رواية ضحية لمن لايرحم الفصل الثامن 8 - بقلم زهراء الحسناوي

فصليه جيت اعليك موش برضاتي
جابوني بالتابوت تسحل عباتي

،،،،،،،،،
//ضحيه لمن لايرحم//

//بقلم زهراء الحسناوي//
،،،،،،،،،،،،،،،

صباح الخير

،،. ،،،،.،

غصون، كل كلمه تحجيها المرة روحي تنقبض اكثر ويضل بالي يم زينب طول ماكانت تحجي بداخلي اگول يارب حنن گلوبهم عليها

ام ذياب،،اول ماتزوجت واخذني ابو ذياب الله يرحمه عشنه ابيت عمي الي هو حاليا بيت ابو لواء
هذا جان بيت عيالي كلهم ملتمين بي

الطابق الفوگ الي بي غرفه والثانيه مخليتها عمتي الله يرحمها مخزن والثالثه ل ام لواء
والطابق الجوة غرفة عمتي والاستقبال والمضيف وغرفه لبنات ام لواء الكبار نهله ام سجاد ونذيرة ام جنه
بس جانن مامتزوجات بعدهن احديثات
نهله من زغرها هادئه ومالها صوت وحبابه حتئ من تتعارك ام لواء وياي تضل نهله يمي تساعدني بنوبتي
تدرين انتي جناين ولازم يصير بينهن مشاحنات
جنت مااحجي اضم بگلبي لان عمتي تصف ويه ام لواء دائما
واني من يجي ابو ذياب من العسكريه مجاز مااحجيله اگول خطيه احجيله همومي كافي علي هموم الجيش والتعب اسكت احسن الي

حبلت ورة سنه بذياب وصعبه عليه اصعد الغرفتي
ف افرش بغرفة عمتي لان بطني واصله الخشمي
تجي نذيرة من غبشه من الفجر تسحل البطانيه المتغطيه اني بيها اتگلي گومي علئ ساعه يجي خطار يشوف بيبيتي وانتي مفلگحه وبطنج شكبرها

ولااتگول اني مرت عمها عبالك شريجتها
اگوم الم فراشي بدون مااحجي لو اتعارك لان ام لواء وعمتي يايدن كلامها
يخلني. اگعد من غبشه حتئ اشتغل وهنه گاعدات

من ينزل زلمتي مجاز يشتغلن گدامه عود شايلين نوبه ويه مرتك ومن يلتحق يشوفني النجوم بعز الضهر

مرات ام لواء تسوي روحها تستنجس من كنسي وتتحجج اتكلهم مااتنضف عدل وترجع وراي اتنضف البيت حتئ لو نضيف في سبيل اطلعني وسخه بنضر عمتي

يوم من الايام دخلت بشهري وعمتي منعتني انام يمها اتگول انتي تونين بليل ماتخليني انام
وفعلا جنت اون لان ايامي قربت والطفل نزل علئ ساعه اطلگ وزلمتي بالعسكريه ومحد الي ابو لواء بيد مرته شتگله يسوي

صادف بدايه رمضان وصايمه
غسلت ملابسي وشريتهن ع الحبل بالحديقه
شويه وطلعت لگيتهن واگعات بالطين بس نذيرة جانت واگفه بالحوش
ماشكيت بيها گلت يجوز واكعات من الهوئ

رجعت لميتهن وغسلتهن ورة اسبوع هم غسلت الملابس وشريتهم وشائت الصدفه انو اكون بالمطبخ شباك المطبخ صاير بجهة الحديقه وشويه مفتوح دنيه الضهر ومن الضوة الواگف برة مايشوفك لان الداخل يصير ضلمه

اباوع النذيرة راحت للحبل تتلفت خاف واحد يجي
صارت تشيل بملابسي وتشمر بالگاع وتسحگهم برجلها
شفتها شوف عيني طلعت فايرة صدگ طلعتها من ماعونها شافتني ساكته ركبتني اكثر

كتلها ولج عمه بعدج زغيرة وكلبج مليان حقد ليش متكابله ويااي شمسويتلج حتئ تشمرين بهديماتي واني عبالي من الهوئ يوگعن

علئ صوتي طلعت عمتي وام لواء يركضن وهي كامت تبجي اتگلهن شفت هدومها بالگاع ردت اشيلهن واشرهن شو طلعت تغلط وتتهمني اني ذابه الاهدوم

يخاله يغصون فرت السالفه. عليه خلت امها وبيبيتها يصدگن واتعاركن وياي وام لواء تصيح وين اخذ بناتي واهج بيهن لان انتي متگابله وياهن

صدك انهضمت بيومها وهنه زعلن وياي مايحاجني
صعب تعيش ويه عائله تحسها نابذتك وكلهم مايحجون وياك
تحس روحك منبوذ

انوب صعدة الدرج صارت كلش صعبه گوة اوصل غرفتي
ثاني يوم اشتهيت كباب مال بيت وعمتي من زعلت وياي گالت لااريدج اطبخين ولاتگابلينه بالاكل

جبت التخته وكفت بالمطبخ ثرمتلي ماعون كباب مال بيت وحطيت القوري ع النار قبل الفطور بنص ساعه
گليت الكباب حطيته بماعونه بالصينيه وخليت القوري هم بالصينيه وشلتهم
صعدت للدرج اتذكرت نسيت بطل احط بي ماي

وصلت النهايه الدرج فوگ حطيت الصينيه ونزلت اجيب البطل

والله العضيم يايمه بعدني توني رجعت بيدي البطل
اريد اصعد وجان اشوف صينيتي تدربه ع الدرج هي وكبابها والقوري المتروس جاي حار

نزلن يتدهدن من فوگ رفعت راسي وجان اشوف نذيرة حاصرتها ضحكه عرفتها هي الشمرتهن من فوگ

عاد اني اهنا صايمه وگلبي مفرفح شلت طرف حجابي ورفعت عيني للسماء
گتله ربييي عبدتك اني صويمه اريدك تشوفني بالضالم يووم

هم صارت هوسه وعركه ونذيرة اتگلهم هي حاطتهن فوگ ودفرتهن بدون ماانتبه ماشفتهن

عاد من نزل ابو ذياب گعدت وياه وكتيت الاول والتالي حجيتله ضيم سنتين وياهم ساكته

عمج من سمع سوالفي ثاني يوم اشترة هذا البيت جان قبل بالدنانير بس الدينار يحجي قبل وغالي

اخذني وطلع من بيت ابو طلعنه بطرگ ارواحنه ماعون ماانطونه وزلمتي العندة والماعندة لمهن واشترة بيهن البيت
طلعت فارغه بس غرفت خشابي اخذتها خلف الله علئ اخوتي وامي وابوي جهزولي النواقص مال البيت

ماكو شدة إذا مابعدها فرج الله يفرج علئ عبدة الصابر لأن كاعد علئ كرسي حق ويشوف ربج عادل ييمه ولابد يجي يوم يطلع ضلم الضالم من خشمه إذا هو جرع الناس المر الله سبحانه وتعالئ راح يخلي يجرع الأمر منه

الله لايجعلني من الشامتين بس شوفي الله شنو ضم للضالم?

نذيرة حال الضيم حالها هسه عايشه علئ افلوس ابوها واترملت
وعمتي صابها سكر گصو رجليها اخذتلها سنه واتوفت الله يرحمها ويغفرلها

وراح ذاك الوكت وصار سوالف وربج افرجها عليه وعوضني بذياب واخياته اثنينهن والحمدالله علئ كل حال
ييمه انتي امج تحبج وداعيتلج صرتي لوليدي
بس هو بعدة مستغربج لان زواجكم لاهو عن حب ولاهو زواج تقليدي
وانشاءالله بمرور الوكت الله يعمل بي الخير

والله حبيتج من اول ماشفتج نگعتي بخاطري

غصون،،همي كبر علئ زينب لان الاسمها نذيرة ام جنه ويه مرت عمها شوفتها الويل جا اشلون ويه زينب?

شويه ودخلت عذراء والابنيه وراها باوعتلها خزرتني

عذراء،،يمه الساعه 9بليل خل ذياب يكعد يودينه قبل لاينامون اعيالي ومحمد اليوم خفارته مايجي

ام ذياب،،اصعدي گعدي يمه من العصر نايم لسه

غصون، ،هي صعدت والاسمها نور واكفه مكتفه اديها ولابسه عبايتها تنتضر ينزل ياخذهم

نزلت عذراء گالتلها هسه يجي
شويه ونزل لابس اتراك اسود بيدة السويج والموبايل
طلع گدامهن وعذراء شالت مصطفئ ابنها لان نايم
ونور باوعتلي بنضرة اتحسها طلقه مونضرة

سلمت علئ ام ذياب وطلعت
شويه ورجعت گالت خاله يمج الثلاجه خاف اتجوعين لاتستحين البيت بيتج

عافتني المرة وطلعت اتمددت بالفراش واتغطيت
صرت اذكر ايام قبل ودموعي وحدهن ينزلن امسح وحدة تنزل الثانيه

ماادري شوكت غفيت گعدت علئ صوت طگطه خارج الغرفه

اني جبانه الابعد الحدود واول مرة انام وحدي
يم اهلي احشگ روحي يم اخواني الصغار بليل لان اخاف

طفرت من مكاني فتحت شويه من الباب اريد اشوف شكو

الحركه بالمطبخ مستمرة تالي مااتحملت طلعت اريد اركض الغرفه ام ذياب ردت اخبص الحوش بالصايح
عبالي حرامي
بسرعه مشيت للغرفه فتحتها واني ارجف واگلها خااله حررامي حرامي

المرة فزت مرعوبه عبالها البيت اداهم

ام ذياب،اسم الله الرحمن وينه الحراامي?

غصون،،اشرتلها ع المطبخ بسرعه راحت وگفت بالباب اتباوع وبعدها التفتتلي تضحك وتصفگ ايد بيد

اسمع صوت رجال بالمطبخ يسالها شكو يمه?

ام ذياب،،لتخافين بنيتي هذا الحرامي عرف

غصون،،هو من سمع حجي امه طلع وگف يمها علئ وجها نضرات تعجب واني من فشلتي خبصت الوادم نص الليل مدري وين اضم وجهي
تالي عدلت حجابي ودنكت رجعت للغرفه

سديت الباب ورجعت لفراشي واحس وجهي دخن من الفشله هسه شيكولون ?

،،،،،،،،،،،،،،،،،

زينب،، نزلت انضف جوة شفت نسوان كاعدات اربعه بالصاله وام لواء وحنان وكلهن گاعدات يمهن
اكو وحدة منهن گاعدة بصف حنان تبجي رفعت راسها الي واشرت عليه

ام حنان،، هي هاي الفصليه؟؟

حنان،، اي

ام حنان،، الله لايوفقج ولايوفق اخوج الله يفرفح امج بااخوانج انشاءالله

زينب،، ضلت المرة تعد وتصف احتارت شتحجي تالي عفتها وردت ارجع للمخزن
گوة كاتمه دموعي خنگتني العبرة لان فشلتني

جنه،، هييي وين موليه؟
نضفي المطبخ وغرفة بيبي

زينب،، رحت للمطبخ نضيف مابي شي كعدت امسح بالكاونتر دخلت ام جنه فتحت باب الكاونتر صارت اطلع جدور وصواني وتحط گدامي

ام جنه،، شوفي ولج ذني الجدور والصواني اريد تجلفيهن بالسيم اريدهن يلمعن لمع كون وجهج ينشاف بيهن

زينب،، الكدور متروسات سخام من جوة من كثرة النار گعدت بالكاع لان اهواي طلعت كل الموجود بالكاونتر جنه جابت سيم شمرته يم رجلي
كمت اخذت كدر بي تايت وسفنجه وبديت اجلف بالجدور واحط علئ صفحه
احس ضهري انكسر من گد مادنكت

اجلف وارجع لورة اهواي بالساعتين اني مبسطه بالمواعين بالمطبخ اليروح ويجي يشوفني

كملت وگلبتهن علئ وجوهن بصينية جبيرة حتئ ينشف الماي الموجود بيهن

دخلت ام جنه

نذيرة،، ياالله فضيها عدنه خطار صارلج ساعتين نايمه ع الجدور تتنعوصين هميي ايدج وفضيهااا ياالله

زينب،، وكفت يم السنگ ترست الجدر ماي وشمرته بنص المطبخ فيضته

نذيرة،، اغسلي المطبخ زين شوفي الكاشي شصار بي من السخام

زينب،، ورجعت اردود غسلت المطبخ ونذيرة تفتر مثل حصان الشرطه فوگ. راسي سطرتني سطر بس تتأمر

كملت ردت اطلع صار بوجهي رجال جايب علاليك اهواي بيهن مسواگ

نذيرة سالته ع السمج گالها بعدة ابو السمج ماكمل شوي انطيني صينيه اروح اجيب السمج بيها

راحت انطته صينيه اخذها وراح نص ساعه ورجع جايب السمج الشوي ريحته ترست المطبخ ترس واني علئ ريوگ الصبح خلف الله ع المرة الطيبه ريگتني وراحت والساعه ب 2الضهر تقريبا جوعانه

اجت جنه حضرت الزلاطه بس واگفه وتتامر جيبي هاي وجيبي ذيج ولان مااندل غراضهم وين حاطيهن كل حجايه والثانيه اتگلي ثول اهنا حاطين الملح ثول اهنا حاطين الشغله الفلانيه
ومخلصتها وياي ثول وعمه اسود

ماكملنه تحضير الغدة اله عيوني صايرة خضر من التعب والتحضير وهو اصلا جاهز المفروض بسرعه يحضرن
احنه ابيت اهلي لوجايبين سمج شوي يمكن ابوي بعدة شايلها بالباب ويلگاها مخلصه قبل منحطها بالسفرة وذوله ساعه يحضرون زلاطه

واخيرا شالو الاكل واني وحدي گاعدة بالمطبخ بالكاع لان نذيرة كالت انجبي واكعدي اهنا لاتتحركين
اني هم ماتحركت ضليت علئ كعدتي

شويه وكملن دخلت ام حنان رافعه اديها كافه اردانها بيها زفر وكفت ع السنگ اتغسل وتباوعلي
كملت والتفتتلي كلهن واكفات يردن يغسلن

ام حنان، اخوج الساقط روحله شاب يسوة راسه وراسج وراس. ابوج
بنيتي ماتهنت بعرسها مثل البنات
عسن بيت ابوج يصبح خفت ورماد علئ روسكم انشاءالله

زينب،، هم ضليت مدنكه ماحاجيتها
اجت جنه تمشي بسرعه عبالك منتوله

جنه،، نعااله ماتكومين تلمين السفرة لو تردين واحد يجي يكلج

زينب،، كمت اخذت صينيه وصرت انقل بالاكل رجعت خليت القوري ع النار
انتضرته يفور اسمع ام حنان اتكول البتها

ام حنان،، يمه ابوج مايقبل اتضلين اهنا ودزني حتئ اجيبج وياي يكول زلمتها وراح شكو ضاله يمهم بعد

زينب،، حنان كامت تبجي ماتقبل اتروح وامها كالتلها ابوج حلف اذا مااجيتي ويانه يدخل لهنا وياخذج اسمع حنان تبجي ماقابله تروح ويه امها وحتئ ام لواء تبجي وياها شو ماحسيت غير اجت حنان طايرة

اني واكفه بصف الطباخ دفعتني دفعتها قويه احس متني انخلع
اختل توازني ومدري اشلون جريني من شعري للكاع وصارت فوكي هي اصخم مني صرت فرخ جواها

صارت تضرب بوجهي بهستيريا رفعت اديه احمي وجهي بيهن لزمت شعري من طرف كذلتي وصار تهز براسي احس فروة راسي انشلعت بيدها نذيرة اجت هي وجنه وبعد مرة وياهن وخرن حنان من فوكاي سحبنها
وامها اتكلهن عوفنها خل يرتاح كلبها سودة عليه بنتي مفرفحه من وره ذوله الخايسين ماخلوها تتهنه بزواجها

كمت اعدل بثوبي وبحجابي وشعري صار شكبرة نفشته نفش الي وجهي احسه نار عبالي من الراجديات تالي رجعت للمخزن اركض اتمنئ الكاع تبلعني

الكنتور بي مرايه اباوع الوجهي صاير خريطه مشخط من اضافرها

كعدت بالكاع لزمت طرف حجابي سديت بي حلكي لان صرت ابجي بحركه
الله لاينطيك يااحمد الله يشلع كلبك مثل ماشلعت كلبي وكلب ابوك وامك

اسمع هوستهن برة عرفت حنان راحت وياهن من صوتها العالي وهي تدعي علئ اهلي

وجهي يرحكني احط ايدي علي افز رجعت باوعتله الشخوط انفخن
ضليت خاتله بالغرفه لاساعه ولاساعتين

دخل ولد تقريبا بكد امير اخوي الزغير يطلع عمرة ١٠سنوات بيدة صينيه
حطها كدامي وكعد
مبين هادئ

جود.،اكلي بس حبابه لتكولين لماما جبتلج لاكل الزاد
ترة تضربني

زينب،، ابتسمت بوجها وكرصت خدة باوعت للاكل شزاد منه؟
بس الكشور مال السمج ضاله
لكن جوعانه حيل وراي شفت مسائي بالتنضيف خل اكل واذب حملي ورة الله
ضحكت علئ نفسي بدون ماانتبه سالني

جود،، ليش اتضحكين؟؟

زينب،، سامع بالمثل اليكول كتله ب اكله؟

جود،، لا

زينب،، من تكبر تسمع بي وهسه هلمثل ينطيق عليه حصلت كتله مساع وهسه اكل حتئ يصير بيه حيل للشغل والكند

جود،، والله اني ردت احاميج من ضربتج عمه حنان بس ماما لزمتني
اني رجال صرت احامي ماما واخواتي

زينب،، رجعت ابتسمت وبداخلي كلت خل الناس تتحامه منهن وبعدين ياله يحتاجن اليحميهن

جود،، اكلي حبابه بسرعه لان بيبي كالت ذب الاعضام مال السمج للاجلاب مالتنه

زينب، غصيت والدمعه لاجت بعيني
كتله يعني هذا اكل الجلاب؟؟

جود،، اي ذني جلاب خالو حسين الله يرحمه بوليسيات يحبهن ومدللهن وبيببي هسه يوميه ادزلهم الاكل الزايد ومرات اول متطبخ ماما توديلهن لان يجن يوكفن اباب المطبخ

زينب،، الطفل يحجي واني اكل حتئ الجلد اكلته من الجوع احس معدتي انترست من كثر مااكلت

اننفتح الباب ودخلت جنه

جنه،، خوش بسطه بس والله لسه مامرتاح كلبي امشي عدل ترة اقل زله منج ابسطج بسطه اخليج ترحمين الحنان علئ هاي بسطتها لانها ولاشي من ضربي

وانته شتسوي خاتل اهناا؟؟

كوم امي تصيحلك واذا شفتك اهنا اخلي امي تكطعك

وانتي ياالله فزي بيتنه يرادله تنضيف

زينب،، عدلت حجابي ونهضت وراها وبكلبي اكله ربي اخذ عمري ولاتخليني مكفخه للرايح والجاي

رحت ورة جنه اتلگتنه امها احصان الشرطه

نذيرة،، اخذيها خل تنضف بيتنه اريد تكلبه ع الابطانه

زينب،، مشيت ورة جنه صارت كدامي المغسله غسلت اديه عن الزفر بسرعه اشلون ماجان لان البومه تباوعلي
رحت وراها طلعنه ع الحديقه بيت صغير موكلش جبير دخلت وراها وضلت ادليني ابيتهم ونضفي هاي وجيبي هاي
احس طلع جلد السمج من خشمي من كثر التعب وانترست اتراب حتئ الحديقه كنستها بالمشواف (عثگ نخل يابس)

انهلكت واحس ضهري انقسم نصين من الصبح لسه اكند وماملحكه عبالك ماصدكو اجتهم خدامه

عركت من التعب ردت بس اسبح حتئ ارتاح
للمغرب كلش كملت
وجنه كاعدة تلعب بموبايلها ع التخم وكل شويه تاشر بيدها نضفي اهنا ونضفي اهناك

ماصدكت خلصت كامت كدامي واني وراها
هي مدري وين راحت واني صار بوجهي جود لزمته بدون محد ينتبه سالته ع الحمام

جود،، بالممر الجوه يم الدرج

زينب،، دخلت للمخزن طلعت الهدوم الانطوها الي اصلا اهواي وياهن اسميهن هدوم وكل ثوب شكبرة امشي واعثر بي واعراض

اختاريت الزين مابيهن يلعب ستين نفس بس المهم عندي اسبح
طلعت ملابس الباقيه(د) من الجبتهن وياي

ورحت للحمام لكيته منتضرني اشرلي من بعيد بمعنئ ذاك
رحت دخلت للحمام يخبل عوزك تفرش وتنام
يمكن الحمام بگد غرفتنه اني واخواتي
انتبهت بصف الحمام تواليت غربي
ضليت صافنه هذا اشلون يكعدون علي؟
مرة اذكر امي تخربطت نص الليل لزمتها بطنها
اخذناها اني وابوي للمستشفئ ف طلبو منها تحليل خروج رحنه للحمامات اكو شرقي واكو غربي
امي اختارت الشرقي كالت هاي تواليتنه المعلمين عليها
واني كتلها شسالفه يمه اصلا هاي سهله
دخلت للتواليت الغربي باوعت منا رديت منا
مالكيت روحي غير شبختها وصعدت فوكها

ماحسيت غير وكعت ونص صفحتها اتفلشت
امي اجت مخترعه واني رجلي انشخطت

تالي طلعنه شاردين خاف يجي مسؤول التنضيف ويشوف صفحه التواليت طايرة

اتذكر واضحك ماادري بروحي كملت تعليك ملابسي ردت اسد الباب دفعت جنه الباب بيدها

جنه،، هووب هووب هاي اهنا تردين تسبحين؟؟

زينب،، هزيت راسي مامفتهمه كلامها

جنه،، شبيج صفنتي جنج ازمال اطلعي يالله

زينب،، احساس ماينشرح ولاينوصف ولاحتئ اكدر اعبر عنه بمجرد كلمات
لميت ملابسي مثل الحبابه وطلعت من الحمام

جنه،، تعاي اكلج وين تسبحين وياويلج اشوفج داخله للحامات الداخليه

زينب،، طلعنه خارج البيت شويه قريب ع المخزن تواليت شرقي مبين متروك

جنه،، اهنا اتسبحين هذا مكانج

زينب،، عافتني وراحت ضليت اباوع واهدومي بيدي
كعدت بالكاع انتجيت بضهري ع الحايط

هي هاي حياتي؟

جريت حسرة شكت كلبي وطلعت
استغفرت الله وكمت دخلت للتواليت حطيت ملابسي فوك الباب لان مابي معلاكه

حتئ طشت لو دولكه ماكو تالي شطفت البريج وسميت علي خاف نجس

ترسته وبديت اسبح وكل شمرة ماي علئ راسي توكع بكدها دموع من عيني علئ حياة الذل والمهانه الشفتها بذني اليومين

كملت وطلعت للمخزن همزين امي مخليه كل غراضي
ومن ضمنهن مشط مشطت شعري ولفيت حجابي

الدنيا ضلمت ومعدتي صارت اتكطعني اتكطع عرفت من جلد السمج اتخربطت

اجه جود كال امي اتكول خل تجي تصب عشه

هم كمت رحت للمطبخ لكيتهن صابات ومخلصات
بس لازم اوكف يمهن قابل يصير ارتاح شويه؟
لا مايصير

سمعت ام لوائ اتكلهن موتنسن عشه لوسي وجاكي
بكلبي گلت فدوة اشلون اسماء حلوة اكيد لوسي وجاكي حلوين بس وينهم ماشفتهم؟

اجت ام جنه بيدها صينيه عليها تمن ومرك وخبز ولحكم صايره هوسه
كالت اخذيها انطيها الوسي وجاكي

ضليت صافنه عليها بس اسمع الجلاب تنبح اباب المطبخ الخارجي لان بي بابين باب يودي الداخل البيت وباب نطلع منه للحديقه

اسمع الباب يندك عبالي واحد يدك بي
ولحد الان مااعرف المن اودي الاكل؟

جنه،، يالله المن صافنه موفلشن الباب

زينب،، هم مافهمت تالي جود كال وهو يضحك طفل وعرفني مامفتهمه السالفه
كال لوسي وجاكي الجلاب البوليسيه مال خالو حسين

طلع جود كدامي فتح الباب واني وراه بمجرد ماشفتهن من الخوف ردت اذب الصينيه علئ هدومي
يفترن داير مدايري يشمن بطرف ثوبي واني جامده لو تذبحوني قطرة دم ماتلكون بيه
كتله جوود راح اشرد

جود،، لالا لتنهزمين منهن ترة يركضن وراج ويعضنج
ذني مدربات لتخافين

زينب،، كعد يمهن يمسد بضهرهن مدن رجليهن وكعدن بالكاع جود اخذ الصينيه من ايدي حطها كدامهن صارن ياكلن

بكلبي كلت والله عبالي لوسي وجاكي اطفال طلعن جلاب

لمن كملن اكل ياالله نهضن وراحن
واني بعدني اضحك علئ تفكيري

بعدها بلشت بالمواعين ردت اغسلهن اباوع ام جنه تلم بالاكل الزايد من المواعين
ترست الماعون تمن مخبوط فوكاه مرك ولمت القطع مال الخبز الزايدة نصهن منكعات مرك
حطتهن فوك الماعون

ام جوه،، هذا عشاج اخذي

زينب،، ضليت صافنه ع الماعون
وهي اخذت الجدور حطت الاكل بالثلاجه

ام جنه لمي المواعين اغسليهن ونضفي المطبخ

زينب،، سويت مثل ماطلبت مني بس ماعون التمن كدامي اخذته شمرته بالزباله لان موجوعانه ومعدتي تاذيني من اكله الضهر صارت سم عليه

كملت تنضيف ورجعت للمخزن بس احس معدتي انشلعت
ضليت احوس منين يجي النوم ونار شابه بمعدتي
تالي ركضت للتواليت الخارجي اتقيئت يالله شويه ارتاحيت عبالك راكب الاكل علئ معدتي من الضهر

وهيج مرت اربع ايام اكعد من السته الصبح مثل الفرارة افتر بالبيتين تنضيف وشغل
اكمل البيت الجبير وارجع لبيت نذيرة

بس محد حجت وياي مجرد رزايل عابرة مومثل اول يومين من جانت حنان موجودة كلساع تكفخني

كلشي صار براسي تنضيف وطبخ وهدوم صرت مالحك احط خبزه بحلكي من الفره الي افترها وبليل من اريد انام مااكدر انام من الم ضهري بحيث اريد انكلب علئ صفحتي الثانيه مااكدر من الالم

مر اسبوع علئ روحة حنان اني بالمطبخ المغرب اجهز بالعشه وهمه يصلون
موبايل ام جنه يمي ع الكاونتر سمعته يرن
اجت جنه اخذته لمها

اسمعها تسولف شويه وصارت هوسه
صار عندي فضول اعرف شكو وشبيهم انخبصو والشيخ يصيح يااااللله

الاففتهمته من كلامهم حنان حامل شهر ونص ومتدري بروحها
بلحضه انكلب جو البيت من حزن الئ. لحضات فرح

حتئ اني فرحت لان ذكر ابنهم ماراح يندثر وراح يكون اله طفل يحمل اسمه

يتتبع

حبيت