رواية ضحية لمن لايرحم الفصل السابع عشر 17 - بقلم زهراء الحسناوي

ضحيه لمن لايرحم

يقلم زهراء الحسناوي

،،،،،،،،،،،،،،،،،

انه مرقد حزن يطوفوني مجروحين
وعلى شباج جرحي اهواي يبچون
انه عندي بخت يعثرله مرجع دين
انه دفتر محنه اليقره بيه يدوخ
انه شايل حنان يكفي دور ايتام
انه شايل گلب للطعنه يفتح باب
انه متاني الگبر يحضني حتئ ارتاح
انه عندي فرح مثل الله ماينشاف
انه بضهري سهم يذبح جبل حمرين
انه ويه الحزن عشره معاميل
انه شايل خلگ حتئ انتضرت المات
انه بگلبي سوالف تذبح السجين
انه خيمت حزن بيه الجروح تنام
انه احلامي مشن كلهن سبايه وياك
من هلحضه اصيحن بيك الله وياك
،،،،،،،،،،،،

زينب،، شيخ منهل هد علئ حسن راد يضربه
من سمع لواء گاله شيخ عشيره ال افلان اتصل ويگول شنو هذا الكلام المنشور بصفحة ابوك؟

ركض الشيخ سحل حسن وكدام الكل ضربه راجدي
حسن دفع ابو بس مبين صوته مهزوز ومكسور

راد يطلع لزمه لواء

لواء،، انتضر ويين تريد؟؟

حسن،، عاايف البيت لمك وابووووك العربانه التدفع بي امك النهااار كله
مسوووي روحهه شيخ ع الوادم وبالحوش امي شايخه اعلي وع الكلللل

كاافي كرهت روحي لان الله ذبني عددهم

شيخ منهل،، انجبببب ساقط وعلي اسحگ بحلگگ اذا اتجاوزت مره الثاانيه

حسن،، وشتسوووي؟

ردت اخلصكم مني واتخلص منكم بس جنها الله كاتبلي اگابل وجوهكممم الزفررره

شيخ منهللل،، حسسسن

زينب،، الهوسه مستمره دخلت ام سجاد وبتها رفل ضلن صافنات حتئ محد استقبلهن لان ملتهين بالعركه

حسن،، لاحسسسن ولاقنددره كل الجاي يصيرررر بيكم حوبتها هاااي حوبتهاااا
حوووبت العلووويه الفضحتوهااااا
انتهكتوووو سترهااا وطعنتووو بشرفهااا انتتت وذذذيييج الكاعده عووود امي هم حاسبه روحهاا حالها حااال الامهاااا
عود ااانتي الجنه تحتتتت اقدامج؟
وعلي ماشميتي حتئ ريحة الجننننه بسوالفج هاااي وجدددام الكل گلتها قبل وارجع احجيهاااا

بررري منهاااا لااعتبرهاا امي ولااني ابنهااا وحتئ لو تموووت قسما بمحمد حتئ بجنازتها ماامشي

ونذذيره شيسوووي بيج الله بعد؟؟
بسبب خبااثتج الج يوم تشووفين هذا الشي ابناتج
الله شاهد اووول شامت بيج اني

شعبالكم حووبت الفقيررر تخطيييي؟؟

لاوحگ هو علي تبطي بس ماتخطي وراح تعثركم حوبتها وتغسلكم غسل فوگ ماانتم مغسوللين هسه

كارهكم بكد شعر راسي ولو بيدي ادير عليكم نفط واحركم بالدنيه قبلللل الاخره

لواء،، كافي حسن خشمك طك دم

حسن،، عووفني مالكم دخل بيييه مخبل؟
مخبل علئ روحي محد يحاسبني
وانته شيخ منهلللل السويته بيك اليوم نقطططه ابحر الراح اسوي بيك بالجايات

زينب،، عافهم وطلع
متت قهر علي وامه تبجي سكته اتردد راح وليدي

شيخ منهل وجها صار اصفر لواء كعد يمه وطلب من جنه اتجيب علاجه مبين صعد السكر والضغط

خطيه ام سجاد اباوعلها واكفه تبجي وبتها تبجي وياها اريد اعرف شنو سالفتهم ماجاي افتهم

من هدئت العركه سلمو علئ اختهم بس مبين ضايج خلگها

ام سجاد،، هاااي تاليها استلمي يممه

ام لواء،، كاافي نهله لاتزيديهااا تره البيه مكفيييني

زينب،، شيخ منهل دخله لواء الغرفته
وام لواء ضلت كاعده بالصاله هي ونذيره والغريب نذيره ابد ماحجت ولافتحت حلگها ابد

كل هاي الهوسه اني واكفه اباب المطبخ اباوعلهم
تركتهم ورحت للمخزن ارتاح شويه مادامهن ملتهيات عني

اول مادخلت كعدت ع الفراش انتبهت البطانيه منفوخه مبين شي جواها

رفعتها وجان اشوف جنطه شكبرها
عرفتها ام سجاد جابتها وقبل ماتفوت للبيت دخلتها للمخزن حتئ مايشوفنها نذيره وجنه

ركضت مثل الطفل الفرحان متلهفه اشوف شكو بالجنطه سديت الباب ورجعت
اول مافتحتها طلعت منها تكرمون انعال بس شكله حلو مو مثل الجنت البسهن قبل ابوي يجيبهن بالف الواحد
بعدها طلعت كارتون فتحته بي حذاء كلش حلو افلات اسود

بعدها طلعت علاكه فتحتها بيها عبايه مخيطه مبينه خياط جديد
جريت العلاكه البعدها طلعت ثوبين مبين قماشهن غالي هم مخيطات وكلش حلو خياطهن وعلئ قياسي فيت

اخر شي طلعت علاكه جبيره فتحتها وجان اشوفها مليانه ملابس (د) كل الانواع يخبلن

حتئ شغلات تخص العنايه بالجسم وبكره وابره ومكص وملقط
شغلات اهواي جايبه عبالك جهاز مال عروس
اخر شي لكيت سيتات نوم اثنين لونهن اسود
ضليت صافنه ذني شسوي بيهن؟
خاف المره جايبتهن الها ونست خلتهن بالجنطه

عفتهن علئ صفحه من يصير مجال انطيهن الها
شلت الغراض ركضت ضميتهن بالكنتور والجنطه فرغتها دحستها بين الحايط والكنتور ماتنشاف

شويه وانفتح الباب دخلت الحنينه ورفل وراها مبتسمه بس امها تمسح بدموعها حضنتني وبوستني
تحجي بصوت ناصي وتاشر ع الجنطه بمعنئ جبتلج غراض

كتلها شفتهن وضميتهن رجعت بستها وبست رأسها احسها امي
ربتت علئ ضهري وكعدت ع الفراش ورفل هم بوستني وكعدت يم امها

اباوع ام سجاد مامرتاحه وكل شويه تحجي ويه رفل بخصوص هوسه حسن

اتشكرت منها ع الغراض كالتلي گومي البسي العبايه خل اشوفها علئ طولج عدل لوبيها شويه طول؟
حتئ اذا جبيره عليج ارجعها وياي واخلي الخياطه تاخذ من طولها شويه

كمت لبستها جايه قيط بالقرميط علئ طولي
واكفه واتمايز بيها جدامها وبداخلي فرحه شكبرها
اتذكرت الملابس مال النوم
نزعت العبايه ضميتها وطلعت العلاكه خليتها بصف ام سجاد ضحكت كتلها خاله ذني غراضج

ام سجاد،، ياخاله شسوي بيهن اني؟

زينب،، انتي خالتهن بالجنطه

ام سجاد،، جبتهن الج

زينب،، ياا وااني شسوي بيهن؟

ام سجاد،، بنيتي اني اتعنيت من بغداد لهنا الخاطرج
والله ليلي ماانامه بس افكر بيج
ييمه كافي تنامين اهنا واصعدي نامي يم زلمتج تره حرام تنامون كل واحد بكتر وانتم جدام الله متزوجين

زينب،، سكتت ودنكت بس كلبي بمجرد مافتحت الموضوع صار يدك سريع
كتلها خاله اشلون انام بغرفته واني حتئ مااحس نفسي زواجنه شرعي

ام سجاد،، اشلون موشرعي يايمه اذا عقدكم سيد واكو شهود ف الزواج شرعي امام الله والناس

اذا قصدج علئ عقد المحكمه ف عقد المحكمه فقط اثبات حقوق وحاضر وغايب تضمن حقج الدوله
بس العقد الاصح هو عقد السيد لان تتسجلين بكتاب الله علئ ذمه اخوي

اني جبتلج ذني ومااعوفج منا لمن اشوفج نايمه بغرفته وتمارسون حياتكم طبيعي حالكم حال اي زوجين

زينب،، مامقتنعه بكلامها ومجرد الفكره خلتني ارجف كتلها خاله والله مااكدر خليني اهنا

ام سجاد،، ولج يمه اشلون نخليج اهنا؟
انتي مرته تعرفين شنو يعني مرته؟
يعني مطلوب منج حقوق غير الحقوق الشرعيه

مثلا تهتمين بي ب اكله بملابسه
بكلشي وفهمج كفايه
خليج وره لواء يحميج منهن ولاتصيرين فاهيه تره اني اختي وشبعت منها ضيم جانت تسوي المشكله وتكربسها براسي

زينب،، سكتت وجرت حسره كملت كلامها ب الله يهديها

ام سجاد،، هسه رفوله تحفلج وتنضفج واني هم وياجن لاتستحين مني انتي هم حالج حال رفل
بلكت الله ولن صاير عدكم طفل ومسكت حلوگهم بعد محد يگدر ياذيج

زينب،، فتحت حلكي كتلها طفللل ومنين اجيب طفل؟

ام سجاد،، من شيب الخلفوني

ولج يمه انتي تفهميني لو لا؟

جاي اكلج نامي بغرفة زلمتج ولتمنعي من شي وخلو حياتكم ماشيه طبيعيه وساعتها اختي وبناتها مايكدرن يحجن وياج

زينب،، خاله والله مااكدر احسها فشله لابيناتنه حجايه لانضره لاكلمه
واروح عادي انام بغرفته واكله تعال يمي اشلون يصير،؟؟

ام سجاد،، بنيتي اني خالتج هلجدامج والله زلمتي خطبني واني ماشايفته امهاته شافني بمناسبه وخطبني ل ابنهن
وصارت القسمه وماشفته بس بيوم العقد گبل تفكير الوادم يختلف
مايخلون المره والزلمه يسولفون سوه اله لمن يتزوجون يعني ماكو ايام خطوبه وهاي السوالف مثل هسه كلشي عادي

الله وكيلج جنت قبل العرس بكم يوم ارجف واتمرضت وافكر اشلون انكشف علئ زلمه واني سالفه ماعندي ويااه
تالي بيوم العرس عبالك اعرفه صار سنين
لان ربج ينزل الموده والرحمه ويرفع حجاب الخجل بين المره والرجال
احتوي ييمه وخل يحتويج واحدكم يصير للثاني سند
اذا اتضلين اهنا نايمه معناتها راح تضلين راضيه بمعاملة اختي الج طول العمر

زينب،، كلامها صح بس مااكدر اقتنع هزيت راسي عود مقتنعه لان حلفتني انقل غراضي لغرفه لواء
ومبين من كلامها هو متصل بيها لان لمحتلي بكلامها

بعدها كالت خل اعوفجن وحدجن انتي ورفل سولفن واني رايحه اكعد يم امي شويه

من راحت الفضول عندي يقره الف سالت رفل عن موضوع خالها حسن

رفل،، اوو موضوع طويل ويقهر

زينب،، يعني هو الوصل خالج الهذا الوضع؟

رفل،، اي واصلا خالو حسن ماجان هيج جان سبورت ويضحك ويحشش النهار كله
جنت ابجي من نرجع البغداد لان اليكعد يم خالي عبالك كاعد بسينما

زينب،، جا شوصله الهذا الحال

رفل،، خالي جان. طالب كليه سنه ثالثه
ومن جان يرجع من الدوام بطريقه صادف بنيه
طالبه اعداديه
من شكلها ومشيتها الرزنه انعجب بيها
ويوم عن يوم خالي اتعود لازم يشوفها بدون مايعرف نفسه يحبها

سال عنها وكالوله علويه من الساده ال افلان
وقتها اكتشف هو يحبها ورايدها علئ سنه الله ورسوله جان حبه الها فقط بالنضرات لاحاجي وياها ولامعترف الها وصار يحسس الابنيه اتعرفين شباب والف طريقه عدهم حتئ يوصلون اهتمامهم للشخص المقصود

خالي حسن سال عليها ويعرف الجبيره والصغيره عنها ف اجه لبيبي وجدو كالهم اني احب وحده ورايد اتزوجها

جدي وبيبي فرحو كالوله همزين حتئ نزوجكم انته وخالي حسين الله يرحمه يزوجوهم سوه بنفس اليوم

خالي كالهم اليوم بليل نتوكل نخطبها
بس جدي اعترض كاله خل نسال علئ اهلها نعرف اصلها من فصلها

حسن،، علويه وجدها رسول الله من عشيره الفلانيه بيت الساده ال.. معروفين والهم شارتهم كلها تحلف بيهم
ابوها ميت وهي الجبيره بين اخوانها عدها ثلاث اخوات غيرها واخو واحد زغير

شيخ منهل،، بيها الخير دامهم خوش ناس وساده هنياله اليناسبهم بس هم لزوم نسال

حسن،، براحتك حجي بس والله من راح تسمع الناس تحمد بااخلاقها انته من وحدك تفرح يصير عندك كنه مثلها وبااخلاقها وتربيتها

رفل،، راح جدي سال عنهم ومن كلام الناس وبيتهم المتهالك عرف حالتهم الماديه كلش ضعيفه
بس ماجان عنده اعتراض يعني بين الموافق والمامقتنع

رجع البيبي واتفقو يرحون البيت الابنيه حتئ يخطبوها ولعادات اهل الريف من يرحون يخطبون فشله يروح العريس ويه اهله يخطب

وهو مجرد كلام بس راحو حتئ ياخذون موافقه الابنيه وبعدها ياخذولها مشيه مال زلم

بيبي راحت من شافت بيتهم اتفاجئت
البيت شبه بيت خرابه وناس علئ كد حالهم كلش
امها فقيره الابعد الحدود
استقبلتهم المره بس بيبي كاعده علئ اعصابها
لان حتئ افراشهم تعبااان كلش قديم ومشگگ

علئ اساس راحو يخطبون بس من شافو وضع الابنيه واهلها اتخبلو
وبيبي بدل ماتخطبها كالت ل ام الابنيه

ام لواء،، شوفي عيني اني اجيت لان مااكدر اكسر خاطر ابني
بس بصراحه اني بنتج مارايدتها

رفل،، المره صاحبة كرامه ونفس ابيه كالتها واني بنتي مازايده عندي حتئ اشمرها الكم وانتي بلسانج جايه اتكولين مارايدتها وابنج جابج غصب عنج
اتوكلي وروحي گولي ل ابنج مالك مره يمي

رجعو جدو وبيبي لعبو لعب بحال خالو حسن
بيبيتي فرفحت اتكله افراش ماعدهم يكعدونه علي
وانت تريد اتناسبهم؟
لو ماخذتها الك ماضحكت الوادم عليه من يشوفون بيت انسابتك؟؟

خالو حسن اتخبل واتعارك وياهم ايام وهو مايحجي وياهم والابنيه غيرت حتئ طريقها وامها صارت تاخذها وترجعها للدوام

فبيوم خالي اعترض طريقهن وحجه ويه امها گدامها كالها خاله اني رايد بنتج الي مو لهلي ومستعد بس تنطيها الي اعزل بيها بيت بوحدها ولاالها شغل ب اهلي ولااهلي يوصولها

بس امها رفضت كالتله زواج بدون موافقة الاهل الله مايبارك بي حتئ لوجانو همه الغلطانين بس يبقون اهل وانته وبنتي مالكم قسمه

بيبيتي من شافت خالي حسن داك رجله ورايد الابنيه ومستقتل عليها صارت هي وخالتي نذيره يطلعن حجي ع الابنيه اشكال والوان
وكل ماتجي مره يمهن يكولن بنت سيد افلان تضحك علئ ابني تريده ياخذها وهي سمعتها موزينه

طلعن حجي اهواي ع العلويه في سبيل ماياخذها خالي
ف اهنا ريف والحجايه بسرعه اطش
والحجي الطلع فضيحه
والناس السانها مايرحم حتئ لوماشايف بعينه ياخذ عرضها بالموزين

وصل الحجي ال امها وبيوم وليله هجت المره من المنطقه اخذت عيالها وراحت كعدت يم اخوتها بديالئ

خالي كلب البيت سواه جحيم عليهم وتركهم وطلع لان سنه كامله هو يحبها وميت عليها
بعد ماانتقلو ب 10اشهر تقريبا وخالي مامفاركها يروح لديالئ مخصوص حتئ يشوفها من بعيد لان صارت مرحله اولئ كليه بس جانت تصده

حتئ مخلي مراقب عليها يوصله اخبارها
وبيوم من الايام نزل خالي حسن يلطم علئ راسه مثل النسوان ويصيح ماتتت علويتي

خالي وكع واتمرض ودخل باانهيار عصبي وصل الموت
والعرفنا ضاربتها سياره من طالعه من الدوام َكاتلتها

وهذا يوم وذاك يوم صارله سنتين مايحجي ويه جدو وبيبي وخاله نذيره وتقريبا ميحجي ويه الكل وحتئ ترك الدوام وماداوم اخر سنه

وصار هذا وضعه ساعات تشوفي زين وساعات تتخربط احواله

زينب،، رفل تحجي واني دموعي تجري
شنو الضلم الشايلي بكلبهم ماادري
حتئ علئ ابنهم مارحمو وخلو يتهنئ ويه اليحبها

كنه نحجي دخل جود جرته رفل يمها انتجه علئ رجلها
وبعد كلام دار بينه احنه الثلاثه جود كال

جود،، زينب اني اجوع بليل اموت من الجوع ومن اكعد امي تسويلي اكل تزمخ بيه اتكلي نام الصبح ناكل واني اخاف اجي لهنا واكعدج

زينب،، باوعتله الرفل كلتله انته زلمه والزلمه مايخاف

ضحك ودنك لان رفل فشلته من كالتله الزلمه مايخاف

جود،، بعد كم يوم عيد ميلادي اتوسل ب امي تسويلي كيكه وشموع وعيد ميلاد بس ماتقبل تكول خالك ميت اشلون محتفل
واني بنفسي العيد ميلاد اصدقائي كلهم اهلهم يحتفلون بيهم بس اني ولامره فرحوني وسوولي عيد ميلاد

رفل،، خل تطلع دوره السنه وانسويلك احلئ عيد ميلاد اني اسويلك كيكه واجيبها وياي اوياها احلئ هديه لجودي

زينب،، ضحك جود اشرتلي رفل بمعنئ احفلج؟؟ هزيت راسي رافضه لان جود كاعد واريد اكوم هم يالله الحگ اسوي عشه
شويه وكلنه كمنه طلعنه رفل راحت كعدت يم بيبيتها واني. رحت للمطبخ اسوي عشه
اجت نذيره بيدها قفل المجمده فتحتها طلعت ثلث دجاجات خلتهن ع السنگ

نذيره،، سويهن عشه تمن ومرگ دجاج

زينب،، عافتني وراحت بديت احضر بالاكل للمغرب دخل لواء وحسن وراه يمشي تركنه وصعد الغرفته

بليل صبيت عشه للكل بس نذيره اتسهم الدجاج بالطوس ماخلت ولاشويه
بس تمن وخاشوكتين مرك بالجدر

ردت اتعشه بيهن فاتت ام سجاد

ام سجاد،، ياالله تعاي اتعشي

زينب،، همست بصوت ناصي حتئ محد يسمعني
خاله والله مااگدر مايقبلن وبس ترحين يبسطني خليني اهنا اتعشه

ام سجاد،، اذا مااجيتي اني الراح ابسطج
عليمن خايفه منهن؟
يبسطنج احجي الزلمتج لاتصيرين خوثه
وتخليهن ياكلن حگج
وبعدين زلمتج هو الوادني اصيحلج يكول من اصيحلها تعاي ماتجي وتتحجج ماكله وشبعانه

زينب،، گوه جرتني كعدتني يمهم لواء باوعلي ابتسم
ورجع ياكل
اكو ماعون تمن علي فخذ دجاج وطاسه مرك زايدات جرتهم ام سجاد حطتهم گامي

ام سجاد،، ياالله اكلي

زينب،، اول لكمه خليتها بحلكي احس كلهم سمعوها من بلعتها بلعومي من المستحه يطلع صوت
رفعت راسي نذيره خزرتني خلتني حتئ حلگي بعد مااندله
مااكدرت اكل غير لكمتين لان هي وجنه استلمني يتخازرن وياي مخازر

كملت ونقلت المواعين وجود ورفل وياي ينقلون للمطبخ
همه راحو دخلت نذيره تغسل
وهي مدنكه تغسل بوجها كالت

نذيره،، سويها مره ثانيه وكابليني بالسفره اله اغط راسج بالطاسه

زينب،، عافتني وراحت لازم تذب سمها وتروح هي لكمتين طلعتهن سم وزقنبوت عليه

وكفت رفل ماخلتني وحدي اغسل بالمواعين كالت اني اجلف وانتي اشطفي

اتكابلنه عليهن غسلناهن اشلون ارتاحيت ولاحسيت بيهن شوكت خلصناهن لان سالفه وضحكه

حسن ام سجاد صعدتله اكل الغرفته لان ابد ماياكل وياهم
بليل من كملنه كعدنه اني ورفل وجود كاعد بنصنه بالمخزن نسولف وام سجاد هم جايبتلي وياها علاكه نساتل شكبرها ضامتها بجنطتها
ناكل ونسولف ماحسينه غير الساعه ب 1ونص بليل

رفل كامت نامت لان كالت الصبح نرجع وجود وصلنا الباب بيتهم اكل هلمره وشبع نساتل ويانه يمكن نام مرتاح

ثاني يوم لواء التحق وام سجاد راحت
وصفيت بس اني والعگارب

اول ماشافن ماكو احد بالبيت استلمني شغل وكراب من الصبح للعصر
ختمنها بغسل الزوالي 12زوليه غسلتهن وحدي ضهري انقسم نصين من التعب
،،،،،،،،،،،،

غصون

ايام تمر وذياب تصرفاته تغيرت من امر من يمه يجر حسره لو يشمرله حجايه تخليني ارعش من الخوف
مااعرف شنو تفكيره كل الي ابالي ليش جاي يتصرف هيج وياي؟؟

ام ذياب كل شويه وكالت كافي روحي نامي يم زلمتج شكو شارده منه؟
ومايصير كل واحد منكم ينام وحده
احس كلامها جاي يفتح عيني علئ اشياء كنت غافله عنها
احس بمشاعر اتجاها بس مااعرف شنو نوع هاي المشاعر
شكله
تصرفاته
ضحكته
نضراته كلهن يحجن بس ماافهم كلامهن
مرات اكول يمكن هذا هو الحب اليحجون عنه خاف يحبني واني ثوله؟
وساعه اكول صدك اني ثوله وغبيه اشلون يحبني وهو يحب نور حماة عذراء؟

اكيد اني تفكيري غلط والرجال تصرفاته طبيعيه
المشكله مرات من ارفع راسي اشوفه عينه مني
تتخربط احوالي وحتئ لوبيدي شي يخرط من ايدي
اعصابي ترجف

كاعدين العصر اني وام ذياب بالحديقه تقريبا ب4ونص
گالت عمه اني رايحه اتسوگ
وشجيب عشه؟
گتلها بكيفج
المره شتريد تجيب تسالني واني اكلها بكيفج فشله اضل اتشرط عليها كل التجيبه نعمة من الله

قبل ماتطلع دخلت عذراء وراها نور بمجرد ماشفتهن معدتي انخبصت
بس نور شطالعه؟
صدگ نور من الجمال اني من شفت اديها يلهثن ضميت اديه استحي
ايدي يم ايدها فضيحه

ام ذياب راحت وهنه سلمن سلام عادي

عذراء،، خلونه گاعدين اهنا احسن الجو حلو
غصونه ارجعي احمي الجاي واذا اكو كعك جيبي

غصون،، رحت حميت الجاي وخليت كعك بالماعون ورجعت قدمته الهن اثنينهن لازمات موبايلاتهن
اباوع نور تضحك وتگول العذراء اخوج ابد مو راحه

مافهمت كلامهن
رجعت عذراء گالت

عذراء،، يارب تنجمعون خطيه ذياب وين جانت مضمومتله هاي السالفه جان قبل يحسب يوم يوم حتئ. بس يستقر وضعه يتقدم النور

غصون،، اصب جاي مدنكه وساكته ابد ماحجيت
بس اكو شعور بالقهر بداخلي ومااعرف شنو السبب

رجعت نور ضحكت وقربت الموبايل يم وجه عذراء واثنينهن خربانات ضحك

عذراء،،، صدگ ذياب علي سوالف اتضحك
شوفي شكاتب خطيه

غصون،، قربتلي الموبايل خلته كدامي
مدري شصعد براسي من شفته كاتب

ذياب،، نويرتي اموت عليج
مااصدگ اخلص من الفصليه وارتاح
لو مافشله من عمي اليوم ارجعها وافتك منها

،،،،،،،،،،،،،

مر اسبوع واني حال الضيم حالي
نذيره وبتها طلعن اللگمه الاكلتها وياهم ع السفره من خشمي
وهلمره صدك گطعني الجوع اكل كلللش قليل وينطني الزايد بالماعون
بحيث من كد ماصار عندي فقر دم بعد مااشوف وكل شويه اريد اوكع علئ وجهي كوه امشي

ويوميه اني اخذ الاكل ال لوسي وجاكي
يشبعن اكثر مني
مخليلهن صينيه مخصصه الهن يصبولهن بيها اكل

ريوك مامتريكه گالن ماكو خبز ف تريكت بس استكان جاي والغده نص كرصه خبز وخاشوكه مرك بجعب الطاسه

بليل لمن الاكل الزايد كله وخلنه بصينيه الجلاب
انطتنياه نذيره اودي الهن

جسمي يرجف جوعانه اخذت الصينيه ردت اوكع
اباوع الطريق ياخذ وينطي والكاع تفتر بيه
مالگيت روحي غير فتت للمخزن وبيدي الصينيه
ومن الجوع نزلت عليها دوسه ونص اكل وايدي وحلكي يرجفن ودموعي توكع بالصينيه

ع الحال الوصلتله صرت حالي حال الجلب بهذا البيت لاوالله الجلب احسن مني ياكل

من الجوع نسفت ثلاث ارباع الصينيه احس معدتي انترست والاكل راح يطلع من خشمي صدك شبعت من كل گلبي

باوعت الاكل ماباقي بي غير شويه
انوب ضليت اكل بروحي اشلون انطي للجلاب؟
تالي اخذته ورحت حطيت الصينيه كدامهن عفتهن ورجعت

بس بالي يشتغل احس روحي مسويه ذنب
رجعت للمطبخ الحمدالله ماموجودات كاعدات يم امهن
بديت انضف بس مرتاحه لان شبعانه صح خايفه ومااعرف ليش لكن يكفي بطني اليوم متروسه

دخلت نذيره للمطبخ مدري شتسوي
وجان اسمع صوت نباح مال الجلاب فضحن البيت بالنباح مالتهن

وهنه معلميهن بس من يجوعن يجن ينبحن من اوديلهن اكل ويشبعن ماينسمع صوتهن

فتحت الباب نذيره شافتهن يفترن بالباب ومبينات يردن اكل لان فعلا اكلهن مابي ماعون كلش قليل

التفتتلي واحس الاكل الاكلته راح يطلع من خشمي من الخوف

نذيره،، الجلاب ليش اجن؟
وين وديتي اكلهن؟
ماكلته مووو؟؟

يتتبع

تابعو حسابي الثاني Zahra036

وهذا حساب الكاتبه اطياف راحله AtyafAtoofa

هذا كروبنه ع الفيس
بس اكتب
كروب قصص(زهراء الحسناوي)

الكرووب عباره عن عبدالله الشيخ 😂
بطلنه نتابع قصص حاطين البطل وگاعدين 😂😂😂