رواية ضحية لمن لايرحم الفصل الثامن عشر 18 - بقلم زهراء الحسناوي

ضحيه لمن لايرحم

بقلم زهراء الحسناوي

،،،،،،،،،،

يقال عندما تسقط شعره من رمش
عيناك يتحقق ماتتمناه
صفيت بلا رمش من گد ماتمنيت 💔

،،،،،،،،،،،،،،،،،،،،،،،،

زينب،، ضليت واگفه بمكاني لااخذ ولاانطي
رجعت سالتني

نذيره،، شبيج سطرج العباس ماتحجين؟
الجلاب انطيتيهن اكل لو لا

زينب،، هزيت راسي بمعنئ اي ويمكن لوتدري اني ماكلته راح تقدمني عشه لجلابهم

نذيره،، جا ماتحجين طرمه؟
هاج اخذيلهن هذا الاكل هم صايرات مايشبعن

زينب،، كلبي يركض ركض اول ماحطتلهن اكل اخذته وركضت الهن حطيته كدامهن خطيه اكلت عشاهن وضلن جوعانات

نذيره وبناتها راحن البيتهن ينامن واني دخلت للمخزن اجه جود يمي لان من يوم السهرنه انه وياه ورفل يوميه يجي يمي نسولف ونضحك
ومن يريد يروح لبيتهم اطلع اوگفله بالباب
جود هو مصدر راحتي بالبيت من اشوف ضحكته واسمع سوالفه انسه التعب
شويه وراح واني
اول ماحطيت راسي ع المخده غفيت

،،،،،،،،،،،،،.،
غصون
باوعت الكلام ذياب شكاتب النور ورجعت دنكت اصب جاي اتصنعت الابتسامه حتئ مايتشمتن بيه ويكولن ضاجت
بالعكس شاركتهن الحديث بدون اي اشكال
مدري ليش احس نار تلهب بصدري
صار 3اشهر يمهم دائما انتبه النضراته يباوعلي من احجي لو من ابتسم اهواي امور تصير انتبهله عينه مني

نور،، لالا عذراء ليش شوفتي رسالته لغصون؟

عذراء،، اصلا غصون ماضايجه لان هي هم مثل ذياب مجبوره
مو صح غصون؟

غصون،، من غبائي وماادري بشنو افكر بس ردت
ابين الهن اني مامهتمه مالگيت روحي
غير گتلهن اني هم احب ابن عمي بس انجبرت بسبب الشي الصار اتفلش موضوعنه هم كنه متفقين ع الزواج

اباوعلهن وحده ضلت تباوع للثانيه مااهتميت المهم برد گلبي حتئ يعرفن اني موبحال ذياب

عذراء، اصلا ذياب مقهور عليج اجاني البارحه ضايج يكول اني ماكاسر ضهري غير الفصليه
وحتئ اذا امي جبرتني اتقرب منها فراح يكون تقربي واجب مو اكثر

نور،، اشلون يتقرب منها؟
اوووع تره حراام لان اني سامعه زواج بالاكراه لايجوز وبحالتهم اثنينهم مجبورين هو يحبني وهي تحب ابن عمها ف اكيد زواجهم باطل واذا اتقرب منها حراام مايجوز

غصون،، ضل كلامهن يفتر براسي بيه. طبع بسرعه اصدك واثق لان مااحمل حقد عندي كل الناس مثل گلبي

شويه وراحن وام ذياب بعدها بالسوگ
شلت الاستكانات اخذتهن للمطبخ
خليتهن ع السنگ اغسل بيهن

انفتح الباب دخل ذياب درت وجهي باوعتله ورجعت التفتت للاستكانات مامهتمه ولامعبرته كانه بين علئ حقيقته كرهته لان يحب وحده وعينه ع الثانيه اعتبر تصرفه اناني

بمجرد ماحسيت بي وراي كلبي صار يدك سريع بس سويت نفسي ماامهتمه

صار كلش قريب التفتت صار وجهي بوجها ردت اعوفه واطلع من المطبخ بس منعني لزم ايدي ودفعني انضرب ظهري بالحايط

بس ابد ماباوعتله مشتته نضراتي حتئ ماتصير عيني بعينه

كتله بدون مااباوع بعيونه شنو تريد؟

ذياب،، شنو اريد؟
اكو مره تسأل زلمتها شنو تريد؟

غصون،، ابتسمت علئ حجايته مستهزئه
اتقرب مني ضرب الحايط بيده

ذياب،، ليششش بارده وياااي لييشش؟؟

غصون،، دكات كلبي سمعها من الخوف بس مابينت
ضليت مدنگه لزم وجهي عصره بيده ورفعه
صارت عيني بعينه

ذياب،، ااحجييي ليش معلعلتنييي ويااج؟

غصون،، لزمت ايده بعدتها عن وجهي
بس فهمني شنوو تريد منيي؟

ذياب،، ولللج ياامه الاسلام مرررتي انتي مرررتي
شهور صارلج هنا ماكاض ذيالج واگول خطيه خل تتطبع علئ وضعها الجديد وتعرف طبعي شنو
ومااريد اجبرج علئ شييي لان استخطييج وانتي ثاولتهااا وياااي

غصون،، اتذكرت كلام عذراء من اتكول انتي كاسره خاطره وكل اليسوي وياج مخافتا من الله يكول خاف اتحاسب عليها لان اعتبرها واجب لاكثر

دفعته من صدره ارتد لوره ضل صافن ردت انهزم رجع جرني من ايدي دفعني ع الحايط

رفع اصبعه بوجهي

ذياب،، والحمزه ابو حزامين الج مجال منا الباجر
نوم يم امي بعد ماكو
من باجر تنامين بغرفتي غصب عنننج افتهمتتتي لووواعيد؟

غصون،، عفته وركضت للغرفه دخلت قفلتها وكعدت وره الباب جسمي يرجف يرجف

سمعت صوت تكسير مال استكانات ماطلعت بس اختض بمكاني ساده حلگي
شويه وصارت ضربه قويه مال باب عرفته طلع

فتحت الباب وطلعت المطبخ بس گزاز شايل الصينيه هي واستكاناتها وراكعها بالكاع

اريد اسيطر علئ دموعي مااگدر
بداخلي اكول اني مومضحك حتئ يقشمرني بكلمتين اذا مايحبني ليش يتلاعب بمشاعري

نضفت المكاني ورجعت للغرفه ماطلعت حتئ لمن اجت عمتي رحت سويت عشه وعمتي تلگط دگ تليفونها شالته اسمعها اتگله لاتتاخر والله يمه اخاف عليك والوكت مو امان

عرفته راح يتاخر برجعته للبيت
بس ضلت حجايته براسي
اشلون بيه باجر وهو حلف غصب عني انام بغرفته

الليل كله اتگلب بفراشي مايجيني نوم خايفه لاينفذ كلامه

ماادري شوكت غفيت كعدت الشمس طالعه طفرت من مكاني الساعه ب8

نزلت لگيت ام ذياب وذياب كاعدين بالصاله يسولفون و يتريگون
صبحت عليهم واني مدنگه ورحت بوجهي للحمام غسلت ورجعت اشلون حض اليوم لازم اكابله واكعد اتريگ

كملت ورجعت ام ذياب كالت جيبي كوب وتعاي تريكي
رحت جبت واجيت هو كاعد كبالي عمتي شالت ماعون كيمر خلت كدامي وهي صبتلي جاي
ردت اكل استحي ثلمت خبزه وخليتها بحلگي

ذياب،، اسمعي غصون هاي گدام امي
نومه وحدج بعد ماكو من اليوم تصعدين غراضج كلها يمي

عليش عاقدين بويه؟؟

غصون،، الخبزه بحلگي لااكدر اذبها ولابعد اكدر ابلعها بدون مقدمات كت الاول والتالي
ضليت مدنكه عيوني بالصينيه

ذياب،، اكَلي حتئ اخذج انتي وامي للصالون ومناك للسوگ

ام ذياب،، بنيتي صح حزنانين بس تعتبرون اليوم عرسان جدد
اخذج ارتب وجهج وحواجبج واشتريلج ثويب ابيض العذر لله لو دايره سنه حسين والله احلئ بدله اجيبها الج
ونعزم بنياتي وبيناتنه بدون محد يدري بس عائلتنه
بغرفتج البسي الوان الزلمتج ومن اطلعين البسي اسود فشله لايجي واحد من كرابتنه ويلكاج فاكه حزنج

غصون،، ردت ابجي من الفشله وذياب ولاجن يمه السالفه مبتسم وعيونه نضراتهن موراحه ابد

عافنه ووراح للاستقبال كال انتضركم نص ساعه الگاجن جاهزات

هو راح وعمتي استلمتني صيري سباعيه ولو مامقتنع مااجه وكال يمه احجي وياها
واهواي كلام حجت بس عقلي فاصل مويمها يم نور

مقهوره منه كلش بس ماكدرت احجي
البارحه يريد يفتك مني واليوم يريدني انام يمه

دخلت للغرفه اخذت ملابس سبحت وطلعت بدلت لبست ثوب عادي وحجابي لفيته عدل وعباتي
طلعت لگيت عمتي مخلصه ومنتضرتني

لگيناه بالسياره كاعد عمتي يمه كعدت واني وره
اول ماصعدت عدل الجامه الجهتي

اتحرك بينه مد ايده شغل شعر
لحد الان اذكر كل حرف بي

انته ابالي احسك وين مااروح
واذا وياي تمشي اشلون تبعد؟
شما تلتفت عيني الگاك موجود
ويتراوالي وجهك وين مااصد
اغمض والگه ضلك يمشي بالعين
بحيث من ارد اجيك برمشي تلبد
وانوط عن خيالك واقترب ليك
وتتلاحگك روحي اتصيرلك سد
حيره وماعرفت اشلون وياك؟
تصفه ويمشن احساسين بالضد 💔

جر حسره طويله بس من سمعت الشعر ابالي اجت نور كلت معقوله هلكد يحبها بحيث يسمع اشعار ومهموم؟
هاي الفكره الابالي ومقتنعه بيها همه واحد يحب الثاني واني الاجيت بينهم وخربت كلشي
لسه كلامه بالرساله ويه نور براسي

وصلنه للسوك نزلنه كدام مول كال انتضركم
دخلنه للمول عمتي بدت تختار اختارت سيت نوم ابيض قصير وشغلات وياه
بعدها اشترت فستان ابيض وكل شغله تشتريها اتگلي ها عمه حلو؟
فقط اكتفيت اهز راسي بمعنئ اي

اهواي اخذتلي شغلات واني ساكته ابد ماحجيت
بس احس نار تلهب بصدري لان راح اخلي شخص ينجبر بيه
اذا اليوم وافق يقترب مني ك واجب باجر اكيد ياخذ نور اليحبها وتحبه واصير مالي اي قيمه

كملنه وهو اجه ساعدنه شال من الغراض
حطهن بالجنطه مال السياره

ام ذياب كالت اعرف صالون خوش يشتغلن صاحباته

دلته بالمكان واخذنه كال ل امه من تكملن خابريني

الابنيه سالت شسويلج؟
سكتت ام ذياب كالتلها شتسوين للعروس سويلها هي هم اعريس
بدت الابنيه صببغت شعري وخصلته هو ناعم
والله ولارفعت راسي ولاانتبهت الروحي هي تشتغل واني بوادي غير واديهم

بعدها كملت واستلمتني احفافه وقناع وتجيب وتلبخ بوجهي من مساجات وكريمات

كملنه وام ذياب بس تضحك وتغامز بعيونها
ثلاث ساعات احنه بالصالون
كملنه واني لبست حجابي وعباتي رفعت راسي اعدل حجابي شكل ثاني جانن حواجبي ثخان ومختلطات جنهن حواجب المارد

اشلون شامرتهن وجهي ابيض لان مابي شعر صافي

عدلت عباتي وطلعت وره عمتي
هو كاعد بالسياره مطلع ايده من الجامه منتجي عليها
شافني ضل يرمش دنكت وعبرت للجها الثانيه فتحت الباب وصعدت
رفعت راسي معدل كعدته يباوعلي بالجامه
التفتت العمتي گالها

ذياب،، يمه شيخ مزعل وين وديتي؟

ام ذياب،، هههههههه عفته بالصالون

غصون،، درت وجهي للجامه ردت افشخه عبالي شيخ يعرفه طلع يقلد عليه

طول الطريق هو فرحان منطلق يسولف ويضحك

وصلنه للبيت الساعه 1الضهر تقريبا
ام ذياب اتصلت ابناتها گالتلهن معزومات ع العشه بس انتن موتجيبن واحد وياجن

وذياب كال اني اجيب عشه جاهز كلشي لتسوون

احس كل ساعه تمر اختنگ اكثر
العصر اجن البنات عذراء وساره
ساره طبعها جاده كلش شكلها مومال شقه ومتجادل ومتجاوب كلامها ع كد السؤال والجواب

بس عذراء تحتار شتصنفها ساعه تتمنه تحطها بروحك وساعه تنگلب ومن سمعت الخبر من امها انگلبت طنطل

بس ابد ماحجت كدامي لان امها خزرتها سكتت

فتت سبحت وبدلت لبست دشداشه من الجبتهن
ولفيت حجابي وطلعت يمهم شافتني ام ذياب اكلت كلبي كالت اعتبار اليوم عرسج وانتي ملفلفه بالحجاب انزعي ورتبي شعرج

استحيت بس ضلت تحلفني انزع الحجاب وارتبه
استسلمت وسويت مثل ماكالتلي

المغرب رجع ذياب جايب عشه ومبين محلق شعره ومرتب لحيته محددها
ساره باركتله وهو خربان ضحك مدري شيسولفون ويضحكون
كالهن حضرنلي الحمام اسبح

دخل للصاله صرت گباله قبل لايعبر ابتسم وغمزلي
رديت شارده للغرفه
غمزه وماعت روحي من الخوف اشلون بعد شوي يقفلون علينه باب واحد؟

عذراء بس تنافخ وجها مطعون احمر

ام ذياب،، گومي بنيتي بدلي وخلي سويره ترتبج

غصون،، گمت ويه ساره دخلنه غرفة عمتي طلعتلي الفستان الابيض كلشي مجهزته ابيض
بعدها خطت عيوني بكحله عرب من شفت العوده مال الكحله خفت تبز عيني
گالت لتخافين بس غمضي ولترمشين
غمضت وهي كحلتني وخلتلي مكياج وحمره خفيفه ماطوخت حواجبي رسمتهن كلش حلوات

اتمنيت امي ردت امي يمي
جانت قبل كل ماتحجي وكالت من تعرس غصون احتار شجيبلها اخلي البنات تحجي بعرسها
تالي من دون البنات لاعرس ولاحنه ولامهر ولامحكمه كلشي ماكو

عيوني دمعت

ساره،، لتبجين حتئ ماتنمرد عيونج حبيبتي

غصون،، اجت ام ذياب بوستني هي وساره وعذراء من بعيد كالت ع الخير عيني

ام ذياب،، ياالله يمه خل اصعدج الغرفه زلمتج
صيري سباعيه والمره السبعه تحتوي زلمتها
ومن هذا الحجي واني معدتي اتخربطت ردت اتقيئ من الرهبه

صعدت رجل تصعد ورجل ترد لوره خايفه
فتحت الباب امه وفتنه للغرفه هو ماموجود

دخلت غرفته مرتبه سرير نفرين وكنتور ابو ثلاث ابواب مال نفر واحد انتبهت مفروشه فرشه بيضه
ام ذياب مامقصره كلشي مجهزه اني اباوع بعيوني وراسي يفتر علئ ساعه اتخربط

فاتت عذراء وام ذياب رادت تطلع شاورت عذراء اسمعها اتگاها علميها

هي طلعت وضلت بس عذراء گالت

عذراء،، مامقهوره غير علئ ذياب واگع بين نارين
من جها انتي وملحة امي عليج خلته ينجبر بيج
ومن جها نور اليحبها زعلت من سمعت اليوم دخلتكم وذياب طلع خارج البيت يحجي وياها خطيه اثنينهم انضلمو جانو راسمين احلام سوه وبلحضه كلشي انهدم
البارحه شمحالتهم يتراسلون واليوم اثنينهم يبجون

غصون،، هي تحجي واني شابكه اديه عاصره وحده بوحده اسمع واموت قهر حسيت نفسي حقيره

تالي من سمعت صوته بره گلبي انقبض واتذكرت كلامه وياها ورسائله وياها البارحه
وهسه راح يرضيها لان زعلت

انفتح الباب ودخل عذراء نهضت باستني وباركتلي

هي طلعت وهو قفل الباب
بمجرد ماگعد يمي گلبي انقبظ
اول مالزم ايدي طفرت من مكاني
رفعت اصبعي احذره
اياااك تلمسني

،،،،،،،،،،،،،،،،،،

زينب مرن كم يوم ونذيره حصان الشرطه شالعه گلبي وجنه اضرب منها
كل ماتشوفني البس دشداشه حلوه من الجابتهن ام سجاد تضل تتخازر وياي مخازر

العصر رحت للتواليت سبحت وطلعت مكيفه بروحي صار كم يوم البس بيهن احس روحي نضيفه لان لابسه جديد
كملت سبح وطلعت للمخزن
فتت وبيدي ملابسي النزعتهن

خليتهن بالكاع اباوع للكنتور القفل مكسور
اول ماخليت ايدي ع اليده انفتح
عرفت وحده منهن كاسره القفل

فتحت الباب اباوع الملابس عباره عن قطع صغار مگصگاتهن

اجر الثوب صاير وصلتين مامخلياتلي ثوب صاحي
اشتعلت روحي وانطفت كعدت بالكاع وجريت الهدوم بحضني وكل دمعه توكع اشكي بيها لله عز وجل ضلمهن
شحجي وشگول؟
اذا احجي يضربني
اني الوكحه الجنت ارادد هسه صرت خرسه من كميه الضرب والذل بذني الكم شهر العشتهن بين ناس ماعدهم مخافه الله

لميت الهدوم رجعتهن للكنتور
حتئ مابيه امشط جنت فرحانه بيهن حتئ الحذاء ماخذاتها

لفيت حجابي وطلعت لگيتهن بالمطبخ يتمضحكن
يباوعلي ويبسمرن بالحجي جنه وغفران

صح تحترك روحي وانقهر بس ابقئ ساكته
لان من احجي انبسط

شويه وسمعت صوت موبايل وام لواء تحجي وفرحانه طايره من الفرح وتصيح الله يبشركم بالخير

راحن يشوفن شنو الموضوع الافتهمته حنان ماخذيها اهلها مسويه سونر وطالع بيها توأم بنيه ولد

والله فرحت لان مااعرف احمل حقد
ضليت بمكاني والبيت انخبص الكل فرحان

ام لواء دكت رجلها اله ياخذها الشيخ تشوف حنان ونذيره هم حطت روحها
تالي اخذهن الشيخ وراح

وجنه هي واختها ضل موبايل امهن يمهن وحده تغمز للثانيه مدري شبيهن
همه راحو وهنه اخذن الموبايل وركضن البيتهن

سويت عشه وكملت بس العجيب اليوم ماكو احد بس مالي نفس لأن انقهرت ع الهدوم انسدت نفسي

اتاخرو يالله رجعو متعشين الاكل اخذته نذيره ضمته بالثلاجه وقفلتها

بليل مانمت طلعت الملابس شخيط منهن؟
اذا مازگاتهن من النص مايتخيطن

رجعتهن. واتمددت بفراشي
قريت الفاتحه لبوي بمجرد ماذكرته عيوني جرن وحدهن
ادفع عمري وراضيه اعيش بكوخ بس ترجع ذيج لمتنه وايامنه سوه والله بعد مااتبطر ولاافكر اعيش ابيت جبير ولاافكر بفلوس ومال وجاه
لان حصلت علئ البيت الجبير بس ماشفت بي الراحه

ولاحتئ ارتاحيتلي ليله بهذا البيت
تعبت من التفكير للفجر ياالله نمت

ساعتين وانهجم باب المخزن نذيره ادك واتصيح اكعدي يالمسعده

رفعت راسي باوعت الشمس بعدها مبينه ب 6
الصبح
حتئ ماصليت صلاتي بوقتها
گمت بسرعه لفيت حجابي وطلعت توضيت ورجعت صليت
خليت القوري ع النار كل واحد بيهم يتريگ
شكل ام لواء والشيخ بيض سلگ

ونذيره گيمر عرب متفقه ويه مره عدها حلال يوميه الصبح تجيبلها ماعون هي وبناتها
واني ريوكي خبيزه وچاي

كملنه ريوگ نذيره كالت اليوم عمل شعبي ع السطح والبيت كله تنضيف من فوگ لجوه

استلمني من الساعه 7الصبح للساعه 3الضهر
اني اكرف شغل وحدي

سمعت صوت جود يحجي ويسلم بصوت عالي رفعت راسي شفته لواء
من دخل ابتسملي بدون وعي بادلته الابتسامه

لواء،، السلام عليكم

زينب،، رديت السلام دخلت نذيره اتلگته اكلته اكل بلسانها وترحيبها بجيه اخوها

فات يم امه شويه وكال اريد انام تعبان من الطريق
صعد نام بغرفته واني واكفه اريد اروح للمخزن واخيرن كملت شغل اريد اخذ ملابس حتئ اسبح

نذيره فاتحه الثلاجه مدري شتريد اجه جود

جود،، يممه سويلي عيد ميلاد موتدرين اليوم عيد ميلادي

نذيره،، ولي ولك ويني وين الميلاد گلبي خلصان
عود السنه التجي اسويلك

زينب،، جود صار يبجي ويكلها كلهم جَاعتي تسويلهم امهاتهم ميلاد بس انتي ماتسويلي
التفتتله امه عاطت بي من شافته يبجي

نذيره،، كتلللك السنه التجي اسويلك الطاااااام

جود،، والله راح اموت ومامسويتلي ميلاد

زينب،، متت قهر من شفته يبجي
مدت ايدها نذيره الصدرها طلعتله الفين

نذيره،، الف جيب بي معجون والف الك بس جفيني شرك لاتضل تنج يم راسي

زينب،، ركضت للمخزن من شفته راد يطلع صحتله
امي انطتني 15ماصرفتهن اوين اصرفهن؟

طلعت منهن 5الاف اجه جود
حطيتهن بيده وشاورته

كتله جيب بطل ببسي ونساتل وباكيت شموع حتئ نحتفل اني وياك بليل وحدنه بالمخزن لان والله مااعرف اسوي كيكه وعمري مامسويتها

ضحك واول مره يشبگني ضل مطوگ رگبتي حاضني
عافني وراح يركض فرحان

اخذت ملابسي وفتت للتواليت اسبح
توني كملت سبح واريد البس سمعت صوت صرخه
دوت بنص البيت

يتتبع