دهاليز القدر الفصل السابع وثلاثون 37 - بقلم نهى

دهاليز القدر

للكاتبة

Nuha-d-h
زهراء
جنت احط اللمسات الاخيرة على وجهي وسمعت الباب انفتح

زهراء-هَـا عمورتي شوف بالله شلونة الفستان علية حلو لو لا

عمار وهو لازم بيدة علبة -هههههه ولج شكلج يضّحك طالعة جنج بطريق انتي وبطنج
زهراء بزعل-كلة من ورة ابنك صرت هيج
عمار-بالله شو امشي كدامي خل اشوفج عدل

زهراء وهي تمشي بدلع ولازمة ظهرهة وايدهة على بطنهة

عماربضحكة -جا انتي ماتوبين من هاي سوالفج الا من اگوم عليج هسة واكلج اكل اكو واحد يلومني
دنك عليهة وخمط بوسة

زهراء-لالا يالله بعد راح اصير حبابة
هَـا ماكتلي حلو علية الفستان
عمار وعيونة عليهة تريد تاكلهة- اگلج عليج بروح جدج خن عوف العرس وما نحضرة ونگعد نشوف شغلنا عدل حتى نستعجل بجية ولي العهد
مو يگولون الحامل اذا دخلت بشهرهة خلي ابو الشباب يطلع شطارتة دتعالي خل اراويج عضلاتي واشوفج الامهات شجيب والله اذا توافقين على اقتراحي اخليج الباجر الصبح تطلگين وتجيبين
زهراء بشهكة وتضربة على صدرة-ولك انتة تاليتهة وياك والله راح تفضحني بهاي سوالفك
وتريد تقشمرني حتى اعوف عرس اسيل واكعد وية جنابك حتى تشوف شغلك وياي مو حبيبي؟
عمار-شفتي شلون افكر بيج يعني اضحي بعرس اختي
علمودج بعد شرايدة
زهراء -لاحبيبي شكرا و ممنونة لكرمك بس ما اريد الگة ست اسيل هي وبدلتهة هنا تدردم فوك راسي تعرفهة على اخوهة طالعة التردونة تسوونة وهي تريدني وياهة بمثل هيج يوم
عمار وبحنية -بالله شو دوري انطيني ظهرج
زهراء التفتت وصارت مقابل المراية وهو صار خلفهة فتح علبة طقم الذهب وگعد يلبسهة الگلادة وباس مكان الگلادة وبعدهة كمل تلبيس باقي الطقم
تعرفين قصة هذا الطقم
زهراءبستفهام -شنو قصتة؟
عمار دراهة عليه-تدرين هذا شريتة الج من بعدشوفتي الج بالساگية
تعرفين شكد جنت منتظر هاللحظة حتى اسولفلج على عيونج شلون وگعني بيوم شفتج غركانة بالطين جنت اتنمى بوكتهة احطج بحضني واضمج واكعد اسولفلج شلون گلبي حبج

ودنك عليهة وباسهة من راسهة

عمار بضحكة-اكلج مو جنج كصرانة اشوية لو يتخيلي
زهراء تضربة على صدرة -لاحبيبي تتخيل اسم الله علية ماكصرت بس ابنك ثگلني

زهراء وهي فرحانة تباوع لروحهة بالمراية وتنظر وتتلمس العقد النازل على صدرهة

ابتسمت واتذكرت ذيج الايام كيف عانت وية عمار وشلون دارت بينهم لحضات العتاب

ام عمار- شبيج ياخالة مانتبهتي شجاج وين علقج
وبديتي الجاي على روحج

زهراء واكو غصة بقلبهة وتريد تبجي-لا خالة ما بية شي بس شوية تعبانة
ام عمار-گومي يمة عوفي البيدج وروحي صعدي لدارج شوية ارتاحي ترة ام الولد تصير ثكيلة الحمل فتشوين نفسج بسرعة تعبين
زهراء وبالهة مو يمهة بالهة صعد فوك وية الصعد وعافهة ومادرة عنه
-اي خالة صاعدة
ومرت الايام و كان عمار جدا مشغول بالعمل لان كان تاركه كلش فترة طويلة علمود جان مسافر للبنان حتى يعالج حوراء. جان يطلع من الصبح يجي بالليل
وحتى اهلة ما يشوفونة كل يوم من يرجع اشوفة يصعد ينام عند نوال

زهراء وبقهر -نوال سؤال
نوال-سئلي خية
زهراء-عمار شبيه اشو منشوفة ولا يسأل علينة
نوال-لاوالله خية بس شوفة عينج يطلع من الصبح للشغل ومايرجع الا بالليل حتى اكل ما ياكل بالبيت يكول لان عايف الشغل صارلة هواي ولازم يخلصة وهو جاي ينام عندي يگول خليني هنا انام ما اريد اتعب. زهراءوياي وخطية هي حامل

زهراء
نوال تحجي وانة. افرك بالجدورة حيل
ومن القهر سويتهن يلمعن
اي خطية على الاساس هو حنين حيل على زهراء
هو زين اذا اتذكر اسمي واجة على بالة
زهراء وهي تحجي وية نفسهة
هاي هي وصل حدهة بعد ما راح اسكت واليوم بس يجي اسويلي حل وشيريد يصير خيصير

واتخذت قرار لا رجوع فيه

وبوكتهة
من دخلت على الصالة وشفت عمار راجع للبيت من وكت بيومهة باوعت عليه بعتب وطلبت منة احجي وياه من يفرغ
وعفتهم وصعدت فوك لشقتي
حسيت على عمار صعد وراي لشقتنا وشفتة واكف بالباب متردد بالدخول

زهراء وبكل قسوة-لاتخاف عمار فوت ادخل جوة ما راح افرض نفسي عليك بعد اليوم
عرفت عمار ليش ما يريد
يدخل لان يعرف نفسة اذا نوجدنا انة وياه بمكان واحد مراح نگدر نتمالك انفسنا
لان مانستطيع نبقى سوية بنفس المكان ومانكون بحضان بعضنا لان احنا اثنينة نملك نفس نقطة الضعف وهي الحب والشغف الي نملكة بأتجاه بعضنا

زهراء تحجي وهي مدنگة- عمار اني استسلم و بعد ما اكدر اقاتل لاكمال زواجنة ما اگدر اكمل وية شخص بايعني وعندة كبريائة اعز عليه من زواجنة
وهسة عرفت مكاني بحياتك انة نكرة
و اني بالنسبة الك لاشيء

زهراء وبصوت ممزوج ببرودة القساوة-عمااااار طلگني

وگف عمار ينظر. لي بصدمة من الي سمعة
عمار-شنو گلتي ولج اشو جنج گمتي تخرفين وجاية تطلبين الطلاك شوفي ولج نجوم السما اقربلج من الطلاگ
ترة انة لحد هسة عايفج براحتج وساكت بس مو معناهة تگعدين تسربتين
زهراء-عمار انة جاي احجي صدك يعني عاجبتك
حياتنا هيج لااني مطلگة على وجه ولا انة متزوجة وباقية معلكة وياك
والله خليتني احس بروحي عالة عليك

عمار وبغضب -هَـا وهسة انتي طالبة الطلاگ علمود انتي باقية معلگة
وشوكت انة محسسج انت عالة شبيج شناقصج اشو كلشي عندج والتحتاجيه اشو گبل يجرالج بعد شمحتاجة وگاعدة وتتحسرين عليه

زهراء-لا عمار غلطان الگلّگ انة مرتاحة وغلطان اذا كنت تحسب الاكل والشرب واللبس هي نوع من انواع الراحة لاعمار انة هواي محتاجة اشياء وضالة بحسرتهة

اني محتاجة هذا (وهي تأشر على گلب عمار)
محتاجة حنضنك الي تبخل علية بيه
بس تعرف شنو اكتشفت
اكتشفت ان انة الضعيفة مو انت انة الي ما استغنة عن حضنك مو انتة
والدليل انت كملت حياتك وانة اتدمرت
وابشرك شربت من نفس كاس الضعف الي سقيتك بيه واجة اليوم الي تشوفني بيه شلون اعاني من بُعد حضنك وصرت انتظرك بلهفة وشوگ حتى اشمك
واهنئك على كسرك الي
انة اعلن انهازامي
واعترف اني جبانة وغبية اي غبية
لان حبيتك حب اعمي وصرت مثل الضايع
الداخل بدهليز وما يعرف ليوين يقودة هذا الطريق
وشنو نهاية

زهراء-طلگني وعيش حياتك وارتاح
وخلي كبريائك وكرامتك تنفعك

عمار باوعلهة بقهر- انت شتعرفين عن الحب وجاي تحجين بي
وانت بعدج باول الطريق وصحتي تعبت من حٍٍِْــًبٌٍـــِٓېٍٓ الك
((ولج انطيج مثل عن اليحبون ولج اليحب مو ساعة ويهون ))
ولج لو افتح هذا(وهو يأشر على گلبه) يشيب راسج على الالم العايشة ولج كضيت عمري بس الهط من التعب وكلهة تريد نفسهة مني وكضيت عمري بس ارضي احبابي واشوف احبابي مايوم سألوني عن حالي

وانتي شعرفج بصبر المحب
ولج بيوم الوگعتي بدربي بساگية الطين بساعتهة انتي ماطحتي بالساگية ولج انتي هنا طحتي (ويأشر على گلبه )
شحجيلج بعد عن صبري تردين اسولفلج على الحرگة من زفوج گبالي لاعز ناسي
لو اسولفلج شلون تجرعت الوجع من اشوفج بحضنة ويناغيج
وانة اظل وية الالم والمر هو اليناغيلي واهون على گلبي واگول
((مادام شفتج ويّة غيري حيل عشگانة
گلت دصبر ياگلب ونساهة لفلانة
وخلهة ويّة المحب تراهة اهواي فرحانة ))((خاطرتي ))

عمار
صبرت ودفنت حبي الج بگلبي وسويتلة قبر
ولج صار الج مزار بگلبي گمت استبرك بيه

حبي الج مثل الطفل الميت المالحك يشتم الهوى من طلع عالدنيا هيج جان حالي وية حبچ

يزهرة اذا انت تحبيني فأنة اهواج اتنفسج
اقتربت زهراء من عمار وهي متفاجئة بكلامة
وشمرت نفسهة وهي تبجي على حضنة
زهراء-اوف ياعمار تعبني حبك كل هاي السنين وانت كابت بگلبك وساكت واني بكل ظني انت تعطف علية بيوم تزوجتني وسترت علية وعلى ابني
عمار وبلهفة-اشو تعاي اشم حضنج خليني اعوض الي فقدتة
زهراء ضربتة على صدرة -انت عنودي وبخيل علية ولك
تدري اني بحملي اتنسيت على حضنك
عمار-اخ الله ولج تعالي لحضني لايطلع بالولد وحمة حضن ههههههه
زهراء وهي تبتعد لداخل الغرفة وعمار يمشي وراهة
لزمهة من ايدهة ودارهة عليه رفعة وجهة بيدة وخلة شفتة على شفتهة يحس صارو بجمر من كد الشوق
وتركهة واكفة وهي تحس بالضعف من اثر البوسة
ونزل وركع على ركبته وصار مستوى راسة وية مستوى بطنهة ورفع ثوبهة وشاف الحمل مبين عليهة اقترب منهة وهويرجف وحط شفتة على بطنهة وباسهة وهو يحس بالفخر ان ابنة داخل احشائهة
عمار -زهراء بعد ما اتحمل اريدج
زهراء-عمار انت ماتحتاج للاذن حتى تاخذني وتملكني

عمار وهو اصلا ذايب ومشتاقلهة ويسمع هذا الحجي گبل هجم عليهة واخذهة وياه لعالمهم الخاص

(وبعدها تعانقت الارواح المتعبة بعدَ. الم الفراق والعتاب
اتحدوا فاصبحوا جسدا واحد)

في الوقت الحالي
عمار
وهو يضحك -شنو وين صافن الحلو احجي وياج وانتي مسافرة بغير عالم مويمي
زهراء بنتباه-
هههههههههه اي صدك جان فكري شارد جنت اتذكر ذيج ايامنة من جان راسك يابس شفت شلون احبك حتى من اصفن واني يمك تلگاني افكر بيك
عمار -يالله امشينا خل ننزل هم يالله بس شوفي قبل لاتنزلين خففي الحمرة
زهراء-لاعمار شدعوة عليك ليش اخففهة حتى اني لابسة بركع منو يگدر يشوفهة
عمار وبغيرة-النسوان يشوفنج ويگعدن بعدين يسولفن بمحاسنج گبال زلمهم
زهراء-ههههههههههههههه والله عليك افكار اسرائلية
دك نقال عمار
عمار-الو هَـا هلة هشام
هشام -لا هلة ولا ابو حلة شوف خلي مرتك تتصل على العلة اختهة وتگللهة تطلع هسة و ترگب وياي بالسيارة من نطلع بالزفة لان بنت جابر من يوم الخطبنا گضتهة علية كلة تبيع ثگل براسي
بس اخ الله بس خل انعرس الا اطلع هذا ثكلهة كلة من عيونهة
عمار خربان ضحك-ولك عوف البنية بحالهة راح تشرد من ورة هاي سوالفك
هشام -وين تشرد مني بنت جابر اجيبهة اجيبهة لو باخر الدنيا
اگلك عمير احلفنك بروح جدي ضمد عليك
خلي المرة تقشمرهة وتجيبهة لسيارتي
عمار -ان شاء الله افكر واشوف
هشام -ولكم يا ناس ياعالم ترة هي مرتي وعاقد عليهة محكمة وسيد وهيج تذلوني بشوفتهة
جا خوش يعمير جا اذا ما اخذهة و اعرس عليهة اليوم وية عرس هذا الطلي عزام. چا بسيطة (اليوم الاشهرك بالگروب ياحميد ياحقير )

اليوم الا اخلي عمك يطيّح حظك من وراي ويگلك هذا العار منين جبتة النا واجيت
عمار بضحك -ولك هشيم اثكل فضحتنا بين الوادم
هشام-ولك خايب خوية شثگل اي مو راح اصيربگد نبيل شعيل من ورة الثكل وانتو بعدكم مامزوجيني والله منتظرين بنت جابر تخلص امتحانات
ولكم راح يخلص عمري وهي بعدهة ما مخلصة

زهراء
خلص عرس اسيل وجانت طالعة تجنن واخذنة صور
وزينة بخجلهة خبلت هشام وهو ميت عليهة
وراح يكون زواجهم بعد شهر
وخطية زينب اختي زوجهة مثنى طلع من السجن لان عمار لگالة واسطة من معارفهم عندة مركز بالدولة
وبعدهة عمار طلب من مثنى يستقيل من الدوام مالتة ويجي يشتغل عندة بالمعمل وسواه مدير على العمال وجرالة راتب اضعاف الي جان يستلمة من راتبة ذاك
يگول عمار مثنى شاغول وابن حلال ويريد يعيش وهو كلش فايدني بالشغل
وحبيبتي وصديقتي تبارك انتقلت من مدرستنا الي بالقرية وراحت على مدرسة قريبة من بيتهة وعمتهة ام رجلهة انشلت وصارت تبارك هي المسؤلة عن البيت وهي اللازمة المصرف والراتب مالتهة صار كلة بيدهة
وسلوى مرت محمد طلعت حامل بولد بهذا حملهة وهي ومحمد طايرين من الفرح تكول جنا ما مخططين للحمل مثل كل مرة يكعدون يخططون للحمل ويسون على الحساب وبعدين تطلع حامل ببنية شوف ربك ما ينسة عبدة بدون لاتخطيط ولاشي حبلت بولد سبحانه الله مسبب الاسباب
وشيخة وبناتهة صارن يروحن يشوفنهة كل شهر مرتين
لان عمار ما يأمن على بناتة عندهة من ورة رعونيتهة فقدت النعمة الجانت عايشة بيهة
اما الحبيبة نوال فبقت مثل ماهية

((عائشةٌ على اطلالك ياحبيبي بعدما اخذك مني الموت العجيبِ
و تركني خلفهُ مثل الاسيرة اعانق النفس مع النحيبِ
مكبلة بقيوود حبك فلا يحلو للنفس من بعد. موتك خليلِ))
هذا ماهو عليه حال نوال ((هذه الخاطرة بقلمي))

زهراء
ولك عمار الحك علية راح اموت من الوجع
وعمار وهو خايف عليهة-اتنفسي جري نفس عميق اي اي عفية
زهراء وهي تسوي مثلة
اجت للمرضة يالله مامة نزعي ذهبج وخلي عند زوجج احنة مامسؤلين وفوتي جوة الدكتورة تنتظر

زهراء وهي تباوع لعمار -عيفية اندعيلي هاك الزم هاي التراجي والكلادة وبقت بس المحبس اللي جابة الهة بي خضرمة

وبعد معانات الانتظار والقلق الذي ينتاب الاهل والاصدقاء
وجاءت ساعة الرحمة

الممرضة -مبروك اجاك ولد
طبعا كان يوم ولادتي جدا مؤثر على عمي وعمتي
من انجبت الطفل وحملة عمار واذن وكبر بخشوع بأذن الولد
عمار والدمعة معلگة بعيونة-سميتك ياسر
ونزل راسة على الطفل وباسة
هنا شفت الدموع بعيون الكل وكأنما طيف ياسر يحوم بينا في هذه اللحظات وكان علاوي ابني فرحان باخوه ياسر
علاوي بطفولية-بابا خلي ينام يمي اني ادير بالي عليه
عمار وهو يتذكر اخوه شلون جان داير باله عليه-اي بابا عفيةانت الجبير وانت تديربالك على اخوك الصغير
واذا وكع انت تشيلة

لقد كانت مجرد كلمات متبادلة بين الاب والابن
لكن كانت تحمل بين طياتها معاني كثير

اقترب عمار من زهراء ودنك عليهة وباس راسهة

عمار-الحمدلله على سلامتج ام ياسر ك

وعاشو اابطالنا حياتهم بحلوها ومرها

احببت ان اروي لكم حكايتي بماتحملها من عبر كثيرة

لكن على الرغم من الصعاب التي تمر علينا لكن نبقى نجهل لمايخبئهُ لنا القدر في دهاليزهُ

اتمنى لكم قراءة ممتعة مع تحيات كاتبتكم المخلصة
Nuha-d-h