رواية بين الكاف و النون الفصل السابع والعشرون 27 - بقلم saja altaie95

بين الكاف والنون (كن فيكون)

التاسع والعشرون

بقلم .....سجى الطائي

‏‌‎هـذا حـال اليعطش وجـوه اليحبهم
لا قطار  يجيبهم وتنام عينة
ولا مطلعين أسمه مـن دگـة گلبهم

  ______________________🍃

سديم

مرات الفشل يعلم ومرات العثره صحي ومرات الخطاء يوعي حياتنه عباره عن اغلاط مرات البشر يوعه على نفسه ويراجع تصرفاته ويحاول يصحح لو شي بسيط

اكو ناس ماليها الذنوب واخطاء تمشي حياتها بله ضمير صاحي ومستمرين على طريقهم

والبيهم بين هذا وهذا وبيهم الي يحاسب نفسه كل يوم هذا لتخاف منه ضميره صااحي عن الامام علي (ليس منا من لم يحاسب نفسه كل  ليلة)

بعد حادثة اخويه ومرضه امي واريام واماني التزمن البيت تبخير ومسح بخل وملح خشن ويوميه اماني تقره عليهن سورة الجن سبع مرات والايات القصار هم على سبعه سبعه ريحانه انطت الاماني قطعة من ضريح الامام قاريه على رقية ابطال السحر خاليها بكلاص نشرب تحسين منها

الوضع احسن كدرنه نرجع مثل قبل خلصت عطلت نصف السنه وبلشنه بلفصل الثاني رجعت اداوم

اليوم احد كعدت من وكت اول يوم نداوم بي وره العطله متحمسه لصديقاتي اريام ضفرتلي شعري هندي من اليل ولفته بشال ونمت كعدت وخرت الشال لكيته مصفط

لبست صدريتي النيلي ممنوع غير لون والون الاسود وكت محرم شال ممنوع والربطه هم بس حجاب الاميره لبست وكفت كبال المرايه اعدل بنفسي دنيت روحي عيوني بيهن لون ابتسمت وشعري ذهبي وبياضي اول مره انغر بتفاصيلي جرت عيني حلوه رغم صغرهن مو واسعات ولا صغار كلش

ابتسمت بينن سنوني مرتبات بشكل رباني وخرت منها اجاني صوت امي صيعني اتريك اماني سدت باب غرفه واني بلهول واكفه بيدها عبايتها وجبتها الماروني جوه العبايه تلبسها حجابها المضبوط

تفاصيلها بارزتها العبايه رغم ضعفها دوران وجها منطيها جماليه تريح النضر تقربت يمي لبست عباتها دنيت عنها شوف روحها

ردن العبا بي خيد متين مثل الحلقه ينحط باصبع الابهام علمود الردن مينرفع اثناء حركت الايد شكلته وخرت تباوعلي على صفتي

اماني "سرحتي بيه اكو غلط لو عباتي بيها شي"

هزيت راسي " لا لايكتلج مطلعين اذا متكويها الج خلك صدك امونه باجر عدي كيميا اريدج تقريني هاي مدرستنه سطل ماتفهم ضاله مثل الاطرش بلزفه"

التفتت شايله الفكس " ماشي من ارجع ذكريني بليل اقريج اكضي دروسج الضهر "

مشت ومشيت وراها" الضهر انام خليها العصر وبليل اقره دروسي حبابه"

التفتت" سديم الضهر اقري للعصر ترتاحين وره العشه ابلش اقريج لتلجين تره اني مثلج عدي محاضرات"

سديم" شيفرق يعني اذا العصر لو بليل بااعي مو هم انتي ترتاحين وتدرسين بليل"

عكدت حواجبها عرفت بيها راح تحجي عليه " الضهر تكضيها نوووم والعصر اقريج علمود بليل تختلين وتكابلين المسلسلات بحجت تقرين الي يوم اشيل هذا الشيطان وتنحرمين منه "

نفخت بضجر "سبينه العنب السود "

مشت مسافه "اي ام لسان مو اكول شعجب مااردت "

طلعت للمطبخ ضوجتني مسويه عليه حصار تلفزيون ممنوع مسلسلات تلهيج لعب ماكو عيب كبرتي بيت جدي ميخلوني اروحله والعب ويه بنات عمي

طبيت للطبخ بعدها واكفه تحاجي امي "يوم يا بيض هسه عباتي تزفر صير بيها ريحه "

ام تحسين" طلعين على لحم بطنج يمه مشوفين نفسج صايره جلد وعظم مدكليلي شجاج من رافكتيلي ريحانه وانتي كاضيتها صيام انطي الروحج مفكه ارتاحي شهر رجب خلص وهل احنه نص من شعبان وانتي صايمه "

اماني"يوم مااشتهي شعلي الصوم وبعدين الصوم ترويض النفس جسمي يتخلص من السموم والذنوب "

ام تحسين" ادري يمه فدوه العينج هل احنه وياج نتاني رمضان يوم يوم نوصل نص الشهر نكون ناحط مناحط نريد بس يخلص ونرتاح شحال انتي ثلث اشهر صوميهن"

اماني " تعويد يمه وكمت مااحس بلجوع يله تأخرت دنكت تلبس حذائها كملت وكفت كالت مع السلامه باوعتلي وتاشر بصبعها الضهر كملي دروسج ياويلج اذا عاندتي احرم عليج هذا الملعون بلغرفه "

دارت وجها وطلعت امي باوعتلي " سمعي كلام اختج ولا تركبين هذا الحجاره حاطيها براسج تخاف على دروسج شوفيها الله التفتلها وهداها ولتزمت بدينها وحجابها وحتى دراستها متفوقه بيها"

كعدت اكل شبيدي اني قابل شمسويه هااي اروح وارجع من المدرسه للبيت لا مسيره ولامطيره بس يعرفون يحجون عليه

كملت وطلعت للمدرسه كملنه خمس دروس وحلينه بطريق الرجعه وياي صديقتي ودق تعرفت عليه نقل جديده همزين مدرستنه فصلو الولد عن البنات كمت حتى حجابي انزعه داخل المدرسه ويوميه مسويتلي فيكه بشعري

الله ينطي الاريام الها واهس ومتحملتني تصرفاتي بلبيت اليشوفني يكول شكد وكحه بس اني العكس اخجل بسرعه ومرات من يصير حديث ونقاش قوي مااعرف شرد اخواتي لان ماخذه عليهن اصرف على لاهيتي وموقف اليوم ثبت هذا الشي

رجعين ودق هواي تحجي سطرتني على اخواتها وامها واخوانها واخوها يحب بت عمها وذيج تحب ابن خالتها وهي تحب ابن خالت بت عمها عيوني زوغلن من سمعت

همست يمها قريب " حزورتج خابطه الكوت كلها انتو فلم هندي يحتاجلكم مخرج وسيناريو يرتبكم طلعون فد شي "

باوعتلي صفح" مصدكين هوه هذا حضي جابهم وخبطهم يمي ومااحبيت غير ابن خالتها اووي فدوه الطوله سديم شايفته شكد طويل تيل من يفوت من بابنا يدنك اوووي شكد احبه حتى قوطيت الببسي مالته ضامتها من اجانه مره للبيت تدرين مره نسه باكيت جكايره بي عطره متت عليه توسلت بامي تاخذني للسوك ونروح لبو العطور اغافلها واكله عليه اريده حتى الباكيت راح عطره من كد مااشتمه

صفنت عليها ضلت تحجي عنه بلهفه كلامها ضل بالي طول الطريق افكر اكو لوفه للشارع يودي البيتنه حسيت بولد يمشي وراي بعد ماوصلت ودق ضليت امشي بسرعه حسيت بخوف

كمت اتعثر بصدريتي اجيت اطيح على وجهي الخوف مله كلبي حسيت بوجوده بصفي ردت بس اشوفه منو وكفت كرم مدنك

كملت مشي " سديم مااريد منج شي بس اوكفي دقيقه احاجيج واروح"

التفتت وراي ماكو احد الشارع فارغ "عيب كرم هسه يشوفونه الناس ويحجون عليه "

كرم" اسف رايح مااعطلج بس اريد منج صورة الطكيناها بلبتدائيه "

عكدت حواجبي " ياصوره كل صف نطك صوره جماعيه ياصف منهن"

ابتسم " الرابع ابتدائي اذكرج بيومها تعاركنه اني وستار على الوكفه وراج والمعلمه رزلتنه وخلتني اخر شي "

نصيت خجلانه من مشاعره اخذت نفس هزيت راسي ولا بالي احساسه شكد يحاول يبين هذا الشي واني من صغري شايلته هزيت راسي " باجر اجيبها وانطيها الاختك وياي"

اعترض بلبدايه كتله " مااكدر بعد اوكف وياك كرم افهم عيب كبرنه "

هز راسه "ميخالف قابلين "

يله" باي"

ضل واكف مشيت خطوتين رد" لا تنسين ذكرياتي بيها "

التفتت لا ماانسه

رجعت للبيت حضرتها للصوره خليتها بداخل الكتاب وضميتها بجنطتي كضيت اليوم كله اماني درس بيه حتى دراستها عافتها

لليل كاعدين نراجع دك تلفون اماني شالته ريخانه فتحت خط بعدها دسلم عليه اماني وجها تغير ساكته بس تسمع صوت الصرصور عالي اسمعها تبجي مااعرف شتحجي

اماني" رياحين حبيبتي بس اخذي نفس اهدئي افهم عليج شبي اخوج وزوجته سكتت اماني

تسمع ردت " اي هذا عرفنا وكلتيلي نحلت ريحانه كلشي ماافهم عليج بسم الله الرحمان الرحيم رددي يالطيف انطي نفسج مجال حاولي تعين هاي اليله وباجر نحجي "

"ايي ياكلبي شبيدي هسه ليل منو يخليني اجيج واهلج اهبطهم صير صير ريحانه الناس تذابح وراها تنحل مشكلتهم وترجع المي المجاريها "

"ولج حتموتيني بس اهدئي والله مااعوفج كوومي غسلي وهدي روحج لا تقلقين تنحل اييي مااعوفج والله وداعت امي اييي ماشي نامي لشيلين هم الله وياج "

سدته اماني مختنكه عافتني وطلعت للطرمه ضليت كاعده بمكاني طلعت وراها

سديم" شبيها ريحانه ليش تبجي "

اماني دنكت مسحت عيونها اول مره اشوف اختي هيج مقهور تقربت يمها كامت تناشغ خوفتني مجرد صرت كبالها حظنتني

تهمس بقهر ودموعها على كتفي " اخيتي جاي ضيع مني مااعرف شسوي روحي تروح من اشوف حالها "

امسح على ضهرها " على كيفج اماني ماشايفتج من قبل هيج صاير وياها"

وخرت مني تمسح بعيونها " بيوم وليله نكلبت مااتحمل حالها وضم على اهلها مخوفتني علاماتها مشككتني "

سديم" شلون يعني فهميني مريضه بيها شي اسم الله"

باوعت للحايط الكامها هزت راسها لا مو البالج عاكده رايت ابو فاضل سبع الگنطره وهاي حفيدتهم يحلها وناخيته مااريد ادعي الك ثلثين الدعاء ياداعي اريدها بذمتهم "

سكتت مسحت وجها تلفونها بيدها باوعتلي مدت ايدها بصدرها طلعت فلوس " تلبسين عبات امي بدون مشوفج ترحين لم ابراهيم جيبيلي رصيد ابو الخمسه اثير وترجعين طيااره "

سديم " مااروح تردين امي تلزمتي وتموتني كتل باجر اجيبلج من ارجع من المدرسه "

لزمت ايديه " سديم سويها لوجه الله تفكين ازمتي ساعديني ضاله على الله وعليج تمشين جيبيلي رصيده محتاجته ضروري "

سكتت شفتها مو مال اسالها واعرف شبيها غافلت امي وصيت اريام تلزملي الباب اخاف ليكفوني اخواني رحت ركض اتعثر بلعبايه وضلت البابهم

مبينين ولدهم بلطرمه بلحديقه صوتهم عالي ونار شاعلين وسط الحديقه من ريحت احتراك الخشب

ترددت ادك الباب شيكولون عليه بين التفكير والخجل دكيت الباب ماسمعو لان ضحكهم عالي رجعت بقوة دكيته اجه واحد يكرخ بنعاله مال واحد لابسه بطرف اصابعه

طلعلي ولد طويل اجتافه اعراض مبين شكله لان ضوه الكلوب الاصفر بضهره وناصي مضلم وجها من صوتها عرفته "تفضلي"

سديم " خاله ام ابراهيم موجوده"

رد" اي جوه طبي يابه لضلين بلباب فوتي كبل للمطبخ " فتحلي الباب سوالي مجال باوع للحديقه كال بصوت عالي يسمعهم شاب صوتكم دنكت وطبيت وهمه هم سكتو

رحبت بيه المره عرفتها بنفسي بت ام تحسين تعرف امي والبنات اخذت منها رصيت راحت صاحت على نفس الولد شفت ملامحا واضحه مربي شوارب وسكسوكه ضخم مزين اكرع

اله هيبه وصوته لا هوه خشن ولا ناعم بي بحه من صاح على الولد بعلو حسه

انطاني رصيد وراح من طلعت شافني كال "اوكفي يابه انطي صبر لتركضين عاف جماعته واجه وراي

ضليت واكفه مستغربه فهم وكفتي ومتررده شعده جااي ضليت بعتبت الباب كلهم " اوصل الاهل وارجعلكم"

مشه كدامي مشيت ورا مشيته برزانه حاط ايده بجيوب قمصلته حتى ماباوعلي اطمأنيت

ماعدنه بنيه تطلع بليل الع وياها احد لهذا اجه  يوصلني عرفته صاحب غيره منين عرفني اني اخت حسام فات على اخر مره شفته بيها من الابتدائيه  قريب منوصل البيتنه وكف على صفحه  "صيحي على حسام بطريقج "

دنكت وفتت للبيت يمه لزمت كلبي احس روحي اركض ودالهث من الركض اخذت نفس بارد نزعت العبايه باب البيت من داخل مشيت علكتها بلمطبخ همزين محد موجود فتت للغرفه شمرت عليها الكارت

رفعت راسها عيونها مورمه " ليش تبجين عبالج زغيره ماافهم اذا كتيلي "

ماردت عليه زلغت الكارت وتعبي بلمبايل درت وجهي طلعت صحت حسام على صاحبه ورجعت للغرفه

ثاني يوم دزيت الصوره بيت اخت كرم كتلها يستنسخه ويرجعها الي

ريحانه

خبر حمل تكتم فرح الكل بابا وماما ورضا طاير بلخبر  بابا على سلامتها ويبعد عنها النفس والعين ذبح دجاجه ونطاها لبيت بلمنطقه على كد حالهم

تكتم صارت اقرب شي الي من بعد اماني مااعتبرها صديقتي اختي عوضتني عن كلشي فقدته كعداتنه
سوه مرات تنزل يمي نقره قرأن

بايام البيض صوم وياي نكمل شغلنه بليل والنهار نضل لو نايمين لو نصلي ونقره ادعيه حتى طبخ
بليل نطبخ

وجودها خل فرق عدي عشت اجواء احلم اعيشها علمتني على المكياج بلختلات خلتلي وغسلته

مر شهرين بيت خالتي خديجه مرتين اجونه ورجعو
احساسي مايخيب حسيت اكو امور ورا زياراتهم

واجه هذا اليوم فاتحتني بي تكتم طلب اخوها مسلم الي " اني مااريد اخسرج ريحانه صرنه خوات اني يمج وانتي يمي مااريدج ترحين لغير واحد اريدج
قريبه يمي شكد حلوه زوجي اخوج واخويه زوجج

شايفه اكو احله من هيج وننجمع بلمناسبات وجمعاتنه صير بيناتنه امي تحبج وابويا حابج
وكلنه رايديج

ادري بيج خجوله ومتكدرين تردين عليه خلي كلامنه بيناتنه اني حتى خالتي ماخليته تاحجيج كتلها اني
اكلها

مسلم حباب مو لان اخويه واحمد بي بس طبعه هادء وفقير ومسالم ميريد اكثر من مره تحبه
وصونه وزينه ويه امي يدللج والله وشفتي
ماعده سوالف بنات

فكري زين واني يمج لاتستحين مني يااا شو رفعي راسج خيه شبيج صرتي طماطه

رفعت راسي باوعتلها كوه صابره ضحكت وكرصت خدي يلوكلج الخجل ست البنات فكري تره ماانتضر واخويه ضال على نار هههه خطيه لو شوفين حاله
امر من حالج بس ركبيله جناحات وخلي يطير

تقربت همست سر بيني وبينج تدرين يمووت عليج
وشكد متمني صيرين اله ذاك اليوم وصه النجار على احسن غرفه رادها من ذني الثكال يكلي تستاهل الزين

بوست خدي وطلعت فرحانه كلبي نقبض وحسيت بضيق بصدري حسيت روحي محتاره ليش هيج احس متوتره

احتاجيت عبد الملك وينه اختفه من عهد ذاك اليوم
حلفته شكد مااجاني بجيت

كمت مسحت عيوني وطلعت اتوضه  للخلاص من الظالم او العدو او ضيق الصدر طفيت الضوه رحت للجرار طلعت شمعه وشعلتها مديت السجاده بيدي احرام الصلا لبسته كعدت مستقبله القبله

صليت  ركعين لوجه الله  بعد الانتهاء من الصلاة تقول بسم الله الرحمن الرحيم مرة واحده ثم نقول
(ولقد نعلم انك يضيق صدرك بما يقولون فسبح بحمد ربك وكن من الساجدين) (٧٠مره)
استغفر الله (٧٠مرة)
اللهم صل على محمد وال محمد (٧٠مرة)
نسجد ونكول يارزاق ياالله (٧٠ مرة)
وره ما نكمل نهدي  كل هذه الاعمال الى النبي محمد
صل الله عليه واله وسلم

فتحت كتاب مفاتيح الجنان عظي عاده من افتح الكتاب شيطلعلي من دعاء اقراه من البدايه

طلع كدامي دعاء التوسل غمضت نزلت دمعتي
احس بغصه داخلي مااعرف شنو نوعها ليش هاي
السلبيه العدي بسرعه تكأبت

بلشت اقره واتوسل الى ان ختمته عيوني وجعني
حسيت بغواش قوي ضليت اردد اسماء الله

كملت تسبيح واني على كعدتي فتحت عيوني
الشمعه واصله للنص مثل الهوى حرك نار الشمعه

ابتسمت داخلي ضليت ساكته اكثر من ربع ساعه
طول سكوتي انسد الكتاب من وحده

رفعت راسي ماكو خياله ضليت على هدوئي اعرف
اكو امر يحاول يوصله الي ثواني ونفتح الكتاب

على سورة يس حافظتها ميحتاج اقراها بلكتاب
سديته وخرت ايدي رجع انفتح

ابتسمت غمضت عيوني بسم الله الرحمان الرحيم
يس والقرأن الحكيم انك لمن المرسلين ... قريت نصف السوره سكتت حسيت بقربه

همسته واضحه بأذني  احذرو عبدة الشياطين
قشعر بدني فتحت عيوني على وسعهن التفتت ماكو

تحذيره دوخني شنو قصده بعبدة الشياطين ضليت طول الكعده افكر ساعه مرت كمت طويت السجاده
مددت بفراشي بيدي السبحه رددت تفيد من المجربات تنطي راحه نفسيه اطمأنان نتأجها
فوريه

وسخر لكم ما في السماوات ومافي الأرض جميعا منه ياعلي ياحي ياقيوم ١٠٠٠

من تسابيح الرسول صلى علية وآل وسلم  للشدائد تدفع الف شده ياحي ياقيوم ٧٠٠مره يومين

بسم الله الرحمان الرحيم ٧٨٦

كملت وبعدها ختمتها ب تسبيح (يادليل المتحيرين)
(٧٤)

نمت براحه كعدت ثاني يوم عدي دوام من الفجر كملت للسبعه واكفه منتضره الخط اماني اليوم مداوم 

خطنه غيرنا لتكسي واول يوم النه وياا فات بشارع
متوقعت يجي يوم اشوفه كان طريقنه يطلع على الشارع العام كل مره

فات عيوني صدت لذاك البيت كلبي دك حسيت بي
رعت ايدي على صدري عيوني ويه ديرت السياره

فتنه بطء الشوارع بيها طسات نفتح بايهم وكفت السياره الرجال دك هورن ويه االصوت رفع راسه

عكدت حواجبه تفحص السياره ضليت اتامل وجها
وفه بوعده وبعد ماوصل للجامعه

شاف السايق رفع ايده ردله السلام دار سد الباب بيده كارتونه حطها بلكاع عرفت الطالبه بيتهم كبال
بيته

رجع دنك خله الكارتونتين فوك بعض بيده بين اصابعه الجكاره خلها بحلكه وشال الكارتونات
وصلن الكتفه

مشه خطوه انتبه عليه وكف ضافن عيونه مركزات
حسيت برجفت كلبه مثل كلبي بينت ابتسامته رغم اليشوفه يكول وجه عادي

نصيت خجلانه فرحه بداخلي اول مره اشهدها احس بطاقه اجتني غريبه ونشوة حب عجيبه

بعد واكف حاير ليكدر يرجع وليكدر يمشي واني كوه ضامه الفرحه بداخلي اجت البنيه صعدت حتى من سلمت ماادري رديت لو لا

حرك السيارة وتميم واكف طول الطريق الفرحه
بداخلي يااربي حرام الاسوي ضليت بخوف على
قلق على فرحه

طول اليوم كضيته اصفن شي اخذ من كلبي حيز ملا وين ماادير وجهي تجيني ابتسامته ضحكت عيونه

لابس كلاو وجها اسمر وحمار خدوده شي انرسم كدام عيوني مثل صوره وبحايط كدامي

خلص اليوم وتوالت الايام عدي حسمت امري شفت نفسي مااكدر اصير المسلم وتميم عايش جواي

انطيت رفضي التكتم مباشرتاً انصدمت بلاول
وارتبكت عفتها ونزلت فرحانه هم ونزاح مني

ايام تمشي بيه وابواب السمه مفتوحتلي يارب يارحمتك كلشي مشه عدي بحماس اماني فرحانه
على فرحي حجيتلها البداخلي

اول مره احسه تايدني بلحب حاولت استفسر من
والدي مابي اشكال مشاعر الحب اتجاه الشخص من
غير الوقوع بلاذنب

وكانت صعوبه عدي ليحس من نبرتي المتلهفه سكتت
خابرت نرجس خليتها تسأل جدي واجاني الخبر

لابأس بذالك ما لا يقتربا من الحرام او امور محرمه

دخلت السعاده الكلبي وكان قصد جدي الكلام والغزل بين الجنسين محرم ولا يجوز لانه يؤدي الى الوقوع بلحرام واثارة الشهوه عند الجنسين اذا تطوره الامر

اطمانيت مابيني وبين تميم غير النضرات الخجوله الصادقه محسيت بي ينضرلي بغير نضره كوني مستوره من ناحية البدن

تكررت شوفتي اله وعرفت من عهدها ينتضر الخط من يسمع صوت هورن الرجال يطلع بحجت طالع للمحل

اماني تغلس جنها ماشايفه بس متهمس خدودج راح يطكن من الخجل

اصير بنص عباتي لحد مااجه اليوم اماني كاعد بصفي وصلنه للجامعه نمشي اني وياها وكفتني كبل مطب لكليتها رفعت ايدها بيها جيس

"امانه وصلت الاصحابها يله في امان الله "

ضليت اباوع على الجيس مستغربه " وين رايحه شنو هذا"

اماني " ماادري كالو وصليها وصلتها "

سوتلي باي وراحت رحت يم الحديقه كعدت على المستطبه فتحت العلاكه بيضه بطنها كارتونه بكد كف ايدي فتحتها ربطه جرجيت كربلائيه علامتها

لونها وردي وبيها تشجرات ناعمه على الحافه
شميتها عطرها عطر الحضره مي ورد مركز

رجعتها شلت العلاكه وطلعت لكليتي طول اليوم
كل ساعه اطلع الربطه اباوعلها اشبع منها شوف
وارجعها

رجعت للبيت تكتم واكفه تغسل بلجدر حضنتها من ضهرها وبستها من خدها

باوعتلي " فرحانه خير يارب شايفتلج طير طوير"

ابتسمت " لا شايفتج هي الجامعه بيها طيور "

علت الجدر وكلبته خلته على السنك ينشف مسحت ايديها بدشداشتها التفتت ناحيتي " عيونج طايرات ريحونه احنه مو كلنه اخوات والاخوات سرهن واحد
ليش ضمين عليه "

هيج اني مفضوحه وماحاسه على نفسي بحيث تكتم
عرفت بلجواي سكتت مااكدر اصارحها بحبي وهي متامله اتقبل اخواها

ضليت ساكته دنكت مقهوره " عمري حلمت يكون عدي احد قريب عليه وبعمري صح عدي خوات
بس محد بيها حسيتها قربها على كلبي بكدج

ريحانه مااجبرج عليه ولا اكلج تعالي سولفيلي
هذا الشي يخصج براحتج بس تاكدي شوكت ماتحتاجيني تلكيني يمج

واتمنالج الخير اني اختج واحبج من كلبي وما
معتبرتج حماتي بلعكس احسج قطعه مني

وكفت تقربت باستني بخدي

دنكت مستحيه " مااعدي شي احجيلج مجرد فرحانه بدرجاتي تكتم حبابه لتضوجين  "

ابتسمت بقهر" لتصورين  اضوج منج تعرفين شنو
الاخت شعوري وياج غير عن خواتي افضلج عليهن
براحتج شوكت ميعجبج اني يمج "

وفاتت صعدت اجيت ابجي شي يكلي لتحجين ودموع تكتم اذني

نويت بس بيت خالتي ينسون سالفت خطبتي اصارحها ومااضم عليه

ثاني يوم اخذها رضا لبيت اهلها مر عليه الاسبوع
مابي طعم خابرتها

ريحانه" تعالي البيت ضوجه بدونج تعودت عليج
وعلى طبخج "

تكتم" هههه ضوكو فراكي شويه اشوف معزتي عدكم خالتي شلونها متونسه على روحتي "

ريحانه" ماما هم تشتاقلج اليوم نسولف بيج وكلنه الرضا يجيبج كال بس يكمل يرجعج "

تكتم " شبيج حتبجين حبيبتي جايتكم هي كم يوم وارجع وهم اريد اكمل مراجعه هناا صدك ريحونه
شوفي سلة البغرفتي معوده رضا يذب بيها ملابس
الوصخه بلكت تغسليهن اله "

ربحانه " نزلهن  وماما غسلتهن وكويتله قمصانه"

تكتم "فدوه الجنتنه الحلوه اووووف لا ضوجين كلبي نسيت لساني وكلبي راهم على الفكره
يله ربج يعوض سلميلي"

سديته منها وره يومين رجعت طبت بيدها الجنطه فاتحه الباب وتكسي واكفه

امي طلعت واني وراها بوسناها حضنتني "ولج اشتاقيتلكم هووواي اخخخ شو وخرت بوستني بخدودي "

رجعت سلمت على امي

امي "منو جابج "

"مسلم وصلني ورجع "

امي"ليش يمه مادخل صدك جذب شوو جيبي تلفوني ريحانه بلعجل "

تكتم لزمتني "عليمن خاله عده شغل كوه قبل يوصلني وهم امي عدها روحه البيت جدي محد بلبيت "

امي "شكد عيب يمه جان ارتاح شربله ميه اسويله
ستكان جاي شني من الباب وراح مامقبوله منج خاله
الطريق بعيد وسفر من محافظه لمحافضه "

تكتم "لتخافين عليه متعود على الطرق وكتلج خاله البيت محد بي وتعرفين امي راحت وضل فارغ واخواتي وحدهن ميكدر يتعطل"

طبت ذبت عبايتها ضلت امي تعتب عليها "حتى ماسلم عليه يكول خالتي انزل اسلم واروح شني مزاعلنه مسلم "

تكتم "اهوو ياخاله عليمن يزعل مسلم كلبه طيب
وعادي هي قسمه بس كتلج ميلحك مستعجل واصلاً مستحي منج وكال وصليلها سلامي

اول مره نجي مو دائماً ينزل يتعشه ومرات يبات "

سكتت امي للعصر سوينه كيك ويه الجاي بابا يحبه وتكتم على موده سوي

عدت الايام وبيوم جمعه نويت اصلي صلاة اليل كاطعتها من داومت جامعه ماالحك

كملتها ومكابله مصلايتي اسبح متانية اذان الفجر
باوعت لجهازي بعد كدامي ساعه امدد بفراشي
بين مايأذن

نمت وبيدي السبحه الاضويه طافيه البيت هدوء
دقايق وحسيت صوت مشي اقدام غرفتي مباشرتاً بصف الدرج اليفوت يصعد وينزل يمر منها

رفعت راسي خيال من جوه الباب استغربت ضوه الحمام عاكس على الارضيه الخيال يروح ويرجع

ماكو صوت دااكوم يدت الباب نزلت رجعت راسي
عصرت السبحه بيدي انفاس شخص اعوذ باالله منو
والله احس بي قريب يمي عصرت عيوني مغمضه

جسمي يرجف ياارب دخيلك ربع ساعه واني على وضعي كلبي يدك وادعي بداخلي منو هذا

قويت روحي يمكن اتخيل فتحت عيوني الغرفه فارغه كمت نزلت من الجربايه ويه طخت رجلي للكاع حسيت برطوبه

ركضت شعلت الضوه الغرفه فارغه الكاع عليها قطرات مي مو هواي دنكت للكاع اشم بلمي مابي
عطر ولا شي لمسته باطراف اصابعي شميته
مره ثاني عادي منين اجه

كمت تقربت يم الباب اباوع فتحت عيوني مقفول
سلام قولاً من رب رحيم منو فتح الباب قبل شويه

كعدت مهدود حيلي اني مااقفل الباب

......يتبع

عدنا والعود احمد

ربي تكونون بخير وصحه وسلامه

اعرف طولت عليكم الحمدالله على كل حال شائة
الاقدار انو ضروفنه تكون بهذا الايام

رجعت وياكم نكمل بقية القصه حابه انوه على كم
شغله من هسه اكللكم القصه طوييييله

شكد طول ماادري تعرفون عدنه اربع ابطال وكل بطل حيات اكيد تاخذ من يمنه وقت حتى
اسرد كل بطل وبطله بادق تفاصيل حياته

طريقة النشر مااحدد ولا انطيكم موعد مااعرف باجر الله شضاملي لهذا التزم وياكم بس ماانطيكم كلمه
يجوز وره ساعه تتغير الاقدار

والمتابعني يعرفني متعرضه لهواي امور وكذالك بيتنه هواي يجونه خطار لهذا اليوم الماانزل بي بارت معناها اليوم الورا انزله

القصه ابد مااستعجل بيها ولا اختصرها

اي شي حابين سؤلوني عليه سئلوني بلانستا على حسابي sjo_a1995 والادعيه التطرحه ريحانه
مااكدر كلهن اكتبهن فاانزلهن بلانستا

صح البارت مو طويل 3200 كلمه ان البارتات الجايه مايقل عن 5000 لهذا اتاخر بتنزيل كل بارت

لان راح يحتوي على اربع ابطال مااختصر بحيات اي بطل

ونسألكم الدعاء