رواية بيت جبر الفصل الثالث والعشرون 23 - بقلم هُدىٰ آذار

مساء الخيَر اخوان
تأخرت عليكُم يوم مانشرت، بَس اعتقد اغلبكُم تعرفون السَبب، صح مانشرت عَ العام بس جنت انشر عَ المنصة عَ حسابي، واطمنكُم شي شي، واليوم الف الحَمدُلله والشكر اتطمنا عَ علي اطمئنان تـام و الله يرحم جَميع الشُهداء ويشافي جَميع المُتضررين ..
وهَسة اتركُم وي الرواية
للكاتِبة : هُدى آذار
بـارت الانفصالات 🫠

رَحمة

غَيث
اريد تقريلي يوميـة قُرآن بصوتج قَبل لا انـام مُمكِن؟

ابتسمتله وعيوني گالت أكثر من كل الكلمات،
وگلت بهدوء:
رَحمة
بس صعبة، مراح أكدر... اهلك موجودين، وانت بلشت تنام جوة، فشلون بهيج حالة؟

سكت شوية، چان صوته ناعم وبي لهفة واضحة..
غَيث
بس أني جنت حاب أعيش هالشعور...
أحس هسة صوتچ خلة مسامعي ترتخي،
كأنوا صوت عقلي وكلبي چان مزعج وهدأ...
يعني، مو صوت وبس، هو راحة...

باوعتله، وهو عيونه ناعسة وشايل بوجهه حچايه ما گدر يكوله.
جنت أعرف، هالطلب بسيط بعيونه،
بس بِنسبة الي جان صعُب ..

رَحمة
غَيث... يمكن ما اگدر أگرا إلك يومية،
بس إذا تحتاج تهدأ،
اتمنى اكون وياك ساعتها، وراح احاوِل علمود اكون موجودة يمك بـ لحظات احتياجك الي اوكي ..

ابتسِم الي وجـان فرحان هواي، كمت حَتى اسوي عَشة
مـادري ليش بَس حسيت مراح الكي فُرصة احسَن مِن هذي حَتى اسمع بيها كُل حَياة غيث وشنـو الي وصِلة لهل حالة ..

اكو طَريقة اني قاريتها بـ احد الكتُب اسمها المرايا العاطفية + الأسئلة المفتوحة الناعمة وهاي تُستخدم بالعلاج السلوكي المعرفي والـ humanistic therapy، وتخلي الشخص يتكلم من نفسه، لأن ينكسر حاجز الدفاع عنده ببطء.

طلبت منة ما يكعُد وحدة ويشاركني بـ تحضيري للعَشا
فـ جان كاعِد ياكُل خيارة بهدوء ويباوعلي
التفتت الة لكيتة يباوعلي بادلتة بـ ابتسامة وكتلة بنبرة هادئة

رَحمة
مرات نشتاق للحظات كلش بسيطة، مثل ريحة خبز طالع من الفرن، أو صوت چاي يغلي عالنار هيَج تمُر كَ لحظة عابرة بس تكون حلوة ونشتاق انُ نرجع نعيشها مو لأنها لحظات حلوة بس، بس لأن بداخلنا جوع مثلاً
وهَل شي مـو بس بالاكِل للحظات حّقيقية هم

رجعِت التفتت الة وكتلة
رحمة
أنت شنو أكثر لحظة تتمنّى ترجع تعيشها؟ مو لأن بيها شي حلو، بس لأنك تحس هناك بديت تتغيّر.
وحَتى اعزز الة الامان واحسسة بروح المُشاركة كتلة
يعني مثلاً انا اتمنى ارجع ليوم ٨/٨ لان بهاليوم اتوفى بابا وبساعتها حياتي كُلها تغيرت .

(ما حَطيتة تحت ضغُط مُباشر ولا كلتلة شنو صار بحياتك خليتلة سؤال مفتوح وعفت ذاكرتة تفكُر بعفوية، هاي الجملة تخلي عقله يروح ورا، مو بوعي كامل، وتكسر الحاجز شويّة)

اباوعلة غمض عيونـة لثواني
واتنفس بعُمق وگال ..

غَيث
بليل الساعة بـ ٨ واني طاب عَ شُقة نسرين ..

صدمني من ذِكّر اسم بنية وكتلة

رَحمة
شكلي ما متعرفة عَ هاي البنت قَبِل

غَيث
احسَن، هيَ انسانة حَيل سيئة
بسببها حياتي تدمرت كُليًا وانكلبت رأسًا على عقب

رَحمة
امممم ايّ؟

غَيث
تدرين كُل ما اذكر هاي الفَترة انقرف من نفسي هـواي
واحس بسببها ماجاي اكدر ارجع لوضعي الطبيعي

رَحمة
موغلط انك تغلط بس الغلط انة توكف عَ الغلط
كُل احنة نغلط وكُل احنة نضعف
بس هل يعني انُ لازم نوقف حياتنا بس لانُ غلطنا؟

غَيث
لا بس احس الي صار وياي هوَ عِقاب من رب العالمين الي

رَحمة
الله اكبر من انُ يعاقب شخُص بـ عافيتة وصحتة، العافية والصحة هَي نِعمة من رّب العالمين و حرمانة منها هوَ اختبار مو بلاء ابدًا
يعني مثلاً اكدر اكول انُ اني مريضة لان الله عاقبني عَ تصرفات واشياء غلط !

غَيث
بس انتِ متشبهيني انتِ نقية حيل رحمة
انتِ نفس هذا الماي بالضبُط
جاي تشوفينة شلون نقي ؟ مابي لون؟ مابي زيف ؟ مابي ايّ شوائِب
انتِ هيج رحمة
انة اختلف عنج، انة ما خليت شي ما سويتة بحياتي  واحس هاي كلها عقاب الي

رَحمة
مرة، بابا الله يرحمه، گالي سالفة ظلّت بعقلي سنين، كلّما أتذكرها أحس الله جاي يحچيني بيها من جديد.
چان أكو شخص، غاطس بالمعاصي، والخطايا مالاتة مو شي بَسيط وينغفر لا جان ما مخلي شي سيء ما مسوي واصلاً ابسط ذَنِب عندة انُ هوَ جان عايف الصلاة وجان يشرب وانتَ اتصور المعاصي الي جان مسويها، فجأة حَس على نفسة وضل النـدم ياكلة وشكد ما حاول يرجع ما يكدر اكو شي بداخلة يحاجي ويكلة
شراح يسوّي ربّك بيك؟ بعد كلشي سويته؟! الله شيقبلك؟!
والناس اللي داير مدايرة ما رحمته، بالعكس... صاروا سيف عليه.
"تبدي تصلي؟ بعد كلشي؟ هاها، لا تسويها تمثيلية!"
"الله شراح يغفرلك؟ شبعنا من سوالف التوبة وانت ترجع أسوأ."
"وحَتى لـو رجعِت كُل ظنك الله يغفرلك"
وهوَ جان مصدگ نفسة ومصدگهم ومجان يكدر يرجع يتوب
لحد ما بيوم، چان مار من يم جامع،
وصدفة، أو مو صدفة – لأن ماكو شي صدفة عند رب العالمين –
سمع صوت قارئ يصدح من الداخل، كأنه الصوت موجه إله وحده:
{قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ...}
وگف بـمكانه. وحَس الدنيا سكتت براسه.
تجمد كلشي... حتى أنفاسه.
{...إِنَّ اللَّهَ يَغْفِرُ الذُّنُوبَ جَمِيعًا...}
جميعًا؟ حتى اللي سويته؟ حتى اللي محد يعرفه غيري؟
حتى اللي عفت بسببه الصلاة سنين؟
{...إِنَّهُ هُوَ الْغَفُورُ الرَّحِيمُ}
بهاي اللحظة، دمعة نزلت من عينه...
مو دمعة ندم،
دمعة رجعة.
دمعة فَهم.
وفات على الجامع، وتوضّى، وصلّى.
وأول سجدة، چانت ثگيلة، كلها وجع،
بس لما رفع راسه... حسّ الدنيا أخف.
من هذاك اليوم، ما رجع للخلف،
مو لأنه صار ملاك، لا،
بس لأنه عرف:
الله ما يستقبلك لأنك ملاك...
الله يستقبلك لأنك عبده، حتى لو چنت مكسور
وحتى لو چنت ب اسوء حالاتك الله راح يستقبلك
لان هوَ مو بَشر حتى يصدك ويفشلك
هوَ الله الي دائِمًا فاتح النة ابوابة
وهوَ يفرح لـو رجعنة الة من جديد

اكو شـيخ مَرة سمعتة شيكول ؟
كُل العلاقات بيها مصلحة ماعدة علاقتك وي ربك
مو هوَ يريد منك، هوَ يريد ينطيك
وهوَ فعلاً الله ينطينيا بَس ماياخذ منة
وحتى لو اخذ فَ يرزقنا اضعافة ..

جنت ملتهية اگلي بالكُبة واحجي ويـاه
كملت كلامي وانداريت الة اباوع ردّة فعلة
كان وكإنما هايم بالكلام وناسي كُل شي
ابتسم وگال

غَيث
ليش محد كالي هل كلام قَبِل ؟
الكُل حجة وياي كُلشي
بَس محد كالي انُ الله لِسة بعدة يريدني

ابتسمت الة وكِتلة

رَحمة
ماطولك سمعتها قَبِل لا تموت اسم الله عليك
معناهة الله رايدك

ابتسم براحة وتنفس بعُمق

كَملت عَشـا وصحت لامي واتعشينـا سوية
ضل كاعِد يمنة ويسمع قُصص عن حياتنا مِن أُمي

فاجئني وهوَ يسأل أمُي هل سؤال

غَيث
خالة رحمة شلـون جانت بصُغرها
هم جانت هيج هادئة وحنونة ؟

ام رَحمة
يـا يُمة رحمة من يوم يومها حنينة
هيَ اكبر من اخوهـا علاوي فَ جانت عمرها اشهر وحبلت بـ علاوي الله يرحمة، وحبالتي يا يمة انة صعبة فَ خطية جانت تشوفني موزينة شسوي تاخذ مُخدة وتنـام وحدهي وفطمت روحها بوحيدتها سودة علية

ابتسمت على حَجي امي رفعت راسي لكيتة يباوعلي ومبتسم ابتسااااامة عَريضة حَيل، حَسيت نفسي اول مَرة اشوفة هيـج مبتِسم بهل شكل هذا . 

كملنـا قُرآن ومُضة الوقت، كام غَيث طب لغرفة الشيخ ومرتة وامي طبت لغرفة الي بيهـا سَبب تنـام لانها تِعبت

احس نَفسي تعبانة وهالكة خصوصًا اليـوم محد وياي والبيت حَيل جبير كل مرة البنات وياي مو كلش احس بالتعب رُغم انّي ما اخليهن يشتغلن بس هنّ ميقبلن

بديت انظف بالجـوة شي شي البيت جبير والاثاث ضخُم وهُمة كلهم من النوع الي ميحبون التراب الخفيف حَتى يصير عّ الميوزة او هيج شي لذالك جابوا عامِلة

جنت ستوني بادية وجاي اشتغل اجاني غَيث
شكلة نعسان وتعبان بـس مانايم
اجة كعد عَ التخم الي بالصالة وگال

غَيث
احجي وياي رّحمة احب اسمعلج

مِن حجة هيج ضحكت من كُل وكلبي
وحَسيت بـ احساس غَريب
اول مرة شخُص هلكد يحب يسمع مني

ضَلينة نحچي سوة والأغلبية هوَ المُستمع واني المُتحدِث
حب يشاركني بالشغُل رُغم انّي رفضت إلا انُ هوَ اصر

مع انّي ماصارلي هواي عدهُم إلا غَيث لاحظت تغير بشخصيتة فَضيعة وصاير يتفاعل ويحجي حَتى اكثر من قَبِل
كملنـا اخُر شي بس اني جنت منهارة من التعَب
كتلة يلا غَيث كملنا روح انتَ نام بعد هاهيّ
وجنت احاول ساعتها اخلي مياخذ مُهدئات وينام هيَج

غَيث
وانتِ؟

رَحمة
اني اريد اصلي صلاة الليل وبعدها انام

اباوعلة اكـو كلام بداخلة يريد يطلعة بس ميطلعة

باوعتلة وبدون تردُد كتلة
رَحمة
تحب تصلي وياي ؟

بارعلي لثواني وسِكت، ابتسمت بوجها گال ايّ

فَرحت هـواي بهذا كلامة
رحنا توضينـا ورحت جبت جادري الابيض وسجادتي وقرآني وصرت كدامة

باوعلي وگال
غَيث
طالعة نَفس الملاك
لا لا يا ملاك انتِ رَحمة ألآهية

ابتسمت بوجهة وهوَ هيج يحجي وبنفس الوقت خجلت
كتلة يلا خلي نبدي صير انتَ كدامي واني وراك
واني راح احجي بصوت عالي وانتَ ردِد وراي
اعرُف بهذا الشي اكو اشكال شَرعي بس كلت ميخالف
بس اريدة يسمَع شوية لعلّ قلبـة شوي يخشع
واني متاكدة لو رِجع لرّبة كُل شي بحياتة يتحسَن

اباوع الة جان يمة تردُد ونفس الخوفة بس بنفس الوقت اكو حماس تِجاه هل موضوع

غَيث ترة مُمكِن تحس بصداع ومُمكِن صوت يكُلك كافي روح نام وعوف كُل شي هذا الشيطان عادي من العَجز اني اول مابديت بيها هم جنت هيج بعدين اتعودت هههههههه

كتلة هَيج في سبيل اهدي واحسسة بالانتماء

بدينـا بالصلاة وجان شرطي انُ يحجي بصوت عالي حَتى اسمع صوتة

خلصنا كُل شي وبقت الوتر

صوتي ما بي لا خطابة ولا تجويد، بس نابع من القلب، وكل حرف أقراه حسيت بيه:

"الحمد لله رب العالمين..."
"الرحمن الرحيم..."
"مالك يوم الدين..."

صوتي بدا يرجّ المكان، مثل طاقة صغيرة جاي تدفع الجدران تبچي ويانا.

قُلۡ أَعُوذُ بِرَبِّ ٱلنَّاسِ (1) مَلِكِ ٱلنَّاسِ (2) إِلَٰهِ ٱلنَّاسِ (3) مِن شَرِّ ٱلۡوَسۡوَاسِ ٱلۡخَنَّاسِ (4) ٱلَّذِي يُوَسۡوِسُ فِي صُدُورِ ٱلنَّاسِ (5) مِنَ ٱلۡجِنَّةِ وَٱلنَّاسِ (6)
قُلۡ أَعُوذُ بِرَبِّ ٱلۡفَلَقِ (1) مِن شَرِّ مَا خَلَقَ (2) وَمِن شَرِّ غَاسِقٍ إِذَا وَقَبَ (3) وَمِن شَرِّ ٱلنَّفَّٰثَٰتِ فِي ٱلۡعُقَدِ (4) وَمِن شَرِّ حَاسِدٍ إِذَا حَسَدَ (5)
بهالثواني، سمعت شهگة صغيرة.
ما التفت، بس حسّيت بشي داخلي ينكسر...
غيث، لأول مرة، يبچي.

كان بكاء مو عالي، مو نحيب،
بكاء مختنق، مثل واحد صارله سنين ما تنفس.

كملت الركعة،
وهو بعده ساكت، بس صوته متألم، كأنّه كل ذنوبه متجمعة بحنجرته وتريد تطلع.
سلمت، والتفتت الة ببطء...

لقيته مطأطئ راسه، ودموعه نازلة عالگاع،
كاف ايده عالخده الثاني، يحاول يخفي وجهه بس ما گدر.

غَيث (بصوت مبحوح):
شون چنت عايش بعيد عن هذا الشعور؟
شون چنت أضيع وقتي وقلبي... بمكان ما بي رحمة؟

اقتربت منه شوي، بهدوء وهمس...
رَحمة:
غيث، الله دا ينتظرك، مو بس يسمعك.
كل مرة تبچي، مو ضعف... هاي دمعة قوة، دمعة رجعة.

غَيث (عينيه تدمع أكثر):
صوتچ هو اللي خلاني أحس إنّي حي... مو أتنفّس، لا، أحس.

مد إيده، وسحب السبحة اللي يم القرآن،
ظل يمررها بأصابعه، وكأنّه يحسب كل وجع مر بيه.

رَحمة (بلطافة):
تعال... أقرالك دعاء صغير.

كعد يمي وهوَ مطأطئ راسة وصرت احجي
"اللهم طهر قلبي من النفاق، وعملي من الرياء، ولساني من الكذب، وعيني من الخيانة، فإنك تعلم خائنة الأعين وما تخفي الصدور."
صوته اختنگ وهو يسمعني.
بكل دمعة نزلت، طاح حِمل...
وبكل كلمة دعيتله بيها، رجع جزء من غيث القديم

احس دموعي بعد ما اسيطر عليهن
الولد صار يبجي بصوت عالي ومسوع
و وجهة كُلة صـار احمَر

دموعي ما كدرت اسيطـر عليهن
وصارن ينهمرن بـ هدوء
واحجي وجسمي كُلة مكزبر من المنظر الي اني بي

يارب...
يا رب طهر قلبه من كل حزن، من كل تعب خفاه وساكت عليه.
يارب طهِر روحه من كل وجع، من كل ذنب ما گدر ينساه.
يارب إنك أحن عليه من نفسه،
فـ خذ بإيده، لا تخلّيه يضيع مرة ثانية.
يارب ريّح باله، وسكن روحه، وردّه إلگ ردّة حلوة، ما بيها خوف ولا تردّد.

يارب، بجاه هاي الليلة،
افتح له باب ما يتسكر، باب طمأنينة وسلام.
وخلّي كل خطوة بيمشيها... تقرّبه إلك،
وتبعده عن أي شي يكسره.

يارب احفظه،
يارب سامحه،
يارب نَوّر دربه.

بهـل اثناء باوعت روآن موجودة
واكفة جانِب وتباوعلنة وتبجي

اباوعلة يحاوِل يمسح دموعة
بـس جان منهار بمعنى الكلِمة ..

رَحمة
غَيث إذا تِريد تبچي... إبچي.
البچي مو عيب، ولا ضعف،
إبچي حتى تفضّي قلبك من كل التعب الي ساكن بيه من سنين.

(تقرّبت من عنده شويه، وعينيها تتكلم قبِل لسانها)

رَحمة:
تعرف شنو؟
سِجدة وحدة، تكدر تخلّصك من كل شي تحسه يخنگك
سِجدة وحدة بيها تكول لله ( اللهُم وكلتك امري ) خلاص الله راح يتوكل امرك

سجودك مو لازم يكون بكلام كثير،
مو لازم تعرف شنو تدعي...
بس إنت إنوِ، وگله: يا رب... ساعدني، رجّعني، غيّرني.

غَيث
احس كلبي تعبـان ومخنوگ حيد

رَحمة
گلبك مو خربان يا غَيث...
بس متروك.
وماكو أحسن من رب العالمين يرجّعه نضيف، ويردّ لك ضوّه من جديد.

أنا هنا...
مو حتى أغيرك،
بس حتى تبچي وأنت متطمن...
حتى تسجد وما تخاف تنكسر.
خلّي گلبك ينكسر لله...
مو للدنيا

يلـة هَسة اسجد
قوي ايمانك غَيث واسجِد وكول ( يارب اني بَشر مو حجَر، يارب ارحمني، اللهُم وكلتك امري وقلة حيلتي )
وكوم، واني اوعدك راح تنحيي مِن جديد

هزلي راسـة وعيونة حمر صايرات من البجي
حَسيتة نفس الطفِل ويريد يبجي

سِجد وبسجدتة ما حجة
جان بَس يبجي

كتلة خليك ساجِد واني راح احجي، ضل يبجي بنحيب وبصوت عالي وبديت احجي
دموعي احس ما اكدر اسكتهن كعَد على جنِب وهوَ عَ نفس بُكائة
باوعتلة واحس بعد ما اكدر اسكت اكثر

اجتِ روآن بسرعة يمة

روآن
اهلي متغيرين
حَتى علي وامير الي هُمة احن ثنين
حايرين بَس بنفسهُم وناسين الكُل
امير ماجان يعوف غَيث لحظة شلـون عافة وحدة وراح
غَيث انتَ متأذي بيك شي ؟ 

وكفت روآن يم غَيث واني احس نسيتهُم وسجِدت
بهاي اللحظة سويت لكُل الدنيا كتِم
واختليت وي ربّي واني اباوع لحالة غَيث
سجدِت عَ الكاع واني ابجي وكلت

يـارب اريد غَيث منك، يا مُحييّ العِظام وهيَ رميم احيِي غَيث
طَهرة ونقي قلبة وزيل مِن عندة كُل شعور سيء

حجيت هَيج وكمت اقرة ادعية بسجودي حدما حَسيت اكو ايد نمدت عَ ظهري، الايد مجانت تضغط علية جانت خَفيفة مُرتجّفة كإنما تستأذن حَتى تبجي وياية، حَسيت نفسي بعالم الرؤيـا
شلت راسي وشفِت كدامي غّيث

كمت وكفت واني اباوعلة وهوَ يبجي بشكِل هستيري
ماحسيت شلـون، بَس مُباشرتًا شمر روحة وحِضني حيل

جسمي كزبر واحِس انصدمت، اخذت ردة فعِل صادمة
ضل هوَ حاضني واني واكفة نفس مكاني

باوعت لروآن حاطة اديها عَ حلكها وتبجي من صدمة الجاي يصير
لانُ غَيث مجان يبجي بجي عادي كان ينحِب ويبجي

حَسيت اريد اوخر بـس روآن اشرتلي انُ ابقى وكان شكلها يتوسل بية، ماكدرت اروح واعوفة بـس احس كُل شي بية يريد يروح

حاط راسة بكِتفي ودموعة غرگني
غمضت عيوني وكلت بكلبي
- يارب لا تكتبة علية حرآم، شِفاء عبدك قائِم علية مِن بعدك

غمضت عيوني واني كلبي ينبُض حَيل
ايدي ترجِف ما مستعدة تسوي الي راح تسوي
بَس عقلي يشجعني اسوي

حَطيت ايدي عَ راسـة بلطُف
وغمضت عيوني وكمت ارتل

وَنُنَزِّلُ مِنَ الْقُرْآنِ مَا هُوَ شِفَاءٌ وَرَحْمَةٌ لِلْمُؤْمِنِينَ وَلَا يَزِيدُ الظَّالِمِينَ إِلَّا خَسَارًا
﴿ وَيَشْفِ صُدُورَ قَوْمٍ مُّؤْمِنِينَ ﴾
﴿ وَإِذَا مَرِضْتُ فَهُوَ يَشْفِينِ﴾
وضليت اكرر بيـهِن لان هنا الي اجن بـ بالي بهذا الوقت، جِسمي يرجف بس احاول اصيـر اقوى مِن هَيج
اباوعلة متمسك بية حَيل وكإنما مايريد يهدني
وخرتة من يمي
صار مقابيلي
عيونة الزرگ متحولات حُمر
ويغمض بعيونة ويرجع ينشِج بالبجي

غمضت عيوني وحَطيت ايدي عَ صدرة
مع انُ ايدي جانت ترجف بس تحاول تثبت نفسها عليّ
وصرت احجي بصوت مُرتجِف بس صادِق بكُل مابي

اللهم يا شافي، يا مُعين...
اللهم إني أستودعتك روح غَيث...
اللهم طهّر صدره من الألم، وبدّل حزنه شفاء، وهمّه راحة، وتعبه طمأنينة.
يا ارحمَ الراحمين ارحم واشفِ غَيث برحمتك التي لا يوسُعها شيء يارب العالميـن ...

مِن حجيت هَيج اباوع غَيث كام يتنفس بصعوبة وصـار گوة يفتح عيونة
احس نَفسي انذهلت وروآن خافت
لزم صَدرة وصار يحاوِل يكعد عَ التخم الموجود

غَيث انتَ بخير غَيث حاجينة

روآن راحت جابتلة مي واجت
صار يشرب وكإنوا اول مَرة يشرب مي
وكإنوا جان بصحراء قاحِلة

نام عَ التخم وحط ايدة عَ راسة
والعرگ جان يوشل من كل جسمة
خصوصًا من جبهتة

روآن
رَحمة شـصار نخابرهم!!!

رَحمة
لتخافين روآن هَسة يصيـر زين

حاولنة نوجه السبلت عليّ وهوَ ضال يلهث وكوة فاتِح عيونة
اجاني صوتـة الهامِس التعبان وهوَ يكول

غَيث
رَحمة اقريلي قُرآن رَحمة ..

كعدت يـم راسة وصرت ارتل قُرآن بصوت خافِت
قريت يمة سورة يس كُلها
وقَبل لا اوصل للنهاية شفتة نـام ..
حَسيت من نفسة ثكل وكملت السورة وكمِت

وكفت كدامة
اباوعلة حرآمات
شاب نفسة يدمر ليـش ؟
بيومهـا حَسيت نفس النـار صارت بگلبي
نايم كدامي ومگنفُص عَ نفسة نفس الطفِل برحم امة

اجيت عَ سجـادة مَرة ثانيـة وصرت ادعي
وهل مَرة دُعائي جـان مِن كُل وگلبي
لازمة القُرآن و اتوسل لربي بشفاء غَيث
وبهـل لحظة ما جان شي كدام عيوني غَيرة وغير شكلة وهوَ تعبان !

ومن دون ايّ حسبان حساب او قصِد كلت
( يارب اذا شِفة غَيث انذر نَفسي الك ولكُل شخص محتاجك )

كلت هَيج وسجدت رجع انتابني شعور حلو بَس هل مرة فعلاً جنت مطمئِنة وموقِنة بـ عدالة الله

شلت راسي لكيت روآن مغسلة وجاية
ابتسمت بوجهة
بـس جان وجهة تعبان وعيونهـا غارگة بالتعَب

مادري ليـش بَس حَسيتها محتاجة احد تشاركة ويـا همومها
كعدنـا نحجي سوة وحجتلي عَ كُل شي صاير ويـاها
وحجتلي عَ وحدتها مِن بعد الي صار

صفنت بوجهة واحِس مادري ويـن رحِت
بس واحِد وكلي باوعي لبطنهـا ..

باوعت وحَطيت ايدي عَ بطنها نزت وگالت

روآن
شبيج رَحمة

رَحمة
ادني روآن لتخافين

ادنت يمي بَس جانت خايفة، حَطيت ايدي عَ بطنها وگلت

رَحمة
بطنج راح تنترس، وراح تكونين سَبب فرحة انسان، وراح تتعبيـن بَس بعدين تفرحين ..

كلتلها هَيج وابتسمت
باوعتلي بعدم فهِم كتلها

رَحمة
ابـد لتحاولين تستفسرين مني
الايام راح تفهمجيـاهة ..

حَسيت نفسي حَيل تعبت اليوم، صبحت عليها ورحِت
ادري انُ عفتهـا بحيرتها بس ماجنت مرتاحة لانّي احجيلها مقصدي

طبيت لغرفتي وبوجهي لامي
اقيس نبضها على أمل انُ الگا موجود وما انفجِع بيها
تطمنت عليها الحَمدُلله
و وقتت موبايلي بـ ٦ ونمت ..

نايمة وافكـر بالموضوع واحس عقلي تعب
ودي اكوم وبعد ادعي
بس كلبي مطمئِن
وكلبي مُستحيل يطمئن عبثًا

ما مضى هواي عَ نومتي إلا ومـا حَسيت صوت الباب اندگ حَيل
فَزيت مرعوبة واني اسمع الصوت
انتبهت سَبب نايمة يعني جايين
باوعتلي وگلتلي

سَبب
شكو منو ديدگ الباب هيج

رَحمة
سَبب كومي انتِ استحي والله خاف واحد من الولد

حَطت شال عَ راسها وطلعت
سِمعت صوت زَعيم وهوَ يكول

زَعيم
رَحمة بسرررررعة خل تجي سَبب بسرعة ...

التفتت الي سَبب وهيَ تباوع ومافاهمة شي
امي كعدت والكُل كعد

حَطيت شال عَ راسي وطلعت
اباوع الكُل مجمِع بمكان مُعين
اول ماشافني امير اجاني مفزوع ومرعوب وهوَ يكلي رَحمممة تعاي بسرعة

تقدمت بخطوات ثقيلة وخايفة
باوعت لكيت .......
يُتبععععععع
البـارت الجاي حتبجون انتوا هّم، حضروا نفسكُم
بس ما ادري اذا راح احطهُم او لا، لان نفس متعرفون دورهُم ثانوي مو اساسي ..
_________________

فَرس

اجيت داطُب بنفس الوقت اجة هذا الولد باوعلي وگال

- الشال لو كان بيجي الاوتفت يصير ولا غلطة

باوعتلة باستغراب هذا شبي ؟

سمعت صوت امير وهوَ صاير گدامنة ويصيـح

امير
فَرس شكو؟؟
حَط ايدة عَ كِتفي واشر للولد بمعنى - شكو -

الولد ما حِجة شي خلة وطَب
رِجع باوعلي امير نزل ايدة خلاهـا وي ايدي وطلعنـا

فَرس
الامتحان حَيبلش ليش طلعتني ؟؟

امير
شنو احنة يومية درس عَ الحُمرة؟
ترة حمرتج حيل طوخ فَرس شبيج ؟؟

صرنـا يم سياج الحَديقة المُقابِل للقاعة تقريبًا اغلب الطلاب دخلت وبعضهُم منتشرين بَس محد يمنة

فَرس
انتَ شدخلك امير رجاءً لتدخل بشي يخُصني
وابد لا تنسى الي بينة مُجرّد مسرحية لا اكثر !

باوعلي وغمض عيونـة بعدم صُبر
واخذ نَفس وگال

أمير
ادري الي بينة مَسرحية بس بنفس الوقت انتِ وياي وعلى ذمتي ودامج وياي فَ يعني تمشين عَ مرامي اني وهاي الحُمرة الطوخ والتنورة الگصيرة لو الـبنطرون ما يمشن يمي !

فَرس
هههههههه وانتَ هسة تذكرت ترة صارلي ساعة افتر كدامك هَيج شو مكتلي؟ انتَ لو صدك تغار جان من اول لحظة اجيت وكتلي مو هَسة لمن كملت عزيزاتك واجيت ..

أمير
ماكو ايّ شي يضحك بالموضوع تـرة !
صارلي ساعة واكف على اعصابي ومنتظر بَس فُرصة حَتى اجيج واحاجيج فَرس رجاءً لا تلعبين بـ اعصابي امسحي الحُمرة ونزلي تنورتج شوي وين رافعتها !!

فَرس
ما اسوي شَي وهسة عوفني اريد اروح الامتحان حيبلش

ردت اروح لزم ايدي بَسرعة ورجع خلاني بنفس المكان الجنت واكفة بي

فَرس
شهل تصرُف الهمجي !
ترة ايدي انخلعت

باوعتلة يباوعلي بعَصبية هامسة ولا حَسبالك امير الي كدامي، جَد جان انسان يختلف بمعنى الكلِمة ..

أمير
ما اعيد كلامي مرتيـن كتلج امسحي الحُمرة ونزلي تنورتج وصيري نَفس العالم والناس وطُبي لامتحانج ! يـلا فَرس ..

من يحجي هَيج احس نفسي وكعت بـالفخ
فخ الرجال المثالي الي كُلها تريدة بس من تتقرب يمة تنقرف من حقيقتة

كالعادة الكلينكس ما يخلص بجيبة مَد ايدة وانطانيا
ويباوعلي بنظرات حَيل لئيمة

ماكدرت اسوي شي، بنهاية ما اريد ولا صُفر بالمية تبين علاقتنا بيها خّلل بالجامعة فَ اخذت الكلينكس منة ودمعتي بنُص عيني بس واحد يكُلي هَيج تنزل
درت وجهي ومسحتها، اجة هوى عالي حَيل من جهتي وراسًا طارت دمعتي ويـا عَ كد ما جانت كوة مچلبة بعيني
مسحت دمعتي ودرت وجهي

فَرس
هسة تمام ارتاحيت؟؟

أمير
عدلي تنورتج..

صـار گِدامي سَد شكو شي كدامي نزلت تنورتي شوية
وخَليت ومشيت لان حسيت بعد ماكدر اتحمل اكون ويـا
اجة من وراي وحَط ايدة بـ ايدي وگال

أمير
لتديرين وجهج وتمشين مَرة ثانيـة ..

طبينة للقاعة وهوَ مبتسِم ومبين ذاك الاستاذ اللطيف الي الكُل يحبة و ضحكتة متروح من وِجهة، اباوع كُل البنـات يباوعلي مُمكِن يتمنن نفسهِن مكاني، بَس محد تعرُف الحَقيقة شنـو

دائِمًا الاشياء الي نحِسها مُبهرة ونسوي ما نسوي في سَبيل نحصل عليها، بَس نحصل عليها غالبًا نكتشف انُ احنة غلطانين ومبالغين بيها ..

كَعدت بمكاني وانتبهت انُ الطالب الي يمي نّفسة الي مطقم وياي
مبين حَرِك وماخذ راحتة بالكعدة زايد واحنة هـم جنة هواي بالقاعة
فَ طالب عربي وطالِب صَيدلة وهيج كعدتنا، فَ جان يمي مُباشرتًا .

جان مَزاجي متعَكِر ومالي خُلك لشي
وهذا حَظي جابة علية
عَجيب شلون ما انتبهت عليّ بـ اول يوم من اجيت
مَدري اليوم انچلب مادري

كعدتة مرتاحة عَ الاخُر وحاط العلج ويعلج ويهمِس ع كُل سناريو يصير عود اني مُضحك وكذا

حاولت اتجنبة وابتعد شويـة عَن رجلي الي بَس يحركهن
رفعت راسي باوعت امير يفتر ويباوع علينة بملامح مزعوجة

-
شلونة العَربي حلو ؟

مادري ليـش حَسيتة انسان مُستفز ويريد يستفز امير خصوصًا
جاوبت بـ ( زين حَلو )

-
اكلج يعني انتوا هم ادرسون بالعربي سيبويه وخانويه لو لا هههههههه

أمير
الكلااااام ممنوع الاسئلة راح تتوزع
ماريد ايّ واحد اباوعلة والكا يحجي مفهومم؟

باوعتلة مبيـن يُقصدة بالكلام، اول ما اجت عيني بعينة خزرني ورجع باوعلة وگال

أمير
ايّ انتَ، التزم بالصمت احسن مِمّا تطلع برة القاعة ..

وزعوا ورقـة الاسئلة حَليت بسرعة وطلعت عَ كد ما تضايقت من هذا
قَبل لا اطلع اخذت موبايلي من عِندة وخليت وطلعت

رحت للسكن وجـان عِندي عُطلة لان مادة صعبة، مادة أُستاذ امير بس كُل الاحوال اني ما اكدر اقرة إلا قَبل الامتحان بنُص نهار فَ مايهمني

گضيت اليوم كُلة نايـمة من ١٠ الصُبح لحد الـ ٦ المُغرب
كَعدت عَ مُخابرة ايلول حجيت وياها شوية
وسولفتلها عَ كُل شي وشكد اني ضايجة فَ اقترحت علية انُ اطلع
فَ عجبتني الفكرة وكلت اطلع اكُل من برة واجي ما اطول ..

سديتة من ايلول شفت أمير مراسلني بـ ١٢ تقريبًا
أمير
هذا السَخيف بعد ما تكعدين يمة، واذا حاول يحجي ايّ حجاية ويـاج لا تردين عليّ

اوه الغيرة حاركتة حرك سودة علية
هههه عجيب شكد يمثل، احس اصلاً هوَ حتى ميغار علية قبل هم جنة بعلاقة عُمرة مكلي حمرتج لو لبسج، بَس هَسة صار يسوي ويتحكم علمود نظرة النـاس وانُ اني خطيبتة لا اكثر
ايلول تحجيلي واني اشوف غَيرة علي عليها، هذي صدُك نكدر نعتبرها غيرة وما نكدر نعترض عليها وحَتى حلوة شكد ما جانت تخنگ
بَس مال أمير ؟ ابدًا، احسها طالعة من ورة خَشمة ..

بهاي الايام بالذات ماحَبيت امير ابد،من ساعة ما كعدت ويـا بالبيت واني اكتشفت هواي اشياء بطبعة جامدة وغير مفهمومة
وشخصيتة كُلها تغيرت عن قَبِل
صحيح قبِل هم جان بارد وجامد وثكيل بَس ماجان نفس هَسة

صراحة احس شغفي مـات تِجاهة
واحس تعبت من المحاولات
اني غلطت وما انكُر غلطي ابدًا
بَس هذا ما يعني انُ هوَ يعاقبني لهل درجة ..

طلعت وحدي لمـول
اشتريت شكم شي محتاجتة واكلت ورجعِت، ماطولت ساعة ونُص ..

نشرت عَ الانستكرام صور الي ورجعت هم نمت عَ كد مجنت تعبانة
كعدت لكيت امير كووووومة متصل علية ومراسِل كومة، نصهن حاذفهن وراسل جدد
أمير
مـا الها ايّ معنى
سالفة تغلسين عَ رسائلي
وتطلعين بدون ما ادري
محتاجة شَي؟ تكدرين تخابريني واني اجي اخذج
اعتقد انتِ حاليًا صرتِ مخطوبة
و وراج رجال لازم تشاركي بـ احداثج
والا انة متوهم؟

ضحكت بـ استهزاء عَ رسائل وكتلة ..

فَرس
لا تنسى هيَ مُجرّد مسرحية ..

مُستحيل انسى التصرف الطفولي الي تصرُفة وياي
مُستحيل انسى شعوري وشلون جنت خايفة بس جنت فرحانة وبلحظة وحدة استهان بمشاعري وذكرني بالواقع مالتنة، دآم هوَ يريد هيج اني هم راح اكون هيج ومُستحيل ارجعلة بعَد، كسرني هواي أمير بتصرفاتة بيوم العقِد، وبيوم ما كلي من ستر مؤمِن سترهُ الله، وبيوم الي قرب علية وكلي مُجرّد مسرحية، شكد تلافيت وسكتت عن ذنيج بَس اخر شي احس خلاص وكفت عندي، وقررت قرار اكيد بَس ارجع للموصل افصخ الخُطبة وشيريد يكول حُسام خيكول ما يهمني ..

ما مرت رُبع ساعة ورجع رد ..

أمير
جاي تصعبين علاقتنا هـواي
وجاي تغثيني فوگ متصورين

فَرس
ههههه انتَ اغثك؟
امير البارد ما غيرك ..

شافهـا ومارد، ضَل ساكت لخمس دقايق ومن بعدها صار يكتب، تقريبًا بالعشر دقايق هوَ يكتِب اخُر شي دَز ..

أمير
تقولينَ إنّي باردُ الطبعِ دائمًا
ولكنَّ قلبي في هواكِ يُفَجَّرُ
ترينَ جمودي... والجميلُ بأنّني
أخفي اشتعالَ الشوقِ كي لا يُظهَرُ
أنا لا أُجيدُ البوحَ مثلَ صغارهم
لكنَّ حبّي مثل نارٍ تُسعّرُ
فلا تخدعنّكِ هدأتي وتظنّي
بأنّي جليدٌ... بل أنا المُستعرُّ

فَرس
شنو فائِدة اشعارك البيها حُب وانتَ ما منطينيا
ابد ماراح انسى مواقفك مراح انسى بيوم انُ انتَ عيشتني بشعور حِلو وفجأة انقلبت نفس الطفِل وكتلي هذي مسرحية، هذا الشي هواي واكف بعيني ومُستحيل اسامحك كد ما كسرتني بذيـج الساعة ..

أمير
اعتذرت من عندج بساعتها انة، وارجع واكرر اعتذاري جان هدفي مزِح لا اكثر اصلاً مادري ليش انتِ تحسستي زايـد من الي صار !

كلت بيني وبين نَفسي ..
ههههه تحسست زايد بس لانّي صدُك احبك عكسك انتَ التعرُف الحُب بس ماتعرف تحِب

فَرس
انتَ ويـن و اني وين أمير
انتَ حتى بهاي مفاهمني
والله جَد واصلة لطَريق انُ مُستحيل اني ويـاك ننجِمع ولا نكدر نتفاهم وحَتى مساع جنت افكر شلون احنة نكتل روحنة حَتى نحصُل ع شي وبس نحصل على شي يقُل قبولنـا تِجاهة ..

أمير
شفتِ انتِ حجيتيها بنفسج، انتِ الي ملانة فَرس انتِ الي ماتردين هاي العلاقة موبس اني الطَرف الغلطان انتِ هم غلطانة
انتِ عبالج السالفة الي صارته هّينة مثلاً ؟
تدرين انتِ شكد اني متأذي من الي صار
تدرين لحد هَسة عقلي يكلي شي وكلبي يكلي شي ثاني
زَين انتِ عندج ولو لشوية معلومات عن الي عانيتة؟
فد يوم كتيلي أمير شصار وياك شلون تعاملت وي سارة
شلون سارة صارت تتلافاني ومتحجي وياي
هذا الخراب الي انتِ سببتي وضريتيني وضريتي نَفسج بي
عانيتي منة؟ خليتج تحسين بي؟ لو انتِ جنتِ الطرّف الساكت
وانة كُل شي اتحملتة بدون لا احجي ولا اشكي !
ولمّن اتعامل ويـاج ب برود تلوميني وتكولين لا انتَ وانتَ
انتِ لو تعرفين شنو سويت علمودج وعن شنو تنازلت في سبيلج
ما جنتِ كلتيلي هل حَجي

فِتح فويز وصـار يحجي لمُدة طويلة، دز الفويس فتحتة جـان يحچي بعصبية بَس هادئة وصوت جان وكإنما شايل غَضب الدنيا كُلها ..

امير
كُل شوي وكلتِ انتَ بارد انتَ بارد
وبكُل مَرة انة اسكت، بس مو لأن ماعندي جواب،
اسكت لأن إذا فتحت باب الحچي، أخاف أگلك شي يجرحج...
بس كافي، خلي اكلج ليش انة بارد .
صح انة من طبعي الحِنية الزايدة وانتِ شفتي هل شي بـ بداية علاقتنا ، بَس بنفس الوقت انة مو من النوع اللي يگدر يفرّغ مشاعره بكل لحظة،
بس وياج؟
صار شي ماصار ويه أي بشر.
وگلت ساعتها يمكن فَرس الوحيدة الي تكدر تطلع منّي لهفة، ولهفة صدگية مو بس نزوة.
بس تعرفين شنو يحرگ؟
انّي لحد هّسة ما جاي اتخطى مُحادثاتج وي سارة علية
فَرس انة عارِف كلش زين المكان الي بي انة شنو
وماخذ حَذري كلش زَين مو بس علمود ربي علمود سمعتي التدريسية
وانتِ تعرفيني شكد انسان يحب عملة
وفوك كُل شي صار وفوك كُل المُحادثات والحجي الي يوجع
چنت أفكر شلون أحميچ من كل نظرة، من كل كلمة.
چنت أظن أنتِ غير
وحتى بعد ما صار الي صار، حتى بعد التسريب،
رجعت...
مو لأن ناسي، لا،
رجعت لأن ماردت الناس تحجي عليج ولو بكلمة،
وروحي وشوفي لو اشرف واحد هم ما يضحي بنفسة ويسوي الي سويتة الج، هم يكلك انة شعلية ؟ هيَ الرادت تضحك علية مو انة الاضحك عليها ! بس انة رجعت حتى اوكف بوجه كل حرف بيه إساءة إلج. بس بيني وبين نفسي؟ انهدّيت.
يمكن انة فعلاً بارِد
بس مو لأن حبّي خلص،
لأن خوفي صار أكبر منّي.
خايف أحبج بعد أكثر،
وخايف ألگة روحي مرّة ثانية وحدي، أتأذى وحدي، وأنتِ تظلين ساكتة.
ماتدرين شكد تمنّيت يوم تسأليني: أمير شصار بيك؟ شتحس؟
شنو صار وياك بالضبط بَس انتِ سكتي ونعتيني بالبارد وبَس ..
مادري بس مُشكلتي ماجاي انسى الطعنة الطعنتينياهة ومو بهل سهولة اسامحج عليها، كل ما اشوفج اضعف واحِن و ودي اضمج من كل شي الي، الي وبَس..
بَس ارجع واذكر الي صار وانفُر ..

سمعت الكلام واحِس حيرة صارت بكلبي حيرة جبيرة لدرجة انّي حَتى ماعرفت ارد ولا عرفت شنو اكول، علاقتنا متوترة حَيل وماجاي نكدر حَتى نوازنها ب ايّ شكل من الاشكال واحس نفسي تعبت من حمل اني مو كدة ابد !

أمير
كنسلي كل الحجيتة واهتمي بـ امتحانج اقري زَين

كتلة ان شاء الله
وسكتت وهوَ سكت ..

احس طول اليـوم افكاري ماعافتني ولا دَقيقة
حطيت الملازم وردت اقرة ماكدرت احس نَفسي مافهم كلشي ع كد ماعقلي جان مشوش

بـ ١١ تقريبًا وصلتني رسالة منة

أمير
ويـن وصلتِ ؟

فَرس
لـ ولا شي ..

أمير
شنو! لسة مقارية؟؟

فَرس
ايّ

أمير
شنو السَبب !
ترة المادة مو هينة ابد وسعيج بي عَ الحافة
شمنتظرة ؟

فَرس
مادري بـس بالي مشوش

رأسًا اتصل
اخذتلي ثواني ورديت

أمير
يلة جيبي المـلازم وتعالي

فَرس
بس ماريد

أمير
تردين ترسبين؟ فَرس يلة

فَرس
اني اقرة وحدي

أمير
ايّ ميخالف جيبي ملازمج وتعاي

اني هم جبِت ملازمي واجيت، شرحة ما شاء الله حَيل حلو ويوصل المعلومة بسرعة واني هم مو غَبية يعني استوعب قدر زين من المعلومات فـ خلال ٣ ساعات هوَ كملي كُل المادة

الساعة بـ ٣ تقريبًا كملنة، كلي باجُر انتظريني بالكراج نطُب سوية كتلة تمام ورحِت نمِت
كعدت الصُبح متأخرة والدنيا محترگة يمي
بسَرعة بدلت وطلعت
اول ما وصلت للكراج شفِت الكراج فارغ وبَس امير وشَمس واكفين سوية وجان أمير ماد الكلينس لشَمس ويباوعلها ويحجي بهدوء ..

احِس بساعتها الغيرة استولتني بشكِل موطبيعي !
جانت مِثل النار الي تحرگ عقلي واعصابي
وتالي ويّ شمس اساسًا ليش هوَ مُقرب الها لهل درجة هـاي !
وليش حِنية النظرات هذي
ما اتحمل يتعامل وي ايّ شخُص نفس ما يتعامل وياي

تقدمت سلمت عليهُم و اميـر گال يـلا
ماحچينا شَي سوية وسويت روحي اراجع طول الطَريق

قريب ما ردنة نوصل امير تقرب وحِجة وي شَمس
ما ادري شنـو بس جان واضح بهمِس
حَسيت نفسي بالعة غَصة جبيرة
لا اكدر احجي ولا اكدر اسكُت
بنفس الوقت حَسيت بـ اهانة جِبيرة
وحَسيت اكو شي غلط جاي ينطُبخ من وراي ...

طبينـة للامتحان و أمير جـان ويايّ
رافقني لمكاني و اول ما وصلت گال للولد الي وراي انُ يبدل بينة وبينها، الولد الي وراي جان كاعدة يمة بنية من الصيدلة ..

تبادلنة الاماكن واحِس انظار الكُل توجهت تِجاهي
ماعاولت اكعُد واستقر ..

كُل الي اعرفة وقرانيا امير جاوبتة وجانت الاسئلة لا بأس بيهَا

باوعت وقبِل كُل الموجودين شَمس طلعت، مادري ليش بس جنت مراقبتهُم ومراقبة نظراتهُم ثنينهُم ماكو خلال ٥ دقايق طلع وراها
اني هنـا احس الشيطان تربع براسي
وافكاري كامت تروح منا وتجي منا

حاولت اثبِت نفسي وامنع افكاري، الاسئلة الاخيرة كُلها اعرفها بس مُشكلتي اريد بَس اطلع !
حَسبت درجتي ب الي حليتة اجيب النجاح، فَ خليت وطلعت بسرعة ..

مـادري وين اروح المَمر كُلة فاضي، صرت ادور بالكُلية وداير مداير كُلية الصيدلة واندعي انُ ما اشوفهُم سوى، فجـأة ومِن بعَيد المح أمير ولازم ايد شَمس !

بساعتها ما اعتقِد صار عندي شعور من الصَدمة
ضليت بس اباوعلهُم وساكتة والدمع كُلة اتجمع بعيوني

يباوعلها بنظرات حَنينة بس وِجهة كدامي وهيَ دايرة وجهة
ويحاجيها مدري شنو بهَمِس

هنـا احس ثكُل صار على كلبي واحس بعَد ما اكدر اسكُت ابد ..

تقدمت تِجاهُم جنت نظري موجهتة عَ أمير ومتجاهلة وجود شَمس تمامًا ..

فَرس
هههههههه حَسبالي انتَ شخصيتك باردة وجامدة
اثاريك ما شاء الله يم غيري

نزعت الحَلقة وشمرتها بالگاع بكُل عَصبية وحرقة كلب وكتلة
فَرس
كُل شي بينتة انتهى، اتهنى ..

جـان مدري شديحجي ومخبلة ومدري شنـو
عفتة ومشيت بسـرعة

دموعي صـارت تتطافر لاول مَرة يم الناس
وماجنت مهتمة لوجود ايّ شخص كدامي

صار يمشي سريع و وكف كدامي بسرعة

أمير
شبيـج فَرس انتِ مخبلة!!!
مو الناس كلها جاي تباوع علينـا
اصبري خل افهمج السالفة مو نفس ما انتِ متصورتها !!

باوعتلة ودموعي جان مالية وجهي واحس بعَد مُستحيل اطيقة لحظة وحدة

فَرس
انتَ اسوء انسان مَريت علية
ماريد اشوف وجهك نهائي اني حيَل اكرهك
وماريد اشوفك بعَد

أمير
فَرس السالفة خَطرة فوك متصورين
لا تصيرين طَفلة وتحكمين علية بسوء
انتظري اجيج وابرر الـج حَتى لا تتندمين بعدين

فَرس
هههههههههه اتندم ؟
عَ انسان بارد اتندم
او عَ انسان خاين ؟

كلت هيج ومشيت وعفتة واكف بمكانة ..
بساعتها حَسيت كلبي يريد يطلع من مكانة
ماتحملت شعور الخُذلان الي مَريت بي اني
مادري شلون رجلية وصلني للسكن

اول ماوصلت انهاريت من البجي
جنت متمنية يلحك وراي يكول شَي
او يراسلني عَ الاقّل
بـس كل هل وقت وماكو أيّ شي اجاني
لا برر ولا گال ولا حَتى رِسّل شي

حَسيت أمير اسوء انسان بالدنيا
واخر أمل بعلاقتنا كطعتة بيدي ...

الامتحـان الي ورا اباوع لاميـر ما انطاني ولا نَظرة
حَتى لو بالغلط، وجان طول الوقت يم شَمِس وبكُل وقاحة
ساعتها حَسيتة انسان حَقير وحسيتني شكد جنت مخدوعة بي

جنت اتمنى يجي يبرر يكول بـس الظاهر جان راضي بالوضع

خصوصًا مِن شفتة ما مهتم لانّي نازعة الحلقة ولا مهتم لشنـو البس وشلون بهاي اللحظة عرفت انُ علاقتنـا اني و امير صـارت مُستحيلة وكُل شي بيناتنة انتهى ..

الاسبوع الثاني صادفت عُطلة عندي يوم جُمعة وسبت والاحد امتحاني راسلت حُسام حَتى السايق جيرانا يجيني بَس فاجئني انُ الرجال جان عندة ظَرف حيل ضجِت وجنت اريد اروح واشوف ايلول لان بالي هواي يم ايلول وهواي محتاجة اكون يمها، ف كلت من الخَميس اروح وجُمعة وسبت بليل ارجَع، خابرت ايلول وكلتلها كلتلي عَلي اليوم نزل من الدوام وراح يجي للموصل تعالي ويـا

استحيت وكتلها لا ما اكدر بَس هيَ ضلت تلح علية
ودزتلي مُحادثة الها ولعلي وجان علي يكول الها

علي
لا عادي امر الها انة واجيبها وياي

ترددت صراحة بـس ماجان عندي خيار غيرة
وابد ماكدرت أجلها لان جنت مشتاقة لايلول
وبالي يمها .

راسلت حُسام وكتلة
كلي ليـش ما أمير يجي كتلة مشغول بالامتحانات
كلي لعد تعاي عـادي

راسلني علي بساعتها سلم علية وكلي شويـة واجيج
اني هم ماعندي شي اخذت شكم شغلة وحَضرت نفسي
خابرني علي كلي انُ اني وصلت خَليت وطلعت

صعدت بالسيـارة وسلمت عليّ
جنت مستحية هـواي من عندة بس علي لَطيف بما فيه

ضل يحجيلي عَ ايلول و عَ كُل شي صار الها
واني احِس كلبي انمرد و مرّد واني اسمع حجية
لدرجة كمت احاول بدون مايحِس امسح دموعي بهدوء
بس كلبي جِنت احسة محروگ حرگ عليها
ماعاولت بَس اوصل وراسًا اروحلها واحضنها ..

الحلو بالموضوع لهفة علي وكلامة وهوَ يحجي ع ايلول
جَد حسيتة شكد يحب وشكد كلبة محروگ عليها
ومن هل لحظة كلت اكسر راسها لايلول
اذا من بعد هَل حُب كُلة وضالة ميبسها راسها ويا ..

بعدها عّم الصمِت بيناتنا وصرت افكر بكُل شي صار
شيصير لو مـا منطية مَجال لسارة؟
شيصير لو ما مِتهورة هَيج؟
شيصيـر لو ما حَبيت أمير اساسًا ..
نَدم اجتاحني فَضيع، عَ كُل شي صار
من اول ما رحت من الموصِل لحد هَسة ..

وعدت روحي من هاي الحظة بالمضبوط انّي بعد مُستحيل اكون وي ايّ انسان مهمّا قدملي وما احكم عَ ايّ احد من منظرة
لا انُ فقير اتعاطف ويـا
ولا انُ حلو و وسيم يعجبني واتمنى

تعلمت إنّه مو كل حضن أمان،
ومو كل ابتسامة صدگ،
ومو كل "أحبچ" تعني حب حقيقي.
من اليوم،
ما أركض ورا أحد،
ولا أتعلّق بشخص بس لأنه كان حنون بلحظة ضعف.
راح أختار اللي يختارني بثبات،
مو اللي يحبني بس من بعيد...
أو من وكت لَـ وكت
يُتبع...
_______________
شَمس
كملِت اول شي خليت وطلعت
جنة متواعدين بالحديقة الي جنت كاعدة اني بيهـا
اجة وراي وكلي نفس ما كتلج سوي
بصراحة ماجنت اعرف شنو الي راح يسوي وشلون
وجنت خايفة بس جنت مضظرة اكمِل واني ساكتة
لان ماجان يقبل اسئلة عَ شي

جنة واكفين ودنحجي حَسيت نفسي دخِت و توازني اختل
حجيت بصوت ناصي
شَمس
امير دخت

ماجانت اكو مصطبة يمنـة اكو مقابيلنـا
ردت امشي خطوات الها حَتى اكعد حَسيت روحي راحت
اني عندي نقُص حديد وفقر دم فَ دائمًا اتعرض لدوخة قوية
امير جان مركِز وياي فَ راسًا سندني

استحيَت من عندة بس ضل لازمني بَس حَتى تروح دوختي شوية

امير
شتحسين

شَمس
مادري بس دوخة قوية فجأة ..

جـاي نحجي ماحِس إلا عَ صوت فَرس ورانا ..
التفتت الها واني مصدومة، اباوعلها تباوعلنة وعيونها حُمر ومدمعة

امير
فَرس، شسوين هنا؟

انتبهت انُ هيَ تباوع لادينا وبسرعة وخرت ايدي الي جان امير لازمها

شَمس
اتمنى متفهمينة غَلط بَس..

بعدني ما مكملة كلام دارت وِجهة لـ أمير وگالت ..

فَرس
هههههههه حَسبالي انتَ شخصيتك باردة وجامدة
اثاريك ما شاء الله يم غيري

نزعت الحَلقة وشمرتها بالگاع وگالت

فَرس
كُل شي بينتة انتهى، اتهنى ..

امير
هاي شبيـج فَرس انتِ مخبلة ؟
السالفة مو مِثل ما تظنين !!

عافتنة وراحَت تمشي بسرعة مشة اميَر وراها
واني احِس الدوخة سطرتني سَطر

مادري شلون رحِت وكعدت عَ المسطبة
ياربي فوگ الحَظ وفوگ ما الولد ساعدني راح اخرب حياتة
شلـون سالفة هـاي

جنت اتمنى اكدر امشي حَتى اروح و اوضح الها
ضليت كاعدة بمكاني و ايدي عَ وجهي وميتة من الدوخة كوة فاتحة عيوني

حَسيت اكو شخُص يمشي يمي
رفعت راسي امير
جـان شكلة بُركااااان، معصُب بشكل كارثي
ومبين مزعوج

شَمس
امير شصار، هدأت ؟؟

أمير
لا تهتمين شَمس يلا بسرعة كومي كدامي
شفتة طلع

ديحجي وياي موبايلي اتصل باوعت هوَ

أمير
ردي كوليلة جـايتك ..
شوفي شَمس انتبهي علية كلش زين
انة جان سحلتة هنا بس ماريد تصير السالفة بالكُلية حافظًا عليج، هذا شي الشي الثاني ماريد السالفة تصير ومرتة ويـا خلي بلكي يتعدل ويحس بذنبة ويرجع للطريق العّدِل ثالث شي ماريدج تكونين ويـا فَ مُجرد ما انتِ تطلعين بسيارتج وهوَ بسيارتة حاولي تمشين بطيء ومن تشوفين مفرزة شُرطة جاية تخلين وترحين للبيَت
من بعدها السالفة صارت يمنة مو يمج، مال يتعرضلج بعد ؟ انسيها راح يتربى خوش تربية

شَمس
مفرزة شُرطة شلون أمير؟ خاف تصير غير سالفة !

أمير
لا السالفة يم علاوي لتخافين هوَ يدبرها
شوفي انة من اول يوم حجيتيلي جان ودي اروح واكسر راسة، بس فكرت بعقلي وكلت خلي كل شي رسمي احسَن من ناحية يعرف احنة ولد عمج ومن ناحية علي بالمركز ف مراح يحجي شي لان بعتبار جاي يطبق القانون عليّ فهمتيني هَسة؟

هزيت راسي الة بتمام، رديت عَ محمَد كتلة اطلع وحطلع وراك، هنانة امير كال راح اروح بالكراج بسيارتي بدون ميشوفني حَتى لا يشوفني ويـاج، فعلاً راح أمير وهوَ جان يطمني طول الوقت وحسيت نفسي ب أمآن صدك، ولاول مَرة حسيت نفسي مفضفضة بمكاني الصَحيح ..

رحت للكراج شفتة موجود ركب بسيارتة وصعَد خابرني وكلي ضلي امشي وراي هوَ يحجي واني قارفة من عندة وصافنة عليّ شلون اتغير؟ هيَ دنيا تغير الانسان تغير تصرفاتة وطباعة بَس معدنة شلون تكدر تغيرة؟

امشي بالطَريق واشوف امير ورانا شكد ما جانت وضعيتي سيئة وجنت احسب وافكِر واتندم عَ جيتي كُلها إلا حَسيت بشعور ألامان وامير موجود وياية، وكإنما اخوية الجبير وديرافقني بمشواري

ما ابتعدنـا هواي مِن الكُلية إلا واجت دورية مـال شُرطة
وكفت سيارتي وصرِت اباوع مِن بعَيد
وكفوا سيارتهُم مقابيلة تمامًا
السيـارة مكتوب عليها ( قِسم مُكافحة الاجرام- وزارة الداخلية )
نزلـوا ٣ شُرطة وحاطين عَ وجوهُم نفس الاقنعة السود
ونزل علي

اباوع الهُم جروا محمّد جرر
و واحد من عندهُم ضربة حَيل

حَسيت نفسي ما اكدر اتحمل المنظر، راسًا دمعتي نِزلت وصِحت بصوت خَفيف ..

بذيج اللحظة...
الدنيا كلها ضاقت بعيوني،
الشارع كبر فجأة وصار أبرد من روحي،
وصوت خطواتهم وهُم يجرّون محمّد... صار مثل سهام على قلبي.

كلشي اختفى،
الناس، السيارات وصوات الشارع
كلشي تلاشى،
ما ظل غيره هو،
هو بس،
حطوا نفس الشال الاسود عَ وجهة
بس أنا شايفته، شايفته بعيني قبل لا يخطفوه منّي.

احسّ بدقات قلبي صارت تصرخ،
رجلي ثبتت وما قدرت أركض له، بس گلبي جان ودة يكون يمة
عيني دمعت، مو من الضعف، بس من كد ما روحي انهدمت.

صعدوا بالسيارة واحس جسمي بدة يرجِف،
مو من الخوف،
من العجز...
لأول مرّة، حسّيت شلون الوقت يوقف،
شلون اللحظة تصير أطول من عُمر،
وشلون الإنسان ينكسر وهوه واقف

فززني مِن خيالي امير وهوَ يدگلي هورن
باوعت يمي
اشرلي بَسرعة اروح وهوَ يخزرني

مسحِت دمعتي بـ ايدي الي صارت ارخص من كُل شي من يوم ما اجيت لهنا لحد هَسة
اباوع هذا الطَريق نفسة الي اجينة اني وبابا نسجل بالجامعة وجنت مكيفة واريد اشوف محمّدي، شلون هَسة اني داسلم محمّد بـ ايدي للشرطة وهوَ اساسًا شلون سمح لنفسة يصير هَيج؟

دموعي ماكدرت اوكفهُم ابد، ساعتها جسمي صارت بي رجفة قوية وماكدرت اسوق ابد، ضليت واكفة بالسيارة رُبع ساعة وصافنة للانتقالة الي صارت

انتبهت عَ صوت الموبايل وهوَ يدگ
شلتة بابا

شَمس
الو بابا

حَسنين
ها بابا صارلي ساعة ادك وينج ؟

معقولة بابا صارلة هواي يدگ
وهيج عقلي وكلبي مو بمكانهُم ؟
شسويت بية محمّد
ما استاهل كُل هذا منك ابد ..

كلت لبابا راح اجـي ورحِت للبيت
بهذا اليوم جان شعوري مُختلف تمامًا
حَتى لو بجيت جنت ابجي بـ برود
احس روحي انصابيت بـ برود مُختلف
برود جزعي من كُل الي صارلي

ومن بعدها حَتى الدمعة صارت صعبة علية ..
حاولت اقسي كلبي وافتهم سالفة انُ الي صار من أدينة ويستاهل
فكرة انُ يتحول لهل انسان القاسي فكرة مُرعِبة ومُقرفة ..
واني كُلي ثِقة بـ أميَر واعرف انُ هوَ انسان مُثقف وراح يعرف يتعامل وي الموضوع

صليت بهذي الساعة واندعيت
اندعيت محمّد ينهدي ويرجع لمرتة وبنتة وابنة الي جاي بالطَريق
واندعيت الله يبرد كلبي مِن بعَد الي صار ..

فكري صار يم امير وخَطيبتة
والقهر استولاني على الي صـار
راسلت امير حَتى يطيني رقمها احاجيها بَس بساعتها مارد

تَقريبًا للعصُر خابرني ..

أمير
اهلاً شَمس ..

شَمس
اهلاً أمير

أمير
نـآل العِقاب المُناسب، ابن أُمة لو فكر يقترب الج مَرة ثانية، تربى تربية من هاي الزينة، ومُستحيل يفكر يباوعلج بعَد والله ..

شَمس
مايهمني امير
اريد رقَم فَرس ..

أمير
لتهتمين يجوز خَير ..

شَمس
مفهمت؟

أمير
اساسًا احنة ما متفاهمين ابدًا

شَمس
لا أمير لا تصدمني انتَ وفرس ممتفاهمين !
مُستحيل السَبب وين ؟؟

أمير
يجوز من عندي لان ماجاي اكدر انسى غلطتها
ويجوز من عندها لان غلطت
مادري بَس اشياء هواي
عَ العموم انة واثق من بعَد الي صار اليوم مراح يصير ايّ شي فَ ماريدج تخافين ابدًا، بس لو احتاجيتي شي او صار شي فَ انة موجود وها، اتمنى هذا الشي صار درس الج، واتمنى تكون اول و اخر غلطة
انتِ تستاهلين الاحسَن فَ لا تطمثيـن ضواج بظلام بَشر ..

گال هَيج واترخص وسَد الموبايل
حاولت اطرِد كُل الافكار من راسي واقرة لامتحاني

اليـوم الي ورا ماجان عدي امتحان، انتبهت انُ محمّد حضرني من حسابة الاصلي
حاولت ما اهتم وانسى كُل شي واهتم بدراستي اكثر واكثر
بيـوم الي جان عدنة امتحان رحِت للامتحان
اول ما وصلت للقاعة شفت محمّد واكف هوَ ورسُل
اول ماجت عينة عَ عيني دار وجهة رأسًا
حاولت اشـوف فَرس حَتى احجي وياها بس بساعتها
اجتِ متأخرة وطبت بعَد ما جان الكُل طاب

وبالطلعة صـارت خَبصة وماشفتها ..
اليوم الي بعَدة شفتها ورحت حَتى احجي وياها بـس جان اسلوبها ابد موحلو وياي وكلتلي ما مهتمة بـ ايّ شي وخلت وراحت
حَسيت علاقتهُم مُعقدة ومادري ليش مرتبطين اساسًا وهُمة بهيج وضعية

بدت تسير امتحاناتي والوضع نَفس ماهوَ محمّد جان نهائي ما يباوع الي واذا امشي من طريق يروح للطريق الثاني، واغلب وقتة يكون وي رسُل يطبون سوة ويطلعون سوة
جان مجنبني تمامًا وكإنما شو شمسويلة
انتابني فضول أسال امير صراحة بَس استحيت

وبهاي الايام امير ابد ماعافني وحاول كُل ما يتواجد يكون يمي
وكإنهُ حَسيتة دينطي رِسالة مُبطنة لـ محمّد

المُهم كملنـا امتحانات وبوقتها قررنـا نرجع لبغداد لان جانت عطلتنا تقريبًا اسبوعين

رجعـنا لبغداد واحس كُل شي انعاد علية
صعُب اتخطى، انتظاري ابد ما جان هّين علية
وفوك كُل هذا صدماتي بي

قررت قرار ساعتها انُ نِسختة القَديمة اضل اذكرها واحبها
بس مانتظرها ولا اريدها ترجع تكون وياي
اما نِسختة الجديدة فَ امحيها مِن بالي وامحي كُل شي سوى ساعتها حَتى لا اخرب صورتة بـ عيني و كلبي يضل يتأذة ..

ومِن بعدها انخلقت شَمس جديدة
بـاردة، هادئة وحتى الدمعة تنزل مِنها گوة ..

قَصة شَمس لازِم تكون عُبرة الكُم يا بنات
اتمنى تسمعون وتتمعنون بكلامي شويـة
المعادِن تتغير والاشخاص تتغير والشخصيات تتغير فَ لو تعرفتوا عَ انسان وكان زين او احتضنكُم بوقت كنتوا تعبانين بي ومحتاجين شخُص يطبطب عليكُم هذا ما يعني انُ هذا الشخُص زين وراح يستمر وياكُم هيج ومراح يتغير، مرات الله يوديلنـا ناس عَ شكِل درس ومرات يوديلنا شخُص يكون وقتي مُجرّد ينقذنا من الي احنة بي كَ وسيلة مِن الله النة وبَس، يجوز هوَ مو هيج واخلاقة مو هيج بَس بهذا الوقت صارلكُم هَيج لان هيَ حِكمة الاهية، فَ يا اخوان استوعبوا سالفة انُ مو كُل شخُص يدخل بحياتكُم لازم يكمِل بيها، الانسان بهواي مَرات درِس لا اكثر، هذا شي ...

الشي الثاني والاهم لكُل بنت غلطت بفد يوم بحياتها وكعدت تلوم نَفسها عَ الغلط كومي وارفعي راسِج وابد لا تخلين شخُص يطبق نصائحة عليج وهوَ ما مطبقهن على نفسج ماكو احد بهدنيا ما يغلط وكُل احنة مارين بلحظة ضعُف وبلحظة جَهِل وبلحظة يكون قلبنـا يتحكم بكُل قراراتنا بس تذكري انُ غلطج هذا لازم يكون بداية مو نِهاية، القوي هوَ الي يوگع ويتعلم من غَلطة وما يعيدة، مو يغلط ويتندم ويضل متقوقع على نَفسة بسبب الغلط الي ارتكبة، والاهم انُ ما تخلين ايّ شخُص يحكم عليج مِن ماضيج ولا تخلين نَظرة الناس تدفنج، ترة الناس تحاسب وتنسى نّفسها تعلم عَ الصلاة وهيَ متصلي، الاهم بالموضوع انُ تسامحين نفسج ع كُل الاغلاط وتقررين تبلشين مِن جديد وصدكوني الي يغلط ويتغير احسَن من الي ما يغلط لان بكُل الاحوال كُل احنة مُعرضين للغلط، وضلي ذكري نفسج دائِمًا انُ الغلط ما يوكف حياتج، وتذكري انُ انتِ قادرة، قادرة على التخطي وكُل شي واصلاً ماكو شي يوكف بوجهج، بالنهاية كُل شي مقدر ولو شي الله كاتبة النة صدكوني يا بنـات الله مراح يخلينا نتعذب بي وهوَ راح يسهل النا كُل الطُرق بينما لو جان موضوع بيبانة مقفلة ومُتعِب فَ لُطفًا عوفوا وانسوا لان الله ما كاتبة لصالحكُم، بس احنة مرات نحاوِل نفتح باب الله قافلة النة، ومن ينفتح نكول ليش هيج ياربي ؟

الشي الثالث هوَ لا تخوضون بعِلاقة وي متزوج تحت ايّ ظرف كان لان صدكوني الكارما تأذي، وحَتى لو الشخُص الثاني مُقصَر او موزين او ايّ شي المُهم لا تفوتون روحكُم بهذي المواضيع ابد، لان صدگوني النهاية مو لصالحكُم ابدًا ..

الشي الرابِع والاهم لا تسكتين عن المُبتز
لان شكد ما طولتوا بالموضوع انتِ حتتأذين وهوَ راح يستمُر وهم يجي يوم وتنكشفون والفَضيحة تكون ضعُف، اليوم احنة بالقُرن الـ ٢٥ تطورنا و الحَياة صارت اسهل صدگوني هواي اشيـاء تكدرون تسوونها وتخلصكُم مِن الي انتوا بي، واذا مكدرتوا تحجون وي اهلكُم وتصارحوهُم بهالشي فَ اكو هواي طُرق عدالها المُهم ما تخضعون الهُم لان النهاية مراح تكون لصالحكُم ابدًا ..

وبِما انُ انتوا تحبون تتواصلون وياي مَرات، وللامانة اني شخص برايڤت جدًا، يعني مو جاية للواتباد حَتى احصل شُهرة ومدري شنو، اذا متعرفون عَني فَ اني طالبة طب واغلب وقتي مكرستة للدراسة بَس بنفس الوقت عندي فُسحة مجهولة احب افضفض بيها فَ لو حبيتوا فد يوم تحجون وي هُدى فَ اني موجودة عَ برنامج ( التلينيوم ) تطبيق رسائل مجهولة، اكتبوا يوزري byhuda1 اطلعلكُم 🤍

وحاليًا اكدر اكول الكُم باجر انتقالة جبيرة بحياة كُل بطل من ابطالي و اولهُم راح اجسد احداث مروان و روان وهم اغششكم ب انتقال عِلاقة علي و ايلول لمكان اوضح من هَيج واحتمال اكو بَطل جديد عَ الساحة راح يدخل ويانة، راح تنصدمون من الاحداث وقلب الاوراق انتظروني بـ بارت جديد
لا تنسون التصويت والتعليق الحلو، احبكُم🤍