رواية بين الفقر والطغيان الفصل التاسع وأربعون 49 - بقلم رونق

مساء الخير ع اجمل متابعين

بارت طويل ومليئ بالمفاجئات تعويض البارحه اتمنى لكم قراءه ممتعه

🌹البارت 51 🦋🌹

🌹🦋 بين الفقر والطغيان 🦋🌹

🌹🦋 للكاتبه رونق 🦋🌹

جان تكول مروه متخربطه وداخله مستشفى

ليش شبيها خيرها

تكول خاله واكعه من الدرج والطفل مسقطته وكاعد تنزف وحالتها ممستقره ابد

هي تكول وكعت صدفهزمن الدرج متدري احنه عدنه علم

بس الدكتوره اعرفها كالت اعترفت كالت ماخذه علاجات ومسقطته للطفل

خاله وعمو متخبلين

المشكله ماثر عليها العلاج

خابروا اهلها وهسه جايين بالطريق

الدكتوره متخبله تكول ماخذه انواع العلاجات وحتى اعشاب لحد ماساقط

والله دوختني ليش هيج تسوي وشلون ينطيها كلبها تقتل نفس بريئه

اني من صار نظوري مستعده كلشي اسوي في سبيل مااسقطه

ذليت نفسي واتوسلت بحيدر وادري بي راح يذلني

بس وافقت لاجل ابني

رحت بدلت اني والجهال مبدلين يم اهلي

حتى غده هناك نتغده يوميه

غسلت الملابس وجففتهن

نزلت جوه وره شويه كالوا اجوي اهلها

امها وابوها واخوها دخلت سلمت

هالمره لبست صايه وحجاب كلت عيب كل مره اتهرب

خاله باقيه يمها

امير وعمو يمهم

سوينالهم جاي كال عمو اني اروح وياكم نزورها

خابرتني خاله كالت دزينه ملابس الها

رحت اني وامها جهزت جنطه وانطيتهيا

راحوا لليل اجوي

خاله راجعه لان عدها دوام ثاني يوم

باقيه امها

ابوها واخوها تعطلوا

ناموا همه وعمو ابيت حيدر

خاله متخبله تكول اذا عرف حيدر هي الي مسقطته للطفل يتخبل

كعدت الصبح جهزتلهم ريوك

الكل عنده دوام زهراء ادز بنتها لاهلها

عموا كال مااداوم ع حسابهم عيب

اني قررت بس اول محاظره مهمه وارجع

حتى اسوي غده عيب منهم

فعلا رجعت وخبرت ماما تخلي الاطفال يمهم

سويت الغده وصبيت الهم

كالوا نريد نروح للمسشفى ومناك نرجع بس امها راح تبقى

وره الغده راحوا حتى عمو

اجت خاله من الدوام

كالت خل نروح اني وياج للمستشفى

جهزنه الغده ناخذه ويانه

رحنه اني وخاله

لكيناها نايمه

وره شويه كعدت بس تبجي

كالو اليوم هم تبقى يمنه لان النزيف ميتوقف

وهذا الشي خطر ع حياتها

محتاجين دم ومتبرعيلها اخوها وامير محصل شخص هم متبرع الها

محتاجه 3 ابطاله دم دايريلها وبعدهي تحتاج واحد

اتغدت كوه هي وامها

لكينه ابوها واخوها

ابوها سال خاله منو جابكم ليش مااجيتو ويانه

كلتله زينب عدها سياره واجينه بيها

وره فتره اترخصو وراحوا

كالت خاله راح ابقى اني هنا

اخذي ام مروه خل ترتاح ولليل يله يجيبها امير

باجر جمعه همزين ماكو دوام

اخذتها كتلها خاله راح امر باهلي بس اجيب الجهال

كالت عادي حتى اسلم عليهم بطريقي

فعلا مرينه شويه متاخرنه

رجعنه وبقت وره العشه اخذها امير

رجعت خاله كالت لحد يحجي شي كدام حيدر ابد

مخبل هذا يروح يعوف الدوره ويجي

كالت تكول اني ممسقطته للطفل

اخذت علاج بالغلط اتوهمت بي

كالت زهراء لو ماكالتلي الدكتوره ذاك اليوم جان صدكتها

ثاني يوم طلعت وامها وياها مستقره حالتها

اني مجهزه الغده

دزيته الهن

لليل زهراء سوت العشه وهم دزته الهن

بس تبجي وامها ماكله راسها

ابوها لاعب بيها جوله

محد عرف السبب الي خلاها هيج تسوي

كلتلي ابقي يمي هنا اريد احايج

امها راحت يم خاله

كالت عفيه لتخبرين حيدر هسه ابد

لاوالله ماعليه لا هسه ولا بعدين

انت ويا اتفاهموا ماادخل ابينكم ابد

بس ليش هيج سويتي

والله ع مودج انت وجهالج

بقيت صافنه اني شعليه

والله حيدر باله مو يمي

عقله مو يمي

وكلبه مو يمي

حتى ماشفت الفرحه بعيونه من كتله حامل

الي اعرفه الاب يفرح بهيج خبر بس حيدر لا

حيل استحقرت نفسي

اني دمرتكم والله

هو يحبج انت

اني متاكده اول وتالي راح يطلكني

كلت اول شي اتخلص من الطفل لان متاكده ميطلكني لان حامل بابنه

واذا طلكني اكيد الطفل  راح يتعذب بيني وبين ابو

اني هسه راح اطلب الطلاك منه

اني جان هدفي اسكت اهلي من وافقت

لان اذوني حيل اتزوجي واتزوجي

هسه اذا اطلكت بعد محد يحجي وياي

وحتى اذا حجوا من يقبل يتزوج وحده ارمله ومطلقه

مااعرف شاحجي وياها

لساني انعقد

كالت اريد ارجع لبنتي

اني عايشه بقلق

ها اخاف يدرون بيه اهلها باللحضه ياخذوها مني

بس مروه والله اني ماعندي اعتراض بعلاقتج وي حيدر

لان اساسا ماكو علاقه تجمعني بي

الشي الي يربطني بي هو نور ونظوري

اني باقيه بس لخاطرهم

مو مهم اهم شي اطلع من حياتكم

تدرين ليش رفضت الزواج رغم هواي تقدمولي

لان زوجي الشهيد الله يرحمه

احبه حب جنوني

عشقني واني باول متوسط

جاب 5 مشيات يله وافق ابويه

انتظرني 6 سنوات

جاب ساده ومعممين

حبيته وحبني وبجنون

عشت اجمل ايام حياتي وياه

قبل ليموت بيوم

خابرني كلي امانه عليج اذا صار عليه شي امانه عليج ليوم الدين شوفي حياتج

بعدج صغيره والايام كدامج ماعليه بيج

بس بنتي لتخلين الغربه يربونها ولتفكرين تنسيني

هاي وصيتي الج

تحجي وتبجي

واني ابجي وياها

خليت بنتي تبتعد عني

خليتها تتعلق بامي

اني مو هينه عليه ابتعد عن بنتي

اني عبالي انسى حبي بزواجي من حيدر

حاولت اتقربله وانسي

طلع حبه الي بكلبه اصلي مو تقليد مثلي

مكدر يتجاوب وياي مره

المره الوحيده الي تقربلي بلهفه يوم زواجنه وبس

كمت مااعنيله شي

حسيت بنفسي عبئ عليه

قررت الافضل ننفصل

بس اكيد مراح يوافق اله يموت الطفل

اني مو هينه عليه اقتل ابني بيدي

بس اذا بقه عايش اني متاكده راح نتعذب كلنه

هو واني وحيدر وحتى انت

هسه يجيني احد ويكلي ليش ماحسبتي حسابج من البدايه

اني اكلج عبالي اتحمل فراك بنتي وعبالي انسى

عبالي راح يحبني وينسيني حبي

شفت معاملته الي كرهت نفسي والله

المفروض اني مااوافق ع واحد متزوج وعنده اطفال

اكيد راح ادمرهم

بعد مااكدر مااتحمل ابتعد عن بنتي

ولا اتحمل اهجم عائله

كل الي اعرفه اريد اطلع من حياتكم

اهلج شراح يكون موقفهم

خبرتهم كتلهم اريد اطلب الطلاك

واتخبلوا

لعبوا بيه جوله

كتلهم والله اكتل روحي

اريد بنتي مااتحمل ع فراكها

وخبرتهم بس احد يحس بيه ياخذوها والله

اهلي حسوا بالخطئ اني متاكده

هم سبب دماري والله

قبل ليجي حيدر اجاني واحد مدرس وزوجته متوفيه

وولده بكدي

وهمه اتخبلوا عليه

سولي سالفه اله توافقين

احنه مدايمين الج

واخوتج منو يكول يتحملونج

كتلهم اذا الاخو ميتحمل اخته منو لعد يتحملها

كالو المره مايسترها وما يحميها ومايتحملها غير رجلها

رفضت رفض نهائي

هذا جان اكبر خطأء ارتكبته

من اجه حيدرعبالي راح ينقذني من هواي اشياء

اول شي كلت اطلب مهر عالي بلكي يرفض

وثاني شي ردت موافقتج

واعترفلج انصدمت من شفتج

اتوقعتج جبيره لو مو حلوه

وجنتي بالنسبه الي اكبر لغز معرفت احله ابد

اهلي كلهم انصدموا من شافوج

من وافق اني الي نصدمت

معقوله هيج يدفع مهر

بعدين كلت خل اوافق مدام زوجته قابله وقبل بالمهر العالي

بس جنت اكبر غبيه من وافقت

تحجي واني صافنه اني هم مريت بهذا الشي من خطبني علي

مااعرف الاهل يتعاجزون من البنت

مرات احس البنيه عبئ جبير ع اهلها

رغم حبهم الها

مااعرف شنو السبب بالضبط

كتلها مروه انت استعجلتي هواي

انت متعرفين حيدرشنو

حيدر عاصفه لا اكثرمن عاصفه يمكن اعصار

يدمر كلشي كباله من يعصب

مايشوف دربه

يمكن اذا دره بيج مسقطته للطفل يتخبل

مو مهم المهم اريح ضميري

اني راح اروح وي امي قبل ليجي

واخلي بالامر الواقع

مااعرف كلامها يفرحني لو يحزني

اني مااريد ابني سعادتي ع تعاسة غيري

مروه خطيه ماالها ذنب بلي يصير

الله عليج لو ما متقدملج حيدر عانيتي هيج

يجوز اعاني اكثر

ابد ممتندمه لان اتزوجته لحيدر

لان اهلي مدمريني بكلمة اتزوجي

بينما هسه راح يسكتون بعد محد يحجي

اكلهم هو يحب مرته واني احب بنتي

وراح اكلهم هاجر مرته بسببي لان تزوجنه

مااكدر اعيش بدونها لبنتي والله

متتصورين من اشوفج شلون معتنيه بنور رغم ماهي مو بنتج

اضوج من نفسي والله

اني متاكده مراح يجبروني اهلي ع شي بعد

والنبي راح احس بتانيب الضمير من وراج

ليش انت شكو منو يمج

يمكن لو مااني جان مسقطتي للطفل

لا والله اني ادري بطريقي مسدود

اتزوجت بالسر بدون مااحد يعرف من عيالي

لان حيل خايفه من ردة فعل اهل بنتي

يعني شيردون يسوون

ياخذون بنتي مني هذا ابسط شي يسوونه

كالت احتمال باجر اروح وي امي

اتفاهم وي اهلي ع كلشي

ويجوز اكلهم راح اوافق ع حماي حتى اسكتهم بس مستحيل اسويها

مرات اصفن اكول الله لينطي الدواعش

دمروا عوائل هواي

اني وحده من الضحيات

اكو ملايين يجوز الي مثلي

اي فعلا مرينه بهيج شعور

من تصوب حيدر

وين اتصوب

بسامراء وهم طلع من الموت معجزه

الله عليج تحبينه لحيدر

اجذب اذا اكول مااحبه

بس مو كلشي بالدنيه الحب

جرحني مرتين واتزوج عليه

شنو السبب

مرتين اتزوج راد يكسرني

وفعلا نجح

كسرني وخلاني محطمه

زين ابد ميتقربلج هاي الفتره

لا ابد وجان اتفاقنا قبل لنعقد مره ثانيه

ليش هو هم طلكج

اي اطلكنه مدة سنه

ها كتيلي ع مود الدوام

مااعرف بذاك الوكت منو الغلطان

اثنينه عاندنه

وهو يتخبل من العناد

بس تدرين بي مخبل والله

هاي الغرفه مرتين كسرها

اخذ ابني مني وحرمني من شوفته

قاسي بشكل وميرحم الي ياذي

رغم كل هذا واني كلبي طايحضه

حبه وع شنو مااعرف

بس هو هم واضح عليه الحب

مبين يتمنى رضاتج

تذكرين من محمد طلب منه يطلكج

شفته بشوفه كرهت نفسي لان اني زوجته

حيل ضجت عليه

اتخبل كام باليوم الواحد ملاحضته يشرب 10 باكيتات جكاير واكثر والله

اني متاكده يحبني بس شلفايده

اذا اذاني هواي وجرحني هواي

رغم حبي اله مكدرت اتقبله ابد

الله كريم بس اطلع من حياتكم تراح تعيشون بسلام وسعاده ان شاء الله

يمعوده ياسعاده هاي الي تحجين عليها

صارلي 5 سنوات هنا نسيت السعاده

الله كريم لابد تفرج بيوم

يله اخذي راحتج وارتاحي

عفته وطلعت وراسي يفتر

صعدت ودايخه

اكول منو الي يتحمل خطية هذا الطفل الي مات وهو هستوه صار

اكيد حيدر هو الي يتحمله

لو ما متزوج مصار الي صار

حيدر : قررت اسافر بدون ماودعها وطبعا هذا الشي ع اعصابي

لان هواي نزلت نفسي الها هواي اتوسلت وهي ولا كانو

خليت فلوس عند امي ووصيتها عليهم

اخذني امير وصلني للمطار

سافرنه وصلنه واستقرينه بالفندق

ثاني يوم بدت الدوره

محبيت اخابرها ابد وراح ابين الها اني ممهتم بيها

بلكي تحن عليه وهي تخابرني لو تراسلني

بس خشمها يابس ولاكانو

مروه دائما تخابرني وتطمان عليه

خبرتني باخوها يريد يخطب اخت زينب

الولد حباب وخلوق وعنده محل

بس ضجت من زينب

ابد محجت ولا جابت طاريه

وصلت لمرحله بعد مااتحمل

اريد اسمع صوتها لزينب

اذا هي قاسيه اني لا

اتصلت بيها وبديت احجي ع مروه

واقارن بينها وبين مروه

كلت بلكي تغار وتحن عليه

حسيته ضايجه وطبكته الموبايل

حيل اتاذيت لاذيتها

ماينطيني كلبي اصير قاسي وياها

هواي اتصلت وماكو جواب

الصراحه بقيت بقلق

راسلتها هم ماكو

وره شويه هي خابرتني

اعتذرت منها

حسيتها تغار من مروه غيره واضحه عليها

اني ممتاكد من مشاعرها اتجاهي

ساعه احسها تحبني ومتستغني عني بس كاعد تكابر

وساعه احسها مو يمي ابد ومستحيل تحبني لو تفكر تحبني

حلفتها تعترف تحبني لو لا

جان تصدمني من اعترفت تحبني

احس بنفسي طرت طيور من الفرحه

اعتبر حبها الي معجزه من رب العالمين

لان السويته بيها مو هين ابد

شعوري صعب اوصفه

راح اكتفي بحبها

شكاتيلي الله اني راضي بي

راح اتركها ماالح عليها

هسه هي من ذاتها راح تبدي تشتاقلي وراح تحن عليه

مشكلتي الوحيده علاقتي بمروه

كمت كلما اختنك واضوج اتوضه والتجئ لرب العالمين

حسيت فرق هواي بين قربي لربي

وبين الشرب

الشرب صحيح ينسيني مؤقت بس دمرني

بس من اتقرب لرب العالمين يخليني انام مطمأن

اتوضيت وصليت ركعتين طلب حاجه لرب العالمين

كتله ياالهي اني انسان تائب وفعلا تبت من كل منكر

راح اصحح اغلاطي كلها

اريد منك السماح ع كل ذنب سويته

واريد اصير طماع انت تكول ياعبادي ادعوني استجب لكم

واني هسه ماكو بيني وبينك اي حاجز

اريد اطلب منك اتخلص من مروه بس بما يرضيك

مااريد اطلكها هيج واظلمها وياي

اريد هي من ذاتها تطلب الطلاك

اني ادري اطلب معجزات منك ياربي

بس مو معجزه عندك

اتمنى تحققلي هاي المعجزه

بقيت ادعي واتوسل

بعدها قريت قران وصليت صلاة الصبح

ونمت

مو دائما اكدر اخابر لو اراسل

رحنه اليوم سفره سياحيه بتركيا

رحنه للمدينه المائيه اكوا مارينا

ذاك اليوم جان مطبوع بذاكرتي نسينه الدنيه كلها بيومها

حيل حلوه هاي المدينه

تحتوي ع احواض خاصه للاسماك وبيها شلالات صناعيه

والالعاب البيها روعه

حيل اتونسنه بيومها

اتمنى اجيبهم زينب والاطفال

تقريبا بعد اسبوع وتخلص المهمه ونرجع

راسلت زينب واطمانيت عليهم

امي دائما اخابرها هي وابوي وامير وحتى محمد

مروه كذلك دائما اراسلها واطمان عليها

قبل لنجي بيوم رحنه لمولات قريبه علينه

اخذت لزينب زنجيل ذهب عجبني حيل

واخذت الها خلخال عجبني حيل لكيته

اخذت ملابس للجهال كلهم

اخذت لامير عطر ماركه واخذتله ستره عجبتني حيل

ولابويه همين عطر

بقيت افتر ردت شي للبنات

الصراحه حرت شاخذ لان بضاعتهم حيل حلوه

اخر شي قررت اخذلهن ملابس للدوام لان كلهن عدهن دوام

حتى اخوات زينب تبارك ورقيه اخذتلهن

لابو زينب اخذتله عطر ولخاله ام زينب اخذتلها صايه كلش حلوه هي وامي

اخذت اليه ملابس

الصراحه بضاعتهم توب

جهزنه جنطنه ثاني يوم رجعنه

جنت حيل مشتاق للكل

بس اكيد اشتياقي لزينب يختلف عن كل اشتياق

امنيتي الكيها متلهفه عليه

كون تستقبلني مثل اي زوجه تستقبل زوجها بعد سفر

بس هيهات هذا الشي ينطبق ع زينب

وصلنه للمطار وجان ابويه وامير خطيه منتظريني

سلمت عليهم ورجعنه

متلهف اوصل للبيت

راسلت زينب

الووو

باللحضه جاوبت

الووو

شلونج شخبارج

تمام الحمد لله

وانت

الحمد لله

وصلت للعراق

اي لعد شلون كاعد اراسل

الحمد لله ع السلامه

الله يسلمج

الجهال شلونهم

زينين

مشتاقلكم موت

حتى هم مشتاقيلك هواي

بس هم وانت ممشتاقتلي يبذات

مجاوبت شي

الوووو

وياك

اشو سكتي

وين انت هسه

بالغرفه

متغدي لو لا

اي متغدين

تقريبا الساعه ب4 هسه

شراح تسوين عشه

مااعرف شاسوي بعدني ممقرره

شنو مشتهي شي

بكيفج ممشتهي شي معين شنو تسوي من ايدج طيب

شكد وتوصلون

بعدنه مطولين هستونه طلعنه من المطار

الجهال كاعدين

اي نور تدرس ونظوري يلعب

وصلنه للبيت وره الاذان

لكيت زهراء وفاطمه وامي وزينب كلهم بالصاله

سلمت ع امي وبست راسها وايدها

ورجعت ع فاطمه

سلامي وي زينب عادي

لان اهلي موجودين عيب

رحت للبيت كلت اسبح وابدل حتى اجي اتعشه

رحت للبيت اتفاجأت مروه ماكو

شنو السالفه

خابرت زينب سالتها

كالت متخربطه وراحت لاهلها

معقوله بدون متخبرني

خل ارتاح واسبح واصلي وبعدين اتصل بيها

فعلا سبحت وبدلت وصليت

رحت يم اهلي جهزن البنات الاكل

اتعشينه وكملنه

انطيتهم الهدايا

اتذكرت الملابس الي جبتهن من بغداد الي ولزينب

كلت خليهن لليل وانطيهيا سويه وي الذهب

سالت امي ع مروه

كالت متخربطه واحنه كنالها روحي

الطفل مهدد بالاسقاط

ليش شصاير

مصاير شي بس الدكتوره خبرتها الطفل تعبان واحتمال اتسقطه

مااعرف افرح لو اضوج

افرح ع مود زينب

واضوج لان خطيه الطفل اتمنى يعيش

حبايبي حاضنهم اثنينهم

صارت ب8 ونص

كلتلهم زينب يله موعد نومتكم

بعد وكت عوفيهم

لا ياوكت يوميه ب8 ينامون لان وراهم دوام من الصبح

بوسوني وراحو صعدوا

زهراء هم صعدت

امي وابويه راحوا هم ينامون عدهم دوام

بقينه اني وامير شويه وهم صعد

رحت جبت العلاكه وصعدت

بدون مااخابر

دخلت لكيتها كاعد تقرأه

التفتت لكتني كبالها

فتحت اديه الها

وجنت كلي امل تذب نفسها بحضني

تكلي مشتاقتلك

بس طلعت متوهم

بقت بمكانها

لج شلون قاسيه صارلي شهر غايب

وهيج تستقبليني

الصراحه مع الاسف

محجت شي

احسب الايام شوكت تخلص حتى اشوفج

وبعدها كمت احسب الساعات شوكت ادخل للبيت

وبعدها كمت احسب الدقايق وحتى الثواني

بسرالظاهر اني عبئ عليج

اسف اذا ازعجتج واسف اذا ضوتج

انطيتها العلاكه ونزلت

لان من صدك احتاريت وياها

مااعرف شاسوي بالضبط حتى ترضى عني

نزلت وجنت حيل ضايج

الجو بي بروده تقريبا بداية شهر 11

بقيت بالحديقه اشرب جكاير

حيل ضجت وروحي طلعت من وضعي

جهازي بيدي اتمنى تراسلني

اتمنى تعتذر

اتمنى تكلي تعال مشتاقتلك

بس هيهات تسويها زينب

اتذكرت مروه عيب منها لاسالت عليها ولا خابرتها

وهي مريضه

دزيتلها الوووو

لكيتها ممتصله

عيب اخابر هسه مااكدر

نمت وثاني يوم كعدت تقريبا ب10 لكيت البيت فارغ ولا بشر

الكل بالدوام

اتريكت واتصلت بمروه

اتفاجأت جهازه مغلق

شنو الفلم شنو السالفه

اتصلت باخوها

وسالته كال والله ماادري ليش جهازها مغلق

بس ارجع للبيت اتصل بيك

خابرت امي كتلها شنو السالفه ليش جهازها مغلق

كالت مااعرف

خبرتها راح اروح لاهلها حتى اطمان عليها

لا يوم ارتاح هستوك جاي من السفر

مو مشكله عيب من اهلها

بدلت ورحت

وصلت وي الاذان تقريبا

لكيتها ماهي رايحه يم اختها بغير محافظه هي وامها

اتخبلت هاي شبيها مروه

معقوله تطلع بدون متخبرني

سالت ابوها ليش جهازها مقفول

كال والله ماادري

تكدر تتصل بخاله اريد احجي وياها

صار ابني

اتصل وحجه وياها كللها صيحي مروه

هذا رجلها اجه عليها ويريد يحجي وياها

انطاني الجهاز

كوه احجي لان ابوها يمي

كالت الوو

الووو

هلو حيدر شلونك

تمام وانت

تمام

ليش جهازج مغلقد

انكسر ومصلحته

اشو ماكلتي تردين ترحين

عبالي بعدك مجاي واني ماعندي جهاز

افور دم يمكن اذا كبالي اشرب من دمها

شوكت ترجعين

لباجر ابقى

وليش لباجر

اني اجيت عليج حتى نرجع

لا مااكدر عيب منهم راح نبات

واني اكلج تعالي هسه اريد ارجع

شلون تسافرين وتدرين خطر ع الحمل

مو الطفل سقطته شنو محد كلك

شنو سقطتي

حملي اذاني ومتحملت اخذت علاج وسقطته

انت شكاعد تحجين

شنو كاعد تشاقين

لاوالله مااشاقه احجي صدك

محد خبرك

كمت افور دم

مروه هسه تجين لا يصير الحجي غير

مااكدر اجي هاي شبيك

لاتختبرين صبري مروه هسه تجين

لو تنطيني العنوان اني اجيج هسه

لا اجي ولا تجيني لتصير معقد

هو اني يم اختي قابل وين اني

عيوني صارن بكصتي

اني اعلمج بالمعقد

طبكته

كتله عمي تكدر تاخذني اجيب مروه

ليش عمي اكو شي

لا بس اشو كامت تخربط بالحجي

الطفل تكول سقطته

اجي من السفر الكيها جايه الكم بدون علمي

هسه رايحه لاختها واني ماادري

اكلها تعاي تكلي لااجي ولا تجيني ابقى ابات

كال والله كالت خبرته لحيدر وهو كلي روحي

لاوالله عمي البارحه اجيت من السفر واتفاجات بيها

اني اتصرف ابني ارتاح كوه صلي واتغده ويصير خير

خابر لامها كللها هسه تجن

لاغده ولا عيب جيبي بنتج وتعاي

اتوضيت وصليت بعدها جابو الغده

اني ع اعصابي افور دم

وره فتره اجن

مااكدر افسر تصرفاتها لمروه ابد

ولا كانو شي صاير

سلمت وسلامها جان بارد

اني نار ومشتعله بيه

ابوها كال اخذوا راحتكم خل اتركم بوحدكم

عافنه وطلع

يله جهزي نفسج خل نرجع

لا ماارجع اريد ابقى هنا

ليش عود

يعجبني

مروه لتخليني افقد عصابي

روحي جهزي نفسج وهناك نتفاهم

اريد اطلكني

انت شكاعد تحجين

كاعد اكلك طلكني

ممكن اعرف السبب

بدون سبب اريد اطلكني

انت عقلج صاير بي شي

الطفل صدك انت سقطتي لو تشاقين

لا وعليمن اتشاقه صدك

ممكن اعرف السبب

لان مااريد ابقى وياك ولا اريد اي رابط يجمعني بيك

ظربتها راجدي وكعتها بالكاع

بكل جراه جاي تكولين وكعته للطفل

انت شنو من بشر

اذا متردين اطفال ليش اتزوجتي

هذا الشي ميخصك

وماالك حق تضربني واني ابيت اهلي

ضربتها مره ثانيه

انت منتبها ع نفسج زوديتها اكثر من اللازم

اني مراح اتفاهم وياج اطلعي

وصيحي ابوج اتفاهم ويا

عافتني وطلعت

اجه ابوها

كتله عمي تقبل هيج مروه تسوي

ليش تقتل الطفل شنو ذنبه

وليش اتزوجت اذا هسه تريد تتطلك

كال ابني اني مقابل عليها ابد

بس هي تكول مااتفاهمنه اني ورجلي

وتكول انت متندم لان اتزوجتها بس ماتكدر تحجي لان تخجل من عدنه

تكول خطيه اطفاله متبهذلين

وزوجته هاجرته بسببي

وتكول الافضل اله يطلكني

احنه منقبل تهجر زوجتك بسبب مروه

منو كللكم مروه السبب

معروفه ابني

واحنه هم نخاف الله منريد نظلم احد

انت استعجلت بزواجك

احنه عبالنه متفاهمين انت وزوجتك ع كلشي

ممتوقعين هاجرها والسبب بنتنه

يعني افهم من كلامك انت موافق ع الطلاك

اي ابني طلكها هي خل تربي بنتها وانت ارجع لزوجتك واطفالك

واذا ع الغايب متنازلين عنه لان هي الي طلبت الطلاك

اني المفروض افرح من تطلب الطلاك بس هسه لا

ضايج وروحي طالعه

ماردت تسقطه للطفل ولا ردت تكشف سرنا اني وزينب

وهسه بينت كدام اهلها هي المظلومه واني الي ظالمها

اني ماعندي شي وياها ومن البدايه ذكرت هذا الشي

اني ماظلمتها مثل ماظلمت زينب

جنت انفذلها اي شي اطلبه مني

من تريد لاهلها مااكلها لا ادزها

من تريد لمكان مااكول لا

بس الظاهر اكو سبب الي خلاها تطلب الطلاك

لازم اتفاهم وياها

كتلها عمي خل احجي وياها اخر مره

اجتي وجانن عيونها حمر مبينه باجيه

مروه اني مااريد اظلمج وياي ولا اريد ااذيج

اريد تنطيني سبب مقنع حتى اطلكج

اذا تتحججين بزينب احب اطمنج

اني هاجرها من زمان قبل لنتزوج يعني مو بسببج

اني احجي هيج لان هاي الحقيقه وحبيت اعرف سبب الي يخلي مروه تريد تطلك فجأه

كالت الخلل بيه وبيك

شلون يعني فهميني

الخلل بيه اني ضحيت ابنتي ع مود ارضي اهلي

لان جبروني اتزوج

وافقت بشروط مهر غالي وموافقة زوجتك

جنت متوقعه راح ترفضون

بس وافقتو بعدها اني وافقت حتى اخلص من الملحه

عبالي اتكيف وياكم عبالي تنسيني حبي وانسيك حبك

انت تحب زينب حب جبير

واضح عليك بكل حركه منك

بكل حجايه

بكل تصرف منك

واني بنفس الوقت احب زوجي الله يرحمه ومكدرت انسى

ولا كدرت اعيش بعيده عن بنتي

يعني بالحالتين احنه استعجلنه اثنينه

لهذا السبب زواجنه فاشل والافضل النه ننفصل

بس شنو ذنب الطفل ليش هيج سويتي

خطيه مااله ذنب يجي للدنيه ويلكي امه بصفحه وابو بصفحه

الافضل اله مينولد لهذا السبب اجهضته

وهسه اريدك اطلكني وكلمن يروح لحال سبيله

مااعرف افرح لو احزن

فرحان لان راح ننفصل بس حزنان ع الطفل مااله ذنب

هو اني الصوج بيه

يوميه ورحت اتزوجت

شحصلت بس الاذيه وشلاع الكلب

كتلها صيحيلي ابوج وتعالي يمنه

اجه وجان حيل خجلان

كتله عمي اني راح اطلكها لمروه والحاضر والغايب تستلمه حسب الاصول

كال لا ابني البنيه هي الي طلبت الطلاك

ميجوز وانت ماالك ذنب

لليوم مشكت منك

بس احنه ياابني غلطنه من زوجناها بهيج طريقه

عبالنه زوجتك بيها قصور لو مريضه

متوقعنه شغلة عناد مسويها واتزوجت عليها

خطيه البنيه شنو ذنبها

تعرف اذا سمعوا اهل بنتها مروه متزوجه كبل ياخذوها للطفله خطيه

واحنه حيل متعلقين بيها

تكعد يمنه وتسكت

طلكها وكلمن يروح لحال سبيله

وراح تبقى علاقتنه نفس ماهي متتاثر ان شاء الله

كال هسه طلك سيد وبعدين طلك محكمه

فعلا طلكت سيد ورجعت

الطريق كله عقلي مشتت

معقوله ربي يستجيب دعائي

اني يوميه اصلي وادعي اريد مروه تطلب الطلاك وفعلا هي طلبت

ماكو اجمل ولا افضل من قربنه لربنه

وخاصه وقت السحر هواي جربت هذا الشي

احس الحاجز البينه وبين ربنا ماكو

احس الدعاء يصعد للسما

اني جنت متوهم من اروح اشرب واكول محتاج ارتاح وانسى

بالعكس يزيد همي

بس من كمت التجئ لرب العالمين

انفتحت بوجهي هواي اشياء

حسيت بالامان حسيت بالطمأنينه

جنت اخاف من الموت اخاف يحاسبني ربي ع اخطائي

هسه ميهمني الموت لان اني ع ثقه الله غفور رحيم

من تصوبت بسامراء اتمنين مااموت مو خوفا من الموت

لا بالعكس اعتبر شهيد

والشهيد مقدس

بس اني حبيت مااموت اريد اصحح اخطائي

وفعلا كدرت اتوب واتمنى ربي يسامحني

رجعت للبيت العصر

رحت لبيتي لان جنت ضايج حيل

قراري جان خاطئ من فكرت اتزوج

ظلمت نفسي وظلمت زينب وظلمت مروه

ماحسيت بفرحه ابد من طلكت مروه

مااعرف السبب هل هو تانيب الضمير لان ظلمتها

هي لو ملاحضتني زين وياها مطلبت الطلاك

اكيد حست بيه ممرتاح وياها

سبحت ونمت كبل

كعدت وجان الجو بارد يمكن الساعه ب10

صليت وحسيت بنفسي جوعان

رحت لاهلي لكيت البيت هدوء

لكيت اكل ع الطبله بس بارد

مااحب الاكل البارد ابد

مااريد اطلب من زينب شي

حيل ضوجتني البارحه وقررت ابد ماعليه بيها حتلو طلكتها مروه

اني متاكد راح اتعبني زينب

حتى لو طلكت مروه راح اطلع سالفه من جوه الكاع في سبيل مااتقربلها

اكلت مجبور ورجعت

جنت شبعان نوم وثاني يوم ماعندي دوام

كعدت اكلب بالفيس من زمان تركته لان بايام الدوره ماعندي وقت

نشرت فيديو شعر ع صفحتي الشخصيه

كتبت مقصوده

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

بس ابتليت ع عمري من كتبت مقصوده

بقيت التهيت بالتعليقات

جماعتي نصبوا عليه لك مقصوده ع الاولى الثانيه الثالثه الرابعه ويضحكون

واحد كللهم هاي ع الزواده مكفن الاربعه

حجينه برموز محد فهمنه

وظحكنه وغيرت جو شويه

بعدها صليت يله نمت

ثاني يوم كعدت يمكن ب1 الظهر

صليت وخلصت رحت يم امي

سلمت عليها وبستها براسها

سالتني ع مروه كتلها طلكتها

كالت يوم ليش تعاند شكنالك من البدايه

والله ابوك كال اذا بقت ويا سنه شوفوا

وفعلا مصارلك شكم شهر

ليش هيج تبهذل نفسك

انت مااعرف تعاند نفسك لو تتعمد ع اذيتك

سكتت محجيت شي

مااعرف شاحجي

يوم جوعان شمسوين غده

كالت هسه بس خل احمي الاكل

يوم منو الي يطبخ الغده

زينب تكعد من وكت تطبخ وبعدها تروح للجامعه

اتغديت وخلصت

ضايج حيل وماالي واهس لكلشي

كلت لامي ماترحين للنجف

مشتاق لمروان حيل

منو يروح ويانه

بس اني وياج

خل نتاني زينب والجهال ناخذهم ويانه

لايوم بس اني وياج

ياريت حيل مشتاقه ازور الامام وازور مروان

يله لعد بدلي ع ماابدل

فعلا بدلنا وخبرنه ابويه ورحنه تقريبا ب2

رحنه كبل للمقبره احس بكلبي مقبوض حيل

ضايج ضوجه متنوصف ابد

وصلنه امي خطيه تبجي عبالك هستوه مات معبالك صارله 5 سنوات

قريت الفاتحه وقريت قران وجبت مي ذبيته ع القبر

جانت علاقتي بمروان متنوصف ابد اقرب واحد الي

احس بنفسي حيل مشتاقله هواي

خلصنه ورحنه زرنه الامام علي وصلينه المغرب بالحضره

احس كلبي انفتح بالحضره

بعدها رحنه اتعشينه بشارع الروان ورجعنه

احس بنفسي هواي ارتاحيت

رجعنه بالليل لكيت نور ونظوري نايمين خطيه حيل مشتاقلهم

صارلي يومين مشايفهم

بس دست ع كلبي وماصعدت لان ادري بنفسي اضعف امامها اذا صعدت

وكرامتي متسمحلي بعد اطلب منها شي

خليها ع راحتها لمن هي تتقبلني

زينب : مروه راحت وي امها لاهلها

كالت خاله منخبر حيدر احنه

خلي هو وياها نارهم تاكل حطبهم

كام يحجي عمو كال تذكرون شكتلكم من رحنه خطبنه

دومه ابنج مستعجل مااعرف هذا عليمن طالع

اشو ولا واحد من اقربائنا متزوج 2 وهذا المخبل اتزوج 4

المشكله ولا وحده طلعت بيها حظ

بس هاي زينب الوحيده الي تحملت خبالاته بس هو ممقدرها

جنت متوقعه من حيدر يطلك مروه راح اكون اسعد وحده

بس هسه مااعرف ليش مفرحانه

يمكن لان كالت ع مودكم نزلته للطفل

حسيت بذنب حتى لو من بعيد

اني طرف بهاي السالفه

اجه الموعد الي يجي بي حيدر

جنت حيل متلهفه يرجع حيدر من السفر

واخيرا رجع بس احسه حيل متغير من ناحيتي

هاملني ولا كانو مقابيله

كملنه العشا وصعدتهم لان موعد نومتهم

وكعدت اقره جان عندي امتحان كورس اول

وجنت اقره ومندمجه

فجأه دخل حيدر اول مره يسويها

دائما يطلب الاذن لو يدك الباب لو يراسلني

فتح اديه واني بالي راح لبعيد توقعته بس اروح اذب نفسي بحضنه ياخذها بغير شي عباله موافقه عليه

هذا الشي لحد الان ممتقبلته ابد

مااعرف ليش هيج اتصرف

حسيت بي ضاج انطاني علاكه وطلع

كلت لازم هيج اسوي اذا صرت سهله وسامحته اكيد راح يعيد الاهاين الي

بس خلي يتعذب شويه مثل معذبني هواي

فتحت العلاكه وجان بيها ملابس الي واله وجايبلي ملابس للجامعه بنطرون وقميص كلش حلو

جايبلي خلخال كلش حلو

طبعا ذوقه فد شي

وجايبلي مداليه هم حلوه

المداليه لبستها لان جانت عباره عن عين بيها رموش

بقه بالي مشتت مركزت بقرايتي

نمت طبعا بالدوام اترك صلاة الليل بس خميس وجمعه تقريبا

لان انام من وكت مااكدر اسهر

كعدت الصبح مثل روتيني

رجعت حيدر ماكو كالت خاله راح لمروه

حسيت بغيره مو طبيعيه

اسم مروه يهز كياني

اني متاكده راح يطلكون بس غيرتي معرفت افسرها

بقيت افكر ها هسه راح يرجعها بعنادي لان رفضته

ها هسه يتوسل بيها

هسه يكلها اموت بدونج

بقيت بقلق للعصر ماكو

بعدين كالت خاله جاي بس نايم

كملنه عشا وصعدنه

عيني تراقب الباب اتامل يجي

اني محتاجه وجوده بس مو مثل ماهو يريد

بس هو كاعد يثبت العكس

اخر شي نمت

ثاني يوم كذلك رجعت من الجامعه

كال عمو راحوا للنجف حيدر وخاله

تجاهله الي خبلني

اني مااريده يتوسل بيه ولا اريده يتقربلي ولا اريده يتجاهلني

اريده يبدي وياي من الصفر

اريده ينسيني الجرح

اريد اتعود لوجوده بيناتنه

بس هو مهمه هاي الاشياء

همه الوحيد ينام وياي

وهذا اكبر غلط منه

لليل صعدنه وهم نمنه من وكت

ثاني يوم صادف خميس

هم ممداوم حيدر

صارلنه 3 ايام منشوفه

صاير هواي قاسي

يعني مفكرت تشوف نور ونظوري

خطيه هواي يسالوني عليه واكلهم عنده شغل

من رجعت وجبت الجهال

لكيته بالصاله سلمت وصعدت

نور ونظوري بقوا يمه

سبحت وبدلت ونزلت

سالتهم منو ممتغدي كالت خاله بس انت لان حتى زهراء وامير اتغدوا

رحت للمطبخ اكلت شي بسيط

اجه حيدر للمطبخ

راد جاي صبيتله واني غسلت المواعين

كال بدلي لنور ونظوري اريد اطلعهم

جنت اتمنى هم يطلب مني

بس معبرني ابد

راحوا ماادري وين

بقوا لليل راسلتني رسل وبقينه نسولف

سالتني عن علاقتي بحيدر

وسولفتلها كلشي هي الوحيده الي اكدر احجي بالتفصيل

لان من البدايه تعرف كلشي عني

كالت زينب انصحج نصحيه

كافي عناد الرجال تندم واعتذر منج

حس بخطأه واعترف

الاعتراف بالخطأ فضيله

وانت كاعد تحبينه وهو كذلك

ليش بعد هاللف والدوران

كتلها مدا اتقبله من ينام وياي

لج لتصيرين عوبه والله يرجع للحرام

وراح تاكلين بنفسج اكل

من ترجعين للواقع حرام عليج تمنعينه

انت شلون تصلين وتصومين

لعد ومروه

شوفي زينب راح احاجيج بكل صراحه مااعرف راح تزعلين لو لا

انت لو مو مروه مراح توافقين عليه

ع ابو هاني وضربني

لج بابا الرجال مو هين عليه يتوسل بمره

بس هذا لان هواي اذاج هيج يشعر بندم

بس هم عنده كرامته وصبره اله حد ديري بالج

واذا رجع يعصب والله ياذيج

اشو جان لاعب بيج جوله مايوم حجيتي ولا دافعتي عن نفسج

هسه من بده زين وياج شلتي خشمج عليه

انت مستحيل تتطلكين ولا راح تفكرين تروحين لاهلج

هل من المعقوله تبقين هيج لا انت بسما ولا انت بكاع

المره تحتاج الرجل بحياتها

تحتاج تشكيله همها

تحتاج تخلي راسها بصدره حتى تحس بالامان

الاهل مدايمين لاحد

انت حبيتي لحيدر وهو حبج يمكن اكثر من الكره الي كرهج بي بالبدايه

اني جنت دائما اسمع الكره يولد الحب

مدام تاب وبعد ماعنده اي شي

احتويه وقربي الج وانسي الماضي

لتصيرين معقده

كتلها خل افكر واشوف

لج شتفكرين ميحتاج تفكير

كملنه المحادثه

كعدت اقره

تقريبا ب9 يله رجعوا

اجوي فرحانين وجايبين وياهم حلويات وكرزات

نمت وره شويه وجان يدك جهازي

شفتها رسل ملحكت عليها بس لكيتها يمكن 20 مره داكه

بقيت حايره هستونه جنه نحجي

دكت مره لخ رفعت خط

وجان رسل تبجي وتكول ........

توقعاتكم حبايبي شبيها رسل ؟؟؟؟؟

وشراح تكول لزينب ؟؟؟؟؟؟

زينب راح تسمح نصيحة رسل لو لا ؟؟؟؟

تحياتي للجميع حبايبي 😘😘😘😘