رواية ضحية لمن لايرحم الفصل الثامن وأربعون 48 - بقلم زهراء الحسناوي

البارت 34

ضحيه لمن لايرحم

يقلم زهراء الحسناوي

،،. ،،،،،،،،،،،،،،،،،،

أنا بالفعل اخوض صراع كل يوم من أجل أن لاتتحطم احلامي
من أجل أن أبقى شخصا لطيفآ مع الجميع
احاول تجنب حقيقة أن الواقع في غاية التعاسة
اصارع مخاوفي من المستقبل، من المجهول، انهض كل يوم دون رغبه في مغادرة الفراش
اقاوم كل الافكار التي تقودني للاختفاء عن الناس
اقاوم اضطرابات نفسيه ، ذكريات لم انساها
تفاصيل مازالت عالقه في ذاكرتي ومازالت تؤلم قلبي
أنا اقاوم في حياتي الاجتماعيه، احلامي ونفسي
انا اقاوم واقاوم وسوف يأتي الفرج باذن الله

زينب،، عمي ولواء اثنينهم التفتو الجهتي
عمي رجع حجه ويه لواء ولاكانه شافني
بس لواء عيونه عليه يباوعلي بخوف وقلق

دنگت لميت الگزاز باادين ترجف اخذت الصينيه ورجعت للمطبخ حطيتها ع السنگ احس گلبي راح يسكت

ماتحملت رجعت وگفت قريب عن الباب اريد اسمعهم

لواء،، يابه صدگ تحجي انت؟؟
انت اشلون اقتنعت بهاي الفكره؟؟
اشلون الي نفس اخذ مرت اخوي؟؟

شيخ منهل،، اخوك وراح بويه وذوله اولاده نتركهم يربون عند الغريب؟؟
مايصير ياابني حسن ماحجيت وياه لان اعرف جوابه بدون مانحجي
وانت الجبير والعاقل بيهم ترضاها اولاد اخوك يربون بعيد عن عيونه؟؟

لواء،، حجي من الاخير حتى لااشلع گلبك هاي الفكره شيلها من راسك لان لا نفسيتي تتقبل اخذ مرت اخوي ولاعقلي ولا كياني كله رافض الفكره من اساسها

رجائا يابه سد الموضوع

شيخ منهل،، حاليا راح أجل الموضوع بس لاتعتبره نسد نهائيا لان وروح حسين اذا ماتاخذ مرت اخوك اغضب عليك ليوم الدين

زينب،، اسمع واحس الدنيه افترت بيه ونفسي صار سريع لواء سكت ماحجه رجع ابو كمل كلامه

شيخ منهل،، واخوك حسن سالفته داجه والله مابيه يوميه ماكلي هبطه جديده انه اشوف نحطه بمستشفى احسن

لواء،، قصدك مستشفى مجانين؟؟

شيخ منهل،، جا شتشوفه انت عاقل؟؟

لواء،، ماشفته يملخ بهدومه لو يمشي ويضرب بعباد الله
حجي خلي الطبگ مستور تره اني وانت نعرف السبب من وره انتكاسه حسن

شيخ منهل،، غلطه وصارت ولويرجع بينه الوكت يشهد الله اخذها اله لو اعرف ابنيلها بيت وحدها بس صارت بعد اشم گفه ايدي راح تموت؟؟

زينب،، رجعت للمطبخ لايطلع عمي ويشوفني
شويه وطلع الشيخ
احس عيوني صارن جمر اريد ابجي مخنوگه
سمعت صوت لواء يصيحلي
مسحت عيوني ورحتله فتحت الباب شافني ابتسم دنگت
رحت يمه واني مدنگه
سالته شنو تريد؟؟

لواء،، اريدج انتي

زينب،، لااراديا نزلت دمعتي بلعت الغصه لزم ايدي گعدني يمه
رفع وجهي ومسح دمعتي ب ابهامه

لواء،، شنو المبجيج؟؟

زينب،، ولا مره گدرت اخلي عيني بعينه لااراديا ادنگ
احس عيونه تقره كل تفاصيلي
متاكده يعرف شبيه لان سمعتهم بس يريد يسمع مني سكتت من حجه بس نفسي سريع مثل الداخل بحلبة سباق
لان لاول مره احس نفسي اغار الهاي الدرجه عمري ماعرفت شنو معنئ الغيره بس من سمعت كلام الشيخ حسيت بيها
تحسها شعور مؤلم مثل سكين حاد ينغرز بصدرك

ولاول مره يسالني

لواء،، تحبيني؟؟

زينب،، رفعت راسي وتجرأت اباوع بعيونه الكانت نضراتهن متسلطه على شفايفي سكتت لان الكلمه ماتطلع مني

لواء،، تدرين شگد احب هدوئج وحيائج وخجلج؟؟
اتمنئ اضمج بروحي من اشوف وجناتج يطغي عليهن الحمار من الخجل

جاوبيني زنوبتي خليني اخدر حد الثماله من اسمعها منج

زينب،، شعور الحزن طغى على كلشي
گتله بصوت يرجف راح تاخذ حنان؟؟

لواء،، وعيونج يحلمون

زينب،، يعني ماتاخذها؟؟
احجي وهو عيونه ذبلانه ومركز نضره على شفايفي همس

لواء،، احبج

زينب،، دنگت ورغم عني بجيت جر راسي باسه

لواء،، ام دميعه اگلج احبج افهميها واسكتي
واعتبري كلمتي جواب السؤالج

زينب،، ابتسمت والدمعه بعيني بلعت الغصه گتله
احسك مالتي الي وحدي
سكتت ماگدرت

لواء،، كملي وبعد؟؟

زينب،، هواي كلام بداخلي بس ماعرفت ارتبه بساعتها واصيغه بجمله اكدر اوصله مشاعري من خلالها اكتفيت بالسكوت

لواء،، وداعت دموعج كلي الج قلباً وقالباً
السمعتي من ابوي فرضيات لاااكثر
خصمت الحجي وياه وانتهت

احجي شي ريحي گلبي

زينب،، همست شحجي؟؟

لواء،، الحجايه منج بلسم لجروحي شتحبين تحجين تلگيني كلي اذان صاغيه

تعاي يمي

زينب،، ابتسمت واين اجي يمك؟؟
السرير ابو نفر ماياخذنه اثنينه

لواء،، گلبي بحجم قبضه ايدي وماخذج كلج
تعاي تصيرين لتخافين ماتوگعين

زينب،، ابتعد عني الجهة الحايط نام صفح سوالي مجال عمليته بالجهة الثانيه مو بالجهة النايم عليها
مدلي ايده الصاحيه اتمددت واتوسدتها
خليت خشمي بصدره وغصب عني بجيت
باس راسي وجر نفس طويل

لواء،، كافي زينب حجايه انحجت راح تجلطني دموعج بالقران

زينب،، مااگدر احجي لان مايحس بناري
لواء گدر يخليني اتعلق بي مثل تعلق الاب ابنته
الدرجة اذا ماشفته دقايق عيوني تضل ادور علي
من اشوفه ارتاح نفسيا
لان احتواني بااصعب فتره بحياتي
مايوم سمعني كلمه غثتني ولايوم حسسني اني اخت قاتل اخو ابد والله

حط حلگه يم اذني همس بصوت ناصي بكلمات عذبه كفيله تخليني ابتسم

لواء،،
بنيتي
مليكتي
واميرتي
قيثارتي
وفيروزتي

لاتندهشي لا تكترثي ولاتخجلي
أن بدأت الحديث بهذا الجنون
وهذا الغزل
لاتخجلي أن تأملت ضياء الجمال في عينيك وكيف اكتمل القمر على وجنتيك
لاتخجلي من حروفي وبوحي وعطري وشعري
لاتخجلي اذا مابعثرت النجوم تحت قدميك
وبسطت ردائي فوق حاجبيك
لاتخجلي ان نبت الياسمين على خديك
وارتوي ظمأي في زمزمي انا دمع عينيك
لاتخجلي فكم من فتاة
تحلم بأن اهديها هذا الكلام وهذا الشعر
وطوقا من الياسمين ورائحه العطر
لاتخجلي أن اطلت فيك الغزل
ف أنتي رواية عشق وقصيدة شعر وحلمي المنتظر

زينب،، نسيت البجي والضحكه شگت الحلگ وصارت من الاذن للاذن
گتله حلو الشعر

لواء،، موبگد حلات عيونج.
تدرين زينب شنو اكثر شي جذبني بيج؟؟

زينب،، همست واني رافعه وجهي وامرر اصبعي على لحيته

لواء،، حيائج وخجلج
احب البنت الرزنه الثگيله الهادئه

زينب،، انثولت گتله شنو معنئ الحياة؟؟

لواء،، الحياء وليس الحياة
ركزي زين زينب كل كلمه الها مفاهيم تختلف عن الثانيه واكو فرق بين الحياء والحياة
الحياة الي نعيشها
والحياء هي من المقتضيات الفطريه للانوثه
الحياء بطبيعته يميل للتخفي لان بالتخفي يحفض وجوده بالنفس وبالمجتمع
الحياء عند المرأة مثل الزئبق
تعرفين شنو معنئ الزئبق؟؟

زينب،، هزيت راسي بمعنى اي گتله اعرفه قصدك الزيبگ النخلي ويه الحنه

لواء،، انووب الزيبگ حطيتنه ويه الحنه؟؟

زينب،، اي عمي جان يجيب الغصون من العطار نعجنه ويه الحنه حتى يثخن الشعر ويطول
غصون تعجن طاسه حنه جبيره واني وهي واخواتي نتملغط تملغط اذا شفتنه حسبالك هنود الحمر

لواء،، هههههه نسوان تصنعن للفاره اذان

المهم الحياء للبنت مثل الزئبق بمجرد ماترفع عنه الغطه يطير بالهوى ويتلاشه
ف كلشي تحت الغطاء يحفض جماليته اكثر
وصلت الفكره؟؟

زينب،، هزيت راسي بمعنى اي
ضليت نايمه بحضنه بدون ماانتبه مديت ايدي حضنته غمض عيونه حيل عرفت روحي لجمت جرحه
ردت ابعد لزمني

لواء،، ابقي لاتوخرين

زينب،، انفتح الباب دخل حسن يبوووو
من الفشله تمنيت اذوب واختفي من گدامه
اني طفرت ميته خجل وهو ابتسم مد ايده حك راسه مغمض تك عين

حسن،، الجماعه مخلصينها محاضن واني حاضن الصوبه

لواء،، انت بس أشر واني اجيبلك مره وانه الممنون

زينب،، وگفت على صفحه احس وجهي اشتعل نار

حسن،، ردي المجانج طالع انه ادري گطعت رزق اخوي

زينب،، السانه متبري منه اني متمنيه الكاع تلبعني وهو نازل دوسه ونص تالي لواء جاوبه

لواء،، ابقى بعد شيبي رزق اخوك من زمان مگطوع

زينب،، اشلون اثنين فتحت الباب وشردت
رحت للمطبخ سويت عشه
وجهزته نذيره مرتاحين منها صار كم يوم ماتجي عود زعلانه بس تجي غفران تاخذلها عشه وتروح

انطيتهم عشاهم وغسلت مواعيني وصعدت الغرفتي عزلتها ورتبت الملابس لان مامرتبتها من وقت الي رحت لهلي قبل مايتصوب لواء
وانوب صارت سالفه لواء ولحد الان مامعزلتها بس اعدل فراشها وانزل
اتاخرت تعبت وعرگت اخذت ملابس سبحت
وطلعت
ملابسي موكلها جدد وخاصتا اللون الاسود واذا القماش كشمير
غسله غسلتين يعتگ يصير لونه باهت
دشاديشي كلهن نفس الشي صايرات قديمات احنه بدايه شتا بس مااعرف البس قديفه نادرا البسها لان احسها تخنگني ف اكثر لبسي كشمير
گلت من يگوم لواء على حيله اخلي يشتريلي
لو من تجي ام سجاد ادزها للسوگ تجيبلي كم دشداشه

نزلت الساعه ب11 لگيت لواء گاعد ياخذ علاج وحسن فارش بالگاع على صفحه وغافي

لواء،، وين جنتي؟؟

زينب،، عزلت غرفتنه وسبحت

لواء،، جيبي فراشج اهنا نامي بعد لاتنامين فوگ وحدج

زينب،، فتحت عيوني حيل همست اشلون انام وحسن اهنا نايم؟؟

لواء،، يمج گرباج حسن؟؟
شو نايم بنهايه الغرفه وانتي بالطرف الثاني
نامي اهنا لاتعاندين الدرج موزين كلساع صاعده نازله

زينب،، رجعت جبت فراشي مديته يم رجلين لواء بالگاع ومددت
من يوم الاتصوب لليوم احلم احلام تخوف وخاصتا اكثر شي مرات احس حسبالك اوگع من مكان عالي افز مرعوبه

لواء نام واني هم غفيت هنااااك وجان احس روحي صاعده على حافه السطح فلتت رجلي وگعت
فزيت ريگي يابس لواء نومه خفيف بسرعه رفع راسه التفتلي

لواء،، اسم الله زينب شبيج؟؟

زينب،، عدلت گعدتي گتله حلمت وگعت من السطح؟؟

رفع نفس بثنين ادي انتجه ع الجربايه وعدل المخاد وره ضهره

لواء،، زينب باجر خل حسن ياخذج لهلج ارتاحي فتره جسمج تعبان يحتاج للراحة

زينب،، هزيت راسي گتله مابيه شي مجرد حلم

لواء،، تحلمين هيج لان نفسيتج ومعنوياتج وجسمج تعبانات يردن راحه روحي وبطلي اعناد

زينب،، ابتسمت گتله شمدريك تعبانه؟؟

لواء،، من تحلمين واگعه من مكان عالي
هذا العقل يخترع هذا الحلم حتى تگعدين من نومج
لان وضائف الجسم جانت تريد تتوقف وتموت

زينب،، سبحان الله
بس مااگدر اروح اذا رحت هم ماراح ارتاح وراح يضل بالي يمك

جاي نحجي رفع راسه حسن مفتح تك عين

حسن،، روميو المسكرب وجوليت الفاهيه ماتنامون وتخلونه ننطمر رحمه الدينكم

زينب،، ضحك لواء گاله ماتنطمر منو يمك؟؟

حسن،، اشلون انام وانت صايرلي انشتاين زمانك

زينب،، لواء شال السبحه ضربه بيها وذاك غطه راسه حلوه علاقتهم همه الوحيدين بعائله الشيخ تحسهم گلب على گلب

حسن دار وجها ونام ولواء احتار شيسوي ساعه يهمس احبج واني نايمه بفراشي وهو فوگ ع الجربايه
ساعه يدز بوسه بالهوه اخر شي صار ياشرلي بمعنى اريد احطج بحضني يبووو سحت ومعت وتسرسحت
درت وجهي ونمت لاگوم اسحل حسن اشمره بره و اغتصب الزلمه وهو مفلش تالي سترت على روحي وعلي لان اثنينه صايرين اكسباير

يوم بعد يوم اني الاهتم بلواء
نومه
اكله
شربه
علاجه
الدرجه عنده علاج الساعه ب2بليل اوقت الموبايل واخلي يم راسي حتى اگعد انطي العلاج
حسن ضل نايم يمنه 20يوم بس بعدين لواء گاله اصعد نام بغرفتك لان صرت اگدر انهض وحدي لواء
من يريد يروح للحمام انطي الصولجانات يتعكز عليهن بس يذب ثگله على رجله الصاحيه وضعه يتحسن بالنسبه للعمليه بس رجله من يجي الليل مرات اسمعه يون من الالم من اكوم يمه يگلي البلاتين بارد احسه وهو بداخل رجلي يصل عليه مايخليني انام

انقهر علي اتمنى اشيل جزء من الالم اليحس بي
مرات اذا ابو لو حسن يطخ الجربايه النايم عليها لواء بسرعه يفز من نومه متألم

بس بي شغله حلوه مواضب على قرائه القران والنهار كله سبحته بيده يسبح بيها اكثر الاوقات من تاذي رجله اشوفه يحط ايده على مكان البلاتين ويقره

لواء،،
اللهم إني أسألك بحق القرآن العظيم الذي نزل به الروح الأمين وهو عندك في أم الكتاب علي حكيم أن تشفيني بشفائك وتداويني بداوئك وتعافيني من بلائك

زينب،، انتبهتله يقراها ثلث مرات من سالته گال هذا
دعاء للامام الحسين عليه السلام
دائما من يصيبني صداع لو اكو الم بمكان بجسمي بمجرد مااحط ايدي ع المكان واقره الدعاء يسكن الالم ويهدئ

ومرات اقره

بسم الله وبالله ولا حولَ ولا قوة إلا بالله العلي العظيم اسكن أيّها الوجعُ سكنت بالذي لهُ ما سكن في الليلِ والنهار وهو السميع العليم

بسم الله وباللهِ ولا حول ولا قُوّةَ إلا بالله العليّ العظيم اسكُن أيها الوجع بالذي يمسك السّماء أنْ تقَعَ على الأرض إلا بإذنِه إنّ اللهَ بالناسِ لرؤوفٌ رحِيم،
بِسم الله وباللهِ ولا حَولَ ولا قُوّةَ إلا باللهِ العَليّ العظِيم اسكُن أيها الوجَعُ بالذي إنْ يَشأْ يُسكِنِ الرِّيحَ فَيظللن روَاكِدَ على ظهره إنَّ في ذلكَ لآياتٍ لكُلِّ صبار شكور ،
بسم اللهِ وباللهِ ولا حَولَ ولا قُوّةَ إلا بالله العَلِيّ العظِيم اسكُنْ أَيُّها الوجَعُ سَكَنتَ بالذي يمسِكُ السّمَواتِ والأرضَ أَنْ تَزُولا ولَئِنْ زَالتَا إنْ أَمسَكَهما مِن أَحدٍ مِن بَعدِه إنّه كانَ حَليمًا غفورًا".

علمني عليهن كتبهن الي بورقه واضبت على قرائتهن وفعلا اشوف فرق من يوجعني ضهري لو مرات من حبلت صار الم بسنوني موطبيعي بحيث ابجي
من الوجع لكن بس اخلي ايدي على موضع الالم واقره الدعاء بفضل من الله يسكن الالم وانام

مرات يعلمني ادعيه واذكار بعد الصلاه صرت استفاد منه اهواي
من زمان جان ابوي يعلمنه ع الادعيه بس قرائه القران ماضابطتها كلش اتلكه لان احسها صعبه

مره سالته ليش هلگد تقره قرأن؟؟

لواء،، لان القرآن الكريم ربيع القلوب ونور الصدور ويجلي الحزن ويشرح الصدر
قال الله في محكم كتابه (وننزل من القرآن ماهو شفاء ورحمة للمؤمنين ولايزيد الظالمين الا خسارا)

وايضا الرسول محمد عليه افضل الصلاة والسلام
قال
ابشرو ابشرو أليس تشهدون ان لااله الا الله وأني رسول الله؟؟
قالو نعم
قال فأن هذا القرآن سبب طرفه بيد الله وطرفه بأيديكم فتمسكو به فانكم لن تضلو ولن تهلكوا بعده ابدا

زينب،، عليه افضل الصلاة والسلام
بس اني مو كلش اعرف اقرأ لان فصحئ مرات احس نفسي اخطأ باللفض

لواء،، اني اعلمج شوكت متحبين

وفعلا يوميه يعلمني اقره جدامه بالبدايه هو يرتل القرأن حتى انتبه وبعدها اني اقرأه وصدگ حسيت اكو فرق وكدرت اتعلم شويه شويه

وره كم يوم سمعت جنه جايه يم امها وبالصدفه سمعت من عمي يحجي ويه لواء يگله بنت اختك عدها طفل وميت ابطنها وجابها رجلها لهنا شمرها وراح
العصر اخذها اني وامها للدكتوره نشوف شنسويلها هاي هم مصيبه ثانيه اجتنه تايها

العصر اخذوها جنت بالحديقه اجيب ملابسي من الحبل شفت نذيره وغفران لازمات جنه يگودن بيها
عباره عن هيكل عضمي بحيث السواد جوه عيونها ماخذ حيز كلش جبير
گوه تمشي

دخلوها للسياره اخذوها وراحو
اتاخرو يم الدكتوره الساعه ب 8بليل رجع عمي
لواء صح حلف ماله شغل بيها
بس اعرفه گلبه طيب طول الوقت وهي يم الدكتوره هو يحش بالجكاير ساكت مايحجي ادري اولاد نذيره هو رباهم بس كل الجاي يصير بيهم بسبب امهم

من اجه عمي سمعته يحجي ويه ام لواء گالها اخذنالها سونر والطفل ميت ابطنها يگولون توه عمره شهر ونص وراح يسولها كرداش مدري شنو
وهسه دخلوها بالمستشفى

من سمعتهم ضليت صافنه اشلون عمر ابن جنه شهر ونص؟؟
اني متاكده حبلت قبلي اقل شي هسه هيه بالرابع
بس قشمرن عمي بالنتيجه مال السونر حتى لايطيح حضهن ويعرف هي حامل قبل زواجها ف دسترن السالفه بينهن

على اساس ثاني يوم يطلعوها من المستشفى بس دخلت يومين
حتى عمي ولواء گالو هو طفل بعده دم عليش هيج تتاخر؟؟

تالي بيوم الثالث طلعوها بس عمي اتصل بعمها ابو رجلها گاله مره واصله الموت وداخله وطفلها ميت فشله عليكم ماكو واحد من عيالها يوگف وياها
وانه رجال جبير بشيباتي افتر بالمستشفى من كتر الكتر
تالي بيوم الطلعوها ياالله اجه رجلها راح البيت نذيره
لواء ابد ماراح البيت اخته ولاشاف بتها ابد
بليل جنت يم لواء انطي اكل حتى ياكل وياخذ علاجه سمعت ام لواء تحجي ويه غفران گالتلها صيحي ل امج

راحت وغفران شويه واجت هي ونذيره قبل ماتدخل للبيت سمعتها تصيح على بتها تگلها ارجعي للبيت مايصير تخلين اختج وحدها تعتبر نفسه لاتنطفي عليها الكهرباء وتخترع

راحت غفران رجعت البيتهم جية نذيره مامرتاحه الها
دخلت الغرفه امها
اكو ممر اباب الغرفه ويمه الدرج الممر ياخذك للحمامات الداخليه
رحت للحمام صوتهن ينسمع
بااذني سمعت نذيره تحجي ل امها
والافتهمته من كلامها جنه مامسويتلها كورداج لان الطفل بشهر الرابع جبير ف دخلنها بالمستشفى والدكتورات حطن الها حمالات ومغذي حتى تجيب طبيعي يومين يحطولها جرعات علاج بيوم الثالث يالله نزل الطفل
نذيره مفهمه ابوها انو الطفل عمره شهر ونص وعلى اساس جنه رايحه للدكتوره منطيتها مثبتات للطفل
ومن المثبت لازگ الطفل بااحشائها ميت بس ماينزل

عرفت سالفة جنه واتاكدت منها بس طمطمن السالفه بيناتهن
ماحجيت ولاجبت طاري لان هذا شي يخصهن مالي شغل بيهن هنه بدون عزا ساگماتني سگم

بقت جنه يم امها عشر ايام وقبل لاتروح لعيالها
نذيره وصت ابوها يتسوگلها مسواگ كامل من كلشي
وفعلا راح عمي ترس السياره مسواگ الجنه
لان من كلامهن عن عيالها عرفت جنه كاتلها الجوع وعمتها قافله عنها الاكل بالثلاجه
على اساس اقتصاديه والله العظيم ترس اذني سمعت نذيره تگول لبوها عمة جنه قافله عليها الخبز بالكنتور

بگلبي گلت سبحانك يارب العالمين
مثل ماجانت جنه ضالمتني افتر دولاب الوكت واجاها اليضلمها فعلا مهما تعمل تجازه

بيوم الرادت تروح طلعها رجلها من بيت امها بدون كلشي اباوعلهم من جامة المطبخ نذيره منفوخه تريد تنفجر تالي راحت جنه واجتنه نذيره ادردم اسمعها تدعي على عيال بتها بصوت عالي
لان رجلها ماقبل ياخذ المسواگ الجابه الشيخ
وگالها ممنوع تاخذ شي منكم
نجوع تجوع ويانه نشبع تشبع ويانه
لذلك مااخذ ماقبل ياخذ المسواگ
بيومها نذيره دعت على عيال بتها دعاوي ماسامعتها قبل من حرگه روحها

وره كم يوم عمي رجع فتح موضوع حنان وهم رفض لواء رفض قاطع وبيومها صارت عركه بين لواء وامه وابو
گالهم اذا فتحتو الموضوع مره ثانيه اخذ مرتي واعزل عنكم
ساعتها سكتو من شافو عصبي

مر على حادث لواء ثلاث شهور
وحالته تحسنت كلش ودخلت بشهر السادس
واطفال حنان صار عمرهم ثلث شهور ونص

بيوم گاعدين العصر واجت نذيره گالت لبوها يابه اجو اهل حنان كلهم

اني ماشفتها من راحت لهلها بالعده مالتها ولسه
لفيت حجابي ولبست عباتي ردت اطلع

لواء،، وين تردين ابقي بمكانج

زينب،، فشله ابو حنان جاي وياهم

لواء،، گلت اگعدي

زينب،، سمعت اصواتهم يحجون بالصاله انفتح باب غرفة لواء ودخل ابوها وامها شايله طفل بحضنها
وراهم حنان شايله الثاني
اباوع الحنان صايره شسمنها والترتيب تلمع
بس ابوهم سلم عليه لكن هي وامها دارن وجوهن عني لواء باوعلي واشرلي بمعنى اگعدي

گعدت يم حديده الجربايه وهو ضل گاعد بمكانه
ام لواء اخذت الولد تبوس وتشمشم بي كامت تبجي وتحجي ويه الطفل يبيبي محرومه منك
وانوب استلمت الطفله
لواء مدنگ ماحجه رفعت راسي اجت عيني بعينها رفعت حاجبها مبتسمه بطرف شفتها
درت وجهي عنها بس انتبهتلها مرتبه حواجبها مبينه حافه

قبل جنت اباوعلها بنضره عاديه بس هسه مااعرف ليش ماحبيت جيتها وخاصتا من سمعت عمي يقنع لواء حتى ياخذها امها ساعه كامله تصبغ بحنان ومتعلمه عليكم والجهال شنو ذنبهم؟؟
ومن هاي السوالف بس الكل منتبه على كلامها مبينه شنو نيتها

ام حنان،، اليوم حنونه سوت جدر دولمه الكم جابته واجت تكول ماتعبت عد عيالي ولاشبعت منهم
اي الله لاينطي الجان السبب

زينب،، حجتها وباوعتلي
دنگت عنها
شالت الطفل وگامت حطته بحضن لواء

ام حنان،، خلي ابن اخوك بحضنك لحمكم هذا

زينب،، من گالتله لحمكم هذا جرت الحجايه جر مثل التريد تحسسهم تره ذوله اطفالكم شامريهم عدنه
اباوع لواء مخلي الطفل بحضنه يبوس بي
والله مااجذب اذا اگول غرت علي من الطفل البحضنه
بعدها شاله گالهم تعالو اخذو هذا السربوت بهذلني
نهضت حنان دنگت اخذت الطفل بحيث اتقربت من لواء كلش وجها قريب من صدر ثوبها لان عبايتها مفتوحه لواء دنگ ولاشافها اصلا عينه بالطفل باسه وانطا الها

بعدها ابو حنان ضل يسال لواء على رجله اشلون صارت
جاوبه لواء گاله شويه احسن بس اذا ضل هيج وضعي اطلع ل ايران يگولون اهناك احسن تتحسن حالتك لان بعد وراي عمليه بعدلها ثلاث شهور
واشوف من الافضل اسويها اهناك مو بالعراق

اتاخرو يمنه للمغرب كلش عمي ماقبل يرحون بدون عشه بس ماقبلو گالو غير مره نجي
طلع ابوها وعمي لبره وام لواء تدفع بيها غفران ونذيره تمشي وراهم يسولفن ويه حنان وامها

اني طلعت وراهن لان لواء گال فشله اطلعي وياهن

ام لواء،، لوباقين اهنا جان شبعنا من الجهال حتى مالحگنه نشوفهم

نذيره،، عن قريب تشبعين منهم حجيه

زينب،، ضحكت ام حنان وضربت نذيره على متنها
حتى حنان مبتسمه دنگت سلمت على ام لواء رفعت راسها باوعتلي خزرتني وطلعت

ذبيت عباتي ورحت للمطبخ شفت جدر دولمه ع الطباخ
مديت ايدي اريد اخذ تذكرت سوالفهن ضجت رجعت الدولمايه للجدر بداخلي گلت الله يستر منچن ومن نذيره حتى كشت روحي من دولمتجن

رجعت غلگت الجدر ورحت توضيت وصعدت الغرفتي اصلي لان احب اصلي وحدي
نص ساعه ونزلت دخلت الغرفة لواء

فاجئتني نذيره واگفه يم لواء بيدها ماعون فارغ
مبين جايبه دولمه لخوها وماكلها......

يتتبع