رواية بين العقل و الطريق الفصل الرابع والعشرون 24 - بقلم غزوان علي

بين العقل والطريق
للكاتب غزوان علي
البارت الرابع والعشرون

قال لها ..!!!
كيف لكي أن تقرأي كل ما أشعر به..
رغم أني لم أنطق بحرف.......؟؟؟
فأجابته ...
لان الذي ينبض في جسدك قلبي....💙

ود.. استلمت الورقه واني بحاله من الصدمه محجيت شى بس صافنه ودخلت للبيت والورقه بأيدي وفاتحه عيوني داحلم لو شنو كابوس يمكن لو ديشاقون ويايه رجعت رفعت الورقه وقريتها لا هذا واقع ورقه طلاكي من هشام نزلتها وامرد بيها بقوه اريد اتذكر اني شنو الي بدر مني وخلاه يطلكني جان بيتنا هوسه بس احس مدااسمع احد بابا يعيط وغيث وامي تدعي عليه البيت انگلب واني واكفه بنصهم جامده من الصدمه غمضت اريد اتذكر شنو الي صار وخلاه اطلكني رجعت لذاكرتي لأخر مره التقينا بيها

اجاني جنت بالغرفه مالتي كاعده اتصفح انترنيت ودك الباب تفضل
هشام ... الحلوه مالتي شدتسوي
ود.. ركضت وحضنته هشومي حبيبي اشتاقيت
هشام ... مًوبكدي گلبي تعالي لج شو انتي حليانه
ود.. ههههههه تضحك عليه وين الحلا بالوضوع لابسه اسود وشعري هوسه ولا مكياج ولا شى چني فزاعه
هشام ... احلى فزاعه شوو تعااي وجان اشيلها
ود.. ههههههههه لك نزلني عيب صوت الضحك مالتي واصل لأهلي شيكولون
هشام ... ماا زوجتي وحبيبتي ومشتاق الها بكيفي
ود.. ههههههه لابداعتي نزلتي

هشام ... يله نزلتج وحصرتها بالحايط وابوس بيها
ود.. هشومي اكعد راحه تره احنا مو بيتنا
هشام ... ولج مشتاق حسي بيه
ود.. ههههههه اني هم مشتاقه والله انت صوجك ذاك اليوم كتلك تعال اخذني ومن شفت الجهال تبجي وعدتهم تبقيني هاي الايام كلها انت عميت على نفسك
هشام ... شسوي انقهرت عليهم خطيه لازميج عبالك امهم
ود.. لزمت وجهه وابوس بخدوده يمه من فدوه للحنين مالتي

هشام ... تبوسني وتخليني انثار وراها لا هشومي للتتقرب لتتحارش عيب وعيب اكعدي راحه تره لو مو اهلج لو الدوله كلها هنا هسه اغتصبج
ود.. ههههههههههه تموت ضحك من تكول اغتصبج
هشام ... بله بربج شوني من اغتصب
ود.. هههههههههه طالعه عينك والله
هشام ... اوف لوتعرفين شكد احبج
ود.. تعال يله احجيلي شسويت اليوم بالدوام وطلاب المرحله الاولى هااا عيونك تعرفني
هشام ... هو الي عنده ود يباوع لذني
ود.. اي قشمرني واكل بعقلي حلاوه
هشام ... انتي الحلاوه شوتعاي اكلج
ود.. ههههههههه كافي بداعتي اكعد خلي نسولف
وكعدنا سوالف وضحك والوضع جداً عادي
هشام ... دودي
ود.. هااا حبيبي
هشام ... شوفي بيش الساعه
ود.. انداريت ساعه ١٢ الا ربع ليش
هشام ... هسه مال شنو بهذا الوقت
ود.. صفنت اي عرفت مال شنو 
هشام ... شنووو
ود.. مال بيتزا حاره وبيها جبن هوايه وقوطيه كوكا كولا مجرشه اويلي جعت
هشام ... عطت بله انتي من كل عقلج اكولج مال شنو تكوليلي بيتزا وكوكا صدوك النسوان مومال عين واغاتي ورومانسيه اروح اني
ود.. تعال ياعيني شبيك كعد اشاقه شبيك گلبتها صدوك
هشام ... رايح .. كروب قصص غزوان علي
ود.. هشام هشام ركضت وراه عافني وطلع نزلت للشارع وراه شخط السياره وطلع بله اني شحجيت والله جنت اشاقه انقهرت حيل اخابر يدك وميجاوب كلت على شنو بعد ولا اخابر فوكاها قابل سبيته غلطت عليه دمعت عيوني وشمرت التلفون والدمعه بعيوني اول تالي يزعل على هيج شى سخيف وره اكثر من نص ساعه ١٢ ونص بليل جان تنفتح باب الغرفه

هشام ... شوف شجبت لحبيبي
ود.. طفرت من مكاني من شفته كبالي عبالك الله ذب عليه كل البجي ابجي واحجي ليش هيج تسوي وتعوفني وتطلع
هشام ... هههههههه يمه من فدوه للدموع الحلوه ولج اني موكايل متبجين مااتحمل دموعج
ود.. شوف نفسك شسويت والله جنت اشاقه
هشام ... هههههههه حضنتها ام دميعه دشوفي شجبت لحبيبي ..
ود.. باوعت بيتزا بيده وعلاكه بيها قوطيتين كوكا ضحكت بله بربك طالع ١٢ الا ربع بليل تروح تجيب بيتزا
هشام ... لو ساعه ٣ الفجر وحبيبي اشتهى اكل افتح المطاعم لعيونه
ود.. حضنته حيل وبسته اوف شكد احب حنيتك وراها ضربته على صدره
هشام ... ااخ ليش ليش شنو هاي من حنينه ورومانسيه گلبتي محمد على كلاي
ود.. تستاهل لان هبطتني
هشام ... ههههههه ردت العب عليج وطول مااني اعيط حاصرتني الضحكه ومن تتصلين اموت ضحك لان اتخيل منظرج انتي من كل عقلج ازعل من گلبي بس گلت صار فتره ماكو اكشن بحياتنه بس حضن وبوس تغيير
ود.. حضنته يارب مااريد اكشن اريد بس بوس وحضن

هشام ... وبس متأكده
ود.. ههههههههه موكتلك طالعه عينك يله تعال ناكل ريحة البيتزا زرفت خشمي
وكعدنا ناكل ونضحك لل٢ وديطلع جلبت بيه بداعتي بات اليوم هنا
هشام ... تره والله استحي ابات على عيني ذيج الايام من بقيت
ود.. بداعتي
هشام ... من تتوسلين گلبي ميتحمل يله باقي
ود.. بقيت بحضنه الليل كله ميقبل حتى اتحرك شويه ونام صفنت عليه يارب شكد كمت احبه احفظه اليه مااتحمل بدونه صار هو كل حياتي
هشام ... شو صافنه بوجهي هيج حلو
ود.. كاعد حبيبي
هشام ... حسيت من رفعتي راسج وعفتج كلت خلي اشوف حبيبي شيسوي بس طولتي الصفنه
ود.. تدري هشام اني كمت اموت عليك
هشام ... نامي ود وستري على نفسج
ود.. هههههههه شبيك والله دااحجي
هشام ... واني هم داحجي صدوك من تحجين هيج وبهدوء وتتموعين وبحضني والفجر والجو رومانسي ولج بنت الاوادم طابوكه خوما طابوكه
ود.. هههههههه اروح فدوه للطابوكه وابوس برگبته وبصدره بهدوء
هشام ... لا والله انتي ناويتها ومشتهيه ومستحيه شوو تعالي بعد لو موو اهلج
ود.. لا حباب سكتت والله
هشام ... فات الاوان
ود.. ههههههههه وجانت ليله حب ورومانسيه حسيت روحي طفله واني بحضنه وكعد الصبح وكال اروح للبيت اسبح وابدل واروح للدوام استحي اسبح عدكم هسه يعرفون مسوين جريمه

ود.. هههههههههه براحتك گلبي بس انتبه على نفسك وباسني من راسي وراح ولحد الظهر اتصل مرتين ويتغزل وراها ادك يشيله ويكول عندي شغل ويسده وجهه ميطخه السيف كلت يجوز ضغط الشغل وبعدها كام ميجاوبني وگلبي نار اتصلت على بلسم تكولي زين وخابرنا بايت يم صديقه  زين شبيه لحد موصلتني ورقة الطلاك

رجعت صحيت على عياط اهلي واسمع بابا يكول لغتو
ابو زيد.. هي هيته يتزوج ويطلك بكيفه شنو ماعدها اهل طالعه من زرف الحايط غير يجي يبلغ يكول هيج ماعنده اخلاق وشنو سبب الطلاك اهله ماعدهم اصول معلموه بنات الناس مو لعبه

غيث .. اله انعل والديه ليش هيج يسوي ماعنده احترام النا جاي ودز الورقه وعبالك متزوجها من الشارع اذا مااطيح حظه
ود.. مشيت وصعدت لغرفتي يصيحوني مااجاوب او مااكدر اجاوب اسمعهم بس مااكدر انطق الصدمه فوك احتمالي طبيت للغرفه تمددت بجربايتي وغطيت راسي وغمضت واردد نامي ود هذا كابوس راح تنامين وتكعدين تلكين نفسج بحضن هشام
نامي نامي

مااعرف شكد بقيت هيج مغمضه بس منايمه ومن فتحت عيني لكيت الوضع كما هو عليه الي عرفته دازين اهلي عليه حتى يعرفون السبب واليوم العصر يجي اني فقدت النطق الكل يكعد يمي يردون احجي ماكو ابجي ماكو بس صافنه بوجهم اني اريد احجي اريد اصرخ بس مديطلع شى

اسيل .. فدوه ود احجي ولو كلمه ولج راح تموتينا امج فوك ضيمها انتي وهسه بس تبجي وغتو نار يريد يتعارك ويه هشام وعمي كوه لازمه يخاف يسوي كارثه مثل مسوه برجل ندى وحتى شهد من عرفت الي صار بيج انقهرت خطيه بس كالت تعرف بيه مابي حيل انزل وبس اصير زينه احجي وياها
احجي ياعيني عيطي صيحي اغلطي المهم احجي
غيث .. هااا اسيل بشري
اسيل .. على نفس الوضع لااكل ولا شرب ولا نطق هاي اذا تبقى يوم لاخ توكع متتحمل
غيث .. خلي يجي هذا الساقط العصر ونفتهم منه شكوو

هشام ... السلام عليكم
ابو زيد.. اكعد وفهمنا
غيث .. وفوكاها بارد ومداير بال يعني هيج بنات الناس عندك لعبه
هشام ... رجاءاً على كيفك وخلي نتفاهم وهو كلشي قسمه ونصيب
ابو زيد.. شصار وشون اطلك بدون مترجع النا وتبلغنا
هشام ... ياعمي
ابو زيد.. اني مو عمك ولا يشرفني اكون عم لواحد مثلك
هشام ... ياابو زيد اني مقصرت ويه بتكم وصار سنتين وياها وسألها بس اطفال مكعد يصير عدها واني من حقي اصير اب
غيث .. اي من حقك بس مو بهاي الطريقة ومنو يكول اختي متخلف
هشام ... اني وديتها للطبيبه صح كالت ماعدها اي مانع يمنع هذا الشى وانتظرت وشهر يجر شهر وماكو
ابو زيد.. يعني انت من كل عقلك اطلك بنتي علمود هذا السبب هي كلها سنتين لو ١٠ جان شسويت
هشام ... ممجبور ابقى ١٠ بقيت سنتين كافي ومصار لازم اجرب اتزوج غيرها واخلف
غيث .. يعني انت صدوك استاذ جامعي ومثقف من امداها الشهاده الي اخذتها وخلتك هيج انسان همجي متخلف تفكر وتعتبر المره عباره عن حيوانه تخلفلك اطفال ومن متخلف اتذبها
هشام ... رجاءاً لتتجاوز اني متجاوزت ولا تعديت حقي ومارسته وبنتكم يمكم وحقوقها كامل توصل الها والي تريدوه حاظر ومثل مدخلنا بالمعروف نطلع بالمعروف

ابو زيد.. انت مبقيت معروف بينا والحمدلله بنتي مگضت حياتها ويه واحد فاشل مثلك وحقوقها منريدها الك بتنا غاليه علينا وفلوس الدنيا كلها متعوض الي سويته بيها وامشي اطلع بره لابارك الله بيك ولا بأهلك الي معرفوا يربوك
ليش بابا مخليتني اكتله هذا اكمشه هسه وادمي واخلي عبره لكل رجال يفكر مثله
ابو زيد.. لتوصخ ايدك بيه هذا سافل بس تعال كولي ود شون نفهمها سبب الطلاك راح تنجرح
غيث.. هي اصلاً متحجي ومتاكل ونجي نزيد عليها
ابو زيد.. لازم تعرف احجي لمرتك وخلي هي تفهمها بطريقتها
غيث .. ماشي

هشام ... طلعت من بيتهم والطريق كله اتذكر الي صار مااكدر ارجع للبيت مخنوك اسوق وشفت نفسي قريب نهر دجله يم ابو نؤاس طبكت السياره ونزلت وكعدت كبال النهر وصافن وادخن واتذكر الي صار
رجعت بذاكرتي لقبل ١٥يوم

ام هشام ... وتالي عيني راح نبقى هيج
هشام ... يمه ابوس ايدج كافي مو مرمرتي حياتي صار اكثر من شهر من راحت ود وانتي يومياً كل مااطب واطلع حجت زوجتك كال الجهال تره والله مليت كافي تدرين مااريد ارجعها لهنا من وراج من وره النك مالتج
ام هشام ... فوكاها فوك مااخاف على مصلحتك
ام هشام ... يوم اني موصغير موطفل رحمه لذاك الاب الطيب تره الي كدامج رجال ومتزوج واعرف مصلحتي ومرتاح شتريدين مني
ام هشام ... اريد تاخذها للطبيب تراجع
هشام ... مواخذتها مرتين وكالو مابيها شى وانتي جنتي ويانه
ام هشام ... اكو دكتوره بالكاظميه كالو عليها كلش زينه نروح الها
هشام ... شنو الفايده واني ممحلل
ام هشام ... وعلى شنو تحلل انت مثل الورد
هشام ... ذيج المره فشلتي ود من كالت لازم اثنينا نحلل واكلتيها وشربتها ابني مابي شى ابني رجال شو انتي متستحين شون اطلبين يحلل تكول عبالك البنيه كفرت وتعرفين كلش زين لازم اثنينا انحلل وحتى الدكتوره كالت لازم يحلل الزوج وكتيلها بس شوفي جنتي بالاول وبعدين نحلل لأبني واجيبه الج وطفرتي ومقبلتي نحلل وهم ود خطيه سكتت وكالت منريد مشاكل المهم اني مابيه شى يجوز حجي امك صح مابيك شى

ام هشام ... اي اعرفك مابيك شى مثل الورد
هشام ... شنو انتي دكتوره لو محلله لو تعلمين بالغيب ياامي ميصير تره والله انتي كاعد تظلمين البنيه واني لحد الان ساكت وماانطي بيج اكول امي وحرام اكون عاق الوالدين بس بهاي تصرفاتج راح تخليني اخذ ود واطلع من البيت واخذلي مشتمل واكعد واسكت

ام هشام ... اي هيج كول هي هاي خطتها توكع بينا حتى اطلعها بيت وحدها
هشام ... اوف ربي خلصني موو متت اروح اطلع احسن
ام هشام ... اوكف وين رايحلها مو
هشام ... غير مرتي
ام هشام ... هي وينها المسعده شو صار اكثر من شهر عايفه بيتها والله نسوان تالي وكت كل متصير مصيبه عد اهلها تاخذلها شهر شهرين
هشام ... اني مبقيها هناك لحد مااشوف صرفه بالنك مالتج
ام هشام ... شوف هشام اتجيب مرتك ونروح لهاي الطبيبه واذا كالت متخلف تتزوج وغصب عنك  لا والله اغضب عليك ليوم الدين

هشام ... ههههههه والله ياامي مرات عندج سوالف تضحك اني اتزوجها عليها مستحيل لو موجهال لتعبين نفسج
ام هشام ... خلي متسمع كلامي وشوف والله مااحجي وياك العمر كله . بيج قصص غزوان علي
هشام ... خلي اطلع قبل مااحرك البيت
وبقت امي يومياً نفس الموضوع يوم بهدوء يوم تهديد يوم عركه كل الطرق استخدمت وياها ومافاد حتى ابويه ادخل ومافاد قافله اله نروح للطبيبه هاي كلت خلي اشرط عليها
شوفي يوم راح اجيب ود ونروح للطبيبه الي انتي تريديها بس اذا ود مابيها شى هذا الموضوع مينفتح ابد لو مو تزعلين لو مو تغضبين عليه اذا انفتح والله لحظه ماابقى بهذا البيت
ام هشام ... تهدد

هشام ... اي اهدد وهاي كدام ابويه وبناتج اذا انفتح الموضوع بعد والبنيه مابيها شى لحظه ماابقى بالبيت
ابو هشام ... حقك ابني
ام هشام ... فوكاها تطبك وياه
ابو هشام ... اي كافي مو لحيتي هوايه طيحتي حظهم والله عنده خلك ابنج ومتحمل لوانتي امي ثاني يوم اعوفلج البيت
بلسم ... ههههههه اخذني وياك بابا موتعوفني
ام هشام ... انجبي انت واسكتي
بلسم .. سكتت
ام هشام ... الله كريم شوكت تجيبها
هشام ... نهايه الاسبوع يله طالع واخاف اتأخر ليضل بالكم

وطلعت ورحتلها وگضيت ليله وياها تجنن وره منامت ود وبعد الضحك والمداعبه والممارسه وياها صفنت كلت هم نفس كل مره خطيه بس هي تجكك وتحلل وتتعب واني مااحلل خلي اروح احلل وحتى ننهي الموضوع عندي صديق عنده مختبر بالحارثيه وخوش مختبر وجديد رحت حللت وهي تتصل ومتدري مكتلها كلت خلي اسويلها مفاجأه لان اعرف بيها تتمنى احلل بس تستحي تحجي وثاني يوم رحت للتحليل

صديق هشام ... والله مااعرف شأكول انت اخويه وصديق ومااكدر اكذب عليك وهو كلشي رزق
هشام ... شكو يمعود راح اموت هههههه
النتيجه طلعت والصراحه مؤسفه
هشام ... احجي شكوو
النسبه مالتك صفر ميصير عندك اطفال
هشام ... هههههه لا بطل شقه مو وكتك
صديق هشام ..كولشي رزق ولازم نرضى بيه

انت شكعد تحجي يعني اني عقيم
مع الاسف  الْحٍمَدلله على كولشي خلي ايمانك قوي بربك والطب اطور يجوز بمرور السنين تصير معجزه هوايه حالات مثلك وبقدره رب العالمين صارت
هشام ... انهاريت واعيط ولك شون تصير واني نسبتي صفر عيد التحليل لازم اكو غلط
والله اني اشتغلت التحليل بأيدي واكثر من مره تعرف انت صديقي وغالي عليه لهذا اشتغلته بأيدي على كيفك هشام كول ياالله منتهت الدنيا

طلعت منه واني مضروب على راسي وامشي وكمت ابجي صعب الرجال يعرف هو ميخلف والنسل مالته انكطع وشنو نظره العالم عليه والمصيبه عدهم اذا ميخلف معناه مو رجال بينما الرجوله وحد والخلفه شى ثاني وعوف الناس عوف الاطفال ود شون بيها شأكول الها يعني احرمها من الامومه احرمها العمر كله من كلمه ماما اتوجهت للامام الكاظم دخلت بحضرته ابجي مثل النسوان حسيت بلحظه خسرت كولشي حلمي اكون اب ويصير طفل من الانسانه الي احبها وخسرت حبيبتي لان يجوز من تعرف تعوفني وحتى اذا تحملت اول مده شفقه منها على وضعي راح يجي يوم وتمل وتنقهر ويجوز تعيرني بقيت ابجي واصلي الدنيا نهدت بيه شفتها ظلمه ومن الخنكه مكدرت اطلع وبقيت بالامام ليله كامله بس ابجي واصلي واقرا قران

خابرت اهلي كتلهم ابات يم ولد صاحبي وهي تتصل ومااجاوبها مااكدر احجي بس اسمع صوتها راح ابجي ضعيف كدامها ومن كثر ممحتاج الها اخاف احجيلها الي كعد يصير بيه لهذا قررت مااحجي اسكت ومااجاوبها

بقيت يوم كامل بالامام وبعدها طلعت اتمشى ساعات وافكر شنو الحل شأسوي مااريد اظلمها اني اعشقها وبنفس الوقت مااتحمل تبقى وبعد مده تعيرني اموت مااتحمل ومر اليوم الثاني وهم مرجعت للبيت كعدت  افكر قررت اعوفها حتى بدون ماابرر الها ولا اخذ رأيها الي كاعد اسوي لمصلحتها يجوز اول ايام تتعب بس بعدين تدعيلي لان مراح تخلص حياتها ويه رجال عقيم وتنحرم من الاطفال واكيد راح اتعب واعصابي تتعب واذب حرگتي بيها لازم اجنبها كل هاي الاذيه

وخابرت صديقي يشوفلي محامي والتقيت بيه وانطيته فلوس ضعف الي راده وكتله خلال يومين اريد يكمل الطلاك وطلكتها بعد ٣ ايام واني ابجي دم عليها راحت حبيبتي واخذت عمري وروحي وحياتي وياها وبدون مااودعها لان اذا اشوفها مااتحمل يمكن ابقى ابجي بحضنها ورجعت من المحكمه فاقد العقل واول مدخلت استلمتني امي

ام هشام ... هااا خوش والله صار ٥ ايام ماكو حجزتلك يم الدكتوره وانت طفرت شنو طفله كدامك وتقشمرها
هشام ... كمت اعيط فقدت كافي اسكتي ارحميني هااج وشمرت ورقه الطلاك ورقه التحليل يم رجلها هاااج ابنج عقيم ميخلف ارتاحي موتمشين وتصيحين ابني رجال ومثل الورد هاج شوفي نسبتي صفر

ام هشام ... عزه الي عزاني شكعد تحجي
هشام ... احجي بعياط رجيت البيت ونار ومااشوف كدامي فاقد وهااج طلكتها ارتاحيتي طلكت ود حتى ابقى بدون مره وجهال واكابلج واكعد ارتاحي بعد ماكو لا ود ولا جهال
ام هشام ... يمه فدوه اهده
هشام ... شهده داكولج مااخلف وكمت اكسر شكو شى كدامي
صفا وبلسم اجوي يركضون فدوه هشام على كيفك حبيبي
هشام ... ولكم عوفوني خلوني متعرفون النار الي بگلبي
بلسم .. ابجي واحجي ود شعليها خطيه شنو ذنبها اطلكها متعرف بيها شكد تحبك
هشام ... حتى تعيش وحتى تصير ام اسمعوا كلكم اذا احد حجه كدامها وكالها سبب الطلاك الحقيقي والي خلقكم ادفنه بأيدي كان من يكون

صفا.. لعد شتكول الها والله حرام متعرف
هشام ... اسكتوو مااريد اسمع صوت وحده بيكم كتلكم اذا عرفت متخلصون مني
وصعدت للغرفه اكسر واضرب بكل مكان

ام هشام ... كعدت بالكاع الطم على حظ ابني
صفا.. كافي يوم عفيه لتتخربطين كافي
ام هشام ... شون كافي واخوكم ضاع لا مره ولا جهال وفوكاها تخبل علينا انتو عبالكم راح يهدا ويسكت راح يبقى العمر كله متخبل يارب ساعد ابني وبرد ناره شون بيه وين انطي وجهي خابرولي ابوكم خلي يجي ابني راح يضيع مني ولكم يله

هشام ... كعدت بالكاع بعد متعبت وكسرت الدنيا واجه ابويه حضنته وابجي
ابو هشام ... كافي ابني كله رزق ربك وساعه من ساعه فرج بس انت غلطت اكو واحد يطلك مرته بهذا الشكل وفوكاها بدون متبلغها تره هي هم من حقها تعرف

هشام ... شتعرف بابا تعرف رجلها مابيه خير لو تعرف مراح تصير ام طول حياتها خليها هيج تتوقع الاذيه مني احسن مااشوفها عايشه ويايه وتستخطيتي مااتحمل هذا الشعور
ابو هشام ... واهلها شراح تكول الهم عيب خوش ناس ويقدروك ويحبوك حتى مبلغتهم راح اطلك بتهم وحتى اني مااكدر ابلغهم بيا عين متكولي وانت صخمت بتهم
هشام ... اني اعرف شحجي وياهم

رحت الهم وكذبت عليهم حتى محد يحس بالسبب مااريد احد ينظرلي بشفقه
انتبهت على الوقت صارت ساعه ١١ بليل واني بعدني على ابو نؤاس خلي اكوم اروح اهلي حاركين التلفون حرك

دخلت للبيت بدون مااحجي مالي خلك لأحد
ام هشام ... هااحبيبي الله يساعدك شسويت
هشام ... على شنوو
ام هشام ... علمود ود محجي وياها مفهمتها بلكت ترضى ترجع الك
هشام ... باوعت على امي يعني لو هي الي طالعه عقيم تقبلين ابقى عليها ومااتزوج وابقى طول حياتي بدون اطفال انتي شفتي النتيجه كدام عينج البنيه مابيها شى وصار سنتين اكلتي راسها اكل علمود الاطفال واتهميها كدام الرايح والجاي متخلف وهسه من شفتي ابنج السبب تريديها ترجع ليش هي مو بشر موو من حقها تصير ام لو حتى هاي لازم تنحرم منها

ام هشام ... ياابني غير جنت ادور مصلحتك ليش هيج كارهني لتنسى اني امك وانت بعزيه روحي وردت افرح بخلفتك مجان قصدي أذيك
هشام ... افرحي هسه بح لا خلفه ولا مره وعوفوني بحالي ولحد يدك الباب عليه باجر مااداوم

صعدت اسحل بروحي سحل والدنيا طالعه من عيني شمرت نفسي على الجربايه سحبت المخده مالتها واشمها بعده عطرها بيها مشتاقلج ود مشتاق لدلعج وحبج وضحكتج شون اكدر اعيش بدونج شون اكدر كوليلي لتضوجين مني حبيبتي الي سويته لمصلحتج

صفا .. نبقى هيج ساكتين واحنا نشوف اخونا ديموت موت بطئ هذا يعشقها لود وميكدر بدونها يجوز هسه ساكت بعد مده ميتحمل
بلسم .. خوو اذا سوتها رد كرامه واتزوجت هذا يموت والله
ام هشام ... شبيدي عليه مشفتو شون هدد وكال الي يكول الها ادفنه تعرفوه هسه هو متخبل ومطايق احد وابوكم كال عوفوه هاي الفتره لحد يضغط عليه لحد متستقر حالته الله يعينك ياوليدي منين جانتلك هااي
بلسم .. والله يايمه هاي حوبة ود هلكت ماتمشين وتعيرين بيها الله طلعها بهشام حتى يحرك گلبج مثل محرگتي گلبها واكثر من مره تهميها عاقر
شمرت النعال عليه امي وتعيط
حقيره اسكتي لااكص لسانج صايره متحترمين خلي يجي ابوج اله اخلي يربيج من جديد
بلسم.. خلي اصعد اقرا عندي امتحان اذا ابقى مااسكت اعرف بروحي
صفا.. اخذيني وياج

اسيل .. غيث شون فدوه
غيث .. شبيج اسوله
اسيل .. هاي ود نفس الوضع وكعدت فهمتها كولشي وخاله ويايه وشوي شوي بس باوعت علينا ودارت وجهه ولا كلمه زين هسه لتحجي بس اقلها خلي تاكل تشرب البنيه راح تموت ومابيدينا شى نسوي
غيث .. رايح الها
طبيت عليها للغرفه كعدت گبالها
تدرين ود اني مشتاق الها دارت وجهه بس نظرتلي
اي مشتاق الها وكعدت ايام ويه نفسي افكر ليش عافتني لو باقيه ويايه جان هواي امور تغيرت تدرين انتي هسه مثلي بس الفرق انتي تعرفين هو وين بس اني مااعرف

موكلشي بالحياه نريده نحصله اكو شغلات نموت حتى نحصلها ومتصير لو شكد منتعب نفسنا واكو شغلات مومهمه تصير بسهوله وتدخل حياتنا الدنيا متوكف على واحد بس الي يوكف هو هذا واشرت على الگلب
هذا يوكف يحس يوكف يحب بعد يرفض اي مشاعر بس ينبض
اعرف بيج متأذيه لدرجه الصمت وهاي اعلى درجات الالم تعالي كومي سحبتها من ايدها سحبتها مني بهدوء رجعتهم
ونزلت راسها يعني قصدها مااروح

شلتها بدون اي اعتراض منها هي اصلاً خاويه لان من قله الاكل والمي منتهيه
نزلت وشايلها .. كروب قصص غزوان علي
ام زيد.. وين ماخذها ابني بيها شى اجي وياك
مابيها ماما ليضل بالكم تعالي اسيل جيبي جبه اشمريها عليها لان مومال تبدلين الها
اسيل .. هاك گلبي اجي وياك
غيث .. لا ليضل بالكم ساعه ونرجع
شايلها مثل الطفله وهي ساكته ولا تنطق اخذتها بليل وفتحت كل الجام مال السياره جان شهر ١٢ والجو حلوو وبارد وهي غمضت عيونها وتتنفس
وصلنا لجسر ذو الطابقين وشتا وليل وفارغ بالطابق الفوك وكفت السياره كتلها انزلي على كيف مااكدر اشيلج اخاف يجي واحد وعباله صاحبتي واتحارش بيها يله ايدج انطينياها يله حبيبتي باوعت عليه ومدت ايدها ومشت بخطوات ثگيله وكفتها قريب حافه الجسر

شوفي ود لحظه من اللحظات الي عشتها ويه موج هي هاي بأن افرغ الطاقه المكبوته الي بيه اعيط بكل قوتي حتى ارتاح اريدج هسه تعيطين تحجين تصرخين المهم احجي اني سويت هيج وصدكيني راح ترتاحين
بقت تباوع على النهر والهوا بارد ثلج وتتنفس وتغمض عيونها محجت تقربت منها وهمست بأذنها اعرف اختي كعد تعاني مثل مااني عانيت من حب موج
همست بأذنها احجي هشام كبالج هشام خذلج كوليله ليش مواني احبك
وجان تعيط بكل قوتها ولا عبالك هاي التعبانه ومتكدر تمشي تحجي بعياط وبقوه وجهه للنهر وتبجي ابتعدت منها حتى تاخذ راحتها
ود.. لك ليش مو حبيتك ليش تجازيني هيج ليش عفتني مفكرت بيه مكلت ود حبيبتي شون تنام بعيده عني هشام حرام عليك لتموتني مااستاهل الي سويته اذا انت الك نيه تتركني ليش خليتني احبك هاي تاليتها مو كتلي احبج موكتلي مااعيش بدونج موكتلي  انتي سبب سعادتي جذاب  اطلع من گلبي الله لايوفقك الله ياخذ حقي منك لك اكرهك

غيث .. كافي گلبي انتهيتي الحبال الصوتيه مالتج راح تتكطع
ود.. غتو اذاني والله احبه ليش عافني والله اني مابيه شى والدكتوره اكدت اكثر من مره جان وداني مره مرتين ليش يعاقبني على شى موبيدي بيد الله ليش
غيث .. حضنتها كافي بجي والله ميستاهل دمعه منج
ود.. بس لو كايلي مواجهني مااستاهل منه هيج غتو قبل ايام نام هنا نام على صدري ويضحك ويتغزل خلال ٥ ايام يتبدل يعني كلامه حبه كله جذب اذا جذب ليش خلاني احبه شنو ذنبي يدمرني هيج اخذ گلبي وروحي وعافني ميته شون اعيش كولي

غيث .. تعيشين گلبي  صح متنسين ويبقى يحفر بگلبج الي سواه بس تعيشين بس اريدج تكونين قويه انتي اختي وده حبيبتي دلوعه البيت ً وضحكته لازم ترجعين اقوى من گبل
ود.. موت الضحكه بداخلي موتني غتوو
غيث .. لا اخت زيد وغيث متموت بطله وسباعيه وترجع بقوه وتثبت اله ولكل احد يحجي عليها هي قويه ومحد يكدر يكسرها تعالي يله امشي ولج ثلجت حتى بطني لوتني بله شجاني وجيت هنا بهاي الساعه والبرد لو موديج بالحمام وتعيطين هم الصدى اقوى وهم ادفى

ود.. ههههه والله مالي خلك اضحك
غيث .. اضحكي ياروح اخوج تهون حبيبتي المهم صحتج يله امشينا اخذلج لفه تاكلين واجيبلج كوكا الي تحبيها
ود.. مااكدر مااشتهي
غيث .. اني هم جوعان هذا البرد يخلي الواحد يتعشى ٣ مرات لخاطري حتى اكل وياج
ود.. والله مااكدر
غيث .. لخاطر غتو حبيبج يله لتكسرين بواهسي واخذتها اكلت شوي المهم دخل شى بمعدتها وشربتها مي وعصير شوي صارت احسن وصلنا للبيت كعد تنزل

لا عيني اختي البرنسيسه مثل مااخذتها شايلها ارجع شايلها كم دوده عندي هي دوده وحده
ود.. هههههه هم رجع يصيح دوده
غيث .. دوده واحلى دوده بالدنيا يله هوبا وشلتها ودخلت للبيت ولكيت الكل داخل انذار ابويه وحتى زيد جاي واسيل وشهد كلها كاعد طبيت شايلها هاكم صايره شثكلها ذكرونا على العيد نذبحها
ود.. لتخافون اني زينه
ام زيد.. اللهم صلِ على محمد وال محمد نطقت يمه بنيتي كسرتي گلبي
والكل حضني ومقهورين وحاولت اطمنهم عليه خطيه كافي الي همه بيه
وصعدت والكل ويايه تكول زفه باسوني وطلعوا حتى ارتاح بس شرتاح والگلب نار صحت غتوو
غيث .. حبيبي أمريني
ود.. تعال وحضنته حيل وبسته شكراً يااحلى اخ بالدنيا
غيث .. امشي لج بينا شكر  شعندي غيرج كومي ود وصيري زينه لخاطري ولخاطر بابا وماما والكل تره مابينه حيل صدمه جديده تره الكل تعبان گلبي وخايفين عليج
ود.. لتخاف احاول بمرور الايام اصير اقوى
غيث .. ان شاء الله وبست راسها وطلعت
ود.. رجعت نمت واول مره انام من ٣ ايام
وكعدت الصبح افضل بس نفسياً صفر بس لازم ابين قويه لخاطر اهلي

موج .. قررت اتركهم واروح بعد مابيها مجال مااكدر ابقى بعد كل الي صار بس بنفس الوقت خايفة من الي راح يصير اني مو كد الوحوش الي بره اذا اني بنص ناس خيره وطلع واحد بيهم سگط اذا اوگع بناس كلهم موزينين شون الي عشته لمده ٧ ايام بالشارع والخوف والرهبه خلوني متردده ذيج المره الله وحضاني بأم منتظر هلمره شون گلت خليني يومين بين مااشوف وين اروح جنت انظف البيت رجعت صحتي احسن وخاله فاطمه خطيه متطلع علمودي واني انظف عتبه باب الصاله الي يطل على طرمه صغيره وباب الشارع رفعت راسي شفت المشتمل الي گبال بيتهم مكتوب عليه الدار للبيع صفنت عليه هو صغير ومن بره بس طابوك ياترى شكد سعره دخلت

اكولج خاله هذا المشتمل الي مقابيلكم ديبيعوه
الحجيه .. اي وشبيه
موج .. اريد اشوف شكد سعره
الحجيه .. شسوين بيه
موج .. اشتري خاله
الحجيه .. انتي صدوك تحجين يعني بعدج مصره اتعوفيني
موج .. اروحلج فدوه خاله خابري ابو رقيه خلي يجي
الحجيه .. مااخابره لان مااخليج اطلعين من البيت
وبعد ساعه من التوسل قبلت تتصل واجه مهدي وسلمت عليه
شوف ابو رقيه اريدك تساعدني
مهدي .. عيوني الج ام علاوي
موج .. المشتمل المقابيلنا للبيع شوفلي شكد سعره
مهدي .. بس هذا صغير ٤٥ متر ومكامل شسوين بيه
موج .. كافي ونعمه من الله اكعد بيه اني وابني
مهدي .. لا اكيد تخبلتي
موج .. شنو
مهدي .. العفو بس تفاجأت
الحجيه .. ولك يمه ريگي نشف وياها ماتقبل موتتني تريد تكعد وحدها
موج .. اسمعوني زين انتم غاليين عليه والله شاهد واعتبركم اهلي ولو احمدالله العمر كله عليكم قليل لان الي سويتوه اليه اهلي مسوه بس لازم استقر الى متى ابقى متشرده اني وابني
الحجيه .. لا زعلتيني شنو مشرده مستعده حتى البيت اسجله بأسمج
موج .. من فدوه اروحلج خاله ولحنيتج الله يشهد اعتبرج امي بس انتي هم فهميني لازم أبني حياتي وعلي ديكبر ولازم من يكبر يلكه الي يريحه واكون كد مسؤوليه تربيته
مهدي .. زين انتي عندج فلوس شراء البيت
موج .. رحت جبت الذهب هاك اخذ قيمه وشوفه شكد واذا فلوس الذهب تكفي اشتري هذا المشتمل اشتري مكفت ابقى كاعده عدكم
وراح مهدي ساعتين واني على نار اعرف البيوت هنا رخيصه مو مثل بغداد اضافه المشتمل بناء جديد بس مكامل  وصغير والذهب كميته زينه موو قليله بلكت الله يكفي

مهدي .. بعت الذهب واتفقت ويه ابو المشتمل ونزلنا من سعره وصار الج
موج .. ياالله شكد فرحت يارب يحفظك بجاه نبينا محمد
مهدي .. من فرحت احس گلبي طار ويه فرحتها اني جملت مبلغ بسيط على المشتمل بس مكتلها مااريد تحس مسوي فضل عليها من شفتها مصره على المشتمل كلت تبقى كاعده گبال عيني وحدها احسن مما نكعد الصبح منلكاها وتهج ومنعرف الها طريق كمت اخاف عليها واحسها مسؤوله مني

ام علي العقد بأسمج بس وقعي
موج .. لا اريد البيت بأسم ابني
الحجيه .. شنو الفرق يمه الدنيا مو امان اخاف يكبر ويشمرج مثل ماشمروني وليداتي
مهدي .. خوش تبسمر الحجيه
الحجيه .. جاا مجذبه انه لو ما البيت بأسمي يمكن نسوانكم تلزمني الباب
مهدي .. ماعاش ولا كان يمه الي تمس شعره منج احنا نطلع وانتي تبقين
الحجيه .. مبين بله ماتسگت من هيج اخذت مريتك وطرت طير بيها
موج .. ههههههه حجيه على كيفج ويااه
مهدي .. اويلي الله احس روحي ترجف من تضحك وفوكاها ادافعلي صفنت على وجهه وضحكت على ضحكتها
موج .. هسه ابو رقيه شوكت اشيل للبيت
مهدي .. تره البيت مو كامل بس بياض بس همزين بيه كاشي ومطبك سيراميك بس بعده هواي نقوصات بيه وكهربائيات مكامله

موج .. شون لعد عبالي من باجر اشيل واكعد هناك
الحجيه .. فلك طرج تركض ركض تكول عگربه وتركض وراها شبيج تخبلتي تريدين بس تخلصين مني مثل ذوله الغمان
موج .. ضحكت وحضنتها وابوس بيها اني اخلص منج شعندي غير ماما فطومه اروحلها فدوه
الحجيه .. شوف الكلاوجيه تقشمرني واني گلبي رجيج عليها ومااكدر ازعل منها وفوكاها تكولي ماما
موج .. هههههه والله مو گلاوجيه بس صدوك اموت عليج ومن اليوم اصيحلج ماما
الحجيه .. فدوه بحلكج جنها العسل
مهدي .. اي والله يايمه صدوك عسل
موج .. خجلت من حجي مهدي بديت احس بنظراته ومفضوح اصلاً ويحاول يتقرب مني بس اني حاطه حواجز ومااتعداهم
مر اسبوع وايدي على گلبي ليروح يجي رسول ويسويله هوسه بس الحمدلله ماكو ومهدي كمل شغلات البيت الكهربائيه وعادي هسه اكدر اكعد بيه بس محتاجه فراش وصوبه ومضل عندي بس ترجيه بأذني نزعتهم
تفضل ممكن تبيعهم الي
مهدي .. ليش محتاجه شى
موج .. اريد اشتري فراش وصوبه اول شى بين ماتفرج والكه شغل وشويه شويه الامور تتحسن

مهدي .. البسيهم
موج .. اترجاك ابو رقيه
مهدي .. دااكول البسيهم يمه حجيه فاطمه
الحجيه .. هاا يمه صحتني
مهدي .. تعالي ويانه نروح نشوف المشتمل حتى تغسله موج وباجر تبات بيه

موج .. طرت من الفرح واخيراً صار عندي شى ملكي سگف يحميني اني وابني دخلت للبيت لكيت بالصاله تلفزيون صغير وبيه ستلايت وقنفه ام نفرين وكرسيين هااشنو مال منو ذوله
مهدي .. تعالي ودخلت للمطبخ بيه سنك تعليك وكاونتر صغير بابين وطباخ وثلاجه صغيره
هاي انت جبت هاي الاغراض مستحيل اخذهم
الحجيه .. يمه من فدوه لطوله للحنين عاشت ايدك يمه
موج .. خاله مااخذهم
الحجيه .. انجبي انتي واسكتي موتيتي بيج جني مصروع اسمه مااخذهم اشش اسگتي خلي نفتهم
مهدي .. ههههههه تعالي يمه الغرفه فوك تكدرين تصعدين
الحجيه .. اي اكدر اصعد جا شعبالك اني بعدني شباب
موج .. كل الشباب انتي خاله يله وصعدنا جربايه خشب ام نفر وعليها دوشك وفراش وبطانيات ٣ وبصف الجربايه جربايه ثانيه مال طفل لحد ٤ سنوات فرحت كولش ودمعت عيوني رغم الغراض كولش بسيطه بس حبيتهم ومخلي بردات لكل البيت حتى ليشرف على الشارع
مااعرف شون اشكرك الي سويته اليه ابن امي وابويه مسواه
مهدي .. مكافي تمشين وتشكرين تره والله بديت اضوج
موج .. بس اني محبيت تشتري هاي الغراض
مهدي .. شفتيهن بسيطات كولش اني اكدر اجيبلج ارقى شى بس بذاك الوقت راح تتخبلين ومتقبلين
موج .. اي والله جان مقبلت
مهدي .. يله اعوفكم تنظفون البيت ساعه وارجع
نظفت بيتي والفرحه الي صار سنين محرومه منها واخيراً دخلت گلبي بس صفنت والعيشه شون لازم ابيع التراجي اقلها تقضيلي شهر شهرين مصرف

الحجيه .. هاج يمه
موج .. شنو هاي خاله
الحجيه .. تاخذين ذني مصرف الج ولوليداتج اذا ماخذتيهم يحرم عليه اجيج ولا اوصلج ولا اعرفج
موج .. كمت ابجي وحضنتها واخذتهم منها بس وعدت نفسي بس اشتغل ارجعهم جان المبلغ ٥٠٠ الف خطيه مال تقاعد رجلها هاي المره لو انطيها عيوني قليل صدوك بعد اكو ناس طيبه وخيره لو خليت قلبت

اول ايام جنت انام مرعوبه واخاف بس اعوف التلفزيون على القران للصبح وشوي شوي تعلمت وكمت من انام اقفل زين ومااخاف
جانت خاله فاطمه يوميه تجيني الظهر تتغدا ويايه وتبقى لصلاه المغرب وتروح وهذا الشى جان مريحني مهدي عرف المنطقه عليه وگال الهم كرايبهم بنت خاله وعرضه ومحسوبه عليه اني مااطلع ابد والمسواك اكو طفل صغير اسمه عبوسي عمر ١١ سنه هو يجيني بين يوم ويوم اكتبله بورقه شريد مسواك وغراض من السوك ويشتريهم اليه وانطي لو الف لو الفين هواي يساعدني ابن جوارينه الله يحفظه لاهله
مهدي ميجي علينا اله خالتي موجوده وهذا الشى جان يريحني لان اذا اجه وحده استحي شكول اله لتجي بس هو انسان يعرف الاصول لهذا اله خالتي ويااه يله يجي
مر شهر و١٠ ايام على وجودي بالبيت مالتي وبديت اقنع خاله تعلمني اخيط اقلها ٥٠٠٠ او ١٠٠٠٠ تشيلني وتعيني مصرف الي ولأبني وبديت اتعلم اساس الخياط واجانه بيوم مهدي

اني وعدتج بتعيين بس تعرفين الدوله وتعينات ماكو والعقود والاجور اليوميه متوقفه
موج .. انقهرت بداخلي بس مبينت جنت حيل متأمله عادي كله نصيب دااتعلم خياطه والله كريم
مهدي .. اصبري خلي افهمج اكو معلم عدنا الله وفقه وانقل لبغداد هو وزوجته هم معلمه مثله وجانو ياخذون دروس خصوصيه لطلاب المنطقه وجان عدهم خوش مجاميع لان قدماء ومعروفين لهذا طلبت منهم يحولون كم مجموعه من الي عدهم الج انتي ادرسيهم تاخذين دروس خصوصيه ادبرين هذا الشى  . بيج قصص غزوان علي
موج .. شون ماادبر ياريت مال ياصف
مهدي .. رابع ابتدائي وخامس واذا تكدرين وبيج حيل سادس هم
موج .. بيه كل الحيل رحمه لأهلك ياريت
مهدي .. من باجر اجيبلج الاعداد مالتهم وكتب مال كل مرحله حتى تقريهم وتعرفين ادرسيهم
موج .. افضالك كثرت ومااعرف شون اردها
مهدي .. الفرحه الي بعيونج احلى فضل الي بالدنيا
موج .. شكراً ابورقيه انت اخ عزيز
اتقصدت اكول اخ لان اعرف لشنو يلمح
مهدي .. يله يمه من رخصتكم
وصار عندي طلاب وبديت ادرس كل مرحله ١٠ طلاب وجنت ادرسهم من كل گلبي صح اتعب بس الحمدلله صار وضعي افضل الحلوو هنا نظامهم فلوس الدروس الخصوصيه بالايام على عدد المحاضرات ومرات يجوني طلاب ادرسهم مال امتحان واحد مر شهر بعدشهر والوضع جيد جداً وحياتي شبه مستقره بس الگلب ممستقر ودوم افكر اهلي شونهم امي شونها وحبيب الروح نساني لو بعده
من صار عندي فلوس اول شى فكرت اشتري سيم كارت وجابلي مهدي واحد وفتحته واتصلت على مروه  وگلبي ينبض بقوه وخوف يارب يدك
دك اي دك
مروه... الوو نعم تفضلي
موج .. ابجي واحجي حبيبتي اني موج اختج
مروه.. طفرت من مكاني ولج وينج موج انتي عايشه
موج .. بقينا نحجي ونبجي بحيث من اشتياقنا مسكتنا من البجي وحجتلي شون اهلي من عرفوا من اخذت الولد وطفرت
فاطمة .. ابويه حالف يذبحج بس يلكاج
موج .. ليش هو مذبحني من رجعني لأكرم وصدك بيه ومصدكني
مروه.. شصار بينا بعدج وهاي ام اكرم خزتنا بالمنطقه يوميه اتجيب الشرطه علينا لحد ما القضيه انسدت لان انتي امه واخذتي وهي متملك حق الوصايه يله شويه افتكينا منها بس تعرفين بعد منطقتنا لكولهم سالفه يتونسون بيها وذاك الحجي
موج .. والله موبيدي شسوي ابني شون اعوفه وكله من وراها بست ايدهم ابويه وبشار بالفاتحه مال اكرم وكتلهم اخذوني عدكم حتى لو خدامه مقبلو همه ذبو لحمهم بالشارع ويردون مينفضحون يعني لو قابلين ارجع وياهم جان صار هيج بحالي
وامي شونها
مروه.. تنوح وتبجي النهار كله عليج
موج .. وخواتج الكبار
مروه.. يمعوده حايرات بروحهن وحتى بالشهر مره يجن
موج .. والشيطان مرة اخوج بشار
مروه.. يبووو اسكتي هاي لعبت لعب بعد ما طفرتي وتمشي وتعير ويوميه عركه ويوميه طلابه وهذا اخوج الاغم بشار صار نسيواني ويه مرته وطابك وياها تالي ابويه من المشاكل قسم البيت بالنص النه اني وبابا وماما نص والهم نص وامير تعرفين بالمشتمل مالته بعده المهم خلصنا منها ومن دوختها بنت الگلب
موج .. الله لايوفقها والله حاسه الي صار بيه من وراها هاي وحده متخاف الله وكلشي اتوقع منها
مروه.. اي والله هسه انتي وين
موج .. مااكدر اكولج
مروه.. ليش متأمنين بيه
موج .. امشي بابا شون ماأمن بس افضل الج والي گلبي هذا رقمي ونبقى على اتصال
مروه.. انتبهي لنفسج موج ولأبنج
موج .. لتخافين اختج سباعيه وممسويه شى غلط ولا اسوي بحياتي وسديت الخط وارتاحيت اطمنت عليها وعلى امي وذوله اهم اثنين عندي بس بليل والتلفون بيدي گلبي رجف وتذكرته اني حافظه رقمه ادك عليه لا ماادك بقيت بحيره اخر شى كلت خلي اكعد واسكت
اليوم وبعد مرور سنتين على اختفائي اباوع للسما هذا ثاني شتا اجاني واني هنا بالمشتمل ابني علاوي گبر ويمشي ويكمز هو مالي حياتي
واندكت الباب خاله ومهدي تفضلوو همزين اجيتوا تعلمت طريقة معجنات من النت تخبل هسه ويه الجاي ناكلهم هسه كملت
مهدي .. عاشت الايادي بس تعالي كعدي عندي موضوع وياج
الحجيه .. يمه راح اخذ علاوي واكعد بالمطبخ وانتم احجوا على راحتكم
موج .. تفضل محتاج شى صاير شى
مهدي .. موج تتزوجيني
موج .. شنوو
مهدي .. اني احبج من اول يوم شفتج بيه واريدج على سنه الله ورسوله
موج .. بس اني متزوجه
مهدي .. لا اني اعرف كولشي عنج وادري ارمله وكولشي اعرف من اول مدخلتي بيت امي سألت عنج بغداد
موج .. دنجت مستحيه
مهدي .. عوفج من كولشي هسه كوليلي شنو رأيج

موج .. وزوجتك وبناتك
مهدي .. انتي بيت وهي بيت ومستعد حتى اشتريلج بيت واسجله بأسمج بس وافقي وعمري مااذيج واشيلج على راسي ومحد يدوسلج على طرف ولا اخلي بشر يتقرب منج وافقي وعمرج متندمين
موج .. دااحجي ودك تلفوني مروه رفضته ورجعت دكت
العفو من رخصتك هاي اختي واخاف بيها شى
مهدي .. على راحتج
موج .. هاا شبيج خبصتي الدنيا
مروه.. يمعوده الحكي بس انتي تكدرين تنقذيني
موج .. شكوو احجي
مروه.. غيث

يتبع ....