دهاليز القدر الفصل التاسع والعشرون 29 - بقلم نهى

دهاليز القدر

دهاليز القدر
للكاتبة
Nuha-d-h

مر على زواجي من عمار شهر
وخلال هذا الشهر
كنت مشغولة بعلاوي ابني صاير كلش حرك وعمتي وعمي والحجي والحجية متخبلين بي ومايقبلون احجي وياه فصاير وكح وخطية بس يضرب بنات محمد وعمار الصغار اللي تقريبا يصيرن بنفس حلة(العمر)

زهراء
اول ايام جنت انام وية اسيل بغرفتهة بطلب من عمتي لان رفضت ان ارجع لشقتي القديمة
ام عمار-لايمة لاتصعدين لشقتج خاف اتهيج عليج المواجع وماتاخذين راحتج و تظلين كلساعة متذكرة موقف بيهة
لذلك قررت عمتي ان تجدد شقة محمد حماي الية
زهراء -عليمن عمة مكلفة روحج هنا ننام بغرفة اسيل احسن لان علاوي حرك وما اريدة يصعد وينزل الدرج
والله خطية عمتي اقتنعت واسيل طايرة من الفرح بعلاوي
ومرات احس بيهة عبالك هي جاهل موعلاوي من اشوفهة شلون تتحايل علية علمود ينطيهة جبس لو شوية عضة من الكاكو مالتة
وعمتي نزعتني الاسود وكالت مايصلح فرجعت على ملابسي القديمات لان ما مشترية وهنة صحيح حلوات وكشخة بس صايرات ضيكات وصغار علية فكلت عادي محد بالبيت وياي خلي اكضي بيهن شغل من افرغ اروح اشتريلي ملابس وغراض اني صحيح سمنت عن ذاك جسمي بس هذا جسمي احلى منو اللي يشوفني يكلي هيج احلى لان حسب كلامهم جنت معصكلة بس هسة صايرة التضاريس الانثوية اكثر انوثة
علاوي ذب علية عصير فعفت علاوي بالهول ورحت ابدل ملابسي بغرفة اسيل اسمع علاوي ظل يبجي وراي
نزعت دشداشتي وبقيت بطرك الملابس الداخلية جانن صادف لونهن احمر فجاي اريد البس الدشداشة الي طلعتهة من الكنتور وماحسيت الا الباب انفتح وشفت عمار داخل بالغرفة وبيدة علاوي يبجي
هو جمد بمكانة واني جمدت بمكاني والله بذيج الساعة بس واحد يسويلي بز ابجي
حسيت على نفسي ووضعي غلط كمت بسرعة البس بدشداشي
زهراء-ادري ماتعرف تدك الباب
عمار بعدةعبالك مخدر- هَـا ياباب
زهراء -باب الغرفة بعد ياباب
عمار بخزرة-ماتوقع احتاج اذن اذا اريد ادخل غرفت مرتي فاهمة
يالله جهزيلي علاوي خلي اخذة

عمار مرات من يطلع ياخد علاوي وياه
احلى شي
مرة عمي جاي من كويت وجايب وياه دشداشة بيضة صغيرة وياهة شماغ لعلاوي وتكرمون ونعال صغيروني موديلة مثل موديل الكبار
فمن گال جهزيلي علاوي اليوم ياخذة وياه للديوان وية ربعة
فگمت بدلتلة الملابس اللي جابهم عمي بس الضحك ان هاي الهيبة
والكشخة كلها لابس جواهن حفاظة وهو دبدوب
علاوي يمشي كدام عمار وعمار طاير بي احس من
يباوع لعلاوي عيونة تكوم تلمع
طبعا علاوي صاير يحجي ولسان
علاوي-يالله بابا نلوح
كلهم ضحكوا على شكل علاوي
محمد بضحك -زهراء تعالي اخذلي صورة اني ونسيبي بالنقال
رحت اخذت النقال من محمد وكعدت اطكلهم صور هو وعلاوي
فجنت انطي ملاحظات لمحمد حتى تتطلع الصورة حلوة
زهراء-محمد شوية اقترب اي اي بعد شوية ارفع راسك ووخر شعرك نازل على عيونك اي هسة زين

احس بعمار ظل يحوم فوك روسنا يالله فضوني اريد اطلع وكلساع كام يعيد نفس الحجاية اني رفعت راسي واجت عيني بعينة وهو خزرني
دنكت راسي ورحت كعدت يم بيبيتي الحجية اصبلهم جاي
عمار -صبيلي وياج جاي
صبيت الجاي ورحت اوديه الة هوجان كاعدعلى صفحة احنا تصير صالات البيت وحدة مفتوحة على الثانية رحت انطي الجاي خليت الجاي على الطبلة اللي بصفة
لزمني عمار من زندي شوفي ولج ترحين تبدلين هاي الدشداشة لا اسويهة وصل عليج
اني بصدمة هَـا شنو
زهراء-اي هسة
رحت الغرفة ابدل وشفتلي دشداشة شوية زينة كمت ولبستهة
طلعت كدامة من غرفة اسيل اشو اشوف عمار نطت عيونة رحت للمطبخ جاي امشي واشوف عمار سحب ايدي حيل ودخلني على المطبخ الحار لان محد بي

عمار-شنو هذني الدشاديش مال نوم لو مال بيت اكلج غيري الدشداشة ترحين وتلبسين الاطكع منهة
شنو انتي خوثة مومحمد موجود بالبيت وانتي كلساعة عارضة جسمج

زهراء
نزلت راسي واريد اشوف الداشداشة شنو عيبهة
زهراءوبقهر احس عمار ناشب وياي على كل صغيرة وجبيرة اطكع من شيخة اللي من اجيت لحد هسة واني حاطة گلبي بشيشة من وراهة
زهراء-شبيهة الدشداشة شوفهة مابيهة شي لو انت بس تدورلك على حجة علمود تحجي علية وترزلني
عمار-روحي اوكفي گبال المراية وشوفيهة من ورة شلون ضيكة وحاضنة الورك حضن
زهراء اني خدودي صارن طماطة عمار مرات يحجي حجي وياي كلش جريء بس ما يبنتبه على نفسه
عمار -يالله روحي بدليهة
زهراء وبصوت هامس -صار
رحت بدلت الدشداشة بوحدة ثانية اخذته من اسيل اشوية اسيل اسمن مني
رجعت للصالة وشفت عمار ماخذ علاوي وطالع
اجيت وكعدت يمهم
وشيخة كالعادة لازم تسمم الواحد بالكلام
شيخة -شنو حبوبة اليوم السابعة مالتج كلساعة مبدلة ثوب
زهراء -عمار ماقبل على الدشداشة وكال بدليهة ضيكة
شيخة هنا تخبلت
شيخة -اي حقة لان كلساعة مفرعة جسمج يم عمار تردينة يباوعلج حتى بلكت يحن عليج
وگامت تهز بيدهة -ايه والله عشنا وشفنا نسوان اخر وكت ماجنهة رجلهة متوفي وما صارلة هواي وهي تحوم على حماهة وتلعب عليه اي موكافي اخذج وستر عليج وعلى ابنج كافي ماتشبعين
زهراء -شنو هذا الحجي الزايد شيخة ترة زودتيهة
نوال وبصوت عالي-شيخة احترمي نفسج وزهراء هم مرت الشيخ عمار حالهة من حالنا و وفاة رجلهة اكل وشرب عليه الدهر واتوقع الحي اولى من الميت وزهراء محترمة نفسهة فلا تكعدين تذبين حجي يسمم مالة داعي ترة اخليج بحلك عمار وانتي تعرفين شيسوي

شيخة سكتت بس الشرر يطلع من عيونهة

خلصنا الشغل وعجنت عجينة فطائر كلت اسويهة الصبح حتى تبقى حارة وصار الليل
وكعدة كالعادة يم الحجي والحجية حضرتلهم دلة كهوة وخليتهة بصينية هي واكوابة واخذتة ورحت يمهم وكعدت
بالكاع يم رجليهم
احب اكعد وياهم واسمعهم شلون يسولفون

دخل علينا عمي وعمتي للصالة
ابو عمار-الله شنو هلريحة شنو مسوين كهوة
زهراء بابتسامة -اي عمي خطية جدي اشتهة الكهوة

ابوعمار-هلة هلة شعندة الحجي هو والحجية وية الكهوة بتالي الليل جا ماتخاف يصير عندك ارق وتظل سهران
الحجي -روح ولي منا انت شلك غرض عودك من يطكنا ارق اكعد اسولف وية مريتي سوالف توالي الليل
الحجية -اسكت اسكت يالشويب مابيك خير بس حجي
زهراء اني هنا خربت من الضحك ما اعرف منين يجيبون هذا الحجي
ابو عمار -اي اتذكرت بيوية ابن عمي رجل فوزية اختي طلب ايد اسيل بنتي لعزام ابنة وانة وافقت
ان شاء الاسبوع الجاي تصير كعدت الزلم ويجبون وياهم السيد حتى يعقدلهم يكطعون مهر
ام عمار -بيهة الخير ان شاء الله

زهراء باوعت على اسيل خطية صارت خدودهة طماطمة وبسرعة كامت راحت لغرفتهة

دخل علينا عمار وغترتة على اكتافة وشايل علاوي وهو هم نازع الغترة والدكم مالت الدشداشة مفتوحة والدشداشة ملعوب بيهة طوبة وتكرومون لابس تك من النعال والثاني ماكو
عمار -گواكم الله
الكل -هلة الله يساعدكم
ام عمار بضحكة-هاي شنهي انتة وابنك داخلين على عركة لو راحين لديوان

عمار -سكتي يمة لاتذكريني شلع گلبي
والله فشلني بنص الديوان ابو ثرد
خطية جماعتي كعدو يفترون علينة ويقدمون النة علبة بيهة جكليت اباوع على ربعي همة وجهالهم من توصل يمهم العلبة كل واحد ياخذ وحدة الاهذا عليوي من وصلت يمة العلبة كوم جر العلبة كلهة من ايد الولد وحطهة بحضنك
وجيب اللي ياخذهة منة
وانة وبالك عني الشيخ عمار والناس تحلف براسي
اكلة بوية عيب رجع العلبة لعمك خلي يوزع
وعلاوي الشفج يهز يراسة ب لا ويكول للولد
لوح لوح لوح هدا ماتّي (روح روح هذا مالتي)
وخلة الوادم تضحك علينا

زهراء اسمع عمار شلون يسولف واني خربانة ضحك عليهم نزل علاوي من ايدة واجة يركض علية وحضني وخلة ايديه الصغار على خدودي وكعد يبوس بية من شفايفي
يمة شلون ولد حلو ويشتاق لامة

عمار جنت احجي وية الوالد وكطعت سالفتي
من طاحت عيني على زهراء وعلاوي شلون هو حاضنهة ولازم خدودهة وكاعد يبوس بيهة من شفايفهة
اني ما اعرف شصاربية گامت عرگة تاخذني وعركة تجيبني من المنظر الكدامي وهمة ولايهم بغير عالم لواكول بوكتهة حسيت بغيرة من علاوي وكعدت اتحسدلة يمكن تضحكون علية لان صدك غرت منة
عمار وبصوت حاد-يالله كومي بدليلة ملابسة صايرات خارطة من الوصخ
زهراء نزيت على صوت عمار -اي هسة
الحجية تباوع لعلاوي
الجدة -يمة عمار شد الهمة يمة وجيبلنا وليد اخو لعلاوي
ومادام هاي الفرخة كدامك ولادّة اولاد(معناهة انة اخلف كلة اولاد)
زهراء اني هنا تعالو دورني من الفشلة صرت حمرة طماطة واستغربت من جواب عمار
عمار -اي حجية صدك مادام الفرخة كدامي راح اشد حيلي منا ورايح
زهراء عزة بعيني شيقصد
مر اسبوع
وشفت نوال كالبة البيت والعمال طابين طالعين
زهراء-شكو شصايرعندنا
نوال تغمزلي-اجانة امر من الادارة العليا بتجهير الشقة الفوك مالت محمد لعمار راح يعرس من جديد

زهراء من سمعت حجي نوال متت قهر وظليت احرك بروحي واسولف وية نفسي
شنو هذا الحجي ليش راح يتزوج ادري مو عندة شيخة ونوال على شنو يتزوج ولا هم راح يأثث شقة كاملة للخاتونة اي صدك
اشو كلهن زوجاتة مسويلهن شقق وتعبان عليهن
واني حتى ماكلف نفسة يشتريلي غرفة مثل البنات
ظليت احوم ما اعرف شجاي يصير بگلبي
گلت لو بعد ابقى هنا ساعة احتمال اطك واموت
وهاي نوال شبيها اتخبلت اشو فرحانة رجلها ياخذ عليها مرة
انتظرت عمار يرجع من الشغل لازم احجي وياه

ورة اربع ساعات رجع عمار من الشغل وما صارتلي فرصة احجي وياه
ان اريد اروح لاهلي
عمار- الله يساعدكم
وشفتة كبل صعد هو وشيخة لشقتهم لان اليوم يوم شيخة مااعرف شجاني اليوم شسصار بية كمت احوم مثل البزونة اللي سادين الباب على ذيلهة
شنو معقولة اغار على عمار وهذا الشعور اللي جاي امر بي معقولة اني احب عمار وماحسيت على نفسي الا من كالت نوال راح يتزوج وحدة رابعة صحيح اني وياي ثنين شرايج بس اعتبر نفسي اني الاخيرة ومحد تجي وراي
اهوووو وهسة اني شبية كاتلة روحي هو حتى مامگلبني ولا بحالي
واصلا ماحاسبني ولامعتبرني مرتة اشوفة مقسم ايام الاسبوع كلة على نوال وشيخة وانة حتى ما يكلف نفسة ويكعد وياي ويشوفني شمحتاجة والله حتى اشوفة ياخذ شيخة هي والبنات وعلاوي ويطلعهم ويونسهم وحتى نوال مرات اشوفهة تسافر وياه كلمن منطيهة حقهة

ما اعرف احس اليوم الشيطان كعدلي متربع تربع وصرت اتذكر جميع المواقف من يوم اللي اتزوجني عمار لحد هذا اليوم ماشفت ان فديوم خلة بيدي مصرف وجانت كلة عمتي تخلي بيدي فلوس اذا اريد اطلع للسوك وية نوال وكعدت اتذكر هواي اشياء خلتني استهضم على نفسي وانقهر
ليش اني شناقصني حتى مايعاملني حالي حالهن رحت لغرفة اسيل اباوع على روحي بالمراية وبجيت من اتذكرت كلامة وياي بيوم عقدلنا السيد
عمار بوكتهة گال انا ماميت عليج وماكاتل نفسي عليج يعني من الاول جانت نيتة ان يتزوجني علمود علاوي لان خاف
اتزوج رجال ثاني وعلاوي يتبهذل بين البيوت
وفعلا كلامة جان صحيح ان علاوي جاي يعيش حياة مستقرة بين اهلة وناسة ومعزز مكرم وما عليه عازة
بس انة انة وين من كل هذا يعني شنو ذنبي اني هم بشر واحتاج الكلمة الطيبة اللي تجبر خاطري مثلي مثل اي بنية بعمري
ورة ساعتين
انتبهت على شيخة من نزلت سابحة والضحكة شاكة من حلكهة
اني جريت حسرة
كمت احجي وية نفسي شبيج زهيرة تخبلتي اليوم استغفر الله ياربي اليوم شلون بالشيطان ماناوي يعوفني اعوذ بالله

نوال-ها خية زهراء شخيرج شبيج اشو تحجين وية نفسج
زهراء -لاخية مابيني شي هيج عندي حسبة ببالي
نوال وهي تضحك -اي خية الله يصفي بالج

ثاني يوم
نوال -خية زهراء عينج على البيت راح اخذ اسيل ونروح للسوك مامحتاجة شي الج اجبة وياي من السوك
زهراء -لاخية اخذي راحتج مامحتاجة شي
جنت كاعدة على ميز الطعام وحاطة علاوي من فوك الميز وجاي اريكة دخل عمار للمطبخ ووراه شيخة تسولف وتضحك وياه اسمعهة تگلة -عمار حبيبي اخوي هشام راح يجي علية ياخذني اني ورشا وامي للسوك عندي كم شغلة اشتريهة محتاجتهة لمهر اسيل
عمار-والبنات حوراء وملك ورسل وين تبقيهم
شيخة التفت علية -خية زهراء عادي اعوف البنات عندج بين ماروح للسوك وية امي
زهراء
طبعا شيخة كدام عمار كلة هيج كلامهة تبين ان هي تموت علية وعودك احنا خوات گلب على گلب
زهراء- عادي بقيهم وية علاوي عيني عليهم
جاي احجي وية شيخة وما انتبهت على علاوي من راد ينزل من على الميز شوية واسمع صوت طبة بالگاع وصرخة علاوي
اني كمزت احس گلبي راديطلع من صدري شلت علاوي وظليت افتر بي وهو فرفح من البجي وعنجرت كصتة
ركض عليه عمار واخذة من ايدي
عمار زمخ عليهة بصوت عالي -شبيج انتي ثولة ماتنتبهين زين ما صار بالولد شي جان دفنتج بمكانج
زهراء صكيت بمكاني وماتحركت وصار عمار مقابيلي يريد يعبر
عمار -بالله شو وخري منا والله عندج فهواة تشك الواحد شك
اجت عمتي تركض وشافت علاوي كصتة معنجرة
وهم ظلت تحجي علية
ام عمار-وين جنتي صافنة وملتهية عن الولد اي غير تنتبهبن عليه
زهراء احس الغصة خنكتني وكوة جريت النفس حتى ما ابجي -عمة والله جنت يمة بس ما انتبهت عليه
وگامت الدموع تلالي بعيوني بس ما نازلة
رفعت راسي وصارت عينوني بعيون عمار هو ظل يباوع علية وبعدهة دار وجهة واخذ علاوي وطلع

ولحكايتي بقية

دهاليز القدر
للكاتبة
Nuha-d-h
اتمنى لكم رحلة موفقة الى دهاليز روايتي
لاتنسون التعليقات لان تنزيل البارت يعتمد على تعليقاتكم
فها مااوصيكم على كولت الحجية بيبت عمار
عفية شدو الهمة وشوفوني تعليقاتكم