رواية بيت جبر الفصل الثاني 2 - بقلم هُدىٰ آذار

تنويـة مُهم قبل قُراءة القُصة
سابقًا جنت ناشرة البارت ٣٠٠٠ كلمة او ٤٠٠٠ بعدين دمجت كُل بارتين ب بارت واحد فَ خاف تشوفون اول بارتات تنقفُل الفقرة وبعدها ترجع مرة لُخ السالفة انُ ( بارتين سوى )
قراءة مُمتعة حبايبي 🤍
______________________
ايلول
شلـون راح نتحمل الحـر لج اني جو الموصـل ما اتحمله نوب جـو الجنوب يمه اني متاكده اذا اجيب بيضايـه واگليـهه بطاوه تتگله هسه

فرس
ايلول لا تتبجيـن ب باب العباس رجاءا امشـي واسكتي ولصيرين مثـل المطي لتفشليـنه وهذا اول يوم النه بالكُليـة خلينا ننطي انطباع حلـو وامشي بثقه لتمشـين جنج جندي طاب للمعركه ويريد يحررهه للمنطقه اضل اعلم بيج شون يعني !

ايلول
شوف هاي تدور سوالف نزاگه بنص هل زلك لج بابا انتي شبيج اني راح اموت من الحـر وهاي تحجيلي بنزاكه وبالانطباع يعني شنـو والله لازم امشي علكيف واقدم رجل وارجع رجل وانوب اسوي العكس وافر بشعري حته اعجب الولد مثلا

فرس
ما ميتين عليـهم بكل الاحوال باعي شكولهم لحد هسه ما شفت واحد بي خيـر ، تكولك جبار ع حقاً وحقيقه
بس المهم ننطي انطباع حلـو انو احنه البنات النازكات الجميلات مو هيج تمشين جنج رجال ايلول بشرفج لا تفشليني

ايلول
والله حبيبتي هاي انـي امشي هيج والبس هيج واسوي اليعجبني انتي ماعليج واذا ترديـن عود لتمشين ويايه

فرس
اخ هوه اني لو اكدر ما امـشي وياج جان من صبح عفتج لان م جايبتلي غير المشاكل والفشله

ايلول
فرس والنبـي هسه امرغلج بالكاع هنا واخلي هاي النزاكه كُلهه تروح اذا ماسكتي ، اني وين وانتي تتمچقليـن فوك راسي

فرس
اوووه ديلا عيني يلا امشـي هاي وصلنه لقسمنه مكتوب
قـسم اللغه العربيـة

طبـوا لقسمهم الي هـوَ قسم اللغه العربيـه بكُل ثقـه
ايلول الي تغور البنـات بنصوعة بياضهه وقوه شخصيتهه
و فـرس الي لا تقُل عن جمـال ايلول وبنفس الوقت هادئة وقويـة ، جـان الاختلاف الي موجود بيـن بيئتهم وبين البيئه الجديده حيـل جبير ، بيئه الجنوب وبيـئه الشمال ، شي يختلف عـن شي ، وجان شي صعب ، وخصوصا لبنـات مثلهم ، يحبـون الحريه التامـه من دون تقييـد

نضـرات الكُل توجهت عليهم و على ايلول خصوصاً الـي جانت لابـسه قميص ابيض وتنوره قصيره ضيقه سوده وشعرهه منثور ، بينمـا فرس جانت محجـبه واقـل حُريه بالبس من صديقـه عُمرها ايلول بس بنفس الوقت تتمتـع بالنزاكـة واختياراتهه الجريئـة بالوان ملابسـهه ..

الاختلاف بيـن الصديقات مبيـن حيـل
متنافرات لابعد حد بالصفات وبالكلام وبالبيئة وبالمذهب وبكُلشي ، بـس دائما الي يتنافر يتجاذب وجانن هنـه هيج ..

ايلول
بعد تعالوا اكلونه وخلصونه تعالوا تفضلوا لا تستحون هاي شبيهم ذولا بس يباوعلون

فرس
حُبـي اني كتلج بس انتي م تاخذين نصيحـه مني انتي المفروض تغيرين من لبـسج ولو شويه ماكلج تحجبي ولا اكلج شي بس اكلج طولي لبـسج احنه مو بالموصل استوعبي احنه ويـن !! بيئة غير كُلشي غير لازم نحترم تقاليدهم

ايلول
اكلج حبابه اسكتي اني مامجبوره اغير لبسي علمود ناس مايقتنعون هوه انـي خالو محمد يدُك ويلطم وياي في سبيـل اغير لبس القصيـر شويه
واني اباوعله واكله شنو كلت خالو اسفه م جان بالي وياك؟

فرس
ههههههههههههههه خو انتي مطنشه الدنيا كُلهه
المهم اسمعي انتي تتخيلين احنه راح نصير سيبويه وخانويه ونفطويه مدري شسمهم ذولي

ايلول
لج اني متعجبه من روحي دباعي الوكت شون دوار انـي الي جنت بالعربي ما ارضـه الا دور ثاني هسـه راح اصـير مدرسه عربي خرب الوكت الخلاني هيج والله مصيبـه اني لو من الدوله غير معدلي فيتچري ما اقبلهه بي

فرس
والله اني من صادقتج ماشفت الخير وصرت مثلج بس لو مامصدقتج اخخ

ايلول
جان هسه انتي بالمستشفى تسوين عمليات!!!!
فرس اكُعدي وسُكتي غير اني اجيتج لكيت درجاتج كله ٦٠ و ٧٠

فرس
انجبي والله جنت زينه بال٨٠ اخذ بس من اجيتي وصادقتج وكمنه نقسم الدرس ابيناتنه انتي تقرين نص واني نص انلعب بينة جولة

ايلول
هههههههههه والله ذكرتيني ايام حلوه تذكرين مره من قسمنا امتحـان الاحياء ابيناتنه انتي قريتي ٢٠ صفحه واني ٢٠ صفحه وتالي المدرسه كومتنـه وحده عن اللخ ، والله نضربنه بوري بساعتها ههههههه

فرس
هههههههه اموتت ولا انسا هالموقف ضليت ادُك والطُم بوقتها مخليت واحد بعشيرتج ما سبيته لان علمتيني ع هيـج فكره

ايلول
والله اني جنت مصيبه ، في سبيل مـا اقرا اذا صادف عندي امتحان اروح من الصُبح واكعد اكتب قسم بالكاع وقسم ع رحله وقسم ع الحايط جنت جني ولد انطنط تنطنط

فرس
تذكرين مره من اني كاعده يم الشباك وتاخرت بالامتحان جنت سوال ماعرفه ابد وانوب انتِ جنتي تحاولين تعرفين متكدرين اخر شي درتي من ورا ويم الشباج وراويتيني الكتاب تالي مس رؤى شافتج وانتِ سويتيهه ركضتين

ايلول
ههههههههههههههههههههه يمممممه بوقتها حسيت روحي نحصرت تسلقت ع الشجره ومن شجره للحايط ومن الحايط طفرت ربج الحايط حيل ناصي بوقتهه رحت لبيتـي ركض وجنطتي ضلت بالمدرسه

فرس
ايلول ضحكتج حبابه موهيج والله موهيج وحق النبي موهيج لا تفضحينه اضحكي عدل وين نزاكتج ووووينننن ياربي صبرني عليٌهه

ايلول
انجبي وخلي اكمل من يحجون الاكبر منـج تسكتين اوكي الصغار تسكت من يحجون الكبار سمعتي امي؟

فرس
تره والله موتيني والله دقيتيني دق اكبر مني ب١٣ يوم بس دكافي خنكتيني ذليتني ذل

ايلول
يله اوكي راح اسكُت ماريدج تبجين خطيه

فرس
اوف لج ايلول هيـجي و واحد شخصيه طويل وعضلات عنده اسمرانـي لحيته خفيفه من لجنوب يحبني ويكتل روحه عليه ويكل لاهله لو هيه لو ماريد اذبح واصلخ عليهه اكتل وانكتـل ، اوف واذا اعاند يكلي اكسر راسج اذا سوين هيج واذا ازعل يكلي هسه اجي احرك لموصل كلهه علمودج يلبس خليجي ويفر بسبحتة ويباوع هيج
-فرس وهيَ تصغر عيونها حَتى تحاول توصل للملامح الحادة-

وبنُص احلامها اجتها كفخة من ايلول
ايلول
وجع حَتى وجع لهيج فارس احلام !!
هذا مو فارس احلام هذا مُطي احلاممم
ويكلج اكسر راسج وتسكتين؟ شنو من بشر انتِ ! والله يعمي غير اكسر راسه وراس عشيرته اذا حجه ويايه هيج
شبيجن تموتن ع الذله تره اساس العلاقه الاحترام المكثف بين الشخصين
يعني اني زوجي اذا اكلي انجبي اكله طلكني! تموتن ع الي يذلجـن تموتن
يا الله شكد اكره هيج بنات نوب صديقتي هيج وخري فرس وخرييي

فرس
اهووو حسره عليه احجيلي حجايه يمج وج بابا انتي م شايفه اهل الجنوب شون يحبون وشون يغارون اووف هيج ويكعد حضي ويرزقني واحد منهم وبيهم

ايلول
شبيج فرس تره غثيتيني والله اهل الجنوب اهل الجنوب شونهم عاد هسه اهل الجنوب نص بناتهم مقيدات الاغلبيـه مدمرات ومعنفاات يعني هوه اذا اخته مدمرهه ترددين مرته يحبهه دخيلج عاد شنو من مبدأ عندج انتِ

فرس
حبي المره غير عن الاخت تختلف تختلف
وبعدين منو كلج نص نسوانهُم مُعنفات ترة هاي قبل بزمن الجاهلية اصلاً محد يدلل مرتة نفسهُم حُب ودلال وشهامة ورجولة وكُلشي و ..

ديحجون وي بعض ماحسوا اله بنيـه جانت كاعده كدامهم التفتت الهم , شكلهـا مبعثـر وملابسهـا قديمه بس الخُبث موجود بعيونها ..

البنـات اصدقاء من الصغر جـانوا متواعدين مايصادقون ابد ولا يسون صداقه ثلاثيـه ويكتفون ببعضهم حتى لا اتصير مشاكل ، وجانوا ينفرون جدا اي بنيه تحاول تدخل بيناتهم ، لانها صارت قبل وتندموا !

ساره
مرحبا بنات عادي اكون صديقه الكم اني ماعندي احد هنا

وحده باوعت للثـانيـة ، ايلول رادت تحجي گرصتها فرس

فرس
اي حبيبتي اهلا بيـج

ساره
اني ساره من بغداد جايه هنا حته ادرس و بالقسم الداخلي مسجله

فرس
اني فرس و صديقتي ايلول جايين من الموصل وهماتين قسم داخلي اتشرفنا بيـج

ساره
واو يعني راح اصيرون نفس السكن كُلش حلو اني اهلي كاعدين ايجار بغداد واني اجيت لهنا حته ادرس و اشتغل واساعدهم واجيت هنا مستغربه ف شفتجن انتن كلت ذني بنات حبابات حيل مبينات

فرس
وين تشتغلين هنانه

ساره
لكيتلي شغل معيـن وراح اشتغل بي

فرس
اذا الشغل بشرف ف الشغل موعيب حبيبتي

ابتسمت فرس الهه و ايلول جانت بركان نار لانو فرس وافقت ع صداقتها

ساره
اني رايحه اغسل تجون ويايه

فرس
لاحبيبتي روحي وتعالي

كامت البنـيه وايلول مباشرتا اطلقت عصبيتها

ايلول
شبيج انتِ فرس من كل وعقلج

فرس
تره والله خطيه مسمعتيهه شلون وبعدين شبيهه بنيـه حبابه لا تكونين انانيـه ايلول اكيد هيه مراح تكون كلش ويٌانه بس فشله نردهه وهي هيـج حالتها هم حسي بيها

ايلول
ماعندي مشكله بس اذا اسببت بضرر العلاقتنه ف انتِ السبب تمام

فرس
شحده الي يحاول يخرب علاقتنا ابو الشباب لا تخاف انت عضيدي واخوي ماعوفك لو اموت

ايلول
اي عفيه ، بس اني ما مطمنه لهل حيه هاي جنها ابو بريص

فرس
لج كافي تتنمريٌن خطيه متشوفين حالتهم مبينه فقيره

ايلول
اوي سوده عليه وانتي صدكتي لج بابا والله هاي ملعبه اني من عيونها عرفتها وكولي ايلول مكالت يا فرس

ديحجون سوى ماحسوا الا شخـص طب محد حسباله انُ هذا الاستاذ استاذهم لا الكل حسـبالهم طالب واجاهلوا وجوده

اميـر
ممكن تتوقفون عن الكلام شويه

الكل توقف عن الكلام وباوعوله

اميـر
اني استاذ اميـر استاذكم في ماده البلاغة العربيـة
بمادتنا راح نتناول اشياء جدًا حلوة وسلسة
وندرُس تفاصيل او الاساليب البلاغية في النصوص
اتمنى اكون عند حسن ضنكم ومن الله التوفيق ومنكم الاجتهاد وبما انُ اليـوم اول محاضره ف المحاضره مفتوحه الي عنده سوال يساله وحته اتعرف عليكم

اثنـاء مايحجي طبوا مجموعه من الطلاب ومن ضمنهم ساره

اميـر
اتفضلوا ادخلوا بس مره ثـانيه اني ماسمح لاي طالب يدخل ورايه بس اليوم لانكم جديدين وماتعرفون النظام الجامعـي

فرس
عود صدُك هذا استاذ لو ديضحك علينه؟

ايلول
شمدريني اصبـري هسه أساله بلة ما اخليها بنفسي

ايلول بكُل جرئه
اُستاذ تكدر تفهمني شلون انت استاذ وانت بعمرنه؟

امير بابتسامة
نعم عزيزتي اكدر
انـي مُحب للغه العربيه من صُغري، بسبب انُ كان جدي استاذ كبير في اللغه العربيه ومارس مهنته بكُل حب واهتمام فيها لكن بسبب شـي معين انفصل عن وظيفته ، كبرنا واحنه نشوف جدنا حيل مهتم باللغه العربـية وكان اكثرهم تاثراً اني وكان دائما يكلي اريدك تكون استاذ مُهِم وناجح في اللغه العربيه وتكمل مسيرتي ، تخرجت من السادس بعمـر ال ١٨ بمعدل يقبلني في قسم اللغه العربيـة درست الجامعه واهنـانه شديت حيلي انُ اطلع من الاوائـل حته اكدر اتعيـين ك مُعيد جامعي وهذا الي صار اني هنانه معيـد جامعي ومو بس اني صديقي حيدر كذالك راح تشوفونه يجيكم بماده غيرها
بعـد عدكم سؤال ؟

ايلول
يعني استاذ هسه احنه كل احنه يعني داقصد النه حق نصير معيدين جامعييـن

امير
نعم عزيزتي تكدرون بس يتطلب هذا الشـي جهد كبير بكل مرحله من المراحل الاربعه حته تكدرون تتنافسون وي زملائكم وتحصلون هذا الشـي، وبالمُناسبة الي يمة اصرار وطموح لتطوير نفسة ماكوشي راح يصعب عليّ

طالب اخر
استاذ انت شكد عمرك حالـياً وشكد صارلك تدرس هنانه

امير
نعم عديزي
خلي احجي الكُم بالتفصيل حَتى نزيل الفضول
بعد ما تخرجِت من كُلية الآداب اني ما توقفت وكملت حصيلي الاكاديمي مُباشرتًا، بعدها حصلت على شهادة الماجستير في الادب والنقِد من جامعة بغداد، ثُمّ نلت الدكتوراه مِن الجامعة الأُردنية بِرسالة تناولت أثر الاسلوب البلاغي في الشعُر العربي المُعاصِر
كنت بالـ ٢٦ من عُمري لمّن جئت الى الجامعة
بس بصفتي أُستاذ لا كطالِب
درست السنة الي فاتت، وحاليًا بعُمر الـ ٢٧
تكون السنة الثانية الي في التدريس

ايلول ل فرس بهمس وهي تباوع ل اميـر
هذا شكد صرف عزيزي وعزيزتي

امير
نعـم ؟

ايلول بِعفوية تامة
لا عزيزي ماكو شي

ادركت ايلول الي سوتـه من بعد ما الطلاب صارت تضحك
كام تمتمت بالحجـي وماتعرف شتكول

اقصد استاذ

اميـر ب ابتسامة
متعود انـي ع هاي الكلمه ف تعودوا عليهه

فرس ل ايلول
اوي لج شوفي شون كيوت ومو من ذولا العصبييـن

طالبه اخرى
استـاذ انت مرتبط

طالب اخر
هذا خوش سوال هههههههههه

امير
لا بعدنـي اني اهتمامي فقط في مستقبلي حالياً احب اكون نفسي واستقل مادياً بشكل زيـن ومن بعدهه اكيد راح اكمل ديني وازوج ، وهـا من الفتاة الي الوالده تختارهه الي لان اني ما اؤمـن بالحُب

ايلول
واخيرًا استاذ واحد يحب زواج التقليدي نفـسي اني حيـل اكره الزواج عن حب واعتبرة فاشل بصراحـه

امير
كل شخص واله نضرتـه واني وياج نضرتنة هيـج والبعض هم بس اكو ناس لا، الحُب موجود ونابُض بداخُل كُل شخُص بينا، وكتصحيح لِما فآت اني اؤمِن بالحُب، لان لو ما اؤمن بي معناهة ماكو اني انسان بلا قلب، واني موهيج، بس اني اكره اشخاص الحُب نكتفي بالذي قيلَ

ونبـدي نتعرف بيكم واحد واحد تفضلوا

طول هـل كلام وفرس صافنة ب اميـر ، صافنة بطوله وبجماله الخفـيف الناعم ، صوته وثقافته بالحجـي الي عجبنهة وعيونـة الي لونهن سحرنهة ..

فرس
دشوفيـن جمالة وجمال عيونه؟

ايلول
ماحب الرجال العيونه ملونه واحسة عادي وماحبيته لان عنده لحيه واني ماحب الولد العنده لحيـة بس شخصيته قويه واسلوبه حلو ومو معقد ف لابأس بي

التفت عليهن ساره وهي تكول ل فرس
ساره
هذا لو اكبر وحده بالكليه ماتجيب راسه

فرس
دخيلـج تره بوخه همه والله ، يحجون هيجي بس بالحقيقه يمنه ميكدرون ولا يقاومون يعني صراحتًا اني عندي نظرية لتحكُم على انسان من خارجة يعني هسة هوَ يمنة يصيح الحُب لا ومدري شنو تطبون لحياتة تلكونة ما شاء الله

ساره
هسه الي يسمعج يكول طايح بيدج هوه نضرة ما عبرج

فرس
وهسه اني ميته عليه لو اخلي بالي تره اجيبة

ساره
اي كلش مبين شو اسكتي ماتشوفينه شون يحجي لج هذا شايف روحه ومغرور

ايلول
رجاءا التفتي لمقعدج وكافي كلام
فرس كافي شبيج ليش تترزلين من اول يوم مو ع اساس تردين تطين انطباع حلو كافي بس تبسبسين
شنو لو اخلي بالي اجيبة!
شهل كلام؟؟

فرس
اشاقة شبيج قابل صدُك

سكتت فرس و ايلول التفتت تسمع الطلاب وهي تعرف عن نفسهه

ايلول منفسة وماكدرت تسكُت من الكلام الي كالتة فرس
بنهاية هُمة صح مُنفتحين بس اخلاقهُم ومبادئهُم مايغيروها
باوعت لفرس وكالتلها بصور مسموع ومُتعَمِدة حتى تسمعها سارة

ايلول
شنو اخلي بالي ويـا اجيبة بعد لتعيديها مال بنات شوارع هل كلام!

ساره
شنو قصدج انُ اني بنت شوارع؟

ايلول
اكو مثل يكول البعبة طلي يمعمع حبيبتي التفتي لمقعدج احسن الـج مالنه خلك

ألتفت سـاره وهي ضايجـة

فرس
انتِ صدُك تحجيـن شبيج هيج تحجين وي البنيه

سكتت ايلول وماحجـت شي
لان مالها خُلك تناقش فرس اكثر
والمُهم وصلت السهم للمقصود

رجعت التفت سـاره ودموع بعيونهه وهي تكل ل فرس بهمس

سارة
مادري شبيهه صديقتج ومبينـة كلش ماحبتني اعتقد لانُ مو من نفس طبقتجن

ماردت فرس بشي بس ضاجت وحطت ايـدهه ع كتف ساره وكلتلهه
فرس
لا زعلين حبيبتي

اميـر
بدون صوت رجاءً

التقت عيون فرس و عيون اميـر سوة
فرس ضـلت صافنه وكانما ما تعرف شتسوي
غض النضـر اميـر وكمل مسيرته بالتعرف ع الطلاب

ايلول
هيج احسن الج؟ مو عَ اساس اريد انطي انطباع واريد انطي انطباع

فرس
انتِ بذات لتحجين

ايلول
والله يالله روحي احجـي وي سرو احسـن الج حبيبتي

الطرفيـن سكتن بس جانن حيـل ضايجات من بعض

وصـل السره الهُم كامت ايلول وهي تعرف عن نفسها

ايلول
اسمـي ايلول عمري ١٩ سنـه طبيت للغه العربيـه مو لاني احبهه لا بس لان اني نقبلت بيهه واني من الموصل

اميـر
تشرفنـا عزيزتي

اجت عيونة لفرس الي گاعده وضايجـه ومامنتبهه لديصير ابد

امير
تفضلي ؟

كرصتهه ايلول وهي تكلهه كومـي لانُ جانت صافنه وضايجة

فرس وهي تباوع لاميـر بأعجاب
اسمـي فرس ومن الموصل وطبيت للغه العربيـة لان كلش احبهه يعني اني من صغري واني احبهه

ايلول وهيَ تباوع وهيَ متعجبة وتريد تحجي بس ساكتة

امير
حلو واخيرا لكيت احد يحب اللغه العربيـه نفسي
فرس ، اسمج غريب شنو سبب تسميتج بهل اسم هذا ؟

فرس
الخيل معناهة

امير
هههههه افتهم عزيزتي
بـس شمعنا سموج هل اسم ؟ كانت اكو مناسبه الة؟

فرس
اها اي ، والـدي الله يرحمه كان مُغرّم بالاحصنه والفروس ومن اجيت الهُم سماني ع هذا الاسم

امير
الله يرحمـة ، اسم متميز وجميل

راح امير للي بعدهي وايلول حجت

ايلول
من يمته انتِ تحبين العربي ومن صغرج شبيج انتِ انخفكتي

فرس
ايلول اسكتي خليني مركزه ويـا شنو من استاذ يربي

ايلول
خبال لتتخبليـن شبيج كل عقلج مامرتبط تره يجذب علينه تلكينه مزوج وعده كومه زعاطيط بس يسوي هيجي حته معجبات وكذا

فرس
متشوفينه شكال هسه المهم اسكتـي خل نسمع شيحجي وشلون وبعدين ولي اني ماحجي ويـاج

ايلول
مساع تكولين هيج نماذج يجذبون هسة تكولين مامرتبط ؟

فرس
ترة مبين حباب وينة وين الجذب
يجنن ياربي

ايلول
فرسسسس اصحي ترة احنة جايين سنة ونروح و اهلنا مأمنين بينة ومودينا وحدنا حتى ندرس مو حتى ننعجب ب اشخاص

فرس
ايلول ماتحسين انُ انتِ هواي بالغتي!
تحسسيني انُ حرام ننعجب ب احد ؟؟
لو انتِ بس مشخصنتها وياي
خل اسكُت احسن

كمل من التعريف وي الطلاب رفعت راسهه فرس اله وجان القلم بيـدهه باوعلهه وأبتسـم وگال

اميـر
‏كانتِ العربُ تقول من قبـل : لا تُبَرْقِل علينا
و البَرقَلة هي كلامٌ لا يَتبَعه فعل يعني ًمجرد كلامَ، مأْخوذٌ من البَرق الذي لَا مطرَ معه
و يقولُ صفي الدين الحلي:
مَا كُنتُ أَحسَبُ أَنَّ الوَصلَ مُمتَنِعٌ
وَ أَنَّ وَعدَكَ بَرقٌ مَا بِهِ مَطَرُ!.

الطلاب كلهه كام تضحگ وتصفگ

اميـر
تعودوا ع اشعاري الهيـج ويلا اخذوا راحتكم باجر نبدي انشالله

فرس
بس استاذ !!

التفت الها اميـر

اميـر
تفضلي عزيزتي ؟

فرس
استاذ ممكـن تردلي الشعر الي قريته اريد اكتبه

جانوا البنـات بالمقاعد الاولئ تقريبـاً ، تقرب اميـر يم فرس وصار يردلهه الي حجـا وهي تكتبه

اميـر
خطج حلـو

ابتسمتلة فرس وباوعتلة وكالتلة

فرس
شُكرًا الك اُستاذ

ابتسـم امير بخفـة وطلع من القاعه

(اللهجـه موصليه نوعاً مـا بس للسهوله الكم انطيكم المعنى باللهجـه العامه)

فرس
اوف لـج شفتي جماله وجمال شخصيتـه

ايلول
انتِ من يمته تحبين العربي بس اريد افتهم

فرس
ايلول اسكتي وبعدين اذكرت انتِ شبيج وي البنيه ليش هيجي خطية، بلة اني متعودة ع فصلاتج بس هيَ!
ايلول
فرس اذا تمشين وياهه متمشيـن ويايه رجاءً

فرس
ليش اتصيرين انانيـه ايلول شبيـج

ايلول
الخبث مبين بعيونها واذا خربت بينة يا فرس انتِ السبب راح تكونين بهذا الشـي تمام !

فرس
ما اسمـح لاحد يخرب بينـه لتخافيـن بس انتِ بطلي من هـاي سوالفج حته مساع فشلتيني يـم البنيه

ايلول
اني فشلتج مو ! اوكي حبيبتي روحي يمهه احسـن شي واني خليني اگـوم واخليلكم الجـو

گامت ايلول وهي معصبـه فرس ضلت بمكانهه لان تعرفهه اذا تعصب ماتريد احد يحاجيـهه

التفت ساره بعدهه الي جانت تسمعهن وصارت تحجي وي فرس

ساره
صديقتـج كلش عكره مادري شلون متحملتهه

فرس
رجاءً ساره لتحجين ع ايلول هيجي هي موبس صديقتي هي اختي واني ويـاهه نعرف بعض من الصغر ف مايحتاج هذا الحجي تحجينه عليهه لان اني ماقبـل ابد

ساره بتمسكن وبدموع بعيونها
اي هسه اني شحجيت شكرا الـج واني هم بعد هايهيه ماحجي وياج مع انـو جنت اتمنه اصادقج لان محد الي هنانه

فرس بغبـاء
اوف لضوجيـن حبيبتي بس اني ماقبل احد يحجي وي ايلول

ساره
والله اتصوري اني جوعانه ومامتريكه لحد هسـه لان ماعدي فلوس كلت اشتغل وابدي اخـذ فلوس

فرس
حبيبتي كومي خل نروح لنادي الكليـه وناكل

ساره
لا شكرا الج لا تحرجيني

فرس
كومي ناكل ع الواهـس

استدرجت فرس شـي شـي
راحوا للنـادي وهناك لگوا ايلول كاعده تاكل جانت صعبه ع فرس انُ تكعد مقابيل ايلول من دون ما تكعد يمـهه بس هي انحرجت اكثر بينما ايلول جانت تغلـي من العصبية وسـاره اخذت دور المسكينـه

ساره
شبيـهه صديقتج بس تخزر بيه مادري بس فرس اني بعد ما امشي وياج لان مبينه دضوجج

فرس
لا حبيبتي انتِ ما الج علاقـه

ساره
شنـو يعني هي تغار مني ؟ ترا مو حلوه هيـج هي مو حبيبج واني ولد ومتقبـل هيج يعني قابل تريدج بس الها

فرس
ههههه لا موهيـج ايلول مو تغار عليه بس تخاف لا احد يخرب بيناتنه ولا هي كلبهه كُلش طيب

ايلول حيـل ضاجت من فرس وخلت وكامت لانـو فرس جانت كاعده تحجي وي ساره و ساره تضحك ويـاهه

اتجهت ايلول للمكان الي كاعدات بي فرس و ساره
باوعت ايلول ل سـاره وكلتلهه
ايلول
لكيتي فرس ع كد ايدج اشبعي بيـهه زيـن
وانتِ غبية وراح ضليـن غبية وماتاخذين حجي مني ف تحملـي عواقب افعالج

فرس متعودة عَ فصلات وعصبية ايلول بس كلش ماحبت الموقف الي سوتة وماحبت انُ هيَ حجت عنها هيج بوجود سارة

سارة
ترة حيل اوفر شنو سالفة هاي صديقتج كلش مامحترمة!
اساس العلاقة هي الاحترام شجاهة هيج تعاملج؟

فرس بعصبية
رجاءً سارة احنة صديقات مابينة شي اسمة احترام ومدري شنو وعلاقتنا هيَ هيج بهل شكِل واني ماحِب تحجين ع ايلول هيج لُطفًا لُطفًا
اني رايحة كدامج للقاعة المُحاضرة حتبلش

خلت وكامت بس بداخلها ابد ماراضية ع الي سوتة ايلول بيها
كامت سارة وراها وطبوا للقاعة سوة
كان موجود أُستاذ حيدر

حيـدر النصف الثـاني ل امـير اصدقاء مـن ايام الاعداديـه سوى يشابهون بهواي شغلات بـس الفرق بيناتـهم انُ حيدر اكثر شده وصرامـة من امــير

مضـة اليوم عادي و ايلول ما حجت وي فرس اي شـي واخذت وضـع الصمت و فرس جانت ضايجه بداخلهه حيـل من ايلول ومن شافتها ما اجتها وصلحت الموقِف  كام تضحك وتسولف وي ساره فـي سبيل تغيض ايلول وماتدري بهذا الشـي راح يزيد الطـين بلة

راحوا للقسـم الداخلي مالتهم بعد ما كملوا دوام

سـاره جانت بجانب فرس و ايلول جانت مبتعده عنهم هالشي سبب نرفـزه للاثنين بنـفس الوقت بس اتحتم عليهن هالشي

ايلول
هسة من اكوم واجرهه من شعرهه لهاي الحقـيره هم احد يكُلي ليـش المسمومه الحيـه الادبسز هي السبب وهاي الثوله الغبره الي صدكت بيـها وكاعده تضحك وياهه في شبيل تغيضني اخ ودي هيـج اكوم امرغلهه بالگاع

فرس
كاعده وحدهة ولاكانما ماتجي وتكول صديقتي ماعوفهه وحدهي ورايحين اقسام ونقلة وكذا بـس اني اعلمج يا ايلول ع هاي سوايتج

التهـوا البنات بين اجراءات القسِم وبين النقلة
الغُرفة لازم يكعدون بيها ٣ اشخاص
واساسًا جانن البنات مسجلات سوا و وياهُم بنية ثالثة

انقضى اليـوم بالصمت العُقابي الداير بين الطرفين بدون حدوث أيّ احداث او كلام بينهُم

صـار اليوم الثـاني وصـار الدوام تأنقت فرس ب كامـل اناقتها وهي تطلع للكليـة
اندگت الباب وطلعت سـارة
تقدمت لفرس وكلتلها بهمس حَتى ماتسمعها ايلول

سـاره
واو ملابسج حيـل حلوات اتمنه لو عندي ملابس نفسهن
والله استحي اروح بملابسي هذني نفس ملابس البارحة وقديمات..

برغـم ما فرس تكره احـد يشاركها بملابسهـا غير ايلول الا انها نقهرت ع سارة بسبب اللبس الجدًا رديء الي لابستة وكالتلهة

فرس
تكدريـن اي شي تاخذينه مني البـسي عادي

حضنت ساره فرس وهي تشكـرهة وابتسمت ابتسامـه جانبيـه بخبث وانتصـار ع انُ الشي الي تريـده بدة يصير ...

بهـل اثناء ايلول مجانت دتفهم الي يصير بينهُم وخلت وطلعت
راحت سارة تبدل ملابسها ومن اجتِ وشافت فرس كلتلها

سارة
واو استاذ اميـر اذا شافج هسه يموت ولو هذا الاستاذ ميحب البنـات ولا يعترف بيهن

فرس
انتِ همات كلش حلوه طلعتي لاكلج هاي الملابس
وبعدين هسه انتِ شمدريـج ميحب البنات تحجين وكانه صارلج قرن بالجامعة كتلج هُمة بوخة يبينون ثگال بس هُمة من جوة لجوة خصوصًا الحلوين، يعني تقنعيني بهل جمال وأستاذ وكُل هل بنات وما مُرتبط ؟ مُستحيل ..

ساره
هههههه لا مو اني ماكتلج شـي اني عايدة السنة هنانه واعرف واستاذ اميـر بالذات ، حاولت ويـا اكثر بنيه حلوه ومافاد صـدكي

فرس
باعي اني لو ادور هاي السوالف جان اجيبـة بس هذا مو دربي والله

ساره
هههههه يعني شلون تجيبينه اريد افتهم داكلج احلة بنيـة حاولت ويٌا وماكدرت

فرس
لتخليني اتراهن ويـاچ هسه ع اني اگدر اخلي يحبني

ساره
كولـي والله؟

فرس
والله العضيـم بس اني ماريد كتلج ، يعني يجوز صح اني انعجبت بي وكذا بس متوصل بيـة المرحله هيج اسوي

ساره
كولي ماكدر اله حبيبتي لتكولين هيـج كتلج ولله مراح تكدريـن

بهل اثناء طبت ايلول لانُ ناسية موبايلها
كالت فرس بغيض حَتى تسمعها وهيَ تُضحك

فرس
ههههههه هـا ؟ اوكي لعد نتراهن !!

ساره
نتراهن وشوفي يا فرس وكولي ساره ما گالت ماراح تگدريـن ..

ايلول
ذنـي شجاي يحجن سوى ياربي انـي حيل خايفه ع فرس ، فرس بسـرعه تتقشمر وبعدهة ما حاطه عقلهة براسـهه ومتهوره حيل ، ماتعرف شنو الي ينفعهه من الي يضرهه، صح اني مقهوره وزعلانه منهه بـس مراح اخلي اي شخص يستغلهه ل فرس وهاي سارة اني اعلمـهة
عَ شنـو يتراهنن وشنو وشلون مدافهم !
جَد خفت ..

اخذت موبايلي وطلعت وهنّ طلعن قبلي رُكبنا سوى بالباص ونزلنة يم محطة قريبة عّ قاعاتنة بس يحتاج نمشي شوية

المُشكلة هيَ ميبسة راسها ومتباوعلي حَتى !
شلون اروح واحاجيها ؟
وفوكاهة دتحجي وي سارة وتسوي سوالف مُراهقات في سبيل تغُثني
والله مادري شسوي !
داحجي وي نفسي واتأفف

شفت اكو ضُل وراية وشخُص ديمشي

ياربي شكد اتنرفز من شخُص يمشي وراية لو يصعد الدرج وراية
فوبييييا والله فويااااا
غير يمشي بسرعة استغفرالله

شوية وسمعت صوت وراية

-
انـي مشايف حلو واكف يحجي وي روحـه وعصـبي طالع ملاك بالابيض ي حلـو

التفتت الة بعصبية وكتلة

ايلول
وانت بالاحمـر طالع جنك أبليس دروح عنـي شلون الي خُلك اني، لتخليني اخزيك كدام أُمة مُحمَد..

هو ضل يباوعلي ومايعرف شيحجي
الحّل لكُل مُتحرش هوَ الاهانة
اما سوالف الصمت
نطبقهُم عَ النحبهُم ونسكت ..

طٌب الكُل للقاعه وجانت اول مُطحاضـرة، ل استـاذ امير

امير
صـباح الخيـر طلاب يـلا اليوم نبدي اول محـاضره وياكم
وان شاء الله بدايه خيـر

فرس
طول ماهوه يحجـي اني اباوع لعيونة ومركزه بيـهن زين بي شي جذبني اله ماعرف شنـو بـس حسيتة سحرنـي
كُل شي بي حلو
وكُل شي بي حلم من احلامي
احس سرحت واني اباوعلة
وماصار كدامي شي غير انّي اجيبة
ليش مثلاً مايصير وياي ؟
هوَ صح حلو بس اني احلى بهواي
ومراح يلاگي احسن مني
وسهلة مو صعبة ..

ب اثنـاء مداباوع عليه التفت ألي واجن عيونـي بعيونه صفن ل ثوانـي وراسـاً دار وجهه
هاي صارت للمرة الثانيـة

احس كلبي بدة يخفق عَ السريع، ياربي شديصير
معقولة هوَ هم مُعجَب !

افكاري راحت لبعيد، وخيالي تحور لغير اشياء

بـدة يشرح بالمحاضـرة واني طوَل المحاضره مركزه عليّ
و واضح كُلش مدانتبه للمُحاضرة كد ما دانتبه الة

اميـر
مثـلا انطيكم مثال عليهه

عرفتـه راح يحجي شعر راسا حضرت قلمـي

اميـر
و قَد بَسَمَت إليَّ، وكُلُّ هَولٍ
عظيمٍ بعدَ أنْ بسمَت صغيرُ
و لَم أكُ قبلَ مَبسمِ وَجنتَيها
عليمًا كيفَ تَحمَرُّ الزهورُ؟!

رفـعت راسي لگيتـه يباوعلي ويحجي وكانما منتضرنـي ارفع راسـي

بعد نضراته عنـي وكمل شرحه

وشكـو شي يحجي ينطي مثـال عليـه واني اكعُد اكتبه واتمعن بي !!

حجـه اخر شي شعر كُلش حبيتـه بس مالحكت اكتب اخر تكملٌه منة

فرس
سارة سارة مسمعتي شنو اخر بيت

ساره
مادري كومـي ورا من يطلع من المحاضره وكوليله

خلصـت محاضره استاذ اميـر وطلع هوه طلعت ورا بسرعه خجلانه ومرتبكـه بس كلت لازم احاجيَ واكُله

فرس
استـاذ ممكن تردلي تكمله الشعر ما لحگت عليـه

باوعلـي وارتبكت حيـل من انطاني هنضـرة وكلي

امير
ليـش تكتبين الاشعار الي اكُولهه ؟

فرس
لانهـا حلوه واني احب الشعـر الفصيـح

ولللاسف هذي المرة الثانية الي اكذب بيها
لان اني ماجنت احب الشعر الفصيح ولا افهم عليّ
بَس !
من يوم الي شفتة وبدة يحجي واني احس بلذة كُل شعر وافهم شكو شي يكولة، يعني لو غيرة يحجيلي غزل مُمكِن اصفن وما افهم، ومن بدة يحجي هوَ حَتى الكلمات الصعبة صرت اخمن معناهن صح

اميـر
بعـدين حالياً اني مشغول ذكريني اردلجيـا اعتذر بس منتضريني بالعماده ع الاجتماع

فرس
تمام براحتك أُستاذ

ابتسم وراح
يالله هل استاذ شكد بشوش ويجـنن رحت لقاعتي وصـارن كُل البنات يحجن بي وبوسامتة وجمـال اختياره بالاشعار الي يلقيهه عليـنة

صافنه بيَ
جد حلـو وشخصيته تجـنن

ساره
بلـة فهميني شلون راح تخلينه يحبج

فرس
يحبني شنـو تخبلتي اني اخلي يحبني لو هوه يحبني من نفسـة

ساره
والرهـن شنو نسيتي

فرس
اممم اوكي ما اتراجـع عنـه

(القصـه الي تنكتب بيـهه مساوئ ابطالهه احسـن من القصه الي تخلي ابطالـها ملائكة،  بنهاية هي قُصة والهدف من القُصة العبرة والحُبكة، اني اذا اخلي الكم الابطال ملائكة لُطفًا بَس  شراح تستفادون؟ )

راحت سـاره حتة تغسـل وايلول كاعده بمكانهه وتفكر

فرس
اني شبيـه مخبله شنو اتراهن ع ولد شنـو هاي سوالف اني مو مراهقة وعمري ١٩ سنة ليـش داصرف هاي التصرفات !

اوه هسـه ليش تكبريها فرس اصلا اني قابل شنو شراح اسوي مجرد راح اخلي ياخذ ميانة وياية واطلع وجهه الحقيقي وهايهيه اريـد هاي ساره تشوفني شلون اني قوية واكدر اسوي اي شي اريدة

.. اوف بـس هوَ شكد حلو والله شخصيتة حلوة
ياريت بس لو يحبني صدُك !

كاعدة تفكر وسارحه بخيالهه ما حسـت غير ساره اجتي وتبجي

فرس
شكو شبيـج ؟

ساره
ايلول لزمتني مـن ايدي وضلت تصيح عليه وتكلي ابتعدي عن فرس و فرس الـي ومدري شنو ، شنو سالفه فرس ليش تحسسني انُ هي ولد وانتِ حبيبتة ليش هيج جاي تسوي فشلتني يم البنـات ولله

معقوله هاي تصرفات ايلول؟
صدُك تحجي هاي شون تفشلنـي هيج

فرس
اكيد مجانت تقصُد هسة اكوم احاجيهة

ساره
لاحبابه مبينه دور مشاكل ماريد تحاجينـهه خليهه حبابه الله يخليج لا تحجيـن وياهه ابـد ولا تكوليلهه
كالتلي اخلي بابا حَتى من الـسكن يطلعج تخيلي بس !!!

فرس
ابو ايلول دكتور ومعروف وفعلاً قادر يسوي كُل شي بس معقولة ايلول تستخدمة ضد انسان!
ايلول بعُمرها ما حجت بمناصب اهلها ولا زاودت بيهُم كدام ناس
شديصير وليش هيج دتسوي ؟
جددددد فقدت عقلها هاي
نوب اباوع لسارة دموعهة تنزل مثل الطفلة
وكدام الكُل
جَد انقهرت عليها
وصار بكلبي حُقد ع ايلول جبير !

فرس
اوف ماعرف شبيهه ايلول ماجانت هيـج ابد اني اسفة واعتذر نيابة عنها لتزعلين خلاص حبابة بس اهدي منا الطلاب

شوية وكلتلي دايخة مدري شبيـة والبنية انتهت
كلتلي انُ هيَ ممتريگة كتلها كومي اخذتها للنادي وخليتها تاكُل
والله خفت عَ البنية لا توگع علية ع كد ما جانت حالتها تعبانة
جانت ملتهية بالاكل وكإنمّا مماكلة سابقًا
كلش قهرتني وحسيت عيوني دمعن عليها، وبنفس الوقت ودي الزم ايلول و اموتها عَ السوتة
شوية حسيتها هدت وبدت تحجي

ساره
والله انتِ اروع صديقـه بالدنيٌا كُلهه شُكرًا الـج

ابتسمت الها وسكتت ماعرف شنو احجي
احس روحي تايهة ومو عارفة شديصير

قبـل لا تبدي محاضره اُستاذ حيـدر ب ٥ دقايق بينمـا الطلاب كُلهه مجتمعه استعداداً للمحاضره

مُمثـل القاعه
طلاب استـاذ اميـر يريد گروب النـه ف اريد ارقامكم كلكم نسوي كروب ع التليكـرام

اخذ المُمثل ارقـامهم حته يسويلـهم گروب خاص بيهم

سـاره
هـاي فرصتج واني جنت محتاره منين جيبين رقمـة لان هوَ العام ماجان يتواصل ويانة غير قناة وينشر بيها
ههههه تگدرين تراسلينـه هسة

فرس
بـس شلون اراسـلة و ع اي اساس سارة

سـاره
مو ع اساس اني كدها واني كدها واكدر واكدر شبيـج

فرس
طبعـا اكدر وراح تشوفين شون راح يميزني عنجـن كُلجن وخليهه عليـة
الطُرق هواي 🤭

ساره
خلي نشـوف بله شتسوين ....

فرس
اوف والله مشتاقة ل ايلول
حَتى امير نسيتة
ما متعودة هلكد اكون بدونها
احنة حتى من نتعارك قليل ونتراضى
نوب شكد خططنا من نجي شنو نسوي وشلون
تالي هيج؟

بس ايلول هواييي نست نفسها وهواي خُطأت ومُستحيلللل اروح واحاجيها خليها تتعاقب ع اغلاطها ..

كمـل الدوام ورحنـه للقسم الداخلـي
ايلول اول مارجعـت نامت
العصـر طلعت مـادري ويـن

جنت حيـل ضايجه لان احنة جنهة مخططـين نطلع سوى ونتونس سوى هواي جانت مخططات عدنـه

ضجت ورحت لغرفة سارة لكيتها مجهزة ولابسة ملابسي الي اخذتهن مال الكُلية الصُبح

سـارة
عيني اني طالعه للشغل

فرس
ماكتيلي ويٌن تشتغلين انتِ؟ 

سارة
ها ااا اي انٌي اشتغل وي مـره نسوي فطائر ومعجنات وهسوالف

ماقتنعت بحجيٌهه هواي
لان كشختهه مو مـال هيجي ابد وتوترت من سالتهة
زيـن هاي شبيها ما ترجع الملابس ما تستأذن
شنو ناوية تنام بيهن؟
اصلاً بعد ما اخذهن منها
لعبت نفسي
اني اول ما اجي اغسل ملابسي وانام
هلكد ما معتنية بملابسي
واخاف عليهن ..

ساره
يلا ما اوصـيج طلعي مهارتج خل انشوف شنـو يصير بينكم هههههههههه

مانطيت ردة فعِل
احس كلبي لاعبني منها، بنفس الوقت بحجيها انقهُر عليها واغير وجهت نظري تجاهة

گاعده المغرب تقريبـاً ، وحدي محتاره شنـو اسوي وشلون دخلت روحي بهل ورطـه وليش وافقت وشسوي هسه وشون اطلع روحي من هسـالفة ؟ مادري شلون وشسوي بس المهم ماريد اثبت الساره انُ اني ماكدر اسوي شي وبنفس الوقت اني صدُگ حابتة واتمنى يكون من نصيبي

فتحت موبايلي اكلب بي لكيتهم ضايفيني بكروب بحثت بالاسماء لگيـت حساب استاذ اميـر جان حاط صوره حيل حلوه الـة صافنه بيـهة واحجي وي صـوره نفس المخبـلة

هوَ انـي ليش احس حبيتك حيـل...
ياترى هل هذا حـُب لو لا ؟
معقولة مُجرد اعجاب لو انـي صدُك حبيتك ؟

صافنـه وافكر وماحس اله انطـيت اتصـال الـه بدون ما ادري ........

_____________

بيـت الشـيخ جبـر يُرحب بكم لتدخلـوا في اعماق تفاصيَلهُ
السـاعه ٤ مسـاءاً

علـي
انـة اليوم عندي واجب بالانبـار اضـل ما اجـي ف لا تقلقون عليـه ومو تضلون كل ساع واحد مخابر عليّ ومفشلني عبالك طفل ال ٤ سنـوات طالع بشارع وتخافون عليّ

جبـر
عليـوان لا تشوف روحك جبيـر تره ولله بعدك بطول زري نافش رياشتـه علينه حاطله شچم نچمـة و ..
وشايف روحة عليـنة ابن النعـال

بعـدة علي ماحاچي شـي ما حسوا الا ع صوت بابـهم الي يندگ بصـوره موطبيعية الچرص من جهه والبـاب من جهه وبكُل قـوه 

مامتعوديَـن ع هيج شـي ابد الي يدگ بابهم يدگة دگة وحدة وباحتـرام لان الكُل يهاب الي بهذا البـيت واذا ندگ دگتين معنـاهه هذا واحد من اهل البـيت

جبـر
ياستاررر ياربي اي اي اجينه ياهووو

طلعوا كُلهم مُسرعيـن حته يشوفون منـو وچـان يشوفون مجموعـة من الزلـم مُلثميـن ولازميـن بيدهم اجود انواع الاسلحـة والنـاس ملتمـة حَولهم

حجه واحد دشداشته البيـضه صايرة حمـرة من الدَم ،مغطي وجهه ب الغتـره بس عيونـه حمر دَم

مـروان
وينـة سجاددددد وينـة وينـة طلعوا الـي بسرعه ، والله ثم والله لو بأخـر الدنيـا الگا طلعوا الـي

أنتبهـوا عليّ وعرفوا من صوتـه ، مَن اشد الخُصمـاء لچبر و احفـادة، خلافات واشكالات قوية الي خلت دحـام( جـد مروان) و جبـر (اولاد العـم) يصيـرون من أشد الخصوم بعد مـا كانوا اقرب ثنين بـسبب الطمع (بالشـيخة ) لحـد ماقرروا ال دحـام ينفصلـون من العشـيره ويكونون عشـيره وحدهـم .

مـات دحـام و ابـو مروان ب حادث سيـر وصار مروان شيخ  من بعدهم ع نـاس هواي ب اعتبـار جده دحـام انسان حيـل معررف ومتقـل شهرته عن شهـرة جبـر .

برغـم من صُغـر سن مروان ع (الشيخـه) ، كان عمـره ٢٨ سنـه من مات ابـو وجده واستلم الشيـخة الا انـهُ ابرز روحـه حيَل وجان معروف بغيـرتة وكرمـة وذكائة الي يخلي مستحيـل يطب بين ثنين الا مايراضيـهم مهما كانت السالفـه چبيره، مرت ع استلامـه للشيخة ٥ سنـوات وصار عمره ٣٤ وهوه مستمـر لُحقده ع جبـر و اولاده واحفـاده جـان ماشي ع حقد ابو وجده وتنافسـة معهم بمـا انهم قريبين ع بعـض بنفس القريـه جانوا، وجـان مـروان يتنافس هوه واخوته وي كُل احفاد جبـر الي بعمره وخصوصا وي زعيـم (الحفيـد الافضل، ايـد جبـر اليمين) .

زعيـم
انت شجاااااي تمخرط ؟ جاي وجايب وياك هل مزعطة هاي وجاي شتريد هـا !!

مروان وصوتـه يرعد من العصـبيه .
سجاددد كتـل اخووووي، سجـاد كتل عباس كتل اخوي الصغيرررر اليوم الدم يصيـر للرچاب وحق علـي اذا ماتطلعونه ، اريد اكتلـه بيدي نفس ماكتل اخوي طلعوا الي جاي اكلكم طلعـواا

جـان يصيح ومنهـار ع اخـو، عيـونه الحمر وصوتـه الي يرعـد توصف حالتـه الجنونيـه الي واصل الهـا

جبـر
هذا شجـاي يحجي كاعد تتهـم ابنه ! وصل بيكم الحقد تتهمون ابنه ظلم وزو امشـي روح منانه اخذ زعاطيطك وامشـي يله ناقصني فروخ انه

صـارت مشادات كلامـيه جداً قويـه بين الاثنين راح مـروان وجـان يكول

مـروان
رايح والله رايح ادفن اخوي واچي  ومنا لساعتهـا ديروا بالكم عليّ زين راح احط ١٠٠ ازلمه ابابكم بـس يلگطوا لهذا الگواد يجيبـوا

زعيـم
روووووح درب يسـد ما يرد راوينـه عرض چتفاك ولتقصـر

مروان
انة انة وانتوا انتوا وحق علي بن ابي طالب اموتكم كلكم اذا ما تطونيا

زعيم هَد على مروان ومروان راد يهد عليّ
صاروا بينهُم الناس
والشيخ جبر حاول يهدي الوضع من صدمتة من الحالة الجنونية الي واصل الها مروان
كوة فضت السالفة وراح مـروان بس هوَ جان عد كلمتة وعاف زلم بالباب خاف سجاد يطلع

عليّ
شيخ  شجااااي يصيـر سجااد ويـن

جبر
مصيبـه مصيبـه و وكعت علينا اذا سجاد صدك مسويهه انذبينـا بمصيبـه احنه بمصيبه

طبوا للبـيت ويصيحون
سجاددد سجاادد

زعيـم
وووووين رايحح هذا اردافتهم ويـن رايحح
عمـه سجاااد شفتي ويـن راح

ام سجـاد
لا وللـه يمه من الصبح لسه اني ماشايفته شكو شبي وليدي شمسوي

جبـر
شمسوي شمسوي مسوي الطامـه لكبرى كاتل ابن العالم ولكم طلعوليـا من جوه الگاع طلعوووا خل اشوف شمسووي راح اتخبـل انة

صالحة
كول يالله شيخ كول يالله لا يروح ضغطك يرتفع ويـن نوديك

جبر
راح يكتلوني ولدج و ولدهم والله العضيم راح يكتلوني

بوكت ماجـان الكل يصيح ويدورون ع سجـاد
هناك جان اكـو وحده تباوع الهم والدموع بعيونـها ، حُب عمرها سجاد كاتل واحد معقوله؟ زين شراح يصيـر بي وشلون؟

اجـه امير من الدوام ب اثنـاء ما البيت جـان مگلوب گلاب تلگتـه سيوف وهي تبچي وتكله

سيوف
سجـاد كاتل واحد امير سجاد ماهوه هسه

اميـر
كاتل واحدددد !! شلووون ؟

بيـن دقيقه ودقيقه بيت الشيخ انقلب راساً على عـقب اجو الولد وجايبيـن وياهم سجاد الي جـان كاعد وحده يم النهر و جانت حالتـه يُرثى لهـا صاروا يحجـون ويا ويعيطون وهوه ساكت ومكتفي بالسكوت فقط

يباوع ل سيوف الي تبچي ويذكر أيامهم سوى جان بوده بيـن ضوضاء هاي العالم كلهه ياخذهه ويـحضنهه حيل

زعيم
ولك احجي احجييي شلوووون كتلته احجي

سجاد وهوَ الكلمة كوة تطلع منة
مادري مادري لحد يسالني ماعرف

اكتفـه سجاد بهٌاي الكلمـات وخلـهّ الدنيـا تنگلب

جبر
ولك سجاد اكتلك هسه ومايرف الـي جفن ولك ليش كتلـته شلون هـا احجيي

سجـاد ماجان ينطق بحرف واحد
جـانوا يسالونـه انت كتلته؟
يهز راسـه ويكتفي بالسكوت !
ليـش شلون ليـش سويت هسالفه؟
مايحجـي اي شي

السـر الي محد يعرفـه سجاد وعباس اصدقاء برغـم كره اهاليهم لبعض وهاي الصداقـه جانت بالسـر ليش وشلون سجاد كتل رفيق عمرة!
وشلـون كدر يسويها وسجاد ماكو أحن منة ومن كلبة؟

زعيـم
ولك گواد ساقطط احجي شلووون كتلته شلون وليـش والله العضيم هسه اكتلك هنانه واشمرك للجلاب احجي شبيك

علـي
لك هذا خاف ماخذله شي شو تعال اشمكك

اجـه السجاد ويشم بي خاف لا متعاطي شي او شـارب ، بينما سجاد جان رايح بغيـر عالم ومستسلم الهم ولضربـهم

علـي
مابي شي ، سجاد شوف وحق علي هسه اخذك واذبك بالتحقيق واخليهم ينهوك تنهي تحجي لو شلون

جبـر
تفضحونه تردووون تفضحووونه ولكم انه تالي عمري انفضح من وره ولد والله اكتله اكتله هسه بمچانه(بمكانه) اضحك ع الناس وانه يصير بيه هيچ

داروا ع سجـاد ويعيطون ويصيحون عليّ ويضربونـه وسجاد مستسلم ورايـح بغير عالم

هـذا الشي خلـه جبر يجن جنونـه صـار يعيط ويضرب ب سجـاد ويگله

جبـر
وحگ علي هسه اخذك بيدي واطيك لاهل المچتول(المقتول) اذا ماتحجي ولك احجي احجي تكتلك بني ادم ومنووَ منووَ ابـن ال دحام ولك تريد تخرب سمعتنـا رحنه احنه رحنه بين الرجلين اليسوه والمايسـوه راح يحجي علينه اليسوه والمايسوه
ولك انة، انة شيخ جبر بتالي عمري أمشي على ناس !!

غيث
كااااااااافي !!!!!
تـرة مايصير الي جاي تسووونه بي جاي تشوفونه مو بوعيـة صح سجاد متسرع بس ماتوصل بي لهيـج انتم ليش هيج جاي تعاملونه بدال ما تتفاهمون ويـا

لزم ايدة اميـر حته يسكت لان غيث عصـبي ومايحب اسلوبهم واذا حاجوا شي وعصبوا عليّ يعصب وتصير مشكلة ابيناتهـم
واغلب المرات هيج منتهية السُبل بالعرك وعدم التفاهم بين غيث وشيخ جبر خصوصًا .

اميـر
شيخ انه اتفاهم علكيفك عوفه عوفـه
سجاد احجي وياي بعدك صغير ليـش تروح احجي يجوز نحاول انقذك احجي علكيفك واحجي

سجاد بكل برود وعدم وعي
كتلتة وهايهيه لحد يسالنـي شلون تردون تموتوني شتردون تسوولي سوولي ماعندي شي بعد اخسره ازيد من هيـج
باوع لسـيوف والدمعه بعينه ..

كـان شكله مبهذل وكانما انسـان مخمور بـس هوه ما شـارب اي شي جـان رايح بغير عالم من الصدمه الي صـارت اله!

سجـاد صغير بالعمر ١٩ سنـه جَان وجانت سيوف عمرهه مايقـارب ال ١٨ سنـه حبوا بعـض من الطفوله بكُل نقاوه بمـا انُ همه اولاد عـم وبنفس البيـت ، من اول مافتحوا عيونهـم جانوا يسمعون كلمـه سيوف لسجاد وسجاد لسـيوف وحبوا بعـض ع الفطره وع هذا الاسـاس

حاولوا وي سجـاد يحجي بالعنـف وماجانوا ينطون مجـال لَ اميـر و غيث حته يتفاهمون ويـا بما انُ هل ثنين اعقـل ثنين بالبيـت
. وجهوا السلاح نحوه ورادوا يخوفونـة وهوه جـان ساكت ومايحجـي اي شي

شوية و اچـه شيـخ حيل معروف اسمـه الشيخ مالك وگال ل شيـخ جبر انُ آل دحام راح يرجعـون من الدفـن وماناوييـن الخيـر ابد
جبـر استسلم وماعرف شنـو يتصرف
وصلت بي المرحلـه يكتل سجاد لو مـا امه تبجي وتتوسل الـهم وتركع يم رجلين جبر حته يعوفه ..

جبـر
هايهيه شيخ  نگعـد ونشوف الي يردونه وانه مستعد لاي شي

راح الشيـخ وجبر جـان يدگ ويلطم نفس النسوان ويصيح
انه اگعد بديوان وي هذا ال من بزري ويشرط عليه !
انـه اطخ راسي واروحله مشيـه انه انذل لا يابوي ليـش ليشش من وره الزعاطيطط
ولك اني لجدة الله يرحمة ما انحنيت وهو جان نفس اخوي
بس شفتة يريد يقودني رحت عنة
نوب اخلي المن بزر بزرة يشرط عليّ

محد جان راضي انُ يرحـون مشيه ل آل دحـام وخصوصا زعيـم الي جان متخبـل من السالفـة ورايح گوه عليـه

راحـوا ل آل دحـام بعد ما أيسـوا من انُ سجاد يحجي شـي

بِمرور الوقت راح تحفظوهُم، بس حاليًا خلي انطيكُم نُبذة عنهُم
آل جبـر وتعريـف عنهم كصورة عامـة
جبـر عنـده ٤ ولـد فقط
حسن (الچبير) -  اميـر ، غيث ، زعيم ، زينب ، سيـوف
حسين - علـي ، سراج ، سجاد ،ملاك، روان
محسن -طالع ب بيت وحده مو ويـاهم وعنده مصطفى، مرتضى، تبارك
حسنين - اصغـر واحد ع خلاف جبير مع ابـو جبر
فـي بغداد وعندَه بنيـه وحدهه شمس

كُلهم اساسسين بالقصـه وكلهم راح نطرق الهم حته يسهـل عليكم كلشي ومع مرور الزمن حيصيـرون زلاطه عندكم وتصيرون من اهل البيت لا تخافون محتعانون من الاسماء كُل قصه بيـهم راح تستفادون منهه هواي وتاخدون كومه دروس منهـا

توقعاتكم شنـو الي حيطلبة مـروان بالضبط ؟
وهل راح يگدر يكسِر كبرياء جَبر !
______________________

فـي بيـت آخَر  .....
آل عدنـان، عائِلة يحكُمها الجهل والتعصُب
تُربي بناتها على القمعِ والخضوع
وتطلِقُ العِنان على وِلدها ليكبروا على الطيشِ واللامُبالاة
يُقَدِسون الذكر ويجلدون الاُنثى، يعيشون على مبدأ المزاج لا القانـون
لا حَق يُحترّم، ولا عَدلٌ يُقام
مُستهتِرون في قراراتهُم، فوضويون وعديمين العواطِف
يتسترون خلفَ إسمِ العائِلة وكإنهُ دِرعٍ يُبرر كُل الاخطاء ...

سـبب
البنيـه الاصغـر لِ ال عدنـان
بـدت قصـه حياتي المأساويـه بعمـر الـ ١٨
العمـر الي كُل بنيٌه من توصـل الة تكون حـيل فرحانه
لان بهلعمـر تگدر تسافر وحدهه، تكدر تعيش وحدهه، تاخذ اجازه السـوق، تتخرج من العداديـه، تروح للجامعه الي تحبـها  ...اللخ
بـس للاسف احنـه بالعراق قلـه تصـير هاي الحالات .

احنـه ٣ بنـات و ٥ ولـد اخوانـي مزوجيـن و اخواتي مزوجـات وانـي بعدنـي وعنـدي اخت صغيره اسمهـا لُبنى 
دائما يسمعونـي كلمـه انـو انه ل ابن عمـي رائد وانـة لو اموت مستحيـل اصـير اله لانـه انسان ماعنده مخافـه الله ابـد يشرب ويكبسل و كُل سالفه موحلوه بـي، هوَ صح هيَ هاي الصفات موجودة عند كُل اولاد عمي واخواني بـس هذا بالذات جان كلش زايعها على كولتنا ..

انـه بت شـيخ ، تربيت بالدواويـين ، ابوي الشيخ جان  ، حيـل مبعدني عنه لدرجه عنده استعداد ينطيني هدية لإيّ احد في سبيـل خلاف بين ثنين يحله هوه ويطلع بوجه ابيــض !! مافـد يوم حسسني ب احسـاس انُ هوه يحبنـي ولا فـد مره كالي بـابا ولا فـد مره كالي كلمـه حلوه حتـه

امـي متوفـيه ب اثنـاء ولادتـي لذالك ابويه سمانـي سبب لان جـنت سبب ب وفـاه امي
الـي اعرفه انُ ابوي جانت يحب امي حيـل ومن ماتت امـي الكُل حملوني هل ذنب الـي اني ما الي اي علاقـة بي .

اخوانـي و اخواتي وابويه حيـل يكرهـوني وما بفـد يوم من الايـام شفت حُب منهم الـي ، وجانوا دائما يسمعـوني الكلام الجـارح والمسممـوم

عنـدي جد من احن النـاس عندي
هوَ انسان حيـل جبيـر ومابيه حيـل ومقعد بـس كلمتـه ماشيـه  و ابوي يحبه ومايرفـضله طلب ، احنـه ماعدنه بنيـه تدرس ابـد ، بس انـي الوحيده الي ادرس وجنت ع عيـن الكُل اسوي هشـي !

لان محد دارس عدهم من قبـل مـن البنات وميقبلون بهشـي ابد ، عدهم المـره اهم شي تزوج وتحبل وتجيب اطفـال!!

بس الجـان واگف بعيـنهم جدي ، جـان ابـد مايقبـل ويوگف بوجـه الكُل علمودي ويكلـهم اني اريد سبب تكمل دراستـهه يجوز لان جان يعرف انـي مو مثل الكل وممكن بـ اي لحضه يتخلون عنـي بكُل بساطه ...

دائما افكـر اشرد من البيـت واروح لاي مكـان حتـه اخلص من الي بي بس الوحيـد الي مصبرنـي جدي ولبنـى جنت حيل معتنيه بي اني اكعده وانـي امشي وهوه يموت عليه ويميزنـي من بين الكل

امـا لبُنى ف هـاي بنتي الصغيـره حاسبـتها نفس بنتي بالضبط ، هي من مرت ابـوي بس مرت ابوي محـتاره بكشختها وبـس وهامله بنتهه لذالك انـي عتنيت ب لُبنـى من الصغر

ابوي مزوج وحـده حيل ضالمـه و ماتخـاف الله انسـانه ما تهتم غيـر بس بكشختـها و ذهبها وفلوسهه ، جانت حيـل حقوده اسمـها صفـية

بعـز الشتـا وكلهه نايمـه توقت الموبايل مالتها وتكعدنـي بالـ ٤ في سبيـل  اطلع لبـره واخبز بعـز البـرد

كلش طبيعي وكلش عادي عدهه انضـرب من ايدهه يم اي احب ان كـان يم ولد عمـي او بنات عمي ، جانت دائما تعاملنـي معامله الخدامـه

جنت اذا انطق بحرف و اوكف بوجهه او اعـارضهه ابوي عده استعداد يكتلنـي بمكاني ف لذالك جنت دائما اسكت واتحمل كلشي
في سبيل محد يهيني كدام احد

حيـاتي جانت عـذاب عدهم طلعه ماطالعه لاي مكـان غير المدرسه الي يجيني ويوديني السايق الي همه حاطي الي بس

لبـس جانت الدشداشه العريضـه محتمـه عليه وممنوع اي شـي غيرهه حته بوقت النـوم ولازم تكون الوانهه طوخ حتـه ماتغري الولد (اخواني و اولاد عمي) وملابـس الداخليه كذالك جانت ممنوعـه ويعتبروها عيب (حمـاله الصدر)

جـنت اني دائما اصبر ع كُل شي واكول

راح يجي يوم من الايـام و اصيـر دكتوره واكون روحي وماحتاج لاحد بيـهم

جـان بوسط هل مراره مال العالـم اكو فد شي حلـو والي هوه الطب ، جنت اعشـق هذا الشي ومن اذكره تلقائيا ابتسم وجان يصبرني عن كُل البشاعه الي اني عايشتهه

جـنت بانيـة ب خيالي احلام كلش بسيطه
ادرس و اتخرج واروح للجامـعه ، اهلي يثقـون بيه ، يخلونه نطلع اني وصديقتـي وحدنـه ، يصير عندي موبـايل ، اكدر اسوق ، اكون مستقبلي واكون انسـانه ناجحه..
بـس هل احلام البسيـطه جانت معجزه بنسبه الي

مـرات جنت اكل لجدي

سبب
جدي شنو يعجبك اصـير شنو رائيك بالدكتوره؟

جـان يكلي  لا انتِ تصيرين معلمـة احنه ماعدنـه بنات تشتغل وي زلـم !!!

من جنت اناقشـه جان يزعل و الـي يخليني بسرعه اسـد الموضوع حته لا يزعـل مني وحته بعد مايخليني اداوم
ع كولـه اهلنه يا مستوره انستري

جانت البيبان كُلهه مقفلـه بوجهي بس كُل هذا وما استسلمـت

مـرات اصفن واكول ياريـت لو عندي ام يجـوز هاي البشاعه تتخفف الام حنينـه بطبعها هي تحمي بتها هي الي تستر عليـهه من جانوا يضربونـي اكول ياريت بـس لو عندي ام اجي يمهه واحتمـي بيها..

بديت ادرس للـسادس علمـي وجانـوا اهلي حيل معارضين هالشي خصوصا اخواني  بس جدي مايقبـل عليهم ويوكف بوجوهـم

مـرت ابوي جانت مدمرتنـي جانت خصوصا ب امتحانات نص السنه او الاخيـره تسوي مشاكل حته ماتخليني اقره وارسـب ومرات حتـه ماتخليني اروح للدوام واطلع دور ٢

صرت كلش اضايق من الوضع حجيت وي صديقتـي بالمدرسـه اقترحت عليـه سالفـه انُ اكعد بالبيت اقره وبس امتحـن نص السنه و الوزاري كتلـهه شلون كالتلي ابويـه يكدر يدبرهـا الج (نفس سالفه الانتسـاب بس جانت موكلش شائعه)

وفـعلاً صارت السالفـه وجنت بوقتـها حيـل فرحانه واحس لامـة فرحه الدنيـا كُلهه ويـايه

صديقتـي افراح من اللطف الناس الي تعرفت عليـهم ما احجي وياهه بالعطله ابد لان ماعندي موبايل وممنوع تجيني اهلي مايرضـون ف اشوفهه بس بدوام وهي حيـل حبابه ولطـيفه

بوقتهـا جابتلي ملاَزم مال اساتذه وكالتلي اقـري عليهن يفيـدوج وانطتني اسماء اساتذه باليوتيوب ..

جنت ماعرف شنو يوتيوب وشـلون بس هي علمتني وكالتلي سوي من موبايل جدج من ينام

افراح من النـاس الي ماتتعوض، ينكال عليها كِلمة صديقة بدون ما تحسسك ولو لصُفر بالمية انُ هيَ لا، هيَ مستواهة زين واني مستواي زين بس كنت دائِمًا اني اجيب درجات اعلى منها، مافد يوم تحسست او ضاجت تفرح بكُل مابيها لو شافتني زينة ومستواي زين، ودائِمًا تحفزني وتدعمني، وتحاول بالدوام تخلي نفسييتي زينة وتدعمني بكل شي، هذي الانسانة الله مصبرني بيها بحيث انتظر ساعة ساعة حتى بس اروح للمدرسة والتقي بيها واتونس وياها واسولف الها وتشاركني بجزء من همومي، ما فد يوم حسيت بمستحة من احجي وياها وافضفض الها شلون اهلي يضربوني رُغم هيَ اهلها مدلليها بالشكل الغير معقول، جانت دائِمًا تسمع مني الصغيرة قبل جبيرة وصديقة بمعنى الكلمة..

جنت حيـل فرحانه لهذا الشـي وفعلا ابـو افراح كملي كل الاجراءات مـال الانتساب من كلت لجدو فـرح وكالي يلا بعد الاحسن ضلي بالبيـت

جـان اكو حلم مرسخ ابالي ومستحيـل اتنـازل عنه
الصدريـه البيضـه الي مو لغيـري

كاعده وصافنـه ..
امشـي بالمستشفى ويصيحولـي
دكتورررره سبب دكتورره عدنه حالـه بسرعه دكتوره
اتخيـل اركض و المساعديـن يركضون ورايـه الابتسامـه شاگه حلگي شوي و صحتني من صفنتـي مرت ابوي وهي تصيـح عليه وتكلي كومي شتغلـي واخوي يصيٰح ويكلي امسحيلي حذائي بسرعه

كمـت اشتغلت وافكـر شلون ارتب وضعـي وشلون ارتب يوميَ؟

حاولت اكرس جم ساعه ومالكيت افـضل من الـ ١ لـ ٤ وقت نومهم الضهـر ومن ١٠ لـحد الساعه بـ ٤ بليـل، بعدها اخبز و انـام لـ ٧

صرت اخذ موبايل جدي واكعد اقٌره ولحسن الحظ جانت غرفتي وحدي ولُبنـى جانت ويايه موجودة

واجهت صعـوبات هوايه بـس جنت متحمسه لهذا الشـي واكول هانت وماضـل وانـي لازم اجيب الي اريده مهما كلفنـي  الثمـن  ...

استمـريت بقرايتي مـع كل الصعوبـات الي واجهتني لحد اخـر شي اجتي امتحـانات نص السنـه وجنت لازم امتحـان

لضـيق الوقت عندي و واجهتني صعوبه بالعربي جبيـره القواعـد فقط الي خلتني اترك العربي نهائيا وكلت ادخل وزاري اذا ضبطت ذنيـج والعربي يضل اخر شي

جـان سندي الوحيد بهاي الحيـاه هوه رب العالمين
جنت دائمـا اصلي صلاتي واصلي صلاه الليل و اي صلاه اسمعهـا تقضي حاجه اصليـهه في سبيل ربي يخلصني من الضيم الي اني بي

اصعـب شي انك تكون انسـان فاهم الحيـاه غير عن الي فاهمينه بيئتك والمشكله بيئتك ما تسمح الك تفكر وحدك ولازم قرارهم ينفـرض عليك ، صعب انك تواجه شخص بقوة المنطق وهو يواجهك بقوتك عليك، جنت ما احس بالانتمـاء ابدا لبيتنـا ،

جنت اكول هنيال خواتـي المزوحات تاقلمن وي الوضـع او نخلقن وهنه متعايشات ع البيئه هاي بـس اني جنت غير افكاري طموحـاتي كلشي اتخيله غير وبعيـد عنهم

والمشكله انُ الشي الي اريده واتخيـله هوَ ابسط شي ممكن للبنيه تحصـل عليّ بـس جان بنسبه الي معجـزه

اهلي من ناس المتخلفـه لدرجة انُ اذا واحد من اخواني شاف مره بالشارع تسوق يجي يحجـي عليهه وبشرفهه ويضـل يشكك بيـهه والكُل تأيده حتـه النسوان مالتنـة ..

اذا شافـوا مره تمشي بشـارع وحدهه يطلعوهه موشريفـه ورجلهه موشريف

واذا شـافوا مره طالعه وي رجال زوجهه او اخوهه يستنقصون من عنده ويكولون (هسه احنه لو نموت نطلع مره نعرضهه للشارع كدام خلك*خلق الله )

جـانت الحيـاه الي راسمتها ابالي تختلف جذريا عن حياتهم يـاريت الاختلاف بسيط جان اتعايشت وي واقعي بٌس جان واقعي مايشبه الحيـاه الي اني اريدهه ابـد ، واني الشخصيـه الي مدفونه بداخلـي والي محد يعرفهه لان دائما اطلع الهم شخصيـه البنيه الي تنضرب وتسكت . الشخصـيه هي القويـه الي ماتقبـل انُ تتنـازل عن حلمهه ابـد

واصـله بيه مواصـيل انُ
خلاص ماخلونـي اروح الطب انزل راسهم بالگاع واشـرد ومستحيل اضل يمهم وجان هذا القرار الاخيـر بالنسـبه الي .

بديت امتحـن وجنت اعتمد ع الي قاريتـه سابقاً بـس
لان طول فتره الامتحانات جانت مرت ابـويه مستحيـل تخليني من ارجع من الامتحان انام او اكعد اقـره جنت اقره بـس من تنـام بس بوقت الامتحانات حته من تنـام تنطيني شغل لازم اسوي بحيث اجي للفراش بـ٣ ب٤ مكملتـه وميته من التعب ..

اجت نتيجـه نص السنه وجنت داخله الحمدلله وكل المواد جنت بيهه زينـه الا العربي جانت درجتـي ٦٤ وجنت بوقتـها مجاوبه بس الادب والانشـاء و القواعد شويه بـس لان اني مافاهمته ..

استمريت بالقرايٌه رغم كل الضروف الي صارتلي
مـرات اكون مدنگه ع الكتاب و ابجـي بس كل هذا واني جنت مستمـره ، جانت من ابسط امنياتي اوراق حتـه اكدر احل بيهه المسائـل ، جنت احلهن اغلبهن بالهـوى

كل هذا واحس القهـر مستوليني ع حالتي بس مابيدي اي شي اسوي ، جانن البنات بالمدرسه يكللي قبل لا اكعد بالبيت مستحيل تدبريها وحدج واهس مـاكو وكلشي ما متوفر الج شلون راح تكدريـن ماتملييـن وتستمرين تقرين حته دوام متداومين

مـرات تجيني اقفل و اكول خلاص راح اعوف كلشي واستسلم بس من اصـفن اكول مستحيـل لازم اكون مستقبـل الي انه تاليتي شنـو محد يدوم الـي وبعد يومين اذا ابوي مخليني بالبيت يخاف ع سمعته يجوز من بعده اخواني يطردوني حته .

جنت اواجه صعوبه جبيـره بالرياضيات من ناحيه انُ الاستاذ مايشرح كلشي واني عندي ملزمه وزاريات واسئله من افراح ف من اجي احلهه اواجه صعوبـه جبيره ف مـرات انزل لواتساب لجدي واراسلهه تفهمني و امسحه ، طبعا جان كلشي بالختله لان لو يدرون اخذ موبايل جدي بليل يطلعوني اراسل واحد يخنگونـي ويموتوني بمكاني

تعبت حيـل وذبلت و وزنـي نزل وجهي شحب بس كل هذا وانـي مُصره .

يـوم من الايام جـانت الساعه بـ ٣ الفجـر جنت كاعده اقره ع اليوتيوب ع استـاذ الرياضيـات
وجـدي جان نايم يمي لان مايصير اخذ الموبايل و اختـلي بي حسيا بجدي موطبيعي كلساع يتفزقز عرگـان اخر شي كالي كوميني بويـه اروح للتواليت

سبب
يلا جدي كوم

باوعلـي وكالي
الله يرضه عليج بنيتي ويسويلج شكو شي تردي

كومتـه وحطيته بكرسيـه غسلتله وكملت طلعته نيمته بفراشـه ، جان هذا الشي سهل عليه لان تعودت عليه كلش من زمـان ومحد مداري مثلـي وحتى جسمير احسة قوة عليّ

اجيت اريد اقره وهوه بفراشـه يباوعلي بنضـرات غريبه حيـل كل ما ارفـع راسي الگا يباوعـلي وجانت نضراته تخجلنـي
و الي يخليني ادنگ راسـي واني ميته من الخجـل

جان مبين ع وجهه مـادري شبي بس نفس التعبـان

لحدمـا سمعت صوته وهوه يكلي

سبب تعـاي بحضنـي

استغربت من حجيـه!
جدي بعمره وبحياتي ما حاضني ولا بايسني مجرد اني ابوسه من ايده وبـس

كـالي عوفي الكتاب وتعـاي شويه

كمت بس انـي حيل متوتره و خجلانه..... يتبعععع
توقعاتكم؟؟الـي يتوقع صـح انشر حسابه ....

توقعاتكُم؟
كأول بارت بالقصـه ارائكم تهمنـي ؟ شنو رئيكم بالسرد وبكُلشي ؟
البارت ٥٠٠٠ كِلمة لعيونكُم 🫣

اكـو لحظات ننجرُّف بيها ورة التحدي، نركُض ورة شي ما يشبهنا، ننسى شنو نحِب، وشنو نخاف، وشنو نؤمِن، وشنو أحنة!
مرات نلعب لعبات مو لعبتنا، ونسوي اشياء ما تشبهنا، بَس لانُ نريد نثبت شي، او نثبت نفسنا، او يمُكٍن بس حتى نثبت للناس انُ احنة نكدر، بس بالحقيقة، مُمكِن نضيع واحنة جاي نحاوِل نثبت نفسنا، مرات التحدي يقتل ويوديكُم لـ اشياء ما كنتوا متخيليها ابدًا، لحظة تهور واحِدة قادرة على إنها تدمّر حياتكُم كُلهة ..
الكاتِبة : هُدى آذار ..