رواية بيت حبوبه الفصل السادس 6 - بقلم دانيا

رواية بيت حبوبه

الفصل الخامس5

بقلم دانيا

سمعنا صوت ضحى قمنا جرينا على الغرفه وحبوبه مع المطر والرطوبه كانت رجليها واجعنها لكن كانت ماشه ورانا فجأة وقعت انا وتقى م انتبهنا ليها جرينا الغرفه لضحى قلنا ليها مالك يابت لقيناها واقفه جنب الباب قالت لينا شفت زول كان واقف جنب الشباك وفجأه اختفى ،، مكارم كانت ورانا رجعت لحبوبه قالت ليها حبوبه انتي كويسة سمعنا صوت مكارم بتنادي لينا رجعنا لقينا حبوبه واقعه ومكارم بتحاول تسندها عشان تقوم اتلمينا كلنا سندناها وصلناها السرير كان باين عليها الوقعه مؤلماها قلت ليها حبوبه الواجعك شنو انتي كويسه ؟ قالت رجلها واجعاها مكارم مشت المطبخ تسخن ليها مويه ملح ونحن بقينا متلمين حولها .

مكارم جابت المويه والقطعه بتاعت القماش وبقت تعمل لحبوبه مكمدات بمويه الملح الدافيه قلت ليهم ياريت لو خالو محمد قاعد ضحى قالت لي سمعتو قال وصى عمو زاهر يجي علينا بس شكلها المطره م خلتو والضيف دا نحن م بنعرفوا م بنقدر نتكلم معاهو مكارم قالت ليها حتى لو اتكلمنا م ح يقدر يعمل حاجه عيادة البصير م ح تشتغل في المطر دا ،، حبوبه قالت لينا انا كويسة م تشيلن هم يابناتي .

حبوبه ارتاحت شويه بعد موية الملح دي ونامت ونحن مشينا المطبخ جهزنا العشاء المطر كان وقف مكارم قالت لضحى وتقى نورو الوانيس حقت الحوش وانا وهي مشينا برا الزريبه عاوزة تحلب الغنم وتور للغنم الفانوس في الزريبه .... طلعنا برا الضيف كان واقف في الباب التابع للديوان سلم علينا من بعيد وسألنا من حبوبه مكارم قالت ليهو كزيسه إلا بس وقعت ورجلها واجعاها بس هسي ارتاحت شويه ونامت قال ليها الف سلامه مالكم م كلمتوني نوديها البصير ؟ قالت ليهو في المطر داك البصير م بكون شغال لكن لبكره لو م اتحسنت عمو زاهر جاي وح يوديها .

قالت لي تعالي امسكي لي الفانوس خليني انور الفوق دا للغنم عاينت لي لقتني شارده وم مركزة معاها قالت لي يابت عووك قلت ليها هاااا قلتي شنو قالت لي شارده وين انتي؟ قلت ليها والله يامكارم الضيف دا نفس الزول الأنا شفتو قبيل واقف في الشباك لمن كنتي انتي وتقى قاعدين في البرندا قالت لي هس هسي بسمعك هو البوقفو في الشباك شنو ؟ قلت ليها م بعرف واقفين بنتناقش شفنا زول من بعيد جاي علينا راكب حمار بقينا دي بتعاين لدي قلت معقولة خالو محمد جاء؟

لمن جاء وقف قدامنا قلت ليها دا عمو زاهر جاء سلم علينا وقال لينا خلاص انتوا خشو جوا انا بحلم الغنم وكان شايل اكياس ادانا ليها خشينا جوا مشينا المطبخ قلنا للبنات الحمد لله الله فك حيرتنا عمو زاهر جاء وح يهتم بأمر الضيف تاني ... بقينا قاعدين نتونس لمن جاء جاب اللبن وشال العشاء مشى الديوان ،، ونحن ختينا اللبن في النار وشلنا عشانا مشينا لحبوبه قالت م دايره تأكل م ليها نفس مكارم مشت جابت ليها حليب وقعدنا نتعشى جنبها قلت ليها انتي ياحبوبه الضيف دا ببقى ليكي شنو ؟ قالت لينا والله يابناتي انا م بعرف كل الوليدات القامو في الحله لأنو انا البلد ديك طلعت منها بدري لكن حسب كلامو هو قال هو ولد واحد من اولاد اولاد عمي إسماعيل الله يرحه ،، قلت ليها لكن ياحبوبه انتي صدقتي من كلامه بس ؟ ضحى لكزتني في يدي وقالت لي اجي يااصغر القوم بالغتي عاد كمان القرابه فيها كذب .

مكارم قالت لينها احم عاينا ليها اشرت لينا نظام هس خلن حبوبه ترتاح ،، تقى قالت لينا ورح نتم الباقي في المطبخ عشان الحليب م يفور يتدفق في النار ومكان نعملوا الشاي لناس عمو زاهر قمنا مشينا المطبخ بقينا مع مكارم وضحى نتناقش في الموضوع لمن تقى جهزت الشاي وقالت لينا يلا يالسمحات امشن نادن عمو زاهر يجي يشيل الشاي طلعنا انا وضحى حوشنا الكبير كان منور كأنو القمر طالع الفوانيس منتشره في كل الحوش مشينا في حوش صغير فاصل بينا حوشنا الكبير والديوان وقفنا في الباب وبقينا ننادي لعمو زاهر مرتين م رد لينا .

ضحى قالت لي معقولة م سمع؟ قلت ليها هم مالهم م بتونسوا ؟ تاني نادت ليهو م رد ولا حتى الضيف م قال حاجه قالت لي يمكن من هنا م سمعوا ارح قدام حبه دخلنا جوا حوش الديوان قربنا وبقينا ننادي برضو م رد لينا فجأة قالت لي اسكتي وقفنا بقينا نسمع صوت همهمات متقطعه جاي من جوا كأنوا زول عاوز يتكلم وم قادر ،، بقينا نعاين لبعض وسط حيرة وخوف الحاصل شنو؟