دهاليز القدر الفصل السادس وثلاثون 36 - بقلم نهى

دهاليز القدر
للكاتبة
Nuha-d-h

حوراء-هَـا عمة نبدي نشوي
زهراء بصوت ناصي
-عمة حور نصي صوتج ترة هنا زلم بالديوان ومايصير خاف يسمعون صوتنة

اخذت االجداحة وكعدت ادور بالگاع على عود شي او ورقة انة متعلمة اشغل التنور كلة هيج لو ورقة لو عود خشب ما اعرف اخاف اشغل بالجداحة احس بالوورقة اسيطر اكثر
دورت واقتربت عالتنور. اشوف بلكي اكو ورقة بس استغربت ان اكو ريحة غريبة
شنو هاي ريحة نفط لالا هاي ريحة بانزين
كمت عفت الجداحة على قنينة الغاز ورحت اصيح البنگالي حتى ينقل التنور لغير صفحة لان الكاع كلهة بانزين مايصير اشغل التنور وهذا البانزين تارس الگاع
خاف يكب بوجهنا ونصير دجاج شوي
زهراء -عمة حورة ابقي هنا عينج يم السمج لاتاكلة البزونة بس خل اصيح البنگالي

درت وجهي وعبرت الحديقة ووصلت للكراج حتى ااصيح البنگالي بعدني ما واصلة واسمعلك صرخة عالية صوت حور تصرخ
اني بفزعة التفتت وشفت نار گبت واشتعلت حيل وتريد توصل لحور اني گبل ركضت بين ما وصلت شفت النار لگفت طرف ثوبهة شفت حور تصرخ من حلات روحهة واجت تركض لصوبي واني اتلكيتهة بصريخ وحسيت على الزلم والرياجيل طلعوا من الديوان بس ما شفتهم

لكن النار جانت كلش سريعة واشوفهة شلون لهمت ثوبه لحور وما وعرفت شسوي حسيت بگلبي صار عليهة مثل الطير المذبوح ظليت بس اگمز وتهسترت من منظر حور وهي تحترك والنار تلهم بيهة گدامي
وجانت تصيح بصوت عالي -عمة زهراء لحكيني احتركت عمة حبوبة طفيني
كانت الفترة ثواني وكنت امام خيارين و صرت لازم اقرر بيهة اما ان احافظ على ستري امام الرياجيل الجاي يركضون باتجاهنا وادري بيهم منا لحد ما يوصلون تكون النار قضت على حوراء
او اتنازل عن ستري
وهنا ماتردد ولا لحظه
وبسرعة وبحركة وحدة نزعت الاحرام ونگعتة بماي موجد بالحديقة ورحت شمرت نفسي على حوراء وولفيتهة بالاحرام المبلل والنار الي جانت واصلة لحد خصرهة
و نخمدت النار بسرعة من لفيت حور وخليتهة بحظني
واني كاعدة وياهة بالگاع ابجي وعاين عليهة وصخام الحريق تارس وجهة سودة علية عمة حورة
وجان اكو صخام على زنودي وخدي وظليت اصيح وابجي عليهة
-ولج عمة حور لا على بختج عمة حورة

شفت الزلم انخبصت بين اليركض علينا وبين الي يشغل السيارات
حسيت على واحد شمر علية شي وسترني بصاية العباية مالت الزلم رفعت راسي شفتة عماربس راح يركض ورة
هشام لان اجة واخذ حور من حضني شالهة وركض بيهة للسيارة

سمعنا صوت صرخة شيخة المفجوعة شفتهة شلون ركضت من باب المطبخ تركض مثل المخبلة وتلطم على وجهة وتصرخ

شيخة
وهي تحس بجزع وانهيار على بنتهة وتشوف زهراء شلون ركضت تطفي بحوارء وشلون نزعت احرامهة ونگعتة ولفت بي بنتهة حتى ما خافت على نفسهة من النار

شيخة بصريخ وصوت عالي-ولج يمة حورة ممو انتي اللازم تحترگين بالنار
وبصوت عالي
ولج يمة حور اني الموتج بيدي اني الحرگتج بالنار انة الذبيت البانزين بيدي يم التنور
ولج يمة حور شوداج هناك
يمة انة القتلت بتي بيدي انة يمه ردت احرگ زهراء والله طلعهة ببزري

شفت عمار ركض على
شيخة الي تخبلت وركضت ورة سيارة هشام بالشارع واخذهة وجرهة ودخلهة جوة للمطخ وودفعهة قوي ووكعهة بالكاع مالت المطبخ وبغضب بصوت عالي
عمار-نوال لزميهة لاتخليهة تطلع
طلع وسد الباب حيل وراح ركض على سيارتة حتى يلحك على هشام

عمار
جنا انة وولد عمي وربعي والشيخ زامل صديق ابوي وابوي گاعدين بالديوان
وسمعنا صريخ عالي اول مرة جان بس صوت حوراء تصرخ حيل وبخوف
وبعدهة سمعنا صوت صرخة ثانية انضم لصوت حوراء سمعتة صوت زهراء
انة گبل ركضت حافي من الديوان واشوفلك من بعيد نار گابة واقتربت على الناراركض اريد اشوف شنو شصاير حسيت عالزلم والربع كلهة طلعت وراي وانة جاي اركض شفت حورة بنتي النار لاكفة طرف ثوبهة وشفت زهراء تركض بتجاه النار لعند حوراء وخطية حور ركضت لزهراء وتصرخ عمة طفيني هنا شفت زهراء اترددت ثانيتين لكن بالثالثة شفتهة نزعت احرام الصلات ونگعتة بالماي شمرت نفسهة على النار الي تلهم بحور ولفتهة وحضنتهة وگعدت بالگاع تبجي واني اركض اريد بس اوصللهم احس برجلية صارن خيوط من هول المنظر والهبطة وشفت الشيخ زامل ركض على سيارتة حتى يطلعهة من الكراج لان صايرة ورة سيارة هشام فشفتة لابس صاية يصير شكلهة عباية مال زلم

گمت سحبتهة من جتفة وركضت ذبيتهة على زهراء وصل هشام واخذ حور من حضن زهراء وركض بيهة للسيارة وحرك السيارة بسرعة وطلع اجيت اركب وياه وشفت شيخة تطلم وتصرخ وطلعت بشارع وركضت ورة السيارة رحت اخذتهة ودخلتهة من الشارع ودفعتهة بالگاع وگلت لنوال لاتخليهة تطلع
واني مصدم على حرگ بنتي حور ومن الكلام السمعتة من شيخة

عمار
وصلنا للمستشفى وانة وهشام صارت دخلتنة سوية بنفس الوقت رحت اركض عسيارة هشام وفتحت باب السيارة وشلت حورة بحضي وركضت بيهة لداخل المستشفى واتلگوني الممراضات بسدية واخذوا مني حور
ودخلوهة لغرفة الطوارئً وانة. انهاريت بالگاع رجلية ماگامن يعينني وگعدت بالگاع احس انهد حيلي من الهبطة على بنيتي وعلى ام بيتي ومريتي اجيت اتخبل بيوم شفتهن اثنينهن بوسط النار وانة بعيد عنهن

هشام كعد بالگاع هو الثاني بصف عمار حسيت عليه هو هم اكل هبطة من موقف حريق جسم حوراء وكلام اختة شي مايشيلة العقل
ورة ساعة واحنة من منتظرين

ام زهراء
اتصلت على زهراء
اليوم الظهر اريد اطمن على حملهة وشفتهة ماترد ونوب رجعت اتصل عليهة مرة ثانية سمعت صوت وحدة ردت عالنقال مالت زهراء واسمع يمهة اصوات صياح وصريخ وناس مخبوصة
ام زهراء دخيلك ياربي شنو شصاير
ام زهراء-هَـا يمة زهراء شنو شصاير عندكم وشنو هالصريخ
اسيل-لاخالة انة مو زهراء انة اسيل
وهي تبجي وتعيط
ام زهراء اني وگع گلبي بين رجلية -يمة بنيتي زهورة بس لاصار عليهة
اسيل وهي تبجي-خالة احترگنة زهراءوحوراء احترگت

ام زهراء- انة سمعت حجي اسيل منا وانة وگعت من طولي
وركضوا علية ابو زهراء وزينة

ابو زهراء-ها خير خير شكو شبيج يامرة

وحجت ام زهراء الصار
گبل ابو زهراء اتصل على عمار وسألة بَـــأي مستشفى وسدة بوحه عمار وما اتنظرة يكمل كلامة
واخذ ام وزهراء وزينة بنتة للمسشفى بسرعة وهمة الخوف ماخذ وصلة من گلبهم على بتهم

عمار بعد ساعة ونص
وانة وبصفي هشام كاعدين بالگاع ووجهنا بي صخام من دخان الحرك
شفنا ابو زهراء يركض علينا وامهة واختهة يمشون وراه
ابو زهراء وبخوف-هابوية عمار زهراء بنيتي شبيهة
ام زهراء وهي تبجي-يمة بنيتي راحت صخام الصخمني
زينة لاؤل مرة يطلع صوتهة وبحرگة گلب -ولك على بخت خوية عمار اخيتي وينهة فدوة لطولك اريد اشوفهة

عمار وبفزة هو وهشام گاموا من الگاع
وگعد عمار يطمن ابو زهراء وامهة واختهة -لاتخاف عمي مو زهراء الحترگت بنيتي حورة هي الي احترگت

زينة اني ارجف واحس النفس صار مثل الطابوگ على صدري بس سمعت حجي عمار واني اغمى علية

هشام
شفت اهل زهراء اجو مخبوصين وخايفين على بنتهم حسبالهم هي المحترگة بس عمار گعد يطمنهم من خلص كلامة شفت اختهة وگعت واغمى عليهة
انة هنا گلبي خمطني وما حسيت على روحي الا وانة راكض لزينة ورفعت البرگع وكعدت اضرب على كيف
على خدودهة واجت امهة علينا
وركض عمار جاب ماي واخذتة امهة من عندة وكعدت ترش على بنتهة وهي راسهة بحضني صار
وابو زهراء راح يصيح للدكتور
و خطية شوية فتحت عيونهة ترمش
هشام هنا ماحس على روحة من حجة
هشام -اخ بوية خايب انة بيا حال والدفان يغمزلي
حسيت كلهة تعاين على وجهي
والله ما انتبهت على روحي من حجيت هالكلام بصوت عالي
والله عبالي وبكل عقلي جاي احجي وية نفسي
بس من شفت عمار داير وجهة ويريد يضم ضحكتة عن عمي ابو زهراء
انة هنا عرفت اخوكم جفص بالحجي
خايب هو انة شما اشوف عيون هلمگرودة اشو اتسودن وتخردل ومااگوم اجمع بالكلام وما اعرف شحجي
ونوب حاطين راسهة بحضني ادري مايخافون الله هذولي ويعاينون على حالي
گمت وخليت راسهة بحضن امهة واني ايدي ترجف
لان بالعباس اذا مطول دقيقة لأسوي سواية اخلي كل الي بالمستشفى تحجي بيهة بس خل اوخر واستر على روحي احسن
لايبطل ابوهة وما ينطيني مرة
نوب خاف عبّالة انة واحد امسودن
اي صدك مسودن وواگع بهوى بنيتك ياعمي

طلع الدكتور وطمنا على حوراء
والحمدلله الحرگ لايح بس رجهلة اليسرة واصل للورك ومتلاحكينهة
والفضل يعود لزهراء بيوم طفتهة لان لو ما هي صارت فطنة ولفتهة بالاحرام جان صاعد على جسمهة وصدرهة من صفحة الگلب الحمد لله
الله سترنا

زهراء
مرت على احداث الحريق شهر
وخلال هذا الشهر عمار طرد شيخة من البيت واخذ بناتهة من عندهة
والكل مصدوم بفعلتها عمي وعمتي ظلو يحجون
اتذكر عمي ابو عمار
-شوفي ولج سالفة الذهب البكتي بلعتها وسكتت وكلت ميخالف بنت اخوي والشيطان شاطر وهاي من الغيرة
وكلت اسكت لخاطر بناتج
بس مال تجين وتسوين هاي السواية وتردين تحركين بنت العالم لا هاي واكفة هاي الماينسكت عليها
ولج انتي صرتي خطر حتى على بناتج بعد ما راح اكدر اأمن عليهن يمج
ومن يومها
شيخة عند اهلها بس ساكتة وتصفن جنهة مخبلة وماتحجي شي ولا تحجي وية احد حقهة يصير بيهة هيج لان حرگت بنتهة بيدهة وعقلهة ما اتحمل الذنب

واني وعمار خلال هاي الفترة علاقتنا على ماهو عليه
مايقترب مني كان ملتهي بين الشغل وعلاج حرك حوراء
زهراء ابتسمت من
اتذكرت حنيتة علية بيوم دخل للبيت علينا وشافني گاعدة منتظرتهم يجون ويجيبون حور واني باقية على نفس گعدتي وما بدلت ملابسي من الخوف والتفكير
شفتة اول ما دخل عاف اهلة واتوجه علية ومد ايدة وگًومني و سحبني لحضنة گدامهم وباسني من راسي واني هنا شلون الطفل شمرت نفسي بحضنة وحضنتة اخذني وصعدني وياه الدرج ورحنا لشقتنة وگبل دخلني للحمام وفتح الدوش ونزعني ملابسي ودخلني جوة الدوش وكعد يسبحني شلون الطفلة
عماروهو يسبح زهراء وينظر الهة بحنية ابو -ليش ركضتي عالنار هيج ضايجة مني وتردين تخلصين مني
زهراء شفت بعيونة حنان وخوف الابو على بنتة ا
وانة الدموع ترست عيوني وما گدرت احجي شي
سد الدوش وسحب المنشفة ولفني بيهة وشانلي ووداني علسرير
وسحب الغطة علية وغطاني واني مثل الطفلة حطيت راسي على صدرة وشميت عطرة وماحسيت على روحي من نمت

وكالعادة كعدت يوم ثاني الصبح و ما شفت عمار يمي
ورجع الحزن يغزو صدري
وعرفت ان عمار بعدة ماناسي كلامي بذاك اليوم
ولازال الحاجز موجود الى الان بينّا
رحت نزلت وشفت عمار وحور ونوال محضرين جنطهم يريدون يسافرون للبنان علمود يعالجون حور
انقهرت من شفتة راح يسافر من جديد
ويعوفني لوحدي بدون حضنة للمرة الثانية

ورة شهر على حادث الحرق

زهراء
اليوم راح يرجع عمار من السفر هو ونوال وحور
والله بيومهة البيت انخبص بالخطار قرايبهم كلهة اجت حتى الي بالمحافظات اجو وصار بيتنا لخة
واني بس اكرب وخطية حتى عمتي وسلوى مرت محمد هم گامن يساعدني بالمطبخ وسلوى حامل خطية تگول والله صار الحمل بالغلط ما مسوين حسابة

وحتى بنات عمهم اجن ويانة يعينونة على الخطار واسيل عليهة الجهال تسبحهم وتبدللهم
وكلساعة داخلة للمطبخ تركض ورة علاوي وهوة يركض على خالتي ويختل وراهة
اسيل -والله يايمة صگطي الولد وخربتيه بالدلال
شوفي زهراء ابنج الثاني لاتخلينة عند امي ترة والله هم تخربة بالدلال
ام عمار وهي تصحك - تولي ولي منا لا بالخاشوكة على راسج وعوفي الولد

زهراي والله
وسمعنا صوت الزلم وعرفت ان عمار وصل
گلبي گام يدك بس من يمر طاريه
شفت نوال وحور دخلو و سلمو وتلگنهم النسوان واني ورحت على نوال وحور وحضنتهم جنت كلش مشتاقتلهن

وعمار ماگدر يدخل لان گبل بوجهة دخل للديوان جان هواي زلم وعيب يعوفهم
واني ظليت احوم على شوفتة جنت كلش مشتاقتلة
وطاك گلبي عليه والله ما اريد شي بس اشم حضنة وبعد كلشي ماريد

ورة ساعات هدء البيت من الناس وكلمن راح لبيتة
وبالليل يالله عمار فك ياخة من الخطار ودخل وسلم على اهلة وسلم علية من بعيد جان بوكتهة كلش تعبان من السفر والخطار وظال على فد وكفة من الصبح
لحد هسة من سلم علية وهو وگاعد يم خالتي
احس ماشفة غليلي بسلامة علية صرت مثل العطشان ويريد يروي عطشة

ورة شوية شفتة استأذن من عندنة وصعد الدرج وراح على صفحة شقة نوال مو على صفحة شقتي
وشفت نوال صعدت وراه
وانة اتخبلت ما اعرف شسوي بحيث جنت جاي اصب جاي لعمي ما اتبهت على الاستكان من انترس وحرك ايدي
من ورة حرگت گلبي والله ما حسيت بالالم احس حرگة گلبي اكثر الم من حرك ايدي

يتبع

انتظروني يا احبتي لموعدنا مع النهاية

دهاليز القدر
للكاتبة
Nuha-d-h
يتبع