مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________
شَمس
سُراج بخـوف وفزع وبرود
شني مـاتت انتَ شجاي تحجي
امير بصدمة وصايح
جاي اكلك ماتتت انتَ ماجاي تفهم ماتتت بين ادية ماتتتت نبضها راح وفتحت عيونهـا اعلى كبرهن، شمس ماتت ماتتت بين ادية ماتتتت سُراج جاي تفهمنييييي
سُراج بيـن صدمتة وبيـن ما يحاول يوكف امير الي جان يدفع بسُراج على صدرة لورة ويحجي وهوَ بحالة هستيرية
سُراج
اميررررر كافي كااااافي اهدئ كافيي
لزمة من اجتافة، واميـر جان يتنفس ع السريع، كعدة سُراج ع الـ كرسي مال الانتظار وامير يهمس
امير
شلون، شلون هجي البت ماتت للحظة ماتت بين ادية شلون هجي شلون
عافـة سُراج وراح يركض للغرفـة، لكة شَمس محطوطة وحدهي بالغرفـة، اتقرب الها بسرعة دموعها بعدهي ما جافة من وجهة ! وعيونهـا مفتوحة عَ النص
انفزع من منظرهـا ومُباشرتًا حط ايدة ع ركبتها حتى يشوف النبض، نبض خفيف واقرب للمعدوم
كام يبلعـم ونبضة بـدة يسرع من الخوف
طلع بـسرعة وهوَ يصيح بين الممرات
سُراج
هاي وينكُم صدك تحجـووننن
راح للغُرف مال الاطبـاء بكُل سـرعة وصار يفزعهُم حَتى يجـون حالاً، عـاند الدكتور وكال الا يجي احد يوقع الهـا على مسؤوليتـة يلة اكدر اشتغُل
هذا الي خلة سُراج يفقـد اعصابة ويتعـارك وي كُل الكادِر الي موجود، وبغضون ثوانـي توزعوا الاطبـاء واتجهوا مُباشرتًا لغُرفة شَمس
سُراج موجود فوگ راسهُم وهُمّ بلشوا يشتغلـون
فجأة حس برجفـة ب ايدها، لزم ايدها بخوف على لُطف على انفجاع
سُراج
انة يمج شَمس انة يمـج
الدكتور
حضرتك شتصيـر من المَريضة استاذ سُراج؟؟
سُراج
ابن عمهـا
الدكتور
ياريت تتفضل وتناديلنـا دكتور جراح ثاني
سُراج
دكتور اني موجود ماطلع وياكُم
الدكتور
انتَ متأكدة بـ توترك هذا راح تكدر تلزم ابرة بس ؟؟
دكتور سُراج الكادر الصحي يُمنع يدخل بـ عملية تخُص ذويهُم رجاءً تفضل اطلع، لسلامة المَريضة وسلامتك
سُراج
تمام دكتور تمام ماسوي شي فقط كاعد ماشارك بـ ايّ شي
الدكتور
استاذ سُراج
سُراج
دكتور رجاءً بلشوا بالقسطرة السالفة ماتتحمل تأجيل
تبدون من الفُخذ او الايد !
الدكتور
الفُخذ افضل
غرفة العمليـات امتلَت بالتركيز. انفتحت الاضوية والأجهزة صفّرت، وضوء الشاشة الكبيرة سلّط ع صورة أوعية الدماغ. الممرضة عَقمت منطقة الفخذ، مدّت الأدوات المعدنية اللامعة للدكتور.
الدكتور
نبدأ من الشريان الفخذي، ندخل قسطرة دقيقة ونصعد بيها لحد الدماغ.
إبرة صغيرة دخلت أولاً، بعدها سلك رفيع جدًا يشبه الشعرة، ومن خلاله دفعوا أنبوب القسطرة. على الشاشة ظهر الخط الأبيض يتسلل ببطء بين العروق
سُراج يراقب من فوق راسهم، قلبه يخبط، عيونه مركّزة ع يد شَمس الساكنة. لما شاف الخيط يتحرك ع الشاشة همس لنفسة بـ يارب يارب يارب
المشهد ظل بين أصوات الأجهزة، حدة أنفاس سُراج وتوترة، وهدوء الأطباء اللي يشتغلون بخطوات دقيقة ومدروسة
كل نظرة ع الشاشة تثبت إنهم مو بس ديقاتلون الخُثرة الي صارت، إنما ديقاتلون حتى ترجع حياة بنت ما متجاوزة العشرين.
الدكتور، بعينين مركّزات ع الشاشة
هاي العملية غالبًا نسويها للكبار، نادر نواجه بنت صغيرة بهالعمر بهيج وضع. خلال مسيرتي بـ اكملها واجهت حالة بس وتمت وفـاتها ..
الممرضة تهمس
حيل صغيرة حيل ياترى شصاير ويـاهة شنو سالفة استاذ سُراج
باوع سُراج الهُم، وعيونـة جانت تحجي ميت حجاية رُغم سكوتة، بدة يحس شي ينهش داخلة بعُنف
راسه مطأطأ، إصابعه مشدودة ع إيدها الباردة، عيونه تحاول تمنع اظهار ضُعفة وانهيارة، لكن كل نفس بداخله يصرخ:
يـارب ماريد سوء يصيبهـا، ماردت هجي يصير انة
فززة من صفنتة صوت الدكتور وهوَ يرفع صوتة
وصلنا! استعدوا، الشبكة رح تنفتح.
رفع راسة سُراج وكام وُكف وضل يباوع على الشاشة، الأنبوب يحرر الشبكة الصغيرة داخل الشريان، وكأنهم ينصبون فخ حَتى ينتشِل الخُثـرة. لحظة صمت، بعدها الدكتور يأمر:
اسحبوا ببطئ، لا تخلوها تنكسر.
الجميع محبوس أنفاسه، حتى صوت الأجهزة صار كأنه جزء من الدعاء
الدكتور يلتفت للفريق:
نجحت القسطرة. بس تبقى تحت المراقبة المشددة، الساعات الجاية أهم بالنسبة النة وان شاء الله خيـر
طلع الدكتـور وضل سُراج يمهة
عيونـة تنبُض وانفاسة تتعالى وكُل شي بداخلة متندم
سُراج
مـاردت أذيج صدكيني ردت احميـج شَمس
ردت احميـج من غبائج وعشوائيتج الزايدة
بس ما جنت اظن راح اوصلج لهل مرحَلة
يباوع لـ شَمس وجهة اصفر وشكلها حَيل تعبان
حس روحـة مُذنب حَيل وماتحمل منظرهـا وخلة وطلع
انصدم بـ وجود الكُل بـرة
الشيخ جبُر جان كاعد وحاط ايدة اعلى راسـة وصالحة تبجي و الولد ملتمين كلهم، اول ماشافوا كاموا كلهُم الة
صالحة
ولك ها يُمة بشرني شلونها
جبُر
ولك بوية بشرني بشررررنة شلونها ابنيت عمك ولكم بشروا
سُراج ببرود
زيـنة جدي، امير شلون صار كلشي
امير
مـادري سُراج جنت بمُحاظرتي فجأة اجاني طالب كلي استاذ مُمكِن شوية من وقتك طلعتلة كلي بـت عمك وكعت فجأة طلعت لكيتهَة بمنظر مُرعب هجي تكلك عـبالك ميتة، كالي الدكتور فجأة استاذنت و طلعت و واكعة مادري شني الي موصلها لهاي المواصيـل ابد
صالحة
يمة عوينـة عوينة وصابتها بـت ابني، شمالها جنها وريدة وبالبيت والله مابيـهة شي والله
جبُر
البت هايّ گضيتها تمطمط من سالفة لسالفة ولا ارتاحت من يوم وفاة ابيها لحد هَسة هيَ مكضيتها مُستشفيات ولا ارتاحت الها سويعة ( ساعة ) وحدة
حسَن
شجابها الها شجابها ارد افتهم هسة هيَ وينها وين السكتة الدماغية تراها سالفة ماتدش بالمخ
امير
كال الدكتـور سببها شي نَفسي
حسَن
ايّ هيَ شلون نفسيتها فول منانة سُراج فوك راسها مباويلها اعلى الحرف التحجي والفعل الي تسوي شلونن نفسيتها تصيـر
كال هجي بـ انفعال وصايح هامِس، اكتفى سُراج بـ انُ يباوع لابـو ويخلي ويروح
لحظات حاسِمة وصادِمة ومُفجِعـة بنفس الوقت
ومحد مستوعب الي صار اساسًا
وجه مرعوب و لسة بصدمتة وما مستوعِب الي صار
و وجـه متندم
و وجه يحِس بالمسؤولية وخيانتة لامانـة المرحوم حَسنين
عيون خايفة، وصوت يرتِل قرآن بهدوء
وكلهُم كاعدين داير مداير شَمس
من بعَد ساعتين، كدرت شَمس تستعيد وعيها بسبب البنج، كعدت وهيَ مصدومـة ومو حاسة بـ ايّ شي ولا تذكر شي
شّمس
كعدت ع ألم بسيط بفُخذي
تأوهِت بـ وجع اجاني صوت سُراج
سُراج
شَمس شبيج اكو شي يوجعج شَمسس
فتحت عيوني بـ انزعاج من الالم شفت سُراج كدام عيوني و بيبي وجدو وعمو حَسن وسَجاد موجوديـن يمي
كُلهم انفزعوا واجـوي يمي بسرعة، بيبي لزمت ايدي وتبوس بيها وجدو يكلي شييج جَدي شيوجعج
مادري شصـاير اصلاً واحس روحي رجعت لايام الحادِث مافاصلة بالاحـادث من ثُگل السطرة الي جنت احِس بيها ( سطرة التخدير)
بـدة يقيسلي النبض والضُبط وهُمة يحجون وياي واني دايخة واكلهم
شَمس
هيَ الضربة غير براسي فُخذي شعليّ
فُخدي ديوجعني شو
باوعلي سُراج وجان شُبه مصدوم من كلامي
وكانهُ جاي يبتلع الكلام ومايريد يحجي
سُراج
لازم ما تتحركيـن ابدًا خصوصًا راسج ديري بالج وضلي مرتاحـة احسَن
صالحة
يلة ي يُمة نـامي يلة
خلقرالج المعوذات عبنّج (لانك) محسودة ومن وحيدة لوحيدة
نمت ع صوت بيبي وهيَ تقرالي قُرآن
سُراج
حولتي لمحمَد لو شني السالفة
المشهد كُلة انعـاد بذاكرتي بوسَط احلامي وبديت اتذكرة كُلة
صحيت واني ع نفس شهگتي الي شهگتها واني طلعت
بس ماجنت ادري انُ اني شهگتها بالواقِع
فَزيت مرعوبـة الساعة كدامي بـ ٧ المُغرب، انتبهت لوجود سُراج كدامي هوَ وبيبي وجدو بَس
فَزوا هُمة بسرعة وكلهُم اجـوني
جبُر
بسم الله يارب دخيلك شبيج جَدي شبيججج
صالحة
يـا يُمة شبيج اسم الله ولج لا تطيحين حيلي احجي
كمت كعدت ع حيلي ودحست راسي بحُضني وصرت ابجي بطريقة هستيرية واني اتذكر الي صـار
جبُر
ولج جَدي بي خل افهم منج احد مآذيج احد مزعلج ارفعي راسج خلنّي احاجيج ولج
رفع راسي بيدة، اجت عيني بـ عين سُراج الي جـان يباوعلي بنظرات مُستحيل تتفسر، بس شعور الندم جان طاغي عليها
رجعت ابجي وحضن راسي لصدرة جَدي
جبُر
شمس بوية والله عليتيني عل، ابوج اخذ نص حيلي وانتِ راح تاخذين النص الثاني بس احجيلي كليلي مني ماذيج اكو واحد ماذيج بالكلية شو شني بس احجي بوية
صالحة
احجي ي يُمة خلنّة نشوف طريچنـا
لا احنة بشام ولا احنة بحلب هَسة
شلون يطاوعنا كليبنـا نعوفچ بضيمچ
شلون نسكت عنج ولج شلون
انفتحت الباب مـال الغُرفة وسمعت صوت علي
علي
السلامُ عليكُم
باوعت طب عمي حَسن وعلي، اول ماشفني عمي حَسن اجاني بسرعة وحضن وجهي وباسني من راسي
حَسن
شبيج يبعد ابوج شبيج يبعد روحي ليش تبجين
جبُر
هاي صارلها ساعة اعلى هل حـالة بس لو نفهم شبيها نرتاح والله
بهاي الاثنـاء طلع سُراج واجة علي وكف كدامي وصار الكُل يحاولون يفهمون سَبب بجيي الهستيري
علي
زين جدي عمي يُمة عوفونا وحدنة شوية انة وياهة مُمكِن؟
حَسن
ولك ماتشوفها فاحطة مكسور الركبة تريد تطبق تحقيقاتك اعلية
علي
جدي يابعد عيني قابل انة بغرفة تحقيق واطبقها اعليكم بس انة ارد احجي وياهة شوية من اخو لاخيتـة فَ شوية من رخصتكُم خلونة انة وياهة شوية
حَسن
ايّ يلة بوية خلنّة نطلع يجوز هوَ يكدر يفتهمهة
طلعوا هُمة واني انتجيت ع الجرباية ودموعي تنـزل مني
تعبت منة، مُستحيل اكدر اعيش ويا اكثر، مُستحيل اكدر اتحملة
ماكدر والله ماكدر تعبت منة تعبتتت حتى سُمعتي خربها ومخليلي مُراقب شنو يسوي بعَد شنو
سحب كُرسي عليّ وكعد من جهتي الي اني كالبة وجهي عليهـا
ماريدة يشوفني واني بهالضعُف درت وجهي للجهة الثانية
علي
هاي شني شميسة نلعب انة ويـاج لو شني ؟
شَمس
ماريد علي ماريد
لا تتصور تاخذ شي مني مابية شي صدكني
علي
تنوعيلي شَمس يجوز انتِ الله ما رزاقج اخ وما تعرفين الشعور وحّتى لو رازقج مراح تعرفيـن شني شعور الاخ تِجاه اختة
وهاي هي فطرة سليـمة الله يزرعها بشكو واحد بي خير وآدمي
ولو ايلول ماتشوفني انُ انة آدمي يمها بس عاد بية خير وهذا يكفي صحيح ؟
كال هجي بحجة يضحكني، بس حتى كلامة ماجان يكدر يضمدلي جَرحي
جَـر حسرة وبدة يحجي
علي
اميـر متخبل وخبلني ويـا، منظرج ماجاي يروح من بالة، الة ساعات وهوَ كاعد بالغرفة ويفكر بـ شكلج ويكول شلون هجي، امير مرعوب من الحـالة الي شافج بيها وامير يعرف ويفتهم
فَ مُقارنـة بـ عمرج والي صارلج هذا الشي الي مخبلة
وما اخفيج سِر انة لُگفتـة يريد يروح لمحمّد، ماجان غيـرة ب بالة وكال ١٠٠٪ السَبب هوَ، كوة هديتة وكوة سحبتة وكتلة دام مانعرف السالفة مانكدر نحكُم وانة كتلة متاكد شّمس من حاجيناها لسة عافتة
من كال هَيج صدمني، درت وجهي الة بـ صدمة جبيرة وكتلة
شَمس
لا والله مو هوَ علي والله موهوَ
علي
شوفي حبيبتي انتِ مو بحاجة تبرريلي في سبيل تجملين روحج بنظري، انة بمقام اخوج الجبيـر وكل انسان بالحياة يغلط فَ لو انتِ غلطتي
ماعتقد هذا الشي راح يأذيج انتِ
يجوز يزعلني انة بس مال يأذيج انتِ ف لا
فَ هسة انة ماطلب منج غير تكليلي هل هوَ ورة حالتج هاي ؟!؟؟
وللعلم شَمس ٩٩٪ هوَ
لان وجودج ويـا تحت نفس السقف هوَ بحد ذاتة غلط !
بس ثقتنا بيج جانت اكبر من كلشي
فَ انتِ لو كسرتي ثقتنا بيج صح راح نزعل اعليج ويجوز زعل ثكيل بس بنهاية انتِ بتنـا ومنة وبينة
بس ذاك ماراح يفلت مني، لان نفس مايكولون انة واخوي اعلى ابن عمي وانة وابن عمي اعلى الغريب
فَ يا شمس ياعيوني انتِ احجيلي وكليلي لا تخافين ولا تترددين ابد، انتِ بس احجيلي والباقي يمي يلة شَمس احجي
شَمس
علي والله موهوَ والله صدكني
علي
شَمس صدِك تحجين؟؟؟؟
يمج مطي لو ترديني استمطي واعبرها !!!
ماراح تعبر اعلية ابدددددد وجاي اكلج متاكد بنسبة ٩٩٪ هوَ
ف كليلي هل حيوان شمسوي ولتخافين
شَمس
علي ليش مدصكني داكُلك موهوَ والله موهوَ قسمًا بالله موهوَ
علي
بس انة ماجاي اصدك شَمس
واذا ما تحجيلي قسمًا برب العزة قسمًا برب العزة الا اروح واحط چيلة بنُص گلبة قسمًا برب العزة يا شمس ولحظة لحظظظة ما اتردد سمعتيني ؟؟؟
حجاهة بَ عصبية واصرار خفت من منظرة وعدلت كعدتي راسًا وحجيت بدون تردد
شَمس
وروح ابوية يا علي وروح ابويـة لا يمي ولا كرباي اباوعلة وكانهُ انسان غريب ويباوعلي هكذا
وكُلش ملتهي ب مرتة
وروح ابوية ياعلي، وهاي اووووول مرة احلف بيها
تنفس بغضب وعيونة تخزر بيـة
علي
متاكدة شَمس لو جاي تغطين
شَمس
وروح ابوية علي شنو قابل احلف بي وهوَ ترابة بعدة اخضر علمود روحي مثلاً ؟؟
ضل يباوع لعيوني ولتعابير وجهي ودنگ على ادية
شَمس
علي وترتني والله الي بيـة كافيني حباب
علي
خاف بعدج تحبي وجاي تشوفي وتتاذين
شَمس
والله موهيج والله موهيج، الموضوع مو يم محمَد ابدددد مو يم محمَد علي
علي
جا شبيج ارد افهم شبيججج
شَمس
مادري شبية مادري
اني وحدي احس روحي مخنوگة صدكني
مابية شي
تنفس بعدم صبُر وگال
علي
جا شني شَمس شني
لا تقنعيني وحدج ماكوشي اسمة وحدج
اليوم شني انة هجي ماعدي عقل و اصدك وصلتي لهل مرحلة وحدج؟
خاف سُراج؟؟؟؟
من گال هجي رفعت راسي الـة وكتلة لا
علي
جا شبيج ؟ مشتاقة لعمي
هزيت راسي بـ ايّ ودموعي صارن مثل الشلالات
ضل علي يحجي وياي ويحاول يهدئني بس ماجان اكوشي يفيـد
كتلة بَس اريد اطلع من المُستشفى لان احس روحي حيل مخنوگة، طبوا جدي وبيبي وعمي لكوني نفس حالتي ضلوا يحجون وياي ويحاولون يفتهمون مني مَرة ثانيـة
طَب سُراج وعلي گالة تريد تطلع
سُراج
ويـن يصير لازم تضل ٢٤ ساعة تحت المُراقبة خاف كِلشي يصير
اندارلي علي وگال
علي
جا انتظري
شَمس
علي ارد اطلع مختنگة حَيل ماريد اضل
علي
جا يلة نطلع وسُراج يمـج واذا كلش كلش نجيب مُمرضة ويانة
اكو داعي خوية؟
سُراج
ماكو داعي انة هنا
حَتى صوتـة وهوَ يحجي صـار مُقرف بالنسبة الي، ماريد شي غير عيونة ما تتلاگة سويـة لان كُل نظرة من عندة تخليني اتذكر الي صـار كُلة
ساعدني عمـو حَتى اكوم، اجـة ب بالي من طلعنـا من المُستشفى وشلون جنت نايمة ع رجلة، غمضت عيوني بـ صعوبة ودمعة غصُب عني نزلت
ماكدر مالوم نفسي وماكدر مالومـة
ثنينة أذينة بعُض
بس مُستحيل يوصل للاذية الي اذانياهة هوَ ..
ماصعَد ويانة هوَ رُغم انُ السيـارة تكفي وسيارة امير مو يمـة، كال ارجع وحَدي بس علم بيبي ع علاجاتي وهاهيّ
رحنـة للبيت وحالتي جانت ما تتفّسر ولحد الان اني كُل ظني غبت عن الوعي او صـارلي انهيار حـاد ك اقصى شي ..
حَسيت اكو الم بفُخذي بس ماكدرت اتفحصة حدما وصلنـة للغُرفة، وتقريبًا الكُل طلع شفت رجلي نفس الكدمة الحَمرة صفنت عليها هاي شنو!!
شوية وطبت بيبي
شَمس
بيبي هاي مدري شنو بفُخذي نفس الحمـار
صالحة
جا يبيبي غير سولج قسطرة منهـا
شَمس
شنوووووووو !
قَسطرة شنوووووو
كلت هّيج بصوت عـالي وملامح الصّدمة جانت واضحة علية
صالحة
يُمة جا غير سكتة دماغية وسولج قَسطرة
سودة بوجهي اعليج
هيَ تحجي واني اباوعلها وبدون ما ارمِش حَتى
شنو قسطرة شنو سكتة دماغية
هيَ بيبي شدتحجي بالضبُط
من الصَدمة الي صارت بية
كعدت ع الجرباية بدون مادري ودموعي بدت تنزل بصَدمة
طبوا عمي وجدو ثنينهُم
رفعت راسـي الهُم بصدمة ودموعي تنزل
شَمس
عود صدُك سكتـة دماغية
لا يعني صدُك لو تشاقون
جبُر
جا احنـة اعليمن كاتلين ارويحتنـا
ولج بوية انتِ تردين تموتين روحج لو شني
ستوج جايـة وتعبانة نامي وخليها ورة ربـج
ماحجيت شي بس بكلبي جانت نار متوقدة، سكتت رُغم الالم رُغم الوجع رُغم الكسران الي جان بداخلي
نمت ع الجرباية وغطتني بيبي
صرت ابجي بهدوء وافكر بالصدمة الي تلقيتها
ساعات اكره سُراج
وساعات اكره نفسي
وساعات اتمنى اموت واخلص من الي بيـة
وخلال مرور ساعة من البَجي الي جنت بي
نمِت أخيرًا على الجرباية، بس النوم مو نوم كد ماهوَ هروب من الصدمة، والقشعريرة بعدم التصديق تخليني أحس إن روحي مو بجَسدي ..
كعدت من النـوم الساعة بـ ١ بليل، جدو وبيبي نايمين واني كاعدة وَحدي واجهزة ضغُط ونبض واشكال و الوان يمي
كعدت من مكانـي حطيت ايدي ع رجلي ودنكت راسي عليهن
ماجاي استوعب شي ولا شي يكدر يستوعبني ابـد
تعبت منـة تعبت من تقييدة وتعبت من نظراتة وكِلشي سواليـا، تعبت من برودة وشخصيتة المُستفِزة، واحس بعَد ماكدر، ماكدر ابددد اتحملة ولا اكدر احط عيني بعينـة ولا اكدر اكون ويـا بنفس البيت اساسًا
ضليت ابجي بهـدوء وبجيي تحول لشهگات، ماكدرت اكعد بيبي وجدو خليت وطلعت، ع كد ماجنت مخنوگة والدموع مغوشة عيوني ماجنت اشوف گدامي ابـد غير لون التُخم البيجي
خليت ورحت بسرعة كعدت ع الحافـة
حَسيت بـ ايد انمدت على جتوفي حَتى تسندني راسًا
اللمسات، العُطر مال سُراج مابحتاج ارفع راسي حَتى اشوفة
نُفرت روحي بسرعة قبل ما اسمع صوتة حَتى
ودرت وجهي الة بعصبية
شَمس
وخررررر عني لا تلمسنيييييي
صحت بصـوت عالي بدون ما أُبالي لايّ شي
عيوني كد ما محملات دموع صارن ينزلن بشكل مَطر مو دموع
سُراج
شَمس بس خل احاجيج
شَمس
ماررررريد لا تحاجينيييي ماريد شي
سُراج
خوش والله خوش طالع بـس كافي لا تأذين نفسج بس اهدي
شَمس
ماريددددد شي انتَ بس وخررر وخررر عني ماريد اشوفك
جنت احجي بصوت مخنوگ بس بنفس الوقات بعياط عـالي
سمعت صوت امير وعلي وهُمّ ينزلون بـسرعة
شافوني وانصدمـوا بية شلون ابجي واصيـح
اجـة امير مُسرع الي وصاح على سُراج
امير
انتَ شبيك شتريدددد منها
سُراج
تـرة ماسويتلها شي شبيك اجيت مفزوع!!!
اجة يمي اميـر واني جنت ابجي حَيل
سُراج
البجي موزيـن عليها موزين
علي
بس هسة لو نفهم ليش جاي تبجين ليش
ماجنت اكدر اوكف بجي ابد، وبنفس الوكت احس روحي مختنگة حَيل
شّمس
مادري مختنگة والله مختنگة
علي
اطلعج؟ يلة كومي خل نطلع كومي
مارفضت ابد لان صدك حَسيت روحي محتـاجة لهوى رحت لبست حجابي واني ع نفس البجيـة
طلعت وعلي وامير صاروا كدامي
جـان سُراج كاعد اول ماشافني كام واجة وراي
ظنيتـة يريد يروح ويانة
انداريت بسرعة الة وخزرتة بعيوني
باوعلي بـ ملامح تعبانة ورجع خطوتيين ..
طلعت وي علي واميـر
صعدنك بسيـارة علي واخذوا الطريق كُلة يحجون وياي ثنينهُم، لحد ما وصلنـة لـ يم النافورة مال المَي
كال علي خل ننزل
نزلنـا وكعدت ورة ع النافـورة، الهوى بارد والمي ينگُط على ظهري واني كاعدة وابجي
حاولوا يتفاهمون وياي او يهدوني شويـة بس اني جنت رافضة الكلام نهائي ومكتفية ب انّي ابجي بدون تعب ولا مّلل
أيسـوا وهُمّ يشوفوني هيج وماهدى ابد، كتلهُم اريد ارجع للبيت انـام يم بيبي بلكت اهدئ شويـة واني يمها
رجعنـا للبيت لكيت سُراج كاعد بالصالة ويدخن
اتجاهلتة ورأسًا رحت للغُرفة وعلي طب كدامي حَتى يكعدها
ضليت واكفة بالباب وابجي، ماريدها تكعد واريد اسكت روحي وحدي بس ماكدر احس من جـوة اكو شي خانگني خنگ
بهاي الاثنـاء اجة سُراج من وراي ولزم ايدي وحجة بنبرة هادئة
سُراج
شَمس كافب الله يخليج اهدي والله راح تموتين كاااافي
من كالي هَيج احس نفس البالونة وفجرني بيدة
صحت بوجهة بصوت عـالي وكتلة
شَمس
واذااااا اموت واذاااااا ماعليك بية اني اريدددد اموتتتت شعليك بية شعليكككك
حَجيت هيج بعصبية عارِمة، عيوني اتجهن ع اميـر الي جان يباوعلي ومصدوم من تصرُفاتي
وبنفس اللحظة بيبي كعدت وجدو فز مرعوب عَ الصوت
سمعت صوت بيبي وهيَ تكول
صالحة
اسم الله رحمن يُمة شبيج شبيج
گطفت روحي بـ حُضنهـا ابجي واناااشغ بكُل قوتي
جبُر
ولج جدي شبيج بس كليلي شبيج مو عليتي كلبي عل شبيج حاجيني يبعد عيوني انتِ
علي
صارلها ساعة بس تبجي ما سكتت ابد وتكول مختنكة طلعناهة ردنة منها ماكو
صالحة
يمة بسم الله الرحمن وضع بنيتي يخـوف
ولج شصايرلج شجاريلج
عين الماصلت اعلى النبي يبعدروحي ي يُمة
لا لا شيخ والله مانسكت اعلى حالتها شني اشوف بت ابني هل ريحة من عدة تموت واسكت لا والله ماسكت شوفولياهة شبيها دخيلكُم
بهاي اللحظة نَسيت اني منـو ونسيت شكد عُمري وماهتميت لمستحة ولا فشل، حسيت روحي طِفلة ومو رايدة إلا أمآن يحتويها شوية ويخفُف الها من بشاعة الجاي تشعِر بي
الكُل جـان يتهامس علية إلا اني جنت ارتجِف من البجي مثل الطفلة الصغيـرة
بدت بيبي تقـرالي قُرآن وبدت بـ
قل اعوذ بـرّبِ الفلّق ..
بدت تحصني بـ الايات القُرانية وتقرالي ادعيـة حَدما حَسيت روحي اغفى بحُضنها بدون مادري ولا احِس
اليـوم الثاني جـان نفس الشي ومو احسَن ابدًا
وسُراج جـنت اتلافى كُليًا، وكُل مايريدلة حِجة حتى يحاجيني ماجان يلكـة لان جانوا الكُل محاوطيني
دموعي ما نشفوا من عيوني ابدًا، وكُل ثانيـة جنت ماضيعها بالبجي وما اهتم لايّ احد ب انُ يشوفني او لا
جان بية احساس غريب احساس مختنگ احساس يدفع بداخلي حَتى ابجي غصبًا ماعلية وبدون ايّ توقف
مر اليوم هـذا واجة ثاني يوم و اني ع نفس وضعـي
واحد يكول سُحر و واحد يكول عين والثاني يكول صابهـا تلبّد وفزع من بعد موت ابوها و بسبب الصدمات المُتكرِرة
بس محَــد جان يدري شنو السَبب غيري اني وسُراج ط
اليوم الي وراه رّحمـة سمعت بـ حالتي واجتي يمي، حاولت تحاجيني وتعـرف السَبب الي بيـة بس اني جِنت قافلة نهائي انُ ماحجي ايّ حرُف
فتحت القُرآن رّحمة و اول ماطلع
وَعَسَى أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَى أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ﴾
رَحمة
شوفي صدق الله العلي العظيم والله اكيد الشي الي الله مختبرج بي هَسة من وراه عوض جبير
هيَ تحجي واني اباوعلها وعيوني تدمع
صالحة
يُمة يعني ماكو سحر شو شني لان وضعها موطبيعي
انة ما آمن بهسوالف بس كلت خاف
رّحمة
لا يُمة مابيها ايّ شي وهاي مُجرد تراكُمات
حَبيبتي شَمس، باعيلي كِلش زين مرات الله يخلّي الوجع كدام عيونـة بس ما وراه إلا كل الخير. أنتِ هسة شايفة الظُلم والقساوة الي دتتوجه الج نفس العِقاب بنسبة الج مو؟
هزيت راسي بـ ايّ واني احس بكُل كلمة تحجيها نفس ماحس تمامًا
رَحمة
بس يمكن هو النصيب المرسوم إلچ، شمدريج انتِ؟
حجت هَيج باوعتلها ب استغراب ضوء
رَحمة
مادري بس الي ادري بيه انُ الشي اللي تبچين عليه اليوم هو بحد ذاته رحمة وباجر تشكرين الله عليه. ولا تنسيـن ربج شگال: (وعسى أن تكرهوا شيئًا وهو خير لكم) ..
هيَ تحجـي واني اسمع منهـا وابتسم ع كُل شي تحجي، واحس روحي ارتاحيت لوجودهـا وياي
رَحمة
وهسة يلة، محد كدج يطبخ اكل طيب حتى سَبب مو مثل طبخج كدامها اكول
سَبب
ايّ والله طبخ شموسة يخبُل
رّحمة
يلة خل نكوم ثلاثتنـة نُطبخ
بس بالبداية شنو اريد منج تكوميـن تسبحين هاي اول شي وثاني شي تنزعين الاسود كافي جَد كافي
شَمس
لا رّحمة مارررريد
صالحة
وعلي اكوملج يشَمس انزعي الاسود واسكتي ابوج من فوك عذبتي بكبرة شجاج يُمة شجاج
شَمس
ماريد يابيبي ماريد
رَحمة
ترة والله مايصير حجي امهاتنا كبُل ترة موبس حجي عادي وخُرافات هوَ فعلاً الي يلبس اسود ع الميت موزين و ع العايش مايصلح فَ انتِ يجوز تاذين جدج عمج بيبيتج وهسة انتِ ماذية روحج ف انزعي احسَن
بيبي ضلت تصيح وتكول هَسة تنزعينـة وضلت تلح علية
ماحبيت اكسر الهـا كلام
رحت صعدت لفوگ صارلي ثلث ايام حَتى ماسابحة وروحي طالعة، اخذت دوش طويـل وخيالي فجأة سِرّح للمشاكل الي صارت بينـة اني وسُراج، ياترى شلون راح اكدر اكمل ويا الحياة وشلون راح اكدر اطيقة و اباوع لوجهة
حَسيت التفكير تعبني وماراح يجيبلي ايّ نتيجة طلعت من الحمام عز علية البس شي الـوان بس بنفس الوقت ماردت اكسر بيبي
لبست دشداشة وردية، اجيت باوعت لنفسي بالمراية وجهي فَذ ذابِل وصاير حتى شوفة مابي
ياربي شكد فَشلة وعيب طول هل ايام اني ابجي كدامهُم كلهُم هسة شيكولون علية، تنفيت بـ راحة و اطلقت اخر نفس ثگيل جان بداخلي
مادري بس من ساعة الاجت رَحمة لحد هسة اني احس روحي زيـنة ومرتاحة موبس ظاهريًا حتى داخليًا
حاولت اصلح الخراب الي بوجهي، حَطيت شوية كُحل ومورد لشفتي وخدودي وفوك عيوني
بعدة التعب بوجهي وما اكدر اخفي ابد، حَطيت شال ع راسي ونزلت، اول مانزلت لكيتهُم كلهُم كاعديـن سوة
سَجاد اول ماشافني صوفر
علي
طير زاجِـل كدامك؟
سَجاد
هاي شميسة مو بعينك
ولج طلع وجهج واخيرًا
ابتسمت من كالي هيج والتفتت الجدو الي جـان يضحگ الي
رحت يمـة وبستـة ردت اكعُد يمة صاحني عمو حَسن، باسني براسي وحضني بحنية
حَسن
بوية والله خوفتينـا اعليج
علي
شكلي حتى انة راح اغارن من شَمِس
ابتسمت لعلي وانداريت لعمـو
شَمس
اسفة عمو بس والله مادري ليش وشلون
غَيث
عادي تصير لحظات ضعُف بس المُهم مانخليها تتفاقم علينة وانتِ قوية وكدها وعديتيها وعديتي الاكبر منها
ابتسمت الة وكعدت يم جدو وبيبي
ضلوا يسئلوني شبيج وليش هجي واني ساكتة وماعرُف شجاوبهُم
امير
هاهيّ جدي كل واحد بينة عدة طاقة مُعينة للتحمُل ويتحمل يتحمل يتحمل الواحد بينـة بعدين ينفجر ويطفح كيلّة ف هذا الي صار وياهة، سدوا الموضوع والحمدلله من مُضى ع خير، بس نريدها تدير بالها على نفسها اذا مو علمودنـا علمود عمي الله يرُحمة
جبُر
يا جَدي جا هيَ شعدها انة اموت واعرف شعدها
امير
بداخل كل انسان بينة شي ما يعِلمة إلا رّب العالميـن
جبُر
ها يَ شمس تضمين علية
شَمس
لا جدو ماكو شي اضُمة عليك بس نفس ماكال امير تراكُمات والاكثر موتت بابا اثرت علية
ضلوا يحجـون بصورة عامة واني كاعدة وصافنـة، رفعت وجهي حَتى اسمع زَعيم شديحجي، اجت عيوني بعيون سُراج الي جان كاعد يم زَعيم
اول ما تلاقن عيونـة ضل يباوعلي بتركيز وكانهُ جان يحاول يوصلي شي بنظراتة
مادري ليـش بذيج اللحظة ماكدرت اوخر عيوني من عيونـة، ضليت اباوعلة واتخيل الي سوى بية وبداخلي اكول ليـش؟
فَزيت ع ايد جدو وهيَ تتمرر ع ظهري ويكلي
جبُر
ها يرويحتي
ابتسمت ع كلمتة واني بصفُنتي، فزيت واني اشوفة لسة يباوعلي
وخرت عيوني منة بسرعة وانداريت بكُل جسمي لجانب جدو
انطيتـة ظهري وكتلة
شَمس
اسفة جدو ادري خوفتك علية وتعبتك هواي انتَ وبيبي وياية بس صدكني بعد من اليوم وجـاي حكون قوية وماكوشي راح يكدر يأذيني ابد
حجيت بصوت مسموع تقريبًا وهوَ ماجـان يبعد عني هـواي فَ سمعها لان حَتى عمو حَسن الي جان كاعد مقابيلة من جهة ثانية سمعهـا
كمت وي البنات سوينـا عَشا وتعشينـا وجانت الاجواء الحلوة غامرة عليهُم، صارت بالـ ١٠ استاذنت وصعدت حتى انام
لبست تراكي مال النـوم وغسلت وجهي وفرشت اسناني ورجعت للفراش، جِنت كاعدة وافكر بالي صار بهل فتـرة
مو مال استنزف طاقتي وصحتي عليّ، دراستي دتروح حياتي دتروح، دادوخهُم واتعبهُم وياية ومداشوف شي من ايامي، ماكوشي اساسًا يسوى حَتى اتعب هلكد علمودة
اني غُلطت هاهيَ المفروض انتشل نفسي مو اعاقبهـا
لازم اسامح نفسي لان اول شي مُمكِن يساعدني حتى اتشافى هوَ نفسي
ماراح يهمني شي بعَد
لا محمَد ورُسـل
ولا سُراج ومزاجيتـة وقساوتة علية
راح امضي بنفسي وحيدة حاملة وياي شي واحد
والي هوَ السعـادة
ومُستحيل اخلي مجـال للحزِن يدخل لحياتي مـرة ثانيـة ..
وقتت موبايلي ع الـساعة بـ ٧ نمت وكعدت بـ ٧، احس روحي مولودة من جِديد واحس الدنيا ضاحكتلي واحس كُلشي داير مدايري ينبِع أمل، احس هاي الطاقة كُلها اجت من ورة رَحمة ياربي شكد حجتلي اشياء وشكد تونست ويـاهة شكد سمعت عن قُصة غَيث بس هيَ فعلاً ثبتتلي هشي
اخذت دوش سريع وطلعت، لبست صايـة عِندي الـوان رسمية لونها جوزي ولبست شـال بيجي بطريقة حلوة، اخذت لابكوتي لان جان عندي عملي هم ورتبت وجهي بـ مكياج حيل خفيف واخذت موبايلي وايبادي وطلعِت
سُراج جـان كاعد مقابيل الدرج تقريبًا ف جان يكدر يشوفني، من اول مـا نزلت وهو عيونة مثبتهن علية بحيث ادنگ وارجع ارفع الگا يباوعلي
ماهتميت لنظراتـة ابد ونزلت وبكُل طاقة كلت
صبـاح الخير
جبُر
يــا صُباح العافية هاي شني اليوم منين الشمِس شارگة؟
امير
هـا اليوم شنو ترحين تداومين
شَمس
ايّ اداوم ما يكفي الي فاتني؟
امير
انة عود ماخذلج اسبوع
يلة ميخالف اروحن ويـاج اليوم الغيها
شَمس
ولو ازحمك بس هذا واجبك
كلت هيج بضحكة وهُمّ كلهُم ضحكوا
ماكو مجـال للزعل بعَد كافي لازم اكوم واشوف حياتي واعيشها بـس بطريقـة صَحيحة
صرت اكِل بـ حماس وبنفس طريقتي قبِل بالاكل، احط عكسي ع رجِل بابا واكل بعشوائية، سويت هيج على رجل عمو حَسن الي جان كاعد يمي وكعدت اكِل واستمتع لكلامهُم
جبُر
ايّ عفية عفية هجي اريدج اكلي ولج راح تغدين صفيرة
شَمس
لاجدو بعد كُلة اكِل حضر ميزانيتك راح تروح بـس للاشياء المالهة داعي
جبُر
عمي اذا هجي انة راضي فلوسي تروح للمالها داعي المهم تاكليـن
نظراتة تلاحكني بكُل لحظة وبكُل مـرة احط عيني ب عينة الگا يباوعلي بالطريقـة هيَ نفسها
كملت كلامي ورحِت غسلت ورجعت يمهُم، امير يسولف وي جدو وملتهي
شَمس
اميررر هم يلة ٨ الة
امير
اي دقيقة
كمل كلامـة وي جدو مدري ع شنو يحجي مُخصصات وراتب ومدري ايش
شَمس
اميررررررر ماضل وقت يلة
بهل اثنـاء نزل سَجاد مبدل وكاشِخ وكالب خلقتة
شَمس
حي الله ابـن عمي المسحول من نومة
فرك عينـة بنُعاس وانزعاج واتثاوب
سَجاد
انعل ابو الدوام منين جبتولنة هاي سالفة مادري مو جنت مرتاح عليش ورطت روحي
شَمس
هذا داوملة اسبوع هيج كام يحجي بنهاية دوام شلـون
سَجاد
منو كلج اداوم كل الايام والله يالله
سُراج
ايّ عود خل يفصلوك ما اوصيك
صالحة
يُمة تعال اكل
سَجاد
لا يُمة ماريد رايح
اوصلج وياي لو امير ياخذج
شَمس
ايّ يلة خل نروح امير شكلة يتعطل
سَجاد
يلة اطلعي واكفلج
طـلع سَجاد وكلت لامير رايحة وي سَجاد كلي اجيت كتلة لا هاهيّ رايحة ويـا
رحنـة سوية اني وهوَ بسيارتة، لان بـ ايام العُطلة اشتغل بس حتى يجمع فلوس اقساط لسيـارتة وانطة اول دُفعتين منهن ويضل ع شغُل ويلم وينطي اقساطة، جدو كالة رُبع مانطيك ولا واحد يطيك كون روحك بروحك وهوَ اعتمد على هـاي
انطلقـنا بالطَريق واجانا سُراج من بعيـد صار كدامنة
شَمس
اه الا يبرز روحة يسوي روحة هوَ ابو العضلات المحد يكدرلة ومحد يغُلبـة
سَجاد
هيَ سيارتة سريعة شيسوي الولد، انة لو عدي سيارة سُراج اظن اطير بيها ل غماس
شَمس
شنـو هاي غماس ويـن؟
سَجاد
بالصومـال
شَمس
ها اوكِ
ضلينـا نضحك بالطريق ونسولف حّدما وصلني وراح
طَبيت للقـاعة وماجان اكو مكان اكعُد بي غير كدام محمَد
اضطريـت اروح اكعُد هناكَ، بعدني ما مسوية الستول اريد انزلة حتى اكعد اجاني صوت حسين
حسين
الحمدلله ع سلامتج شَمس ماتشوفين شر ان شاء الله
ابتسمت الة وكتلة شُكرًا الكر
كعدت بمكاني واجة الاستـاذ مُباشرتًا وصار يشرح
كملنا مُحاضرة ورحِت للنـادي خابرت البنات حَتى يجن يمي، وصدُك والله التمينـا ثلاثتنـة وكعدنا نسولف
كملت منهن ورجعت لمُحاضراتي جنت مركزة تركيز تـام وماريد يضيع علية اكثر، بس لانُ احنة ب بداية الدوام ف ماجانوا منطين مُحاضرات هوايّ
كملت يومي بـ سلام خابرت امير كلي جايج
امير
اليوم مرتاحـة زايد
شَمس
ايَ الحمدلله احس من بعد رحمة كُلش ارتاحيت وطاقة فضيعة صـارت يمي
امير
رَحمة، رَحمة طاقة ايجابية قسمًا بالله
شَمس
امممم امير اريد اطلُب منك شي
امير
بالخدمة انة بس كولي
شَمس
انتَ مـرات تكون عندك مُحاضرتين وتخلص والاخيرة ماعندكياهة فَ تطلع، من تطلع عادي تخابُر سَجاد مو سُراج يجي علية؟
امير
هوَ ايّ بس خير شصاير بينج وبين سُراج
شَمس
ماصاير شي والله بس اني مارتاحلة
امير
ماترتاحيلة شني ولج
شَمس
لا مو الي ب بالك بس ماحب وجودة فَ اني نوبّ اذا حسيتك طالع اخابر سَجاد مو تخابرلي سُراج حباب
امير
وتالي وياكُم انتوا الثنيـن ترة سُراج يعزِج شَمس، بوكعتج هاي للصبح هوَ مساهِر وياج حتى دوام اخذ منة اجازة
شَمس
امير حـباب ماحب احجي بهل موضوع لا تغيرلي مزاجي
سكت اميـر كلت بكلبي
ايّ يساهِر وياي وهوَ جان المُسبب بكُل شي
اول مارجعت صليت و اكلت وبديت اقـرة حَتى اعوض الي فاتنـي، طبيت لغُرفة بيبي وجدو وجنت اقرة وحدي
مُضت الايام ع هذا المنـوال وخلص الاسبوع واني مستمرة ع نفس الروتيـن امير ياخُذني واذا ماكو سَجاد يضرُب مُحاضرة وبجي عليـة وبالبيت اضل اقـرة بغُرفة بيبي وجدو لان محد يطُب الهـا لحد الليل ولليل اصعد لغُرفتي
سُراج حضرتة وطلعت موبايلة من كُل تطبيق عنديا، وسويت انستكرام وحظرتـة نهائيًا
يوم مو الايام راسلت امير طلع عندة مُحاضرة ثالثة واني ماعندي مُحاضرة خلصنـا خابرت سَجاد كلي جايج، اجاني سَجاد وجـان حَيل ضايج
شَمس
شبيك سَجاد شو مو على بعضك
جاو بس يدخن وساكت
شَمس
هسة متحجي شبيك
سَجاد
شَمس سيوف موتتني موتتني من داومت لسة مغندبـة علية وعندها الدوام معناهة انة داير مداير البنات ومصادق بنات وعوزها مـا شتكول
شَمس
حقها يـا سَجاد شعور طبيعي انُ هيَ تغـار عليك
انتَ تفاهم وياها وخليها عندها ثِقة بيك
سَجاد
شلون شَمس شلون
شَمس
اذا انتوا حتى انستا ممخليها تسـوي خليها تكون موجودة تشوفك شلون تكضي يومك وي اصدقائك وهيج ترتاح
سَجاد
انستا شني شو اسكتي عمي هيَ هم احد اسباب التغندب هايّ تكلي نزلي انستا ونزلي فيس اني هم اريد نفسكم كتلها انجبي وبطليهن هسوالف
شَمس
شبي الانستا هسة اني موعدي
سَجاد
انتِ تعرفين شَمس طبلج واحد خاص تطي حظر كُبل وهاهي، هاي ذاك اليوم جابتلي موبايلها الصوت منصة من الاعدادات ماتعُرفلة
يطبلها واحد يحجيلة شو شني بوجهة ويخرب منظومتها الفِكرية صدِك تحجين انتِ شو اسكتي عمي قابل متدرين وكتنـا شكد طايح حَظة
شَمس
زين شلون تتعلم اذا انتَ مقوقع عليها هيج؟
شلون بعد يوم يومين تواجـه الحياة
سَجاد
انة موجود يمها، مو شغل المـرة تواجِه الحياة دام عدها رجال
شَمس
لا والله شهل تفكير هذا
بلة انتَ صار عليك قدر اسم الله عليك؟
شلون بيها ساعتهـا؟
سَجاد
عدها اخوان و ولد عم ينشد الظهر بيهُم ومايخلونا تعتــاز احد
شَمس
هذا التقوقع عليها غلططط سَجاد غلط
سَجاد
شمس ترة بت فُطيرة من اهل الله شتردين اخليها تشيل مسؤولية هيَ حتى روحها ما شايلة مسؤوليتها
شَمس
مو هيج بَس هيَ حتضل تتخيل سناريوهات مموجودة
فَ انتَ لازم تخليها مُطلعة بحياتك غير هيجي
صُفن وماحجـة
شَمس
فهمتني سَجـاد
سَجاد
راح اوكف يم المطعم والله احس روحي جوعان خل ننزل ناكل ونسولف
كتلة خـاف يقلقون علينـة كال ما نتأخر، عفت موبايلي وايبادي بـ سيارتة ونزلنة سويـة، جان ضايج حَيل وبنفس الوقت خايف ع سيوف بشكِل مُبالغ بيه
سَجاد
ماريد شَمس ماريد، ماريدها تشوف هل عالم ولا تشوف بشاعتة هيَ حلوة ونقيـة انة اريدها تضل هجي ومعنبلة علية من يوم الي كلتيلي حلو ستوريك لسة الا تنزلي انستـا
شَمس
خطية سـَجاد والله خطية نزللهيا وخل تتونس، سوي حسابها خاص وها اهـا وهم تشوفك وتفُكك مِنهـا
سَجاد
شمس بس انتِ ماجاي تفهميني!
انة خايف عليها يا بشر خايف عليها
شَمس
خوفك مراح يودي لنتيجة حلوة ابد
ضليت احجـي ويا واحاول اقنعـة انُ عُمرهـا هَسة تريد تجرُب كُلشي ف ما مفروض تحرمهـا حتى لا تنحرف وتسوي من ورانا اشياء، اقتنع هوَ لكلامي تقريبًا وضل ساكت ماكال شي
احنة طلعنـة الساعة بـ ١٢ فَ ضلينا لحد الـ ١:٣٠ احنة كاعدين ونحجي بدون مَلل
فتح موبايلة صِدفة وانصدم
سَجاد
العبببب حارگيني حرگ ولج ٥٠ مُكالمة من جميع الجهات
انداريت حَتى اشوف موبايلي، موبايلي ماكو
شَمس
عفتة بسيارة موبايلي
سَجاد
موبايلي صامت ولا ادري شني الوضع
شَمس
عـزا بعينك سَجاد امشي امشي هسة تلكي جَدو ميت خوف علية
طلعنـا سوية شوية بـ استعجال وسَجاد خابر زَعيم
سّجاد
الو هـا زَعيم
زَعيم
ولككككك سَجاد بيكم شي صايرلكم شي ؟؟؟؟؟؟؟
سَجاد
لا يمعود نزلنـة ناكل شبيكم
زَعيم
نزلتوا تاكلون بشرررررفك
حَسن
طيح الله حظكُم اعلى هجي عملة طيح الله حظكُم
جبُر
ولك سجاد جلطتنيييي انة اعلمك
سَجاد
ديلة هسة جايين يلة
جنت اسمع اصواتهُم وسَجاد حاصرتة الضحكة واني متت من الرّعبة
شّمس
سَجاد صدُك تحجي والله كلهة من ورااااااك
سَجاد
عمي ذبيها ب بلاي واسكتي شبيج خفتي هسة
فتحت موبايلي اباوع الكُل مخابرني
خصوصًا سُراج ١٢ مُكالمـة
رحنـة للبيت واني بايگة طن هوى من الخوفة
سَجاد
السلام عليكُم لمن رد السلام، والي مايرد لا سلام ولا عليكم
جبُر
من خِفى لهل صوتتتتتت ان شاء الله ولك انتَ شني شنيييي
الكُل كاعد والكُل متوتر
گُمز سُراج الي جـان گاعد وعيونة ناطة من العَصبية
سُراج
انتَ عقل ماعدك لو شني
ليش ماتحجي ليش ماتكول انة رايح لفلان مُكان
ليش ماترد اعلى الاتصـالات
وين جنت دايح
حَسن
ولك كلوبنـا ورجلينة ماتتت يالاغم
علي
ماخليت دورية ما ناديت بيها خـاف صايرلكم شي
امير
انتِ شمس مو بال١٢ طلعتي شنوو صار وليش لسة متاخربن
اني ضليت ساكتة ماحجيت ولا كلمة
سَجاد
عمي علكيفكم بيت جبُر علكيفكم اكلتوني حاصل فاصل هلكد انة عزيز اعليكم
جبُر
ولك ماتسوى بازة انتَ شني بس غير بت عمك وياك
سَجاد
انعم الله اعليك جدي
عمي رحنـا تغدينا واجينة عزمت
شني مايصيـر اعزم بت عمي مثلاً
سُراج
والله هـاي لطلطة زاااااايدة
جبُر
بويـة هَسة دخابر كولوا
سَجاد
شيخ موبايلي صامِت والله مادري بي
جبُر
وانتِ الاخرى ماتردين اعلى الموبايل
شَمس
نسيت موبايلي بالـ سيارة ومادري
جبُر
طيح الله حظكم اعلى هاي الدگة الناقصة ما اكولن غيرها
باوع لسَجاد هوَ يضحگ واني مغندبة وعوزي مابجي ع رزايل
سَجاد
والله انة ورطتها البت ما اعليها لا تبجي عاد انة اتحملكُم
كلهُم جانوا ضايجيـن ومعصبين خصوصًا سُراج، درت وجهي شفت سيـوف واكفة وجانت ضايجة
يعني حقهـا تضوج صراحة طالعة وي سَجاد و وحدنة شلون ماريدها تضوج
صرت يمهـا وكتلها تعـالي اصعدي وياي
سيوف
مـاريد
كالت هَيج بزعل وخلت وراحت للمطبخ
رحِت وراهة
شّمس
لـج سيوف تعالي خل احاجيج
سيوف
ماريد شَمس ماريد وترة لا اغار ولاشي بنهاية انتِ بنت عمـة ومن حقكُم فَ عـادي ماهتم
شَمس
انجبي ولا تحجين هجي وانطيني مجـال خل افهمج شنو سَبب تأخيرنـا حبابة لا زعليني عليج
دارت وجهة الي وعيونهـا بيهن دمع
بعدها ماحاجية سمعت صوت سُراج ورانـا
سُراج
ولج خل يولي لا تقهريـن روحج اعليّ
واحدهُم ما يسمع الكـلام لو دنيا تنگلب ويحسسوك انتَ غلط وبس هُمّ صح انتَ الهمجي وهُمّ المُنفتحين الي يدورون مطاعم حتى يتونسون
درت وجهي بعدم صبُر وعَصبيـة الة
شَمس
انتَ لو متدخـل مو احسلك؟
من واحد يطلب رأيك عود تدخل تمام؟؟
خزرني بعيونـة حيل وتقدملي وهوَ يصك ع اسنانة بعَصبية
سُراج
ترة انة مو سَجاد انتبهيييي واحجي وياي عدل
شَمس
اكُلك انتَ شتريد مني عوفني لا تدخل بيـة مالي خُلكك تـرة
درت وجهي عنة وجريت ايد سيوف
سمعتة صاح بـ اسمي بعَصبية ماهتيمت الة
اخذتها لغُرفة بيبي وطبيت
شَمس
سيـوف اسمعيني زيـن ادري هذا الشي غَلط والمفروض احترامًا الج اني ماسوي هيج شي بس انتِ تعرفين نيتي وي سَجاد شنو صحيح ؟
سيوف
صحيح شَمس اني مافكر ب ايّ شي تجاهكُم والله وادري كُلش زين يعتبرج أُختة وتعتبري اخوج
شَمس
معَ هـذا الانسان على من يحُبهُ غيـور ف اني والله صحيح جان المفروض احسب حسـاب هيج خطوة وتدرين بية اني ماتعداج ابدًا بس هوَ فجأة كال والتهينـا نسولف اخذتنة السوالف وماشفنا الوقت
من كتلها هيج باوعتلي وعيونها صارت تلئلئ من الدموع
شَمس
موضوووووعنـا جان عليج والله العَظيم
سيوف
ليش هوَ بحـالي مثلاً
شّمس
لا اصلاً هوَ جان ضايج علمودج وحديثنـا جان كُلة عليج صدكيني
حجيتلهـا ع الصار كُلياتـة حَسيتهـا فرحت وضل وجهـا بس يضحگ
شَمس
ف اني قنعتة اسويلج انستـا
سيوف
وفيسس هم
شَمس
ولج منو يستعمل فيس، فيس مال شياب
اسويلج انستـا ونشري وتونسي بس ها كُلشي بحدود يعني لا تجاوبين ع رسايل مجهولة و ولاشي اني قنعتلجيا
حضنتني سيوف بفرح
سيوف
شُكرًا شَمسس
شَمس
عيوني الج انتِ حجيتلج ويا ورزلتـة هم وكتلة تشاركهـا بكُل لحظة تمُر وياك بس انتِ هم خففي شويـة
سيوف تـرة سَجاد جد يحبج ومُستحيل يبدلج ب ايَ وحدة
سيوف
اوف مادري خـايفة لايصير شي ويتغير بس من اتذكر سُراج من طب للكُلية وطلع ورجع وخطب زينب ارجع ارتـاح
شَمس
ايّ حبيبي لا تخافـين اني متاكدة سَجاد مايزعلج يفد يوم
ومو تزعلين مني اماننننة والله العظيم وروح ابوية الحجي جان كُلة عليج والله
باستني بـ خدي بلطافة وكلتلي
سيوف
ماضوج من اُختي انة
حضنتهـا بلطُف وطلعنـا سوية نضحك
باوعلنة سَجاد وابتسم
وسُراج يباوع ويخزر
عابت لهل وجِه حَتى عابت
حجيتهـا بكلبي ورحِت يم جدو وبيبي
شَمس
اسفة جدو ما قصدي اخلي بالكُم علية والله
جبُر
لاجدي هو صوج موبيج بهذا المطي المايفتهم
ضحكت وباوعت لسَجاد
سَجاد
هاي بس ببيوتنا البنات اميرات والزلم مُظطهِدة
جبُر
عود صار مُحامي ويحجي بالمُظطهِد
سَجاد
جا شعبالك جَدي بعد كلكم تحتاجوني الله وكيلك وينة هذا النقيب
اسمعني علي بعد حركة منا لهنا متتحرك بدوني وبدون قراري اقرر انة وانتَ والباقين تنفذون فهمت
علي
ولك وعلي اكوملك هسة انعنع ضلوعك تنعنع
اكعد عدل ولكككككككككككك
صاح بي بصوت عـالي عدل كعدتة سَجاد لان جان كاعد ب اريحية ويأشر على علي وهوَ يكلة
سَجاد
بيت جبُر ما يتشاقة وياكُم شبيكُم أُنفـة
ضلوا يحجـون سويـة ويشاقـون جنهُم بعدهُم كاعديـن مينامون لان عدهُم مشية بـ ٣
خليت وصعَدت حَتى ابدل و وصيتهُم محد يكعدني لان حَيل تعبت هل اسبوع
لاحظت سُراج صعَد وراي وجان يخـابر ماهتميت
صـار وراي احس ارتبكت سرعت خطواتي شويـة
ماحس الا صـار كدامي، حَط الموبايل بجيبة وگال
سُراج
اريد احاجيج شَمس
شَمس
من بعـد كُل الي صار الك عين تحاجيني ؟؟؟
وخر عن طـريقي
سُراج
ضروريي احاجيج صارلي اسبـوع افتر وراج وما تخليني شهل اعناد غير اعرف شهل اعناد
ملامحي كُلهن تعكرن عفتة وردت اروح ع اليمين صـار كدامي رحت للجهة الثانية اجة كدامي
سُراج
مترحين كتلج اريد احاجيج كافي عنـادددد بحياتي كِلها ما شايف بت راسها يابس هلكددد
شَمس
ماريد احجي ويـاك ماكوشي يجمعنـا ويخلينا نحجي سوة
سُراج
وانة مُصر انُ اليوم نحجي وما اخلي السالفة تطول
شَمس
كتلك ماحاجيككك خوش
حجيت هَيج واني معصبة واباوعلة وعيوني تخزرة وعيونة تخترق عيوني خرق ع كد ما جنة معَصبيـن
عفتـة وشمرت ايدي بعَصبية وخليت ورحت
سُراج
كتلج اليوم تسمعيني يعني اليوم تسمعيني
ماحِس الا اخذ بـ ايدي ع السريع مالحكت اشهگ إلا وهوَ حاط ايدة على حلكي وبحركة سـريعة سحبني لغُرفتة ضل مثبتني واني اخزر بي واعيط بس صوتي ماينسمع لان ايـدة موجودة
سَـد الباب وبهاي اللحظة احس جنوني جَنت عضيتة من ايـدة بس الظاهر كانت بالنسبة الة نفس الدغدغة بحيث لا تحرك ولا تزحزح من مكـانة حَتى
سحبني للغُرفة وسد البـاب و وخر ايدة
شَمس
انتَ شبيككككك مخبللل لو شنووووو
سُراج
ايّ مخبللللل ايّ
انتِ خبلتيني قسمًا بالله عقِـل ما خليتي براسي مااااا خليتي
اسمعيني زين شَمس
قسمًا بالله قسمًا بالله اذا ماتكعديـن وتخليني احاجيج هَسة
شَمس
هسَة شنوووووو هاا هَسة شنوووو مثلاً
تروح لجدو تحاجي عليّ وتضل تهددني نفس زمـان !!!
سُراج
ما اهددج ولاشي انة بَس ردتج تجريـن عّدِل وفعلاً خليتج تجرين عدل
شَمس
اها يعني هسة انتَ أُستاذ سُراج الي خليتني اجُر عَـدل
سُراج
انتِ لو تضل بوراج غير قسمًا بالله تلعبين شاطي بـاطي
شَمس
شقصدكك اني شبيـة !!!!
سُراج
موووو لان نيتج سيئة يا بت الناسسس موهجي بس انتِ وحدة غبية غبية
شَمس
لا تكول عني غَبية و وخر عني اريد اطلع
صـار كدامي بسرعة و خزرني بعيونـة بطريقة تخوف
سُراج
شوفي شَمس وحق الحق العب جولة اذا ماكعدتي وصرتي خوش بنية والله العظيم ماعدي مانع اخلي الكل يسمع ويجون ونتفاهم يمهُم اسكتي واكعدي يلـة
عصبيتـة جانت مُفرطة وشكلة يخوف شوية
وكفت وكتفت ادية ودرت وجهي
شَمس
يلة احجي شتريد
سُراج
اكعدي خل نحجي
باوعتلة وكتلة
مـاررررررريد احجي خل اطلع
سُراج
اكعدييييي خل امسلت خل احجيييي
كعـدت بتملمُل سحب كُرسي ميز التواليت وكابلني، درت وجهـي عنة وهو بـدة يحجي
سُراج
شَمس انة مـا ظلمتج كد ما انتِ ظلمتي نفسج خلي بالج بهذا الشي، انة رجـال شروگي تعرفيـن شني يعني شروگي لو مـا تعرفـين ؟؟
تدرين لو غيري شايـفج هَجي من اول مرة شيسوي ؟؟؟ تدريـن هنانة شيسونن لو ماتدريـن!!!
يكتلوهة يكتلوهة بـسررررررعة
ولج انة نبهتج، مرة ثنين ثلاثة يا بت الناس يا بت العالم مايصير والله مايصير رجال متزوج خلّة يولي مدري شني صار بعينج؟ لا ماصار وشسويتي رجعتيلة بكِل سهولة
زين انتِ من سويتي هجي شلـون تردين من عِدي أامن بيج بعَد ؟ شلون ترديني اثق بعد مـا مرتين نبهتج وسويتهة؟؟؟؟ شلـون تردين شلون؟؟؟
انتِ لاعمي واكف بعينج ولا امير وعلي وكفوا بعينج وانة هم فوكاهِم مرتين ما وكفت بعينج اريد اتأمل بيج بعَد تنلزمين؟؟؟؟
جان تهتي الله وكيلج جان تهتي
ولو لغيري؟ قسمًا بالله بنفس اللحظة يكل لجدي وطزززز شيصير بيج خلّة يصيـر، بس انـة ضَليت ساكت وبالعها بـ زردومي
تذكرين من تعـاركوا وياي بسببج تذكرين؟؟؟
تحملت حجي منهُم وتحملت تغير وابوي ضربني بس لان احجي اعليج، بس همة مايدرون ليش انة احجي اعليج وشني الي ضامة بكلبي اعليج
وكل هـذا وسكتتت واني الي تحملت مو انتِ
وانة رحت ودست على راسة لهذا الاثول
ومنعتة كُليًا بطريقتي الخاصة
وجذبت عليج من كتلج ازوجيٰا والا انة شني اطيج لهل كواد هذا
بـس ردتج شوية تحِسين على اروحج
شَمس
تكدر تبرررلي ع كُلشي بس متكدر تبررلي الخنگ الي خنگتنيا بالجامعة متكدر تكُلي ايّ شي
سُراج
شَمس ثقـتي بيج انعدمت تعرفين شني انعدمت؟
موزين من عدي والله يعمي زيـن وتفهم من عدي من خليتج تداومين جامعة ويا، انة لحد هسة صافن شلون اقتنعت مادري الله هداني اظن من بعد ما ركضتلج بال١٠ ايام انة اركض بين جامعتين حتى يسولي نقل وما سوالج ايست وكلت اخليها تبطل ولا تداوم ويـا بس شلون خليتج مادري
ف انة دوامج بحد ذاتـة بالنسبة الي مسوي جميل اعليج
شَمس
هه اي صح جَميل هاي بس يمك هيج
سُراج
بس يمي ؟
هسة انتِ مو عدج جدي وابوي و سّجاد اخوي اكثر ثلاثة تحبيهم ويحبوج؟ دخل يلكفج واحد بيهُم مسوية هاي العملة والله يا شَمس والله راح تحسيـن بشكد انة اهون بميتتتتت مـَرة
ولج تدرين جدي لو درة بيج شيسوي لو ماتدرين؟؟
لو مو تصيرين شمس لو تصيرين منوووو هَم، هم مايهتم الج ويزوجج ايا وغصبًا اعليج حتى طلاك ما تطلكيـن من عدة وهذا كلة اهوووووون من ثگل الوجه الراح يراويجيا
اما سـالفة المُراقبَة ف انة ما جنت اكدر اعوفج وحدج ابد، وُغم كِلشي وبنفس الوكت انة ادري بيـج مالج احد هناك فَ صرت واضح وياج من البدايـة وكتلج يابة ترة اكو واحد جاي يراقب كب تصرفاتج حتى يصيـر براسج انُ انة من اليوم وجاي ايّ تصرف تصرفي انة فوك راسج بي واخليج تحسبين حساب لكلشي تسوينـة وهذا صار طبعًا ..
من گال هجي رفعت راسي وكتلة
شَمس
شكددد اناني لعد تهتم لنفسك وماهتميت لشنووو جان راح يصيرلي اني كرهتك كرهتككك وموبس انتَ كرهتك حتى نفسي كرهتهـا من وراك، كلشي بية مات من وراك
ضليت امشي واتلفت، فقدت طعم الامان وحسيت بـ بهُتان ب كُلشي حوالية من وراك وانتَ تكلي الي ردتة صـار!!!
سحَب نفس ورجع زُفرة وگال وهوَ يحط عيونة بعيوني
سُراج
صـحيح ما انكر انُ انة تعاملت بقساوة وياج لدرجة انّي نسيت كلشي ونسيت شمس الرقيقة واحتاريت بس احافظ على شَمس وهاهي
شَمس موبيدي كِلشي صار انتِ وصلتيني لهنانة وداعتج
لو تسأليني هَسة متندم؟
راح اكلج لا
شَمس انتِ جبرتيني جبرتيني
كمت وكفت بسـرعة وكتلة بعصبية
شَمس
يعني اذا ما متندم المن جايبني لهنا!!!!!
سُراج
جبتج لانُ اريد اكلج كافي هاهيّ
خل نمد ايـد الصلح وخلي كلشي ينثدر
خلي الماضي يضل ماضي، واحنة ولد اليوم
احسبيني حسـاب ابن عمج اخوج ايّ شي واسمعي كلامي وبَس ماريد غير شي
شَمس
لا والله بهسهولة ترة اني صارت بية سكتة دماغية من وراك تعرف شنووووو من وراك!!! وانتَ هسة جايبني تكلي ما متندم بس بنفس الوقت تريد تسوي الامور طبيعية
انتَ بيك خلل!!!
سُراج
لا عاد تكوليـن بيك خلل بيك خلل كافي
شَمس
يعني ترة انتَ أذيتني و أذية جبيـرة وهسة جاي حتى اعتذر تستكثرة علية؟
سُراج
بنفس الوقت انتِ أذيتيني وهم أذية جبيـرة وبس الله من فوك يدري بشني مَريت
شَمس
هههههه ليش بشنو مَريت ها ضگت الي ضايگتة
خزرني بعيونـة وكال بعَصبية قاتمة
سُراج
واكثرررررر بعَد، مسؤوليتج صعَبة شَمس انتِ امانة برُگبتنااااا
شَمس
الامانة تسوي بيها سكتة دماغية
سُراج
انتِ زودتيها انتِ رقيقة زايدددددد هسة انة شسويتلج قابل؟
شَمس
لا شسويتلي بس عايف وحدة تراقبني منو هاي بلة !!!
سُراج
وحدة مو وياكُم خارج القسِم اصلاً
شَمس
والله فضحتني فضيحة
سُراج
لافُضحية ولاشي كتلها هاي البنية احبهـا وماعرفها واريد اعرف تفاصيلها وكتلها اذا تكدرين تساعديني فّ البنية مكالت لا وهيَ اصلاً مو دائمًا هيج من اكول الها تروح
شَمس
والله قرف والله قرفففففف
سُراج
انتِ الحطيتي نفسج بهذا الشي فَ اكلي
شَمس
مُستحيلللللل انسى الكلمات الي حجيتهن بحقي مُستحيل
من تكلي انتِ تصيرين حلوة بعيوني
ومن تكلي لارتقارنين روحج بـ زينب
ومن تكلي الله يعلم نيتج شنو وي سَجاد
ومن تكلي حولتي ع محمَد
ماراح انسى كلماتك ماراح انساهن
سُراج
شَمس كلهِن نحجن بوكت عَصبيـة وبسببج حجيتهن لج والله طيرتيلي عقلي، احس تفكيري صار بيج ٢٤ ساعة جنت
بس اريد الزمـج وخايف من كلشي خااااايف لدرجة مرة ردت اكعدج وهاهي اخلص مـن القلق الي معيشج بي ومعيش روحي بي
شَمس
هسة شتريد سُراج شتريد
سُراج
مارايد شي غير كافي الي بينـة خل ينتهي
شلون ماتحاجين الولد حاجيني
والله حلوة هاي شبية انة وبس تخزريـن بية ومتجاهلتني !
اشو سَجاد ما شاء الله حتى مطاعم وطلعات سوية مكضيها
وعلي واميـر بعد عيني وبعد كلبي
وزَعيم وغَيث هم نفس الرطينـة
جا انة ليش ليش ؟؟
تكلين لامير انة ماريدن سُراج ياخذني نوبّ خلي سَجاد
هلا هلا طنچرة واگت غطاهة انتِ وسَجاد
يا سُراج يا دنيا
عداوة لا تشدين وياي شَمسس لا تشدين
لان كلما سويتي هجي كلما اركب راسي اعليج اكثرر والله
شَمس
سُراج احسن شي اني بطريق وانتَ بطريق
لا انتَ تتراهم وياي ولا اني اتراهم وياك
ماكدر اطيقك ابدددد خصوصًا بعد كلامك ومُقارنتك وتشكيكك
تذكر من كتلي لعبت نفسي منج؟
اني هم خلاص
سُراج
يعني ماترضيـن بالصلح ؟
هزيت ب راسي بـ لا
سُراج
خوش براحتـج
كال هَيج وسوالي مكان حتى اطلع لان جان مقابيلي، طلعت بسرعة من الغُرفة واني مفورة من العَصبية
يعني هوَ جايبني حتى اعتذار ما حاول يعتذرلي
شكَد أُنفـة ياررررربيي
عفتـة ورحت لغُرفتي نمت ماكعدت الا الساعة بـ ٩ ميتـة من التعَب ميت مرة كعدتني سيوف بيبي تصيحني بس اني ماكعدت
يالله من بيبي شكد اكول الها اريد انام ارتاح تكلي مايصير دنيـا المُغرب تتوزع الارزاق
كعدت واني اطوطح من النُعاس وجوعاااااانة حَيل اريد بس اكل، لاكوني علي وسُراج واكفين يم غُرفهم وهُمّ يضحكون سوية ويشاقون
واني امشي وعيوني كوة فاتحتهِن
علي
منين اكو شَمِس تكعد بليل
شَمس
احتار ب ايلولك واسكت مالي خُلك
ضحگ وگال
علي
اخخخخخخخ ياااابعدكلبي صارلنة ساعتين متعاركين خل اروح اجلطها
ضحگت ومشيـت دانزل من درج، حسَيت بسُراج ينزل وراي
سُراج
ديلة ميت سنة تنزلين
درت وجهيّ الة واني احس نفسي مو بوعيي
ضليت واكفة واباوعلة
شَمس
تؤ استغفرالله والله اذا تريد تنزل اتحمل البيت مو الك وحدة اني هم وريثة بي
كلت هيج بتملمُل وخليت ونزلت علكيف
سُراج
هههههه استغفرالله الهي
الدرجة الاخيرة احس عيني علستهـا وكمت اشوفها الكاع نزلت واني من ذيج الدرجة ماحس الا اتمزلك بسرعة
ردت اوكع لزمني سُراج من ظهري
سُراج
الله الله الله الله ههههههههههههههه
گال هجي وهوَ يضحگ
جبُر
هاولكم شمالكم
فزيت من نُعاسي باوعتلة خزرتة وهوَ يضحگ
سُراج
ادري سكررررانة لو شني
شَمس
دهدني هدني
سُراج
بس اهدج اكسررررج
شَمس
مرتين دخلتني عمليات ضلت ع ثالثة؟؟
ضحگ بوجهي حَيل
خزرتة واني اكلة
سُراج
نرجسي مخبل
عدلني بسرعة وكفت ع حيلي استعيد توازني ونزلت
سُراج
ثولة تمشي وهيَ نايمة و وكعت همزين انة موجود
شَمس
همزين هوَ موجود جان سويت عملية ظهر ثالثة
جبُر
شجاج يجدي شجاج
صالحة
هاي من نوم ولج مو البت تكعدج ماتكعدين
شَمس
بيبي غير كتلج ماريد اكعد خليني براحتي صارلي اسبوع مانايمة زيـن بسبب التراكُمات
صالحة
ولج بيبي موزين هسة شينيمج بليل
شَمس
لا نعسانة هسة انام
هلو عمو شلونك شو صافن اليوم
اجيت لعمـو حَسن الي جان صافن ابتسملي وفتح ايدة رحت كعدت بحضنة
شَمس
شبيك عمـو شو مدري شبيك
حَسن
لا والله يعمي هجي ب بالي حَسبة
سُراج
خيرك بويـة
حَسن
خير يصيبك بوية ماكوشغلة هجي
باوعت لجدو بـ استفهام، مو من طبيعة عمـو هجي
هو دائمًا يضحك ومتفاعل خصوصًا وياي
جبُر
هسة دكلي وصحصحي وتعـاي ونحجي
من كالي هيج احس روحي خِفت
شَمس
شكو شصاير عمو حبيببي بيك شي !!
حَسن
لا بوية شبيج بعد ابوج والله مابية شي بس شردت شويـة اعلى مُستقبلج
احس كلامهُم مُبهم وماجـاي اعرف شنو الي يردونة بالضبُط
كعدت ع التخُم وكتلهُم
شَمس
احجـوا داسمعكُم اني ؟
جبُر
دكومي اكلي وتعاي
شَمس
لا جدو ماشتهي احجـي
جبُر
جَــدي انة بوكت مٌا اخذت بيبيتج من اهيلتهـا هُمّ جانوا نـاس غربة اعلينا، احنة من عشيرة وهُمّ من عشيـرة ثانية بس انة اخذتهـا بعَد ونفس ماتكولين بزور عن اهيلتهـا
فَ هُمّ من بعدها عرفوني انة شنو وحبوني، وصارت عِلاقتنة حلوة من بعـدها، ولمن كبرتوا انتوا، مجبِل يمشي ويصيح انة اريدن وحدة من بناتك الي
وانة اكلة كل بناتي محجوزات لولد عمهن فَ هوَ رجال يسكت، بس من شافوج اصروا ومن رفضت زعلوا وعاتبوني وكالولي ليش جـا بس احنة ؟
وانتَ عود واعدتنة، انة صدك عود واعدتهُم كتلهم لو صارت عدي بنت اطيكُمياهة اتشرف بهذا الشي
فَ هُمّ رايديج جدي، والولد هَم قانع ويكول انة شفتها وهيَ خوش بنيـة ومجبِل هسة اليوم بالمشية كدام العالم كِلها كالي انة رايد وعدي منك وبتكم انة رايدهـا
ماكدرت اكلة لا بعَد لان جلامة جان بين مجموعة زِلم يعني لا عِشيرة ولا ثنين اربع عِشآيـر
فَ انتِ يابوية قطعة مني وانة صدِك بعدني ما شبعت منج بس انتِ هم كُبرتي، وحياة البت تكملها بـ بيت رجلها وهاي قسمة زينة وما تتعوض
صالحة
والله هوَ كال حتى دراستها تضل اعليها هوَ اصلاً يريدلة وحدة تدرس ومبين عاجبتي انتِ حيل يكول مرباية ومأدبة حجالي هوَ يكول لاكيتها مرة سلمت عليها عينها مارفعتها اعلية ردت سلام وخلت وراحت فَ هوَ رايدج ي يُمة والقسمة الزينة تجي مرة وحدة فَ انتِ شتكولين؟
هُمة يحجـون واني مصدومة شجـاي يحجون هاي !!!
سُراج
وهوَ هذااااااااا قُنــدررررررة محمَد شلونننننن يجرأ ويكووللللل انة شفتها
صالحة
ياااااا برد شرك هسة هوَ شكايل
كال شفتها وسلمت اعليها بيها شي شيخ
جبُر
لا مابيهـا شي بعتبار قريبها والسلام ل الله هُمّ ماكاعدين سوة حتى نكول لا ومايصير
سُراج
تررررة مايصير هذا الحجـي ولدنة هسوالف
جبُر
شني ولدنة الناس رايديهـا وطالبيها بالحلال ولدنة ليش
زَعيم
والله انة اكول محمَد خوش محمَد وانسان مُثقف وخلوق
هُمّ يحجـون واني مامستوعبة شي هذولة شجاااااي يحجون صدك عود
شَمس
جدو ماريد اني ما مخليـة ب بالي فكرة زواج اساسًا
اني بعدني صغيـرة
جبُر
جدي هيَ ماكو صغيرة بعد صرتي ٢٠ انتِ هاهيّ
شَمس
بس جدووو اني ماريد ماكدر والله بعدني صغيـرة
جبُر
جَدي انتِ تمشين وراي لولا الولد خوش ولد من الاخير ودكتور حالة من حالج
سُراج
جَدي شبيك
جبُر
انتَ الشبيك؟ شو هذا مادري شمـالة قابل انتَ المخطوب لو هيَ، هيَ تشوف روحها وتحجي انتَ ليش جاي تنگز
شني تريدهـا وانة مادري ؟؟
سُراج
صحيح حقك اعلية انة شدخلني اساسًا
هيَ حرّة نفسها
كال هيج وخلة وكعد ولزم موبايلة بعصبية واني احسني مصدومة
جبُر
شكلتي جدي
صالحة
يُمة والله ماتلكيـن احسَن منهُم صدكيني
شَمس
لا جدو حباب اني ماريد
جبُر
و وعدي يشمس ؟
شَمس
جدو ليش تحرجني هيج
جبُر
انة ماجاي اطيج لياهو ان جان حتى انكول ميخـالف انة جاي احجيلج واقع بوية
الولد خوش ولد لو موخوش ولد ماكلج حتى
حَسن
والله يعمي خوش ولد دكتور وبيـت وسيارة واخلاق وكِلشي
صالحة
وعلي شاريج يَ شميسة واذا اخذتي يدللج دلال
شَمس
جدو ترة دورة سنَة بابا لسة مادايرة تدري لولا؟ ماصارلة من ٧ اشهر من توفـة شلون تخطون هل خطوات هسة
جبُر
موهسة جدي هسة بس حجي وبعدين ان شاء الله كلشي
شَمس
مادري جدو مادري لا تنتظر مني جواب اني هسة مصدومة والله
جبُر
جدي يريد جواب مني باجُر
شَمس
جدو بهسرعة!!!
جبُر
ايّ جدي طلبج مني يم ناس ويريد جواب يمهُم هم وباجر مشيتنـا على هاي طلابة ف كالي اريد جواب وياك باجر فَ فكري بهل موضوع ورديلي خبَر
كعدت واني صافنـة وماعرف شنو احجي حَتى، محد من الولد جان موجود غير زَعيم وسُراج
رفعت وجهي لسُراج لكيت سُراج كُتلة مال اعصاب ويهز برجلة ويباوع لموبايلة
احس روحي مامستوعبة صدمة حَتى
ولا بعُمري تخيلت ازوج هسة بهالعُمر هذا خصوصًا بعد طيحان الحظ الي جِنت بي ..
بديت افكِر بمحمّد، مابي شي ومبين صدُك خلـوق وحباب ولوك كُلشي وسيم
يعني عود معقولة ؟
والله مادري ..
مضة الوكت وبيبي حطتني يمهـا وتحجي براسي وعدهُم هيج وعدهُم هيج
كوة فلتت روحي منهُم صعدت فوگ وسيوف كالت اريد اشوفة صار عدها فضول
طلعت ع الـ انستا حاولت الكي ما لكيتة طبيت لحساب جامعتنا لقسم الطب العام لكيتـة
كعدنة اني وسيوف نشوفة وسيوف تكلي والله شخصية وحلـو
منشوراتة اغلبهن بـ صالة العمليات ونصهن فسلفة وكُتب مبين عليّ انسان راقي
جنت متحيرة ومادري شسوي وسيوف كعدت تكلي
سيوف
ولج يدللون المـرة لا عبالج نفسنة نسوانهُم سيارات اخر موديل ويطبن ويطلعن بكيفهن محد يكللهن وين ماوين
احنة هنـانة خيرهُم امير شوية يمشي ويطلع ماينغُص عليج الطلعة
وعدهُم كُلشي عادي وطبيعي وتكدرين ماتلبسين عباية اصلاً بت ماجِد اخوهُم تلبس بنطرون وقميص طبيعي يعني فَ والله ما يتفوتون لو جاي خاطبني اني يا سَجاد يا دنيا
ضحكت عليها شلون تحجي بحماس
بنفس الوقت السالفة صعبة عِندي
احس روحي ستوني طالعة من تجارُب ماكدر اجرُب بعَد ..
صارت دنيا لليل والاغلبية ناموا، واني ع نستلة اكلتهـا بَس، نزلت حتى اكل حميت بالميكرويف الخُبر ماحسيت الا ع واحد حاط ايدة ع حلكي من وراااي
جفلت وجسمي كُلة اتكهرررب للحظة حَسيت حرامـي
درت وجهي باوعت سُراج كدامي
شّمس
هاي شبيك مخبلللل جفلتني ليش حطيت ايدك ع حلكيي عبالة خاطِف
سُراج
اششششش وتعـاي بسرعة ..... يُتبعععع توقعاتكُم
________________
روان
روان
والناس علي وجدي وهوَ
علي
طُز بكل واحد يحجي وانعل ابو الي يحجي بيج لو يمسج بحجاية وحدة دامج وي علي راح تعيشين وتضلين عايشة بـ زودة وابن امة وابـو اليحجيلة كلمة ويـاج
روان
علي والله متحيـرة متحيـرة
علي
اصفيلج على رآي وحاجيني وانة ويـاج بكل قرار تاخذي
رحنـة للبيَت سالوني ع مروان كتلهُم زيـن وماعندهُم شـي
الظاهر واصلهُم الخَبـر على مروآن لان هوَ اساسًا جان ناشر على الفيس فَ جدي جان شاك انُ سبب جيتي الولد
لزموني جَدي وبيبيتي و ابوي وامي يحجـون علية انتِ رجعتي بـ ارادتج فَ لازم تتحملين ونفس ما هوّ انرزق انتِ هم لابُد بيوم تنرزقيـن منة
جبُر
لا تكونين انانية يبوية وتوكفين بوجهة المفروض تباركيلة وتتمنيلة الخير مو تصيرين ضِدة
روان
مـاصايرة ضِدة انة جَدي
جبُر
ايّ هاهيّ بويـة صيري يوم يوميـن ارتاحي وروحي المُهم ماتهدمين بيتج بنهاية الرجـال شاريج ورايدج
كتلـة ان شاء الله وسكتت بس جـان مبين علية شكَد انة مهضومـة وزعلانة، فتحت موبايلي لكيتـة مراسلني
مروان
فاگدج انة، البيت خالي بـدونج
ماحبيت هذا تصرفج مـال ترحين وماتكليلي وهجي بهل فجأة
بس ميخالف مدللة انتِ
شوكت ماردتي اجيج اجيج بس منـا لباجر حدِج روان مو اكثر ابـد
كِتل راسي التفكيـر واحس روحي تعبت وانة بس افكِر كلت لعلي ياخذني يذبني يـم رّحمة رحت يمها وصرت احجيلها ب الي صار من بعدها بالتفصيـل المُمِل
رَحمـة
زين اني صح حَسيت انُ راح يصير عندة طفِل بس مادري ليش جنت متاكدة انتِ الي راح تكونين أُمـة حسيت انُ انتِ الي حتقدميلة فرحتـة مو احد ثاني
روان
شلـون رّحمة شلـون بربج ماهيَ صارت بعَد وصدكيني بداخلي فرحانتلة متصورين شلون فرحان هوَ بس شلون بية شلون بنار كلبي شلـون؟
رَحمـة
خُطية والله روان جا شتسوين بعد انكتبت عليكم
روان
الصوج مني علي كال والله كال
كتل تتأدين عاندتة وكتلة لا
رَحمة
شوفي روان اني مؤمنة انُ كِلشي يصيـر ما يصير عبثًا
وايّ شي يصير مهما بدا سيء بنسبة النة هوَ لابُد وحتمًا جواتة ميت شي وشي، الخيـر موجود وخصوًصا خيرج انتِ، انتِ بس اصُبري لعلهُ ألم ورى شي بي راحة الج
روان
شلـون هَيج ارد افهم شلون رَحمة
رَحمة
مادري بس اني متاكدة من بعد هل حدث اكو راحـة الج، فَ انتظري وشوفي شنو الحُبكة من هذا الموضوع كِلة
روان
زيـن افتحي القُررآن وشوفي حبابة
رَحمة
راح افتح واكلج من وراهة خَير لو شَر بَس
كامت توضت واستقبلت القِبلة ومدري شقُرت
خمس دقايق هيَ بس تُقـرة فتحت الكتاب كلت بسم الله
رَحمة
بسم الله الرحمن الرحيـم
إِنَّ ٱللَّهَ لَا يَظْلِمُ مِثْقَالَ ذَرَّةٍ ۖ وَإِن تَكُ حَسَنَةً يُضَـٰعِفْهَا وَيُؤْتِ مِن لَّدُنهُۥٓ أَجْرًا عَظِيمًۭا
يُمكِن تحسين الجـاي يصير خسَـارة بس يجوز هوَ يكون بداية للخير
هاهيّ روان توكلي ع الله اكوشي حـلو بالطريق راح يسعدِج وكولي رَحمة كالت
من كالتلي هجي احس طمنتني
رجعت للبيت راسلني مروآن مـرة ثانية
مروآن
وينج مشتاقلج شو مختفية
روان
امممممم جنت يم رحمة
مروان
مني جابج ومني الاخذج سن روان شو انتِ ترحين وترجعين بكيفج
روان
علاوي اخذني وعلاوي رجعني
مروان
هم علاوي اسمة عليييي عليييييييييي
روان
عود صدك تنغث لو شقة؟
مروان
والعباس انغث والعباس
كلت بكلبي لو يدري علاوي شلـون اليوم يكلي اطلكي منة جا تنتهي السالفة
گضيتهـا وي اهلي متونسة ومدري شنو
لل ليل تقريبًا
اجة علي كلي شقررتي كتلة لا ابقى
علي
خوش بس موتجيني بعدين اهئ اهئ اريد اطلكككككك
اطرج طر والعباس انتِ ورجلج المابي حظ
روان
ها ها خيررررر ليش رجلي مابي حظ
علي
لو بي حظ جان خلاج بيج حظ بس مابي حظ
روان
جا انتَ اخوي صارلك وياي اكثر ماسويتني انتَ بية حظ دامك انتَ بيك حظ
علي
لا بالله حگِج بهاي
ضحگنـا بصوت عالي لليل صعدنـا اني وسيوف وشَمس نحجـي بهل اثناء راسلني مروان
مروان
اردنـام وشو ماكدر جاي احوس عليج
اجي ؟
روان
لا والله كاعدة وي البنات نضحك ونسولف
مروان
حبابة ارجعي شبيج تذليني بيـج قابِل ؟
خل اجيج
روان
شبيك ماشفتهُم بعدني حتى الولد نص شفتهُم ونص لا
مروان
بتتتتت الاوادم وانتِ شني اميمتهُم الجبيرة مخلفتهُم وناسيتهم ترة اخوتج كلاثة اذكري هشي روان
روان
ضل معصب عود اني ردت اكلك تعال
مروان
روان هواي تمسلتين يلة جاي والي يسالني اكلهم هيَ خابرتني
روان
تعال وانة اذا كلولي اجة اكلهم مادري بي وحدة
مروان
تكسرين كلامي يعني
روان
كلامك مراية واكسرة
مروان
بوللة ماينكدر للسانج بس مامعقولة ماكوشي يردعج
دنتظريني
ضحكت ع كلامـة وبنفس الوكت ماخذتة ع محمَل الجد، مرت اكثر من رُبع ساعـة وخابرني
مروان
اجيت افتحولي الباب
روان
هاي صدك تحجيييييييي
مروان
والله جا اتشاقة وياج قابل
والا اكلج روحي ووحي هذا مدري مني اجة يفتحلي الباب
اكيد شافوا بالكاميـرات وطلعولة خَليت شال ع راسي ونزلت مطببي بالصالـة وكاعد وياهُم جانوا موجودين زَعيم و سُراج وعلي وامير
روان
هـا جا شعجَب اجيت مو على اساس لباجِر؟
مروان
غير انتِ كتيلي تعال شني نسيتي ؟
حجـة بعصبية قاتمة مخفية وما واضحة بس انة اكدر اشوفها
ماكدرت اعاند اكثر منظرة يخـوف وكعدتة بعَد اكثر تخوفني
روان
ها صحيح نسيت
علي
شني عمي انتم تضحكون اعلينا لو تضحكون اعلينـا
مروان
لا بس هي صايـرة تنسى شو
يلة روان جهزي نفسج خل نروح
ماكدرت احجي شَي شكد حقير كال اجي يعني اجي
خليت ورحت جبت غراضي واجيت
تلگاني علي يم درج همس
علي
برضاتج؟
هزيت راسي بـ ايّ
علي
يلة واذا صار ايّ شي حاجيني
الزمي بيتج وصيري خوش مرة رونة
باسني من راسي ورجع باسني بخدي وحضني
علي
جاي يتنوعلنة مووو
روان
عيونة راح ينفجرن من العصبية
علي
حيل يستاهلللللل
الحمدلله اخوان ايلول مو هنا جان نجلطت
ضحكنـا ثنينة مروان كام وكال بصـوتة الخشِن
مروان
ما شاء الله على الاخـوة الله يحفظكم ويديمكم
علي
اكثر واكثر ان شاءالله ببركة دُعائكُم و وجودكُم شيخ مروان
مروان
الله يسلمك حبيبي بس شويـة حاول تستوعب انُ اختك هيَ اختك انة وياك ماكايل شي بس شوية مسؤولياتها كثرن وصارت مزوجة
ابتسم علي وگال
علي
فَ يعني ؟
مروان
فَ يعني انة رجال اغارن اعلى مرتي اذا بيها مجال شوية تخففون
گالها وهوَ يسحب ايـدي ويخليني بسِدة ابتسمت وعلي ضحگ بخُبث
علي
مُشكلتك هايّ نفس ماهيَ مرتك
هيَ لبوتي
مروان بجديـة
لبوتك قبِل هسة هيَ مرتي
زَعيم
مالك حگ عليّ عمي ترة حگة الرجال يغار اعلى حُرمتـة
اندار لزَعيم وگالة
مروان
ابـن اصول انتوا، بس علاوي شويـة يحب يشاقة وياي
بس شقا ثگيـل
ضحگنـا كل احنـة اعلى حجيـة وخلينـا وطلعنـا
ركبنـا بالسيارة والولد بالباب طلعوا ورانة جانوا فَ ضل هادئ حدما حرك سيـارة
مروان
شايفة شنـي يعني يحرگني حرگ هذا اخوج يحرگني حرگ وفديوم اذا عاد هاي حركاتة يمي قسمًا بالله اطيحة بالگاع
اتنوعتلة يحجي بجـدية
روان
هاي شبيك عود ترة يشاقة
مروان
ماكوشي اسمـة شقة وياي!
انة كتلة اليوم حجي ب بساميـر وان شاء الله يفتهم
وانتِ هم شوية لا تزحزحين وثگلي
تعرفيني مارضى
روان
تـرة اخوي عادي هيَ هاي علاقتنة بس انتَ لان ما مار بيهـا ماتعرفها
مروان
روان شو سِكتـي لخاطر ربج، ويـن اكو لهاي الدرّجة هاي
انة مارضى مارضى يـا بت الناس مارضىى كافي عاد لا تعصبيني لان صدككك فرِت هَسة
اتنوعلة يحجي بعصبيـة ويصيح بصوت عـالي وكانهُ فعلاً هذا الموضوع نرفزة لهاي الدرجة
فتح جامة السيـارة و اول دُكمتين من الدشداشة وصـار يستغفر ابتسمت بمكُر وضليت كاعدة برهـاوة
مروان
احجيلج شي كول هل كلب ابـن ال .. استغفرالله ماريد اجيب ابوي وهوَ بكبرة كولي هل آدمي هذا هل حيوووووان هـذا يغارررر ميت مرة كالي ميت مرة نبهني
لج غرسِت اضافري بـ ادية في سبيـل اتحمل واسكت مادري شلون سكتت والعباس مادري
روان
ايّ شسويلك انتَ تغـار يعني قابل بعد ما تشبگي اخوي ؟
مروان
ايّ ما تشبگي ممنوع هل سوالف الزايـدة حدج ومحدودج سلام غيـرة ماكوووووو يروآن ترآج تندمين
باوعت لوجهة والابتسامة الجانبية بعدهي مرسومة ع شفايفي
وحجيت بصوت خافِت
روان
وشسوي يعني
احجي والعب بـ شراشيب الحجاب تنوعلي وضـل مركز بعيوني
بلعم وگال
مروان
لا انتِ ناوية تجلطيني
روان بضحكة
يااااا هَسة انة شسويتلك والله عجيب
مروان
اخوج شعلني نوب عيونـج خدرني
روان
ياااا شمالك تسودنت
مروان
سودني حُبج، ساعة تصرفاتج تشعلني، وساعة عيونج تهديني ومادري شلون بيـة
روان
انتَ السودنتني شلون بية حيل طحتلي بحُب شايب
مروان
وشبي هذا الشايب ماعاجبج ؟؟
روان
ماعاجبني غصُب عني شسوي
اخذ ايدي وعضها حَيل
ضل يتشاقـة وياي بالطَريق حدمـا وصلنـة للبيت
هدوء والبيت الكِل على كِلة نـايم صعدنة بغُرفتنة على فراشنـا حطني بحُضنة وضل يحجي وياي
مروان
هذا فرحتـي الاولى روان، الني مزروع برحمهـا ماكدر اتجاوزها وكانها شي عـادي، بنهاية هيَ أُم ابني راح تصيـر بس كوني واثقة حُبج محد راح يكدر يمحي ولا يقللة وان شاء الله تجيبيلي بنية تشبهج بكلشي حَتى باللسان قابل
روان
مروان اذا ماصار عدنة هم راح يقل حُبك الي جاوبني بصراحة هوَ اكيد راح تكول لا ومدري شنو بس اني اريد اسمعك
مروان
انتِ اول مـرة احبها بحياتي هاي مُعادلة ما تقبل تغير
واذا ما تصدكين بية فَ الزمن راح يخليج تصدكين
رُغم انُ اكو خوف بكلبي من المُستقبل بس اتذكرت كـلام رحمة وكلت ان شاء الله خَير
روان
ابد لا تفكر انُ انة زعلانة لان راح يصير عندك طفِل بالعكس مروان اني فرحانة الك ومن كل كلبي والله بس مادري احس احساس الغيرة اجتاحني ساعتهـا
مروان
انة هم ساعتها حسيت روحي مافتهم شي لا سعدية تغتر من سُعاد ولا سُعاد تغار من سعدية وما مجرّب هذا الطعم اساسًا ومـرة من المرات سعاد كالت اظنّي حبلة ف سعدية جانت تضحك وفرحانة وعبالي هجي تالي الحجية فهمتني
روان
مادري مروان مادري
باسني من راسي وهوَ يقربني الة
مروان
متفائِل بيج، ومتاكد وجهج وجه خير علية
متأكـد انتِ اجيتي والخير كِلة راح يجي ويـاج
نمنة بهذا اليوم فرحانين ومرتاحين
مروان فرحان لوجودي ويـا وهدوئي
وانة فرحانة لان هدوئي استمديتة من رَحمة الي أملتني بالخيـر
بدت الايام تُمضي و مروان جـان يهتم بسعدية هواي، وسعدية تتنغوص ومـا تلمس ايّ شي صارت تتأمر علية وجيبي هاي وردي هاي وانة بطبيعتي ماحب احد يطلب مني شي وماسويلهيا فَ عادي مرات انطيهـا بس من وصلت سالفة اغسلي ملابسي ومدري شنو عطت بيهـا
كتلها انة مو خدامـة عدكُم وماسوي ايّ شي
حجيت لمروان ومروان كالي هاهيّ انة احلها
فَ حلاً للنزاع جابلنـة عاملة بنگلادشية حبابة
ومعَ هذا مـا خلصت من سعَدية وتنغوصهـا
اما ام مروان فَ شكلهـا جان حَيل غريب يوم تبين ماعدها شي وصاحية ويوم تبين نفس المخبلة والي بيها حالة نفسية، الحجية تمشي وتصيـح هاي سعاد تسويلها سحورك وترجع لورة تنتقم منهـا لان هيَ ال لزمتها وخلت مروان يطلگها
سـعدية جانت تتنغوص على مروان تنغوص وطلعتلنـا سالفة جديدة سالفة الوحام على مروان، تمشي وتصيح اتوحـم اعليك وعلى ريحتـك
بحيث مروان كون ٢٤ ساعـة كون يكون وياهة وحَتى لـو طبينـة لغرفتنـا شوية وتجي تتمطيّن
اعصابنـا ثنينة تلفت من وراهة، ومروان بـدة مايطيق الوضع ابـد ع كد ماجانت خانكتة وحارمتـة مني
مروان
انة جزعِت تعرفين شني يعني جزعِت وين اكو مـرة تتوحم اعلى الرجال ويـنننننن
روان
لا تكول ويـن مروان الله فوگ راسنـا هوووايّ هيج مرت عمي حسين هيج انة شفتها شسوي
مروان
شلون يعني شلون حسرة علية اجي للبيت واكعد شوية وي الحجية شوية وياج الا وهيَ نابصة بالنُص ياخي حتى بغرفتي تجيني مو لهدرجة
روان
انتَ رايد الولد فَ هاهي الي يريد الحلو يصبر على مـرة
مروان
روان انة مشتاگلج حيل مشتااگلج
روان
مابيدك شَي مروان وانة مقـدرة هالشي
جنت احجي واحس روحي اتكسر من الداخِل تكسر وهم الدنيا كِلة احسة فوگ صدري ع كد ما اگضيها بجي بكِل ليلة مايكون بيهـا وياي بس مُضطرة اسكت حتى لازيدها عليّ لان جاي اشوف شلون نافِر الوضعية
روان
بس تدري مروان اتذكر مرت عمي حسـين اخذوها للزكتورة انطتها مُكملات غذائية صارت زينة
مروان
هسة غير اكلها متقبل تجعمرررر فوك راسي
يلة باجـر اخذها غصبًا اعليها
جاي نحجي واندگت الباب
سعدية
مروان
مروان
ماتتتتتتت مروان وخلص من هالعيشَة مات مروان
روان
ميخالف مروان امانـة لا تعصُب روح ومن تنام تعال انة كاعدة
مروان
انتظريني مو تنـامين
هزيت راسي بالايجاب راح هـوَ واحس روحي اختنگت بكِل مابية
اجـة اليوم الثاني جنة كاعديـن ع الـريوگ مروان گال
مروان
شسم الدكتورة الي رحتن الها ؟
من گال هجي مانحط الا سعدية غَصت ضلت تكحكح ومروان يطبطب الها
مروان
هاي شبيـج اسم الله
ايّ ما كلتيلي منية
سعدية
هاااا شسمها نسيتها شسمها خالة
ام مروان
شسمـها اسمهة ........
مروان
يلة جـا حَتى نروح
سعدية
بس ماكو داعي انة زينة هذا بس وحام والله
مروان
ميخالف لازم ترحين تشوفة تجيكج شني بدون دكتورة نقص فلوس
سعدية
ماريد والله
فضيلة
شلون ماتردين يا يُمة شلون روحي وشوفي نفسج شلونج
مروان
يلة انة راح اروح مشيـة ارجع الكاج جاهزة خوش
ماحجت شي بس اباوعلها ملامحها كِلها اتخربطت وباكت طن هوى امرها قلقني بنفس الوقت حَسيت روحي متوهمة وماكوشي
طلع مروان وهيَ و ام مروان طبن للغرفة
انة موغبية احس اكو شي بيناتهن شي غريب مُستحيل يكون شي عادي
حاولت اتدنى واتسمع بس ماكدرت اسمع ايّ شي صوتهن مامبين بَس مبيـن صوت عرِك
احتاريت شسوي بس انة احس اكو سالفة مُبهمة ورة هل موضوع
بهـاي الاثناء طلعن ثنينهن
سعدية باوعتلي وكالتلي
اريد تغسليلي هدومي اروح بيهن للدكتورة
كوكي
ماما انا اسويهم الك
سعدية
لااااااا هيَ خل تسويهـا
روان
اكِلج ترة مو خدامة عد الخلفوج جا المن كوكي جاية!
سعدية
لا شوووو الا تكومين انتِ
ام مروان
هسة كومي انتِ شكد صلفة رحمة لربج كوووومي
سعدية
وعلي اذا ماتجين هسة
هسة اجرج بالكاع كومي جاي اكلج
اباوعلها تحجي بـ عصبية فائقة عبالك مدري شبيـها
كمت وكفت كدامها وحجيت بعصبية
روان
انتِ تفتهمين لولااااااااا جاي اكلج مااااااااا اكوم
لو تغسليهن لو تخلين كوكي تغسلهن
اجت جرتني بسـرعة وهيَ تصيح
سعدية
ترة انة حامل غصبًا عليج تجيـن وتسويلي الي اريدة
حقيرة
جرتني من ايدي وحَطت ايدها على شعري صارت تملش بي دفعتهـا بسرعة عني اريدها توخر ماحس الا وكعت نفسها على حافـة الجُرباية
سعديـة
اخ اخخخخ اخخخ يمة ابني ماتتتتتت اخخخخخخ
حطت ايدها على بطنهـا وكامت تصيـح بكل قوتها
انة واكفة وصافنة على صلافتهـاااااااا
حركاتها مبينة ذيج وينـها جذب بـ جذب
ام مروان كعدت يمها والحجية كعدت على صوتهن
ام مروان
ولكم ابن ابني ماتتتتت خابروا مروان خابروااااااا
فضيلة
ولجن شصار شصاررررر
ام مروان
هاي العرمة دفعتها لسعدية حيل ولكم خابروا الحبوبة خل تجي
فضيلة
ولجن يااااا حبوبة روحوا للمُستشفى يااااااا حجية يا حجية
ام مروان
لااا هسة اخابـر هاي المَرة
فضيلة
خو خابري مرواننن
الحجية تحجي وهنّ ولا يسمعنـة راحت ودتها للغرفة وخابرت مرة ماكو خمس دقايق والمرة يمنـة عبالك منتظرتنة
طبت المـرة شكلها يخوف ومدري شلونهة
الحجية مصدكة وتبجي وتكلي ولج ليش عبالها صدِك
وانة صافنة على منظرهم
حَسيت بالوضع ابددددد موطبيعي رحت خابرت مروان
دكة ثنين ثلاثة رد
روان
مروان هسة تجي بسرعة
مروان
شكو
روان
مروان لازمممممم تجي ع سريع
مروان
ولج بيج شي سعدية بيها شي
روان
تجي وتفهم مروان استعجل الدقيقة تأثر
رحت ع صفحة واحجـي الحجية طلعنهة عود بس هنّ يشوفنهة
شوية وطلعت ام مروان
ام مروان
مات مات ابن ابني بسببج مات بسببي يايمة سودة بفگرك ي ابني ي مروان سودة بوجهييييي
فضيلة
ولج شمعرفها هاي منين جبتيها
ام مروان
خالة تعرف تعرف
كله من وراج الا بس يجي مروان اخلي يطلكج امة اعلمج
هيَ تحجي وانة ساكتة حرف ماحجيت
رحت لبـرة طلعت خابرت مروان
حجيتلة السالفة كِلها
روان
ارجع واكلك السالفة بيها انّ
واذا ظلمتني يمروان لحظة ما اضل بالبيت
تعاللل وشوف شجاي يلعبن اصلاً ١٠٠٪ مو حاملللللل
كلت هيج وهوَ تخبل ما مفتهم السالفة شنـو ويريد يموتتت من القهَر فتحتلة الباب بهدوء طب وهوَ نارررررر من العَصبيـة
صار يخطي خطوات سريعة وغاضبة وصل للـ صالة ام مروان انصدمت
ام مروان
هـا يُمة اجيت
ماهتم الها
مروان
وينهن
روان
بُغرفة سعدية بسرعة
دفع الباب بسـرعة وطب بدون لا استأذآن ولاشي
طبَيت ورا وجـان انصدم وهنّ كاعدات وحدة بصف ثانية
مروان
شجاي يصيـر
باوعت للمـرة خافت
-
جهضنالها يمة البقية بحياتكم
روان
انتن تضحكن اعلينة لوووو شنو
ويـن الـ دم وين الوجع شو كاعدة وساكتة
انتن تستهبلن علينـة اوشنو
مروان
شوفن اسمعن قسمًا بالله هسة ثنينجن اذبحجن هنانة وجفن ما يرفلي شني هل تمسلنتتتتتتتتت هذا
طفرت المـرة وكالت بخوف
والله انة ماعلية هنّ صاحني هنّ
سعدية
شوف مروان والعباس انة ماعلية امك كالتلي
كالتلي كليلة حامل وتسويلة مشكلة وي روان وعود انتِ كتلتي ابنة والله مو انة والله مالي علاقة صدكني
ورطتني هيَ والله ورطتني
ام مروان
يـاااااااا نجسة
يمة مروان انة ماعلية ماعلية
هنّ يحجـن ومروان صافن والمـرة طلعت
مروان
انتن تضحكن اعلية لووووووو شنيييييييييييييييي
كال هجي بصوت عـالي ام مروان طلعت وصار يتقدم لسعدية وهيَ ترجع
سعدية
والله ماعلية والله هيَ مروان والله ماعلية
اندار الي بغضب وگال
اطلعيييييييييي
روان
مروان اهدئ مروان لا تسوي شي تتندم عليّ مروان
مروان
روان اطلعي
تطلعين لوشلوننننننننن
كال هَيج وهوَ يصيح حيـل
جسمي كام يرجف
طلعت بخوف وما اسمع غيـر صوت تكسير
ما اطاني كلبي ما اطب طبيت بسرعة اني والحجية لكيتـة لازمها ويصيح
ولججججج ليششششش ليشششششش
ليششش تلعبين بمشاعري ليشششش
ولج شلون شلونننن كلبج يطيج شاون
والله موتج حلال والله موتج حلال
الحجية تتوسل بي وانة واكفة وابجي واحاول ادفعـة
ماحس الا دفعني وطلع بـسرعة
جاب السجينة وانة ورا وابجي
روان
مروان لااااا مروان الله عليك لاااا، لاااا تخليني وحدي مروان لا تسوي شي تتندم عليّ حباب لااااا
دفعنـي بسرعة وماجان مهتم راح لزم السجينة وبسرعة ...... يُتبعععععع
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!