراب هذا الهوا مالتي واذا انكطع اموت
الحجيه .. اوف يابنتي دومج مشلوعه گلب
موج .. فدوه خاله ادعيلي
الحجيه .. الله ومحمد وعلي وياج يوكفولج بشدتج وترجعين لأبنج وبيتج
موج .. امين فدوه لگلبج 

ودخلت العمليه واتشاهدت ولحظات ويسألني ابو التخدير واجاوب اسمج عمرج وراها محسيت بشى

فتحت عيوني الالام قويه بصفحتي ومتأذايه لكيت شهد يمي
شهد ..  الْحٍمَدلله على سلامتج گلبي
موج .. كوه احجي وابلع بريگي واصيح غيث
شهد .. لتخافين نجحت العمليه والفضل لله والج
كمت ابجي واحمدالله على نجاحها
اجاني عمي ابوزيد وزيد وامهم
والله يابنتي لوشكد منشكرج منجازيج
امه لزيد وغيث تبوس بيه وتبجي وتتشكر مني
اني كوه احجي لتتشكروني المهم يصير زين فدوه
زيد.. بفضل الله وفضلج يرجع احسن من قبل
ابو زيد.. بنتي صيري زينه وارجعي ويانه بعد صرتي وحده من عدنا ومااخليج ترحين
موج .. عموو صعب
زيد.. ماكو شى صعب احنا وياج وبس يكوم بالسلامه نعقد الكم
موج .. الله كريم
رفعت راسي شفت اسيل واكفه بعيد وتباوع وبعيونها الف كلمه وحسره وقهر دنجت ونمت مااريد افكر بأحد

بقيت حوالي ٤ ايام وطول هاي الايام واني الوب اريد اشوفه لحد متحسن وضعي وطلبت ياخذوني اله بس كون نايم مااريد اشوفه هيج وتقربت منه وهو نايم بسته وكتله خليت جزء مني بيك رايحه گلبي ومتركت بس الگليه يمك تركت گلبي وروحي وعمري مودع بالله ابقى ادعيلك العمر كله بصحه وسلامه واني روحي ترفرف يمك غيوثي

شهد .. انتي شكعد تحجين
موج .. طلعيني منا اخاف يكعد
شهد .. احجي طلعنا
موج .. لازم ارجع لبيتي وحياتي مااكدر ابقى
شهد .. غير يموت اذا كعد وملكاج انتي تخبلتي
موج .. اكو اقدار لازم نعيشها حياتي وحياته مستحيل تنجمع محد راح يعوفنا بحالنا اولهم زوجته وعمتي ام اكرم واهلي والناس الكل راح يظلمونا وراح نسمع اشكال المصايب رجوعه الي معناه ضياعه وضياع ابنه وابني وهمه مالهم ذنب
شهد .. لتتفلسفين بابا هذا مجنون بيج شون يعوفج وشون بعد كل هذا الحب والتضحيه تعوفي
موج .. الي يحب من صدوك ينطي بدون حساب وبدون شى مقابيل شى اني من انطيته قطعه مني لان اعشقه ومااكدر اخذ بمكانها استقراره وحياته
شهد .. لج هاي كليتها منطتها اله وعزتها عليه الي جاي تضحين علمودها ياستقرار تحجين عنه

موج .. والله موو علمودها علموده هو لان مراح يكدر يعدل بينا وراح ينظلم ابنه وابني لان اكيد عمتي راح تاخذه مني عدا الناس واهلي طريقي وطريقه ميلتقون بيوم كافي اني اعتبره كدام الله زوجي وهو هم خليني اعيش حياتي بدون مشاكل وهو يعيش بدون مشاكل
شهد .. عذرج اقبح من ذنبج شون تعوفي
موج .. عايفته جسد بس مو روح بس امانه انتبهي عليه
شهد .. زين وين رايحه وانتي حتى صحتج بعدها
موج .. لازم اروح اذا ابقى مراح يخليني
شهد .. بستها واني اول مره ابجي عليها شكد تحبه لخاطر الكعبه هاي البنيه شنو ذوله حبهم عجيب يمكن اذا احد يحجيلي عنه مااصدك واجه واحد اخذها كالت هذا مثل اخويه ويااه مره جبيره بالعمر ومخلتني اتعرف عليهم كالت طبي حتى محد يعرف راحت وجان هذا اخر يوم نشوف موج بيه اختفت مثل مختفت الضحكه والسعاده من غيث بعد مكعد بقى ايام يسأل عنها ويتصل وماكو ورادت حتى عمليته تفشل من الاعصاب والعياط گلب الامه يريدها وعرف راحت وعافته بس كمنا يوميه نجيب ابنه اله حتى يتمسك بالحيااه .. كروب قصص غزوان علي
لحد متحسنت حالته وبعد ٣ اشهر عرف هي الي متبرعه اله عن طريق زيد وهنا دخلنا انذار وصارت حالته حاله والحمدلله عدت بقى اشهر نحسه جسد بلا روح وكأن موج انطته الكليه مالتها واخذت روحه وراحت

ود صار عدها توم ولد وبنيه وهذا الشى خبل هشام وطاير من الفرح ودوم مدلل ود واطفاله وحتى عمتها تموت عليها وعلى جهال هشام واخت هشام اتزوجت والثانيه بلسم مخطوبه الله يتتم الها بخير

اني وزيد علاقتنا طيبه وهادئه وعايشين احسن عيشه لكن دوم نفكر بغيث الي من ذاك اليوم مشفناه سعيد صح تشوفون حياته هادئه وصار عنده طفل ثاني سماه تيم وصارو اطفاله ايهم وتيم علاقته بأسيل عاديه رغم توقعت يعوفها او يطلكها بس هو كال مااكدر اشمرها بالشارع لان ماعدها احد واقلها لخاطر جهالي هي امهم وبقت علاقتهم بارده سطحيه جداً وهي ساكته ومتقبله الوضع لان ماعدها غير حل

اني غيث حبيت امرأه متزوجه وكثير منكم اعتبره غلط وحرام ماانكر سويت اخطاء لكن ماعندي سلطان على گلبي مثل كل الناس  ماعندهم سلطان على گلبهم
حبيتها وتعلقت بيها وممتندم لان حبيتها
دخلت بمعركه خسرانه لكن ممتندم لان عندي امل بيوم ترجع لحضني

وتقصدت انشر قصتي مو حتى احرض على العلاقات المحرمه والعياذ بالله قررت انشرها لان هاي الانسانه كانت مثال للشرف رغم كل الظروف الي مرت بيها منطت نفسها ودوم فضلت الكل على حياتها

نشرت قصتي عسى ولعل ترجعلي صار اكثر من سنتين واني ادور عليها مبقيت مكان مسألت عليه نشرتها بعد تردد لان كلت اكيد اكو ناس راح يفتهمون حبنا غلط ياريت تحكمون بقلبكم لان احنا مغلطنا من حبينا بس الظروف الي انحطينا بيها هي الي غلط

مروه هذه الانسانه الجميله اشكرك من قلبي لان ساعدتني بتفاصيل كثيره عن الي واجهته موج خلال هروبها وكدرت اكمل القصه بيهم
انقطعت اخبار موج حتى عن مروه تخابرها كل شهرين مره اطمنها وتسأل عن صحتي وعن امها وبعدها ينغلق الخط وتروح

موج ارجعيلي بعدني لهذا اليوم ادور عليج ياريت تقرين قصتنا وترأفين بحالي وترجعين
انتي عفتي قطعه منج بيه بس اخذتي روحي وعقلي وحياتي
سعادتي وراحتي عندج ارحمي حبيج حياتي ظلمه ومابيها اي طعم بدونج ياانفاسي

اشكر كل من تفاعل مع قصتي واشكر الاخ الًـغالي والصديق غزوان علي لسعه صدره وتعبه على نقل الاحداث بدقه وحرفيه سلمت اخي العزيز
دعواتكم محبيني بأن انجمع مع الانسانه الي ملكت قلبي
(غيث)
مع تحيات اخوكم الكاتب غزوان علي وان شاء الله نلتقي قريبا بقصة جديدة . واذا عجبتكم القصة لتنسون التصويت الها والتصويت هو عبارة عن هدية منكم لتشجيع الكاتب
الفيديو هو هدية من غيث لموج