رواية بيت جبر الفصل السادس والعشرون 26 - بقلم هُدىٰ آذار

حبايب نشرت هذا البارحة بس الاغلبية مطلعلة البارت، فَ الاغلبية كالوا ايّ خلي النشر بين يوم ويوم، فَ انتوا انطوا ارائكُم هَم
وهـا عَ شرط بين يوم ويوم الـ بارت بَس ينذكر بي كُل الابطال تقريبًا بدء مِن البارت الجديد ..
اذا لكيت تأييد عُكبة انشر بارت وبي كُل الابطال ونكمل ..

لا تنسون التصويت والتعليق الحلو
وهَسة اعوفكُم وي القُصة
للكاتبة : هُدىٰ آذار
________________

رَحمة

حَطيت شال عَ راسي وطلعت
اباوع الكُل مجمِع بمكان مُعين
اول ماشافني امير اجاني مفزوع ومرعوب وهوَ يكلي رَحمممة تعاي بسرعة

تقدمت بخطوات ثقيلة وخايفة
باوعت لكيت غَيث نايم ع جتڤ الشيـخ وعيونة فاتحهن بتعب
وكاعد وكانهُ بغَير عالم

صرت مقابيلة الكُل باوع الي
باوعتلهُم بتوبتر

امير
رَحمة غَيث يريد يسولفلج حلمة
حبيبي غَيث هاي رحمة اجتك

اول ما كال امير هيج فز بسرعة
باوعلي وبعيونـة حجي هواي
باوع للموجودين ورجع باوعلي

رَحمة
غَيث احجي اني يمك تكدر تسولف الي حلمتة ؟

اخذ نَفس وهز راسة وگال

غَيث
ايّ اكدر بس اكعدوا كلكم بالبداية

صوتة جـان يختلف جذريًااااا عن صوتة القَديم
وجان يبحبح ويحجي وكأنهُ الصوت گوة جاي يطلع

واحد يباوع للثاني والكل مستغرب
ومحد يعرف شجاي يصير

و اولهم اني !

كعدنـة كل احنة وبدة يحچي
بس يحچي وهوَ مدنگ راسة بالگاع
ويحجي وكانهُ مابين الحلِم وبين الحَقيقة
وكانهُ دايخ ومسطور وماجاي يصدك شي

غَيث
حلمت وكإني بمكان وكلشي حوالَي اسود، وجـان صمت داير مدايري ، لا صوت، لا نور، بس إحساس ثگيل وغريب، عبالك روحي تايهة بمكان ما إله بداية ولا نهاية.

چنت أباوع داير مدايري، ماكو أحد، ما أعرف إذا چنت واكف لو طاير لو نايم. بس حسّيت إن جسمي مو موجود، بس وعيي موجود وگلبي جـان يدگ حَيل، من هول المكان

لزم راسة وعصر عيونة حَيل وكانهُ بدة يتذكر الموقف
غَيث
جـان المكان مُخيف، ظلمة، هدوء، عاصِفة قوووية وجسد ماكو بَس روحي موجودة جانت
جاي تستوعبوني انتوا مووو !!

الكل جان يباوعلة بتركيز ومنتظري بَس يكمِل !

جبُر
ايّ بوية وياك كمل شصـار بعدين !!

غَيث
فجأة... لمحت نقطة نور بعيدة، صغيرة، بس چانت تكبر بسرعة. وكلما اقتربت، شعرت بجسمي يرجع، برجفة حارة تمشي بعروگي، وصوت بدا يظهر ويا النور... صوت كلش هادئ، بس قوي.

اول ما گال هَيج الكُل صاح
( اللهُم صلِ على مُحمد وآل محمَد )
الحلم بـدة ينفهم
والكل منتظر بحماس قاتل حتى يعرفون شجاي يصير
اما اني ؟ فَ جنت احِس گلبي واگف ما ينبُض
واباوع وجسمي كوة مثبتة بالگاع من الخوف!!

اباوع لغَيث غمض عيونة وگال بهمس

غَيث
راسي حيَل جاي يأذيني

امير
غَيث كمل لتخـاف

رفع راسة لامير وگالة بهدوء

غَيث
شبيك امير شنـو اخاف منين اخاف انة دايخ بَس
واحس صوت العواصف الي بذاك المكان لسة براسي

الصوت بـدة يظهر صوت حَقيقي
صوت مُختلف جذريًا عن الي جنت اسمعة وكت ما جان مَريض
ويحجي بهدوء وكأنهُ انسان صاحي مابي ايّ شي !
مو ذاك غَيث الي يتنرفز بسرعة من ايّ شخُص يحاجي

غَيث يكمل ...
النور صار وجه، والوجه صار ملامح... لحية بيضة ناعمة، عمامة خضرة، وعيون
عيووووون فَضيعة حلوة جذابّة وومليانة حنان.
باوع لمرت الشيخ وگال - يمة مستحيل اكدر اوصف الجمال
و اصلاً جنت كل ما احاول اركز الصورة تروح ويجيني نور ويعمي عيوني ماجنت اكدررر اباوع بتركيز حَتى

اتقرب يمي بهدوء وكل خطوة يخطيها يصيـر رعددد مُرعب
افز من عندة انة وهوَ يلوحلي ب ايدة حتى اوكف وانتظرة ..

حدما تقرب مني حَيل وصـار گدامي
سالتة وكتلة
انتَ منو، وانة وين وشجاي يصيـر وليش هجي الدنيـا جاي تنگلب !

گلي انة العباس بن علي و وداني الك جدي رسول الله

من گال هَيج نزلت دمعتي وجسمي كلة انتفض من المشهد الي صار
اباوع اجاني صوت بجي
درت وجهي الشيخ محني راسة وحاط ايدة على عيونة وصوت بجية مسموع ويكول

جبُر
دخيلك يابو فاضل

اباوع بالوجوه النسـوان كلهة تبجي
والولد دموعها بعيونها ...

رجعت باوعت لغَيث الي دموعة بـدن ينزلن بهدوء

رَحمة
غَيث كمِل شصار !

مسح دموعة بَ ادي وضحك خَفيف وگال

غَيث
مدلي ايدة وجـان ب ايدة نَفس القنينة الصغيرة، جانت مملية ماي بس تضوووي، شايفين من تحطون ماي وتحطون جوة الكلاص ضوة الموبايل شلون يضوي الماي ؟؟؟
ايّ هجي جـانت القنينة الي بيدة ..

اخذتة من عندة وگالي
جدي رسول الله يكول هذا مو ماي عادي، هذني دموع بنية اسمها رحمة سجدت على سجادتها واندعت من كل وكلبها وكل الها تكمل النذر النذرتة لله، وانتَ انريد منك توزع الماي نفس ما احنة انطيناك ماي
لا تخلي عطشان يمر وما يلكة ماي
وانويها بثواب الحسين بثواب عطاشى كربلاء
بثواب طفل الرضيع، وبثواب زينب الصابرة، وبثواب العطش اللي بعده ما خلّص.

وقبـل لا يروح فتح القنينة ودار نصها على وجهي، حسّيته يغسل كل شي: خوفي، وجعي، سكوتي، وحتى حلمي.
وگالي اشرب الباقي، شربت الباقي
وبذيج اللحظة حَسيت نفسي ارتويت، وكلبي بدة ينبُض، ودموعي نزلت رغم إني بحلم، شفت نور يلف جسمي، حسيت كأن جناح يرفعني برفق، وگلي:
كوم، الدنيا تنتظرك... أمك تريدي تطمن، وأبوك گلبة يركض، والبيت ما يضحك إلا بصوتك.

ورجع النور يبتعد، وأنة أنهض، جسمي صار خفيف، خفيف كلش، مثل ما يكون شخص نفض من عندي وجع الدنيا كلها.

وبس صارت المسافة بيني وبينه بعيدة... گلي من بعيد:
لا تنسى، الحياة مو بس نَفس... الحياة نية، ووجودك هدية
وجـان اكو صوت ضل يرردد بي حَدما اختفى والي هوَ (ارجع لربك) ..

وانطفت الدنيا وفَزيت بسرعة ..

غَيث
احس روحي جنت بغير عالم، وهسة صرت بعالم ثاني
انة وين چنت ماعرف

هو يحچي... واني أبچي،
ماعرفت شلون، بس چنت أرجف... جسمي كله يرجف
كلامه چنه يدخل جوه الروح،
چنت أحس گلبي يريد يطلع من مكانة
مو من خوف، من شي أكبر... من رهبة، من نور،
كأنه رب العالمين يجاوبني بصوته...
كأن كل دمعة نزلت، رجعتلي جواب.

اباوع الهم امير راح بسررعة حضن غيث كل قوتة وصار يبجي وغيث يبجي وكانه لقاء الاخوة من بعد سنووووات طويلة ما شايفين نفسهم

روان دموعها نازلة
اجتني راسًا حضنتني وكالت
روان
رَحمة انتِ شمسوية يم الله وشلون الله يحبج هلكد

ماجنت احجي شي غير انّي ابجي ع الشي الموطبيعي الي صار

مرت الشيـخ اجتني تبوس بية وام غيث كذالك الفرحة ما سايعتها والكل فرحان ويبوس بغَيث
واني احس روحي بحلم
عرفت الله ماراح يردني
جنت متاكدة
بس بهالطريقة !

زَعيم
غيث يعني انتَ بخير هسة شتحس بس كلي

غَيث
والله ماحس شي زَعيم
احس بالماي البارد الي شربتة واحس بشعور غريب بس شعور كلة فرح كلة سعادة
واحس هسة ما بودي غير ازور وماريد اي شي ثاني

سُراج
عمي حتى صوتة تحسون انخلق من جديد مو ذاك الصوت المُرعب الي يخوف تحسون صوت غيث رجع

صالحة
سبحانك يارب اتلطفت بحالنة وحال هل ولد المسكين واخيرًا

جُبر
ربج اذا راد يطي ف لايخاف ولايستحي

فززني وفزز الكل صوت روآن وهيَ تحجي
روآن
بس انتوا ما تعرفون شنـو صار، بيتكم بي ملاك انسان طاهر والله يحبة

امير
صدك شنو صار و شلون
يعني رحمة انتِ اندعيتي لغيث لوشنو بضبط صار

ماحجيت شي بس روآن حجتلهم الي صار بالتفصيل
اباوع لغيث يباوعلي بس هلمَرة نظرات مختلفة
مو نظرات طفِل يلاكي امان يم واحد
لا نظرات غَريبة وما مفهومة ابد

دنگت راسي وصرت حَتى ما اتحمل نظراتة وروآن مستمرة تحجيلهم ب الي صـار

سَبب
سبحان الله والله رَحمة مجربتها ايَ شي تكولة الي يصير بسرعة هيج بس تباوعلي وتصفن بوجهي وتحجي حجيها راسًا يتحقق وجربتها ب اكثر من مرة ..

هنانة مرت الشيـخ اجتني وباستني من راسي وهيَ دگول
صالحة
يمة دخيل بختج شبينج وبين الله وهلكد الله كرمج وكرمنـا

امير
انة جنت اعرف من اول مادخلت انُ هيَ راح تكون سبب بشفاء غَيث بس جنت اظن بمعرفتها وبذكائها النفسي بس ماجنت اظن بهاي الطريقة ابد، رحمة انة ماعرف شلـون اردلج الجميل انة ممنون الج طول عمري والي تردي والي ينطق لسانج والله لوشمهما صعب راح يصيرلج

جبُر
هاي كرامة من رب العالمين و الله يحطها ب مو ياهو الجان والينكرها ويكول جذب ف هو ماعندة ايمان و الله يا بوية اختارج من بين الكل وفضلج وحطلج هاي الكرامات بس انة فهمت كل شي الا سالفة النذر شني سالفتة بوية غيث ؟

غَيث
ما ادري بس كالي انُ نذرت نذر لوجه الله خل توفي

هزيت راسي بـ ايّ

ام رَحمة
شنذرتي يمة؟

رَحمة
نذرت اساعد ايّ احد يحتاجني ونذرت نفسي لوجه الله لو غَيث طاب ..

صالحة
يابعد كلبي كلبج يا يمة

رجعت باستني من راسي وضمتني حَيل لحضنها

جبُر
بارك الله بيچ، يا بتي، بارك الله بيچ.
والله يشرّفني، ويخليني أرفع راسي، إنُّ تحت سقف بيتي عايشه بنيه مثلچ.
أنة رجال ما أؤمن بالسادة ولا بالشيوخ الي يبيعون دينهم بدراهم،
ولا أمد إيدي عَلى الناس بحجّة شفاء ودواء.
واكول الحط الداء هوَ وحدة اليكدر يداويك
بس إنتِ... غير.
إنتِ يابوية من أهل النور والبركة
وإنتِ بهالبيت معزّزة مكرّمة، مقامچ فوق الراس،
وتوفيچ لنذرچ، وسعيچ للخير، هذا عز وفخر إلنه كلنا.
وأنة بنفسي الشيخ جبُر، والله على ما أقول شهيد،
أتشرّف وأتباهى إنُّ عندي بنيه هجي،
وأسأل الله يقدرج عَ الطيب، ويقدّرنه نِوفي ويّاج بالخير
وانة بنفسي راح اكون داعم الج وامشي بيـن مجالِس الزلم واحچي بيج وارفع راسي بيچ

هوَ يحجي هجي ومرتة تبوسني وترجع تحضني

رَحمة
شيخ انة اهم شي عندي انُ غَيث رجع
غَيث انسان زين ونقي من الداخل
ويستحق يعيش مرة ثانية
بحياة حلوة

شيخ
الله يبارك بيـج بنيتي
ويبارك بي واللهم ينور طريقة
ويجعلها بداية غير عليّ

باوعت لغَيث مبتسم اجة قبل ايدة وحضنة حَيل
وخر من حضنة وگال

غَيث
انة ارد ازور كربلاء هَسة اروح وحدي بسيارتي

من گال هَيج رجعناه خِفنة وكلها وجهة بهت

امير
غَيث حبيبي سيارتك من يمتى انتَ بايعها

غمض عيونـة بقوة وفتح عيونة وتنهد
ادنة يمة امير وگالة ( انتَ بخير )

غَيث
اي اي بس احس ماجمع هواي اشياء قديمة صارت

رَحمة
احسن لا تجمعهن ولا ترهق روحك بالماضي، الماضي ماضي وانتَ ابن اليوم عوف كل شي وعيش الجاي انسى الماضي

من كلت هجي باوعلي وهزلي راسة بالايجاب وهوَ يبتسم بهدوء .

غَيث
يلا امير يلا يالولد جا خل كل احنة نـروح، نفس روحات كبل بس هلمرة ماكو تفحيط وسرعة لان سيارتي ماهيّ بس سيارة سراج موجودة
اخوي تطيها موو اريد اسويلكم الطَريق ساعة ونص بدال ثلث ساعات

من گال هَيج گالها بحماس وكانهُ جاي يلطف الجـو ويضحگ
كلها ضحگت اجا الشيخ وجرة من اذنة بشقة

جبُر
ولك انتَ ما تتوب مو هستونة كلنة عقل ويالله

علي
صدك جذب تروحلك سيارة سُراج وسُراج بنفسة فدوة

بـدوا يضحكون سوة وضحكاتهم صـارت تتعالى ومرت الشيـخ تگول رجعت فرحتنـا للبيَت

صالحة
عوزنـا بَس سجودي وصيـر الگعدة كاملة

صوت تنهيدة علي ارتفعت باوع ب ابتسامة وگال

علي
وداعتج يا يمة مهدود حيلي عليّ
بس رحمة ربج على ساعـة

جبُر
مشكلتة الولد مدري شبي لا يحجي لا يكول شي ولك شني السبب كول تحجى ماكو صامت

علي
جدي الله وكيلك حَتى قوة ردت استعلمها ويـا حتى يعترف وماكو ..
سجاد سالفتة غامضة واحس نفسيتة جاي تتدهور وماريد اضغط عليّ بنهاية هو اخوي الصغِير ف حاطة بمكان زين والله يفرج عنة

كلها كالت ( آمين )

زَعيم
يلة خل نطلع بسيارة وحدة احنة الشباب
جَدي انتَ تروح ؟ بوية عمي انتوا هم؟

جبُر
آفة عليك يالزعيم شلون ما اروح واتشكر ابو فاضل بنفسي
كل احنة نروح بوية بس النسوان شلون وحدهن يضلن

صالحة
يا جا شعلينة ننلطِع روحوا يبعدروحي زوروا واتشكروا من ابو فاضل وتعالوا

صدگ والله قرروا يرحـون كلهم اتطشروا همة واحنة النسوان كعدنة بالصالة
وبدت امي تحجيلهن قبل شلـون بذاك البيت جانن نسوان يجني افسرلهن الاحلام واخذلهن خَيرة بالقران على انُ السالفة الي تريدها زينة لولا
وكعدنة نحچي سوى

شويـة ونزل غَيث اول واحد لابس دشداشة بيضة ولازم سويـج السيارة بَ ايدة وطالع وسيم بشكل موطبيعي
اباوعلة ينزل علكيف وعيونة تجاهي درت وجهي وحاولت اشغل عيوني ب ايّ شي

ياربي اول مرة هلكد اكون متوترة بوجودة !

اجة نـزل وراسًا اتجة لمرت الشيخ بـاسها من راسها وانحنى لمستوى كعدتها وكعد عَ الگاع وصـار يبوس بـ اديها
ضمتة حَيل لحضنها وهيَ تبجي وبجتنة كل احنة
وراح لامة وكذالك ضل يبوس براسها ويحضن بيـها

غَيث
انة تعبتكم هواي، وطحت بنتيجة اعمالي
بس اوعدكم وعد بعد ما اخليكم تتعذبون بسببي
ولا اخلي دمعة وحدة تنزل منكم علمودي
وراح اسوي المُستحيل حتى اشوفكم انتوا و ايّ انسان انة احبة يضحك

كال هَيج ورفع راسة علية بشكِل واضح ..
سَبب جانت كاعدة بصفي راسًا ندستني

درت وجهي الها وجنت متوترة وهيَ تضحگ
كمت لغرفتي واحس گلبي يدگ بسرعة
يُمة شبي غَيث وليش هيـج حجة ورفع راسة تِجاهي

اجتي سَبب فتحت الباب و وگفت بالباب وضحگت حَيل

زَعيم
وسِممم بگلب العَدو
شبيـج؟؟؟

مبيَن زَعيم صار كدامها
خطية هيَ من الخرعة سدت الباب بسرعة

رَحمة
اجيتي تشمتين بية
شوفي الله شلون وگعج هههههههههههه

سَبب
دخيلة علوية رَحمة حبابة لا تشوريـن بية
بس والله تلميحة
شفتي شلون باوعلج من كال انسان احبة

رَحمة
لا سَبب انجبي ترة ما قصدة هيج ابد

سَبب
اي صحيح مبين مو قصَدة

كالتلي سَبب انُ طلعوا كمت اتوضيت وصليت شُكر لرّب العالمين و وعدت نفسي انُ اوفي النذر ومُستحيل اقصر بحق ايّ انسان يحتاج مني ايّ شي

كعدت اليوم الثاني بَديت انظف البَيت
الولد جانوا كلهم نايمين بالديـوان
جنت اشوف غَيث من بعيـد لبعَيد
جـان بصورة ثانية تمامًا

اباوعلة هدوء عَ ثكُل عَ مُزاح خفيف
ويحجي وطبيعي كانهُ

عيونـة تدورني
بس من يلمحني يدنگ
ويضل يفكر ويحجي بينة وبيـن نَفسة

هواي حاول يحاجيني بس اني اول ما اشوف انُ المكان صار موجود بي بَس هوَ ابتعد، مادري ليـش بس صرت اخاف واستحي انجمع ويـا
معَ انُ الولد جانوا عادي وتعودت ع وجودهُم بصفتي مُساعدة بهذا البيَت فـ جنت متعودة عَ وجودهُم بَس غيث جان وجودة يربكني

رادوا يسون عَزيمة الة بـس صارت عدهُم هواي اشيـاء وزَعيم سافر نوب احترگ معملة فَ تاخروا شوية

غَيث اختلف جذريًا والكُل لاحظ الاختلاف
جـان يصلي بالجامع وقبل لايصيح الاذان بـ نص ساعة ياخذ سيارة امير ويروح للجامع يصلي، وجانوا الولد او شيخ يرحون ويـا واذا مشغولين يروح وحدة ما يهتم، ومرة من المـرات لمّن زعيم سافر سَبب جانت كاعدة من الصُبح كلتلي قبل لا اطُب شفِت غَيث طلع ويريد يصلي بالجامِع
تغيرة صـار ملحوظ يم الكل، وحَتى المُهدئات عافها نهائي
غرفتة بطل ينام بيهـا وجابلة عمال ساعتهـا ثنين حتى يغيرون كل شي بيـها ..

ورة الحَريق مال زعيم باليـوم الثاني
جنت بالمطبخ جاي اطبخ سَمعت تحمحم زَعيم
درت وجهي شفتة سلم علية وگالي

زَعيم
بيتكم صار جاهِز وتكدرين من اليوم تباتون بي

ابتسمت بوجهة وتشكرتـة وجنت كلش خجلانة منة

زَعيم
هذا ابسط شي ممكن نسويلجيا وابد لا تظنين انُ هاي الفلوس من عندي هاي من مـال الله وهذا ابسط شي اصلاً

رَحمة
بعدني عَ قراري تـرة واني راح ادفعلك حق كُل شي
بس علكيفي

زَعيم
خوية راسج يابس هواي غير طيحناهن لامي الفلوس شني هيَ

گال هَيج وضحك ضحگت ويـا علكيف
طَب غَيث للمطبخ لابس دشداشتة ولاف غترتة عَ راسة
وسبحتة بـ ايدة مبين ستوة جاي من صلاة الظهر
باوعتلة وابتسمت ودرت وجهي
وحمدت ربي وشكرتـة عَ التغيير الي صارلة ..

زَعيم
ما اوصيج رحمة اذا تردون من اليـوم ترحين لبيتكم تچيكونة

درت وجهي وكتلة ان شاء الله
باوعت غَيث وجهة ضايـج مبين وحَتى ميباوعلي

طبوا سوة وكملت الطبـخ واني صافنة شبي غَيث ضايج
واني جاي افكـر سمعت خطوات وراي التفتت شفت غَيث

توترت لجيتة هاي ومبيـن جاي علية حَتى يحاجيني

غَيث
شنـو هاي رَحمة عود انتِ الثگيلة العاقلة
واگفة وي زَعيم وتضحگين شنو سالفة !

انصدمت بحجية هـذا وحَسيتة ضايج من عندي
كتلة بعفوية راسًا

رَحمة
غَيث والله فهمتني غلط جنة دنحجي عَ البيـت والفلوس وو.. سولفتلة

غَيث
ميخالف رَحمة هذا مو يعني انج تضحكين ويـا ما اعتقد ابينكم حديث او صداقة او عداهن

درت وجهي سويت روحي اخوط بالكدر بس الدموع تجمعن بعيوني
خايفة لا يكون اخذ نظرة سيئة علية، والله اني موهيج ..

غَيث
مافهمتج غلط، وادري انتِ شنو واعرفج نقية وبيضة
بس ماريدج توكفين يم احد غيري وتضحكين هيـج
ومادري ليش ..

گال هَيج واتنهد وخلة وطلع
وخلاني مَصدومة
معقولة غَيث عندة شعور تِجاهي هوَ ليش يحجي هيج اساسًا ؟

شعور غَريب اجتاحني واني افكر هيج تفكير
بس حاولت اطرد التفكير بهيج مواضيع

للعصُر زَعيم اخذنة اني و امي للبيت
وغَيث راح ويـانا

هناكَ انصدمت بالبيت
صح هوَ صغير بس جان مرتب بشكل لَطيف
غرفة وصالة صغيرة واستقبال اكبر من الغرفة بشوية وتخاريج
والبيت مؤثث من الالف للياء حَتى فراشات حاطين
امي ضَلت تشكر بزَعيم وتدعيلة
وغَيث جـان حَيل فرحان بهشي

بيومها ضلينـة ابيتنـا ولليل يلا رحنـا
كملنـا تنظيف وكعدنـا وي البنات نحچي
حجينا بمواضيع هوايّ وسولفنـا عَ الورِد
حجيت الهن عن هوسي بي وشلـون اني حَيل احب يكون عندي بُستان ورود

سَبب
ع هذا الحجي المسعد لازم يومية باقة ورد

رَحمة
لا اريد بُستان ماريدة يموت ابـد

جانت عدهم مشية وطالعين واحنة ماخذين راحتتة بالحجي
طولوا لـ ١١ اجة غَيث كال

غَيث
يلا خالة ام رَحمة انة اخذكم

كمنـا اني وامي طلعنا لكيناهُم برة يسولفون سلمنة عَ الشيـخ وسالنة شمحتاجين تشكرنا ورحنة صعدنة وي غَيث

اباوعلة ولا يباوعلي بس اكو كلام بعيونة كومة
عرفتة من بعد كل الي صار مستحي من عندي

وصلنـا للبيَت وراح هوَ
طبيت للبيت وجنت كلش فرحانـة بي
امي جانت تعبانة كتلهة نوب ما ترحين حسب راحتج وتكونين ضايجة تجين واني اروح وحدي

وقتت الموبايل بالـ ٧ ونمت ..
كعدت الصبح سبحت وسويت ريوگ لان جانت الثلاجة بيها بيض وطماطة ولحم وهواي اشيـاء عفت لامي ولبست عباتي واجيت اطلع من البيت

باوعت كدامي غَيث واگف وادي وملابـسة بيهِن تراب، وانتبهت للگاع لگيت .... يُتبععع

شنـو رئيكُم بـ قصة غَيث اليوم، حبيتوا السرد؟
ارائكُم تهمني اخوان !
________________

مشتاقيلها مـو؟ كتلكم البارت الجاي بَس الها
فَ ان شاء الله البارت هذا ٣٠٠٠ كلمة صارت لرحمة والباقي كُلة حيكون لروآن ..

روآن

صدمني علي وهوَ يگول رايحين مشية لـ امير
ضل يلح علية انُ اروح وياهُم بـس بيومها جنت قافلة انّي ماريد اروح ابد

ضَليت بغرفتي كاعدة واحس نفسي حَيل مخنوگة
حَتى اهلي كِل واحد عايش بعالمة وما يدرون الدنيا طشت لو رشّت
ولا عبالك كل هذا صاير بيـة وهلكد جنت تعبـانة ..

بـليل بساعتهـا نزلت وشفت موقف غَيث وي رحمة
رحمة بساعتهـا حجتلي اشيـاء مُبهمة وجانت تكرر ب

رحمة
الله راح يترِس بطنج

روآن
رَحمة انتِ صدِك تحجين ترة هوَ عقيم تقريبًا وحَتى تقاربنـا صار مرة وحدة

رحمة
ايّ مو شرط هَسة المهم انُ الله راح يترس بطنج وراح تكونين انتِ سبب فرحة احد و ع الاكثر هوَ
لان اني جاي اشوف شخص راح يفرح هواي من وراج ومـاكو غيرج انتِ راح تفرحي وبيمن تفرحي اكثر من الولد

روآن
رجوعي الة مُستحيل رحمة تعرفين شنو مُستحيل

رحمة
بس اني ماشوفة مُستحيل اني اشوفة جائز وبشكل جبير وبعدين راح تعرفـين اكثر ماريد احجي ازيد او افسر من كيفي بس المهم هو راح يفرح بسببج

حجت هَيج ومانطتني مجال احجـي اكثر ابد

رجعت صعَدت لغرفتي واني ماطايقة احد ب بيتنـا حتى علي احسة متغير ابد مو ذاك الاولي واصلاً ٢٤ ساعة مو بالبيت يجي بالصدددف وبسرعة ويروح

عُقدتي بالبيت جانت سَبب وجنت حَيل اكره وجودها بي
خصوصًا من اشوفها هيَ وزَعيم وشلون يعاملها واشوف نظرات سُراج تجاهُم اكرهة زايد، لان بنهاية هيَ سبب بموت واحد

وحرمـان احد من مرتة، واني خصوصًا اعرف سُراج شكد يحب زَينب وزَينب الها مكانة بكلبي جبيرة ما جانت بَس بنت عم جنت اكثر بعد

وكل ما اشوف سُراج احس يتگطع كلبي عليّ
بس ما اكدر احجي شي بسبب زَعيم ..

مضت الايام ونفسيتي احس سائت حَيل
من اشوف اميـر ويّ فرس شلـون
ماجنت انقهر انُ امير ارتبط وراح يزوج وهاهيّ
جنت انقهر عَ القدر الي فرقنـا
وخلا يعيش حياتة
بـس حياتي انة ماعشتها

مرت ايام علية حَيل صعبـات
وجنت بس كاعدة فوگ ومقوقعة على نفسي
ومالي خلك ايّ احد

علي جان بين وقت لوقتـة يجيني يحط يمي
اشيـاء يجيبلياهن ويروح
لان اغلب اوقاتة يجي بليل
ويضل يراسلني انزلي ومدري شنـو

عرفت من سـيوف انُ علي عندة علاقة بـ بنية
تصير صديقة ايلول وهنـا عرفت شبي علي متغير وساحب

بساعتها احِس كمت ما اتقبل ايّ شي
ولا يعجبني حَتى احجي وي احد

جنت بس اكعد بغرفتي واسكت
كلشي ماسوي حَتى ..

يوم من الايام كلت خلي اكسر روتيني ب ايّ شي
اتابع قصص لو اباوع مُسلسلات او اي شي اسوي

بساعتهـا كتبت عَ اليوتيوب قصص
طلعلي قصص بـ برنامج
عرفت انُ اكو قصص ببرنامج اسمة الواتباد
نزلتة مُباشرتًا

طلع كدامي كلهة قُصص فصليات
فصليتي عنيدة
فصليتي ام اللسان
فصلية الشيخ مدري منو

كمت ونزلت وحدة وبديت اقراهـا
اباوع شو ذولة دگ غزل
جا انة مو هم صرت فصلية؟
شو صارت بنعل !

من الفراغ كمت اكمل باليوم قصة
مع انُ كلهن نفس الاحداث
ونفس الجذب وادري بيهن جذب وتسفيط
بس جنت اقرة من المَلل

يوم من الايام جنت كاعدة
واجة بـ بالي مروآن، مروآن دوم على بالي وما انسى ودائمًا اتذكرة
واتذكر حجايتة الاخيرة وهوَ يكلي ( احنة قصتنا انتهت قبل لا تبدي )

يجوز هوَ حيل قِسى وياي
بس انة هم غلطت
وهوَ بالاخير سوى كل الي يكدرلة حَتى يسوي الي يريحني
بَس احس نفسي طابت منة
ومنهم
ومن المشاكل وكل شي
انة حَتى اهلي صرت ماتقبلهم
شلون لو مروآن ..

فَ بهذا اليوم احس جنت اتذكرة
ومادري بـس اجة ب بالي اعرف اخبارة
رأسًا اجة ب بالي الفَيس

نزلت الفَيس طلب من عنـدي اسِم
كتبت روآن راد كُنية كتبت جبُر

طَبيت وبحثت على اسمـة شفت عندهم صَفحة اعلام قبيلة آل ...

ينشرون صورهُم ومشياتهُم ومدري شنـو
وبكُل صورة موجود مروآن

اباوع للصورة واكبرهـا
كلت بيني وبيـن نَفسي وبدون ماحِس على روحي
- لو ما اهلك جـان هَسة احنة ضالين سوى -

مـادري ليش بساعتها دمعِت ونزلت دمعة من عِندي عَ الموبايل
هيَ دمعة وهيَ لايك
اني نزيتتتت عَزة العزاج روآن

كمِت بسرعة ومسحت الفيس كُلة من الاساس
ماجنت اظن انُ اكدر اوخر اللايك
لان اول مَرة اسوي بيهـا فَيس
وحَتى تعلمت اسوي حساب من اليوتيوب خطوة خطوة

مسحت البرنامج كلة وجسمي صـار يرجف
ظنيت انُ هاهيّ بهجي حالة البرنامج انمسح وماراح يطلعلة حِسابي

بس ضليت بتوتر وخايفة وحتى ما اكدر اسئل احد
ومحد مكابلني غير سيوف
وسيوف ولا طكة
اصلاً حَتى موبايلها مابي غير يوتيوب و واتساب

ضـليت لثاني يوم انة ماسحة التطبيق وخايفة

اليـوم الثاني احِس صارت بية دودة
الة اعرف شصار وياترى شاف لا ..

نزلت الفَيس مرة ٢
وهاي المَرة جانت اسهل
لان جان حاطلي حسابي راسًا
وكالي - هل تود الدخول إلى هذا الحساب-
وجكيت مَرة ودخلي وهاهيّ

انتبهت اكو فوگ رمز مال اشعار
انتبهت اكو رسالـة من مروآن آل دحام
هوَ انة شفت الرسالة وانة انخفكت

بَسرعة نزلت الماسنجر حَتى اشوف شنـو المكتوب
طَبيت عَ الرسـالة شفتة داز

الشيـخ مروآن آل دحام
؟

مِن شفتها احِس نثولت وبنفس الوقت صفنت وبنفس الوقت فرحت وبنفس الوقت خفت وبنفس الوقت غَميت نفسي ع الثول الي انة بَي

سديت الموبايل وكلت
الله ياخذج يـا روان الله ياخذج يعني ليش تشوفين صفحتة اساسًا
شتردين ترجعيلة؟
اكيد لا مارجعلة لو اموت من بعد السوا بية
جا شتردين بهاي عملتج
ليش سويتي هجي

احجي وي روحي والومها
ماحس الا على صوت طلع

نَزيت من مكاني عبالي الباب شو شنـو ماحس الا صوت ثاني
انتبهت هذا من الموبايل صوت اشعـارات
فتحت الموبايل وانة مغمضة عين وفاتحة عين
واكول

يـارب ما يطلع هوَ ياربببب

اباوع
الشيخ مـروآن آل دحام
٢ رسائل جديدة

انة شفت هَيج وانة كمت ادك والطُم
عَزة بعينج روآن عَزة بعينج

بعدني ستوني لطمت على خدي
اجاني اشعار فوگ

الشيخ مروآن آل دحام
مو متصلة ردي !

راحت الرسالة الي فوگ راسًا سديت الموبايل
كلبي يخفق بشكل سريع وخايفة وماعرف شسوي حَتى

ماحس الا عَ اتصـال
راسًا انطيتة رفُض خفت لا احد يسمع ..

سديتة وشجعت روحي وكلت خل افتح الرسـائل

طَبيت ع الماسنجر
الشيـخ مروآن آل دحام
- ؟
- روآن مو ماتردين !
- روآن ؟
- مو متصلة ردي ؟
- مُكالمة فائِتة ..

فاتحة المُحادثة واشوف الرسـائِل صار يكتب
التوتر عِندي صـار الف

- انخمش كلبي مِن شفتج موجودة

مارديـت ضليت بس صافنة وماعرف شحچي

- ماراح تحچين شي ؟

- ماريد احجي ايّ شي طبيت صِدفة وبدون ما ادري انطيت لايك وبعدهـا مسحت التطبيق

- ايّ وانة انتظرتج يوم كامِل ..

باوعـت وسكتت ماحچيت شَي

الشيـخ مروآن آل دحام
- تدريـن انُ انة مشتاقلج لدرجة انُ من شفتج حاطة لايك بالفصحة العامة احس گلبي طـار وما عاولت اجيج واراسلج
صارلي يوم انتظرج، جنت اظن بعد ماراح اشوفج بس گلبي جـان حاس انّي راح اشوفج وشفتج ..

- عمي شنـي بشبابي ومراهقتي ما سويت هيج انة نوب هَسة تالي عمري ومن بعد ما شيبت وعلى كولتج صرت شايب كمت اراهق و ويامن وي بت الـ ١٧ ؟

- تدرين لحظة ما رحتِ عن بالي شني وشلون وليش مادري بس ال ادري انُ انتِ براس مروآن ٢٤ ساعة

- ما ادري بَس احس تعودت على وجودج بالبيت، حتى نچارتچ شكد جنت اكرهة وشكد جنت اوكف بوجهج عليها احس استفقدتها، وكمت ادور بالوجوه عنها

- مو من عادتي التعبيـر ومادري ليش جاي اعبر بس شو صدگ فاگدج ..

هوَ يحچي وانة دموعي تهمِل من عيوني
شكلة وشريد احچي

الشيـخ مروآن آل دحام
- ما تخليني اسمع صوت تنعوصج ؟

من گال هَيج ابتسمت والدموع مِستمرة تنزل من عدي
اتذكرت شنـو سوة بـ اخر يوم كتلة بحقِد

روآن جبُر
- لتفكر انة احبك واجيت ومدري شنو ترة جان مُجرد فضول لا اكثر واصلاً انة كاعدة ب بيت اهلي معززة مكرمة احسن من الذلة مالتكم لا تنسى شنو سويت اخر شي كل ما اتذكر اكرهك اكثر اصلاً !

الشيـخ مروآن آل دحام
- ولا تنسين انتِ شنو حجيتي
شايفة لو غيرج حاجي هل حجاية
قسمًا بالله العلي العَظيم ما اخلي لحظة يتنفس من هوى الله
لو مهمّا جان هالشخص منو
ابوي لو يطلع من گبرة ويحجي وياي هجي هم مارحمة
انتِ اصلاً شلون تجاسرين وتحجين ويـاي هجي
انتِ عيرتيني
اجيتيني من جانبي المكسور
شترديني اصفكلج مثلاً ؟

روآن جبُر
- لا اريدك تصفگلي ولا اريد اصفگلك
ماريدك وبَس ..

الشيخ مروآن آل دحام
- هوَ وين نرهم احنة بعَد، بس انة اكول هيج صارت بنفسي سالفة
اكول لو ما اهلج واهلي جان احنة غير شي ..

روآن جبُر
- لا والله اهلك، اهلي شبيهم شنو سووا !
ادخلوا بعلاقتنـا خربوها ؟ شسووا مثلاً ؟

الشيخ مروآن آل دحام
- لا ابوي الكعد النـاس الساعة بـ ٢ بليل حَتى يحچي بسالفتي وي مرتي !!

روآن جبُر
- ما اعذرك انتَ كاعد ب بين ناس ماعدكم لا كلب ولا عدكم رحمة وإلا شنـو ! تخيل تكون عندك بنية ويصير بيها الي صار وياي شراح تسوي تسكت !؟؟ لو تكتل وتنكتل عليها ..

لحظة صمِت ..

روآن جبُر
- شوف سكتت لانّك تعـرف الحَقيقة كلشش زين

الشيـخ مروآن آل دحام
- وهسة شنـووو !!

روآن جبُر
- ولا شـي

الشيخ مروآن آل دحام
- ليـش عَصبية ؟ ليش من تشوفيني تتعصبين حَتى برسائل عصبية، شمسويلج انة ارد افهم ! عود هاي گعدة عِتب ..

روآن جبُر
- ماكو گعدة عِتب وياك، لان لو احچي راح احرگك گد ما اكو نـار بگلبي

الشيخ مروآن آل دحام
- احرگيني راضي انة، المهم ما يضل بگلبج عليّ

گال هَيج وخابرني
فصلتة ..

الشيـخ مروآن آل دحام
- روان ليش تخبليني عليج، ردي

روآن جبُر
- ما ارد

الشيـخ مروآن آل دحام
- روآن والعباس اجيج لا تلعبين بـ اعصابي

روآن جبُر
- ضحكتني وين تجي

الشيـخ مروآن آل دحام
- ترة مايهمني لا اخوج هذا علي الي يهوبز ولا زَعيم الشايف روحة شيخ ولا شيخ جبُر بنفسة يهمني
لو اريدج فَ كوني واثقـة اجيبج

روآن جبُر
- الظاهر نسيت ذولة اخذوني منك

الشيـخ مروآن آل دحام
- لا ديري بالج، ديري بالج تحسسيني هُمّ انتصروا علية واخذوج غَصُب، مو الشيـخ مروآن آل دحام الينغلب، هُمّ زلم وانة زلمة وياعيب زلمة يضحك عليّ
بس مُمكِن انضحگ عليّ بشي واحد لا اكثر

روآن جبُر
- شنو هوَ

الشيـخ مروآن آل دحام
- انتِ ..
خربطتي احوالي روآن، اول تالي انة هجي يصيـر بية انة اعترف اعترف انُ انة طبيت بهاي المعركة وطلعت خسران
بس ما خسرت بسبب بيت جبر
خسرت بسبب بت بيت جبُر

الشيـخ مروآن آل دحام
- والله احسج موجودة بعقلي دوم بحَيث انة ماكدرت لحظة ما افكر بيـج

-شوفي ردي على اتصالي لا اخزيج وعلي
اتصل عليـة ماجاوبت

كمت قُفلت البـاب واجيت
خايفة ومرتبكة ومـادري شحجي اصلاً
بَس رديت ..

اول مارديت اجاني صوتة ..

مروآن
الو ..

روآن
...

مروآن
ردي بلعتي لسانچ ؟

روآن
حاجيني بـ احترام احسَن الك ..

مروآن
بوية لتهدديني انة مروآن ما اتهدد

روآن
....

مروآن
اسمعيني
الدنيـا مگلوبة فوگ راسي
اهلي يحجون علية، والناس الداير مدايري صافنين علية
شني شكو ليش رجعتها ونوَب بنفسك رايح لبيت جبر
وانة مطرِش كل الناس وبالي يمج
تدرين شكد تحملت حجي؟
وشكد نـاس سمعتها تحجي
وتضعف بشخصيتي كدام شخصية اهلج
وكل هذا وانة ساكت

ولج قسمًا بالله رجفتهم لاهلج من ما جنت اعرفج
خليتهم يسون الي اريدة وهمة الممنونين

انة مروآن آل دحام واحد ماخذ حگي واجي لبيتة؟
انة مروآن آل دحام يندگون بي ويسكت !
لا وابو فاضل لا
بـس الخصم جـان انتِ هاي المّرة

بحيث هَسة انة ما مهتم لكل شي
على كد ما بهاي الايام انتِ ب بالي وما طلعتي من عندة

فد يوم فكرت اجي هجي امر بمنطقتكم وشيصير خلّة يصير

بعدين كعدت وفكرت وي روحي
ولك مروآن ثارات ابينكم مو ثآتر
والناس كلهة تدري والدم للرچاب واصِل
شجاك شبيك جاهلة تهزك وو ...

روآن
لتكول جاهلة! انة مو جاهلة ...

مروآن بضحكة عَميقة
المثل معَ المِثال
ولج انة ويـن احجي والبطران وين يحجي

روآن
وهَسة شتريد ..

مروآن
مادري
اصلاً ليش جاي احاجيج مادري
تنهَد بصوت مسموع وسكت
وانة سكتت ..

مروآن
تذكرين من حجيتيلي عَ الحُب
وكتيلي انتَ ماتعرف تحب
وماعدة كلب ؟
ابشرج كلبي بدة يشتغل
وصرت احس بوجودة
ونبض
وحبيت
بس مو حب عادي
هذا الحب المستحيل

هوَ يحچي وانة صافنة بي
معقولة ؟
هذي صفحة مروآن
لو كاعد يضحك علية
والله مـادري

مروآن
هوَ انة ما اسمع اغاني بس سمعت بشكل عشوائي
هاي مال
هلك والعـاذل يريدون
وانة وياك رادة نريد ...
ولو يـا انة وياك
انة وحدي وانتِ وي اهلج ..

احس الارتباك موتني وهـواي مشاعر اجمعن بعيوني

مروآن
يجوز راح ادفع ثمن هل حجي بعديـن
ويجوز حَتى انتِ تستخدمي ضدي
ادري بيج خبيثة ب بعض الاحيان
بس روآن انة صدك احبج

هو انة مادري شنو يعني حُب
وما بعمري عشتة
بس اتوقع سالفة انُ انسان ما يروح من بالك
ب ولا دقيقة
وتموت لو سمعت واحد يحجي عَنة
ومستعد تاكلهم اكل لو جابوا طارية بسوء
وتصير تتخيلة بكل وقت كدامك
وبكل حديث ينحچي
وحتى بحلمك ميفارگك
هو هذا الحُب التحجون عنة ...

مِن گال هَيج انصدمت صَدمة عُمري
ومن صدمتي راسًا سديت الخَط
عفت الموبايل وكعدت ع جرباية
تربعت وصافنة
هذا صدگ يحبني لو يضحگ علية

احِس كل شي حلم يصعب تصديقة
مروآن يحبني ؟
شنو ويمتى مادري

صوت رسائِل
الشيـخ مروآن آل دحام
- عقلي يسولف بيـج لاخر لحظة بليل
وبالصبح تردين تشغلين بالي

الشيـخ مروآن آل دحام
- روآن انة واصل لمرحلة انّي مستحيل اعوفج
احِس انُ شيصير خلّة يصير
احارب اهلج احارب اهلي
مايهمني، اليهمني انتِ ...

الشيـخ مروآن آل دحام
- نفس ما انة غلطت انتِ غلطتي
والاغلاط تنمحي لو جان الحُب صادق
وانة صدگ احبج وماريد ترحين من ادية
طول هل فترة انة افكر بيـج وماحس مستعد افرط بيَج ابـد

ما انكر اذا اكول اكو فَرحة بداخلي صارت غَريبة
هوَ اكو انتقام واكو كره بس اكو فرحة يصعب توصيفهـا
وما ادري شلـون اعبر عّنها حَتى

بهـل اثناء سمعت صوت علي

علي
تعـال اشبعك حُب اشبعك دلال
تعـال يبن النعال
من نعلة على ابووووووج الي ب بالي

طبلي وهوَ يعيط وعلاگة بـ ايدة

ارتبكت ومسحت الفَيس بسرعة ..

علي
هلا عيني سَت روآن
شني شو لا حس ولا نَفس

روآن
انة الي لا حَس ولا نَفس
لو انتَ محتار ب اهل الموصل

علي
لك سالفتي ما ضال واحد مايعرفها
بس جبُر ما يدري ولو يدري الا يشعل جدي السابع عشر
ويسمط ابو ابوي

روآن
ها يعني تدري ومكيف

علي
ولج هوَ الحب شني حلاوتة وشني لذتة اذا مابي اكشِن
جا حب وكبع واخذ ؟
شكد سخيف
عمي الحب الحقيقي يبدي بمعارك وينتهي بززززفة

من گال هَيج حجة وهوَ يجعص خدي ويبوسني
اباوعلة بي طاقة مُفرطة بشكل
مبين فرحان

جذبتني حجايتة الاخيَرة
وبنفس الوقت فرحت لان هوَ هلكد فرحان

روآن
شنو الحبيت بيها

علي
شنو الماحبيتة بيها ؟
كلشي احبة بيها بس ابوها خر.. عليّ كلب ابن كلب

ضحكت حَيل وكتلة

روآن
ياااا ليش تغلط ع رجال

علي
يريد ما يطينياهة جاي يذبلي بسامير
ما يدري انة علاوي ابو حسين اكل للكاع انشكي واخذ الاريدة

هوَ يحجي وانة اضحك
علي موجود منو ما يكعد يمة وما يضحك مُستحيل

اجة جايبلي نساتل ومدري شنـو

علي
اي فضفضي شلونج شخبارج شعدج كاعدة بهل حجرة
ما مليتي

روآن
ليش تهمك اخباري ؟
اشووو ماكوووو ٢٤ ساعة بالموصل و واجبات حتى مااشايفيكك

علي
وعلي حقج بس روآن كفيلج الله الموت جاي اشوفة بعيوني
لا تشوفين ضحكتي تارسة وجهي من كل النواحي جاية علية
ضغوطات الشغل وضغوطات الحياة
ومن كل النواحي ضغوطات
بس ماكول غير الحمدلله ..

حجاهة بـ نبرة تعب
جان مبين تعبان ف ماحبيت اعاتبة ازيد
حجينـا شوية وگال يلا خل ننزل يمهم

نزلنة يمهم شويـة و واحد خابر على جدي

جبُر
اهلاً وسهلاً بيكم شيخ رائد
عيـن غِطى وعين فراش

سد الموبايل وگال

جبُر
الشـيخ رائد جاي، بس الغريب گال انة و اهلي

من گال هَيج كل احنة باوعنة لسـيوف
انة ادري بـ سيوف تحب سجاد وسجاد يعشگ سيوف اصلاً
واذا صارت صدگ فَ معناهة هاي نهاية سيوف
لان ادري بيها تتخبل على سجاد وبنفس الوقت
ما تكدر تحجي لو صار شي

روآن
جدي سيوف صغيـرة

زَعيم
لا مايصير هجي حجي لتخافون ..

گامت سيوف بسرعة صعدت صعدت وراهة
جـانت تبجي وخايفة حَيل
كتلها لتخافين وايّ شي يصير انة احجي وياهم وماطول زَعيم كال لا فَ هاهيَ

الشيخ رائِد اكثر انسان يكرهة مروآن
هوَ من جماعتنة وشيـخ معّدل على گولة اهلي
بس يم مروآن مادري ليش موخوش

اجتِ امي وكام تحجي عَ سيوف وتكول الها هَسة احنة ماندري شيصيـر انزلي واسكتي

قنعتهـا وكتلها لتخافيـن انة يمج ومايصير شي

صدگ والله ماكو ساعة وهُمة يمنـة اجن النسـوان وگعدن سوة بَس الغريب انُ هنّ يباوعن عليّ

( اخوان انتبهوا، دام المشهد يخُص روآن فَ ما اذكرة بكلام رحمة ولا بكلام سَبب كُل وحدة والها مشهدها الخاص ماريد احرگ الفقرات ابـد )

بدن يحجن ويقدمن مُقدمات الخطوبة ومدري شنو
ويعرفن عن ابن الشيـخ رائِد وشنو عندة ومدري ايش

- واحنة جـايين اليوم وطالبيـن ايد ( روآن ) ل ابن الشيخ رائِد

روآن
شنـو خالة قَصدج سيوف ؟

- لا خالة انتِ رايديج بالاسم ههههههههه

صالحة
العفو منـج خية بس شنو معنى رايديها بالاسم احنة بناتنا ما طالعات حَتى واحد يشوفهن ويطلبهن ب الاسم

- لا خية السموح منج مو هجي السالفة بَس احنة جايين نفس ما تكولون عبِد مأمور

روآن
خالة تـرة انة متزوجة و.....

بعدني ما مكملة

- خالة ندري جنتِ حرمة آل دحام واحنة جاييـن عليج مخصوص

كل احنة صفنة عليهن وما ندري شنجاوبهن
هذني شبيـهن !! وشنو سالفة !
يدرون بيـة مزوجة قبل ول ال دحام
وجايين حَتى يخطبوني لابنهم المحامي الي عمرة ٢٥ سنة بَس
وما مزوج قبل ؟؟

اباوع امي فررررحت فرحة موطبيعية وبيبيتي نفس الحـالة

خليت وكمت من مكـاني وصافنة هذولة شبيهم صدك شبيهم

شويـة وراحوا راسًا نزلت حَتى اشوف شنو السالفة
اشوف الكل كاعدين ويضحكون
اول ماشافني جدي صاح

جبُر
شفتي يـ روان
هذا مروآن راح تنكسر عَينة كسرة معدلة

وكفت كدامة وكتلة

روآن
ليش منو كلك انة راح اقبل اساسًا ؟؟

زَعيم
وليش ما تقبلين
وعلي لو انة منج اقبل واكسرررر عينة لهذا السگط
لج انتِ شايفة ابنهم شني ؟؟؟؟
وحق الله ادبة واخلاقة كلها تحجي بي
ومحامي وما متزوج حَتى
ورايديج انتِ

جبُر
هوَ كال انة ردت اناسبكم من زمان
وعنادًا بمروان وبالي سوى حتى يكسر هلبت المسكينة
اجيت حتى اثبت انُ بنات جبر ما ينكسرن

روآن
وهـا هَسة هوَ حُبًا بيكم هيج طلب

جبُر
ايّ شيخ رائد من اقرب الشيوخ النـة

صالحة
وليش لا ولج يمة
دقبلي واكسررررري عينة وراوي هوَ منو
وقسمة تخبل ليش لا

حَسن
والله انة اشوفة حظ واجاج يبوية
هم رحمة من الله وهم تكسرين عين هذا

روآن
علي مااااا تحجي شي ؟؟

علي
لوبيدي انة اتزوجة واكسر عين مروآن ولج شتحجين
والله يعمي لو انة بمكانج اتزوج

روآن
بهل بساطة!!!!!!

علي
افتهمي انتِ ولج
اول شـي الزلمة مثلة ومثل اخلاقة ماكو رجال معدل ومعروف وانة صاير عندي تماس ويـا ب اكثر من مّرة وما متزوج وبيت رائِد بعَد
شعندج كاعدة بغرفتج وحابسة روحج وتبجين
مو تكليلي اريد انتقم منة
هاي اجتج للحلگ
بس بنفس الوقت مو تنتقمين ع حساب حياة كاملة
بس هسة انتِ لكيتي حياة كاملة ولكيتي انتقام
وبعد بكيفج محد يغصبج على شي انتِ ماتردينة

جبُر
والله عوبة اذا كالت لا

اباوعلهُم كلهُم فرحانين
ويعتبروهـا كَسرة بـ مروان
وانتصـار عليّ
خصوصًا علي دائِمًا يكلي
يجيج اكبر واحد واحسن واحد وتكسرين عينة غصبًا ماعليّ
وبيت رائد شيوخ مو شلون ماجان
ناااس معروفة على مستوى العِراق موبس الجنوب
فَ جـان الكل مقتنع بالسالفة ..

صعدت لغرفتي ومُباشرتًا نزلت فَيس وماسنجر
اباوع مروان رسالة ورة رسالة
ومستمر يدززز !

الشيـخ مروان آل دحام
-هـذا شنو جاي يخطبـج
اولاد الچلب يتحدوني لو شنووو هيَ
وعلي اطررررهم طَرررررر

الشيـخ مروان آل دحام
- انعل ابوهم لابو الجابهم يردون يكسرووننن عيوني بيج

الشيـخ مروان آل دحام
- وهذولة اهلج منطيهم أمل موووووو

هاي شنو وشمدري وشبسرعة وصلت الاخبار اصلاً

رأسًا خابر رديت ..

روآن
شتريـد؟

مروآن
لج لا تخليـن اموتج وحق الله وفوكاهة وتحجين هَيج ؟

روآن
شدخلك مروآن ترة انتَ مو رجلي وتتحكم بيـة

مروآن
يحلوة ترة طلاگنـا باطل تعرفيـن شنو باطل ؟
اول شي انة مطلگج مرة

وهم مغصوب ومو برضاة نفِس
يعني شرعًااااا هوَ باطلللل

وانتِ مرتي غصبًا عليج مرتي
رضيتي بيها رضيتي
ما رضيتي مو مُشكلة
انة واهلج نتفاهم

واحرگ الدنيا عليهُم
والله اسويـها الحرب العالمية الثالثة عليكم

والا اكلج انة عليمن اتفاهم ويـاج

خل اتفاهم وي الراس الجبيـر
ارد اشوف شنو تاليتها وياكُم

واذا ما حرگت الدنيا فوگ راسكم
ما اسمى شيخ مروان آل دحام

يـلا روحي ...

گال هيج وصرت اسمع طن طن طن
الاتصال انگطع .... يُتبعععع
توقعاتكُم
هّم راح تعلگ بين آل جبُر وآل دحام
وياترى هل مَرة منو الراح ينتصر ؟

لا تنسـون التصويت
دعمكُم حبايب 🤍