رواية بين الكاف و النون الفصل الثاني والعشرون 22 - بقلم saja altaie95

بين الكاف والنون (كن فيكون)

الثالث والعشرون

الكاتبه سجى الطائي

/////////////////////////////

آحن لـ گلبك المآحن ..
وآتلذذ بـ هجرك والوصل ويآك
وآذكرك .. وآبتسم !
والنوب آرد آحزن !!

ارغد

باوعت لسعاد دارت وجها اخذوها طببو خالتي لللستقبال غسلت ورجعتلهم الف حسبه وحسبه وجوهم مفزوعه عليها

ابو وسن" صار وياها وشكل عدها ضغط"

امي" ياخويه وحدها انه وياها كاعدين اذكرنه الموته ونقهرت طاحت علينه سوده عليه ماتحملت"

ابو وسن" شني جديده عليج وهيج تنقهرين عليهم صارلهم سنين راحو الرحمة الله شبعو موت زغير وهيج سوين بروحج"

امي" الله يرحمهم بعد تريد صير لا تلومها قابل بيدها هل اني صنين ومنين احن على بنتي وهي عمرها عشر سنين من راحت ومانسيتها"

سكت الرجال شويه وكالو نترخص جلبت بيهم مااقبل صاح على بته اجت وسن الوجه احمر عيونها منتفخه

عضيت شفتي بسنوني شجاني مالزمت روحي اني اتهور هيج سنين كدام عيني مادنيتلها

خالتي معتبرتني ابنها تالي خزيت روحي بهاي تسرعي الله ينعلك ياشيطان راحو وخالتي متباوع بوجهي بس طلعو ركضت على سعاد فايرر وامي وراي جرر بيه " رويغد هيد لا تفضحنه بين الناس وصواتكم طالعه عوفها"

ارغد" عاجبج السوي وين الله يحطج بيا قاع يحرك لشتج طلعيني من طوري شمسويلج ..... بيادين انتي اخت واتحاسب عليج"

اسامه دفعني شافني هاجم عليها" دوووخر شبيك مخبل انت "

ارغد" ولك امك من يامله من ياادين ياهوه صخم وجها وكلها انت مسلمه كافره يهوديه والله اشرف منها"

سعاد" اني فلا اضل هنا على هاي الاهاين بزر بطني كدام عيونكم بعد شويه ويجي يضربني وين عنه الوبيا تالي وكت انضرب"

" ويطبج عرج اليجي منيده الله يزيده "

صاح وسام " حدك هنااا اشوفك الزلم لا تتعده وانسه القرب "

وخرته" دولي عني لو احطها براسي وحك الله وحك كل لوعتي اطلع حليب امي من خشمها واحرم عليها تعتب باب البيت مو بعينك امك ماتنحمل"

طب ابراهيم من بره" هيووو هاي عليمن "

كعدت رجلي ترجف " شكوو يمه هذا شبي ويه سعاد عليمن تعوووين فهميني انتي "

امي كعدت تحجيله باوعلي " ماتخطبها اذا هيج كاتل روحك عليها ديج هراتي دكمز على اختك "

باوعتله" انطت مجال ابوها واخوها شدراهم بيها المن خابرتيهم "

تمسح بدموعها حية التبن" مو اني هذا اسامه كالهم على خالتي واجوي شفتني فاتنه بهذا عمري متستحي من وره مره سوي بيه هيج"

رفعت حواجبي " مسكينه سوده عليه "

سعاد" شوف حالك شلون كتلت نفسك بعدها مااجت "

امي " يمه انتي ليش تخلين راسج وراس هل بزر بكد ابنج وتعرفين طبعه مايتحمل عوفي اجاهلي اضل كل يوميه النه طنه ورنه "

ابراهيم " اطلبيها اله وفضيها "

امي " اشوف الوضع كدام عينك الايد كصيره والعين بصيره العرس مايرادله فلوس يايمه منين اجيبله ودراسته وروحاته البغداد البت ماتريد"

تميم فات شايل كارتونت بيض نزلها صاح يمه "جاي جاي"

كعد "اي لمت خير شبي وجهج"

سعاد" من المحنه هيج وجهي مورد "غطت وجها تبجي

كالي" شبيها ام اسامه"

اسامه" هيج خالي سالفه بينها وبين ارغد"

تميم" هذا الاغبر شغلاته عوجه شمسوي"

ابراهيم " كافي عاد بعد مااريدك تتعده على اختك سعاد بمقام امك ربتنه على ايدها من صرت انت جانت مزوجه متعرف مقامها ماعاشرتها كدنه "

امي" يمه عيب اختك جبيره تهينها على اي شي ماصايره واذا خابرت زوج خالتها ابل تريد اضرك هاي المره سكتتلك مرة لاخ لا بمه ازعل عليك زعل ثكيل "

تميم " غير افهم الداير هنا شبيها سعاد وارغد"

عفتهم وصعدت صاح ابراهيم تعال انزل على اختك حبها وصالحها مارديت عليه كملت طريقي روحي بخشمي اول مره هيج انفعل عليها جبت عمري اعدي واكول اكبر منك ومره جبيره وصلت حدها الفقير ينوكل يمهم

ريحانه

ايام وتمت خطبت رضا من تكتم والفرحه دخلت البيتنه وامي طايره بيها وخالتي سوت خطوبها مصايره الناس حصره عليها العيشه وهي هبر لحم ودجاج وعازمه عيالها وبيت جدي وحمواتها البيت نترس وجان وكتها نهابة السنه الجو حلو بي نسمة بروده

رضا وتكتم عصافير مندمجين ناسين وجودنه شكد هوسن البنات وركصن جرني بنصهن خجلت شكد اكره روحي من اشوفهن عادي يهوسن يهزن كدام الكل بس اني الخجل طاغي عليه احس روحي صفر كدامهن

كل البنات يركصن وهوه عرس اخوي واني ميته مستحه درت وجهي وفتت للمطبخ الهي روحي باي شي كعدت امسح بصواني المهر مالاتنه جبناعن من البيت

مر شهر على الخطبه اسابيع وابلش دوام مرحله ثانيه ماعدي اي لهفه للجامعه حالها كحال المدرسه امي من هسه بدت سوي سلف تلم لزواج رضا وحيدها ماعدها غيره رجع للنجف اخر سنه ويعطل والدي طلب منه يكمل الماجستير ويتعين استاذ وهذا هدف رضا

كمت فتحت خانت الكتب اذكرت كتاب مصغر كتيب كان عباره عن مجمع مال ادعيه قديم ممزق الاوراق الاماميه والخلفيه ضال جزء بسيط تابع للامام العسكري عليه افضل السلام بفترت العباسيين كتبه احد تابيعيه وانفقد بمرور السنين كدرو يحصلو واحد الساده العلويين بزن النضام

اعاد صياغته الكتاب ونشره كان من ضمن مكتبت جدي بمرور الايام والبعثين اعتقلو جدي وعمامي وحركو مكتبت البيت اذكر الحادث للان بالي شلون داسو على الكتب

ومن ضمن الكتب النحركت هذا الكتاب فقدت عنوانه كانت حوارات بين الامام الحسن والامام علي مجادله لطيفه احب اعيدها لمن الامام الحسن يطلب من ابيه وصف الكون

تمنيت الكه تكملت الحديث بحثت بكل مكتبت والدي مالكيته

رجعت كلشي المكانه طاحت حلقه تراجي خفق كلبي شمرتها سحبت نفس مااريد اذكر كافي تعب وحصره

ايام وابويا كال نروح للنجف قبل دوامج عده ندوه وقرر ياخذنه كيفت حضرت نفسي ثاني يوم طلعنه طريق خطر اباوع الصبات بلطرق النجف مهجوره بسبب المحتل صور لشهداء الانتفاضه

شهداء المقاومه كل شهيد نمر منه والدي يتنهد بقهر شبابهم ضاع بلد محارب على مر الازمان

وصلنه لليل قررنه نزور حمزه ورضا وبيبي ونرجس ومعصومه راحن ويانه هم داخلي يعيد نفسه صارت القبه امامي وكفت سحبت نفسي عن الطريق التفت رضا اشرته براسي هنا اضل عيوني مدمعه اريد اختلي بنروحي

غمضت نزلن قطرات الدمع ياوسيلة الله في الارض ياحبيبي يامولاي يوم الستنجدت بيك ماعفتني لزمتني من ايدي ودليتني على الطريق شفتك باب الفرج كلي ذنوب اغثني ياغياث المستغيضين

نسيني الماضي مااكدر اعيش والكابوس محاوطني واعدتك امشي على منهجك اقتدي ببنتك الحوراء زينب الكبرى بحقها عليك بدمعتها بسبيها لا تعوفني كمت اناشغ والله يامولاي جاي اموت على البطيء وساوست ابليس يحاولون يقيدوني اصرفهم عني عيني ياعلي اغثني ياعلي ادركني ياعلي انت باب الله واني جايه داكه بابك

كعدت غطيت وجهي كلي فده ونذر لترابك ماانسه معجزتك احاطتني بذاك اليوم ونقذتني لا تعوفني سيدي لا تعوف حفيدتك ضليت ابجي واباوع للكبه نرجس كاعده بصفي تعرف الصارلي حضنتني

نرجس" حبيبتي مسحي عيونج انتي طيبه وعلى نيتج لا تاذين روحج راح وله للدرك الاسفل من جهنم جدو يكول هاي رابع مره يزوج وميكدر ياخذها انفضح "

بجيت" حطمتي دمر نفسيتي "

نرجس" وكلي الله وحبوتج ماعافته شوفي حاله وجه اسود بين الناس ومحد يعتبره ويقدره كل شخصيه مااله"

ريحانه" لو منتهك عرضي بذاك اليوم هسه اني شنو حالي بينكم والله الموت اهولي "

نرجس" لا تحجين وتذكرين عوفي انتي معجزه الولد فجئه عجز وماكدر يسويلج شي احمدي الله واشكري امه لحد قبل سنه اجت البيبي تريد تجيج وطيح عليج تبرين ابنها"

دنكت امسح بعيوني" مااكدر اني مو غليظة القلب ولا جاحده الله يسامحنه على كل ذنوبه بس اني انسان داخلي وجع ماانسا نرجس شفتيني صار بيه"

نرجس" لا سامحي عوفي يجازه ويه ربه بس ريحي نفسج ذبي همج لا تاكلين بروحج"

طبينه للامام زرت ودعيتله من كلبي يهدي وينور طريقه بطريق الحجه ويجعله من الصالحين حسيت بضيق مجربه هذا الدعاء والصلا

من دعا بهذا الدعاء اصابه الفرج عن ابي حمزة الثمالي قال سمعت الامام السجاد زين العابدين (عليه السلام) يقول لابنه يابني من اصابه منكم مصيبة او نزلت به نازل فليتوضأ وليسبغ الوضوء ثم يصلي ركعتين او اربع ركعات ثم يقول في اخرهن

( يا موضع كل شكوى ويا سامع كل نجوى ويا شاهد كل ملأ ويا عالم كل خفية ويا دافع ما يشاء من بلية يا خليل ابراهيم ويانجي موسى ويا مصطفي محمد (صلى اللله عليه واله وسلم) ادعوك دعاء من اشتدت فاقته وضعفت قوته وقلت حيلته دعاء الغريب والغريق الفقير الذي لايجد لكشف ماهو فيه الا انت يا ارحم الراحمين لا اله الا انت سبحانك اني كنت من الظالمين) كملت داخل ضريح

اللهم صل على محمد وال محم

طلعت صلية صلاة الزياره وركعتان لوجه الله من بجيت ارتاحيت طلعنه افترينه اشتريت كم قطعة قماش اماني تخيطهن الي

الناس تفتر الشوارع ممليه الاجواء حلوه حسيت نعيق حمار وسط السوك وليل وين اكو

خفت ركضت لمي تكرر الصوت اتلفت ماكو همست النرجس ومعصومه صمعن صوت مطي

ضحكت وين اكو مطي كاعد هسه وهنا بنص السوك

اتلفتت ماكو كملت مشي الصوت رجع بغير طريقه صوت حيوانات رضا مسافه من يمنه فات شخص من يمنه وجه انسان رجلين ماعز

هنااا اني خرطت العافيه عطت من الخوف سديت عيوني حضنتني امي سمي جرتني يم المحل ارجف رضا والبنات التمو يمي

رضا " ريحانه شبيج "

ضليت ادور بعيوني ماكو اباوع للناس اليمنه يباوعولي مستغربين وينه كتله" شفت واحد رجليه رجلين حيوان"

دار وجها يباوع " ماكو يتهيألج وين انسان برجلين حيوان وين شفتي "

اشرتله "هنا هنا فات من يمك"

رضا" يمه هاي خاف نرفع عنها الغشاء "

امي" لايمه وينها وين هاي المرحله يجوز متوهمه"

بجيت " والله شفته مصدكوني "

رضا " لا حول الله ريحانه تعرفين اليشوفون الانسان على حقيقته بذنوبه هذا ياهوه بس الواصله مرحله متقدمه وتدريب روحي وترويض يعني اقل مايكون اربعين يوم ترويض النفس بلجوع والعباده وابتعاد عن كل لهو الحياة "

سكتت اذا احجي ياخذون نضره عليه مخبله واتخيل وادخل بتحقيق من والدي ادري بي يصدكني مااريد اشوف هاي الامور تخوف دخيلك ياربي كمت اخاف اباوع بوجوه الناس ولا بلكاع

لحد مارجعنه للكوت الخوف مسيطر عليه عايشه برعب بس وصلت للبيت ركضت توضيت وصليت دعيت بس هذا الشي ينشال مني مااريد اشوف شي والدي وره ايام عرف من ماما وكعدني حجيتله الصار كام يصلي على النبي واني ميته خوف مااريد شي بس اعيش مثل البنات مااريد اشوف شي

ايام مرت داومت والخط نفسه اماني وياي وهاي حالها امر من حالي عائلتها وضعهم مدهور اختها رجلها شامرها وماسأل عنها

شهر ورضا نصب الغرفه صاج عراقي شكد حلوه اخذو القاط الفوك بابا رممه وبيضه وجاب صباغ صبغ البيت كله العرس صار بسرعه بسرعه كلشي جهز امي راحت هي ورضا هم يشوف خطيبته وينطيها فلوس النيشان

حددو موعد العرس بداية السنه 2006 بلضبط نهار خميس الحنه الاربعاء وكتها الرادود.....الاسدي
بدت قصائده تنزل كاسيتات واقراص سيدي جابه وجماعة رضا بلنجف حضرو

حديقة بيتنه الاماميه والشارع انترس مواليد وجكليت والصفكات عشنه اجواء جنن بنات خالي يمنه قبل سبوع اجوي نرجس ومعصومه وسكينه ورقيه الكل حضر ويايه متونسات على صوت الرادود

ثاني يوم حضرته للزفه العروس اجت بيت عمي علمود تطلع من بيته الزفه من الحمزه للكوت مسافه بعيده وتتعب وطريق خطر

ايام العرس والمه حلوه فرحت خالتي ماضلت ثاني يوم رجعت وخالاتي وبيت جدي ماضلو

انضاف ضيف جديد للعائله مكيفه بيها خالتي خديجه شكد بجت من شافتني ابتسمت " هااي اجتج اخت تتونسن سوه ويه بعض "

كنت متستمره على نضام تهذيب النفس والتخلص من الذنوب صوم ثنين وخميس من كل اسبوع تدريب يخلي الانسان يسيطر على وساوس الشيطان وتخلص من ذنوب

داومت نزلت اخذ ملازم الاستاذ يتركها بلمكتبه واحنه نستنسخها اخذت وحده رجعت للقاعه الاستاذ داخل دكيت الباب باوعلي

"اكو علم عدكم المحاضره الثانيه والثالثه اليدخل وره الاستاذ ينطرد"

واحد من الطلاب كله" والي يصير عده طارء"

الاستاذ" ليدخل "

طالب " استاذ مشيها حتى بعدك ماامحاضر "

الاستاذ" عبد كاعد بكوفي وامشيها التفتلي روحي بنتي للمقرر جيبي ورقه "

دنكت صعدت للمقرر دكيت الباب يمه ولد شاب ورجال كال" دخلي هااا بابا شعدج "

"دكتور اتاخرت بمكتبته استنسخ والاستاذ رفض يدخلني "

مقرر" مرفوض بنتي كم مره نبهنه عليكم مسموحلكم بلمحاضره الاوله وراها يصير تسيب مو"

هزيت راسي مدنكه " بعد لتتاخرين انتبهي الدروسج الفره متفيدج ضيعن محاضره معناها مثل العميه تفتهمين من تقرين "فد انقهرت من رزلني وماصدك بيه

" اسمج الكامل"

"ريحانه محمد جبار "

سجل اسمي وختم الورقه اخذتها ونطيتها للاستاذ دخلت ميته خجل مشت بيه الايام كاعده انقل المسائل الشرح من الصبوره الذكيه الاستاذ موجود الخلص طلع ضليت اني وكم بنيه

دخل ولد سلم على الاستاذ عرف نفسه وبين بينهم معرفه من انطا اسمه واسم والده

ضليت انقل رفعت راسي هذا نفس الولد من شفته يم المقرر كمت انفتحت طباقت العبايه سديتها لميت جنطتي ضميت الاقلام مشيت يم بنيه وياي كلت اماشيها على كد الاكل

نزلنه شربت عصير ولفه كملت طلعنه نغسل حسيت بزه بخاصرتي طبيت للحمام غسلت نص ساعه والوجع يزيد البنيه وياي حست على جهي

كعدت بلقاعه يمكن ثكلت بلاكل هذا الاكلي المعتاد دخلنه محاضره ماطولت دقايق والالم زاد سديت حلكي بيدي خليت راسي على الستول البنات الكدامي شافني اشرن للاستاذ

ماكدرت احجي شي شكد حاجوني اني اتلوه طلعوني بره التمن عليه متت من الوجع صفحتي مثل السجاجين تطعن بيه العرك يصب من وجهي

عضيت عباتي غمضت عيوني اسمع صوت البنات والاساتذه فتحت عيوني مقرر ولد همست " فدوه بطني راح اموت"

البنيه شاورتني " العاده جايتج لو موعدها"

هزيت راسي " لا مو وكتها"

المقرر حاجه البنات " ثنين يجن وياها وثنين يكملن محاضرتهن "

كوه نزلوني اشرت للبنات وياي خابرو بابا من الالم فقدت بعد

حسيت بضوه بعيوني واصوات واحد يسلم "اي سيد اني ابنه "

سيد محمد" شبيها الصبح طلعت مابيها شي "

"لتخاف زائده مخزنه والحمدالله طلعت سالمه"

سيف الدين

الرجال باوعلي بي شبه من امي " تفضل بيش اخدمك"

سيف" حجي ماعرفتني "

الرجال" لا صغرن بيك منو "

"سيف الدين رياض رميض امي ع..... اختك"

عاينلي يتفحص شكلي ابتسم " اهلاً وسهلاً ابني زارتنه البركه تفضل " فتحلي الباب طبيت تارسني امل ضليت واكف بلممر سد الباب " طب بابا تعال "

دخلت ورا الشقه مرتبه مفروشه اثاثها هادء البنت الفتحتلي الباب واكفه بلمطبخ شافتني

الرجال" هاي هيج ع.... عدها رجال جبير زلمه امك شلونها اخبار جدك وابوك "

جنه مايدري بختفائي "جيتي الك علمودهم "

الرجال"خير ان شاء الله بلاول نضيفك جوان جدوو كهوه حبيبتي "

ردت عليه" انت ماتوب ياجدو هسه تصير مريز"
باوعلها بحنيه وهيه تمسح الكوب بلوصله

"للرجال بنتي يشرب وحده ميصير"

هزت راسها "انت عنيد "

الرجال"اي ابني كمل شبيها امك "

كعدت سولفتله بشكل مختصر وشلون جاي ادور عليهم وصارلي 14 سنه فاقدهم

الرجال"زين ماحاولت بلنفوس التركيا الاجئين عدهم سفاره واسمائم مدونه مطارات العراق نجف بغداد محاولت شوفهن "

سيف"ماعدي اي معلومه سفرهم عن طريق الطيران بذاك الوقت مكان اكو والسفارات ماعدي ضمان وجودهم هناك اقرب احتمال الي تركيا سوريا الاردن "

الرجل" يمكن بعدهم بلعراق مطالعين مغيرين محافظتهم "

سيف"جدي بفترة شهر صفه كل املاكه اقرب احتمال هنا انت وخالاتي ماعدهم غير مكان "

ابتسم"تدري اني خالها مو اخوها لمك"

عكدت حواجبي"يعني شنو"

الرجل "بيبيتك الله يرحمها سمت خالك على اسمي واسم جدك نفس اسم ابويا لهذا عبالك اني اخو امك واني خالها قبل شهرين رجعت للعراق استقريت بانطاليا "

نفخت بقهر "كنت بلنسبه اليه خيط نجاة عسى الكاهم "

الرجل"لا تأيس من سنة الثمانين تركت العراق بسبب النظام بعمر السطعش اخذت بيبيتك جدك توفه من زمان ضلت بس هي وخالاتك وحده بفرنسا وحده بتركيا والبقيه طشرن وخوالك هم
ماتت نهاية التسعين جانت تبجي على شوفة بناتها ولدها من ماتت نقطعة صلة التواصل بينهم

ارقامهم متغيره ماخليت احد عرف ماسألته هاي احجيلك بسنة التسعينات سنين مرات قهرتني ماصورت امك تنفجع بيك شيخ رميض انسان قوي ماصورت بشهر يعوفك وياخذ اهلك ويعوفك"

سيف"ماادري هذا المدوخني انه جنت اقرب شي اله من الاحفاد ليش ماتدورو انه وره شهر صحيت من الغيبوه انطيتهم اسمي الكامل وراح الشيخ جليل مالكاهم حتى عمامي شاردين "

الرجل "لا اله الا الله الله يكون بعونك "

طبت حفيدته بيدها صينية الكهوه قدمت وكعدت مقابيلنه ليش اليطلع للخارج البعض ينسه قيمه وعاداته هل المجتمع هوه سبب لو انفسنه السبب حفيدته كانت شبه عاريه كيمونه وشورت كابوي ومنا بيضه الشعر محلول الوجه صبابه هذا ميخاف عليه من النفوس الضعيفه يطمعون بيها

دنكت استغفر داخلي كان الي امل اتبعثر امامه انطيته رقمي اخذت رقمه حفظته شكرت منه ورجعت

هاي وحده من عشرات المحاولات ماأيس ضلت جمره وتاكل بكلبي اختفائهم الف حسبه وحسبه مرات اكول ميتين مقتولين

نزلت للدوام ثاني يوم اجانه امر نتوجه البغداد اطرافها القوات الاحتلات ومواجهات هنا الوضع يخوف وجود قوات الامريكيا كانت وجودها ليش فقط التحررمن النضام كانت غايتهم نهب البلد احلال بنضامه الاقتصادي زرع الفوضه

وبلفعل نجحت اندرج اسم من اكبر ارهابيه المرو مصعب زرقاوي الذبح على الهويا دخول ارهابيين من اراضي السوريه وذبح العراقيين بحديد التنكه واليجيب الراس ينطو عشره الف دينار عراقي

انهاريت وقتها من شفت الرجال مشمور وراسه مفصول عن جسمه

دخل العراق بنضام سياسي مجهول احتلال الامريكي الحروب الاهليه الذبح في الشوارع دخول جماعات ارهابيه من اربع محاور ايران تركيا سوريا سعوديه

مثل فريسه وسط ضباع الشفته شيبني على صغر تنصيب نوري المالكي والا نتخابات كانت نوع من انواع الفرج للشارع العراقي الكل طلع وانتخب وصل عدد الناخبين ثمانية مليوم ناخب عراقي

الامر التلقينا انفجار بمدينة الصدر راح ضحيتها 200 شخص سال بحر من الدم وتوالتها تفجيرات في مختلف بقاع المحافضه

انزل للبيت تتلكاني الحجيه تونون عليه وعلى زياد " يمه شسويلج بيدي اكعد واكابلج حرمه اني شعليه واذا داومت هاي مهنتي اكعد اخبز للعالم لو زياد شنسوي "

امي الحجيه" ولك يمه تضحك عليه وكلبك بارد شكل الكلبي يضل يمكم يامن يردهم من الدوام عوفه خلي يولي هذا بستان ابوك وعيش بي ماتموت من الجوع "

سيف" اي واكعد ازرعلج طماطه وخيار وفجل صدك جذب حجيه بزر انه وتخافين عليه وعلى زياد هذا صارله سنين بلمهنه ذاك هوه مايموت لا تخافين "

امي الحجيه" والله انت لسانك متبري منك اكله اخافن عليك كلبي يلعب "

سيف" كعدي "

امي الحجيه " والله انك ماتخجل وتضحك عليه دمشي موصوجك صوج كلبي "

جريتها حضنتها ابوس كلبج اني شعدي غيرج يمه وادري بيج تخافين وبالج يمنه اطماني مكاني امان وزياد مكانه هم ماعلينه شي بس انتي لا تنسينه بلدعاء والله الحافظ انتي مو دكولين محد يموت غير بيومه وهاي انه عايش مامتت "

امي الحجيه " اسمله عليك عيوني يومي كبل يومك وعساها بعدوينك "

نزل زياد التمينه الحجي كال لازم نرجع معمل الاسفلت بلبصره على طريق البطحه استلمو
الامريكان بعد الاحتلال استلمو المعمل البرطانين
نهب

يومين وراح زياد ويا الشيخ البيت فارغ زوجت زياد راحت لهلها بلكوت واني والحجيه ضلينه راس على راس بيوم منهن كاعد اكلب بلقنوات امي نايمه بغرفتها

نفتح باب المطبخ لي صوت فاتت الما سحبت نفس
" شجابج "

الما" كلبي الجابني "

سيف" روحي لشوفج الحجيه "

ذبت روحها كدام رجليه "اسمعني بعزيز كلبك ادري امي الحجيه بغلات روحك اسمعني بجت والله اليل مانامنه اهجيس روحي تطلع من مكانها مامرتاحه
والدنيا تكولبت عليه سيف انه غزال بين اسود
تناهشوني مناهش ماجتي بت اخوهم ولا جن
انه مره ضعيفه مااكدر عليهم "

سيف"شني الجد الجديد ماله فايده كلامج بعد صرتي على اسم رجال وحرام عليج لا تنزلين روحج
لجل شي صار من الماضي "

عيونها عشرها عشره كوه مقاوم روحي وكاعد واشوفها تكاتل بروحها من للحركه" لا تعايرني يسيف انت ادره بلبير وغطا وانت شاهد على عمايلهم بيه مااشايف شسوومن سمعو بيك طالبني لو ابويه الشيخ من طلبني منهم طلعت ايدها هاك شوف اثار الضرب والتجوي "

لزمت روحي اعصابي فارت نترت بين سنوني " لو جايه وحاجيه لو كايله لبوي لو مطيتني خبر زياد فرات موجودين وهمه حسبت اخوتج ولد خالج ليش ماطلبتيهم انه خلني اولي عذرج اقبح من فعلج "

كمت منتفض منها عاينت لدموعها بذاك الوكت دموعج تحركني حرك لو شفتهن نازلات هسه مالي حك بشي ضيعتي حكي وحك سنين المناطر

تذكرين من كلتي خليك جبير بعيني ولا تنزل من عين الشيخ وانه محترم هاي كلمتج مادنيتلج بلحرام ولا عاينتلج بعين الشيطان والشهوه خليتج بجام وسديت عيوني منج

انه اخاف من العاقبه البيه مايحملها احد وانه من صغري حملت الهم وضميت بكلبي اكولن يجي يوم
واجازه على تعبي انه زلمه مو مرله واجي اكلج تعاي خلي نهرب وانهبج

ولا اكلج ارفضي وانه الكاعد رحت لعد عمامج واحد واحد وره الشيخ وطلبتج منهم مطاحن صرت وياهم
وبيوم اجيت وشفت ملجتج صح اجيت اطب للبيت واخربها من راجعت نفسي صدك اصغر روحي بفعلتي

اليجي من ربج خير وبركه ان جان صرتي نصيبه فهذا حك تعبي والله جازاني بيج

وان جان مالي نصيب بي فروحي مهنايه والله يسعدج ولا دكولين هيج تحجي معناها ماتحبني
بس الله اليعلم البكلبي الج وحده شاهد على حركاني
دمي هذا شيبي منج بس مابيدي حكم

مااعارض حكم ربج ولا اوكف بوجها لجل رغباتي
كومي ردي للبيت ولا تعيديها ارضي بنصيبج وادعي
البي صالح يتممه والمابي صالح منها وتفض

عفتها تناشخ شلعت روحي بدموعها شكد مااقسه
واتلوع تبقه نارها تسعر بروحي بيومها للصبح مانمت
من الصبح خابرت عمي جاسب ابو حميد عينه على الحجيه طالع للصندوق اسراري

......يتبع