بين الكاف والنون (كن فيكون )
الثامن والعشرون
بقلم....سجى الطائي
----------------------------
ياهو يلوگلي عُگبك ؟
يغَنيلي ، وأغنيله
ياهو لضحكتي يضحَك ؟
واذا أبچي يمد چفين منديله !
سيف الدين
طر الفجر وانه كااعد عيني مااخذت نوم كل نشغه منها طيح كلبي وارد ابرد ناره بحضنتها شوكها ولهفتها
جرئتها وجيتها لحد بابي طيرتلي عكلي هااي ناويه عليه طلعني من طوري دنكت افرك راسي ايدي طخت
اعاين الدشداشتي تك ترجيتها معلك يم صدري زارف الدشداشه اخذتها بيدي على شكل حلقه ذهب وبي دعبله عصرته بيدي
يومين انه مدوهن بعلت كلبي شجااااني الوب عليها تاخذني رجليه دون ماادري لعتبت بابهم وارد
الشيخ كلفني امشي ويااا للنجف عدهم عراضه مااعرف شلون مشيت ويااا لهناك اخذنه يوم كامل وردينه بليل
بس باجر والتحق خابرني ضافر رفضته هذا يرادله خلك دكيت على المحامي كلي خلي يجيني ويجيب مستمسكاته
خابرته ونطيته رقم المحامي يتفاهم وياا كل ساعه امد يدي بجيبي اتلمس ترجيتها
ارغد
ضلت رغد بالي اتحسف عليها تعوف الجامعه ضليت حاير شلون احاجيها على التلفون مترد ماضل عدي غير
اروحلها للبيت واتفاهم ويه عمتها بلكت تفهمني
صدك ثاني يوم توكلت اخذت تكسي ولبيتهم دكيت الباب الساعه صبح بلتسعه والجو بارد وغيم وجنها
تمطر
انفتح الباب مره متوسطة العمر الوجه دائري تلج من البياض استحيت من كد مابحلقت كالت "تفضل خاله شرايد"
ارغد" السلام عليكم اني زميل رغد بلجامعه وصارله فتره مامداومه ونزلو بيها فصل واجيت اطمن عليها
ان شاء الله المانع خير "
مدنك واحاجيها رد "خاله الجو مغيم وكامت تنكط تفضل خاله دامك زميل رغوده "
رفعت راسي " هاا مااحب اسببلج احراج اشوف رغد وارجع بلكت تتلاحك وترجع داوم ونحاول يرفعون الفصل عنها "
كالت" خاله مااكدر احاجيك هيج بلباب بس هي كالت بطلت بعد مااداوم "
ارغد" حرامات خاله ماضلت سنه وحده وهاي السنه ماضل عليها شي وتخلص لا ضيعهن "
الدنيا زختها زخا ويه حضي المره تبللت واني تنكعت رفعت راسي للسما شني متانيتني على حضي "
المره ضحكت " خاله دطب عيوني اني من وجهك عرفتك خوش ولد يمه طب واشربلك شي يدفي بطنك"
دخلت وراها البيت تعبان بلوك الحياطين والسكف جينكو وعمدان شي ميشبه شي الاعرفه حالة ابو رغد توب ليش عايف اخته هيج عايشه هاي العائله غريبه
كعدت بصالة قنفات خشب قديمه عليهن جودليات
وطبلات نايلون المره لابسه جادر صلا ابيض
شويه وطبت بيدها صينية استكان جي وكلاص مي
كمت اخذته منها" ليش كلفتي نفسج"
" لا يمه عليمن هوه ستكين جاي تعذرني ماعدنه صوبه بس وحده وخالتها يم رغد مريضه وترجف"
الاستكان بيدي خليته على الطبله" خيرها مستبرده"
" كعدت والله ياخاله شسولفلك البت تعبت من اجتنه هاي مدللة امها وسنين عاشت مامعتزاه شي تلبس من ارقه الاماكن يكلك اجت وبحلكها ملعقة ذهب واني هل شوف حالي على كدي والكمه كوه دابره ماتحملت عيشتنه"
ارغد" ابوها وينه ليش عايفها " اريد اعرف زبدتها وين هاي البنيه غامضه كلشي عدها سكوت
كالت" ابوها واحد ميخاف من ربه شامر هاي الماسه لو عد غيره والله باب الحوش مايطلعوها على حسنها واخلاقها وتالي يريد يزوجها لو احد صايع وعركجي
وصاحب مشاكل "
تنهدت بقهر " زين خاله وجامعتها شلون "
المره دنكت نزلن دموعها " والله لو عدي مااقصر وياها شبيدي العين بصيره والايد كصيره لو عدي ذهب جان بعته الها لو عدي شي جوه ايده اشيله واحطه بيدها
عايشه على الله وعلى هذا الرجال اليجيبه ادبر حالي بي
وهي مصاريفها هواي خط وملابس وكتب وقصاد
الكليه اني لو اشتغل خدامه بلبيوت هم ماادبر عيشتها "
سحبت نفس " واالله ماادري شلون الله يعينكم ويساعدج انتي مره صبوره ومؤمنه "
مسحت عيونها " الله مارزقني بجهال رغده من اجت للدنيا شمعت بكلبي من زغرها اني يوميه اسير عليهم اشوفها وربت على ايديه هذني صعبه اشوف حالها
وابوها اليسوي بيها"
مسحت وجهي ضلت تبجي وتشكي واني شبت بضلوعي نار والله لو كدامي ابوها اكسره ومايبرد
كلبي منهاكو اب يشمر بته هاي الشمر والله جلب
مايعيش عيشتهم الله يساعد هاي المره شلون صابره
ومقتنعه
دكيت صدري الها اني ادبر فلوس اقصاد جامعتها المره ماقبلت وكفت " يمه حسبيني اخوها واني مو ناقص غيره واشوف حالكم واسكت عوفيها عليه والج الصافي
احسبيها لوجه الله "
" لا خاله ابد والله ولا اقبل انت شعدك هم طالب
وراك مصاريف عوفها يمه هي اول تالي تاخذ
الشهاده وتكعد بلبيت"
ارغد " تره قسمنه مرغوب وتعيناتنه مضمونه حرام
ضيع عمره وابوها ماورا خير خليها تفيد نفسها وتفيدكم"
"يمه شنو ذنبك تتحمل اقصادها منيلك"
ارغد " دابره حجيه لا شيلين هم"
" الله يرزقك من اوسع ابوابه ويحفظك الشبابك
ويسعدك وينور طريقك ويبعد عنك اولاد الحرام"
طلعت وهي تدعيلي سلمت وتوجهة للشقه افر براسي
منين ادبرهن العدي ربع الاقصاد ضليت اليوم كله
افكر
اداين من جماعتي بس محمد متمكن البقيه ماعدهم يادوب يمشون امورهم اخابر تميم ينطيني من بلوكاته الحاطهن على كلبه
ماعدي غير حل خابرته وطلبت منه دخلين تحقيق وكوه كاض الساني لا افشر ويقفل عليه حاجتك
عد جلب كله حجي جلوب
قشمرته بمشروع ويه ولد وياي نفتحه ونسترزق
قبل ثاني يوم رحت جبتهن حتى مامريت لهلي
عدي دوام واذا شافوني يلزموني مايهدوني
وهم امي تسأل ليش نزلت ومالي خلك الهم
مريتله للمحل اخذتهن ورجعت باجر دوام
مددت انام دك الجهاز عمتها رفعته صوت رغد
كوه تحجي مبحوح ودكح ارتجيت على الجربايه
كالت بدون سلام " ارغد مالك دخل بيه
عفيه لا تحرجني اني مااريد اداوم لو اريد
اخذ من بابا "
" ليش رغد واذا ساعتج اعتبريهن دين وشوكت
مااتكدرين رجعيهن"
" مااريد عفيه فدوه لتلح مالي خولك احجي
واجادلك عيوني عوفني وبعد لا تجي لعمتي
زوجها مايقبل لا تخليني بموقف يدمر حياتي"
ارغد" اعتذر اذا اجيت العمتج وحرجتها ردت
اساعدج رغد بس هاي السنه كمليها والسنه الجايه
اجليها شوكت متريدين ارجعي علمود مضيع منج"
همست دكح كحتها من صدرها شكت صدري " ماااريد
مااريد انت مو اخويا ولا ابن عمي ولا تقربني ارغد
عوفني بحالي سكتت تاخذ نفس فدوه لا دخل روحك"
سكتت مقهور من اسلوبها تنتر تنتر كتلها "انطيني عمتج"
صرخت "مااانطيك افتهمت ماانطيك عمتي عوفني ابتليت مره فتحتلك كلبي وحجيتلك عوووووفني
تفهم تفهم "
صحت " وسم لهل صوت عرمه مالج دخل انطيني عمتج وطبج طوب مالي شغل بيج صوج الحمار
الكلبه يمج ويركض علمودج "
اسمع صوت عمتها تحجي عليها وهي ترادد ودكح اخر شي صاحت الله ياخذني ويموتني اخلص من ضيمكم
الله لينطي ولا يوفقه
حسيت بصوت قوي مبينه شمرت الجهاز سديته افور
منها صدك مطي شدخلني بيها والله قهرتني من شفت حالها تتوسل بلعميد مايفصلها وانطاها مهله بعدني الوم بنفسي
دك الجهاز رقم عمتها شلته اكيد هي اريد ابرد كلبي بيها
رفعته صوت عمتها سكتت المره تتعذر مني " خاله مالك دخل بحجيه والله مستحيه شوف انت شسوي علمودها وهاي الجلبه متستحي يمه امسحها بوجهي قدر نفسيتها
تعبانه وفجئه خسرت كلشي وابوها تبره منها وشمرها عليه لا تاخذ بخاطرك منها "
ارغد " لا خاله معذوره بس لسانها طويل واني مااكو وحده كبلها هيج علة صوته لو ما اعرف ضروفها لا جان صار الي غير حجي وياها "
" حقك مدري شجاها ماجانت هيج انجلبت عليه نوب
المهم يمه اني ردت اكلك هي عدها ذهبات امها جابتهن وياها كلت انبيعهن ونسددة اقصاد كليتها واليضل
دبر بيها حالها خط وهاي شغلاة دراستها"
وكفت تمشيت للبلكونه فتحت الباب طلعت اشتم هوى البارد كفخ وجهي رجعت شعري اليوره بلايد الثانيه
" لا خاله الفلوس جوه ايدي باجر باداوام اسدد اقصادها عليج ترجعيها العقلها وداوم وتحترم نفسها تكضيها شلون ماجان "
"الله ينطيك ويستر عليك بجاه حبيبه محمد بجاه
كلمن عده جااه اريده يوفقك ويهنيك ويفتحلك باب
رزق وشوف الخير من كل كتر"
ابتسمت " تسلمين يمه ماتقصرين مثل ماكتلك قنعيها داوم وهاي هيه "
المره ضلت تشكر مني سديته بله اني شورطني وياهم بت عم بت خال وهيج اني سبع البرمه واسوي بطولات
عفت كلشي ورجعت نمت صدك ثاني يوم سددت الاقصاد صار حجي وماقبلو جيب ودي وفلان استاذ وفلان دكتور ولخاطر هذا ولخاطر ذاك يله نسدت
خابرت عمتها كتلها خليها داوم باجر رجعت بوجهي للقاعه من وكت رايديني ابو الشغل بمجال شغلي
شفت الماشايفه العقل اشياء ماجنت متوقعها
موجوده بلعراق
بنات ليره مابيهن شخط جمال وكمال بلنها ببيوت
اهلهن بليل بلملهى
باشوات شيوخ تجار ضباط بكل الرتب كل هذا شفته
من تحيلت على صاحب الشغل وخلاني احضر ليله
اني وين عايش وذوله وين عايشين اصغرهم عده
بيت وسياره وكلهم متمرسين مابيهم اليسكر هذا
متمكن مارسها وجسمه ماخذ مايخاف ويعرف شوكت
يثكل وشوكت يخفف عدهم جلسات خاصه
ضحك مره من محمد راد يدخللها ماططبو هنا عرفت
هاي القاعه خاصه بس للروس الكبار
والحلو سياسين ميحضرون بقاعات بغداد كل قاعاتهم
اربيل سليمانيه مينعرفون بغداد ناس محتكه بناس
داخلين ب2007 الذبح بلشوارع والاشوفه بليل ملاهيهم
مااعدهم كل هم عايشين ومتونسين الفلوس مطشره
ادوس عليهن واطلع كبل
كرهت روحي كرهت الفقر بيومها رجعت اذب من راسي
شوصلني اني هنااك عااالم غير عن عالمي
بنات اليختاروهن مواصفات واليريد يدفع مزايده يسون عليها وجبيرتهم تنضمهن لبس ومكياج وصرف واعتناء
عقلي وكف ومااخفيا كان اعظم
حلفت بعد مااحضر اي حفله حتى صلاتي تركتها كوه رجعت وداومت عليها
يومين وداومت رغد الوجه اصفر ومكلوب مبينه على اعصابها مداومه صديقاتها لتمن عليها طلاب يعرفوها كلها تسألها وهي كوه جاوب عفتها وطلعت
سبوعين وامي خابرتني خالتي رافضتني توقعت هذا الشي بلعتها متاني بس انزل
شهر ورغد متباوعلي واني عايفها براحتها كملت اخر يومين ورجعت لهلي
ارتاحيت يوم تلكامي اسامه طلعنه افترينه سبحان الله
مااعرف شلون امه سعاد هوه وين هي وين
بيومها جلبت بي يبات يمي وتميم معزل من وكت حضر
تعشينه وصعدنه واتفاجئ بعود معلك يم راس جربايت تميم
هوه كاعد يحسب ببلوكاته خرب غيرته شكد يحب يجمع يموت على الفلوس
تقرب الزمه صاح " ايدك ابن الخره لا جيسه"
فزيت " شبيك وجع ماكله اريد اشوفه"
وخر الفلوس من حضنه وكام وخرني " لا جيسها وخر لا تخربها الي اريد اتعلم اعزف بي"
عفطتله " لا هاي هيه انت غني ودك واني اشدلي وصله واركص نصير بية ابو الهيوه ابويا شافك "
تميم " واذا شافني يكصهن الي شمسوي هي موسيقه
داك بملهى "
هزيت ايدي وكعدت " تميم شايف شسوي انت بنفسك يوم تغني بأعراس يوم جمع الولد وتكضوها دك وغنه وهسه مشتري عود شسوي بروحك"
تميم " مالك شغل هوفني بمزاجي ومن غنية مااخذت فلوس عرس جماعتي وغنية كفر بابا شبيكم شايفين الغنه عدوكم "
اسامه جان ستوه طاب كال "خالي غنيلنه هاي ذاك اليوم غنيتها "
تميم " موهسه " ورجع يحسب ويلف كل ضبه بلاستيكه
اسامه" لا عليك بروح العزاز خالو وعلي حبيتها وماتروح من بالي دغنيها يله يله "
تميم جان ملتهي يحسب ياغنه يابطيخ هس لو يكلوله امك وابوك ماتو مايدير بال
ضل اسمه يحجي ويا وهذا يحسب ويضم كمل ضمهن بكنتوره بقاصه قفلها وضم مفتاحها وقفل الكنتور
يحسسني كاعد بيت حراميه يشككني بروحي
كمل وكعد سحب باكيته طلع جكاره ودخن" هاا سليت تريد اغنيلك "
ذاك كمز " اييي شني نتوسل بيك لو حافضها اجيب كاسيتها واسمعها "
ضحك وذب الدخان من حلكه" احبها بصوت حاتم رغم ناظم غناها حلو بس حاتم يطرب "
اشرله " نزل العود واكعد"
كام هذا الطلي انطا العود معلك كلبه خلا على رجله وهذا جر الطبله وخلاها كدامه
تمبم يباوعلي ويدخن خلصها " معاجبك ولي جوه لا تنك "
" ماحاجي اريد اسمعها هيج حلوه "
تميم" قديمه وطربيه هااك اسمع "
جان الكلب ساليك لا لا خيي
ودك بصابعه على خشبة العود
وياا اسامه
ياعذابي لاجابك الله بويه لاجابك الله
جان الكلب ساليك لا لا خيي
ياعذابي لا جابك الله بويه لا جابك الله
حيوو صاح اييي حيووو الغنية دخلت بالي
ضليت اسمع تكملتها
ويلي شمصيبه ياهو الي جيبه
مالي قلوب ثنين لا لا خيي
ياعذابي خو تدري بيا
واحد واخذته وياك ياعذابي وشضل اليا
رجعو ثنينهم يغنون طب تمام يطك اصبع ويغني
وياا ورا ابراهيم كلهم حافضيها صارت لمه شباب
والضحك اشتغل طفر اسامه سد الباب
لا ابويا يسمع ورجعو يغنون بس اني ماسامعها
ويلي شمصيبه ياهو اليجيبه
ويلي شمصيبه ولفي شيجيبه
القمر تالي الليل لالا خيي هنا كلهم يغنوها
ياعذابي دزيته ساعي
يانجمه شوفي هواي لا لا خي
ياعذابي نايم لو واعي ويلي نايم لو واعي
ضليت مغمض واسمعهم طربت ويااهم جانت
لمه ماتنسي رجع جروها مواويل
تميم كملها بغنية
ارد ابچي بالعباس والطم بالحسين
وهذوله كلهم صاحو ايييي ابو التمم الله حيك
ضحك وكمل ارد ابچي بلعباس والطم بالحسين
وهمه يكملوها وياا
ما صابني من هواي بس دمعة العين
خية
خية
لوصي المار ما يقبل وصية
ولا اريدهم ولا اريد حنتهم علية
ويا دکة المحبوب دکة ياسريهمالي عتب وياك او يا نصيبي شمت بيّ اعداي ليش يا حبيبي
وضحك اسامه صاح يابويا
ثاري البنات اشكال شبه الچفافي
بيهن تخون الزاد بيهن توافي
لج خية
...خية
لوصي المار مايقبل وصيه
ولا ريدهم ولااريد جيتهم عليه
يادكة المحبوب دكه خزعليه
كلها تطرب من يمي كمت ادندن وياهم ابراهيم
وتمام الجو عجبهم واسامه وياهم
الكعده صارت حلوه ضحك وغنه وتميم متونس
جرها غنيه وره غنيه
تمام كله " غني موبدينه شلون صوووت عليك"
تميم يحب يغني مايتعب وبيده العود شرب
مي " ولكم صوتي راح "
ابراهيم "هنه سليمه مراد وناظم شغنيت "
ضحك هسه بس صيحو على وحده من البنات
سويلنه جاي وعدنه كرزات وكعك عدنه جعت
اسامه نزل يكللهن
رجع غنه مو بدينه اني هنا كمت اغني وياهم
حبيتها من تميم من كد مايغني بيها هوه يعشق
شي اسمه فؤاد سالم ماكو اغنية اله ماعده كاسيته
وكومه مطربين القدامه يسمعلهم
تمام شويه ويكوم يركص
وابراهيم مسلطن
ذاك المطبلجي طب كابله ويدك على الطبله
موبدينه نودع عيون الحبايب
موبدينه
والعشك لحضة عمر وتمر علينه
ويلي طعم المستحه على عيونكم
ويلي ويلي
ويلي شوكي يذوب بين ارموشكم
ويلي ويلي
و يلى طعم المستحه على عيونكم
ويلي ويلي
ويلي شوكي يذوب بين ارموشكم
ويلي ويلي
و ليلكم كمره وهوانا مسهرينه
موبدينه
مو بدينه نودع عيون الحبايب موبدينه
ايابه شلون اغنية صاارت كعده من العمر عمري
ماالتمينه هيج وكعدنه هاي الكعده ماتنسي
لنص اليل احنه ضلينه نشرب جاي وراها كرزنه
حب
مشت الايام رجعت تقدمت الوسن وخالتي قافله
ومبينه شغلة عناد
واني على نيت ناسي وراي حيايه غافل عن ناس
تحب تاكل بلحمي ايام واني خالتي ماعايفها حتى
ابو وسن حاجيته الرجال لا يحل ولا يربط
كلشي بيد خالتي
المعجبني تغيرة مية وثمانين درجه شني الكلبها عليه
بنزلتي الثانيه كااعد اصلح دراجة تمام واسمع
سندس تحاجي سناء يردن يشترن ملابس
ماهتميت ضليت غاط نفسي بلدهن والبلايسات
وغراض الدرجه فصختها
كمت شفت مابيها نفع اله مصلح طبيت اغسل
ولا كتني سندس تضحك نترت بيها " قرقوز كدامج
ضحكينه وياج "
" لا هيج مو يمك ميصير واحد يضحك بهذا البيت"
كتلها" اضحكي مو مكابلتني وتتبسمين " عفتها وطبيت جوه الدرج اغسل واباوع النفسي اليوم كل شغلي ناوشته التمام يكمل مهر
انقهر على حال اخوتي مابيهم المتمكن وشايل روحه غير تميم وهذا بس الروحه ومسواك البيت غير شي
ماينطي لو يحتركون حتى من تمام راد فلوس
ماانطا من عاتبته كال" بله اسكت ارغد بكد البغل يريد اشيل تعبي وانطي مايشتغل كاضيها خده وخدر اتهب بيهن الحلكه يجوز ويتفنكح على الجربايه
وبعدين متوازي على الزواج ارتب وضعي وازوج لو
دو.... بيه "
سكتت كلامه صحيح مامتوازي يزوج وهوه شغل مالاكي مااعرف هاي الناس انطتها على طوله شيوكل مرته حجار هم من تميم ومني منو ينطي مصرف البيت غيرنه
كملت تغسيل عدلت شعري طبيت للمطبخ جوعان فتحت الثلاجه طلعت طماطه وخيار
اذكرت فتوه واحد كالها الي مدري منين سامعها
حرام جمع بين الطماطه والخيار اعتبار بي شبها
ومثلوها على اعضاء الذكر والانثى وحرموها
رجعت ضحكت من اذكر الفتوه مالتهم اطك
من الضحك حتى عيوني دمع ضليت اثرم واتخيل
شلون تخيلوها الشياطين مناعيل الوالدين شجابها
على بالهم الخايس
كملت سويتلي لفتين وصعدت اكل زوجت ابراهيم
مخبوصا لاكتني على الدرج شايله ملابس
كتلها ولكمه بحلكي الوج بيها" شبيجن اليوم مخبوصات"
كالت" يااماتدري "
ارغد"شكو مادكولين"
كالت" غير خطوبة وسن "
وكفت اباوعلها هي حست على روحها فتحت عيونها تعتذر " يااا ارغد لا دكول ماتدري ودريت مني " ضربت غدها " عزه بعين امي لو ادري ولا احجي فدوه العينك "
شمرت الاكل من ايدي على الميز بلهول ونزلت صحت وين امي سناء وسندس بغرفهن طلعن " شكو شبيك"
صحت " امممممي ووووين"
كالت" طالعه هي وابويا للسوك"
يمي السله شمرتها طشرتها نايلون تكسرت
طلعت شايش وصلت للباب بطرك الفانيله والبرموده
رجعت بدلت ونزلت لاكاني تمام تعديته سمعت
زوجة ابراهيم تحاجي لحك عليه واني طالع جرني
دفعته" عووفني اليوم انعل شي الطلعو منه اميييي وييييين وين ولت "
تمام" طب فضحتنه " دفعني للبيت
سديم
يومين اماني متخبله على تحسين البيت داخل انذار
اريام بس صلي وتبجي امي مارجعت هي وابويا حسام يروح ويرجع يكول بس يتقيء وضعه متخربط
اماني ماتحملت ثاني يوم صعدت النعمه تحاجيها وذيج تنكر وتحلف مالها دخل
يومين عايشين على اعصابنه ثالث يوم طلعو فرشناله بلهول اماني من دخل مستشفى وهي كاضه قران وتقراله على بطل مي خابرت ريحانه مااعرف شعلمتها
وامها هم انطتها ادعيه خاصه وايات قرأنيه
بحيث نهار كامل اماتي ماتحركت على كد الصلا مكابله القرأن وتقره على المي من طلعو خلت حسام سبحه
شخلت الامبيثري عدنه صغير وبي رام شغلة قرأن
اول مره نشوف تحسين بهاي العصبيه صاااح طفووو
هنا اماني عرفت اخويا مشرب نعمه من فوك الفوك تجي تطمن اماني هي الزمت البيت
خلت اريام تطبخ وركبت التمن خلت بلمي مالته قبق من مي المقري عليه والمرك كذالك
تحسين راد مي هي ركضت دارتله من البطل وتنطي
وترجع اضيف على البطل مي وترسه
بلعدل سبوع اماني ملتزمه تحسين يوميه اشوفها تخابر ام ريحانه وريحانه ماادري شتكللها وتطبقهن وتنطيهن التحسين
مااطول اخر الاسبوع تحسين نكلب حاله رجع يتقيء
بس شي اصفر صافره مثل الكركم مخبوط بمي
ضل تحسين شهر وضعه موهلكد اماني تعبت وياا بس ماتاركته واريام وياها
نعمه اطب تطلع تستفز خواتي تعير اريام بطلاكها
غير تعيرها الاماني
يوم منهن اماني واكفه تمسح بلثلاجه ونعمه واكفه على الدرج اماني شافتها ورجعت تكمل تنضيف
نعمه " اييي هذا مقامجن "
اماني باوعتلها" غير نعرف بمرت اخونه جايفه ونضف جيفتها حظ اخويا المسكين طاحله مو مره مستنقع"
نعمه " اني الجايفه يابايره بيج حظ جان زوجتي ولفيتيلج زلمه حالج حاله البعمرج غيارات موووتن
بغيرتجن وجه الفكر "
اماني ضحكت" حبيبتي اني اخر همي ازوج شهادتي تسواج وهذا مقامج زواج وخلفه ومدكه للرجال اني
اعلى من هذا يله ولي نضفي غرفتج وطلعي جوه
الجربايه ميت فار بزون الله اعلم"
نعمه ماتحملت ضلت تهز برجلها هاي حركتها انحسها على كد عقلها " تموتن لان تحسين يحبني ويريدني
متردن هيج كبور تلفجن يابايارت معنسات موتن
موتن"
اماني غسلت الوصله وشرتها على حافت الكاونتر دارت عليها تمس ايديها بدشداشتها" بااعي ام عقلين وخليهن
بذانج الاحجيهن لو اريد ومزاجي كاعدلج اقنع تحسين
يقلعج يم خيست اهلج وهايشتكم وازوجه اغاتج
واجيبله النضيفه المعدله العطرها طيب من ينام
يمها مو انتي وسدة خشمها اوووي شلون متحملج
ماادري
ولج صابون ومي ابلاش شبيج امداج وهااا واحله منج هم وارتب منج بس الكاسر عيني هذا الطفل
وتحسين شلون يحبج ويريدج والله يركص بجفيه
بس اخويه يخاف الله واني مااريد اضلم هذا الولد"
نعمه خلت وصعدت تتكاتل واماني طبت تقره وعية
على خواتي كل وحده همها شكل كل وحده بيهن
مامرتاحه وعاشن المر وهنه شابات
اريام تتستر استر من السان نعمه ومعايرها اماني
رغم قوتها هم داخلها حزن مااعرف شنو نوعه
اشوفها دائماً تدعي نص اليل ومرات تبجي
داومت نفس معاناتي ويه كرم داخلي ماارغبه
نضراته وخجله لهفته بشوفتي يضايقني
الكل يعرف بمشاعر كرم الي رغم هواي طلاب
اشوف يردون يتقربون ناحيتي واصدهم
اليوم من دون الايام اجاني كرم طلب مني صوره
اخذناها بلابتدائيه يريد يطلع عليها صوره
كتله انطيها الك وترجعها هز راسه وراح ذكرة
ذاك اليوم بيوم الردنه ناخذ صوره
كرم صار وراي اجه ستار ودفعه واكو طالب ويانه
هم كرم يضوج منه ثلاثتهم تعاركو على المكان
المعلمه عرفتهم ليش يتعاركون صاحت بيهم
وكرم صار اخر شي خلته وستار بلنص
هذا اليوم ميروح من بالي ومااعرف راح يجي يوم
تنعاد بي هذيج الايام
.......يتبع
مرحبا
اعتذر عن عدم التزامي تعرفون اصابت والدي وكلنه مصابين الله يبعد عنكم كل مرض بنات نصيحه مني
شكد جنت مستهانه بلفايروس وعدي لاشي
من شفت وحسيت بي عرفة عظمتا الله ستر
والدي مااراح بيها كتلكم اشاهد بين اديه
احترزو ولا تطلعون دون كمامه وتباعد وتعقيم
ضروري واخذو مسحات
نرجع القصه احداثها هواي وجاي اشوف نفسي مااكدر اسيطر والقصه جاي تفقد احساسها بسبب
ضروفي وسردي صاير مو هلكد مامقتنعه ابد
القصه مو هذا استحقاقها
سيف الدين وراا احداث وفصول عظيمه
ارغد اكثر شخص راح يتعرض لعكوسات واحداث غير متوقعاا
سديم حياتها تبلش من السادس
ريحانه واعظم ماكتبت هااي الانسانه تستحق قصه وحدها من كميته المعلومات التملكا وانطتنياهن
تستحق كتابه اكثر واكثر دورها قليل لان ابطالنه هواي وحياتهم طويله ونهايات غير متوقعه
الاريده منكم تعذروني القصه راح اوقفه فتره معينه مو هواي بس نطلع من هاي الازمه وتعدي على خير
وارتب القصه وارجعلكم
مااطول فترة قليله وارجع اكملها
احبكم واخب تفهمكم واشكر البنات الدعلي واقره تعليق تعليق والمشاهدين بصمت هم احبهم
تعذروني لان والله العظيم القصه اكبر من هيج مااريد اضلمها
ان شاء الله بس ارتب اموري ونطيب اسوي بث بكروب ست مريم لان اغلبيتكم موجودين بي رغم شكد كتلكم كروبي موجود بحسابي دخلوله هواي امور تخص القصه افتح بث بي بس مع الاسف
محد بيكم دخل للكروب
اعتذر عن الاطاله
❤
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!