رواية ضحية لمن لايرحم الفصل الثالث وثمانون 83 - بقلم زهراء الحسناوي

مابعد الألم
(ضحيه لمن لايرحم)

بقلم زهراء الحسناوي

،،،،،،،،،،.،،،،،،،،،،،،،،،،،،،،،

نعم أحببتك كما لم احبب شيئاً ابدأ
ولكنني تعلمت بعد أن صفعت من الحياة ذات مره
أن اواري مشاعري وأخفيها عن الجميع
وكأني اخفي عنهم اثار جريمه
ولكن الأن وبعد أن حرمتني التقاليد منك
وبات الوصول اليك أمر لايحدث الا في الأحلام
لااعتقد أن ثمة سبيلاً آخر
أستطيع أن أخبرك فيه بما يعتمل في قلبي
إلا بهذه الطريقه المحفوفه بالمصاعب و المخاطر

غصون،، مااعرف بشنو ابدي أول سطور كتاباتي
كل الاعرفه اني بحاجه ماسه حتى افرغ الابداخلي
من كلام مكبوت محد يعلم بي غير الله سبحانه وتعالى وزينب تؤم روحي

دائما احجيلها الاشياء الابداخلي احجيلها كلشي يدور ابالي
اعرف همومها كافيه عليها وزياده بس ماعندي غيرها بعد الله اشكيله

من يوم خطوبتي ل امجد واني بين المقتنعه وبين الرافضه لان خايفه

عمري 24وهاي ثاني مره راح اتزوج
مرات اضحك على عقلي اكول ليش الاول هم ينحسب زواج؟؟

كل يوم اتذكر شكد جان گلبي ابيض وطيب اسامح الي يأذيني

شگد ماكانت شخصيتك ضعيفه بالماضي
راح يجي يوم تصير أكثر قوة
كل مصيبه تمر عليك تخليك تكون اقوه
الحياة بيها
الحلو
وبيها
المر

اذا جانت حياتك كلها حلوه لو بالعكس كلها مره
ماراح تشعر او تحس بطعم الحياة او نعم الله علينا لذلك نمر بهذي الامتحانات القاسيه

لكن الله سبحانه وتعالى مايخليك بأمتحان اذا ماكان متاكد من نجاحك وتخطيك

كل اليمر بحياتنه راح يصقل شخصيتنه يوصلنه للي احنه علي حالياً

كل المر عليك راح يكون جزء من حياتك وراح يزيدك خبره بالتعامل ويه الناس

ذياب شكد مااحاول انساه واحلف اشيله من بالي الگه ذاكرتي تخوني للمرة الألف

لم اشئ
لتلك الذكريات ان تعود اليوم
لماذا اليوم؟؟
ايحن زجاج لسماعه شطر قصيدة تتغزل برماح الرحيل؟؟

ذابت النقاط على ثغري ولكن نسيت ان تمسح
ثنايا البوح بلمسة تصيب يمين وجهي
اااه ياعزيزي كم اشتقت.....
طلقت الحروف ونسيت الشرع وماحلل لي
لماذا عدت اليوم تأنسني بخيوط تجردت
من قلبي وتشد وصالك الجريحة
فلترحل وتزيل كحل عيني بيديك
فأنا من خانتني ذاكرتي وتذكرتك

بالنهايه االنسيان يعتبر قلب صفحة من كتاب العمر
ماكو شي اسمه نسيان
اكو شي اسمه تناسي التناسي اليخليك تكدر تقلب صفحة الماضي حتى تعيش المستقبل
مستحيل تكدر بيوم تقتلع هاي الصفحه من كتاب حياتك
ومادمت ماتكدر تقتلعها راح تظل تعثر عليها
بين كل فصل من فصول عمرك
هاي الصفحه بالذات الي تحاول تطويها راح تلگاها مستنسخه تلقائيا بكل صفحة بهذا الكتاب

امجد ماطلعت وياه غير مره وحده للمحكمه
واتصال بيناتنه مايتجاوز عدد الاصابع
حوراء يوميه تشجعني هي وامي حتى ابادر ومااخلي علاقتنه بارده من بدايتها

تفاجئت امجد اتصل بيه الظهر گال حضري نفسج العصر نروح نشتري كم شغله لان مابقه شي للعرس
هو ماقبل يشتري اثاث للبيت كال ننتظر لمن ينتهي البناء ونجهز ف كان قصده نشتري شغلات لغرفتنه لان قرر نكعد يم اهله بدايه الزواج لان البيت يتاخر بنائه كم شهر
اعرف فكره طلعتنه سوه وراها حوراء متاكده هاي فكرتها واقتراحها لخوها لان حسب. علمي اهله مجهزين كلشي يخص غرفتنه

وهم عمه اخو ابو مصاب كورونا وابو امجد قدم موعد العرس كال اخاف كلشي يصير والاعمار بيد الله
فقررو يسوون العرس مختصر لان هلفتره كثرة الاصابات ويخافون يسسون هوسه مال عرس خاف الناس التجي واحد يصيب الثاني

ماعندي اي شعور لابفرح ولابحزن خاليه من المشاعر تماما
انهزم من روحي وتفكيري وحزني اروح يم زينب الگه حالها اخس من حالي
احنه الي صابتنه لعنة ال منهل ومااعتقد يجي يوم نتخلص من هاي اللعنه

رجعت للبيت سبحت وجهزت نفسي اتصل امجد كال اطلعيلي

لبست حذائئ واخذت عباتي لبستها باوعت النفسي مكياجي جدا بسيط واليشوفني يكول ماحاطه شي
طلعت لكيته بالباب هو ومثنئ

صعدت يمه وگلبي يدك حيل
سلم على مثنئ وصعد

تبادلنه السلام بكل هدوء بين فتره وفتره من الوقت نتبادل اطراف الحديث بشغلات عاديه ماتستوجب الذكر

ماكان بيناتنه اي حوار حالنه حال اي خطيبين
اكتفينه احنه الاثنين بالسكوت
كل واحد بينه عايش صراع بينه وبين نفسه

كاعده بصفه واتذكرت اول واخر رساله دزها الي

انتي جميلة ك وطن محرر
وانا متعب ك وطن محتل

حسيته يريد يحجي بس مايعرف منين يبتدي
وصلنه لمحل مال تجهيزات غرف نوم
هو نزل واني نزلت وراه دخلنه للمحل

القسم المفروشات اشكال والوان عارضين بس عيوني تباوع اما روحي بغير مكان

كل مايسألني على فرشه نشتريها اكله بكيفك
تالي بعد ماسألني وصار هو يختار
اهله مجهزين كلشي ومشترين فرشه العرس بس مااعرف ليش اقترح يشتري اغراض غيرهن
اخذ تيبلامب وتحفيات نقلهن للسياره
هو گالي انو اهله عازميني يمهم

كملنه دفع فلوس لصاحب المحل وصعدنه بالسياره
كلشي بينه جامد كانه واحد مايعرف الثاني
ولاكأن بعد كم يوم عرسنه

وصلنه لهله اتلگتنه امه ونسوان اخوانه بملگه حلو
ابتسامتهن وسلامهن الحار يخليك ترتاح تلقائيا

دخلنه للبيت كعدنه بالصاله اني كاعده بعبايتي
وهو صعد لفوگ يمكن راح يبدل وفعلا شويه ونزل لابس اتراك اسود

ام امجد،، يا خاله ليش مگمطه روحج بالعبايه؟؟
شو حموينج مثل اخوانج وهم كلمن بشغله مايرجعون لليل وبس رجلج اهنا انزعيها وارتاحي

غصون،، خجلت من كلامها بس هي كاعده يمي
ونسوان اولادها راحن للمطبخ نزعت عباتي وخليتها بصفي شويه واجت وحده منهن جايبه صينيه بيها كاسات ماي

سالتها وين البنات الصغار؟؟

وسن،، اروجه واختها يم بيبيتهن يباتن اليوم

ام امجد،، خطيه متعلقه بيهن وخاصتا بالزغيره
كل كم يوم تاخذهن يباتن يمها

غصون،، حسيت بكلبها حجي بس سكتت واني هم دنكت من التوتر لازمه حزام جنطتي اعصر بي

صار المغرب وبس اني وام امجد كاعدين هو ماشفته امه كالت يقره قرآن بالاستقبال يوميه هيج
فتره المغرب يخلصها بين صلاه وقرائه القرآن

امه كامت كالت كومي خاله توضي وصلي
نهضت وراها يم المغسله شفت مرت اخو الاسمها وسن من شافتني ابتسمت
مبينه هادئه وحبابه كالتلي كملي صلاه وتعاي يمنه للمطبخ تره صرتي حالج حالنه لاتعتبرين نفسج غريبه

اني وهنه كلنه صلينه بالصاله بعدها اخذني يمهن للمطبخ يسولفن سوالف عاديه يحاولن يضحكني ويخلني اندمج وياهن ابد ماجابن طاري لزوجة امجد الله يرحمها

مدن السفره بنفس المكان الكعدنه بي بالصاله
والكل كعد داير مداير السفره
عمي كل شويه وكال اكلي بويه لاتستحين

يخليني اخجل اكثر واكثر اما امجد مدنگ ياكل بكل هدوء حتى مايرفع راسه

اول واحد كمل عشه هو ونهض قبلنه شفته راح للمغسله غسل وصعد
ابو كمل اكل وكال جيبولي جاي للاستقبال

ندستني مرت اخو

وسن،، اصعدي يمه راح اجيبلكم جاي

غصون،، فتحت عيوني كتلها لالا خليني اهنا

متاكده حتى اذا صعدت يمه راح نضل ساكتين
حتى مااعرف اشلون راح ننجمع بغرفه وحده واحنه هذا حالنه

ام امجد،، كومي وياي اراويج غرفتج
حتى اذا اكو شي ناقص سجلي يمج حتى نشتري

غصون،، ماحجيت هي كامت واني كمت وراها صعدت الدرج كدامي تحجي عن البيت وشنو بانين جوه وشنو فوگ واني بالي مويمها ابد

صرنه بنهاية الدرج تصميم الطابق الثاني اربع غرف بنفس السره يعني مو غرفه مقابل غرفه
المحجر كدام الباب مال الغرف يعني البصاله يكعد من يرفع راسه يشوف كل البيبان الفوك

بنهايه الممر صاله وبصفها مطبخ
ترتيب البيت وتصميمه حلو

اخوان امجد اثنينهم متزوجين وكلهم بنفس هذا البيت عايشين لان مره حوراء كالت ابوي مايقبل اخواني يطلعون بيت وحدهم حتى امجد من راد يبني ماقبل ابوي بس بعدها قنعنا لان راح يبني بالحديقه مو بعيد عنه وشرط ابوي البيت بس انام بي يعني ريوك وغده وعشه بالبيت الجبير كلهم يلتمون على سفره وحده

عرفت اول غرفتين لخوانه واخر غرفتين وحده منهن غرفته القديمه ماقبل نتزوج بيها
والغرفه الاخيره غرفتنه الجديده

وصلنه يمها امه فتحت الباب صار هو كدامي بيده دفتر وقلم مااعرف شنو يكتب من شافنه تركهن على صفحه ونهض

عمتي ضلت تسولف عن التجهيز وشنو تحتاج وهو ساكت واني حالي من حاله

بعدها امه طلعت وسدت الباب وراها خلتنه بس اني وياه
جلئ صوته

امجد،، تفضلي اكعدي

غصون،، كعدت يمه مدنكه اسمعه يجر حسره وره حسره
دقايق واحنه هذا وضعنه لاهو حجه ولااني
فجاه نهض من مكانه كال الحگيني

ماعرفت شكو كمت طلعت وراه شفته فتح الغرفه البصف الغرفه الكنه كاعدين بيها عرفتها غرفته القديمه

دخل ودخلت وراه مرتبه كلش حلوه كانه غرفة عروس مليانه عطر نسائي

جر الكرسي اليم الجربايه كعد وكال اكعدي
مالكيت نفسي غير كعدت بكل هدوء

منتجي على عكوس ادي وعيونه تفتر بالغرفه كانه يتذكر كل شي عاشه داخل جدرانها هو وزوجته الاولئ همس بصوت ناصي وعيونه مركزهن بمكان بعيد عني

امجد،، قبل يومين كان عيد ميلادها صار عمرها 30سنه مرت اربع سنوات على فراگها الي

غصون،، عيوني مركزه بعيونه وعيونه مركزه بغير مكان بيهن لمعة متاكده لمعة دموع اذا ينطيهن المجال ينزلن مستحيل يتوقفن بسهوله

كمل بنفس نبرة صوته الناصيه

امجد،، كانت دائما تسميني أبن گلبي
حتى بموبايلها مسجله نفس الاسم

كانت تفرح اذا صارت مناسبه بالبيت تلگاها اول وحده مخبوصه بالتحضيرات
كلشي ترتبه بيدها تجهز ادق وابسط التفاصيل
لكن اليوم كلشي مرتب وكلشي جاهز
بس هي ماموجوده

غصون،، بدون وعي نزلن دموعي وحتئ مااعرف شوكت ندمجت ويه كلامه وشوكت تأثرت
كل الاعرفه هو يحجي واني دموعي تجري بدون صوت

امجد،، كانت عدنه اهواي احلام من ضمن هاي الاحلام بيت خاص بينه اني وياها واطفالنه
واليوم حققت هذا الحلم وبنيت البيت الجانت تحلم بي
بس هي ماراح تسكنه وياي

غصون،، جر حسره تحسها هشمت صدره وطلعت
كل مايكمل كلامه يسكت مده من الزمن وبعدها يكمل بصوت مخنوگ

امجد،، بنيت البيت الجانت هي راسمه خريطته
كم غرفه بالبيت وكل تفصيله ذكرتها نفذتها وبنيتها بنفس الشي الخططتله
والغرف الكانت تخطط شنو تحط بيهن من اثاث
والغرف الكانت مقرره تخليهن للبنات
كلشي رادته حققته الها بس هي الشخص الوحيد المراح يدخل الهاي الغرف

غصون،، اهنا نزلت دمعه منه شقت طريقها على خده واختفت بلحيته

امجد،، راح تصير مناسبه عرس بالبيت بس الشخص الوحيد المايحضر هي
عمرها ماراحت المكان بدون اذني
بس الهذا المكان راحت بدون اذني وبدون اراده منها

غصون،، ابتسم بااستهزاء والتفتلي

امجد،، هم سمعتي الموت يستأذن من احد؟؟

غصون،، بلعت العبره الخنكتني ودنكت
افكر لشوكت راح يظل تحت تأثير الغائبه الحاضره
وهم يجي يوم ويفتحلي ولو مكان بسيط بداخل گلبه؟؟

رفع ادي فرك عيونه وباوعلي

امجد،، انتي الوحيده الي مااعترضت عليج من رادو اهلي يخطبوج الي تعرفين ليش؟؟

غصون،، ردت اكول ليش؟؟
بس العبره خنگتني وسدت مجره التنفس بحيث اكتفيت هزيت راسي اله بمعنى ليش؟؟

امجد،، لان حسيتج تشبهيها
روحج نفس نقاوة روحها

قصة حبنه دامت 5سنوات رفضني ابوها من تقدمت الها وكان شرطه اله تتخرج يالله يقبل ينطيها الي
انتظرتها واني اعد الايام يوم يوم حتى انجمع بيها بالحلال بعد 5سنوات من زواجنه اخذها مني الموت
عشر سنوات وهي كدام عيني وبنص گلبي

غصون،، ماكدر يحجي مختنك دنك يعصر بگصته بطرف اصابيعه جر نفس ومسح وجها بثنين ادي

امجد،، سبحان من قهر عبادة بالموت والفناء
لا اعتراض على حكمك يالله

غصون،، رفع راسه يباوعلي عيونه حمر

امجد،، اني تعبان غصون كل جزء بروحي تعبان
اتمنى مايكون كلامي ضايقج
واتمنى ترممين الانهدم بداخلي
ساعديني حتى ادفنها بگلبي
مثل مادفنتها بالتراب بيدي
ساعديني حتى اتجاوز محنه غيابها عني
اني مؤمن بقضاء الله وقدره
وماعندي اعتراض على ماقسمه الله الي
بس غيابها وفكرة فقدها صعبه مرت اربع سنوات ولحد الان مامتقبل فكرة غيابها عني للأبد

قاريه حديث الإمام علي عليه السلام؟؟

غصون،، شنو هو؟.

امجد،، سألو ياامير المؤمنين ماهو اشد من الموت
اجاب فراق من نحبهم اشد من الموت

غصون،، ماجنت متوقعه هذا الانسان الكدامي مستعمر گلبه الحزن الهاي الدرجه
اللحظه ردت اگله اعذرني مااكدر وخل ننهي كلشي من هسه لان طريقنه طووويل اني وياك يمكن انجح بترمييم داخلك ويمكن افشل وساعتها اكون اني الخاسره الوحيده والاصعب من كلشي اني المحتاجه شخص يرمم بقايا روحي المتهشمه

فكره انو انهي كلشي بيناتنه سيطرت على عقلي
لان من سابع المستحيلات يجي يوم ويحبني على كمية الحب الشايلها الزوجته الأولى بگلبه

وهيج عمرها ماراح تنجح علاقتنه
هسه تاكدت فعلا انو اهله اختاروني حتى اكون ام لاطفاله فقط علاقتنه راح تكون ابرد من الثلج

اندك الباب دخلت مرت اخو بيدها صينية الجاي
مابيه حيل حتى اخذ الاستكان منها بعد السمعته منه

اثنينه ماشربنه نهضت من مكاني كتله بصوت كوه ينسمع رجعني لهلي تأخر الوقت

نهض بدون صوت طلع كدامي واني وراه
نزلنه لكيناهم كلهم كاعدين حتى اخوانه كامو من مكانهم سلمو عليه بكل احترام مدو اديهم
كل الابالي اطلع منا لان اذا اضل بعد نص ساعه
اكلهم بطلت مااريد اتزوج لان ابنهم متيم بزوجته المتوفيه وعمره ماراح يحبني لو يعتبرني زوجه يشاركها كلشي يصير وياه مثل ماجان ويه هاله

ابو كال بعد وكت وامه كالت ضلي ونسوان إخوته رادن يقنعني ابقى بعد ساعه بس اصريت ارجع للبيت

ومثل ماجابني وهو ساكت هم رجعني وهو ساكت

نزلني يم باب بيتنه وانتظرني لمن دخلت يالله راح
اول مادخلت اتمنيت ابجي بصوت عالي
مو على كلامه لا ردت ابجي على روحي
وعلى عمري يمكن مكتوب عليه اشلاع الگلب بكل مراحل حياتي

ثاني يوم كاعدين نتعشه سمعنه صوت صايح بالمنطقه طلع ابوي ومثنئ يركضون واني وامي وكفنه بالباب بس من شفنه زينب التصيح طلعنه كلنه نركض
هي دقيقه لااكثر اخذها ابوي ومثنئ وامي وزينب للمستشفى خفت على زينب تموت عمتي ادك وتلطم وتصيح راح تروح بنتي من ايدي مثل ماراح اخوها

تقصد زينب لان گلبها تعبان وبتها وكعت بيدها خافت عليها لاتموت من خوفها على فاطمه

ضليت اهدي بيها وبالحقيقه اني بأمس الحاجه الشخص يهديني بعد السمعته البارحه من امجد وانوب مصيبة بنت زينب

اتصلت برقم ابوي ماجاوب وامي تاركه موبايلها ومثنئ هم ناسي تليفونه ع الشحن
مريم تبجي وتحجيلي اشلون الطفله وكعت بدون لاحس ولانفس

نص ساعه وكفت سياره اباب بيت عمي نزلو منها اثنين زلم مخبوصين لان من واكعه الطفله حمئ زينب جان ع الخط يسال عن وضع بنت اخو والضاهر سمع الهوسه واجه طاير هو وابوها
مريم طلعتلهم وعمتي مسمعه لواء كم حجايه يدكن بالعظم كايتله حسبي الله ونعم الوكيل بيكم يبيت منهل
اذا صار شي ابنتي عساكم ماترتاحون لادنيا ولااخره

مريم كايله العم فاطمه بمكان المستشفى لان هي المستشفى الوحيده بهاي الناحية واقرب شي هي
ومتاكده اكثر من متصله باابوي كايللها احنه وصلنه المستشفى الفلانيه

ضلينه كاعدين نبجي ونندعي اكثر وحده بجت اني
بجيت على روحي وعلى زينيب وعلى الوضع الوصلناله
لو مارايحين فصليه بسبب العادات والتقاليد الفاشله جان ماوصل حالنه الهاي المرحله

للساعه ب3الفجر يالله رجعو وياهم الطفله
اول ماسمعنئ صوت السياره طلعنه
اني وعمتي ومريم
مثنئ شال الطفله بيده دخلها لبيت عمتي تلكينه زينب تسحل بروحها سحل

حتى ماتحجي عيونها وارمه
دخلنه كلنه للبيت ابوي وامي واجت مرت مثنئ
مريم فرشت للطفله فراش وجها اصفر حاطيلها كانونه بيدها ولاصقه مال حراره بگصتها نايمه الطفله حطها مثنئ بالفراش وكلنه داير مدايرها زينب مثل المصدومه ماتحجي بس عيونها يجرن وكل شويه ودنكت باست رجل بتها

ابو مثنئ،، كافي بنيتي مايصلح موزين عليها هيج تسوين

زينب،، بنيتي عمي

ابو مثنئ،، ادري يابويه هو هذا الطفل ينشمر ويتمرض ويشلع الگلب خو مانريده بس يضحك وكلشي مابي هم حاله حال الاكبار يتمرض

كفيلج الله جان مرتضئ ابني من ينشمر اكول خلص مات بس هلتشوفي جدامج حدار مابي
هاي الجهال يبنيتي مثل ماتوكلنه الشهد تلوعنه وتوكلنه المر والقهر
واكو مثل جان عد امي تكول مايصير راس اذا مايشيب راس
يعني مايصير ويكبر الطفل اذا مايشيب راس امه وابو من القهر

لا علئ كلشي تتراجفين وتوكعين وانتي مريضه يابويه

وبعدين لاتضلون هيج داير مدايرها مايصير اسم الله عليها

كومي مريم جيبي فراش لختج خل تتمدد يم بتها خلها ترتاح تعبت بالمستشفى

غصون،، كامت مريم جابت فراش مدته وامي وابوي راحو بعد ماوصو زينب الف وصيه وطمنها على وضع بتها وانو مابيها شي والصارلها صاير بكل الاطفال

بعدها مثنئ اخذ مرته وراح ردت اروح زينب رفعت رأسها وحجت بصوت مبحوح مبينه هواي مصيحه

زينب،، لاترحين ضلي

غصون،، كعدت يمها لزمت ايدها بارده ثلج
كتلها بس ابدل وارجع يمج ابات
دقايق وارجعلج
جنت لابسه تراك مااعرف انام بتراك اذا مادشداشه ارتاح بيها

وفعلا رجعت بسرعه بدلت لبست دشداشه خليت حجابي على راسي وعبايتي اخذتها بيدي لان وادم نايمه محد يشوفني من اطلع بطرك ثوبي لبيت عمتي

رجعت الزينب لكيتها عيونها مفتحه تباوع لبتها
همست بصوت ناصي

نامي زنوبه اني كاعده يمها مايجيني نوم

كسرت گلبي من حجت ودموعها تجري

زينب،، ماتت يغصون بس الله رأف بحالي ورجعها

غصون،، كولي يالله زنوبه والله كلشي مابيها باجر تصحه وتصير جنها ورد

زينب،، لو ميته اموت وراها

غصون،، زنوبه كافي هيج تحجين تفاولين على الطفله باوعيلها كدامج مابيها شي

زينب،، بالمستشفى واتخيلتها ماتت واتخيلت نفسي اشلون الطم عليها مثل مالطمت على أحمد وعلى ابوي
خفت اخسرها مثل ماخسرت اعزازي قبلها

غصون،، مريم هم بدت تحجي على زينب حتى تهدئ شويه وماتفكر هيج تفكير يموتها قبل اوانها

شكد حاولنه وياها حتئ تنام بس ابد ماغمضلها جفن فاتحه عيونها تباوع لبتها كل ماتتحرك الطفله زينب تطفر من مكانها مرعوبه

عمتي عدها بيرغ للعباس عليه السلام
جابته ومررته على گلب زينب وتحجي بصوت ناصي بعدها خلته يم راس الطفله

ام احمد،، ماعدنه غير الله واهل البيت فدوه لاسمهم
دخيلك يسبع الگنطره دخيلك يكفيل زينب بنيتي بشاربك بجاهك عند ربك

غصون،، ثاني يوم الطفله زينه وضعها مستقر زينب كل ماتگح بتها تفز خايفه عمتي تحجي عليها تگلها موتي روحج بعد ماكافي الصار بيج قبل؟؟

زينب تسكت والطفله هادئه مريم تجيب عصاير ونساتل من المحل وتحط كدامها كل شويه وسألتها شنو اجيبلج؟؟

كل ساعه يتصل عمها عليها يطمن على وضعها
تالي گالها حضري فطومه حتئ اخذها العصر لدكتور اختصاص اريد اجيك وضعها اكثر وانتي هم تعاي وياها بعد مانهت زينب الاتصال عمتي كالتلها ماترحين اكعدي واسكتي انتي مريضه خل عمها ياخذها

بس زينب كالتلها اذا ماخليتيني اروح ويه عمها ااجر سياره والحگها

عمتي سكتت ماحجت تدري بيها من تنقهر تتخربط

وهم زينب ماقبلت نحجي ل ابوي عن روحتها ويه حماها للطبيب تدري اذا دره مايقبل بروحتها

للعصر مريم سبحت فاطمه ولبستها وزينب كاعده على اول درجه لابسه عبايتها وحجابها جواريبها السود وشحاطه مبينه اخت عمتي مو بتها
دوم مغلفه نفسها بالحزن تندب حضها

مره كعدت وياها اريدها تطلع من القوقعه الدافنه نفسها بيها اريدها ترجع مثل قبل
زينب القويه ام السان الطويل الوكحه الماتخاف
ياربي شكد مشتاقه اسمع ضحكتها القديمه قبل لانروح فصليات
جانت من تكعد يمي اگلها انتي سينما ابلاش على كد ماتخلص الوكت تضحك وتضحكني وياها

هسه كلشي بيها طافي مابي روح
تگلي من انام اتشاهد وانام اخاف اموت واني نايمه لان گلبي عايش ع البطاريه

كتلها ذيج فلانه وذيج علانه هم عايشات ع البطاريه مثلج وعايشات حياتهن ولاكأن بيهن شي
ليش ماتصيرين مثلهن؟؟

تره كل الجاي نمر بي امتحان من الله يختبرنه على قوة صبرنا وتحملنه
صيري قويه الخاطر بنتج بدل ماتكتفين مره بالمحاوله بتقربج منها حاولي مره واثنين وبالاخير الدم يحن لابد يجي يوم وتتقبلج

شكد احجي مايفيد بيها الحجي ابوي شكد حاول وياها هم مافاد تالي تركناها على راحتها يجي يوم وتصحى من سباتها وتندم على شبابها الفنته داخل جدران غرفتها

للعصر اجه حماها اخذها حاجزين يم دكتور انطاهم موعد الحجز الساعه ب6يدخلهم
صادف خميس ابوي بالاستقبال فارش سجاده وفاتح كتاب يقره دعاء كميل

رحت كعدت كدامه وهو يقره بداخلي حجي اريد اگله يابه بطلت مااريد امجد لان متاكده راح اتعب وياه

تالي تركته وطلعت توضيت وهم فرشت سجادتي بصف امي الواكفه تصلي صلاة المغرب
وكفت اصلي كملنه اجه مرتضئ كال ابوي يصيحلج

نهضت ورحت وراه لكيته لازم السبحه يسبح بيها رحت كعدت يمه كتله نعم يابه

ابوي التفت لمرتضئ كاله اطلع وسد الباب طلع اخوي وسد الباب وراه التفتلي ابوي

ابو مثنئ،، اي بويه احجي

غصون،، ابوي يقره وجوهنا اذا عدنه سالفه ومانكدر نحجيها من يوم سالفتي ويه ذياب لليوم ابوي يقراني بدون مااحجي صرنه موبس اب وبنته لا اصدقاء يحجيلي واحجيله
شخصيتي هو البناها خلاني اكون قويه اكثر واكثر

جليت صوتي وحجيتله بالصار ويه امجد وشنو كلامه بخصوص مرته

خايفه من مستقبلي وياه خايفه يقسه وياي لو يجرحني واني البيه مكفيني

ابو مثنئ،، راح اسألج سؤال وجاوبيني

غصون،، دنكت وبصوت ناصي كتله تفضل يابه

ابو مثنئ،، لنفرض انتي مارايحه فصليه اني مااريد اذكرج بالصار بس اكو غايه من سؤالي
لنفرض اني ماانطيتج فصليه وبعدج عندي واجه امجد خطبج وهو متزوج ومرته ميته وعنده اثنين اطفال

انطيج اله لو لا؟؟؟

غصون،، دنكت ماحجيت

ابو مثنئ،، اكيد لا ماانطيج لان ماناقصج شي حتى انطيج لشخص ارمل وعنده اطفال

بس شوفي حكمه الله سبحانه وتعالى من كال الصار وياج شنو هي الحكمه؟؟؟

غصون،، رفعت راسي عيوني مدمعه اباوع بوجه ابوي

ابو مثنئ،، كل اليصير بحياتنه من مواقف ومصايب ومأاسي وكلشي هو امتحان من الله سبحانه وتعالى
امتحان حتى يوصلج للجها الصحيحه

كل النخسره بحياتنه ربج راح يعوضنه اضعاف اضعافه
كله تخطيط من الله عز وجل مررج بهيج مصايب وتعرقلات بحياتج بس حتى يوصلج لامجد

لان هو العوض الاحسن الج
اني مااجبرج هلمره
وكل التردي اني وياج
حتى لوقبل العرس بيوم تكولين تراجعت لان ماقانعه بهذا الزواج هم اكلج تدللين اتصل بيهم واكلهم بطلت مالكم مره يمي

غصون،، وكعت دمعتي بحضني رفعت راسي كتله يابه بس هو كلش يحب مرته

ابو مثنئ،، وراح يحبج انتي هم وبنفس مقدار حبه الها

ليش الله سبحانه وتعالى حلل للزلمه الزواج مره واثنين واربعه؟؟

غصون،، ليش؟؟

ابو مثنئ،، لان يعرف قلب الرجل يتسع لاكثر من حب
مثل ماحب زوجته الأولى راح يحب زوجته الثانيه والثالثه والرابعه بنفس مقدار الحب
كل وحده الها معزتها الخاصه بگلبه
كال اعدلو بينهن مو فقط بالمشتره او المتطلبات العدل يعني حتى بالحب تعدلون بينهن ومو وحده اعز من وحده لا كلمن الها معزتها

مثل ماامجد يحب زوجته الأولى الله يرحمها ودافن حبها بگلبه راح يحبج انتي هم
صدگيني يابويه اسألي مجرب بهذا الشي

غصون،، عرفت ابوي يقصد حبه البنت عمه الطلگها
شبه اقتنعت بكلامه جر راسي باسه وكال فكري منا ليومين وانطيني جوابج النهائي حتى اذا بعدج مامقتنعئ اروحلهم وننهي كلشي

جريت ايده بستها تركته وطلعت ورحت لغرفتي واني التفكير لاعب بعقلي لعب مااعرف شنو اريد خايفه من المستقبل ويه امجد

احس نفسي واكفه بنص معركه مشلوله عن الحركه
عاجزه
اتراجع لو اتقدم؟؟
دائما اصعب الخيارات هو الخيار الأوسط (لو)
تلگه نفسك معلگ من تلقاء نفسك ومتقيد بكلشي
ماگادر تتوقف لوتمشي
محتار بين گلبك وعقلك

مشكلتي دائما اتضاهر بالقوه بس من الداخل متحطمه من هشاشة روحي اذا مرت عليه نسمة هوئ راح تجرف
وتقتلع صمودي وتحطمني

ضليت بمكاني اگلب بكلام ابوي براسي وبعدها اذكر كلام امجد وحبه المرته

اشلون يكدر يحبني اني هم وهو مابكلبه حب غير المرته الله يرحمها
اني سامعه بفاقد الشي لايعطيه

بعدها صبينه عشه وتعشينه كملت ورحت البيت عمي سألتهم على زينب گالت مريم بعدها مااجت هي راحت ساعه 6المغرب وهسه الساعه 8ونص وزينب بعدها ماجايه
ضل بالي يمها
جريت موبايلي اتصلت بيها اول دگتين رفضتني
كتلها عمه رفضتني احتمال جايه بالطريق
مرت نص ساعه وزينب ماكو تملكني القلق رجعت اتصلت بيها يدك متجاوب

يتتبع

Jonson_Sab

Kawther-mohammed

يسعد مسائكم حبايب قلبي
بنات عندي طلب منكم ادري متقصرون
اكثر قصه تعبت بيها هي قصه ضحيه
لان فعلا تستاهل التعب وتستاهل تكون نهايه لكل عادات وتقاليد تبخس حق المراة

الاطلبه منكم ترجعون تصوتون من اول بارت لاخر بارت واكون جدا ممنونه 🌹