رواية بين الكاف و النون الفصل الاول 1 - بقلم saja altaie95

بين الكاف والنون (كن فيكون)

البارت الاول

الكاتبه سجى الطائي

//////////////////////////////

هــلي ...

وسـيـّرتـوا عليّ بوحشـتي ...
حݘـايـة بـريد ، وبيت نــايـل
وشتـهـيتـوني آكـتب الكم عن
وفا البردي وحنين المـاي ودمـوع
السنابل وعن عين التلم اللـّيل دمعـه
،وتعتـلگ وكت الوفـا شموع ومشاعـل
وعـن الگـلوب التـموت بلايـا سـم
وبلايـا رايـه وعـن شمـس طـلگـت
بسـمهـا وعسـّـرت بـآوّل قــضيـة
وغـربـتي وصـوت النـواعي يـلـوحـنـّي
وتـلــتم إيــديــّه الصـوت بيـه ريحـة
عـيوني ، وبيـه هـلي ؤوّحشــة مسـيـّه
هـلي يـامـن ضـيعـوني

_________________________

صوت الجيلات قويه واكف العب بلرمل محدود على جوانب طريق اليودي البيتنه دقايق وصارت هوسه ودوي صياحهم مراكض ازلام طبيت ركض ختلت يم باب المطبخ...

اسمع ابوي وزلامنه ملتمين كدام بيتنه امي وحبوبه واكفات يسمعن مثلي ويدعن ويدورن بعيونهن يردن يفتهمن الصار ....

اصواتهم علت جرت عباته حبوبتي خلتها على راسها وجها
يستفسر عن الصار وكفت بعتبت باب المطبخ انه
وراها صاحت على عمي

"هشام شبيكم مدوهني شنو هذ الرمي "

عمي هشام دايخ وصوته عالي من سمع حبوبتي
اجه يمها عصبي كلها حرامي سطه علبستان ركض
وابو سعيد شايفه راكض ورا ماملحك بي ضاربه
وتكوم بمكانه

ضربت صدرها" فد لا مات "

هز راسه عصبي اخذو وراح

امي لطمت دهر صابكم كون ماتعرفون تحرسون عدل
ارواح الناس بيدكم لعبه شكو تضربو جيله وتكومو
بكاعه ..

التفتت حبوبتي باوعتلها

" شكو تعوين يطبه حريشي كايليه بوك حلال الوادم هل يوميه سامعين صوت الجيلات واانلكف ..كون تعدي على خير وماواحد منهم يضرر"

هاي كانت بداية انعدامي اشبه بلموت بلنسبه الي
الكلمات ماتكفي اوصف معاناتي طفولتي الضايعه
حياتي المنعدمه

عام24_7_1991 البصره _العشار بلتحديد

انه سيف الدين رياض رميض جدي شيخ استارثها
من ابو عبد العظيم من كباريت مشايخ البصره النه
صيتنه والكل تعرفنه بس كلهم بيت عبد العظيم

بساتينه واراضينه الزراعيه تربتنه خصبه نخيلنه
عالي ننتج اغله انواع التمور مهنتنه هاي من غير
زرع المحاصيل النحصلها نوزعها درانه عماره
مضيف جدي مفتوح للكل لهذا اله شأنه بين الوادم

حكاني ورثها لبوي عكس عمامي من صغري واشوفهم
ميردوها اله عمامي ثنين هشام وقاسم

احنه فخذ من افخاذ أل جبور ( عشيرة جبور مقسومه الى اقسام وكل قسم اله اسم ويدعوهم فخذ )

قصتي بتدة من ذاك اليوم المشؤم زرعني بين عاكول
كاع صبخه ...

صبحيه مثل صبحياتنه الشمس طالعه الجو رغم حرارته بس صبحيته تكون هواها بي نسمة بروده
متعلم اكعد ويه السبعه من امي تفز انه فز كبلها
تبتسم بحنيه تاخذني للحمام تغسلي وتبدلي وننزل نتريك متعلم ورا مااكمل ريوك اطلع للبستان بيتنه
صاير وسطه جبير بنائه جامع عمامي بس ابويه المزوج بيهم البقيه بعدهم انه وحيد اهلي

امي مصار عدها بعدي مااعرف شنو السبب
شفت جدي وابوي ماموجودين ركضت لصحباني
نروح لسوك العشار قريب يم بستانه نلعب بين المحلات والبسطيات طفل عمري ماعبر الست سنين

اركض بين الكراتين والصناديك هاي لعبتنه نتختل
ياهو يلك الاول هوه اليفوز نجمع الخمس وعشرين
والخمسينات ونسويهن رباعه ونطيها لليفوز

ناسي مكانت جدي وابوي لاهي بلعب لو امي تناحط
من الحجي مااخذ كلامها اذا ردت شي اسوي شكد
تنبه عليه وتحذرني مااطلع بس اشوفها تلتهي بشغل
البيت اركض اطلع

ماكنت داري هذا اليوم كان اخر يوم اكضي بين اهلي قدري مكتوب من الاول ادفع ثمن اخطائهم سنين همه يحرسون البستان ويوم الجيله لمن رادت تطيح طاحت بواحد ميخاف الله حرامي ومتعدي على بستان جدي

عشاير تكاومت وفصول انحطت لجل واحد مايسوه
كشت حنطه يوم اليموت يصير سيد كومه ولا اكو
فوكه ولا حدره احد وعيت عليهن لمن كبرت

فحطت والسوك يروش الكاع ترابه تثعول ابو العربانه
والحصان كومها وخلانه نهفي من العجاجه السواها
وراا

رحت يم الحب الشمس تصكع جربت الطاسه الفافون
شاديها بحبل ورابطيها بيدت الحب والحب مقبقي
بخشبه عريضه من الذبان والبك والحشرات

شربت الله شلون مي بارد وهوه مكتر بضهر المحل
رجعت اكمل لعب وانه بلشارع حسيت طبكت سياره
لاندكروز قديم نزلو منها ثنين زلم كبار ملثمين رواحهم
بليشماغ مغطين وجهم بس عيونهم طالعه ولابسين
اسود

يمشون بهمه محسيت روحي غير نشاليت ومشو بيه ونشمرت بلسياره كمت اصيح عوووفووني يا ناس يا عالم؟؟

صعدو وحركو والناس تباوع محد كدر يدخل ثنين ركضو وره السياره يردون يلحكون ماكدرو ..

واني اصيح وابجي التاف عليه واحد كاعد بلصدر
محسيت غير ضربه قويه من اثرها انغمى عليه..

طفل مافاهم شلون خطف مافاهم يعني شنو ثار
شنو قتل كل همي العب واطلع للسوك حرص امي
وخوفها ماافهمه ليش متخليني العب مو ذوله جماعتي
اشو محد يصيحهم ولا مره شفت ام واحد منهم طلعت
وراا وصاحته بكيفهم يلعبون وكيفهم يطبون ليش بس انه ؟

كبرت وفهمت وياريتني فاهم من الاول !
ياريت سامع كلامهم ؟
صوج امي الخلتني مدلل
لو صوج جدي الراد يربيني اشوف الزين واكتسبه
واتعلم من الشين واجنبه دومه يكل لبويه خلي يصير
زلمه تريده يتخونث رياض ابنك وحيدك هذا من هسه
ربي يصير حوك شنو مجبنه وحابسه بعد يومين من
ينطك يجيك يبجي

وابويه بحضوره مايرد يهابه ويحترمه بس كل هذا
يخلي جدي يطب وهوه يصيح امي تصعدني ليفوك
وسده الباب عليه اخاف احجي او ابجي ميقبلون
ابجي خصوصاً جدي اذا شافني يخزرني يكلي
عيب انت زلمه والزلمه مايبجي

وعيت كوه افتح عيوني راسي مأذيني ضليت
افتح واسد بجفني رمشت عدت رمشات يله
وضحت الرؤيه اشوف روحي مقيد مربطين
اديه ورجليه ريحت جيفه مدري فضلات
رفعت جسمي واشوف نفسي بحضيرة ابقار

عدلت روحي حرت شلون اتحرك مقيديني بشريط مشكوك من بجامه بازه مخططه ...

نزلن دموعي والله لو شافني جدي مايقبل ضليت ادور براسي الريحه تلعب النفس الكاع ترابه الحياطين طين
مسكوفه بعمدان خشب بي فتحات اشوف الشمس
تمر اشعتها منها حاره موت

نصيت وبالي يم بيت جدي اعرف هسه كالبين الدنيا
عليه شاهد على فزعاتهم جنت اشوفهم من صير
مشكله كل اهاليتنه تلتم يمنه عمومنا ولدهم ...

يتحزمون بتفكهم ومايردون لبيوتهم غير السالفه
محلوله ...

اجاني صوت فتحت باب رفعت راسي طبت مره
سمينه وجه اسمر موزره بعباتها تقربت يمي بيدها صينيه صغيره حطتها يمي وبيها تمن وطماطه نيه
مثرومه شياف وخبز ..

صوتي مطبك من الصريخ واني استنجد بلعالم تخلصني
فتحت ايديه ورجليه ...

كالت "اكل وراك ايام سوده تنهدة هسه هذا طفل وينه وين الثارات " مشت وانه صافن عليها

من جوعتي اكلت لحد الشبع شويه وطبت تمشي
وتميل منا ومنا جنها تريد اطيح من كبرت عرفت
المثل وزنها هيج يمشي يوازن روحه

كالت"هااا كملت "

هزيت راسي "اريد اروح للحمام "

ابتسمت " قصدك للمرافق"

"اي "

"دمشي دامك شبعت "

مشيت وراها بره الحضيره جوله السماء والطارق
هاي انه وين اتلفت بيت طين بعده عن الحضيره
50 متر ...

مستغرب الوضع رغم صغر سني فطن جدي دومه
وياي ماخله شي مازرعه بيه روحاته للصيد انه ويا
يعلمني خطوه خطوه شلون الزم الأله واقنص ومااعرف
اضرب ويخيب ضني جدي يهز راسه تتعلم وانه جدك
ان ماخليتك گناص اولي مااسمه شيخ رميض

كملت شلت راسي السكف بي فتحات بينه وبين
الحايط مسافه لو انه اطول اكدر اشلبه واطلع منه
واشرد خاب ضني طلعت رجعتني المره للحضيره
وقفلت الباب

كعدت ماربطتني شافتني صغير ومااكدر اسوي
شي الساعات تمشي والجو غيم وچنها غيمت
اباوع من فتحات الحايط اريدن احد يمر اصيح
ويخلصوني بس البستان البي بعيد عن الحضيره
صاير بضهر البيت ...

يومين مرن وانه نفس وضعي تجي المره وكت
الاكل تنطيني وتطلع من اريدن الحمام تاخذني
وتردني الباب يضل مقفول ....

يوم الثالث على كعدتي وانه افكر بجدي واذكر
شلون كان يحاميلي وميخلي ابوي يمد ايده
يضربي لو يخرليني اطلع وحيدي كلبي يمهم
اعرف خوف ابوي وحرصه علي چنه كلبه
علم يجي يوم واروح منهم مره....

وكفت اسمع ابويه ماقابل على طلعتي ويه صحباني وجدي رميض مايخلي يحجي "دعوفه وانه ابوك صار شكد خله يلعب ويه صحبانه شرايد منه "

رياض_حجي انه شرايد منه غير اخاف عليه والعشار
ماهي مثل كبل هل زلامنه تارسه البساتين واجتنه جيله
من واحد خسيس ربك مااطاحت بواحد منكم

رميض _ الحارس ربك ويومنه ماهو بيدنه لو
طاحت ورگتنه هذا المكتوب نشوفه لاتجبنه دامه
سبع ويريد يعرف ديرته خله يتعلم

رياض _ انه اربح سباعيه لو صارله شي بويه ماامن غير كدام عيني

رميض_ التفتلي جدي كلي كوم بويه منو انت

_اباوعله بخوف وحذر اشرلي تقرب كربت يمه مد ايده على جتفي رغم قوته وهيبته لكن حنيته مرات تخليني اجرء واحضنه همست سيف الدين رياض رميض عبد العظيم

_ابتسم برزانه تجاعيد وجها واضحه دشداشته الصحراويه وعكاله من وعيت وانه اشوفه هَيج
والعبايه بصفه مكترها كال كمل كمل من يا عمام

كتله جدي من أل جبور

طبطب على جتفي كلي يله اركض العد صحبانك
تلكاهم ناطريك

طلعت وانه اسمع ابوي ماقابل ويعاتب بجدي

وعيت على فتحت باب اباوع ثنين زلام نفسهم
الي خطفوني عرفتهم من شكل اجسامهم
دب الخوف بيه رجفت اطرافي ....

وداخلي ارد ياحبيبي يارسوال الله اغثني مثل
ماعلمتني امي من احتاج شي ارددها ..

تكربو لي عيونهم تحجي غيض وحقد چنهم ناوين على كتلي الملثم كعد كبالي نص ركبه مركز عيونه تجدح
شرار بوده يشرب من دمي كال " ايييه ياحفيد الشيخ رميض چن كسرته بروحتك شريد بعد انته بيديه"

من الخوف ورهبت عيونه وصوته فحيح حيه
تنذر غضبها نزلن دمعت عيوني "شتريد مني "

_ اريد دم الي مات بالبستان و فلوسه

_مو احنه الكتلنا

_امي الكتلته ماادري كالها مستهزء

_ "يمكن "حجيته حجايت طفل يريد حبل السبيل
للخلاص بده بانواع الكفرأن والشتائم سديت اذن
ارجف ودموعي تنزل اردد اغثني يارسول الله

ابن الكلب........ ابن ...........

انشاليت غمضت عيوني كل ضربه مااحس بيها
بكد مااكلبي مهبوط سحبه الرجال الويا اسمعه
كله" لا عوفه لا يموت ومانستفاد شي بعدنه بدايه الطريق و صار سنه نخطط لا تخرب هسه"

عافني و مشه

شبعت بجي ردت امي ابويا جدي وينهم عني
ليش مااجو عليه ودور عايفيني يمهم جسمي
يرجف عيوني متروسه دمع اول مره احد يضربني

سبوع وانه يمهم المره ضلت وياي تنطيني الاكل
الوحيده زينه اخاف احجي وسألها على اهلي ...

اليوم 30_7_1991

اليوم المشؤم طبو اخذوني المره عيونها تدمع
بجيت اخاف اصيح وانضرب صعدوني بنفس
السياره وياهم اربع زلم الخطفوني بغير سياره
الرعب اتملكني ....

هاي هيه راح يكتلوني ويذبوني وارجع بالي
لتخيلات السعلو كلبي ينتفض مثل ....
ماما من تحجيلي قصتها من تخطف الجهال
وتاكلهم .....

مشت السياره مسافه بعيد طفل ومااعرف شكد
كل همي ارجع لهلي لحضن ابويه وجدي الخوف
متملكني بس ابجي واناشخ كاتم نفسي ايدي على
حلكي كل الاذكر ادعي واستغيث بنبيي الكريم
الكل التعلمته من امي اردده...

جدي الماعافني كبرت وهوه يحفظني الايات
القرأنيه بكل صلا يوكفني صفه وابوي وياي
يصلون وانه اقلدهم لحد ماتعلمت وكمت اصلي
وحدي

اتاني جدي يتوضه اركض ورا اتوضه يشوفني
ويبتسم عني برضه .....

ساعه السياره تمشي للمجهول اتلفت منا ومنا
الدنيا حاره والشمس ادك بلسياره فاتحين الجامات
الوياي محاوطيني اريد خيط امل بس ادموعي
يواسني شنهي ذنبي بينهم طفل حمل ثارهم
فجئه واحد منهم صاح ذولاك دوس بانزين لاتوكف

كلبي كام يدك متلهف ادور براسي شفت جدو من بعيد و عمامي و ولد من كرايبي مسلحين و ابوي واكف هم

مثل واحد فتحلي باب وكلي روحلهم الفرحه
ماواسعتني كمت اصيح جديييييييي مايسمعني...

سد حلكي كمت ارافس ودموعي تنزل
قيد حركتي متت اريده يشوفني اريدهم يعوفوني مااكدر.....

اجيت اموت من الحركه نفسي ذاك وانه مخنوك
بيديهم مثبتين راسي اشيل روحي واركعها بلكشن
اريد اتحرر.....

ضلم الشوفه ادورهم بعيوني الحكوني انه
كدامكم جدي ابويه .....

دموعي مانشفت دامها المنيه تمشي بيه

فجئه وكفت السياره و السياره الكدامنه
نزلو منها صعدو ويانه

كمت عضيت الي لازمني و فلتني و كدامي ثنين

نزلت من السياره جاي اركض من حركتي
وكعت بالكاع....

لزموني مالحكت اكوم واركض ليهم اشوفهم بعد
مسافه زلام جدي مسلحين وعمامنه

دقايق مرت وهمه يصعدوني هوسه و صارت سيارات شرطه

و صفاره الانذار صوتها وصل اليمي

قريب حييل علينه

الوياي خافو اوجوهم صوفرت صار اطلاق نار بالجو
و ذوله انسحبو محسيت بيهم شلون مشو صوو الطريق
دقايق ....

و شالوني و انه ابجي

شمروني ورجعو شبعت بجي وعيني على
جدو لحد ماختفو طول الطريق ابجي
رجعت للمره السمراء....

من شافتني ضلت تبوس بيه....

حضنتني و ضلت تبجي و انه بجيت وياها

و انه مجلب بيها شفتها ملجئي الوحيد

و ماكدراعوفها من كثر الخوف

لان شفت بيها الامان

هناك و كلتلي تعال تغده

اخذتني غسلتلي وجهي بطاسه ماي

و ضليت كاعد مكاني

راحت المره

انتجيت مغمض عيوني فحطت من البواجي
وره شوي و اجت جابت الاكل

هالمره كباب

الي و الها اكل بنهم ميت جوع جني اول مره اضوك الكباب ما حس بنفسي و اله بطني هاجت علي بالالم....

عفت الاكل و ضليت ابجي و لازم بطني
المره حارت بيه هيه هم تبجي وياي ...

غمضت فاقد الوعي ماحاس بنفسي
ماادري شكد مر الوقت ....

كعدت واشوف نفسي بسرير وين انه افتح
بعيوني واسدهن

اتلفت يمي رجال شايب جبير بالعمر و دكتوره
دكتور....

و ناس ماعرفهم عيوني تغفي
و لساني ثكيل رجعت نمت

وعيت وره فتره جاهل الايام والساعات
كل ضني الوقت يمشي بيه بطئ ماضان
الوكت يركض ركض الريح من تعصف
بصحرا رمليه لاكيتلها مساحه ترضيها

صفنت مره جبيره يمي
وبصفها نفس الرجال الشايب
و دكتوره.....

يحجون وياي و انه اصفن الهم

الدكتوره تحرك ايديها كدام وجهي " تسمعني"

هزيت راسي "بنعم"

اشوف بده الشايب يحمد الله و المره هم

كلتلي" احجي"

ساكت لساني ثكيل ردت نوبت لاخ " انته وين اهلك
شسم بابا اي احد من الناس الي تعرفهم"

بجيت وكتله "اي بابا اسمه "

الشايب وجه استبشر وعيونه فرحت

كملت جوابي "رياض رميض اسمه"

التفتت لليمي ورجعتلي التفاتتها " اي وين يداوم "

كتلها" ما يداوم"

_ "جدك اي واحد تعرفه من اهلك "

_"كتلها جدو الشيخ و انه حفيده"

عافتني ودارت مكمله كلامها للشايب" عمو هسه تكدرون تطلعو و تدورون على اهله براحتكم"

ضل الرجال يفر براسه راسه يم راس المره يحجون
همس مدري شبيه راسي ثكيل كل فرعت عين
ادور وجه ابوي بجيت بقهر وينك يابه ....

تكفلو بخروجي المره اجت لبستني ملابس مبين جايبيلي وياهم طلعنه وانه جاهل وين ياخذوني
ارجف واخاف احجي مدامهم كاضيني ويمشون بيه
دموعي ماوكفن لحدما الشايب شافني كعدني بمكان
مخصص للستراحه بلمشفى ....

كعد صفي دنك لمستواي وانه مستمر بلبجي
بخيك ليسمعني ويضوج ابني اسمعني اني مااعرفك
ولا اعرف شصار وياك امبينه قضيتك ثارت لتخاف
منسويلك شي راح اخذك وياي بين ماتفرج عليك
تنهد بقهر مسح على راسي صير سبع نردك لبوك
وانت بصحه وسلامه....

اطمأنية من كلامه طفل موبذاك الادراك الي
يهيئني اميز بين نوايه البشر الحسنه وبين
يضمرلي الشر

مشيت وياهم الطريق طويل مااعرف وين وجهتهم ولا اعرف المناطق ولا بالي احتمال يأذوني مسلم امري
بصفاء نيه بفطره سليمه وبريئه خاليه من الحقد ....

المره والشايب صعدو عبريه طالت رحلتنه انام واكعد واشوف نفسي بلسياره الجو موت احمر المره بصفي كل ساعه تغسلي وجهي حاطتني بصف الجامه مفتوحه رغم هوه وسموم تكفخ بشرتي اتحملتها النعاس طول الطريق غالبني ....

غافي فزيت على ايد المره تكعد بيه تعلن وصولنه نزلت وياهم افرك بعيوني بعدني دايخ الطريق خالي من الناس الدنيه عصر ماكو تلفونات بذاك الوكت بس الحراري الارضي صارت كدامنه بنزلتنه للشارع
من نلوف بنايه جنها مدرسه

بعد زمن عرفته معهد وصلنه لمكان مثل بستان جدي
ونفس مساحته الواسعه بدايته بيت دخلوني وياهم البيت جبير و جان اشوف ناس هواي و بنات صغار و اطفال....

و اشوف زلم هواي

و هلاهل و انه صافن بس اباوع

منضره ذهلني منو ذولوه وليش يهلهلون كل
ضني عدهم عرس الوجوه تتمعن بملامحي
اطفال التمو داير مدايري المره لازمتني ...

من بينهم وتطيح عيني على بنيه صغيره
خلتني اباوعلها انه وضعي مخربط ملامحها
البريئه دورت وجها وبياضها چنه جبن عرب
شعرها الاسود رافعته بهمال زايدها جمال

صاحني الشايب " ابني هاي كلها علمودك"

ضليت مستغرب كتله "جدو هذا عرس الي"

ضحك و طلعت سنونه كلي "لا ابني هاي فرحه من كعدت من الغيبوبه"

انه مافهمت شنو غيبوبه وكعدت
بس ضلت الفرحه بكلبي اخذني منيدي
طببتي و كعدت بغرفه جبيره حيييل

ماجنت اعرف يسمو ديوان
بسبب صغر عمري ....

كله دخلت ورانه كعدو الزلم ضلو يباوعولي و يحجون بيناتهم عيوني تتلفت عليهم واحد واحد
بيهم عشر نفرات وكلهم مثل لبس ابوي وجدي
دشاديش وعكل ماعده ثنين جانو شباب
لابسين بنطرون وقميص

الشايب منصي على سبحته يفر بخرزها
جنه باله حسبه ويدوز بيها

مر الوقت صاح على واحد منهم ماكمل
الاكل الولد كله جاهز شيخنه ....

هز راسه واشرله امشي

صفنت بكم الحنان مالي تفاصيله شفايفه
تهمس بكلمات ماسمعته كون صوته ناصي
ويه كل همسه فرت خرزه ....

شوي و دخلو ولد يحطون الاكل نصه الشايب للسفره
سحب وحط كدامي ماعون تمن و لحم بماعون ثاني

و كعدو ياكلون

و انه صافن و الشايب ينتضرني اكل

كال "ها ابني شو ما تاكل"

باوعت لداير مدايري دنيت راسي قربت
حلكي يم اذنه اخجل اطلب" جد خاشوكه"

ابتسم بانت اسنونه" اي تأمر"

صاح" حسين يا ولد خاشوكه للضيف"

نصيت كلها لعيون عاينتلي جابولي خاشوكه

و انه اكل علكيف لان خايف عبالي همه نفسهم الخطفوني من خلولي كباب وتاذيت.....

الشايب انتبهلي " اكل ابني موش علكيفك
حته تصير زلمه ولو انته زلمه و يضحك"

و انه هم ابتسمت

رجع كمل كلامه "اليوم العصر نسال على الشيخ و تروح يمهم"

و انه اهز براسي بنعم فرحان كمت اسرع
بأكلي اخلص وياهم زرع الامل بكلبي ودي
اطير واحلق شما للسما بُعد شماا لكون مساحه

كملو اكل وانه وياهم بدو يرحون ماعرف وين
فرغ الديوان ضليت انه يم الشايب....

بينه الحيره عليه نصيت العب باصابعي متاني
يردني لهلي هوه كلي على الاكل الفرحه بكلبي
ابتسم

رفعت راسي شفت الجهال يلعبون من الشباك و انه اباوعلهم جان شباكهم چبير من السكف شويه ويطخ
الارض برداتهم شويه مرفوعه

ضليت اطالعهم مده انه بس اباوع

و وياهم بنات و البنيه الي شفتها ام عيون
السود اباوعلعا واذكر جبن العرب جانت
حبوبتي سوي من حليب الدواب العدنه

"هااا تريد تلعب ابني روح وياهم"

رافع نضره عليهم والابتسامه الحنينه مزينه ثغره "العب و من تتعب تعال يمي"

_" انه مالعب ويه بنات"

ردي كانو استبشر بي هز راسه مفتهم " انته هنا ابني و هذن خواتك"

رديت" ما عندي خوات و ما اروح يم نسوان عيب"

" ليش عيب"

كتله "جدي الشيخ يكلي الحجي يم النسوان ماله فايده يمنه"

طبطب على متني " اي و النعم من الشيخ"

_"ماكتلي شكد عمرك"

_رفعت جف ايدي واحسبله "خمسه ونص"

"وزيد شهرين"

_"ليش ما يصير"

هز راسه" ها لا ما يصير صحيح"و ابتسم

كمت وكفت يم الشباك اباوع لحديقتهم محدد
بسياج شجر اليجي من بره مينشاف لحد ميعبر
سياج الشجر ويصير كبال الديوان

عيني دور على ذيج الطفله اخذت كلب هذا
الطفل من اول طيحت عين اثاري الكلوب
مالها بعمر الانسان ماجنت ضان عمري يعرف
لهاي المشاعر .....

مدري لان عمري ما لعبت ويه بنيه عدي شي
غريب اشوفهن يلعبن سوه جان جدي حارم
وحده من الحريم لو مدت راسها

ضليت اعاين عليها لحد مااطبت للبيت
درت ارد المكاني

شفت الشايب يريد يمدد

صاح اخخخ لازم رجله ركضت لرجله. اهمز بيها علكيفي

"لا ابني عوفها"

كتله" انه للشيخ اسوي هيج يوميه حته ينام"واضحك

"الله يسرلك امرك"

و تمدد و انه اهمزله رجله تقريبا بالساعه و انه ادلكله هو نام كعد " ها ابني ما تعبت"

هزيت بجتفي" لا"

" يلا كوم وياي غسل و توضه و صلي"

طلعت ورا جانب الديوان جاننت غرفه كامله مفتوحه بيها حمامين ومغاسل ومرايات كدام كل مغسله
توضيت ورجعت قبله

ابتسم من شافني متاني وبوجهي بقابه
مي الوضوء مشه جابلي مصلى

وكفت اصلي وياا جتفت ايدي شفته ماسوه مثلي
صله ايده مفتوحه منزلهن و يقرا و انه ورا مجتف ايدي.....

نصيت اكمل صلاتي سلمت رفعت راسي

شفت الولد الاسمه حسين صافن عليه
و انه اباوعله

ورا زلمه طويل و ضخم و شاربه ثخين
اسمر صاحله الشايب

"تعال مقدام كول شعندك"

طب عينه عليه جاهل امري لو جاهل طريقة
صلاتي ماكنت اعرف الفرق

كله " يابه الشيخ رميض باع غراضه و طلع من المنطقه هو و ولده و راح يم اهل زوجت ابنه
بالشمال"

الشايب صفن و انه سالته " شنو شمال
بعيده عن بيتنه"

صفنته عليه بيها كسرت خاطر شافني طفل
مايعرف الچدامه تعلم من جده مو البعمره
اعرف النضره شنو هيه وجان عدي امل بي
يلكالي اهلي ...

الشايب حضني و مسح على راسي

ماردت هيج يعاملني انه مو زغير ولباله
ماافهم الحجي لو التلميحات الجرت بينهم
كل جلمه منهم اعرف مغزاها

شنو راح تكون عيشتي هنااا وين اسكن
كلبي حاسني ماراح اشوفهم

ابنه يحجيله وعينه مني جنه يتفحصني
جابها للثارات والشايب كل شويه يتنهد
ويتحسب هواي امور فهمتها من وعيت
ومن مرت عليه هلسنين المره .....

الزمن ماناوي لصلحه من اولها ثارات تاليها وين
شني انه وادفع ثمن مامرتكبه ....

حالي جدي وابوي وامي هسه شنو دموعي
سبقتني والله مااردتهن ينزلن انه زلمه تربات
شيخ ضاك ملوحت البصره .......

........يتبع

مساء الخير عليكم

بعون الله بدينه وياكم بلقصه
النشر حيكون يومين بيوم
استراحه

لاضيعون تعبي متخسرون لو ضغطو نجمه
وصوتو

اتمنالكم قرائه ممتعه 🌹

احبكم ❤