رواية بيت حبوبه الفصل الخامس 5 - بقلم دانيا

رواية بيت حبوبه

الفصل الرابع4

بقلم دانيا

قال ليها كلمت زاهر يطل عليكم " طبعاً زاهر دا راجل خالتي الصغيرة" خالي محمد طلع مشى ونحن كالعاده بقينا اتنين بنضفوا في البيت واتنين بعملوا في الفطور وحبوبه بتطرز في غرفة الخياطه .... قلنا الليله البمشي المرعى منو ؟ ضحى قالت انا بمشي قلت ليها خلاص انا بمشي معاكي حبوبه جات قالت لينا الليله الجوا دا كاتم دا اكيد ح تجي مطرة عشان كدا لو مشيتو م تتأخرو هناك تعالوا قبل العصر قلنا ليها سمح قالت لضحى لو شفتي المطر قرب ماتمشو إتجاه الأبيار خلن السقايه تعالن البيت ،، قالت ليها سمح وشيلن ليكن مويه واكل عشان لا تجوعن ولا تعطشن .

طلعنا ماشين الجوا برا كان حار شديد حتة هواء مافي مغطين وشوشنا بطرحنا اول ما وصلنا قعدنا تحت الشجره وخلينا الغنم سحرن في العشب من شدة الحر شربنا كالمويه الجبناها معانا كلها .... جبنا معانا كراسات بنحاول نقرأ ونتعلم الأدونا ليهو في الخلوى " التجويد " وقت حسينا زمن الفطور جاء بس م كان معانا مويه ضحى قالت لي انتي احرسي الغنم هنا انا بمشي على البير بجيب مويه وبجي قلت ليها كويس .

جاء ولد جيرنا من السوق ومعاهو زول جاء دق الباب تقى مشت فتحت ليهو لمن لقتهم ضيوف مشت نادت ليهم حبوبه .... حبوبه من جات في الباب لبست نظارتها وعاينت للزول في وشو عرفتو وشبكتو سلام وبعدين دخلتهم على الصالون الولد قال راجع السوق خلى دكانه براهو طلع فات ،، حبوبه قعدت مع الزول تتونس وبتسأل فيهو عن اخبار ناس البلد ديك وعن الأهل كلهم تقى جات جابت ليهم المويه ... حبوبه طبعاً رغم إنها م بتشوف سمح من غير النظاره لكن م بتحب تلبسها كتير كانت مطلعاها وبتتونس ،، اول ما تقى جات جابت المويه الراجل خلى ونسة حبوبه وبقى مركز مع تقى .... تقى كانت مدنقره ادتو المويه وطلعت طوالي .

انا بقيت قاعده مسافه حارسه ضحى طولت م جات للحظه بقيت بحس كأنو في زول جاي علي او حاجه اتلفتت بسرعه م لقيت اي شيء قلت يمكن بتخيل ..... ضحى بتحاول تنزل الدلو جوا البير فك اعصار جنبها فكت الحبل وبقت واقفه مغطيه عيونها بالطرحه من الغبار لمن الغبار خفى فتحت عيونها لقت ولد شاب يعني بكون في عمر 16 سنه ماسك الدلو في يدو مليان مويه طلعوا من البير مداهو ليها ،، سحبتو منو بغضب قالت ليهو انا قلت لك طالبه مساعده يااللخو ؟ سكت م رد عليها بس كان بعاين ليها جوا ناس راكبين حمير ماشين بي جنبهم واحد قال للتاني لاحوله ولا قوة إلا باالله بلدنا خربت دي مش بت اخت محمد بقولو عليه صعب وم بنطري .... من سمعت كلامهم دا خافت وحست بالأسف هي م عملت شيء هو جاء لقاها واقفه بس المجتمع ما برحم شالت المويه ومشت .

جات مستعجله وباين عليها م رايقه قلت ليها مالك في شنو ؟ قالت لي مافي حاجه دي المويه جبتها اكلي انتي انا م عاوزة ..... قلت ليها عليك الله يااختي لو ما اكلتي زاتي م بأكل لمن شافتني مصره وافقت تأكل قاعدين نأكل سمعنا صوت حركه ورانا اتلفتنا ،، عاينت ليها وقلت ليها دا جابو هنا شنو قمت قلت ليهو انت امس خالي محمد مش قالك م تجي القريه دي تاني ،، قالت لي بإستغراب بتعرفيهو من وين ؟ قلت ليها دا مع ابوهو امس كانوا عاوزين يسرقوا من غنمنا إلا خالي محمد ساعدنا ... قالت لي ورح البيت اصلاً المطر قرب هشينا الغنم جمعنا وقمنا ماشين والود لسه واقف في حتتو م سألنا .

رجعنا البيت لقينا حبوبه مع البنات في المطبخ بتعمل في الغداء جينا مكارم قالت لي مافي واحده تمشي الصالون فيهو ضيف نايم قلنا ليها سمح ... ح نرتاح شويه وطالعين عندنا خلوة الليله حبوبه قالت لينا نومن اخدن راحتكن لو العصر أذن بصحيكن مشينا من شدة ما الجو حار وتعبنا رقدنا كدا غفينا طوالي والغمام غطت الشمس وصوت الرعد شوية وجات مطرة غزيرة صحيت قفلت الشباك وطلعت برا حبوبه كانت بتصلي والبنات قاعدات في البرندا والديوان حقنا مفصول براهو بعيد عن البيت الكبير في ركن الحوش حتى باب الشارع حقه براهو .

جيت داخله البرندة لمحت لي زول في الشباك فجأة اختفى بقيت واقفه ومركزه في الشباك مكارم شافتني قالت لي صباح الخير تعالي مالك واقفه في المطر دا طبعاً مافي خلوة .... جيت قعدت جنبها قلت ليها ااي مافي ،، قالت لينا امي قالوا عيانه لو المطر وقف بدري إلا نمشي مع حبوبه نشوفها قاعدين نتكلم كدا سمعنا صوت صرخه عاليه حبوبه لمن قامت من مصلايتها مفزوعه قالت لينا دا م صوت ضحى؟