رواية بيت جبر الفصل الرابع عشر 14 - بقلم هُدىٰ آذار

مَساء الخير، حبيت اكول الكُم هذا آخُر بارت مِن بعد التحديث على القُصة، اصحاب المُتابعة القديمة، راح تبدون ويايّ بالاحداث الجديدة و وين ما وقفتوا، استمتعوا، والجاي اعظيم بـ مليون مَرة ✨
لا تِنسوا التصويت ⭐️
قِراءة مُمتِعة
هُدىٰ آذار ...
_______________

روان :

بين العصُر وبين المغرب طلعت اصُب غدة لان جوعانة
رجعت شفت مروان بالغرفة

روان
شسوي هنا؟؟

مروان
شنو معنى حركاتج هاي اريد افهم
حتى الاطفال مايصرفون تصرفاتج والله

روان
وشتريد هسة ها

مروان
اريدد احاجيج اكعدي شوية

روان
ماريد

مروان
خل نحجي روان بدون لا

بعدني ماحجيت سمعت صوت ام مروان وهيَ تهلهل

حوبـه ابني ماراحت ع الخالي بلاش
حوبـه ابني صارت بيهم

فزيت بسرعه ع حجيهه وطلعت
باوعتلي وگالتلي

ام مروان
بنيـه شابه كلشي مابيهه وماتت الله اخذ حوبتي منكم

هيَ تِحجي وانة مصدومة اريد بـس تنطق وتكول منـو

سيوف لو زينب منية خالة حبابة احجي

ام مروان
بـت عمج حسـن زينب ماتت

مِن كالتلي هيج، جسمي كله رعش، حسيت الدنيا تدور، ركبي ما صارن يحملني، وصوتها وهيَ تحجي بعده يرن براسي، بس الكلمات ما جانت تُرضى تدخل مخي... كلشي تجمد بيه، حتى دموعي ما نزلت أول لحظة.

ام مروان
حوبتنـا طلعت بيـهه الله اخذهه من امهه نفس ما ابنـي انوخذ منـي

اباوع احمَد يضحك، مَروان اخذ احمَد وطلعوا
تجمِعن سعاد وسعدية و الاء وام مروان وصارن يهلهلن

لحد هاي اللحظة انة بس صافنة عليهُم، ناصبين علية ذولا ؟
شنو زينب ماتت هوَ شيموتها حَتى تموت ؟
طلعت الحجية واجة مـروان بنفس الوقت
صارت تسألهم شكو

مروان
مـرت سراج بت حَسن ال جبُر مآتت

من كال هيـج باوعتلة ودمعتي طاحت وانة طحت وياهة
ما فقدت الوعي ولا شي بس احس رجلية ما صارن يسعفني حَتى اضل واكفة، اجاني مروان ولزم ب اكتافي حتى يكومني

الحجية
ولـج وصلت بيج المرحلة تهلهلين عله موت بنيـه
الله اكبر الله اكبر شوفوا البنيـه راح تموت

همـه يحجون واني بغيـر عالم
احاول اربط  بالاحداث والسوالف الجـاي تصـير !
باوعت لمروان وانة اهمِس بالكوة، والكلام كإنما بَطل يطلع وياي
مادري حجيت صحيح او لا، بس الي ردت اكولة
(مروان صدك زينب ماتت)..

مـروان
أي هسـه سمعت بهذا الشـي
الله يرحمهـا برحمتـه

دموعي بدت تنزِل بدون ارداتي
نفرت روحي منة واريد اكوم، احس رجلية ثگال
عثرت ب دشداشتي لزمني وكال ( الله )

مـروان وديني لاهلي

ام مروان
هـاي من كل وعقلهه، انتِ فصليـه فصلية تعرفين شنو فصلية
تنجبين وتكعديـن حركة ما تتحركين
اذا مروان سكتلج انة ماسكتلج بعد

الحجيـه
ولج انتِ شنـو حية
البنيـه بنيت عمهه ميتـه وانتِ تحجين هجي
كومي حبوبه كومي اني اخذج كومي

يحجون وانة بغيـر عالم، والجاي يصير كلة ماستوعبة
زينب اختي مو بت عمي
مقربة الي اكثر مِمّا سيوف مقربة الي
سوالفنة اسرارنا كل شي سوى
موتها ماجان شي اكدر استقبلة او افتهمة

مـروان
ماكو روحة طبي لغرفتج ارتاحي

الحجية
يمة شبيك تخبلت خل البنية تروح لاهلها لا تصير ظالم

مروان
حجية ما اصير ظالم ولاشي ما تخطي خطوة ولا تروح لذاك البيت
روحي روان لغرفتج وماريد اسمع اي حجاية منجن انتن سمعتن يمة؟

عفتهُم وطبيت للغرفة وقفلتها بكل هدوء ..
فاتحه عيوني
وبَس صوره زيـنب جانت مرسومه براسـي
شنو زينب تموت
انة الي حضنتها وجنت اكلها
( ولج لا تبجين راح افشلهم و اجي )
وهي تضحك وتكلي منتظرتج
اول وحدة تتلگاج انة
زينب مو بت عم زينب اخت !
ماجان عدي اخت اشاركها اسراري وهمومي
وملاك جانت صغيرة
وزينب صارتلي اخت وصديقة
فكرة موتها ما اكدر استوعبها
هوَ شلون استوعبها اريد افهم
وهي ب زهرة شبابهة

كعدت عَ الجرباية وكل جزء مني يرجف، اسمع دگة الباب
صوت الحجية ومروان، مادري شجاي يصيـر
فجأة تخيلت زينب بالچِفن
فزيت وصحت بصوت عالي ودموعي ينزلن

وكإنما فزيت وتلقيت الصدمة الي اجن
طلعت بسرعة فتحت الباب و وكعت
لزمني مروان بثنين اديّ وهوَ يصيح

مروان
رواااان شبيج اصحي

زينب زينببببب اريد زينب
م مروان زينب مروووون وديني لاهلي مروان حباب وديني لاهلـي اموت والله اموتتت مروان الله يخليك

احس روحي فقدت ماجنت مستوعبه الفكره كلهه
بس اريد اروح واشوف

الحجية
يمة انعل شيطانك البت راح تموت

ام مروان
ولك شيكولون علينة هسة هـا خل تنجب وتكعد بالبيت

روان
مروان اريد اشوف زينب اخذني لزينب مروان
لتخليها تصير حَسرة بكلبي
بروح ابوك مروان لا تحرمني منها لا تحرمني

صفن عليـه وجان يريد يحجي شي بس من شافني بهل حـالة الهِستيرية سِكت ومُباشرتًا كال

مـروان
كومي يله هسه اخذج كومي

جسمي يرجف اريد اكوم ع رجليه ماكدر ساعدني حته اكوم وانـة ابجي حيَل واكول لا لا اكيد ماميته اكيد هذني وحدهن يحجن بلكي اروح والكاهة عايشة بلكي

احمد
انتَ صدك تحجي تريد تاخذها وتروح هناك

مروان
ولا بشر اسمع الة صوتة
لا تدخلون من يمتى انتوا تدخلون بقرارتي

احمد
من كمت تمشي ورة الزعاطيط

اسمع صوت اصياحهُم برة وانة ما هامني الحجية يمي تحاول تهديني
ماعاولت البـس عبايتي وشالي واطلع
طلعت واني اتعثر بالعباية وفحطانة بجي

اباوع مروان لازِم احمد من ياخة دشداشتة ويعيط واحمَد يعيط

الحجية راحتلهُم كوة تريدة يهدة ومروان لازمة
الحجية
ولكم شياطين انتوا شياطين البت وينها وانتوا شجاي تحجون حبوبة عوفة عوفة خل يولي تعال البت راح تموت

صحِت بنبرة خافضة وجنت ابجي
مروان

باوعلي والتفت لاحمد وكلة
حسابك بعدين

ام مروان
عساهم واحد واحد يموتون واذا ما ماتوا انة اموتج على ايدي

الحجية
انة ما شايفة هيج بشر يا الله بدخلك

صعدنة بالسيـارة انة والحجية و مروان

روحي احسها راحت، ابجي حيـل بالسيارة واحجي
بيبي حبابه زينب مامعقوله ماتت مامعقوله بيبي مامعقوله

احنـه بنفَس المنطقه اباوع كل الطريق سيارات كلـه ناس
باوعت لـبيت اهلي من بعيد متروس ترس سيـارات

طول الطريق مروان عيونة علية ويحاوِل يحجي بس مايكدر
آخر شي كال
مروان
الله يرحمـهه اتقبلي هذا الشي روان مانعترض على حكم الله

لا مرووووان الله يخليك لاااا

جـان يحاول يقنعني بـس حته اسكت وماعيط
إلا انة جنت متخبله بالبجـي والعياط مالتـي

الحجية
يمة يلة نزلنـا هنانة شوف السيارات كومة

روحي احسها تريد تصير نفس الحمامة وتمشي بسرعة لجوة
ماقبـل ينزلنه وضل يعصب ويكلهة متشوفين ناس كومة وين انزلجن هنـا وطب لجوة البيت

شفنـه مرتضى ابـن عمي واكف بالباب
مروان نزل الجامه و اشرله يفتح الباب الرئيسي حته يكدر يطبب السـياره لجوه
شافـنه جدي جبـر اشر المرتضى يفتح النـه الباب

طببنـا لجوه بحيث السياره جانت قريبـه من المطـبخ

نزلت بسرعه وانه اتعثر بعبايتي و مروان نزل وياي والحجيه ورانـه
لزمني مروان من كتفـي وهوَ يحاول يغطيني عن الناس الي برة
الباب جان مفتوح مال المطـبخ
باوعت سـراج بالمطـبخ يبجي ولازمينـه امير وعلي  والولد وزعيـم داير وجهه ويبجـي

مروان
البقيـه بحياتكم .

لاااااااا لا تكولوههه الله عليكم لاااااااا

مـن شافني سـراج رأسًا اجـه حضني
حضني وصار يبجـي ويگلي
ولـج زينب ماتتتت ماتتتت ......

تخبـلت وهوَ يكلي هيـج
والصدمة جانت مبينة علية بشكل موطبيعي
ياريتني وياهُم ياريتني شفت الدم وهوَ ماليها ياريت شفتها قبل لاتموت
يجوز جان تقبلت فكرة موتها ولو لشوية
بس انة بعيدة عنها وفجأة تموت شلون اصدگ شلون

انة وسراج جنة نتعارك عليها، ومرات تخلي ينـام وتجيني ونكعد سوى ونضل نسولف حتى بعد زواجها ما تغيرت علية ابد وضلينة اقرب واقرب

وجهِت التُهم نحو مروان وكلت احتمال جبير انُ هوَ الي مسويها وراد ينتقم وسواهة ..

ضليـت يم اهلي لليـوم الثالث وجانت الحجية كل يوم تجـي للطـم مال النسـوان
وبيـوم الثالث بالعشـا گالتلي

الحجية
يمه مروان گالـي روان تجـي وياج فـ يله يمه لمي غريضاتج وخل نروح

ماحجيت شي لان انه بـس اريد اروح واحجـي ويـا

كلـت اي وهزيت راسـي
بهاي الفتـرة كلهم لزموني تحقيق خصوصًا علي وجدي
شلونة وياج مدري شنـو
جِنت اكتفي بـ زينة وبَس بدون ذكر ايّ شي ثاني
لان ادري رجعتي صعبة وفوكاهة دم زينب احسة ياخذ وينطي وياي
واريد اعرف منو ورى هالشي يلا ارتاح

لبـست ملابـسي وشالي وعبايتي وطلعـت
الحديقـه محَد بيها غير ولدنـا و مروان جان گاعد ويـاهم
هه كل يوم يجي حتـه يغطي ع العملـه الي سواهـا
والله اذا طلع هوَ والله بيَدي اكتلة

اجـه علـي سلم ع الحجيه بالبدايـه راحت الحجيـه تحجي وي جدي وانة ضليت يم علـي

اباوع لمروان بحقـد ودموعي بعيوني
هـوَ مو ؟ هوَ السبب بكلشـي صار ؟

علي
مـاندري بـس ماعتقد هوَ ابد
واتوقع اهل سبب الي هنـا، لا تفكريـن بي هوَ هـم ماتركنا ابد بالفاتحه رغم كلشي صـار هم زين منـه

هه انت ماتدري شنـو هوَ

علي
شنـو مأذيج بشي احجي والله اذا مأذيـج ما اخليج ترجعين ويـا وانعل عشيرتـه هَسه والله

لا حبيبي ماعندي شـي ان شاء الله هينـه

حضن وجهي ب ادي وكالي

علي
لبوتي حبيبتي نور عيوني انتِ
لا تضمين علية سولفيلي

روان
علي زين متشوف جابني هنـا لتخاف ماعندي شي

حضني وضل يوصيني علية
باوعت لمـروان يباوعلنة
سلمت عليهُم وطلعنة

اول ماصعدنـا بالسيارة كال

مروان
عود شنو هل احضان وهل خرابيط هـاي ؟

الحجية
يا يمة اخيها شبيك

ترة اخوي واذا ؟؟؟

مروان
واخوج يعني يقرب وجهة من وجهج هيج ؟؟؟
ممنوع منعًا باتًا هاي الحركات بعد روان
انتِ تزوجتي بعد

روان
ترة انتَ والله تبالغ
علي اخوي والي بينة اكثر من هيج بعد مو ذنبي انتَ ماعايش طعم الاخوة ( مـروان ماعندة خوات بس اخوان هوَ و احمد )

مروان
اي انة همجي
خل اشوفج بعد هيج يا روان وشوفي
عود اذا شفتيهم بعد

روان
اي مو انة ضالة وراك

مروان
رووووووووان

روان
لتعيط علية

الحجية
بدت رحمة الله

شبيكم ولكم اسكتوا كافي يمة يغار عليج يا حبيبتي انتِ شبيج مفجوعة

مروان و روان بنفس الوقت :

مروان
اغار شنو لاغيرة ولاشي
روان
ايّ ميت علية يغار علية

الحجية
نسيت شسويت بضرغام لان ضحك وياها

مروان
حبوبة انتِ وياي لو علية

الحجية
يمة ماريدكم تتناگرون كافي مافد يوم شفتكم تضحكون سوة ليمتة يعني ليمتة

روان
لمّن يعوفني ويقرر يتركني

مروان
والله تحلمين اعوفج وانة مروان وعد حجايتي

كلت بكلبي
وانتَ مروان عربانة الدفِع

كتلة ان شاءالله وسِكتت
وصلنة للبيت كُبل طبيت للغرفة

ويلومني واحِد من اعاملهن نفس ما يعاملني
والله كل شي قليل عليهن
مانسى من جنت بصدمتي وهنّ كاعدات ويهلهلن
مانسى كسرة الكلب الي عشتها بذيج اللحضة
حسسني عايشة وي حيوانات موناس

ضليت بغرفتي كاعدة واقرة قران لزينب ماطلعت ابد لان مالي خلك
صار المغرب استغربت طب مروان وهوَ يكلي
مروان
ليش ما تكومين تتعشين؟ لا توكعين صحتج صايرة على گدج

درت وجهي عَنة وكتلة
ماريد شكرًا

مروان
مادري شنو معنى انّي احجي وياج ودورين وجهج
استضغار لوشنو؟

احس طگت روحي ومابية حيل اجاملة بعَد رأسًا عاد طگيتها بوجها
روان
انت انسـان بـ ٧٠ وجـه ماعرف شنـو غايتك من كل الجاي تسوي بـس غايتك حقيره وابد مو سليمة

مـروان
هي هي هي الزمي حدودج
عايـفج انه وعله مرامج لان محترمج ومحترم انـج زعلانه وحزينه بـس مال تجاوزيـن تره انه ماقبـل فـ احترمي واحجي المضوجج شنو بـأحترام و ألا !!!!

و ألا شنـو ؟؟
تضربنـي تموتني وإلا شنـوووو هااا احجي

طب وسد باب الغرفة، لان جان هوَ واكِف
تقدم نحوي ورافع ايدة ويحجي وياي

مـروان
شبيـج تصيحين ؟
رحتـي لـ اهلـج شيشوج عليـه وجيتي ؟؟
روان صوتج مايعلـه لا تخليني اعيـط بيـج وتصير ابد موحلووووه

انت المودي هـاي النـاس ورامين عله بيتنه حته تاخذ حگ عبـاس مو؟؟

مـروان
هههههههههه تشاقـين ؟؟؟
تره مو انـه الاخذ حگي بالخفية
لو انه ف ماخاف من واحَد واسويهه كبال الكل مو بالخفية

گلبـي جاي يكلي انت المسويهة وماجاي اصدگ بيـك ابد

غمض عيونـه ورجع فتحهن بعَدم صبُر وگالي
مـروان
صـبري لـتخلصي ويـاج !
كتلـج مو انة يعني خلاصصص مو انة
لا تضلين تكرررين بالكلام !

روان
مـروان احجي الحَقيقة
انت الكتلتهة مو احجي !!
الـي يحط انسان وي حيوانات عنده استعداد يسوي كلشي
بسبك زينب ماتت بسببك !

مـروان
رروووووووان

صـرخ بوجهي حيَل وهوَ يقترب اكثر

رجعت لورة منه بخطوات حذرة، صوت أنفاسي بالگوة ينسمِع من الصمت اللي بينا. يباوعلي بنظرة نار—عيونه حمر، مو بس من العصبية، كأن بيها جمر مشتعل وكإنما يكلي صبري هاهيّ خلص وياج. عروگ عيونه طالعة، وكأنه كل قطرة دم بجسمه متجمعة هناك.

گلبي گام يدگ بقوة، خفت من منظـرة حيل بس تجاهلت خوفي، ايدي بردت، وحسّيت برجفة خفيفة تمشي بجسمي... بس رفعت راسي، وضليت واگفة بثبات، حتى لو كل شي بداخلي كان يرجف. ما أريد يبين خوفي، مو لأن ما أخاف، بس لأن لازم أكون قوية گدامة

مروان
بعمري وبحياتي محد شك بية كدام عيوني
وبعمري وبحياتي محد تعامل وياي بهل جرائة والصلافة
جاي احاول استخطيج، وجاي احاول اكول طفلة وتتعلّم واحاول احط بين عيوني وفاة بت عمج واحط بعيني گربنة(قربنة) واكول بت عمي اول وتالي، واحاول اكبر عقلي رغم كل الي صار بس انتِ ؟؟
جري عدل روان جري عدل لا تخليني استخدم وجهي الاساسي وياج والله وبالله وتالله اخليج تتندمين

روان
شگد اكرهـك وشگد حاقده عليـك

غمض عيونة ب عدم صبر وكال
مروان
اذا اضل يمج أذيج ف اطلع احسن

عافنـي وطلع وخلانـي وحدي
اذكر زينب واموت بجي
شلـون بيـه وشلـون اگدر انسـاهة
ضليـت ابجي بحرگه
طول اليوم
ومروان هم ماطب للغرفة بيومها

اليـوم الثاني ماطلعت من غرفتـي ولا حاجيت احد
مجرد اطلع اخذ اكل واطب وماباوع لاحـد كالعادة
ومروان متجاهل وجودي نفس ما انة متجاهلتة
اليوم الي ورا نفس الحاله

تواصلـت وي علي وضليت الِح عليّ وصدمني من گال عرفنـه منو الي سوه هذا الشـي وعدو قديم لجدي كتله متاكد گـالي اي متاكد حلفتة بروح زينب انُ مو مروان ضل يحلف ويكول مو هوَ والله

تندمت انُ ظلمتة وحجيت عليّ هيج بس اكيد مراح اروحلة واعتذر لان هوَ كومة سسوة اغلاط وياي مافكر بيوم يعتذر مع انُ انة من عادتي الاعتذار بس العينُ بالعين والسِنُ بالسِن
جان كلش مثكل وياي ومتجاهل وجودي تجاهل تـام..

اليـوم الثالث جنت گاعده اجتنـي مرتـة

سعديـه
اي ادري شنـو يعني بس احنه نشتغل ماتجين تشتغليـن انتِ هم شنو عروس

هاي متعرفها يوم علية ويوم وياي

هه شلـون الي خلكج يدفعنج وتجيـن مالي خلگج روحي اطلعي بره

ام مروان
والله انة شفت بنات صلفات نفسها ماشفت ولا راح اشوف
...... وملفيها بالبيت

مـروان
رووووووووووووووواننن

حجيت بصوت عالي وطلـع هوَ جـاي
باوعتله بنفاذ صـبر وكتلـه

ماتتتت روان وخلصت منكم شتردون هـااا شتردون منـي

جان كاعد بالصالـة ولازِم موبايلة وهنّ جانن ينظفن
فَ اجة رأسًا

مروان
سعديـه اطلعي

طلعـت هي سَد الباب حَيل ورا
باوعلي وگال

مـروان
انتِ لوين تردين توصليـن لويـن ؟؟؟ اريد افـهم

اريد اطلگ منك مارررريد ابقـه يمك ماتفهم لو شنـووو؟؟؟

مـروان
ترديـن ترحين؟ انه هم طكت روحي وماكدر اتحملـج بعد
جيبي منـي طفل وروحي الله ومحمد وعلي ويـاج
هوَ هذا قانونة
الفصليه التجيب طفـل تكدر تروح لهلها

وانه ماميـت عليج ولا رايد طفل منـج
بس ماريد اطلع بوجه اسود كبال ناس
فـ شگلتي ؟؟؟؟؟

روان
انتَ ما تخلُف ف كلت هيج لا اكثر

كلت هيـج وانة معصبة
ما جنت محسبة للكلام الي جاي احجي
وماعرفت انُ انة دست على طرف مروان المتأذي مِنة

باوعلي وكإنما يباوع الاسد لفريستة
نطق جملة وحدة وهوَ يقفل البـاب
مروان
القدر واحد وقدرج الموت من القهر على ايدي... يتبعع
ألإنتـقالة راح تكون فضيعة، وهلمرة مُستحيل تكدرون تحزرون الي راح يصير
___________________

ايلول:

عفت كلشي ومن دون وعي خابرت علي
اول دگتين رد

صوت بجيي جان مسموع وجنت بحاله ماعرف شنـو ولا اعرف شلون احلهه ولا اكدر افهم روحي

علي اريد اشوفك

علـي
شبيج ايلول ؟
دقايق بس اطلع

اسمع خطوات مشيه وسمعت صوت مره حيـل عالي وهي تصـيح
ولككككككك علي البتتتتت ماتتت

مـاصرت أسمـع غير صايحهم وصوت طـلق
انرعبت من يمي حيَل
الموبـايل ضل مفتوح بَس مبيـن بجيب علي

احجي ويـا ماكو مايرد
اسمع صريخ نسـوان
وصوت عالـي حَيل مال زلـم

گلبي راح وخفت حيـل عليّ
أسمع صوت مره جبيـره تبجي
وصوت سيـارات ماسديت الموبايل وضليت قاتحتـه

اسمع صوت استاذ امير يحجي وي المره ويكلهـا يمه لا تخافين مابيهه شي هسه نوصـل للمستشفى

نشـال الموبايل وسمعت صوت علي

علـي
انتِ بعدج ع الخط

علي شصاير شكو كلبي راح يوكف

علي
بعدين نحجي

گـال هيج وسَد الموبايل بوجهي
خابرت عليَ مره ثانيـه لگيته مشغول

يـاربي شصاير وياهم ومنية هاي الي تريد تموت ومنو سوه هيـج  جنت اسمع اني ناس يموتون بسبب طلق تايـه محَد يعرف مصدره بسبب سوالف العشاير وتوقعت هيج صاير

ماعرف شسـوي بس الي اعرفه اكو بنيـة متأذيه وحالتها خطره ، ضليـت اندعي الله يكومهـا بسلامه ومايصيرلهـا شي لان حَسب ماسمعت من هاي المره الي وي علـي تكلهه وين تعوفين اببنـج علاوي

دموعي ينزلن وخايفة عليهم وماعرف شسوي
اخابر على فرس اريدها تجي لزگت

شويه واجتـي فَرس رأسا عطت بيهة

لو ضـاله نايمه مو احسن الج؟؟؟

فرس
شكو شبيـج ليـش تبجين شصايرر ؟؟؟

صعدت فَرس وسولفتلهـا ع الـي صـار

فرس
خل اجرب اخابر امـير أصبري

خابرت اميـر وامير مايرد

ايلول
خل نروح للمستشفى الله عليـج فرس

فرس
ولج وين ترحين انتِ من كل وعقلج ترحيـن للمستشفى هسه تلكيـن الدنيـا مگلوبه و علـي يگلب الدنيا فوگ راسج فوك ما هي مگلوبه

لــج والله بالي يمـهم

فـرس
هسه انتِ شبيج مردتي روحج بالبجي
اسكتي ثولتيني خل اشوف اميـر ياربي ساعة علي ساعة اخو امير ساعة هسة هاي البنية زينب والله هاي الفترة كل ساع شي يصير عندهم

ضليت احاول اخابر ب علي مايرد
انرعبنا عليهُم وضلينا خايفين
هسـه شنسوي كوليلي مايرد عليه

فرس
ولا اميـر يرد خليهه شويـه ونشوف خلي نرجع للسكن مالتنـه هَسه

حته اديه يرجفن ومابيـه حيَل اسوق

فرس
شگد حساسه ايلول كولي يالله يجوز البنيه مابيهه شي يله شنـو نبقى واكفيـن بنفس مكانه

مشينة وضلينة نتصُل عليهُم بس هُمة ما يردون ابـد

ضليت ابجي وكإنما هي اختي او وحده من عائلتنة

مـر الوقت اكثـر و اكثر واحنة مانعرُف ايّ شي عنهُم
شوية و فرس طبت للفيس ومن صفحة لصفحة
شافِت ابن عمهُم ناشر حِداد ..

فرس
عزة هذا كاتِب مُرتضى آل جبُر آل حمدان يعني هُمة مووو ؟
لج هذا حاط حِداد هَسة !!

عزة يعني ماتت!!
كلش ضجت وكلش انقهرت عليهة
افكر بحجي امهه شلون تبجي وتكلهه ابنج علاوي
افكر بيهُم وشلون حالهُم هَسة
أحس روحي ويـاهم واريد اروح و اوسيهُم
او ابجي وياهُم

موقف جان حَيل مُرعب
طـول اليوم علي ماحاجاني ولا رد عليـه ابد
واميـر كذالك جان كلش مشغول

اليـوم الثاني داومنه كليـه واستاذ اميـر ماكو
گال استاذ حيـدر اختـه ميته وضلوا كل الطلاب يترحمون الهه

لثٌاني يوم بليل دزلـي علي رساله

علـي
مشغول جنت ..

اخابرك اكدر ؟

علـي
شكو ايلول اذا تردين تواسيني فـ ماريد بينما اذا ع غير شي احجي

علي شبيـك اني ويـن احجي و انت وين تحجي يعني فوگ كلشي صار واجيت وحاجيتك وانت هيج تحاجيني

علـي
محملتني منيـه مثلا؟
كتلج لا تجيني الا تصححيـن روحج
لان انه وضعج ماتحملـه ابَد

يجوز غلطت واني احاجيك اخذ راحتك

سديت الموبايل بوجـهه وجنت كلش متنرفزه منه
والنرفزنـي ازيد ماراسل ولا دز شـي

بعكس ماجان قبل يكلب الدنيـا اذا اطبگه بوجهه
حتى لـو جنه متعاركيـن ..

داومت اليـوم الثانـي وجِنت بوقتها لابـسة ثوب زيتوني طوخ قصير وي الركبة وبدون اكمام وفوكا نفس الفرو الابيض يغطي بـس الصدُر وردانة تصيـر طويلة

فرس
متاكدة من لبسج هذا؟
مو احسة مال مصيف

ايلول
هذا لبسي اني فرس وعلي بعد مالي دخل بي امشي

رحنـا للكُلية وانتبهت لشي ماجنت منتبهه عليّ
انُ نظرات الطلاب جانت تجاهي بطريقه ابد موحلوه
وجانوا يباوعون عَ اماكِن بجسمي بطريقة مُقَزِزة
ضجت وردت ارجَع للسكن وحَتى ماكملت المُحاضرة الثانية قبلها طلعت

فرس جانت تحاول تعرف بس اني جنت حيل ضايجة وخليت ورحِت وهيَ وياي

اول ماوصلنة للسكن احس راسي يريد ينفجر
واريد اسوي حّل
شنو هوَ مادري
بس اريد حَل
أحس كرهـت روحي وجنت ماله من هاي الحاله

فرس ليـش هيج الطلاب جاي تباوعلي ما جانو هيج والله ولبسي نفسة ماتغير

فرس
لاحبيبتي من البدايه هيج واني شكد حجيت وياج وشكد نصحتج ومافاد انتِ ماجنتي تنتبهين هسه انتبهتي
كتلج احنه ب بيـئه غير الي جنه عنهه
ولازم تحترمين البيئه الي موجودين بيهه ما اخذتي حجايتي

بالاضافه ايلول انت جسمـج حيَل يغري وبارز
وملابـسج اغلبهن فساتين قصيره لو تنوره قصيره
وهمـه عيونهم زايغه حيـل
ويجوز مو بقصدهم يباوعون لان هي هاي بيئتهم هيج
مامتعوديـن ع هيج شي تحسين انتِ نشاز بينهُم

يعني مثلاً هسـه لو تروح بنيه لبغداد او لمكانة احنه
لابـسه عبايه الكل راح يتباوعلهه بصوره لا اراديه
ليـش لان غريب عليهم بنيه هيج تلبس

هسه هنا نفس الشـي

* ما تخيلت بيوم اذكُر هل معلومة بس اكو شكم تعليق نرفزني سالفة هـا شدعوة ترة محد الة علاقة ب احد كل واحد يلبس الي يعجبة بالجنوب والرواية مبالغين
اولاً القُصة بـ ٢٠١٧ والانفِتاح الي صار بالجنوب يمكن صار هَسة من بعد كورونا بسبب الانفلونسر والزيارات مال الخارج بسبب الاهوار وغيرها وإلا الجنوب قَبل مُجتمع مُحافظ وحتى المسيح الي بي يلبسن حجاب حتى يجنِبن الكلام ومادري ليش اصلاً من نكول الجنوب مُحافظ تحسون بنقُص وكإنما الناس المُحافظة شي عيب او يفشل او عدم تطور، ترة هذا تُراثنـا و عاداتنا المفروض ما تزول ابدًا وما نخجل منها، يعني التطور باللبس مـو إنجاز، اكيد احترُم الكُل اني بس لا تنقصون من عاداتنا بالحِفاظ على الزي مالتنا ..
فَ بالنسبة ل ايلول بهذي المُحافظة وهذا اللبس وبـسنة ٢٠١٧ جان شي خارِج المألوف مية بالمية ومحد يكدر ينكُر هذا الشي ..
نكمِل ...

ايلول
فرس اني مايهمني كل الناس اني اعرف الحجاب ما مفروض علينـه مامجبوره اسوي ومامجبوره البس زين حته ما اغريهم خو همه يغضون نظرهُم؟

فرس
ماريد اصير شيـخ براسج وتدرين بيه ماحب احجيلج بموضوع الحجاب لان هاي انتِ قناعتج بـس اكلج
العيـن اماره بالسوء يعني واحد غصبًا عليه يباوع مرات شنو اني بنيـه ومرات من اشوف بنيـه كلش لبسهة وكذا اباوعلهه فَ شلون تمنعين الولد؟  فـ انتِ ايلول خطأ كلشي خطأ بلبـسج

مادري ماجاي اقتنع ماجاي اقتنع بـشي

فرس
زيـن انتِ امج محجبة انتِ ليش مو محجبة

امي لان كبرت فرس امي ماجانت محجبة

فرس
بس هذا مو مُقنع ايلول الحجاب فرض علينـا هسة عوفج
ليـش جاي تعيدين وتكررين ع هذا الموضوع هَسة
اشو ماجنتي تنتبهين قبِل ؟

ايلول
علي اكو غيرة نبهنـي عليهة
ومن صرت اباوع للولد لگيتـهم صدگ هيج نضراتـهم
بس اني اذا اريد اتحجب فـ علمود نفسي مو علموده لان هوَ  مايهمني وحتى لا رجع الي بعد مستحيل اباوع بوجهه لانه صدك هواي جرحني بالحجي

فرس
لو مايخاف عليـج ويحبَج ما جان حجه هيج وياج بس انتِ غبية

ايلول
فرس ترة علي بعُمرة وبحياتة ما حِجة وياي بهاي النبرة
وما يعدي ساعتين وهوَ يدزلي الا هاي المرة كلش سواهة !

فرس
ترة بنية عندهُم ميتة وكلهم تعبانين ومقهورين شترديهم
وانتِ هماتين طگكتي كلبة كلساع ياعيني

ايلول
ماناقصتج فرس اسكتـي

رحَت كعدت وطلعت ع الموبايل
دلالـة فرض الحجـاب
اول مره ابحث عنـة و اول مره هيـج اشوف فيديو او ابحث عن هيـج فيديو

طلعلي كومه شـيوخ واني عندي فوبيـا من الشيوخ ماحب اشوفهم

سـديت الموبايل وروحي طالعة

اجتـي فرس يمي وكالتلي

فرس
هاشبيـج بعدج محتاره شو كضيتي عمرج ما مفكره بهاي السوالف هاي كله علمود علي

ايلول
شوف هـاي تره علي نبهني على هذا الشي
اني اذا اريد اتحجب لا علمود الولد مايتباوعون ولا علمود علي يرضـا اصلا علي بعد مستحيل ارجع ويـا
بس اني اتحجب علمود نفسي وعلمود قناعتي انـي
و اولاً والاهم علمود ربي

فرس
ايلول هسه انتِ وين مشكلتج
مامقتنعه بالحجاب مو؟

اي مادري احس ما مفروض علينـا مادري مادري فرس

فرس
اني من جنت وياج ماحجي ع هذا الموضوع لان جنتي مقتنعه بس تحسين بعد وقت عليج
بس هسه ماطولج مترردده لازم اتدخل اني من تحجبت خو من انـي وصغيره؟ بس بنفس الوقت من صرت بالمراهقه وجنت اشوفج وكذا اكول ليش بس اني بالحجاب بـس بحثت وعرفت انُ الحجاب صح ومفروض علينه

ايلول
زيـن شلون اني بحثت هسه لكيت كله شيوخ كتل مكاتل ماريد اسمع من واحد بيهم

فرس
يكلـج الله ينشاف بالعين لو بالعقل؟
بالعقـل !
احنه عدنه عقل وكون بعقلنه نعرف الصح من الخطأ
مانمشي غير بـس ع القران
لان الاحاديث وكلشي مُحرف هوَ كُلهه تكول وحته نبي محمد بنفسه گال ماكوشي ما مُحرف غير بس القران لان القران محفوظ اما البقيه ف الناس تحرف بيهه

ايلول
اي اني هم ما اؤمن غير بس بالقران فـ احجيلي يله

كعدنه وحده مقابيل وحده وصرنه نحجي

فرس
باعي هنه هواي شغلات اكدلي بس راح اختصرلجياهه بـ آية
اكو آية بيهه زينتهن بس ماحافظتهه

ايلول
باعي طبي لحقيبه المؤمن وابحـثي عله زينتهن هسه يطلعلج الايات

فرس
اي والله هم صدگ يلة

بحثت فرس ورأسًا طلعـت الهـا الآية

فرس
اسمعي وحطي بالج وياي اني لا مفسره ولاشي بـس ركزي واسمعي بهاي الآية الله ديكول للولد شيكللهم
قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ۚ ذَٰلِكَ أَزْكَىٰ لَهُمْ ۗ إِنَّ اللَّهَ خَبِيرٌ بِمَا يَصْنَعُونَ

ايلول
صدق الله العظيم
اي شوفي يعني حَتى الله يكول الولد يغضون بصرهم مو احنة

فرس
اصبري خلي اكمل
وبالآية الثانيـه شوفي شگال للنساء
وَقُلْ لِلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ وَلَا يُبْدِينَ زِينَتَهُنَّ إِلَّا مَا ظَهَرَ مِنْهَا
هنا الزينة قصـدة الشعر والجسم وشكو مكان عورة بجسِم المراءة

ايلول
وانتِ شمدريج الشعر والجسم فرس ؟
يجوز الزينة معناهة الشغلات المنطقية الي لازم ماتبين؟

فرس
هسة اكلج شلون خل نكمل
ۖ وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ ۖ وَلَا يُبْدِينَ زِينَتَهُنَّ إِلَّا لِبُعُولَتِهِنَّ أَوْ آبَائِهِنَّ أَوْ آبَاءِ بُعُولَتِهِنَّ أَوْ أَبْنَائِهِنَّ أَوْ أَبْنَاءِ بُعُولَتِهِنَّ أَوْ إِخْوَانِهِنَّ أَوْ بَنِي إِخْوَانِهِنَّ أَوْ بَنِي أَخَوَاتِهِنَّ أَوْ نِسَائِهِنَّ أَوْ مَا مَلَكَتْ أَيْمَانُهُنَّ أَوِ التَّابِعِينَ غَيْرِ أُولِي الْإِرْبَةِ مِنَ الرِّجَالِ أَوِ الطِّفْلِ الَّذِينَ لَمْ يَظْهَرُوا عَلَىٰ عَوْرَاتِ النِّسَاءِ ۖ وَلَا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِنْ زِينَتِهِنَّ

فرس
يعني هنا الله ديحط الاستثناءات ومنو يكدر يشوف زينة المراة، زين انتِ برائيج اذا فعلاً قصدة بس الاماكن الي لازِم ما تنشاف المنطقية،  يعني هل منطق اروح بدون ملابس واوكف كدام اخوية او ابن اخوية الجبير مثلاً او جدي واخليهُم يشوفون هذنيج المناطق ؟ بس لانُ الله محللهة عليهُم ؟ ترة لا ! منطقيًا لاااا

المُهم نكمل
ۚ وَتُوبُوا إِلَى اللَّهِ جَمِيعًا أَيُّهَ الْمُؤْمِنُونَ لَعَلَّكُمْ تُفْلِحُونَ
وباعـي هنانه هسه شنستنتج انُ الله
ما گال للولد لا يبدون زينتهن الا لازواجهم و ابائهم او ابو ازواجهم او ابنائهم يعني نستنتج هنا انُ البنية مو مُخيرة ونفس الولد تطلع بشعرها وجسمها وعادي !
بس ايـه النساء شنو ؟ قسمها بين الغريب وبين الي حلال عليهة يعني كون ماتبدي زينتهه لاي احد الا لذولـه الي همه محلليـن عليهه

باعي يجوز فسرانهه كَ عُمق خطأ
بس من تفكرين بعقلج تحسيهه صح ترره !

ايلول
اني جنت اقره قران
بـس ع كد رمضان اختمه وهايهيه ومرات بالايام العاديه جنت اقره من اضوج سوره يس او مريم
بس اول مره انتبـه لهَيج شي أحس هسة عرفت معناهة

طلعنا تفسير هل آية باليوتيوب وشرحها النة الشيخ نفس ماشرحتها فَرس، كملنا وكالتلي فَرس ها ؟

ايلول
تدريـن شنو أحس حيل قتنعت وهاي الاية هَي الـي حيل احسهه قنعتني

فرس
اللهم صل على مُحمَد، بـس ايلول هي مولعبة اذا تحجبتي كون بعد مستحيل تنزعينه هاي شي، شي لخ لبـسج كُله تغيري لان خو مو تلبـسين حجاب و تلبسين ويـا ثوب قصير

ايلول
لا شنو حجاب نص ردن اكيد لا
بس فرس اني كلش متوترة والله واحس نفسي موجاهزة

فرس
أفهم خوفچ، وكلنا بالبداية نحس بشي من الترد طبيعي جدًا. بس صدگيني، الحجاب مو قيد، هو اختيار نابع من جوّا، مو شي يفرض يطفينا، بالعكس... هو يغلفنا بهوية واحترام. أول الأيام يمكن تحسي بغرابة، بس بالتدريج يصير جزء منچ، حتى تحبينه وتحسين بالأمان اللي ينطيچ ياه.
تخيلي إنج دا تمشين بخطوة تقربچ من رضا الله، خطوة بيها نية طيبة، وربك يباركها حتى لو كانت بسيطة. وإنتِ قوية، وإذا قلبچ فكر بهالشي، معناها بداخلك بذرة خير عظيمة. الحجاب ما رح ينقص منچ شي، بس يمكن يضيف إلج كرامة، هيبة، وبركة بحياتچ.
تخيلي ايلول اني اؤمن انُ الله يهدي من يشاء، يعني والله شكد اندعي الله يهديني ويثبتني عَ الصلاة بس ماثبت بس بهاي الفترة كلش ثبتت تدرين ليش ؟ واكبت على دُعاء شفتة على النت
اللهم يا مقلب القلوب ثبت قلبي على دينك، اللهم اجعلني ممن يحبك ويخافك ويرجوك، ولا تزغ قلبي بعد إذ هديتني، وهب لي من لدنك رحمة، إنك أنت الوهاب.

واحس فعلاً ثبتت، فَ هيَ هدايا اذا الله حط بطريقج كل هاي السوالف وحط بكلبج هذا الشعور معناه الله رايدج تتقربين الة اكثر، ايلول انتِ بنية ماكو مثلج ابد طيبة كلبج صفائج نقاوتج صلاتج محافظة عليها وقرآنج بحيث الي بعيد من يمج مُستحيل يصدك هي نفسج انتِ من الداخل عوزج بس هذا فَ ليش لا؟ توكلي عَ الله وسوي هل خطوة بدون أيّ انتظار، الله ب انتظارج

ايلول
من كلتلي هيج ونهت كلامها ب الله ب انتظارج نزلت دمعتي
طول كلامها واني متأثرة بي هواي خصوصًا من تكلي الله رايدج

ايلول
يا ولي تأثرت

فرس
ام دميعة هههههههههه لا تبجين ولج
حضنتني وهي فرحانة وتحجي

فرس
عزززززه فرحت والقـران داتخيل شكلج بالحجاب كومي حبابه خل اجربـه عليج كومي

اني ابد مالابسه حجاب بس الـبس جادر اذا رحنه نزور لان اني حيل احب ازور مرات
فرس جانت حيل فرحانه بشكل مُفرط واني هم وياهة صابني شعور فرح جبير

لبسـت الكب واجتي فرس و لفتلي الشال

ختنكتتت لا تضبي حيـل

فرس
انجبي تردين تطلعين رگبتج
ماعدنه بنات تطلع رگبهه من شـال

ههههههههههههه اي دوخري خل اشوف روحي

گمت للمرايـه وباوعت لروحي وابتسمت وضحكت حيـل

فرس
عززززه يمه لـج طالعه تجنين اللهم صل ع محمد، الله يثبتج ان شاء الله
كلتلي فرس خابري امج وكوليلها
خابرتهه كامـرا واني جنت محجبـه ولابسه الحجـاب

ردت عليٌه وجان يمهه بابا من شافوني انصدموا بس فرحوا حيـل وكلولي اهم شي انتِ مقتنعة بي
جنت اتوفع يكلولي ليش بعدج صغيرة اهلي هيج تفكيرهم بصراحة بس صدموني بتشجيعهم الي ..

فرحت حيـل وجانت خطوه حلوه مني انُ اسويـهه
احس روحي رتاحيت راحه مستحيل اكدر اوصفـهه

صـارت بسرعه تقريبـاً بـ ٣ ساعات بَس
وحتى اني ممصدكة شلون اخذت هيج قرار حسبالك حلم
فرس شكد جانت قبل تحاول تحاجيني بس اني جنت انفرهه
لان جنت كُلش قافله بهذا الموضوع
امـا هسه احس من انطيتهه فُرصه حتى تحاجيني
كُلش اقتنعت بحجيهه لان جان كُلشي بدليل

مادري شلون اني جنت غافـلة ع هذا الشي
وهذا شي مكتوب عليـنه
والله يغفُر الـي مضه ويقدم الاحسـن والاخير

اليـوم الثانـي للجامعه جنه مامخططين اني شلَبس لباجر
المشكله اني ماحب البنطرون ابدد احس اتقيد
وماحب الفساتيـن الطويله مال المحجبات هٌم
فرس راوتني شلون جايبه عبايات يخبلن خليجيه
مو مودي ابد بس من لبسـتهه تجنن علية

لبَست وياهن حذاء كعب و شال علمتني فرس الفه بس ماعرفت لذالك فـرس لفتـه الـي

اهم شي سويته من ذاتـي ومو علمود اي شخـص
علي جنت حيَل متنرفزه منه لدرجه اذا اشوفه ودي اموتة
داومنـه انـي و فرس للجامعة

وبهذا اليـوم جنه ثنينه لابـسين عبايات خليجيه وشال نفس اللون وكلشي نفس الشـي

البنات الي ويايه استغربن اكو فرحن الي واكو لا يباوعلي بحقد امثـال اميره و ساره وغيرهه

امشـي و انـي فرحانه بس احس مرتبكـه اول مره هيج البس او هيج اسوي ، صح ملابـسي و استايلي قبل احلى عليه بـس خلاص اني اقتنعت قناعه تامة

هذا القرار من اتخذتة ابد ماجان بسبب علي او اخاف اخسرة او تأثير من فَرس جان قرار ماخذتة بقناعة تامة، بحيث من كعدت اتناقش وي فَرس ابد ما جنت ظانة انُ حتنطيني فد شي اقتنع منة، وبليل كعدت وي روحي واقتنعت اكثر بالي شفتة ..

بالقاعه كُلهه حسبالهه اكـو شي او صاير عندي شي ولبست الحجاب بـس اني جنت اصدم الكُل بـ رد تحجبت

كملنـا محاضره اولى وطلعنه انـي وفرس
استـاذ امير جان بالقاعه الثانية من شافنه وگف
جان يباوعلي ومصدوم

تقربنـا يمه وگتله

البقيه بحياتك استـاذ

امير
البقاء لِله بَس ؟
هاي شجاي اشوف

فرس
هههههههه جاي تشوف حقيقي ايلول تحجبت

اميـر
والله؟ خطوووه حلووه منـج والحجاب مازايدج غير جمـال الله يثبتج عليه يارب بس مانريدج من ذني البنات الي يلبسنه و وره يومين ومايعجبج تنزعي

لا استاذ موهيج اني شكالولك عليـه

اميـر
فرحتيني حيَل والله

ابتسمتلـه وخر انظارة عني واتجـه لفَرس
عفتـهم ع راحتـهم وترخصت
كلت لفرس تلكيني بنفس مكانه
ورحَت گعدت ع المسطبة

اممم اذا امير هيج فرح علي شنو راح يكول ؟
اريد اشوف رده فعلـه بله شنو
بس والله اله اذله لويموت ماحجي ويـا خلي اليوم اميـر يكله وخل يشوف وينقهـر اله اموتة والله بسيطة

شوية وإجَة آدم

آدم
هاي شنو شلابسة اليوم

ايلول
تحجبت ماكو مبروك؟

آدم
صدك صدك لو تشاقين ؟

ايلول
والله شبيك

آدم
ترة ملايكلج وقبل احلى لتتأثرين هيَ سنة وراجعين

ايلول
ما تأثرت بيهم بس اني اقتنعت بهذا الشي

آدم
بس قبل احلى
لبسج البارحة ولبسج اليوم؟ اكيددددد لا

حسيتة فعلاً ضاج شو
جاي يحجي وخابروا كلي بعدين نحجي
الحمدلله راح شكد غِثة ياربي

ضليت كاعده وحَدي شوية
اجتني رساله ع الواتـساب
فتحتهه من علي
دازلـي صوره ومسـج
طبيـت ع المحادثه وجان انصدم بـ .. يتبع
_________________

فرس

اخذ نفس وغمض عيونـه وفتحهن باوعلي وگالي
اميـر
فَ ترضـين تكونين فرس خاصه لهل اميـر وّبس  ؟
موافقـه بـ انُ تصيرين مُلكي ومملكتي واملاكي ؟

ماجذب اذا اكول بهٌاي اللحظة جان شعوري موحلو
جانت اكٌو فرحه بداخلي حيَل جبيره وبنفس الوقت علامات الصدمٌه مبينه عليه

اباوعلة بيـدة علبة والعلبة بيها خاتم

ماگدر اضم الابتسامـه
گلبـي گام يدُگ حيل
ضليـت افرك بـ اديه و اباوعله

اميـر
تمام اخذت الجواب
وهذا راح يجيج للبيت بشكل رسمي وبطريقة تليق بيج
بس انة من حماسي اشتريتة من هسة
نرجع؟

رفـعت راسي حته اشوف رده فعلـه
جان مَبتسم بادلتـه بالابتسامـه ورحَت گدامـه للسياره

فتح السيـاره و صعدنه بيـهه
هوَ ساكت و انـي ساكت

طول الطريق يباوع عليـه
احس روحي ارتبكت حيـل

استاذ شبيك تباوع عليـه قلقتني

اميـر
إني امرؤ مولَعٌ بالحسن أتبعهُ
لا حظّ لي منه إلا لذة النظرِ.

ابتسمت ابتسامـه عريضه حَيل

اميـر
عَسَاكَ تَرضَىٰ وكلُّ النَّاسِ غَاضِبةٌ
فإذَا رَضِيتَ فَهَذا مُنتَهَىٰ أمَلِي

أحس مدري شصـار بيه وهوَ يغازلنـي بهاي الابيات الشعريـه الي خَلت گلبي يدگ ميـت دگه بالثانيـه الواحده

اميـر
اكلج شغله وحده بـس ؟

درت وجهي الٌه وكتلـه
اي استاذ كول ؟

اميـر
اكو شعـر گاله العبـاس بن الأحنف
جـان مُبالغ بي حيـل
وكل ما اشوفـه جنت اكول شدعوه ؟
بـس هَسه احسـه مو مبالغ بي
احسـج حقيقه

وشنـو هذا الشعر؟

اميـر
لَم نَدرِ ما الدُّنيا وما طِيبُها ‏وحُسنُها حتَّى رأيناها

رقـيق دائما عباس بن الأحنف لمن يحجي شعره والظاهر راح اصـير نفسَه

أبتسامتي مرسومه ع وجهـي بكُل هدوء
ماكدرت احجـي شَي ابد غير بـس اسمع غزلـه المُختلف الي

حركاتـه خلنـي أحبه اكثر و اكثر
صوتـه وهوَ يحجيلي الشعر ونبرته الحنونـه
وابتسامتـه الهادئة
چذبنـي حيَل الـه

التزمت الصمت ودوره وجهي للمريـه
فّي حيـن هوه احسه يريد يحجي ويسكت من الخجـل

قربنـا ع السكن الجامعـي حيَل
تنهد وگال
عمياء أنتِ؟ ألم تري قلبي تجمَعّ في عيوني؟
وبلهجتنة اكلِج
راضيلي گلبي بكِلمة؟

ماكدر اضـم ضحكتي عنه ولا اكدر اتهرب منه
اُستـاذ !!

اميـر
أمير مو استـاذ

مُستحيل صعبة

اميـر
عـادي لا تكوليـن امير بـس لا تكليلي استاذ
تكدرين تستبدليهم بكلمـه حلوه مثلاً؟

عرفت شنـو قصده
بينت اني ضايجه منـه بَس اني ميته من الفرح بداخلي
الفرحة الي بداخلي جانت حيـل جبيره
ومُستحيل احد يكدر يوصـفهه

اميـر
ولكن المرء لا يُدان إذا وقع في الحب، لأنه لا يملك زمام قلبه!

ضحكت وصوت ضحكتـي جان واضح يمه
وصلـنه للمكان ردت انزل گتلة بخجّل

شكرًا ع اليوم الحلو هذا

اميـر
رتَّبْتُ أجْمَلَ ألفَاظِي وأعْذَبَها
ثُمَّ الْتَقَيْنا فضَاعَتْ كُلُّ ألفَاظِي
واعذرينـا من التقصير
والخيـر بـ الجاي

أبتسمت ونزلت
يمـااا ودي اعيط بكُل علو صوتـي
فرحانه حيـل واحس كلبي يريد يطير من مكانه

اول مارجعت حجيت لايلول كلشي

ايلول
فـرس مو دتحسـين انُ استعجلتوا شوي ؟

ايلول جد جد اني احبـه ومو بس اعجاب هذا والله العظيـم حُب واني احبه انتِ ليش متصدكيني وبعدين الحُب ميعرف مُده ولا شي وهوَ لو من ذوله المنـا منـا جـان مو من هَسه اعترف وكلي اريد كُلشي يكون رسمـي يعني متاكده يريد تكون السالفـه رسمية ويجي يتقدم الي وبعدين امير دفرنت(مختلف) ايلول دفرنت والله

ايلول
شوفـي فرس انـي ذولا الزلم ما ارتاحلهُم ولا اطيقهُم
بس بصراحة حقج من تكوليـن اُستاذ امير دفرنت ( مختلف)
انـي عاشرته وشفتـه وهادئ ومو مُتعصب وفوكاهه خلوق حيـل
بـس اكو شي فرس

الـي هوَ ؟

ايلول
شلـون حتكدرين تعيشيـن وياهُم ؟ فرس وضعهُم كُله يخوف والله
ونوب هيـج احسهُم من الناس الـي يزوجون ٤ و ٣ لان هُمه هواي
اني شايفه صوره تجمعهُم كومه كومـه زين ذولي من اجوي ؟
اكيد كُل واحد مزوج ٤ و ٣

ماعتقد أمير هيَج، أمير مُثقف ايلول

ايلول
وتعيشيـن وياهُم ! طبعهُم صعب فرس، مداخوفج بـس جد خايفه اني

صحيح حجيج ايلول كُله صح ، ومحد كلج اعيش وياهُم، انـي شرطي عَ امير يكون بيـت وحدي وشمدريج يجوز اقنعه ونجي للموصل ؟ او نستقُر بـ بغداد  مثلاً ؟

ايلول
اوف شوفـي احَس الفكره تخوفني وتفرحني بنفس الوقت

فرس
هههههههههه شبيج ولج ليش عيونج مدمعه
خاف غرتي عليـه هااااا

ايلول
عابت شنـو غرت عليـج
بـس اني مشاعري ملخبطه حاليًا
اول شي فرحانه ، فرحانه لانُ لكيتي شخص مثل أمير
أمير انسان كُلش حباب وخلوق وهيج يعني مثل ميكولون خُلقاً واخلاقاً ، بـس بنفس الوقت خايفه عليج ، خايفه عليج من الزواج ومشاكله ومتاعبه خايفه عليج من كُل ذنـي

اباوعلهه عيونـهه مدمعه
يُمة احسهه اُمي وهيج دسويلي
حضنتهه وكتلهه

لتخافـين انـي فرَس مو اي وحده وماراح اخلـي شي يضُرني
ولـو كان هل مكان احبه هواي اذا حسيت انُ مُمكن يسبب بشوي ضرر الي اعوفـة

ايلول
من هسه اكُلج خطوبتكمُ تطول فوك الـ سنه تعاشري وتشوفي شنو ماشنـو وتشوفين وجهه الحقيقي وعود بعدين تخطين خطوه الزواج
كُلشي يصير فرس الزواج موهيـن حتى واحد يخطي هيج بهسهوله

صحيح حجيج كلبي ، هسه الله كريم شكاتب النه الله نشوف

ماگدر انطي فرحتـي لاحد فرحانه حيـل لدرجه مُستحيل احد يگدر يتصورهة ويقيمـهة واحس الدنيـا فتحت ميت باب بوجهي

شويـه وخابرنـي اخويه
اكتشفت انُ داگ عليه هواي واني ماراده

حجيـت ويا وجان حيـل عصبي
ضل يعيط عليه ويسمعنـي حجي موحلو
ماتحملـت حجيه وضـليت زعلانه
احس يومي كله اتدهور
اني من نوع كلش حساسه كلمه وحدَه تاثـر عليه

شوَيه و امير راسلني يحجي وياي وانـي مابيَه حيل احجي حته انتبه عليـه وكالي
اميـر
بيـج شي فرس ؟

لا مابية

اميـر
شوفي صوتج شلون مبين بي الزعل
زين بسببي

لا والله انت شدخلك

اميـر
‏يا ليتها تبكي لأفهم حزنها
موجوعةٌ بالصبر لا تتكلمُ

ابتسمت وكتلة
بخيـر اني لا تخاف
تعبـانه شوي بَس

اميـر
وانـي تعبان اكثر منج لان تعبج يتعبني

زادت ابتسامتـي بس ضليت مالي خُلك
امـير ماريد احاجيك اني من اضوج اكُعد وحدي
فـ اريد اكعُد وحدي شويه

اميـر
خليج بوحدج واني ويـاج ماخليج وحدج !

ممكن اطلب منك طلب ؟

اميـر
قبل لا تطلبي تلكيني منفذه

خلانـي انسه كُل حجيي بحجيـه الليـن
بَده يحجي ويـاي مواضيع ويحاول أنسه الشي الي مزعلنـي

بس اني جنت قافله لاني نحسه بهسوالف ومانسه تضل بكلبي كتلـه حنام وصدك رحت نمت اليـوم الثاني رحنه للجامعه وجانت محاضرتـه اول شي

وعكس كل يوم طبلـنه وجان متحمَس حيل
باوعلي وانطانـي ابتسامه

بـده يشرح واني دفتري حاطته يمي وكل شعر ينطي اكتبة كالعادة ، كُلمره يحجي اشعاره وجنت اشك بـ انهن الي بس هل مره لا متاكدة خلاص

اميـر
وَدَائِي باطنٌ ولديكَ طِبٌّ
وَهَلْ لِي مثل طِبِّكَ يا طبيبي

يباوعلي والضحكـه مستحله وجهه استحلال اسرائيل لفلسطين
عكـس كل مره الي ينطي ابتسامه بهدوء

اميـر
وقولوا لها: إنِّي أسيرٌ بحبِّها
فهل عندَها من رحمةٍ لأسيرِها؟

من يحجي هيج بحماس وصوت عالـي ويروح منا ويرجع لهنـا
كل مره ينوع النه بهل اشعار الا هل يوم فضحنـا وهوَ يحجي كُله حب ، فـ اكو ولد ويانه كاله

-
شنو استاذ احسك جاي تحب

باوعله وكاله
اميـر
وشنو اليمنع هذا الشي ؟

كُلهه كام تضحك

اميـر
يجوز عن قريب تزفون استاذكم بيدكم شمدريكم
يلـة خل نرجع لمُحاضرتنا 

كمل درَسه وساره تباوعلي وتباوعلة وايلول تضحك وياية
خفت ونبزني كلبـي منهـا لا تسوي شي هاي الحية

جانت افعال اميـر حيل فاضحتنا وبنفس الوقت جنت حيـل خايفه ، خايفه لا يصير شي وساره تخرب كلشي بيدهة

نعلـت الشيـطان وسكتت
شوي دزلي رسـاله

اميـر
شكد طالعه حلوه اليوم؟
امنيتي تكونين بعيـوني بَس هيج !

اني حلوه من يوم يومي
كتبتله هيج وضحكت

باوعتلـه ملامحه نزعجت وعاف الموبايل رأسًا
اهـا ويغار؟

بهَاي الايام طرت للسمـاء بـ افعال امير ويايه
ماجنه نحجي بالجامعه هواي لان هوَ جان يخاف ع سمعتي حيل ويعرف الطلاب شنـو واكثر حجينه يكون بالموبـايل
ماكتلـه احبك ابدًا بس جان واضـح اله شلون گلبـي ويا

ماطول المووضوع يومين ورجع فِتح الموضوع وياية

امير
فرس دآم هَسة ماعدج امتحانات، انة اريد افاتح اهلي بموضوعنا، وانتِ ماعليج ولا تخافين من ردة فعِل اخوج اخذج يعني اخذج
بس المهم عندي انتِ راضية هاهيّ ولو انة ماوصلني منج رِضا مُباشِر بس صمتج اكدر اخذة كَ إشارة، فَ برأيي اسويلج إجازة ٥ ايام حَتى نتوكل على الله..

من شفت الرسالة انصدمت، سرعتة بالموضوع موطبيعية، اني كُل الي جان ب بالي عاد نكمل المرحلة ١ بَس
كتبتلة انُ خليها عَ الثانية رأسًا رد

امير
انة ماحب سوالف الحرام وسوالف الختلة
انة واثق من نفسي و واثق منج فَ بعد شنو وليش هل تأخير؟
ماريد أيّ عائِق يكون بيناتنا وانة هسة جاهِز فَ شنو يمنعنة؟
اما مال تخلصين مرحلة اولى يلا مُستحيل فَرس، احنة نضل على خطوبة شكد ماتردين اولى وحدج للثانية هّم، لان ماعتقد اصبر ازيد بس دراستج راح تبقى ومُستحيل تتأثر وحتى اطفال انة الي راح امنعج حتى دراستج ما تتأثر

عزة صدمني وهوَ يحجي بجدية الموضوع وراح للاطفال خلاص
ايلول
هذا خوش نسيب والله ما يتلاعب اعجبني اقيمة ٩/١٠ لان العشرة بس لرجلي الدايح

فَرس
ليش ولج دايح هههههههههههه

ايلول
مادري بس احسة دايح هههههههه
المُهم هسة احجي ويـا وكوليلة من اكمل اولى كوليلة اخوية ابد مراح يقبل ديربالج فَرس مو بهسرعة هـاي

اني هم حسيت مومال استعجال وضليت الح عليّ انُ لا فَ هنَ سِكت
استمرينه ع هاي الحاله وبوفاه اخته جان حيَل متاذي امير وجنت واگفه ويـا بكلشي شي ب شي

جان يحاجيني بطريقة تخلي قلبي يهدأ... كأنه شايف بيا شي محد شايفه قبلة. حسيته يشوفني ملجأ، مو بس شخص يحبه... كأنّي المكان الوحيد اللي يگدر يكون بيه على طبيعته، بلا تكلّف، بلا أقنعة.
وفعلاً شفِت وجه ثاني لامير الهادئ الرسمي
والي هوَ امير الحنون الحساس حيل

يحچيلي عن كل شي، حتى الملعوج من أفكاره، حتى اللحظات اللي يخجل منها، يبوح بيها إلي. يشاركني تفاصيلة الصغيرة وكأنها عظيمة، وياخذ رأيي بأكبر قراراته كأني صوتي عنده مرجع.

هالشي خلاني أحس بقيمة مو طبيعية... مو لأنّه يحبني بس، لأنّه مرتاح وياي، لأنه حاسبني أمان، وسند، وراحة. وهذا الشعور... أكبر من كل كلمة أحبك حتى ..

يوم من الايام داومنه وجنت شويه مريضه ومالي خُلك امير كل شوي يشرح ويجي يهمس الي شلون صرتي بخير
سارة واميرة انتبهَن حيـل واحس الشر بعيونهن ثنينهن
جنت احاول انشغل او ما مبين يمهن بس اميـر جان كل شوي يجي

طلع امير وطلعوا الطلاب وضلينـه بس احنه
التفتت الي اميره وكالتلي

اميره
شنو استاذ امير يحبج؟

ايلول
يحبها مايحبها شدخلج انتِ ؟

سحبتني ايلول وطلعنـا
ياربي شلون الي خلك الهن انـي

ايلول راحت تجيب النة اكِل وتجي واني ضليت كاعدة بمكاني لان جنت كلش دايخة ..
شوي وصلني مسج من ساره
دازتلي صور
فتحت الصـور وجانت محادثات بيني وبينهه وشلون اكللهة انُ اني راح اجيب راس امير
كاتبتلي جواهن وصلن لـ استاذ امير وتضحك

جنت دايخه حيـل من المرض
وفوك كلشي صار هشي
دموعي صارن ينزلن وضليت مصدومه وخااااايفة
ماحس الا امير صار كبالي

منين طلعلي
وشمدري بمكـاني ماعرُف
بس الي اعرفـه شفته كبالي واكُف

اميـر
هذني الرسائل الج لو مفبركـات

طلعلي موبايله ضليت صافنه شرد عليه
ماكدرت اجذب عليّ ابد وضليت ساكته
ودموع بعيونـي متكومات

مكانه اني وايلول مابي احد جنه دائما نكعُد بي وامير يدري بينه دائما نكعد هنا لذالك اجة رأسًا

بـده هدوئة يتحول لـ غضب وهو يشوفنـي ساكته
اميـر
قنعيني وكليلي هذني مو الي وهذا مو رقمي قنعيني راح اتخبل!!!

ضليـت ساكته وماعرف شكله بس اباوعله ودموعي بدن ينزلن بهدوء حته ماكدر احاجي احس ماكدر اجمع حجي

اميـر
يعني الج مووو الجج جاوبي اي لو لا

هزيت راسيَ بـ اي
باوعلي وهوه مصدوم

اميـر
شنـو اي ! يعني الج !

سكتت وضليـت مدنگه
احس روحي مسطورة وحتى ماستوعب الجاي يصير

بهـل وقت الاغلاط الي سويتهُن كُلهن صارن كبالي
مثـل الشريط شي شي
بديت اكـره روحي واسمع بحجية
وماكدرت انطق بحرِف ..

اميـر
ارد افـهم اني شنو بنسبه الج وشنو نهايـه هل لعبة

اباوعلـة و الحجي ما يطلع منـي دموعي ينزلن مني
القهـر استولاني افكـر واكول ليـش هيج سويت بروحي ليش ضيعـت انسـان شاريني بروحـة من ورة غبائي ليش
ماكدر حتى اواجهة بكِلمة ماكدر اجذِب عليّ ولا اكدر ابرر لنفسي .

اميـر
جـاي احجي ويـاج احجيلي شنو
هه مراهنه عليـه مو برري كولي خطـأ كوليلي هل رسائل فبركـه كولي قنعيني راح اتخبل والله

بالگوة طلعت مني هل شجم حجاية، الي حجيتهن وجسمي يرجف وخايفة من الي راح يصير
الرسائل صـح بس هنه قديمـات صدكني هسه كلشي تغيـر

رفـع ايده بوجهي بمعنى كافي و غمض عيونـه بكل انزعاج وغضـب

اسفـة

باوعلـي بنضرات كره مو نفس النظرات الي ينطينياهن بكل مـره وگالي

اميـر
قلبي الذي آذيْتَهُ وطعنْتَهُ
أتظُنُّهُ يكفيهِ أنْ تتأسفا
غادرْ فما عادَتْ عيونُكَ جنَّتي
ابدا وما عُدْتُ المحِبَّ المدنَفا
يا من أذقتكَ كأس وصلي عذبةً..
خنتَ العهودَ فَذُقْ إذنْ كأس الجفا
يبدو بأنَّكَ كنتَ تجهلُ قيمتي
فالآنَ قد آنَ الأوانُ لتعْرِفا !

حجـة هيج وگالـي

امـير
انتهت قصتنه جانت غلطه ومستحيل اعيدهـا
يتبـع .....

برأيي الانتقالة الي راح تصيـر بحياة فَرس راح تصدمكُم كَ صدمة انتقالة مروان وروان لان الصراحة ثنينهُم غير متوقعات

___________
لا تنسـون تتابعون حِسابي حَتى كُل شي يوصلكُم ✨