رواية بيت جبر الفصل الثالث 3 - بقلم هُدىٰ آذار

مَســاء الخير
ورجعنــا وياكُم بـ بارت جديد من قُصة
بيَت جبُر
للكاتبة : هُدىٰ آذار
لاتنســـون التصويت والتعليق بين الفقرات
قِراءة مُمتعة.
____________________

القلـم عنـد ايلول جاهزين حته تتعرفون عليهه اكثر؟

اسمـي ايلول تسميت بهذا الاسـم لان ماما جانت تحِبة

من سكنه محافضـه الموصـل ابويـة دكتور و امـي دكتوره اغلب وقتـهم بالعيادات ماجنت اشوفهم هواي بس جانوا موفريلي كُلشي ، عندي اخوان ثنين بكنـدا مسافرين و مستقرين هنـاك وجان المخطط الي عند الاهـل  اكمل دراسـه واروح لكنـدا حته يأمنولـي حياه احلـه

بصراحـه اني كلش اعارض قرارهم وماقبـل بي لان اني كُلش عراقـيه و ع كوله فرس عراقيه عميقه وحيـل متعلقه بالعراق واحب كُل تفاصيلـه

بنيـه عايشه حياتهه نفس ما تريـد ماكو احد يحاسبهه
وين رحتي
وين اجيتي
شراح تسـوين
ليش لابـسه هيج
لتصرفـين هذا التصرف ...اللخ

حيـاتي جانت جدا مثاليـه لهواي ناس يشوفوني
كُلشي متوفر اليه لذالك اني كُلش احب العـراق وما عانيـت لوجودي بي حته من صارت احداث العـراق ابتعدنه عن الموصـل شكم سنه رحنـه لبغداد وبعدهه رجعنـه بدون عذاب جبيـر ، ومع ذالك فرس صديقٌه طفولتي هنانه ف مستحيـل افكر اتركـه ، انـي اسافر بين فتره وفتـره بس مستحيـل اتركه واستقر ب غيـر بلد ابـداً ..

ابويـه من نوع الي كُلش يحب العلم جان عنده طموح ادخـل كليه الطب بس اني جان تفكيري كُلش بعيد عنهم اني انسانه بسيطه حيـل مع انُ اهلي عكسي تماماااا ..

احـب البساطه واحب اختـلط ب اي نـاس وبفئه من دون اي تردد ، اهلـي مسيحيين الاصل بـس بابا معلن اسلامـه هوه و امـي من استقروا وحدهم فَ انولدت مُسلمـه سنيـة المذهب

عشت  واني مامحتاجـه لشي غير الاهتمام!
اهلـي ماجانوا معتنين بيـه ابدا !
ماجانوا موفريلي الاهتمام الي المفروض ينطوا الي !

من و انـي صغيره جنت اشاهد كميـة خلافات كبيره بين امي وابويـه ، وحفاظاً ع سمعتـهم ما اطلقوا ، جنت مرات اسمع ابويه يكُل لامـي اني خلي اطلكج وكافي اني ما الـي عيشه وياج بـس هي تكُله اني ماميته عليك بس سمعتي وسمعه اولادي اهم شـي عنـدي ومستحيـل اخليك تخربـها ..

ماجـانوا يدرون انُ هاي المشاكل هي الي راح تخرب حياتنـه كلهه وراح تاثر ع شخصيتنـه هواي ، جنت اكول لو منفصلين احسن مما يضلون هيج ويخلونه كل يوم نشوف هل منظار المرعبه الي تصير بيناتهم بالعرك

كلشي عدنا، بس حنان ما عدنا..."
أهلنا ما قصروا، لبس وأكل وسقف فوق راسنا، مصروف، مدارس، حتى هدايا أحياناً، بس الحنان؟
الحنان غايب...
لا حضن يطمن، لا كلمة "أحبك"، لا سوالف قبل النوم، لا نظرة فخر، لا طبطبة على الكتف وقت التعب.

كبرنا وإحنا نتصنع القوة، نضحك ونكتم، لأن تعلمنا من صغرنا إن التعبير عن الوجع ضعف.
كبرنا وإحنا نشتاق لشي ما نعرفه بالضبط...
يمكن حضن؟ يمكن اهتمام؟ يمكن بس أحد يسمعنا بدون ما يحكم؟

مو ناقصنا شي، بس ناقصنا كلشي...
ناقصنا الأمان النفسي، ناقصنا الحنان إللي ينزرع من إحساس الأهل مو من فلوسهم!

جنه نتربه يم مُربيات ونقضي اغلب اوقاتنـه ب الحضانه

جانوا اهلي يطلعـون من ٧ الصُبح لحـد لـ  ١١ بليل يجونه ومن يجون تعبانيـن يادوب يبوسونه ويرحون ينامون
مكضيها بين المُستشفيات وللعيادات

صح همه يحبونه بس مانطونه ابداً الحنـان الي لازم ينطونه لجهال ، هالشي جان سلبي علينه اني واخواني ، بس يجوز اخوانٌي محسوا بهالشي هواي مثلي انـي لان اني بنهايه بنيه والبنيه تحتاج حنان اكثر

ويجوز هم هواي يشوفون حياتنـه مثاليه ويتمنون اهلهم يوفرولهم كل هل اشيـاء ويصيريون مثلنه

بس اني جنت هواي مـرات اكعُد واصفُن ع روحي واكول كُلش عادي عنـدي اهلي تكون حالتهم بسيطه ومايوفرولي اي شـي اريده بس ينطوني حنان ، هذا الشـي كُلش كافي عليه ..

الأهل مو من فلوسهم
للاسف محـد يحس بالشعور غير الي عايشه لان الحنـان كُلش ينراد والطفل اذا بدايته طفولته ما تلقـى الحنان حتصير مـصايب بعدهه

حته من عشت بفتـره مراهقتـي جنت  اخطـا لان ماكو اي رقيب عليه يكلي الي دتسوي خـطأ خطات شكم خطا الي انـي اعتبرهن خطـا ومتندمه عليهن ، انُ اني جنت ما اصـلي وما اصـوم تقريبـا بالسنه بس بعدهه عرفت ودركت وحدي انُ الًي سويته خطا وكعدت اقضي ب صلاتـي وصومي
وتكدرون تكولون ب انُ تربيت عن طَريق الاغلاط مو من قبل الاهل ونفسيَ الي ربتني ..

اما سوالف ولد ما ولد ابداً ماجانت عدنه لان اني وفرس نروح بطريقنا ونرجع بطريقنـا وابد ما جنة من البنات الي يهتمن لهاي السوالف

تعايشت وي هالجـو ونملـه وقتي اكثر
من صـار عمري ١٨ جانت هديـه بابا الي سيـاره احدث موديـل بوقتها جنت كُلش فرحانه بيـهه بوقتها كلي نفس ما فرحتج اريدج تفرحيني ب مُعدلج.

بوقتـهه اني جنت ماقرا هوايـه وجنت ناويه اعيد سنه  بس كلامه اثر بيـه وكلت خطيـه لازم اقره شوييـه ، شديت حيلي شويـه موهواي اقـره واطلع اقره واروح يـم فرس وبالاخيـر نجحت ومن اول دور واحس انطيتة هدية اغلى من هدية السيـارة 🤣

لان اني بطبعي ذكيه جنت مرات ب ليله الامتحان اقره و اروح اخذ ع كد نجاحي وهايهيه.

جنت كُلش فرحانه مع انُ اهلي ابدا مراضييـن لان اخواني ثنينهم طب واني اعتبـر البنيه الي كسرت القاعده بهل عائله

كالولي عيدي بس اني جنت قافـله كتلهم ابداً ماعيد السنه واني ماعندي اي رغبه بالكُليات يعني ماريد لا اهلي ولا غيرهه ماستقبل اي كُليه بيهه طب

اصـلا اني كُل تفكيري جان مجرد اخذ شهاده الجامعه وبعدهه ماعتمد عليـهه اعتمد ع روحي واسوي شغـل و مشروع خاص بيـه ..

جنـه اني و فرس متسـاويين بالمعدلات هنانـه اني كُلش فرحت انو راح نروح جامعـات سوى قدمنـا ع كُليـات كُل المحافضات

طلع النـه كُليه قسم عربي بالجنوب(محافضـه ما..)

انـي بصراحه ابـدا ماجنت مقتنعه لان انـي كُلش اكره اهل الجنوب كرجال
انـي عامه اكره الرجـال واحسهم كُلهم نفس بعـض والي بالـي جدا نادر و ع كولـه فرس لو تفترين الدنيا مراح تلكينه ابـد

المهم معدلنـا ناصي وميقبل غير جامعه ، سمعوا اهلي واستسلموا لامـر الواقع ماجان بيدهم شـي بس جان اكو شرط ، انُ اخذ الشهاده العراقـيه بعدهه اسافر لكنـدا وادرس هناك واخذ شهاده الكنديـه جنت اسايرهم واكُلهم اي اي واني مستحيـل اسويهه

اخـو فرس ماجان موافق انُ فرس تروح لجنوب هوه من نوع الي جدا متسلط ع حياه فرس ومامخليها تتنفـس  جان محافظ جدا وبنفس الوقت انـسان موزين وشكاك كلش من ورة مرتة الي دائِمًا تحش براسة ع فرس كوه فرس عايـشه ويا مع ذالك هوه جـان كلش يحب بابا ويحترمه قنعت بابا يحاجي ورحنه اني وبابا كعدنه نحرمص بالكوه قبل

بيومـها جنه اسعد ثنين بالدنيـا
تعتبر سفرع النه وثنينـه وسوى جانت الدنيـا ماسايعتنا احنه جنه كلش خويفين من هناحيـه ، نخاف لا الجامعه تفرقنـا ...

المهم بيومـها العصـر طلعنه و اشترينه ملابـس و فرس  اشترت اشياء ع ذوقـهه بما انها صارت حُره اكثر واني هم اشتريت ملابس

من صار الدرام  ودعنه اهلنـا ورحنه بسيـارتي جنه كُلش متونسيـن وكاعدييـن نخطط شنسوي وشلون

رحنـه لجامعه وبوقتـها جان الوضع مُزري حرفيـا ابد ولاشي عجبني هناك عكس فرس الي جانت كُلش فرحانه، حسيت روحي خطات لان اجيت هنـا بس قبلت بواقعي وبديت شويه انسه والتهي وي فرس ونذكر طفولتنـا حدمـا اجتي بنيـه

وجها ابـد موراحـه مبين اني كلش أثق بسالفـه الطيور على اشكالهه تقـع

بيومٌها صارت هٌواي شغلات(انتـم تعرفوها بعد) حيـل ضجت منها من فرس بشكل خيـالي ومجنت راضيـه ب الي تسوي

مـن اول يوم كومه ولد اجـو وذبوا كلام حيل موحلو  واني اباوعلهم ومقروفه منهم

انـي طبعاً سافره شكد فرس قنعتني انو اغير من نفسي احتراما للمكان بس اني ارفض اغير شوي بس عن نفسي علمود الناس اني بطبيعتي كلش ماهتم للناس وماهتم ب رائيهم بيه ماطولهم ماحجوا عليهّ مادخلني بيهم

العصر بدلت و اذكر جنتت لابـسه ثوب قصير جوه الركبـه بلـون اللابيـض

انـي مواصفاتـي بيضه وشعـري متوسط الطول جسمـي مو ضعيف ابداً لا جنت مليانـه مو سمينـه حيل و اوڤر ولا ضعيـفه وجسمي مو مثالي لا جـان جسمي وسط بـس جنت دبدوبـه وحيـل حابه جسمي ماجنت اهتم اضعـف ابداً لان اعتبر جسمي حلـو بهذا الوزن والشخصية مالتي احسها جاية ويا

طلعت من القسـم وركبت سيـارتي والعيـون كُلها عليه حتاريت وين اروح وجنت حيـل ضايجه لانُ جنت اريد فرس ويايه واريد نتونس بس الحقيـره كاعده هي وساره ويضحكـن

ضجت ازيـد وطلعت بالموبايل ع اللوكيشن(الموقع) جـنت ادور ع سوگ او مول او اي مكان اشتري منـه ملابس بما اني كل ما اضوج اشتري ملابس

مريـت بصدفه ع سوگ ومبين كُله ملابس ومحلات صفيت سيـارتي بمكـان ونزلت حتـه اشتري

بعدنـي ستوني نازلـه ودامشي ماحس الا ع صوت الطلق ع راسـي ... انـي هنانه متت خوف اني بطبعـي حيل اخاف من هاي السوالف وجانوا يسولفون ع الجنوب هيـج وشفت بعيني احس مادري شصـار بيه اريد اتحرك اريد اروح لسيارتي ماكدر ضـليت مصنمـة بمكاني

صـارت لخه بالسوگ والكل تشارد ومحد انتبه لثانـي كُلهه تكول ضلوا بمكانكم لاتجيكم طلقـه تايهه

انـي هنانه اذا انذبح ولا قطره دم راح يلكون بيـه ع كـد ماجنت مصنمه وميتـه من الخوف

يجوز لو صـاير هل موقف بالموصل ابد ما اخاف وراح اتعامل ويا بكُل قوه ، بس هنا جان الموضوع مختلف لان اهلي هواي حذروني من هاي المُحافضه و انـي اجيت رُغم عن الكُل وفوكاهه جنت اسمع و اشوف هاي المُحافضه شلون بيهه هواي ناس ماتت ظُلم بسبب العادات هذي ( الدكات العشائِرية )
*عِلمًا الكلام مابي أيّ مُبالغة، بوقت مِن الاوقات هذي المُحافظة امتازت بالدگات العشائرية المُستمِرة، رُغم انُ حاليًا لسة منتشرة هل امور بس نكدر نكول لابُد اقل ..

ختلت ورا بـراد جـان موجود هناك شفت شون جماعه مسلحه يركضون ورا واحد لزمـوا موتوااا ضرب اكو ولد واكفه وتشوف باوعتلهم وكتلهم روحوا ساعدووووا ليش هيجي

كلولي انُ سالفه عشائريه وملازم احد يدخـل ...

الموضوع جان مُرعب بنسبة الي
اذا تذبحوني قطرة دم متلكون من الخوفة
يعني اني جاية وحاطة ب بالي نُبذة عن المكان الي اني بي
واهللي حذروني نوب اشوف الولد ينزف من كُل مكان ونفس العصابة مداورتة احس روحي عايشة بالصين ومافيات ومدري شنـو

شويـه شفت الشرطه اجتي ضلت واگفه اشوف واحد بالسيـاره نزل وضل يصيح اصعدوا مبيـن ضابط مادري شنـو ..

احس اعصابي ماكدر الزمهه
الولد حيموت وذولـة واكفين يتفرجون !
اني كيفت من اجوي تالي اجوي حَتى يضلون واكفين !

رحت الهم وكتلـهم

الولد راح يموتتت روحوا شوفوا شبي شبيكم مو انتوا شرطه ع اساس الله يخليكم روحوا يمه

باوعلـي هذا الي مبين ضابط مدري شنو بنظرة مُستفِزة من فوگ لجوه حسسني وكإنمّا اني عريانة
بنضره استهزاء وكالي

بابا احنه مالنه دخل بالعشائر العشـائر مستقلييـن

كتلـه
شنوو هل نظام الي عندكميـا الولد راح يموت ب ايدهم بس انقذوا منهم عفيه الله يخليك وخروا من يمه وبعديـن شتسوون سووا

راسا عاط بيـه بصوت مسموع وكال
لا تدخليـين انتِ ماعليج روحي لبيتكم احسـن الج طالعتلي بهذا اللبـس حضرتها و تريد تحمـي انسـان دحمي روحج بالبدايـه

هوَ من گال هيج احـس نار اشتعلت بداخلـي باوعتلـه وكتله بعصبيه

انتتت شلـونن تحجي ويايه هيج و ع اي اسساس هااا

ماحـس غير دفعنـي ويكل للشرطه الـي ويا اصعدوا يلا عوفوهه هٌـاي تلغي وحدهه، هاي تريد غير اشياء الظاهر ويجوز تريد تجذب نظر هههههههههههههه

رجعت كم خطوه ليوره من ورى الدفعه مالتـه

احس مادري شنـو صار بيـه نار بكلبي اشتعلت كبـال العالم وهيج يفشلني !!!  حجيت ويـا بكُل احترام وبـذرة ما غلطت ويا شلون هيج يجاوز ويدفعنـي وفوكاهة بحجي حجي مُلغم صح اني مافهمتة بس اكيد نيتة جانت سيئة!

ضليـت مصدومه شلون يسوي هيـج! شلون يجرأ وهوَ شرطي وكبـال كل الناس ؟ لعد هذا شكد بايعهه ويسوي هيج!

محد حجه حجايه وحده من الموجوديـن الكُل اكتفه بالسكوت وملامح الخوف مبينه بوجوهم

غمضت عيوني وحجيت بيني وبين نفسي
والله ان ماندمتـه مايسمه اسمـي ايلول

رحـت بسرعه ركبت سيـارتي وصرت اسوق وراهم و الحگهم

الدموع تنـزل مني واحس روحي مفوره من العصـبيه

احس الفشلة الي تفشلتهه والصدمه الي انصدمتهه هدمتني !
بس ! مُستحيل اخلي حقي يروح .

وكفوا گبـال مركز غمضت عيوني و مسحت دموعـي ونزلت واني جنت ناويه ع شـر ...

سامعه بكُل السوالف الا هسالفه حسيت روحي بفلـم ! شلون يتجرأ ويدفعنـي هيج وبكُل وقاحه احنه وين واصليـن ليا مرحله ، لو يدفع ولد يجوز بيهه باب و جواب بـس يدفع بنية واكفه كدامه تحاجي وبـ ادب وجنت شُبه اتوسل الة بـ انُ يروح ينقذ الولد !

ابـد ماجنت ناويه ع خيـر نزلت واني كُلي شـر واتوعد انُ مارتاح الا اشوفة منهان كدامي

شافونـي شرطه واكفين بالباب الكُل يباوعولي بنضرات غريبه حاولوا يوكفوني ب انُ ماطب مادري ليش بس اعتقد المكان الي اجيتـة جان خطر ومو مُخفر عادي
ماهتميت وطبيـت ، اول مره بحياتي اطب مخفر شرطه مادري شنـو الي راح يصيـر بس المهم اطب وانتقـم منـه
ما انكُر انُ ماخفت وحدي مادري شحيصير بية يجوز اموت هنانة ومحد يدري بية، تصرُف خاطئ مية بالمية بس نار بداخلي وتهور دفعني ويكُلي لا تسكتين ..

طبيت لكيت مكان شلون الصالـه وبيهه مكتب لگيت بوقتهه الدنيـا مگلوبـه هناك كومه شرطه كومـه وملتميـن وكاعد واحـد ع الكُرسي مال المكتب

من شافونـي راسا اجوي ذوله الي يم الباب وراي اعتذروا وكالوا طبت وحدهه

الـي عرفته انُ جايه لجنه تحقيق للمركز بنفس الوقت الي اجيت بيَ ندعيت من ربي انُ يوكف ويايه ضـد هذا الوحش لان كبال ناس كُلهه دفعنـي وانـي  ماسويت شي ! شراح يسوي للمظلوم شلـون يطلع حقـه وهوَ رتبتة عالية المفروض يوكف وي ناس ويوكف الظلم مو يُظلم

جانت دموعي تنـزل من القهر شفتة من بين الموجودين اباوعلـه باوعلي ويريد يفتسرني بس مايگدر ، اباوع الكُل يباوعلي بنضـرات غريبه سمعت صوت حنين گـال

رئيس لجنه التحقيق
تفضـلي بنتي ؟ خير نكدر نساعدج بشي ليـش جاي تبجين شصاير

انـي من شفته مادري شصـارلي اريد اروح اضربه راشدي التفت للي حجه ويـايه مبين رجال حيـلللل حباب يا الله بلكت يساعدنـي

غمضت عيوني وكلت الايـه الي دائما تنقذنـي من كلشي
(ربـي اني قد مسنـي الضـر وانت ارحم الرحمين)

عمـو اني جنت بالسوگ وفجـاه صارت مُشاجره بين ثنين واجتي الشرطه وطلبت منهم يرحون وينقذون الولد لان مجموعه ع واحـد والولد صغير بعده والي يضربو حيل كبار وضخمين
ومن اجيت للشرطي  دفعنـي وماحترمني وضل بحجي عليـه وحضرته هذا موجود
واشرت عليه

الضابط
لا سيدي ماكو هيج شي هاي جاي تبتلي عليه مامعقولة انتَ تصدگ وحدة نفسها

رئيس لجنه التحقيق
عـدل كلامك حضره الضابط شنو تبتلي عليك ماتشوف حاله البنيه شلون وشلون جاي تبجي اهدئي بابا تعالي تفضلي اكعدي واحجي

جنت منهـاره ودموعي تنـزل لان الموقف الي صار ويايه ابد موهيـن من ناحيه ميته قهر ع الولد الي مساعدوا جـان يكدر بس ينقذ حياته وهاي حيـاه بشر ومن ناحيه غلطه عليه و شلـون دفعني كبال كُل الناس

اني من نوع الي حيل حساسه بسرعه ابجـي بس بنفس الوقت مستحيل اضيع حقـي واذا انمس ب حجاره أرمي ب١٠ احجارات عادي ابجي و اعيط بنفس الوقت المهم ما اضيع حقي

عمـو والله العضـيم هذا الي صـار واذا ما ثاق بيـه هسه نكدر نروح للمكـان وتشوفون الكاميـرات اكيد المحلات بيهه كاميرات

رئيس لجنه التحقيق
ويـن الشرطه الي جانوا وياك بسـرعه !
وبعديـن اذا جان اكو اعتداء انت شلون ماتدخل ؟
انت هنانه لحمايه الشعب ! بلـه جانوا عصابه فدشي وملاحقين الولد

الضابط
سيدي عشائريه واحنه ماندخل بالعشائر تدري

رئيس لجنه التحقيق
مو معنـاهه نسبب ارباك للناس وحيـاه شخص المفروض من عندك تجيبهم ثنينهم هنـانه وتذبهم بالحبـس انت شلون تصرف هيج تصرف يعني اعترفت بنفسك

وبعدين شلون تدفع البنيـه هاااا حضرتك؟ لان كالتلك دافع عنه هذااا مو منطق هذاا احنه وين عايشين

الضابط
سيدي والله العضـيم مادفعتهه كاعده تجذب وتفتري عليه

وتحلف وتكذببب فوكاهة؟؟؟
عمـو والله العضيم ماجذب هوَ دفعني وكبال العالم كُلهه

رئيس لجنه التحقيق
ويـن الي جانوا وياككك؟ الشرطه وينهم؟

الرجـال عمو صار عصبي عليّ حيـل اني بداخلي ضحكه بوسط هل بجي الي مبين عليـه والله يستاهل لعد شحسباله هاي اني ادافع عن حقي الله اعلم شكم واحد خطيـه من ورى مظلوم

رفعوا ايدهم ٣ اشخاص

رئيس لجنه التحقيق
شوفوا ولـدي كامرات موجودات بالمكان اكيد بالمحلات اذا ماعرفت منكم اعرف منهم بس تخسرون وضيفتكم بـس اذا عرفت منكم كلشي مايصير الكم ف احجوا الحقيقـه جاوبوني ب اي او لا دفعهه او لا ؟

الضابط بتوتر وعصبيه
سيدي انت ليش تصدك بوحده نفسهه شوف لبسـهه اكو بنيـه شريفه تطب للمركز

هوَ من كال هيـج اني انصدمت وشهكت!
خلـه الرجال عمو ولزمه من ياخته

رئيس لجنه التحقيق بكُل عصبية
انت مبين كلش بايعهه شلون تحجي هيج ع اعراض الناس هاا انت تدري هسه انت ب دعوه منهه تسويهه دعوه اعتداء تنذب وره الشمس ! حسابك بعدين

جان ودي اذبحة اقتلة اسوي كُل شي
بس اني صح متهورة بس بنفس الوقت اعرف اصرف ف من شفتة حجة عمو اني اكتفيت بالنظرات الي تخلي تموت نظرات التشمت الي انطيها لاخوية من بابا ينطيني فلوس اكثر منة

وانتم احجوا دفعهه او لا

هزوا راسـهم بـ اي راساً كال ل واحـد

رئيس لجنه التحقيق
عفيه عليك عود انت رئيس المركز ومامن بيك خوش حجي مركزكم راح ياخذ مخلافـه وهذا الحثاله اني اعرف شلون اصرف ويـا

اباوعله يباوعلي يريد ياكلنـي كام وهجم ع رئيس لجنه التحقيق ويتعارك ويـا اخذوا بسرعه الشرطه ب امر من الرجال عمو ومبقـه غير اني و رئيس لجنه التحقيق وحمايتـه

انـي هنا توترت حيـل بس احس فرحت لانو اخذوا وانذب بالسجن

رئيس لجنه التحقيق
بنتـي اني اعتذر الج عن كل الي صار وكوني واثقه راح ياخذ جزاءه

شكرا الك عمـو انت انسان حيـل حباب

ابتسم الـي وكام يسوي ب اوراق كلي بابا لازم تملين هل اوراق حته تسوين عليّ دعوه كتلٌه تمام خلـه وراح وضل واحد يمي قريت الاوراق صدك دعوه كملتـهه وشي ماحس الا اجه رئيس المركز الي مساع الرجال كاله مركزكم راح ياكل مخالفه

كـالي يلا اطلعي منـا معايزيـن مشاكل منج اكثر

حجه وخله وراح طلع لبره

اني تنرفززززت يعني مجرد ماطلع هذا رئيس لجنه التحقيق راسا هيج تعامله صـاررر كبر حته كبر

انتـــم اهل الجنوب ولااا تصريلكم جاره حضلون هيج بهمجيتكم طول عمركم

ماحس الا طـب واحد وجان شكله مبين حيـل عصبي وكام يحجي

علي
شبيـهم اهل الجنوب مايعجبون حضرتج اي حقـج انتِ مستواج ميعجبه مستوانه يعجبوج ذوله اهل الكفاش والصبغ مو
وبعدين واذا عجبناج او ماعجبناج راح تهمينـه مثلا تره اشكالـج ب دنيـار مانشتري
درت وجهـي واني اسمـع صوت عصَبي باوعتله وخزرتـه وگتله

ايلول
اهل الكفاش والصـبغ احسن ميـت الف واحد مثلكم مااا يهمكم غيررر المشاكل العشائريه عدكم استعداد تقتلووون ميـت الف و الف شخص علمود شي تافهه ناس همج وبعـدين انت شعليك لو الي بعبـه طليي يمعمع

علي
انتِ لوووو عندج ذره ادب جـان ماوگفتي بنص مخفر وبنص الزلم وبهذا لبسـج وتلتعلين جنج وحده .... استغفرالله ماراح انزل لمستواج اكثر احنه ناس عدنه شغـل امشي ولي منانه وذبي بلاج عله غير ناس شوفيلج ناس غير

تره احنه اهل الجنوب هاا
ومنننجرع والمشاكل تمشي بدمنة وهمج عله كولتج واحنـه الي هنانه كل احنه همج قـح يلا اطلعي بلا زحمه

يحجـي بعصبيـه اشرلـي اطلع بـره احس جسمي كام يرچف من العصـبيه اخذت جنطتي من ع المكتب وباوعتلـه ورفعت ايدي بتوعد الـه وگتلـه
واللٌه العضيم اذا ما اذبك بالسجـن ويا ، لان الي امثالك وامثالة حرام يشتمون هوى الله

باوعـلي بتحدي ونضـرات ماتقل حده عن نضراتي وحدتهن ضحگ حيـل وگال

علي
بابا روحي نامـي بحضن امج احسن الج صدكت روحها

ايلول
منا للعصـر انت بسجن وكول ما كالت ايلول

عفتـه وطلعت بس احس متتتت يعني الفساد واصل بيهم لهدرجه هذا ابو المركز مجرد ماطلع ابو تحقيق كام يطرد بيـه وهذا الثاني لا محزوز ولا منزوز اجه يصيح عليه صدُك جذب ذولـه شلووون نـاس !!!

انهضمت ازيـد بعد شافني واحد من شرطه الي بالباب كلي

خويه لا تهتميـن بس ذوله البلباب حاجو .... علـي وحيل عصب منـج وحجولة جذب وصدك وحجوا حجي موبيج لذالك هيج حجة وياج بس والله هوَ انسان طيب

اخويه اذا تريد تساعدنـي بشي ممكن تنطيني رقـم هذا الرجال الحباب الي اجـه

كلـي
خويه السالفه مو بهاي البساطه ابـد اعتذر منج بس مانعرف شي يخصه وبنسبه لـ ..... علي ف محد يكدر اله مو بهسهوله وهوَ حيل حباب والله بـس ذولا الي بالباب حجوا يمه عليج وعصب يمـج احسبيهه علينه واهدئي وانوخذ حقج وحق الكل لان هذا الضابط هوَ والله نذل واني شخصياً هواي عال بية بس ربج بالمرصاد ياما اكل حق ناس وجنود وهسه اجة يومة

حاولت اخذ رقمة ماقبل. تشكرت منـه ورحت بدون ماكول شـي والله شايف نفسه صورته متروح من بالي ودي اروح و اكلـه ، بس مانكر انُ هوَ خوفني ب تصرفة وصوتة، ولا ذاك ينطنط نفس النسوان، بس ماعاش الي يحجي وياي هيج بسيطة
بعدني اريد اصعد بسيـارتي شفته شلون اجه وبيده جكـارته ويدخن

باوعتلـه بنضره استحقـار من فوگ ليجوه و اجيت لسيـارتي افتح بالبصمه متنفتح مدري شبيـهه شفته اجـه وراي راسا درت وجهي بعصبيه وكتله

ايلول
شكـوووووو شبيك لاحگني ويـن ماروح

علي
تراا هاي سيارتي للعلـم والاطلاع مو لاحگج ميت عليج

ايلول
هااا وبعـد يعني انتم تردون تبوگوني هماتين ! شنو عينك عينك !

علي
شنو نبوگج باباا روحي ذيج سيارتج الي وراي

باوعت صدك سيارتي الي ورا انتبهت للداخل خرب حضـي نفس السياره ونفس اللون شلون مانتبهت حته الداخل يختلف بس اني جنت حيل معصبه ومانتبهت

رجعت شعري ليوره وبلعت ريكي وكلت
مانكلبت الدنيا
وعفته ورحـت اسمعه يكول

علي
شلـون عالم ياربي

التفتت وكتله

ايلول
نعـم شكلت؟

علي
ابددد مو يمج بس فكينيي

عفتـه ورحت بسيـارتي اوف الموقف يخجل بـس ولله هوَ حلـو بس خبيث كبر اله

عفتـه ورحت راساً للقسـم الداخلي مالتنه طبيت لگيت فرس كاعده وحدهه ع المـوبايل  والله يالله خليهه خليهه خل نشـوف وين توصل

رحت توضـيت وصليت واجيت كعدت ع موبايلي

انتبهت فَرس ماصلت
فَرس صح مُحجبة بس عقلها مُتهور نوعًا ما، مو عاقلة ابد ومتعرف شنو تسوي تنجُر ورة أيّ واحد يحاجيها، بنفس الوقت طيبة وفاهية لابعد حَد، وصلاتها مو دائِمًا تصلي يوم ويوم، عَ حسب مزاجها من اذكرها تكوم تصلي ومن ماذكرها متصلي اصلاً، شكد حاولت وياها هيَ هم تحاول بس بعدين تعوفها

القهرنـي حته ما اجت وحجت ويايه بس اني متاكده سـاره شو شحاجيتلهـا عني الادبسز ادري بهيـج نماذج شونهه

تقريبا لساعه الـ ١٠ اجتي سـاره وشكلهه مدري شونه مادري ليـش بس شكيت تشتغل شغل موحلـو استغفرت ربي وكلت اني شعليـه بيهه لا اخذ ذنبها

كاعده و افكـر هذا شلـون انتقـم من عنده
افكر بكلام الشرطي وشلون كلـي هذا علي موهين
بس بسيطه يا علـي والله اني اعلمك يعني شنو واذا انت ....
انـي اعلمه بـس شلون مـادري

افكـر افكـر بسالفه وما لكيـت اي شـي حَدمـا  .. يتبـعع
رأيكم؟

________________

القلـم عنـد فرس
گاعده المغرب تقريبـاً ، وحدي محتاره شنـو اسوي وشلون دخلت روحي بهل ورطـه وليش وافقت وشسوي هسه وشون اطلع روحي من هسـالفة ؟ مادري شلون وشسوي بس المهم ماريد اثبت الساره انُ اني ماكدر اسوي شي وبنفس الوقت اني صدُگ حابتة واتمنى يكون من نصيبي

فتحت موبايلي اكلب بي لكيتهم ضايفيني بكروب بحثت بالاسماء لگيـت حساب استاذ اميـر جان حاط صوره حيل حلوه الـة صافنه بيـهة واحجي وي صـوره نفس المخبـلة

هوَ انـي ليش احس حبيتك حيـل...
ياترى هل هذا حـُب لو لا ؟
معقولة مُجرد اعجاب لو انـي صدُك حبيتك ؟

صافنـه وافكر  وماحس اله انطـيت اتصـال الـه بدون ما ادري
اهنانـه اني نثولت ذبيت موبايلي ع جربايه وكمت اكمز انوب من كثر ما جنت متوتره مادري شسوي

سـديت الاتصال بسرعه اباوع اخر ظهور كان قريبا جان
رأسًا تحول ل متصـل

عزه العزاج فرس شيويتيي انتِ
شفتـه جار الكتابه سويت خروج ومسحت التليگرام بدون ما ادري بروحي

يمـه حسيت كلبي يريد يطلع من مكانه يدُگ بسرعه

احس الفشله ماكلتني يارربي هسه انـي شسوي

توترت حيـل وخفت وتندمت شويه اجتني رسـاله من ساره

سـاره
ها بشري شصـار ماصـار

حجيتلـهه كلشي صـار وكانما داحجي وي ايلول ماجنت اعرف الشخص الي كبالي منـو

ساره
بربج ؟ طلعتي بوخه !
وانـي اسولف للكل واكلهم فرس و فرس وينـج شو بس تهمبليـن يمي

توترت من كالت هيـج و راسا و بـ اندفاع كلتلهه

فرس
شبيـج بابا ترا اني مستحيـل اتنـازل بس بنفس الوقت كُلش استحيت يُمة

ساره
ههههههههه يعني تقنعيني انتِ بهـاي فهاوتج تجيبين راس استاذ اميـر

فرس
اي اقتنعـي شوفي اذا ما جبت راسـه وبساعتها راح اكلـج ها شكتلج يا ساره

سـاره
ماعتقد والله ع هذا ثولج راح تجيبين شـي ولج بابا انتِ والله عندج حظ بس ماتعرفـين شلون تستغلي لو اني عندي جمالج ولبسـج وشي واستاذ اميـر هيج والله اجيبه بسرعه انتي كلشي متوفر بيـج ليش مثلا ماتجيبين راسـه بس انتي ثوله

صافنـه ع حجيهه واذكرته صـدُك هوَ شخصيـه وحلو ومن كل الجوانب وفوكاهه احس من ينذكر اسمه نبض كلبي يصير موطبيعي احس روحي وكعت بحبـه مو جذب

فرس
واللـه ياساره اذا ما اخلي يحبني شوفي الا اخلي بنات الكليه كلهن يغارن مني

سـاره
اذا بيج خيـر سويهه يله

جان عندي هاجس انُ انافس ساره و اثبتلهه انُ اني اكدر اسوي اي شـي كُله هذا بسبب الغرور ! اي اني جنت حيـل مغروره وميبسـه راسي و الي اكوله احب يصيريلي مهما كان وبدون ما احسب اي حسـاب للنتائج

شويـه واجتي ايلول احس حيٌل مشتاقتلهه ردت اروح بس هي ولا تباوعلي ضجت منهـا حيـل وعقتهه

اجتي ساره بوقت متاخر وحالهه مدري شلونه سالتـهه وين جنتي جان جوابهه نشتغل معجنات وحيل تعبانه

خطيه حيٌل انقهرت عليـهه شلون هيجي دتتعب

ساره
تدرين اني حته ملابس ماعندي يعني اني ماعرف شنو البس باجر حسبالي اليوم اكو شغل واشتري ملابس

فرس
عادي اخذي مني

ساره
والله صدُك

ابتسمتلهه وهي فرحانه كلـت خطيه خل تاخذ كم لبسه وتخليهن الـهه فردور

بـليل اجانه النت لان جان مقطوع ساره كالتلي يلـه بسرعه نزلي التليكـرام

نزلت التليكـرام احس مو مجرد لعبه جاي نلعبهـا شعوري مستحيـل يتوصف

نزل التليگرام سجلت دخول وفتحـنا جان اشوف استاذ اميـر داز رساله يمه احس كلبـي طار ضحكت وابتسمت ابتسامه عريضه

ساره
شو انتِ  مصدكه اللعبه بس لا حبيتي

فرس
يجوز مـادري بس داحس بشعور يجنن اول مـره احسه

ساره
ديري بالج تتامليـن زايد

فرس
شو اسكتي خل نشوف شكاتب

نفتحت الرسـاله وجان بيهه

اميـر
نعم ؟

حتاريت ش اجاوب عليٌه احس الثول صدك استولانـي

ساره
باعي شتكوليله كوليله استاذ جنت اشوف بصورتك وبالخطا دكيت اسفه بس انسطرت من جمالك ها هههههههههههه

عززززه شبيـج ساررره شنو تخبلت واكتبله هيج يمه لو اموت هسه شنو ماعندي كرامه داحس روحي دازحف الـه

شفنا متصـل احس احوالي تخربطت راسا كتلهه

اني شسويت ماريددد بعد راح امسح المحادثه وبـس والله راح اموتتت من الخجل

سـاره
والله عرفتج فاهيه شبيج انسحبتي من اول شي يعني مثلا تردين تبيعين رسميات براسـه لج بابا مستحيل يطيج وجه اذا تحجين ويا برسميه بس تدرين شنو والله بيج بله هوه بعمره وبحياتـه ما رد ع وحده مادري شعجب مع انج بس اتصلتي رد تدريـن حته اليوم بالمحاضره انتبهت شلـون يباوعلج احس نضراته نضرات حب حسبالك حب من اول نضـره ههههههههههه

من كالتلي هيـج راسا ابتسمت وكتلهه

فرس
كولي والله؟

سـاره
صدكي يعني السالفه سهله هههههههههه يلا ابدي اشتغلي اكتبي نفس ماكتلج يله

فرس
لا ساره لا عيب هسه يكول هاي ميته عليه

ساره
حبي فرس تره احنه مو قصص وروايات و تردين البطل يموت ع البطله بثكلهه تره احنه بالواقع جاي تفهمين شنو وبعدين هسه اني مداكلج اغري ولاشي بس داكلج صيري ذكيه

فرس
عزاااا ساره انتِ شتحجين شنوووو اغري

ساره
لا انتِ وينج وين هاي سوالف مدبريهه ادري بيـج بس اكول يعني اذا حسبالج انُ يموت ع ثگلج ومادري شنـو ف هاي بس بالمسلسلات والقصص ترا مستحيـل هسه واحد مثل امير يحبج بدون ما انتِ تضحين

فرس
يعني شلون اضحيـله

ساره
كلشي بالمعقول هسه اكتبي هذا الكلام ولا اكلج جيبي موبايلج

اخذت منـي موبايلي وكتبت
استاذ اعتـذر بس والله جنت اشوف صورتك وطولت بيهه لان ماشاء الله عليك حيـل حلو و اتصلت بالغلط ههههههه

فرس
لا ساره لا موهيج ماحس مقتنعه ابـدد

شو دروحـي لعد شلون تجيبيه متكوليلي

دزت الرسـاله وكالتلي يلا راويني شغلج خل نشوف شسويـن

هيه خلت وكامت جان متصـل بس ماشاف الرساله ترددت حيل وجان عندي شعور بـشع انُ اعوف الرساله غمضت عيوني وافكـر

مستحيـل اسويهه اني غير! تربيتي كلشي غيـر مستحيل انزل روحي لهل مستوى اني بعمري وبحياتي ما دازه رساله ل ولد ليش هيج والله ايش علمود رهان لا مستحيـل

فتحت عيوني واريد امسح الرسـاله شفته شايـف الرساله احس الگاع انشگت وبلعتني ماعرف شسوي شگد ماحس بشعور حلـو تجاهه بنفس الوقت احس بقرافه من روحي

تورطت حيـل تورطت
من جهه غروري و ماريد ابين يم ساره انو اني ماكدر
ومن جهه كرامتي
ومن جهه انجذابي لاميـر

اميـر
شكراً الـج ، ولا يهمج عزيزتي ..

جان كاتب هاي الرساله اني ضليت صافنه شنـو ارد عليّ اجتي ساره وكالتلي

سـاره
والله حسبالي انتِ كفو طلعتي بوخه شبيج افتحي موضوع ويـا واحجي كوليله ع الشعر مال اليوم مدري شنو شبيج يحضي

فرس
ءاااا انتتي شبيج اصلا اني عرف شصرف بس روحي من يمي

راحت هيه واني اكتب بس احس اديه ترجف

فرس
استـاذ اليوم الشعر ماكدرت انقله منك وانت كلتلي خليهه بعديـن تكدر تكوله الـي

راساً شاف المحادثه يعني جان بيهه ماطالع
شفتـه دزلي مقطع صوتي هنـا احس كلبي طارررر دحست راسي بالفراش وفرحانـه حيل جنت
اول مـره احس بهل احساس و وي منو؟ وين استاذ امير الي كُل البنات معجبات بيَ
حسيت روحي شي مميز وبديت اتخيل حياتي الكاملـه ويا ونسيت كلشي وماحسبت حساب لاي شي !

اميـر
‏أيُجدي فيك وجدي عليك
‏وكوني بعيداً عن وجنتيك
‏أنام حزيناً وحيداً كسيراً
‏وكُل دوائي على راحتيك؟
‏أم يُجدي فيك قدومي إليك
‏برُوحي وكُلي اسيراً لديك..
‏اما زال حُبي عظيماً رقيقاً
‏يطال النجوم في ناظريك؟
‏سواءٌ ترحلُ ام أنت باقٍ
‏فإني أُحبكِ في حالتيك .

دزهة فويس، حجـاهه ويه بضحكه خفيفه بالنهايه احس كلبـي طار بوقتهه حسيته جاي يكلي فرس هذا الـج كعدت اكتب بي بالدفتر الي خصصتـه لاشعـاره عدت الفويس الصوتي اكثر من مره بحـه صوته وجماله اخذوني لغير عالم

ضحكت من كلبي وحيل فرحت كتبتلـه
كُلش شكرا الك استاذ حيل حلو الشعـر

راسا رد عليّ وهوه يكلي

اميـر
تدلليـن

ماعرفت شنـو ارد سكتت شوي شفته جار الكتابه انـي هنا نتهيت شفته دزلي رساله وهوه يكلـي

اميـر
اسمج حيل مُميز
وبنفس الوقت حيـل حلو
فرس .. حلو حيـل الاسم

احسه انطانـي مجال وخلانـي اجرئ واسوي الكالتـه ساره واصـير جريئه ! مع انُ كلامه جان حيل عادي بس اني جنت منتضره اشاره حته اعرف كلام ساره صح من كالت طول المحاضره يباوعلج
الحجي الي احجـي هوه حجي كلبي مستحيـل فكرت بيوم انو اني احجي هيج وي ولد بس بنفس الوقت احس صارلي فد شـي غريب حيـل شدنـي اله حيـل

مو نفـس جمالك استـاذ اميـر
بابا سمانـي هل اسم لان جان يحب الخيول

اميـر
اي كلتيلي اختيـار مُمَيز 
ان شـاء الله مرتاحـه بالمسكن ؟

عزه عزه ديسالنـي عن المسكن يارررربي معقوله معقوله اني الجاي اشوفه يعني هوه مهتم بيـه يمه كلبي راساا رديت عليـه وكلتله

ليـش يهمك ان جنت مرتاحه او لا؟

مـادري شنو الجرئه الي اجتني بوقتـهه وخلتني هيج اسوي بـس بساعتها ماعرف اعبـر عن الي صار غيـر

انـي بنوعي فاهية و خجوله بنفس الوقت عندي شي اسمه حدود وابداً ما اجاوزهن ، امي و ابويـه متوفين ثنينهم عشت وتربيت انـي و اخويه وحدنه

اخويه من النوع الصعب حـيل و عصبي ومحافظ جداً جان مانعني من هواي شغلات وبعمري ماحسيت ب احساس الاخوه ويـا

من بعدها اتزوج ومرتة جانت كُلش مكروهة وتحيلة علية هواي ، كاعديـن اني ويـاهُم ب بيتنه اخويه مُحلل و جان كلش محافظ عليه يعني ممنوع البس ع كيفي ممنوع اطلع ممنوعه هواي سوالف جانت عليـه ، هواي مرات افتقد اهلي بسبب هاي سوالف لان اصعب شعور ع الانسـان ممكن يمـر بي يتحمل ويسكت لان هوه لا حول ولا قوه شنو ممكن اسوي اتمرد عليه احتمـال حته يضربني ف جنت اجرع السم و اسكت

مرينه بكل الضروف وحدنه لان لا عمام ولا خوال وكفت ويـانه

عدينا اصعب الايام بس هوَ جان يمنع روحه من اي شي في سبيـل يوفر النـه الي نحتاجه  نجح من سادس بمعدل حلو  وصـار محلل وبعدهه فتح عيادتـه الخاصه

الحنان اني ماضكته ولا عرفتـه شنو الي لازم يجيني من الاهل

بيوم ماعرف قبـولي بالجنوب ماقبل بـس بحكم انُ هوه حيل يحب ايلول ويعتبرهه اخته مثلي مثلـهه وافق لان حيل حرمصت الـه هي و ابـوهه بيومهه من اجه متردد ويكول شلون وافقـت بس هوَ حيل نحرج من ابو ايلول

اذكر بيـومهه طلعنا اني و ايلول نشتري ملابـس انطاني فلوس هوه اشتريت كُل الي بخاطري اني ذوقي جدا مختلف و مبتعد عن الفساتين الي دائما البـسهم حبيت اعيش حيـاتي وماحرم روحي من شي اخويه ومو موجود شراح يصيـر مثلا واني ماماخذه اشياء مو مستتوره جانت اغلبه لبس رسمي ومرتب ومستور ،بس بحريـة وبذوق كُلش حلو ..

ماجنت احسب حسـاب لاي احد ماحسبت حسـاب لاخويه الي حافظ عليه هوااي وبلكوه خلاني اجي هنـا  ماجنت احسب حسـاب انُ اني ١٩ سنه حافضت ع روحي وماخليت نفسي انمس بكلمـه جان امير اول ولد احجـي ويـا وجنت بعدم تفكير اسوي كلشي

امـير
انتي طالبتي ف اكيـد لازم أمن راحتـج

فرس
اي استاذ حيـل مرتاحـه اني وشكرا لسؤالك

نهه الحديث بيناتنـه ب انو دزلي ملصق ضليت اعيد بمحادثتنـه اكثر من مـره الفرحه الي جانت عندي موطبيعيه نمت واني اتحلم ومسويه حياه كامله وي اميـر

بعمري و بحياتي ولد ماهتم بيه هيـج اني ما لاكيت الاهتمام من اي شخـص يجي امير يهتم بيه جانت عبـاره عن انجاززز

اليـوم الثاني كعدنه من نوم بدلنه ورحنـه للجامعه كملنـه اول محاضـره انتبهت ايلول ماكو جرتنـي ساره وهي تكلي

ساره
بـاعي ايلول ويامن واگفه شوفي صديقتج ...يتبععع توقعاتكم؟

____________

حاولوا وي سجـاد يحجي بالعنـف وماجانوا ينطون مجـال لَ اميـر و غيث حته يتفاهمون ويـا بما انُ هل ثنين اعقـل ثنين بالبيـت
. وجهوا السلاح نحوه ورادوا يخوفونـة وهوه جـان ساكت ومايحجـي اي شي

شوية و اچـه شيـخ حيل معروف اسمـه الشيخ مالك وگال ل شيـخ جبر انُ آل دحام راح يرجعـون من الدفـن وماناوييـن الخيـر ابد
جبـر استسلم وماعرف شنـو يتصرف
وصلت بي المرحلـه يكتل سجاد لو مـا امه تبجي وتتوسل الـهم وتركع يم رجلين جبر حته يعوفه ..

جبـر
هايهيه شيخ  نگعـد ونشوف الي يردونه وانه مستعد لاي شي

راح الشيـخ وجبر جـان يدگ ويلطم نفس النسوان ويصيح
انه اگعد بديوان وي هذا ال من بزري ويشرط عليه !
انـه اطخ راسي واروحله مشيـه انه انذل لا يابوي ليـش ليشش من وره الزعاطيطط
ولك اني لجدة الله يرحمة ما انحنيت وهو جان نفس اخوي
بس شفتة يريد يقودني رحت عنة
نوب اخلي المن بزر بزرة يشرط عليّ

محد جان راضي انُ يرحـون مشيه ل آل دحـام وخصوصا زعيـم الي جان متخبـل من السالفـة ورايح گوه عليـه

راحـوا ل آل دحـام بعد ما أيسـوا من انُ سجاد يحجي شـي

زعيـم
اخ شيخخ اخخ كونه احنه نذل روحنه لهذاا

جبـر
امشي ماعاش الي يذلنه بويه شنسوي بنهايه سجاد ابنه شنسويله ماتكلي عبن حضنا مايل هَيج الدهر سوه بينه

زعيم
والله شـيخ لو بيدي اكتله وارتاح منـه ع الي سوى بس ماكدر ماكدر مثل اخوي هذا

حسـين
والله بويه احط چيله براسه ونخلص هسه اذا تريد

جبـر
حسين امشي واسكت احنه رايحين رايحين وماجابته امه الي يذلنـه

محـد جان مقتنع للروحه ابداً ، الناس هي تمشي عليهم مو همه يمشون ع ناس ، ويمشون ع منو؟ ع ال دحـام ! شكد الوكت دوار لعـد

وصلـوا همه وشيوخ هـواي وياهم وجان من ضمنهم الوسيط الشيـخ مالك الي اجاهم

سلموا وجـان مروان نفس الاسد الجوعان ومنتظـر فريستـه الحقد مالـي عيونه يباوع بين الموجوديـن ويريد يشوف فريستـه سجاد حته يهـجم عليّ ، جـان متاكد انُ جبر هوَ الي مودي سجـاد حته يكتل اخو عباس وينتقم منـهم ، الشي الي خلـه مروان يثور ويريد ينتقـم من كُل هل بيـت ب شتـى الطُرق

بـده الحجي بيناتهم حدمـا وصلوا للمووضوع ...

الشـيخ مالك
بويـة احنه مانريد دم بيناتكم و انتم جدكم واحـد وجدكم يحب اولاده هواي مايريد احفـاده يتكاتلون بينتهم هوه بگبـره مايرضه ف نشوف النـه اسلم حل وناخذه شكلت بويه مروان

مـروان
حل ايـش شيخ حل ايـش !!!
انـه ارررريـد سجاااد اريد اكتله شلووون ما كتل عباس اريد اكتله ولو بيدي اكتلهم كلهم لان انه متاكد هوَ الي دزه ع عباسس

زعيـم
احترررم نفسككك واعرف شلون تحجي احنه كاعدين ب ديوانك صير خوش رجال ولا تحاول تهينة واحنه ب بيتك، ماعاش الي يهينة والله

جبـر لزم ايد زعيم حتـه يسكت وگال

جبـر
انه ما مضطر ابرر الك وكاعد اتحچه كبال الناس و احلفلك بميت عباس و بميت حسين احنه مانعرف اصلا السالفه موش انه الاخلي ولد مني يكتله بني ادم ، نسأله الولد مدري شبي ومياكول شنـو ف انه ماريد اعرض السالفه اكثرر الي تكوله احنه حاضرين اله من المليون لل ١٠٠ مليـون شنو الي تريده

مروان
الفلوس ماترجع الميت ما ترجع اخوي الي مـات انه اريد سجاد اكتله يله ارتاح

صار نـقاش حاد بيناتهم وماجان اكو اقتراح من مروان شي غير قتل سجاد،  حدما كال شيخ مالك

-شيخ مروان عله حسابي انه اجيتك ومن مكان بعيد هيج تردني بويه خل نحلهه بشي اسلم ما عدك شي اسلم من هل قرار ، ما نريد مجاتيل بعد بويه والي تريده يصير مهما جان بس مو جتل

صفن مروان بوجهه و دار وجهه ل جبـر يحجي بكلبه وعيونه تفسر كلشي

مرورن
اريد اذلهم اريدد اخلي راسهم بالگاع اريدهم مايراوون واحد وجهك بعد الي يصير وياهم

اخذ نفس وگال

مروان
اريد فصليـه و ٢٠٠ مليـون

شيخ مالك
بارك الله بيكك شيخ والي تريده يصيـر بس مانريد جَتل شكلت شيخ

هنانـة شيخ جبر والي ويـا صاروا بحالة صدمة، فصلية !
بيت جبر ينطون بناتهُم فصلية !!
ماكدررا يحجون بس الصدمة واضحة عليهُم وهم شيخ مالك جاي يحجي

مروان
بـس انه ماخلصت شيـخ انه بهيج شكون سويتتت! اخوي ينام بكبره والكاتله يفرفر بكيفـه ومن دون عقاب ولا حساب

جبـر
انت طلبت الي تريده شنو الي تريده بعد

مروان
السجـن ! انه راح ارفع دعوه عليّ ويسجنوا لسجاد خلي يتعذببب مو بس اخوييي جوه التراببب

زعيم
لو تحلهه عشائريه لو قانونيه شهل تملعب  ؟ تريددد تحلهه قانونيه روححح بس لا تطلب منه فصليه و ٢٠٠ مليون

مـروان
ال عندي حجيتتتته انه ما عندي غير حجي لو تردون اكتله و ارتاحح لو تردون تسون هذا ، ينسجن ابنكم احسن مما يموت وحجيي خلص و الكم مهلـه يوم واحد بس اليـوم الساعه بـ ٤ باجر الـساعه بالـ ٤ لو انتم الراضين بالكلته لو ناويـن يصير دم
هذا الي عندي شيوخنـه اترخص منكم انه

خلـه وراح مروان وصارت الضجـه

زعيم
احنه ال جبـر نطي بناتنه فصليه اححححنه

شيخ مالك
ماعدكم غير خيار ابنكم تردوووا يموت !! 

نهوا الحديث ورجعـوا للبيت والكل محتار ومايعرف شيسوي طبوا للديوان وكاموا يصايحون

حسين
والله اكتله بيدي ولا هل مذله الي جاي نعيشششهه بسبب هل عار

علي
بويٌه انت شجااااي تحجييي شجاي تحجي ارضوا هايهيه ارضوا بالقرار ، ابوي يحجي وكانما سجاااد حچاره وعادي نذبهه

حسين
ولككك جابلنا العار وماتريدنه نتبره منه يكتلوا ونخلصصص

علي
بوووويه هذااا اخويي اخوييي تعرف شنوو اخويي ، انت ماعرف شنووو الي جاي تحجي جدي الفلوس انه ادبـرهن و الفصليه ماتطلع بت من بنات عمامي تطلع روان اختي و سجاد ينسجن احسن ما يموتت ينسجن ويطلع شكم سنه و انه اخلي ب احسن مكان افضل من انُ يموتت

صـارت مُشادات كلامية بيناتهُم
وصافنين شلون علي يكدر يضحي ب لبوتة روان،
لبوة( أُنثى الأسـد )، علاقتهُم مُتماسِكة وقوية لأبعَد حد ..

علي ساكت وهوَ يكول - اني اعرف الجاي اسوي شنـو-

علي
احنة عدنة خيارين
والخيارين بيهن تضحية
واحد تضحيتة موت يعني بعد ماكو رجعة
واحد تضحيتة بيها رجعة
روان انة اعرفها انة مربيها واعرف شلون راح تتعامل وياهُم
هاي لبوتي
ولا تنـسون هُمة اهلنا ماراح يأذوها
ولو تعرضت لهذا الشي ف انة موجود
ما اخليها لحظة تتأذة
وهم هيَ ماراح تطول يمهم
وهذا من اساس روحتها ..

سكت الكل بغضب سحب نفس زعيم وكال
زعيم
نفس ما كال علي هايهيه سجاد يضل ابن عمنه ومن دمنه ولحمنه صحيح هوَ صعب علينة بنية من بناتنة تطلع بس مانكدر نعارض الي صار قدر الله كاتبة علينة
بس اخ ياسجاد اخ لو تحجي

حسين
ولكم كسررر ضهري كسر ضهري شبيدي اني ماتكلولي

جبر
صارت بعد ي حسين صارت هايهية نرضه ب الي صار بس الفصليه اخ ولكم انه جبر بناتي اطيهن فصليات

علي
جدي بنات عمامي مالهن دخل انتم مالكم دخل احنه الي نتحمل المسؤليـه مو هينه عندي ابد بس روان تروح وهي كدهم وانت تعرفهه شني روان

حسين
ولكك بتي ستوهه عمرهه ١٧ سنه ويننن تروح

علي
بووويه انت لا تخبلني تريد تكتل سجاددد جا بويه شنسوييي ، ماراح توصل بيهم يكتلون روان انه اختي مو هينه عليـه والله مو هينه و اخوي هم مو هين عليه شنسوي كلي شنسوي بويه

حسين
والله هسه اكتله بيدي اروح اطيهميا يكتلونه

علي
بوووويه انت شجاي تحجي شجااي تحجي ابوي يحط منا يرد منا

جبـر
كككافي اسكتووووا انتممم

زعيم
شيخ انت شتكول

جبـر
انة اكول .....يتبع توقعاتكم؟
* للمعلومة هذي الحالات بالجنوب موجودة وبشكِل جبير
صحيح حاليًا بشكِل اقل بس سابقًا كانت منتشرة بشكل اكبر.
_____________________
سبب
يـوم من الايام جـانت الساعه بـ ٣ الفجـر جنت كاعده اقره ع اليوتيوب ع استـاذ الرياضيـات
وجـدي جان نايم يمي لان مايصير اخذ الموبايل و اختـلي بي حسـست بجدي موطبيعي كلساع يتفزقز عرگـان اخر شي كالي كوميني بويـه اروح للتواليت

سَبب
يلا جدي كوم

باوعلـي وكالي
الله يرضه عليج بنيتي ويسويلج شكو شي تردي

كومتـه وحطيته بكرسيـه غسلتله وكملت طلعته نيمته بفراشـه ، جان هذا الشي سهل عليه لان تعودت عليه كلش من زمـان ومحد مداري مثلـي

اجيت اريد اقره وهوه بفراشـه يباوعلي بنضـرات غريبه حيـل كل ما ارفـع راسي الگا يباوعـلي وجانت نضراته تخجلنـي الي يخليني ادنگ راسـي واني ميته من الخجـل

جان مبين ع وجهه مـادري شبي بس نفس التعبـان

لحدمـا سمعت صوته وهوه يكلي

سَبب تعـاي بحضنـي

استغربت من حجيـه!
جدي بعمره وبحياتي ما حاضني ولا بايسني مجرد اني ابوسه من ايده وبـس

كـالي عوفي الكتاب وتعـاي شويه

كمت بس انـي حيل متوتره و خجلانه لان اول مره جدي يكلي عيج

اجيت يمه مد ايده نمت عليهه وضـل يباوعلي اني ضليت صافنه شبي جدي اليوم

كالي وهوه يدقق ب ملامح وجهي

بويه ديري بالج عله روحج زين انتِ عايشه بين ذيابه ماريدج تنزلين راسنه ابد اريدج ترفعينه انه ما دايم الج يوم يومين اروح مادري شوكت بس انه اذا اموت ما راح ارتاح عليج ، باجر اوصيهم عليج واحلفهم واشكل ذمتهم اذا مدوا ايدهم عليج لو منعوج من دراستج

من كال هيج كلبي انغز راسا كتله

اسم الله عليك جدي ليش تحجي هيـج انه منو الي غيرك جدي

كالي بنبره حنينه ومكسوره
جدي محد يدوم لاحد هي هاي الدنيا وهسه يابويه نامي ارتاحي

باسني من راسي وغمض عيونه كبالي واني نايمه ع ايده دموعي نزلن بشكل لا ارادي كلبي وجعني حيـل جدي دومه يحجي هيـج وياي بس مايخذني بحضنه ويبوسني ابد بست ايده شفت الابتسامه ع وجهه وهوه مغمض ضليت كاعده وافكر اذا جدي صارله شي والله افضل اموت منو الي بعد انطب بالزبل

وره ساعه تقريبـا كمت من يمه كعدت اقره وبالي مشوش باوعتله شفتـه شخر بس شخره مو عاديه مو نفس كل مره نعلت الشيطـان وكلت ماكو شي اني اوهوس

لميت كتبي ورحت طلعت خبزت ورحت لفراشي نايمه انه بطبعي نومي خفيف بسرعه اكعد الا هل يوم حسيت نفس الحايط ونايـم عليه كعدت ع صوت صرخه حيـل عاليه فزيت مخترعه واصيح جدددي جددي واني ب امل جدي مابي شي ويكون مجرد حلم

كمت مذهوله اشوف لبنى يمي وتبجي وتكلي جدو مات

رحت بسرعه وانه اركض اشوف جدي محطوط ب تابوت والكل داير مادايره تبجي

شنو يمته شبسرعه جابوا التابوت من يمته!

اني بعلم بحلم شجاي يصيـر ياررررربي !

اجيت وانه نفس المخبله ماعرف شنو جاي يصيـر بس الي اعرفه انو جدي ما لازم يموت

اجيت ع تابوته وانه ابجي واصرخ وين عفتني جدي هوَ انت الوحيد الي بهاي الدنيا وياي شون بيه اني هايهيهه متت بعدك متتت

جـان هل يوم اسوء يوم يمر عليه اخذوا جدي واخذوا روحي ويـا ضليت ابجي عليه نفس الطفله ، مابجيت عله امي بيوم نفس ما بجيت عليّ

ظلمت الدنيـا بوجهي وانتهت حيٌاتي يجوز جنت شويه يحسبولي حساب هسه ابد هايهيه انتهى كلشي

حسيت روحي اريد ابقه وحدي اريد استوعب الي صار الي كاعده بالغرفه وابجي بكل قوتي اجت مرت ابوي وهي تكلي

يله جدج وراح ارد اشوف منو يوكف بوجهنه بعد يلا كومي تنضيفن كلشي اريد البيت يلمع ماريد النساوين تشوف كاسه ماي توكع فهمتي يله كومي شكو ماعون يوكع تغسلي اريد الييت يلهث لا والله اسودلج عيشتج يا سبب

بس عوفيني خاله الله يخليج والله دايخه حبابه احس اذا اكومن اوكع هسه

اجت يمي وهي تجرني من ايدي وتصيح
كومي ولج ادبسززز ... هي مال تمجعص يله كومي بسرعه تدلل الاميره كومي و والله اذا لكيت شي بالييت يله

جرتني حيـل احس ايدي نخلعت باوعتلهه واني متهستره بالبجي وكتلهه

كافي كافي الله يخليججج كافي ماعدج رحمممه انتِ ماعدج عوفيينييي جدي ستوه رايح والله رجليه ماجاي يشلني اكوم والله

وخرت ايدي منهه حيل لان ايدي احس راحت اشو هاي رجعت لوره وكام تصـيح حيل بدون ماتحسب حساب انو ناس عدنه بدون ماتحسب حساب لجدي الي ستوه ميت

اجو للغرفه بسرعه اولاد عمي و اخواني هي كام تبجي وتصيح ولكم ضربتني

اريد احجي ويـاهم مانطوني مجال بعد كمت ماعرف الضرب منين يجيني الي يغلط عليه والي يغلط ع جدي ويصيح ما نطاهه مجال غير هوَ

همه يضربون واني ابجي حيـلللل مو من الوجع مال الضرب لا احسس جسمي خدران يتحمل اي شي ضليتتت ابجي عله واقعي وعله حياتي الجحيم الي راح تصـير الي ابجي ع جدي العافني وحدي بين هل ذئاب وراح

اخوي حسن موتني الضرب صار كله بوجهي احس وجهي ورم

حسن
يله كومي ادبسزز ساقطه تنضفين كل البيت و والله اذا بنيه ساعدتج اله اكسرررر رجليهه ولا وحده تساعدج بس انتِ عليج كلششي وغصبا ما عليج يله ادبسزززز

حجت مرت ابوي وتكله
لا يمـه خلي البنات تساعذهه وين تكدر حته مو نضيفه هيه

حسن
لا وحق الله اذا شفت وحده وياهه الا اكسر رجليهه بس هي تنضف وغصبا عليهه وخل اشوف ماتسوي وج وحق الله اعلكج بالمروحـه واشبعج ضرب لمن تموتين وحته ما ادفنج اشمرج للجلاب اخليهن ياكلنج والله العضيم

كول اخوي الثاني
رسول
انه شلون متحاميلهه اطلع نار كلبي بيهه والله الادبسـز ام المصايب الي من اجت ماشفنه غير المصايب منهه ومن راسهه حقيره

ضربني برجله حيـل ع كليتي حسيت كليتي راحت ، كمت اشهك بالبجي وخايفه من اذكر كلام حسن من يكلي اشمرج للجلاب اخاف تلقائيا احس يسوهه والله

عاطوا بيه انـُ اكوم كمت بالكوه من الم جسمي طلعوا ومرت ابوي تكلي
يله ماريد. شي بالبيت واكع اريد كلشي يلمع وتصبين جاي للنسوان وتجين واذا وحده كالت ليش وجهج هيج اكلهن عاندت اخوانهه وضربوهه واذا شفتج تنفستي بحرف غير الي اكوله اكسر راسجج خوششش

سكتت واني اهز راسي الـهه

كمت والكل يباوع الي وجهي مبين الضرب علي دشداشتي تسحل عليه تعثرت بيهه و دموعي تنـزل بين الناس

تمنيت بهاي اللحظة اموت، تمنيت اني انحط بمكان جدي مو هوَ، تمنيت ماكوم وماشوف ردة فعل الناس، محد استرجة يحجي بس الكُل نظراتة شكل، الي مستعطف، والي ميكدر يحجي، والي متقزز

احاول اصير قويه احاول ما ابجي ماكدر الدموع تنـزل من عيوني والكل يباوعلي

اجيت لكيت المطبخ مكلوب كلاب كله اماعين وصواني وكدوره مال الطبـخ همه جايبين طباخ يطبـخ الهم همزين جان هم طاح براسي الطبـخ

الماعين جانن حيـل هواي مو مال اسويهن وحدي اباوع نسوان اخواني بنات عمي كلهن كاعدات ويتمضحكن الي حاطه حمره وجايه الي كاشخه وجايه والي ثنين كاعدات سوه ويضحكن

دموعي تنـزل بحركه وصوت مسموع ماهتميت لاي احد ابجي و اغسل بالمواعين

لا عمه حنت عليه لا مرت عم لا عم لا احد كلهه تباوعلي وساكتين

اجه ابوي شافنـي ولا حجه شي ولا كال المهم يجيب بالحم ويخلي الناس تاكل هايهيه حته اضن محد اذكره وقرالـه الفاتحه

توهدنت حيل صرت ماهتم للوجع الي احس بي اباوع بالمراويه وجهي يخوف عيوني مورمـه وجهي كله خرايط صاير دموعي تنزل واشتغل بال ٣ ساعات متواصله اني بالمطبـخ بس انضفه يجون بكل بروده ياكلون ويطشرون ويحطون الماعين ويرحون واني نفس الخدمـه

صارت نار بكلبي جبيره كرهتم كلهم حسيت اريد انتقم منهم بطريقه بشعه نفس الي سووا وياي بساعتها لو احد منطيني فد شي وكايلي بهذا تكتليهم اسويهه

اجـاني طفل كلي خاله اريد ماي درت وجهي اله ماحس الا صرخ وكالي

يمممممه وحششش وحش بااااع وجهه

راح طب للصاله ويصيح هيـج بنات عمي كاعدات بالمطبخ ماتن ضحك اني درت وجهي والدموع تنزل منـي واشهك بالبجي
هذا الموقف ابد ما انسى وابد ما انسى شكد أثر على حياتي
وجهي مزورگ واحمر من الضرب
عيني جواهة ازرگ ومورم، ضاربيني وكإنما يضربون حيوان
حَتى الحيوان مايكدرون يأذونة هلگد

محتارة شسوي، اموت، احرك روحي شنو الي اسوي شنوو
اريد شي يخلصني من حياتي لان احسني عبئ على هاي الدنيا

سمعت صوت مرت ابوي تكلي جيبي جاي صبيت الجـاي اريد اخذه اسمع بت عمي تكلي

شبيج حته بملابسج مبهذلة وكاسره وجوهنه دلبسي عدل دشداشتج تسحل وراج جنج مره حبله

ماحجيت شي ويـاهه لان حجيهه صـح طبيت واني اقدم الجاي للنسوان وكلهه تباوعلي وتكلي يااا شبيـج خاله واني ساكته حدما مرت ابوي كالت

والله شكللجن بت عرمة وكحه ماتكعد راحه تنطنط بوجهي ومساع حته ضربتني وسمعوها اخوانها واجو والله اني ولا ارضه عليهه تتاذه وحاولت ويـاهم حته ضربه طاحت بيهه في سبيل ماتتاذه بس شسوي هي جنت عله روحهه

وحده من نسوان كالت
يا خاله شمالج جا هي بالعكس تتعدين ع مرت ابوج هجي وتضربيهه عمي احنه بيا وكت شنو من بناويت يمه اسم الله انه بتي ملصومه ع حكلهه اكلهه كومي تكوم اكلهه اكعدي تكعد

الثانيه كالت
تربت بدون ام لا تربية ولاشي بس موهيج تتعدين ع مرت ابوج

مرت ابوي كالت
وعاد اني شلون والله ابديهه ع بنيتي هاي احجن وياهه هسه هي ضاربتني واني اخاف عليهه اكلهه يمه اعتني بنفسج اجيبلهه الدشدايش الملابس الحلوه البت كارهتنه ولا تقبل هسه حته والله استحي شتكولون ما نجيبلهه ملابس وضاله بهاي ملابسـهه

اباوع لمرت ابوي ثوبهه ارقى شي الذهب يلمع بيهه من فوك ليجوه مكعده لبنى يمهه ولبنى لابسه احلى شي و اني نفس الخدامـه؟ هاي بيت شيخ ويحل مصايب ناس وبيته هيج ! لهدرجه هاي الناس مضاهرهه وهي بـس

مشيت بسرعه من يمهن وهنه يحجن عليه واني ما براسي غير الشر

عندي كرامة مُستحيل احد يتصورها
بس اكدر احجي؟
يذبحوني بدون رّف جفِن
يموتوني ع ايدهُم بس ب اشنع الطُرق
ياريت لو اموت نفسي اني بيدي احسن الي

شفت النار الي ع الطباخ مفتوحه حسيت روحي اريد اروح للطباخ واحرك روحـي وارتاح من كُل الي جاي يصيـر ... يتبععع توقعاتكم

_____________—
اليـوم الثاني كعدنه من نوم بدلنه ورحنـه للجامعه كملنـه اول محاضـره انتبهت ايلول ماكو جرتنـي ساره وهي تكلي

ساره
بـاعي ايلول ويامن واگفه شوفي صديقتج الي تكولين عنهه حبابه

باوعت ايلول واكفـه يم استاذ اميـر يم القاعه الثانيه الي عليهه جان استاذ اميـر

اي يعني واذا ساره غير هوَ استاذ ؟

ساره
بس باعي شون يحجي وياهه باعي عيون الطلاب عليهم شلون هي ساكته وهوه يحجي ١٠٠ كلمه وبعادته استاذ امير مايحجي هواي وانتِ شفتي

باوعت يحجي وياهه بتركيـز واهتمام وهيَ ابد متحجي وساكتة الشيـطان تربع براسي ....

ساره
والله هاي رادت تغثـج وهيج سوت والله العضيم ولا شنو ممكن وتروح وتحجي ويـا هيج وكبال الكل بس شوفي شون تحجي ويا وشكد قريبين من بعض شوفي

احس مادري شصـارلي معقوله ايلول تسويهه ؟ يعني تريد تغثني هيج تسوي ! ماكو غير احتمال وإلا ليش واكفة يمة اصلاً !!
ادري ب ايلول اذا رادت تنتقم ف تنتقم ب اعز شي بس اني شسويتلهه وهيج تسوي !

ساره
واني اكول تكلـج بالمحاضره مال اول يوم اولت البارحه عوفي و جذاب و هسه تلكينه مزوج وعده اطفال اثاريهه هي حاطه عينهه عليّ بس والله عفيه عليهه جايبته للدرب باعي شلون يحجي ويـاهه وكانمـا حبيبتـه ، بس والله تدرين ايلول حيل حلوه وشوفي ملابسهه شون جذابه شلون ماتردينه يموت عليهه

باوعت ل ايلول واني كلي حقد
باوعت لاتجاهي راسا لزمت ايد ساره ومشينـه

ساره ايلول وين جانت المحاضره الاولى مجانت حاضره ويانه

ساره
هه الله اعلم يجوز جانت بمحاضره استاذ امير

ياربي ماجاي اصدك ايلول ما جانت هيج وهي ماتحب الولد وماتحب تسوي هاي الحركات!!!

ساره
عادي تره تسوي هيج بس تريد تغثج وتغيضج مبينه ترا باعي شلون متقاربين وشي عود تحبج والله يالله والله من شفتها عرفتها مسموممه

معقوله ايلول هيج تسوي والله كرهته كره ، احاول الكي مبرر للي تسوي ماكو !!! بعني شعدها وي استاذ امير وشمعنى استاذ امير بالذات

ساره كالتلي خل نروخ للنادي كتلهه ماريد كعدت بالقاعه مالتنه وعيوني مدمعه مو ع امير ابد !!! بس ع ايلول الي سوت هيجي وبكل برود اعصـاب يعني ليش تسوي هيج ليش!!!

يعني معقولة بس علمود تغُثني ؟
هيَ عرفت انُ اني نعجبت بي ف سوت هاي الحركة بعنادي!
شكد كرهتج وشكد طحتي من عيني يا ايلول

شوي واجتي ايلول بس عيونهه مدمعه ومادري شبيهه اجاهلت وجودهه ومبينه جايه الي وكفت كبالي وسكتت وكانما منتضرتني احجي

راساً وبدون اي تفكيـر كتلهه

انتِ وصلت بيـج لهل درجه تسوين هيـج في سبيل تزعليني وترضين حقدج

باوعتلي بعدم فهم وكلتلي

ايلول
شنو الي دتحجي انتِ فرس ! تره اني جايه افتهم منج الي ديصيـر مو انتِ!

شداحجي موووو يعني متعرفين شداحجي وكفتج وي استاذ امير وحجيكم سوووى كل هذا عناددد بيه مووو ترديـن شنووو ايلول فهميني شنو الي تردي منيي

ايلول
ههههههه لا اصبري اصـبري يعني شنو قصدج انُ اني كاعده احجي وي استاذ امير حته اغثج ليش انتو شنو بيناتكم؟؟؟؟

شنو بيناتنه مووو يعني انتِ ماتعرفين اني معجبه بي ماتعرفين اني احبه واني من اول يوم كتلج وانتي لان امشي وي سـاره هيج سويتي وترحيـن حته يحبج لتفكرين ايلول تره هوه جنوبي هوه شي وانتي شي ثاني مستحيـل يحب وحده مثلج اصلا

حجيت هيـج واني بقمـه عصبيتي والقاعه جانت فارغه ف ماخذين راحتنـه بالحجي

باوعتلي ايلول ودمعـه نزلت من عدهه

ايلول
مع الاسف سميتج صديقـه الي مع الاسف ، منا وجاي ماعدج صديقه اسمها ايلول تشوفيني من هذا الطريق روحي للطريق الثاني مراح تجمعنا اي علاقه من اليوم وجـاي وجنت اكدر ارد عليج بس ايامنا الحلوه ماتسمحلي ، بس اكلج ارجعي لوعيـج وارجعي فرس القديمه لان ساره حيل جاي تخرب عليج وراح يجي يوم وتتندمين لان الي داشوفهه كبالي مو فرس انسانه ثانيـه

ساررره سارررره انتِ ماعدج شخصص غير ساره ليش تحسييني اني حبيبج ولازم مامشي وي اي بنيه غيرج ليشش

ايلول
حيجي فد يوم وتتندمين وراح تجيني واستقبلج اني لان انتِ صديقه عمري بس بوقتهه حتكونين خسرانه خسـاره حيـل جبيره اذكري حجيي ارجعي ب اقرب وقت فرس الدتسوي حيهدمج، تحبي شنووو واحنة ماصرلنة ٣ ايام بس !!

عافتني وراحت من دون ماتسمع مني الجواب حته

ضليت بالقاعه ابجي تندمت لان كلتلها مستحيل يحب وحده مثلـج ياربي اني شكتلها وهي شكالتلي وشون ردت عليه جانت حته تكدر ترد وتعاركني بس هي شلون جاوبتني

اجتي ساره وسولفتلهه ع كل الي صـار

ساره
لج سيرتهم ع كل لسان بالكليه كلهه تكول يحبون بعض انوب مو بس هيج فرس يكولون المحاضره الاولى راحه حاضره بذيج القاعه تصورين يمه اسم الله شنو من بنـات

هااااي من صدك دتحجين

ساره
والله العضـيم قابل اجذب

والله تستاهل كل كلمه كلتهه الها وبعد مستحيل احجي وياهه

ساره
واستاذ امير؟ تره يروح الها والله

كلتلها بكُل حقـد
اميـر اني حبيته يعني اني اخذه وخليها ورايه

ساره
والله عفيه بس ايلول صعبـه ديري بالج

كافي ساررره كافي

المحاضـره الثانيه ل استاذ امير طب و ايلول ماكو شويـه واجت بس عيونها حمـر خفت عليـهه هواي شكلها مبين انُ هيَ بيها شي
كالتله استاذ ممكن اطب كلهه تفضـلي ايلول

ضليت صافنه !!! يعرف اسمها ؟؟ فوكاهه !! وخلاها تطب ورا .. للحضـه رجعت كرهتهه

كعدت بالستيج مالتها الي يمي اباوعلهه واني كلي حقد عليهه استاذ امير متجاهلني نهائيـا متكول هوَ الي البارحه يحجي ويايه!

انطانـا سؤال وكعدوا الطلاب يحلون اجـه هوه ل اتجاهنـا باوعلي وابتسم بادلته ب الابتسامه وكف بصف ايلول وكال الها

امير
لتخافين

هزتله راسه وراسا دنكت

ساره كرصتني وكالتلي شوفي شوفي

شجـاي يصيررر! معقوله !
كدامي فوكاهة!!!

كرهت ايلول بشكل كارثي كتبتلهه بورقه (شجـاي يصير) انطيتهيـا مزكتها وكالتلي

ايلول
كتلج ماكو علاقه تربطنا بعد !  لا تحجين ويايه

اول مره احس روحي اكره ايلول و حيـل ضليت اباوعلهه بنضرات كرره وافكر شنو بينهه وبين اميـر

ساره
خاف ماتصدكين بيه من كتلج بيناتهم علاقه

اي اكيد بيناتهم ولا شنووو يجي ويكلهه لتخافٌين

كملت المحاضـره واستاذ اميـر طلع
و ايلول طلعت
ساره كالتلي الا نطلع وراهم  راسا طلعنا وراهُم
أستاذ امير راح باتجاه و هيَ ب اتجاه

شكتلج يا سارة شو امشينا

مشينة بطريقنة الي هوَ نفس طريق ايلول،، راحت كعدت بالحديقـه وحدهه اجاهه اتصـال حجت وكامت

ساره
خل نروح وراهه عدي احساس حتروح وي استاذ اميـر

انتِ مخبله ساره شبيج

ساره
بس كومي خل نشوف

كمنه نمشي وراهه بـس اني ماحبيت الي اسوي مستحيل يصير هيج شي اني اكيد متوهمه
ايلول اني اعرفها والله ليش شكيت بيها

نمشي واذم بروحي واتذمر شلون سويت هيج شي

شفت ايلول طلعت لكراج الكليـه و صعدت وي استاذ امير ..

ساره
شكتلج !!!! هاي سياره استاذ اميـر ههههههههههههه ولله جبتيهه يا ايلول ..... يتبععع توقعاتكم حبايبي شنو الشي الي صاير ؟
للكاتبة: هُدىٰ آذار ..