رواية دجن الضليع الفصل الخامس والعشرون 25 - بقلم رهف علي

نبدأ بذكر الله ﷽💛✨

التصويت قلبي ♡

########ضرووووري تقرون التنبيه الجوه ب اخر البارت ضروووري

أشكو إلى الله ما ألقاه من كلَفٍ
ولَوْعَةٍ أحرَقَتْ نيرانها كبدي .❤️‍🔥!

________♡_______

سيلينا : شهكت بصوت عالي وانا مفزوعه من
الي صار شنو هاي منو ماعرف
قيد اديه وأيده ع حلكي سده بقوه
الرعب الي اكلته بهاي الحظه توقعت ماعيش ورى
انهبطت بقيت ارافس بمكاني حتى ابعده
هذا الشخص عني خايفه لا يسوي شي بيه
جان يجيني صوته ب اذني ..

دابـــــــــــــــر : تعانديني ولج هسه اخليج
تعاينين شلون العناد يصير ع اصوله ..

سيلينا : عزززه هذا دابر شكد سغسغي ع كولت رفه شلون يسوي هيج اذا شافنه احد شنو راح يكول
علينا صخخخام
نوب الجو أظلم ماكدر اشوفه ب وضوح بس ع ضوء القمر حركت نفسي بقوه نوب هو لازمني
مقيد حركتي صخام الصخمج سيلي رحتي بيها
اول ما هددني ما عرفت شنو يقصد

ثواني وما حسيت الا عضه قويه بزندي فتحت ع
وسعهن من الصدمه نوب عضته توجع

دابـــــــــر : اردف بهمس ، هاي حتى اتوبين بعد ما تعانديني وهاي عقاب الج لان ركضتي كدامهم ،
رد عض فكها..

سيلينا : ماتوقعت يسوي هيج ابد
اصلا صدمني عضني من زندي وفكي وبعد عني وانا دموعي صارت تنزل لان صدك عبالك عقرب
توجع عضته اول ما بعد عني انا كعدت الحيلي
افرك فكي وزندي اخفف الالم عنهن ودموعي تنزل

رفعت راسي لكيته يعاين عليه و ع وجهة ابتسامه
خزرته ورديت بعصبيه ، انت شلوووون تسوي هيييج
شلون تعضني بعدين منو سمحلك

ماحسيت الا قرب مني وجهه صار بقرب وجهي
بس بيني وبينه مسافه ، رد عليه بهدوء وعيونه
بعيوني ..

دابر : اردف بهدوء ، ارد عليج وما اخليج ي اسألتج ..
شلون اسويها واعضج ف بكيفي اسوي الي يعجبني
اما منو سمح الي ، ف انا الي سمحت النفسي
عندج غير هاي الاسئله ؟

سيلينا : تعصبت منه شبي هذا ، بعدت نفسي شوي
ورديت ، بعد لاتسسسويهاا

دابر : بويه جاي اكلج بكيفي انا

سيلينا : لا مو بكيفك

دابر : جا بكيف منو ؟

سيلينا : بكيفيييييي

دابر : غمز ورد ب ابتسامه تزين ثغره ، هذا زمان اما هسه لا ..

سيلينا : عافني وراح يااا هذا شبي صحت قبل لا ينزل ، تررررى انااا زعلاااانه ..
هو لتفت سريع ..

دابر : نراضي الزعلانين بويه نراضيهم

سيلينا : نزل وانا بقيت صافنه اخر شي وعيت ع نفسي
سحبت المخده وحضنتها ونمت وانا فرحانه
من الحماس كل ثانيه ارفس الغطه
وارجع اتغطى إلى أن اجتي نسرين تصيح ..

نسرين : دخيلك ربي سييلينااا ركبها جني

سيلينا : عاين عليها بطرف عيني ، اشو انجبي لج

نسرين : كعدت كدامها ، شبيج ترفسين الغطه والله اول ما عاينت ع منظرج ردت اطفر واصرخ
اتوقعت راكبج جني كلت شبساع ركبها الجني
وانا ما صارلي هواي  من تركتها لوحدها ..

سيلينا : ضربتها ، حقيره سويتيني مخبله شايفتني كاعده ع الشجره واصيح واق واق

نسرين : نسدت عيونها من الضحك ، خرب يومج جاي اتخيلج مثل القرد كاعده ع الشجره وتسوين بيدج
مثل ما يسون يبوووو

سيلينا : فتحت عيوني ع وسعهن ياااا هاي عليه
والله ماكو قرده هنا غيرج انتِ ياقرده القروده

نسرين : لج اااخ كافي تضربين حيوانه نوب ايدج
عبالك طابوكه

سيلينا : لعد سدي حلكج عابت ، عفتها تلغي ورجعت
تمددت ع الفراش اعاين ع السماء وبالي كله
يم الموقف الي صار قبل شويه
رفعت ايدي خليها ع زندي الحد الان العضه توجعني
شكد خبيت عضني بحركه بحيث ترك اثر سنونه
بيهن حتى ملمسهن واضح تنهدت ماعرف وين راح نوصل بهاي العلاقه اتمنى نوصل الحل يرضينا
لان حرفيا تعبت وهواي هم

رفعت راسي من تذكرت انا ما متوضيه هو علمني
قبل لا انام لازم اتوضى وبعدها اقرا سوره الكرسي
يلا انام لهذا تسحبت ع ضوء الجهاز رحت توضيت سريع ورجعت لفراشي قريت سوره الكرسي وغمضت عيوني ونمت

مرت الايام وانا احوس اريد اتصل بس اتراجع
الحد الان ماخذه موقف منه صح احبه
واسوي اي شي لخاطره بس مو معناها ماعندي كرامه لهل درجه حتى اسحل نفسي علموده
تنهدت كلش مشتاقه اله ولسوالفه وهو هم مشغول
بشغله ماعرف شصاير بي ومنا اخو لهسه جاي يتعالج
وحالته الصحيه مو زينه يراجع بي بايران كل فتره
لان اساسا فتره علاجه هناك صارت من البدايه ولازم
يستمرون هناك ضروري ..

حاطه ايدي ع خدي وانفتح الباب دخلت ماما
ها ماما شبيج ؟؟

ام زياد : كومي حبيبتي صديقتج ريفان جوه
هسه اجتي وتريدج

سيلينا : انا سمعت ب اسمها وفزيت ع طولي ركضت اريد اطلع بس ماما لزمتني

ام سيلينا : لحظه ماما ، لواضح من شكلها بيها شي
حاولي تسحبين منها الكلام يمكن البنت جاي تتعنف
حتى نساعدها

سيلينا : كلام ماما خوفني وانا منا بالي يمها دائما
لان كل ماتجي انا اكعد اقرا الها قصائد وهي تكظيها بس بجي وانا من اشوفها هيج ابجي وياها
تركت ماما ونزلت جوه طايره لكيتها بالديوانية كاعده
اول ما شافتني ركضت عليه وحضنتني
انا لميتها لحضني بس ثواني وما حسيت الا صوت
شهكاتها تعلى
بعدتها عني وانا اعاين بعيونها ، لججج شبيييج ؟؟؟

ماتحجي نوب خبلتني بالزايد بعدين عرفت شمسويات بيها ونوب كاصات شعرها بحيث مسوياتها ولد
كلششش نقهرت ودموعي صارت تنزل من عاينت شعرها الحلو مكصوص 
كسررر ب ايدهن الحقيررررات

من عرفت ب تُليد يريدها انا اصريت عليها تتزوجه
خلاص صح رهبار يموت عليها ومجنون بيها
وهي هم كذلك بس هو هسه متزوج
يعني مايفيد شي وحتى لو طلكو من كال راح يتزوجها يمكن امه تسوي شغله وما يتزوجون
لهذا اصريت تتزوج تُليد وتقبل بي
واصريت ع هذا الزواج
بس هي ما اقتنعت الا ان دخلت ماما
وحجت وياها بس هم ما اقتنعت اخرها تركناها تقرر
لوحدها بعد هذا القرار
بلكت عسى ولعل تقبل اتمنى حتى ترتاح
راحت وراحت روحي وياها حيل خايفه عليها

صعدت فوك بعد ما ودعتها اول مادخلت ما اسمع
الا صوت الرسائل وحده ورى الثانيه
ركضت شلت الجهاز لكيت الرسائل من دابر ..

( شكد خبيثه انتِ )

( لهل درجه هنت عليج حتى ما تراسليني )

( كولي اكو *** خلي اطمن عليه لو حتى هاي
ماعندج احساس بيها )

( كون الزمج شايفه شسوي بيج العب بيج طوبه )

( اخخ الله بختج انا احبج )

( ولج ام راس المحجر ما لان راسج لو بعده )

( بسيطه وين ترحين مني اليوم انا اجي واشوف بنت امها وابوها الي ما تتطلعلي وربي تلكيني
مزروع فوك راسج وبغرفتج  )

سيلينا : اقرا الرسائل وانا ميته ضحك بس من وصلت للرساله الاخيره احس جمدت بمكاني عزه العزاج سيلي
رحتي بيها وربي سريع رجعت اله رساله ورديت عليه ...

( ماكو داعي تجي كول الي تريده هنا )

انتظرت الرد ثواني ورجع اتصل سحبت نفس
وانا متحمسه هو الي اتصل مو اني افيششش
كعدت حتى اقلل من حماسي حتى ما يحس انا متحمسه اله وفرحانه
رديت عليه من طرف خشمي ..

الو ..

دابر : بويه عاش من سمع صوتج ..

سيلينا : شُكراً ..

اندري شكول اله ماسمعت الا صوت ضحكه مالته القويه وانا مثل الهبله مبتسمه ع ضحكه

دابر : المهم عود ليش ما تتصلين شنو مانعجب

سيلينا : لا مو ع اساس انا زعلانه ولازم انتَ تتصل

دابر : انصدم ، هااا خير هو منو الزعلان انا لو انتِ

سيلينا : طبعا انا

دابر : خاف ما تقبلين

سيلينا : لا والله اقبل

دابر : اللهم طولج يا روح ، هو غير انا الزعلان

سيلينا : عيب عليك تزعل مني

دابر : جا انتِ مو عيب عليج تزعلين مني

سيلينا : انا شي وانتَ شي ثاني

دابر : دخيلك ربي الله غاضب ع الشخص الي يوكع بيدجن اطلعن روحه وتخلنه يندم ع الساعه ال....

سيلينا : عطت ، شنووووو تقصد ساعه السوده موو
دابر يعني انا ساعه السوده الي بحياتك مووو

دابر : لججج لا بويه لا ردت اكول الساعه الحلوه
منين جبتي هاي الساعه السوده

سيلينا : ماصدك

دابر : افااا تشكين بيه

سيلينا : سكتت ..

دابر : هسه شنو يابويه صافيه يا لبن

سيلينا : هو انتَ الي خلقت المشكله هي اختي اتصلت عليك وما سوت شي وانا ماردت تتصل وحجت بس كلام طبيعي وانتَ زعلت مني

دابر : و بعد ؟

سيلينا : ماكو بس جاي اكول مو مني السبب

دابر : هاهي بويه انسي انا اصلا طالع مسافر

سيلينا : وين ؟؟؟

دابر : عندي مراجعه ل اخويه من غير العركه الي صارت شوي اطلع وارتاح

سيلينا : ارتعبت ، عركه شنو دابر ؟؟

دابر : سالفه ويه اخواني

سيلينا : غير اعرف شنو ؟ دابر انا بالموضوع مو ؟

دابر : تنهد ، قافلين قفله علي فد مره
اخر شي تعاركت وياهم عركه جبيره
..

سعد : شوكت ناوي تعرس ياخويه 

دابر : ان شاء الله هاي الايام

سعود : يعني نروح نخطبها الك

دابر : رفع راسه وابتسم بهدوء ، اي خويه أريدها اصير ب اسمي حتى ارتاح

سعود : جا خويه تدلل الباجر احنه نمشي
ع بيت اهل زوجه اخوك ونروح نطلب اختها الك
تتزوج وتستقر هم نريد نفرح بيك ..

دابر : لحظه لحظه عن أي وحده تحجي انتَ خويه ؟؟؟؟

سعود : غير ع اخت زوجه اخوك

دابر : ووووين رحت يمعود انا ما اقصدها

سعود : جا تقصد مني ؟؟؟؟

دابر : خويه انا اقصد سيلينااا

سعود : كَطنه وشيلها من اذانك هاي البنت انا ما اخطبهااا الك تريد تتزوج تاخذ اما اخت زوجه اخوك لو وحده غريبه اما هاي البنت ماتاخذهااا مفهوم

دابر : تعصب ، وانااا ما امشي ع هذا كلامك هاي حياتي انا مو حياتك لا انتً ولا اخواني
انا الي راح اعيش وياها كل حياتي
مو انتَ ولا هم لهذا كلامي انا الي مايتناقش بي
كوو انتوا

سعود : اردف بعصبيه ، لك دابررررر شنو تكسر
كلامممي

دابـــــــــــــــر : اسمعني خويه انتَ واخوتي  انا رايح ل إيران ومن ارد انا اتقدم الها واشوف *** واحد بيكم يفتح حلكه
انا الي اريده وانا الي راح اتزوجها انتوا ما الكم
ايد بالموضوع لهذا سدوا حلكم واسكتوا ترى جزعت
ما طلعت حاله فتره وارد ويصير خير ..
...

سيلينا : يحجي وأنا فاتحه حلكي شنو هاي
بس ما صدكمني الا كلامه اخر شي ما اهتميت للباقي ولا بالعركه ولا بالسفر الي اهتميت بي وصدمني كلامه من كال يرجع ويتقدم الي
بقيت ساكته من صدمتي

دابر : ها حبيبي وين رحتي ..

سيلينا : ابتلعت ريقي بهدوء وانا مو مصدكه ، يعني صحيح راح تتقدم الي

دابر : ضحك بهدوء ورد ، وعيونج الحلوات
اول ما ارجع اسجلج ب اسمي وكولي دابر مايسويها

سيلينا : فرحتي ما انطيها ل احد كلش فرحانه
ماعرف شنو اتصرف وهو يضحك عليه
نهيت الاتصال ويا من طلع للمطار حتى يسافر ل إيران
بقى بس انتظره يرجع حتى يخطبني وهيج اكون
تسجلت ب اسمه وصرت بظهر جنسيته
ياربي ما مصدكه ..

طول فتره ما هو ب إيران انا ويا ع اتصال
صح مرات قليله بس يحجي وياي من
يصير عنده مجال وانا هم عاذرته
وماعندي اي مشكله ويا غير بس
شوقي يوم عن يوم يزيد
وفرحتي تكبر كل يوم زاد عني الأمل
بكلامه والطاقه الايجابيه الي ينطيها الي
من يتصل اول ما افتح الخط يرد عليه ..

دابـــــــــــــــر : هلا وكل الهلا لتسوه الاجوا والراحوا

سيلينا : شنو يعني ؟

دابر : شنو هل غباء حبيبتي

سيلينا : يعني انا غبيه !

دابر : جا انا ، جاي اكول تسوين كل الي جانو بحياتي
وراحو والي دخلو حياتي يعني انتِ تسوينهم

سيلينا : بقيت ساكته بس دكات كلبي تزيد وهو
مايسكت يزيد اكثر بكلامه الي سلب عقلي ..

دابـــــــــر : اخ بـــــويه شلـــــون غـــــصن البـــــان الريِـــــان شـــــافي كل جـــــرح بيـــــه

سيلينا : كلش صايره احسد نفسي وخايفه لا يطلع حلم

دابــــــــر : مو زلمه اطلع لو ما نكتبتي بظهر جنسيتي

سيلينا : بعد ما مرت ايام طويله نايمه
والشوق غالبني صحيت ع صوت الاتصال
فتحت عيوني بالكوه من النعاس ملزكات
قريت الاسم مُـــــلاذ عيـــــوني سريع فتحت
الاتصال وكلي لهفه اله اجاني صوته
البي دفو وحنيه ..

دابـــــــــــــــر : بـــــويه جـــــهزي نفـــــسج البـــــاجر
انا داز اخـــــوي ومـــــرته حتـــــى يخطـــــبوج الـــــي

________♡_______

دهليـــــز :-
جَمـــــيعهم سَـــــاهموا فـــــي قَتـــــلي .

بقيت صافنه وانا ادحك ع الدكتوره شنو طفل
شنو راحه عيوني انتقلت لبشار لكيتو صافن عليه وكأن
يريد او ينتظر رده فعلي
اهجس جسمي باد ع هذا الخبر وما توقعت بحياتي
اصير حامل ومن منو من الانسان الي اكرهوا
وما اطيقوا
غمضت عيوني بقله حيله اريد اصرخ
بداخلي الم جثير وصرخه تهز الدنيا
شعور مالو اي نهاية حتى انا هم حرت شنو الي لازم اسوي تا اخلص من هذا الموقف الي انا بي

اتخذت وضع السكوت يحجون وياي وانا ما ارد
الدكتوره حجت هواي وهيَ تحذرني وانا بالي مو
يمها كان داخله بسبات وصدمه قويه
راحت وهم اجوي كعدوني ونزلوني
عمتي لازمتني من ايدي وتمشي بيه
وهو بصفي ماعرف شنو الي يسوي كل شوي
وصايح يمه من هين امشوا ومايتقرب مني يمكن يخاف رده فعلي لا انفجر بي

وصلنا للسياره فتح الي الباب وكال صعدي
انا كأن هو ما موجود حتى ما دحكت بوجهو
صعدت بهدوء وكعدت صافنه
طول الطريق امه تحجي ويا وهي فرحانه
وهو يرد عليها وكأن فرحان بس ما يريد
يبين كدامي تا ما اطلع خبالي عليه هساع

رفعت راسي لكيتوا يدحكلي من المرايا
لفيت راسي بعدم مبالاه وبقيت ادحك ع الطريق
وصلنا للبيت اول وحده تركتهم ورحت لغرفتي
صعدت وسديت الباب
ما اريد ادحك ولا مخلوق ماريد اقابل ولا جنس من البشر
اريد اهجس بنفسي الي اهجس ضيعتها من بيد اديه
وانا مو داريه بيها

كطفت نفسي ع السرير وبقيت صافنه ع السكَف
وبالي شارد يفكر ويفكر ويفكر
ماعرف شنو اسوي
اجت ع باالي سيلي سحبت الجهاز
وتصلت بيها
هي وياي دائما ابد ماتركتني
خطوه خطوه وياي حتى من تركت المدرسه ولا يوم
عافتني الحالي صح هي هم حالتها مو زينه
بس هم تشيل عني من همي وتساعدني بكلامها
الحلو

اتصلت عليها خليتها تقرا الي قصيده الباسم الكربلائي
ماعرف شنو الي اريده حتى ما حجيت وياها
اي شي سديت الجهاز وكطفته يمي وغمضت عيوني ونمت حتى بشار ماعرفو وين راح
استمرت الايام تروح وتجي

واحنه بسنه 2014 الي اكول عنها سنه الخراب
والهلاك سنه التحطيم الي مادحكنا منها الا الدمار
خربت بيوتنا سلبوا ناسنا هتكوا سترنا
اخذوا اطفالنا سبوا نساءنا قتلوا عوائلنا
الطفل يتموا  والمرأة رملوها ، سبوها ، يتموها ،
الشباب غسلوا عقولهم والزمومهم بطابع
الدوله الاسلاميه القذره خسرنا
خساره اكبر من عمرنا اضعااااف

كالعاده كاعده وانا حايره بنفسي الي ما منها اي رجاء
بعدني بلاشهر الأولى ويوم بعد يوم اكره نفسي
اكثر حتى الطفل الي بطني هم كرهته
مو بيدي

بشار واهلو طايرين طيور حياه الروح يجيبوا
الي وانا اي شي ما رايدتوا غير بس اخلص من
هاي الحياه الي عايشتها والله مو بيدي
شي انغصبت بي مستحيل احبوو

دحكتوا دخل الغرفه وانا جنت ابجي
واهجس هساع يلا صحيت ع نفسي
وعرفت خلاص انا انتهيت عبن صرت حامل
مستحيل اتطلك منو
وكفت الحيلي وكفت كداموا انا ابجي وجسمي يرجف رجيف كتلوا وانا بالكوه احجي ..

دهليز : شششوكت ناااوي اطلكني هااا

صفن بوجهي بعدها رد بعدم اكتراث

بشار : مـــــا اطـــــلك

دهليز : فتحت عيوني ع وسعهن ، شششششنوووو !
انتَ تحجي من كل عقلك شنو ما اطلك ؟؟؟
اتطلكني وغصب عنكككك

رفع ايدو راد يضربني وتراجع صاح بصوت عالي

بشار : كتلج ماااا اطلك شنووو انتِ ما تفهمين
طلاك شيلي من راسج
كَطنه وشيليها من راسج
انتِ مرتي وانا ما تخلى عنج واطلكج

دهليز : ضربت ع وجهي وانا اصرخ وابجي ، انتَ
شلون هيج تحجييي هاا كلنا الك من البدايه
واتفقنا شلووون تخون الوعود ليشش انتَ هيج
جذااااب ليششش

بشار : تقرب لزمها من فكها كز ع اسنانه وصاح بصوت عالي ، تردين تتطلكين تا تروحين تتزوجينوا هااا
يولي وتالي وياج تحلمين اعوفج ماخليج
تتهنين بي وانا هين اعتلج بناااري

دهليز : دفعتوا من صدروا وانا النار شابه بصدري
انتَ انتَ اي انتَ واحد جذاب وحقير
ماهجست الا لازم شعري وشد عليه بقوه انقلب
وحش وهو يتصارخ بوجهي
أصواتنا علت واهلو خسفوا الباب فوك راسنا
وهو مو ناوي يتركني كطفني ع السرير وانا منهاره بالبجي
هو رفع اصبعوا ورد عليه بتهديد

بشار : السسسانج ول حيوووانه هذا راسج اطكوا ب ايدي لو عدتيها وطلاك ما اطلك

دهليز : تركني وطلع صاح ب اهلوا وسد الباب
حتى محد دخل عليه وانا دكيت ولطمت
خابرت كيناز وهي تصبر بيه خطيه مابيدها
شي نوب اهجس بيها شي وماترضى تحجي الي
وهيج مرت الايام بالكوه وحاملتها بطلعان الروح

قبل أيام من زوجنا اخوي صارلوا تقريبا 15 يوم من
زوجنا خطيه انطوا اجازه بس 10 ايام عبن
الوضع مو زين ولازم يلتحق واخوي الثاني
خاطب ماصارلو جثير غير شهرين

وبيوم الي صار زواج اخوي
انا رحت وبقيت اسبوع كامل
ماجن رايحه اسبوع كامل جن دهر خبصني خبص
كل يوم جاي ها ماتردين ها ماتجين ترجعين وانا
ما اقبل اريد ابقى هين ماريد ارجع
وهو معاند خاصه بعد السالفه الي صارت
جثير كرهتوا وكرهت نفسي اليوم الي
دمرني بالزايد الي ماقبلوا اطلك وارجع لأهلي بعد ماخلصت هاي الشهرين مال الزواج وطلعلي الحمل صفح

بعد مارجعت للبيت وراها ب 10 ايام من زواج اخوي
التحق خطيه جثير انقهرت

وراها ب اسبوع
اسمع اصوات عاليه جوه
ردت اكوم اطلع انفتح بقوه باب غرفتي ودخل
بشار بس مو بشار الي اعرفوا
هجست كلبي انخطف ماعرف ليش تقدمت
بصعوبه وانا خطواتي بطيئه
وكفت كداموا سألتوا. 

دهليز : شبيك ؟؟

سكت مارد بس نظراتوا جثير بيها حزن
والم انعصر كلبي رديت سألتوا ..

احجي بشااار شنووو صاااير ليش هيج
ادحك بوجهي

بشار : ابتلع ريقوا واردف وهو يدحك بيها بنظرات
اليمه ، دهليز أخوانج ..

دهليز : هو كال اخوانج لو انعصر كلبي بزايد
لزمت ايدوا وانا ارجف ، شبيهمم اخووواني
بششاااار اخووووووواني شبييييهم اححححجي

اريدوا يحجي بس دموعوا تنزل هو انا
حكتوا بجت لو تخبلت اول مره ادحكوا يبجي
لزمتوا من دشداشتوا وهزيتوا ، شبيييهم
لك احجججي ليش تبجي راح تموووووتني

نزل راسوا واردف بصعوبه

بشار : استـــــشهدوا اخـــــوانج دهليـــــز

دهليز : وكفت عن الحركه ، ادحك بوجهوا وارمش
بعيوني اريد استوعب الي كالو
هزيت راسي وضحكت ، شنو تحجي انتَ شنو استشهدوا شجاي تحجي بشار تتشاقه
وياي مو اي اكيد تريد تنتقم مني عبن انا
اريد اطلك منك لهل سبب تريد تنتقم مني
وتخليني ابجي وانقهر موو ؟؟؟
الله يخليك كول هذا شقه ميخالف خليني ابجي
وشتريد اسوي بس كون مو صح كلامك
الله يخليك كوول هذا انتقام مني والله راضيه
كل شي تسوي بيه راضيه الا اخووواني
بشارر الا اخوووواني

بشار : بسسس اهدي شوي حبيبيتي اهدي راح تموووتين ورب العز ما اسوي هيج تا انتقم وربي
انا ما يهون عليه اوصل الج هيج خبر
بس لازم نروح ل اهلج راح يجيبون اخوانج للبيت
شوفيهم اخر مره ماريد احرمج منهم
لآخر مره

دهليز : هو كال هيج لو انا تخبلت صرخت صرخه
طلعت من أعماق كلبي هي صرخه وانا انغمى عليه
بنفس اللحظه ورى فتره من الوقت ماعرف
شكد كعدت لكيت نفسي ع السرير وبشار امو يمي
يدحكون عليه
عمتي تبجي بجي وبشار ساكت وجهو كله حزن
اتذكرت اخواني اهجس انتهيت
بنفس الحظه اخذوني لبيت اهلي
من بعد تعب الطريق وانا كضيته ادك والجي
وصلت لفرعنا لكيت الناس كلها يم بابنا
نزلت ركض حتى وكعت يم عتبه الباب كوموني حتى ماعرف منو
ودخلت انا دحكت اهلي يبجون ويتصارخون
وانا صرخت بعلو صوتي
اهجس احبالي الصوتيه انمردت مرد
كعدت بنص اخواتي وامي كطعت نفسي
من البجي اهجس روحي الي طلعت مو
اخووواني

وراي بشوي وصاحوا وصلووووا
وكفنا نريد نطلع وهم يدخلون بينه دفع مايردونه
نطلع زلم تارسه البرى ترس
واحنه مو بعينه احد بس نريد نلزم اخواني
ونلمهم بحضنا

شوي ودخلو اثنـــــين توابيـــــت البيتنا

وجهي ملختوا اريد الزمهم اريد المهم الضحني
اخواني هذول كسروا ظهري بروحتهم
خلوا التابوت ع الارض واحنه نمنا عليه
ماخلينا لا شعر لا ملابس كلش انتهينا
حضنت تابوت اخوي العريس
بعدوا والله بعدوا عريس
ماصار الو 15 يوم من اتزوج ليش هيج يروح
بسرعه ليششش
واخوي الثاني بعدها خاطب صارلوا كم شهر
وناوي بعد النزول وتهدأ الأوضاع تايتزوج
البنت الي رايدها تكون الو زوجتوا

صرت مثل السمجه انا واخواتي نروح كل شوي
لتابوت واحد من اخواني نحضن بي ونبوس نريدهم
والله نريدهم خلي يرجعون اخواني سندي
وعزوتي راحو بلمح البصر

مابقوهم هواي انتهينا وامي اخخ يا امي
انتهت بين توابيت ولدها الاثنين
الي يسدون عين الشمس بطولهم راحو شباب
وعرسان ما دحكوا شي من حياتهم
لساتهم ب اول الطريق واخذوهم الي ما يخافون الله

اخواني الباقين دخلو ملثمين وحالهم مو احسن من
حالتنا ابوي اخخ يا بويه الي محني الظهر ودمعتوا
مافاركت خدو

شالوهم وطلعوا واحنه نتصارخ
وهم سدوا الباب تا مانطلع وراهم بالشارع

مرت ايام العزاء وكأن اليوم علينا بسنين
طويله ادمرنا دمار نفسي وحياتنا صارت
بلا طعم وصارت تمر الأيام مابيها اي لون
يوم بعد يوم اموت بطيء يوم بعد يوم يزيد
كرهي الهاي الدنيا الي اخذت مني وما عشت بيها
براحه وصرت من تعاسه ل تعاسه اكبر

جـــــاسم كريـــــم
مـــــحمد كريـــــم
( اخوان دهليز  الأسماء حقيقيه استشهدوا ع يد داع11 ) اترحمـــــوا الهـــــم ..

زوجه اخوي من ليلتها صارت حامل
وبقت يم اهلي ما رجعت ل أهلها عبن هي مارادت
تفاركنا وهم احنه ما ردناها تروح عبن فرحانين
بيها طلعت حامل ب ابنو ل اخوي مراح ينسي  وراح يجي ابن يحي اسمه وماينمحي

اما اخوي الثاني الي خاطب ، خطيبتوا بعد وفاتوا
ب 4 أشهر تزوجت ابن عمها طلع يحبها
من زمان اول ما تزوجوا سافروا للخارج
وبعد ما عرفنا عنها أي شي غير انها حياتها حلوه
وعايشه بخير الله يسعدها وين ما راحت ..

دهليز : لابسه الأسود وعيني ع المرايا
ملامح وجهي متعوبه وسواد الي جوه عيوني يوم
بعد يوم يزيد الي فقدوا مو هين
كل فتره افقد شي من حياتي وهاي انا
هساع حالتي اضرب عن الاول
اهلي أخبارهم ماتسر العدو
من بعد اخواني انتهوا وصار الحيل مايجي بالساهل
عايشين بفضل الله ..

اما حالتي صرت عايشه ع امل الذكريات
الي هي تنسيني مر الايام
من فراق اللهيم لفراق اخواني

دهليز : جثـــــير ألـــــم بكلـــــبي
بـــــس ماينحجـــــي  ..

رفعت عيوني لكيتوا يدحك عليه كمت وكفت
كدامو ، شوكت ناوي اطلك
ترى مابيه حيل بعد

بقى يدحك عليه سحب نفس وزفر اردف بهدوء ..

بشار : ترى مايصير الطلاك هساع يبطل عبن انتِ حامل

دهليز : عجل شوكت ؟؟؟؟

بشار : من تولدين يلا يتم الطلاك هسه مايجوز

دهليز : فتحت عيوني ع وسعهن ، شششششنوووو يعني بعد اشههههر يلا اولد نوب ابقى انتظر كل هذا الوقت ؟؟؟

بشار : هز راسه ب اي

دهليز : كعدت وانا كلبي اهجسوا يريد يطلع
امالي نهبطت وصارت بالأرض
جثير تعبت ليش هيج يصير وياي
جثير هل كلام عليه انا..

عفتوا ماحجيت خلي تمر هل ايام
يمكن الطفل مايبقى خاصه انا اهجس ب الام جثيره
بس ما احجي ماريد احجي بلكت اموت انا واخلص

الي زادت الطين عليه بله اتصال
كيناز وخبرها بيوم الي اتصلت بيه وكالت ..

دهليز : احجي كيناز شبيج ليش هيج تتراجفين

كيناز : اللهيـــــم عرف بيـــــج بشـــــار  متـــــقرب الج و ماخـــــذج وعرف بيـــــج
هسااع حامـــــل منـــــو ، دهـــــليزز ..

________♡_______

ريفان : اول ما انطيتها الموافقه طارت من الفرح
عبالك من صدك فرحانه الي وهي كلها
حقد وكره اتجاهي اعرفها تريد تخلص مني
وماتريد ابقى عاله عليها
عفتها وصعدت لغرفتي
ماريد ابجي كافي بجي ريفان كافي الي شفتي منهم
كافي عليج يخليج توافقين حتى تخلصين منهم
وهاي اجتج لفرصه لعندج حتى تخلصين
صح الي صار غصب عني وأنا ما رايدته
بس يمكن هذا الي صار الصالحي

الي مانعني كل هذا الوقت هو حبي ل رهبار
اموت عليه واحبه حب مو طبيعي
واحس كلش خنته بهذا تصرفي اريد طريقه بس تجمعني بي بس ماكو كلها صارت ضدي
واعرف اذا هو وصل اله خبر يخرب الدنيا
وما يكعدها واعرف توصل بيه حتى يضربني لان
سويت هيج شي بس كافي تعبت من هذا الحب
وتعبت من كل هاي السوالف
اريد ارتاح
اريد جسمي يرتاح من الضرب ومن الحروق اريد ارتاح

بنفس اليوم بلغتهم بالموافقه ماستغربت ابد
بالعكس جنت متوقعه تزوجني بنفس اليوم
الهل درجه وصلت بيها من كميه الحقد والكره
الي شايلتهم عليه

بس الي استغربته هو ثاني يوم من الموافقه
طبعا دراستي هنا تركتها حتى ما صح الي
الفرصه اداوم ويومه بنوع عذاب جديده
ادمرت نفسيتي
جاي انضف ثاني يوم ودخلت عليه فاطمه
بسرعه ..

فاطمه : صخام روحي غسلي وبدلي سريع رتبي نفسج
ام تليد راح تجي ..

ريفان : نوب حتى اسمه شلون تنطقه تِليد مو تُليد
حتى لعبت نفسي من الاسم و هو اسمه كلش حلو
هزيت راسي ب اي تركت الماعون من ايدي وصعدت
لغرفتي بدون صوت
غيرت ملابسي وسرحت شعري ونزلت حتى ما خليت
قطره مكياج

ردت ادخل جان تتطلع فاطمه بوجي استغربت من
كال خلي شي ع راسج ودخلي
هي بس امه شبيها هاي ع شنو اتستر
اخذت شال وخليته ع راسي
فتحت الباب ودخلت
اتصنمت بمكاني وانا اعاين ع الكدامي

هذا نفس الشاب الي عاينت عليه بيوم الي طفيت
الماطور ورهبار رزلني بسببه !!!!

ابتلعت ريقي بصعوبه وانا خجلانه نوب
هو نظراته حرجتني نزلت راسي سريع
اسمع امه تهلي وترحب بيه وانا طكني الثول
ماعرف شنو اسوي بقيت جامده بمكاني

فاطمه : ههه البنيه نحرجت تستحي

ام تُليد : ياا ماما ليش تستحين اشو تعالي يمي
حبيبتي تعالي

ريفان : تمشيت وانا رجل اطك برجل
كعدت يمها وهي لزمت ايدي وبقتها ب ايدها وتحجي
وياي

ام تُليد : شلونج ماما ان شاء الله زينه

ريفان : همست بالكوه ، الحمد الله زينه

ام تُليد : اني هم زينه كالتها بضحكه حتى تخفف من الخجل والتوتر ..

ريفان : نوب استحيت شكد عيب ماسألتها وهي
ردت بلطف ابتسمت بهدوء ومارديت

ام تُليد : البارحه ام رهبار درت النا خبر الموافقه
وانا و ابني نريد نسمع هذا الكلام منج انتِ
موافقه ماما بدون اي احراج أو ضغط

فاطمه : ياحبيبه منين يجيها الضغط اكيد موافقه
بنفسها بدون مو صح بنتي ؟

ريفان : اعاين شلون خزرتني بدون محد ينتبه
انا نزلت راسي وهزيته ب اي

ام تُليد : الحمد الله والله جنت متمنيه هل بشاره
والف الحمد الله من صرتي نصيب ابني وين الكه
بزونه مثلج جمال وأخلاق

ريفان : لا رد بس ضاغطه ع اصابعي من الاحراج
هو توترت لان هذا موجود ويانه
شوي نوب زادت الطين بله من كالت

ام تٌليد : عيني ام رهبار ابني يريد يحجي وياها
ع انفراد تعرفين لازم نشيل هذا الخجل وهي مو غريبه
ان شاء الله بعد أيام تصير زوجته

فاطمه : ردت بسرعه ، اي اي عادي اصلاً ماكو مشكله

ريفان : بقيت فاتحه عيوني ع وسعهن هاي صدك تحجي شلون تعوفني يم شخص غريب
وحتى مابينه اي عقد استغفر الله
بقيت جامده بمكاني ماحسيت الا خيال صار يمي
وكعد بصفي عرفته هو صار بيني وبينه مسافه
كم شبر
ضغطت ع اصابعي من الخجل ياربي دخيلك
خلي اليوم يعدي ع خير ويمشي سريع
لان من صدك احس الحرار صارت عاليه
والدخان صار يطلع من اذاني

تُليد : شلونج ؟

ريفان : ز... زينه

تُليد : دومج يابه واني هم زين

ريفان : يا هذا مثل امه شكد يفشلون دخيلك ربي
نوب سمعته ضحك رفعت راسي وعيني صارت
بعينه سريع رجعت نزلت راسي كلش اسسستحيت

تُليد : ليش هذا الخجل ما اكل بشر اني
بعدين اني ردت احجي وياج حتى ما يكون بينه
اي علامه مُبهمه لازم يكون بينه
علاقه حلوه ومابيها اي تردد وتوتر مو ..

ريفان : هو يحجي وأنا ما ارد عليه بس اهز براسي
عبالك قرد من هذا الي مخلي بالسياره يهز براسه

تُليد : احجي ليش ساكته عندج شي تحبين
دكولينه ماتردين تعرفين شي عني
او تسأليني اي شي

ريفان : شجعت نفسي ورفعت راسي ، عندي شروط
اذا وافقت عليهن يتم الزواج

عاينت عليه شلون ابتسم بهدوء ورجع ظهره
ع القنفه واردف ..

تُليد : ألي تأمرين بي كولي ..

ريفان : مممم ..شسمه اريد ، صفنت ماعرف شنو اريد
بعدين يلا تذكرت ، ها اريد دراستي ما اتركها

تُليد : ضحك بخفه ورد ، وبعد ..

ريفان : ما البس عباه

تُليد : وبعد

ريفان : وما تجبرني ع اي شي ما اريده

تُليد : وبعد

ريفان : استمريت انطي شروط والفاجأني قبوله
المستمر هذا الي شجعني ع تكمله الي اريد
اخر شي كتله ..

وهذا البيت ما اريد ارجع اله مره ثانيه ..

حسيته صفن بوجهي مصدوم من طلبي
اول مره وحده دكول ماريد ادخل بيت اهلي
ولا اشوفهم بحياتي
هز راسه بعدم تصديق واردف ..

تُليد : ليش !!!

ريفان : رفعت اكتافي ، ما اريد وبس

تُليد : سكت هاز راسه بقبول ، وبعد

ريفان : هاهي انا هاي شروطي

تُليد : يجرالج يابه تدللين علينا

ريفان : ابتسمت بهدوء والدمعه بطرف عيوني صارت ماعرف ليس احس هذا
الشخص راح يعوضني عن كل الالم الي مريت
بي بحياتي هسه لو رهبار بمكانه
لو هو الي طالبني لو هو الي احبه ويتقدم الي
ماقصر بشي اتجاهي ابد بس الدنيا لعبت لعبتها ويانا
وفرقتنا حسافه كلش مقهوره كلش

بلمح البصر مرت الايام الا ان اجه بي يوم
العقد مالتي ..
الي حرفيا اكول عنه يوم الجنازه مو عقد
لان كظيتها بس بجي
حتى رهبار ماكو مختفي اكيد هسه
هناك مكظيها كلها شغل ويادوب يفكر بنفسه

جهزت نفسي طبعا فلوس المهر صارت كلها ب ايد
فاطمه اخذتهن كلهن وجابت الي يادوب ملابس
قليله والذهب جابته هم قليل
شكد ما احجي عنها قليل برغم رهبار ما عايز
اي نقص فلوسه معطيتها من العماير الي عنده
والمعمل ومن غير شي فلوس بابا الله يرحمه
مامنقص عنها رهبار ولو شوي بس العينه
فارغه تبقى فارغه طول حياته وما يمليها غير
التراب

كاعده انا ورى الباب واسمع السيد
يردد ..

يابنتي هل تقبلين تُليد سامان زوجاً لكي
ان قبلتي قولي نعم وانتَ وكيلي ..

ريفان : سريع نزلت دموعي ، اتمنيت يكون
رهبار ياريت هو الشخص الي حبيته يكون
زوجي مو غير واحد
ماتوقعت بحياتي كلها اكون الغيره
هنا اكبر ظلم الي من اتزوج انسان ماعرف عنه
اي شي ولا اعرف ليش تقدم الي اساساً
انسان من مكان جديد ماشايفته انسان
من بيئه جديده عليه كل هذا صعب عليه
خاصه انا كلبي متعلق ب انسان غيره
مو الي ولا مكتوب الي ولا بحياتي يصير الي

سحبت نفس بقوه وانا اتخيل هذا الشخص
رهبار حب حياتي وحب طفولتي ماضيي والحاضر
مالتي ومستقبلي
هذا الي اتخيلته لا غير ..

غمضت عيوني نزلت دمعه ع خدي
رديت وانا ارجف ..

ريفان : نعـــــم وانــــتَ وكـــــيلي

________________♡__________________

للحـــــكايا بقايـــــا ♡

                  حسابي الانستا 🦋✅️