بيت جبر الفصل الثاني وسبعون 72 - بقلم هُدىٰ آذار

لايـوجَد مُقّدِمـة، اقرء بِصمت أيُها القارِئ
انهّــــا على وشكِ النِهاية ..

قُصـة بيَت جبُر
لِلكاتبة : هُدىٰ آذار ..
________________

ايلول

ابتسم و قربني للجرباية كعدت وتربع وكعد كدامـي
علي
خل نصفي حساباتنـا لو جاوزنا الموضوع فَ راح نرجعلة ب ابسط واقرب عركة، اريد نتعاتب ونِحجي اعلى كِلشي صار ومن بعدها نحدد رجعتنـا، الج حيل الي ؟
انة اريدج اليوم كبل باجِر ايلولة ..

باوعتلة ورجعت نظرتي الـة نفس قبِل، ضليت اباوعلة واتذكر الي سوى شي شي، والصمِت عّم المكان ..

علي
عيونج جـاي تحجي، ليش حلكج ساكِت چـا ؟
هلكد اذيتج انة مو ؟ احچيلي ايلولة انة جـاي اسمعِج
اشكيلي حَتى لو مِني انة قابل ..

صـارت دمعة بعيوني، واحِس جسمي كُلة انتفض مِن قسوة الي صـار بذيچ الفّترة، ماكدرت اسيطر على دموعي وعيوني صـارت حابسة دموعهـا بالزور

علي
لتضلين ساكتـة احچي، كِلشي بكلبج احجي، حَتى لو تردين تغلطين، تصيحين، ايّ شي بس لا تضلين ساكتة احجي الي بكلبج ايلول، اعتبري الي يمج مو علي اعتبري الي يمج نفسج مرايتج وكاعدة جـاي تحجين ويـاهة، احجي لا تفتتيـن گلبي والله تعبني سكوتـج ..

رفعت عيوني الي جِنت منزلتهِن وباوعتلة
عيونـة خزرن عيوني
اباوعلة تلعثّم وانخُبص وهوّ ساكِت

علي
موتيني، وجهيني اعلى قِبلة مُحمَد ولا دموعج وعلي اتهّستر اعصابي تطير واحس روحي مو بروحي مادري بس كلبي ينكمِش وينمرد مَرد بس اشوفنهن طالعـات

يحجي ويمسح دموعي بـ اديّ وهوّ يتقرب مني شويـة شويـة واني مصنمة بمكاني بَين اتذكر الي صار واريد انفُر وبين انّي اتقربِت بسبب شعوري وماكدر بعَد انسحِب ..

ضليت اكِل بـ شفتي وصافنة ماعرُف شحجي ولا اعرُف اعبُر احس كُل شي بية متجمِد، رُفع راسـي من زاوية حِنكي وباوعلي بطّرف عيونـة برِقة وفهاوة بس كلامة جان حآد ..

علي
ماريد هـاي ايلول الهآديـة الآدمية، كومي صيحي كَسري عربِدي أسبيني واخُبصيني وخليني افقِد اعصابي وانهـار، حسسيني بحُبج لا تراويني برودج هذا

ايلول
ماعرُف منين ابلش علي

علي
من الي يعجبج شني الي تذكري وتحِسي جرحج اكثر شي، شني الي يجيج بـ بالج احجي ميخالف ايّ شي انة اجمعلج ..

باوعتلـة واحِس كلبي بِدة يطلع حرارة ع گد ما مأذيني وكتلة بصوت مخنوگ
ايلول
ما انسى ذيچَ الليلة ابـددد، ما انسى لمّن خليتني اطلع وحَدي لمن لبست نظارات بَس حَتى ما اراوي العـالم شكد اني متأذية وما اراوي العالم ضُعفي مِن ورة دموعي المستمرة، ما انسى لمّن طلعت مِن البيت و حَسيت انّي وحيدة ومـا الي ايّ وِجهة بـ هاي الدنيـا

ومانسى هم لمن خليتني احِس روحي أغبى إنسانة بهاي الدنيا، لمن فتحت عيوني ولكيت روحي ما عِندي ايّ شي، لا سيـارة لا اهل لا انتَ، لا شخصيتي القَديمة ! كُلشي ما جوة ايدي من اشيائي الي جِنت امتلكهِن قبِل ..

ما انسى بيوم الفنُدق الي جِنت سايقة فوك الـ ٤ ساعات بصورة مستمرة ومكضيتها بَس بجي ولمّن اجيت جان المفروض انـام من كِثر ما تعبانة بس اني صبح الصُبح واني عيوني ما غافيـة كاعدة وابجي مِن القهّر

غمضت عيوني بقوة واتذكرت اسوء يوم مَر بحياتي واحِس كلبي انعصَر وصوتي بلش يخفِت
ومُستحيـل مُستحيل مُستحيللل انسى بيوم طلعـة اميـر مِن السجِن، مُستحيل انسى بشاعة الشعـور الي عيشتنيـا، مانسى لمّن مشيت وسجلت ممُخالفتين وردِت اسوي مَدري شكم حادِث

حسيت روحي نفس الـ طير المذبوح اليرفرف المايدري ويـن يروح وشلـون يتخلص مِن خنگتـة، ما انسى لمن اجيت وطردوني مِن السكن وخلوني اطلع بنُص الليل ماعرُف شسوي ولا اعرُف ويـن امشي

مانسى لمّن اجـة هذا وراد يتعدى علية، ولمن فزيت ولكيت روحي يم رِجال غَريب، هذيج الركضة بنُص الليل وشعـور محد الي مانساهة ابـد مُستحيل انساهة علي مُستحيل

كلت هّيج واني ارفع راسـي الة وابجي بصوت مسموع، لكيتـة ديباوعدي بطريقة غَريبـة حَيل بس جانت نظراتة عَصبية حيل وكإنمّا گوة متحمّل الي داحجي، وفوك هل نظرات جانت اكو نظرات ذابلة بجوة عيونـة ..

ضليت اباوعلـة وابجي ساكتة لثواني بَس
قاطعني وهوَ يكلي بصوتـة المبحوح

علي
ك كمل ي، احم احم
كملي ايلول خل اسمِعج ..

وخرت عيوني عنـة وصرت اباوع كِدامي واتذكر ذاك اليوم المشأوم
مِن هل يـوم واني احِس روحي كرهتك، كرهتك؟
هههههه لا ماكدر اكول كرهتك لانُ لاخّر لحظة اني اكُلك بيهـا روح ماريدك وجِنت مُصرة كلبي جان ديموتني تموت لان جِنت انطق هيـج كِلمات وداعيـة إلّك ..

بَس هل يوم بالذات تحِسـة غريب، تحِسني صرت ايلول الثانيـة الي ماتهتم لايّ شي رُغم داخلهـا جان مَيت بسبب هل موضوع

رجعِت درت وجهي الة وحَطيت عيوني بـ عيونـة
شهگت نَفسي بهدوء ومسحت الدمعـة بطرّف اصُبعي وكتلة بهدوء

ليـش هيج سَويت ؟ ليـش عفتني هيج؟ شنـو سويتلك اني لدرجـة انّك جِنت مستعِد ترد عَ فَرس بـس ماترِد علية؟ شنـو الي صار احجي شسويتلك اني ؟ لتضل ساكِت علي احجي حباب احجي !

علي
مـا جِنت اريد أذيج ايلول، انتِ شتدريبيني(شتدرين بية)
انة هم اجاني فد يوم وطحِت بضيچ ( بضيگ ) واجيتج ؟
يا يوم كليلي يـا يوم ؟ ماعدا اليوم الي جَدي رفض بي زواجنا
غيـر هذا اليوم اجيتج ؟؟

شكد صـارت اعلينـة سوالف وشكد مَرينـا بظروف هاي صارلنـة سنـة ونُص سويـة ميت ضيچ وكعِت بي لمّن جنت اوگع اجيج لو شسوي ؟

مو جِنت اقفل موبايلي واكعِد واسكِت وحدي !!

انة ادري بروحي مخبّل، ادري بروحي مو حمِل اشارك مشاكلي وي واحِد يادوب اكعِد اكِل بروحي واسكت
ماريد أذيج ايلول ماريد أذيج

ايلول
هذا مو مُبرر علي مو مُبرر
يعني مُحادثتي ما تصير كدامك؟ مايثيرك فضولك تشوفهـا، ما تشتاق تحاجيني !! ساعات وانتَ تختفي عني وماتجاوبني اصلاً، جِنت اناني تعرف شلـوني وتعرف الي تريدة وتروح!

علي
جانت مُحادثتج تصيـر گِدامي، وجِنت اشتاقلج واتمنى احاجيج بس بروحي شي مكسور ايلول، بروحي شي مكسور مو مِنج من امير، جِنت بس اريد ارجعـة وارجع ألِم شملنـة، من جان بروحي هل شعور هوَ مو بَس لاميـر هوَ الِج هم حَتى اكدر انجمع ويـاج

وحگ علي الكـرار كِل ما اشوف دليل يگربني اكثر ليج وحگة علي يا ايلولـة وانتِ ما الِج اعلية يمين، كلبي يطيـر واصيـر اتخيل الف صورة ويـاج براسي

اميـر موجود انة اكِلج وخوفي اعليّ ولهفتي وحرگتي حَتى اطلعنـة طاغيـة مو شلـون ما جان، بَس بنفس الوكِت انتِ جنتِ مستحلة تفكيري ماردت احاجيج لان ادري بروحي اضعّف

من كال هَيج احس عَصبني وكُبل صحت بصوت عالي
ايلول
علييي كافي تكول اضعّف واضعّف !!

يعني انتَ ما تعلمِت من شغلك تفصُل بين الشغُل والبيت؟ ما طول عُمرك تكلي احنة تعلمنـا نستأصِل عواطفنـا ونفصلهن بـ شغُلنا ! وبعدين هَسة اني مو داشوف الناس

اقرّب مِثال اميـر، امير بـ ايّ شي يصيـر ويا يجي لـ فَرس ويحجي وياهة ويشاركهة همومة، ولمن يكملون يكول الها انُ اني هَسة هِديت او حملي خّف شويـة لمُجرد وجودج
اني بعُمري وبحياتي ما عشت هل شعور علي !!!

علي
بس انة مو اميـر ايلول، انة علي !!
وهذا انة ماكدر افهميني بَس افهمينييي
انتِ بعُمرج وبحياتج ما جِنتِ نقطة قوة الي، كتلج وراح اكلجياهة هاي للمرة الثانيـة وما مستعِد اعيدها مَرة ثالثة لان ادري ماكوشي راح يتغير فَ استوعبيها وبَس !

ايلول
هيج حيـاة فاشلة، فاشلة علي

علي
فاشلـة ليششش ؟؟
يابة مني الرّجال انة لو انتِ !!
انتِ مَرة ضعّيفـة تكونيلي نقطة ضعُف، وانة ازلمة اكونلج نقطة قوة وارتِكاز وتجوة وسَند، هجي المُعادلة تصيـر !

كمِت وكفت وكتلة بعَصبية واني اباوعلـة
ايلول
اني مو ضعـيفة ولتكول عَني ضعيـفة، اذا انتَ ممعترف بية فَ غيرك معترف بية واكدر اكون بـ عشِر زِلم هماتين

كام وكَف كدامي وكال بعَصبية مُقابلة لعَصبيتي
علي
انتِ قويـة بَس لوحدج ولاهلج ولتعرفيهن
بـس يمي انتِ ضعيفة وانة القوة الـج
بطلي يبسـان راس ولا تحاولين تعادلينـة
مو ضعُف بيج ولا اهانة الـِج بس احنة هجي ..

ايلول
اناننيييي، عِندك نفسك انتَ قوووي وبَسسس
والمـرة لازم تكون مُستضعُفة وبحاجتك ولازم بدونك متكدر تسوي شَي هذا تصرُف همجي علي واني ماقبل بي غير تفكيرك وتعـال حاجيني !!!

علي
استغفرالله استغفرالله لِج يابة انتِ ويـن وانة ويـن !!
انـة قابِل من ذولة اليستغلوج وتخـافين تكونين يمـة ضَعيفة ! يابة انتِ كون تحطين راسج اعلية وتنتچين وانتِ مغمضة، ما تسئلين اعلى هاي ولا ترجعين اعلى هـاي وهذا مو ضعُف هذا استحقاقج

لازِم البنات يتخلون عن كِل المسؤوليـات، والرجال الي وياهِن هوَ الي يفكر ويخطط و يحمي هذا ما يعني قوة الة ولا ضعُف الهـا هاي تحصيل حاصل افهميني افهمينييييييي

كـال هَيج وهوَ يضرُب بالحايط بقـوة بس بصوت ناصي

ايلول
وهَسة انتَ شنـو عود اذا ضربت الحايط حتطُبب الفكرة لراسي لو شنـو مدافهم ؟؟

وخر ايـدة و اخذ نّفس

ايلول
بطل هتصرُفات الهمچية علي ما احبهِن ترررررة
لا حسبالك اني من البنات الي يحبن واحد يصيح ويعربِد عليهِن ومَدري شنـو! هذي التصرُفات كُلها ما مسموحـة يمي

علي
حاضر حبيبتي همچيتي هايّ راح احاول ابطلهة، وراح احاوِل اصيـر اكثر رُقي وراح اتحكم بـ اعصابي اكثر واصلاً انة لو شفتج قابِل راح اعربِد بس تضحكيلي انسى كِلشي بس هسة كلبي فاير والله اعذريني ..

ايلول
ميخالف علي، ماحب هسوالف اني ماحب..

علي
حبيبتي انتِ صوتج اعلى مِني ترة شترديني اهدى لا ونوب طابين بنُص عركة ونقاش حـآد
ثنينة اطباعـنة هجي وثنينة وايراتنا طابگات فَ لتحدديني ولا احدِدج
صيحي احجي بكيفج بـس كِلة داخل غُرفتنا، برة اكو احترام وكدام الكِل، يجوز انة افهمج بس الناس ماراح تفهمج وبالمُقابل راح يقللون مني ومنـج هماتين
واكيد انتِ هم بدورج ما تحِديني وتخليني براحتي، بنهاية انتِ تعرفيني ما اتجرئ وامد ايدي ولا اتجرئ واجاوِز حدودي اعليج ..

ايلول
لا والله عايـزك تِجي وتضرُبني بعَد

ضحگ بخُفة وتدنى الية

علي
ويـن اكدرلِچ انة، غير اذا ضربتج ترجعيـن الضربة اعلية

گال هَيج وهوَ يحاوطني ويوگف گِدامي، عيونة بعيوني و وجهة مبتسم بـ لطُف

رجعت خطوتيـن لورة وحاولت اكمِل دور العَصبية
ايلول
بس اني ماكملت

علي
احم احم

عدل روحـة ورجع لورة

علي
شفتي انة عدي وجهة نظر، ادري بروحي بگُربج انسى كِلشي و ودي بس اگابلج وبَس، يلا كملي شعدج احجي لا تخلين شي مضموم ابد طلعيهن كِلهن ..

ايلول
ليـش ماقبلت اجي وي فَرس ؟

علي
رَحم الله والديج ستوني كلتهة وهَسة اكملهـا
بويـة وجودج ضعُف الي، انتِ نُقطة ضعُفي والله ما اتحمل، نوب اعوفن كِل المشاكل واكابلج واكعِد

ضحكت بـ استهزاء وكتلة ع حسب الي فهمتة

ايلول
وهَسة انتَ تنظرلي كَ جَسد بَس؟
خُبصتنـا ب يا اميـر ويا اميـر
يعني معقولة بعِز ذيج الفّترة لو اجيتك اني جان نسيت اميـر والتهيت وياية ؟؟

علي
ايلول انتِ شجاي تحجين؟
عـاد لا تكومين تمسلتيـن ولج

ايلول
امسلت ليش احجي فهمني اذا غلط كلامي !!!

علي
طبعًا غلط ورّب الغلط هميننن، شني تنظرلي كَ جَسد لج لا تخليني اطرج هَسة طر ، شاهد ربي اعلى كَلامي، ويجوز تحسي مو صح بس شاهد الله كلامي هذا مِن كل وكلبي

بـ ولا فد يوم نظرتلج كَ جَسد، ومُستحيل واحزم اعلى كلامي انة هذا انة مو هلكد سطحي ايلول، انة ترة اول ماشفتج جنت كاره جسمج بس بعدين حبييت روحج الي بيـج

والدليل انة ماحبيتج من اول نظرة انة كرهتج من اول نظرة وبعدين لمن تعاشرنـا يلة حبيتج

هذا موضوع، اما الثاني انتِ هم مساع حجيتيها
سالفة شعلومكُم بالعسكرية
احنة ما علمونـا واحِد يصيرلنـا نقطة ضعُف، حَتى لا بفد يوم من الايام يستغلونـا بشي، بس انة صرتيلي نقطة ضعُف واكبر ضعُف هم، واطلع مو رّجال لو اجيت ونكرت هذا الشي

عمي انة دمرني فراگج، سودني وخبلني، تهت كفيلج مُحمَد تهت، صرت مو ذاك علي وكإني واحد قاسي حَتى الله مايعرفة اعلى كد ما يتصرف شاطي باطي

بَس السالفة ومابيهـا حَتى لو بدون جَسد شلون اوصفلج هَسة وشلون تستوعبين، بوية مُجرد وجودج راح يربكني وراح يغير هـواي سوالف

ايلول
شلونننن شلوننن فهمني بلة !

علي
راح اشتاق ب انّي ارجع للبيت واشوفج، راح اضل متهلوس عيوني ع الوكت واريد بَس ارجع، راح اضلن هجي ٢٤ ساعة افكِر حتى اكون ويـاج
ادري بروحي راح انرِبك يشهد الله، وادري ماراح اسوي شي مضبوط لذالك ردتج تبقين يم اهلج ما عبالي يصير هجي اشياء، كلت اكمل مهامي وكِلشي ويجي اميـر حتى تصير فرحتنا سوية، احنة بدينا سوة وننتهي سوة هجي فكرت الله شاهِد ..

وهم ماردتج تجين لانّي بحالة ابد موحلوة وماردت استقبلج هجي، ردت استقبلج ب احسن حالاتي

هسة يا ايلول انتِ جاية تعتبين اعليَّ يابة وحگة هوَ علي ما جِنت بوعيي ما جِنت بوعييي بس هسة لو ترجعيني لذاك الوكت جان سويت نفس الشي بَس

ايلول
هاااااا يعني بعدككك مو بعدككك؟؟؟

علي
هسة انتِ غير تخليني امسلت !!
بس مُمكِن جان بغير اسلوب مادري احس لان هسة مترهي احجي هجي، ايلول ترة احنـة هم بَشر، مو دايمًا لازم نكون مثاليين وما عدنة شي ونضحك ونسولف ونتصرف بتصرفات نـاس عُقال، ترة الله وكيلج ذيج الفترة حَتى روحي كرهتهة

ولج جَدي الي هوَ جَدي ما اكو اعز منة وما ابديج اعلى معزتة بس جَدي هذا ايلول، الة احترامتة وهيبتة، ولج كعدت يمـة وبكل عين صلفة دخنت گدامة، ولمن حاجوني خليت وكمت بكل عنفوان وعجرفة، لحد هسة يحجون بالموقف

ايلول والله انة اريد واحد يكلي الله يساعدك شلون تحملت تعَدي ذيج الفترة، ولج والله بـالف ياعلي انگضت وعّدت صدكيني جِنت ب اسوء حالاتي، كلت وراح ارجع اكول شِدة من شِدة هاي

ولج اخوي سَجاد من انسجن ونسيبنة سبايـة هم ماصار بية نفس ماصار بـ امير، تدرين ليش لان ادري ورا فَرس الماتت اعلى فراگة، هيَ تبجي وهوّ يوصيني اعليهة

ضليت ساكتـة واباوعلة وهوّ يحجي

تقرب واخذ بـ اطراف ادية لزمهِن
علي
ايلولة حبيبتي، انتِ تدرين بمعزتج لو شني ؟
تدرين هاي ال عشر تشر ( عشر اشهر ) المّرن بدونج جانن موت بالنسبة لية ؟

ايلول
بس انتَ عفتني علي

علي
بس انة حاولت ايلول

ايلول
وإن، وإن ..
جان المفروض ما تعوفني ابد

علي
وعفتج انة؟ ولج مو من بعَد كل الاهاين والتواسيل السمعتهن منج ضّليت يجوز بالاخير ماحاولت بس انتِ تدرين انّي ضليت وما غِبت عنج ابد

انة علي ابو راس اليابس الما يطخ راسـة لاكبر واحد طخيت راسي الج وتوددت لگربج وتوسلت الج، شسوي اكثر من هجي ماتكليلي والله حَتى روحي كرهتينياهة بذيج الفَترة

والي مُدة انة ايلول الي مُدة بالتواسيل، ومن بعد ما شبعت اهاين ورفض سكتت بس رحِت؟ لا مارحِت عنج انة

تدريـن انُ بيوم من الايام جنت بالموصل انة ؟
اشتاگيت الج هواي مع انّي انة ادري بروحي مُستحيل نتلاگى بَس گلبي اشتاگ شيسوي ؟ فَ بساعتهـا اجيت للموصل

كلبي دِك الناقصة بية الا يشوفج، احس روحي جانت فحطانة اعليج، شايفة الكلبة يرفرف اعلى شي هوَ رايدة انة هجي والعباس، حسيت روحي لاول مـرة انة ماكدرت اتحكم بروحي فَ مادري شلون شالتني رجلية واجيت لبيت خالتج

خابرتهـا كلتلي محَد عدنـة وايلول نايمة
كلتلي تعال طُب كتلها زحمة محد بالبيت
كلتلي اكعدها ؟ احس كلبي جان شايل اعليج وماريد أذيج اكثر بنفس الوكت
اخرشي احس طگ كلبي تدرين شسويت ؟
طّبيت الـج

ضليت بالـ ربع ساعة انة كاعد ومكابلج وكلبي فحطان شوگ اعليج، شسوي شلون اطفي هل شوگ هذا مادري
تالي اخرشي حَسيت روحي جاي تاكل روحي وكل ما اشوفج ناري تاكلني اكثر فَ خليت وطلعت

هوَ يحجي واني اباوعلـة بصَدمة
ايلول
هاي شنـو شلون يَمتى؟؟ عود صدُك تحجي !

علي
والله اسئلي خالتـج

ايلول
بس مكلتلي

علي
انة حطيت اعليها العباس ماتحجي

ايلول
ليش تجذب، قابل خالتي شيعية وحَطيت عليها العباس هيَ مسيحية

علي
ولج انجبي قابل جاي اجذب حلفتها ماتكول بوية

باوعتلة صفُح وصفرت عيوني
تقرب يمي وحاوط كتفي بـ ادينّة

علي
شوفي ايلول انة احس اهم شي بين ايّ ثنين بالعلاقة الحُب

ايلول
متوهم علي، الحُب موكُلشي

وخر كذلتي الي نـزلت ع عيوني وكال بصوت خافِت

علي
انتِ المتوهمة، الحُب هوَ كِلشي، بس مو ايّ حُب، هذا الحُب الصادق النقي القـوي، الي يحِب يهتم، والي يحِب يتنازل، والي يحِب يضحي، والي يحِب يغير من نفسة
بينما تريد انسان يضحي وهوَ مايحب ف ماراح تلكين تـرة ؟

يجوز انة غلطت بحقج وو ..

ايلول
يجوزززز؟؟؟؟

علي
عمييي مو يجوز غلطت بحقج وانة اعترف انّي غلطت، بس قابل تخلين هل غلط يدوم وما تسامحيني اعليّ؟ بالنهاية انتِ تدرين بية شكد احبج

هسة اذا عدينـا هل حُب هذا ماراح ينعـد، حبي الج بلا حدود كد رحمة الله النـا انة احبج، واكو واحد يكدر يعِد رحمة الله؟
لا ..

فَ كافي جِفا وكافي بغُض وعناد
ثنينـة نحب بعض وثنينـة كلوبنا فطيرة رغم كلشي
وثنينـة نعرف انُ احنة نهايتنا سوية فَ ليش نگضي ايامنـا ب البعُد ؟

انتِ تعرفين كلششش زين علي ميكدر بدون ايلول
وانة اعرف زين ايلولة ماتكدر بدوني وتحبني

وبعدين تعاي بالنهاية شني نسيتي علي شني الي سوى اعلمودج؟
ماريدج تحطيهن بالحسبان ومن ضمن المواقف المُشرفة وهل خريط، لان هذا واجبي وغصبًا اعلية بس اعلى الاقل خل يثبتلج هذني المواقف شكد انة احبج

والله مرة من المرات تعرضت لموقف ب مواجهاتنـا، جان بيني وبين الموت شعراية وحدة، صفنت بساعتها، كلت لو مَيت وانة ما عايش حياتي الي رايدهة وياهة ؟

يحجي ودگات گلبة صوتـها مسموعة بشكِل موطبيعي، فوگ ما انهّن عاليات فوگ ما انهُ هوَ لازگ بيـة

من جاب سيرة الموت حَطيت اصابعي ع فّمة وكتلة
ايلول
اسم الله علي لا تكول هَيج

ابتسم ابتسامـة هادئة وگال
علي
كِل احنة اعلى هذا الطريق، ماندري شمضموم النة
اليوم باجر احنة ميتين فَ ليش مانعيش حياتنـا كافي

كال هَيج وهوَ مركِز بعيوني، اخذ ايدي وباسهـا وهوَ يباوعلي ويحجي

علي
ويـاج من نهاية ٢٠١٧ لمن جنتي هاگدج كتكوت جاي وحَدة يوصوص بنفس المركّز وهسة احنـة وين ب ٢٠٢٠ مُضن سنتين ونِص واحنة سوية، كولي قل هل حُب نقص ؟ لا بكِل مرة يزيد واكثر واكثر ..

احبج، اليوم، باجر، عكبة ولبعـد مَيت سنة
مرض متعشق بية
لا انة الاكدر اخلص روحي مِنة
ولا يجرأ يجي انسان اليحِل مكانج ويطيبليا

ايلول
هم عوزك بعَدددد يجي غيري تريـد مووو

علي
تخسى وعلي، ايلول واكطع
الاولة والاخيـرة بحياتي
ولا هسة ولا بعد ميت سَنة
غيرج مـاريد

وانتِ شني؟

ركز ب اخر كلمتين وباوعلي، احس نظراتة اخترقن وجهي خرُق وكلبي صـار يدگ حَيل وبنفس الوقت احس اكو شعـور رِضا وفرحـة من بعد الكلام الي دار بينة

ايلول
بس مو مِن بعَد مـا توعدني ما تعوفني ابدًا
هسة انتَ مشهودلك توكفلي بـ ظروفي السيئة ما اختلفنـا وياك، بس اوعدني مـا تعوفني بـ ظروفك السيئة ..

ابتسم ابتسامة عَريضة وباوعلي وكالي
علي
هسة اختلف الوضع، هسة صرتِ انتِ مرتي وين اروحن عنج، هوَ انة اذا ضاگت الدنيـا اجي لحضنج

كالهـا وهوَ يضحگ بالنهاية، راد يحضني، ضحگت ويـا والتفتت وكتلة

ايلول
مو بهالسهولة هاي حبيبي

سحبني مِن ايدي علكيف وبنفس الوقت جانت اكو سُرعة مدروسة بحيث سحبني راسًا لحُضنة

حضني وهوَ يرفعني من خُصري حتى اكون بمستوى كِتفة حضنـة تعبر عن اشتيـاق جبير وحُب بعَد اكبر

ماكدرت مـا ابادلة بالحُضن ولا كدرت اخفي مشاعري الي جانت دتفيض بذيج اللحظة

علي
شكد ما اكول مشتاگ فَ قليل

ايلول
اني هم

بـدة يضغط علية اكثر بحُضنة ويحجي

علي
اخ لوبيدي، اوكف الساعة هَسة واخليني وين ما انة
احبج ايلول، احبج هـواي، وعد ماراح ازعل عيونج ابد بعَد اول و اخـر مَرة ...

نزلني مِن خُصري و دنگ هوَ الي
حَط راسة ب بين كِتفي و رُكبتي يتنفس علكيف ويحجي بهدوء

وخرني مِن حُضنـة للحظة، ماحَسيتة راح يعوفني ابـد لان عيونـة جانت تحجي لهفة موطبيعية، اخذ بـ ايدي ومِشة ومشاني ويـا للجُربايـة

علي
اريدج تكونين بحضني اشبع من عِطرج ومنج ماريد غير هذا الشي

كـال هَيج ب اسلوب حيل حَنين، وكإنهُ ديوصفلي بي كمية اشتياقة لهذي اللحظة
ماجِنت متوترة ولا خـايفة ابدًا، لان احس بس اباوعلة استمِد كُل الراحـة والأمـآن مِن عندة ..

هزيت راسي ب ايّ بهدوء ابتسم ابتسامـة واسعة وتمدد وسحبَني يمـة

نـام وهوَ فاتح ايدة واني كاعدة ع الجُرباية واباوعلة
اشرلي ب انُ تعـاي
شو لِلحظة احسني خفِت

علي
ايلولة ترة اموت ولا اشوفج خـايفة بسببي !
انة جاي اطلب حضنج حتى ارتاح، انتِ تخافين شكو؟
شني ماجاي تحسين ب الي احسة؟

ايلول
لا بَس ... بَس

علي
ايلولة، حضنـج بَس رايدة تخافين اعلى شني ؟
تعاي لمكانج

كال هَيج وهوَ يدور وجهة الي يسحبني ويخلي راسـة ب بين ايدة وصَدرة ويلف ذراعـة عليّ

جان نايم صفح ع المُخدة ومـاد ايدة الي نايمة عليها واباوع عليّ

الابتسامة شاگة وجوهنـا ثنينة

علي بهدوء
وجهج مخلوق حّتى علي يتأملج ويصفن بيّج وبَس
مـاريد اعيشن بحياة مابيها انتِ
اريدج دوم وياي، هجي مقابيلي ٢٤ ساعة

شـايفة هذا المثل الي يكول اراكِ محّطة طمأنينة وّسط رِحلة طويلة مِن القلق ؟
ضحكنـا ثنينة

علي
عاد لا تكولين شمعرفك بهسووالف ترة انة اعرِف بس ماراويج هاي شخصيتي، ايّ المُهم
فّ انة اشوفج محطة حياتي الي ارتاح بيهـا مهمّا تعبتني الرحلة ..

والله ماكدر اوصفج، ياخي شحجي قليل بحقج ماودي غير هيج اكلج كِلج واكعد واسكت

حجـة هيج وطُبع بوسة ع خدي بعُنففف مِن كمية الحماس الي جان بي

اطيني ايدج شـوو

اخذ ايدي وصـار يبوس بيهة علكيف

علي
هجي اكلج لو بيدي واخلص بس عود يشفالي غِليل، لا وعلي هم اضل الوب ماكدرررر دودة اعليج

مِن گال هَيج ضحكت بـ صوت عـالي وهوّ صار يضحگ وياي

علي
خررررررب انّ اليشوف حجييي وياج الا يركعني بميت قِندرة

ايلول
وهسة شبي حجيك وياي عيني

قربني الـة مِن خُصري، صرت قريبـة لوجهة حَيل وصدري صار طاخ بصَدرة وصـار يحجي

علي
شبي، بربج شبي، هوَ كولي شني المابي
غير تمطين اتمطين ويـاج
ولج ركزي بوجهي شوفي هل شوارب والكبر
يلوكلة هجي تمطين ؟؟؟

ضحكت بخُفة وكتلة بصوت خافِت
ايلول
مداشوف غيـر طفل صغير كِدامي مبتسم، وهالطفل هذا عندة أجمل ابتسامة بالكون

من كتلة هّيج ماحس الا عاططط
علي
بوووووووووية ولكممممم انتهيّتتتت
مادري بس هذا مدح بعيوني مدح والعباس مدح

گال هَيج وجان ديهتز من الفَرحة واني اضحگ ويـا

علي
خل اعضج حبابة

ايلول
ياااااا عليييييي وخُر تعضني شنـو شهل عُنففففف

علي
والله بس شويـة تنوعي بَس شويـة

كال هجي وهوَ ياخذ ايدي ويعضها علكيف

ايلول
ااااه عليي

علي
هوَ انة شمسوي شبيج

كال هَيج ورجع عضها حيل عطت وكمت

ايلول
علييييييييييي هاي شبيك

ضحك بـصوت عالي وكعَد وياي

علي
والله ماعيدهـا بعّد يلة تعاي

ايلول
ماريد علي ماريددد شوف شلون خليت أثر يا مُفترس

علي
ماعيدها عمييييي ماعيدها دناميييي شبيج

باوعتلة صفح ب انزعاج ومسحتهـا
ايلول
صارت حمرة باع شلـون

باسها بهدوء ورجع باس خدي
علي
اسِف بس والله ماكدر اتحمللل منظرج شني هيَ
يلة حبيبتي تكبرين وتاكلين غيرها

ايلول
ياااا علي صدُك تحجيييي

علي
ايّ وعلي صدِك، فلا اضمنلج روحي

ايلول
لاااا رُبحنـا

ضحگ وگـام، تثاوبت لان جِنت نعسـانة
من انـام ماكدر اعوف شعري ملفوف فَ فتحتـة
طولان وطالع شعر اسـود والجـوة جان لونـة الي صُبغتـة ماصاير نشاز ولا حلو مقبول نوعًا مـا، بس اني هملتة لان ماجان الي خُلك اروح اصبغ واجددة ..

باوعت لروحي ماكدر انام بالدشداشة لو اموت
وعلي يدندن ويفتح ب الشبابيك مال الغُرفة

ايلول
علي ماعرُف انام بالدشداشة شلون

علي
هدومج تـرة هنانة جنطتين هنا كومي شوفيلج شي

ايلول
يااا نِسيت احنة ودينـة قبل العرس كم جنطة النـا بلة لعد خلكوم ابدل

علي
كلهن مسفطات ب الكنتور كومي شوفيهن

ايلول
يا شعَجب مسفطهن

علي
لا ويـن ولج هوَ انة مزعل اخس منج ( اتعس منج ) بس هاي البنات سونلجنياهة

كمِت للكنتور باوعت للملابس مُعظمهن ملابس نوم بَس، اني اساسًا متعودة انـام بملابس نوم فَ ما اخذت ع بالي واخذت بس ثوب قصير مخصّر ع الجسِم بدون اكمام احمـر ورحِت للحمام لبستـة وطلعت

شفت علي لابِس بس بُجامـة و جان ديشيل تشيرتة الي نزعـة
اول مرة اشوفـة وهوَ عـاري الصَدر هيج

جِسمة جان مقسم بطريقة حيل حلوة، لا عضلات اوفر ولا ماكـو عضلات، ولا متانة وضخامة ولا نعومـة

التفت الي بهذي اللحظات وضل صافن، عيونـة صارت تجول علية من فوگ لجوة بَس رأسًا حول نظراتـة لوجهي وكانهُ ديتلافى وگال بهدوء

علي
ترة انـة ماعرف انام بتشيرت لو تذبحينيييي ما البسة ولا البس دشداشة لمن اردنـام

ايلول
عـاد نتشارك بشي ماحب الملابس الزايـدة

كلت هَيج ورحت للفراش عدلت المُخدة وسحبت الغطا ونمت، طَفى الـ اضويـة وهوَ يحجي

علي
وياي عادي اختصري لا تعبين روحج بس وي النـاس لاشما بيج تستري

ايلرل
ويـن تريد توصلني بعَد اشو ماصرت البس غير جُبة

علي
ايّ وعلي سنعة ولـج سنعة من اغديلج مليوننننننننننن فدوة

گال هيج وهوَ ينـام ع الجُرباية ويجرني لحُضنة ويبوسني حيل بخَدي

علي
اكثر شي جِنت خـايف مِنة تدرين شني، والعباس ماخفيها اعليج جنت اتراعش من هذا اليوم وكلت اذا سوتها كفيلج العباس اسويها كولِبة اعليج، اطين عيشتك وهجي اخنگج بيدي واموتج حَتى لو جنة واحد مايحجي وي ثاني ومتكاتلين

يحجـي ويضغط ع ايدي الي حاضني بيها، حَسيتة صدُك عصب ضحكت بخُفة وكتلة

ايلول
هَسة هوَ شنووو غير اعرُف

علي
كلت خـاف لا تنزع، تنزع شني اقصد ترجع نفس قبِل يعني وتغثني، تخيلت حتى تنزعين الحجاب

ايلول
ترة مو ناقصة عقل لهل درجة

علي
شوفييييي شوفييييييي وعلي سَنعة ويلوموني بحُبج

ايلول
يمعود اني الي خُلك اغثك وتغثني حتى روحي جنت ماطايقتها فَ جنت اشوف الجُبة البسها واطلع

علي
وهيَ شبيها الجُبة

ايلول
اطلع مبهذلة بيـهة بَس يعني ميهمني

علي
والعباس والعباس يَ إلا تشگين شگ بيهاااا هجي تحسيهـااا تطيج شخصية قوووية موشلون ماجان

ايلول
ترة اساسًا اني شخصيتي قوية

علي
ادري ادري، بس بملابسج ذيج تبينين وكانّج هيج طفلة ناعمة اما بهذني تطلعين لا صدِك شخصية صارمـة وهيج راقية راقية عبالك شني ماكدر اوصف جمالج بيها والله، بَس صدِك تلوگلج، عمي هسة انة شكد شايف بناتت يلبسن جُبب بس هجي جمال لا بالله ولا شايف

درت وجهي الة وخزرتـة

ايلول
ايّ ايّ شكد شايف احجيي

علي
الاشوفنن هـواااي بس الي بكلبي وعيوني وحدة ..

ابتسمت بس حجيت بنبرة غَيض

ايلول
انتم الزلم نهايتكُم خيانـة. مايملي عيونكم غير التراب

علي
افة، انة عيوني تشوف غيرج؟

ايلول
والله تشوف

علي
ليش تحلفين؟ من شالج الله ورگعج اعلى حلفانج هذا
انة لو ردت وردت جان بال٢٧ سنة العشتهن قبلج شفت، وبهذني الاشهر العفتيني بيهن شفت، بس عمي انة رجال اخر همي النسوان حَتى ماعرف شيريدن بحياتهن وعلي مگرود الله حَتى كلية بنات ماطاب منين اعرف من البيت للشغل ومن شغل للبيت حدي ومحدودي بناويتنـا

ابتسمت و سِكتت
تثـاوبت ودحست راسي بصَدرة دانـام
احس تصرفاتي تُطلع بـدون ماحس ع كد ما جِنت منعسة

حضني اكثر وتنهد بـ صوت ناصي

علي
نعستي؟

ايلول
امم

علي
....

ايلول
وانتَ؟

علي
هَسة انام نامي انتِ يلة تعبتي

تثاوبت مرة ثانية وغمضت عيوني
حَط ايـدة على ظهري صـار يمررها علكيف ويحجي

علي
مِن أحُضنك احضِن الدنيا بدية
حَبيبي وغالية عيونك علية
بسرعة الوكت صاير يخلص وياك
هَوى انتَ واذا رحت اختنگنـا
اختنگنـا ..

ضَليت اسمع بصوتـة ومبتسمة بهدوء

علي
احبج

كالهـا وهوَ يبوسني مِن راسي حضنتة اقـوى ودحست راسي بـ حُضنة وهمست

ايلول
اني هم

مِن بعَدها غُفيت، كعدت ثاني يوم من النـوم لكيت روحي بحُضن علي باوعتلة نـايم واكو ابتِسامـة على وجهة

حَطيت ايدي ع وجهة وصرت اتأمل بي واني مبتسمة
احسـة طفِل شايل حِنية ومُشاغبة و برائة على وِجهة موطبيعية

صرت امسد ايدي ع وجهة واباوعلـة بهِدوء

كبرت ابتسامتتة وكال بـ صوت ناصي
علي
ارد اشوفن انة شني بعيونج، شلون تشوفيني

فتح عيونـة بهدوء باوعتلة والابتسامة وضحت بوجهي
ايلول
اممممممم اشوفك طفِل بريء

رفع تك حاجِب وگال ب انزعاج

علي
جا والشوارب مـالهِن قيمة؟ طفِل شني

منظرة وهوَ انزعج جان مُضحِك وحلو حيل
كرصتة من خَدة وكتلة بضحكة خفيفة

ايلول
والله هيجي كتكوتتتت اشوفك

من گتلـة هَيج ضحگ بصوت عالي

علي
ولج كتكوتتتتت شني، انتِ ماكوشي بعينـج شو

ايلول
اني اشوفك هَيج طفل صغيرون بريء موبيدي

ابتسم ابتسـامة جانبيـة وعيونـة اجت على شفايفي من باوعلي بهل نَظرة خفت وكمت بسرعة كعدت ع الجرباية، لزمني بـ طرّف ايدي و كعد وياي وبلحظة سـريعة وهادئة اخذ شفايفة بين شفايفي بهدوء واشتيـاق

مادري شصـار بس احس فُصلنا ثنينة، وماحسيت ع نفسي إلا و اني لاكيتـة هوَ فوگاي وديتعمق بـ لمساتة

فزيت بسرعة ونترت روحي مِن عندة وصرت ع جنب واني اغطي بداية جسمي ب جرجف

اجـة يمي بهدوء ولزم ايدي بـ هدوء

علي
رايدج ايلول

من كالي هَيج احسة خوفني وخلّة عندي ردّة فعِل
كمت بسرعة من الجُرباية وكتلة ب اصرار وتلبُك بنفس الوقت
ايلول
ها لا ماريد علي

علي بعَصبية
هسة انتِ دلبسي شبيج مصلخة ونايمة اذا ما مستعدة

عقجِت وجهي وباوعتلة بعَصبية
ايلول
اني شعلية انتَ الجبتني بغُرفتك تـرة، واني مانام غير بهيج ملابس

علي
وانتِ تردين تنامين يمي هجي وعادي اعديها طبيعي ؟
شبيج انتِ شبيج فوك ما حارمتني منج صارلج شكددد
حَتى عرس نفس الناس ماصارلي
كال هَيج وذب المُخدة الي جانت ع الجُرباية بالگاع

دنكت ع المُخدة الصغيرة بـسرعة ولطشتة ع وجهة حيل

ايلول
لتعصُبببب بوجهييي اذا ماصارلك عرِس نفس الناس فَ هوَ بسببك انتَ

علي
انجبي انجبي محد غيرج يخرب بالسوالف لسانج اطول من عدج وراسج ايبس من الطابوگ

ايلول
هييي لتكول هيج لا تشوف شي ميعجبك ترة

علي
اوييييي خفتتت علكيفج وياي ماما -بصوت خافت-
دروحيييييي بابااا روحيييي، روحيي لا الزكج بالحايط هَسة
وخري عن وجهي-بصايح-

كال هَيج وخلة وكام من الجرباية، يمشي برعونيـة ويحجي وي نفسة بمدري شنـو رحت ورا واني اصيح وهوَ ولا همة

ايلول
انتَ الي تلزكني بالحايط انتَ
والله اني الي الزكك بالحـاي...

بعدني ما مكملة ماحس الا دار وجهة علية ولزمني من ادية ثنينهن ورجع ورجعني عَ الحايط

عيونة مليانات عَصبية وعيوني للحظة ارتبكت من نظراتة، ماحسيت الا وهوَ ماخذ شفايفي بعُنف وهوَ يقاطعهن بكلامة

علي
بس اسكتي اسكتييي

وخـر بسرعة وطّب للحمام واني حرُف مانطفت ضليت بس الهث وصافنة

للحظة احس تذكرت من يكلي الزگج بالحايط
ايلول
منو يلزگني بالحايطططط منوووو

للحظة ردت اعيط بس للحظة تذكرت انُ هوَ فعلاً لزكني بالحايط غميت روحي وكلت
الله ياخذِج ايلولللل ..

رحت بعَصبية للباب واني اسمع صوت الدوش مفتوح وضربتة حَيل
ايلول
اني اعلمك علييييييي

علي
راح اطلعلج وفِنّ اليهدج مني

عفتـة بهدوء ورحت للغرفة اجت عيوني بالمراية الكدامي، هوَ فعلاً الثوب مالتي قَصير بس ترة عادي اني متعودة ع هيجي لبس واذا علي يعني موجود شسويلة

شفت موبايلي ديرسل اشعارات رحت فتحتـة فَرس
فَرس
ها عيني هاااا نايمينننننن سوية

ايلول
عابت اسُكتي وجيبيلي جُبة بسرعة ماعدي جُبة هنا و اريد اسبح حَتى نروح للمُستشفى

فَرس
هااااااااااااا والله عرفتتت احساسي كلي علي ميفوت فُرصة

ايلول
المطي المجلوب الي براسج وخري
ماصاررر شي ولا حيصير اريد اسبح جيبيلي جُبة شلون يعني اطلعلج هَيج

فَرس
اممممممممم امرج مشكوك بي بس يلة بعَدين افتهم منج عود
يلة جايتج افتحيلي الباب

رحت لماما طمنتهـا علية لكيت علي واكف كدامي لابس دشداشة و واكف شعرة مبلل

علي
ها شو لسة بعدج بهذا الثوب راح امزكة عليج ترة روحي فايرة وخري من كدامي

ايلول
هذا شبي هذا مخبل، شبيككك انتَ

علي
ولج انة شبية لو انتِ شبيج، هوَ شبررررر طولة نوب كاعدة دشوفي شوفي

باوعت لحُضني صدُك مرتفع لفوگ ركبي ب شبرين تقريبًا وهوَ احمر وكالب عَ جسمي بـ هواي، هاي غيـر فتحة الصَدر الي فاضحتني فُضيحة

المُشكِلة اني مداحس بنفسي لانّي متعودة ع هاللبس دومني، سحبت الثوب مِن ورة وكمت ع دكة الباب

علي
وين طالعة وين

ايلول
علي شبيك دتعيط علية شبيك
فَرس اجت اني صحتلها

تنهَد وعفتـة ورحِت

علي
مو تفتحين الباب اعلى حيلة ديري بالج خل تطب يمج هيَ

فتحت الباب ع كيفي وطّبت هيَ
اول ماشفتها حضنتني حَيل

ايلول
لج بعدنيييي ما ماخذة مسحة

فَرس
مشتاقتلج هوووواي يولييي

ابتسمت وبادلتها بالحضِن
وخرت مني وباوعتلي

فَرس بهمِس
عزة الاحمر والاضاءة الخافتة مال الشُقة مخليات جسمج يتلئلئ من كد البياض، كل هل جمال وتقنعيني ماصار شي

ايلول
انجبي ولج كُلشي ماصاير

فَرس
متاكددددة

ايلول
والله العظيم شبيج، دروحي هَسة خل ابدل حَتى اروح للمُستشفى

فَرس
اممم بعدين بعدييييين عود اتفاهم ويـاج

جنت جايبة الـ برنص مالتي اخذتة وعفت الـ جُبة بالصالة وطبيت سبحت وطلعت رحت للغُرفة

لكيتـة كاعد ع الجرباية والغرفة مبعثرة وهوَ يباوع للموبايل، اول ماشافني عيونة اجت علية

ايلول
ب بدال هالكعدة متكوم تنظف الغُرفة لو ايدك مكسورة شهل كركبة هاي

كلت هَيج ودرت وجهي كلبت شعري صُفح وصرت انشف بي

علي
اكِلج بعد عمج جا انتِ ٢٤ سااعة مصلخة

رفعت شعري وباوعتلة
ايلول
هذا شبي هذا ترا لحد رُكبتي البرنص مصلخة شنـو والله عيني ما ميتة هليك اني هذا لبسي لو هم تريدني اغيرة؟ قابل حراممممم

علي
لا ابد مو حرام اصلاً بعدين راح اسويلج تغيرات بس نحو الاسوء هلمرة مو الاحسَن
المُهم كلتي انظف الغرفة مو، ليش يعني انتِ ما تنظفيها؟

ايلول
جايبني انظُف؟ غرفتك لو غرفتي، خلي عندك مستحة شوية وكول ستوها جاية فشلة اني انظف

علي
لايابوي اعلى راسي راح انظفها انة بعَد شتردين
يلة ايلولة استعجلي حبابة حَتى نروح بلكي الله يسهل النـة

نشفت بسرعة وهوَ ينظُف بالغرفة، باوعتلة من بعيد وابتسمت جانبي عليّ وخليت ورحت بدلت واجيتة

ايلول
عندك كمامات و كفوف

علي
ايّ تعاي ومعقم هم

لبسنة الجفوف وسوالي الكمامـة وخلينا ونزلنة ثنينة
البيت كُلة هدوء وكُل واحد بغرفتة

ايلول
البيت هادئ

علي
لو جدي واهلي هنا جان صار متروس والكل صاحي بس من راحوا تاهوا ذولة وكل واحد نايم وحدة

ايلول
فَرس كاعدة هيَ وامير اظن

علي
ايّ هذا امير خرب يومـة شكدددد مستغل عرسة بصورة صحيحة ماكو هجي قابلية لازك بغرفتة

ايلول
وانتَ حاط عينك عليّ دخيلك ربي

علي
لا وعلي شلي غّرض بيهم مهناين بس يعني اكولن شمالة حظي هجي عجس وياي بَ اهم ايام حياتي

ايلول
احجي عدل شبيك كمِت تجأجأ

علي
انجبي ولج عاد الا لهجتي خط احمر لا تضلين تتجمعصين وتعيبين اعليها ترة اتعارك وعلي

ايلول
هسة اني معيبة لو انتَ مدري شلونك

علي
اذا لهجتي ما تعجبج فَ هذا شي راجعلج تحتفظين بي لنفسج وتسكتين بس ما يعني انّي اسمحلج تعيبين وتحجين هجي تجاجا ومدري شني شهسوالف عود ..

كال هَيج وصعد بـسيارة وجان مبين ضاج من كلامي
هذا شبي صدُك يحجي، اظن اني زودتها
خرب والله ماقصد

ايلول
ترة والله ماقصُد داضحك ويـاك تدري احِب لهجتك

علي
ايّ كِلش تحبيها كِلش

ايلول
علي هـاي شبيك شو مَدري شلونك

علي
اسكتي ايلول شو اسكتي

ايلول
اهـووو علي شو انتَ مدري شلونك جنك تريد تتعارك

سكت ماحجـة شي، مد ايدة ب جيبة وطلع باكيت جكاير
اني اباوعلة و رافعة تك حاجِب بتعجُب واباوعلة

فتح الجكارة وحطها بحلكة

ايلول
لا بالله لا بالله عود صدُك تحجيي

علي
شبيج شبيج چفلتيني بصوتج عبالك لكيتيني وي بنية

ايلول
والله لو لاكيتك وي بنية هم اشرفلي
شنو عود هاي صدُك جكاير وكذا هاهي تثبتت

كعد براحة ع الكشِن و انتجى عليّ ولازم الستيرن ب ايد وحدة ويحجي

علي
اي والله شسوي بعَد تعلمِت شو

ايلول
علييييييي بطلهننن ترة ماقبل اني والله

علي
هوَ انتِ السبب ترة من وراج صرت ادخن

ايلول
من وراي شنو قابل اني جاية وضاربتك ع ايدك وكايلتلك دخِن، جيبها علي جيبهاااااا

علي
ولج وخري ايدج شليج انجلبتي وخري

ايلول
ماعلية داكُلك جيبهااااا

اخذتهـا من ايدة بَسرعة وفتحت الـ جامة وذبيتها وهوَ يعيط

علي
انتِ مخبلة، مخبلة
هسَة لو مسوين حادثث

ايلول
علي اذا تشرب جكاير والله ماضل وياك بعَد
هاي اخر حجي عِندي

كلت هَيج ودرت وجهي عنة بعصبية

علي
وتحدد بخيوط هم

درت وجهي الة ب استفهام
ايلول
شنو؟؟؟

علي
هجي هجي، استغفرالله شهل صباح هذا

ايلول
اي والله صباح الاكشر الي اتصبحة بوجهك

من كتلة هَيج ابتسم ابتسامة جانبية ودار وجهة وهوَ يستغفر

ايلول
مارضى ابد ابدددد تشرُب جكاير بعَد
علي يعني احنة متعرضين لكُلشي
اسم الله اسم الله فرضًا سويت حادث انتَ مستعِد تسوي عملية بدون بنج!!! او مستعِد لامراض جانبية ابسط شي الكانسر، ترة كانسر الرئِة اغلبيتة سَببة الجكاير
مو تكول بسببج؟ اني و اجيت بعد شنو؟؟

ابتسم بوجهي بهدوء وگال
علي
بس تعلمت اعليها

ايلول
استبدلها بغير شي عادي
انتَ رجال شطولك شعُرضك جكارة تسيطُر عليك؟

علي
ايّ والله دومني اسئل روحي اكول شلون
انتِ مسيطرة اعلية

ايلول
قابِل اني اضرك نفس الجِكارة

علي
ثنينكم تحرگـون الگلب

ايلول
علي، جكاير بعَد ماكووو
لو اني لو هيّ فهمِت ؟

علي
لتهددين ولج

ايلول
لا اعتبرة تهديد شو
وبعد بكيفك

علي
مو اكلج ماكدرلج انة، ماكدرلج عمي
اعترف ماكدرلج

ضليت اباوع لكدامي بعَصبية وجنت اتنهد من القَهر

حَط ايدة ع ايدي فجأة، نفرتها بَس ضل لازمني بقوة

علي
عمي لخاطرج حتى ابوي اعوفة

ايلول
عمو حَسن شعليّ المكرود

علي
والله حآب سالفة حجيج، كالب اعلينا هل ايام

ايلول
ايّ جا شني غير عاشرتكم الاولى وثانية وثالثة هَسة شريد بعَد

علي
لا خليج اعلى حجيج احسن عتسوين وتاسوي
وعلي عَسل من حلكج

ابتسمت ابتسامـة صفح خُفيفة

علي
اضحكي شبيج معبسسة شبيج

ايلول
لا علي صدُك اذا بعَد تشرب حكاير والله العَظيم ماحجي وياك

علي
عمي تولي الجكاير وابو الجكاير هم
الجكاير نستبدلهن بشي ثاني صدِك جذِب تدللين
بس اضحكي انتِ
شني كل هرشاقة ومتشاقة ياعيني

لا صدِك صدِك تدللين اعوفها ليش ماعوفها
هاهيّ احسبيها انتهت
مايعلى اعليج شي انتِ يابة
انتِ تكولين واحنة انفذ

ابتسمت ع كلامـة و وصلنة للمُستشفى طبينة ثنينة سوينـة مَسحة كالوا لباجُر تطلع النتيجة وبهذا الوقت كون نضل محجورين وممنوع نطلع لا منـا ولا منـا

رجعنـا للبيت شفناهُم الكُل مجموعيـن
شَمس و سُراج و فَرس و امير وسَجاد وسيوف وغّيث هم وياهُم

علي كال الهُم اكو احتمـالية فَ مانريد نعديكُم خاف كُلشي يصير خصوصًا مِن بعد ما هُمّ ما صارلهُم من طلعت مسحاتهُم ايجابية

صعدنـا لفوگ للغُرفة فتح الباب علي وسوالي طَريق حتى اعبُر طبيت وهوَ طب وراي

علي
صدكينييييي اذوب اذوب اذوب
لمّن تحاجيني اذوب انة وياج يَم شامة
احلى حَجر اشوفة بحياتي اللهُم اشهّد

ضحكت ع كلامـة وطّبيت للغُرفة
هوَ فتح جهة كنتورة و اني فتحت جهة كنتوري

علي
تدرين انة ما مصدِك وعلي ما مصدِك انُ احنة انجمعنـا

ايلول
منو كلك انجمعنـا ترة ماضل وياك حسبالك هيَ سهلة دروح عيني روح بس اخُذ نتيجتي اروح ماضل ويـاك قابل ميتة عليك وابقى مكابلتك وكاعدة

علي
اذا انتِ ما ميتة اعلية منو ميت اعلية؟ ولج نسيتي من مكابلة للباب وكاعدتلي
يبوووو وعلي كتلة يارب اعلمودها لا تخليني اموتن حتى لا انة ماستحق اعيش اعلمودها عيشني

ابتسمت من كال هَيج وكتلة بصوت ناصي واني اتأملة
ايلول
علوشيييي

علي
لج فداااااااااااااج وفدة صوتـج

تقرب من يمي وباسني من خّدي بحُب، الابتسامة مالية وجوهنة ثنينة، حَط ايدة ع خُصري وسندني ع الكنتور
اخذ بـ ايدي وحطها ع صدرة
دكات كلبة سـرررريعة، حسبالك واحد ديدُك طبِل بي

علي
جاي تسمعين هل گلب شلون يدگ
واكو رّجفة خفيفة هم، هاي بس يمج تصيـر

انة شايف نـار وتُفگ وصاير بنص صوت الفِشگ والانفجارات العالية حَتى الهـآون وهوَ مار فوگ راسي ما زحزح شعرّة مِني، انة متعود اعلى الخَطر بس ما متعود اعلى الرجفة التجيني منچ.

وخر كذلتي مِن على عيوني وحط خُصلة شعري ورة اذني وكال بهمِس وهوَ يغمض عيونة ويطئطئ راسة يم راسي

علي
انتِ الحّرب الوحيدة الي مستعِد اخسَر بيها بإرادتي، فَ شلون تزعلين لو كتلج انتِ مو مَصدر قوتي، انة اموتن يمج ايلولة، انتِ اكبر نقطة ضعُف لعلي..

هوَ يحجي واني احس رايحـة بغير عالم، ادري الكلام الديطلع من اعماق كلبة، نبرتة بالكلام وعدم التكلُف بالالفاظ ودگات الگلب جانن يحجن كُل شي

ومن غير مُقدمات، حضنتة بسرعة.
ما انتظرت ردّة فعل، ولا حتى نظرة من عيونة، چنّه شي داخلي دفعني الة، شي أقوى من تفكيري ومن خوفي.

لفّيت ايدي حَولة، وراسـي غُفى على صَدره، المكان اللي جنت دائمًا أتخيلة، بس هالمرة حِسيته ينبض فعلاً تحتي.

حرارة جسـدة لامستني، صارت مثل دوى المطر على أرض عطشانة، كل وجع، كل تعب، كل خوف ذاب بهاللحظة.

إيده التفّت ع ظهري، مو بحذر، لا، بحنية رجل يريد يطمن كلبة قبل ما يطمنها ب انُ الي يريدها ويا، حضنني وكأنه يرجّع كل ثانية غابت بينا.

حسّيت نفسي أهدأ، ودگات گلبه تمشي ويا أنفاسي، كأن الدنيا سكتت بس حتى تسمعنا.

علي
احبج ايلولة

ايلول
احبك ابو شـوارب

ضحكنـا ثنينة و وخرنا من بعُض طُبع بوستة الخفيفة على شفايفي وكال بحماس

علي
يلة خل ناكل لا اكلج تررررة

ايلول
اوكي اوكي
ترة اني هم جوعانة

علي
عود البسي مشلتح وتعاي يمي اكلج والله

برطمِت وكتلة
ايلول
اوي علي، لعد شتريدني شلبسسسس هاي شبيك، تدري بية لبسي هيج

علي
اشاقة عمي اشاقة الي يعجبج البسي حَتى لو متلبسين شي عادي والله نتحمل ونسكت منا لمن يفرجهـا الله

باوعتلة صفح واخذت تراك نُص ردن وطبيت للحمام بدلت وطلعت شفتة لابس گلبية وگاعد بالصالة وحاط الاكِل

علي
شلوننن ريحة اويلي تفوتج تعااي تعااااي احلى حَجر بالتاريخ

ضحكت على كلامـة واجيت كعدت يمـة

جايب لفات گص و مُقبلات ومدري شنو كعدنا ناكُل ونشـاقة ولا كانهُ الصُبح متعـاركين

واحنة دناكُل خابروني اهلي ديطمنون علية، فتحت الهُم كامرا وحجيت وياهُم شويـة وعلي حِجة وي ماما وبهل اثناء بابا صار على صفحة

علي
هنا عمي خل اسلم اعليّ خـالة

حبيت ردة فعّلة، علي جان شايل ع بابا هواي لان طلعني بالبيت وبدون ما يدري هوَ عود ومن بعدها هوَ مخابرة هواي بـس مارد

بهل اثنـاء امي انطت الموبايل لبابا وعلي حِجة ويـا طبيعي

ومن بعَد ما كملنـا المُخابرة، باوعت لعلي بحُب وكتلة

ايلول
شُكرًا لانّك دتحاول كُل مرة علمودي

علي
انتِ كلتِ حجاية حلوة، كلتِ علمودي
وانة فعلاً علمودج كِلشي اسوي
ادري بهذا الشي يخليج تفرحين وتبتسمين من الداخل قبل الخارج، ودام هذا الشي انة اكدر اسويلجياه فَ راح اسويلجياه حَتى لو اعلى حسابي وحساب بعض مبادئي

ايلول
اريد الزمك هَيج اموتك، انتَ شلون انسان حقيقييييييي
والله فضائييي

كتلة هَيج ودمعن عيوني حضني وقربني الة وضحك بصوت عـالي

علي
ولج فضائي شني

ايلول
مادري من زمان اكول انتَ موحقيقي

مسح بـ ردانة دموعي وصار يباوعلي و وجهي مُقابل وجهة ويحجي

علي
تدرين جـا انة شني احسلج ؟
من شفت آمنت ب انُ الله مُمكِن يخلقلك شي يكسر ويضمدك بي وانة الله كسرني بيج بَس ضمدني بنفس اللحظة بيج، مهمَا احبج احس بعدني مقصر بس هوَ انة فعلاً احبِج ومِن كِل وكلبي

من گال هّيج احس خلة گلبي يرجِف ماتحملت ودموعي تسابقن بالنزول گدامة

باوعلي ب انزعاج وصار يمسح بدموعي ويحجي بهمس

علي
وعلي اموتن الف موتة ولا دمعة من عيونج تنزل بالغلط حبابة لا لا تبجيننن، هسة انتِ ليش تبجين

ايلول
بسببك علي انتَ حقيرر

علي
حقير شني ولج شمسويلج هيَ مچلوبة ببدال ما اتغزل بيج

ايلول
منو كلك تتغزل بية هيجي والله ما تحمَل

كلت هّيج واني مستمرة ابجي، ضحگ للحظة وبدون ما اشوفة شلون تقدم لخدي عضني حيل منـة

علي
لا وحق الله انتِ استحقيتي اكِل

بعدني ما حاجيـة شي ماحِس الا اخذ بوسة من شفايفي بقُبلة شَرسـة

وخرت عنـة واني خايفة وارتجِف من واقعية الي بِدة يصيـر

علي
لا تخافين مني ايلولة شبيج حبيبتي

ماتقبلت حتى وجودة بهـاي اللحظة واحس جسمي كُلة انتفض وخاف ،انزعج علي من عندي بس اني ماهتميت وخليت وطبيت للحمام مَيتة من الخـوف

ضليت بالحمام شويـة واحس روحي ميتة من الحَر والبوخة الي صارت، مدَري شبيك بس للحظة توترت وكمت ارجف

وبعد مرور خمس دقايق دك علي الباب

علي
ايلول حبيبي اطلعي شبيج

غمضت عيوني وسحبت نَفس وغسلت وجهي وطلعت

علي
شبيج حبيبي

كال هَيج وهوَ يتقرب مني، وجهي راسًا انطة النظرات الخـايف ورجعت لورة بخوف

علي
تعاي حبيبتي تعاي خل نروح ننام

باوعتلة وصُفنت
شلون اكُلة انُ اني مامستعدة ابد وخايفة

علي
ما اسويلج شي والله شبيج بس تعاي خّل ننـام مادختي من المُستشفى ؟

ايلول بتوتر
بس علي

علي
بدون بَس تعـاي لتخافين مايصير شي بدون رضاتج

اخذ بـ ايدي بلطُف وجرني علكيف وصار كدامي
شفت ع وجهة ابتسامة جانبية شريرة

ايلول
شبيك مبتسمم شو

علي
هجي ولاشي تعاي خل نـام يلة

طفة الاضويـة ورحنـا نمنة ع الجُرباية، دناني يمة كالعادة فتحت موبايلي اخذة وسدة وحطة ع الميز

علي
الموبايل مو وقتـة ما شابعة منة خليني اشبع منج

خفت من كال هَيج وباوعتلة بخوف

ايلول
علي انتَ تضحك علية شكتلي مساع

علي
خاب شبيج كلمتي وحدة انة ما اتراجع عنها بس قصدي نكعِد نسولف شويونة

ايلول
مثلاً بيمن ؟

علي
مثلاً بفراگج شلون عشِت؟

ايلول
جانت اسوء فَترة بالنسبة الي، مانسى الي سويتة بية علي يجوز اتناسى بس مال انسى احس مُستحيل

علي
ماكو انسان مايغلط وانة ماغلطت وياج ابد الا بهالفترة احس كلشي تجمع ضِدي وانة بشر ايلول بشر انضغطت من جميع الجهات وماكدرت اكتِم اكثر، وصلت مرحلة ماريدج ظاهريًا حتى بس اخلص من الي بيـة بس داخلي وكلشي جان يريدج

انة اخليج تنسين كِلشي سيء عشتي، الشغلات الحلوة تعم اعلى الموحلوة، خصوصًا انتِ، ايلول ام گلب الابيض راح تنسين صدكيني

ايلول
اني انسى علي، بس مانسى الي ياذيني بوقت اني متاذية بي

علي
بس انة راح أنسيج كِلشي وعيونج ماراح تشوفين غير الفرح والسعـادة وياي، انة رايدج ايلول رايدج ب بحياتي ومارايد غيرج ابد فَ لتحرميني منج
يكفي انّي احبج، وكلشي تحبي راح ابلش اسويلجيا بس المُهم ما تعوفيني

ابتسمت ع نهاية كـلامة وحضنتة بهدوء

صرنة نحجي عن ايامنا وشلـون عبرت وعلى كُل تفصيلة مرت بحياتنا لمن ماجنة بحياة بعُض بهذي الفترة، مادري شلون مضى الوقت وتحول الوقت من ساعة ب ١ ل ساعة بـ ٦

احنة نايمين بحُضن بعُض ونسولف عن ايامنـا وصعوبتها ..

صاح الاذان كمنة صلينا، جابولنـا اكل اكلنـا، اليوم الثاني سُراج جان هوَ الي يجيبلنة النتيجة عَ سااس

احنة جنة ضامنين سلامتنـا لان ثنينة نحس روحنـا زينين بَس صدمنـا سُراج بالنتيجة ب انّي اني جنت بعدني شايلة للفايروس اما علي فَ كانت النتيجة سالمـة

احس روحي مخنوگة بين اربع جدران وبدون ماشوف احد واكعد وياهُم بجيت بوقتهـا لمن كال النة سُراج من ورة الباب عَ النتيجة و اول جُملة كلتها

ايلول
علي ماريد اضل يمك، حباب ماريد اعديك مرة ثانيـة اصلاً وجودي هنا كُلة غلط

درت وجهي عليه، ودموعي بعدها تتسابق على خدّي، چنت أحاول أتحاشى نظراته بس ماگدرت.
كلشي بداخلي ينهار، وخوفي يصيح بداخلي بصوت أعلى من صوتي.

اجـة حُضني بهدوء حاولت افلت من عندة بس هوَ ضل لازمني بقوة بس مو بعُنف، بحنية شخُص ديحاول وي شخصة الثاني ..
قرب وجهه مني أكثر، وصوته مبحوح ومليان وجع
علي
ولج شني هيَ تروحين؟ تخليني هنا وحدي بعد كل هاللي صار؟ بعد كل لحظة چنت أعيشها وأنا أتخيل صوتج، ريحتج، عيونج؟
ما أسمح ترحين ابد، ماريد المعاناة الصارت كبل ترجع تتكرر وبعدين هذولة يمسلتون شبيج شزينج هاي وينج كِلشي مابيدج

وعمي ان شاء الله بيج شي هم انة قابل انعدي انتِ شعليج بية خوما الج گوة اعلية؟

ايلول تبچي، وتحاول تدفعة
علي رجاءً، مو منطقي، انت سليم، أنا مريضة، أني خطر، خليني أبتعد مو وقت حُب ولا وقت غزل

ماجنت اكدر حَتى اتحرك غُمرني بحُضنة بقوة حُضن كُلة تملُك وتمسُك
علي
إذا خطر، فأنة أختار أعيشه وياج
إذا مرض، فأنة أريده منج
إذا تعب، فخلي يصير وانتِ يمي مو وانة بعيد عنج
ما أريد سلامة بلياج ولا اريد عُمر بدونج.

صارت ادي تلتف اكثر حولي ودموعي صارن ينزلن ع صدري، صرت احاول احجي بس صوتي جان مخنوگ..
ايلول
علي، لا تسوي بيّ هيچ، لا تخليني أضعف أكثر حباب..

ردّ علية وهو يضمني أكثر وكانهُ يريد يمزج روحي بروحة، وصوتة يتهز بين شهگة وحُب
علي
ضعفي بيج مو ذنب، هذا قدر، وانة راضي بيه، انتِ مو خطر، انتِ سبب إن كلبي رجع يدك من جديد، وماعوفج الا لو صرت انة الخطر اعليج، وهم تضلين تحت سگُف هالبيت مو بعيد عنة ..

كافي حبيبتي كافي اهدي والله مايصيرلج شَي انة ويـاج شبيج

وخر وجهي من على صَدرة وخلا مقابيلة وحجة وياي بهمِس
علي
دموعج لينزلن
گال وهو يمسح دموعي بطرف اصابعه،
علي
دموعج لينزلن هجي الا وانة اصيرن جوة التراب، شني هالحالة الخايسة ايلول اعلى كِلشي وذرفتي دموعج ونزلتيهن عشرة عشرة، كضي روحج ولج ماريدج تبجين اعلى كِلشي وعلي ترة تمردين كلبيي

ايلول
علي انتَ مدتشوف، مدتشوف الناس شلون دتموت والمُستشفيات انترست!!! ليش دتعرض روحك للخطر ليششش انتَ ما مضطر ماريد اضل هنا والله ماضلل

كلت هَيج واني اريد ابتعد بس هوَ جان مثبتني بقوة
علي
لا تصيرين مخبلة لو اعرف موتي يصير اعلى ايدج هم ماطلعج من هالغُرفة، الي يصيبني فَ يصيبني لية مو ليج اسكتييييي واستچني شوية كافي حبيبتي

ضليت بُحضنة ابجي وتراودني افكـار ضل يهدئ بية ويحجي

علي
حبيبتي والله العَظيم مايصيرلج شي هَسة ارد اعرف اعليمن تبجين شني هيَ هسة دكافي انة مو يمج بعَد اعليمن تبجين مايصيرلج شي ولا يصيرلي شي دامنا يم بعض

باوعتله وأنا بعدني ماگدرت أستوعب انُ اكو شخُص نفس علي موجودين بحياتي
إيده بعدهـا على خدي، تحرگ بيها بخفة، كأنه يرسم حدود وجهي من جديد.

ايلول
شلون تگدر تحب هيچ؟ شلون بعدك تشوفني حلوة واني بهل شكل؟

ضحك ضحكة صغيرة، ضحكة بيها وجع وحنية بنفس الوقت،
علي
ما أشوفج بعيني، أشوفج بگلبي انة وهواي فرق، لأن العين ممكن تخطأ، بس الگلب لا، هوَ يعرف وين راحتة، وانة راحتي بوجهج، بصوتج، بطريقة حچيچ، وبوجودچ يمي، شكد جنت اتخيلج وجودج يمي راح يفرحني بس طلع موهجي بَس، طلع وجودج يخبلني وانة ما مضطر اروِحج مِني..
يلة كومي خل اگليج

باوعتلة ب استفهام واني امسح دموعي مقابيلة

علي
غير صرتِ طماطية دكومي خل اگليج ياعيني
اوكفي خل اگليج انة

ماحس الا شالني وحَطني ع الجرباية وصـار يشاقة وياي

علي
هسة شبيج خل اگليج

ايلول
ياعلي وخر دَدغدغنيييي

علي
هاي شكم دال لفظتيها خو كولي جاي تجكجكني وفُضيها

ايلول
هاي شنو عود جكجكني احسها جمجك سجاجين

علي
اختلاف ثقافات حَبيبتي ولايهمـج

مضت يومين ماحسّيناها من كثر ما چانت تمُر بيـنا بِدفء وقلق وحنية، كل لحظة تنخَتِم بذاك الصمت الحلو بين كلمة وكلمة، بين نظرة ونظرة.

كُل الوقت جنة واحد مكابُل الثاني، يسولف لي سوالف خفيفة ويضحكني، وكُل ما يشوف تعبي من المرض، ينسى نفسه ويحاول يطمنّي.

ومن بعد هليومين طلعت نتيـجة المّسحة الثانية الي اخذلياهة سُراج بنفسة سلبية

بوقتهـا جنة حيل فرحانين بهذا الشَي وبنفس اللحظة اجتني فَرس للغُرفة نزلنا كُل احنـة بساعتها للصالة كعدنـة سوية نضحك ونشاقة ونسولف سوالفنا الحلـوة

شويـة وامير كال نسوي كُل احنـة حملة ع البيت تعقيم خاف كُلشي يصير حَتى الباقييـن يجون

وفعلاً بنفس اليوم سووا هُمّ حملة تعقيم ع البيت بقيادة سُراج و امير واحنة جنة بس نباوع معَ القليل من المُشاركات الطَفيفة ..

مُضى اليوم عَ خير، وگضيناه بأجواء دافية تشبه راحة البال بعد تعب طويل.
وإجة اليوم الثاني، اليوم المنتَظر، اليوم الي جنة كُل احنة حاسين بيه شي مُختلف، لان واخيرًا راح يجون من بعد انقطاع اكثر من شهر ..

لبست القفطان البيجي، اخذتـة مِن فَرس جان كُلش حلو علية ومرتب، دخلوا أهل علي، والبيت كله ضوى بضحكاتهم.
الكل فرحان بوجودي، وبالأخص يمّة صالحة، وجهها چان كله ابتسامة وسعادة غامرة.

صالحة
هاااا، رَد الدم لوجيهك واخيرًا يعليوي

جبر
إي عمي، الضحكة تارسة وجهة، كِلش متغيّر، تكِلك روحه رَدت.

وبين ما الكل يحچي ويضحك، حسّيت بإيد علي تلتف عإيدي بخفة وحنان، رفعت راسي له، چان يضحك—بس مو أي ضحكة، ضحكة فخر، ضحكة واحد شايف حلمة يتحقق كدامة
.
قرب إيدي من شفايفه، وباسها بهدوء، كدام اهلة ..
ما گدر يسكت، ما گدر يخلي حبّه مخفي أكثر.

علي (بصوت واضح ومليان صدق)
والله انة ما أحيى بدونها. ماكدر اوصفها لانهّا تفوق كِل الوصِف، زجاجة تنخدِش من ابسط شي ارد احافظ اعليها حَتى من نفسي، غلطت بحقها مرة والثانية راح تكون عوض والثالثة سعادة وفرح، وهاي كدامكم وكدام الكِل يعيون ايلول يا ماتشوف غير الفرح دامني انة ويـاهة ..

تجمدت للحظة، حتى الهوى وكف وصار يستمع له، نظرات أمه عليه، ونظرات أبوه بين دهشة وفخر ، والابتسامة ما فارقت وجوههم كلهُم.

أما أني... حسّيت بدمي يغلي بخجل، بس ويا الخجل فخر، فخر مو طبيعي، فخر أني صرت البنية الي انحجى عنها بمحبة وصدق، مو سر، مو ظل، لا، حب علني، نقي، مابيه خوف ولا خفاء.

سَجاد وهوّ يقاطع الصمت الي صار
لكككك الله، الله اعلى اخوي الكِلة حُب وغراااااامممم عشت عشتتت
كال هَيج وكام يصوفر

علي
ولك هيَ .. ماكدر احجي جدي وعمامي وابوي كاعدين
تصوفر شني كدامك طير زاجِل

ضحكنـا كل احنة على كلامة

صالحة
ي يُمة اريد كون من الله يحفظكُم ويديمكُم سويـة ويخليكم دوم واحد مچلب بالآخر عگدة ما تنفل

علي
ايّ والله يَ يُمة گلتيها عگدة متنفل

جبُر
صيـر خوش رجال وياهة، وهيَ تصير خوش مرة وياك
ومبروك اعليكم احلى حيـاة سوية

جانت بكلبي ابتسامـة موطبيعية وهُمة يحجٰون، والي فرحني اكثر شي حجي علي عنّي كدام الكُل، حتى من بعد مانزل ايدي ضلت ايدة بـ ايدة محاوطتني بكُل قوة

احس گلوبنا بساعتها جانت تحجي رُغم انُ كُلشي جان شاكِت وقتها ..

ضلينـا كاعدين شويـة يمهُم وكالوا انُ يردون يرحـون ينامون فَ الكُل تقريبًا تطّشر

الولد طلعوا وكعدنـا اني والبنات سوية نسولف ونضحك ونشـاقة
شويـة واجة اميـر صعدت فَرس ويـا، وسُراج صاح لشَمس وسيوف صعدت فَ ضليت بَس اني

بهل اثنـاء طّب علي اجة توجه الي

يباوعلي بنظرات مغرومة هَيج احسة يريد ينفجُر من الحُب حتى وهوَ ساكِت هالشي واضح بعيونـة كبُل كلبة

علي
يحلوة شرآيج نصعد فوگ شعدج كاعدة وحدج هنانة

ايلول
اممم مادري بَس احس ايّ، لان اريد احُضنك ع الي حجيتة اليوم

علي
مات علي، انتِ تحجين بمواعة وانة اموعَن

من گال هَيج ابتسمت وباوعتلة
مدلي ايدة، انطيتة ايدي وكمنة سويـة

علي
اوف ارد اكعِد بالغرفة اكابلج واكعِد احس ماشبعت منج هجي ارد اكلج اكِل

ايلول
علي ترة انتَ قليل ادب

علي
مو انة القليل ادب، انتِ حلوة زايد

ايلول
اوكف شبيك مستعجِل يُمة حعثرررر بالقفطان طويللل

باوع مِنا ومِنا، وباوع للفوگ وهوَ يرفع راسـة
وبسرعة شـالني ورُكض بيـة

ايلول بهمِس
ياااا علييي يُمة هههههههه لك نزلنيييييييي
لا اوكع علي

طبينـة بسرعة للغُرفة، كلبي يلهث وكلبة يلهث
تقريبًا من نهاية الدرج والممر جان طويل حتى يودينا لغُرفتنا، وركضتة جانت سريعة بحيث ثواني واحنة طبينـة للغُرفة

سد الباب و وداني للغُرفة ع الجُرباية

ايلول
يُمة كلبي انت مخبل هههههه

كلت هّيج واني اضحگ، وجهة مليـان ضحِك وابتسامات جان يباوعلي وعيونـة تتفحَص وجهي بدقة، اني نايمة وهوّ فوگاي بدون ما تتلاصق اجسامنـا ويذب ثُگلة علية

علي
صـارلج شكد تشردين مني، تعاي خل نطفي الاشواگ

ما انطاني مَجال احجي شي قاطعني و اخذ شفايفي بين شـفايفة باسني بوسة خَفيفة ورجع باس گُصتي وعيوني وكُل انحاء وِجهي بـ بوسة خَفيفة بس بلهفة عـارِمة واحس الحرارة شعلت جِسمي شعِل

حاولت ادفعـة واكوم، بس جانت مُحاولاتي فاشلة، وكإنّي ادغدغة مو اوخرة عَني

ايلول
علي

علي
علي دايخ بيـج

ايلول
علي ماريد وخر عني ..

حجيتهـا وكمِت بسرعة وجسمي جان كُلة ديرجِف، كام وراي وحاوطني مِن ورة وحِجة بهمِس وحنية وحُب وهوَ يمرُر ايدة ع ايدي .... يُتبعع

___________________

شَمس
شصاير سُراج شكو احجيلي حباب

غمض عيونـة وتنهد وحِجة بصعوبة

سُراج
سيوف

شَمس
عزة شبيها !!

سُراج
سيوف

شَمس
شبيها سُراج

سُراج
حالتهـا حَيل خطرّة ..

من كالي هيجي نَزيت وحسيت كلبي وجعني، سيوف بغرفتنـا جانت و اني بغُرفة سُراج

كمت من مكاني بصعوبة وكتلة بعيون ذبلانة
شَمس
سُراج خلي نروح نشوفهـا حباب والله بالي يَمها

سُراج
ولنّج ماخذة الفايروس مرة ٢ عمي شو اكِعدي شمِس، هوَ يادوب احنة ركدناج

شَمس
لا حباب سُراج من بعيد بس اشوفهـا خاف محتاجة شي كذا انتوا متعرفولها حباب خلي اروح ومن بعيد ما اتقرب الها والله

سُراج
شمِس حبيبتي ترة مناعتج مصفرة تعرفين شني مصفرة؟ وبعدج شايلة للفايروس يعني اعلى لحظة يرجعلج فَ اكِعدي واسكتي

شَمس
حباب سُراج حباب والله كلبي ما يطيني بس خلي اشوفهـا

سُراج
هسة انة اقنعج انتِ اقنع سَجاد، دكومي كومي البسي جفوف وكمامة

كمت من الجربايـة اول ما كمِت صابتني دوخة قوية وكإني ردت اوكع راسًا، صحت بصوت هامِس واني دالزم راسي

شَمس
ااه سُراج

انتبه علية سُراج واجاني بِسرعة سندني
سُراج بخوف
شمِس شبيج

شَمس
وخر عني سُراج لتنعدي بس خل اكعُد

كعدني ع الجُرباية وراسي جان حَيل يوجعني، ماقبل اطلع من بعدها بس اني جِنت كُلش مُصرة اشوف سيوف، ادري بيها خوووافة حَيل وهيَ بعدهي صغيرة ماتتحمل كُلشي

رحنـا اني و سُراج يمهُم امشي وسُراج يكُلي لتلمسين شي

اول مافتحنة الباب وطبينة للصالة وصـارت عينة ع الغُرفة، لكينـة سيوف كاعدة منتچية وهيَ نايمة وتبچي، وسّجاد كاعد يمها لازم ايدها ويحاجيها

من تقربنـا الهُم لكيناهُم ثنينهُم وجوهُم تعبانة وعيونهُم حمررر مو شلون ماجان، خصوصًا سيوف جانت منتهية

اول ماشافتني كام تبجي اكثر بنفس تعبان وبصوت كوة يطلع
ماتحملت ماروح واحضنهـا

رحت بسرعة الهـا وحضنتها وهيَ صارت تبجي واني ابجي

سُراج
لج شمِس صدِك تحجين انتِ وخرن هاي شني ولجن موزين ثنينجن شايلات المرض يجوز وحدة تعدي الثانية وخرن

ادري بي خايف علية مِن سيوف لان حالتها كُلش تعبانة جانت بس احس ماودي شي

سَجاد
وخري شَمس وخري عنها ما ناگصج انتِ

ماوخرت اني بس وخرت هيَ من عندي

سيوف
ايّ شَمس روحي ماريد اعديج اني حبابة

شَمس
دشوفي حالتج شلون تعبانة
التفتت لسُراج وكتلة
شلون يعني تضل هيجي؟

سُراج
بابا انة جبتج إلها حتى تبجين لو حتى تهديها شوية هيَ قويـة وراح تتعداها هل محنة هاي

سَجاد
ما مطلوب منها تكون قوية، يكفِي إنها يمي انة يمهة وهذا كافي حتى اخليها قوية دوم

سيوف
مادري بس احس روحي راح اموتن، نفس ماهايَ العالم جاي تموت

سَجاد
اش اش ولج شني تموتين جا انة مني الي ما تكليلي ؟ بعدني حتى ما شفت حياتي ويـاج، من فتحنة عيونة لحد هاي الساعة جبُر وذولة خانگينة خنگ شلون اخليج ترحيـن وانة بعدني ماعايش وياج، والله يِخسى الموت الي يريد ياخذج مِني يِخسى الموت

سيوف
مـادري سَجاد بس اني تعبانة مدتشوفني شلون تعبانة حيل تعبانة والله حتى كرهت نفسي

كالت هَيج وهيَ تبجي باوعت لـ سُراج ودموعي نزلن تنهد وتقدمنـا شوية الها

سَجاد جان لازم ايدها ويحجي بصوت مخنوگ
سَجاد
سيوف والعباس بديت اتعصب وهسة اتخبل اعليج هنانة هيَ شنية تموتين شنية كافي تلفظين هجي الفاظ لا اطرج اعلى حلكج الفاهي، انجبي انتِ ما تموتين وين تموتينن ويننن

سُراج
كولي يالله يا سيوف، هاي لان بدايتها هجي صعبة وياج شوفي شمِس شلون هسة تجاوزتها وصارت اقوى، الله وكيلج مرت ب ايام كلت هاهيّ شمِس راح تنتهي بس الله نجاهة، فَ انتِ هم الله راح ينجيج واحنة كِل احنة يمج شوفي كِلها واكفة اعلمودج

سَجاد
وانة هم هنا اعلمودها وراح اضل هنا مُقيم لحد ما تصيرين زينة

سُراج
ايّ حتى الفايروسات تتراگص
عيـد وجابة العبـاس

سَجاد
والله فلا اعلية

سُراج
ولكم افهم مني ل افهم!!!
عمي مايصير رحمة للكائِنات مايصيرررررر

سَجاد
حاجي روحك وانتَ حتى تنام يم شَمس
وخر عني سُراج لا تخلوني اعصب وحگ الله
واذا اعصب احرگ عاليها اعلى ناصيها
لحد يدخلللل بيـة
عسى ما اموتتتن هم انتوا مالكُم حاچ بية

سُراج
سَجاد انة مابية شي فَ اذا اريد اضر احد بوجودي يم شمِس فَ هو روحي وبَس، اما انتَ ف انتَ بيك وهيَ بيها ف يجوز انتَ تضرها مو هيَ الي تضرك !!

اصلاً يجوز بسبب ركودك هنانة هجي حالتها زايدة يعني شلون افهمك انة شلون

سَجاد
لا تفهمني ولا افهمك انة افتهم ترة وحّدي، وانة الي قرار واحد اضل هنا يعني اضل هنا

سُراج
موهجيييي تشكل خطر اعلى البِتتتت

سَجاد
لا تخاف انة اعرِف شتصرّف

سُراج
اطرِبنا يالدكتور

سَجاد
انتَ شِلك غرض بية والله حلوة هاي، روح سُراج روحوا اطلعوا

سُراج
سَجاددددد بديتتتت تعصبني ترة، اذا ما تخاف اعلى حياتك فَ طز بحياتك بس حياة البت مُهمة ف اطلع من يمها

سَجاد
انة شكتلك؟
كتلك ما اطلع وهاهييييي ما اطلع يعني ما اطلعع

جـان كاعِد ولازم ايد سيوف الي جانت تباوع بهدوء وساكتة، مبينة هيَ هم رايدة وجودة ادري بيها خوافـة وما تتحمل تضل وحدهي، سُراج عَصب من سَجاد، بس سَجاد جان معصُب ازيددد بحيث اول مرة اشوفة هيجي يرفع صوتـة على سُراج

همست لسُراج بهدوء
سُراج خلاص عوفهُم الله الحافُظ شنسوي ما تكُلي شنسوي

باوعلي وجان معصُب بشكل موطبيعي
سُراج
كوم خل احاجيك برة

سَجاد
ماريدن

سُراج
ولك انتَ طفِل لو شني شبيككك تخبلت كوم خل احاجيك

سَجاد
جاي اكلك ماريدن، ماريدن اكوم واعوفنها

سُراج
ايّ كوم شويـة وارجع

سَجاد
استغفرالله استغفرالله سُراج

كام بعَصبية طلعوا ثنينهُم واني ضليت وحدي، تقدمت يم سيوف الي جانت تبجي واخذت ايدها
شَمس
لتخافين سوسو والله صرت نفسج وهسة ضلت سوالف

سيوف
مادري خايفة شَمس

شّمس
حبيبي من شنو تخافين سّجاد ويمج واحنة يمج بس تردين شي صيحيني والله اجيج

سيوف
اتمنى تضلين يمي بس ماريد أذيج

كالت هَيج وهيَ تبجي ورجعت حضنتني
ماتحملت وصرت ابجي وياهة

شَمس
ياربي وين وصلنـا احنة دخيلك عافينا ورجعنا نفس قبِل

وخرت مني اباوعلها البنية تعبانة مو شلون ماجان، اجذب عليها من اكلها صرت نفسج لانُ مُستحيل عيونها حُمر ونفسيها ضيق و بالكوة تطلع منها حجاية ولازم تسعل كل ثانيـة

كالت وهيَ تضحك بخُفة وتحاول تلطف الجو
سيوف
سَجاد ولا عافني ابد وحتى من اكلة لا تلزم ايدي لا تنعدي مايقبل ويضل لازمني يعني طلع صدك يحبني مو

ضحكت من كالت هَيج وصفعتها ع راسها بخُفة

شَمس
ياغبية طبعًا يحبج، ماجذب من كال عليج فاهية

سيوف
ههههه اكِلة روح مايقبل كلالي ( كالي ) ما اعوفنج انة

شَمس
تدرين انُ احنة كُلش محظوظين بيهُم، تخيلي انُ هالشي خطر وهوَ فعلاً خطر ومع هذا هُمّ ما عافونـا لحظة، ترة قلة هيج والله

سيوف
ايّ بعدروحي يخبلون

كالت هَيج وضحكنـا ثنينة، رجعت حضنتها وكتلها
شَمس
ديري بالج على روحج سيوف واحنة يمج دائمًا، ولتخافين هاي محنة وتعدي

قاطع كلامي صوت سُراج العصبي الي اجانا
سُراج
استلم هاي الثانية استلم والله انتِ مو صوجج صوجي انة الي جبتج هنـانة

درت وجهي عليّ وهوَ مستمر يعيط ومبين اساسًا ما لاكي نتيجة من سَجاد ومعصب ازيد

سَجاد
سُراج كملوا عركتكم برة لخاطر الله، البت الي بيها كافيها

خليت وكمِت واني مقهورة ليش صرخ هَيج علية يمهُم كلهُم، خليت وطلعت برة وهوَ وراي

سُراج بهمِس غاضب
يعني بس ارد افتهم انتِ براسج عقِل ولا شني ؟ انة بس هاي ارد افتهمها يعني بت منتهية بالحلقة الاخيرة وانتِ ستوج طلعتي من محنتج هاي تحضنيها ليشش

درت وجهي عليّ وكتلة واني دموعي مجمعة بعيوني وكوة لازمتهن
شَمس
ترة البنية منتهية واني احب سيوف وماكدر اشوفها بهيجي حالة واسكُت! اذا انتَ كلبك حجَر ف اني مو مُشكلتي

سُراج
انة كلبي حجر مو؟
خوش خوش ...

كال هيج وخلّة ونزل جوة واني طبيت للغُرفة واني ابجي ومستهضُمة منة، وبنفس الوقت خايفة على سيوف لان صدك الحالة الي جانت بيها مو هينّة ابددد

ضليت كاعدة بالغُرفة وابجي خصوصًا من ردة فعِل سُراج هواي قهرني بيهـا

ما مُضت نص ساعـة إلا وهوَ طاب للغُرفة وبيدة ڤيتامين سي، لا لابس كمامة ولا لابس جفوف حَسيت ماكدر اسكُت وراسًا صحت بي ودموعي جانن ع خدي بعدهن ماناشفات

شَمس
ها شو لا كمامة ولا جفوف وانتَ ما مُصاب وضال تحجي علينا اني وسَجاد

تقدم لاتجاهي وكعد ع الجرباية يمي، باوعت بغضب عليّ بنظرة عابرة وراسًا درت وجهي عنة

سُراج
شمِسي ونور عيوني، انتوا ليش ما تفهمون اعلية؟؟
سيوف حالتها تعباااااانة يعني البت حتى حياتها معرضة للخطر الا هجي اكلكم ؟ ياخي الاوكسجين مالتها جاي ينخفُض اعلى السريع!! ماجاي تشوفين البت من تحاجينة صدرها ينزل ويصعد وبالكوة تحجي وريگها ناشِف !

اصلاً تشبع الاوكسجين وصل ٨٥ لازم تتحجر بالعناية المُركزة هاي انتِ جاي تفتهمين خطورة الموضوع الي جاي تمر بي سيوف ؟

من كال هّيج احس صدمني باوعتلة بخوف واني اشوفة يكمل كلامة

سُراج
لا سَجاد جاي يستوعبني ولا انتِ جاي تستوعبيني هذا الغبي الي ساعتين احاجي ولا جنة فرفحني تفرفح هيَ البت مناعة ماعدهة ابد يعني يجوز انتوا تاثرون اعليها هاي اذا مو هيَ هسة عدتج واخذتي منهـا

شَمس
يعني صدُك هيجي حالتها خَطرة؟

تنهد وگال
سُراج
ايّ والله انة خابرت هسة راح يجيبولي اجهزة هسة اركبلهيا البت منتهية
رجع تنهـد وگال
حجيت وي سَجاد لمن كلبي خلص، ورافض يكلي اضلن يمها ما اعوفنها اطب ليج الكاج شابكتها هيَ هجي يا شمِس والعباس احس مدري شصارلي من شفتج هجي مدنية يمهـا

شَمس
تكسر الخاطُر سُراج ترة سيوف بعدهي صغيرة تحتاج واحد يضل وياها

سُراج
ادري شمسي ادري بس شنسوي هاي تحتم اعلينـا هذا الشي، انة كل ما اصفن هسة واكولن شلون اجتنة هل سالفة هاي اروكض بين غّيث التعبان وبين سيوف وسَجاد وطبعًا حالت سّجاد هم ماتقل عنكم بس هوَ شايلها بحيلة وبين علي و ايلول احس روحي تعبت وهذولة كلهم بجهة وانتِ بجهة
بس بعدين اصفن واكولن الحمدلله والشكر بينـة ولا بـ جدي لو امي لو اهلنـا، ذولاك وين يتحملوها

شّمس
مشتاقة لجدو وبيبي حيل تدري، شلونهُم هّسة

سُراج
كلبهُم طاك اعليج كل ساع يحاجوني اعليج خصوصًا امي كل ساع وتريد تجيج بس احنة مانرضى خليهم هناكّ لحد يطبلهم ولحد يوصل الهم، حّتى زعيم كنالة ما يطلع ابد بس يضل اعلى راسهم يداريهُم هوّ وسَبب هم خطية الله يطيها العافية

هاي البت سنعـة ومكسب لبيت جبُر امانة الله، امي تكول شايلتنة بالصلوات كِل احنة، وانة كا ما اخابر زَعيم احاجي اكلة اطيني سَبب افهمهة، افهمهة و تكعِد تطيهم المقويات بالحرف الواحد ودوامها هاي اول سنة الها عافتة اعلمودهُم هذا غير ب انهّا علاوي مداريتـة نفس الماي الي بالصينية

بصراحة ماراح نكدر نجازيها ابدد، صدك اعلى كولة جَدي هاي بتنا مو جنتنـا مكسب جبير ..

هههههه هذا علاوي صايـر شكبرة بعدروحي مشتاقلة الحقير كِل ما اخابرة كامرا اكلة بابا يكلي لتكلي بابا، باباتي زَعيم

شَمس
متحس انّك لازم تخطي خطوة تِجاه زَعيم وسبب وتِجاه علاوي
يعني الطرفين راح يرضون بي ؟
واني متاكدة حتى زَينب حتكـون مرتاحة ..

عقج ملامح وِجهة بسرعة ورجع باوعلي بعَصبية
سُراج
هم رجعنا لنفس الموضوع، يعني همة مايحجون بس اعلى كد ما انتِ تحجين بي، شمِس علي ابني ومن زينب ومُستحيل اكدر انكر هذا الشي او اخلي علي ينكر امـة، ترة زينب حبلت بعلاوي ٩ شهور وعاشت ويـا سنة وهسة هوّ راح يطب ال ٤ سنوات ف انة شلون احرمها منة شلون ؟

شَمس
والله سُراج انتَ مو منطقي !!
ترة انتَ ما منطي لغريب منطي لـ اخو زينب !! وانتَ تدري اكثر مني ب انُ علاقة زَعيم وزينب جانت حيل قويـة، وزينب جانت حيل تحِب زّعيم، وانتَ تدري وضعهُم شنو هَسة وهُمّ محرومين من الاطفال ف ليش ما تعوضهُم انتَ ؟
وبعدين علاوي شلون حتكون نفسيتة لو كُبر بدون ام ! اسئلني اني سُراج

سُراج
انة موجود يمـة شمِس ولا تقارنين روحج بي هوَ رجال يدوس اعلى جرحة ويمشي مونفس البت تختلف البت تضل حسرة بكلبها ..

شَمس
والولد نفس الحالة والله، وبعدين شنو رجال انتَ وين رحت وكبرتة اني داحجيلك عليّ هسة لمن يعيش فترة الطفولة والمُراهقة وحتى لمن يكبر صدكني الانسان شما كُبر بالعُمر يحتاج ام، حَتى لو صار شكدة هم لابُد يريد ام بحياتة وانتَ مجربها ترة هواي مرات اشوفك تكعُد وي بيبي تحجيلها اشيـاء هواي تخصك وتفضفض الها وترتاح لمن تحجيلها

سُراج
شمِس السالفة تختلف ترة، تدرين انتِ انُ علي مُحرّم اعلى سَبب ؟ يعني حتى حجاب لمن يبلغ كون تلبس يمة

شَمس
اني وياك سُراج بس بنفس الوقت خلوا يعيش طفولتة صح لا تدمروا خصوصًا انتَ كافي تشوش عليّ اني ابوك وامك اسمها زينب راحت للسما، شنو هاي السوالف عود ترة والله تضُرة ما تنفعـة، خلي الهُم سُراج

سُراج
هيَ شني خلي الهُم تحسسيني لعبة واخلي الهُم
ترة هذا ابني شمِس، تعرفين شني ابني ؟

شَمس
بس انتَ تكدر تسويلك طفِل غيرة بس هُمّ ميكدرون ؟
إلا اذا انتَ رئيك جان نفسة لان نفس ماتعرف سئلتك بهذيج المرة وجبنة طاري نفس الموضوع قبل سنة تقريبًا وكلتلي انُ اني لا ازوج ولا اجيب جهال وبَس زينب بكلبي

كلت اخر كلمات بـ ارتباك شوية، شكد مابية احاول ابين انُ الموضوع عادي لمن اذكر اسمها، بس لابُد ب انُ كلبي يغار ولو شويـة من طاري هل موضوع

لزم ايدي سُراج وجرها الة وباسها بهدوء

سُراج
مو كل شي نؤمن بيه يبقى ثابت، ولا كلشي نحجي راح يصيرد الانسان قناعات، وهاي القناعات مُمكِن تتغير بسبب شخُص واحد بَس، أشياء تتغيّر من نشوف الشخص الغلط،
بس أكو أشياء تتغيّر من نلكة الشخص الصح.

أنة قبل جانت قناعتي إنُ الزواج مو إلي، وإنُ حياتي للابد راح تمشي بدون مسؤولية وبدون ما اعيشن حياتي وي بنية، بس يوم شفتج حسّيت الحياة جاي تنطيني فرصة ثانية، عوض، ودفا، وبيت ما ينكسر.

ولمّن كعدت وي روحي عرفت وحسيت انّج فعلاً العوض لكِل عُمري الي فآت.

فَ شلـون رائيي ضل نفسة؟ اكيد تغيـر واصلاً تدرين شني ؟
انة اريد بنيـة تشبهج هجي حيل رايد من كل ونفسي

ابتسمت لكلامة وكتلة بحماس
شّمس
زين اكُلك شي سرتني بي سَبب ؟ محد يعُرفة غيري وغيـر بيبي

سُراج
شني ؟

شَمس
سّبب مرضعة علاوي من ماتت زينب لمّن جان عُمرة سنـة ونُص تقريبًا، مرة من المرات يعني شلون اوصفلكياهة بَس هيَ صايرة لانُ علاوي رايد وهيج يعني فهمتني ؟؟؟

سُراج ب استغراب
ايّ كملي كملي ؟؟

شَمس
ايّ ف هي مرضعتة بدون غاية والله لان هيَ حتى وي زَعيم مجانت تعرف مصيرها، وبيبي لمن شايفتة هيج جانت تفرح وجانت تكول اني ارضعـة بس هوَ سّبب الي مرضعتـة

سُراج
هاي شجم مرة؟

شَمس
تقريبًا ٥ مرات

سُراج
وخمس مرات رضاعة رضاعة لو هجي تملعب !!!

من كالي هيج استحيت

سُراج
ولج احجي

شَمس
لا رضاعة رضاعة، واني بحثت فَ هوَ الدين يكول اذا خمس رضعات ف يحِل عليها وتُعتبر امة مادري اذا صحيحة او لا بس اعتقد صحيحة لان صارت بعتبار اُمة بالرضاعة !! واهم شي انُ علاوي جان اقل من السنتين

سُراج
هاي سَبب كايلتلج عليها وكايلتلج على الـ تبني وهسوالف مو شمِس احجي ؟

شَمس
للاااااا شاهد الله علية لااا

سُراج
شمِس تعلمينييي ترة واضحة!!!!

شَمس
وروح بابا يا سُراج لا، اكو اغلى من روح بابا مثلاً ؟ صدكني لا واصلاً سَبب كُل ما اجيب يمها طاري للموضوع تضوج وتسدة وتدري ماكو أمل رُغم تعلقها الكارثي بـ علاوي
فّ اذا كُل هل اشياء موجودة ليش يا سُراج ليش
بعد ماعندك حِجة بشي
اذا مو علمود زَعيم و سّبب
علمود علاوي، خلي يعيش حياة حلوة وي امة وابـو

سُراج
ليش ما انتِ الي تكونيلة امة؟ لو لانه ابن زينب ؟

شَمس
سُراج اني حيل احب علاوي ولو ما كانوا زَعيم وسَبب بهل حالة صدكني جان اخذتة الي واني الي ربيتـة! بالنهاية زَينب بنت عمي ترة والدم واللحم يتحرك، بس زَعيم وسَبب احق مِني، شكد عجبتني سالفة علي الهُم من يكلهم اول طفل الي الكُم شفت الفرحة الي صارت بوجوهُم ؟ رُغم انُ هُمة يجوز ماصدكوا بس هُمّ والله يستحقون صدكني يا سُراج
وبعد ما عندك حِجة انُ يحرّم عليها ومدري شنو
وهذا الشي اني احسة مو صدفة ابدًا وانما تخطيط الاهي ..

سُراج
عوفج من الحجي واخذي ڤيتامينج هَسة يلة

باوعتلة احسة جان مصدوم بس احس بي أمل صار، هذا الحجي كُلة اني مرتبتة بعقلي رُغم انُ حتى سَبب متدري وجانت تحجيلي بس مُجرد مواضيع، سَبب انسانة حيل حبابة وزَعيم حنون ونيتهُم ثنينهُم بيضة وشكد ما اني احب علاوي ومستعدة اربي كونّة ابني بس سّبب جانت احق بي لان صايرتلة موبَس أُم وإنمّا اكثر بعَد !

اذا تدري بية كلت لسُراج تموتني لان هيَ تستحي واصلاً حتى هيَ مصدومة لمّن در الحليب الة واجـا ب اكثر مِن مرة ..

شربت الڤيتامين مالتي وهوَ طلع مَدري ويـن راح، استلقيت شوية ونمت بمكاني

اليـوم الثاني بدت حالتي ترجَع شويـة شوية وبديت احس بمُضاعفات اكثر شِدة، وشوية شويـة بديت أذبل ورجعت لإنتكاستي واكثر بعَد بيومين بَس !

سُراج جان متخبل علية ساعتها ويدري كُلش زين انُ اني انعديت من سيوف بس مايكدر يحجي ويـاي ع كد ما حالتي صارت صعبـة

مـا مرّن ٣ ايام الا واني واصلة للموت، لا احجي ولا اكدر اباوع بس حرارتي عاليـة ورجفتي زايدة بكُل جسمي ..

هنـا سُراج قرر يجيبلي دكتورة اختصـاص لان ماجان يريد ياخذني للمُستشفى خاف علية

اجتِ الدكتورة ومُمرضات جنت احس بوجودهُم كلهُم بس صوتي ماجان ينادي غيـر ل سُراج ..

الدكتورة
سُراج مايصيـر إبني انتَ غير مُصاب فَ ليش تعرض روحك للخَطر

سُراج
ماكدر دكتورة غَيد، كلبي يضل يمهـا

الدكتورة
الحُب وما يفعل

اسمع كلمات متقطعـة والاوكسجين حاطيليا حَتى اتنفس وكُل ساع يسطرني وينومني

كعدت من النـوم ع صوت سُراج وهوّ لازم ايدي ومطئطئ راسة ع ايدة الثانيـة ويهمس وي روحـة ب مادري شنو

فتحت عيوني زين اشوفة حتى مالابس لا كمامة ولا جفوف وكاعد يمي، حركت ايدي حَتى يحِس بـ كعدتي

فز راسًا وباوعلي بخوف ولهفة وحنية
سُراج
حبيبتي، شمِسي كعدتي

هزيت راسي ب ايّ و وخرت الـ اوكسجين مني

صار يمسد ع وجهي ويوخر شعري عني ويباوعلي بخوف وتفحُص

كعدت أباوع عليه...
وجهه تعبان، صوته مبحوح، وعيونـة حُمر دم

سُراج
ليش شلتي الاوكسجين حبيبتي مو زين اعليج والله رجعي

شَمس
ماريد سطرني ..

لزم ايدي بقـوة وقابل وجهي بخوف جبير

سُراج
شمسي ماريدج ترحين مني منيلي غيرج انة ماتكليلي
إنتِ صرتي كِل دنيتي ترة . ماكدر اعيشن ليلة بدون ضوچ صدكيني ..

إيده تمسح ع شعري برفق،
وصوته دايخ من السهر

سُراج
ظلي يمّي لا تروحين.
خليچ تحبينّي مثل ما روحي تحِبج وضلي يمي دائمًا
لان صدكي كلبي ما يگوة اعلى الفقِد، هلمرة اموت وانتهي انة ومايضل ذكر لسُراج موجود ..

حسيت اكو بعيونـة دموع، ومن حِجة هيج حجة بوجع حَيل جبيـر، ابتسمت بخُفة وكلت الة بصعوبة
شمِس
حَتى لو جانت هاي نهايتي، المُهم تكون يمك هذا كافي ..

سُراج
اسم الله ولج لا تحجين هجي ابد اضيع انة بدونج والله

كال هيج وصـار يبوس ادية بحُب وخوف
سُراج
شمِسي انتِ، ومنين اكو واحد يتحمل يعيش بالظلام طول عُمرة، ما تعلقت بـ انسان ولا حبيت انسان گدج شمِس، لانرحين عني لان صدِك بروحتج ادمر ..

شمَس
احبك سُراج ..

مادري شلون طلعت من عِندي بس جنت احس كلبي بكُل حجاية منة يكولها، حَدما توقف عن الحجي حسيت كلبي حِجة بصوت عـالي..
رُفع راسـة راسًا الي بصدمة، تنفّس بعمق،
وعينه صارت تتشكل بفرحة مذعورة

سُراج
هاي اول مـرة تكوليها شمِس، يعني انتِ فعلاً تحبيني ؟

ابتسمت وكتلة
شَمس
من زمان ...

ابتسم ابتسامـة عَريضة ودنك ع جبهتي وباسها
وضل مقرب وجهة وثاني روحة علية ويحجي

سُراج
صيري بخير اعلمودي، واعلمود حيـاة جديدة نعيشها احنة سوية

هزيت راسي الة ب ايّ رجع الاوكسجين علية وضل كاعد يمي حَدما غُفيت

مضت الأيام...
وگدرنا نعدّ عشرة أيام من الوجع،
عشرة أيام بين فَوز وانكسار..
مرة أتنفس وأحس روحي رجعت،
ومرة كلشي يضيق، وأحس الموت دا ينتظرني على غفلة.

بس بكل يوم جان سُراج ثابت.
ما بلحظة من اللحظات فتحت عيوني إلا وما لكيتة كدامي وجان لازم ايدي احسة جان صاير بيني وبين التعب جدار.

وشكد ما اكُلة يروح ماجان يقبل ابد ويجاوبني بـ
لو ثنينة نصير بخير لو ماريد الخير ابد، حَتى كمامة بـ امرار هواي ما يلبسها ويكعد يمي بكُل اصرار .

جان يأخذني للحمام هوَ ويغيرلي ملابسي بكُل مرة ماجنت اكدر بيها ارفع ادية حَتى من كد ما جنت فاصلة بغير عالم ..

كل لحظة أحس بيها داوكع،
يرجعني من كِلمة وحدة
سُراج
انة شجاعتي بيج انتِ، وانتِ شجاعة وراح تتعديها ..

ماحس روحي تشافيت من دوة كد ما انّي تشافيت بسبب وجودة يمي

وبس حسّيت نفسي صرت أحسن،
جنت أشوفه هو اللي تعبان
الهالات صارت سكن بعيونه،
والتعب يبوح عن حرب خاضها باسمي.

فتحت عيوني بهدوء باوعت ع القنفـة الي كدامي كاعد يكلب ب موبايلة اول ماشافني ابتسمتلة، بادلني ب الابتسامة وكام حتى يجيني
مديت إيدي نحوة
هالمرة مو حتى يساعدني،
هالمرة حتى أسندة اني مِن التعب الي تعدا ..

حضن وجهي بـ ايدة وباس راسي بهدوء
سُراج
لا اليوم احسَن واضح هالشي مو

شمِس
ايّ اني كُلش زينة احس روحي واحتاج اسبح

سُراج
بس خاف تدوخين شمِس وين تكدرين

شَمس
لا سُراج اكدر والله بس خلي اطُب
مادري بس اريد اسبح حباب

سُراج
تمام يلة انة اساعدج بس بالبداية انتظري احضرلج هدومج والـ حمام اكاسرلج مـاي ونوب طبي

شَمس
سُراج اريد تراك نظيف حباب

سُراج
تمام من عيوني

احس روحي متضايقة من روحي صارلي شكد حَتى ما سابحـة راح للحمام ومن بعدها طلع من الغُرفة
اباوع لروحي ع المراية الي يمي
وجهي صاير اصفررررررر وعيوني جواهن هالات واضحـات احس روحي صايرة موميـاء

جابلي تراك مـال نوم واجاني

سُراج
يلة سويتلج ماي بالبانيـو حار شويـة يرخي اعصابج

اجـة لزم ايدي وسندني حَتى اكوم اول ماكمت حسيت راسي انركع حَيل من الصُداع الي بية، ضليت ساندة راسي ع كتفة وساكتة بس اتأوه من الالم

سُراج
شمِسي والله مو بمحل سبِح انتِ هَسة عوفي ارتاحي شوية

حاول ويـاي بس اني جنت مُصرة انّي اسبح مشاني للحمام

سُراج
ماكدر اعوفج شمِس خاف توكعين

شَمس
لا سُراج ماعلية شي

سُراج
لا امشي وياي للبانيو حَتى أامِن عليج واعوفج
سُراج عندة بالحمام مالتـة بانيو وجان مخليلي مَي حـار اصر ع انهُ يوديني عليّ

سُراج
هسة انة صارلي بال ١٠ ايام انة اساعدج حتى تبدلين ملابسج هسة استحيتي مني

شَمس
سُراج ماريد ..
اني حباب

سُراج
شمِس ترة انة رجلج بالشرع فَ لتستحين
انتِ هسة مو بحالة تسمحلج صدكي

شَمس
ماريد سُراج حباب

سُراج
ولج بس اهدج توكعين
جا يلة طبي بملابسج وبس اطلع انزعيهن خوش

هزيت راسي بـ ايّ، ساعدني حتى انزل بي، لمن شافني استندت يـلا طلع

ضليت شويـة بالحمام احس رجعت وعييي وصحِيت وسُراج كُل شويـة يناديني حتى يطمن علية

اخُر شي حسيت روحي صحصحت زيـن من بعّد ما سبحت، لبست ملابسي وطلعت جان موجود بالباب وبيدة منشفة

اول ماشفتة ابتسمت
تقدم نحوي وحط المنشفة ع راسـي

بهاي اللحظة حَسيت روحي اريد احُضنة، بس الخجل والمستحة جان مسيطر علية

كعدنـا بالصالة راح هوَ للغُرفة جابلي ڤيتامين سي واجـة

سُراج
اخذي هجي امتصي حتى يطيج فايدة اكثر

شَمس
سُراج والله لعبت روحي منة ماريد

سُراج
شني سالفة شمِس هوَ شني ترة طعمة طيب يلة حبيبتي يلة اخذي لا تعبيني

شَمس
هاي علمودك بَس راح اخذة

ابتسملي واخذتهـا منة

سُراج
تعاي خل انشف شعرج

جاب شسوار ونشفلي شعري ومشطة الي ورُفعة نفس الكعكة الي ..

كملت الي بَ ايدي وهوَ كمل الي شعري
كمت وكفت ع المراية اباوع لنفسي والله تعبانة وكُلشي بية مكلوب كلب

سُراج
حلوة حلوة بكل حالاتج

شَمس
وين حلوة بس شوف شصاير بيـة وجهي كُلة مدمر

سُراج
شمِسي حبيبتي جا هيَ هينة ؟ صارلج بال ٢٠ يوم تتشافين وترجعين وهاي اخر ١٠ ايام انتهيتي بيهن هسة شويـة شوية ترجعين لعافيتج ماعليج
وبعدين انتِ حلوة بكل حالاتج

شَمس
سُراج دسلكلي انتَ

سُراج
هههه والله ماجاي اسلك بس فعلاً انتِ حلوة ومو شلون ماجان هم

ابتسمت الة وكتلة
شَمس
شُكرًا لانّك دتجبُر خاطري بس وجهي صاير مثل المومياء

سُراج
انجبي ولج مومياء شني عمي هذا تعب تعب
وبعدين مو انة الاشوفج حلوة بكل حالاتج انتِ فعلاً حلوة بكل حالاتج

ابتسمت ع كلامـة، بادلني بالابتسامـة وللحظة ضلينا نباوع بعيون بعُض بهدوء واحنة لازمين ايد بعُض ..

سُراج
خفت عليج هواي..

شَمس
جنت اتمنى اصيـر زينة واعيش حياتي الباقية وياك..

من كتلة هَيج ماحسيت الا وهوَ جارني بلطُف من ايدي وحاضني بهدوء
غمضت عيوني ساعتهـا وادية وحدهن صعدت لظهرة وحاوطنـة بهدوء

جِسمة حس بهذا الشي ورأسًا قوة حضنتة الي وأردف الي بكلمات هامِسة وحنينة
سُراج
سيدتي، أبقي هنا، فأنتِ شمسي التي تضيء كل لحظة من حياتي

الابتسامة بهل مـرة صدُك جنت احسهة نابعة من كُل وكلبي، وحَسيت بشعور غريب مُستحيل احد يكدر يوصفـة بعدني عنة وحُضن وجهي بـ ادية وباس خدي بهدوء

سُراج
يلة يحلوة لازم تنامين الساعـة ب ٣ ترة

هزيت راسي بـ ايّ وطبينـا للغُرفة جان مبدل الجرحف مال الجُرباية وموخر كُل الاجهزة والغُرفة مرتبة وبيها ريحة تعقيم وديتول، انطاني تعقيم وطَبيت نيمني بمكاني وغطاني

شَمس
وين رايح؟

سُراج
يمج ويـن يلة نامي

شَمس
بس انتَ تعبان لازم تنام

سُراج
ميخالف شويـة وانام

شَمس
سُراج انتَ تعبان

سُراج
ميخالف حبيبتي ماعدي شي يلة نامي كدامي

ضل كاعِد يمي حَدما نمت كعدت اليوم الثاني ع صوت سُراج وهوَ يصحيني حتى نروح للمُستشفى رحت لغُرفتنا سيوف صايرة زينـة الحمدلله والشكُر لبست جُبة ورتبت وجهي شويـة خفيت التعب الي بي ولبست كمامة وشـال وطلعت لكيت سُراج منتظرني

سُراج
لو عباية مو احسلج

شَمس
سُرااااج تعبانة حباب عوفني

سُراج
جا انتِ بوم تنزعيها ويوم تعوفيها مايصير ياعيني

باوعتلة وضليت ساكتة

سُراج
يلة لتزعلين امشي هَسة امشي

مشينٰا للمُستشفى اخذنـة مسحة وهوَ هم سوة جيك ع نفسة، ثاني يوم طلعت النتيجة نگتف(سلبية)

ثنينة جنة فرحانين حَيل بهذا الشي
بنفس اليوم ضلينـا سوية واجتِ فَرس و امير وسَجاد وسيوف عدا علي وايلول لان ايلول انتكست حالتها بالاخير

لليل تقريبًا نعسِت كلت لسيوف يلة خل نصعد للغُرفة

سيوف
واخيرًا راح نرجع نفس الغُرفة والله وحشة الغُرفة بدونج

سَجاد
جا انة ما مالي عيونج ولج

شَمس
صدُك ما سولفتلي عن استغلال الفُرص يكولون سَجاد عاش احلى ايام حياتة

سَجاد
شتحجين انتِ، اتعس ايام حياتي وحگ الله شني هيَ رادت تموت بين ادية ردت اموتن وراهة

شَمس
ع اساس فاهية وماحبها واتزوجلي مرة سَنعة

سَجاد
ها ايّ بعدني ع قراري

شَمس
ولج لتضوجين كوليلة خليك ع قرارك واني يتمناني احسن واحد

سيوف
ايّ والله صدِك يتمناني احسن واحز

سَجاد
اكوم اكص لسانجن ثنينجن
شَمس ديربالج تعلميها اعلى هجي سوالف
وانتِ شبيج تقلدين حجي كِل واحد
وبعديـن مني الاحسن مني هااااا

سُراج
اسكت ولك يشاقن قابل صدك

شَمس
اوي ميتحمل دشقة اذا هيج متتحمل المن تشاقة
همست لسيوف
كوليلة الي يدك الباب يلكي الاجابة

سيوف بعفوية
الي يدك الباب يلكي اجابتة

سّجاد
ولجججججج شَمسسسسس

ضحك سُراج عليّ، وهوَ عصب ضحكنـا وخلينـا وصعدنـا وهوَ يتهادد على سيوف

كعدنة بالغُرفة شويـة نسولف ومَدري شنو بنفس اللحظة راسلني سُراج

سُراج
هاي الـ اوي ومدري شني خففيهن، ما ينحجن يم الولد ابد سمعتي !!

ابتسمت عَ رسالتة وكتلة

شَمس
شنـو تغار علية ؟ ترة هيَ اوي شكايلة اني

سُراج
شمِس لتخبلينييييي، بطليها وبَس
ماريدتنحجي بعَد وتنغوصج بطلي هذا

شَمس
ان شاء الله

سُراج
لسلكيلي الكلتة يصير

شَمس
ليش يصير ؟ ممضطرة اسوي الي تريدة

سُراج
لتنسين انتِ مرتي يحلوة

شَمس
للاسف

سُراج
؟؟

شَمس
اشاقة

سُراج
لتحركيليييييي كلبي ولج

شَمس
سُراج البارد انتَ شيحرگلك كلبك ؟

سُراج
ضواج يا ادفى شمِس شفتها بحياتي، هوَ انتِ دافية بس تحركيلي كلبي

ابتسمت ع كلامـة وقاطعتني سيوف وهيَ تحاجيني ضليت احجي ويـاهة مرت اكثر من ساعة ودزلي رسالة ..

سُراج
الغرفة فارغة بدونج متعود اعلى وجودج والله

ابتسمت ع رسالتـة وجرئت روحي وكتلة
شَمس
ميخالف اشتاقلي

سُراج
كلبي مو قوي ويتحمل بعُد
متكومين نطلع شويـة نتونس بالسيارة
لو مابيج حَيل

شّمس
لا ماعندي شي بس شويـة خلي سيوف تنـام دنسولف

سُراج
ما ينلام سَجاد بيجن
ديلة تمام

ضلينـة نحجي اني وسيوف وشويـة ونامت هيَ كمت بدلت وخبرتـة ونزلت لكيت سَجاد كاعد اول ماشافني گُمز راد يجيني صرت ورة سُراج

سَجاد
والعباس يَ شَمس اذا بعد علمتيها اعلى هسوالف، كلبي يفور من حجايتجن لسة ترة

سُراج
وخر ولك وخررشبيك واكف جنك طنطل

ضحكت من كال سُراج هيج سحبني من ايدي وحطني يمة

سُراج
انتَ رجال ادنالها الا اكسر ايدك

سّجاد
ظهرج قوي ماكدر اعليج بعَد مونفس ايام قبل

سُراج
طبعًا، الايد التنمد اعليها اكسرهة

سَجاد
ما شاء الله اعليكم ولد جبر صايرين كساريـن روس وادين

ضحكنا على كلامـة وطلعنـة سويـة

الجو جان هادئ والنسيم يمر خفيف على وجوهنا. فاجئني وهوَ ياخذ ايدي ويحُضنها بواسطة ايدة بهدوء وفتح الأُغنية الي هدانياهة اول مرة

وحلفِت عُمري الك، اخلص الك كُلي الك
واحلفت مـا ابدلك، لا والنبي ما ابدلك
انتَ مِني وانة منك، مُستحيل ابتعد عنك
وماعيش العُمر لحظة بدونك انتَ ..

صـار يتهامس وياها ويباوعلي، احس ربكني بشكِل موطبيعي ونبضاتي تسارعن وكإنما شنـو

خلصت الأُغنيـة وباوعلي بنفس نظرة الحُب وكال

سُراج
اخـر شي توقعتة انّي احبج لهدرجة هـاي

شَمس
اصلاً حُبك كُلة جان اخر توقعاتي

ضحكنـا ثنينة رفع راسة وباوع لعيوني والضحكة واضحة ع وجهة

سُراج
ذاك اليوم جَدي يكلي، جَدي انة اعلى كد ما فرحان بيكم لو تطلب اسجل البيت ب اسمك واضرب اخوانك و ولد عمك بوري هم اسويها

ضحكت بصوت عـالي وهوَ ضل محافظ ع ابتسامتة

سُراج
جَدي من زمان جان يكلي، ومن يكلي اباوعلة واكولن هذا شبي من صدكة يحجي؟ مو بس اخر الاشياء استحالة المُستحيلات
نسيت انُ كِل شي ترفضة اليوم تتقبلة باجر غصبًا ماعليك وبرضاتك هم

على كُلاً شمِس، انة محظوظ بيج هواي وفرحان كلِش بوجودي ويـاج

شَمس
اني هم سُراج

سُراج
احبج

ابتسمت بوجهة واكتفيت ب انّي اسكُت وانتجي ع الكُرسي

سُراج
تذكرين من كلتيلي احبك وكت مرضتج لو حجيتيها بدون ماتدرين ؟

شَمس
لا اتذكر، وحجيتها عن وعي

سُراج
جا ليش ما تعيديها ؟

شَمس
بس انتَ تدري

سُراج
بّس اريد اسمعها منج ؟

درت وجهي الـة وكلبي ينبُض بسرعة موطبيعية

شَمس
لو جان وجودي ويـاك يسبب هيج تسارع بدگات گلبي، ويمدني بالامآن والاطمئِنان لهل درجة هـاي ويخليني سعَيدة والضحكة مَ تفارگ وجهي يسموا حُب، فَ ايّ اني احبك ..

اخـذ ايدي وباسهـا بقوة وهوَ يتنفس من الهوى الي يحيطها بهدوء

سُراج
عوضي انتِ فوك ما انّج شمسي

جانت طلعـة حلوة حيل، ماتخلى من كلام سُراج الي طيرني فرح بس وبنفس الوقت خجلني بي، بديت اكتشف جانب ٣ لسُراج مو جانبة البارد ولا جانبة الي انطانيـا الي يهتم ويحبني لا الجانب الـ ٣ جانب الرجُل الي يحسس البنية الي ويـا بِ أنوثتهـا ورقتها من فُرط ما انه يحجي اشيـاء حلوة ..

رجعنـا للبيت واليوم الثاني بديت اقـرة لان كُل شي تراكم علية، سُراج ويـاي جان كعدنا اني ويا سوينـا جدول وبديت اقرة لان هواي اشيـاء راحّن علية

دوامنـا تحول الكتروني لان صار حظر تجوال بكُل مناطق العِراق فَ جان تركيزي بدراستي وشلون اعوض المُحاضرات الكومة الي ماخذيهن بدوني

بَس سُراج هواي سهلي هل اشيـاء ب وكفتـة ويايَّ

رحت شفت جدو وبيبي بوقتهـا بس ماكدرت اضل يمهُم هوايّ بسبب دراستي واللود(الضغُط) الي جنت بي اني

صارت ايلول زينـة ورجعوا بيبي وجدو للبيت وجنة كُل احنة فرحانين برجوع حياتنا الطبيعية ..

اما اني وسُراج فـ لو انجمعنا سوية فَ جمعتنا تصير علمود الـ دراسة لا اكثر

نفسيتي اكتئبت بساعتها لان على مدار سنتين اني اطلع الاولى وبنُص السنة درجاتي كُلهن زينات فـ ماريد بالفاينل اخربهة بس كُلشي جان متأزم عليَّ لان تقريبًا من كُل مادة بالـ ١٠ مُحاضرات رايحات علية لان الدكاترة جانوا حيل مشدديـن ويانة لانّ ثالثـة ..

بكُل مرة جنت اكول ماكدر سُراج جان يوكف بصفي ويكلي تكدريـن بين الي اقرة الديقروا وبين الي اقرا الي فايتني وحياتي مُضت هيجي

انقطعت بوقتها عن كُل العـالم وضليت بغُرفتي دائمًا، او نكعُد اني وسُراج بغُرفتة او بالصالة حتى يفهمني المـواد

امتحنت الفاينل والحَمدلله والشكر جنت زينـة بس مو بالنتيجة الي اني اريدها لانُ تقريبًا صرت زينة بنُص الـ ٣ وامتحاناتنا جانت بالـ ٥ والدكاترة بـ بدال ما يتوقفون كاموا يزيدون بالمادة وينطون مُحاضرات تضل علينـة ..

طلعت الـ ٣ عَ القسم ساعتها، الكُل باركلي والكُل جان فرحان بيـة إلا اني جنت زعلانة وتمنيت لو كدرت اكمل ع نفس المستوى

سُراج
والله لو انة مكـانج ولا ادبرها وانتِ دبرتيها طلعتي ٣ ع القسم مو مُهم المُهم ضليتي بالاوائل و ع السنة التجي ان شاء الله تعوضيهـا

سَجاد
ولج انة مطلع مقبول بكلهِن وفرحان شكد بطرانة انتِ دحمدي ربج واشكري، بوية غير انة اذا اطلع الـ ٣ اموت بمكاني يشهد الله

جبُر
ايّ لا بالله انة اتعارك وي زَعيم واكلة اخوك اولة مِنك بالشيخة لو طلع الاول

ضحكنـا عليّهُم بَس معَ هذا زعلت هـواي لان قريت كُلش هواي ومن كُل وكلبي في سبيـل اطلع الـ ١، سُراج وجدو وعمو حَسن وبيبي ما انطوني مجال حَتى ازعل حتى شويـة وغيرولي جو رأسًا وماخلوني اكتئِب ..

بدت العُطلة وصار حظر تجوال بكُل العراق تقريبًا، الوضع صار اسوء مِن قبل والناس بدت تموت بـ اعداد هائِلة

سُراج ماصرنة نشوفة ابـد بعتبارة بالقطاع الصحي ويُعتبر مُلامس اول، اجتِ ايام يمرن اسبوعين ثلاثة وسُراج ماجاي للبيت اساسًا ومحتار بالمُرضة

جنـة كُلش خايفين عليّ بس ماجان بـ ايدنة شي لان ندري بي شكد يحب مهنتـة ويحب يشتغُل بـ اخلاص الها ..

ضلينـا نتراسل اني ويا بالموبايل دائمًا وشوقي الة جان موطبيعي، بس كُل ما اكُلة جان يرفُض يرجع ويتحجج بالمرضة

لحد يوم من الايام ومن بعَد اسبوعين هوَ مانازل جنت اراسلة مايرد ويطول مُدة يلا يرد علية، مع انّي متعلمة عليّ قبل حتى لو اراسلة ويكون مشغول يدزلي صورة للي ديسوي حتى ما اقلق عليّ

خفت عليّ هواي وضليت الوب عليّ بس ماكو ايّ رّد
نزلت حجيت وي بيبي وجدو والدمعة جانت بوسط عيني واحاجيهُم

شَمس
مُستحيل سالفتـة طبيعية جدو صدكني صاير بي شي مايرد ابد علية

جبُر
اصبري بويـة اصبري هسة نفتهم شني سالفة

صالحة
يُمة وليدي سودة اعلية خاف صدِك شو شبي

جبُر
هسة انتن ليش تفاولن تدرن بي يتاخر يلة ينزل

شَمس
جدو انتَ مدتشوف الحالات شلون صايرة خَطرة والناس دتموت بالالف والله الوضع خَطُـر حباب شوف شنو سالفة

جانت الساعة بـ ١ بليل واني طابة ع جدو وبيبي ابجي واحجيلهُم، كام جَدي وكلي روحي دكي الباب اعلى زَعيم كعديليا

رحِت صعدت دكيت الباب عليّ شويـة وكعد كتلة جدو يصيحلك كال هَسة اجي

نزلت شويـة وهوَ نزل وراي

زَعيم
ها شيخ آمُر

جبُر
عندك علِم اعلى ابن عمك سُراج؟

زَعيم
والله مادري شيخ امس ماحجيت ويـا بس اول امس عادي حجينـة

جبُر
ومكيف امس ما حاجي ويـا بلة صايرلة شي بت عمك تكول من امس لسة ماكوو

زَعيم
خـاف مشغول شَمس تدرين بي هو يداري المرضة

شَمس
زَعيم حتى لو مشغول جان يدزلي ويحاجيني هَسة ماكو ابـددد مايرد عليّّ

زَعيم
ياستار ياربي هسة اشوفة اصبرولي

جبُر
انتم نايمين وعايفي وِحيدة ماتدرون بي شحالة شلون اوديلة هديمات(ملابس) اكل بالسما بالكاع حايرين بنسوانكُم وكاعدين بَس موو

زَعيم
شيخ والله انة ويا اعلى تواصل، يوم الثنين انة يمة، بس امس التهيت هواي

جبُر
ليش هوَ شني الاهم منة ولك اخوك هذا اخوك
امشي روح شوفليا امشي

زَعيم
حاضر شيخ، هدي اعصابك انتَ ان شاء الله بحيل الرحمٰن ما مآسة ايّ سوء
يلة يمة انتِ هم لا تقلقين لا تخافين اعليّ بخير هوَ

صالحة
ولك شلون اهدة اخاف سريج شو شبي يَ يمُة الوضع يخوف

التفت الي زَعيم وكلي
زَعيم
جا انتِ تكعديهم تدرين بيهم شلون يقلقون يا شمِس ليش ماجيتيني

شَمس
والله مادري زّعيم شلون اكعدك بنُص الليل اني ع أمل يرد بس من شفت موبايلة صار مُغلق خفت عليّ اكثر

زَعيم
يلة صار الخير لا تقلقون انتوا انة رايح واردلكم خبر

جبُر
مو تروح وتغطط زَعيم

زَعيم
٢٠د لنص ساعة انة منطيكم خَبر لا تخافـون

راح صعَد لفوگ شويٌة ونزل مبدل و ويـا علي هّم، وامير وراهُم

ضل امير يمنـا يهدي بـ امي وجدو وعلي راح وي زَعيم لان حظر تام وممنوع ايّ احد يطلع عدا الصحة والداخلية جان التشُدد بشكل موطبيعي ..

كلبي جان يغلي نـار وعيوني محملات بالدموع وامشي واندعي يكون ماكووشي

امير
لتخافين شموسة ان شاء الله يطلع مابي شي يجوز موبايلة مو يمٌة شي

شَمس
مُستحيل يكون مابي شي امير اني اعرف سُراج والله اعرفة ما يتأخر علية هيج

جنت بالمطبخ واميـر يمي، بهل اثنـاء دك موبايل امير كال ايّ هذا علي

اتدنيت يمة حَتى اسمع الي راح يحجي وكلبي يفور من القلق

امير
ها صديق بشر

علي
سُراج مُصاب وحاجري واظن منطي الابرة الخبط هاي ولك استعجلي تعـال وافتح بيتنـا راح اوقع اعلى مسؤوليتي ونطلعة، مارضوا هُمّ بس سويتلي طلابة وياهم شكدها
اخيك امير قبل لا نوصل كون انتَ واصل، كل لايلول المفتاح بجرارات المكتب مالتي خل تطيكياهن وبسرعة روح كدامنـا افتحة وكل لجدي ولامي وشمس شو شني يلة اخيك ..
يُتبع.......

__________________

روآن

اخو سعـاد
مو جبُر ولا ابو جبُر الي يخوفنـا لم جلابك واطلع كال نعـال كال

اهل سـعاد معروفين انُ هُمّ عائلة فالتة وصايعـة سـعاد جانت هدية لمروان بـ حل نزاع عشائري بين اهلها وبين نـاس، ابوهم سكرجي وامهم ميتة وبس هُمّ ٤ اخوة
محتارين بالسكِر والعربدة والطربگة والعركات ومكملين مسيرة ابوهُم الفاضِلة ..

محد تحمل الغلط الي صـار وشي اشتبك بشي
وللحظة وحدة سمعوا صريخ سعاد وهيَ طابة اعليهُم وتصيح

سـعاد
وتكتلون اخوتي ب بيتي والله يمروان ال دحام الا اندمك الا اخليهة تكتل اروحها شلون ما امك كتلت روحها، ما تخلصون مني والله لا انتَ ولا هيَ ولا حتى طفل البطنها عبالك مادري ادري ادري الا اموتهم كدام عينك الااا

للحظة وحدة الكِل جان يباوع ومصدوم ومايكدر يحجي، سحّب مروان بعصبيـة السلاح من صفحة علي وبدون تردد راح وضربهـا طلقتين بـ نص صدرها

علي
مرروووووووووووان لااااااا

وكَعت سعـاد بالگاع والصريخ بِدة يتعالى بـ كِل ارجاء البيَت
كوة فكوا السالفـة وطلعوا من البيَت واخوان سُعاد يتوعدون لـ مروان

علي
شسويت انتَ مروان شسويتتت انتَ دمرت روحك ودمرت روان وراح تدمرني شلون تسوي هجييي شلون

مروان
انة حميت روان وابني، ولو طلعت عايشة هل مرة راح اروحن وانيم سچينة بنص گلبها حدمااااا تموت، وطزززز بيـة مايهمني روحي وشيصير خّلة يصير، اما بالنسبة الك فَ لاتخاف انة اكولن ماعليّ هوَ انة السحبتة

علي
ههه مصدككك مصدككك هجي تنحل امشي للمركز مروان امي احسن ما يشتكون هُمّ امشواا

زَعيم
مروان تصرفت تصرف سريع حيل

مروان
انة ماندمان اعلى كِلشي سويتـة وكتلكم وارجع اكلكم، لو انة اعلى قيد الحياة لو هاي المرة اعلى قيد الحـياة
هاي المرة مسمومة مسمومة تريد تموتلي مرتي وابني واعلى گص رگبتي يصير هالشي، الي صـارررر تستاهلة وهذا جزاتهة واطلب من الله كون تموت، يارببببب دخيلك خلصنـاه منها ..

جان يحجي بـ حرگة گلب موطبيعية، خلوا وراحوا للمركز وانصدموا بـ وجودهُم كدامهُم، يعني حتى احتمـال ما ماخذيها للمُستشفى اساسًا

اشتكوا شكوتيـن على مروان وعلى علي بـ حكم انُ السلاح جان سلاح علي وابدًا مو لعبة الي صـار ب انُ انضربت بسلاحة

مـروان قدم إفادتة بسرعة انُ السلاح اخذة من علي بغير رضاتـة بس كُل هذا جان غير مسموح وامروا ع سريـع بسحب اجازة علي و سلاحة وهويتـة مُباشرتًا واخذوا مروان عَ الحبِس بتُهمة القتل المُتعمّد بداخل البيـت ..

رجعوا للعصُر كلهم من المخفر محتاريـن شلون يواجهـون روان بـ الي صار ..

روان
ضليت منتظرتهُم ع نـار والمُشكلة كلهم جانوا رايحين، اراسل علي مايرد اخابرة هم مايرد و ولا واحد منهم يرد علينـا ابد، ضليت قلقة ودموعي مانشفن من عيوني، وعرفنـة صارت سالفة جَبيرة بيهُم، شويـة واجوا ناس سيروا يم جَدي

من بعَد ماطلعوا شفت وجه جدي وعمامي مايبشر بخير ابـد، وضلوا برة ويخابرون ويحجـون، بس المشكلة محد جان راضي يحجي ابد

سئلناهُم مِن طبوا شكو، ماحجوا ابد وجَدي كالي السالفة مويمج ابد

للعصُر تقريبًا اجو كِل الولد، وجوهُم مكدرة والهبطني مـروان ما موجود وياهم !

اول ماصارت عيوني بعيون علي نزلت دمعتي وكتلة
روان
ويـن مروان علي

تنهَد بتعب واجة تقدم الي بـسرعة، لزم ايدي وطببني للصالـة

علي
انتِ هسة بس اكعدي واهدي ماكوشي

روان
علي لتكلي ماكوشي حباب لتضم علية احجـي

زَعيم
احجولها هيَ عاجلاً ام اجلاً راح تعرف

حجـوا الي صار كِلة وانة ضليت صافنة عليهم بصدمة وايّ حرف ماطلع مني ..

علي
انة بـس اريد افتهم شلون سحبة مني بهسرعة هـاي شلوننن

سَجاد
انة شفتة من اول ماهدت هيَ دنگت وعيوني اجت عليّ اباوعلة يباوعلك كلت هذا شبي ماكو ماخلاهـا تكمل كلامها الا وهوَ منبت طلقتين بـ صدرها

سُراج
الي يموتك هوَ ما متندم ابد، ويحلف ويتكفر يكول يس تعيـش موتتها اعلى ايدي ما اضل عايش بهل حياة وهيَ عايشة لو هيَ لو انة

زَعيم
تردون الصدِك؟ رجـال وبي حظ

علي
يا رجال ولك يا رجال ودة روحة ورة الشمِس بهل فعلة !! تدري حكمة شكددد لو لا !! مؤبدددد اذا مايصدر بي اعدام لا تحجوني عـادد

زَعيم
عمي وحگ ربكمم الي سوى صحيح، ترة الخصم مرة مو رجال وانة كايلها وارجع اكولها خصم المرة للرجـال اشد من خصم الرجال للرجال، عاد الرجال تطگة تتخاصم ويـا الا المرة شسويلها مثلاً ؟ لا نوب هيَ سحورتها وهيَ شوف البت شلون تخبلت

ولكم امة طلعت هيَ كاتلتها تكلة امك موتتها بسحورتي وراح اخلي مرتك تكتل روحها، وعبالكم جذب ؟ لا بالعباس تسويهـا

تسويها وتطلع لذاك الصوب هَم، ف انة اشوفن تصرف مروان تصرف رجولي وهجي نـاس جزاتهُم المـوت

فَمَنِ اعْتَدَىٰ عَلَيْكُمْ فَاعْتَدُواْ عَلَيْهِ بِمِثْلِ مَا اعْتَدَىٰ عَلَيْكُمْ ۚ
وقـابل هوَ يطگها بسحِر فَ هاي جزاتها وهاهيّ

حسيت روحي بهاي الساعـة انفجرت، وبعد مابية اكتم واستوعب كلامهم، كمت وكفت وحجيت بصوت عالي واني ابجي وصدري جان يصعد وينزل ع كد ماجنت اتنفس بسرعة وبثگل
روان
زَعيم انتَ شتحجي شتحجييي ما سمعت شجاي يكلك علي مروان راح راااااح روح روحـة بهاي السالفة

زَعيم
ماكو هجي شي عمي احنة ويـن عايشين يفصلون وهاهيّ

جبُر
ايّ جدي اهلها ناس مطربگجية يكيفون

سُراج
تدرون يكولون جايبيها للمستشفى الساعة بـ ٣ ؟ وهيّ ميتة ساعة بـ ١ ونص تقريبًا، هاي حسب مافهمت من طب العدلي يعني هُمّ رايديها تموت

علي
مانكدر نستعملها ضدهُم؟

سُراج
ماتمشي علي انتَ شتدري قابل هذا الدليل اكبر من انه كتلها بنص بيتها !

فضيلة
يمة شلون بيـة يَ يمة هيَ هاي تاليتنـة كل احنة ليش هجي طشرنا الوكت ليش

جبُر
هدي بالج حجية الله وكيلج نفس ماكال ابني زَعيم هذولة عبيد للفلوس

زَعيم
والله يـا خالة بس ياخذون فلوس يتنازلون عن الدعوة وهُمّ الممنونين

روان
بلة حقروا ومارضوا شلون بهجي حالة

علي
لا حبيبتي صحيح حجيهم ذولة يكيفون اعلى الفلوس فَ ان شاء الله تنحل سالفتـة وخل نحاول نحلها قبل لا ينحال محكمة

جبُر
نروحلهم ونشوف شيردون

زَعيم
لا جَدي تروحلهم شني، يجـون وهُمّ الممنونين هم يطيحون اعليك ويعتذرون اعلى الغلطوا بعدين نتفاوض وياهم
صدكني اليوم اسعد ايام حياتهم لان لكولهُم طريقة يحصلون بيها فلوس
نطيهم ١٠٠ مليـون يكيفون وعلي عيد وجابـة العباس الهُم

روان
ايّ حَتى لو بيتنا نبيعة ايّ شي زَعيم بس حباب لتخلون مروان يبات اليوم بالسجن

زَعيم
روان هوَ اليوم لازم يبات مانكدر

علي
مانكدر حبيبتي اذا راد يصير تفاهم فَ اعلى باجِر

روان ببجي
ليش لباجر ليشش، حباب علي خليها اليوم ماريدة يبات بالسجن حباب

جبُر
بوية مروان ماهو طفِل ومثل هذني عابرات ومتعديات اعليّ هوّ السجن المن للزلم

علي
وحاليًا هوَ بسجن المركز يعني ما مودي لغير مچان، فَ بحيل الله نحل سالفتـة قبل لا يحولوا لغير مكان
وانة راح احاول اخلي شجم يوم بالمركز

زَعيم
هاهيّ عمي اخلصوا هيَ هم حياة حياتكم شني حاطتكم وتركعكم بالسحورة، شيخ تكل لمروان اخلي مرتك تكتل روحها عمي انة لو واحد يكلي هجي وعلي اتصرف نفس تصرف مروان وافضها، لان هجي نموذج سحارات ما يردعة شي غير الموت فَ هوَ هذا جزاتها

ومروان ضل يحجي لاخر نفس ب انُ انة سويت الصح وحميت روان وابني و والله خير ماسوى، صح انة ماحجيت كدامة بس بس يطلع من السجن والله يسهلة اكلة والله عاشت ايدك وثلثت انعـام منك

احس ماتحملت كل حجيهُم وضليت كاعدة وابجي خـايفة عليّ بشكل موطبيعي ما اتحمل فكـرة انُ مُمكِن بعد ما اشوف مروان ابـد

من شافوني بهاي الحـالة خافوا عليَّ وضلوا يحجون وياي وزَعيم وعدني هوَ يحل السالفة

بنفس اليوم ودوا عليهُم ناس ب انُ خل يجونة الشيخ جبُر رايدهُم، ماقبلوا وكالوا اذا يردونـة خّل هُمّ يجـون زَعيم رجعلهم الجواب ( جا روحـوا وفّن اليدگ بابكُم بعَد )

خفت بسبب جوابهُم وجنت اكول لـ زَعيم خاف يعاندون صدك
يضحك ويكلي
زَعيم
ترة ذولة لا يدورون كبرياء ولا غرور يدورون فلوس الله وكيلج، هَسة بالزايد يوم ثنين احسبيلهم وهمّ بالباب، واذا ماصار الكتلج اعليَ يروان شترديـن انطيج

روان
بس خاف يحيلون مروان للسجن ومُمكِن يكون خطر حباب زَعيم

زَعيم
ولج هوَ شني خطر، ان شاء الله ياخذوا للحوت شني يعني مات مروان؟ عمي مروان رجال كَد نفسة ليش تعاملي وكانهُ طفل لتخافين اعليَ بوية امحي الخوف من راسـج

جبُر
جدي انة لو اشوف السالفة مابيهة أمل ومسدودة جان وحگ ربج عفت كِلشي ورحت تعنيت الهُم انة وحليتلج السالفة، بس ياجدب نفس ماكال زَعيم هُمّ يجونة فّ اصبري اعلمود كرامتنـا وهيبتنة يعني بربج انتِ ترضيها سابين جدج واروحلهم ؟

هزيت راسي ب لا

جبُر
هاهيّ جدي اخذيها من عدي رجلج يطلعلج ان شاء الله بسچ كافي بچي انتِ حامل ارحمي روحج شوية

صاحني اجـي يمة شبگني وضل يطمني بالكـلام رغم كلامهم كلهم الا انّ كلبي احسة يفور عليّ واريد بس الاگي ..

مر اليوم الاول واجـة اليوم الثاني بدوا يددحچون ويرحـون لشيوخ ثانين قريبين لجَدي بس جَدي جان عد حجايتة الي يريدني يجيني وانة ماروحن لنـاس مثلهم ..

مَر اليوم الثاني وماصار شي والي سمعتة حالوا مروان ل سجِن الـ كوت المركزي علمّا تصدر محكمتة ويودوا من بعدها للحوت او السجِن ثاني

اعصابي تدمرت بهل ايام وضليت بـس ابجي بحرگة عليّ وخايفة، اما علي فَ جان متوهدن حيل وگضاهة بـ بغداد ومعاملات ومدري شنـو حتى بس يحل السالفة وزواجـة باقيلة اقل ٣ اسابيع تقريبًا

اليوم الـ ٣ كعدت على خَبر انُ يردون يجـون علينا لان أيسوا بعَد فرحت وكلت يـا الله وصار عِندي أمَل، اجوا بنفس اليوم اول شي صار انُ جَدي اهانهُم اهانة معدلة على انُ شلـون يغلطون عليّ وبعديـن حجة وياهُم حتى يتنازلون على مروان

من الاخيـر اجوا وبدون شلعان كلب بسرعة طلبوا ٢٠٠ مليـون ويتنازلون، رجع رزلهُم جَدي وكال الهم ما اطيكم غير الـ ١٠٠ وتفضون السالفة وهاهيّ

رفضوا بالبداية وكالوا لا وخليها ١٥٠ ومدري شني بَس زَعيم جان مُصر اكثر من جَدي انُ ما يطيهُم غير الـ ١٠٠

خفت لا يرفضون او يطلعـون بس بساعتهـا قبلوا الحمدلله، طلبوا مشية وتنعطى الفلوس بالمشيـة، زَعيم رفض رفض تـام وكال لا نجيكم مشية ولا تجونـا مشية هيَ ١٠٠ تاخذوهن وتتنازلون وبَس

ماقبلوا ابـد ودكوا رجِل الا مشية، هنـا زّعيم تعصب وكال الهُم لا حجي زايد ولا شي ثاني مشية ماكـو تعصبوا هُمّ وخلوا وطلعوا وكالوا خلي بالحبس جـا

من سمعت هجي صـار ضليت بـس ابجي و اول ماطلعوا الجماعة نقسموا نصين نص يلوم زّعيم ونص وي زّعيم

زَعيم
عمي وحگ العباس يرجعـون وحگ العباس يرجعون بس كرامتنـا ما ممكن ترجع، عمي شني احنة تالي عمرنا نمشي اعلى ذولة يخسون والله يخسون

روان
هذولة شوفهم اذا اجوك بعد وحَتى لو يجون من بعد وقت طويل ليش هجي سويت زّعيم ليش هجي

زَعيم
واذا اكلج يومين وهُمّ يمج ؟

روان
بس محكمتة بقالها ٣ ايام !!!

زَعيم
عمي وحگ ربج يجون بس اطي صبـر واذا ماجوا انة اتصرف وقبل الـ محكمة هم

كال هَجي وخلة وطلع
روان
جدي انتَ شنو تخلي زَعيم يتصرف ترة صحيح هوَ من بعدك بكِلشي بس هوَ هم شاب ومتهور ليش تخلي ياخذ هجي قرارات مصيرية ليش

جبُر
جدي زَعيم يعرِف مو مايعرِف ومن يحجيلة حجاية انة جدة الاكبر منة احترمة واسكت لان ادري بي حگاني والشي الي يكولة يصيـر كالج يجون واجوا وهسة كالج يرجعون وراح يرجعون اطي عطوة خلي اخوج يتصرف يابوية

عفتهُم وصعدت فوگ ابجي واحجي بحرگة گلب على زَعيم
شويـة وصعد وراي علي

روان
هَسة هوَ زّعيم شنو جدي حاطة الامر الناهي شيعرف هوَ علي

علي
ولج لا تحجين هجي زَعيم يعرف كِلشي من هوَ ٩ سنوات هوَ يطلع وي جَدي، تربة بالدواويـن واخذ ذبة جَدي بكِلشي، فَ جدي مطمن منة ولو ما يشوف انُ حجية صحيح جان وگفة بس هوَ يعرف

روان
ترة يضل شاب ومتهور شلون يعني مروان يوكع بسببة

علي
حبيبتي رونـة زَعيم مو صغير زَعيم عمرة بال ٣٣ سنـة يفتهم ويعرف شني الي يسوي فَ كافي تفكيرات منا ومنا وحَتى لو ماجوا انة بنفسي اروح واحجيلجياهم بس دموعج ماريد اشوفنهـا

طمني علي بكلامـة شوية، وطلبت منة ياخذني لـ رحمة، رحت يمهـا كعدت يمها شويـة طمنتي هـواي وكلتلي السالفة راح يطلع بـ اقل من ٧ ايام

فرحت من رجعت من رَحمة حيل لان كلامها الوحيد الي مُمكِن يطمني، اليوم الثاني ماصار شي اليوم الثالث جنة كُل احنة قلقين لان باجُر محكمة مروان بـ ١٠
ضلينـا منتظرين لحد العصُر وماكوشي
وزَعيم احسة يلعب على اعصابي لعِب

زَعيم
عمي منا لليل حدنـا ل٩ اذا ماجوا انة اتحارش بيهم بس اطوا صبُر هسة تلكوهم اعلى نار واحد يكول خل نروح واحد يكول لا وانة وديتلهم طارش يحجي يمهم انُ احنة شدخلنـا بمروان ومشاكلة نارة تاكل حُطبة فَ لا تخافون

جنت كاعدة على اعصابي اخر شي عفتهم ورحت لفوگ ابجي وخـايفة، ماكو اقل النص ساعة واجتني سيوف ترگض ع انهُم خابروا

احس الفرحة ما لمتنـي بساعتها، ودوا عليهُم بنفس الوقت واجـوا واتفقوا انُ هاهيّ باجر يطلعـوا وبنفس الوقت يسلمونة الفلوس

راح علي لـ مروان حتى يبلغة بـ الي صار ومروان ضـال يصيح ويكول ما افصل ذولة لو مدري شيصيـر وجان مُصر على كلامـة

كل ماحسها بدت تتفك ترجع تتعقد من اول وجديد جَدي كال انة اروحن واطيح حظة هيَ بكيفـة وفعلاً بنفس اليوم راحلة جدي بليل وحجـة ويا

ماجان عدنة مجـال نبيع شي او نسوي شي خصوصًا بـ غياب مروان فَ الولد دبروا من يمهم وكالوا بعـدين عود

راحـوا هُمّ تنازلوا وسقطت الدعوة ضِد مروآن، خابرني علي بالطريق وگالي اجينـة الحَمدلله

فرحتي جانت ما تتوصف ابـد، جنت فرحانة وميتة من الفرحة هم وكإنهُ روحي طارت ورجعتلي من جديد

جنت انتظر دقيقة دقيقة علمّا يجـون بس الساعات بدت تطول واحس الثانيـة بميت دقيقة علية

اجو الساعة بـ ١٢:٣٠ تقريبًا، الكل جان يصلي وبس انة جنت كاعدة ومنتظرتهُم، اول ماشفت من الكامرات شلون نزل مروان وجهي ضحگ وگلبي كام يفرفر وبسرعة طلعت لبـرة حَتى استقبلة

جانوا ويـا زَعيم وعلي طب زَعيم كدامهم ضحگ بوجهي
زَعيم
ها وفيت بوعدي لو ما وفيـت

روان
ابووو يعگوب بعَد، احسن واحلى شيـخ اشوفة بحياتي والله

ضحگ بصوت عـالي و وعبر من يمي وهوَ يكول يالله يسوي مَجال لـ مروان عبر علي من بعدة واني اباوع لـ مروان

ملامحة ضايـجة ومعصبة بشكل موطبيعي اول ماشفتة رحت شبكتـة بسرعة

بادلني بالحَضن السريع و وخرني من حضنـة باس راسي وباوع لعيوني وهوَ يكول
مروان
احسن واحلى شيخ شني ؟ بعدين نتفاهم اعليها

گالها بحزم وخلة وطب كدامي
ضليت واكفة بمكاني وما تحركت
رجه التفت الي ومدلي ايدة

مروان
تعاي شبيـج

بين على وجهي شكد اني ضجت وتقدمت بلا ما انطي ايـدي
طب سلم عليهم واحد واحد وضل يبوس بالحجيـة

كَعد يمهُم وانة صرت كاعدة كدامـة وكوة لازمة نفسي من انّي ابجي هسة هوَ يخرب فرحتي على كلمة؟

جبُر
والله انة اعلى كد ماخبصتني مروان اعلية كلت اذا تازمت السالفة اروحلهُم عمي شسوي

باوعولي كلهُم وضحكوا باوعتلة باوعلي ب ابتسامة عابرة، ورجلة جانت تهز بطئ عرفتـة ضاح حَيل

راد يروح كـال عندي هواي شغلات لازم افضهن هّسة بس جدي رفض يطلع وكالة تتغدة وتروح، شكلة جان مبيـن شكد ضايج بس ماجان يكدر يعبر عن ضوجتة

طّب سبح و غير ملابسـة و طلع تغدة وشرُب جـاي وطلع
وقبل لايطلع كال حضرن روحجن للعصر اجيجن

حيل زعلت وانغاضيت من عندة، للعصُر تقريبًا اجة بسيارتة جان كاشخ ومتعطر ومجهز روحة ع اخـر حباية، بس وجهة بعدة معقوج ومبيـن ضايج

جان جاي وجايب فلوس ويـا كالولة ليش استعجلت بس هوَ تشكر منهم وكالهم ماعدي شي، كال انُ هوَ مطلع نـاس ذابين شكو شي ب بيتنٌا الجديد حتى الملابس والغراض ولاشي مبقي بالبيت

رحنـة للبيت ساعتها وجان فعلاً مفضي من كِلشي، بس عايف جرباية للحجية وجايب فرشة واشيـاء جدد وجايب فراشات النـة فراشهن بغرفتنـا

اول ماطبينـة صاحني حَتى اطب للغرفـة
طبيت ورا وسَديت الباب
دار وجهة الي وجـان معصب بشكل موطبيعي

مروان
احسن شيـخ و احلى شيـخ هم !! روان انتِ مقتنعة بالي كلتييييييييييي خبلتيني وخليتي لهفتي كِلهة تموت بسبب حجيج شلون تكليلية هجي وكدامي هّم !!

روان
مروان انتَ صدِك تحجي لو شنو ايام انة انتظرك حتى تنغصلي كلشي بهاي الطريقة ! ترة زّعيم جان يطمني عليك لا اكثر ولا اقل وانتَ تدري شنو هوَ زَعيم فَ ليش هيج نغصت علينة فرحتنة

مروان
انة النغصت اعليج فرحتج لو انتِ روان ؟؟
يعني انة واكف طرطور يمج لو شني ارد افتهم شلون تكليلة هجي حَتى لو اعرف نيتة واعرفج انتِ شني عاد خليلي احترام تدرين بية كِلششش زين اموتن من هجي تصرفات انة اخوج علي اضوج منـة نوب زَعيم ؟

روان
ترة الي تحجي عليّ اكثر شخُص ساهم بطلعتك ليش تنكُر فضل اهلي مروان!

مروان
ما ناكر فضل احد انة، واهلج وموقفهم على راسي روان، وزَعيم صديقي بالفترة الاخيرة وانتِ تدرين كِلش زين، بس لا تعايريني بهالشي لو جنت انة بمكانهم جان سويت نفس السالفة وانتِ تدرين فَ همة ما منخين اعلية وانة ما منخي اعليهُم عوفي هاي السوالف مانريد نطب بيها ونزعل روحنـا

انة احجي اعليج انتِ وشلون تكولين لزَعيم هجي لا وفوكاهة بعدج مُصرة وتشوفين روحج ما غلطانة ؟

روان
هاهيّ مروان انة غلطت واسفة واعتذر ما تتكرر ان شاء الله

كلت هَجي ب برود عكس الي بيـة ودرت وجهي ورحت ودموعي نزلن على خَدي

لزمني من ايدي لمن صرت يمـة
مروان
ماريدج تعتذرين، اريدج تعرفين شكد هذا الشي ضوجني حتى ماتسوي مرة ثانية لا اكثر ولا اقل

هزيت راسي بدون مـا اباوعلة

لزمني من چِتفي و ودارني الـة

مروان
مشتاگلج شني ما مشتاگتلي

روان
هه هوَ انتَ شخليت مروان من اول ماشفتك وانتَ نازل علية

مروان
والعباس حرگتي گلبي، لحد هَسة انة گلبي محروگ
كافي لا تبچين تدرين بيـة ما يطيني گلبي اعليج

اخذني وحضني بـ قوة دموعي صارت تنزل على چتفة والدموع تحولن لـ شهگات شي شي

مروان
اشش كافي لا تبجين كافي انة يمج وانتِ يمي وماكو شي يفرگنا بعَد ولا ايّ قوة تگدر كابوس وخلصنـا مِنة ..

كعد وجرني بحُضنة كعدني وهوَ يمسح دموعي وينشف وجهي بـ اصابعةر

مروان
ماريدج تبجين ابد منا وجاي ماكو شي يستاهل يخلينا نضوج اعليّ، خلي حياتنا تكون عِبارة عن افراح وبّس، وايّ شي ثاني ماريدة ..

حضني بقـوة بادلتة بالحضن واحس روحي هستوهـا رجعتلي ب وجودة

حط ايدة عَ بطني وكال
مروان
ابني شلونة، جاي يعذبج؟

روان
نفس ابو كِل ساع ومأذيني

مروان
عمت عيـن ابو لكونة هجي، بس غير هيَ الام ماتكعد راحة
صدك روان بما انه الحمدلله فضينا كِلشي اريدج من باجر نروح للدكتورة وترتبلج مواعيد حتى ترحيلها دوم تجيكين يمهـا خوش

روان
ان شاء الله نروح ونشـوف

مُضى هل يـوم واحنة نشارك بعضنـا اشتياقنـا وحُبنا لبعض وجنـة حيل متونسين بهذا اليوم، اليوم الثاني مروان جاب اثاث ثاني ورجع جهز البيت مَرة ثانيـة، رحنـة للدكتورة والحمدلله كالت الجَنين وضعـة بخير

رجعنـا بسرعة حَتى ما نطول على الحجـية، لكينـة كوكي مسوية عشا وكاعدة يمها يعني ماعندهـا شي بس لكيناهة بحـالة موزينة وكاعدة وتبجي

سئلنـاهة شبيج جاوبتنـة بصوتها الخافت وهيَ تبجي
فضيلة
اجاني دحآم بالحلِم يكلي انة السبب بـ الصار بولدي يـ مروان

مروان
مافهمت حجية شني يعني ؟

فضيلة
من جدك حمدآن مـآت الله يرحمة جانت وصيتـة جبُر يصير شيخ مجانة مو دحآم، ونفس ماتدري دحآم جان اكبر من عدة

فَ هوَ حطهم ثنينهم وكبل لا يموت كال الهم اريد الشيخة لـ جبر مو لـ دحام لانه اعرف بس كام دحام وحلف بالقران انُ كلام جبر مو صحيح والشيخة ابو اطاهيا الـة

هذا الفعل محَد يدري بي اعلى فراش الموت بالمستشفى وكاليا دحآم بس شني الفايدة يـا يمة ماهوَ دمركم بي

مانصدمت لمن عرفت لان جدي اساسًا مسولفلنة ب الي صـار والكِل يدري، بَس الي انصدم مروان لان كِل ظنة حجي ابو جـان صحيح وجدي الجان يجذب ..

فضيلة
عوف الشيـخ يمروان عوفهـا هاي لعنة اعليك اجاني دحام وهو يكلي الشيخة مو النـة، عوفوا الشيخة لصحبناهة يَ مروان خلي هل لعنـة تروح عنّة يكفي الي فقدنـاه يَ يمة

مروان يسمع من عندهـا وهوَ مصدوم، ماحجة ولا حرّف وخلة وطلع

ضـل بالنـا عليّ خابرتة ردت منة مارد لليل كلش يلة رجع وجانت حالتـة تعبانة حَيل ومهموم مو شلـون ماجان

حس بالانكسار بلحظتها خصوصًا كدامي بس حاولت احتوي وكتلة احنـة ولد اليوم ومُستحيل نتحاسب اعلى اغلاط اهلنـا

بس مروان جان ماخذ قرار نهائِي انُ يعوف الشيخة ويعتزلها ..

صدمني بـ قرارة بس كال هذا القرار الامثل النـا، اخلي حياتي تقتصر على عائلتي وبَس ..

باليوم الثاني انطـة الخبر لجدي اول شي وسوة جمعة مِن بعدها وكـال للكُل بهذا الشي، الكُل انصدم بـس هوَ جان مُصر ع قرارة ونِهى كلامـة بـ ( لو تردون امشي نفس ما انة امشي فَ انة شيخي راح يكون شيخ جبُر ومن اليوم اعلن انتمائِي وياهُم )

هذا الشي صِدم كل اهلي تقريبًا محد يدري بالسبب وشلون وليش بس محد ظن بهل سهولة هـاي مروان يتنازل عن كِلشي

هواي حاولوا يحجون ويا من ناسة يقنعون بـس هوَ جان قافل اعلى هالشي، واكثرية الناس انحازت ويـا لجدو ..

مروان كروس اغلبيـة وقتة النة، وحب ينعزل عن كِل العالم الخارجي ويضل بس ويـانا ..

ومع مرور الأيام، صارت لحظاتنا عادية بحلاوتها، بس كل لحظة عدت صارت أعظم ذكرى. مروان صار يُغرم بية أكثر من أي وقت مضى، وكلبي بدة يعرف شكد هوَ ينتمي لـ مروان وشكد جان راغبة ..

ضحكنا، تعاركنة ، ورحعنا ، وكل همّ أو ألم صار بعيد، كأنّه ما كان. صرت أعرف أن الحب الحقيقي مو بالكلمات الجبيرة، بل باللحظات الصغيرة اللي نشاركها سوا.

عرفنـاه بالسونـار انُ الي جاينـا ولد
الفرحة جانت مو طبيعية، وكلبنا ضل ينبض بسرعة، والابتسامة ما فارگت وجوهنا طول اليوم، كأن كل لحظة صارت مليانة معنى. كل نفس صغير منه جان يذكّرنا بالقوة، بالحب، وبالحياة اللي ما توكِف عن العطاء ..

مضت الايام وصـار وقت الولادة ورزقنـا الله بـ ( أيهّم )

لحظة شوفته ما تنوصف، الدنيا صارت كلها نور، وكل تعب السنين صار يسوى لحظة واحدة من هالحياة الصغيرة.

عيونه زرك، ونظراته البريئة تنقل فرحة مو طبيعية، ابتسامته الصغيرة تذوب القلب، وكل حركة منه تحكي عن الحب اللي ما ينتهي. مروان جان شايلة ويضحك وهو ما يكدر يوصف شعوره، كأن كل السنين اللي انتظرها انطوت بحضنة.

البيت صارت مليان ضحك ودفء، وكل شيء حوالينا صار يحجي عن معجزة جديدة. وكل نفس من أيهم جان يذكّرنا أن الحياة تستمر، وأن الحب الحقيقي يكبر وي كل لحظة، وي كل ابتسامة،و وي كل نظره بريء يملة الگلوب فرح وسلام.

كبر أيهم بسرعة، وصار البيت كله يحجي عن ضحكاته وحركاته الصغيرة. كل زاوية بالبيت صارت تذكر بأحاديثه ومغامراته اليومية، وكل يوم جديد جنة نخوض مغامرة جديدة ويـا

ماجان المُفضل لمروان بَس وإنمّا هوَ جان المدلل مال بيت جبُر، النسخـة الثانية مـال علي، نفس الشخصية، نفس الرجولية، نفس الرعونية، ونفس الجمَال والمعاني حتى بالحركات نفس الشي

وجان هوَ يموت على خـالة و خالة يموت عليّ

من بعَد ما كُبر ايهمومي وشفتة شلـون مُشاغب وشكد تعبني كلت لـ مروان لو اموت ما اسوي بعَد، بس هوّ اصر عليّّ ع انهُ نسوي بنيـة بعّد

وبعُمر الـ ٣ سنوات ل ايهومي رزقنـا الله بـ ثمرة جديدة لحُبنـا ( مودّة )

مودّة اخذت معزت ايهومـي كِلها وصارت المُفضلة يم مروان، النسخة المُصغرة مالتي بشگارهة وعيونـة وكل شي بيها، جان يحطها مروان ويبوس بيها ساعة وهوَ ما موخرها من حضنة، ويخلينـا اني اموت من القهَر وأيهم يضحك علينـا ..

اندكت البـاب بسرعة موطبيعية، عرفت انُ اجـة أيهم من الروضة رحت فتحتلة الباب حضني بقوة وجلب بيـة حيل

ضليت ابوسة واسئلة شلـون جان يومة بالروضة، بما انهُ صار عمرة ٥ سنوات واستحق روض وسجلنـاه

أيهم
موحلوة، بطلت ماريد اداوم اريد انام

من گال هجي ضحگني وطببتـة واني احاول اخلي يحب الروضة بس هوَ جان كارهة مو شلون ماجان، من هسة يكره الدوام لا ربحنـا

كتلة انتظرني عمّا انصي الطباخ واجيك، اجيت لكيتـة مكعدلي مودّة ولاعب جولا بالغُرفة

أيهم
اذا انتِ رجال الزمينييييييي هي هي ماماااااا

متعلم من مروان هل سوالف دومهُم يلعبـون سوية هجي

روان
ولك أيهم انزلللل اختك كام تبجي خل ابدلك تعال

أيهم
ماما العبي وياي حبابة العبي وياي

روان
حبيبي موهسة ننام ونكعد ونلعب

أيهم
ما ما الا هسة مااااا والله ابجي ترة

روان
ولك انة ال راح ابجي ايهم تعبتني تعال ابدلك

ردت الزمة ماكدرت صار يركض بـ انحاء البيَت كِلة واني ورا احاول الزمـة بَس ماكدر قرد ينطنط منـا ومنـا

سمعت صايح مودّة عفتة ورحت الهـا اخذتها ولبدت ورا الباب، طَب ايهومي سديت الباب وسكتت مودة ولزمتـة

ضليت ادغدغ بي ونضحك سويـة بوستة من خدودة و وخرت شعرة عن وجهة وبدلتلة وغسلتلة

كتلة انتظرني اوكلك وهم زبگ مني، اجتني البجيـة بساعتها لان صدك جنت تعبانة وبس اريد اغدي وانيمة وانـام

راح يم بيبيتـة لبد وراها ويباوعلي ويضحك
فنج تلزميني فنج تلزميني

طّب مروان وانة اعيط عليّ وهوَ ولا كانهُ

روان
شوف حل لابنك لو انة لو هوَ ونبي موتني قرد ويكمز

ضحگ مروان وتدنى من يمي عيونـة صارت بعيوني استغرب

مروان
ولج هاي ليش دموعج تلالي بس لا من ايهومي

روان
ايَ والله تعبني اريد انام ماجاي يسمع كلامي

مروان
ولك ايهومي تعال بابا ليش ماجاي تسمع كلام ماما

اجة ايهومي مبرطِم ويكول
ايهم
اف اريد العب شنو هيَ

مروان
بابا انتَ جاي ماتعبان من الروضة العب العصر موهسة عاد، هسة تعال اكل وصلي ويـاي، ونوب ننام والعصر نلعب اوكي ؟

ايهم
امممممم اوكي عجبتني يلااااااا

ضحگ وگمز گمزة عالية بحيث رأسًا تعلك ب رگبة مروان لان جان مدنگ ويحجي ويا

ضحكنا على حرگتة كل احنة
مروان
اعليمن يطلع اعلى امـة نجرة

روان
ايّ مو ابـو عايز اسم الله عليّ

ضحگ و اخذ ايهومي وراح وكلة وتوضوا وصلوا ثنينهم، وطببة للغرفة واني رحت غسلت ماعين وانطيت للحجية علاجهـا ورحت للغرفة، لكيت ايهم ع وشك النوم، اخذت ثوب نوم وطلعت سبحت ولبستة ورجعِت للغرفة

أيهم نايم ومودّة نـايمة ومروان نايم ع الجرباية، اول ماشافني ابتسم وفتح حُضنة ابتسمت ورحت يمـة

ضلينـا نشاقة ونضحك، شوية وگال
مروان
بتج صارت سنتين ما نـاوية تجيبيلنة اخو لايهومي بمناسبة انُ هوَ متعبج حتى يفك ياخة منج ويلعب وي اخـو

من گال هجي فتحت عيوني بصدمة وعطت
روان
مروااااااااان

مروان
اشششش ولج اششش اشاقة الجهال نايمة راح تگعديهم

روان
ترة عُمرك ٤٢ والي يشوفك ميكول هجي يكلك اصغر من ورة سوالفك

مروان
ترة انتِ مو صغيرة ٢٥ سنـة وبعدج بعزة شبابج، انة تاخرت بس انتِ هسة بلشتي تعوضيني ف غير تعوضيني ياعيني

روان
وخر شايب رجليك مدندلة بالكبر

مروان
اها متاكدة انة شايب ؟

باوعتلة والابتسامة صارت على وجهي
الي يشوفة يكول ابن الـ ٣٠ سنة نفس ماشفتة وهو جان ٣٤ سنة كِلشي ماتغير بي ابتسمت وكتلة

روان
احلى شايب بحياتي اصلًا

ضمني الـة وگالي بهمس
مروان
شفتي شلون كلها راهنت اعلى فشلنا، شوفي احنة وين وهُمّ ويـن، حَتى لو القاعدة هجي احنـة نشِذ عنها

روان
سامعة بـ العِمر مجرد رقم، بس هسة جاي اعيشة، لو خيروني مرة ثانية جنت اختارك وبـ ارادتي هم

غمست راسي على صدره، وكأن كل كلمة انطقها تقوي رابطنا أكثر، وكأن كل سنة فرق بينة صارت مجرد رقم ما يساوي أي شيء كدام الحب اللي بينـة

مروان
فصعونتي وصغيرونتي انتِ، اغديلج مليـون الف فدوة

ضحكوا سوا، وكأن كل كلمة بينهم تصنع عالمهم الخاص، عالم كله حب وفرح وسلام. غمروا روحهم بعالمهم الخاص، وكل لحظة تمشي تثبت إنو الحب الحقيقي ياخذ وقته حتى يثبت نفسه، والحب مو بالسن ولا بالوقت، الحب الحقيقي موجود بس بين قلبين اختاروا بعض بصدق.
ودام هذا الحب حقيقي، ماكو أي قوة بالعالم تكدر تكسّره، مهما صار، مهما حاول الزمن أو الظروف، الحب الحقيقي يبقى صامد، قوي، ويدوم للابد .
وهلمرة ماراح نكول يُتبع، لان الحُب الحقيقي
هوَ بحد ذاتة قُصة لا منتهية
تجَدد بكُل يـوم احنة نعيشة
( نخلي الكلام الحلو الهُم هنـا )
__________________

حبايب كلبي وروحي ضروري الكُل يقـرّة، طبعًا اني ردت انزل اوقت بس كتولي بالتليجرام دنقرة فَ اجلت البارت واستمريت اكتِب الكُم، البارت صح طول اسبوع بَس بارت بعتبار ٣ بارتات والله لانُ كُلش طويـل

اقروا حَتى لا تسئلوني شوكت وشلون 📌
البـــارت الجاي حيكون حاوي ع الكُل وكلُهم حيكونون فقرات بالتسـاوي، حاليًا خلصت شَمس و ايلول الاكبر فقرات وختمنـا روان ضلوا الباقين ع فقرة فقرة، فقرات طوال وحلوات ونختم القُصة، يمتى انزلة ع الاسبوع الجـاي ركزوا بدراستكُم وخلوني اركز بدراستي وكل يوم اكتب الكُم ع فراغي، حَدما ينزل احلى بارت ، بارت اطول واحلى من هذا، هذي النهاية فَ يحتاجلها صبُر شويـة . وحَتى تعرفون بـ اخر الاحداث تابعوا قناتي ع تليجرام hudathar
دُمتم بخير ..