رواية ضغن الهرماس الفصل العاشر 10 - بقلم سارة الحسن

رجع سحب راسي حضني على قلبه وباسني بقوة وهمس: يروح أخوج أنتِ. قاطعنه صاحبه من قال لهارون: أنا رايح. ابتعدت عن هارون، باوعت للولد وهارون جاوبه بضحكة: هاي أفروزي سحارة قلبي. باوعلي هارون وقال: هذا الميرزا. الميرزا: شلونج أفروز؟ أفروز: الحمد لله. هز رأسه مبتسم وقال لهارون: يلا رايح أنا. هارون: ابقى يمنا اليوم شسالفة صفد. صفد: لا يخوي زحمة بس إن شاء الله نتلاقى. هارون: تمام براحتك وتوصل بسلامة.

صفد: الله يسلمك يلا في أمان الله. هارون: الله وياك. سحب جنطته وطلع قدامنا، وأنا وهارون رحنا باتجاه أهلي، أول وحدة حضنته أمي وتبكي لأن هاي السنة كلها ما إجانا وحيل اشتقناله. تقدمت هزراف تضحك وتحكي بلهفة: الحمد لله على السلامة هارون. هارون: الله يسلمج غزالتنا. ضربته بوكس بظهره ونترت به: لا تخجل هزراف هرهووووور. هارون: قبل دقيقة جنتي تبكين عليّ وهسه تركعين بي بوكسات. أفروز: أي صرت قديم بعد. معاذ: رجعوا توم وجيري.

أفروز: شسالفة بابا شو ما تشبهنا غير بحيوانات، اليوم توم وجيري قبل فترة تكلي خفاش الليل وتكول على هارون العتوي شسالفتك ويانا. تقرب هارون وهمس بأذني: أخخخخ الله لو مو أبويا جان حجيت حجاية خليته سنة لقدام صافن عليها. أفروز: يمكن اللي ببالي ببالك. هارون: هههههههههه أي والله. عليا: رجعت البسبسة هم. سحبني هارون حاضني من رقبته ومشانّي ويا وقال: تحملوا دام خلفتوا.

مشينا قدامهم نضحك وهزراف ويانا وأبويا وأمي يمشون ورانا ويحكون علينا بشقة، رفعت راسي على هارون وسألته: منو هذا؟! هارون: صاحبي كنا ندرس سوى وعايشين بنفس الشقة. أفروز: اسمه أصفاد؟! هارون: صفد. أفروز: ليش تقوله الميرزا لعد؟! هارون: أمه علوية يعني خواله سادة واللي خواله سادة يصيحوله ميرزا. أفروز: الله ما يصير يصيحولي ميرزا وأنا أمي مسيحية. هارون: ههههههههه منين لك هلدروب. أفروز: شو حبيت أريد أصير ميرزا.

هارون: هسه نزوج أبويا علوية ونسجلك باسمها وتصيري بنتها وتصيرين ميرزا. أفروز: حتى عليا تهججنا احنا وأبوك والعلوية من البيت. هارون: بيت جساس ما تكدر. أفروز: أقلك شو هذا عيونه حلوة؟! ضربني براسه على راسي بخفة وقال: هسه تغزلي بي بقلبك شلون قدامي. أفروز: وإذا تغزلت هو هم أخويا. ضيق عيونه علي وقال بضحكة: أي صدق نسيت أنت أخونا المسترجل. أفروز: بالضبط هههههههه.

بقينا نحشش ونضحك لما وصلنا السيارة وهزراف بس تضحك، بالعادة قليل تشارك بالكلام بين اثنين وهارون يحاول يخليها تحكي حتى لو ماكو سالفة، من يحكي شي يكللها: مو هزراف؟! وهي تضحك وتهز رأسها بإي، هزراف محد يحسها بنت تركان، كلها تحسها بنت معاذ وأختنا وأكيد هي أكثر شخص حبّاب ولطيف ببيت جساس. رجعنا للبيت وكلهم كانوا موجودين حتى يستقبلون هارون وفرحانين إلا الحيايا أكيد ما يفرحن.

رسول جاب دي جي وشغل أغاني ردح وصار يركص هو وهارون وخيبر طبك وياهم على الخط حسسوني عندنا عرس. بعدها هارون أكل وراح نام وأنا بقيت أحوص أريد أگعده أحس ما شبعت منه، كل شوية أقول لهزراف: أگعده لو خطية. هزراف: خطية هسه تعبان من السفر خلي يشبع نوم وهو يگعد من ذاته. أفروز: أهوووو أريد أحكي ويا شنو هاي. هزراف: بعد ما يروح واشبعي منه. تأفأفت وبقينا ساكتين كلمن عينها بتلفونها، شوية وقالت هزراف: أكلك شو إجه على بالي أدرس.

أفروز: إذا تجيبين طاري الدراسة قدامي أهجج من الغرفة هزراف. هزراف: ههههههه لچ ملل وين أروح. أفروز: قومي نروح يم جدو. هزراف: يلا. نزلنا من غرفتنا دورنا جدي بغرفته ماكو، سألنا عمتي هاجر أم هزراف قالت: موجود بالمكتب. طلعنا عليه للمكتب وسط البستان، وقفنا بالباب ودقيناها بخفة سمعنا صوته صاح: تعال.

فتحنا الباب هو كان دايخابر، أشر لنا بيده ما نحكي شي احنا هم ما حكينا، قعدنا على الكرويتة ساكتين واللي فهمته من كلام جدي كان يحكي ويا عبد القادر. انداريت بسرعة على هزراف وهمست: عزاااا بعيني دايحكي ويا جد فقار. هزراف: وشبيها؟! أفروز: هسه يطلع فقار قايللهم وهمه دايقولون لجدو. هزراف: وهسه شنسوي؟! أفروز: قومي نشرد قبل لا يكمل مكالمته فشلة. ما حكت شي وقومنا ثنينا نريد نطلع صاح علينا جدي: دقيقة أفروز. يمكن ختمت

القرآن يلا انداريت عليه: ها جدو. أشر لي بيده أقعد بمكاني، ورجع يحكي ويا عبد القادر، دفعتني هزراف بخفة ورجعنا قعدنا وهمست لها: هاي شبيه ترا لعبت روحي من روحي. هزراف: ليش شكو؟! أفروز: داحس بمشاعر أنثوية وداستحي إيييعععع فد كرهت نفسي. هزراف: هههه شبيك مو زين حسيتي بنفسك أنثى. أفروز: صعبة حياة الأنوثة هاي شلون عايشة أنتِ. هزراف: ومحد مخجلني غيرج بس تتغزلين بي. قاطعنا جدي من ضحك وقال: شبيجن متعاركات.

أفروز: لا جدو دنسولف بس حتى ما نشوش عليك. جساس: تعالن يبعد جدكن. قمنا من مكاننا تقربنا منه، بستُه من رأسه وهزراف هم وهو يبوس بينا ومبتسم، أشر لي على ثلاجته الصغيرة وقال: أكو حلويات جابولياهن من الإمارات أخذنهن وأنطن لأخواتجن هم. فتحت الثلاجة طلعتهن، فتحت العلبة شكلهن يجنن شلون مرتبات ويشهن، ابتسمت وحجيت ويا هزراف: شوفي هزراف علبة الحلويات صعدت طيارة واحنا بعدنا. ضحك جدي وقال: تردن تسافرن. أفروز: أي والله جدو.

جساس: تدللن يبعد جدكن. هزراف: جدو أخذنا لتركيا. أفروز: إييععع ترا نفسها شمال العراق. باوعت لجدو وأحكي بحماس عبالك صدق راح يسفرنا: جدو نروح للبنان. جساس: وين شايفه لبنان أنتِ وتريدين تروحيلها. أفروز: هارون قال حلوة وراح العام سفرة إلها والسنة هم يريد يروح. جساس: ههههه صار. هزراف: جدو عود صدق تاخذنا؟! جساس: لا جدو أقشمر عليكن. أفروز: أول مرة أحس بشعور اللي يصير قشمر.

ضحكوا هو وهزراف، وهزراف واقفة ورا جدي وبس تحرك شفايفها فهمتها تقول مثل رؤيا، وطقيتها بضحكة بقى جدي صافن لأن الموضوع ما يستوجب هيج ضحكة. قعدت على طرف المكتب وشايلة علبة الحلويات بيدي أكل وأحكي ويا جدي وماخذتنا السوالف، ما حسيت غير على هزراف من قالت: كافي حلويات هسه معدتك تتخربط. باوعت على العلبة يمكن آكلة نصها وأنا ما حاسة على نفسي، نفضت يدي وخليتها على جهة وجاوبتها: أصلاً مو طيبة هي.

جساس: ههههههه ولچ يا جدي لو طيبة جان شسويتي لعد؟! أفروز: قول بالعافية جدو. ضحك وقام من مكانه وقال: بالعافية يبعد جدج، تعالن نرجع للبيت يلا. رجعت شلت علبة الحلويات وهمه ضحكوا وطلعنا راجعين للبيت، كان وقت غروب وهارون لسه ما قاعد. نطيت العلبة لهزراف: اخذيلنا منها خليهن بغرفتنا والبقية انطيها للبنات حتى لا يقولن ما أكلنا منهن. هزراف: ههههههههه هي شباقي بيها راح أنطيها كلها إلهن. أفروز: بعد حصتك حبيبتي أخذيها وضميها إلي.

ضحكت وهزت رأسها بقبول وأنا عفتها وصعدت لغرفة هارون، دقيت الباب ألف مرة وماكو صوت، تالي فتحت الباب ودخلت، نايم ولا عبالك كان أحد يدق بالباب. تقربت قعدت يم رأسه وهمست بأذنه: من هو ربك؟! كررتها مرتين بأذنه، انقلب على ظهره وفاتح عيونه يباوع لي بس الغرفة ظلمة، رجعت همست: ما هو دينك؟! تفر من مكانه ووقف وصافن عليّ يريد يستوعب، ما أدري شلون سيطرت على ضحكتي على شكله، وقفت يمه وعطت بي: من هو نبيك؟!

هارون: أعوذ بالله من الشيطان الرجيم، بسم الله الرحمن الرحيم، لا إله إلا الله. قام يخبط مي ودهن وأنا انفجرت من الضحك، وهو شغل الأضوية وبقى واقف يباوع لي مصدوم. تقرب عليّ لزمني من ملابسي ونتر بي: شقد جنت عار من جنت أشتاق لك، امشي اطلعي برا وإذا دخلتي غرفتي بعد رجلك أكسرها. هو لازمني من ملابسي يسحب بي وأنا حاضنة يده ما أريد أطلع وأضحك عليه: شبيك هرهووور مو أنت المؤمن الصالح على شنو خفت.

هارون: دنقبي انقبي جايني منكر ونكير وتريدني ما أخاف. أفروز: شبيك هرهور مو اشتاقيت لك. هارون: انجلطت ومتت من ورا هاي الهبطة عود شيفيدني اشتياقك. أفروز: أهووو لا تصير نفسية عاد. هارون: شتريدين هسه. أفروز: أقعد أريد أحكي وياك من إجيت لهسه نايم. هارون: أغسل وأنزل انقلعي هسه. أفروز: خمس دقايق إذا ما نزلت أرجع أصعد لك. دفعني قدامه وقال: امشي امشي شهل بلاء هذا. طلعت من يمه وقفت يم الدرج انتظره، طول يلا طلع،

من شافني واقفة ضحك وقال: خيييير؟! أفروز: أنتظرك حبيبي. هارون: تكدرين تنتظريني جوة ترا. ضحكت ورفعت له حواجبي هو ضيق عيونه عليّ وقال: لااااااا. أفروز: بداعة هناء. هارون: لااااااا. أفروز: بداعة أريج. هارون: استغفر الله شهل لعبان نفس. أفروز: چؤ ما أسمح لك تحكي على عمتي هرهور. هارون: ليش تخليني هسه أشعل جدها السابع عشر. أفروز: أشعله براحتك وهسه يلا تعبت وأنا واقفة. ضحك وتقدم نزل درجتين ونطاني ظهره وقال:

اصعدي يا بلااااااء اصعدي. قفزت بسرعة على ظهره أضحك ونزل بي الدرج شايلني، دخل للصالة كلها كانت موجودة وهو صاح: السلااااااااام عليكم. الأغلبية ردوا السلام بضحكة والبقية من ورا خشومهم يعني الحيايا، قال عمي جاسر: مزعطة روحها صغيرة أنتِ وشايلك على ظهره. هارون: أياااااابة هاي منو دايحكي؟! شبيك عمي غير هاي النفس. هز إيده وكال: "نكدر نحكي ويه ولد معاذ إحنه؟ معاذ: شبيهم ولد معاذ شمسوين؟

عمي جاسر جان متنرفز، مدري شبيه، كام من مكانه أشر علينه ونتر بأبويه: "هاي كل المصايب من جوه رأسها وذاك الجبير لسانه أطول منه." جساس: كاااافي جاسر، صغير أنتَ مخلي رأسك براسهم. جاسر: ما يوم كلت لواحد منهم كافي، لكافي بس ع جاسر، مو ولدك إحنه ملفينه من الشارع وما ندري؟

تلاغوا بيناتهم وهاي مو أول مره، ع طول هيج يسوي جاسر والسبب من كد ما تنحش بيه هناء وتزن براسه ع ولد معاذ لإن ما تحبنه لا أني ولا هارون لإن ما نسكت ع سوالفها. كل هذا وهارون شايلني ع ظهره وواكف يباوعلهم وهمه متلاغين أبويه وعمي جاسر وجدو وعمي أكثم يهدي بيهم، وعمتي أريج توزع ابتسامات ما مصرفلها الوضع. همست لهارون: "أحسك مشتاق لهل عركات شو متابع بتركيز." هارون: هسه همه نغثوا من عدنه وتعاركوا مشيناها، عمتج ليش تضحك؟

آفروز: هي شتريد لعد؟! غير تخربنه وخاصة ويه جدي. هارون: عمج جاسر أكبر أغم بهل دنيا. سندت رأسي ع كتفه وجاوبته بحزن: "دثو خطيةةةةةةةةة." ضحك بصوت عالي وصارت البيت هدوء، كل الأنظار علينه وكالت هناء: "طلعنا للخارج يدرس يتثقف، رجع هتلي وبدون أدب." هود: "هتلي لو قوري؟ هو حجاها وكلنه ضحكنه، بقوا عمامي وجدي صافنين علينه، نزلني هارون من ظهره وكال بصوت عالي: "عيني بيت العايش.... قاطعه هود وكال: "راح نصير بيت الميت." رسول:

"ميت أنااااا ما بي مشاعر ميت أنااااا بلا حب ولا بشر." ما خلى جدي يكمل أغنيته وضربه بعود الخيزران طفره من مكانه واندار ع هود هم ضربه وحده ورجع ع خيبر وهارون. أني صرت وره هارون مسويته درع إلي، ما حسيت غير انسحب هارون وانضربت بعودة الخيزران عطت عيطة ليكول وحده داتطلگ. صاح هود من مكانه: "لااااا جدي شسااااالفة؟ جساس: "كلكم سرسرية وطالعه عينكم من الدلال، والله لما يجر عدل منا وهيج يتغدى ويتعشى كتل بهل عودة."

هارون: بالله ذوله أحفادك صار 5 سنين يمك ما تذكرت تحاسبهم إلا من رجع هارون؟ رجع جدي فجأة وضربه مره ثانيه وصاح بيه: "ما بيكم واحد براسه خير وعاقل من أكثم ليونس، واحد أجلب من الثاني." يونس أخو هزراف عمره 5 سنوات، ضحك عمي أكثم بهدوء وكال: "رحم الله والديك حجي." من كد ما نرفزه عمي جاسر رجع علينه كلنه رزلنه وضربنه ودار وجهه يريد يروح لغرفته وكف واندار ع عمتي أريج وصاح بيها: "أنتِ هم الشعااااارة، احترمي نفسج وخليني محترمج."

جانت مبتسمه ومخليه رجل ع رجل من صاح بيها جدي اختفت ابتسامتها وعدلت كعدتها مصدومة وكالت: "ياااا أني شكو؟ جساس: "كلهم ماخذين عرامتج." هناء: مو يكولون العرج دساس. جساس: "اششششش، أنتِ صرتي آدمية هسه، ما بيكم واحد آدمي زبااااااااااايل." إحنه كوه لازمين ضحكتنه، بس دخل لغرفته انفجرنه نضحك، باوع علينه جاسر وتفل علينه وراح لغرفته. حضني هارون من أكتافي وكال: "طيرلنه كم واحد بعد خل نتعشى براحتنه." آفروز: يمه هذا شبيه جدك؟

هارون: شو تسأليني غير أني أسألج، طلعتوا مطفرين روحه وساكت. هزيت إيدي ورحت كعدت يم أمي بستها من خدها بقوة، كالت أريج: "دكافي لواگه مو لعبت نفسنه." معاذ: هي وأمها لو هم ضارتكم بشي؟؟؟ أكثم: يابه صدك جذب عوفوا البنية بحالها شمسوية هي؟ أريج: مالها داعي 24 ساعة تبوس وتحضن كدامنه. آفروز: تردين أحد يبوسج عمه؟! أريج: إييييعععع بحال بوستج أني. هارون: "غير عسل، تعالي آفروز بوسيني."

دنى رأسه يمي وأني ضحكت وبسته بقوة وبقوا الولد يصنفون عليها وهي خلصتها علينه إيع وإيع. تعشينه بدون جدي وعمي جاسر، وبعدها كاعدين كل اثنين لو 3 ع جهه، كاعدين أني وهزراف اجت أمي أشرتلي بيدها وكالت: "تعالي ماما عندي موضوع وياج." لزمت إيد هزراف بسرعة وجاوبتها: "نجي أني وهزراف." ابتسمت وكالت: "تعالن." رحنه وياها لغرفتها كعدت وهزراف يمي ولازمة إيدها من كلبي حسني بموضوع أمي شنو، هي ابتسمت وكالت:

"يعني ما يصير نحكي حجاية بين أم وبنتها؟ آفروز: هزراف هم بنتنا. هزراف: راح أطلع أني وإنتوا أخذوا راحتكم. عليا: اكعدي ماما أشاقه وياجن مو غريبة أنتِ. بقت كاعده هزراف وأمي اجت كعدت يمي وصارت تمسد بحنيه ع شعري وكالت: "بنيتي الحلوة كبرت وصارت العين عليها." هزراف: عمه قصدج ابنج الثاني كبر وصار يجيب العين. عليا: هههههه عين الله تحرسها مليانه أنوثه. آفروز: "شو حسيته بسمار."

عليا: لا ماما ليش بسمار وين اكو بجمالج ورزانتج وأدبج. ابتسمت ع كلامها وسكتت وهي كملت كلامها: "اليوم أبوك حجه ويايه وكال متقدملج ولد ابن عائلة ومن ناحية أبوك مقتنع ويكول الولد خوش ولد وابن أصول وحجه ويايه وكال شوفيها شدكول." هي تحجي وأني كلبي صار ديسكو وحتى بطني مغصتني، سألتها هزراف: "عمه إحنه نعرفه؟! عليا: لا عمه هو أبو ويه عمج معاذ يداوم. هزراف: ياااا عبالي....

عصرت إيدها حيل عرفتها راح تجفصها وإحنه جنه متوقعين الداتحجي عليه فقار، كالت أمي لهزراف: "عبالج شنو؟! هزراف: هاااا... عبالي نعرفه. نظرات الشك جانت بعيون أمي وكالت: "لا ما تعرفنه." آفروز: المهم هسه ما أريد ماما كليليه ما موافقه. عليا: انطي صبر شفتهمتي منه أنتِ ورفضتي. آفروز: هو لإن ما أعرفه ولا مفتهمه منه شي فما أريد. عليا: فكري ماما أبو الولد خوش رجال وصيته معروف وأكيد ابنه مثله.

آفروز: مو شرط ماما خمو كلمن أبو زين معناها أولاده زينين. عليا: أبوك يعرفه ومتأكد منه لو ما متأكد ما يحجي. آفروز: بس هم ما أريد. عليا: فكري اليوم ع راحتج لا تتسرعين وباجر أرد الجواب الأكيد لأبوك. آفروز: تمام. ابتسمت وما حجت شي بعد وإحنه كمنه طلعنه من يمها كالت هزراف بهمس: "عزا ردنه ننفضح وأني عبالي فقار."

آفروز: "مو هنا السالفه، هسه إذا أجه فقار وخطبني وأني قبلت أمي راح تكول لعد أنتِ تدرين وجنتي تنتظري ورفضتي ابن صاحبه لأبوك." هزراف: عزااااا إيييييي هاي شراح نسوي لعد؟ آفروز: "نعيش دور الهبلة لكل شي ما تدري ومن تسألني أبقى أكللها هاااااا وهي تغلس." هزراف: زين كولي لفقار لا يجي هسه. آفروز: شتحسييييييييين؟ هزراف: أحس بحيرة. آفروز: "هههههههههههههه دخلتي كلبي لإن تافهه."

ضحكت وسكتت وخلص اليوم طبيعي، ثاني يوم العصر جانت عمتي أريج كاعده بالحديقة وتلفونها بيدها، وأني جنت أرش الورد بالصوندة. كملت وشمرتها ع جهه ورحت لعمتي أريج حجيت وياها مبتسمة: "شلونها عمتي الغالية؟ رفعت عينها عليه وعوجت حلكها ورجعت عينها بتلفونها، كعدت مقابلها وحجيت وياها: "من جنت أداوم بالمدرسة البنات يسألني ع منو طالعه أنتِ فـ أني بدون تفكير أكللهن ع عمتي أريج حبيبتي." أريج: شتخربطين أنتِ شجاب طاري الموضوع هسه.

آفروز: غير داسولفلج شلون متفاخره بيج. أريج: ما يشرفني أصير عمتج بس الوكت أغم وخلاني عمتج. آفروز: هسه راح تصير عمتي ع سن ورمح. ضيّقت عيونها عليه وكالت: "شقصــدج؟! آفروز: باجر تعرفين. ضحكت وكمت من يمها صاحت ورايه بقهر: "والله أكسف أحوالج إذا سويتي شي چلبة." طنشتها ورجعت للبيت، بالليل جدي صاح لأبويه وأمي وأني وهارون لمكتبه كال أبويه: "خير حجي اليوم رايدنه؟ جساس: كل خير وليدي ردت أحجي وياكم بموضوع يخص آفروز.

حجاها وابتسم وأني جمدت بمكاني وين صايره هاي يحجون كدام العروس ويكلولها راح يخطبونج ما يفكرون بمشاعرها الأنثويه تهيج. هارون: شمسوية مصيبة؟ آفروز: اكو أمور ثانية غير المصايب ترا. هارون: مو أنتِ اسمج آفروز كلوتة. آفروز: محد كلوتة غيرك يا كلوتة. عليا: شبيكم ماما خلوا جدكم يحجي هسه. سكتنه وجدي يضحك علينه وإحنه واحد يخزر بالثاني، الكلوتة اللي تسوي انسداد بشريان الدم وتسبب جلطة للشخص. معاذ: احجي حجي ما عليك منهم.

جساس: "عبد القادر حجه ويايه وطلب إيد آفروز لفقار ع سنة الله ورسوله." بلعت ريكي مرتبكة وجدو يباوعلي مبتسم وكمل كلامه: "فقار خوش فقار وتعبان ع نفسه وشغله خير من الله وما يعيبه شي وحتى بيت عنده راح يعيشون وحدهم.... قاطعته أمي وكالت: "ما أنطي بنتي لـابن أريج." اختفت ابتسامة جدي ونتر بيها: "وشبيها أريج؟! عليا: عمي بنتك وتعرفها شنو ما يحتاج أكول. معاذ: شهل حجي عليا.

جساس: "أول شي أني منطي لابن حامد وحفيد عبد القادر، وثاني شي إذا سمعت كايلة هل حجاية مره ثانيه لا تلومين إلا نفسج أم عون." عليا: العفو منك عمي أعتذر، بس أني ما قابلة ع هل الزواج. جساس: صح أنتِ أمها بس مو أنتِ اللي تقررين هل شي. بقيت حايرة بين كلبي اللي يريد فقار وبين كسرة خاطر أمي، لإن إذا قبلت وأمي ما قابلة راح تضوج وتنقهر أكيد. معاذ: كولي يا الله عليا وشبيه فقار؟

عليا: ما كلت بيه شي بس أني ما أريد أزوج بنتي هسه أريدها تكمل دراسة. جساس: أكيد راح يخليها تكمل دراستها وموافق ع كل شروطها. هارون: "طلع عركة هذا مو زواج،" اسمعوا موافقة آفروز بالأول واتعاركوا. عليا: مو عركة بس اني مموافقة. اندارت عليه ونترت بيه: إذا قبلتي ليوم الدين ما راح أرضى عليكِ. بقيت صافنة عليها ما عرفت شحجي وشجاوبها، نتر بيها أبويه: كاااافي علياااا هو هذا حجي. جساس: اطلعي برا أم عون. حكاها ودار وجهه،

رادت تحجي أمي: اسمعني عمي. جساس: كااافي اطلعي برا ما أريد أفقد أعصابي عليكِ، وهاي الحجاية خليها ترجيه بأذنكِ، الشخص الوحيد المسؤول عن آفروز هو اني، لا أنتِ ولا أبوها ولا أخوها مسموحلكم تدخلون، بس اني احترمتكم ونطيتكم أكبر من حجمكم يوم قررت آخذ رأيكم. معاذ: اعذرها حجي. هارون: شسالفة ترا اللي راح تتزوج آفروز مو أنتو حتى هيج متعاركين، القرار الأول والأخير لآفروز. معاذ: بابا آفروز شنو رأيكِ أنتِ؟

رفعت عيني ع أمي خازرتني وهزت راسها بلا، ضحك هارون وقال: حتى إذا البنية موافقة هم نخَلَسَت من نظراتك علولة. اجتني الضحكة بس إذا ضحكت صدق راح أصير تافهة، بهيج موقف وإحنا نضحك، دنكت راسي ولميت شفايفي قُوة سيطرت ع نفسي، قال جدي: احجي آفروز ما عليكِ بأمج. بقيت حايرة شجاوبه أريد وما أريد لخاطر أمي، سكتت ما جاوبته، قال أبويه: احجي بابا ليش ساكتة؟ دسني هارون وهمس بضحكة: بطلي سوالف البنات طلعي جعفر اللي بداخلكِ.

ابتسمت وكرصته من ظهره، ابتعد عني يضحك، رفعت عيني ع أمي نفس الخزرة، باوعت لجدي وجاوبته: إذا أمي قبلت اني موافقة. هز راسه وقال لأمي: ها أم عون. بقت ساكتة أمي، ضحك هارون وقال: يابة البنية تريد زوجوهاااااااا. معاذ: بس سد حلكك أنتَ. ضحكت وتقربت همست لعون: يابة زوجوني شنو هاي؟ هارون: عرفتكِ عار وحق النبي هود. آفروز: أخخخ ذكرتني بهود، غير تجيبوه ويّاكم ينطي رأيه. هارون: هو أنتِ العروس محد ماشي برأيكِ يمشون برأي هود عود.

جساس: إذا خلصتوا بسبسة اطلعوا برا عوفوني ويّا أهلكم شوية. هارون: خلونا نسمع ليش نطلع. جساس: أنتَ عود الخيزران ما لاعب ع ظهرك زين. هارون: البارحة لعبته عليه جدي هي يومية. جساس: قوم خذ أختك واطلع يلا. هارون: صار. قام واني قمت ويّاه، طلعنا وسدينا الباب، وكف وقال بهمس: تعالي نسمع شيحجون. آفروز: راح أرجع للبيت اني. سحبني من ايدي لزقني بالباب وقال: انجبي من شوكت صرتي مو فضولية، اسمعي وانجبي.

ضربته برجله بقوة، قوة كتم صوته وغلس وبقينا واكفين نسمع، واللي فهمناه جدي مستقتل ع فقار وفرحان لأن يريد يتزوجني، بس أمي جانت ما قابلة لأن ابن أريج. سحبت هارون ع جهة من سكتوا وهمستله: سمعت ماما شدكول؟ هارون: هنه هواية يا هي منهن؟! آفروز: تقول أريد بنتي تخلص دراسة وهي البارحة جانت تقنعني أتزوج ابن صاحب بابا. هارون: ههههههههه ملعبة مرت معاذ. آفروز: جنة جساس. هارون: هذا ابن صاحب أبويه يمكن ما يعرفكِ أخونا.

آفروز: اي عباله أنثى. هارون: ذاك غريب وما يعرف هذا الأغم فقار شجا. آفروز: لا تحجي ع خطيب أختك المستقبلي هرهور. هارون: مرات تحسسيني اني صديقتكِ مو أخوكِ من كد ما مستفلتة الوضعية ويايه. آفروز: غير أنتَ أخويه هرهووووووووري. هارون: طاح حظكِ وحظ هرهوركِ. دفعني كدامه ورجعنا للبيت، صعدت لغرفتي شوية ودخلت ورايه هزراف وسألت بحماس: شيريد جدو؟! آفروز: قال فقار يريد يخطبكِ. هزراف: الله اي وشصار وشوكت؟ آفروز: أمي ما قبلت.

اختفت ابتسامتها وقالت: ليش؟! آفروز: لأن ابن أريج. هزراف: ياااا خطية شنو ذنبه هو؟ آفروز: ما عرف بقى جدو يحجي وياهم لأن جدو موافق وزعل من أمي لأن رفضت وقالت لأن ابن أريج. هزراف: قلبي وجعني والله خطية فقار هسه ينقهر. آفروز: شسوي شبيدي بعد هاي هم أمي زحمة أكسرها علمود رجال. هزراف: إن شاء الله تقبل. هزيت راسي وسكتت وبقينا قاعدين نطقطق ع تلفوناتنا، لما اجت أمي وعمتي جوري زوجة عمي أكثم،

ضحكت عمتي جوري وقالت: صدقة للكبرت وراح تصير عروس. راحت عيني ع أمي جانت مبتسمة بس مبين قُوة عليها، سكتت ما حجيت شي، كعدن عمتي جوري وأمي وقالت أمي: اني ما أوقف بطريقكِ ماما بس اني أريد لكِ الزين. جوري: فقار مؤدب وزين وهم ما راح تعيش يم أريج، هي راح تروح هناك بعيدة عنها. هزت راسها أمي وقالت بابتسامة: باجر الصبح نطلع نجهزكِ، راح يجون فقار وأهله ورا الظهر. باوعت لهزراف والضحكة شاقة حلكها، ورجعت

باوعت لأمي وسألتها بشك: يعني أنتِ وافقتِ؟! عليا: اي ماما. حضنتها بقوة وهمست يم أذنها: إذا مو من كُل قلبكِ ما أريد هَل زواج ماما. عليا: أريدكِ تكونين سعيدة وما أريد شي ثاني يا روح أمكِ. ابتسمت وبستها من خدها وهمست: لا تقولون لعمتي أريج. عليا: لا تسوين مشاكل وياها آفروز. آفروز: مو إذا قلتوا لها راح تسوي مشكلة ويانا، خلوها ابنها يقلها. هزت راسها وسكتت وعمتي جوري بوستني وباركت لي وطلعت،

قامت أمي تريد تطلع وقالت: جدكِ قال باجر يجون وتعقدون سيد. آفروز: شو بهَل سرعة غير العقد جية ثانية. عليا: هاي ويّا الناس الغربة ماما، فقار هم ابن هذا البيت ودام موافقة أنتِ ما يحتاج نأجلها. آفروز: تمام إن شاء الله. عافتنا وطلعت وهزراف صارت تقمز وتضحك فرحانة ورجعت حضنتني بقوة وتحجي بفرح: أوي أوي أوييييي شكد حلووووين ألف مبرووووووك. آفروز: ههههههه الله يبارك بيكِ. ابتعدت عني وقالت: شراح تلبسين باجر؟!

آفروز: هسه أخمط من تشيرتات هارون الجديدة. هزراف: شوفي آسفة مقدماً بس والله أنتِ أجبرتيني أقول لكِ انجبي. آفروز: ههههههههههههه حلوة منكِ دخلتي قلبي. هزراف: نروح باجر الصبح نشتري فستان الكِ. آفروز: شبيهن تشيرتات هارون هههههههههه. حضنت أيديها ع قلبها وقالت مبتسمة: أووووي أحسكِ فرحانة. آفروز: هي العروس شتسوي لعد هزراف. هزراف: تحمست أشوف شراح يصير باجر. آفروز: راح آخذ فستان أسود مقدماً ع روح عمتي أريج.

هزراف: اي عزاااا والله تنجلط إذا عرفت. آفروز: المهم هسه لا تعكرين مزاجي وفكري شألبس باجر. هزراف: ليش ما نسوي حفلة؟ آفروز: حفلة الي والكِ لأن محد راح يفرح لآفروز حتى ماما قُوة عليها. هزراف: مو بحالهم عادي نحتفل اني وياكِ. آفروز: باعِ اني ما أحب هاي الهوسات وشي نروح باجر نشتري شي بسيط ونقول للبنات هم إذا يردن. هزراف: راح تعرف عمتي إذا حجينا للبنات. آفروز: نقول ابن صديق بابا ههههههههه.

هزراف: عزاااا راح ينصدمون صدمة عمرهن. بقينا نضحك ونقشمر وهزراف منطلقة بـ العادة ما تحجي عليهن بس بآخر فترة سدرة قامت ما تحجي ويايه ورؤيا كل ما نكعد بمكان نتعارك ويقين المخطوبة 24 ساعة تلفونها بيدها ومعتزلة وهزراف ابتعدت عنهن. اتصلت ع هارون أول ما جاوبني حجيت بسرعة: علولة وافقت. هارون: أدري. آفروز: أختكِ راح تصير عروس. هارون: أهلهل لكِ؟! آفروز: وتركص لي هم. هارون: اسمعي لعد.

ما حسيته غير طقها بهلهولة كل اللي بالبيت سمعها، ضحكت بصوت عالي وجاوبته بصياح: لك هرهوووووور دخلت قلبي. هارون: أنتِ دخليني وتطرديني ع مزاجكِ. آفروز: حسب أفعالك حبيبي. هارون: راح نسهر تجين ويّانا؟! آفروز: اي أجي أودع العزوبية. هارون: سويلنا أكل لعد. آفروز: طير والله ما أسوي. هارون: سويلنا حبيبتي شعدنا غيركِ غير أنتِ أختنا الحنونة الحبابة الحلوة اللي راح تتزوج وتعوفنا. آفروز: كافي راح أبكي عليكَ.

هارون: سوي وتعالي بالحديقة. آفروز: صار. غلقت منه وقلت لهزراف إذا تنزل بس رادت تنام، عفتها ونزلت للمطبخ سويت لهم لفات طماطم وخليتهن بصينية وخليت وياهن كلاصات بيبسي وطلعت عليهم. من شافني هارون ضحك وصار يصفق ويغني لي: هلا بيك هلا وبجيتك هلا. شافني شايلة الصينية وفرحان عباله أكل دسم، تقدمت عليه وقدمت له، أخذ له نظرة عليهن وباوع لي وقال: هاي شنو؟! آفروز: أكل حبيبي. هارون: لفات مال شنو؟!

آفروز: أنا البندورة الحمرة مزروعة بلفة هارون. لزم قلبه ورجع لورا وصاح: ولج آفرووووز كلووووتة ناوية تجلطيني. درت وجهي عنه وجاوبته: دروح اكو أطيب من لفة الطماطم أنت الخسران. قدمت لهود أخذها وأخذ كلاص بيبسي وقال: مغزرة بيكِ اللفات الكص والهمبرغر والعصاير مال تالي الليل. آفروز: بسمارك خدش مشاعري.

باوع لي صفح وسكت ونطيت لخيبر ورسول ما حجوا شي غسلوا، كعدت كدامهم وأخذت لفة هارون داريد أكلها طفر عليّ أخذها ونتر بيّ: فوكااااها تريد تأكلها. آفروز: شبيهك غير أنت ما تريد. طنشني وأخذ اللفة قام يأكل، قمت من مكاني سحبت لفة هود وحجيت ويا وع الأساس ماكو شي والوضع طبيعي ولا عبالك ماخذة لفّته من ايده: قوم هدهد أريد أحجي وياك وحدنا. رسول: أسرار العصر العصملي. آفروز: لا تقلدني خوش. رسول: أنتِ الأصل وإحنا صناعة يابانية.

شلت كلاص بيبسي مالت هود ومشيت كدامه وهو قام اجى يمي، وكفنا ع جهة نطيته الكلاص وأكلت شوية من لفة وحجيت بدون ما أباوع له: شوف اني راح أتزوج. بقى ساكت واني رجعت أكل وما أباوع له ما أريد أشوف تعابير وجهه، حسيت عليه مد لي الكلاص وقال: شمخلية بالبيبسي. آفروز: راح أتزوج فقار. قصدي هو يتزوجني. هود: اشربي يا عيون هود، يمكن مصخنة أنتِ. آفروز: باچر نعقد. حسيت عليه شرب البيبسي كله دفعة وحدة وصار يكح وكال:

ولچ يا هو هذا الراح ياخذ أخو؟ آفروز: مو كلنه فقار ابن عمتك أريج؟ هود: شبي هذا شارب نفط؟! آفروز: بانزين لان سريع الاشتعال، بس كتله لا تروح بدون تفاهم اجه يخطب. هود: شصار شلون تطور الوضع هيچ؟! آفروز: ما صار الله وكيلك، هو من كطع بينه هاي الفترة ومن اجه بيوم الي تعارك ابوك علمود الملف واني مدري شبيه ستهترت وكتله لا تروح بس هو راح وكال يومين وراجع اني وأهلي نخطبچ.

وره ما خرطتهن رفعت عيني عليه هو صافن عليه، أكلت من اللفة وحچيت بصوت ما واضح اني وأكل: والله وعيونك هذا الصار واليوم جدو كال راح يجون باچر إذا أنتِ موافقة واني صرت خفيفة وكلتلهم إي موافقة. ضحك وكال: ما أصدك والله، شنو يابه بحلم لو علم اني؟ آفروز: ما مصدك اني راح أصير عروس؟! لو شنو؟! هود: ولچ برغوثه شوكت گبرتي أنتِ وتريدين تتزوجين؟ آفروز: شنسوي الظروف تجبر. هود: ههههههههههه ولچ يا ظروف.

آفروز: شنو لعد گلبي من صار يركص له شيسموها مو ظروف؟ ابتسم بهدوء وكال: الألف مبروك يا عيون هود أنتِ. آفروز: لا تحچي ويايه بأدب بهيچ مواقف والنبي أستحي. هود: هههههههه ألف مبروك حبيبي چعفر. آفروز: الله يبارك بيك عيون چعفر أنتَ. ضحكنه وكال: تعالي تعالي نسهر، هسه تصيرن مخطوبة وبعد ما تتحاچين. آفروز: خطيبي ميقبل أكعد يم ولد بعد. هود: نعال بحلگ خطيبچ إذا يمنعچ من عدنه. آفروز: لا هود ما حبيتها منك، شو أخلاقك منحطة صايره.

هود: مصاحبلي واحد منحط وعلمني. آفروز: أصدقاء السوء. ضحك ورحت كعدت يمهم وهمه چانو يحچون عادي بطاري خطوبتنا والي فهمته خيبر يعرف بس أريج متعرف وكال خيبر: باچر يگلها، ما رادها تسمعها منه ع التلفون. هود: بيها الخير إن شاء الله. بقيت شوية يمهم وبعدها صعدت لغرفتي نمت وثاني يوم الصبح رحنه اني وامي وهزراف للسوگ نشتري ملابس ونجهز نفسنه.

البنات أكيد نطيتهن خبر وكل عقلهن واحد غريب، الي يعرفون بي فقار معدودين، وكلمن طلع وحده يجهز واحنه وحدنه وكالت امي راح تصير حفلة بيناتنه ويجن نسوان هم من أهل فقار. رجعنه الظهر من السوگ وبوجهنه نريد نصعد لغرفتنا، تلگتنه عمتي أريج ع الدرج ضحكت وكالت: مستعجلة ع الزواج. آفروز: إي عمه راح تخلصين مني. أريج: لا أحس البيت راح يصير كئيب ويامن أتشاقه وأضحك بعد. آفروز: لا تخافين، ما تكتئبين حتى واني بعيدة، تأثيري راح يبقى.

ضحكت ورفعتلها حواجبي وصعدت وعفتها وهي چانت مقتنعه راح تخلص مني. بلشنه اني وهزراف نتجهز، لبست فستاني چان نازك وبسيط، شسورت شعري وخليت مكياج عادي طبيعي. صار وقت جيتهم واني توترت والوترني أكثر ردة فعل أريج الي ما معروفه شنو وشراح تسوي. وصل فقار وأهله وصدك چان جايب هوايه عالم، ما أدري شنو داعيهم، شيوخ وسادة وناس كبارية كلها جايبها وجاي، چنه واكفين بالصالة لفوگ اني وهزراف ونباوع عليهم كلت لهزراف:

شو حسسني محد منطي مره وجايب كل هاي الناس دخيلة ع أهلي. هزراف: اني حسيته جاي يتعارك ويانه وجايب جيشه ويا. بعدني ممجاوبتها وصل مسج لتلفوني من فقار: نص ساعة وراح تصيرن كُـل دنيته لفقار. ابتسمت وما جاوبته ونزلنه جوه، دخلوا النسوان الي من طرف فقار والي فهمته چانن عمته أخت أبو وزوجة أبو وزوجات أعمامه اثنين. من شافتهن أريج وكفت وباوعت لامي وكالت: هذن شجابهن؟! جاوبتها فتون عمة فقار: غير خطوبة ابنه لو نسيتي.

بقت مصدومة وعينها تفتر علينه استقرت عليه وكالت: الراح يخطبچ فقار؟! فتون: خطوبة ابنچ وما تدرين شبيچ أريج. عاطت بيه أريج بدون متباوع لفتون: شلون لعبتي بعقل ابنيييييييي يا چلبة. جوري: شهالحچي أريج منا العالم. أريج: أنعل أبو العالم لأبو خيرهم، ولكم هچمت بيتي وهسه تريد تااااااخذ ابنييييييي. باوعتلي وكال بنبرة مليانه غل وحقد: والله ع چثتــي أخليچ تاخذينه، والله ما راح يتم ع هالزواج إلا من تموت أريج.

عافتنا وتريد تروح تطلع عليهم، صار بوجها عمي تركان لزمها وكال: وين وين غير الأمة العربية كلها بره. أريج: وخر عنييييي وخر. تركان: شبيچ أريج شصاير لا تفضحينه. أريج: ولك خطووووووبة ابني وهسه يلاااااا اعرف وفوكاهااااااة من منوووووو من الهچمت بيتييييييي. تركان: أول شي محد هچم بيتچ وثاني شي عيب تطلعين كدام كل هاي الناس، انتظري هنا وهسه أصيحلچ ابنچ وتفاهمي ويا.

دفعها دخلها وطلع وعمتي جوري رحبت بالنسوان الي بقن مصدومات من ردة فعلها وما حچن شي كعدن ساكتات. زوجات عمي كعدن ع جهه وامي واكفه ووجها صار أصفر من الموقف، أباوع ع سدرة واكفه بباب المطبخ ترجف ودموعها بعينها. كُـل هذا واني واكفه ع الدرج بدون ردة فعـل، دقايق ودخل فقار ما باوع ع أي شخص موجود سحب أمه الصارت تلطم ع وجها ودخلها لغرفتها.

صوت فقار چان ما مسموع بس صوت أريج تصيح وتعيط وتبچي، طولوا وهمه جوه وصوتها ما هدأ ومبين دايحاول يسكتها أو يقنعها. دخل جدي سلم بهدوء ع الموجودين وراح لغرفة أريج وصار صياح جدي وأريج هرج البيت وفقار يحچي بهدوء وأغلب كلامه ما مفهوم. دقايق ونفتحت الباب وطلع جدي وفقار يمشي ورا وثنينهم معصبين، طلعت عمتي أريج وراهم تركض وشايله شفرة بيدها وصاحت ع فقار: وحـق السماك فقار يا ابن بطني إذا صارت هاي الخطوبة راح أنتحر وكدام عينك.

اندار عليها فقار والغضب يطافر من عيونه ونتر بيها: كافي رحمة لموتاچ كافي هاي بدل ما تفرحيلي تسوين هيچ ولچ معلعل اني من ذاك اليوم الأكشر لليوم معلعل أبوس إيدچ كافي ارحميني وخليني أشوف دربـي. جساس: تريدين تموتين موتي، محد راح يموت وراچ وحتى فاتحة ما أسويلچ وحق الحق يا أريج أدفنچ بالبستان وأطلع زفـة فقار وآفروز بدل چنازتچ. ما جاوبته وعينها ع فقار تبچي وكالت: أحچــي يا ابن بطني وسندي راح تتزوجها؟

فقار: لو آخر يـوم بعمري هم راح آخذها. أريج: روح يا فقار الله لا يرضى عليك لا دنيا ولا آخرة، وغضب أمك ما يفارگك طول عمرك وعساك لا تهنيت ع فراش يجمعك بآفروز. أحس بطني مغصتني من دعوتها، كلماتها توجع وخاصة ابنها، أي شخص يسمع هيچ دعوة من أمه راح تنمرد روحه مستحيل أحد يگدر يتحمل هيچ كلام.

بس كملت كلامها بدون وجع گلب شگت وريدها وكدامنه كلنه، الدم صار يطافر من إيدها بقوة ووكعت بالكاع تباوع علينه بين صياح التفاجئوا وصرخت ظليل بنتها وصدمة فقار بأمه الخلته جامد بمكانه. ركض جدي عليها وغصة صوته واضحه والرجفة الصابته خلته يگعد گعود ع رجليه يم راسها وصاح بوجع وقهـر وخوف: أريج بنيتي.....