دهاليز القدر الفصل الثاني وثلاثون 32 - بقلم نهى

دهاليز القدر

دهاليز القدر
للكاتبة
Nuha-d-h
في يوم المهر

زهراء
حضرت الفستان الي راح البسة اليوم وحطيتة
على السرير وحضرت الميك اب على الميز لان ما اروح للحلاقة عمار مايقبل
زهراء وهي تبتسم
اتذكرت عمار شسوة من رجعت من بيت اهلي
جان الوقت ظهر وعيالي كلهم نايميين
واحنا بالگراج
عمار - انطيني علاوي وانتي اخذي راحتج صعدي شوفي الشقة شلون صارت

زهراءانطيت علاوي لعمار ورحت اخذت غراض علاوي والجنطنة من السيارة ودخلت للبيت سنطة هدوء وصعدت فوك بوجهي للشقة جنت متلهفة اشوفهة
رحت دخلت للشقة شفتهة تجنن ومرتبة ودخلت لغرفة النوم جانت كلش حلوة من هذني التركيات
نزعت عباتي وعلكتهة على التعلاكة ونزعت شالي هو والنقاب
وفتحت شعري عدلتة وشفت اكو عطور كومة على ميز المراية اخذت واحد ورشيت شوية من عندة
وكعدت اباوع لجسمي واتلفت بالمراية
سمعت صوت باب الشقة انغلق هنا گلب كام يرعد رعيد
دخل علية عمار للغرفة وشهك متفاجئ بية
عمار-انة ابنك يسلمان
ولج زهرة جنج ناوية على موتي اليوم
تعاي بالله شو خل اشوف
زهراء بخجل -لا ما اجي
عمار -عمي الما يجينا احنا نجيبة
وراح يمهة
ولج يزهرة انة من غير كلشي مدوهن
ونوب هسة لاعبة بروحج لعب صايرة جنج لعابة
تعاي خل العب وياج يحلوة هذا كلة الي
زهراء تريد تتشرد-اة اة عمار علاوي وين
عمار -علاي بح عفتة عند عمتة خلي تتورط بي
اريد الجو يخلة بس النة
اريد اكلج اريد اشربج اريد اتنفسج

زهراء تريد تضيع السالفة -عمار عاشت ايدك عالشقة كلش حلوة وغرفة علاوي تجنن والله ما اعر..........

اتقرب منهة عمار وخلة صبعة على شفايفهة حتى تسكت
وسحبهة لحضنة وشمهة
عمار-افيششششش اشكد جنت منتظر هلحظة
تعالي خن اشبع منج بالله امشي كدامي خل اشوفج شلابسة
زهراء وبخجل الخجل لايك عليه
كمت امشي گدامة بدلع واتمايل بخصري
مالحگت هنة اربع خطوات وبالخطوة الخامسة لگيت نفسي طايرة بالهوة
شالني عمار وشمرني على السرير

عمار وهو
ينزع ثوبة وعيونة بعيون زهراء وكانت نظراتهم تتبادل الشغف والاشتياق
عمار -اليوم اخذج اخذج ولو تنگلب الدنيا ماتحرك من الغرفة الا وانة ماخذج
زهراء بمستحة -عموري ترة ما راح اطير والله
عمار شمر ثوبة بالگاع واقترب منهة
-من حترگت عشيرة عموري بنار ونفط

ولج خافي الله بية يابنت الناس
بهذا دلعج علية تراه يشيب الراس
ترة وحيد لهلي ونطلبت من العباس
خاف اشمج و الهوة بصدري يخلّص انفاس

(طبعا هذه ☝🏻الخاطرة من ضمن كتاباتي )

وصارت زهراء لعمار بكل لهفة بين المحبيين

في يوم المهر

زهراء
حضرت الفستان الي راح البسة اليوم
وحطيتة على السرير وحضرت الميك اب على الميز لان ما اروح للحلاقة عمار مايقبل
عمارقبل لايطلع -شوفي من تلبسين البدلة اتصلي علية اصعد اشوفهة واحرك الخلفوج اذا الكاهة مفرعة
زهراء -واذا جنت بالدوان يم الزلم شلون
عمار بعصبية -حتى لو جنت بالقنادر تتصلين
اريد اعرف ليش ماتراوينياه هسة
زهراء -لاعموري عفيا اريدة مفاجئة
عمار - ترة خلي ببالج اذا مفرعة انة افاجئج وما اخليج تلبسيهة
ودخل عمار للحمام حتى يسبح

اتصلت على اهلي حتى اتأكد اليوم يجون للمهر لو لا
وردت امي وگالت منتظرين ابوج هسة يجي ياخذنا
زهراء -وزينب تجي اليوم لولا
امي -والله ما ادري بالله اتصلي عليهة وشوفي

اتصلت على زينب اريد اعرف اليوم تجي للمهر لولا

سودة علية هي هاي الايام حالتهة المادية كلش تعبانة والحكومة صارلهم اربعة اشهر ماصارفين رواتب للموظفين متت قهر عليهة وهي جانت كبل من شغلي وعمل ايدي وبالگوة تقبل تاخذ مني موهسة من فلوس رجلي بوقتهة كنا بالسوك من اشتريت فستان الي وفستان لزينة ردت اشتري الهة فستان رفضت رفض قاطع
فتصلت عليهة
زهراء-هلو زنوبة خية شلونج
زينب -هلة خية زهراء شلونج اتصلتي بوكتج زينب وهي تبجي
زهراء -هاخية زينب گولي شبيج وگعتي گلبي
زينب -خية زنوبة اليوم سلبو مثنى بالطريق ماخذين السيارة من عندة والسلاح ومنزلينة بنص الطريق
زهراء بشهكة-ياخية وهسة شلونة
زينب -الحمدلله مثنى زين
بس المصيبة السيارة والسلاح اثنينهن ملك مالت الحكومة
زهراء -اي خلي يقدم بلاغ ان هو تعرض لعملية سرقة
زينب -اي هي هاي المصيبة ماعندة اي اثبات بان هو اتعرض للسرقة همة سلبوه بطريق هيمة محد بي بس هو والله يعني الحكومة اذا مانطاهم فلوس السلاح والسيارة راح يحبسونة ويصدرون بحقة عقوبة
زهراء -زين شكد المبلغ
زينب -يصير بحدود العشرين مليون
زهراء -عزة العزاج زنيبة خية
زينب -بس الله اليحلهة ماعندي غيرة الجئ الة
زهراء-خية ٢٠مليون هواي والله لوعندي هيج مبلغ والله ما راح اقصر وياج بس عندي كم فلس جوة ايدي مجمعتهم عند امي راح انطيهة خبر وتنطيج الفلوس العندهة وان شاء الله ما اعوفج الي اكدر عليه اسوي
لاتنقهرين ربي يعوضكم
سديت النقال من زينب وشفت عمار طالع من الحمام
وجاي ينشف بشعرهة وهو لاف الخاولي على خصرة
زهراء -هَـا عموري بالعافية خلصت
عمار-اي صارلي ساعة منتظرج تخلصين مكالمتج وية اختج حتى تحضريلي ملابسي
شنو شبيهة اختج زينب سمعتج تحجين وياهة بسالفة تسليب
زهراء وهي تحضر ملابس لعمار وحجت السالفة كلهة
عمار-والله موقفة كلش حرج بس خلي افرغ
عندي معارفي واصلين بالحكومة راح اسألهم واشوف شنو نگدر نسوي

وبدل عمار ملابسة وطلع

اني رحت
بدلت لعلاوي قاطة الاسود وببيونة لونهة احمر على القميص وسويت شعرة بجل ورفعتة طلع مودل فاشنيستا يجنن
رحت نزلتة يم خالتي وخالتي ظلت تهلهل
اجة عمار ودخل للصالة
عمار -صوتج يمة شهرتينا منا الخطار شنو عزام دخل عليكم وگعتدي تهلهلين عيب ترة بنتج اللي راح يخطبوهة
ام عمار -خب تولي ول شوفي هذا العريس وانتة احجي من راحتلة عرسان العالم كلهة فدوة

عمار التفت على علاوي وضل يضحك على شلكلة جنة رجال قزم
عمار -جيبي جيبي خل اخذة وياي واخرب على عزام خطية فرحان حسبالة بس هو عريس اليوم الا اخلي يكسر خشمة تعال بوية علاوي تعالي
اليوم ماتطلع من الديوان اذا ما هاديلك مرة
واني ظليت اضحك واقرة المعوذات على ابني وحصنتة قبل لايطلع

صعدت لشقتي ولبست بدلتي كان لونهة اسود تجي قالب صب علجسم ويصير على الصدر سلاسل ذهبية و الردن ثلاث ارباع وعدلت شعري سرح مايحتاج اشسورة وخطيت عيوني خليت حمرة مات ماروني طلعت اخبل يمة فديتني
اتصلت على عمار حتى يجي يشوفني
ورة شوية واجة عمار وبيدة صندوكين وعلبتين
عمار -هَـا بالله اشو خلي اشوف
زهراء وهي تدور حول نفسهة
عمار يباوع وعيونة منططة عليهة
عمار -ولج فلك طرج شنهي ناوية تجيبيلي الجلطة
زهراء وهي حاصرته البجية تخاف مايقبل على لبسهة

عمار يا الله نقطت ضعفي عيونهة بنت الاوام وشلون عيون عندهة -هَـا هَـا شحجينا وانتي گبل طاحن دموعج
بعد راح اسميج ام دميعة

عمار -هذني صناديك الذهب مالت البنات وامي راح اضمهم هنا بالشقة لان عندنا حفلة وناس طابة طالعة وتصير علينا رجل
من تنزلين قفلي باب الشقة وياج واخذي المفتاح
ماخليت الذهب عند نوال لان شقتهة تصير ميدان بالحفلات والبنات كلهن يدخلن بغرفتهة ويكعدن يلبسن وينزعن
وشيخة عندهة بنات صغار وشقتهة حلل
فانتي الوحيدة ماعندج شي بالشقة

زهراء
قفلت باب الشقة ونزلت وشفت اسيل
رجعت من الحلاقة وطالعة تجنن
رحت للمطبخ حتى
اخذ صينية التقديم للصالة
وشفت شيخة طالعة حلوة بس جانت تباوعلي بطرف عينهة
شيخة-هَـا ام الرياجيل اخذتي عمار وارتاحيتي
زهراء-ما راح احجي وياج وراح اتجاوزج بأخلاقي

شيخة -شوف مني تحجي بالاخلاق ولج انتي ك....ة
انتي اخر وحدة تحجي بالاخلاق

نوال وبزمخة-شيخة. شنو هالحجي الماصخ المالة داعي والله محضورة جان حجيت لعمار واخلي يعلمج
شغلج
تردن الناس تحجي علينا وتكصرن رگابنا بهذرتجن
يالله تحركن كلمن تروح لشغلهة منا خطار

زهراء
احس نوال صبت على گلبي ماي بارد من حجت عليهة
رحت اخذت الصينية ودخلت للصالة وقدمت العصاير
الصالة متروسة نسوان وهمزين هي جبيرة وحاطين كوشة كلش نازكة مال خطوبة والنسوان ملتهيات بالسلام والسوالف وشفت امي اجت ويمهة اختي زينة لابسة وعبايتهة وفوكهة البوشي
اني رحت سلمت عليهن

زينة -زهورة وين انزع عباتي والبوشي واعدل نفسي

اشرتلهة مناك ليغاد تصير عندنا هول صغير هذا مكان يكعدون بي الحجي والحجي بالشتا لان دافي ومكان مغلق موً مثل الصالات مفتوحة والبرد يلعب بيهن

وراحت
زينة دخلت لبيت عيال زهراء واني امي
واني شايفتة قبل ماشاء الله ربي يزيد ويبارك شلون حلو شفت زهراءاجت علينا وبوستنا واشرتلي على الهول حتى اروح انزع العباية والبوشية
رحت للمكان الي كالت عليه زهراء بس دخت شفت موزع بي ثلاث ابواب واحد مقابيل الثاني
صلوات همة بيتهم جبير وزهراء خطية مشغولة بالتقديم للخطار فختاريت باب عليك يالله ودخلت شفت ممر بي مراية جبيرة ومغسلة وبصفهة درج مبين هذا درج الخلفي مالت البيت
وشفت ماكو احد كمت شلت البرگع ونزعت العباية وكعدت اعدل مكياجي الخفيف امي ماقبلت احط مكياج الا بطلاع الروح وعدلت بدلتي جانت قصيرة ولونهة جويتي بحيث بارز بياض جسمي منه عدلت وكملت وشلت عباتي وبرگعي على ايدي ودرت وجهي اطلع
يمة واشوف رجال ساد الباب بطولة مجتف ومنتجي على الباب ويباوع علية من فوك ليجوة عيونة تريد تاكلني زينة وبخوف بسرعة تذكرت روحهة مفرعة فتحت عبايتهة بسرعة وشمرتهة على راسهة ووجهة وغطت روحهة
زينة وبصوت ناصي يرجف -خوية الله يستر على عرضك خليني افوت
هشام من ردت ادخل للصالة اختي شيخة گالت تعال اريدك بشغلة وكالت انتضرني بالصالة واني بطريقي للصالة شفت بنية بالممر واكفة لابسة عباية اقتربت اكثر شفتهة لابسة بركع گبل عرفته اخت مرت عمار اي هي نفسهة الي شفتهة يم براد الماي دخلت وضليت منتجي على الباب وهي كعدت تسويلي عرض ازياء وكامت تنزع كدامي قطعة قطعة
نزعت عبايتهة ونوب نقابهة ولحكهن الشال واني بس اباوع وعيوني سبلت على حسنهة هنيال امهة عليهة
شفتهة تعدل بفستانهة عليهة سيقان تگول مرمر من الجمال ولابسة كعب عالي
هو انة بس شفت عيونهة واتخبلت ونوب هنا الاخت جاي تسوي اغراء شنهي ماضل عقل بية
شفتهة درات علية وشهكت اويلي يابة فكت عيونهة جا غير تموت
ونوب شمرت عباتهة شلون ماجان على راسهة ووجهة
بس الاخت نست رجليهة طالعة جنهة گيمر
تكلي الله يستر على عرضك خليني افوت

هشام -جا خوية الله يستر على عرضج رجعيلي گلبي
خلي اروح

زينة هسة هذا شحجي وياه -رحت بتجاهة حتى اوخرة من الباب واطلع
هشام -لا لا الله يستر على عرضج لاتسويلي شي والله اهلي يموتني اذا شافوني يمج
زينة ضحكت على حجية يعني گلب السالفة علية نوب طلعت انة اتحارش بي مو هو
هشام سمعت صوتهة من ضحكت وانة خرفيت
گلت هاي بعد لو سوت حركة ثانية احتمال اسوي مصيبة ببيت عمي واشهرهم فخلي اعوفهة تطلع احسن لا اجيب راح العيد
والله ووخرت من الباب وهي بسرعة ركضت راحت جوة علبيت

خلصت حفلة اسيل وعقدت واخذت صور هي وعزام وثنينهم شلون طالعين جنهم عصافير والحب مبين عليهم
اجتني رسالة من عمار
كاتب بيهة فتحلي باب الشقة راح اصعد فوك تعبان

رحت صعدت فوك وفتحت باب الشقة وانتظرت عمار هسة ماكو بس سمعت صوت نوال تصيح علية رحت ركض عليهة
شفت نوال شتريد- هَـا نوال شنو تردين
نوال -انتي موجنتي تدورين علية ترديني
لان البنات گالن خطية زهراء جانت تدور عليج وگالت نوال وين
زهراء-لاماجنت اتدور عليج
نوال -يالله اگلج راح نسوي عشا للناس لان راح يبقون عندنا للعشا لان الشيخ سلمان لزمهم على العشا

زهراء -جا خوش خلي اصعد ابدل ملابسي وانزل اساعدج بالمطبخ
نوال -يالله حبيبة خفي ايدج واستعجلي

زهراء رحت صعدت شفت عمار ما صعد فكمت بدلت فستاني ولبست گلابية خليجة حلوة علية وفوكاهة شال وقفلت باب الشقة ونزلت وخليت المفتاح بصدري حتى مايضيع
نزلت يم نوال بالمطبخ وكعدنا نشتغل احس ضهري انكسر من الشغل والطبخ واللف وگلي وهاي واحنا عندنا خدامات وما نلحك على خطار ماشاء الله
رحت للمخزن اجيب شكر من الدبة مالت الشكر الي بالمخزن
كمزت من لزمني عمار من زندي ودراني عليه وقربني منة
عمار -اشتاقيتلج واجيت تنطيني تصبيرة مناعلى ما يجي الليل
زهراء وبغنج ودلع -عموري مايصير هيج انت لازم تصير عاقل وحباب
عمار وهويقربهة عليه -من احترك ابو عموري هو انت بقتي بية عقل اشو دتعاي خلي اشمج نزل راسة على رگبتي وكعد يشمهة وتحولت الشمة الي بوسة وتحولت البوسة الى عضة
زهراء دفعت عمار من صدرة وهي خدرانة وجفونهة ذبلن من ورة حركة عمار
زهراء -اذابقيت هيج تسوي راح ننفضح والله فروح احسنلك واحسنلي
عمار-من اشتعلو دتعاي بس خل احجي وياج اوكفي
زهراء -لاعفية صير عاقل
نوال -زهراء شنو وين صرتي هو شكر قابل رايحة تصنعينة
زهراء دفعت عمار واخذت لشكر لنوال واني رجلي يرجفن من ورة حركات عمار الجريئة
شفت عمار طلع من المخزن ويمسح بالكلينس رگبتة لان صارت بيهة حمرة
ههههه حل يستاهل مر من يمي وطلع من باب المطبخ بس قبل لايطلع همس اشتعلوا عشيرتج نار ونفط

زهراء
صرت احب عمار لدرجة الجنون والشغف مجرد اسمع صوتة يظل گلبي يرف مجرد اشم عطرة اسكر بدون خمر
عمار ملكني وگلب كياني بتصرفاتة بشخصيتة بحنانة وحتى قساوتة حتى عصبيتة كلشي احب بي
ربي يحفظة الي

خلصت العزيمة بعد ما انهلكنا اني ونوال والله حتى شيخة كربت ويانة
اجيت اخذ علاوي واصعد فوك لشقتي
بس هذا البطران ويريد يلعب ومايقبل يصعد وياي خالتي گالت عوفي يمنا اليوم ينام بحضني
وعلاوي -لوحي لوحي انة انام بگن بيبي (بحضن بيبي)

عفتة وصعدت فوك وشفت عمار منتجي على الباب منتظرني
زهراء-ياسودة علية صارلك هواي منتظر هنا؟
عمار لا ماصارلي هواي
زهراء جاي امد ايدي اريد اطلع المفتاح من صدري

عمار -هوب هوب اوكفي بقي بمكانة اني اطلعة
زهراء صفنت ما افتهمت قصدة
شفتة مد ايدة ودخلهة لصدري وطلع المفتاح
عمار -هنيالة للمفتاح شبع حنان ودفو حالة احسن من حالي
زهراء بخجل وبهمس خدرانة - انت والله ماتستحي
عمار وهو يجرهة من ايدهة ودخلهة للشقة وسد الباب وراهم
وبقة لازمهة من ايدههة واخذهة للقنفة
وكعدهة بحضنة وفتح شعرهة وظل يشم بعطر شعرهة
عمار -انة صرت مدمن على شعرج وشفايفج وحضنج وكلج
زهراء-حتى اني صرت مثلك مدمنة بس ثولة ابسرعة اخدر
عمار يموت على جرئتهة الخجولة -اخخ بوية سلمان
مددني على القنفة وصار فوكي

وخمط بوسة من شفايفي ووووووووووووووووًًًوووووووووووووووووووو
ووووووووووو
(
((الكاتبة
ماوراء الكواليس
اي نكمل سالفتنا بالله ذكروني شجنا نحجي ها اي ااتذكرت ماعليكم بيهم لاتباوعون فوك 🙈☝🏻عليهم عوفهم خلي ياخذون راحتهم هذولي ناس كفار مايحسون بالحدايق))

بعد ما خلصت ال(ووووووووووووووووووووو)
دك نقال زهراء -الو هلو زنوبة
زينب -مشكورة زهورة ماتقصرين امي انطتني الفلوس وطلعت عندهة ٦ملايين حبيبتي ان شاء الله بس اسوي سلفة ارجعهن الج
زهراء-خية شنو السالفة قابل اني شنو قدمتلج والله لو عندي بعد فلوس جوة ايدي والله ما اقصر ادزهن الج

زينب -ربي يخليج ويحفظج يا احن وارقى اخت
حبيتي اخذي راحتج يالله مع السلامة

زهراء -الله وياج حبيبتي

زهراء سمعت صوت عمار يصيحني بغضب -زهراء
زهراء-ها عمارشبيك
عمار -زهراء انتي فتحتي باب الغرفة اليوم بالمهر
زهراء - ليش شكو شصاير
عمار وبشك -صندوق ذهب ماكو
زهراء -اني مانتبهت عليك هنة شكد كم صندوك
عمار -هنة صندوكين وعلبتين مال ذهب
وهسة مختفي بس صندوك
وباقي بس صندوك وعلبتين بالله روحي جيكي ذهبج شوفي موجود
راحت زهراء وشافتة موجود على حطت ايدهة ماملعوب بي
زهراء -هذا ذهبي على حطت ايدي ماضايع منة شي

(طبعا ملاحظة من اگول صندك مو معناهة حجم الصندوك بحجم صندوك الطماطة لا صندوق صغير الحجم فقط للتوضيح)

هنا عمار -زهراء احنا انبگنا واكو حرامي داخل بيتنا
هسة خل انام لان كلش تعبان والباجر يصير خير

وصارت الاحداث وكعد عمار يوم ثاني واجتمع مع افراد العائلة بالصالة

عمار -شوفو البارحة صعدت الذهب فوك بشقة زهراء وهي قفلت الباب ونزلت
وبعدين بالليل رحت اشوف الذهب حتى ارجعة للبنات عندهن شفت صدوك من الذهب ماكو مختفي
وكعد عمار يحقق
فدار وجهة على زهراء
-احجيلي زهراء شنو سويتي البارحة
وكعدت زهراء تحجي شنو سوت من تزلت من شقتهة لحد ماصعدت فوك وشافتة
عمار بعد اتذكري
زهراء -ماكو بس انت دزيتلي رسالة كتبت بيهة صعدي فوك فتحيلي باب الشقة
اني هم رحت فوك وفتحتلك باب الشقة وكعدت انتظرك
ونوب صاحتني نوال عفت الشقة مامقفولة ونزلت شفت شنو نوال رادت
نوال -اي صحيح صحت لزهراء لان البنات گالن زهراء جانت تدور عليج وتريدج فصحتهة ردت اعرف شتريد

عمار وبشك شكد جانت الفترة اللي نزلتي بيهة
زهراء -ماكو دقيقة ماطولت وبسرعة صعدت بدلت ملابس وطلعت
نوال انتي شفتي احد فوك بهاي المدة
نوال -لاوالله ماشفت
عمار-وانتي شيخة ما انتبهتي على احد صعد فوك على صفحة شقتنا
شخية -لاعمار ماشفت واحد غريب صعد
نوال -وبسؤال زين ذهب منو الي انسرق
عمار -الصندوك الي بي ذهب شيخة
شيخة بشهكة -يمة ذهبي انباگ عزة العزاني زين منو دخل علينة

زهراء احس كل اصابع الاتهام توجه الي
واني بوكتهة لزمتني الباردة
زهراء وبصوت مخنوك-فتشو الغرف
عمار - مايفيد نفتش الغرف قابل الي باگ الذهب يگعد ينتظرج شي اكيد راح يطلعة برة البيت

شيخة -زهراء ماكو غيرج انتي الي بگتي ذهبي
عمار وبزمخة -شيخة احترمي نفسج زهراء مو بواگة
عمار -زهراء راويني الرسالة الي دزيتهة الج بالمهر
زهراء طلعت نقالهة وسلمتة لعمار-
باوع عمار بالنقال شاف ماكو رسالة من عندة وهو اصلا متاگد ان مارسل اي رسالة لزهراء
هي وحدة من الاثنين لوهذا ملعوب من زهراء حتى تضيع الشبهة عنهة
لو اكو واحد ثاني وهذا الثاني كارثة اللي كدر يحبك هيج شي
عمار-زهراء ماكو رسالة بنقالج من عندي
زهراء وبصدمة -زين روح شوف نقال وداخل على الرسائل
عمار-ولو انة متأكد انة مادازلج رسالة بس هم اأكد احسن وفتحت النقال وراويتهة
عمار-زهراء صعدي وراي فوك اريد احجي وياج
ابو عمار-عمار لاتستعجل اسمع منه وافتهم عدل

ام عمار -يمة رجعو دوروا عدل بلكت الله ضايع طايح منا منا

زهراء صعدت فوك والافكار تتقاذف بدماغي والله راسي راح ينفجر
دخل عمار للشقة وراح ورة زهراء بالغرفة وتعثر برجلة بجنطت زهراء مشمورة بالكاع
رفعهة عمار عن الكاع حتى يعلكهة
بس جانت الجنطة مفتوحة وطايج منهة تك ترجية
عمار وبصوت غاضب -زهراء اكدر اعرف هاي تك ترجية شيخة شتسوي بجنطتج

زهراء وموقفهة كلش ضعيف - عمار مااكدر احجي اي شي بس اگلك احلفلك براس عل

عمار وبصوت عالي -لااااا حدج لهنا وحدج لانحلفين براس ابنج
مع الاسف عليج زهراء اذا انتي محتاجة ميحتاج تمدين ايدج علمود الفلوس
جان اجيتيني وطلبتي مني واني انطيج
صحيح زينب اختج جانت محتاجة واعرف بيج ردتي تساعدينهة
بس مال تبوگين الذهب وتسويلج فلم وتردين تطلعين نفسج منهة بريئة هاي ترة حيل واكفة

دهاليز القدر
للكاتبة
Nuha-d-h

اتمنى لكم قراءة مشقوقة شاركوني ارائكم
ولاتنسوووون تعليقاتكم لان البارت الجاي يعتمد عليكم