رواية بين العقل و الطريق الفصل الثلاثون 30 - بقلم غزوان علي

بين العقل والطريق
للكاتب غزوان علي
البارت الاخير الجزء الاول

‌‎وأهـلُ الهـوى أن عشقــوا
اعطوا ما لديهم ومـا بخلــوا
ولا سئلــوا ولا طلبوا ولا أنتظروا
بديـلاً لما وهبـوا .

شهد .. بقيت فاكه حلكي ومااعرف شحجي والحظ المصخم طلعت اسيل الوحيده المطابق الانسجه مالتها وكلياتها اثنينهم ممتازات اجه زيد والفرحه ماليه وجهه ومكيف لان طلعت اسيل مطابقه جان ادنج وتكول بلكت الله يجي متبرع اني ممستعده حاليا
زيد.. شنوو ممستعده ولج اخويه ديموووت وانتي تكولين ممستعده
شهد ..  على كيفك زيد وياها
زيد.. انتي كاعد تسمعين شتحجي اخويه الي هو زوجها ابو ابنها بين الحياة والموت وبيدها تنقذه وتكول ممستعده هذا حجي مال وحده عاقله مال وحده تحب زوجها
اسيل .. اي احبه اكيد وكولش احبه بس انتم هم فهموني اني اذا صار عليه شى منو يبقى يم ابني منو اله اني عانيت من اليتم ومااريد ابني هم يعاني
شهد .. ياعيني حقج بس انتي هم فكري هذا زوجج وحتى اذا انطيتيه وحده من كلياتج ماعليج اي شى وهاي اعمار بيد الله هواي ناس صحتها مثل الورد وفجأه تموت وناس مريضه ٢٤ ساعه وتبقى تعمر سنين هاي كلها اعمار بيد الله وانتي قابل اذا انطيتي راح تموتين لا راح ترجعين طبيعيه وبنفس الوقت غيث عايش مراح تحرمين ابنج من ابوه
اسيل .. مااكدر والله افهموني
زيد.. اااخ ربي اخر شى اتوقع تخذلين غيث بهاي الطريقه توقعت راح تركضين علمود هذا الشى يعني اتعجب عليج شون الج گلب تشوفي يعالج وديموت وتبقين تتفرجين عليه
اسيل .. ابجي واحجي والله مقهوره وادعيله
زيد.. اششش لتكملين وهاي دموعج وفريها لنفسج
شهد .. عافنه زيد وطلع بره صاير نار اعرف بيه اذا يبقى يم اسيل يمكن يضربها
تعالي اسوله اكعدي
انتي ويه منو حجيتي وقنعج بأن متنطين
اسيل .. اني من الاول جنت محابه الفكره وخابرت امين واستشاريته وهو نفس موقفي شهد اني صح احبه لغيث بس اعرف انتم مراح تعوفوه بس اني اذا صار عليه شى منوو اليه
شهد .. مع الاسف هذا تفكيرج تره احنا موو انذال حتى من تتمرضين اويصير شى نعوفج ولو غيث بمكانج جان اتبرع اعرف بيه گلبه طيب والصراحه توقعت تفرحين لان تنطي حتى تقوى علاقتكم ويحبج اكثر واعتقد احنا مابيوم حسسناج بتقصير او انتي غريبه عنه او بيوم نعوفج دوم معتبريج بتنا والج مكانه ومعزه بينا

اسيل .. حاولت وفكرت مكان المره الف بس
شهد .. هذا هو كافي سدي الموضوع اله الله لهلمسكين
اسيل .. فدووه لتكولوله اني مقبلت مااريد يزعل مني اترجاج شهد اقنعي زيد ميكول لأحد استحي مااكدر اواجههم
شهد .. صفنت عليها وكتلها لتخافين مراح نحجي هو الانسان بوقت الشده يبين
اسيل .. ادري زعلتو مني واذا تأزم الوضع بذاك الوقت انطيه
شهد .. لا خلف الله عليج مقصرتي وعفتها وامشي واهز بأيدي يعني صدوك اكو هيج بشر ليش دوم ننخدع بسهوله ونتوقع الخير من اقرب الناس وبوكت الشده منلكه احد اووف ياربي امانتك هذا الولد شافي وعافي

ود.. انت شكعد تحجي هشام غتوو بالمستشفى صار ٣ ايام واني ماادري
هشام ... على كيفج گلبي غير اخاف على صحتج لتنسين الحركه موزينه عليج
ود.. هسه توديني معليه
هشام ... لج بابا انتي بالشهر السادس استري علينا ميصير منا الطسات مراح تتحملين الطريق
ود.. كمت ابجي والله اذا موديتني اخذ تكسي واروح
هشام ... على كيفج هسه ليش تبجين ياعيني
ود.. لك اخويه بين الحياة والموت وتكولي ليش تبجين وديني هسه
هشام ... يله امشي البسي وعلى كيفج امشي لا والله وداعتج مااوديج
ود.. لا على كيفي
ام هشام ... وين امي شون ماخذها وبهذا وضعها
ود.. عمه دخيلج اخويه تعبان واذا مااشوفه يمكن اموت
ام هشام ... بنتي ميصير الدكتوره محذرتج من الحركه
ود.. على كيفي فدووه خلوني اروح اذا ابقى مااتحمل يمكن يصير بيه شى
ام هشام ... اوكفي خلي اجي ويااج
هشام ... طول الطريق مسكتت وبس بجي يعني شون والله من وره هاي تصرفاتج راح افر السياره وارجع
ود.. لا لا عفيه سكتت
وصلنا للمستشفى وهي تريد اطير وتوصل وكوه لازميها اني وامي ودخلنا وجان اشوف من بعيد خالد كاعد ضجت مردت يشوفها بعدني لحد هاي اللحظه اتخبل من اشوفه رغم ادري بيها هسه هي تموت عليه بس اغار عليها وهو بقى يباوع خزرته دنج بس ود ولا انتبهت ولا عبالك كاعد وطبت ركض لغيث وجان حالته تعبانه وهي شافته نهارت
ود.. غتو نظر عيني . كروب قصص غزوان علي
غيث .. ولج دوده اشتاقيتلج
ود.. ياروح دوده انت
غيث .. ههههه مابيه اضحك اول مره اكولج دوده ومتزعلين
ود.. كولي دوده حشره اي شى بس صير زين
غيث .. ههههه تعالي حبيبة اخوج وتبوس بيه وتبجي هااي شنو بطنج صايره دعبله بعد مااصيحلج دوده اصيحلج دعبله
ود.. فدوه تحمل لخاطر اختك ولخاطرنا كلنا مااتحمل يصير بيك شى غتو
غيث .. كافي تبجين سكتها هشام وانت ليش جبتها اصلاً
هشام ... هي تنجرع گلبت الدنيا ولو مجايبها جان اجتي وحدها
غيث ..

يله روحي لبيتج ارتاحي موزين الوكفه هوايه عليج
ود.. مااروح باقيه يمك لواموت مااتحرك من مكاني
غيث .. تره كوه احجي ومالي خلك عنادج اذا تحبيني روحي ارتاحي لتزعليني منج
هشام ... يله حبيبي شفتي شون كام يتعب ويكح يله لتعبي
ود.. شون اروح مااكدر شون ارتاح وهو هنا تعبان
غيث .. كافي دوده وسمعي كلام تعالي انطيني بوسه وديري بالج على نفسج وعلى الي بطنج
طلعت ود وهي تشهك من البجي بقيت اباوع عليها مااعرف ليش كل شخص يجيني ابقى اباوع علي وكأن اخر مره اشوفه

خالد .. اجتي ود وصار مده طويله مشايفها شفتها حامل وكوه تمشي وهشام لازمها جنت حيل مشتاقلها وطولت النظر وراها انتبهت على هشام خازرني دنجت عيب مجان المفروض اركز هيج بس صارت غصب عني اشتاقيت اشوفها وراها طلعت واني اشوف شون حاضنها ويبوس بيها يهديها لان تبجي انقهرت حيل جان المفروض اني مكانه اني ضيعت احلى حب ممكن اعيشه وانحكمت ويه انسانه اي مشاعر اتجاهه ماعندي ومن شفت وضعهم هيج تأكدت هي تحبه لان لازمته عبالك ابوها وعيونها رغم تبجي على اخوها بس بيهم حب اله ضيعتج من ايدي ياود الله يسعدج وينسيني حبي الج

غيث ..
شهد صيحيلي زيد
تدلل
زيد.. هاا غتو شبيك
غيث .. اخذهم كلهم خلي يرحون للبيت مااريد اي احد هنا
ام زيد.. مااروح منا شون اعوفك ماما انت تخبلت
غيث .. لا كل شويه ابقى احجي واني كوه النفس اجره لتعبوني دخيلكم
زيد اخذهم كلهم وخلي خالد يبقى ومن ترجع هو يروح
اسيل .. شون اعوفك مااكدر
زيد.. باوعت علييها صفح ولو بيدي اشرب من دمها لو ما هي رفضت جان هسه سوينا العمليه وخلصت
غيث .. حبيبي روحي للبيت عايفه ايهم والجهال يم الجيران شون يصير ولا وحده منكم يمهم ارجعوا واخذوا ابويه وامي لان تعبوا
زيد.. يله امشو الكل كامو يحجون ويردون يبقون عطت بيهم واخذتهم وطلعت لأبويه هم كوه قنعته يروح يرتاح وباجر اجيبه يشوف غيث

وره ساعتين رجع زيد تعاال اكولك اكعد يمي بالاول خالد راح
اي راح وكال باجر من الصبح اجي
غيث .. جاوبني الصراحه شبيك ويه اسيل
زيد.. هااا مابيه
غيث .. انت اخويه ومن نظراتك اعرفك كولش زين لتكذب شصار وخلاك حصره تحجي حجايه تريد تكطعها بشنو اتجاوزت واني ماادري
زيد.. حبيبي غتوو ليضل بالك
غيث .. كمت اكح وتعبت احلفك بروح ابنك حسن وهاي اول مره احلفك بروحه شكوو ممرتاح لوضعكم بعدني مميت وهيج صارت عداوه واني كلت اذا اموت مأمن اخويه يراعي مرتي وابني
زيد.. اسم الله عمرك طويل حبيبي
غيث .. يله احجي تره تعبتوني والله اليوم
زيد.. طلعت تحاليل التطابق
غيث .. اي اعرف ولا واحد بيكم مطابق شنو الجديد
زيد.. لا مرتك مطابق طلع
غيث .. اسيل مطابق طلع
زيد.. اي ورفضت التبرع
غيث .. بقيت بحاله من الصدمه والهدوء ومحجيت اي شى وبس اكتفيت ادير وجهي للشباك واصفن عليه وشون الهوا بارد وليل مشاعري بهاي اللحظه بين اعذرها وبين اكرهه بين اكول حقها ويجوز متكدر كلمن وقابليته ومن اشوف حالتي بيني وبين الموت شعره اختنك منها زين ليش لو اني مكاني مستحيل اتأخر عليها مكدرت اعاتبها وطلبت من زيد ميكول لأحد وخاصه اسيل اني عرفت
واذا صار عليه شى تبقى اسيل وابني امانه برگبتك واياك بيوم تحاسبها على هذا الشى
زيد.. اني لوبيدي اشرب من دمها يااحاسبها
غيث .. لا عوفها براحتها ولتضغط ابد عليها اذا الله كاتبلي اعيش راح اعيش وكولشي قدر ولازم نعيشه

زيد.. اني والله مساكت افتر من مكان لمكان وان شاء الله نلكه متبرع بس قوي ايمانك بالله وان شاء الله خير
غيث .. الله كريم الي الله كاتبه الي اشوفه

موج .. ولك علاوي تعال ماما تغدا وتالي وياك بس تكمز
هثه ماما بس اغلبهم واجي
اوووف منك
الحجيه .. يمه دعوفي هو جاهل شجاج حاطه عقلج ويه عقله
موج .. خاله مدياكل بس لعب موتني واخاف عليه
الحجيه .. انتي بس على كيفج ويااه لاتنسين طفل ويحب يلعب
اووف ياخاله كل ميكبر تكبر مسؤولياتي ويااه واخاف من الزمن والي ضاملي
الحجيه .. شوفي بنيتي طول ماانتي ماشيه عدل ومغلطانه بحق احد وحافظه نفسج وقبل كلشي تخافين ربج مراح توكعين بشده اذا مو ربج يدزلج الي ينقذج منها ربج رحيم بعباده ومايظلم يابنتي البشر ظلام بس انتي هم وضعج معاجبني خاف مريضه
موج .. والله خاله مااعرف شبيه گلبي مقبوض ومخنوكه حتى البارحه منمت مرتاحه وكعدت اقرا قران يله كدرت اغفى
الحجيه .. اسم الله بنيتي ذبي حمولج على ربج ولتفكرين بشى

موج .. ونعم بالله خاله دك تلفوني هاا ام المصايب اختي
الحجيه .. اعوفج وياها واروح ارتاح تعبت
موج .. ابقي خاله شعندج
الحجيه .. لايمه اروح ارتاح حتى وراها اروح لحجيه ام جاسم مريضه ادي واجب واجي محتاجه شى
موج .. سلامتج وجاوبت مروه هلوو حبيبتي
هلوو قلبي شًّـوماكو عيني
موج .. ملتهيه ويه الجهال والتدريس عوفج مني انتم شخباركم

مروه ..
ماشيين البارحه ابوج قرر نبيع البيت والمشتمل مال امير ونشيل لغير منطقه
موج .. شعجب ليش
مروه .. كثر القال والقلت وابويه واخوتي مكعد يتحملون الحجي وخاصه بشار من طلع من السجن وحالته النفسيه زفت وحتى بيته ميدخل اله لهذا كال ابويه انبيع ونشيل لغير منطقه اقلها محد يعرفنا
موج .. احسن قرار
مروه .. مترجعين
موج .. اكولها ثور تكولي حلبي لج بابا ماارجع اني كتلهم انتم مواعتبرتوني متت واني بعزه حاجتكم هذا هو الميت ميرجع
مروه .. تدرين البارحه جنت افكر واكول ليش منطيتيني عنوانج وكل مااسألج انتي بيا محافظه تنهزمين

موج .. احسن الي والج
مروه .. انتي حتى من تحجين على العالم الي انتي هسه يمهم متكولين اسمائهم كله حجيه وابو رقيه وابواحمد حتى اسمائهم الحقيقيه مااعرفها احس متأمنين بيه
موج .. مو ماامن بيج لا ماامن بالدنيا الغبره الي دوم عاوجه ويايه الي شفته مراوي خلاني احسب حساب كولشي اخاف اكولج وبيوم يضغطون عليج تعالي انطينا عنوانها مثل سالفه التلفون موكلتي اخذو منج بالقوه واتصلو يجوز هم يضغطون عليج وتنطين العنوان اقلها هسه اني مأمنه محد يكدر يوصلي
مروه .. انتي من شنو خايفه شو اهلج وعرفو بيج ويتوسلون ترجعين
موج .. اخاف من عمتي
مروه .. هاي العجوز الكركمه تخافين منها
موج .. هاي الي متعجبج تكدر تگلب الدنيا عليه لعبالج هسه هي كاعده وساكته لتنسين بالفلوس وبهذا البلد الي مع الاسف كامت تحكمه الماده كلشي كام يمشي تكدر بفلوسها تاخذ ابني مني
مروه .. شنو هي هيته احنا نطيح حظها
موج .. وكت الصدوك مراح الكه احد ويايه واحتمال ابوج واخوتج همه يشيلون ابني وينطوه الها حتى يخلصون ويزوجوني لأي احد يتقدم
مروه .. انتي صدوك هيج تفكرين
موج .. واكثر لان كولشي اتوقع من اهلج ليغرج كميه الحنان الي نازله عليهم يوم مااصير يمهم اول شى يفكرون بيه هاي ارمله وكلام الناس وبعدها صغيره ولازم انزوجها وبما ان الطفل الحجه مالتي راح يحاربوني وياخذون ابني مني اهلج عديمي الرحمه وعدهم اهم شى المره براس رجلها مومهم زين حقير ميخاف الله المهم ميتحملون مسؤوليه مره لهذا مامستعده اجازف وارجع بعد مابنيت حياتي مثل مااحب

مروه .. والله مااعرف شكول اكو هواي من كلامج صحيح
موج .. موهوايه كل كلامي مروه اهليج بس اول مده يستقبلوني بالاحضان بعدين يرجع الشك والمحاربه هاي عقليتهم ولو الف ظرف وشكد متمر الايام مراح يتغيرون لهذا اسكتي ومااريد اسمع طاري الموضوع هذاابد
مروه .. صار
شوكت تتزوجين
غير يكمل شغلاته ولو تدرين جنت كلش خايفه ليعوفني بعد موضوع دعاء
موج .. لا خطيبج يحبج وطول ماهو يحبج مراح يتخلى عنج وان شاء الله تتزوجين ويصيرون عندج احلى جهال وافرح بيج
مروه .. امين امي تسلم عليج
موج .. بوسيلياها يله اروح اصير عليوي حتى نتغدا
مروه .. روحي گلبي الله ويااج

اسيل .. هلو امين شونك
امين.. هاا بشري خوما تبرعتي
اسيل .. لا بس والله حاسه بذنب اني احبه شون بمحنته مااوكف ويااه
امين .. بابا ذوله مينخاف عليهم هسه يخلقوله من جوه الكاع كليه حيري بروحج وابنج جاي تضيعين صحتج علموده حتى بعدين يصير زين ويتزوج عليج
اسيل .. بس اخوه ميت مني وحقه ماالومه
امين .. خلي يطير مالج علاقه بيه المهم ديري بالج على صحتج وابنج تره محد يفيدج
اسيل .. بس والله گلبي نار وخايفه عليه
اامين .. احنا كل شويه نعيد الكلام روحي طبج مرض اتبرعي وراها تمرضي ونامي بالفراش وهو يذبج مثل الچلبه ويروح يتزوج وخلي يفيدج الحب بذاك الوقت
اسيل .. لا هذا هو مااتبرع يله اروح انتبه لنفسك

غيث .. يوم بعد يوم واني احس ايامي بالدنيا معدوده وفرص نجاتي كاعد تقل الكل حلل حتى هشام وخالد وغير مطابق ود دومها مطابقه معي بس لان حامل مرهمت تتبرع وهي بس تبجي تكول حتى الطفل كرهته واني انقهر عليها وانقهر على امي الي اشوفها يوم بعد يوم تذبل كدام عيني ومابيدي شى اواسيها احاول احسسها اني بخير بس حالتي وشكلي غير كلامي

الدكتور .. اخ زيد تره حالة اخوك كعد تدهور يوم بعد يوم وعلى اي لحظه نخسره وصار اسبوعين وملكينه متبرع واكثر الي يجون مكعد تطابق
زيد.. والله يادكتور كدامك مستعد انطي حالي وفلوسي وكل مانملك بس يعيش غيث
الدكتور .. اني الي عليه كتلك تره اخوك راح يدخل مرحله العد العكسي والساعات الحرجه وهاي الساعات معناها بأي لحظه يموت
زيد.. لا دخيلك دكتور
شنو الي بيدي اصلاً زين لحد الان مقاوم ومتحمل لان شاب وبنيته قويه صامد واله لو اكبر بالعمر وتعبان جان يومين مطول
المهم استعجلو والله يشافي
زيد.. من حلات روحي طلعت للبيت وصاير نار وطبيت اعيط
اسيل اسيل . بيج قصص غزوان علي
ام زيد.. شبيك يمه اخوك صار بيه شى
زيد.. لايوم لتخافين
ولج اسيل وصعدت وكض عليها وبطلعتها من الغرفه جان الزمها من ركبتها
اسيل .. شبيك ابوحسن شبيك

زيد..
هسه تروحين تتبرعين لغيث بالكله مالتج لا والي خلقج ازرفهن الج وابقيج سكط حصره عليج الهوا
شهد .. ركضت عوفها زيد شجاك عوفها
زيد.. ولج هديني هاي الحقيره بيدها حياة اخويه وهي كاعده هنا تاكل وتشرب ومتهتم واخويه كاعد يموت الله يقبلها
شهد .. كوه سحبت ايده من رگبتها شجاك كول ياالله
زيد.. ديموت غيث واني كاعد اتفرج عليه ومابيدي شى
اسيل .. والله اسفه موقصدي اذيكم والله
كلت اكيد راح تلكون متبرع ومتعوفوه
زيد.. بابا انتي زوجته لازم ويااه على الحلوه والمره اذا بأول اختبار اله تخليتي عنه شتكولين لبنج اذا كبر خليت ابوك يموت

شهد .. تعال ياعيني وتهدى بالرحمن تعال اخذته وهو يبجي واني ابجي ويااه وراها عافني وطلع لان عاف غيث وحده
اسيل .. شهد اني مستعده اتبرع
شهد .. لتستعجلين وفكري منريد نأملهم خطيه وراها تنسحبين عيونج بيها تردد فكري واذا بقيتي على قرارج نبلغهم باجر

شهد .. اعرف بيها راح تتراجع مبين من عيونها الي جابها المستحه والخوف اذا مات غيث تنذب براسها الله يعينك على مابلاك ربي لتحوجنا لبشر لتحوجنا غير لرحمتك وكرمك يارب

غيث .. صافن وحالي تعبان والهوا يدخل بالرئه مالتي بهدوء اني من يوم مدخلت للمستشفى طلبت من زيد الغرفه تكون بيها شباج جبير وليسدون البردات ابد والغرفه جانت بالطابق الثاني يعني بس اشوف نهايات الاشجار تتحرك بقوه حالياً شهر الثاني 2016 وقطرات مطر متفاوته ابتسمت قبل كم يوم جنت بالسطح اتذكرها باوعت للساعه شفتها ساعه ١٠ بليل دخل زيد وجهه دم شبيك شجاك
زيد.. هاا الگلبه زوجتك لومتبرعه مجان هسه صرت زين

غيث .. لتضوج حقها الصحه اهم شى محد يعرف بقيمتها هسه بكدي ااااااخ
زيد.. ركضت عليه شبيك غتوو
غيث .. مابيه الالام بجسمي تروح وتجي
اوعدني زيد متأذي اسيل اذا صار بيه شى ولا تحملها سبب وفاتي
زيد.. اسكت توجع گلبي بهذا حجيك
غيث .. اذا تحب اخوك ديربالك عليها وعلى ابني ذوله امانتي يمك
زيد.. ان شاء الله تكوم بالسلامه وانت ادير بالك عليهم

غيث ..
زيد تلفونك وين
هذا شبيه
ادخلي على الفيس مالتي
زيد.. بله بربك هسه مال فيس انت بيا حاال
غيث .. صار يومين افكر شون اوصل لموج
زيد.. شذكرك بيها
غيث .. ليش اني نسيتها حتى اذكرها هاي بالدم تمشي ابوحسن بالدم
زيد.. والله لوادري مرتك هيج تطلع اله بأيدي ادورلك عليها وازوجها الك
غيث .. هههههههه جنك وياها مثل العمه والجنه وتريد العمه تكسر خشم چنتها وتزوج ابنها هههههه
زيد.. ولك لتضحك تتأذه
غيث .. يله افتحلي الفيس مالتي
شسوي بيه
ماكو طريقة اوصل لموج غير مروه وماعندي رقمها بس قبل مده عرفت الفيس مالتها اريد اراسلها بلكت الله يحن گلبها عليه وتنطيني رقم موج
زيد.. والله اروح اسحلها من شعرها واجيبلك الرقم
غيث .. ههههههه عوف شغل الاستخبارات مالتك البنيه خوش بنيه وحبابه ادخل خاص عليها واني اردلك وانت اكتب لان مااكدر اكتب مااشوف زين وايدي ترجف
دخلنا على الخااص اكتب شونج مروه اني غيث محتاجج ضروري شغله حياة او موت

مروه .. جنت كاعده اتصفح واسولف بالكروب ويه صديقات الي اجاني اشعار ماسنجر دخلت يمه هذا غيث اهووو هم رجع شمعرفه بالفيس مالتي معودت خلصت منه ذيج الفترات جان اتعزيت من وره جياته للكليه مالتي صفنت على رسالته خلي اسويله بلوك سويتله ورجعت اسولف

هاا مجاوبت لا
مروه .. بقيت الوب اكثر من نص ساعه ورجعت قريت شنو حياة وموت اخاف اكو شى يخص موج اخاف عمتها وصلت الها وديحذرها عن طريقي خلي افتح البلوك واذا شى سخيف اغلقه وانتهى

هلو غيث الحمدلله تفضل محتاج شى
زيد.. جاوبت
غيث .. اكتب اريد رقم موج ضروري
مروه .. ماعندي بله هذا من كل عقله يريد الرقم قابل انطي بسهوله والله ياالله
غيث .. اعرف مراح تنطي بس راح اكولج شى
اني داموت
مروه .. عوفها بحالها غيث وعيش حياتك
غيث .. شوفي داموت موو من الاشتياق لا فعلاً داموت يعني ايامي معدوده ويجوز ساعات واني حالياً بالمستشفى واريد اودعها واخليها تبريتي الذمه
مروه .. شنوو انصدمت هذا ناصب عليه لو شنوو
شوف غيث بطل هاي سوالفك لتزعل مني انت موصغير حتى تستخدم هيج شغلات حتى انطيك الرقم كتلك ماعندي وياريت بعد متراسلني
زيد.. يابه هاي لويمي اله انعل والديها واسحلها من شعرها
غيث .. قرب التلفون ودوس بصمه خلي ادز
مروه والله مو حركات واعذار فعلاً حياتي انتهت واريد اودعها واعتقد صوتي اكبر برهان وراح ادزلج صورتي هم
مروه .. جمدت من سمعت صوته وراها بدقيقه وصلت صورته لطمت على وجهي ياربي دخيلك هاي تموت اذا عرفت بيه هاي حالته ومباشره اتصلت ماسنجر وجاوبني
اعذرني والله متوقعت هيج حالتك
غيث .. اعرف وحقج بس اترجاج اريد رقمها حققي امنيه انسان ميت تكسبين اجر بيه

مروه ..
صفنت هو رقم شكووبيها عود بعدين تغيره المهم مااتحمل ذنبه ويجوز اذا مات وعرفت موج منطيت الرقم تزعل مني خلي انطي والله كريم حتى اذا زعلت عود اراضيها والله متنلام متنطيني العنوان جان حتى العنوان هسه انطي لغيث
هااك عيني هذا رقمها
غيث .. شكراًمروه مقصرتي الله يحفظج ويسعدج
مروه .. سترك ربي ودفع بلاك خطيه انقهرت عليه
موج .. الساعه ١١ ونص دك تلفوني واني مصار ربع ساعه من نايمه باوعت رقم غريب
مجاوبت عفته يدك رجع مره ثانيه وهم مجاوبت بالثالثه كلت مابيها مجال خلي اشوف منوو

الوووو
غيث .. غمضت واني اسمع الوو مالتها احس كهرباء تسري بجسمي احس نبضات گلبي هادئه وتستمع ويايه لصوتها وانفاسها
الووو منوو الوو
شونج امواجي
موج .. كمت من الفراش امواجي بس غيث يصيحلي هيج بس هذا موو صوته
انت منو
غيث .. نسيتي حبيبج
موج .. غيث شبيه صوتك شبيك عفيه كمت ارجف واحجي
غيث .. تدرين اول مشفتج وانتي نازله بدشداشه قصيره وكاعده تفركين بعيونج وتشيل بشعرج الي نازل منا ومنا من اول لحظه شفتج بيها دخلتي گلبي
موج .. كمت ابجي فدوه شبيك ليش هيج صوتك
غيث .. ومن عطتي وكلتي حرامي وحطيت ايدي على حلكج واشوف صدرج يصعد وينزل حسيت الي بداخل الصدر الي هذا راح املكه ويصير الي اموواجي اني احبج بجنون وكل لحظة مرت واحنا سوه جانت احلى لحظات عمري
موج .. كافي فدوه وكولي شبيك
غيث .. ابتسمت داموت حبيبتي اجيت اودعج
موج .. كعدت بالكاع ولطمت على وجهي انت شكعد تحجي شنو تموت لتعوفني غيث لتعوفني

غيث .. انتي مو عفتيني شون انطاج گلبج
موج .. احجي وابجي بهستريا فقدت والله عفتك لخاطرك ولخاطر بيتك مردتك تتأذه والله
غيث .. انتي لو تريدين خاطري متعوفيني تعرفين كولش زين سعادتي وراحتي بأيدج ليش ابتعدتي كتلج ابقي ومراح اخلي بشر يلمسج ابقي ومراح أذي بيتي بالعكس بوجودج راح استقر نفسياً وارتاح وراحتي تنعكس على بيتي شون نمتي واني بعيد عنج مرتاحه بدوني كوليلي
موج .. ميته والله ميته جسد بلا روح
غيث .. اني حبيتج والله شاهد عليه بنيه صافيه وردتج حلالي

موج .. بس كولي شبيك اروحلك فدووه
غيث .. حبيبي ادعيلي بالراحه تعبت من المرض وابريني الذمه وديري بالج على نفسج
موج .. كمت اعيط لتحجي هيج فدووه لك اموت وياك مااتحمل صح اني بعيده بس الي مصبرني اكول انت زين وعايش حياتك مرتاح وتشتم الهوا هذا الي مهون عليه
غيث .. تعبت گلبي بعد مااكدر احجي ديري بالج على نفسج واذا صبحت باجر اخابرج مصبحت بعد عذري عندي لان كتلج مره بس الموت يمنعني عنج وراح يمنعني يااول نبضه بقلبي
موج .. الوو الووو كمت ادك والطم يارب لتموته موتني اني بس بقي مااتحمل يصير بيه شى
زيد.. ركضت على الطبيب لان غيث تعب كولش وانطوه علاجات ومسكنات ودك التلفون اكيد هاي موج الوو
موج .. منو ويايه
اني زيد..
شونك ابوحسن ڤًدوه شبي غيث
وحجيت كولشي لموج وهي تبجي وصوتها يرجف وبقت تحجي وبعدين وسلمت وراحت

بقيت الليل كوله ابجي ومتخبله مره اصعد ومره انزل مااعرف الطم املخ وجهي تهسترت بعدين من وره البجي مالتي كعد ابني وبقيت حاضنته وابجي
ثبيج ماما ليش تبجين منو دربج
موج .. محد ضربني ماما الزمن مكعد يجوز مني يوميه مدمرني
منو زمن اني الوح ادربه بالعوده
موج .. حضنته حيل وهديته لحد منام وخليته بفراشه وراها توضيت وكعدت اقرا قران وابجي لحد مصاح الله اكبر صلاة الفجر لبست عبايتي وركضت لخاله ودكيت الباب
منووو
اني خاله افتحي الباب
الحجيه .. شبيج يمه ابنج بيه شى
موج .. خاله اريد اروح لبغداد واعوف علي يمج
الحجيه .. يمعزايه وين رايحه وليش
موج .. مو وقتها والله من ارجع احجيلج
الحجيه .. مااخليج ترحين وحدج تخبلتي وبهذا الطريق البعيد
موج .. لازم اروح خاله مضل وكت
الحجيه .. روحي حضري نفسج وادز وياج ابورقيه
موج .. لا اروح وحدي
الحجيه .. انجبي واسكتي ماكو وحدج ابورقيه وياج واريد اعرف شصاير حتى لو بس شويه
موج .. اكو شخص عزيز عليه ديعالج ولازم اروح فدوه خاله خليني اروح وبقي علي يمج
الحجيه .. اصبري اخابر مهدي
مهدي .. خير يمه مخابره الفجر بيج شى متخربطه
تعال هسه بدل وجيب غراضك اريد تودي ام علي لبغداد
مهدي .. ليش .. كروب قصص غزوان علي
الحجيه .. تعال هسه وبعدين اسأل
موج .. حطيت علي وامنته يم خاله وطلعنا اني ومهدي وهو طول الطريق ساكت واني وجهي على الجامه وابجي مدااكدر اسكت اتذكر سوالفه ضحكته غزله ااااااه ياغيث انتظرني جايتك ياانفاسي جايتك

مهدي .. لهاي الدرجه هذا الشخص عزيز عليج بحيث مكدرت تصبرين وتنزلين لبغداد رغم شكد اقترحنا عليج ترجعين كلتي ولا ارجع لبغداد بعمري
موج .. رجاءاً ابورقيه اني تعبانه ومااكدر احجي
عرفت هسه سبب رفضج للزواج
موج .. اترجاك اسكت
مهدي .. سكتت وبقيت اباوع عليها شون تتلوى مثل الطير المذبوح وتبجي مبطلت دموع خابرت واحد اسمه ابوحسن ودلانه المستشفى

ابورقيه روح واني بعدين اخابرك واكولك شوكت ارجع
مهدي .. خلي ابقى وياج
موج .. لا مااريد احد يشوفك ويايه حتى لحد يعرفك
مهدي .. رايح لبيت قريبي بالكاظميه اذا احتاجيتي شى خابريني
موج .. رحمه الله والديك
دخلت للمستشفى شفت زيد وابوه وامه كاعدين وكفت امه من شافتني ممصدكه عيونها واني بس الدموع تنزل بحيث مااشوف
ام زيد.. موج مدااصدك
موج .. خاله وينه اريد اشوفه
ابو زيد.. دخلي بنتي جوه
طبيت وجان زيد كاعد يمه وهو نايم جريت الكرسي وكعدت بصفه وبس ابجي زيد عافنه وطلع وبقيت وحدي ويااه لحظات صعبه اشوف اكثر انسان احبه ديموت
غيث .. دااشتم عطرها متأكد نايم واحسها يمي فتحت عيوني واني كوه اشوف وجان احس اكو احد يمي يلزم ايدي فتحتهم بصعوبه وسديتهم احس المرض تمكن مني وانتهيت

موج .. حبيبي غيوثي افتح عيونك اني يمك
غيث .. اااااااه مااريد افتح عيوني اخاف احلم والصوت الي كاعد اسمعه يطلع خيال
موج .. لا افتح عيونك ياعيوني انت افتحهم امواجك يمك
غيث .. فتحت ومصدكت لازمه ايدي من فرحتي بشوفتها نزلت دموعي
موج .. نمت على صدره وابجي لخاطري تحمل لتعوفني مااكدر اعيش بلياك والله
غيث .. موكتلج اخليج بنفسج تجيني
موج .. بس موبهاي الحاله ليش تأذيني

هسه اذا اموت مااهتم لان شفتج وهاي جانت اخر امنيه اليه
موج .. لا انت متموت دومك عرفتك قوي وجرئ ومراح تعوفني
غيث .. تعالي اريد اشمج تقربي وتقربت وشميت عطرها افييش ياريحه الجنه انتي ريحه الجنه الي تمنيت اشتمها واشتميتها
موج .. اشتاقيتلك
غيث .. شفتي حبيبج شصار بيه لوانتي موجوده مجان صار هذا حالي
موج .. راح تصير زين وترجع كمت جان يلزمني وين رايحه لتعوفيني ابقي اقلها لكم ساعه الجايه
موج .. مااروح حبيبي باقيه يمك هسه دقيقه واجي
غيث .. اكيد
وعيونك لتخاف مااعوفك
طلعت لزيد واهله اني اتبرعله
زيد.. منويكول تتطابق كلنا مطابقت
موج .. ميخالف نحاول مخسرانين شى
ابو زيد.. بنتي ميصير انتي هم عندج طفل برگبتج ميصير
نزلت ابوس ايد عمي فدووه عمو اخذوها مني حتى لو اثنينهم بس يعيش ابوس ايدك
ابو زيد.. كومي بنتي رحمه الله والديج اعرفج اصيله
خاله فدوه قنعيهم
ام زيد.. ياريت يابنتي ليش مااكيف ابني يصير زين
زيد.. مراح يقبل غيث
موج .. لتكوله اني بس استعجل
وبقيت اتوسل وافقوا ورحت اجريت التحاليل ورجعت اله بدون ميحس
غيث .. وين رحتي تأخرتي
موج .. مسحت دموعي جنت اسلم على اهلك
هسه انتي جايه الهم لو الي
بعدك تغار من كولشي
غيث .. اغار عليج من هذا الهوا الي يدخل الرئه مالتج تعالي يمي
اخاف احد يجي
غيث .. محد يجي واي واحد يحجي اطرده
موج .. على كيفك گلبي لتتعب هو كوه يحجي ويجر النفس حالته تبجي الصخر كل مااباوع عليه ابجي
غيث .. كافي اريد اشوف عيونج الحلوات احجيلي كولشي من يوم مرحتي لليوم
موج .. حيل احجي شصار ب٣ سنوات هيج تتعب تنتهي
غيث .. احجي گلبي اريد اسمع كولشي صار وياج وبديت احجي وكل مااسكت يكول كملي صح موويوم بيومه بس هواي شغلات ذكرتهم مره نضحك سوه ومره نبجي ومره نفرح ومره ننقهر مشاعر مختلفه محد دخل علينا غير مره وحده الطبيب فحصه وطلع حتى اهله مدخلوو اعرف حتى نبقى سوه
وصار الليل واني راسي على صدره وحاضني ونايم من اثر المسكنات ودخل زيد وخرت بهدوء منه ابتسم زيد اعذريني دخلت بس صار ساعات وكلت اكيد جاعت
موج .. لا مااشتهي
زيد.. تعالي بره نحجي
طلعنا بره الغرفه شوفي اختي الي سويتي بعمرنا مننساه وانتي والنعم منج بس متأكده من قرارج
موج .. شنو متأكده اكيد وبدون تردد واذا وحده تعبانه والثانيه زينه اخذوا الزينه المهم يعيش
زيد.. صفنت عليها صدوك بالمصايب يبين الحب الحقيقي زين لازم تاكلين حتى تتقوين

مااشي اكل شوكت تطلع النتيجه
زيد.. باجر الصبح
موج .. من رخصتك اريد ابقى يمه
زيد.. اكيد واني راح ابقى بره وشتحتاجين موجود
موج .. اكلت وخابرت خالتي طمنتها واطمنت على علي
ورجعت وهو نايم بقيت اتلمس بوجهه وعيوني وابجي بهدوء حتى مااحسسه حسيت اريد ادخله بضلوعي من كثر ممشتاقه اله وره ساعات كعد اني تعبت نمت على جتفه حسيت بيه يشم بشعري اني الربطه منازعته بس هو يشم براسي

غيث .. هسه غير تنزعين الربطه حتى اشم شعرج ولج مشتاقله
موج .. هههههههه حرام ميصير انزع كدامك
غيث .. والله احنا نضحك متنزعين الربطه حرام ونايمه على صدري
موج .. هههههه شسوي منتبهت من حلات روحي وخوفي عليك
غيث .. انتي زوجتي كدام الله واذا الله كتبلي عمر مباشره ازوجج واذا متت
حطيت ايدي على حلكه اششش اسكت مااريد اسمع فدوه
تعال تقربي مشتاقه لأنفاسج ااااااه شكد تعذبت بفركتج ااااااه
موج .. والله اني مثلك والله
بقى يتلمس بخدودي وكاام يغنيلي
واني اغني ويااه بهدوء وجان يسكت 😔

يتبع
انتظروني بعد ساعه بأحداث البارت الاخير الجزء الثاني
من بين العقل والطريق لنطوي صفحه من حياة ابطالنا
اخوكم غزوان علي