رواية بين العقل و الطريق الفصل السابع عشر 17 - بقلم غزوان علي

بين العقل والطريق
للكاتب غزوان علي
البارت السابع عشر

حزن يغتالني وهم يقتلني وظلم حبيب يعذبني
آه .. ما هذه الحياة التي كلها آلام لا تنتهي وجروح لا تنبري ودموع من العيون تجري جرحت خدي أرقت مضجعي وسلبت نومي آه يا قلبي يا لك من صبور على الحبيب لا تجور رغم ظلمه الكثير وجرحه الكبير الذي لا يندمل ولا يزول ما زلت تحبه

اني اسيل عمري ٢٠ سنه مكملت دراستي بسبب ظروف اهلي التعبانه اني شكلي لابأس بيه رغم هواي يكولون انتي تخبلين وخاصه عيونج بس اني اشوف شكلي عادي بنظري الحلووه لازم تكون بيضه وشكره وعيونها ملونه بس اني حصلت العيون الملونه عيوني لونهم خضر على بيبيتي ام امي بس طلعت حنطيه البشره وشعري تمري اللون اني طويله ١٧٠ سم وجسمي رشيق عشت ويه اهلي بدايه طفولتي احسن عيشه لان والدي جان موفر كولشي النا وامي حنونه عائله عراقيه حالها حاال الالاف متماشين ويه الوضع لحد مابيوم بسنه ٢٠٠٥ طلع ابويه وامي زياره لأقاربنا بكركوك وراحوا بعد مرجعوا انگلبت السياره بيهم واتوفوا هنا تغيرت حياتنا جان عمري بوقتها ١٢ سنه وامين جان عمره ٢٠ سنه هو اخويه الجبير وعندي اخ اسمه سيف عمره بوقتها ١٠ سنوات عمامي مرحمونا جان البيت ورثه مال جدي باعوا بس طلع اربعين يوم على وفاة اهلي وطردونا وحتى حصتنا مندري بيها وين وطالبهم امين بيها وتعاركوا وياااه وهمه هوايه خاف امين منهم وطردونا

اخذنا امين ويتلطم بينا بالدنيا وكعدنا بالبدايه بهيكل مكامل لان جان حتى فلوس اكل ماعدنا وطلع يشتغل بس جان دوم يخاف عليه وخاصه بعد احداث سقوط بغداد والاوضاع بدت تتأزم واني صح عمري بوقتها ١٢ سنه بس جنت طويله مبينه اكبر من عمري لهذا خاف لحد يتحارش بيه جان يلبسني ملابس سيف حتى ابين ولد مثله ومحد يتقرب مني وحاولنا منبين وجودنا لأحد  نقلنا امين لمكان افضل شقه بس العماره تعبانه وتخوف

اجتي اياام ماانام من الخوف وخاصه مداهمات الامريكان ايام سوده عشناها لحد مابيوم اخويه لكه شغل يم رجال حباب ابن اوادم وتحسنت حالتنا وبمرور الايام كدر يلم امين واشترينا مشتمل ٦٠ متر وجان عبالك قصر بالنسبه النا جان بيه طبع امين يحجي هوايه بأبن الحجي وجان اسمه غيث من كثر ميحجي بيه واني بنيه مراهقه حبيته حتى شوف مشايفته اني تركت الدراسه وجنت سادس ابتدائي بس سيف رجع انقهرنا عليه لان جان يبجي على المدرسه وهو صغير ميفتهم لهذا قررنا نرجعه بس جنت دوم اكعد ويه سيف واقرا حتى لاانسى القراءة واكون جاهله ماافتهم حتى جنت اشطر من سيف وكل المراحل ويااه

وكمت اعرف انكليزي بطلاقه احب الدراسه بس الحظ لعب دوره وياايه بالعكس وادمر مستقبلي صرت أم الهم ودوم انتبه الهم جانت حياتي ماشيه بهدوء لحد مابيوم قرر أًمين يتزوج هنا انگلبت جحيم جان اكو بنيه جوارينه كولش حبابه او جنت متوقعتها حبابه وجانت حاطه عينها على امين كيفت كلت خوش بنيه وصديقتي واكيد راح تكون ونس اليه تالي الي حسبته عون طلع فرعون . كروب قصص غزوان علي
ومن اول ايام زواج أمين بدت تتأمر وتتشرط وحتى اخويه كلبته علينا وحاربتني بأكثر من طريقة مجان بيدي غير السكوت اني طبعي هادئ الي جان يونسني بليل خيالي اي خيالي جنت اخيل روحي زوجه غيث

واعيش ويااه ويحبني اني من جان عمري ١٦ سنه شفته لغيث مره اجه على امين جان عنده سجلات وغراض ياخذهم وطب للبيت من شفته وكع گلبي وخاف جنت احبه مره كمت احبه الف مره هو مشافني لان سيف قدم اله العصير تمنيت احصل صوره اله بس بقى بخيالي لحد مابيوم واني بعمر ١٨ صار عدهم مشروع واني انظف وكعت الاوراق ولكيت مستمسكات غيث الاربعه وصور مال معامله موو شفت صور عبالك شفت الجنه مباشره اخذت صوره وضميتها ومن يومها من اريد انام احطها بصدري وانام حبيته واني مسامعه حتى صوته حب مجنون بس حقيقي ولان اني بسيطه وحياتي عباره عن شغل بيت وماعندي لا طلعه ولا تطلعات صارت غير هو ونستي وراحتي

وبمرور السنين تعقدت الامور بيني وبين مرت امين وخاصه من صار عنده جاهل اوو لازم يوصخ ويكسر ومااحجي اشتغل وبس اجوني خطابه لان هي متحملت وجودي كامت ادلل بيه منو يزوجها تكول كاعده على گلبها
وكل ميجون ارفض الشى الوحيد الي الله رحمني بيه بأن امين مجبرني اتزوج
وبقيت اداور يومي بين تعب وضيم مرت اخويه وبين خيالي وحبي لغيث

لحد مابيوم رجع أمين عصبي ويعد ويغلط على غيث انقهرت بداخلي بس مابيدي غير اسمع واسكت ومن دخل لغرفته ويه زوجته عله صوتهم وبطريق الصدفه اكتشفت امين يبوك من الدخل مال غيث وهو لزمه وطرده وحتى مسوي مصايب بشغل غيث بجيت ليش هيج اخويه يبوك بس الي افتهمته كله من وره هاي الحيه مرته تحجي بعقله وتحرضه بحجه لازم نأمن مستقبلنا ولج تأمني من الحرام بقيت ايام مقهوره وحتى ابجي وكلت هاي هيه بعد حتى بالحلم مااشوفع اني مجان طموحي يتعرف عليه ويحبني لان اني بعيده كل البعد عنه بعد السما عن الارض بس جانت امنيتي الوحيده اشوفه واحجي ويااه وجهه بوجه ولو مره بعمري

وبعد مده واليأس دخل كلبي وزادت المشاكل بين امين وزوجته لان كاعد ملكه شغل طلع أمين يدور اتصلو علينا كالو مدعوم وحالته خطره اسودت الدنيا بعيونا وخاصه هو موبس اخونا هو بمثابة ابونا
وطول فتره علاجه يردد اسم غيث وكالو لويصبح لو لا ادعوله متحملت ونهاريت وبقيت ادعي وابجي بان يعيش وحجه ويايه الصبح بس بعده كولش تعبان وطلب غيث اني اعرف عنوانه وسيف عرض هو يروح بس امين مقبل وتجرأت اروح كميه الرهبه والخوف الي جانت بگلبي متقدر واني اشوف الانسان الي احلم بيه گبال عيوني بس سويت نفسي مااعرف وحجيت ويااه وقبل يزور أمين هنا موو بس جنت احبه كمت حتى احترمه اكثر من قبل بالالاف المرات لان بعد كل الي سواه اخويه قبل يسامحه ويزوره ورحنا للمستشفى اما الطريق صار عبالك للبصره كثر مطويل لان جنت حيل متوتره لان كاعده يمه بس هو جداً ثكيل ومحجه اي كلمه طول الطريق
من وصلنا اتحمد لأمين بالسلامه وجان يصدمنا اخويه بطلب غريب وغير متوقع

امين.... استاذ غير انت ابن ناس وشريف واخلاقك عاليه والله شاهد رغم جنت ابوك منك واكيد اذيتك بس اني مااكرهك بالعكس احبك وتمنيت ماأذيك بس الشيطان بعد غواني

غيث .. عوف هذا الحجي هسه وكوم بالسلامه والباقي ينحل
امين .. استاذ غيث عندي طلب ولو مو من حقي بس احلفك بعزيز گلبك تقبل
غيث .. شنو الطلب
امين .. تتزوج اختي هااي اسيل
غيث .. شنوو يازواج شبيك يمعود
امين .. حقك تتفاجأ بس اني اذا صار بيه شى هاي راح اتيهه بالدنيا واتضيع وهي طيبه گلب وراح تتأذه واريد أمن مستقبلها وموعيب ادور راحه وامان اختي وخاصه اعرف اذا متت راح تتأذه وماكو احسن منك ازوجه اختي 

غيث .. انت مكعد تطلب مني فلوس او شغل واكولك حاظر انت كعد تطلب مني اتزوج ومنو اختك مستحيل وشنو بهاي الطريقة وممجبور اتزوجها حتى لو انت تتوسل

اسيل.. متت قهر من كلامه بس حقه اني منو حتى اتزوج ابن الحسب والنسب المهندس غيث
رجاءاً امين ميصير هيج انت كاعد ترخصني وكاعد تشوف شون استاذ انحرج  بيج قصص غزوان علي
غيث .. العفو اختي اني موو قصدي ارخصج بس انتي كاعد تسمعين كلام اخوج اكيد انتي هم ممقتنعه
اسيل.. شرفتنا استاذ تكدر تروح
غيث .. عفتهم وطلعت واني مصدوم

اسيل .. شجاك امين هاي تاليتها ترخصني بهاي الطريقة
اني مداارخصج بالعكس داحافظ على مستقبلج غيث انسان طيب ومحترم ومن عائله راقيه
اسيل.. وتتوقع ابن العائله الراقيه يتزوج وحده مثلي
امين .. يتزوج لان اعرفه متهمه المظاهر واني اخاف اموت واعرف نوال زوجتي مراح ترحمج وتأذيج وسيف حاير بروحه ولا بيوم فكر لابيه ولا بيج يعني راح اتيهين بعدي

اسيل.. اسم الله عليك طوله العمر حبيبي
امين .. اذا رجع غيث وافقي والله راح تعيشين احسن عيشه
اسيل .. مراح يرجع
أًمين.. راح يرجع متأكد
بقيت ايام ماانام حالته لأخويه شوي تحسنت بس بعده تعبان اما زوجته الي من وراه ادمر مستقبله راحت لأهلها ولا اهتمت بتعبه ولا بصحته وسيف حاير بالامتحانات مالته صفنت كلت صدوك حجي امين اني منو الي بعده اذا صار شى لاسامح الله اني صح امنيتي غيث بس موبهاي الطريقة المهينه

غيث .. بقيت افكر بكلام امين مااعرف اضحك مااعرف استهزأ هذا من كل عقله والله ناس متستحي فوك الي سواه يزوجني اخته موبعيده اخته تكون حراميه مثله

وره ايام كاعدين بالمطبخ والعب ويه ياسمين بنت زيد وشهد تغسل مواعين وجان اطب امي
هاي ماما وين جنتي سألت عنج
أم زيد.. والله ياحبيب امك جنت بيت ابو أكرم

غيث .. نغزني گلبي والفضول كتلني صار مده مااسمه اخباره ولا اريد اسمع بس هلمره گلبي راد يسمع شى عنها
وشخبارهم وخاصه هاي جنتهم خطيه
باوعت صفح شهد وعوجت حلكها

أم زيد.. والله ياغتو الي شفته الوضع زين حسب حجي ام اكرم مدللها لزوجته وكبرانه بطنها والحمل صايره تخبل عليه وحتى جايبلها خدامه

غيث .. نار وشبت بگلبي
يعني هي سعيده ويااه
أم زيد.. اني مسألت بس الي شفته ميخلوها تشيل ورقه من الكاع هي سلمت وصعدت بس تكول ام اكرم صايرين عسل كام اكرم يحبها ومدللها
غيث .. من نار گلبي وقهري حجيت
يوم اريد اتزوج
شهد .. وكع الماعون من ايدي
أم زيد.. اسم الله بنتي خوما اتأذيتي يله طار الشر
شهد .. لاعمه متأذيت
غيث .. شكلتي يوم
أم زيد.. والله ياغتو يوم عيد وهنا ولو يعز عليه اخطبلك والسنه مال اختك مصار ايام من طلعت بس هم اريد اشوف جهالك قبل مااموت
غيث .. بست راسها العمر الطويل حبيبتي
شهد .. ومنو العروس
غيث .. اخت المحاسب مالتي أمين
شهد .. أمين الحرامي انت صدوك تحجي لو تخبلت
غيث .. عطت بيها احترمي نفسج شهد ولتتجاوزين شنو تخبلت طفل شايفتني كدامج وتتجاوزين
شهد .. دمعت عيوني من كلامه جنت دوم هاي طريقه كلامي ويااه بس هو من يوم معاف موج تغير وحتى كلامه وتصرفاته تغيرت وصار قاسي
أم زيد.. على كيفك غتو شنو هذا العياط ولتنسى شهد اكبر منك
غيث .. خلي هي تحترم عمرها وتنتبه على كلامها حتى اني احترمها
شهد .. صعدت ركض للغرفه ابجي حيل انقهرت منه
أم زيد.. لا غتو انت متغير حيل وكلامك صاير دوم محلوو ومتوتر واعصاب ليش هيج ابني ليش متغير حاستك من يوم طلعتك من السجن وانت حتى اخلاقك تغيرت
غيث .. لاتغيرت ولا شى يوم متوهمه
أم زيد.. ابن بطني واتوهم بسوالفه
غيث .. فدوه يوم فضيلي سالفه الزواج
أم زيد.. تره حقها شهد ملكيت غير اخت امين وتعال كولي شنو تحصيلها الدراسي وضعها

غيث .. كلشي مااعرف عنها
أم زيد.. والله متنلام بيك شهد من تكول تخبلت اكو واحد يخطب وحده وميعرف عنها شى وفوكاها اخوها حرامي ومأذيك

غيث .. كعدت حجيت كولشي لأمي وعن وضع امين
أم زيد.. ياابني تساعده بمبلغ تشوفله شغله كله بيه مجال بس مال تتزوج اخته منو يكول ممتفق وياها ومسوين خطه عليك

غيث .. وين كاعدين ماما شنو هو فلم امريكي وخطط ومؤامرات
أم زيد.. ابقى استهزأ وبعدين كول امي كالت ومسمعت كلامها
غيث .. يووم من الاخير راح اروح اسأل عن اخلاق البنيه بالمنطقه وضعهم اذا طلعت خوش بنيه ومؤدبه نهايه الاسبوع نروح نخطب
أم زيد.. يمعزه بهاي السرعه
غيث .. اي بهاي السرعه وخلي اكوم اراضي شهد مااريد تزعل
ورحت دكيت الباب لكيتها تبجي
هاا ام دميعه شبيج
شهد .. اطلع بره مااريد اشوفك
غيث .. هههههههه مخبله تبجين لان حجيت عليج من شوكت هيج صايره حساسه
شهد .. روح غيث مااريد اشوفك ولا اسمع كلمه منك
تقرب وباس راسي
لتزعلين مني انتي اختي والله شاهد واحبج وكولش اقدرج ومو من كلام تنسين حبي

شهد .. اني مزعلانه بس من كلامك زعلانه حتى عليك انت تغيرت هوايه وكأنك غير شخص مو غتو الي يضحك للهوا ويكمز ويغني وكأن شخص ثاني يختلف اختلاف كلي عن غتوو انت منووو والله راح اتخبل الله لايوفقها غيرتك
غيث .. لتدعين عليها
شهد .. بعد كل الي سوته ومتريد ادعي عليها مكافي غيرتك وكسرت گلبك
غيث .. الله يجازيها المهم هسه انتي مزعلانه وهااا حتى لوو زعلانه طخي راسج بالحايط
شهد .. هههههه والله ضحكتني
غيث .. اي مو مخبله تبجين وتضحكين سوه
يله اكوم اروح عندي شغل

شهد .. غتووو
غيث .. خيررر
شهد .. لتستعجل على الزواج لتتخذ هيج خطوه بلحظه غضب او تسرع
غيث .. لازم اغير حياتي من كلشي واكون عائله واعيش موو بس هي تعيش وتنسى كولشي وتشمرني وره ظهرها اني هم لازم اشمرها وره ظهري

شهد .. بس اقلها اختار صح موو اخت أمين
غيث .. اخت امين او غيرها ميفرق عندي كلهن بنات وزواج تقليدي منها او من غيرها مجرد اكون اسره مستقره
شهد .. شراح اكولك مراح يغير قرارك
غيث .. بالضبط ميقدم ولا يأخر كلامج ولا كلام الكل اريد اتزوج هاي البنيه وانتهى

وطلعت اتمشى بالشارع وحاير شنو الي دااسوي ولوين اريد اوصل

اسيل .. طلع امين سلامات بس وحده من رجلي ميكدر شبه منتهي العظم حاولو يحطون بلاتين وعمليات يراد حتى يرجع لعافيته رجعت زوجته وفوكاها لسانها شطوله فوك ماعايفته صار ايام بالمستشفى حتى مفكرت تزوره وحده ماعدها ذره مستحى وبنفس يوم طلعته اندكت الباب وافتحها واشوف غيث كدامي ومن الصدمه حتى ضغطي هبط

غيث .. نكدر ندخل
اسيل .. اي اكيد تفضلوا وشفت ناس ويااه وسلمت بس مااعرف منو
غيث .. شوف أمين الي صار ننساه واليوم جاي اخطب كريمتك اسيل
امين .. يوم الهنا كبع واخذ
ابو زيد.. عندك طلبات ابني
امين .. كولشي مااريد بس يصون اختي
غيث .. اني عندي
امين .. تفضل استاذ
غيث .. تنسى شى اسمه اسيل
امين .. يعني شون مفهمت
غيث .. من تطلع من بيتك تنساها تماماً لااريد اشوفك ولا اشوف اي احد يتقرب منها هي راح تكون زوجتي وبحمايتي ومااقصر وياها بس مااريد توصلون الها ابد

اسيل .. شكد فرحت طرت من الفرح لان غيث تقدملي اصلاً اخاف اغمض يطلع حلم موحقيقه بس من كال الشرط مالته طفه فرحتي ودخلت الهم لان صاحوني دياخذون رأي
شون تريد انسى اهلي
غيث .. هذا الي عندي كولشي مااريد منكم اخذج بملابسج الي عليج واحاول مااقصر وياج واكون وياج زوج صالح بس تنسين عندج اهل
اسيل .. اكو وحده تنخطب وخطيبها يشرط هيج شرط يعني شرطك تعجيزي
أم زيد.. ابني حقها البنيه شرطك غريب
غيث .. هذا الي عندي وكلته وبكيفكم بعد
امين.. موافقين
اسيل .. امين
امين .. اسس انتهى الموضوع خلي نقرا الفاتحه
اني ضاعت فرحتي بسبب شرطه لغيث وانقهرت وحدوا العرس الاسبوع الجاي بسرعه البرق كله ركض بركض وحتى همه خطيه انخبصوا وهو مصر على الاسبوع الجاي

غيث .. اليوم الحنه مالتي واني صافن شسويت بروحي ليش استعجلت وهاي الي راح اتزوجها شنو ذنبها واني انسان محط وتعبان تعيش ويايه واني حتى روحي محاملها
ولان بيت امين صغير كالو نسوي الحنه سوه وجابوا اسيل من الصالون لبيت اهلي من دخلت شفتها صدوك طالعه حلوه ونازكه كعدت بصفي واحسها ترجف مهتميت لان ماعندي اي مشاعر خاصه اتجاهه ومااشوف غير تدخل موج مو دخلت عبالك گلبتني من راسي لرجلي حتى نفس كوه اتنفس شجابها وشفتها طالعه تفاحه تخبل وبطنها كبرانه لو ما الناس يمكن جان كمت خنكتها شعدها جايه تريد تشوفني سعادتها لو تشوفني الانجاز الي سوته وحبلت من زوجها

من باب شوفتها رجفني لان مشتاق الها ومن باب عصبيتي لان اجتي وبكل صلافه تحضر عرسي

موج .. وصلت يمه وكأن بس اني وياه بالصاله مبرووك
غيث .. شكراً الله يبارك بيج
موج .. تقدمت باتجاه زوجته مبروك حبيبتي بالرفاه والبنين
اسيل .. تسلمين . كروب قصص غزوان علي
غيث .. اقدملج جيرانه موج متزوجه اكرم جيرانه وان شاء الله بعد مده انسميها ام فلان
موج .. يحجي بأستهزاء اني سويت الوضع طبيعي ادعولي اكوم بالسلامه وان شاء الله يرزقكم مثل مرزقني من رخصتكم

موج .. امشي وجسمي يرجف كعدت بالزاويه واني اباوع عليه شون يبتسم والكل يهلهل وفرحان جابو الذهب لان يمكن ممسوين نيشان لهذا صار النيشان والحنه سوه بدا يلبسها واني ويه كل طخه منه الها اشب نار حتى النفس ضاق اني شجابني ليش اجيت شكلت لروحي ليش هيج اعذبها حتى الالام ولاده احس صارت عندي من كثر القهر الي داشوفه وخاصه زوجته حلوه حتى احلى مني بس اااااااه ياغيث ليش حبيتك شطلعك بدربي ناقصه عذاب اني ياربي متحملت منظره
غيث .. تقصدك أذيها لان اعرف بيها جايه تشوف وضعي لهذا مثلت السعاده والفرح ردت اشوف شنو ردت فعلها يعني جيتها اخر شى اتوقعه الدنيا كلها تضحك وفرحانين واني امثل الفرح صح مااباوع عليها بس گلبي يبجي دم وكل شويه اضحك وحتى بست خدها لأسيل ردتها تتعذب اعرف بيها راح تتأذه من تشوفني هيج ولزمت ايدها

موج .. اباوع على العروس وهي فرحانه واكول هذا مكاني المفروض اني هنا اني الي قريبه منه هذا حبيبي وفرحت عمري الي ظهرت بأصعب الاوقات ليش هيج صار ويايه والله اني مااستاهل هيج اتعذب واني اشوف الي احبه ينزف لغيري اذا الله مكاتبلي اعيش وياك ليش كتبلي عذاب حبك اصرخ بگلبي وانحوح ساعدني يارب ضاقت عليه الدنيا ضاق النفس ومن باسها لوبيدي اكوم اعيط بنص الناس واصيح حرام كافي لتعذبني هيج تره اني من لحم ودم حس بيه داموت لتلمسها انت مالتي انت الي انت حبيبي اني موحبيبها  وجان اشوف ود..

ود.. اليوم حنه غتو وتفاجأنه بقراره وبسرعه التحضيرات لهذا طلبت من هشام يوديني وجابني الصبح وراح واني رحت للصالون ويه العروس ولبست بدله سودا مكشوفه الصدر وطويله مقسمه على الجسم وتسريحه بسيطه ومكياج هادئ طلعت اخبل تمنيت هشام يجي ويشوفني واني ادخل للصاله اسلم على الناس لمحت موج كاعده رحت بسرعه عليها سلمت وكعدت يمها

ولج شجابج تخبلتي
موج .. اااااه ياود نااار ولج گلبي راح يوكف داموت ود
ود.. والله انتي موطبيعيه حتى شوفي وجهج شون يعرك وتلهثين بالكلام بيج شى والله خوفتيني
موج .. نحجي بهدوء حتى محد يسمعنا وصوت الموسيقى والاغاني عالي لهذا نحجي براحتنا
بيه اشياء ود بيه موووت وروحي تتكطع
ود.. شون تجين للحنه مالته شون تتجرأين اصلاً وخاصه بهذا وضعج
موج .. موبيدي گلبي جابني ردت اشوفه مدري اشتياق مدري اريد أذي نفسي واعاقبها بيه اليوم زواج حبيبي ود زواج الي المفروض هسه هو زوجي يعني باجر تنام بحضنه مكان مااني الي انام وراها تصبح بوجهه ولازم اني الي اصبح راح تلمسه ود واني مااكدر المسه ود راح غيث مني راح حبيب عمري راح النفس الي عايشه علموده

ود.. على كيفج كاعد ترجفين لتتخربطين كاافي فدوه والله كمت كولش اخاف عليك
موج .. كوميني ود بعد مااتحمل
ود.. امشي اغسلج راح تخربين امشي استغفر الله حالكم يبجي الصخر

غيث .. شفت ود لازمتها وتمشي على كيف احس گلبي طفر من مكانه من خوفي عليها اوووووف منك ياگلبي لوبيدي ادوسه برجلي ولا اخلي يرجف عليج بس يحبج وملكج وماعندي سلطان عليه
وره مطلعوا بقيت متوتر وصرت اعصاب

اسيل .. بيك شى
غيث .. لا مابيه
اسيل .. حسيت وضعه موطبيعي وعيونه بره ويلوب اني سويت نفسي الوضع عادي واحاول اركز ويه المعازيم حتى لحد ينتبه وجان يكوم من يمي وين رايح
غيث .. هسه اجي

ود.. غسلت الها وشربتها مي هااا ميمي بشري
موج .. تعبانه صيحيلي عمتي خلي نروح
ود.. امشي لغرفتي اكعدج بيها ترتاحين لحد متجي عمتج
وصلتها للغرفه وكعدت على الجربايه وجان تنفتح الباب
غتوو شجابك يمعود لحد يحس استر علينا
غيث .. لج انتي شجابج ها متستحين على نفسج وجايه فوك كل الي سويتيه بكل عين قبيحه جايه

موج .. دنجت وبجيت ومحجيت اي حجايه
ود.. على كيفك غيث شجاك البنيه تعبانه
غيث .. طبعاً من الحباله مستمتعه ويه رجلها وجايه تراويني بطنها وتكولي شوف مرتاحه  ويااه وحتى خلفت منه
موج .. كافي غيث فدووه

غيث .. انتي اشايفه احمدي الله مجريتج من هدومج وطردتج بره شكد شايف صلفات وحقيرات مثلج مشايف يعني جايه تخربين زواجي مووو
ود.. يمعود اطلع صوتك عالي راح يسمعون وتصير كارثه
غيث .. اني اريد تصير اريد الناس كلها تشوف الساقطه الي صادقت فوك رجلها وصارت خيره براسي واملتني وسويت المستحيل علمود اتزوجها وراها باعت شرفيات وكالت انساني ورجعت لزوجها وحبلت فوكاها

موج .. وكفت واني حتى حيل مابيه اوكف
شوف غيث لااني الي تحارشت بيك ولا اني الي كتلك حبني اني من اول مره كتلك ابتعد عني بالعكس انت الي اذيتني انت الي دمرتني
غيث .. الي يسمعج يكول جانوا يعاملوج الاميره ديانا واني خربت بيتج هاي اذا اكو بيت اصلاًجنتي مجرد خدامه لعمتي ومكفخه لرجلج

موج .. داانجرح من كلامه وكمت ابجي واحجي شوف صح جنت خدامه ومكفخه بس اقلها مجان گلبي يأذيني جنت متحمله كولشي وساكته وراضيه انت الي دخلت حياتي وعيشتني بأحلام ورديه وسويتلي الدنيا جنه وحبيتك ومتت عليك وصلت مرحله اتنفسك تعرف شنوو اتنفسك

ود.. على كيفج موج راح تموتين
موج .. خليني اكمل ود خليني اطلع نار گلبي
ياما وياما كتلك عوفني اني ماافيدك اني طريقي نار بركان جنت تكون اريد نارج اريد بركانج اريد اعيش بيج وبحبج واني اكولك هاي النار اذا طلعت راح تحركنا وانت تكول نارج ثلج بالنسبه الي اكولك اني متزوجه عوفني تكولي ميهمني المهم تحسين بيه وراها راح نحل كلشي خليها على الله
بقيت ايام واشهر وتكول خليها على الله والي كاتبه نشوفه وشفته غيث شفت القهر والضيم والقلق والخووف

غيث .. هذا الي شفتي من حبي لهاي الدرجه جنت ثكيل عليج
موج .. تعرف شنو معنى تحب واحد وتعرف بيه ميصير الك تعرف شنو معنى من تنام والدموع بعينك لان مشتاقله ومتكدر تحضنه وتنام
تعرف شنو معنى من مااكدر المسك واداريك من تتعب تعرف شنوو معنى من تطلع بليل والقلق والتوتر يسيطر على اعصابي لحد مترجع للبيت اني حبيتك بجنون صرت الهوا كمت اختنك بدونك وكل مااحاول ابتعد عنك اتقرب منك صرت حتى اعز من روحي وكل اهلي يعني احبك كل هلحب ومااكدر اكون الك شون تتوقع يكون احساسي

غيث .. وهسه خلصتي مني
موج .. ياريت اكدر اخلص ياريت انت رحت وراح تتزوج وتكون اسره
غيث .. وانتي هم راح تكونين ام وتكونين اسره متعادلين

موج .. لا ممتعادلين انت راح تعيش ويه انسانه احتمال بمرور الوقت تحبك واحتمال انت هم تحبها بس اني مستحيل راح اكدر احب زوجي انت اسرتك مستقره وهادئه واني طايفه بحر الذكريات اني مومثلك انت تكدر تمشي حياتك اني الذكرى وكل نفس منك وكل كلمه راح تبقى ترافقني العمر كله

غيث .. صرت عصبي ونااار واعيط فقدت ولزمتها واهزبيها
لعد ليييييش عفتيني ليش رجعتي اله ليشششش
ود.. يمعودالبنيه حامل لتموت بيدك
موج .. انجبرت والله اذوني وطردوني لعبووو عليه ورجعوني اني ميته غيث ميته جسد بلا روح الي صار بيه بغيابك العقل ميشيله بس مااكدر احجي شكول

غيث .. كوليلي فهميني ليش تبقيني مثل الاطرش بالزفه
موج .. مومهم كل هذا والي صار بيه وعذاب گلبي دااحسه انت تتحمل ذنبه خطيتي برگبتك
غيث .. فوكاها
موج .. اي فوكاها خليتني احبك واموت بيك وهسه دادفع ثمن هذا الحب
غيث .. لتخبليني ومسويه نفسج فقيره هو الغلط كله منج
موج .. مني اًو منك مراح يغير شى كل الي حصلته من يوم الي عرفتك بيه الدموع والالم
غيث .. وخريها ود مني لاابتلي بيها واكتلها خلاص فوكاها صايره هي ام الراهي واني الجاني عليها

ود.. تعالي موج كافي شوفي حالج وضعج موطبيعي امشي اوديج للبيت بس البس عبايه فوك ملابسي
موج .. ميحتاج اني اروح وحدي بس اريد اكوله شى اخير لغيث

غيث .. مااريد اسمع اي شى منج رووووحي
موج .. تقربت منه وبيني وبينه مسافه شبه ماكو وصار نفسنا واحد
راح تتزوج وتعيش حياتك ويااها واحتمال تحبها بس اتحداك بكدي تحبها واتحداك تحسس بيها مثلي واتحداك راح تعشق انفاسها مثل متعشق انفاسي ونفخت بهدوء بوجهه ورجف حتى رجفته حسيتها
شفت هذا النفس لوو تموت متحب انفاس زوجتك مثل متحب انفاسي

غيث .. عطت بيها شجابج لخاطر الكعبه دمرتيني كرهت نفسي وكرهت اليوم الي حبيتج بيه
موج .. رايحه وبعد متشوفني بس دوم حط هذا الشى بالك كتله وبصوت واضح الله لايريحك ويه غيري
غيث .. رجفت من كلامها اكره ضعفي كدامها اكره نفسي لان تحبها اكثر الدنيا كلها
روحي موج ولا اني اريد اشوفج بعد
وراح احب زوجتي وادللها واعيش ويااها احس عيشه وانساج وامحيج من حياتي وراح تصير زوجتي هي كل حياتي

موج .. اتذكر كلامي اني هنا واشرت على گلبه اني هذا املكه وروح حب وعيش حياتك وبس يوم يمر اسمي او تسمع اغنيه جمعتنا او تصفن راح تتذكر امواجك الي يحب بهااي القوه والجنون عمره مينسى
وعفته وطلعت كوه امشي احس اكو شى بده ينزل عليه اريد بس اوصل للبيت

غيث .. كعدت اختنكت من كلامها طبت شهد
شهد .. هاي انت هنا الدنيا كلها تسأل عنك اخوك وابوك واصدقائك يله غيث كووم
شبيك ليش هيج تعبان وشنو هاي الدمعه الي بعينك صار شى

غيث .. مسحت دمعتي لا مصار يله امشي
وطلعت رحت للحفله مال الولد لان بالحديقة مسوين كعده وعشه

والكل فرحان واني بغير عاالم بالي وفكري كله يم موج وكلامها

موج .. رجعت للبيت واني اروح واجي وضعي تعيس وحالتي حاله مأساويه ودااحس عندي ولاده بس من كثر ماگلبي يوجعني واللالام بصدري من القهر احس فااق الم روحي الالام الولاده وبلحظه عطت متحملت واتصلت بعمتي

ام اكرم .. هااي وينج داادور عليج
موج .. الحكيني عمه اني رجعت للبيت يمكن صار موعد الولاده
ام اكرم .. من عزه العزاج ولج انتي بالسابع وينج وين الولاده

موج .. الحكيني موو وكت سوالف
ام اكرم .. اجيت وطلعت اركض
أم زيد.. هااا ام اكرم خيرج ياستار شو تركضين
ام اكرم .. هاي موج يمكن اجتها الطلوگه ودتجيب
أم زيد.. هي موبالسابع  بيج قصص غزوان علي
ام اكرم .. اي بس تكول صارت الالام ولاده الله يستر من رخصتج خيه ومبروك على ابنج
أم زيد.. مرخوصه وان شاء الله خير وتفرحينا بأبن اكرم
ام اكرم .. اي فدوه ادعيلها اهم شى الطفل يجي بسلامه
اجتي عمتي اخذتني واني ابجي احس هذا احسن عذر للبجي بقوه منا گلبي الي تكطع وزواج غيث ومواجهتي اله وضيااع كولشي بينا ومنا ولادتي وخوفي على ابني ليروح مني مشاعر هوايه ومتضاربه بس بذاك اليوم حسيت انتهت حيااتي

فتحت عيووني واني بالمستشفى ابني وينه
ام اكرم .. بالخير اجانه ولي العهد ولو من وراج اجانه سبيعي بس  الْحمدلله تاام الخلقه وحلوو بس شويه تعبان بالخدج بس طمنونا على صحتي

أكرم .. الحمدلله على سلامتج موج واخيراً صرنا اب وأم
موج .. اريد اشوفه
ام اكرم .. ممنوع هسه بس يصير احسن اجيبه الج ترضعيه
موج .. الحمدلله يارب خليتني اشوف ابني واملي عيني بيه يارب ساعدني اتخطى هاي المرحله من حياتي واقاوم الايام الجايه بحلوها وبمرها واربي ابني يارب ساعدني

غيث .. سمعت بموج جابت واني الليل كله ابجي مقهور لان راحت بعد وانتهى كولشي بينا تمنيت اليوم هي يمي تمنيت اليوم الطفل الي اجاها مني ليش كولشي تمنيته وياها معشته عشت عكسه ااااااخ ياگلبي شتتحمل بعد من حبها علمتني حتى على البجي

ود.. انتهت الحنه مال غتو واني مشفت هشام انقهرت تمنيت يشوفني شون حلوه طالعه كلت خلي اخذ التلفون مالتي حاطته بالمجر بالمطبخ واصعد وجان ادخل واشوف هشام گبالي

هشام ... طول فتره الحفله واني الوب ابد ممرتاح وخاصه من شفت خالد وعيني على الباب مااريد يدخل لداخل البيت وخاصه اني اعرف هو يدخل وعنده ميانه ويه اهل البيت ويدخل بدون استئذان
وكاعد تخلص ونشيل الغراض جان عمي ابوزيد طلب من خالد يجيب مي لناس خطار اني خفت لتكون ود داخل المطبخ وطفرت
اني عمي رايح اجيبلك
باوع عليه خالد صفح ومحجه شى
ابو زيد.. اخاف زحمه عليك ابني
هشام ... غير هذا بيتي ياعمي
ابو زيد.. اي والله ياابني بس اني كلت لخالد بحكم لان متربي عدنا ومتعلمين عليه
هشام ... ميحتاج اني موجود ورايح اجيب
اني ادخل من باب المطبخ واشوف ود كبالي مشفتها طول اليوم تفاجأت بكميه الجماال والاغراء الي هيه بيهم ضليت بس صافن عليها وهي تتقرب مني
ود.. محتاج شى هشام
هشام ... هاااااااا اي ابوج راد بطاله مال مي
ود.. كم واحد
هشام ... ١٠ بطاله
ود.. دنجت احضر اله البطاله اطلع من المجمده واحط بالصينيه وهو صافن وجان

هشام ... اباوع على تفاصيل جسمها خلتني ارجف واشتهيها وهلمره ادنج من اشتعل عمج مو جسم غضب والبدله تكطع عليها مفصله على  جسمها تفصال ذبت انتهيت متحملت وردت المسها
ود.. حسيت بيه اتقرب
وطخ بيه
انداريت عليه جان يحصرني حيل شطالعه
ود.. ابتسمت شطالعه
هشام ... حسيت على نفسي ومردت ارجع علاقتي وغزلي بيها وجان اگلب وجهي عليها
ود.. بالبدايه اني حسيته متفاجأ وحب شكلي شو من تقرب عبالك صار غير شخص حتى قهرني منه
هشام ... انتي متستحين شنو هذا صدرج طالع والبدله مجسمه عليج
ود.. غير حفله وكلها بنات وماكو ولد دخل
هشام ... تدرين جان هسه خالد دخل وشافج هيج لو ما اني نطقت وكلت اني اجيب المي هيج ماعندج مستحه ولا احترام لوضعج وانتي متزوجه
ود.. شبيك هشام شمسويه اني حفله اخويه والكل لابسات مثلي واني محترمه نفسي ومطالعه وحتى هسه من طبيت للمطبخ دااخذ التلفون مالتي واصعد ابدل وطول اليوم مشفت احد دخل

هشام ... مبين تريدين يدخلون ويشوفون جسمج وخاصه حبيب القلب اكيد كل هذا الترتيب اله
ود.. نزلت دموعي اشكرك هيج تشوفني موشريفه بحيث اظهر جسمي للرايح والجاي

هشام ... حجايتي جانت قويه بس مااكدر كل مااتذكر حبها لخالد انجن وخاصه لو محاجي اني وكلت اجيب المي جان اكيد شافها هيج احس الغيره سيطرت عليه وكمت مااشوف
لزمتها من جتفها بقوه يله لج كدامي روحي نزعي الي لابسته لا اشكه عليج يله
ود.. حاظر وصعدت اركض وابجي كسر خاطر توقعت يكولي طالعه حلوه اصلاً كل التحضيرات جانت اله
شهد .. يبوووو مو حفله تكول جنازه كل شويه شايفه واحد يبجي شبيج انتي هسه
حجيت لشهد الي صار
شهد .. حقه تره وخاصه تعرفين خالد من النوع الي يطب لبيتنا بدون استئذان وانتي مصلخه الصدر طالع والفستان ضيك طالعه تخبلين لو شايفج خالد ودره هشام جان يكتلج ويكتله خلاص جان المفروض اما تحطين شى على جسمج من اطبين للمطبخ لان متعرفين منو فجأه يدخل اما تبدلين وتلبسين شى مستور

ود.. ليش دوم اطبكين ويااه 
شهد .. لان حقه  وكلامه صحيح سامعه غلطت الشاطر بالف غلطتج حجيتي مشاعرج لهشام وراح كل ميصير شى يعيرج لهذا اتحملي بس سؤال شو احسج ترجفين على هشاام هاا ولج جنج حبيتيه
ود.. مشاعري متضاربه بس اريد رضاته اريد يسامحني يمكن هذا اكثر احساس مسيطر عليه
شهد .. اكص ايدي اذا مكمتي تحبيه واذكرج
ود.. خلي ابدل وانزل اكمل شغلي عفته وحده بالمطبخ
لبست تراك وردي فاتح وشلت شعري طلعت عبالك طفله ونزلت وجان الكااه ماكو بقيت كاعده بالمطبخ تمنيت يرجع حتى يشوف شلابسه ليش اهتم برأيه وبزعله كلت خلي الملم المطبخ شويه وسمعت صوت كلت اكيد هو وجان اشوف خالد كبالي اني جمدت وصارت بيه خوفه خفت من هشام وتذكرت كلام شهد وجان اندار داامشي واعوفه جان يحجي
خالد .. شونج ود
ود.. انداريت عليه الحمدلله انت شونك
هشام ... رجعت للمطبخ شفت خالد راح شبيت نار بس مدخلت ردت اسمع شراح يصير بينهم كلام الغيره والشك اكلو گلبي

خالد .. لهاي الدرجه ميعجبج حتى تسلمين عليه
ود.. ليش قابل شكوو انت مثل اخويه ليش مااسلم عليك
خالد .. اخوج
ود.. اي اخويه ليش اكو شى بينا غير هذا الشى
خالد .. بعدج ضايجه مني صدكيني
ود.. سكته رجاءاً مااريد افتح اي مواضيع راحت وانتهت اني هسه مره متزوجه وانت بحكم رجال متزوج
خالد .. مبين رجعتي لهشام سامحج على الي سويتيه
هشام ... تخبلت يعني يعرف بلي صار بينا
ود.. شى خااص بيني وبين رجلي انت مالك علاقه بيه
خالد .. اذا بينج وبين رجلج ليش خابرتيني بذاك اليوم
ود.. غلطه وصارت ومتكرر بعد اني مرتاحه ويه رجلي وهو انسان حباب ويحبني
خالد .. بس انتي متحبي
ود.. شى خااص بيه احبه لا بس للمعلومه اني بديت احبه لان صدوك هو الوحيد الي يستاهل حبي
هشام ... متحملت خفت لااسمع شى ثاني واكتلها خلاص طبيت وسويت الوضع طبيعي
هااا حبيبي كملتي
ود.. شفت هشام طب واني قطره دم مبقت بيه من الخوف هااا اي كملت
هشام ... اكو شى خالد محتاج شى
خالد .. سلامتك
ود.. مباشره طلع خالد وجان يخزرني هشام وتقرب مني تصعدين فوك ومتنزلين لااكسر رجلج وباجر بعد العرس اني الج موهسه مااريد اخرب عرس اخوج
ود.. والله مصار شى بينا والله
هشام ... صوتج مااسمعه رب باجر موجود واني الج
ود.. اسمعني فدووه والله مصار شى
جان يلزم كلاص ويكسره بالحايط ويعيط اصعدي فوك لااكسر الغراض كلها على راسج
شهد .. خير شبيكم ياستار
ود.. صاعده وصعدت اناشغ من البجي حيل انقهرت منه
شهد .. اخويه تهدى وكول ياالله شكاك انت العاقل
هشام ... ام حسن رحمه لأهلج هاي مااريدها تنزل جوه واعذريني اذا على صوتي وكسرت كلاص
شهد .. فداك الف كلاص اخويه المهم تهدا وادلل متنزل بس على كيفك . كروب قصص غزوان علي
هشام ... وكوليلها اذا باجر ملبست شى مستور حتى عرس اخوها مااخليها تحضره خلي تتجنب غضبي
شهد .. ان شاء الله ميصير خاطر غير طيب
ود.. صعدت بس ابجي ونمت والدمعه بعيوني
هشام ... طلعت افتر بالسياره ومخنوك شنوو خابرته وشرادت منه وشكالتله ليش ياود تخليني علج بحلك اصدقائي كرهت حتى نفسي لان تحبج شوكت اخلص من حبج ماادري

اسيل .. اليوم زواجي مدااصدك اني صرت زوجة غيث الانسان الي مستحيل اتوقع بيوم اكون من نصيبه شون الزمن اندار وجابني اله صح الطريقة مذله وحسيت اخويه رخصني بس لازم احاول آحـسن صورتي كدامه

غيث .. واكف كدام المرايه واعدل بالقاط مالتي وعيوني كل مااغمضها اتذكر دموعها رجفتها ريحتها اطلعي من راسي اطلعي لشوكت ابقى مسجون بحبج لشوكت

اسيل .. صارت الزفه وجان زواج عادي بدون حفله بس اجه اخذني من بيت اخويه كدام الناس ورحنا للفندق اول مدخلنا اخذني من ايدي وكعدني كدامه

غيث .. من وصلنا للفندق واني ممرتاح لازم اتقرب من زوجتي حتى ليكولون مو رجال لان مع الاسف يقيسون الرجوله بهذا اليوم بس اني مالي نفس بيها تقربت منها وكعدنا على الجربايه رفعت البركع باوعت عليها كلش حلوه مبروك
اسيل .. الله يبارك بيك
غيث .. حاولت اتقرب منها غمضت دابوسها جان تجيني رساله

اسيل .. اول بوسه الي والتوتر موطبيعي وخايفه وبنفس الوقت اسعد يوم بحياتي جان تجي رساله بس شفته توتر

غيث .. اجتني رساله وفتحتها وانهزيت
موج .. طلعت ثاني يوم الصبح من المستشفى وضعي زين بس الطفل بقى بالخدج واني نايمه جان اسمع المزيقة اووويلي ربي ارحمني ليش هذا العذاب يعني تمنيت مااسمع الهوسات ولا اشوف زفتك بقيت ابجي والطم على وجهي تهسترت ولازمه صدري وافرك بيه اختنكت اريد هوا طلعت اركض واني تعبانه وطالعه من ولاده طلعت للسطح كعدت بالكاااع
وابجي واسمع المزيقه واباوع على رب العالمين واكوله رحمتك ربي دااموت لو تاخذ عمري لوترحمني من عذابي اني قليله الحيله وضاق صدري من الظلم الي مريت بيه ساعدني احلفك بحبيبك ونبيك المصطفى ارحمني هون عذابي دااتكطع بقيت على هذا حالي مااعرف ساعات يمكن

وصار المغرب ومحد اجاني ولا حتى احد استفقدني لان عمتي واكرم بقوا بالمستشفى يم الطفل رجعت للغرفه واخذت التلفون
وجان ادزله رساله حسيت بيه يمها كمت اتخيل يلمسها يشمها يحضنها والنار تاكل بيه وجان اكتبله

أعلم انك لست لي ولكن ماذا أفعل بقلبي 💔
ارجوا عندما تضمها تشم عطرها وستعرف في ذلك الوقت انك خسرتني للابد وانك لن تشم عطري ولن تتنفس انفاسي ولن تلمس جسدي استمتع بجسد غيري ولكن لن تجد بجسدها عاطفه وحب كحبي ولا حراره كحراره روحي ولا قبله كقبلة شفتي الممتلئه بالحب والعشق والهياام ولا قلب ينبض بقوه كنبضي عندما تعانقني تذكرني ياحبيبي وقارن وستلاحظ انها لستُ انا 

غيث .. طلعت بالبالكون مال الغرفه واتصلت عليها
الووووو
يتبع ...