رواية بيت جبر الفصل الرابع والعشرون 24 - بقلم هُدىٰ آذار

مَساء الخيررر
اليـوم البارت راح يكون طويللللل حَيل
وراح اذكر الكُم اكثر شي ايلول و علي
كُل شي وبالتفصيل المُمِل
ادري بيكُم تحبون التفاصيل 😂
___________

ايلول
هوَ يحچي ودموعي تنزل بصورة لا ارادية
يحجي بنبرة كُلها حِنية كُلها حُب كُلها صدق واخلاص
احِس علي تعذب، تعذب بسببي هواي
مادري شلـون جرأت نَفسي وبشكِل لا ارادي كتلة

ايلول
تدري طول عمري ادور عَ الأمآن
ومـا جنت الگآ
بس لگيتة بيك

علي
اويلي عليك علي
احَلى مِن كلمة احبك حَتى

ايلول
علي لو صاير بيك شي
حجيتها واني اجر بالكلام جَر واحس اريد ابجي

علي
شعجب هل ايام تحنين علية او انة عبالي وجودي والماكو سوى

ايلول
عليي

علي
روحة مِن الدنيا

ايلول
بَس الدنيا ؟

علي
والآخرة هم

ضحكت عَ كلامة وكتلة

ايلول
تِدري مشتهية تمُر

علي
وحلاوي هم، باجُر نازل وبوجهي للبصَرة اجيبلج واروح لديرتنا ارتاح شوية واشوف شكو ماكو والعصر لو بليل اجيج

ايلول
علي شنـو اكثر حلاة ضايگهة وتحبها ؟

من كتلة هـيج اجتني صوت ضحگتة الهستيرية وهوَ يگول
علي
الله يلعن تفكيرك ياعلي

صفنت عليّ وكتلة
ايلول
شنـو ؟

علي
ماشوف نَفسي ضايگ حلو لحد الان، مُستقبلاً اكيدد ...

مادري ليـش حَسيتة يحجي فَد شي غلط بس بتحديد شنـو ماعرفت

رجعِت حجيت ويا بجدية
ايلول
علي لتقلل أدب هاااا

علي
حبيبتي والله السالفة كلها غلط ادري
اوكفي خل اكعد عدل واحاجيج

ايلول
يلا احجي شبيـك خوفتني

علي
بس دسمعيلي زين، أنة متأكد راح أكون أحسن أب بالعالم،
يعني حتى واجبات أولادنا أحلهن انة
شني برياضيات انشتاين ميلحكني والفيزياء هههي اسوي للمُعادلة زط بط لنها محلولة

واذا ع الاسلامية فَ اصيرلهم شيخ بالجامع والعربي لا والله يعذروني عمهم امير موجود لان انة رجال بدِوي

وهـا اذا انتِ تعبانه أطبخ، بس لا تعتمدين عالمذاق اهم شي الشكل
وإذا بناتنا ما رضن ينامن، أگعد أحجيلهم سوالف قديمة عني وعنج،
واكلهم شلـون امهم جانت عنيدة وراسها يابس وشلعت باب كلبي

هاي الجدية مالتة عود من حِجة هَيج ضحكت وجاريتة بالكلام
ايلول
وإذا البنات طلعوا مثل أمهم قوية وراسها يابس؟

ضحك وگال:
علي
اويلي عليك علي اذا بـ بدال وحدة تنرزق بـ ٥
هيج اريد افاريخ هـواي يعني فد ٣/٤ بنيات ايلولات صغار
ينكدن علية هنّ وامهن ويكرهني بـ ام عيشتي
واريدلي اخو الهن واحد احط راسي على راسة ونحتار بيچن

نايـمة على بطني ورجلية رافعتهن وافر بيهن
وابتسامتي مليانة وِجهي وحاسة بـ احساس يجنن
وكإنهُ احساسة واصلني وتعشعش بية ..

علي
اكلج فِنچ شني انة قررت اريد ٤ بنيات شني ٣ مايكفن
أربع بنيات وولد... هيچ التشكيلة المثالية،
البنات كلهن يشبهنچ، نفس العيون اللي تكطع النفس،
ونفس راسچ اليابس... الله يساعدني بس ميخالف تمونون ..
وذاك المسكين الولد، يظل يتعارك وياهن ويدور على ابو حَتى ينقذة
وانة اجي عود اريد ارد العايل بس اشوفج انتِ وبناتج تبجون
اكتلة واكلة انعل ابوك لابو الجابك ابن الكلب اطلع واطردة
بهيج حالة مترهم يراد ثنين اخوان يسندون بعضهم
وانة، احير بينچن... أرد مرضى وحدة، تزعل الثانية،
واذا راضيت الثالثة، الرابعة تكلي: "بابا انت تحبهم أكثر؟"

هوَ يحچي واني اضحك عَ كلامة وحماسة
واحس نسيت كل شي وضليت اجاوب ويـا

ايلول
امممممم الظاهر تحب البنات

علي
طبعًا شعدي غيرهن وغير امهن
على حُب امهن احبهن
أصلاً من هسه راح أبلش أكتب وصية،
وأكتب بيها: "لا تعاندون أمكم، ترى إذا عصبت تسوي انقلاب عسكري بالبيت"

ضحكت مِن حِجة هيج حيل وتعالت صوت ضحكاتنا سوى وهو يكلي
والله شبيج ...

ايلول
والله ضحكتني علي

علي
شوفي ايلول... أنة إذا ضحكت فـ لأن ضحكتچ،
وإذا فكرت بالمستقبل، فـ لأن بيچ،
ماكو بيت بگلب علي إلا وانتِ أول زاويـة بيه
احِس راسم حياتي المستقبلية كلها ويـاج
واذا وي غيرج ف راح يكونون زعاطيطنـا

ما أدري شصار،
بس فجأة حسيت بشي غريب، شي أول مرة أحسه،
هوَ يحچي ويمزح ويضحك،
بس عيوني ما تشوف إلا الطيبة اللي بعينه،
ذاك الحُب اللي كلشي بيه نقي،
الحب اللي يبرد الكلب، مو يحرقه...
اللي يخليني أباوعله وأكلي:
معقولة انت حقيقي؟ معقولة هالإنسان موجود؟

وجود علي بحياتي وبهاي الطَريقة
جان شي اشبه بالخيال والمُستحيل بالنسبة الي
اني الي اهلي ما ضكت حبهُم
شلـون داضوگ كل هذا الحُب من انسان طلع بحياتي فجأة؟

كلشي بيه مبيّن عفوي...
ما جاي يتصنّع، ما جاي يمثل،
هوَ يحب، وديبين حبه مثل طفل،
يحچي عنّي وعن بناتنا وعن المستقبل،
وكل أمانية نبتسم سوية

فرحت، فرحت بطريقته، بحنية صوته،
بطريقة يخلي كلبي يرجف وأنا ساكته،
بس... مگدرت أبقه ساكته أكثر،
گلتله بنعومة، وعيوني مليانة حُب لاول مَرة ..

ايلول
علي... تگدر تجاوبني بصراحة؟
ليش حبيتني؟
يعني... شنو بيّه خلّاك تحبني لهالدرجة؟
أرد أسمعها منك، لأن كلشي بيك يخوفني من فرط الصدق الجاي احسة ..

تنفس بعُمق وجَر حسرة وگال

علي
مادري... والله مادري،
ما صار شي غريب، ما گعدت أقرر،
ولا گعدت احسِب ومدري شني
بس من شفتج... حسّيت كلشي بيج إلي،
عيونج، عصبيتج، نچارتج وكل شي صلف بيج
مادري يعني كل صوت بية يكلي هاي إلَك، لازم تكون إلك.
وبكل مرة احاول بيهـا احاجيج اعصب وانهار وافقد اعصابي
وارجع للبيت اكول انة بعد احاجيها لو اموت
وبَس اشوفج يتغير كل شي بية وارجع اريدج بكل مابية
وكل لحظة بعدها، تأكدت إنُ مو بس لازم تكونين إلي...
لازم تظلين إلي،
وبيني وبين نفسي؟
ما أريد غيرچ... ما أريد أحد غيرج ابد
احس رباط من رب العالمين
الله كاتبج الي فَ لو الدنيا كلها صارت علية
مايهمني، دام الله وياية ..

هوَ يحجي واني دموعي تنزل

ايلول
علي خليتني ادمع

علي
اويلي على علي عمي انة كلشي اريد بناتي يتوارثن منج الا البجي والحساسية ماررريد اريدهن نچرات يطگن بس مايبچن

حجة هيـج وخلاني اضحك
سكتنة شـوية ورجِع سإلني

علي
ايلول شنـو رأيج بية
يعني اذا هَسة كتلة احجيلي عني شنو راح تكولين ؟

ارتبكت من سؤالة وصفنت
جان ودي اكول احسك فضائي مو حقيقي
واحسك انسان ما مطروق وكلبك ماكو اطيب منة
بـس جنت استحي

ايلول
اااا مادري يعني شنو احجي بَس شخُص زين مُحترّم خوش انسان

علي
بَس هذا مو كل شي
احس بچوفج اكو حجَي يريد ينحجي بس انتِ تكابرين

ايلول
لا تحرجني علي هذا كُل شي

علي
لا مو كِل شي بس راح اصبُر حدّما الله يفرجها علية

نعست وهوَ يحجي كلي كومي حطي علاجج ونـامي
حَطيت علاجي وجان قوي شوي العصارة كون احطها بظلام وألمها ميتقارن بـ الم ذيـج ابد

احِس الالم ذكرني بعلي وشنو راسمة ويـاي
اندعيت من ربي الله يعديلياهة ويرتبلي حَياتة بنفسة
وخليت ونمت

اليـوم الثاني فَرس رادت تجي فـ خابرت علي كلي اني اساسًا جاي فَ قرروا يجـون سوة، جِنت كُلش فرحانة لجيتهُم ومنتظرتهُم عَ احر من الجُمر

باوعت لجرحي صاير احسَن من قبِل
يعني قبِل كانما لحم وطالع اما هَسة ف ملتأم وطبَقة جلد فوگا تحسهة نفس طبقة جلد العجوز بَس جوزية
ف كمت اوخر كُل الضماد واحط بس باندج صغير عليها

جِنت كاعدة ومنتظرتهُم خابرت فَرس حتى اشوفهُم وين
اول ماخابرت ردت

ايلول
ويـن صرتوا

فَرس
ولـج علي مخبل
والنبي مدري اضحك مدري ابجي من التعب
لج جابنة لديالى ديدورلج تمُر خِستاوي يكول ما كدرت اروح للبَصرة اجيب تمُر حلاني مدري شنـو وصارلة ساعة يدور وهَسة نزل لكة واحد يبيع

ايلول
يـا عزة ولج البارحة اشتهيت تمُر وكتلة

فَرس
كولي والله؟ واني اكول شبي والمن يريد
ونوب استحي اسئلة
عَزة بعينج ايلول راح اجي والنبي اذا ماحبيتي علي انتحر اني مكانة

ضحكنة سوة واني كلبي لاول مَرة احسة يدگ حَيل وبصورة غَريبـة

فَرس
اصبري اجة اجة واخيرًا جاب الخِستاوي

سمعتة يصعَد ويكول لفَرس

علي
حصلت الحمدلله، بس ما مقتنع اخذلهيـا هَيج راح امر على مكتبة صخام لطام يسويها بصورة حلوة هيَ نفسيتها ماش نوب اخذلهيا بهجي حالة حتى ما تاكلة ادري بيها

فَرس
علي تـرة هوَ تمُر مو ورد وتزروقة

علي
عمي شبيـج دصبري جنج امير ما عدكم صبر
جاهلكم شيطلع ابو گميزة

گال هَيج وفَرس ضحكت ع كلامة واني ضحكت

فَرس مابينت الة انُ هيَ دتحاجيني سَدتة وضليت منتظرتهُم

المَسافة طويـلة فَ بهاي الاثناء نمِت اني عمّا يجـون
من كعدت جانوا ع ابواب يجـون وجان يوم جُمعة اهلي ماعدهُم دوام خبرتهُم بجية علي وفَرس سوة، كتلهُم امير عندة شغُل وعلي جابها

ابو ايلول
فشلـة لعد بابا اعزموا علي عَ عشة

ام ايلول
اي والله عيب يجي وما يطُب

فَرحت وهمة يكولون هيج خابرتهُم واصلين تقريبًا ما ضل شي ويوصلون

ايلول
علي هذا بابا هنا يكول خل يطُب يتعشة ويانة

علي
هلا هلا بعمي الغالي المعِزب
اطبلك وانة الممنون انة رايد منك هجي التفاتة
واخيرًا حَسيت جنك بتك راسكم يابس
اسمعي ولج كوليلة علي يكول لا فشلة ما اطُب
خل ابيع ثگل شوية فشلة شيكول ما شايف

ضحكت وهوَ يحجي هيـج واهلي منتظريني اجاوبهُم لان جانوا كدامي

ايلول
امممم بابا علي يكول لا ماريد ازحمكم

اخذ بابا مني الموبايل وصـار يحجي وي علي ويكلة تعـال ومدري شنو
واني اضحگ عليّ عود يماطِل ومدري شنـو

فرحت انُ راح يجون والضحگة شگت حلگي شگ ع كولة علي
باوعتلي ماما وكالت

ام ايلول
ها شو فرحانة

سديت حلكي وبطلت اضحك وكتلها بجدية

ايلول
مو فَرس حتجي واني مشتاقتلها

باوعتلي بشك وسكتت اخذت موبايلي من بابا ورحِت ابدل
بابا كال اني راح اجيب اكل مِن بَرة

لبست فُستان ابيض طويل ومنفوش بسيط وحلو
وحطيت عَ شعري شال لون احمَر
وما ادري ليش بس هَل مرة بتحديد حَبيت احط حُمرة

باوعت لنفسي بالمراية واني فرحانة حَيل ومتحمسة بعد اكثر
وهم مشتاقة لفَرسسس كد الدنيا
وهم متلهفة لجية علي

شويـة وسمعِت صوت الجَرص وهوَ يندگ
وصوت ماما وهيَ تكلي ايلول انزلي افتحي الباب

باوعت من شباك غرفتي علي وفَرس واكفين طرت بسرعة
والضحكة ما اكدر اوخرهـا من عندي
ما ادري شبية

طلعت بَسرعة بس من وصلت للباب احس ارتبكت
اخذت نفَس وفتحت الباب
صـارت بوجهي فَرس

اول ماشافتني حَضنتني حَيلل
حضنتهـا بكُل قوتي وجنت كلش مشتاقة لشوفتها

علي طَب وجـان بـ ايدة علاليك كومة وعلبة هّم
سـد الباب واتبع الصمِت

باوعتلي فَرس وعيونهة دمعن واني صرت اكول الهـا والله مابية شي لتخافين وصرت احسَن
رجعت حضنتني مَرة ثانية
بَس حسيت فَرس مو فَرس
حسيت حيل جانت مقهورة وضايجة

اجانـا صوت علي وهوَ يتحمحم ويكول

علي
اذا سمحتوا كافي شدعوة

وخرنـا ثنينة واحنة نباوعلة
باوعتلة لابس تشيرت اسود نُص اردان وعضلات ايـدة حَيل بارزة
وبنطرون كابوي ازرق
علي غالبًا ما يهتم لـ لبسة وشفتة وشافني تشيرت او قميص وبنطرون
بس مُشكلتة وسيم برُغم عدم اهتمامة بالتنسيق ومدري شنـو

باوعتلة وابتسمت، ما اكدر اكول بادلني بالابتسامة لان ابتسامتة مارايحة عن وجهة اصلاً

اباوع انطاني عِلبة وبيهـا تمُر حَيل حلوة

فَرس
هاي بسببها تاخرنا هلكد
يكول تفرحها فرحتج ؟

ايلول
يااااا فَرس تجننن شوفي شكد حلوة

ضحگ وكال الها

علي
ها مرت اخوي شكتلج
كتلج راح تفرحها
شوفت عيونهـا وهيَ تلمع تستاهل هل فَرة كلهة

يحجي واحنة مبتسمين ثنينة ومانعرف شنجاوب حَتى
بهل اثناء طَب بابا تسلاموا على بعُض

انتبهت علي جايب فواكه ويـا همستلي فَرس

فَرس
كلي هاي عاداتنا من نروح لبيت واحد مَريض انخُبص خبُص
يكول اول مرة بحياتي استنگي فواكه ( هو هيَج حجاهة )

هيَ تحجي واني مبتسمة، بابا تشكرة وكلة شنـو هاي الزَحمة
طبينـا لجوة واجتِ ماما سلمت عليّ
جـان خجلان كومة بس بنفس الوقت يحاول يسوي روحة عـادي ويحجي طبيعي

قَبِل لا اصعد بابا شاف العلبة بـ ايدي سالني شنـو هاي كتلة علي جابها باوعلي بنظرات انُ ماعاجبة الوضع وخلة وطب للاستقبـال يم علي

ماعجبني بابا بَس سكتت كلت قابل ما عاجبة وجود علي ومودي عليّ؟ اكيد لا ..

اخذت علبتي وصعدت لفوگ حَطيتها بغرفتي ونزلت

كعدنـا اني وفَرس نحضُر بالعشا وماما وبابا كاعديـن يمة باوعت لفَرس وكتلها

ايلول
فَرس شو ما مرتاحة لبابا، هوَ ماعاجبة علي بـس ب ايام ماجنت متأذية حَيل جان مُضطر يجاريني وميكول لا وجان يعرُف انُ هوَ مُقرب علية ف ميكدر يحجي شي بَس هسة من شاف العلبة باوع بنظرات مدري شلونها بس محلوة خايفة لا يحجي شي ويضوج علي

فَرس
لا ماعتقد تطلع من ابـوج ايلول لا تفكرين ولاشي خلينا نروح نوديه الاكل يلا

ودينـا الاكل عَ طاولة الطعام بالصالة، وبابا صاح لعلي واجوي
اباوع لعلي كاعد بينهُم نفس المؤدب الحباب
حَتى مارفع عيونة تِجاهي

كعدنـا عَ الاكِل جان بابا كاعد بصف علي وامي من جهة ثانية واني فَرس مقابيلهُم

بدينـة ناكِل وبابا بدة يحچي وي علي

ابو ايلول
ايّ بابا انتَ شنـو رتبتك حاليًا ؟

علي بـ هدوء
عمي انة مُلازم اول حاليًا ما صارلي من اترقيت الحمدلله والشكُر

ابو ايلول
زيـن شنو خططك المُستقبلية يعني معقولة تكمِل حياتك كلها بالجيش العراقي ؟

علي
حالياً مستقر بمكاني، والحمدلله أموري ماشية هم تخدم بلدّك وهم جاي احصل انة واخدم نفسي واهلي وخير مِن الله ليـش لا عمي .

أبو إيلول (يهز راسه ويضحك )
إي طبعاً... بس شوف بابا الحياة مو كلها بندقية وخيمة وركض، لازم الواحد يخطط لأهله، لزوجته، لأولاده...
يعني مثلاً اني كَ أب وعندي بنت وحدة
من يجيني واحد عليهـا بالجيش شنو الشي الي يخليني انطيهيا ؟
او شنو المقاومات الي عندة وتخليني أمن عليها ؟

مِن حِجة هيج احس انصدمت
باوعت لعلي باوعلي واحسة گوة كاتِم العَصبية ومصدوم من الجاي يصيـر

أبو إيلول (ينظر للأكل ويكمل بنبرة كأنها مزحة)
يعني تخيّل بنتي، إلي عمرها ما شالت شي ثگيل، ترتبط بشخص بيطلع اليوم أمر نقلة، وباچر مهمة ميدانية، وبعده يمكن دوريات أو جبهات.
منو يضمن حياتة ؟ منو يضمن استقرارها؟
كَ استقرار مهنتك مو مُستقرة ابدًا
وحياتك انتَ ما محافظ عليها فَ شلون راح تحافظ ع حياة واستقرار انسان ثاني ؟

اباوع لعلي عدل كعدتة وگال بـ اسلوب حاد
كل شي بيد الله عمي، انة أشتغل بشرف وأحافظ عَ الي أحبه، وهاي تكفيني.

أبو إيلول (باستهزاء مغطى بابتسامة)
إي إي الشرف شي طيب، بس هسة الدنيا تغيرت، الناس تدور استقرار ومستقبل واضح...
يعني مثلاً، منو ما يتمنى يصير نسيبه طبيب، محامي، مهندس... ناس نرتاح نعرف بناتنا بأمان وياهم.
بابا، أني مو قصدي أحرجك، وبابا ايلول اسف الج لان جاي احطج بـ النص اني ادري انتِ لا احلامج هيج ولا طموحاتج هلكد بـس جاي نحجي كَ سبيل مثال لا اكثر وبصفتي اب

من حِجة هيج اباوع لرجل علي كدامي كلم يهزها بكل قوتة وبالكوة متمالك نَفسة وكاعِد بمكانة

علي (بصوت خافض بس بنبرة واضحة)
عمي، كل مهنة بيها خطورة وتضحية، بس الشغلة مو بالشغل... الشغلة بالمعدن. الي يقدر يتحمل نفسه، يقدر يتحمل عائلة.

ضحك بابا وگلة
إي بابا، بس المعدن وحده ما ينفع، هاي مو معركة، هاي حياة. بيت، عيشة، أطفال. يعني تخيل فد يوم مرتك خابرتك وهيَ محتاجتك هسة للدكتور وانتَ عندك واجِب، وين ما شخص دكتور او مهندس حُر يعوف كل شي بيدة ويروح و وين الي يدوّر اجازة من اللواء حتى يمرّ يشوفها!

علي (يحاول يسيطر على أعصابه)
عمي، إذا عَ المسؤولية، فـ إحنا انولدنا واحنة شايليها.
واتمنى ما تشيـل هّم مرتي لان مرتي راح تكون بعز وجاه ودلال
ومو انة الي اخلي واحِد يتحكم بروحتي وجيتي ..

أبو إيلول
إي بس ترى الزمن هذا ما يعترف بَس بالمسؤولية. يعترف بالشهادة، بالمركز، بالسيارة الي واگف بيهـا وبالحياة الي راح تقدمها للي وياك .

علي
رُغم انّي من عائلة الله رازقها ابًا عن جِد ورُغم وضعنا الميسور وحالتنة المادية الجدًا مُمتازة،وبغض النظر عن اهلي وبالنظر الى وضعي الي الله مكرِمني بَي بَس ياعمي تـرة السيّارة تتغير، واللقب هم يتغير... بس الرجولة؟ هاي تبقى. وإذا هاي مو كافية حضرتك، فـ يجوز إنتَ تريد رجل من كارتون، مو من لحم ودم.

ام إيلول
والله صحيح كلام الولد، مو كلشي بالحياة أرقام ومناصب... مرات نختار ناس، مو لأنهم كاملين، بس لأن قلبنا يحِس بالأمان يمهم

ابو ايلول
مو موضوعنٰا هاي موضوعنا على مهنتك الغير مُستقرة والي ما توفرلك حَياة كريمة الك ولعائلتك كد المهن الاخرى نفس الدكتور وغيرة ..

علي
عمي انة ما اريد اقلِل من مهنة شخُص
بـس كل الي ذكرتهم لو لآنة ما جان احد عاش ومارس مهنتة
والي صار ب ٢٠١٥/٢٠١٦ انتوا شاهدين عليّ
ما اعتقد احد حِمى اعراضكُم و ارواحكم غيرنـا ..

أبو إيلول (ينفخ ويعدل كعدته، ونبرة استعلاء واضحة):
بابا، ترة مو الكل گام يتباچون ويصيحون من الدواعش، الناس الي عدها عقل طلعت أول يوم، شردت، شالت عيالها وراحت...
مو گالت: "لا إحنا صامدين، إحنا ننتظر الجيش يخلصنا"؟
ماكو شي اسمه صمود، أكو شي اسمه غباء.

من حِجة هيج موتني
حَسيت انُ بابا شبي وشلـون هيج جاي يحجي
هوَ بطبيعتة بي داء العَظمة وعندة بـس هوَ وبَس
وحَتى تعاملة خارج اطاري مو حلو لا وي ماما ولا عند الي يشتغلون عِندة بس هذا الشي ابد ما توقعتة منة بساعتهـا

ردت احجي علي كالي من رخصتج وحجة

علي
عمي، ترة الناس مگاريد الله انسبوا سباية كربلاء الله وكيلك، مو الكل عنده سيارة، ولا جواز، ولا رصيد بالبنك.
وحدة چانت لازمة بيد أمها وتباوع بباب البيت وما تكدر تطلع لان رجال ماعدهم ، وواحد چان شايل أبوه المشلول ويطبب من شارع لشارع،
مو كل الناس خلوا عيالهم ورگضوا، أكو ناس ظلّت حتى لو چانت النهاية موت لان ماجانوا يكدرون يطلعون ..

ام ايلول
والله كلامك صح اني اخوية واحد من الناس ما كدر يطلع ونلعب بية جولة ع رغم اخوية دكتور بس ماجان يكدر يطلع لان امي انسانة مُقعدة

أبو إيلول (باستهزاء واضح)
بَس الموت غباء إذا إنتَ گادر تطلع.
يعني شنو تبقى وتنتظر يجيك "الأمل" بمدرعة؟
الي باع ذهب مرته وسافر، هذا الفهيم.
أما الباقين؟ يا أما أغبياء، يا أما جبناء، ماعرفوا يخلّصون نفسهم.
وحَتى اخوج ثائِر غبي لو عدة معارف جان كدر يطلع بس هو ما مأسس حياتة صَح ..

ام ايلول
ترة السالفة موهيج ابدًا
هوَ منو يعرف الثاني ساعتها كُل واحد يكول ياروحي

ابو ايلول ضحك بـ استهزاء ..

علي (نبرته حادّة بس محترمة)
عمي، هاي ناس اتعذبوا وجاعوا، وانخطفوا نسوانهم، وتذبحوا أولادهم، لأن ما عدهم واسطة تطلعهم.
وإنتَ تستهزئ بيهم؟

أبو إيلول
إي بس الحياة اليوم تريد ذكاء، تريد مراكز، تريد واحد يگدر ياخذ خطوة قبل لا يوگع... مو واحد ينتظر القدر ياخذله قرار.
وكل الي ذكرتهم لو مشغلين عقلهم سابقًا ماجان وصلوا للعجز هذا

اباوع لعلي ضحك ضحكة استهزاء وگال
وإنتَ شكد خططت، طلعت، درست، فتحت عيادة، بس ما گدرت تحب غير روحك.
وإذا گدر واحد يحب غيره ويفكر بغيره، ترى هذا أعظم من ألف شهادة.
والحمدلله احنة الجنود الي معاجبيك من نطب ساحة المعركة اخر شي نفكر بي هوَ روحنـا
وهَسة تسمحولي لان عدي شغُل

ام ايلول
مـاما ما اكلت بعدنة ب البداية

اباوع لبابا ما گام ورا بَس گالة

ابو ايلول
شوف موكتلك عَ ايّ ساعة يجيك شغل وحتى راحتك ما ضامنها بس انتَ تعاند بابا

كال هَيج ورجع ياكِل
اباوع لعلي راد يحجي شي رجع باوعلي سكت وخّلة وطلع

يُمة اني احس اعصابي اتمدمرت
عفتهُم وطلعت رأسًا ورا

يلبس بحذائة وما يحجي ولا حَرف
بس وجهة صايرررر احمَر دم من العَصبية

ايلول
علي شبيك خل احجي وياك حباب

علي
ايلول ابد لتحاجيني ابد

خَلة وطلع لبست برجلي وطلعت ورا بسـرعة
صرت كدامة واحاجي

ايلول
علي والله اسفة بَس بابا
بابا ماعرف شبي

باوعلي و وجهة يريد ينفجر ويحجي
علي
ابوج انسان فاشِل بمعنى الكلمة
ياريت بـس لو مو ابـوج جان وحق الله اعرف شلون اربي لو مو بكد ابوي

ايلول
علي لا تحجي هَيج ع بابا

علي
ماحجي هيج ع بابا مو؟؟
بـس هوَ ما تحجيلة وتعلمي ع الاصول

عمرة بال ٦٠ سنة وهوَ مايعرف شنو الاصول
وما يعرف شلون يصير رجال معِزب ويحترم ضيوفة

ابوج طردني ايلول طررردني
واصلاً جابني حتى يهيني
وما طلع من ظهر ابو الي يهيني

هوَ رجال وانة رجال
وياعيب اخلي رجال يهيني
اصلاً جيتي هاي غلط بغلط
بس كلت ميخالف علي اكسر مبادئك شوية
واتقرب الة واتعرف عليهم اكثر
بـس شكلة من البداية ماجان ناوي عَ خير

يحچي واني اباوعلة بقهَر والدموع مجمعة بعيوني وما اعرف حَتى شحجي، جان معصب هـواي وحَيل ضايـج جان يحجي وياي و وصلت سيارة بصف بابنـة

باوعت خالتي وعز الدين

باوع علي بعّدم صبُر وگال بهمِس

علي
يارب چا كل كفار قريش علية فردمَرة ..

رحت سلمت عَ خالتي وسلمت عَ عزوز مِن بعَيد
باوعت علي سلـم على خالتي
وخلة وراح

عِز الدين انصدم انُ هوَ ما سلم عليّ
وضل يسالني شكو ومنو هذا
بس اني جنت اكلة مشغول ومستعجل يجوز ماشافك

اول ماطبـوا تسالموا بينهُم بـس عزوز جان حَيل ضايج

إيمان ( خالتي )
هَسة يا ماما الدنيا ضلمة بجوز صدُك ماشافك

ماما سالتهم شكـو حِجة عز الديـن وكمل كلامة بـ
هوَ هذا منو ؟

ابو ايلول
واحد همجي ما يفتهم ايّ شي ومسوي روحة هوَ ولا عنة
ايلول صداقتج هاي البدون طعمة انهيها ويـا
هذا انسان مو من مقامنا ولا مِن مستوانا اساسًا بابا

ايلول
بابا عـاد لتخليني احجي اني بدون شـي شايلة كومة بكلبي عَ الي صار مساع ! يعني انسان معزوم يمنة هوَ هذا تعامُل تتعامل بي ويـا هَيج !!

ابو ايلول
ليش دتعيطين هـيج ايلول ؟؟؟؟
اعرفي شنو دتحجين و ويامن بابا
هذا انسان مُتَملِق ومو مصادقج لـ الله ابد

ايلول
بابا شنـو قصدك مو لله مثلاً ؟
هوَ بعازتي ترة بيتهُم نفس بيتك بـ ٤ مرات
من رحِت ويـا لبغداد بهاي روحتي للطبيب ما خلاني رُبع ادفع

ابو ايلول
عفية عفية وانتِ شنو وتخلين واحد يصرف عليج
لعد ابوج وين راح ؟؟

ايلول
بابا رجعتهن الفلوس الة بس الزُبدة اريد اوصلكياهة علي مو بحاجتي حتى يتملق الي !
والي سويتة كُلشش عيب صراحة

ابو ايلول
مو انتِ تعلميني العَيب
ام محمّد انسان جاهِل جاي بحجة صداقة وضاحك عليها وهوَ عدة نية زواج ومدري شنـو، جايني من رِيف معيدي ويريد اطي بتي عود هو ذكي جاي حَتى يرهم الاوضاع ومدري شنـو

إيمان
لا خالة مستواج مو هيج انتِ مستواج اعلى اسمعي كلام بابا

عِز الدين
واني اكول شبي مايسلم علية طلع من ذولـة المعدان المايفتهمون شي

ايلول
رجاءً ما اقبل تحجون عليّ هيج، علي مُلازِم اول ومُثقف ومُحترم مو انتوا الي تكولون عليّ هذا الحجي
التفتت لبابا وكتلة
والله ماعرف شحاجيك انتَ بس يا بابا الي سويتة حَتى الطفِل ما يسوي وين اكو واحد يهين كرامة ضَيفة بهذي الطَريقة !!

حجيت هيج وسمعت صايحة وراي ما هتميت وخليت وصعدت
وي صايحة ضل يكول ( عَديمة اخلاق، واني احجي لمصلحتها ) ضجت حَيل شلون يحجي هيج علية ويم خالتي فوگاهة بابا شبي صدُك يحجي

اول ماصعدت صعدت فَرس وراي وجانت مصدومة حالها حالي

فَرس
ما اكدر احجي عَ ابوج كدامج بـس ايلول الي صار كُلش موحلو بحق علي خصوصًا ابوج وجهلة طردة بس مو مُباشرة

ايلول
لج ادري ادري والنبي راح اموت هوَ بابا شلون كدر يسوي هَيج مادري !! لج حَتى ماما استحت شكد حاولت تغطي سالفة بَس جان مُصر حَتى من كام علي ماكام ورا

فَرس
وعاد هُمة شلونهُم رحت وشفت تدرين من نزلت اسلم عليهُم الكُل وكفوا وسلموا علية والله اخلاقهُم مُستحيلة ومُستحيل شلون تعاملوا وياي ساعتها لا وفوكاهة وي علي والله ابد ميستاهل هيج تعامُل علي
شايفة بالطَريق شلون فرح من ابوج عِزمة وگال هوَ احسة ميطيقني ويحجي بنبرة حادة بس لان جانت ايلول مريضة ف يسكُت

ايلول
متفشلة فَرس متفشلة
وما اعرُف حَتى شنو اسولف وي علي

فَرس
احس من بعد الي صار علي مُستحيل ينزل روحة ويحجي وي ابوج

ايلول
ادري متاكدة من هذا الشي مَرة عقيد حجة ويـا بنبرة موحلوة ومن معارفهم ويعرفوا تخيلي علي لحد هَسة مايحاجي ولا يسلم عليّ يكول جدي يحجي علية يكلي حاجي وهوَ ابد ادري بكرامتة شكد عزيزة والي سوا اليوم بابا شي ينزل الراس

فَرس
دخابري ايلول خابري وافتهمي منة

جبت موبايلي خابرتة مايرد علية

ايلول
من يعصُب ما يرد علية

فَرس
عود ليش

ايلول
يكُلي ماريد اسمعج كلمة موحلوة، اني ادري بروحي من اعصب اتسودن
اباوع لفَرس كلم تضحك وتباوعلي، لا تضحكين فَرس والله هوَ هيج يكُلي

جـنة نحجي اني وفَرس واحاول اخابر علي بس ما يرُد
شوية واندكت الباب كلت منـو صوت عزوز

فَرس
عزة استحي هذا وين صعَد
خل انزل

ايلول
اششش ضلي هنانة فَرس حبابة اكعدي ع جرباية وديري وجهِج اذا  تردين

فتحت البـاب طَب هـوَ

عِز الدين
شكو ضايجة ايلول تعالي خل نحجي

ايلول
عِز الدين والله ضايجة ومالي خُلك احجي ابد

عِز الدين
اشو صارت عِز الدين مو عزوز
غير افهم من عندج شبيـج وشنو الموقف الي صار وهذا منو اساسًا

كتلة انُ هوَ صديقي هناك اعرفة من طَرف امير خطيب فَرس وكعدت احجيلة عَ الموقِف الي صار اليوم

عِز الدين
اني متاكد ابوج يظن انُ اكو بينكم علاقة فـ سوة هيج

ايلول
هذا ما يعني انُ هل يقلل ادب وي ضيف جاية هيج !!

عِز الدين
لا تكولين هيج ايلول هذا ابوج بنهاية
هسة انتِ عليش ضايجة تمشين نطلع؟

ايلول
لا فَرس يمي وحضل يمي اليوم فَ ماريد

عِز الدين
يول خاف صدك مرتبطة وهذا يغار اشـو كلج متغيرة مو ايلول قبِل

ايلول
مو هَيج بس مالي خُلك

حَس ب اسلوبي شكد جامد وحسني شكد ماطايقة احجي فَ خلة وطلع ضَليت احجي وي فَرس شوية، قررنا تُبقى يمنا فَ خابرت حُسام حجيناه وياه وقنعناه يدري انُ محد عدنة بالبيَت

كَعدت فرس تحجيلي عَ الاشياء الي صايرة وياهة وعن علاقتهـا وي امير بصراحة حَسيت الطَرفين غلطان
فَرس مدتفهم طِباع امير ومتقدر انُ هوَ لسة ماخذ عَ بالة
وامير مديكبر عقلة وينسى الي صـار
سولفتلي ع كُل شي وعرفت ساعتها انُ سالفتهُم منتهية اساسًا
طمنتها وكتلها خليها ورة الله وشيصير خيصير ليضل بـالج

بـ ١٢ تقريبًا خابرني علي يُِمة احِس كلبي كُمز شكد جان بالي يمة وخايفة عليّ

علي
هـا ايلولتي

ايلول
ها علي وين جنت ؟
والله ضل بالي يمك ..

علي
انة مو كايلج اذا اعصب احب اكعد وحدي
ماريد اجرحج بشي ايلول

ايلول
بس هَلمرة جرحك اني سببة
اسفة علي جد اسفة ماعرف شلون اتأسف منك وحيل خجلانة منك

علي
اشش ولج اششش انة اذا انتِ غلطتي وياي ماحبج تعتذرين انوب تعتذرين ع شي انتِ مامسويتة ؟
ميخالف هوَ مادري حضي هيج او مكتوب علية شلاع الكلب هذا مادري وين ماحط ايدي تتعروج

ماعرفت شحجي ويـا سكتت ..

علي
ابوج عارف السالفة وحاسة كلبة انُ انة رايدج وانطاني باص اليوم انُ مُستحيل هاي السالفة تصير وانة اريد اسويها عنـاد واشوف شلون ماتصيرين الي وعلي الا احط ايدي بـ ايدج وكدامة هيج بعيونة ..

ايلول
علي انتَ شجاي تحجي

علي
خرب هُبل حَتى انتِ
حَتى انتِ ايلول يعني انتِ مقتنعة
عمي انة رايدج والله رايدج
شنو الشي المُمكِن اسوي حتى اوضح الج هذا الشي

ايلول
علي تعرف حالتي هَسة ف ليش تفتح هيج مواضيع هَسة

علي
ادري لج والله ادري
وماريد اضغط عليج بس بنفس الوقت صدك خلص صبري
واحس مادري بس احس كلشي واكف ضدي
هذا امير شكد سالفتة متعسورة وشكد بينة وبين فَرس مشاكل
شوفي شلون رُغم كُل شي اخذهة
الا انة كلشي واكف ضدي حَتى انتِ يا ايلول حَتى انتِ

فَرس
يقارن روحة بـ امير
والله امير مايجي لذرة منك

باوعت لفَرس واني محتارة وماعرف شسوي سمعت صوتك صوت جداحة وصوت تدخيـن وهزة رجِل
عرفت حالتة شكد متوترة

فَرس يمي وتسمع وتهمسلي
فَرس
كوليلة ايّ شي يريح كلبة والله كلبي من يمي انشلع

علي
هذا  الساقط راح لبيتة ؟
خوما كعدتي يمهُم

ايلول
لا تعاركت ويـا و وي بابا وصعدت

اخذ نفس وگال
ايلول
ابوج ابوج مهما صار يضل ابوج
اذا تصير مُشكلة ف بيني وبينة ميخالف
لا انة ابنة ولا الة عدي ولا الة عدي
ولو الة اشيـاء تخصني
بس ميخالف نرهمهة بينة
المُهم انتِ ما تدخلين ب ايَ شي ومتأثرين بعلاقتج وي ابوج

ابتسمت عليّ وعلى تفكيرة
وهاي فرّس تلح علية

فَرس
لج بس كوليلة فَد شي متشوفي يجر حَسرات ونبي ضجِت وانقهرت عليّ

ايلول
ااا علي

علي
روحي كولي

ايلول
لا تضوج حبـاب

كلت هَيج واباوع لفَرس شو هاي غمتني

علي
هههههه تدللين

ايلول
شنو يمتى ترجع ولشوكت تُبقى ؟

علي
والله مادري باجُر عندي واجب بس وين مادري من يخابروني اطلع الهُم بس قبلها اريد اشوفج
يصير مو؟

ايلول
اكيد بس كول واحنة نطلع

علي
هاهيّ ان شاء الله خير

نهينة الحَديث بيناتنة واجيت يم فَرس

فَرس
امداج شنو من كلب عندج الولد ميت من القهَر مبين كولي احجي شي

ايلول
يعني شتردين اكولة فَرس

فَرس
احبك مثلاً شبيها مو كل حديث ولازك ويا احبج ما احبج يمتى تكوليها او يمتى تحسيهـا بالاحرى

ايلول
تردين الحَقيقة ؟

فَرس
ايّ

ايلول
حاستها بس اكولها احس صعبة

فَرس
عزة هاي من يمتى وشلون

يمة واني احجي احِس كلبي صـار يدگ بسرعة وتوترت حَيل ولا كانهُ فَرس الي كدامي

ايلول
شوفي فَرس علي وهاي السوالف كُلها ماجانت بـ بالي حَدما شفت من عندة مواقف، فَرس يعني من بعد ذني حَسيتة فد شي غَريب ولا كانهُ انسان عادي، حدما وكف ويـاي بالكُلية وتعارك وي حَيدر والعميد علمودي، وطبعًا حجالي بعدها شكد حَيدر مُقرب الهُم ومن صـارت سالفة الحَريق و وكف وياي
فَرس شايفة البجي الي بجا علي ؟

فَرس
جذابة بجة بجة!!

ايلول
والنبي ايّ فَرس يبجي يبجي مو بجي عـادي
اذكر مَرة جنت نايمة كعدت مالكيت ايّ احد يمي عدا علي
تخيلي جـان يصلي ويبجي ويدعي
فَرس لذكريني جسمي يكزبر بس اذكر الي سوا بالمُستشفى علمودي

فَرس
صدكيني يا ايلول مراح تشوفيـن مثل علي ولا راح تاكين احسن من عندة علي انسان ميتكرر وانسان يستحق تحاربين الدنيا علمودة يعني تخيلي هوَ موقفة اليوم من يدورلج على تمُر لا ويريدة مزيّن بعد يكول هيَ نفسيتها تعبانة، والله احسة حنون وانسان يجنن

ايلول
ادري فَرس
بس المُشكلة اكو بينا اشياء وفروقات كومة مادري اذا اكدر اتخطاهن

فَرس
شنو الفروقات متكليلي لج حَتى اهلة حسبالج نفس ماجنة مصوريهم لج نـاس راقين واخواتة وبنات عمة فد حبابات حَتى جدة والله احسة حَنين حَيل هيَ السالفة سالفة نصيب ايلول واذا نصيبج وي علي لا تكوليـن لا وبعدين تتندمين
ايلول، والله مو دفاع عن علي، بس اني دا اشوف شي انتِ ما دا تشوفينه.

ايلول
شنو يعني؟ وضحيلي فَرس

فرس
ايلول، علي يحبج... مو حب چذب ولا طيش شباب، حب رجال، حب خوف وغيرة واهتمام، حب مو مال يوم ويخلص.
حب واحد متمسك وعارف شنو يريد

ايلول (ساكتة وعيونها تدمع)
بس فرس... مرات أخاف، أخاف احبه وبعدين ينكسر كلبي
واحسني بعَدني صغيرة مادري .

فرس
علي؟ علي مو من النوع الي يكسر ابد
لاحظت وجودي بشكم مُشكلة بينكُم يزعل ومدري شنو ما يمضي نهار إلا وهوَ جاي عليج حَتى لو انتِ غلطانة
اني اشوفه شلون يباوعلج، شلون يسأل عنج، شلون يختنگ بس يشوفج متضايقة وزعلانة .
ايلول، هذا يحبج، ويستاهل فرصة.
لاتخلين الخوف يسرق منج حب نادر وحَقيقي
نصيـحة من عِندي الج ..

ضَليت افكر بـ الي حجتة فَرس واحس نفسي ماعرُف اتخذ ايّ قرار ومرتبكة ومشوشة حَيل
اليوم الثاني ماما وبابا جانـوا طالعين للمُستشفى عندهُم دوام وعمليات
وجِنت وحدي بالبيت لان فَرس الصُبح راحت

تراسلنـا اني وعلي كلي كدرت ارهمها اليوم اضل وباجر اروح
فَ اتفقنا انُ العَصر نطلع سوية
صَار الوقِت واتفقنـا عَ مكان
لبسِت وتكشخِت وطلعت بسيـارتي
بعدني ستوني صعَدت شفت بابا مخابرني كومة
استغربت شعندة مو من عوايـدة هلكد يخابرني

مَشيت بسيـارة وخابرت بابا

ايلول
هـا بابا شكو

ابو ايلول
ايلول انتِ وين سدي الباب ولا تطلعين ابد اني جايج

ايلول
شنـو ليش بابا شكو ؟

الو
بابا
وينك ؟!

هوَ يحجي واني مستغرُبة شكو شصاير !
معقولة عرف اني طالعة وي علي
والله بابا عاد مصخها ويٌا شجاه !

كملت طريقي ورجعِت خابرتة ماكو
المُستخدم خارج نظاق التغطية

كملت طَريقي وما اهتميت لشي
الدنيا تقريبًا غوربَت والشوارع عدنة وقت الغروب خصوصًا بعد ماصارت سالفة داعش تخُف شويـة متكون حَيل ازدحامات

من دامشي لاحظت اكو واحِد وراية، اني بطبيعتي ماحب احد يكون وراي اتنرفز اكعد اعيش جو الافلام واحِسة يراقبني لمن اوخر واشوفة يوخر يلا يرتاح بس مال شخُص يضل وراي حَتى لو صدفة اتوتر

صرت اراقبـة شو هذا يمشي وراي ويـن ما امشي
خفِت وضليت اباوعلة بالمراية اريد اشوف شِكلة
بهل اثناء خابرني علي

علي
ايلولتي انة وصلت وين انتِ ؟

ايلول
علي اكو واحد وراي ديلاحگني من طلعت من بيتنـا لِسة
و بابا خابرني كلي لا طلعين وفجأة انسد الخَط
علي اني خايفة شسوي هَسة ! 
انزل من سيـارة ! حَتى شوارع مابيها ناس قليلة

علي
اوكفي اوكفي ويـن وصلتي هَسة
ايلول بسرعة وين مكانج

انطيتـة مكاني بـس اني احِس جاممممدة بدَمي وخايفة حَيل باوعت لموبايلي بابا جاي يخابر شنـو اكلة
ماكدرت ارُد ابد وضليت احجي وي علي

علي
شوفي حبيبتي ضلي بسيارتج وامشي علكيف سمعتي امشي علكيف ايلول انة جايج هاي راح اوصلج هـا اها جاااي

ايلول
علي خايفة اذا قتلوني محد راح يجيني حَتى كُلها تخاف من بعد الي صـار كلبي احسة جاي يرجِف

علي
بس صبريلي لا تروحيـن ضلي وياي دقيقة ...
الو حول حول تسمعوني

-
نعم سيدي

علي
المُلازم الاول علي ، أنة حالياً بموقع [... ]، تعرّضت لهجوم مباشر، أطلب إرسال دوريتين فوراً، نحتاج إسناد عاجل، أكرر نحتاج إسناد عاجل. خلّوا القوة تكون على جهوزية وتنطلق حالًا حالاً تسمعوني

-
نعم سيدي، تم استلام الإشارة... راح نوصلكم خلال خمس دقايق، القوة الآن بطريقها، يتم تتبُع موقعك خليك على تواصل ويانـا .

اسمع اصوات اللاسلكِي واني ميتة خوف وكوة اسوي
فجأة شفتة بِدة يريد ياخذ مكان كِدامي

ع علي جاي يتقدم لكدام شنـووو اسوي

علي
جاااااايج جاااايج هاااي وصلت لراس الشارع ويـن انتِ بس فهمينييي ويـن

باوعتلة صار يمي مُباشرتًا بسيارة سودة مُضللة وماكو شي مبين منة

باوعتلة بخوف وكلت

ايلول
اني، اني يم
باوعت داير مدايري ماكوشي واضح اغلبيـتة محلات مفلشة ..
علي مادري وين

رفعت راسي لجِهتة نزل جامتة
شاب باوعلي وابتسم وصار گدامي

الشـارع ولا طَيررر بي
محد غيري وغير سيارتة

مِن صف سيارتة كدامي حَسيت هاهيّ
اني جاي التقط انفاسي الاخيرة

ايلول
علي وكف كداميييي علي

علي
ايلول اجيتج جااااي اشوفج اجيتج
ايلول ارجعي لوررررة بَسررررعة ارجعيي

ايلول
علي خايفة جسمميي جاي يرجف

علي
لا تخلي ينززززل قبل لاينزل ارجعي لورة بكل سرعتج ايلول
اجيتج جاي اشوفج من بعيد بس ارجعي واتقربيلي

دست بريك عَ السريـع
المُشكلة الشارع ضيق حتى ما اكدر استدار بي
هوَ من شافني ضليت ارجع لورة ضل يرجع وراي
ويباوعلي ويضحگ

شوية شفتة طلع ايدة من الجامة وبيها مُسدس
ومُباشرتًا رِمة عَ تاير السيارة

الستيرن اخذ جِهة وحدة وماصرت اتحكم بي مُباشرتًا سيارتي طخت عَ الـرصيف
ماجنت امشي بسرعة فـ ماتأذيت بس احس السيارة انرجَت رّج
بهل اثنـاء ماحِس الا علي صـار كدامي من الجهة الثانية
فِتح جامة سيارتة وبَدة يرمي لفوگ بسرعة

هـذا انحُصر وسيارتي واكفة بالعرض بنُص الشارع ف مايكدر يطلع طول فَ ضَل بس يرجَع لورة
اباوع علي يمشي وهوَ يمشي وثنينهُم ابتعدوا واحد يرجع واحد يمشي بس بسايدات مُختلفة

اباوع الاثنين واحد صـار يرمي عَ الثاني وشنو جاي يصير كدامي جِنت ما اكدر استوعبة وما اشوف اساسًا غَير الغُبار من السيـارات
ابتعدوا حَيل من كِدامي لان الشارع حَيل طويل
باوعت من گدامي شفت سيـارتة بنچرت و عَ السريع صعدت عَ الرصيف
علي راد يدوس بريك لان اجِتة بس ماكدر لان السيـارة جانت سَريعة وفقدت التحكم بسبب الطَلقة الي علي رماهة ع التاير

باوعت السيارة صعدت فوگ سيـارة علي وانگطفت داخل المحّل الي مفلش  وسيـارة علي صعدت فوگ الرّصيف

من صار المنظر كدام عيني
صحت بـ علوا صوتي

ايلول
علللللللي

نزلت بسرعة مِن سيـارة
اباوع سيارة علي من رَصيف و واگعة صَفح
احس نفسي تخبلت
ركضت بـكُل ما عِندي من قوة تِجاهة

بهل اثنـاء سمعت صوت شُرطة وهيَ جاية من كدامنـا
وبدة المكان كُلة تنتشر بي شرطة
اسمع اصواتهُم وهُمة ينزلون ويكلولي اوكفي بمكانج لا تتحركين
واني مستمرة اركض واريد اوصل لعلي بـسرعة

وصلت باوعت السيـارة صفح وعلي كاعد بمكانة ومگلوب الكرسي بي ويحاول يدفع بالباب وايـدة بيها دم

اني شفتة واني شهگت وصحِت عليييييي

علي
ايلول ابتتتتعدي

اجو الشرطة بسرعة وراحوا شرطة للسيـارة الثانية
صرِت عَ صفحة وابجي
اباوع اكو دم دينزل حَتى من الباب
جابوا مُعدات وفتحوا باب السيارة بسرعة ومدوا ايدهُم وطلعوا علي

اباوع لعلي اكو دم نازِل من راسة على عينـة وايدة اليسار بيهَا دم
مَدري شحجة وي الجِنود
وصـارت عينة علية

باوعتلة واني ابجي وميتة من الرعبة
عرفني راح اجي
فَ عافهم كلهم واجة يرگضلي

بشكِل لا ارادي رحت وحضنتة بسررررعة واني ابجي

حضني حَيل وهوَ يهمِس بتعب
علي
عدّت الحمدلله، عدّت ايلول اششش

وخرني من حُضنة وهوَ يحاوِل يهدئني واني منهارة من الرعُب والخوف

الشرطة كلهم يم ذيـج السيارة ومحد يمنـا
باوعت لعلي عيونة نفس الغوشن وخرني صَفح وراد يروح يكعد عَ الرصيف

اباوع راسة ديجري مِنة دم بشكل جبيـر
كعَد ع الرصيف وهو يهمس وكوة فاتح عيونـة

علي
انتِ روحي همة يهتمون بية
خل واحد يروح وياج ايلول وروحي للبيت
ولا اكلج لا ترحين ضلي هنا
ديري بالج ترحين

كعدت عَ الكاع واني اكلة
علي حباب باوعلي علي

حَسيتة بعد ماكدر يفتح عيونة راد يوكع اجيت بسررررعة سندت راسة

صحت بصوت عالي واني ممتحملة فكرة انّي اشوف علي يموت بين ادية
ايلول
علي حباببببب لا تموت احبكككك علي لا تعوفنييييي ....

ماكدرت اسندة اكثر جان ثگيل عَ جسمي وكع راسة عَ الرصيف
يباوعلي بهدوئ ويريد يفتح عيونة بـس مايكدر
لزم ايدي وگال بصوت خافِت

علي
اذا هذا حلم فَماريد اصحى مِنة
واذا هاي نهايتي فَجانت احلى نهاية
متت وانة ادافع عنج، وسمعت منج الكلمة الي حلمت بيها من سنين
احبج
يُتبععع ...
__________________

سَبب

للعصُر صارت يمهم مشية وماكدروا يطلعـون جنة كاعدين سوى شوية وراسلني رقُم غَريب فتحت الرسـالة كاتِب الو وجاي يكتب
ماكتبت شي انتظرت يكمل كتابة واشوف منو

تبـارك
أني تبارك.
ما أحب اللف والدوران، فخليها واضحة من البداية.
زعيم يحبني، ويعرفني من زمان، مو مثلچ طلعتي فجأة بوجهه.

إحنا من أصل واحد، ومن لحمة ودمة، مو مثلچ دخيلة ما إلج مكان بينه.
لا تفرحين بالعقد، لأن اللي بينه وبينچ مجرد ستر، بس هو إلي... كان يريدني، وراح يرجعلي، عاجلاً لو آجلاً.

نصيحة، طلعي من حياته قبل لا تخسرين كرامتچ... ترى أنا بت عمّه، وأنا أولى بي. واساسًا من زمان جدي يكل لزعيم انتَ اريدك تزوج اكثر مِن وحدة فَ زعيم تزوجج علمود السِتر وبَس

وراح يزوجني الي بعديـن
وبعدها انتِ تنسحگين واصير بس اني موجودة بحياتة
وازيدج من الشعِر بيَت هماتين
جدي گال لابوي تبارك لزعيم مو لواحد ثاني
بس الدخيلة محد ياخذها ف خليناهة لزَعيم

باوعت ولعبت نفسي مِنها عرفتها تجذِب خليت وحضرتها
وطكيت صورة لحجيها
بنفس الوقت احس كلبي اشتعل نـار
خاف صدگ الشيخ يعدد لزعيم
وإلا شلون قِبل ما ياخذ بت عمة
شلون بدآهة عَ الغريبة اساسًا

احس نَفسي كلش ضجت وضليت زعَلانة طول الوكت
وخايفة لا صدگ يأثرون عليّ وبعدين يروح وياخذ تبارك

ضَليت افكر بكلامهة وكاعدة بغرفتي
صارت الدنيا المغرب اندگت الباب
حَطيت شال عَ راسـي وكمت فتحتة
باوعت زَعيم كدامي

باوعلي وابتسم وگال

زَعيم
گلبي رچِيچ وعيونة يحتاجلهن هـواي

ابتسمت بوجهة بهدوء

زَعيم
شـبيج ام يعگوب احسج مو على بعضچ

سَبب
يعگوب منين إجة

زَعيم
افة متعرفين لقبي الثاني ابو يعگوب ؟
يلا تطلعيـن للبُستان شوي نشتم هوى ونجي
بالسيارة نفتر بي ما نمشي

سَبب
بس ماجاي عَ بالي

زَعيم
ليـش شبيج مريضة ؟

هزيت راسي بـ لا
تأففت وحَسيت ماريد اسكت وكتلة

سَبب
راح البس واجي

زَعيم
قلقتيني ترة
يلة منتظرج باب المطبخ

لبست حِجابي وعباتي وطلعت
واگف ويباوعلي باستفسار عَ الي صـار كتلة خلي نصعَد ونحجي

صعدت بالسيارة ومُباشرتًا كلي سولفي
فتحت موبايلي وانطيتـة المُحادثة
باوعلها وهز راسة وگال

زَعيم
تؤتؤتؤ هـاي ما توب !
زَين سويتي من حضرتيها عفية
بس اصبري شبيج مغندبة خاف صدگتيها

سَبب
مو سالفة صدگتها لو صدگتها جان انطيت واخذت ويـاهة بالحچي

زَعيم
چا شبيج ضايجة؟

درت وجهي الة وحِجيت بـ زعل جبير

سَبب
زَعيم صدگ انتَ من عاداتكُم تعددون وخصوصًا انتَ تاخذ اكثر من وحدة الشيخ كايلك ؟

زَعيم
مو بَس ثنين الشيخ يريدني اربُع بعد كلبي

سَبب
اااااه يعني تربع اربعة !!!
شهگت وحَطيت ايدي عَ صدري بسرعة

ضحگ زّعيم وگال

زَعيم
ولج هااااي حركتج بطليها
اذكر بطلابتنا وي آل دحام علي من نزل سلاحة ونزل سويتيها
يابوية ساعتها جان ودي اموتج بـ ايدي من سويتيها

سَبب
زَعيمم
هَسة عوف كِل شي واحجيلي صدِك عود تاخذ ٤ !

زَعيم
ايّ جا انتِ ما سامعة بـ سالفة الجدر ما يتربع إلا على اربعة

سَبب
لا تستثولني الجدر ما يتربع إلا على ثنين

زَعيم
هههههههههه حاضر ولا يهمج ثنين يكفن هاهيّ

من گال هيَج درت وجهي للجامة وجنت حيل مضيوگة خلك وبس يحاجيني حجاية ابچي

زَعيم
چا شمالج درتي وجهج وغندبتي
شنـي جا غَير انتِ بت شيوخ ؟ وتفتهمين وتعرفين انُ سوالف التعدد عدنة سالفة تقليدية عادية

درت وجهي الة وكتلة بعصبية وجَزع

سَبب
زَعيم مو انة الي تعدد علية
الله يشهد بيـوم الي تجيبلك وحدة ثانية اخذ سِم فار واموت
وخطيتي برگبتك ليووووم الديـن

زَعيم
اويلي يابة هههههههههههههه ويقابلج الله شتكليلة ليش اخذتي سِم فار ؟ لان زعيم جاب حرمة ثانية عليج، ما هذا حگ مِن حگوكي عايل وياج؟ لا يابوي ..

سَبب
زعيممممم رجعني بـسرعة
حجيت هيـج والدمعة صـارت بطرف عيني
اقل حجاية مِن عندة تطفُر مِن عندي

وگف السيـارة وصوت ضحگتة صارت عالية وگال

زَعيم
دوري وجهج خل احاجيج

سَبب
ماريد زَعيم

وجهي جان يرجِف، دمعتي نزلت مسحتها بسرعة
ماريدة يحسني ضَعيفة ولا اريدة يشوفني ابجي

زَعيم
بوية ديري وجهج خل احاجيج
نعلة الله عليك يالشيطان والله مادري شقاي يضوچج
قسمًا بالله لا تعدد ولا غيرة
محد صارت بعيني ولا وحدة راح تصير بعيني غيرج
شعندي غيرج
انتِ مريتي الاولى والثانية والثالثة والاخيرة

من گال هيج ما هدة الموضوع بالعكِس زاد الطين بلـة ودموعي كامن ينزلن اكثر

زَعيم
ولج لا تبجين وابو الفضل ما اقصدددد لا تمردين گلبي بدموعچ يبعد عيوني وعلي اشاقة ويـاج صدگيني

جان يحاول يخليني التفت الة بس اني جنت مُصرة ما اخلي يشوفني وانة ابجي
اخذت كلينس وانة دايرة وجهي ومسحت دموعي و وجهي

زَعيم
هل كبرياء الي عندج، ولج انة رجلج بعَد تستحين من عندي ديري وجهج

دار وجِهي بـ ايدة ضليت مدنگة عيوني وساكتة

ماحس الا ونطبعت بوسة على عيني اليمين بعَدني جاي افتح عيني انطبعت بوسة عَ اليسار
لزم ادية حَيل وثبتهن بـ اديّ
رفعت عيوني تِجاهة
غمض عيونة وباوعلهن بتمعُن وگال

زَعيم
اوعدج وعد رجال انّج دامج على ذمتي، ودآم النفس الي بية يصعد وينزل ما اخليج تبجين بسببي ولا راح أذيج بعمري وبحياتي

ابتسمت الة بهِدوء ابتسملي بعُمق وباس راسي
ضل لازِم ب ايدي وكمل طَريقة وهوَ يگول

زَعيم
ما ضنيتج هلگد رچيجة انة اعرفج سَبب النچرة شني دموعج وانتِ

سَبب
موهيج بس والله ضنيت هالشي صحيح
هيَ حجت وانتَ ثببتلي مادري بس انتَ ماصاير بمكاني وتعرف شعوري زَعيم لا تشاقة هيج شقة وياي بعَد امانة

زَعيم
صار ام يعگوب تدللين صدِگ جذب عد عيناج

ابتسمت وگتلة ليش يعگوب بالذات؟

زَعيم
من وانة صغيَر احِب هل أسم جنت اكل لجدي اريد اغير اسمي يكلي لا انتَ الزَعيم واسمك راح يضل هَيج بس اذا ردتة فَ سمي ابنك هجي ومشت علية بهـذا الاسم
شنو بس لا ماعجبج ؟ وتردين ايلان وبطران ومدري شنو هاي اسَماء هسة

سَبب
هههههه لااا اذا ما رُقية وفاطمة وعلاوي احنة مانرهم

زَعيم
اي بالله ذكرهم بركة ب بيوتنـا
شرايج نسويلنة زيارة لكربلاء ؟؟

سَبب
الله اتمنى تدري عمري وحياتي ما زايرة!

زَعيم
عد عيناج هل ايام اتقرغ ونروح تدللين

ضلينـا نفتر بالبُستان بالسيارة ونضحگ ونسولف صاح الاذان فـ استدارينـا ورجعنـا

الاذان يصيح وزَعيم يحجي ويكلي رددي وراي

زَعيم
رضيتُ باللهِ ربًا
وبمُحمد نبيًا
وبالإسلام دينًا

رددت ورا الي گالة، اباوعلة كام يسوي استغفرالله والحمدلله واشيـاء هواي ماحِجة الا لمن كمّل الاذان

زَعيم
هاي الي كتلج عليها كل ما يصيح الاذان كوليها
رضيتُ باللهِ ربًا
وبمُحمد نبيًا
وبالإسلام دينًا
يكلك الي يكثر مِنها يدخل الجنة، فَ كثريهن وياي حَتى نلتقي هناك سوة

كال هيج وابتسملي ابتسامة عَريضة
بساعتها حَسيت نفسي صدك مختارة شريك صحيح

مادري شلـون جرأت نَفسي ودنيت ايدي يمة
باوع لايدي وابتسم وقرب ايدة وحط ايدي بـ بطنها

مَرينة من يم العُمال مال بيت رَحمة جانوا عَ اثر يكملون وجنت انة من جهتهم وزَعيم من جهتهم الثانية گالي

زَعيم
ديري وجهج لية

سَبب
دنيا مغرب شيشوفون

زَعيم
ديري وجهج يا بت الناس
ترا حُبنا ماهو بحُب اتراك
حب البدو مبني على الستِر والغَيرة ..

درت وجهي صوبة وصلنة يمهم سلم عليهُم عَ سريع وهوَ يمشي ومِشة

اباوعلة واحس الله منطيني اكبر هدية بالدنيا
كل صفات الرجولة والشهامة بي
مادري وين جان مضموم الي ..

زَعيم
ماريد سيارتي فارغة، اريد اولادي مالينها ملي وصارعينة طول الطريق بحجيهم وطلباتهم

جَريت حَسرة وابتسمت وكتلة

سَبب
يرادلها بخّت

زَعيم
البخت بيج ام يعگوب دآمج موجودة كل الخير موجود

سَبب
تدري ابوي ليش سمآني سَبب مو؟

زَعيم
لانج راح تكونين سَبب بفرحة الزعيم
غير هذا السَبب حقايق جذبية

ابتسمت عَ كلامة ونزلنة ثنينة جنة گاعديـن وبوقتها اجة امير وجان جايب ويـا فَرس لان صايرة سالفة الحَريق مال سكن الجامعة

اميـر جان قلق هـواي على فَرس وبنفس الوقت ما يگدر يعوفهـا وحدها فَ طلب من عدنة انة وسيوف نضَل يمهـا وخطية هوَ كُل شوية يجي يطمن عليها، امير بطبعة يستحي هواي واحسة متربي عشِر مرات فـ جان يعرف حدودة فَ جان مُجرد يجي يطمن عليها ويطلع

اليـوم الثاني شفِت زّعيم وجان يسالني عليها وكتلة هيـج وهيج
سَبب
البارحة اخذت عرضك كلت لسيوف هذا لو زَعيم يكابلني ويكعد بنفس الغرفة ويكول جا غير هيَ مرتي

زَعيم
ترة فعلاً مرتي وحلال كلشي علية مسوي شي حرام لا بالله
بَس انتِ مدري شمالج

سَبب
لا مدري شمالني ابـد

ابتسم وكعدنة سوية نحچي والشيخ ومرتة يباوعولنة وفرحانين
سالتة

سَبب
زَعيم ليش كِل ما اشوف الشيخ الكا يباوعلنة وفرحان؟

زَعيم
لان هوَ يحبج ودائِمًا يتمنى جناينة يكونن نفسج هجي معزمات ونسوان سَنعة وامهات بيوت بس چن چناينة كلهن راح يچن بزر نستلة بَس انة ربحت الشيخة

ضحگت وهوَ يحچي هَيج بصوت عالي

زَعيم
اشتعلوا ال عدنان كلهم ضحگتج بصوت ناصي شمالج عبالك تفزعين بالموتى !

سَبب
اهو شنـو واحِد ما يضحگ عشتو

زَعيم
لا يابوي اضحكي شكد مابيـج بس ديري بالج احد يشوفج من الولد وانتِ تضحكين لان ساعتهـا ما اتحمل ..

ابتسمت عليّ وهوَ يحجي وصرنة نحجي اكثر
واحس فهمني وفهمتة بِما فيه
وشخصياتنا صارن بيهن ترابُط موطبيعي

مَر ٣ ايام وفَرس بيومها راحت للسكِن
صدمني زَعيم وهوَ يكول انُ عِندة سَفرة لتُركيـا
حَتى يجيب لوازم الخياطة

جبُر
يمتى بحيل الله

زَعيم
والله جدي اقرب حجز اروح لان معمل ال... تقريبًا فضى والمحلات تريد من عدي

جبُر
هاهيّ بوية روح درب السلامة

باوعتلة باوعلي وابتسَم
خابر صديقة بساعتها بالخطوط الجوية العِراقية و اكتشف انُ باجُر اكو حجز لتركيـا حِجز تذكرة عَليها

شويـة ودزلي رِسالة

زَعيم
اصعدي اريد اودعج خاف ما اشوفج الطَيارة بـ ٩ الصبح يعني بـ ٣ كون اطلع من البيت علمّا اوصل للمطار ..

سَبب
يا زَعيم والله استحي كافي فشلة من اهلك

زَعيم
جا اروح ومتودعيني يطيج گلبج ؟

سَبب
هوَ انة من هَسة ما مطيني گلبي ومحتارة شلون ردح افارگك ٣ ايام

حجيت هَيج ماحس إلا گام وصاح

زَعيم
يالله، يلا اترخص منكم ارد اصعَد احضر روحي

سلم عليهم واحد واحد ولمن وصل الي باوع وابتسم

زَعيم
سَبب تكدرين تصعدين وياي تساعديني بـ تحضير اشيائي

من حجة هيـج خجلت وراسًا باوعت لامي( مرت شيخ )

صالحة
ايّ كومي يمة وي رجلج شوفي

كمِت من مكاني سوة روحة يلعب بالموبايل عود مشغول ومدري شنـو ورادني اصعَد كدامة
صعدت وصرت اهمس بالدرج

سَبب
فشلتنيييي زَعيم فشلتني

زَعيم
ترة نيتي سليمة شمالج انچلبتي ههههههههههه

انداريت وكلت

سَبب
لا واضح من ضحگتج سليمة
موبس سليمة حَميدة هّم

زَعيم
جا شني مو عيب اودع الكل وما اودعج ترضيها انتِ !

سَبب
جان حالي حالهُم الا هَيج !!

زَعيم
شتردين ابوسج يمهم؟

باوعتلة وردت ابجي من الاحراج اكلة هيـج يكلي هيج
اول ما صعدنة و وخرنة من انظارهم كتلة

سَبب
زَعيممممم ترة والله اذا ما طلعت عَ الملابس انززل ترة

رفعلي حاجبة وگال بخُبث

زَعيم
فنج بت ابوج انزلي
خيكولون عنج موخوش مَرة
عافت رجلها وحدهة ونزلت

حِجة هيج وخلة ومِشة
ياربي شكد وجهة الثاني استحيييي من عندة

التفت الي وگال

زَعيم
تمشين لو اشيلج؟

سَبب
اتسويها انتَ ما عندك مانِع

اتقدم الي وگال

زَعيم
والعباس اسويها عادي

سَبي
يمة لا زَعيم حباب وخر ترة يشوفونة منا انتَ شطولك مبينننن

ضحگ ع حجايتي وگال
زَعيم
چا بسرعة

وصلنة للغرفة وصدك والله طَلع جُنطتة وبدينة نرتب الة ملابسة
هوَ يضل ٣ ايام هناكَ فَ ع كدهن اخذ ملابس
بس انصدمت انُ الملابس الي اخذهن اغلبهن رسمية وبنطرون وقميص ومدري شنـو

سَبب
عزة وانة جنت متخيلتك بس دشاديش

زَعيم
جا شني البس بتركيا دشداشة شسالفتج بوية هههههههه

سَبب
والله مادري تخيلتك هيج تمشي نفس لبسك
واصلاً انصدمت انُ عندك هيج ملابس

زَعيم
راح تضلين تنصدمين مني
عبالج حباب وطلعت وكح
وعبالج البس بس دشاديش وطلعت البس غير
وما خُفي اعظم

سَبب
اممممم يلا كملنـا رايد شي بعَد

زَعيم
لا شكرًا سدي الباب وراج ارد انام حبابة

سَبب
ابتسمت الة واستغربت انُ عداهة عَ خير
بنفس الوقت مادري ليش بس جنت رايدتة يحضني

تقدمت شكم خطوة و وصلت للباب ماحِس إلا اجة وصـار گدامي
و ورة الباب

زَعيم
الدخول لهاي الغرفة مونفس سهولة الخروج منهـا
يعني بشرفج انة مصعدج من فوگ لجوة بـ ٦٦  باية بالضبط حاسبهن بـ عيني وممشيج مُمر شطولة حَتى ترتبيلي هدومي شني ماعدي ايد واسفطهن ؟

ارتبكت مِن قُربة الي رجعت لورة وكتلة

سَبب
اااا زَعيم اريد انزل حباب لانُ

بعدني ما مكملة فِتح حضنة
باوعتلة وارتبكت بنفس الوقت احس ردت احضنة
مـادري شلون كِسرت خوفي وجرأت نَفسي
ورحِت حضنتة

عَ الحضن الاعتيادي وصلت لجوة صَدرة ضحگ وعرفت ضحگتة عَ الطول كالمُعتاد حاوط بـ ايدة اليمين خُصري ورفعني بيهـا
والايد الثانية طَوق ضهري

حَط راسة يم رگبتي
اخذ نَفس وگال

زَعيم
راح اشتاقلج هـواي ام يعگوب

ابتسمت على كلامة وبنفس الوقت صابني شعور سيء انُ هوَ راح يروح

وخرني مِن حضنة ودنگ راسة الي
حضن وجهي بـ ادي وباوع لعيوني

زَعيم
عيونچ يخبلن من اول ما شفتهِن وهنّ سابياتني سَبي

سَبب
ان شاء الله يعمّن مِن بعَدك

زَعيم
اششش ديري بالج تحچين هَيج
حَط ايدة ع شفتي ورجع حجة وهوَ يمرر ايدة عَ كُل وجهي
وعيونة ما موخرهن عن عيوني

تعرفين شنو اللي خلاني أسكت أول مرة شفتچ؟
مو الحچي، لا...
سكتت لأن عيونچ سحبتني،
عيونچ كبار، بنّيّة مثل لون الأرض بعد المطر
مكحّلة من رب العالمين،
ورموشچ؟ لا، مو رموش
هاي خناجر ناعمة، تنغرز بگلبي نَفس السهام

كلشي بعينچ يحچي
بيها حياء، وبيها دلال، وبيها هيبة

عيونج ما تشبه ايّ شي بهاي الدنيا

ابتسمت الة ورجعِت هاي المرة وانة حضنتة حضني حَيل وباسني من راسي ورجع طبع بوسة هادئة بخدي وگال

زَعيم
يلة خَل ننزل يمهم
نزلـنة وهوَ حاط ايدي عَ ضهري جان بساعتها الكل متطشر تقريبًا
كلي تعاي خل نكعد شوية كتلة روح نـام كلي لا مجايني

كعدنة شويـة جوة وضلينة نحجي
شوية وانة نعست كالي روحي نامي رحت لفراشي و وقتة وي كعدتة
ردت اكون موجودة قَبِل لا يروح
كعدت بساعتهـا شفتة نازل هوَ وجنطتة
ولابس بنظرون وتشيرت ونفس القمصلة لان الجـو حَيل بارد

اول ماشافني ابتسم واشرلي شكو كاعدة
جنت جوة واباوعلة وهوَ ينزِل اول ما وصل عاف الجنطة واشرلي اجي

رحتلة حضني وباسني مِن خّدي

زَعيم
شعندج كاعدة

سَبب
حبيت اكون موجودة ويـاك قبل لا تطلع

زَعيم
حبيبتي الدنيا باررردة روحي تلفلفي بالبطانية ونامي وانة وياج نضل على تواصل ماعدي شي ان شاء الله

سّبب
لا زَعيم حبابة اريد اذب ماي وراك

زَعيم
ولج باررررردة ويـن تطلعين

سَبب
حباب والله بسرعة

ابتسم الي ابتسامة عَميقة وگلي يلا من باب المَطبخ طلع وذبيت ماي ورا ابتسم الي وكلي يلا روحي طبي

طَبيت ونمت ساعتها
ضلينـة ٣ ايام احنة بس نتواصل عَ الموبايل
ساعة نتخابر ساعة نتراسل
وحَسيت نفسي جاي اعيش لحظات حُب
بـس كل هذا جان بالحلال وهذا الشي الحلو بالموضوع

خلصت سّفرتة واجة زَعيم من تُركيا
وخطية اول ما اجة قَبل لا يطبلنا هـو راح للمعمل رتب كل شي واجانا
بحيث بـ ٣ هوَ وصل بس لل ٧ يلة طّبلنة

بساعتهـا تكشخت وتعطرت وجنت بس منتظرة جيتة
سلم عَ الكُل ومن شافني ما تعداني وحالي حَال الكل باسني

فَرحنة على جيتة كل احنة
جنة كاعدين وفرحانين بي
جبنة العشة وكعدنا كل احنة سوة

بعدنا جاي ناكل موبايل زَعيم دگ
شال الموبايـل وگام يحجي

زَعيم
اهلاً سَيد
وعليكُم السلام
شنـووووووو !
يا معمّل منهن ؟؟؟
الي بحي الـ ........

گام زَعيم بسرعة وعلى كومتة الكل گام
سَد الموبايل بسرعة وگال
المعمل احترگ وخلة وطلع

سُراج واميـر جانوا بالبيَت راحوا ويـا هُمة وعمامي ( حَسن+ حسين) والشيخ
واحنة ضلينة بالبيَت ما نعرف ايّ شي من الي صاير
بس الي عرفنـاه معملة الي بحي الـ .... احترگ

الزعل الي احنـة بي جان موطبيعي
خصوصًا انُ زَعيم جان جايب بضاعة حَيل جبيرة

يعني فلوسة كلهن من يسوك يذبهن وينتظر الارباح مالتهن

امي جانت تبجي وتكول حضة مال والكل جان مقهور ويندعي انُ الخسارة موجبيرة

تقريبًا ٤ ساعات همة ماكو لحد الساعة ب ١١ بليل يلا اجوا كلهم

باوعت لزعيم جان بي زعل حيل جبير و وجهة مكبوت وكوة ساكت احس

سالتهم امي وكالولها

جبر
كل المعمل محترك شنسوي قضاء الله هذا الحمدلله والشكر هذا ابتلاء من رب العالمين وزَعيم انسان مؤمن ويعرف هاي السوالف

سُراج
بـس الحادث مقصود ومستحيل تقنعوني انُ الكهرباء ومدري شني

زَعيم
لا ما مقصود وفعلاً الصوج بية انة اليوم قبل لا اطلع شفت واير من الوايرات مكشوف وكلي العامل رطوبة ومُمكِن يسبب تماس بس انة غلست وكتلة على باجر ..

جبر
يا جدي هيَ هاي سالفة ينسكت عليها ليش هتقصير هذا انتَ مشتري بربع ثنين انتَ صاحب معمل يابوية

امير
الصار صـار وهذا قضاء الله كولوا الحمدلله وهاهيّ والله يعوضة بالخير

صالحة
جا محد تلاحگة شي

زَعيم
يمة المعمل مايمة واحد لو منطقة معروفة تدرين
خلف الله عَ الناس الخّيرة مارين وشايفيـن ومبلغين الاطفاء ومخابريني

حِجة هَيج وتنهد بصوت عـالي
باوعلي نظرة خاطفة وخلة وصعَد ..

كل احنة كعدنة وصرنـا نحجي ع الحادث
شويـة والشيخ كال لامير اصعد يمة احجي ويـا شوية

صدِگ والله صعَد امير
راسلتة مارد

همة ينامون جوة بهـاي الايام
سمعت صوت الكل جوة ماعدا زَعيم ما الة حِس

صارت الساعة بـ ٢ واني كاعدة وبالي يمة ..
شوية و وصلتني رِسالة منة

زَعيم
انة راح اطلع برة البسي حجابج واطلعي

لبست حجابي استغربت من طلبة غالبًا هوَ يوصيني ما اطلع بليل بالخارج

طلعت بـرة شفتة واستغربت
لابس دشداشة سودة ولاف غترتة ومبين مبدل و واكف

زَعيم
رايح انة بمِنية
ما ادري اذا ارجع لو لا
ديري بالج على نفسج
وسامحيني ..

سَبب
شجاي تحجي زَعيم حباب لا تقلقني
شكو وين رايح وع شنو اسامحك ..

زَعيم
الي حرگ معملي ابوچ سّبب
عدنان و ولدة همة الحرگوا
وانة تاكدت من صِحّة الموضوع١٠٠٪؜
ما راح اعوفلهميا وراح ارجعهـا
وشيصيـر خلّ يصير
ماردت اكول لاحد
بس علمودج
ماريدج تتأذين حَتى بحچاية
وحگي انة اخذة بيدي

من گال هَيج انصدمت وبنفس الوقت خفِت وگتلة

سَبب
زَعيم لا الله يخليك لا تروح
ويـن رايح وشلون وحدك !

زَعيم
لا تخافين عليّ
بس اريدج تسامحيني لو أذيت واحد بيهم ..
لان انة هَسة فايرررر وايّ واحد اشوفة ما راح ارحمة ..

ما خلاني اكمِل حجيي حضني وباس راسي وراح بـسرعة بدون ما يسمَع حجيي حَتى

ضَليت منتظرة عَ نار وخايفة حيل
وبس ادعي الله يمضي هل ليلة عَ خيـر
ما مضت ساعتين راسلني وهوَ يگلي انة جـاي ..

اتطمنت شويـة وارتاحيت
راسلتة مارد وخابرتة هم مـارد
شوية خابرني وگال
زَعيم
جاي بطريق لا تخافيـن

اجة تقريبًا وجه الصبح
من اجة كالي

زَعيم
سويت المطلوب وهاهيّ
العين بالعين والسن بالسن والبـادي اظلم ..

سّبب
شسويت زَعيم ؟

زَعيم
جانت النية احرگ بساتينهم وكل شي
بس وصلتني خبرية من نـاس قريبة من يمكم على الاسلحة المدفونة ب بساتينكم
رحت وتاكدت من هذا الشي بنفسي وحاجيت الشرطة وبعد السالفة يمهم ..

ردت احاجي بَس جان تعبـان خلة وراح نام
ضَليت صافنة ومحتارة
شنو وشلـون وهَسة شصارلهم ياترى؟

الصبح كلهم كعدوا جانوا يحجون سوى اباوع لَزعيم صافن ويباوع لموبايلة

شويـة واجة عَلي طَب وهوَ يكول

علي
صلوااااات على محمممممد وال محمممممد
خبررررر صادمممم يا جماعة ولج يمةةةةةة وينج يمةةةة
جدددددي ابشررررك ..... يُتبععع
توقعاتكُم للجـاي ؟

البارت الجاي روان راح تنذكر وتقريبًا كُل البارت حيكون الها، بَس ردت اساوي الاحداث هَسة 🤍

جانت يمنة حِجة السجاد والكُل مشغول بالـطبخ ومجلس العزاء واني سويت المُستحيل حَتى اكمل الكم البارت ويكون طويل 🥲