مساء الخير ع اجمل متابعين اتمنى لكم قراءه ممتعه
🌹🦋 البارت 16 🦋🌹
🌹🦋 بين الفقر والطغيان 🦋🌹
🌹🦋 للكاتبه رونق 🦋🌹
الصراحه جنت مندمج وي حنان
من شفت زينب بهذا منظرها
عقلي وكف واتهسترت
جان تكول مرحبا
لا وفوكاها بعين صلفه جاي تسلمين
يعني من اكول عليها ساقطه الكل يلومني
اتخبل وعقلي يطير من المرأه الي تذب نفسها ع الرجال
مااحب هي الي تغره
احب المرأه الصعبه والمرأه العنيده
واحب المرأه تخلي الرجال هو الي يركض وراها ويتمناها
مو العكس
ترخص نفسها هيج
صحت عليها صوت خليتها تريد تندل الباب وين متعرف بعد
الموبايل طبكته
لج كح..... شمسويه بنفسج
وشلون كدرتي تجين لبيتي بهيج منظر
مفكرتي منا اخوتي وابويه
ولو هي الكح....... تهتم لا اكيد
اكثر شي نرفزني منها شلون هيج جايه كدام اهلي
يعني مفكرت بمحمد يشوفها لو امير
زينب : اجه يوم الحنه وطلبن مني البنات اروح وياهن
اني رفضت ادري بي ميقبل مااحب افشل نفسي
كتلهن مااكدر لازم ابقى اجهز العشه وانظف
اجوي اقربائهم قسم يعرفني اني زوجة حيدر
وقسم لا ومن عرفني الكل يسال
لويش عايفج ويريد يتزوج
كنالهم الدكتور منعني يتقرب عليه
الكل خطيه وخطيه
حرامات متستاهلين وبعدج شابه
ماانكر بداخلي بركان
اتمنى اصرخ باعلى صوتي
ياناس يا عالم الدنيه قاسيه ويايه
ظلمتني ظلم مو طبيعي
اتمنى اطلب الطلاك
والله ابد ماافكر اتزوج
ابقى اربي ابني واكعد واسكت
والله لو مااخاف ع بابا وصحته جان حجيت الحقيقه
وجان طالبت بابني بالمحكمه
وجان راويته حجمه الحقيقي لهذا المغرور
بس مجبوره اسكت واطاوع هذا المغرور والاناني
راحوا للحنه والصراحه جنت حيل ضايجه
ضايجه منه لان هو راح يتزوج ويستقر
واني بالمقابل حالي حال المسجونين
كلشي ممنوع عليه
لبسي هو يتحكم بي
مصيري بايده
احسه خانكني خنك
اتمنيت اروح وياهم حابه افرح اشوف ناس
مليت من نضرات الشفقه
بقينه بالبيت اني وابني وعمو
اخذه بره البيت
خطيه يفرح من احد يطلع بي
اني مااعتبر نفسي خدامه بهذا البيت
لان مستحيل نعتبر النظافه خدمه
وبالنسبه للطبخ اني هوايتي الطبخ والحلويات
الهي نفسي بي
جهزت العشه ورجعو
اتعشو كملت شغلي وصعدت ردت انيم ابني
صعدن البنات فاطمه وساره
بدن يحجن عليه
ارتاحي يالفاهيه
راح راح تجي العجيز وتاخذ رجلج منج
وانت ابقي اخدمي واسكتي
لا وفوكاها لا طلعه ولا مشيه
ومبوشه فوكاها
والله لو اني مثلج جان خليته يركض ورايه
كتلهن فدوه لكلبجن اسكتن والله البيه مكفيني
يعني شنو ضايجه لان راح يتزوج
لاوالله ابد مضايجه لان يتزوج
بس ضايجه لان هيج يعاملني
يعني ميقبل اطلع
ولا يقبل انزع البوشيه
اجتي بنين وبيدها علاكه
اطك اصبع باصبع وتركص وحيل فرحانه
سالنها شبيج
كالت ولجن حيدر دز هاي العلاكه لزينب
ويكول اكو ورقه بنصها خلي تقراها
فتحنه العلاكه وجانت بيها دشداشه بينصل قصيره حمره
وبيها ورقه
قرتها فاطمه
هلو زنوبه شلونج اتمنى اشوفج لابسه هاي الدشداشه
عجبتني حيل واشتريتها الج واني متاكد راح تكون عليج فد شي
راح انتظرج بالغرفه ياريت متفشليني
اتمنى ابدي صفحه جديده وياج ع مود نظوري
واحب اعتذر عن كلشي صدر مني لان معرفت قيمتج اله اليوم
البنات فرحانات
بس اني بعالم ثاني
شنو معناها اليوم حنته وباجر زواجه
معقوله هيج فجأه حن عليه
نضرته اليه مو نضره طبيعيه
نضرته كلها حقد وكره
اني متاكده يكرهني ومستحيل يفكر بيه
كالن وين صافنه
كتلهن اكو انه بالموضوع
مستحيل حيدر يسويها
اكيد اكو غلط بالموضوع
كامن يحجن عليه
عوبه وتبقين عوبه
لج الفرصه اجتي الج وانت كاعده تفكرين
كومي بدلي وخل نمكيجج وخلي شعرج محلول
اذا منسيتي حتى اسمه شوفي
كللي لج ع حساب ابنج خطيه
مو من صالحج هيج تبقين لازم تكسبي لزوجج
والله متاكدين راح تتغير معاملته الج وهسه راح تشوفين
اجتي خاله وياهن وبدن يقنعني
لج اذا رفضتي راح يشد وياج والله
اني ابد مو ابالي
بس بعدين فكرت كلت صدك خلي اكسبه ع حساب ابني وع حسابي
اغير من حياتي
احب اطلع احب اكمل دراستي اتمنى يتغير ويايه
حابه اعيش كانسانه
بعدين اتذكرت اهاينه الي
لا مستحيل اسويها
كامت تحجي خاله والله هالمره اني راح اسولف لاهلج قصتج
بس ترفضين
اكسبي رجلج واسكتي والله يكوم يعبدج عباده
سلمت امري لربي
لبست الدشداشه وخللي مكياج مقبلت طوخ خليته خفيف
اتعجبن بشعري جان طويل وسرح حيل وبي لون عبالك صابغته
طبعا حيل خجلت كدامهن وهنه يضحكن عليه
لبست صايه من فاطمه
حلفني بابني قبل لاادخله انزع الصايه
صعب شعوري بهاي اللحضه
راح ادخل برجليه وهو الي رافضني من البدايه
اني اعترف ماعندي اي شعور اتجاها
بس مرات البشر مضطر يقدم تضحيات لاجل شي
واني هاي تضحيتي كلها الي سويتها لاجل ابني
اني لو ما جنت حامل
من مات مروان عادي مراح اعاني
جان ارفض الزواج نهائي اذا تقدملي احد
لو انتحر واخلص
ميت طريقه وطريقه
بس من صار روح ابداخلي مكدرت اسوي شي
جنت حيل ضعيفه وجنت مستعده اي شي اسوي في سبيل ابني
وهسه هم راح اوافق بحيدر رغم مااني ادري بي اناني ومااطيقه
بس مجبوره
مثل مقبلت بمروان واني جنت مجبوره
هم اقبل بهذا الغثه
دخلت للبيت وفعلا منزعت الصايه وجان الخجل واضح عليه
اترددت ادخل وبقيت اكثر من نص ساعه
حسبه تاخذني وحسبه ترجعني
صار صراع بيني وبين نفسي
معقوله زينب هيج تنسين بسهوله
لج باجر زواجه اكيد حب يقضي وقت وياج
ويبقى يلزمها عليج مصدكتي زيت عليج اجيتي تركضين
عفته وطلعت وجان يلاكني البنات
صاحن ماما تعاي الحكي
والله ممقتنعه ابد حبابات اسكتن
ارجعي واسكتي والله اليوم واكفيلج سيطره
شحدج اطبين نخلي ماما تخابر اهلج
اني متاكده راح ادخل للموت برجليه
والله اذا مخبلتي شوفي
بعدين قريت ايات بكلبي واتوكلت ع الله
دخلت وجانت الصدمه منتضرتني
هو اتفاجئ بيه
وبقه صافن عليه
كوه طلعت مني مرحبا
اشو هذا اتهستر
صاح بوجهي صوت والنبي متت بمكاني
لج كح..... شمسويه بنفسج
متت خوف ردت انهزم بعد مااندل دربي وين
والقران الباب مشفته وركعت راسي بالحايط عبالي الباب
دموعي كامت تجري انهار
مستحيل راح انسى ذاك الموقف ولا ذاك اليوم
كام يضربني ويغلط عليه
لج انت شنو من بشر
اني مو كتلج اكرهج واموت منج
لج ساقطه هيج مترهمين بدون رجال
تعرفين ليش اموت منج ومن امثالج
لان تذبن نفسجن كوه ع الرجال
احتقرج واكرهج انت وامثالج
وراح اعيدها الج
لو تبقين بس انت بالدنيه مااعترف بيج
تف عليج وع نفسيتج الضعيفه
هو يحجي ويصيح وفاقد
طلع وجهج الحقيقي
عرفتج متتحملين ومترتاحين اله انام وياج
بس لو تموتين مااسويه لان انت رخيصه
واني فاكه حلكي مدا استوعب الي ديصير
يعني شنو معناها ليش يدز عليه وليش يهيني
صعب شعوري ومستحيل اكدر اوصفه بهاي اللحضه
اكيد يريد يذلني
كرهت نفسي واحتقرتها
حيل الي يصير بيه
اني لويش وافقت ع طلبه
اكيد يحب يهيني
لج ساقطه من تلبسين هيج عبالج تغريني
كوه كدرت احجي هم خايفه وهم مرتبكه
مو انت الدزيت عليه
لج باجر زواجي من كل عقلج اباوع عليج
من كل عقلج اعوف الاشرف منج ومن اهلج
واجي عليج انت الساقطه
لو عندج ذرة كرامه جان مااجيتي برجلج اليه
اني منطقت ولا حرف
احس بنفسي مبنجه وعقلي وكف عن التفكير
اخذني جرني من شعري
وداني لبيت اهله
صاح خاله والبنات
اجن يركضن
كال قسمآ بالله اذا شفت شكلها لهاي الكح...... اله ادفنها وهي عدله
مااحب اشوف شكلها كبالي ابد
خلي تنجب بغرفتها وتسكت
اذا شفتها طالعه ابتلي بيها
التفت عليه وكلي
خل يكون بعلمج حسابج راح يكون عسير بس وره زواجي
اله اعيد تربيتج من جديد
واعلمج الشرف ع اصوله
البنات صافنات بوجهي
اني منطقت ولا بحرف بس دموعي سلاحي الوحيد
حيل خجلت منهم
موقفي ماانحسد علي ابد
حسيت بذل واهانه اكثر من اي وقت
شعري مكفش
عفتهم وصعدت لغرفتي قفلتها عليه
احس بنفسي رخيصه حيل
كمت ابجي احس بنفسي مااكدر اتنفس
نزعت الدشداشه وشككتها دخلت للحمام غسلت وجهي
اخذت المكص وردت اكص شعري
بعدين كلت شعري شعلي واني حيل احبه
ومعتنيه بي حرامات اكصه
كلت لازم اسويلي حل
ميصير هيج يسوي بيه الي يعجبه
شوكت ميعجبه يدز عليه وشوكت ميعجبه يهيني
صحيح احنه متفقين بس اطلب الطلاك لازم اتنازل عن ابني
وماالي حق اطلع من الباب
بس الي حق اروح لاهلي
وهالمره راح اروح ومراح افكر ارجع ابد
ومااله حق يحاسبني بعد
راح ابقى يم اهلي ومستعده مااطلع من الباب
راح انتظره لمن يسافر باجر
اطلب من عمو ياخذني لاهلي
الباب اندكت ابد مفتحتها
والله من فشلتي مااحب احد يشوفني
وره شويه دزلي رساله
تعرفين انت شنو دواج
دواج الغرفه تنقفل عليج
لان انت خطر علينه
هالمره حاولتي تغريني باجر الله اعلم المن راح تحاولين تغرين
قسما بالله اذا شفتج مره ثانيه بالاحمر متلومين اله نفسج
شنو انت معندج كرامه
كاعد اكلج مااريدج واكرهج واحتقرج شاكلج بعد
وهسه كرهتج اكثر
خل يكون بعلمج راح اكره بيت اهلي واكره ادخل بي
بس لان انت بي
مااحب اشوف شكلج ابد
خلي كرامه لنفسج ياعار
مجاوبته ولا بحرف
راسلت اهلي وسالتهم هم باجر اطلعون كالو لا
كتلهم احتمال اجي يمكم
لان زوجي راح يسافر
فرحوا حيل
كلتلهم جهازي مابي شحن وراح اقفله
قفلته الجهاز ماالي قابليه بعد اسمع اهاين اكثر
هو روحي خلصانه بدون شي
حضرت ملابس لنظوري وخليتهن بعلاكه
مااخذ بعد جنطه حتى اذا اخذت شي يبين
اني مااخذ ملابس الي
لان لبسي عند اهلي غير هذا لبسي هنا
هناك كله لبسي قصير وتراكات
واللوان حلوه مو مثل ذني
يمكن اذا شافتي ماما بذني ملابسي تخترع عبالها بيبي
طبعا ماما حيل نازكه ولحد الان بدون عبايه
رغم ماهسه حالتنه مو شي
بس اذا طلعت ماما واخواتي وبابا
عبالهم من الطبقه الراقيه
للصبح مانمت حيل ضايجه ومقهوره
كعدت نور وجانت حيل فرحانه
متعرف شنو الي ديصير بس فرحانه ع مود البدله
فتحت الباب بس منزلت
اجني البنات وحجن ويايه
كللي شنو الي صار
سولفتلهن كلشي
كتلهن وداعت نظوري ويمين عليه
لو يصبني حيدر من ذهب بعد مااقبل بي لو اموت
احجي وابجي
كتلهن متعمد يريد يهيني
هو الي دز عليه وهيج عاملني
بس والله وروح اخويه لو ما انتن جان مرحت اله
هدئني وكامن يحجن علي
ويكولن والله مايستاهلج ابد
خل يولي
خل يروح لهاي العجوز هي الي تفيده
خطيه فاطمه اخذت نظوري كالت جيبي خل اريكه
شويه وجابتلي ريوك
كتلهن والله ابد مااشتهي
سالته عن نظوري
كالت عند حيدر
صارت ب1 واخذوا عمو وخاله
كالن راح يودوهم للمطار
نزلت رادن يصبن غده
جنت ابد مااشتهي كتلهن لتصبلي وياجن
سالتهن عن امير
كالن بغرفته
كلت لفاطمه حبابه تعالي ويايه اريد احاجي
صعدنه دكينه الباب
هو اتفاجئ بيه
شاف عيوني مورمه من البجي
عباله لان اتزوج
كلي هاي شمسويه بنفسج
هاي كلها لان اتزوج
لج والله ميسوه دمعه منج
كلتله فاطمه لا ولك يامتزوج
بس البارحه اتعاركو
خطيه ضربها
حيل خجلانه والله
اذا عرفوا السبب شيكولون عليه
كال وعلي اكبر زوج هذا حيدر
ميسوه دمعه من دمعاتج وداعتج
كتله اطلب منك طلب اتمنى متفشلني
كلي اامري امر بس كولي
كتله اريدك توديني لاهلي
كولي ياالله والله متسوه
فدوه لا تحجي ويايه ولا تقنعني
اذا تكدر تاخذني مراح انسالك هذا الجميل ابد
واذا لا راح انتظر عمو
بس خطيه راح يروح لمطار بغداد وبعدها يرجع لهنا
اكيد يتعب اذا اخذنه
كلي زين وحيدر
لج مخبل والله يكلب الدنيه علينا
اني خبرته وكلي خل ياخذج امير
اكيد كايلتله
اي اكيد
لعد خل اتغده واخذج
فاطمه خبرت البنات
كالن حيل ويا خوش تسوي خل يولي
فعلا اتغده وكليزجهزي نفسج
طلبت من فاطمه تروح ويانه اخافزيلزم عليه لزمه
كالت عادي اروح مشتاقه للبنات
الكل اتفاجئ بالعلاكه مالت نظوري
كتلهم احسن اخاف اسرق شي حتى يبين
محد قبلت بس مهتميت
فعلا رحنه وخرت الخوف مني
كلت شيسوي خل يسوي
صبري خلص وي هالغثه
وصلنه للبيت وطلبت منهم ميحجون شي
بس لان حيدر مسافر اجيت
دخلو للبيت بس متاخروا
شويه وراحو
نور خليتها هناك
راحت وي عمو وخاله
كلت خاف يريد حجه عليه خليتها
الكل اتفاجئ هالمره ملابس ابني بعلاكه
كتلهم ع مود نور خاف تشوف الجنطه وتبقى تبجي ورايه
ليش مجبتيها خطيه
يردون يدزوها لامها فتره وترجع
وعيونج شبيهن وارمات
كتلهم كمت ابجي ع حيدر لان سافر
اكيد مراح يصدكوني
احس بامان واني بنص اهلي
اتمنى ابقى هنا عايشه
والله حتلو اكل خبزه ومي وراسي بارد اني قابله
بقينه اول ليله سهرانين
نسولف ونضحك
والله نسيت الضحكه بهذاك البيت
جهازي بقيته مقفول حتى ماانزعج ابد
سالوني ع الجهاز كتلهم نسيته هناك
هو فعلا قفلته وخليته بالكنتور
حاولو اهلي يطلعوني بس اني ماطلعت اخاف يحس بيه
ويلزم لزمه عليه
سافر الخميس والجمعه موعد رجوعه
ماانكر الخوف الي بداخلي مينوصف
بس قررت حتى اذا يحجي لاهلي ميهمني بعد
حتى اذا حجه اانتحر وابني يعيش قابل شيريد يصير اكثر من الي صار
حسيت بنفسي من صدك انسانه واني ابيت اهلي
حيل اشتاق لايامنه من جنه سويه وسيف ويانه
اتمنى يرجع بيه الوكت مره ثانيه
ووالله جان مرحت لشركة مروان ولا اتعرفت علي ابد
بس هيهات نرجع الوقت
اليوم صادف خميس
وباجر جمعه مراح اتوقع ردة فعله اذا لكاني مو بالبيت
للصبح منايمه الخوف اكلني اكل
اني صحيح بعد مااتحمل ابقى عايشه هناك
بس فكرة يجي ويصارح اهلي هاي بحد ذاتها موت بطئ بالنسبه الي
صار الصبح وجنت حيل خايفه
كلبي يدك مثل الطبل
بيومها معرفت اكل مثل الناس
اموري متخربطه
صارت ب 4 العصر اندك الباب كلبي حس انو حيدر بالموضوع
فتحوا الباب جان يكولون خالتج وعمج ونور وياهم جايبيها حيل مشتاقتلهم
رحت كعدت يمهم وخطيه يبوسون بنظوري وخلو بحضنهم
اني اخذت نور وتبجي تكلي شلون عفتيني بس ابجي عليج
حيل ضجت عليها
يحبيبتي جنت مريضه
اني هم ابجي عليج ومشتاقتلج كومه
جايبين وياهم فواكه وحلويات
سالتهم ع الغده
كالو متغدين
طلعت ماما شويه
حجوا ويايه
شلون هيج اطلعين من البيت بدون علمنه ميصير هيج
كتلهم بس حيدر حيل هاني وحيل اذاني
ميصير هيج
ابقى واطاوعه بكلشي
اي بس ع الاقل خلي جهازج مفتوح حتى نطمان عليج
محبيت اسمع اهاينه اكثر
وكلولي جهزي نفسج حتى نرجع
لان حيدر مقبل ابد كلب الدنيا والله
اعذروني خاله وعمو مراح اكدر اروح
راح ابقى ابد ماارجع بعد
لج ماما لتعاندينه والنبي مخبل
كسر الغراض وسوه المصاير
خاله ميهمني بعد شيريد يسوي خل يسوي
حيل تعبت
بهالاثناء واحنه نسولف
دك جهاز خاله
حجت والظاهر هو حيدر
كلتله خاله متقبل تجي
والله يوم حاولنه وياها بس معانده
كالت هاج هذا يريد يحجي وياج
اخذته وطلعت بره حتى محد يسمعني
ماما دخلت يمهم
حيدر : مراح انسى ذيج الليه ابد
بقت تحفر بعقلي حفر
منظرها مو طبيعي
هاي لو غير زينب مستعد ادفع عمري كله مقابل اقضي ليله وحده وياها
بس زينب مااعرف ليش مااطيقها
ويمكن لو شايف زينب بهذا منظرها بغير وقت وبغير مكان
يعني اشوفها صدفه قصدي
يعني لو اشوفها بغرفتها مثلا وبدون تخطيط من قبلها
جان مااضمن نفسي شراح يكون ردة فعلي
يمكن اضعف كدامها ومستحيل اسيطر ع نفسي
بس هسه لا وقتها ولا موقفها خلوني افكر بغير الرفض
بعد مرزلتها وضربتها وصعدت
رجعت للغرفه
ثار انتباهي صايه ع الطخم عرفتها الها جانت لابستها واني بالي راح لبعيد
عبالي هيج جايه من اهلي واني فقدت
بس هم مو معناها هي بريئه
اكيد رادت تغرني وعبالها اني اضعف
لكيت 100 مكالمه من حنان
حجيت وياها شويه وطبكته
لان ماالي خلكها سين وجيم وعليمن صيحت وليش
طبكتها منطيتها مجال
بقيت افكر بس بزينب
شكلها ميروح من بالي
جمال طالعه بنت اللذين
وفوكاها لابسه احمر ياكل ويشرب وياها
وشعرها بوحده يدوخ اكبر واحد
عقلي وكف عن التفكير باي شخص غيرها هي
راسلتها وطلبت منها ماتلبس احمر
واني الصراحه طلبت منها مااشوفها
لان ادري بيها خطيره
مراح اضمن نفسي اصمد امامها
ومااعرف نفسي شكد راح اكدر اكابر وارفضها
الليل كله منظرها ميروح من بالي
جسمها ابيض حيل ويخبل رشيقه
لا سمينه ولا ضعيفه
ساعه اتندم واكول لو نايم وياها هي اول وتالي زوجتي
وساعه اكول لا خل تولي
بقيت دايخ لوجه الصبح يله نمت
كعدت ب11 وماشفتها ابد
اجتي فاطمه ومنزله نظوري
اخذته منها اني ريكته بيدي
وكتلها اخذيلها اكل بس لتخلوها تنزل لمن اروح
بدلت واخذت الجنطه واخذوني امي وابويه
رحنه لبيت حنان ولكيناها جاهزه
اخذونه لمطار لبغداد
طارت طيارتنه
الصراحه الطريق كله بالي يم زينب
مااعرف ليش اخذت تفكيري كله
وصلنه واني كلشي مفتهمت
بس صورتها انطبعت ابالي
نزلنه بالفندق
شكد جنت متلهف لحنان ومشفت اي لوله بيها
هسه لا راحت لهفتي مااعرف شنو السبب
سبحنه وارتاحينه وجبت عشه
اتعشينه وقضينه ليلتنه كاي زوجين بس بدون لهفه ابد
حتى هي اتفاجأت بيه
حاولت اوخر زينب من تفكيري
قضيت ايام جميله بلبنان
بس ولا ابالي احسب لحضه لحضه حتى ارجع
دائما اراسل اهلي واتصل بيهم
بس اتفاجأت برقم زينب مقفول
الفايبر ماكو اتصال من يوم الي دزيتلها رسائل بالليل
سالت فاطمه كالت مكسور جهازها
كلما اكلها اريد احجي وياها
كلت بحجة اسال عن نظوري اسمع صوتها
ساعه تكول بالحمام او نايمه
ونظوري كذلك لو نايم لو مطلعينه لو ابويه لو امير
شكيت اكو شي بس ممتاكد
اتمنيت طير واطير اشوف شكو وارجع
اجه يوم العوده للعراق
وجنت حيل متلهف ارجع
حتى اشوفها
وفعلا وصلنه واجوي اهلي استقبلونه
رجعنه للبيت وجانت عيوني ادور بس عليها
سالتهم عن نظوري مااكدر اسال عليها
كالو فوك
اجتي نور تركض شبكتني وبوستها
جان تبجي وتكول ماما زينب راحت لبيت جدو
ومااخذتني وياها
اني بقيت ابجي عليها
هم انت ماكو وهم ماما ماكو
رادوا يسكتوها كتلهم عوفوها
منو اخذها
ماادري من وصلناك للمطار لكيتها ماهي
اني بس ابجي
كتلها يوم وين زينب
كالت راحت لاهلها
شنو يعني راحت لاهلها
شوكت راحت وليش ماعندي علم
ومنو اخذها
كالت امي من وصلناك اني وابوك
لكينه امير ماخذها
اني هنا عقلي وكف اتخبلت
كمت اصيح
منو سمحلها بنت الكلب تروح
وامير منو كله ياخذها
صحت امير وينك
روحي نور صيحي عمو
اجه امير
كتله امير اني مو محذرك متتقرب عليها لزينب
كال والله هي كلتلي حيدر كلي حتى هاي فاطمه اسالها
اجتي فاطمه كالت اي والله صدك
اني اعلمها والله اله اخليها تتندم بنت الفكر
حجه امير
حيدر كاعد تهينها اكثر من اللازم
يعني حتى بيه تشك
شنو فلمك
وخل يكون بعلمك فاطمه راحت ويانه لتخاف لا لمستها ولا سويتلها شي
ضربته لامير
انت اكبر غبي اني مااشك بيك لو اموت
بس هي الي متكعد راحه
امير زعل عافنه وطلع
كالت امي روح ارتاح وعندي حجي وياك
عيب من مرتك
فعلا رحت بس افور دم
سبحت وارتاحيت
جهزولنه الغده
اتغدينه وخلصنه
كلت لحنان روحي اسبقيني للبيت وهسه اجيج
كعدت امي وابويه
كالو هاك هاي الورقه اقراها
قريتها صحيح بلساني مكتوبه
بس مو خطي ولا اني
كتلهم شنو هاي
كالو انطوها لزينب وكلولها من حيدر
وشنو اليضمن صحيح مو هي الكاتبتها حتى تغطي عملتها
كالت لا يوم لان هاي اخواتك هيج سون واتفقن وهنه الي قنعنها
وصاحني حتى احجي وياها
وحتى اني ادخلت وقنعتها والله كوه قبلت تجيك
لان جانت رافضه نهائي
بس كنالها ع حساب ابنج
والله روحنه طلعت يله وافقت
لمن هددتها اني وكتلها احجي لاهلج كلشي يله وافقت
كمت اصيح
وشنو غايتهن البنات من هيج سون
وانت شلون اطاوعيهن
والله ماادري بيهن عبالي من صدك انت داز عليها
البنات هم خطيه ميعرفنك مسودن
والله يا يمه لخاطر نظوري
رادن يحاولن يقربنكم اثنينكم
وكالن خطيه بعدهي طفله وانت حيل قاسي وياها
كتلهم هسه ترحون ترجعوها
اكلب الدنيه اذا مرجعت
يوم انت الغلطت وياها ولازم انت تروح ترجعها
لا مااروح اني ماكتلها عوفي البيت واطلعي بدون علمي
منتظرتني لمن اجي
لك يوم لتصير مخبل
هنتها اهانه مو طبيعيه شتانيك متكلي
يوم روحوا رجعوها احسن والنبي اذا رحت اني اشبعها كتل كدام اهلها
واعلمها شلون تطلع بدون علمي
فعلا راحوا واخذوا نور وياهم
والبنات حسابهن ويايه
خابرتهن وحده وحده
وكامن يعتذرن
صيحت عليهن وغلطت
كالن والله لخاطركم ردنه نقربكم لبعض
معبالنه هيج راح تسوي بيها
يابه والقران اذا اشوفجن اله اخليجن تنعدن الساعه الي فكرتن بيها
ياالله واني الجنت قاسي وياها
وبالي راح لبعيد
هاي ثاني مره اغلط بحقها خطيه
المشكله المرتين اهينها اهانه قويه بحقها
بس هالمره اهانتها قويه
حقها تروح لاهلها
حيل جرحتها
المشكله جهازها مقفول
جان حجيت وياها
احلى شي عجبني بيها ابد مترادد ولا تحجي ويايه من اكون عصبي
تكتفي بالسكوت
احب المراه تكون هادئه من الرجال عصبي
هي لو مفهمتني احسن
ولو هي حجت وكالت انت الدزيت عليها
واني اثول اخذتها حاصل فاصل
مفكرت معقوله هاي المتجاهله وجودي ممكن هيج تفكر
العصر اجوي اهل حنان وسلمو علينه
عطلتهم للعشه
جبنالهم جاهز كله
وعزمونه ع ثاني يوم
اني بالي بس يم زينب
هالمره شلون هم مراح اعتذر
لازم اعتذر منها لان غلطت بحقها
اتصلت باهلي وكالو وصلنه
بس متقبل ترجع ويانه
كلت لامي انطينياها احجي وياها
اخذت الجهاز من امي
اني طلعت بره احجي
كتلها الووو
الوووو
شلونج
الحمد لله
اول شي ليش قافله جهازج
احسن حتى ارتاح من الحجي الي يسمم البدن
زين منو سمحلج تروحين لاهلج
سكتت
ليش ساكته متحجين
حبيت اريحك مني حتى متشوف خلقتي ابد
لويش تنحرم من اهلك بسببي
زين منو سمحلج تصعدين وي امير
هم سكتت
اول مره احجي وياها بهدوء
اشو ذابته ع الصامت
روحي جهزي نفسج وتعاي وي اهلي
اعذرني مااكدر ارجع
والسبب
بدون سبب
انت كلت بس اطلبين الطلاك اخذ ابنج منج
لهذا السبب مراح اطلب الطلاك
وطلبت مني مااطلع من الباب بس لاهلي
وهذا الشي هم نفذته الك
مراح اتحرك خطوه وحده بره البيت
بس متفقنه ممنوع ابقى يم اهلي
وشنو معنى هذا الحجي
معناها راح ابقى يم اهلي خليني فتره وعود افكر ارجع لو لا
تحترمين نفسج وتجين وي اهلي
لا والقران اخليج تتندمين
سكتت
روحي جهزي نفسج بسرعه بدون لغوه
ماارجع ابد
متاكده
اي متاكده
انطيني امي اريد احجي وياها
كلت لامي احجيلها ع البنات واللعبه الي صارت
طبكته
وره فتره خابرت ع امي كالت اجينه بس مقبلت تجي ابد
اتخبلت خبال
هاي اول مره تعاندني
هسه لو عدها جهاز جان حجيت وياها
وباجر لو ماعازمينه اهل حنان جان رحت
بقيت افور دم
ثاني يوم رحنه لاهل حنان واتغدينه يمهم وع اعصابي بقيت
خلصنه اترخصت منهم ورجعنه
رجعت حنان ودخلت سبحت وبدلت
وكلت لازم اروح ارجعها للبيت بنفسي
واني اعلمها ع العناد هذا
باجر لازم ادوام ماعندي بعد مجال
خبرت اهلي ورحت
كلولي زين تسوي
حجت امي وياي
يوم بروح اخوك لتفلت شي كدام اهلها
خطيه هواي اتحملت وهواي انهانت
فكر عندك بنيه وبعد جم يوم الله يعابيك بيها
الله كريم ج
اتوكلت ع الله ورحت
امشي سريع حبيت اوصل باسرع وقت لان من صدك افور دم
وصلت ودكيت الباب وجان انصدم ب ........
توقعاتكم حبايب بيمن انصدم حيدر
وشراح يكون ردة فعله اتجاه زينب
راح ترجع ويا لو تعاند ومترجع
راح يتغير شعوره اتجاه زينب ويغير معاملته لو يبقى هو هو ع حاله
حبايبي باجر باذن الله اروح لكربلاء المقدسه وراح ابقى يومين مراح اعرف وقت التنزيل شوكت بالضبط
اني الصراحه مااشترك ع الخط راح ابقى ع النت الي بالفندق
من نستقر ونزور ان شاء الله انزله الكم واذا مكدرت ارجو المعذره واتمنى تقدرون ظروفي
اليوم عوضتكم ابارت طويل لان البارحه لحيتوا عليه انزل بس والله ماكدرت
الكتابه صعبه مو مثل القراءه الله شاهد بس مراجعتي للبارت تطول اكثر من ساعه مرات ساعتين اخاف زليت بكلمه او اخطات دون قصد
كيف كتابة البارت مرات اطول بي يوم كامل يله اكمله
ارجو تقدير ظروفي
تحياتي للجميع 😘😘
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!