رواية بين العقل و الطريق الفصل الثاني عشر 12 - بقلم غزوان علي

بين العقل والطريق
للكاتب غزوان علي
البارت الثاني عشر

الندمِ ليّس فِي العشّقْ ، و إنمآ الندمِ علىٰ منْ نختآرهم گ ( روحٍ ) تسّگُن أجّسآدنآ...!

خالد .. اليوم زواج ود وقبل بيوم عرفت من غيث بطريق الصدفه متوقعت بهاي السرعه زواجها بقيت للصبح بالشارع افتر احس روحي ضاعت احس مدااتنفس كل هوا الله موجود ومااتنفس ليش هيج اني ضعيف ليش معرفت احتويها واحافظ عليها واجه العصر واني طير مذبوح ومثل المخبل معرفت شسوي ومشفت نفسي غير اروح حتى اشوفها يمكن لأخر مره وياريت مرحت حجت حجي خلتني طول عمري اتذكره ويحفر بقلبي بدون رحمه

دخلت للبيت وكان الكل ملتهي شفت محد انتبه دكيت الباب
ممكن ادخل
ود.. انصدمت على جرئته شون گلبه انطاه واجه يشوفني
خالد .. بحكم ميانتي ويه العائله طلبت من شهد تراقب الوضع
اذا مصارت زحمه ام حسن بس عندي كم كلمه ويه ود بس شوفي اخاف احد يجي
شهد .. ماشي بس لتتأخر
خالد .. لا مااتأخر تسلمين انداريت عليها
مبرووك
ود.. الله يبارك بيك يوم الك
خالد .. جان المفروض هذا اليوم احلى يوم بعمري وتكونين متحضره الي
ود.. المفروض وشى ومصار شرايد خالد وليش جاي
خالد .. جاي اكولج اني احبج ومو حب عادي احبج بجنون وجنت اتمنى تكونين زوجتي وضيعتي كولشي برفضج الي بذيج المره ومتعرفين شكد هسه تعبان وداموت من القهر واني اشوفج تنزفين لغيري

ود.. انت جاي بهيج يوم تكولي احبج حتى تخربه اليه وتخليني اتعس عروس وماانسى هذا اليوم بعمري موو
خالد .. هذا واقع وردتج تعرفين شضيعتي بتصرفج هذا مرتين غلطتي مره من رفضتيني ومره من قبلتي بهشام

ود.. اذا انت بالك تضيعلي احلى يوم المفروض البنت تعيشه ابشرك ضاع وراح ابقى بس اتذكر كلمه احبج منك
بس اني راح اضيعلك عمرك كله واكولك تعرف انت شنو بالنسبه اليه . كروب قصص غزوان علي
انت الحلم الي تمنيت اعيشه تعرف شنو مشاعري تجاهك اني احبك لا موبس احـبك اعشقك واصلاً من يوم مفتحت عيني وعرفت معنى الحب حبيتك انت حب عمري وحب مراهقتي تدري من شوكت احبك

خالد .. رجفت من كلامها هزني هز انتي شكعد تحجين
ود.. خليني اكمل تعرف من شوكت احبك من اني وعمري ١٦ سنه حافظت على نفسي لأجلك جنت اشوف الشباب كلهم انت حتى مراهقتي معشتها ولا حبيت ولا صادقت لان جنت احبك اني حاولت بكل الطرق الفت انتباهك وانت تعاملني كأخت ورضيت وكلت يجي يوم ويحس بيه ومن دخلت للكليه وحياة جديده وناس وشباب اشكال والوان ومغريات منهزيت ومن بينهم هشام شكد حاول لان جنت دوم اكول اني لخالد
تعرف شنو شعور وحده تحب واحد يوميه يطب ويطلع وياكل يمهم ومحاس بيها ويعتبرها اخته

تعرف شنو شعور وحده تنام. والدمعه بعينها من تشوف الكل يتمناها وهي تتمنى كلمه وحده من الي تحبه وهو محاس ولا معبرها
عشت ٦ سنوات يااخي اتمنى نظره منك نظره وحده من تصيح بأسمي تكول عبالك ملكتني الدنيا عشت لحظات اتمنى بس تباوع بعيوني عدا الايام الي اقلق بيها من تتأخر انت وغيث بره وارجف والخوف عليك كاتلني اني حبيت حتى برودك ويايه لو تعرف شنو الي جنت احسه وياك مراح تتحمل

خالد .. وليش محجيتي لتخبليني وكمت اعيط
ود.. اعصابك خليها الك لان متفيد فات الاوان على كولشي خالد انت حبيتني بلوقت الضائع ويوم محاولت تملكني حصرتني بأيدك ً وكسرتني مكان متحتويني دمرتني

خالد .. لزمتها من جتفها واهز بيها واعصاب ومنتهي وارجف
ولج ليش ود كل هذا الحب وساكته
ود.. نزلت ايده رجاءا لتلمسني لتنسى اني على ذمه رجال
خالد .. يارجال مااخليج اليوم اطلعين منا وتروحين مني لو الدنيا تنكلب
ود.. متكدر انت واحد جبان
خالد .. احترمي نفسج شنو جبان
ود.. اي جبان محاربت لخاطر حبيبتك اكتفيت تتفرج عليه واني انخطب وانزف لغيرك
شهد .. صوتهم عالي راح يسمعوهم ونتصخم فتحت الباب ومديت راسي يمعودين فضوها اذا عرف احد تصير كارثه

خالد .. اعيط واحجي خلي تصير كارثة اليوم ود متصير لغيري

شهد .. يمعود خالد استر علينا شجاك
ود.. فدوه شهد ثواني بعد
شهد .. ماشي بس نصو صوتكم وطلعت وسديت الباب
خالد .. اليوم متزوجين لو على جثتي

ود.. ضحكت بستهزاء انت من كل عقلك اني انطيتك كل هاي السنين حتى ولو مره تحسس بيه ومحسيت وحتى بعد هاي الاحداث الاخيره سألتكً شأسوي شنو رأيك وجان جوابك يخبل الي تشوفي صح سوي وهذا الصح خالد وكاعد اسوي اتزوج رجال حارب الدنيا كلها واخذني

خالد .. بس هشام ميناسبج انتي كعد تغلطين غلطت عمرج هذا واحد مراح يسعدج راح يدمرج افهمي
ود.. فهمت بس متأخر فهمت حبيت واحد حرامات خلصت عمري كله افكر بيه
انت خسرتني وهذا كله من ايدك ترددك وخوفك وطريقة تصرفك هي الي خلتني اقبل بهشام على الاقل كولي لتوافقين كولي احبج انتظريني لتروحين والله جان انتظرتك العمر كله بس انت متكدر تكسر كلام اهلك ومتعرف تتصرف وبارد وتريد كولشي يمشي على هواك وبهدوء الحياه تمشي خالد وانت واكف تنتظر هي تنطيك والحياه عمرها متنطي الحياه تاخذ وبس وهذا اول شى اخذته منك حبيبتك

لهذا رجاءاً سد الموضوع واتمنى تطلع ماكو حجي بينا والزفه راح تجي عن قريب ومااريد احد يحس
خالد .. بجيت متحملت الموقف وحضنتها ود لتروحين عفيه بيش احلفج لتروحين وتعوفيني ولج والله احبج وروحي بيج وغلطان بحقج سامحيني بس لتتزوجين لطلعين واني هسه اكول لأهلج كولشي ومااخلي الزواج يصير

ود.. دفعته مني وبجيت جاي متأخر خالد دومك متأخر عفيه كافي تعبت اطلع بره
خالد .. ود سمعيني
ود.. مااسمع اطلع بره عساك دوم گلبك محروك مثل محركت گلبي روح خالد اتمنى من الله انساك وانسى حبك وانت عساك تبقى دوم تحبني وتعيش بعذاب ادعيها من گلبي لربي
خالد .. فدوه لتروحين اترجاج والله الي تريديه اسوي
ود.. واني الي ردته منك كلمه وحده ومكلتها
ردت كلمه احبج وانتظرتها ٦ سنوات
خالد .. والله احبج وهسه اجيت وكلتها
ود.. روح خالد جاي بيوم عرسي وتريد اخزي اهلي مكافي الي صار قبل بسببك وتريد اعيد واكرر الي صار لو اموت مااحط ابويه واخوتي بهذا الموقف كافي مره صار ومااكرره ولتنسى اني متزوجه يعني حتى ميحقلي احجي بعد  ان فاتك الزاد كول هني اطلع رجاءاً اطلع مااريد اشوفك
خالد .. حاولت وياها وهي قافله ود اسمعيني
اطلع بره عفيه كاافي ارحمني كاافي وكمت ابجي بقوه وكعدت على الجربايه
خالد .. متحملت منظرها دنجت بست راسها وكتلها اتمنالج حياه سعيده انتبهي لنفسج وطلعت
ود.. من طلع كمت اعيط ودخلت شهد تركض وحضنتها ليش اجه مكافي الي شفته منه ليش ليش
شهد .. اشش حبيبة قلبي على كيفج ويه نفسج وباعي حالج لابقى مكياج وحالج كله تخربط اذا اجتي امج والبنات وندى شنكول الهم يمعوده كافي . بيج قصص غزوان علي
شفتي شهد هسه جاي يكولي احبج دمرني الله يدمره لو محاجيها احسن اقلها ابقى طول عمري اعرف بأن حبي غلط لان من طرف واحد شفتي شسوه بيه

شهد .. كافي ياعيني كلها قسمه وهذا الولد مو من قسمتج
ود.. اني صوجي جان المفروض ماارفض ذيج المره
شهد .. لتكولين صوجي انتي دافعتي عن كرامتج ولو متزوجج بذاك الوقت الله اعلم شنو الي جان صار او شنو نوع العلاقه الي بينكم احتمال بدا يحس يحبج لمن فقدج لو متزوجته بذاك الوقت يجوز بقى العمر كله يتعامل برود وياج الي صار صار ود وكافي حاولي تنسين صرتي على ذمه رجال وحاولي تسعدين روحج تره هشام يحبج
ام زيد.. يمعودات يله تأخرتوا هااا يمه شبيج اسم الله ليش هيج حالج

شهد .. عمه ماكو شى بس تبجي عليكم تعرفين بعد عروس وتبجي لان راح تفاركم
ام زيد.. سوده عليه تعاالي
شهد .. هاي شنو عمه مكاني متهديها تحضنيها وتبجين وياها
ام زيد.. هاي اخر العنقود دلوعت امها وراحت منها
شهد .. لا اسم الله ادعيلها بالسعاده وراحه البال
ام زيد.. يارب بجاه حبيبنا المصطفى يسعدج ويهنيج يابنتي ويبعد عنج العين والحسد والناس الموزينه
شهد .. امين يله ود كافي عوفي عمه خلي اعدلج المكياج
ود.. عوفيني بحضنها لحد ميجون
شهد .. سحبتها ولج كافي دلال يله وعدلت وجها
ود.. ماما وين صارت ندى يعني يصير هيج اختي الوحيده ومتجي عرسي والله اذا مأجتي لااعرفها ولا تعرفني
ام زيد.. والله هاي البنيه ورمت گلبي مدري شجاها لا بالخطوبه اجتي وهسه راح يجون الزفافه والخاتون ماكو وادك عليها ومتجاوب راح ادز غتو عليها والله بس تجي اله العب بيها طوبه
شهد .. اجوي يله انزلي
ود.. ونزلت بخطوات بطيئه بأتجاه المجهول وگلبي يبجي دم على كل الي عشته وصار گبالي هشاام ولزم ايدي وباسها واخذني من ايد بابا
ابو زيد.. هاي بنتي امانه عندك اذا لمست شعره منها ادمرك متعرف ود شنو غلاتها عندي
هشام .. لتخاف عمو بعيوني يله گلبي امشي
ولازمها بأيدي وممصدك واخيراً صارت الي

يمكن تعرفتوا عليه بس عن طريق ود واكيد قدمتني بصوره بشعه بس لازم اعرفك عليه
اني هشام علي الكبيسي من عائله معروفه واصله سواء بالحاله الماديه او بالسلطه
استاذ جامعي معيد بكليه الاداره والاقتصاد قسم محاسبه شكلي اسمر معاني عاديه مثل اي شاب  جيد وسيم نوعاً ما طويل طولي ١٨٤سم جسمي جيد رشيق بس مو بضعف  احب الاناقه واللبس روحي بالملابس يوميه شكل احب انوع وبأحدث الماركات ساكن بيت اهلي بغداد منطقه اليرموك عائلتي هم ابويه الله يحفظه عقيد بالجيش انسان ملتزم جداً ومحترم واله شخصيته وكلمته الي محد يتجرأ يكسرها وامي الحنينه ربة بيت خريجه سادس اعدادي وعندي اخ اسمه مروان عايش بالنمسا كل سنتين ينزل اجازه شهرين هو وزوجته بنت عمي اسمها ساره وعدها بنوته حبيبة عمها دارين وعندي خوات اثنين وبعدهم طالبات جامعيات وحده اول كليه والثانيه ثالث صفا وبلسم

اني بطبعي انسان شخصيته قويه والي يريده يحصله لو مهما كان بسبب توفر كلشي الي كدرت فعلاً احصل الي اريده اله هي ااااااه منها جذبت انتباهي من اول يوم هادئه كلامها مشيتها وحتى ابتسامتها بهدوء اني بمراهقتي حبيت بنت جيرانه وحبيتها حب موطبيعي وتعرفون مراهق ويدخل بكل ثقله بالمشاعر وجنت احلم واخطط وياها هيج اعيشج وهيج اشتريلج وحتى جنت اصرف عليها هدايا وطلعات وطاير طير بيها ومااشوف بعد سنتين حب بيوم اسمع مزيقه وحضرت جنابها تتزوج واحد اكبر منها ب١٨ سنه تخبلت بيومها وكمت ابجي وحتى حاولت الانتحار لوما ابويه بوقتها كعد ويايه وضل يحجي واحتواني وطلعت من هاي الازمه بأعجوبه وبوقتها جان عمري ١٧ سنه ومن وقتها كلت ماكو وحده شريفة وكل مااتقرب من وحده واكول هي هاي الي راح تغير مفاهيم عقليتي وتغيرني تزيد شكي بالبنات اكثر ومن كم مراسله تنطيني كولشي الي اريدها حتى امارس وياها وفلوس انطيها حتى اكو بنات شريفات وبنات عوائل ماكو كم مكالمه وتسلم نفسها اليه حتى بعدني مملحك اتعلق بيها والكاها زباله وارجع لنقطه الصفر

ومرت السنين واني هذا حالي من بنيه لبنيه لحد مصارت سمعتي زير نساء والمصيبه البنات كاتلات نفسهن عليه رغم يدرون بيه العب ومو مال زواج بس مستقتلات وبقيت سنه تجر سنه وتخرجت بدرجه امتياز وتعينت معيد ومن شفتها خطفت گلبي وبقيت اراقبها لأكثر من سنتين وشفتها هادئه وعاقله وسألت عليها طلعت بنت ناس راقيين وخوش ناس وحاولت بالبدايه اتقرب منها كعلاقه ومن رفضتني يبوو لزكت ورجعت تقدمت على اساس اتزوجها وهم رفضت كلت هاي هيه لو هيه لو مااريد بس اني اتصرفت خطأ ماانكر لان حسيتها راح تضيع مني وجان اكبر غلط اشوه صورتها متوقعت الامر هيج يكبر اعرف بخالد هو صديقي من ايام الدراسه عرفت بيه صديق اخوها الروح بروح وسويت الخطه الي المفروض تجبرها تتزوجني بس هي طلعت شاطره ومكان متوافق بسبب الظروف رفضت وبقوه وهذا الشي كبرها بعيوني وحاولت احسن صورتها بالكليه صارت روحي بيها وكلت لازم ارفع راسها وتقدمت كدام الطلاب ورجعت جبت العشيره كلها لعيونها المهم توافق ومن وافقت مصدكت وهسه هياتها بين ايدي وماخذها لبيتي صعدت بالسياره ورايحين للقاعه سويت الها حفله هيبه وتجنن تلوك بحبيبتي الاميره وممصدك يمي كاعده احسه حلم وخايف اصحه منه على كابوس

عاصم .. ندى گلبي اكعدي ندى والله موقصدي واضرب على وجهه فدوه اكعدي والله اوديج لعرس اختج بس كومي وهي ماكو حركه منها شلتها وركض للمستشفى وكمت اعيط الحكولي
الدكتور .. شبيها
عاصم .. عثرت وكعت على طبله جبيره مال جام
الدكتور .. بسرعه للطوارئ وحضرولي غرفه العمليات
عاصم .. يارب ساعدني اني احبها ومااريدها تموت مااتحمل بدونها وابجي ومااعرف اتصرف واتصلت بزيد يدك ومحد يشيله
و٥ مكالمات وماكو رد
اخر شى اتصلت بغيث رد
غيث .. اهوو هذا الحقير خلي اجاوبه وهم ارزله ليش مجتي ندى
هاا عاصم
الحكلي غيث
ولك شكوو شبيك تبجي
عاصم .. ندى بحاله خطره بالطوارى ندىً دتموت
غيث .. وكع التلفون من ايدي شلته وارجف من الخوف وركض على ابويه وزيد
وكتلهم ابويه مباشره كام يبجي انتهى وركضنا للمستشفى بس زيد اتصل بشهد وشهد عاطت ومنتبهين عليها امي ود
ود.. كاعدين بالقاعه والعالم تركص وفرحانه واني بغير عالم وافكر بوضعي وبكلام خالد ومااحس غير شهد تعيط امي رزلتها رادت تعرف شكوو سكتت وجان تكول ندى بالمستشفى بين الحياه والموت وطفرت من مكاني جان ام هشام تكول
وين بنتي لتنسين انتي عروس والعالم كلها جايه حتى تهنيكم لتحرجينا
ود.. بجيت خاله فدووه هاي اختي الوحيده واخاف يصير بيها شى
ام هشام .. صحيح ماالومج بس انتي هم قدري ظرفنا انداريت على هشام
هشام .. اول مره اشوفها تبجي يمه گلبي راد يوكف لتبجين امشي اوديج وطز بالعرس كله واخذتها من ايدها وكمت
ابو هشام .. ابني اكعد عيب لتحرجنا ناس جايين يباركون وكلهم ناس واصلين وراقيين عيب هذا التصرف
ود.. شفت هشام انحرج مردت اضغط عليه بس اني ميته على ندى كتله خلينا نبقى عيب من اهلك حقهم
هشام ..ود الي تريديه يجرالج بس لتبجين
ود.. خلينا هسه والحفله اختمها من وگت
هشام .. تدللين المهم لتبجين
وبقيت كاعده طول الحفله متوتره وخاصه امي راحت ركض للمستشفى بس شهد بقت يمي
هشام ... شفتها كاعده على نار طلبت من صديقي مجتبى ينهي الحفله وماكو ١٠ دقايق وانتهت والناس بدت تودعنا
ود.. لزمني هشام  من ايدي يله واستحيت اكوله وديني وخاصه الدنيا كلها مگلوبه مزيقه وصعادات وطلق واصدقائه كلها فرحانه واصدقاء ابوه كلهم ناس عقداء والويه سكتت بس غصه بگلبي

هشام ... صعدنا بالسياره مالتي وهي بصفي
دودي حبيبي
ود.. نعم
هشام ... باوعي عليه لتبجين والي تريديه يصير
ود.. سكتت ومفهمت شنو قصده وتمشي السياره وصلنا لبيت اهله والمفروض ننزف بفندق
هشام ... انزلي گلبي بدلي على السريع وخلي اخذج لأختج
ود.. صدوك
هشام ... يله لتأخرينا ادخلي بسرعه
ود.. نزلت وهو بقى بالسياره حتى لنتأخر واجتي اخته بلسم دلتني على الغرفه وصعدت بدلت بسرعه لبست جينز وقميص وفتحت الي اكدره من الماشات لان تارسه شعري ترس حتى مكدرت اسبح وامسح المكياج حتى مااتأخر
هشام ... مردت انزل وياها لان مااتحمل بس اشوفها بغرفتي لازم اخذها من كثر ممتمني هاي اللحظه مردت أخذها وهي هيج نفسيتها تعبانه
واجتي من فدووه شتلبس تخبل وشفت واحد من دكم القميص مفتوح مديت ايدي وتقربت عليها اووف ياريحتج
ود.. تقرب مني وخفت منه وجان يمد ايده من جه صدري وكولش تقرب وجان يسد الدكمه وهمسلي
ريحتج شكد طيبه
ود.. استحيت ودنجت . كروب قصص غزوان علي
هشام ... من فدووه للي يسحتي واخذتها واول مطبينا للمستشفى ركضت على اخوها غيث وحضنته والله غرت شبيه غير اخوها شوو اغار عليها حتى من اخوها
ود.. شبيها فدوه ندى احجي
غيث .. شجابج تخبلتي انتي عروس ولازم الليله يم زوجج
ام زيد.. اعذرنا يمه صارت بوجهك
ابو زيد.. ابني اخذ مرتك وارجع ميصير بهيج ليله تجون هنا
ود.. مااروح مااروح
زيد.. موبكيفج عيب من العالم مفكرت بأهله
هشام ... اني كتلها وميهمني احد المهم هي ترتاح وراحتها تشوف اختها
طلع الدكتور انتم اهلها
ابو زيد.. اني ابوها وذوله اخوتها وهذا زوجها
الدكتوره ... المريضه متعرضه لضربه كولش قويه والجام داخل بمناطق خطره بالراس وضارب وتالف هواي من الاعصاب لهذا وسبب عدها نزف داخلي ومااخفي عليكم المريضه حالتها خطره ادعولها

غيث .. كمشت عاصم شسويت بندى احجي
عاصم .. شسويت كتلك جنت طالع رجعت للبيت شفتها واكعه على الجامه مباشره شلتها وركضت بيها
ام زيد.. والجهال وين
عاصم .. خابرت امي واجتي اخذتهم ليضل بالج عمه
ام زيد.. تحجي بگلبها ) من عمه الي عماك ومن ساعه السوده الي شفناك بيها
ود.. بقينا كلنا بالمستشفى والولد صايرين نار على ساعه يكتلون عاصم واني تعبت وكاعده وهشام بصفي
كتله ليش متروح للبيت احسك تعبان
هشام ... شون اعوفج وحدج
ود.. اهلي يمي لتخاف
هشام ... واني زوجج من حقي اوكف وياج
ود.. ابتسمت وكتله شكراً وشويه ومنحس غير خالد يجي يركض على غيث مااعرف منو كايله ومن شافني تفاجأ وبصفي هشام حتى مسلم لان من يوم المشكله وهمه ميتحاجون بس وجهه تعبان وضايج وتحسه بركان ويريد يطك

غيث .. كاعد واتصلت موج وبلغتها عن ندى وكولش انقهرت بس حسيت صوتها موطبيعي
احجي موج بيج شى
موج .. لا سلامتك گلبي
طبعاً بعد الطلاق عانيت من اخوتي ممنوع الطبه والطلعه وحصره الزم التلفون وهاي دعاء الحقيره متوب مني يوميه مشكله تعبت كولش مكعد تعوفني بحالي  عده شغل البيت الي انذب براسي وهي كولشي متسوي وكل مااحجي تكولي هذا الموجود قابل تكعدين رجل على رجل وتسكتين اووف منها شوكت اخلص

هاي الفتره گلبي يوجعني ومااعرف شبيه حاسه بتعب عجيب وروحي مايعه ومااعرف شبيه ودوم گلبي مقبوض
ومردت ازيد هم غيث رغم جنت كولش محتاجه اله بس سكتت وبينت اله مرتاحه بس ااااه منك ياغيث دومك تحسس بيه

غيث .. شوفي امواجي اني اعرف بيج تعبانه ومتحبين تزيدين تعبي بس لتنسين اني منو اني حبيب الروح وحبيب الروح يحس ويعرف بكولشي بداخلج منو متعبج يانظر العين
موج .. غيث اني كولش احبك
غيث .. واني اكثر يقلبي بس كوليلي شبيج تره بديت اقلق
موج .. سلامتك ياروحي انتبه لنفسك وطمني على ندى
ان شاء الله گلبي
احبج موت موت
واني اعشقك ياروحي
ود.. تعبت ومحسيت غير نايمه وعلى جتف هشام
خالد .. من طلعت من ود رجعت للبيت اعيط اتهسترت غرفتي كسرتها
اسعد ... شبيك تخبلت
ام خالد ... عوفه يمه هو من وحده يسكت
اسعد.. يمه كاعد تشوفين وضعه ليروح يأذي نفسه
ام خالد .. اني ربيت زلمه مو مره وهسه تعبان وراها بفتره راح ينساها من يتزوج بنت عمه
اسعد.. يعني مصره تزوجيه زهره
ام خالد .. راس الشهر المشيه مال اخوك
وهو يمه منو يكول يقبل
اذا ماقبل لاهو ابني ولا اعرفه حتى من البيت اطرده خلي ينجب ويصير زلمه حوك شنو يبجي على مره
اسعد .. والله يايمه لورايحين خاطبيها اله وفاضيها
ام خالد .. اسكت انت الثاني المره الي توكف بنص الزلم وتكسر كلامهم ماتكون جنتي ولا راح تكون مره حوك لرجلها
اسعد .. يمه الوكت تغير والبنات مو مثل قبل هسه البنات يدرسون ويشتغلون وينافسون رجال بكولشي حتى بالحكم حتى بالبيت يمه المره والرجال هسه سوه بكولشي
ام خالد .. اني مااعرف هاي السوالف اني اعرف المره بيتها ورجلها وجهالها وبنات هذا الوكت المدلعات مايفيدني لهذا كيفت من مصارت قسمه اخيك
يمه ديعيط ويبجي خلي ادخله فدووه ليصير بيه شى
ام خالد .. داكولك عوفه
اسعد .. اووف يمه ليش هيج قاسيه
ام خالد .. اني موقاسيه اني اعرف مصلحه ولدي لان كبرت وربيت ومامستعده انطي رباي للمدلعات
خالد .. لج ليش ياود عفتيني اموت بلياج
وابجي واشهك وحاضن صورتها عندي صوره مره لكيتها بسياره غيث واخذتها بدون ميدري واحجي وياها انت هسه بحضنه يشم بيج نااااار ربي نااار بقلبي الغلط مني مادافعت عن حبنا مااخذتج من ايدج غصب عن الكل اني صدوك جبان حجيج صحيح اني جبان ومابيه خير وهاي نتيجتها خسرتج
وابجي ومتأذي وخابرني غيث بالبدايه مجاوبت وبعدين من لح مردته يحس لان اذا مااجاوب راح يجيني للبيت اعرف بيه

وعرفت ندى بالمستشفى ندى اعتبرها اختي احنا نعتبر اهل ورحت اركض للمستشفى واتفاجأت شفت ود وهشام حتى مكدرت اسلم وطول الوقت كاعدين مقابيلي مدااتحمل مره اطلع بره ومره بالكافتريا اختنكت وكعدت بعيد عنهم شفتها تعبت وحطت راسها على جتفه لوبيدي اكوم اوخرها واوكلها انتي مالتي
احس هاي المواقف الي كاعد تصير عقاب الي على خسارت حبها

هشام ... حطت راسها على جتفي ورجفت وبقيت خايف عليها لتتعب وكعدتها دودي ود اكعدي گلبي
ود.. طفرت اسفه ماادري اذيتك
هشام ... تقربت عليها لا گلبي بس نومتج هيج تأذي رگبتج واخاف عليج تعالي ارجعج للبيت تنامين وراها اجيبج من الصبح
ود.. فدوه هشام بقيني مااكدر اعوفها

هشام ... لتبجين موو كتلج دموعج مااتحملها ماشي نبقى تعالي اخذتها من ايدها وكعدتي بشكل زاويه وسحبت راسها حطيه على جتفي يله نامي
ود.. هااا موو اخاف تتأذه وعيب من الناس
هشام ... ماكو احد وهاج نزعت الستره خطيتها بيها يله ناميلج شويه
ود.. وانت
هشام ... اني رغم زعلان على اختج بس والله يمكن اسعد لحظات حياتي لان انتي نايمه بحضني
ود.. دنجت استحيت منه وسكتت مكدرت اجاوب وحطيت راسي على جتفه ولان تعبانه منايمه صار يومين وبس بجي وقهر مباشره نمت
خالد .. مدااتحمل طلعت بره واشتريت جكاير رغم صاير سنين تاركها واشرب وحده ورايه الثانيه ومديبرد نار گلبي وهلمره بحضنه تناام متحملت الموقف وبقيت بره مااكدر ادخل
ود.. نمت مااعرف يمكن ساعتين وكعدت لكيت هشام مخلي راسه على راسي ونايم كعدته وكتله رايحه اغسل واجي
هشام ... اجي وياج
ود.. لا تسلم مااتأخر
ورحت غسلت وهاي ساعه ٤ الصبح وهدوء المستشفى تمشيت طلعت بالحديقة

وشفت خالد كاعد ويدخن صار شكد هو تارك التدخين شفته درت وجهي ورجعت جان يركض بأتجاهي ويلزم ايدي
اااااخ عوف ايدي شبيك

خالد .. اوكفي انتي ليش هيج تسوين
شسوي
تحركين گلبي تثيرين غيرتي
ود.. لا اكيد انت موطبيعي انت تعرف احنا وين ولشنوو احنا بمستشفى والسبب اختي بين الحياة والموت يعني من كل عقلك اعوف اختي وبضروفها وافكر بحضرتك واثير غيرتك
خالد .. لعد شتسمين تصرفاتج
ود.. اني ممصرفه شى غلط
خالد .. شنو تنامين بحضه ويلمسج ليش تسوين هيج كدامي مفكرتي بيه مكلتي هذا كاعد اخاف يتأذه يموت بسبب هذا الشى.

ود.. تتأذه والله ضحكتني شبيك خالد اصحى تره انت من اليوم متهمني الي يهمني هسه وضع اختي انت دومك هيج اناني متفكر غير بنفسك خلي اروح احسن
خالد .. اي روحي لزوجج
ود.. انداريت عليه اقلها كدر يحارب الدنيا وياخذني مو مثل غير ناس
كام يعيط ويسب عفته وطبيت اركض خفت ليجي هشام وتصير عركه مابيه حيل
ومشيت وصار هشام كبالي متت خوف وكمت ابلعم
حبيبي شوو تأخرتي
هاااا لا بس جنت اغسل .. بيج قصص غزوان علي
هشام ... وين جنتي هاي مو جهه المغاسل
ود.. جنت بالحديقة شميت هوا وطبيت
هشام ... يله تعالي مااريد تبقين وحدج
بگلبي احجي  الْحٍمدلله عدت على خير والله هبطه
عاصم .. خايف لااروح اخسر ندى وعدت ربي بس تكوم بالسلامه ابطل الشرب وكولشي يارب بس كومها بالسلامه اعقل وكولشي مااسوي موزين ندى لتعوفيني

ود.. بقينا يومين ورجعت لبيت هشام وبس بدلت وغسلت وحسيت امه وخواته كالبين وجوهم وسمعت هشام يحجي ويه امه
ام هشام ... يعني صار سنين اتمنى اشوفك عريس ويوم مااشوفك تكضيها بالمستشفى مكان ماصباحيتك اجيبها للفندق وافرح بيك تكضيها بكافتريا المستشفى شنو هاي المهزله
هشام ... ياامي البنيه حقها اختها يعني موو وحده غريبه ولازم اراعي ضروفها ولتخافين اني مرتاح
ام هشام ... بس اني ممرتاحه واشوف ابني هيج متبهذل
هشام ... لتخافين دااكولج مرتاح وخلي اروح اسبح وابدل واخذها واطلع
ام هشام ... هم ترجع شطلعت هاي والخطار الي يجي يسأل شنكول اله يمه العريس يستجم بالمستشفى
هشام ... بست امي وكتلها كوليلهم مسافر ياامي انتي ام الخطط الحلووه تفوتج هيج فوته يله تأخرت
ام هشام ... اووف منين الله جابها علينا مخبله الولد
هشام ... طبيت لكيت ود كاعده على الجربايه والدمعه بعيونها كعدتها مقابيلها شبيها الحلوه مالتي
ود.. موقصدي اتصنط بس جان صوتكم عالي وسمعت خاله شتحجي
هشام ... حبيبي عادي اكيد تحجي ام وخايفه على ابنها ان شاء الله من تصيرين بعمرها راح تخافين على اولادج مثلها واكثر

ود.. هي اكيد كارهتني
هشام ... وليش تكرهج گلبي امي گلبها طيب صح مرات عصبيه بس والله ماكوابيض من گلبها
ود.. خلي منروح للمستشفى عيب منها واخاف يجون خطار
هشام ... لزمت ايديها وبستها بهدوء وشميتها حبيبي اعرف من راح تبقين مراح ترتاحين واني كله ولا راحتج
ود.. واهلك
هشام ... مالج علاقه بيهم ويله راح ادخل اسبح ونطلع
ود.. مااشي
بقيت افتر بالغرفه مالتي حلوه والوانها هادئه ومرتبه ترتيب راقي نوعاً ما حبيتها بس متوتره مداارتاح من قرب هشام بعدني ممتقبلته رغم ديحاول يسعدني ويوكف بجانبي وطلعنا للمستشفى والكل متوتر
ومنحس غير عيطه قويه من امي
غيث .. شبيج يوم
ام زيد.. راحت بنتي ولكم راحت الغاليه
الدكتور .. البقاء في حياتكم

هشام ... من سمعنا الخبر جان توكع ود مااعرف احير بأهلها المنهاريين لو بيها شلتها وركض للطوارئ طلع عدها هبوط حاد بالضغط وانهيار عصبي
وفزت من النوم
ندى ليش عفتيتي ولج ماعندي غيرج اخت هاي تاليتها تعوفين اختج اني منو الي منووو
هشام ... حرام گلبي هذا الحجي هذا امر رب العالمين كلمن ويومه ولزمت ايدها كامت تلطم على وجهه وتعيط اهدي راح تموتين ولج كاافي
ود.. عوفني اريد اموت وياها هاي أختي وماكو اعز من الاخت
ندى ارجعي فدووه لتروحين جهالج المن عفتيهم اني المن عفتيني المن اشكي ويه منو اضحك وانتي قطعه من روحي وشلعتي روحي وعفتيني وطفرت من الفراش وركضت
هشام ... يمعوده اوكفي متت قهر على وضعها تركض بالمستشفى مثل المخبله وحافيه اريد الحك عليها مااكدر وركضت بحضن غيث
غيث .. عافتنا ندى عافتنا وابجي ومنهار اختي تموت وبهاي الطريقة وشنو الي صار وشنو من وكعه موتتها اباوع الكل منهار ويبجي ندى ماتت وكسرتنا كلنا

ام زيد.. اني الربيت والتعبت وسهرت الليالي وضاع رباي بنتي ادفنها بيدي
ولج يمه ندى ربيتج وكبرتج حتى تغسليني من اموت وتوكفين على جنازتي مووو اني اوكف عليها ربي هذا حكمك ولا اعتراض عليه بس بنيتي ياناس شابه بعدها شافت من حياتها وعافت بيتها وجهالها يمه ياروحي الي راح يمه يارباي الي ضاع يمه ياشمعه عمري الي انطفت يمه جهالج صغار ليش يتمتيهم يمه منو الهم عفتيهم وعفتي امج ولج انتي اخيتي مو بنيتي ربي اخذ عمري مالي عمر بعد بنتي ياناس الضنى غالي وضناي راح ادفنها بأيدي

غيث .. مااعرف اسكت امي لو ود لو ابويه كعد بالكاع ويبجي لو زيد الي تخبل يبجي ويصيح بنص المستشفى وعاصم يركع راسه بالحايط ويعيط راحت مني ضاعت خسرتها

هشام ... مكدنا نسيطر على وضع ود وامها انهاروا واخذنا الجثه للطب العدلي ود حاضنتني وتبجي منتهين لاايد ولارجل واخذنا المرحومه ودفناها وضعهم كولش تعبان يبجون الصخر اما ود بعالم ثاني تهدأ ساعه ترجع تبجي وتلطم ساعات مستمره
خايف عليها وبنفس الوقت مكعد اكدر اسيطر على وضعها
وبقت طول فتره الفاتحه منهارين وحتى عفتها يم اهلها مكدرت ارجعها صعب

ام هشام ... شفت هذه الي كتلك نفسك عليها واخذت عمام وشيوخ شحصلت من ليله عرسك وتركض بالمستشفيات وخوش انختمت بالمكابر
هشام ... يووم حبيبتي غير اختها هي بيدها المسكينه هم انكسرت فرحتها وكولشي مشافت
ام هشام ... اكص ايدي اذا فرحانه تكول عبالك جايبيها سخره مشفتها بالقاعه كاعده ضايجه وخشمها ميطخ الهوا تكول فصليه مو عروس
هشام ... متوهمه امي البنيه تحبني واحبها وانتي ام الاصول مكان متوكفين ويه جنتج بمصيبتها
ام هشام ... عشتوووو جنتي هي وينها الجنه اذا هي حتى بعدها بنيه مادخلت عليها وعمامك سألوا ابوك وانحرج
هشام ... همه شعليهم حتى بهاي يخلون نفسهم بيها
ام هشام ... ابقى هيج لعبه بأيدها
هشام ... ياامي لتخبليني البنيه شمسويه غير اختها وماتت وحقها الاخت عزيزه لو مكانها شسوين
ام هشام ... بعد محامي الدفاع موجود
هشام ... حضتها هاااا ياحلووه تغارين لتخافين احبج اكثر منها
ام هشام ... اي قشمرني بكلامك الحلو
هشام ... والله ماكو احلى منج ياغاليه

غيث .. مرت ايام واحنا ميتين ابويه شبه فاقد خسر بنته وبس يبجى وامي ليل ونهار تنعي عليها والبيت كله ميت اما من رحنا وجبنا اطفالها امي متنومهم اله بحضنها
موج متركتني دوم تحجي ويايه وتصبرني حتى من ابجي تهديني حيل ساعدتني لان بديت افقد السيطره على نفسي
واليوم الها ١٠ ايام من ماتت اختي الغاليه وابنها ميقبل ياكل
تعاال خالو تيم شبيك ليش متاكل سمعت من خالتها ود متقبل تاكل
تيم .. مااريد خالو
غيث .. ميصير حبيبي هذا مو وضع
كام يبجي تيم عمره ٦ سنوات وكام يعيط اريد ماما
حبيبي ماما مسافره .. كروب قصص غزوان علي
تيم . لاخالو ماما ماتت بابا كتلها
غيث .. لاحبيبي منيلك هذا الكلامً وتيم يبجي منهار ويعيط ردت بس افتهم منه اخذته بسيارتي حسيت موتت ندى موطبيعيه واشتريتله حلويات لحد مهدأ
يلهً خالو احجيلي شبيها ماما وشصار وخلاك هيج تحجي
تيم .. خالو اني ونونه نلعب بالغرفه وسمعت ماما تعيط على بابا
غيث .. ورجع يبجي كوه سكته حتى افتهم منه
تيم ..ميقبل نروح لحفله خاله ود وضلو يعيطون وبابا غلط على جدو وبعدين شفته دفعها على الطبله وماتت
غيث .. اني سمعت هيج والدم صعد براسي شخطت السياره ونزلت تيم واخذت اسلاح فقدت كمت مااشوف اليوم دم اختي ميضيع
ورحت للبيت ملكيته ومباشره رحت للفندق مالته طببوني بدون تفتيش لان يعرفوني والنار بقلبي وصدري ماانسى منظر اختي والجام طاب بوجهه وبعيونها وبراسها
عاصم .. شبيك غيث . اكو واحد يدخل هيج

غيث .. ولك قذر تكتل ندى وتمشي بجنازتها ولا كأن مسوي سوتك ادمي جانت احسن مره وام بيت ومراعيه الله بيك ياوصخ وهاي تاليتها اليوم ادفنك هنا اليوم موتك على ايدي
عاصم .. على كيفك فدوه غيث افتهم الموضوع اذا متت راح تدخل السجن
غيث .. لواعرف اعدام اليوم اخذ بدم اختي منك ياساقط
عاصم .. اتهدى غيث لا غيث لا

يتبع ...