رواية بيت جبر الفصل السابع والعشرون 27 - بقلم هُدىٰ آذار

مّساء الخير حبايب
رجعت وياكُم بـ بارت جديد
من قصتنـا
بيت جبُر
للكاتبة: هُدى آذار
_______________

حَتى اكدر اوصف الكُم الي صار بالتفصيل المُمِل
مراح يكون هل يوم فقرات لا بالبداية حيكون اكو اكثر من فقرة لشخُص نوب نثبت ..

شَمس
من بعَد مـا رجعت لبغداد، حسّيت نفسي أخف
رغم إنُ بجسمي ثِگِل مو طبيعي، بس بجوّي هدوء،
ما بقه صوت يصيح علي،
ولا نظرة تجرح،
ولا خوف من باچر وشنو ممكن يسوي.

يمكن الوجع بعده، بس على الأقل صرت بعيدة عن السبب
وهذا بحد ذاته راحة ..

يـوم من الايام جنة كاعدين اني وبابا
وفجـأة اتصل زَعيـم، انصدمنـا مو مِن عادتة يخابُر هَيج

فتح بابا الخَط وبـدة يحجي ويـا
جنت مركزة بتفاصيل بابا واباوعلة بتمعُن

وِجهة انقلب لضحكة وصارت بي فَرحة جبيـرة

السَبب صـار واضح يمي
بس اريد اتأكد مِن عندة

اول ما سد الموبايل بابا ضحك حَيل
اباوع لعيـونة جانت مدمعة

شَمس
ها بابا الي بالي؟

حَسنين
بابا جدج عازمنـا عكب باجُر على وليمة هوَ مسويها

من كالي هَيج حيل فرحت، اباوعلة فرحان حَيل و ودة يطير مِن الفرحـة حضنتة حَيل وصرت اشاركة بفرحتة واني اضحك واكُلة يارب كُل شي يعود لمجرى

اباوعلـة انخُبص وصـار يروح مِنا ويرجع مِنا
نَفس الطفل المتحمس على طلعـة

بنفس اليـوم كال اريد اطلع اجيب دشداشة جديدة ومدري شنـو
طلعنـا اني ويـا وهوَ جاب دشاديش واني جبتلي صاية جديدة

جـان فرحان بشكِل موطبيعي وبفرحتة هـاي فرحني ويـا
اني كُلش اعرف شنو معنى انسان يعيش بلا أُم
بس اني عَ الاقل اعرُف انُ امي ميتـة ومـاكو أمل
بَس بابا شلون وهوَ محروم مِن أُمة وهيَ على قيد الحيـاة ؟؟

تحضرنـا اني وبـابا واتجهنـا الهُم
بابا جـان حَيل متحمس وفرحان واني على فرحتة فرحانـة

اول ماوصلنة حسيت شو كلبي انقبض
ماردت ارجع ابد احس هاي المُحافظة استنزفت كُل شي بية

وكل مكان بيهـا صار يذكرني بشي يخُص محمّد
رغم انُ بداخلي برود جبيـر وهدوء قاتل

إلا اني حاولت اطمثهِن وابدلهن بشعور السعـادة
وما انكُر انُ جانت اكو سعـادة ظاهرة ومغطية عَ الحزن الي بداخلي

اول مـا وصلنة وصرنـا مقابل البيت
بابا ما نزل فوراً.
ضل يباوع من جوا الجام، ساكت، كأنه يحاول يترجم الذكرى اللي بعده عايشها بهذا الباب.
ضليت أراقبه، ما جنت أعرف شگول، بس جنت اشوف بي نظرات يصعب احد يفسرها

عَلى وجهه رجفة مو باردة، رجفة ناس كَاتمة هواها عشرين سنة.
عينه كانت تلمع، مو دمعة وحده، لا، جانت بحر صغير يحاول ما يغرق قدامي.

نَفسة حَسيتة ثگل والذكريات كلها كدامة
حبيت اكسر الصمت
حَطيت ايدي على ايدة وكتلة

شَمس
بابا يلة اهلك وناسك منتظريك تـرة

باوعلي وهوَ مبتسم بس جان كل شي بتعابير وجهة يحجي غَير

حَسنين
لتخافين علية اني هَسة قوي بس خايف لا اضعف من اشوف امي

شَمس
لا بابا ماريدك تضعف اريدك تكون قوي علمودهـا وعلمودك
يلـة هَسة تقدم ذاك اليوم امير ضَل واكف بالباب ودك هورن وطلعولة السيارات يطببوهِن لجـوة ..

تقدم لكدام ودگ هـورن السيارة
شويـة انفتح الباب باوعت سُراج
ابتسـم النة وطبيـنة

واني كاعدة و اوصي بـ بابا يكون قوي
نزلنة من السيـارة واجوي كُل الولد تجاهنـا

رحبوا بينـة ترحيب حيل حلو
وسلمـوا على بابا وعلية

جنت بساعتهـا لابسة جُبة حيل عريضة سودة
وشال احمَر

اباوع لـ بابا مرتبك بشكل موطبيعي
ودموعة صـارن بعيونة وبعدنة ستونة بالمطبخ

لزمت ايدة وابتسمت بوجهة وهزيتلة راسي
حَتى بس يهدأ شويـة

أمير
عمي حَضر دموعة من هَسة شني سالفة عمي

من گال امير هيج الولد كلهم ابتسموا واني ابتسمت
باوعت لـ بابا حط ايدة عَ عيونة وايدة جـانت ترجف

زَعيم
عمي كول يـا الله تعـال طب بيبيتي منتضرتك على احر من جمر والله

حَسنين
واعدت نفسي ما اضعف بَس احس ماكدر وعلي مشتاقلهم حيل
وماكدر احط عيني بعينهم حتى
خصوصًا امي شلون احط عيني بعينها من بعد السويتة بيها
ومن بعد ماعفتهـا وحدهة هجي

زَعيم
الماضي ماضي واحنة ولد اليوم
انسى كل شي وانعل الشيطان وطب الهم عمي
بنهاية همة اهلك والاظفر ما يتبرة من اللحم

سُراج
احنة كلنالها العصر كلشش يلة يجي
صارلها من امس لليوم كل ما يندك الباب تكول بلكت عمكم اجة
واحنة نكل الها لا موهوَ يتاخر يلة يجي
فـ طب عمي والله منتظرتك وكلبها متلوع عليك

رجعت لزمت ايـدة وكتلة
بابا حبيبي كافي اهدئ شبيـك

امير
لا ماعندة شي يلة عمي كول يالله وطب يلة

لزم ايـدة امير واخذة وطب
صـار سُراج كدامي باوعلي وكلي تفضلي
مَشيت كدامة
ورة بابا وامير وزَعيم

جانوا كلهُم كاعديـن بالصالة بيبي وجدو والباقيـن
باوعت لـ بابا وباوعتلهم
بيبي من شافت بابا انفزعت

دكت ايدهـا على صدرها حَيل وكامت
صالحة
يمة ضناي
يمة وليدي حَسوني

بهـل اثناء هاي بابا راحلها يركض
حضنها بكل قوتـة وصار يبجي
هيَ تبجي وهوَ يبجي
ومجلبين واحد بالثاني حَيل بكل مابيهم

باوعت لجدو يباوعلهُم ومبتسم
احسة كوة واكف ومثبت روحة
حَسيت بداخلة اكو هواي مشاعِر
بس هوَ طامثهن
باوعلي وابتسم وصاحلي اجي
باسني وحضني

ورجعنـا التفتنا نباوعلهم
دموعي لا ارادي كامن ينزلـن

اباوع لبيبي تحضنة بكل قوتـها وترجع تشمة
وبابا يبوس ايدها ويرجع لراسها يبوسة ويرجع يحضنها بكل قوتـة

رجع التفت بابا لجدو
دنگ وطاح يم رجلة بسرعة

حَسنين
بوية أذيتكم والله ادري أذيتكم بس والله روحي اتلوعت اتلوع وراكم بوية هوووواي قسيت علية هووواي وانة ابنك الصِغير يابوية

اول مَرة اشوف بابا يوصل لهاي المرحلة
اقصى شي جنت اشوفة عيونـة وهيَ مدمعة لمن ينجاب طاريهم لو ينجاب طاري ماما بَس مال بجي وبهلطريقة بعّد
ابد ماشايفتة هلكد منهـار

دنگلة جدي وحط ادي على جتافة
وكومة وحضنة حيل

باوعت لجدي هم مدمع بـس دموعة ما نزلهن
ضل حاضن بـ بابا حَيل
وبابا حاضنة ويبجي

رحت لبيبي حضنتهـا حَيل
ضلت تبوس بيـة وتحاول تعبرلي عن فرحها بوجودنـا

الكل جـان فرحان بيـنة خصوصًا بيبي
جانت كل شوي تبوس بابا وتبوسني
ومـا تقبل لحظة وحدة تمر وبابا مو ويـاها

بابا الصغيـر والمدلل الهُم مِن الصغر
رُغم كُل شي ما اكدر احط اللوم عليهُم بقرارهُم
لان بسبب بابا وبسبب الي سوى
هـواي ناس لحد هاي اللحظة جاي تتأذة ..

شفت فَرس جانت موجودة حجينة سوى وتقاربنا بهاي اللحظة
نجنت كُلش فرحانة لان علاقتها هيَ وأمير رجعت
بس هيَ ماطولت يوم واحد ورجعت للموصل ..

ضلينـة يومين يمهم
واني مجنت اتحرك من مكاني
اني هم من النـوع الي مو كُلش اكدر اتأقلم وي احد
فَ ما تقاربت كلش للبنات
جنت لازكة بـ بابا وبابا لازك بـ بيبي
ونضـل كاعدين سوى
وسوالف بيبي ابـد ما تِنمل

انصدمت بـ قرار جدي الي جان يكولة لبابا
وجان مُصر علينـا عَ انّه نجي يمهُم
بصراحة القرار جان صادم الي
خصوصًا اني منتظرة بس اكمل المرحلة الاولى وارجع لبغداد كُبل
بس من شفت بابا ولهفتة بينت الة انُ اني فرحانة وماعندي اشكال اساسًا

اباوع لبابا شلون متهلف والحيـاة رجعتلة وكانما طفِل ابو الـ ١٥ سنة مو ٤٢ سنـة

ودعناهُم واتجهنـا لبغداد
بيبي ما هـان عليها توديعنـة وضلت تبجي
بَس كعدنا نقنعها اني وبابا انُ فد ١٠ ايام بس نرتب وضعنـا ونجي ونستقر نهائي هنـا

ركبنـا بسيارة وبابا جان عندة طاقة مُفرطة
طلعنا من بيتهُم وصرنـا نسولف ..

حَسنين
بفلوس بيتنـا اشتريلي ارقى بيت هنانة ونستقر هنـا وكل يوم يم امي والله بس ارجع من دوام اخذلي شويـة راحة وكُبل لامي

شَمس
ان شاء الله بابا بس ننقل نضل يمهُم
وتدري شنو اساسًا اني ماتوقعتهم هيج
خصوصًا الولد توقعتهم يكونون صعبين ومدري شنـو
شو طلعوا مثقفين وهادئين

حَسنين
بابا مو عمامج الي مربين هاي التربية هوَ ولا صغرًا بيهم اكيد بس التربية تربية جدج، نفس ما ربانـا رباهم ما شاء الله كل واحد شهادتة بـ ايدة وهم ماعايفين جدهم بالمشيات والفواتج
وهم اخلاق وادب وكل شي

ضلينـة نحجي عّما طلعنـا من البُستان لان جان حَيل بعيد
وبهاي المَرة بابا صار وكانهُ الابن واني الاب
هوَ المُتحدث واني المُستمع

وصلـنة عَ الشارع العـام وگال
حَسنين
صرعتج صرع بالحجي مو

شَمس
ههههههههههه لا بابااااا اني كُلش فرحانة ومتحمسة على حماسك

حَسنين
انة هم والله بابا
مارايد شي غير امي وابوي وهاي اللمة الماتتعوض
هوَ العمر گضة شبقى بي يا بابا
واحد يگضيهن عـاد بين الي يحبهم

ابتسمت على كلامة واخذنـا الطَريق الموازي للبُستان
ماجان بي احد والدنيـا الظهرية جاي نمشي بي ونمشي هم علكيفنة لان الطريق تُرابي ومتعرج

شفنـاه اجت سيـارة لاندكروز من كدامنـا سودة مضللة
الطَريق يوسع لاثنين واحد روحة والثاني رجعة

فَ بابا صار على صفحة حَتى يعبر
شو هذا وكف بنُص الشارع

شَمس
بابا هذا شبي

بعدني ستوني حَجيت ما حَسيت إلا وثنين نازليـن من السيارة
الثنين لابسين دشاديش سود وشكلهم ما معروف بنسبة الي

حَسنين
اولاد دحام شيسون هنـا

من گال هَيج بابا شهگت
بنفس اللحظة طلعـوا سجاجين مِن جيوبهم
صرختتت بصوت عـالي

شَمس
باباااااااا ارجع بسررررعة بابااااا

باوعـت لبابا ارتبك وانصدم
ستوة حَط ايدة عَ الستيرن ويريد يرجَع
ركضوا حَيل لاتجاهنـا فتحوا باب السيارة
باب السيـارة مقفول

صرت اصرخ واصيـح
بابااااااا ارجع بسرررررعة بابااا شبيـككك

اباوع لبابا يباوعلهم بالمراية ومصدوم ومرتبك ومايعرف شيسوي

خلال ثواني بـ السجينة كسروا جامة السيـارة
وكعت الجامـة كلها
فتحـوا الباب بسرعة ونزلوا بابا

احمد
اجـة الوكت يا حَسنين حتى انفذ وصيـة ابوي

ضَليت اصرخ حَيل وهمة يجرون بـ بابا
راد يقاومهم بس حَس ماكو منفذ

بهل اثناء همة منزلي
نزلت بـسرعة ورا
وبـ اثناء نزولي بابا صـار يحجي

حَسنين
شمس بابااا ديري بالج على نفسج
وكلي لابوي خل يسامحني
وامي خل تدير بالها على روحهااا
شمسسس .....

جـاي يحجي واني اتقدم الة
ماحَسيت إلا عَ صوت السجينة وهيَ تنغرز بكلبة حَيل

رجعت خطوات واني اشوف المشهد كدام عيوني
اباوعلة يباوعلي ودمعتة نزلت

همسِت ( بابا )
وماحسيت الا والثانـي غرز السجين الثاني بـ بطنة

عيون بابا لِسة تجاهي وما انسدت ابد
بَس سوة هيج صرختتتتتت بكل قوتي
واني اشوف بابا يوكع والدم يطلع مِن حلگة

احمَد
ودععععع سووة بَحح و لـ الله كبل هههههههههههههههههههه

ضرغام
ودع البزون شحمة ههههههههههههه

ضحكوا حَيل وركبوا سيارتهم ورجعوا وراحـوا

ضَليت واكفة بمكاني
واباوع ومصدومة
دمعة وحدة ما نزلت مِن عندي
حرف واحد ما طلع مني
واقل حركة ما كدرت اسويهـا

الهوى عـالي والدنيـا صنطة
تقدمت لـ بابا واني ما بداخلي ايّ شي
وعندي كُل الي صـار حلم

كعدت بالكاع وحَطيت راسي بحضني
باوعتلة وهوَ معبة بالدم
وعيونـة مسدودة

شَمس
بابا هـذا حلم صح ؟
راح ارجع انام
وانتَ راح تكعدني خوش بابا

حِلم مُرعب ما اكدر حَتى اباوعلة بابا
راح انام وكعدني
بس لا تتاخر حباب بابا

اريد اعيش شعور الحلم وهوّ يطلع مو حقيقي
واريد احضنك حَيل

نمت  وغمضت عيوني
عقلي ماجاي يستوعب الي صار
ولا يكدر يصدكة حَتى

نمت على بداية صدرة وهوَ بحضني

سمعت صوت سيـارة تدگ هورن
وشوية وصـاروا ٤ زلم فوگ راسي

- هااااي شصاير دخيلكككككك ياربي شصـايرررر

- هذا مو حَسنين ابن الشيخ جبُر

- اي ولكككك هو

- ولك روووووح بسرعة لبيت الشيخ روح بسررررعة اندهلهم

اجة واحد راد يوخرني فتحت عيوني وباوعت لوجهة

- بسم الله بووووية انتِ عايشة شننني

باوعتلـة بـ صدمة واني ماعرف شجاي يصيـر حَتى

ضل يحجي ويـاي مَدري شنو واني كاعدة وراس بابا بحضني واباوعلة ومصدومة ..

جان اكو رجـال يحاول يحجي ويـاي بس اني بحرف ما نطقت
ضليت بس ساكتة وملطخة دم واباوع لـ بابا وساكتة ..

مـا حَدث —

مِن بعَد ما سمعـوا الخَبر الولد
الكل جـان مصدوم بـس استقبلوا الصدمة وتعاملوا ويـاهة بسرعة

صالحـة بدت تبجي وتلطم
والولد جـانوا يدورون بَس على سويج سيـارتهم حَتى يرحـون

إلا شخص واحد جان واكف ومصدوم صدمة شَمس
يباوع للنـاس والضجة وگلبة واجعة

شاف الولد راحـوا يركبون بسيارتهم بسرعة راح وياهم

زَعيم
جدددي شبيك

الشيخ جبُر حاط ايدة على گلبة ويحجي علكيف وبصوت مُخيف

جبُر
امشي بسرعة

زَعيم باوع لجـدة وهوَ مذهول
اول مَرة يشوفة بهاي الوضعية وبهذا الضعف !

بَس ماكدر يحجي شي لان هوَ هم ماجان عايز
راحـوا بسرررعة للشارع العـام ومِن بعيد لگوا سـيارة حَسنين واكفة والدنيا كلها ملتمة داير مادايرة
مِن واحد لواحد ومن خبر لخبر والناس تجمعت
والميت مو ياهو الجان بعَد، الميت ابن الشيـخ جبُر

زَعيم والولد نزلوا من سيارتهم بسرعة
وزَعيم نِسى جدة لان جـان بالة يم عمة وشنـو صايرلة

نزل الشيـخ جبر وبنزلتة حَس رجلي بعد ما يعيننّة
و وگع بالگاع رأسًا

شـاف ولد عمرة بالـ ١٥ سنة
اجة لاتجاهة وهوَ يريد يگومة

- شيخ شيخ انتَ بخير شيخ

جبُر
كومني بوية كومني رجلية بعد ما تعيني

كومة الولد وسندة وصـار يمشي ويمشي

- وخروا الشيخ جبُر اجة وخرواااا

المنظـر جان مرعب
شَمس جانت حاطة راس ابوها بحضنها وحاضنتة حَيل ومفتحة عيونها وتون بَس بدون صوت

- البت ما بيهـا شي بوية بَس عمكم راح راح

- آل دحاممممم ماكو غيرهم كتلوا حسبي الله ونعم الوكيل عليهم حَسبي الله

امير ركَض لـ عمة وهوَ يشوف نبضة
غمض عيونـة بقوة وگام وهوَ يصيـح

أمير
مات .....

زَعيم
اشهددددد ان لا اله الا الله
والله لـ اشرب من دمهم والله
والله لـ اخلي الرعب يملي بيوتهم
واخلي الدنيا كلها تحجي بالراح يصيـر بيهم

اتجـه امير لشَمس بسرعة
امير
شَمس شَمس كووومي شَمس

كومهـا بسرعة وهي تباوع لامير وتاشرلة على ابوهـا بدون ايّ بجي لو حجي زايد

امير
سراج بسرعة وصلللل شَمس للبيت

باوع اميـر لسراج، سراج هم جـان صافن
بَس هل مرة ما جان صافن على عمة
جـان صافن على شمس
وفكرة يحجي بهواي اشياء..

فَززة صوت امير العالي
وبهـل اثناء شَمس وكعت

بـس مو شَمس وحدهي الوكعت
وكعت شَمس وصارت صيـحة ثانية من رَجال

- شيخ جبر وكع شيخ جبر وكع

هنـانة الكل جان يباوع ومايدري شيصرف
إلا زَعيم جـان يصرخ ويتقسم

زَعيم
جدام هـاي الناس كلها والله اذا ما ذبحتهم نفس ذبح الدجاجة ما اسمى انة زَعيم آل جبُر
قسمًا بالله غير الذبح ماراح يصيـر
الدم بالدم والبادي اظلم

سراج شـال شَمس بسرعة
زَعيم وحَسن وحسين احتـاروا بالشيخ
وغَيث وامير اخذوا عمهم للمُستشفى ..

روآن
مِن بعد ما سمعنا صوت الرجال وهو يصيح
ابن الشيـخ جبُر وبتـة انكتلوا
كل احنة شهگنـا

بيبيتي كامت وكام تدگ وتطلم
والولد وجدي طلعـوا بسرعة

صالحة
ولك يمة ولك حَسنين والله حسني گلبي والله
والله گلبي نچلني عليّ
ويننننننن راح وين بعدني ما شابعة منة
بعدة ريحتة بهدومي ولك يمة ويـننننننن رحتت

كل احنة جنة نبجي وما مستوعبيـن الي صار
وبيبيتي انهارررررت علينة بالبجي والصريخ

ماخلت شي ماسوتة
مزكت اهدومهـا ملخت شعرها خرمشت وجهـا
واحنة ما نكدر حَتى نسويلهـا شي

اخابر عليهم محد يرد وبيبيتي منهارة ومحد يكدر يلزمهـا
تريد بَس تطلع

اخر شي خابرنـا بسرعة على بيت عمي محسِن
كلنة لمُصطفى بسرعة يجي

اجة مُصطفى ومرت عمي محسِن
مُصطفى لازمهـا وهيَ ما تنلزم تريد بَس تطلع

وبهـل اثناء صوت هورن سيـارة بالباب
ركض مُصطفى حتى يفتحة وبيبي كوة لازمـيها

باوعنة من شباج المطبخ سُراج طب
نزل سُراج من السيارة وشمس ويـا
شايلها ويركض بيهـاااا

طَب بسرعة وبيبيتي تلگتة

صالحة
ولك يمة عمك وين
ولك كلي عمي ما مـات
ولك كلي اخذوا للمستشفى ولك كلي

سراج
يمة عمي حسنينن راح
عمي حسنيننننن ماتتتتتت ماتتت

گال هجي وحط شَمس بسرعة عَ الـ تخم
فاقدة وما تحرك لا ايد ولا رجل

روان
يمة بس لا انكتل كدامها حباب لا تكولها

جـان يهز راسة سراج ويركض بسرعة داير مدايرها
وبيبيتي تدك وتلطم ومُصطفى و امي ومرت عمي لازميهـا

اباوع لسراج وخر شـال شمس ويدك ع خدها ويحاول يكعدها وهيَ ماكو ماتحرك ايّ شي من جسمهـا

كعدت بالگاع وصرت ابجي بحرگة واصيـح

روان
حسبي الله عليك مروان حسبي الله عليك
كتلك ما الها غير ابوها ليشششششش ليششش هجي تسوي بيهـااا
كتلة والله كتلة، كتلة لااااااااا تسوي شي وكلي ماسوي شي كلي ماسوي وكتلة ولجن كتلة

احجي بحرگة كلب وصايح وبجي
وسّبب ورحمة يمي ويهدئن بيـة

كمت رحِت يم سراج الي جان كاعد يحاول يصحي بـ شمس

سُراج
هيَ صاحية بس عقلها الباطن ما يرضى يستوعب شي وما يريد يصحى واذا ضلت هجي راح يصير شي موحلو ابد
شمس تسمعيني شمس اكعدي لازم تصحين شمس
روان جيبيلي ماي ع السريع ع السريع

روان
سراج صعدها لفوگ ماجاي تشوف بيبيتي شلون صعدها فوك بسرعة

هَز راسـة بالإيجاب وگال صعدولي مـاي واصعدن وياي انتِ وسيوف عَ السريع

صعدت ويا وكلت لسيوف تجيب ماي وتصعد
اول ماصعدنـة وصرنا فوگ قابلتنة شقة سراج لانها اول شَي

باوع الهـا وباوع لـ شمس
ادري بي ما يحب اي بنية تطب لغرفتة
حَتى لا عطُر زينب يروح مِن الغرفة

روان
طببهـا بغرفتنا سراج

هز راسة بـ لا وطببها لغرفتة نيمها عَ الجرباية

سراج
مو وكت هل سوالف
البت راح تموت
الماااااي وينة؟؟؟

بهل اثناء طبت سَيوف حطلها ماي على وجهة رمشت
بس ماجانت ترضة تفتح عيـونها ابد

روان
سراج خاف شو شبيـها

هز راسة بـ لا
وتقرب يمنة وحجة بهمس
سراج
راح اسويلهـا فحص وعي ماريد ايّ صوت تمام

كعد يمها
وصـار يمرر ايدة عَ جبتها ويحجي

سراج
شَمس تسمعيني ؟
اني يمج شَمس
الي صار خلاص انتهى
افتحي عيونج
اني اعرف انُ انتِ جاي تسمعيني
لتخافين ماكو شي يخوف انتِ بمكان آمِن

باوعت صَدرها يصعد وينزل
وصارت تحاول تتنفس بطريقة مُرعبة

سراج
نزعنهـا صايتها بسرعة نزعنهيااا

دار وجهة سراج ونزعنـاهة الصاية بسرعة
جانت لابسة جواهن فانيلة بدون ردان وبنطرون غطيناهة وكلت لسراج واني ابجي واني اباوع لـ حالتها

روان
سراج شمس شبيهـا وجهة اصفر صـار

رجع التفت الهـا وحط ايدة عَ جبتها
ورجع يحاجيـها

مـا مرت ربع ساعة وجوة صـارت صيحة
ومُصطفى يصير خل سُراج يجي بسرعة بيبيتي تخربطت

نزل سراج بسرعة و وصاني اضل يم شمس
واول ما ترتفع حرارتها اكلة

سـيوف ما تحملت المنظر ونزلت تبجي
واني اباوع لـ شمس وما بكلبي غير امنية
اصير كدام مروان واكتلة بـ ايدي عَ السوا

شويـة وشفت شَمس نفس الجاي تون بمكانها
بس بدون صوت وتحرك راسهـا علكيف

اخترعت ورحت بسرعة نزلت
باوعت سراج ومصطفى كوة لازميـن بيبيتي

اباوع لبيبيتي خدودهة حَتى دم طالع منهن
وشعرها نصة واكع بالگاع كد ما مگطعتة
وصدرها صايررررر احمر من الدگ

سراج
ليش عفتيها واجيتي روااااان

روان
س سراج تعال مدري شبيهـا شَمس

ركض سُراج بـسرعة لفوگ وروان ورا
على نفس نومتهـا وتون بـدون صوت

روان
شلون تبقى هيج شلون

سراج
حالتها خَطرة هجي حالات تودي لدواهي
بس هيَ غير تسمعني

رجع يحجي ويـاها بنفس الطَريقة
والغريب انُ لمن كال الها افتحي عيونج هَزت راسهـا بـ لا

روان
سراج يعني هسة هيَ كاعدة بس مغمضة عيونها لو شنـو

سراج
لا فاقدة الوعي بس ماجاي تقبل تعين روحهـا وتصحى

باوعتلهـا وبجيت حَيل على حالتها وكتلة
روان
هيَ هواي متعلقة بعمي حسنين طول الوكت وهيَ لازكة ويـا هسة شلون بيها سراج شلون راح تعيش حياتها؟ كلة من ورة مروان الله ياخذة بجاه هذا اليوم الله يموتة ولا يخلي بهل وجود

سراج
دمة ما يروح هدِر
واحنة مو زلِم اذا عديناهة الهم
اني هسة مايهمني شَي روان اريد شّمس تصحى وبس
حاولي تحجيـن وياها انتِ بلكي تستجيب الج
شلون حجيت وياها احجي وياها
وحاولي تلمسين ايدها حَتى تحس بالدفو والامان
اني نازل يم امي حالتهـا ما تقل عن حالة شَمس
ما اكدر اعوفها لا يصير الها شَي
مُصطفى ما يهديها كدي

نزل مُصطفى وصرت احاول احجي وي شَمس
بس هيَ نفس وضعها
وماكو ايّ شي تغير بيهـا

بساعتها انتابني كرررره فضيع تجاه مروان
وتندمت عَ اليوم الي عرفتة بي
وجنت اريد ياخذون حگ عمي وشَمس شلون ماجان
حتى لو يكتلوا المُهم ما يروح دمة هَدر ..

فكرت بعلي وكلت معقولـة ما يدري ؟
رحت لغرفتي جبت موبايلي وخابرتـة
كلي بالطريق جـاي بس انة والمغرب يـلة اوصل

علي جـان يتوعد ويصيح

علي
مو زلمة ولا انعد عَ الزلم ولا اكعد وي الزلم اذا ما كتلت واحد بيدي
شيريد يصير بحر مال دم ؟ خلّها هجي وضعية بعَد ما تنراد وهمة البدوا بيهـا

مع انُ عمي حسنين ما نعرفة هواي والولد صح يتواصلون ويا من قبل بس بشكِل بسيط بس من اجة بهل ثلث ايام وعاش بيها ويانة صدك دخل كلبنا كل احنة هو صغير حسيناه من عمرنا بحلنة يحجي ويضحگ ويانة وهو موبس وسيم بشكلة حَتى بروحة وبملگاه

اذكر من حجة وياي وكعد يكلي لا تتورطين وي آل دحام وانتِ بعدج صغيرة والف واحد يتمناج يَ بابا كلماتة لسة ترن بـ اذني وصوت ضحگتة و ملامح وجهة مـا يرحن مِن بالي

مرت اكثر من ساعتين والعالم كلها بدت تتجمع بـ بيتنـا
وسراج كل ساع يصعد يشوف شَمس وينزل

اخر شَي سمعت صوت نـاس وصوت صايح جوة حَيل قوي
نزلت بسرعة
لكيـت نساوين كومة ب بيتنـا والسواد مالي المكان ملي
طلعنـا بسرعة وبيبيتي طلعت نباوع من الشباج

الدنيـا مكلوبة كلاب والولد شايلين التـابوب والناس تهوس داير مادايرهم

بيبيتي مادري شلون لازميها وشلون مسيطرين عليها
تريد بس تطلع وتلوح التـابوت

اباوع للولد كلهم مليانين دمآية ماكو واحد ما دشداشتة ملطخة دم و وجوهُم مكّدرة وكلهم عيونهم تطافر شرار بس گوة ثابتين و واگفين

جابـوا التابوت وتقربوا لباب المطبخ
وخرن النسوان كلهن وكوة طببنة بيبيتي لجوة

جابـوا التابوت وطبوا علينة وهيّ صارت الصيحة
حطوا التـابوت بالنص
بيبيتي وخرت الجفن وشافت وجهة
وهيَ ماتحملت
كام تملخ بروحهـا تملخ والولد داير مدايرها وكوة لازميهـا

اجة امير يمي وهمسلي

امير
ويـن شَمس ؟ 

روان
شَمس فوگ وفاقدة

اجة سراج

سراج
شَمس كعدت ؟

روان
لا نفس الحالة

امير
سراج شبيهـا !!! من وكت الحادث لسة فاقدة؟؟؟

سراج
ايّ عقلها جاي يرفض يواجه الـ حقيقة
وبهجي حالات من صدمة يفقدون الوعي

امير
لازم تكعد لا تخلوهـا هجي ترا تموت وهيَ بحسرة ابوها

سراج
عوفهـا تخترع وتسوء حالتها امير

امير
شتحجي انتَ سراج اذا اندفن وهي ماشايفتة راح تضل طول عمرهـا ما ناسية السالفة امشي اصعد نحاول وياها

سراج
روان روحي قبلنـا

فهمت قصد سراج ورحت بسرعة رجعت لبستها جبتها وحطيت شـال على راسها على نفس وضعها بالضبط ما متحركة حَتى من مكانها

طبوا امير و سراج وصـار سراج يحاجيها

سراج
شَمس ابوج جوة ماتردين تشوفي ؟

امير
شمس هاي اخر مرة ابـوج يكون ويانة انزل شوفي ليش تضلين تتمنين تشوفي ترة اذا ماشفتي بعد ماتكدرين تشوفي ابد ..

من گال هَيج ماگدرت اكتم بجيتي
وهمة دموعهم صارت بعيونهم

بهل اثناء فتحت عيونهـا بهدوء
باوعت وهيَ ساكتة

امير
شمس ابوج جوة روحي شوفي هـاي اخر مَرة

باوعت سراج صـار عَصبي وكإنهُ ماراد يحسسها بالالم الي هوَ حَسة

سراج
انتَ شجاااااي تسوي امير عوفها لخاطر الله عوفها ماتتحمل بعدهي صغيرة

امير
سراج اذا ضلت هنا راح تضل بصدمتها خل تبجي خل تصيح اي شي خل تسوي المهم ما تضل هجي

كامت شَمس من مكانهـا ماباوعت لايّ احد بينـة طلعت واني رحت وراها وسراج يلوم بـ امير

صارت عَ درج وصارت تباوع للنـاس
هزتلي راسهـا بمعنى وين بهدوء وهيَ گوة فاتحة عيونها

روان
جوة شَمس جوة

لزمت ايدهـا ونزلنا اول ما صار كدامنـا التابوت لكينة بيبي تصيح

صالحة
يمة انشالت وحدة من عيوني
يمة يبعد كلبي كلبك يحسوني
هوَ انة ش شفت منك يابعد طولي طولك
ولك يمة انة الكون انطم بهذا الگبر
ولك يمة هوَ انتَ ش شفت من دنيتك
وانة ش شفت منك
كضيت حياتك تركض يبعد امك ي يمة
وين رايح وعايف بتك وعايفني ويـن
ولك يمة اكعد شلك بالموت
والله بعدني ماشابعة منك يبعد روحي يحسوني
ولك بكل ليلة انة ابجي عليك
ولك مرضتني انتَ
تالي هسة من بعد ما رجعت
متت وماخليتني اشبع منك
يابعدروحي ولك يمة اكعد

تقدمت شمس وسولها مكان يم بيبيتي
كعدت شمس بهدوء وبيبيتي صارت تنعى وتبجي وكل احنة نبجي ويـاها

اباوع لشمس تباوعلة وساكتة
حَتى ما سوت ردة فعل ولا كالت شي

بس شكلها مو شكل انسان بارد
شكل انسان مصدوم وما يعرف حتى شيسوي مو بس مايعرف شيحجي

صالحـة
ولك يمة لو ضال ب بغداد وماجايني احسلك
شسوي اجيت للموت ولك يمممممة
شوفتي جانت ثمنها موتك يبعد روحي روحك يا يمة

كالت هجي بيبيتي وهي تصرخ
وشمس بس تباوعلهـا

بيبيتي صارت تباوعلها
وتحجي ويـاها

صالحة
ولج يشميسة ابوج راح
بعد ماكو حَسنين ولج
بعد ماكو بابا و بابا وتفترين ورا
بعد ما الج احد ي شموسة
لا ام ولا اب ضليتي وحدج

دنگت شمس لعمي وهيَ تهز راسهـا ب لا
لكلام بيبي

بَدن النسـوان يتگالبن وينعن بيناتهن
واحنة نبجي وعمامي واكفيـن بالمطبخ يبجون والولد برة ..

- ذاك ارباي راح اوتعـبِ الايام
وخابت يالولد من عندي الاحلام
ناديتك يَ يمة وهلت العين
يسباح الكلب عني رحت وين
عيني اعلى الدرُب تتربة كل حين
واكول اسا يجي نبع الرياحين
وعيني انطفت من كثر البواجي
واعتب عالولد حلو المحاجي
ينعاك الكلب يايمة والروح
ماساعة ابغيابك فارك النـوح
رف الكلب رفت طير مذبوح
حين الشاف شخصك وكَت مذبوح
كل حَسرة الجبل يبني يهدهة
والله ارويحتي فكَدك مردهة

- يمة اخوانك تنادي بكلب لهفان
وعزاز الكلب هجروا الديران
ومسدود بجفاهم الديوان
شمحلاتها يمة لمة الاخوان

- تنوح ام حَسن والنوح بهداي
يم جثت الذبيح وفاكِدة الراي
مذهولة الوِديعة متيهة الـرآي
ويـن الفاگدة مِثلي ضناهة
تواسيني و آون وابجي ويـاهة
انة العِدوانهة گطعوا رِجاهة

- اخ ولج يمة تبجي ام حَسن لحال أبنها
وتلوع مِن شدة حِزنها
وذكرت مُصاب حسين أضنها

هنّ ينعن واحنـة انهارينة بالبجي والصايح

اجتي مرية احنة نعرفهـا من دَيرة كعدت يم شمس وصارت تصيح عليها

- ولج يمة راح تموتين ولج ابجييي صيحي
هذا ابوج هذاااا ابوج ماتتت ماتت ولج يمة

اباوع لشمس باوعتلها وهزت راسهـا ب لا لا

صالحة
ولج يمة يشموسة ابوج ماتتت ولج يمة راح غالينة راح

باوعت شمس لبيبيتي وضلت تهز راسها بـ لا لا

شوية وحجت بصوت مبحوح وكوة يطلع منها

شمس
بابا ما يعوفني بيبي
هو اخر شي ضل يحاجيني
بيبي تدرين شكلي تدرين
كلي بس نجي هنانة يومية اجي من دوام يم امي
ويومية نجي يمهم
اريد اعوض كل لحظة عشتها بعيد عنها
هجي كال بيبي فَ لا تخافين بابا كاعد هسة اراويج شلون

بابا بابا كوم بابا كوم بابااااا كومم
شبيك ثكلت نومك بابا
اني مو جنت من اكلك بابا بسرعة تفز وتحاجيني
ها حبيبي يلة بابا اكعد

بابا حلمت حلم بشع
حلمت لن كتلوك يمي بابا
حلمت حطوا سجينتين وحدة بنص كلبك و الثانية ب بطنك

يمة بابا متتت متتت بساعتهـا
همزين طلع حلم بابا همزين انتَ عايش
بّس ليش هيج طولت النومة
يلة بابا اكعد حباب اكعد

اباوع لشمس مكابلة التابوت وتحجي ويـا
ساعة تضحك ساعة تبجي ما تعرف شتسوي

شَمس
بيبي ليش تبجيننننننن ليش تبجيننننن
باباااا مابي شي ماااابي شي

صالحة
ولج يمة اوليدي ماتتت
مـآت الولد الربيتة والرباج مات

شَمس
لااااااااااا شنووووو مات
يعني شلون بس كليلي بيبي ام ماعندي اب هم ماعندي
هاي شبيج بيبي شبيج باباااااا مايعوفني ما يعوفنييي
هوَ كلي مرة والله بيبي صدكيني حبابة صدكيني
هوَ كلي ماعوفج ابد اني

هسة اصحي اني هسة ماما

يلة بابا يلة حبيبي باع بيبي شلون خايفة عليك
بابا شجاك ترة كلشششش طولت نومتك
يلة بابا اكعد لا تروح
منو الي بهدنيا منووووووووو

هيَ تحجي وتحاول تندهة وتكعدة

والكل كام يبجي عليهـا

شَمس
هسة اريد افتهم هذا شنوووووو ليش حاطيلة جفن
انتواااا مقتنعين ابوية يعوفني ويروح مقتنعيـن!!!!!!!

ذبت روحهـا عَ التابوت وصارت تبجي بكُل قوتها
النسوان ينعن وبيبيتي تنعى وتبجي
والكل حالتة حـالة

كمت للمطبخ لكيتهم كاعديـن وعمي حَسين شابك ابوي ويبجي

حَسن
انحرمنا يخوية من اخونة انحرمنـا منة

حَسين
لو ضال ببغداد عاد بعيد بس سعيد
نسمع اخبارة ونضم غصتنا ونسكت
ليش اجة وراح بعدنة ما لحكنـا نفرح بي وبلمتنا سوية

بهل اثناء طَب علي
باوعتلة عيونة حمر اجة ركض وحضن ابوي وعمي حَيل

علي
وعلي مـا يروح دمة للگاع والله ينوخذ حلگة من حلگ السَبِع
جدي ويـن جدي

حَسن
بوية جدك بالمستشفى

من گال هَيج شهگت ونفس الحجاية انة وعلي

شنـوووووووو !!!!!

حَسين
جدكم انصاب بجلطة
ولو ما الله وسترة جـان ما تعدت ..

من گال هجي شهگت بعلـوا صوتي

علي
اريد شَمس اريددددد اتاكد اريدد شَمس
والله ان طلعوا همة والله ان طلعوا همة
الا اكتلهم كلهم
والله اكتلهم بمكانهم من مروآن لـ اصغر واحددد بيهم والله

گال هَيج بعصبية وصوت عالي
وضرب الكاونتـر بكل قووووة

طبـوا الولد بسرعة
زَعيم وسراج وهمة يصيحـون شكوو

علي
جدي مصيوب بجلطة !!!!
ليششششششش ماكلتولي ولكمممم ليششش

سراج
شنكلك وانتَ بطريق شنكلك مو زين من وصلت سالم
النة خلك مصيبة رابعة
نحتار بـ جدك
لو بمصيبة عمك
لو بشمس
لو بيكككك
تعداهة لا تخاف غَيث وسجاد ومُرتضى يمة

علي
جيبولي شمسسسسس هَسة جيبوليا ارد اهد البيت على راسهم يابة والعباس ابـو فاضل الا الليلة

حَسن
ولكككككك اشششش اششششش لا تحلف
مو الليلة ولا شي الليلة
خّل جدك يطلع مِن المُستشفى ونسوي اللازم بس اسكت هَسة اسكت

علي
انة اسكتتتت انة
لا والعباس
بوووية جاي يتعلم علينة
مو بيت جبُر اليتعلم عليهم
شَمس ويننننن روان شَمس وينننن

روان
شَمس؟
شَمس مخبلة علي تبجي وتضحك وحاضنة عمي ونايمة يمة
تكول حلم هذا حلم وراح اصحى من عندة شتحجي انتَ شتحجي

زَعيم
الوكت تاخر هسة دامك اجيت يلة نطلع للنجَف
ندفنة ومن نرجع نتصرف
وحگة مـا يروح
الدم النزف منة راح يرجع اضعاف
وهـاي كدام الناس كلها لا اكل ولا اشرب ولا اصلي ولا اغسل دشداشتي اذا ما اخذ حگ عمي
روان سوولنة درب يلة ..

زَعيم من يحچي، يحچي بتأثر حَيل جبير
موبس غضب، غضب و غِل موطبيعي بداخلة

طبيت كلت الولد راح يطبـون
لبست النسـوان عِبيها وطبوا
زَعيم وعلي وسُراج وامير ومُصطفى

صالحـة
يمة وين تردون تاخذونـة يمة
ولكم وليدي ما شبعانة من عندة والله

كَعد علي كدامهـا وباس ايدهـا وراسها
باوعلها بتعجب عَ الي مسويتة بروحهـا

علي
يُمة والله حگكم اجيبة والله ما اضيع حگكم
حگج انتِ ك أُم
وحگ بنيتة هـاي
وحگنـا احنة
وحگ جدي
وعلي ما اضيع حگة
ولا اخلي دمة يروح هَدر
راح عمي بـس دمة مايروح
استهدي برحمن يمة
كل احنة على هذا الطَريق

صالحـة
ولك يمة ما اكدر ولك يمة كلبي شلون ينطيني يمة

گومهـا علي كعدها عَ التخم وامي ونسوان عمي داير مدايرهـا

اجوا لشَمس
حاضنتة حَيل ومدري شتحجي ويـا
تهمس بينها وبينة وتمرر ايدها على شعرة

اشرلي زَعيم حتى اكومهـا
رفعت راسها الي وشافتهم

اجة علي كعد يمهـا وابتسم وگال الهـا
علي
شَمس انتِ اختنا بعد
وانتِ مو صغيرة بنية جبيرة و واعية وعاقلة
ابـوج راح فَ لا تعذبينة اكثر يبعد اخوج
وخري عنة كافي، ترة گطعتي گلبة هّسة

شَمس
يعني شنو قصدك اوخر منة؟
اكو بنية توخر من يم ابوها
اني متعودة علي متعودة اضل يم بابا دائمًا
حتى مرات انام يمة
متعودة احس بوجودة بكل ثانية
ماكدر اروح والله ماكدر

علي
انة اخذج الة بس موهسة وخري عنة شَمس

راد يگومهـا نترت روحها حَيل وصاحت ورجعت حضنت التابوت

شَمس
جااااي اكلك لاااا انتَ متفتهم ماعندك كلب لو شنوووو
جاي اكلك اني ماكدررررر بدون بابااا ماكدررررر

علي احسـة بالغ غصة جبيرة وحَتى كلام ما يجمع
اجـة سراج يمها وراد يوخرها وهيَ مچلبة وتصرخ حَيل

شَمس
لا تصيـرون ظلام والله حرام عليكم
ما اكدر بدونة ما اكدرررر
هَسة انتّ كدرت بدون مرتك هـاااااا كدرتتتت
لا ماكدرت اني هم ما اكدرررر
ما اكدررررر

من گالت هَيج سراج عافهـا وطلع بسرررعة
اجة امير وخرها وهيَ تبجي
لزمناهة بالگوة وهيَ تشحرج وتبجي وتتوسل بـ امير يعوفهـا

شالوا الولد التابوت وشَمس تبجي

امير
بس خل افهمج شمس بس عايني كافي الله يخليج كافي راح تموتين

شَمس
مارررريد مارررريد ليش طلعوا ليششششش
حباب خل يجي حباب والله

عـافها اميـر وطلع وهيَ مستمرة تبجي وتصيـح

النسَوان ضلن يجنة لحد الـ ١١ بليل والولد كلهم راح يدفنون ماعدا سراج جان كاعد برة وحدة وصافن وماكو زلم ابـد برة لان يدرون البيَت فارغ

صارت الساعة بـ ١١:٣٠ بليل والنسوان كلهن راحن تقريبًا وضلينـة بس احنة

شَمس كامت وگالت اريد اطب بغرفة وحدي

روان
شتريدن شَمس خلينـا وياج ليش تردين تطبين

شَمس
ماريد احد حبابة عوفوني وحدي بس اريد استوعب بس اريد اكون وحدي بعَد ما اكدر عوفوني

طَبت لغرفة سَبب الجـوة وقفلت الباب عليها
خفنة عليها بس ماجنة نكدر نمنعهـا
ضليت ورا الـباب اسمع صوتهـا وخايفة عليها

شويـة وسمعتها تصّيح وصوت رجفة وبجي بصايحها مبيَن

شَمس
يااااا ربي ليششششششششش ااااااااه
انكتل كدامي ضليت بلاية ام ولا اب
ليششش ليشش

صوتهـا صار يعلى وصـارت تبجي بعلووا صوتهـا حَيل
خفنـا عليها وضلينة ندگ الباب
نحجي ويـاهة نريد وهيَ ماكوو بس تصيحح

صَفية
ولج روحي اندهي سراج لا تموت البت روحي

طلعـت بسرعة اباوع سراج مرجع راسة للحايط ومغمض عيونـة اول ماجيت فَز بسرعة

سراج
هـا شبيها شّمس ؟؟؟
خومابيها شي

روان
سراج حباب تعال سادة الباب عليها وتصيح حيل

ركض سراج بسرعة وضل يدگ بالباب ويحجي وهيَ
وهي مستمرة تصيح

سراج
انتوا شلونننن تعوفوها وحدهة شلون تخلوها تسد باب الغرفة
شَمسسس تفتحين الباب لو اكسرررة

شّمس
ماررررريد شي اريدددد اموتتتتتت ماريد شَي

من گالت هَيج سراج فَز وكبل كسر الباب
دفعتين والباب انكسر
طَبينـة عليها لكيناهة نايمة بالگاع وتبجي نفس الطفل

رگض عليهـا سراج بسرعة
گومهـا من مكانهة وهوَ يحاجيها

سراج
شمس كافي الله يخليج كاااافي

هيَ تبجي وتشحرج من البجي
نحجي ويـاهة وشوية وباوعت لمكان مجهول
وفجإة حطت ايدهـا عَ راسها وصاحت

شَمس
ضربة حَيللللل بكلبة حَيلللل
سجينتين ثنين

انباوعلها كامت ترجف وصدرها يصعد وينزل وتتنفس بصوت مسموع شكلها جان حَيل يرهب
سراج حضن وجهة وصار يحاجيها

سراج
منوَ عرفتي شمس بس كليلي منو سوة هجي احجي

شَمس
اولاد دحام الي كتلوا امي نفسهم كتلوا بابا
هو كلي كلي ذولة اولاد دحام
وسمعت واحد يكلة احمد اي احمد وثاني ماعرفة بس جان يضحك ويكلة راح

سراج
والله موتة ب ايدي موتة ب ايدي

كال هجي وراح ركض بسرعة لغرفتة

صّفية
يمة ولج صخامممممم بوجهي ولج لا يسوي شَي محد يمة

بيبيتي متخربطة وسَبب تهفيلهـا
ورحَمة وسيوف يـم شّمس

واني طلعت بسرعة
اباوع لـ سراج نازل وب ايدة اسلاح ويركض
جانت ركضتة ركضة جنونية
وجـان وجهة مـا يوحي بخير ابددد

صارت كدامة امي ومرت عمي ويحجن ويا

صّفية
يمة ابوس ايدك موهسة حباب يمة لا تروح من ايدي حباب يمة اكعد

سراج
يمة جااااي اكلج ووووخري عن طريقيييي يمة

رضية
عمة اكعد ولك خل يجون اخوانك وشتريد تسوي سوي اكتلهم اذبحهم ما انكول بس مو وحدك ولك عمة لا تروح انت هم ماعايزنـا عمك استوة راح وجدك بالمستشفى واخوانك موهنانة حباب يمة اكعد حباب

سراج
ارد افهم انة جاااااهل لو شنووو مجلبات بيـة
جاي اكلجن هدني
يمة ليش ادفعج يمة وخرررري من يمي بعد ماشوف واحددد
اليوم مانام اذا ما اطگة جيلة بنص گلبة
لا يغمضلي جفِن ولا يهدالي گلب وخررررن

گال هجي وراح بسرعة مانحِس الا عَ صوت سيوف وهيَ تصرخ حيل

صّفية
ولكككك يمك تعال شوف بت عمكككك شبيها

من سِمع صوت سيوف اتراجع وبسررررعة راح للغرفة واحنـة ورا

طبينة للغرفة اباوع شَمس بالگاع وتتحرك نفس المصروع ومدري شنو جاي يطلع من حلگها

صَفية
يمممممة صخام البت ماتتت يمة

راحلهـا سراج بسرعة كال بسررررعة الزموا رجليها فتح حلگها وحط شال بي، حَط راسها بحضنة وضل يمسدلهـا على جوانب خشمها يم عيونهـا

صَفية
يمة ولك شنو هذا الزباد المن حلگها شنووو

سراج
صرع يمة صرررع

شويـة وهدأ جسمهـا وارتخـة
شالهـا سراج بسرعة للصالة وحطها عَ التخم وصار يحاول يكعد بيهـا

صالحة
يمة شبيها شموسة يمة
اخ راسي يابعد امي وابوي
يـا حسوني وين رحت تعال وشوف حالنة يبعد روحي ييمة

سراج ضل لازم ايد شَمس ويدلك بيهـا ب باطنهـا
شوية ومسح وجهة بـ ماي كعدت

شَمس
وين بابا

بعدهـا ستوها گالت الكلمة غمضت عيونهـا واتذكرت الصار رأسًا صرخت وگامت

شَمس
باباااااا وين اخذتووووووا بابااااااااا

گالت هيج ورگضت لبرة
لحگهـا سراج وگوة لزمها

شَمس
عوفني حباب خل الحك عليهم بلكي بعدهم ما دافني
دافني ؟
يمةةةةةةةةة صارتتتتت صدك
دااحجي بالموتتتتت
ولمنوووووو لباباااا
يمة لاااااا الله يخليك عوفني

جـانت منهارة تصرخ بكل قوتها وتبجي
احنة نباوعلها ونبجي وبيبيتي تبجي ومغمضة عيونهـا وسَبب يمها تهفيلها رغم الدنيا ثلج  وحال الضيم يا حالها

سراج حَضن شَمس
وهيَ صارت بحضنة وتبجي

اباوع لسراج ماكدر يخفي دموعة
مجلجلات دموعة بعيونة بس مو راضي ينزلهن

ايد حاطها بظهر شمس
وايد ثانية صامهـا توعدًا لـ آل دحام ..

وخرت شَمس من حضنة وصارت تحجيلة

شَمس
اسمع اسمع خل اكلك شنو كلي بابا اخر شي

هزلها راسة سراج وحضن وجهة يريد يهديهـا ويسمع منها

شَمس
هاي بابا من نزلوا ردت انزل ورا جان شيكلي
يكلي شمس ديري بالج على روحج
وخل جدج يسامحني
وخل امي لا تنقهر
وكلي شمس وكتلوووووا
جاننننن يريد يحجي شي ثاني الي وما خلوا
معقولة راد يكلي صيري صيدلانية ناجحة نفس قبل ؟
لو راد يكلي احبج نفس ما كل مرة يكلي ؟
لو راد يكلي لا تقهرين روحج ويوصيني على نفسي
شنو جان يريد يكلي

احس حجيهـا ما كدرنـا نتحملة اني رجعت لورة وغطيت عيوني وصرت ابجي بكل قوتي واتحسب على مروآن
وبيبيتي كام تصيح ورجعت تلطم مرة ثانيـة

سراج
كاااافي شمس كااافي امسحي المنظر من بالج اممممسحي كااافي الله يخليج
راح تموتيـن شوفي شصار بحالتج

شَمس
والله راح اسكُت والله بس كلي شتتوقع
شراد يكلي ها ؟

سراج
راد يكلج ديري بالج على نفسج
انتِ عِزيزة يمة هواي شلون يرضى يشوفج بهل حالة شلوننن

شَمس
لعد اشوفة ينكتل كدامي واسكتتتتت
راح اموتتتتتتت اكو غصة هنا تعرف شنووووو اكو غصة هنا
هنااااا هنااااا باوووووع - وتأشر على بلعومهـا -
اكو غصة راح تخنگني راح تموتنييي

شلي بهل حياة شلي
المن اعيش اني بعَد المن؟
منيلي واحد بعد ؟
اني متعودة عليّ
متعودة الگا دومني
هسة اروح لمنـوووووووو لمنوووووو

سراج
احنة يمج والله احنة يمج بس اهدئي

سراج يريد يحضنها ويلزمها وهيَ تعوفة وترجع لورة

شَمس
انتَ كلي عوض احد مكان موت زينب احد عوض مكانهة
مو كلهم يمك تخطيتتتت؟
مو لحد اول البارحة تسأل بابا شنو شعورك من مـاتت مرتك وضلت بتك وياك وعيونك جانن يحجن هسة شنووووو
ليش ماتحسسسس بحالتي ليششششش

سراج
ولج حاسسسس والله حاسسسسس
بس كلبج كاااافي راح يوگف كااافي بس اهدددي شَمس

شّمس
لا ماهدة ماهدة الا توديني لبابا والله ماضل هنا هَسة توديني لبابا

راحت تريد تطلع وسراج لازمهـا گوة
ضلت تصارخ بحضنة وتصيـح اريد باباااا لا تحرموني منة ماريد تدفنـوا

سراج حاضنها بكل قوتة وعيونة مغمضهـن حَيل
باوعتلها هيَ كدامي عيونهـا تشنطن وصارت تباوع بطريقة تخوف وثابتة

شهگت وكتلة

روان
سراج شَمس شبيهـا

بعدة ما موخرها من حضنة طاحت بالگاع وهوَ ضل لازمها وبدت تنصرع مرررة ثانيـة

انخبصنـا حيَل بيهـا
وسراج ضل يصيح الزموا رجليها وجان مثبتها كلش زين
وحاط شال بحلگها

ضلت خمس دقايق ضبُط هيَ بس متخربطة
اخر شي رخت جِسمها وشخرت

رغم سراج حط شـال شوية  بحلگها
بس هيَ عضت لسانها وطلع دم من حلگها مسحة الها
وشالهـا حَطها عَ التخم وحالها يبجي جـان

ضَل كاعد سراج يمهـا وامي اخذت المسدس بدون مايدري وراحت ضمتة

صخونتهـا ارتفعت هواي وجسمها صاررر حار حَيلل

اباوع لسراج ارتبك وصار مايعرف شييسوي

رضية
يمة شبيها البت ليش هجي زهمرت

سراج
ما ادري عمـة ما ادري
جسمهـا كلة اهتز نظامة
وهاي كلة اثر الصدمـات
جيبلها شال بسرعة
خل اخذها للمستشفى

صَفية
ولك يمة منو يضل يمنة بيبيتك لا تتخربط علينة شنسوي بتالي الليل

سراج
راح اخابرلجن واحد من الولد لو غَيث لو سجاد يجي
رواننننن بسرعة حجاب

رحت بسرعة جبت حجاب لبستهيا وشـالها وراح
رادت امي تروح ويـا بس هوَ رفض وما قبل كال المستشفى هسة مكلوبة كلاب واني ما احتاجج

اخذوا شَمس ورحت يم بيبي شادة راسها ومغمضة عيونهـا وتون وتنعى

رحَت صعدت لفوگ جبت موبايلي ونزلت الفَيس
كاعدة ابجي وانتظرة ينزل ولو بيدي اخذ سلاح وبنص كلبة اضربـة

نزل الفيس والماسنجر بسرعة رحت لمحادثة مروان دازلي كومة بصمات ومنهن بيـوم غَيث كاتبلي رسالة وي مجموعة بصمات
- حَسبي الله خليتي غَصة بكلبي بكلامج

عفت كل شي وفتحت بصمة وبديت انهـار عليّ بالحجي واللجي

- سويتها مروآن سويتها ليششششش مو كتلك ما الها غير ابوها مو كتلك متعلقة بي حَيلللل
مو كتلي انة حَبيت وحسيت بـ احساسة جا هسة شنووو

لان عارِكك غَيث سويتتتت هجي
هلكد عقلك صغيرررر
ولك بنتة وبيبيتي حالتهن تكسر كلب الـ كافر

ولك بتة مرتين صار وياهة صرع وهسة اخذوها للمستشفى
وجددددي تصير بي جلطة بسبببكم؟؟؟؟

بتة راح تموتتتتت مروان
بتة ماتت شنو راح تموت بتة ماتت
وبيبيتي ملخت روحها تملخ
تكول ليش حرموني من ضناي وانة ستوني شفتة ورجعلي

روح يا مروان عساككككك لا تشون الضِنة بحياتك

والله لو اشوفك تموت كدامي هم ما راح اهتم
انتَ مو انسانننننن انتَ اخطررررررر شي بهذا الوجود
وانة الغبيـة صدكت بيك وبحجيك
عبالي صدك تحبني
تالي تسوي هجي ؟

ولك موتتت بتة
تخليهم يكتلونة كدام بتة الستوها ١٨ سنة
كتلتوا امها نوب ابوها ؟؟؟

ما اكول غير حسبي الله ونعم الوكيل عليك
وياربببببب تشوفهـا ب اهلك وهمة يموتون كدامك واحد واحد

الله يخلي الغَصة الي صارت بشمس تصير بيك
الله ما يضيع حوبة عمي والله

الحوبـة تبطي بـس ما تخطي
تلحگ وتسحگ وتاخذ ثلثين من الحگ
روح يـا مروآن آل دحام منك لـ الله
حَسبي الله ونعم الوكيل عليكم
ويارب كل غصة صارت بيتنـا تصير بيكم

كلت هجي ومسحت الفيس نهائي
كعدت بمكاني وابجي وخايفة على شَمس
اخابر سراج ميرد علية
وماكدرت الح زايد

شويـة وخابرني علي يريد يطمن وبعدهم ما واصلين للنجف
كتلة عَ الوضع وسولفتلة شلون سُراج راد يروح لـ آل دحام
علي تأكد من عندي انُ السالفة من آل دحام وگال اجي واتصرف
كتلة خابر سراج لا يسوي ايّ تصرف هذا مخبل ع الشفناه منة كال هاهيّ سدة من عندي وشوي خابرني كلي حالتهـا مستقرة هَسة بس يطولون للصبح يلة يجون لان حاطيها تحت المُراقبة

نزلت لجوة لكيت بيبيتي كاعدة وامي ومرت عمي و البنات كاعدات داير مدايرهـا كعدت يمهن وبيبيتي ضلت تنعى
وبهل اثنـاء طب غَيث كعد كدامنا ويباوع ..

صالحة
اكلها ثلث ونـات بليل اونن ثلث ونات
مامش احبيبات اتنوع ولـج وما مِش حبيبات
يمة شراين الكلب كلِش مريضات
اكلها ياجارتي بالله عليج
بطرف رجليج دعدلي غطاي بطرَف رجليج
يمة ولجن اندهنة حسوني ابني ارد اكعد بصفة اندهنة
واعيرنـة وارررريد انزع الشيلة واعيرنة
تِبرة العـدل والمـات منة

رَضية
يمة زنيبـة عمج اجاج يزنيبة

صالحة
تلگي يبعد روحي اجاج عمج يَ يمة

باوعت لغَيث صاحني رحتلة وصدمني وهوَ يكلي

غَيث
تندليـن سلاح الولد وين ؟
علي زَعيم سراج امير
ايّ واحد صعدت دورت ماكو

روان
شسوي بي غَيث

غَيث
سئلتج جاوبي ع كد السوال وبَس

كتلة لا ما ادري رِجع صعّد بسرعة رحت خابرت علي
رد علية كتلة على غَيث كلي انة راح اتفاهم ويا
خفت هواي سراج اذا انلزم غَيث شيلزمة هَسة ؟

شويـة ونزل غَيث كعد يحاول يسكت بـ بيبيتي ويكل الها
والله لو ما علي هَسة اروح الهم

عرفت علي محاجي ساعتهـاا

بهذا اليوم محد منة نـام ولا واحد غمضت عيونة حَتى

اليوم الثاني بـ ٩ صار الكل موجود عدنة
وبنفس الوقت طلعوا جدي من المُستشفى وشمس هم

اباوع لجَدي جـان تعبااااان
مو ذاك الطول ولا ذاك الحيل
الحجاية ما تطلع مِن عندة

وشَمس صعدهـا سراج بغرفتة عن كل الضجة و وصة سيوف تضل وياهة

كاعدين يَم جدي وبـدة زَعيم يحجي

زَعيم
جَدي احنة ما نسوي فاتحـة
وآل دحام اليـوم جايينة
جَدي سالفة نسكت هاي مستحيلة
وهذا الحجي من عدي وعِد الولد كلهم
الي سواهـة احمَد وضرغام آل دحام نفس ما عرفنة

هسة مروان يدري ما يدري ماعلينة
هوَ اساس البلة واصلاً جايين بسيارتة ف لا تقنعوني مايدري

على العموم انة هَسة اريد اتصرف
فَ تسمحلي جَدي اسوي اللازم
لو تحددني بتصرفات؟

هَز راسـة الشيخ بـ ايّ هنانة كاموا كل الولد
وعلي گال الزعَيم

علي
ابو يعگوب ورة صلاة الظهر همة يمنـة كون

زَعيم
هوَ هجي الحَجي ...
واحنة ما نستقبلهم بـ حوشنا ماريد اتقيد واصير لا اگدر اطگ ولا اسوي شّي بحجة هوَ داخل حوشي راح تصير الگعدة يم شيخ مالِك

بيبيتي ضلت تسئلهم بس همة مايجاوبون ابد
يكولون ان شاء الله خَير وبَس
بـ ١٢ ضبط الولد كلها طلعت همة وابوي وعمامي ثنينهم ...
وبعد ماندري شصـار ماصار
ضلينة نتلوة وخايفين عليهم بس ماسمعنا
لا حِس ولا خبر منهُم ..

في ديـوان الشيخ مالِك
آل دحام وآل جبُر و٣ عشاير ثانين ..

الشيخ مالِك
يا نـاس، السالفة مو جديدة
صار إلها عشرين سنة، وانكتلت البنية وكل واحد دفع ثمنة من هاي سالفة لكن اليوم صار بينا دم جديد !
أنة ما أدافع عن أحد، بس أسأل
چانت سالفة وراحت، ليش فتحناها؟ منو رجع وفتح المواجع؟
الدم الأول غسلتوه، زين الدم الثاني؟ شتسمونه؟

مـروآن آل دحام
شيخ مالِك انة ماريد ادافع عَن نفسي بـس الي صار بدون علمي وانة ما مضطر احلف الكم على هذا الشي بس بالله العلي العظيم كل شي صار بدون علمي
ولو انة فعلاً مخطط نفس ماجاي يكولون البعض فـ جان ما صالحت الشيخ جبُر ولا قبلت عزيمتة بحوشهم
السالفة خارج معرفتي وانة ما ادري بيـها ورغم انُ هاي وصية ابوي ونفذها بس انة استنكر الي صار
وانة وياهم من ال مليون للـ ١٠٠ مليون الي يطلبوا يجرالهم ان شاء الله ..

الشيخ مالك
اليوم زَعيم نيابة عن جدة الشيخ جبُر الله يرعاه ويكومة النـة بالسلامة
گول بوية زَعيم واحجي الي عدك

زَعيم
نيابةً عن جَدّي الشيخ جبُر الي مايطول بوگعتة هاي ان شاء الله .
ونيابة عن عمامي اللي حضروا وگلبهم محروگ،
ونيابة عن أبوي اللي رَبى وگال خُطوة الدم ما تنحچي إلا بحچمها،
ونيابة عن ولد عمي اللي ساكتين بس گلوبهم تصرخ،
ونيابة عن بتـة البين الحياة والموت هَسة
أنة، زعيم أتحمل هالسالفة
وآنة اللي راح أتّخذ القرار

الله يساعدكم كلكم
والاجاويد الي جايين هنـا كلكم على عيني وراسي
بس احنة قرارنة واحد ..
عطوة ماكو، حِشم ماكو، فصل ماكو
احنة نريد نعـارِك
مادام صارت مساومة عَ الدم
بوية احنة ميتين

اليوم البي خَير
والجاي من ظهر رجَال وبطن مرة
اليوم يضل بَ بيتة
والبي خَير يكوم
احنة جدامهم رايحين لبيتهم
معَ السلامة ...
يُتبععععععع
توقعاتكُم؟

امانة الله بالكوة كتبت البـارت ومادري شلون انطاني كلبي اكتبة اساسًا، باجر ماعدي شي وراح ابدي من هَسة اكتب الكم البارت بذاك البارت كتلكم انزل الكم مُفاجئ بس تفاعل ماكو بال ٧ الاف يشوفون البارت محد يصوت غير ٧٠٠ حد اقصى فَ تفاعلوا و وصلوا هل بارت ١٠٠٠ و وعد بارت مُفاجئ وعد 🙏🏻