دهاليز القدر الفصل الثالث والعشرون 23 - بقلم نهى

دهاليز القدر
دهاليز القدر
للكاتبة
Nuha-d-h

بعد مرور شهرين على الاحداث اللي صارت

تغيرت حالت ياسر وصار كل يوم يروح يطمن على زهراء بالمستشفى اللي لحد الان ما فاقت من الغيبوبة ومر على حملهة ثلاثة اشهر
ومرة من المرات شاف ام زهراء والممرضات شلون يبدلن ملابسهة ويعدلن بشعرهة وهي مثل الطفل النايم مو بعالمهم
اتذكر بذاك اليوم خوفت ام زهراء وشهكتهة من رادت تمشط شعر زهراء
شهكت من وگعت بيدهة خصلت شعر جبيرة
ام زهراء لطمت على صدرهة
ام زهراء-يمة صخام الصخمني يمة بنيتي شبيهة يمة ياسر روح صيح الدكتور بسرعة هاي شنو خصلة الشعر اللي اجت بيدي شبيهة بنيتي
ياسر دنك بخجل وقهر واتذكر يبوم الضربهة وكعد يسحبهة بدون رحمة من شعرهة وهي خطية لا حول ولا قوة
ياسر يجر حسرة
ياسر-لاتخافين خالة هذا الشعر لان صارلهة فترة مامشطتة
ام زهراء بخوف-يمة ياسر متأكد اشو گلبي مامتطمن اخاف بنتي بيهة شي
ياسر مر علية ذاك اليوم وضميري يتكلب تگلب من التأنيب دمرت حياة بنية بعمر الوردة مالهة ذنب وابني اللي بعدة ماطلع للدنيا خطية حتى ماتهنت مثل البنات بأول حمل الهة
مرت ثلاث شهور واني جسد بدون روح بس اتنقل من البيت لدوامي بالمستشفى ومن اخلص شغلي اروح لزهراء
اني رجعت اكمل دوامي بالستشفى

واخوي عمار واولاد عمي اخذوا ثاري من ناظم الواطي
بس لحد هسة ماشفة غليلي منة
بس ابد ما راح انسى بيوم فضل عمار اخوي واللي سواه وياي راح يبقى دين بركبتي

عمار
خلال هاي الفترة اشوف ياسر صار كلش هادء مو ذاك ياسر الاولي اللي الضحكة ماتطيح من على وجهة
لا هذا الگدامي شبيه ياسر صار يوم عن يوم وجهة يذبل
حقة والله اللي صار بي مو هين
هو بيدة قضى على سعادتة جنت دائما اشوفة شلون يتصرف وية زوجة بروعونية بالبيت.
بس هي بنت ناس وطيبة وماتحجي شي وهو استغل هذا الشي يوم عن يوم گام يتقوة عليهة وهي ساكتة حتى اهلهة كوة يوديهة مرات اسمعهة شلون تتوسل حتى يحن عليهة ويوديهة لاهلهة خطية بنية فقيرة ومبينة تحب ياسر بس مع الاسف ياسر ما قدر النعمة اللي بين ايدة ورفسهة بساعة شيطان ضيّع كلشي

انتبهت على على ياسر جسمة هزل
وامي كل يوم على نفس القوانة
ام عمار -يمة ياسر مابسك ماشبعت قهر والله راح تموتي بحسرتي عليك ليش يمة تسوي هيج بية ليش يمة

وياسر مدنك وما يحجي شي
بيبيتي الحجية -ولك ياسر ماترد على امك تشوفهة مثل الطير المذبوح ولك احجي وبرد گلب امك هاي گلب والدة لاتخليهة تجر حسرة يمة هذا كلة مو زين عليك ترة الله يغضب عليك من يشوف شالع گلب امك عليك

ياسر وبصوت ناصي-تطمني يمة والله كلشي مابية بس راسي يوجعني من الدوام ودوخت الدوام واليوم جابو للمستشفى هواي جرحى لان صاير اليوم انفجار بوحدة من السيطرات ورايحة بيهة هواي وادم
وبقينا اني وجماعتي الدكاترة بس نركض نريد نسد النقص اللي موجود بالكادر الطبي بالمستشفى لان عندنا كم دكتور مسافر ايفاد لخارج العراق
ام عمار-الله يطمن بالك يايمة اني شريد منك كلشي ما اريد بس اشوفك سالم
طمني على امريتك شلونهة اليوم
ياسر وبحسرة -زينة الحمدلله مثل كل مرة بعدهة بالغيبوبة

وخلال ذيج الايام اللي فاتت تبارك صديقة زهراء كل خميس تجي للمستشفى على زهراء وتگعد مع صديقتهة العزيزة زهراء وتقرالهة قران وتكعد تسولف وياهة وصارت عندهة هاي العادة
لان حست بالذنب باتجاه صديقتهة ما كدرت تساعدهة
لان في يوم من الايام من داومت بالمدرسة لكيت زهراء غايبة واتصلت عليهة محد رد
ونوب رجعت مرة ثانية اتصلت على زهراء لكتة مغلق
استغربت ويوم ثاني هم زهراء غايبة
اني هنا حسيت اكو شي
طعبا هي اتعرفت عليها من اتعينا سوة بنفس المدرسة بس بهاي المدة الي عرفتها بيها صارت الي اخت عزيزة
اعز علية من صديقاتي اللي كضيت وياهن سنين الدراسة
لان زهراء كلش طيبة وهواي تساعدني بكلشي جانت حالتيي المادية بذيج الايام ضعيفة
والراتب جنت من استلمة گبل يروح بيد عمتي
وجنت اسولف واحجي لزهراء على ضيمي وية عيالي بس رجلي زين وحباب خطية هو يصير نائب ضابط ودوامة يكون اسبوع يمنا واسبوعين بالواجب يعني حيل متعب بس هي العيشة صعبة ماكو واحد مرتاح
ووجانت عمتي من تاخذ الراتب مني ماتبقيلي شي تگول رجلج ينطيج مصرف بعد شلج بالفلوس واني جاي اتسوك للبيت ههه لا ومسوية فضل فوك راسي
انة جنت ما احجي شي اسكت وانجب بس اريد اعيش بركبتي ثنين اولاد صغار
وجنت اشتكي لزهراء ضيمي بس جانت حيل حنونة مرات خطية تحضني ومرات اشوفهة تخلي امهة تخيط بجايم لاولادي او مرات توصي امه تخيطلي دشاديش سودة علية تسويلي كيكة وتكلي هاي للاولاد من غير على كم مرة بمرة تسد عني هواي دروس وشواغر
الله الشاهد صداقتي وياهة مو علمود مصلحة وان هي لان تسوي وياي هيج اني اصادقهة لا والله الله الشاهد اني حبيتهة من اول يوم شفتهة بالمدرسة
وبقينا سوية وحدة تشيل هم الثانية
ومر اسبوع على غياب زهراء واني ما اعرف اسئل منو ولا اكدر اروح لبيت عيالهة استحي وست فوزية عمة رجلهة هم ما گامت تداوم وضليت احوم ومابيدي شي

وليش ما يوم من الايام وبالحلة اجة السايق واخذنا ومثل كل مرة يصير بيت عيال زهراء بطريقنا نمر عليه
واشوفلك لمة رياجيل نازلين ما السيارات وشفت بعد هواي اكو سيارات صافة يم بابهم
استغربت
درت وجهي على ست امنة
تبارك-ست امنة بيت عيال زهراء شبيهم شصاير عندهم
ست امنة-والله ياخية سمعت عندهم طلابة وعندهم ابن عمهم متصوب واصابتة خطرة ويكلك عشيرة بيت سلمان حركو السلف حرك البارحة بالليل بالرمي
تبارك -ياااا اشوف زهراء ماكو هسة تلكيهة غركانة بالشغل وناسية روحهة
لان همة دواوينهم معزبة وثكيلة
امنة -اي حتى ست فوزية ماكو
والله وعدت الايام وزهراء مامنهة خبر
اني يوم عن يوم تكوم الافكار تاخذني وتجيبني
فيوم من الايام كلت بعد مابيهة مجال اشوف يوم و اخذ اذن من المديرة حتى لو نص ساعة واروح اشوف شبيهة
زهيرة ماتطول علية هيج
والله ويوم ثاني اخذت الاذن وقبلت المديرة اروح بس انطتني ربع ساعة لا اكثر والله على ما وصلت ودكيت الجرس وطلعلي البنكالي وراح هو دخل يصيحلهم واني ظليت واكفة بالباب على نار احسّب للوكت
والله اجت ابنية شابة اني شايفتهة بعرس زهراء وعرفتهة اسمهة اسيل اخت ياسر
خطية من وصلت للباب وعرفتني اتغير لون وجهة ما اعرف ليش
تبارك-هلة خية شلونج انتي موحماة زهراء؟
البنية جاوبت بارتباك -اي اني حماة زهراء
تبارك-اني صديقة زهراء معلمة وياهة بالمدرسة عرفتيني
اسيل -اي اي عرفتج تعالي تعالي تفضلي فوتي جوة ليش واكفة بالباب
تبارك -لاخية ماعندي وكت والله بس اجيت اتطمن على زهراء اشو ماكو لاترد على نقالهةمن اتصلت وبعدين نقالهة صار مغلق ظل بالي عليهة
هنا اسيل ظلت تبلعم -هَـا اة ة ة زهراءمو بالبيت زهراء مسافرة
تبارك رفعت حاجب بمعنى ان ما اقتنعت بالحجي مال اسيل
تبارك وخلص وكتهة ولازم ترجع -لعد هذا هوة اهم شي زهراء ما بيهة شي الحمدلله من تحجين وياهة كليلهة تبارك اجت وسئلت عليج
رجعت للمدرسة واني مامقتنعة بكلام اسيل اخت ياسر لان هي مبين عليهة ماتعرف تجذب بسرعة يبين على وجهة
ورة يومين رجعت ست فوزية للدوام وزهراء ماكو
اني اعرف احس اكو شي صاير بزهراء واني ما اكدر اوصللهة
دخلت ست فوزية والمعلمات كامن يسلمن عليهة ويتحمدن. على سلامة ابن عمهم لان الطلابة بهاي الايام كلهة ببيت اخوهة الشيخ سلمان
تبارك رحت يمهة وسلمت عليهة
تبارك-هلة بام عزام الحمدلله على سلامتكم الله يكفيكم الشر
ست فوزية -الله يسلمج خالة ويحفظلج غاليج
تبارك -اكول صدك ست فوزية زهراء شلونهة
ست فوزية -هَـا زهراء زينة
تبارك -ليش ماجاي تداوم
ست فوزية هَـا -خطية زهراء مريضة وماتكدر تطلع
تبارك هنا اتأكدت ان زهراء بيهة شي ومحد يقبل يحجي

لان كلام ست فوزية مو مثل كلام اسيل وحدة تگول مريضة الثانية تگول مسافر
من حرگت گلبي سحبت ست فوزية من ايدهة وطلعتهة بالساحة مالت المدرسة
تبارك -شوفي ست فوزية اني سكتت وما حجيت شي گدام المعلمات احتراماً الج
ست فوزية بارتباك-شنو قصدج ما افتهمت
تبارك- شوفي حبيبة اذا ما مفتهمة اني اگلج زهراء صاير بيهة شي وانتوا محد يقبل يحجي
ست فوزية وبحسرة لمعت الدمعة بعيونهة - والله ياتبارك ما اعرف شنو احجي ومنين ابدي
بس حبيبة كل اللي راح اكدر اگولة ان زهراء بالمستشفى صارلهة سبوع وهي داخلة بغيبوبة وحامل
تبارك لطمت على صدرهة بشهكة- يمة دخيلك ربي
هاي شوكت وشلون وليش محد يقبل يحجي
يعني معناهة احد مأذيهة منكم
تبارك وهي تبجي -احجي كولي لاتظلين ساكتة

فوزية دنگت وحجت السالفة كلهة لتبارك
وتبارك مصدومة من اللي جاي تسمعة
واللي صار بصديقتهة
فوزية -تبارك حبيبة احلف بعزبز گلبج ماتگولين لاحد على اللي گلتة الج حبوبة ترة اهلهة ماعندهم علم حسبالهم واگعة من الدرج
تبارك من خلص الدوام اني رحت كبل واني بهدوم المدرسة بوجهي للمسشفى وشفت زهراء حالهة مايسر لاعدو ولاصديق
متت قهر عليهة يمة هاي زهورة الوردة الي جانت اخدودهة مثل التفاحة هيج صاير بيهة يمة سودة علية

وشفت امه وسلمت عليهة وكعدت يمهة بس اجت الممرضة وكالت خلص وقت زيارة المريض
سلمت على ام زهراء وطلعت واني صارت عندي غصة بحنجرتي

عمار
رحنا اني وياسر وابن عمي هشام للمستشفى علمود هشام يروح يجيك ويفحص صدره
طبعا هو مرت تقريبا ثلاث اشهر على اصابة هشام بس اني دائما الح عليه ان يراجع الدكتور علمود جرحة
وهو مرات يعاند وما يقبل يروح
گمت انة اخذة بيدي للدكتور لان هو لو عليه مايروح فمرة من المرات كال ياسر تعالو وياي للمستشفى اللي بيهة زهراء
ياسر -عمار تعالو وياي اعرفكم على صديقي دكتور اختصاص صدرية و باطنية كلش شاطر وحجيتلة على حالت هشام وهو گال من تجي جيبة وياك
حتى اجيكة

هشام
دخلت للمستشفى وية اولاد عمي بعد ما لحو علية الا ياخذوني للدكتور ويشوفون حالتي
لان مرة تورطت على عمري وكلت لعمار احس اكو بزة بصدري وياريتني ماحجيت
اكل گلبي اكل الا ياخذني للدكتور بيدة والاستاذ مصدك روحة مسوي نفسة براسي ماما انيسة ابن الاوادم
بس والله اتخبل من ريحة المستشفيات كبل ادوخ من ريحة الديتول
من دخلنا للمستشفى راح ياسر دخل جوة يم الدكتور
وانة وعمار بقينة ننتضر برة وانة واكف حسيت بدوخة من ريحة الديتول عمار التفت عليه
عمار بخوف-هاولك جنك راح تطيح علينة شنو دخت
هشام -لاوالله لعبت نفسي من ريحة الديتول
عماربضحكة-هذا الطول والعرض كلة واللي يشوفك يحوفك وتدوخ من ريحة الديتول ولك طاعت بوخة
اكعد هنا خلي اروح اجيبلك عصير شي
هشام ظليت كاعد
شوية وكمت شفت مناك ليغاد بنهاية الممر اكو براد ماي
گمت رحت اشرب ماي واني امشي بأتجاه البراد
شفت وحدة وكفت قريب على البراد ولابسة نقاب انتبهت عليهة تتلفت يمنة ويسرة خطية وشفتهة رفعت النقاب ومسحت دمعة من عينهة وشربت كاسة الماي
اني هنا صرت قريب عليهة

بس دخيلك يالعباس شنو من حسن شايلة جان النقاب مرفوع فوك راسهة وسواد العباية محوط وجهة تگول عبالك بدر منور
انة ماحسيت على روحي من حجيت
هشام -ماشاء الله تبارك الرحمن

البنية گمزت وبسرعة ردت البوشية على وجهة وعافت كاست الماي على النص وراحت تركض

دخيلك يالله من كمزت وباوعتلي بعيونهة جنهة عيون بزونة
اني هنا ظليت ارجف واباوع عليهة شلون راحت تركض لنهاية الممر وعكست على الممر الثاني واختفت عن الانظار
اني عاينت على البراد شفت جانت كاسات بلاستك شفافة ويعني الواحد يسحب الكاسة من السيت ويشرب ماي وانتبهت على على كاس الماي باقي بيهة ماي على النص خطية ماكملتة لان خرعت الفرخة وخليتهة تنهزم
بس تضحكون علي لو اكللكم اني شربت من نفس الكاس اللي شربت بي ماي وعقجت الكاس وخليتة بجيبي مال القميص
تكولون مبالغ بالامر بس راح تعذروني اذا شفتوا اللي شفتة انة شفت حسن وجمال وحشمتهة زادت من جمالهة
اجة عمار
حط ايدة على جتفي
عمار -هاك اخذ اشربلك شوية عصير
هشام وهو صافن ورايح لغير عالم جر حسرة طويلة-اخ الله
عمار -هاخوية شبيك مو على بعضك يوجعك شي
هشام ويحط ايدهة على صدرة ويلزم جيب القميص اللي بيه كاست الماي البلاستك - اي خوية گلبي خوية گلبي اتسلب
عمار وهويسحب ايدي -يالله امشينا خلي نروح لياسر ويدخلنا على الدكتور يالله بسرعة

هشام واني امشي بثگل وعمار يسحب بيدي واني عبالك مخدر
هشام - عمار تأمن بالله
عمارالتفت على هشام-شنو شبيك شجاك تحجي بالالغاز
هشام -ولك شحجي سالفتي لو هسة اسولفهة للمخبل ما راح يصدكني
ولك عمار گلبي وگع وعثر بحورية سبحان الخالقهة
اعرف بيك راح تكول شبيك ما شايف نسوان
راح اكلك اي ماشايف هيج جمال وحشمة وستر
ولك عمار هي لحظات والله لحضات مو هواي بس بس گلبي تعلك بيهة
عمار وهويضحك وضرب على كتف هشام -اي يخوي حكك العشك مو بيدنا يخوي هذا يجي طارش مثل الخطار يدخل فجاءة للگلب ما يستأذن

ياسر-شنو وين صرتوا صارلي ساعة ادور عليكم يالله تعالو للدكتور ينتظرنا

راح عمار وهشام وياسر
بباب غرفة الدكتور صادفنا رجال جبير ووياه ثلاث نسوان وحدة مرة جبيرة بالعمر
وثنين لابسات نقاب
هشام
اني شفت وحدة من هذني المنقبات تتلبد بين المرة والرجال الجبير
سمعت
ياسر -هلة عمي شلونك شخبارك
ابو زهراء-هلة بوية ياسر گواك الله ان شاء الله بخير بشر شلون صارت صحتك
ياسر -الحمدلله عمي
والتفت ياسر للمرة الجبيرة وباسهة من راسهة -شلونج عمة ان شاء الله بخير
ام زهراء -هلة يمة ياسر شلونك ظل بالي عليك طمني

عمار سلم على ابو زهراء ومستحي من عندة على سوايتهم وية بنتة -شلونك عمي شخبارك

ابو زهراء -هلة ابو ياسر گواك الله
التفت ياسر على هشام
ياسر يأشر على هشام -عمي اعرفك ابن عمي خليصي هشام والتفت على
هشام هذا عمي ابو المرة
ابو زهراء-هلة بوية اتشرفت بمعرفتك
هشام وگلبة گام يدك حيل عبالك راح يخطبونة -هلة بيك عمي اني (الاشرف )

هنا ياسر وعمار وكعو بالگاع من الضحك على منظر هشام وفلتت اللسان وابو زهراء بلعهة وماحجة شي
وحدة من المنقباب سلم عليهة ياسر
ياسر -هلة ام محمد شلونج خوية
زينب وبصوت ناصي -هلة خوية بخير ما دام انت بخير

هشام بالة يم ياسر وعيونة على البنات المنقباب يريد يعرف ياهي منهن اللي جانت يم البراد
گلبي انخمش من سمعت ياسر حجة وية البنية وگللهة ام محمد التفت ياسر
ياسر -هلة خوية زينة شخبارج و شلونج بالمدرسة
زينة وهي مدنكة وبصوت كوة ينسمع- الحمدلله بخير
وصارت ورة ابوهة بس قبل لاتصير ورة ابوهة رفعت راسهة شوية واجت عينهة بعيني ونزلتهة بسرعة
هشام اخ الله هي هي هي والله هي والله والله هي
تخربطت احوالي ومااعرف شحجي

ياسر -يالله هشام امشنا الدكتور ينتظر
هشام واني من الفرحة حلكي ما اندلة وما اعرف شحجي
هشام - ها بكيفك تريدنا نروح
عمار وانتبه على هشام وافتهم السالفة لان الحليم تكفيه الاشارة وهذا هشام مو اي واحد يعرفة ومن هو صغير
عرف ان ابن عمة انصاد من نفس السنارة اللي صادت اخوه قبلة عمار بابتسام يالله امشونا
مشو اهل زهراء والولد راحو للدكتور وكعدو ينصبون على هشام
عمار واستغل الفرصة ويقلد بصوت هشام -اي عمي اني الاشرف ههههههههههههههههههههههههههه لاوالغسل رجال شكدك وشكبرك فلت لسانك گدام عمك
ولك شمالك بعدهم ماخاطبيك
هشام كعد يضحك على روحة

ويارب ضحكة خير عليهم

ولحكايتي بقية

دهاليز القدر
للكاتبة
Nuha-d-h