مساء الخير ع اجمل متابعين اتمنى لكم قراءه ممتعه
🌹البارت 52 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
جان تبجي رسل وتكول يمعوده وين صرتي من يمته اخابر
جنت نايمه والله
شكو شصاير كلبي وكف
لج جنه يم الدكتور طلعلت نتائج التحاليل
اي بشري
شابشر كلنه ميصير عدكم طفل ابد
حتى احتمال ضعيف ماكو
يعني مراح اكون ام ابد
مراح احس بالامومه
مراح اسمع كلمة ماما
مراح اسهر بالليل
تحجي وتبجي
تحجين صدك
اي والله وحبيت اول وحده اشكيلها همومي انتي
كمت ابجي ع بجيها خطيه صارلهم هواي متزوجين
ويحلمون بالطفل
مااعرف شاكلها وشلون اواسيها
كتلها لتكطعين الامل ابد برب العالمين
اذا الله راد شي لو مو الطبيب يصيرعدكم
تذكرين مروان مو تكولون احتمال 10% يصير عنده
وجنتو مأيسين منه
لعد شلون صار نظوري
اكيد الله كاتب النه
بس احنه مرات ماعدنه صبر
مروان جان عنده احتمال 10%
احنه كللنه حتى 1% ماانطيكم
المشكله عندي مو عند محمد
حايره شاسوي هم خطيه يريد طفل يحمل اسمه
الله كريم خلوا عينكم بعين الله
بقيته نحجي فتره بعدها
طبكته منها ونزلت
لكيت البيت هدوء اكيد نايمين خاله وعمو
ردت اصعد بس سمعت صوت خاله
ها زينب اكو شي
يمكن جانت ابيت حيدر
شنو خاله وين جنتي شطلعج بره والدنيه بارده
جنت يم حيدر غسلتله ملابسه خطيه
ليش مخبرني اني اغسلهن اله
والله ماادري يايمه محد شالع كلبي وبنفس الوقت كاسر خاطري غير حيدر
شردتي مني
لاماكو شي
ماكدرت اخبرها خطيه خاله
رجعت صعدت وحيل ضجت ع محمد ورسل
خطيه ميستاهلون ابد
بعدين اتذكرت حيدر دوختني اطباعه
يعني من جان يكرهني وميطيقني اني قايمه بواجبه
ملابسه اني اغسلهن وبيته انظفه واكله عليه
لويش هسه هيج كاعد يسوي
معقوله هملني لان ميحبني
اي اكيد ميحبني
الرجال عنده اهم شي شهوته ميهمه مشاعر الزوجه
هو مكاعد ينطيني مهله
اني مرافضه قربه الي اله عندي اسبابي
جانت مروه العائق بيناتنه
هسه مروه ماكو ليش هيج ابتعد مااعرف
احتاريت شاسوي
اخر شي راسلته
هلوووو
كاعد
ماكو جواب
يمكن نام
بقيت بقلق ونومتي طارت بيومها
كمت اتوضيت وصليت وقريت قران
بعدها اذن صليت ونمت
كعدت ثاني يوم صادف جمعه
لكيت البنات ساره وبنين وفاطمه هنا
سلمت عليهن
التهينه بالغده وجانوا ازواجهن وياهن
كعد حيدر وامير همين
كعدوا وياهم بالاستقبال
كملوا الغده وراحوا
بعدها هم اختفه حيدر
كالن خل نروح للمولات
دائما من يجن يرحن
كالت بنين انت اخذينه زينب
بعد منريد منية احد لا حيدر ولا امير
كتلهن خل اشوف حيدر اذا قبل اروح
روحي شوفي لان منلحك هم يادوب نروح هسه
ردت حجه حتى اروحله لبيته
رحت ودكيت الباب
كال تعالي فوتي
من شافني دنك عينه
كتله ليش تكل لخاله تغسل ملابسك
متكول خطيه مره تعبانه وجبيره هاي فوك دوامها وتعبها
شنو شكتلج امي
لا ماشكت
لعد اسكتي وسدي الموضوع ولتدخلين بيني وبين امي
حيدر لتنسه اني زوجتك وواجب عليه اقوم بواجبك
ميصير تطلب من امك واني موجوده
بس اعتقد انت مو خدامه حتى هيج تسوين
حيدر لتصعب الامور اكثر عليه
عمري ماحسبت شغل البيت لو الطبخ خدمه
هذا واجب عليه
بس انت الي حسبتني هيج
زينب عفيه نعسان واريد انام
عندج شي احجي
ماعندج شي روحي وسدي الباب
اطلع شويه عن البيت خلي انظفه
لا مبي شي عوفي
نسيت اني عليمن اجيت
حيدر لتعاند لخاطر الله
روح يم البنات شويه وتعال نام
طلع ادري بي يحب النظافه حيل
بديت بغرفته رتبتها وخليتله فرشه ثانيه وبرده
خليتهن بالغساله وبعدني كاعد ارتب
اجت فاطمه
كالت ولج شتسوين هنا
احنه وين وديناج وانت وين رحتي
والله نسيت مكتله
كولي والله واحنه مبدلين ومنتظرين
لج خطيه البيت مبهذل وهو يتخبل من الهوسه
هو دزني يكول خل تعوف الي بيدها وتروح
وعود من ترجع تكمل
مااكدر بعد بلشت والملابس بالغساله
خل هو ياخذجن
لحضات ورجع
عوفي البيدج وروحي
ردت احجي اشرلي اسكت
كملت بس الملابس وطلعتهن شريتهن
رحت لكيتن جاهزات
بدلت ع السريع
نور ونظوري بقوا يم ابوهم
رحنه وفرينه واشترينه حتى زهراء ويانه
زهراء خابرت امير كلتله حباب جيب اكل جاهز مابيه حيل اسوي
كال ميخالف
دائما الغده عليه والعشه عليها
اذن واحنه بعدنه
اني دائما حيدر ينبهني ع شغلت الاذان
كتلهن يله مااكدر ابقى بعد
حيدر مايقبل
كامن يتوسلن بس هاي وبس هاي
اني اتصلت بي كلت اخبره
بس ميجاوبني ابد
اخر شي كتلهن مااكدر ابقى
راح ارجع واخلي امير يجيجن
كالن لا خل نرجع سويه
رجعنه
لكينه حيدر يصلي بالاستقبال هو ونور
ونظوري هم يقلدهم
كملت كتله اسفه اتاخرنه بعدني ممكمله
عادي مو مشكله وعافني وراح
كتلني تجاهله الي
اجه امير وجايب عشه
اتعشينه وكملنه
بعدها اتجمعنه بغرفتي
كامن يحجن عليه
لج والله موتي للرجال خطيه
اشو مروه وطلكها
اني اتفاجأت شوكت طلكها
ثاني يوم من اجه من السفر
لعد اذا مطلكها ليش مكلي ليش محاول يحجي وياي
دخت اكثر
اني ادري راح يطلكها
واتوقعته اول وحده يخبرها بهذا الموضوع اني
كالن فدوه بدلي واتمكيجي وروحي يمه وفاجئي
انعاد عليه شريط حياتي
واتذكرت من سويتها بيوم حنته
وشلون فشلني وهاني
لو اموت مااسويها بعد
ابد ماافرض نفسي عليه لو شيصير
مره وحده خطات متنعاد بعد ابد
كتلهن لا مااسويها تذكرن اسوه بيه لو نسيتن
زهراء كالت شو مكاعد اكدر افتهم شي
ضحكن كالن احسن لتفهمين
لج سالفه جبيره
الله عليجن سولفلي
كالت دزينه رساله ودشداشه لزينب ع اساس من حيدر
جانو بوقتها متزاعلين والزعله جبيره
بيوم حنته
دزيناها لحيدر وهو انكلب وحش علينه
اني الصراحه بجيت بدون ماادري بنفسي
هذا الموقف جان اصعب موقف مريت بي
كتلهن لعد اذا تذكرن ليش هسه اطلبن مني نفس الشي
كالت بنين لج جان مخبل واحنه نشهد ع خبالاته
بس هسه صار انسان ثاني يختلف عن القديم
اكيد نعاد فرمته من جديد وصار هيج
هسه يحبج ويتمنى رضاتج
مو مثل قبل
حبابات سدن الموضوع
كالت فاطمه ابصم بالعشره اذا ماينسى اسمه بس يشوقج اكص اديه اثنينهن
عفيه سدن الموضوع
سالني ع اخو مروه
كتلهن ماما رفضت من سمعت بمروه
وحتى تبارك هم رفضت ورجعولهم خبر مموافقين
كالت فاطمه زين سويتوا
لان ماارتاحيت الهم ابد
اتذكرت بيت حيدر
كلت باجر سبت وانضفه
نمنه وكعدنه اتغدينه والعصر راحن البنات
استغليت وجوده هنا يم عمو
ورحت رتبت البيت كله اله
نضفت الثلاجه همين
كملت كلشي
ملابس وسخه ماكو
رجعت للبيت
لكيته ماهو وحتى نور ونظوري
صعدت سبحت وطلعت لكيته بالغرفه
انتابني شعور غريب
اول مره اتمنى يبقى يمي
اتمنى ينام يمنه
اشوف الحزن واضح عليه
بس اتفاجات بي
ولا كانو اني موجوده
معبرني ابد
كاعد يدرس بنور انگلش
مبين عليه قوي بالانگلش
اذن عافنه ونزل
جففت شعري واتوضيت
كملت نزلنه
سوينه العشه اني وزهراء
اتجمعنه كلنه
حسيت بحيدر مو طبيعي
شويه وعاف الاكل
ذب من راسه
سالته خاله كلها ماكو شي
كملنه وصبيت الجاي الهم
شويه وهم اتخربط
كل لامير كوم اخذني للمستشفى
بقينه قلقين عليه
اتاخروا بعدين رجعوا
كالوا ماكو شي مسويله تحاليل وسونار بس مابي شي
احتمال صاير عنده تسمم
ضاربينه ابر ومشكليله مغذي
راح لبيته كبل نام
بقيت قلقه لااكدر اروح اطمان عليه اخاف نايم
ولا اكدر ابقى هنا
باجر عدنه دوام حتى هو
راسلته بس ماكو جواب اكيد نايم
نمت وكعدت الصبح
اني اكعد قبل الكل ع مود الغده اطبخ قبل لااروح
كملت وحضرت الريوك
اجه وجان مبدل الزي العسكري
كال صباح الخير وهو مدنك
صباح النور
شلون صرت
الحمد لله ماكو شي ان شاء الله
كلي مااريد بيض انطيني اي شي غيره
انطيته جبن كيري وصبيتله جاي
اكل وراح بدون كلام
حيل ضجت ليش هيج متجاهلني
رحت للجامعه بس مجان عندي واهس ابد
خلصت المحاضره واتصلت بي حتى اطمان عليه
ينطيني رفض
دزيتله ماعندي شي بس حبيت اطمان عليك شلون صرت
ماكو جواب
دخلت للمحاضره وطلعت
ماكو منه لا رساله ولا مخابره
حيل ضجت يعني ليش هيج يسوي وياي
كوه كمل الدوام وجبت الجهال من الباب ابد مدخلت يم اهلي
رحت لكيته بعده مجاي
حميت الاكل وصعدت بدلت
طلبت من نور تدرس
نزلت لكيت امير وزهراء وهو
ولا يباوع عليه ولاكانو موجوده
اتغدينه سويه
كملت ورحت صعدت درست نور شويه
واني بديت ادرس
اجتي زهراء كالت شبي حيدر هم متخربط
والله ماادري ليش
راحوا هو وامير للدكتور حاجزين
ابد ماعندي علم
زينب خطيه كافي سويلها حد
تعبان هواي ومريض
خطيه محتاجج هسه اكثر من كل وقت
والله مااعرف شاكلج
بس مااكدر اني اتنازل اله واكله تعال
المفروض من طلك زوجته هو الي يجيني
اشو صار العكس
بده يبتعد عني وهاملني
حتى ملابسه يخلي خاله تغسلهن اله
لازم جارحته بكلمه او سامع منج شي
والله مااعرف شاكلج
راح اعوفه ع حاله وخل وين متصفى تصفى
بقيت ع نار
اجوي بالليل رحت سالته
كال ماكو شي
يعني شنو الماكو شي
يعني مبيه شي
اني متاكده ميريد يحجي
عفته ع راحته
رحت سويتله شوربه وانطيتهيا
كال امير اعتنو باكله لازم بدون دهن
سالته شنو البي بالضبط
والله ماكال شي الدكتور ابد ماعرفنه البي
احتمال من الشرب هسه بين بي
شاد كانولا راح يمه امير انطاه علاجه
رحت يمه كتله تعال اصعد نام يمنه حتى انتبه عليك
لا عوفيني مابيه شي
حيدر مو وكت عناد هسه انت مريض تحتاج واحد يعتني بيك
ياريت اتركين التمثيل افضل الج
هسه اليسمعج يكول خطيه ذابحه نفسج عليه
ياريت اطلعين وطفي الضوه وراج نعسان اريد انام
بقيت صافنه عليه
هو مو صوجه صوجي اني الي اجيته
عفته وطلعت والله لو يموت بعد ماعليه بي
بديت اتجاهله مثل ماهو متجاهلني
بس المشكله حالته ادهورت
راح لهواي اطباء كل واحد يكول شكل
دائما يشكي من الم ابطنه ويتقيئ
اكله قل
دكتور كال اثر الشرب
واحد كال قرحه
واحد يكول حساسية امعاء
صارله شهر ع هذا المنوال
يصير زين ويرجع يتخبرط
يوميه اغسل ملابسه وارتب بيته وارجع
اكله خاص لو شوربه لو شوي لو سلگ بدون دهن
هو مبتعد عني واني كذلك
اليوم صادف خميس اتصلت بيه رسل
سالتني ع اوضاعنا
خبرتها بكلشي
بدت تحجي عليه
لج لتصيرين مضحك راح تنطينه مجال يروح للحرام
لو يرجع مروه
ابدي اتقربيله ليضيع من ايدج
والله تبقين تعضين باصابيعج ندم
اكلج هو مبتعد
اي عادي لان جرحتي كرامته
والرجال يختلف عن المره
ميتحمل الاهانه
انت هواي ذليتي وهواي خليتي يتوسل بيج
وانت بس يله تشرطين عليه
لازم واحد منكم يقدم تضحيه للثاني
كافي عناد انت ويا
اشو اكلتيني حاصل فاصل
يابه انطيني مجال خل اسالج ع اوضاعكم شاخباركم
والله بدت المشاكل اني ومحمد
ع شنو
اكله خل نتبنى طفل وهو متخبل
يكول مااكدر اربي طفل مو من لحمي ودمي
اي والله صحيح صعبه يارسل
رناوي شخبارها
خطيه تقره ليل نهار
هنا الدراسه اصعب من العراق
مرات محمد يشرحلها ومرات زوجها مصطفى
ومرات تجيني الي اني اشرحلها
شلونكم وي الغربه
ييه لتسولفين سالفتها والله ارواحنه طالعه
بس شويه الي مصبرنه احنه العراقين عايشين كانه عائله وحده
هذا الشي يهون علينه الغربه
زينب انصحج نصيحه اتنازلي لرجلج واكسبي وبطلي العناد
والله اخاف من ردة فعله اذا رفضني يمكن انتحر واموت والله
اخاف من ردة فعله وصعبه عليه اكله تعال
لاتگليله تعال بس راسلي سمعي كلمه طيبه
محمد طلب منه باجر يسوي تحاليل جدد وسونار
كله دزهن الي راح يعرضهن لدكتور هنا
محمد يكول اشك بي زائده عنده بس محد عرفه
هواي اطباء اكدوا مو زائده
مااعرف بعد باجر نشوف ان شاء الله
حيدر : بديت اتجاهلها لزينب لان من صدك تعبتني بصدها الي
قررت ابد مااصعد ولا اهتم الها
اذا تحبني من صدك راح تحاول تتقربلي هي
ع الاقل تراسلني تهتم بيه باكلي بملابسي
بس لاحضت العكس
اني متاكد زينب متحبني من كل كلبها
راح تبقى حاقده عليه
واكبر دليل دائما تذكرني باخطائي
كلت هسه تنزل تسالني ع ملابسي جوعان شبعان
بس ماكو صدك ضجت
دزيت ع امي وجانت ع اعصابي
لان خطيه تتعب بالمدرسه ومااهون بيها
بس مجبور لان ملابس هواي وسخه عندي
كملتهن وراحت
اني الغرفه رتبتها لان اضوج من الهوسه
قررت مروه انطيها حقها الشرعي الغايب والحاضر
لحد الان ملابسها بالكنتور
لان اكيد اني الغلطان ومن وراي طلبت الطلاك
هي لو ملاحضتني زين وياها مجان طلبت الطلاك ابد
اتصلت بابوها وكتله ع مود الغرفه وملابسها والغايب
بالبدايه اعترض بعدين اصريت اني لان ماالها ذنب
وذنب الطفل هي تتحمل المسؤليه
كال عمي احنه ندور حق الله
منريد 25 اذا انت مصر انطي 10 بس
والغرفه منريدها صعب نقلها لغير محافظه
بس ملابسها خليهن
دزيت ابويه اخذ الفلوس والملابس وكلشي يخصها
وكلنه محامي واطلكنه محكمه
احس بنفسي مشتاق حتى لجهالي مكاعد اشوفهم هواي
اخذتهم للالعاب واشتريتلهم خطيه حيل فرحوا
بس احس نفسي مو ع بعضي
دائما نفسي لعبانه والم قوي ابطني
احس احشائي تتكطع
مااعرف شنو البيه بالضبط
تجي زينب تسال من وره خشمها
عبالك شخص عادي وهيج تسال
كامت تجي تنظف البيت وتغسل ملابسي وتروح
مره طلبت مني اصعد انام فوك
عبالك محملتني منيه
اني رفضت واعترف صاير وياها قاسي لان تعبتني
تدري بيه مااتحمل اصعد يمهم
اني انسان قوي بس امامها ضعيف
اني اريدها هي الي تنزل يمي
اريدها تحس بالمي قبل لا اكول اه
اتمنى اشوف لهفتها وخوفها عليه
كامت حالتي تسوء اكثر
اكلي خاص مااتقبل الاكل الدسم
طبعا ع اعصابي متجاهلها
جنت متوقع اذا طلكت مروه راح تنحل كل مشاكلنه
بس طلعت متوهم
هي الي اختلقت هاي الاعذاروخلت عائق بطريقنه
محاولت تكعد وياي وتسالني بحنيه
اني فسرت تصرفاتها العدم مبالاة
بانها حاقده عليه مستحيل تحبني
هذا الشي هم اثر ع نفسيتي
حالتي من سوء الى اسوء
اصير زين وارجع اتخربط
اخر شي كلي محمد دزلي دوبلر وتحاليل الي
رحت اخذت ودزيتهن اله
هو من البدايه كلي شاك بيك زائده
كتله مامعقوله متبين والاطباء متعرفها
كال متبين لا بسونار ولا بتحليل اكثر شي تنعرف بالفحص السريري
ثاني يوم من دزيتله التحاليل والدوبلر
كال كلشي مابيهن تحاليك
اكو دكتور صديقي وياي هنا من اهل النجف
انطاني اسم دكتور بالنجف كلي خل يروح اله
هذا خاص بالجهاز الهظمي خل يسويلك ناظور
فعلا ثاني يوم رحنه اني وامير ولد صديقه
اول مفحصني كال لازم عمليه متحتاج ناظور
عندك الزائده ملتهبه زايد
كال اكو زائده باللحضه لازم تنشال ميتحمل المريض واحتمال تنفجر
اكو لا يصير بيها التهاب بسيط شويه شويه لمن تاذي المريض
كال هسه انطيكم ورقه دخول للمستشفى اليوم تسويها
كتله بوضع شغلي لازم ارتب اموري واطلب اجازه
كتله انطيني مهله لباجر ارتب اموري وارجع
كال متحتاج تاخير مو من صالحك
احنه نسويلك تقرير طبي
كله امير نسويها بالاهلي
كال ماكو داعي بالعام هم عنايه والعمليه بسيطه
كتب ورقه لمستشفى الصدر
طلبت منه ورقه للمركز مالتي
خابرنه ابويه وخبرنا
كال هسه راح اجيكم مقبلنه بس هو اصر
الولد صديق امير هم دكتور طلبنه منه يرجع مقبل
رحنه للجامع قريب صلينه
بعدها رحنه لشارع الروان رحنا للمطعم عيب من الولد
خاف نتاخر اني ماكدرت اكل اي شي
بس همه اتعشوا
مرينه بمحل جان قريب علينه
اشتريت تراك اريح الي من البنطرون
ورحنه للمستشفى
الورقه مالت المركز انطيتها للولد
كال قبل لااداوم اروح للمركز واسلمها انطيته اسم ضابط صديقي
امير والولد بصفتهم اطباء كدروا يتفاهمون وي الدكتور
جنت اتمنى تتصل بيه زينب قبل لاادخل عمليه
اكيد عرفتني راح ادخل عمليه
دخلوني للصاله
خدروني بعد مااعرف شصار مصار
كعدت لكيت نفسي بغرفه وامير وابويه وامي خطيه
الولد راجع خطيه تعبنا ويانه
اتحمدولي ع السلامه
كال امير لك بيك بخت بهذا الدكتور
لكاها خايسه منتهيه راونيياها
مدري شلون بقيت صاحي
كتله شكد راجعنه ولا واحد عرفني
كال مو دائما اعراض الزائده خلال يوم يتخربط المريض
بس انت بقيت اكثر من شهر لان التهابك جان مو حاد
شويه شويه لحد ما اتاذيت
يوم انت شجابج
كلي ابويه هي سمعت وهي اتخبلت اله اروح وياك
كتلهم روحوا وخلوا بس امير وياي
كوه اقتنعت امي
ثاني يوم اجه الدكتور فحصني وكتبلي خروج
سالته ع اجازتي شلون
كال جيبولي احاله وكتاب من المركز واني اسويلك اجازه 10 ايام
رجعنه للبيت
لكيت زينب كبالي
اتحمدتلي ع السلامه
كلي امير لازم تنام بالاستقبال
لان اكيد الكل راح يسمع ويجيك
ماتكدر كل شويه بمكان
فعلا استقريت بالاستقبال
اجوي حبايبي حضنتهم وبوستهم
شويه وطلعتهم كلتلهم بابا مريض وتعبان
سالتني جوعان
كتلها مااشتهي
للعصر بدت الناس تجي
اجوي جماعتي واهل زينب واهل زهراء
ثاني يوم اجوي نسابتنه وجوارينا
تقريبا 3 ايام مفكينه من الخطار ابد
شويه صرت زين
رحت لبيتي كمت انام اريحلي بفراشي
امير سوالي الاجازه وكملها
كامت تجي زينب تقوم بواجبي
اكلي وشربي وملابسي
يومين هي ممداومه
بعدها رجعت داومت
شفت الخوف بعيونها واضح
لازم ابدي ارجع اتقرب عليها
لهنا وكافي
لان مو من المعقول هي تجيني وتكلي تعال منتظرتك
صرت زين ورحت شلت خيوط العمليه
اول قرار راح اسوي هو ابدل كلشي بالبيت
الغرفه والكاونتر
ارتب غرفه للجهال
هنه غرفتين جوه وحده النه وحده الهم
هالمره مراح افتحهن الغرفتين
كلمن وحد افضل
الغرفه الثانيه فارغه مبيها شي
قررت اسويها النه اني وياها
اخاف متقبل بذيج الغرفه
اخاف تذكرها بالماضي
وغرفتي راح اخليها للجهال
كلت راح ارتب كلشي واخليها مفاجأه
اول شي سويته انطيت الغرفه وانطيت فوكاها فلوس واخذت غرفه النه بمكانها
جبت صباغ صبغ غرفة الجهال صارت الهم
سواها نصين نص ترتيب بناتي ونص ترتيب ولادي
كلش حلوه طلعت
حبتلهم كلمن كنتور خاص بي وجربايه رتبتها طلعت حيل حلوه
بعدها اجه واحد اخذ الكاونتر وانطيت فوكاه وسويت واحد جديد موديل تركي اختاريت لون اوف وايت
اخذوا هو والبي كلت من تجي زينب هي تشتري الاشياء الي يعجبنها
تقريبا 10 ايام يله جهز واجه نصبه الولد
الغرفه اختاريتها ع ذوقي
هم صبغتها
هاي الفتره سويت نفسي ضايج منها حيل
مااطيق كلمه منها
ردت اسوي هيج حتى تزعل ومتدخل للبيت
اكثر شغلي وهي بالدوام يعني الصبح
ابد محست بيه لاهي ولا اهلي
نصبوا الغرفه
اني بنفسي رتبت ملابسي
جبت فرشه نفس الي شككتها العجبتها
وجبت بعد شكم وحده وياها
جبت الها ملابس نوم ع ذوقي ورتبتهن
جبت عطور ومعطرات
تقريبا جهزت كلشي
حسيت بيها ضايجه حيل
اليوم صادف خميس
خابرت امها كتلها خاله محتاج مساعده منج
مسوي مفاجأه لزينب
واريد اليوم تخلون نور ونظوري يمكم يباتون
حاولي وياها
كالت احنه نريد للنجف وراح نبات
راح اكلها ناخذهم ويانه
اي والله ياريت خاله تسويلي جميل ماانسى
تدلل خاله
وره شويه دزتلي رساله
اخذت رايي عليهم
كتلها خلي يرحون ماعندي مانع
كالت اكدر اروح وياهم ازور
لا ممنوع
حباب والله ضايج
لا يعني لا
خلص الدوام ومريت ع محل جبت نفاخات وشموع ضوئيه وعاديه
جبت كيكه وكرزات وعصائر وحبشكلات بعد
رجعت كبل لبيتي نزلتهن وضميت الكيكه
الجو جان بارد حيل لان نهاية شهر ال12
رحت لاهلي ولكيتها تحمي الاكل
جهزت الاكل ورادت تصعد
كتلها تعالي اتغدي
لا مااشتهي ونعسانه اريد انام
حسيتها حيل ضايجه هواي
اكيد من معاملتي الها
بس كلت هانت مبقى شي لليل
امير هو وزوجته راحو لاهلها كالو لليل يله نجي
رحت للغرفه نفخت البالونات حضرت نشره
وجبت ورد نشرته ع الفراش
رتبت الميز
اذن صليت ورحت يم امي
لكيتها تريد تسوي عشه
دزيت رساله لزينب كتله تعالي سوي عشه
نزلت ومبين عليها باجيه لان عيونها حمر
حيل ضجت واتندمت
كلت اني وعدتها بعد مااخلي دمعه تنزل منها من وراي
وهسه نزلت دموعها
اني مااشتهي لان ب3 اتغديت
وهسه الساعه يادوب ب6 ونص
كتلها اني مااشتهي لتسوين الي
هي هم مااكلت
كتلها ليش ماتتعشين
مااشتهي
شنو السالفه الغده متشتهين والعشه متشتهين
روحي اكلي ولتتصرفين مثل الطفله
ولا اهتمتلي انتظرت اهلي كملوا غسلت المواعين
اهلي سالوها ع نور ونظوري
كالت وي اهلي راحوا للنجف ويباتون هناك
اخاف يبجون عليهم
لا خاله متعلقين برقيه
كالت راح اصعد اقره عندي امتحان الاحد
راحوا اهلي للغرفه
خابرتها الووو
الووو
شكاعد تسوين
اقره
هم خابرتي اهلج ع الجهال
هسه جنت احجي وياهم
شلونهم
زينين
جيبيلي جاي حار لبيتي وتعالي
اوك
شعلت الشموع الضوئيه والنشره
جبت الكيكه ورتبت كلشي
مااعرف ردت فعلها بالضبط
راح توافق ومتمنعني
لو ترفضني
كل الي اعرفه ماانطيها بعد فرصه تبتعد عني ابد
طلعت انتظرها بالصاله
اجت جايبه الجاي
انطتنياه ورادت تطلع
وين تردين خل اخلص واخذي الكلاص
بديت اشرب
كتلها روحي جيبي ملابسي الوسخه واغسليهن
اشو ممصدكه منعتج مره شنو يشوكت ابقى اغسل ملابسي بنفسي
هسه لو بعدين
اي هسه ليش عندج شي
لا ماعندي شي
اريدها بس تدخل
راحت للغرفه مالتي القديمه الي هسه للاطفال
كتلها بذيج الغرفه مو بهاي
واني رحت وراها
دخلت وجانت منصدمه
رادت تطلع اتفاجات بوجودي خلفها مباشرتا
وين تردين ترحين
ها اريد اصعد فوك
لعد والملابس
خليهن ع باجر
بس اني اريدهن اليوم
ليش هيج مسوي الغرفه
لان مواعد وحده راح تجيني
لعد خليني اصعد
اي عادي كملي الملابس واصعدي
وينهن الملابس
بذاك الكنتور اشرت ع البي ملابسها
فتحته وهم صفنت
كالت شنو الفلم
كتلها اختاري ملابس لحبيبتي ع ذوقج
اني شعليه بيك انت اختار
سحبت ايدها
اختاريت الها ع ذوقي
درتها اليه حلو لو لا
راح يعجبها لحبيبتي لو لا
زينب : مثل ممتجاهلني حيدر بديت اتجاهله
اني ماعندي مانع من يجي ينام يمنه
لان العائق ماكو بعد الي هي مروه
بس حالته حيل متدهوره ومن سوءلاسوء
اخر شي اخذه امير للنجف
اني الصراحه حيل قلقه عليه وخايفه
خابروا كالو راح يسون اله عمليه
راحوا اله خاله وعمو واني بديت اعيش بقلق
بعد فتره طمنونه وكالو صحه وحالته زينه
اجوي بالليل عمو وخاله
ثاني يوم داومت للعصر واجه
اتحمدتله ع السلامه بس هو نفس التجاهل ونفس البرود
بدت حالته تتحسن وكدر يطلع
بس المشكله بعد ميطيق كلمه مني
مااعرف السبب
حيل ضجت وروحي طالعه
حسيت بنفسي عبئ جبير عليه
كلما اريد ادخل لبيته ميقبل اريد اغسل ملابس ميقبل
بقيت دايخه معقوله اتندم ع حجيه
معقوله ميحبي ويجذب
اي اكيد هذا الشي الوحيد الي افسر تصرفاته بي
كمت اروح للجامعه وارجع ماالي دخل بكلشي
اسوي العليه واصعد بغرفتي
الشي الوحيد الي مصبرني رسل
دائما وحده تشكي للثانيه
كالت طلبت من محمد لو يتزوج عليه خطيه ينحرم من الاطفال بسبب
لو نتبنى طفل
لو يطلكني
وذني كلهن رفضهن واتعارك وياي
محتاره شاسوي
مشاكلنه كبرت من وره هذا الموضوع
اقترحت عليها يسوون طفل انابيب افضل حل
وكتلها هناك بامريكا ناجحه ومضمونه هاي العمليه
كالت هاي الفكره ابد مجايه ع بالي
لعد شوفي وقنعي
اي والله ياريت يوافق لان روحي طالعه
اتمنى اسعده واخلي يصيحوله ابو ....
اتمنى ينحمل اسمه
ماكو افضل من نعمة الاطفال
امنيتي اصير ام اسهر اتعب
الله كريم وربج تهون ع ساعه بس كولي ياالله
ياالله
تعاليلي سولفيلي عنج
يمعوده شاسولف
اذا احاول اتقربله شبر يبتعد عني اميال
ميطيق كلمه مني بس يصيح عليه
اني شكتلج مو كتلج والله تخسرينه وتتندمين بعدين
مابيدي شي والله
مااكدر اني الي اتنازل صعبه حيل
اني ماكتلج اتنازلي
بس اضحكي بوجها
بدلي اتمكيجي
الله عليج هم ترحين للصالون
مو دائما
لعد شلون اداومين بالجامعه متستحين
لج بابا غيري من حياتي ومن روتينج
والله ماالحك احك راسي
تدرين بيت واطفال وطبخ ودراسه
والله دراستي حيل صعبه
ميخالف بس ميصير تهملين نفسج ياعيني
ثاني يوم دزيتله مسج كتله راح اروح للصالون انظف وجهي
منو ياخذج
بوحدي من الجامعه واروح
ممنوع لو امج وياج لو لا
رحت لماما واخذتها ويايه
فعلا نضفت وجهي
طلبت منهن يسولي شعري تسريح حتى اكدر اخلي محلول
رفضن كالن هو ناعم وسرح ميحتاج
بس انت لان دائما تضفيري هيج يصير
انطني عصاره كللي تخليها من الليل للصبح
ثاني يوم يله تغسلينه
راسلته كتله راح اكصه لشعري
ممنوع تكصين شعرايه وحده منه
حيل ضجت شنو بكلشي يدخل
ولو هو ماعليه عتب العتب عليه اني الي اخذ رايي
كملنه ورجعنه
نضفت جسمي لان متعوده انضفه اضوج من الشعر
بس وجهي مااعرف ليش اتعاجز اسوي
من رجعت يباوعلي من فوك لجوه مثل المعاجبه وضعي
خليت العصاره لثاني يوم صار شعري يخبل
بعد ابد مااضفره لان سرح حيل
وره 3 ايام اتصلت بيه ماما
كالت نريد للنجف ونبات هناك
لان منلحك ع ماتجي تبارك من الجامعه وابوج
لهذا السبب راح نبات بالفندق
ونريد نظوري ونور يروحون ويانه
خطيه مجلبين برقاوي وياج وياج
والله ماادري ماما بس خلي اشوف ابوهم
راسلته ووافق
بعدين طلبت منه اروح وياهم
حسيت بنفسي حيل مخنوكه
لان اذتني تصرفاته حيل
كمت اعاني حيل ابعده عني
واكثر شي مضوجني تجاهله الي
رفض اروح وي اهلي
اتوسلت بي رفض
صدك ضجت
رجعت وجنت مخنوكه
جهزت الاكل وصعدت
رحت نمت بس دموعي تجري
اني جنت مااعرف شنو الاريده بالضبط
بس هسه لا عرفت
محتاج لوجود حيدر
محتاجه لحنانه
يمكن حبيته بجنون
اجه ابالي الفيس بين فتره وفتره ادخل ع البروفايل مالته
لكيت ناشر فيديو شعر
معقوله يعاني من بعدي
لا ممعقوله لان يكدر يجي ويطلب مني هذا الشي
اني رفضته لان جانت بذمته مروه وجنت اغار
هسه ماكو شي يعيقنه
دخلت ع التعليقات
ولكيت كاتبيله اشكال واللوان
الكل يعرف بي متزوج 4
دموعي وحدهن يجرن
مااعرف لان رفض اروح وي اهلي
لو معاملته اليه
لو اني اصلا مخنوكه
نمت من صدك
كعدت صليت وكملت وراسلني انزل
اني ابد مااشتهي
اكلت لفه ب10 الصبح ولهسه باقيه عليها
سويت عشه بس لعمو وخاله
زهراء وامير ماهمه يم اهلها
هو كلي مااريد
صعت اقره لان عندي امتحان يوم الاحد
شويه وراسلني جيبيلي جاي
الصراحه كمت اضوج من بيته
لان شكم مره منعني ادخل
كلت ماادخل بعد لوشيصير
بس هسه مجبوره ع مود الجاي
جبتله الجاي واتعمدت اصبه بالمطبخ حتى ع مااوصل يمه راح يكون بارد
لان الجو بارد حيل
اريد يعصب عليه
بلكي يعصب و يضربني لو يصيح عليه
حتى اروح يم اهلي شكم يوم ارتاح اريدلي حجه
ويمكن الكابه فول عندي الي يسمعني كلمه بسيطه انفجر بوجها بالبواجي
طلب مني ادخل اجيب ملابسه حتى اغسلهن
الصراحه محبيت ادخل للغرفه
مااعرف ليش
وجوده يمي ولوحدنا يوترني
اخاف يحس بضعفي اماما
اخاف تخوني دمعتي
حاولت ع باجر بس مقبل
رحت للغرفه الثانيه حسب طلبه واتفاجات بيها
ردت اطلع اساله
لكيته ورايه
كلي متواعد وي حبيبتي
احس بركان وانفجر بنص كلبي
يعني هذا سبب بعده عليه
اي اكيد يوميه يجيب وحده
اني منتبهت للغرفه مبدلها
لان جانت ماكو اناره بس النشره والشموع
حيل ضوجني من كلي تعالي اختاريلها ملابس ع ذوقج
رفضت وداخلي ينزف دم
اخذ ايدي وسحبها واختار ع ذوقه
وكام يلعب باعصابي
هذا حلو لو لا
حيدر وين تريد توصل بالضبط
بعدك مكفاك الي صار
يابه وربك هنتني بما فيه الكفايه
وذليتني هواي
هم ناوي تزوج
والله والقران هالمره تختلف
لا اكلك اروح لاهلي
ولا اكلك ابقى هنا
احجي وابجي
مجرد شريط حب واحد وراح تنتهي معاناتي للابد
يعني شلون مفتهمت اريد اعرفج شنو انت
اشو لا انت التحبيني ولا انت لا
اتغارين غيره مو طبيعيه
ومن اتقربلج تنفرين
اني مجبور اشوف غيرج لان انت ماذيتني
انت مانعتني اتقرب عليج
ماعندي حل غير ارجع لسوالفي القديمه
اجيب بنات يريحني وينسني همج
مراح اتزوج عليج حتى متنتحرين وتبليني بيج
بعد منيلي ام لجهالي
منو الي يطبخنه بعد
منو الي يدرس بنتي
لهذا السبب مراح انطيج فرصه تنتحرين
هو هذا كل همك
اي لعد الرجال شيريد اكثر
يحتاج مره بحياته تنسي همه وتريحه
وهذا الشي ملكيته عندي لكيته عند غيرج
ويحتاج ام لاطفاله تعتني بيهم
ويحتاج اكل نظيف وطيب
يحتاج نظافه
وذني ينطبقن عليج انت
لهذا السبب اني احتاج اثنين بحياتي
دموعي جرن
والله متستاهلني ابد
انت ماخذ نظره عليه خدامه وبس
مستحيل تتغير هاي النظره
عفته وردت اطلع
جان يسحبني وين تردين
اريد اروح لغرفتي كافي اهاين
بس يرجعون اهلي باجر راح اروح يمهم
واخلصك مني وجيب ساقطات لهنا ماعليه بيك
ينطيج كلبج تعوفيني وترحين
اي عادي ماكو مشكله
اذا عندي عادي عندي لا
اذا انت كلبج قاسي اني لا
مسح دموعي
اني واعدتج بعد مااخلي دمعه تنزل منج بسببي
وهسه نزلت دمعتج
اني اسف اسف اسف
اني صحيح عندي موعد وي حبيبتي
واتمنى يعجبها ذوقي وتلبس هذا
وامنيتي تسامحني ع كلشي
امنيتي تقبل نفتح صفحه جديده
اتمنى يوصللها مشاعري
اتمنى تعرفني كاعد اموت بدونها
اتمنى انام بحضنها وهي مسامحتني من كلبها
اتمنى تعيشني هاي الليله ولا بالاحلام
لان صارلي شكم سنه متاني هاي اللحضه ع نار
امنيتي اطلع اشرب جكاره وارجع
الكيها جاهزه مبدله ومنتظرتني
وتكلي اني مشتاقه الك اكثر من ماانت مشتاق
امنيتي ادخل وافتح اديه الها
وتجيني تركض تذب نفسها بحضني
اني تعاملت بقسوه وياها لان حبيت اسويلها مفاجئه
غيرت الغرفه ع مودها وغيرت حياتي كلها ع مودها
اتمنى تكلي راح ابقى هنا وياك لان مااعيش بدونك
والله العظيم وهذا يمين عليه ماحبيت غيرها ابد
ولا ارتاحيت لغيرها ابد
احس بنفسي نار وهي الثلج
بس المسها راح اني تنطفي ناري وهي راح تذوب
ع اعصابي تجاهلتها
لان هواي اتوسلت بيها وهواي اعتذرت منها بس مفاد
تعبتني هواي
ذلتني هواي خلتني اتوسل بيها
من اتقرب عليها تنفر مني
ومن ابتعد عنها احسها تتعذب
مااعرف شنو الي يريحها وشنو الي تريده بالضبط
كل الي اعرفه محتاجها بحياتي مثل ممحتاج الهوى
اعاني ابعدها عني
اني محبيت اجبرها ع اي شي
ولا راح اجبرها هسه
اذا وافقت ونست الماضي وقبلت نفتح صفحه جديده
مراح تتندم ابد وراح اشيلها بعيوني
ووعد مني مراح ازعلها بيوم
ولا اخليها تبجي بيوم بسببي
وعد مني مراح تدخل كلبي وعقلي غيرها
للموت مااعوفها ولا اباوع ع غيرها
بس اذا رفضتني راح تخسرني للابد
مراح ازعجها راح انطيها حريتها للابد
لان مااتحمل وجودها بحياتي بدون ماالي دور بحياتها
راح اطلكها وحتى جهالي اثنينهم اتنازل عنهم
وراح اواعدها حتى اذا قبلت تزوج غيري مراح اخذ جهالي منها
هذا اخر قرار عندي
يحجي واني صافنه
عافني وطلع
ظليت صافنه
يعني هاي الغرفه وهاي التحضيرات اليه
اني بداخلي صار صراع
اجذب اذا اكول مافرحت
يمكن اسعد وحده اني
بس بنفس الوكت خايفه منه
اخاف بس يضوج يرجع لسابق عهده
اخاف يدور بنات الليل
اخاف هم يجرحني ويتزوج عليه
يمكن اذا سواها بيوم وعد مني انتحر
لان مااتحمل بعد
مااعرف اوافق لو اتعزز عليه شويه حتى يتوب ويكوم يحسب حساب الي
بقيت افكر اخر شي قررت قرار نهائي
متهمني العواقب ابد مهما كانت
اني ادري راح تعتبر مجازفه اليه بس مو مهم
وجان اقرر ..........
توقعاتكم حبايبي شراح تقرر ؟؟؟؟؟؟
هل توافق وتنسى كلشي ويعيشون بسلام ؟؟؟؟؟؟؟؟
لو راح ترفض وتعقد الامور اكثر ؟؟؟؟؟؟
شراح تكون ردة فعل حيدر بالموافقه ؟؟؟؟؟؟؟
وردة فعله بالرفض ؟؟؟؟؟؟؟؟
انتظروني بالبارت القادم باذن الله
تحياتي للجميع حبايبي 😘😘😘
طبعا هذا التصميم هديه من صديقتي ومتابعتي المميزه وئام الشيخلي
تحيه خاصه الها مني ومن ابطال القصه زينب وحيدر شكرا الج حبيبتي
[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]
ً
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!