رواية بين الكاف و النون الفصل الحادي والعشرون 21 - بقلم saja altaie95

بين الكاف والنون (كن فيكون )

الثاني والعشرون

الكاتبه سجى الطائي

/////////////////////////////

تعال بحلم... ,
أحسبها إلك جيّه واكَولن جيت
يلي شوفتك شبّاج للقاسم...
ودخول السنة من الكَاك
يا فيّ النبع واطعم....
عطش صبّير ولا فركاك
يلرهميت...
يا مفتاح فضة ولا رهم غيرك عليّ مفتاح
أجرت لك مخدتي وانطر الشبّاج اليجيبك
وانت عرس الليل والقدّاح
يا هلبت تجي وترتاح؟؟
طركَــ المسج والنوم......
طركَــ المسج والنوم
عمر واتعده التلاثين... لا يفلان
عمر واتعدّه واتعديت
ولا نوبة عذر ودّيت

سديم

اماني " ممرتاحه لهاي الحيه مأثر جيته مو خاليه اكلج يمه هي مو كل مره دكول تحسين يدري وهو سامحله تطلع "

امي " اندري يايمه هاي مصكوعة الجلوه تكللنه يدري وهسه طلع النوب مايدري واحنه ضالين باغافلين الكم الله"

اريام" زين هوه ماايحس عليها من تطلع من طب شلون تغافله"

امي " هوه من يطلع للشغل يرد ةره الغده تغدي ويصعد ينام يذب روحه جتيل مايحس بيها وهي تستغل تعبه تروح يمهن الضهريه ساعه وترجع مااعرف اليوم شدرا بيها"

اماني" اني شفته نزل يدورها كتله يم بيت عمي ضل مخنزر وكعد تحقيق وياي اني هم ماجذبت عليه خرطتله الاكو والماكو"

اريام" هي ليش هيج تتعامل ويانه يعني تدري بينه مو صلح ويه بيت عمي راحت صادقتهن وتدري نسوان عمامي ميردنه تروح طب عليهم وبيناتهن واجبات وحده تجيب الوحده هااي شنو غايتها"

اماني" كل السوي ضدنه جكاره بينه وبربى عرفت هي ورا سالفة الذهب وهي النبهتنه عليها وعلى نيشانها"

امي" اختج هم السانها شطوله تجي طلعها من الطهاره على غرفتها وعلى نفسها شوفيها حامل ومبينه هي ذبتها هيج النضيف نضيف تجين تحشين براس تحسين وهذا منا ماطايقها يرجع يكوم عليها"

اريام" يمه فدوه مااشفتيها من خطبتيها ماباوعتي لبيتهم وين لكيتوها"

امي" ياطلابة نعمه يمه اني وين اعرفها غير عمج نعيم وابوج وبيبيتج يعرفون ابوها وطلبوها حتى من رحت شفتها ماقبلت اجيت ابوج كاتله كال تاخذيها اله وسكتين تردين تفشليني ويه ابوها بعد طلبناها منه "

اريام" حبوتنه مااتتعده عمامي وعساها بناتهم ويشوفون الشفنا ويضوكون لوعتنه"

اماني " ابوج حطمنا بتدخل اخوانه وبيبي ماخلونه شخصيه حتى تحسين الي رفض يزوج وحده من بناتهم دبروله هاي هم وكاحه ومستفزه وهم مذرعه وشوفين اخوج طايح بيها"

امي "  الله كفيلهم "

مره اليوم عادي نزل تحسين كالب خلقته
مشت الايام مثل سابقتها

اماني بلشت تسوي نفانيف واريام تعاونها وهاي ضاله لاحس ولا خبر من زوجها منهد الكتله الاكله من اخوتي ودو عليه عمامي شارد

ونعمه شاده كورها وياها كاعدين نغسل بلبطاطين الشتويه بطشوته كبار امي مشتريتهن وحاطتهن بلمخزن وكت الغسل نطلعهن

وكفت اكمز عليهن وامي تصيح لا زفين الطشت العرمه ولج سديمه واني مااسمع واضحك واريام كبالي رافعه دشداشتها موزره بيها وتجلف بلبطانيه العدها

ابن اريام يمنه يلعب بوغف التايت اليطلع ويسوي طوبه وينفخه يموت صحك فدوه العينه

امي تكلم باميه واماني تعزل بغرفتها نعمه واكف باب المطبخ البراني مجتفه ايديها

من ازوجت لليوم مكعدت ويانه وسولفت مالها دخل بينه لو نذابح متمد ايدها اول زواجها جان تحسين يوصينه كعدن وياها علمنها شلون سولف وتحجي ماكو خرسه

بمرور الايام عرفنه على مثل امي من السكوتي موتي ومن المطكطك فوتي

وهي سكوتيه بس موفقيره وكانت تتعمد تبتعد من يمنه لحد مااصادقة بنات عمي وهي انكلبت كلش مطيق شوف خلقتنه

ماضل على حملها شهر وجيب كملنه لليل سوينه عشه وتعشينه

الكهرباء طفت كمنه فرشنه تحسين ومرته ماعدهم صوبه

صاحت "تعالي يمه صعديه لبيت خوج ماعدهم خطيه يثلجون غرفتهم بارده"

اخذتها الصوبه  صعدتها وصلت للبيتونه ماعدنه هي بس بيتونه وغرفة تحسين

البيتونه متروسه غراض بيتنه وبوفيه امي تخلي عليها فراش الخطار دكبت الباب

صاحت" فوتي "

فتت انطبتها الصوبه تحسين يباوع تلفزون مدد ابتسم " تعالي حبيبتي "

اجيت يمه جر المجر طلع جيس كرزات " هاج حصتج"

اخذتها منه " صرتي بالعداديه موو"

"اي"

تحسين" شوكت كبرتي هلكد ذاك اليوم اطلعج وياي"

سديم" تذكر من جنت ابجي اذا طلعت الجماعتك ومااخذتني"

" اي اذكر وضلين تعوين وتعال تحسين شيلها ورضيها "

سديم"هههه مره شلتني وسويتها عليك"

تحسين" ام خ.... خرب يومج لعبتي روحي ستوهم مسبحيج وما محفضيج اذكر يلبسوج لباس نايلون ماحصرتج اله عله متني "

خربت ضحك " ههههه مسولفلي تلعب روحي انت شلون تحملت"

تحسين يضحك" جنتي مدللتنه اني واماني واريام كبل لا تزوج ماتنزلين للكاع وحسام حتى من انتي نايمه يشيلج ويبوسج ويتعمد يكعدج "

مرات اماني دكلي شكد احاول مااشيل ذنب نعمه بس تصرفاتها تجبرنه

مر شهر اليوم كعدنه على عياط نعمه تطلك تحسين بلشغل وهي من البارحه عده تشلعات ضلينه وياها امي طببتها للحمام حمتلها مي دافي يرخي اعصابها وصدك شويه ارتاحت ضلت تدهنلها لحدما اجه تحسين وابويا وياهم امي واربام اخذوها لمستشفى صدام

بلمركز يوم كامل محد بيهم اجه اماني استلمت الطبخ سوت مركت حمص على معجون ودهن مرات اشم ريحت الحم من بيت عمي

وابويا بلشهر مره يجيب وكل واحد اله وزرة لحم لكمه وحده مرات امي تثرمه وسوي كبه

لليل لمتنه اماني حسام واني وابن اريام اكلنه وكمت ويا اماني نضفت المطبخ حسام كال رايحلهم اشوف الوضع تأخرو

ساعه وندك الباب طلعت فتحته اريام وحسام
طبو ركضت سألتها " هاااا جابت "

ذبت عباتها لفتها وشمرتها كعدت مددت تعبانه كالت " جابت الحوبه "

اماني " الحمدالله ولد مثل ماطلعلها بلسونار"

اريام" اي الحمدالله ولد"

اماني " الف الحمد والشكر ليش تاخرتو مارجعتو وبالنه ضل يمكم "

اريام" ولج كارثه اماني امي منين لفتها الهاي وطاحت طركاعه على راس اخوج ولج تخزينه وتعزينه بين الممرضات والدكتوره طلعتلنه كاشه روحها كوه قبلت جيبها"

اني واماني وحده تباوع لوحده تربعنه كدامها مشدوهين البال نريد نعرف ردت اماني " شبيها نعمه شمسويه ومتفبل الدكتوره جيبها "

اريام تحجي وتنزع بجواريبها " اني تورجت عليها بس ماامرقبتها مالي دخل انتن هنا عايشات وياها وتعرفن كل شكد تسبح"

اماني " ماادري بس هي بلسبوع مره تبدل دشداشتها"

اريام" وجسمها ونضافته "

اماني " لا مسوي مره بظاية زواجها تحسين تعارك وياها وكال علمنها بيومها اني وماما تكابلنه عليها وكنالها هيج سوي وهيج حطي وبعد ماادخلنه بيها"

اريام " ادري من قلت المي قلت الصابون شبيها شبيها شلون اخوجن متحملها وجارعها "

اماني " تره تحسين ماله دخل بيها حتى ميتقرب منها مره سمعته يشكي لمي وعايفها لعبانه روحه"

اريام" حياره بس شلون تغيضنه ماتكعد شوف نفسها ترتب روحها تسبح تنضف نفسها تعطر وحها والله سوتنه هلكدوتنه من طلعت الدكتوره تحجي وترزل وتحسين سمعها لو اشتعل للستار كوه لزم روحه ماكو شيره ماكو مز.... ولجن ريحتها طر اليافوخ استغفرالله ربي عمري بحياتي مراح اشوف مثلها"

اماني " هسه شنو جيبتها"

اريام" اي جابت "

ارغد

كملت المرحله الثاني نجحت الولد استلمولي النتيجه سويت برائة ذمه وانطيتهم همه يستلموها

رجعت لهلي بلشت شغل ويه تميم الصبح يطلع عماله اني الزم المحل للعصر هوه يستلمه لليل

نهاية 2005 وضع البلد فوضوي القتل والثارات بدت من سقوط النضام البعثيه شردو والبيهم نسجن والي نكتل على ايد الشعب الثائر

كلها انتفضت بلمقامل مال العام نهدر المباني الحكومي انسرقت والي احترك شي اشبه بلكارثه عمت على البلد لحقتها هاي السنين

الامريكان منتشرين بكل مكان بدت تجمعات لمحاربت المحتل حسب مااداوله شارع الشعب العراقي

هنا طلعت تنضيمات ضد القاعده الي اطلقوها على الامريكان سموها بلجيش المهدي انخبط بيها الحابل والنابل صارت تجمعات

صارت حرب اشبه بحرب الشوارع ايام شفتهم لعبوني ملثمين وبين البيوت يحملون اسلحه يتصيدو فرص لمهاجمت الرتل الامريكي

صارت اعتقالات كل مشتبه بي بيوم ضهريه ندفر الباب طفرنه اني وتمام طلعنه طب ابراهيم ملثم وخر لثامه ايده تنزف دم

ابراهيم " سدوه الباب يقصد باب الاستقبال قفلنه تمام طب جابله كطن وديتول

ارغد" شمسوي بروحك"

ابراهيم " ادافع عن بلدي اخلي بيد الانجاس ال....... ضل يفشر"

ارغد" وبهاي الطريقه الفوضويه"

ابراهيم " ياطريقه نقاتلهم ونطلعهم من البلد"

ارغد" الحكومه الامريكيا مجهزه بادق اسلحة القتال متدربين بدورات تدريبيه قتاليه يعني مجهزين نفسهم لكافة المهمات انت تجي تقاتلهم بهذا سلاحك مو راح صير فوضه وراح تأذي هواي ناس بعاي تصرفاتكم الهمجيه"

ابراهيم" انت كيكي بابا اعوف بلدي وارضي لولاد الزنا يسرقو ونهبو واضل كاعد اباوعلهم اقل مابيدي اشيل السلاح بوجهم اليوم كتلت واحد لاجر اكتل عشره اذا مااتي وانت نحارب الغريب يحارب"

هزيت ايدي" هاك اسمع صوت الرمي كم طلقه راح اصيب عراقي ام طفل شاب ذاك اليوم انضرب عماد ولد واكف بلباب لا حول ولا قوه يريد يطلع سيارته تجي طلقه تايها راح شبابه وتيتمو اطفاله وضاع دمه مينعرف منكم من الامريكان"

ابراهيم " اني عراقي ودمي حار مااعرف المغتصب يجي ينهب ارضي وعرضي واسكت واتحمل مثلك موجود جيش المنتضر ضد القاعده"

ارغد " هذا هتافكم من شيعت شهيد خسر حياته بسبب غبائكم"

تمام" كافي ارغد مااشوفه ينزف من جتفه وكت فلسفتك"

ارغد" ديضيعون نفسهم تمام هذا سمو انتحار مو هيج القتال وين قائدكم وين تنضيمكم ليش تقاتلون بين البيوت اكبر غباء المتضرر الاكبر العوائل"

ابراهيم " وين نحاربهم بصحراء الانبار وين "

ضلينه نجادل جرحه سطحي داوا تمام وحذرنه تسمع امي عفته وطلعت للسبعه المغرب حضر تجوال قفلت المحل رجعنه اني وتميم ميدري

التمينه على سفره وحده زوجة ابراهيم اسمها عبير كالبتها مناحه وامي ماتعرف عليمن عبالها متوجعه حامل

ثاني يوم اجة خالتي ام وسن وراها سعاد واسامه الي اول مره من يشوفني يحضني

اسامه" هلا بلضلع الماينشلع"

ارغد" هههه هلا بيك شني فاطمتك امك بيتنه شةكت مااجي الكاك"

اسامه" احبك موبيدي"

ارغد" حبك بعابع شو وخر ولك لا تلزك"

اسامه" تعال"

جرني طلعنه بلباب "تره كعدت النسوان قال وقلت خلينه نتمشه "

ارغد" وين تتمشه هي الكوت ترابه بس السده وساديها "

اسامه" هنا بلمنطقه "

صدك اخذته فترينه واشوف حنيش هوه وكرشه متر كدامه شايل علاكه مسواك خابطها طماطه والبصل الخيار والبيتنجان وماخذها البيتهم

ابتسمت داخلي اذكرت ام الاصفر بيومها دوختني لوما يلحك عليه عمها ويخليني اصحه على روحي

هاي ماعده رجال وهيج معتنيه بروحها توج وج بتل الذينه طيرت عقلي من راسي خلتني مااندل دربي

هزيت راسي وكملت طريقي للكهوه شربنه جاي ونزلنه طاولي

ساعه ورجعنه طبينه للبيت صاير مطاحن سعاد على تمام على سندس

اسامه " طارت عركه بصراويه بين الديج والواويه "

تميم هفه بل٤٤ وذاك لزم راسه "هااا خالو مستك"

تميم" سكط انعل ابوك لا بوخالك الك.... الملفي هيج عارات "

اسامه" خالو شني مامنطيتك وجاي ثاير علينه"

هوه بصفي ضربته على علبا كمز" لا ارغد خرب "

ارغد" ادبسزز هي هاي حجايه امي لو منتبها جان شكت بي "

اسامه" شني جديده عليه "

ارغد" مالك دخل جديده قديمه لتفتح باب عليه عوفه بحاله جبير مو صغير"

اسامه" لو اعرف منين يحصلهن "

ارغد" شيحصل ولك رجال بس شغل ومحل منيله "

اسامه" وحليب امي مره شفته بعيوني يمشي ويه وحده وابويا وياي كلي شوف خالك النجر اطلع مثله علمود اعلكك من ..... سترت على ذريتي وسكتت"

ارغد خربت ضحك عليه " اني اعلكك من ابوك امشي عدل "

اسامه" اكلك تره بيناتنه سنه لضل تاكل نعل وتهوبز براسي وصير جبير عليه "

ارغد" غصب عنك"

اسامه"وعلى شاربك هم هههههه لا لا والله اشاقيك شبيك ماتتحمل "

صعدنه نام يمنه ضلينه سهرانين للصبح ضحك وسوالف ساعه نكت ساعه تميم يغنيلنه ونكعد نسلطن ويااا وهوه كل اغانيه فؤاد سالم

ثاني يوم كعدنه وسن موجوده جايبها ابوها ابتسمت واني غلست عين خالتي صارت عليه سلمت وطلعت لللستقبال من صير لمه ننجمع بيها اني والولد

عبير من الصبح زعلانه وطالعه لهلها ابراهيم مو يمه البراسه براسه سبب عركتهم من سمعو بأصابته تميم مادخل يكلي بكد البغل يعرف الطريق خطر شسويله

امي ناصبتها مناحه على ابراهيم خايفه عليه
دخلت جوه الدرج اغسل وجهي وصوت البنات
تارس البيت وهوست جهال سعاد

دنكت اغسل وجهي بلمغسله حسيت بحركه وراي
غسلت وجهي من الصابون مدنك رفعت راسي صار
انعكاسها بلمرايه ابتسمت

همست" صباح الخير "

رديت" صباح الحب والياسمين صباح الورد الجوري
صباح العسل "

دنكت تضحك" شني هاي كلها الي "

اخذت منها الخاولي " اي الج وقليل بحقج "

وسن" حبيبي تدري شكد احبك واتمنه يوم يوم انجح من السادس وتخطبني يااااي متصور شكد
افرح من اذكر"

ارغد " ياابعد كلبي وخاناته افرحي يلوكلج الفرح
ان شاء الله على عينج خير بس الكه شغل دائمي وره
دوامي احسبيني ماقدم ومسجلج بسمي "

وسن" يعني متضحك عليه مو ارغد دائماً يجيني هذا الشعور وهواي افكر والخوف يتملكني لا يصير بيه
مثل البنات الي يحبوهن ويضحكون عليهن "

ارغد"  حبيبتي لتقيسيني ويه البقيه اني لبن خالتج يعني منج وبيج من دم ولحم مااكدر اضحك عليج
ولا اني هاي تربيتي اضحك على البنات عدي خوات
وراي عاقبه مااخف على روحي

وهاي العيون وهذا الوجه الوكعني يااثول ينطي كلبه يضحك عليه لتخافين ونامي وراسج بارد

وبعدين ازعل منج ليش هيج تفكرين بيه ماثقين يروحي يمته كتلج حجايه وضحكت بيها عليج"

وسن" لا والله من حبي الي وحقي من اخاف اني بنيه وحيدت اهلي ومرات الشيطان يوازيني واشك"

لزمت ايدها ضحكت التفتت محد موجود جريتها بستها من ايدها دنكت بخجل مكتسحها اي بنت
بهيج وضع تستسلم لمشاعرها عاطفتها تغلبها

كلبي طاك عليها امنيتي اخذها بحضني مااعرف شنو الجرالي وجريتها لحضني وشبكتها بين ضلوعي غمضت ارجف طولي وعرضي ملامس مره

وهي ترتعش جوه ايدي ذايبه ماحركت حتى مبادلتني الحضن مشدوها دفنت راسي بركبتها
اشمها اخخخ ياربي عنبر ضليت اشم بشعرها

متحملت نصيت لحد اذنها بستها منها رجفت
نزلت لركبتهاشفايفي تستطعم بشرتها الناعمه
ميلت راسها تخبلت انطتني الضوء الاخضر
ضليت ابوس بيها نزلت لنحرها

دخت انسطرت فقدت اخر ذره بعقلي ضليت اتلمس
بيها شكد مر الوقت ماادري تايه بحوريتي شجاك
ارغد محسيت غير شهكه وضربت خد

فزيت اباوع امها وراها سعاد اختي من شافتهم وسن كالت ارغد فدوه  غطت وجها شردت لغرفت امي

امها صاحت " سا.... ادبسزززز وسينه " هجمت على الغرفه تدفع بلباب صرت كدامها دفعتني بقوتها منضرها ماانسا وجها زنبر عيونها نطن

صح اني رجال بس بذاك الوقت خفت لا صير سالفه
وطش عليها وعليه

وكفت لزمت ايدين خالتي صاحت" عااار عاار مامنه بيكم ولد اختي خوش تربيه الكاك خاتل بيها وتمص..... بيها وخرررررر "

ارغد" تمونين خاله والغلط مني اني الجبرتها بس تعالي نكعد نتفاهم ميصير هيج اني رايدها واحبها ومستعد هسه اطلبها منكم جنت متاني الوضع يتحسن وهي تتخرج"

ام وسن " ولج خزيتيني ولج فضحتيني الله لينطيج ماعرفت اربيج مااعرفت شلون اعلمج التربيه حريمه بيج التعب وسينه اطلعي لا احركج وروح امي اطلعي "

سعاد" شكد صلفه متستحين تتختلين مزوجات ميسون سوايتج ادبسززز بله اخويه ولد وغريزته
ماتحمل انتي شمالج يمعزايه ماصبرتي "

ام وسن كعدت بلكاع تضرب على رجليه " الله لينطيج العافيه الله ياخذني كبل لا اشوفج بهذا
المنضر يااا كلبه يااا ....... يمه شلون بيه "

وكفت افرك بوجهي استغفرالله

ارغد" خاله فدوه بس صوتج والله هي معليها دفعتني وضربتني اني الجبرتها  لتكبريها فدوه
العينج هسه اخابر الولد واخذهم ونطلبها من ابوها"

سعاد" ولك خاف الله بلمره اشوف بتها بهيج
منضر وتريدها تسكت لو بتي والله اكسر ضهرها
واخليها سالفه تنحجي بيها متستحي بعدها مادخلت
جامعه المفروض تعيط صيح ليش ساكته ومستلمه
بيدك "

خزرتها مستمره تحجي وتوز بخالتي اريدها بس تسكت بت استغفرالله صحت كاافي معليج انتي
مره خطاره خليج بحترامج

اجت امي بعباتها جانت بلسوك "ياستار ياربي شكو
يمه هم تعاركتو تباوع عليه وعلى سعاد "

ارغد" يمه تعالي للستقبال وانتي خاله هم امشي كومي رحمه للكعبه باوعت السعاد وانتي اذا طبيتي وفكيتي علكج هنا حدي انسه انتي اكبر مني وانسه الخوه التجمعنه اوديج لرجلج جنازه"

سعاد" عشتو تايهتلك ابني بطولك متستحي شفتي
يمه من اكلج لسانه طويل وميحترم دكليلي انتي تعيلين بي كدامج شفتي شلون يحاجيني "

امي " شكو ارغد يمه ردينه لسوالفك خلونه مره وحده تنجمعون بله مشاكل شبيكم مدكلولي مناكر
بهل عمر شخليتو للجهال  "

باوعلت الخالتي دموعها على خدها" يااا شجاج خيه شكوو ولكم شمسوين "

ارغد " هسه تفتهمين جيبي خالتي وتعالي مشيت كدامهن للاستقبال كعدت لشتي كلها ترجف مسحت وجهي حيل اريد اسيطر على اعصابي واني طبت وجها ميتفسر تريد تعرف سعاد طبت وراهن

سكتت كوه عني مااريد اصيح واكعد اسامه والجهال

ارغد " يمه تذكرين من كتلج بس اخلص المرحله الثالثه ازوج "

امي هزت راسها " ايمه فهموني خالتك شبيها شدخل زواجك هسه "

سعاد عوجت حلكها" هي هنا المصيبه اسمعي اسمعي"

ارغد  كوه صبرت روحي " يمه الرايده وسن بت خالتي "

امي التفتت الخالتي تهز براسها ودموعها على خدها " شفتي تاليتها ياخيه تنزل راسي العايبه الماتخجل عمري جبته اعلم بيها تالي تفضحني كدامكم"

امي " شمسويه وسونه بتج حبابه وعاقله خيه انتي متردين ارغد لبتج ابني يعيبه شي مو مستواكم"

هزت راسها لا" دادا انتي تعرفين البير وغطا وارغد اعز من ولدي يوم المنه الازفها اله بس سوايته نزلته  من عيني من كالتها هدتني هد مااحترمني ولا قدر وجودي هيج اني مالي قيمه يمه ويدكون دكتهم وتالي سديها واسكتي"

امي " شمسوي ارغد باوعتلي ولك شمصخم فهموني سعاد احجي اخوج شسوه "

سعاد " كولي شنو الماسوه غير لكيناهم بوضع مال مره ورجال متحاضنين  غطت وجها بشهالها عود مستحيه يمه حتى ماادر اكمل من العيبه"

دنكت صكيت على سنواني لازم تستخدم ابهارات زايده استغفرالله "انتي الله مسلطج توزين لو تكعدين محضر خير لو دكومين وجفيني شر لسانج"

سعاد " فوك عيبه كوات عينه اخجل شويه عملتك بس ابن الحرام يسويه "

امي صااحت " صخمان هجمان البيت صمي بوزج خلينه بمصيبتنه مره ابنج بطولج بتج ذاك اليوم زوجتيها خليني محترمتج اسكتي عنه "

باوعتلي " الله يصخم وجهك مثل ماصخمت وجهي كدام اخيتي ماصبرت متوازي انت وذيج الماتستحي غدي منكم وينه احنه وين انتو جنه نخجل من خيالنه بزرت تالي وكت   "

غمضت عيوني " يمه مكعدج تحليها لو ترزلين بيه البت مالها دخل اني الجبرتها"

باوعت لختها" ام وسن دادا حكج والتكولي السوي مالومج عليه واني لو بتي وهيج اشوفها جان موتتها بيديها بس تعرفين هوه ابن خالتها وشباب والشيطان شاطر واحسبيها مملوجه اله "

خالتي " شحسب اجي الكاها ويا طول بطول واني اكعد اكوم كدام ابوها احمد بخلاقه اخلي على بزري ومااخلي على ارغد والله سودنوني عكل ماضل براسي من شوفتهم "

رجعت تبجي وتضرب صدرها" الله ليفقج ياوسن ولج اني تالي هيج حالي من وراج كح.... ماعرفت اربيج "

امي " كولي ياالله خيه ارغد وان غلط والشيطان وزه بس يغرف بروحه مراح يعوفها واني اليوم جايبه ابو ابراهيم وطالبتها منج بس هدي على عمرج ماتسوه
شباب وغلطو "

سعاد" يمه هي هاي هم غلطه لو ماخذها كل ثنين والشيطان ثالثهم شدكل لبوها لخوها حقها مالومها
بلسوي "

خالتي خرت وكعت على امي

امي " يمه الرحمان اخيتي راحت ولج كومي جيبي عباتها وانت اركض اجرلنه تكسي يمممه ام وسن دادت فوده العينج شووو باعيلي شووو يمه المره
صارت خركه بيدي

طلعت ركض الدنيا صبح بيتنه على الشارع فات تكسي وكفته ركضت طبيت امي تلبس بيها وعيونه تجري شلتها صعدته وامي صعدت وراها

سديت الباب سعاد وراي تريد تفتح الباب من الجه الثاني وتصعد صحت" وين موليه "

سعاد" وياكم يعني وين "

ارغد " سعاد اجفي شري وطبي للبيت يله مارايحين نلعب"

سعاد" اعون امي متكدر الخالتي وحده وبعدين شعليك اني وتحاسبني "

صحت روحي طالعه " امشيييي طبي " بعلو حسي
ضلت تتلفت كل البطريق سمعني  طبت تلغط عليه بأنواع الفشاير لازمها بيدي اذا مااطلع روحها

كبل للمستوصف المستشفى بعيده قاسو ضغطها صاعد علكولها مغذي ضربوها ابره كعدت بره

الله ماسلط غير سعاد هسه ماتسكت متأكد راح تحجي لخواتي فركت وجهي الله ينعلك ياشيطان

تانيتهم بره طلعت اشتريت باكيت كعدت ادخن افرغ النار البداخلي بالي كله يمها خالتي رغم حبابه ومالها بسالفة النفاق وحجي نسوان جيب ودي هذا الخلاني
احب وسن من حبي الها اشوف تربيتها الصح

من صغرها علمتها على الحجاب والصلا تعلقت بيها شفتها انسب وحده الي هم اعرفها ورابيه ويانه وهم
بت خالتي

ضليت ادخن واسحن بروحي مالكيت غير سيف اشكيله شلت التلفون مابيه رصيد كم سنت ومخلصات الدولارات

رجعته لجيبي بس الكم الف ارجع بيهن كروه
اجت امي من بعيد طفيت الجكاره وهاي شافتني

امي " كرت عيني بعد شعرف جكاير وسوالف طايح حضها كول يمه شعدك غيرهن "

ارغد" يمه لا زيديها عليه والله كوه لازم روحي وخجلان من خالتي "

امي " انت خليت للعيب مضرط  لو تعرف مادكيت دكتك يمه مادامها مو بعصمتك اختك تعرف شنو اخت يعني  شوفها مثل سندس وسناء وسعاد "

امشي نطلعها خلص مغذيها "

مشيت وراها لكيتها فاتحه عيونها دنكت ميت بدمي منها كوه لزمت نفسي امي طلعتها تجيها طلعت اخذت الراجيته جبتلها علاج  حب ضغط شكل عدها

اهذت تكسي رجعنه طببناها  باب الاستقبال مفتوح
ابن خالتي وزوجها موجودين

.....يتبع

لتنسون نجمه
وتفاعلكم
ومتابعة الحساب

❤❤❤