رواية ضحية لمن لايرحم الفصل الثاني وثمانون 82 - بقلم زهراء الحسناوي

البارت 57

ضحيه لمن لايرحم
(مابعد الألم)

زهراء الحسناوي
،،،،،،،

ﻃﺸﻴﺘﻬﻦ ﻭ ﺗﻠﻤﻠﻤﻦ
ﻭﻟﻤﻴﺘﻬﻦ ﻭ ﺍﻃﺸﺮﻥ
ﻳﻮﻡ ﺍﻟﺮﺩﺗﻬﻦ ﻣﺎ ﻟﻔﻦ
ﻳﻮﻡ ﺍﻟﻌﻔﺘﻬﻦ ﭼﻮﺩﺭﻥ
ﻳﻤﻲ ﻭ ﻋﻠﻴﻪ ﺗﺮﺍﺷﺪﻥ
ﺷﻨﻬﻮ ﺍﻟﺴﺒﺐ ﺑﺲ ﻣﺎ ﺣﭽﻦ
ﺁﺟﺮﻭﺣﻲ ﺣﻴﻞ ﺁﺳﺘﻬﺘﺮﻥ
ﺭﮔﺼﻦ ﺭﮔﺺ ﻣﺜﻞ ﺍﻟﻐﺠﺮ
ﻫﺰﻥ ﺧﺼﺮ ﻣﺎ ﻳﺴﺘﺤﻦ

،،،،،،،،،،،،،،،،،،،،،،،،،،،،

زينب،،كبرت واني بال 24من عمري والشيب مله راسي
الدرجه اليشوف لون شعري وتجاعيد وجهي يتصور عمري 60سنه كثير ناس من النعرفهم ينصحوني
اهتمي بنفسج
صيري مثل البنات البعمرج
انتبهي لصحتج
كبرت قبل اواني والتعب والقهر هد حالي وجسمي
اواجه صعوبه بالعيش والتعايش ويه وضعي ونفسيتي التعبانه
صدك مااشبه البعمري أبد
احس نفسي مختلفه عنهن بهواي
الحياة حكمت عليه بالسجن والتعب المؤبد
وغياب بنتي خلق مني عجوز تنتظر ابنها المفقود بلكت يعود ويرجع الحضنها
صرت اعيش جسد بدون روح
وروح بدون گلب
وگلب بدون نبض
هذا حالي بعد وفاة ابوي واحمد وفقدان بنتي الي هي قطعه من روحي

منو بيكم يتخيل نفسه يعيش يوم واحد بدون ميشوف بنته او ابنه؟؟

من يوم الي دخلت بيت ال منهل الدمرو حياتي وحطمو كل جزء بروحي واني واگفه بنفس النقطه ابد ماتحركت
حياتي من سيء إلى اسوء

رفعت راسي كدامي الساعه قاربت تصير ب5الفجر واني كاعده اباوع على مريم نايمه تشخر واني عيوني مابيهن ذره نوم وهذا حالي من يوم المات

احمد لليوم صرت احسد الينام بليل
اكول هنياله نايم باله مرتاح عكسي تماما
الف فكره وفكره ادور براسي مرة كم سنه ع الصار بس لحد هذا اليوم من اغمض ينعاد عليه كلشي
نوبات من اغمض بليل بلحضه أشوف احمد يركض ولواء يركض وراه

يفز گلبي ويه صوت الطلقه اكعد مرعوبه ادور داير مدايري احس هلمشد مايرضه يفاركني عايش وياي

كل مااذكر الصار يزيد حقدي وكرهي لبيت منهل وخاصتا لواء

نهضت من مكاني توجهت للحمام توضيت وطلعت فرشت سجادتي وكعدت اصلي

الوقت الوحيد الي احس بي بالراحه هو وقت الصلاه
انسه كل همومي واني كاعده بين ادين الله عز واجل
اشكيله همومي احسه يسمعني ويذكرني بقوله
(ان الله مع الصابرين)

منتهى الحفظ عنده وغاية الرعاية لديه
واقصئ الطمأنينه وانت بمعيته
لذلك دائما اگول

اللهم احفظني من بين يدي ومن خلفي وعن يميني وعن شمالي ومن فوقي
واعوذ بعظمتك ان اغتال من تحتي

هذا الدعاء امي علمتنياه تكول يحفضج من ست جهات وهو الحافظ وحده لاشريك له

دائما كنت ادعي واطلب منه يحنن گلب بنتي عليه
حلمي اسمع كلمة ماما بلسانها
من يجيبها عمها يوم يمي تخلصها خاتله يم مريم تشوفني تنفر مني
اتعجب ليش تخاف بس مني ومن مريم ماتخاف؟؟

شكد احاول وياها لكن جميع محاولتي بالنهايه تفشل واصفئ وحدي ابجي بغرفتي مقهوره على وضعي بنتي الي حملتها تسع شهور بداخلي كارهتني وموطايقه تباوعلي

مر شهر ماشايفتها ابد يتصل حسن اسأله عنها يطمني على وضعها ومن يطلب منها تحجي وياي تنهزم رافضه تحاجيني

كل هذا واحط عيني بعين الله واسكت وبداخلي كلمه وحده تتردد
(حسبي الله ونعم الوكيل)

كملت صلاة لميت السجاده تركتها على صفحه
ورجعت لفراشي كعدت بيدي السبحه اسبح بيها

مرات من ادخل لتعليقات الناس ع الروايه اتشجع وابصر خيط امل حتى لوكان رفيع يكفي اتشبث بي
داعيه تحن بيوم الي

اقره تعليقاتهم بخصوص لواء وينعصر گلبي
هواي رادو ارجع بس وين ارجع؟؟

للدمرني ودمر عائلتي
للسلب صحتي وعافيتي
للغدرني وطعني بخنجر مسموم مستحيل يشفئ جرحي
شنو اذكر منه؟؟

كل زيناته مايشفعن اللحظه غدر وحده منه

شنسئ؟؟

لحظه الفتحت الباب علي وشفته وياها؟؟

لو لحظه القتل اخوي جدامي؟؟

لو لحظه السجل بنتي بأسم مرته الثانيه؟؟

لو
لو
لو

وهواي طعناته وكل جرح اكبر من الثاني مله گلبي وروحي جروح من عنده

مر شريط الماضي كله كدامي

الماضي الي لحد الان بصماته مطبوعه على جسمي
بدايتآ برجليه المشوهة اثر الحرق بفوح التمن
مرورا بشكلي وضعف جسمي وتنتهي بالبطاريه العايشه عليها

غير الضغط اذا اكل شويه اكله دسمه يصعد ضغطي وخشمي يطك دم

من اذكر الصار احس روحي تتصدع وگلبي ينكسر مليون قطعه وقطعه
ذكرى اقسئ من ذكرئ
وبلحظه تنفجر بداخلي رغبه لو الزم لواء اموته بيدي مايبرد گلبي

من كنت عنده مافكرت لحظه يجي يوم اكرها الهاي الدرجه
اما حاليه حقدي وكرهي اله فاق المعقول
الفتره الراحت كلها ماشفته من يوم عملية فاطمه
ماشفته ابد

حتى ام سجاد مااتصلت بيه
الشخص الوحيد الماتركني هو حسن
يوميه يتصل يسأل شنو محتاجه

حسن اعتبره اخوي الماجابته امي ولااعتبره واحد من بيت منهل نهائياً
لان مايشبهم گلبه طيب عكسهم وحوش بشريه

صحيت على صوت مريم الي صحاني من سبات الذكريات المؤلمه

مريم،، زنوبه لسه كاعده؟؟

زينب،، هزيت راسي بمعنى اي
والساني يستغفر ويردد التسبيحات

مريم،، اني جوعانه حسوي ريوگ تاكلين وياي؟؟

زينب،، رجعت غمضت وهزيت راسي
تركتني ونهضت من مكانها راحت للمطبخ
بين ماكملت تسبيحات فاطمة الزهراء عليها السلام

رجعت مريم بيدها صينيه تحب تقلي طماطه لاجعه الصبح وتشرب جاي وياها
اما اني مااكل دهن لان ضغطي يرتفع صارله فتره ف اكتفيت بشرب استكان جاي

فجأه هجم النوم على عيوني اتمددت بفراشي ومريم تاكل يمي
ماحسيت على روحي نمت

ماكعدت غير الساعه ب11الصبح
وهذا حالي دائما الليل يمر على عيوني مرور الكرام

ماانام اله بعد صلاة الفجر

سمعت اصوات بلبيت ومن ضمنهن صوت غصون
عدلت كعدتي ونهضت من فراشي واكفه على حيلي الم بي واحطه على صفحه دخلت غصون

غصون،، صحي النوم ياحلو

زينب،، ابتسمت الها وكتلها صباح الخير

غصون،، صباح الضهر قصدج تره حيأذن صلاة الضهر

زينب،، كملت وطلعت وياها للمطبخ امي فاتحه المجمده اطلع كبه من الاشتغلناهن بليل اني ومريم حتى نبيعهن جامدات

زينه من تشوفنه نلف كبه تتخبل تريد تلف ويانه بس امي ماتقبل تكول حرام يمه هي ماتفهم لان نيتها تلعب بنعمة الله موتشتغل مثلجن وهم الناس تأمن بينه وتاكل من عدنه خو مااخلي اختج تلعب بالنعمه؟؟
انطت امي كبه لمريم كالتلها سويهن النه غده واني كتلها اشويلي طماطايه لان مااكل دهن

غصون فتحت الثلاجه طلعت خيار وطماطه تثرم واني كعدت بالكاع وامير اخوي يمي يباوعلي ويضحك دائما احسه يفهم رغم هو معوق مشلول وعنده نقص بالدماغ بس كل مايشوفني يبتسم احس ابتسامته تبعث الطمأنينه الروحي
لااراديا ابتسمله متعلق بيه كلش عكس مريم كل مايشوفها يتفل عليها وهي تتخبل بس اضل ادردم
اكثر شخص بينه متعب امي هو امير

تعب امي ومريم لان يشيلنه كلساع حتى يحطنه بالعربانه لان يتخبل منها يريد يضل يزحف بالكاع وغير سبحه وتنضيفه كله امي واختي قايمات بي مايخلني اساعدهن ب امير ابد يكولن موزين عليج تنحثلين بي امير زلمه ثكيل وزنه مو طفل

امي من الصبح لليل توكف بالمحل صرنه كلشي نبيع
حتى كليجه نلتم اني وغصون وزينب هنه يعجنن العجينه واني اشكل وياهن اشكال الكليجه

عدنه كم نخله بحدايقنه مال بيوتنه القديمه عمي مخلي فلاح يداريهن والتمر مالتهن نكبسه بكياس صغار نسوي تقريبا 100كيس صغار ابو الكيلو ونحطهن بالمحل نبيعهن واكو واحد من جوارينه القدماء عنده حلال عمي اتفق وياه يوميه الصبح يجيبلنه معجانه گيمر عرب وزبد وحليب نبيعهن واله بالنص احنه وياه

الرزق خير من الله بطونه شبعانه من خبزه الحلال
ومامحتاجين من أحد بس يبقه كسرتنه الوحيده فقدان ابوي واخوي كسره عمرها ماراح تنجبر
امي حالها حال اي ام تحلم تزوج ابنها الوحيد وتفرح بااحفادها بس للاسف حتى هذا الحلم صار من المستحيل يتحقق
كعدنه كلنه نتغده وغصون ويانه مرات تشوفها تضحك ومرات تشوفها سارحه كانه بوادي ثاني

افرحلها لانها تحررت من خيوط الماضي وراح تطلع هلمره من بيت ابوها معززه مكرمه عند زوجها وعيالها عكس من رحنه فصليه رحنه مثل السبايه
مسلوبين من كلشي ابسط حقوقنه مسلوبه

ع الاقل غصون تخلصت منهم وماكو شي يربطها بيهم مثلي اني
يبقى الرابطني بذاك البيت بنتي وبس
ولواء الرافض يطلگني شكد عمي دز ناس حتى يقنعو بس جان يوصلني كلامه انو طلاكنه گطنه واطلعها من اذني مستحيل يطلك

كملنه الغده ومريم غسلت المواعين واني وغصون رحنه للغرفه
سمعت من مريم اليوم ياخذها خطيبها يشترون نواقص مال الغرفه مالتهم بس غصون مبينه من شكلها تعبانه ومالها خلك ولامبين عليها حماس لو فرح لزواجها

رفعت راسها باوعتلي سالتها شبيج؟؟

غصون،، مابيه شي

زينب،، اعرفها متوتره لان زواجها بعد ايام
علاقتهم هي وخطيبها بارده كلش لاهي تحجي عنه ولاهو يتصل بيها

اتصالاتهم كلش قليله فقط يسالها شنو تحتاج واذا تريد فلوس بعد يدزلها
خايفه من ارتباطهم هذا لان كل واحد بيهم مضوكته الدنيا ضيم شكل

اني سكتت مااعرف شنو انصحها لو شحجي وياها
لذلك اكتفيت بالسكوت
شويه وراحت لبيتهم واني رجعت اتمددت بمكاني

لان وضعي صاير كلش تعبان اذا افتر شويه بالبيت احس بتعب فضيع الدرجه مااكدر اوكف گلبي يأذيني

للعصر دخلت يم امي للمحل شفت سيارة خطيب غصون هو واكف يم الباب مثنئ يسولف وياه كان لابس قاط اسود كم مره اشوفه لبسه بس اسود حتئ دشاديشه سود

شويه وطلعت غصون اخذها وراح
كعدت يم امي شويه مااگول المحل زين شغله كلش بس المهم موكلنه خبزه حلال حتى لو وارده قليل

صاح اذان المغرب وبدت الدنيا تضيگ بصدري واختنگ وكت المغرب احس الكون يصغر بيه اتمنى اطلع خارج البيت اشتم هوئ ازور لو اشوف وجوه بشر تمنيت عندي اب لو اخ من تضيگ بيه الوسعه همه اليطلعوني ويمكن لو جانو موجودين ماجان هذا حالي دخلنه للبيت نصلي بعد الصلاه

زادت قبضت صدري كلش امي ومريم انتبهن هذا حالي يوميا نفس الوضع بس اليوم تعبت اكثر اريد اهج من البيت والله لو فطيم كدامي واتگلي يمه بلسانها يمكن حتى گلبي يشفه وترد بيه الروح وماجنت هذا وضعي حالي حال الميت

بعد العشه اجت يمنه عمتي ام مثنى من شافت وجهي تعبان ضلت تحجي عليه تكلي حابسه روحج زين مايطك گلبج وتموتين من حبسه البيت

تالي اخر شي گالت حضرن رواحتجن خل اروح اقنع مثنئ ياخذنه يزورنه بسيارته لان غصون ياخذها خطيبها مناك يتعشون يم اهله عزموها
جنت محتاجه اطلع بس اريد ابتعد عن جو البيت

لبست حجابي مابدلت بدشداشتي ضليت روح ماعندي خلصانه روحي من كلشي
لبست جواريب سود طوال وشحاطه تكرمون

البعمري يلبسن اشكال والوان واني دافنه روحي
لان احس نفسي كلشي خسرت

لا عندي صحه ولاعافيه ولا اب ولا اخ ولا حتى بنتي صفتلي

كملت لبست عبايتي وطلعت مريم تتاخر لان ترتب نفسها تحب تتانق رغم لابسه عبايه بس تحسها رايحه مناسبه افرح من اشوفها هيج لان اشوف روحي بيها اريد تتمتع بالاشياء الحرمني الوكت والدنيا منها

امي ماقبلت تروح لان امير عربانته مكسوره لان كلش قديمه وخطيه انطت عمي فلوس جمعتهن من وارد المحل حتى تشتريله عربانه جديده

وهم اختي زينه لان مجنونه من تطلع ويانه تفضحنه بالشارع اخر مره اخذها عمي ويانه للزياره كل شويه توكف يم محل تريد تشتري عمي ماقصر وياها تالي اخر شي وكفت يم محل يبيع بدلات مال عرس دكت رجلها زينه اله تريد بدله شكد حاولنه نقنعها نشتريها الها بعدين بس ماقبلت فضحتنه فضيحه بالصايح بنص الوادم من يومها وامي بعد ماتخليها تمشي ويانا تكول هاي خبله وتفشل عمج من تطلع خلوها تبجي شويه وتسكت

رحنه اني ومريم طلعنه بالباب وبيت عمي شويه وطلعو عمتي وحوراء زوجة مثنئ ومثنئ
صعدنه بالاستاركس

دائما اكعد يم الجامه افتحها حتى اباوع للعالم
اخذنه للامام علي عليه السلام
اول مانزلت احس دگات گلبي اضطربت

امشي واتلفت مثل المضيع شي عيوني تفتر
بداخلي گلت على شنو ادورين زينب؟؟

وصلنه للامام فدوه لاسمه زرنه وطلعنه
بس احس نفسي مامرتاحه اجيت قبل كم شهر زرت بس ماصار هيج بيه ليش هسه قلقه؟؟

عمتي گالت تعالن نشوف المحلات وشنو تردن اخذن وكفت عمتي بصفي لزمت ايدي وبدون محد يشوف حطت شي بيدي عرفتهن فلوس

باوعتلها ماقابله لان مامقصرين ويانه بس كالت هنه قليلات اخذيهن واسكتي حجتها وضحكت
رفعت ايدي شفتهن 10الف دينار تقربت من مريم وانطيتهن الها گتلها اشتري ذني الج مريم رغم كبرها تحسها طفله تفرح بأبسط شغله اخذتهن والضحكه ترست حلگها

اني امي قبل لانطلع انطتني مبلغ بسيط خردوات من الدخل مال المحل واصلا مابنفسي اشتري اي شي
حوراء مرت مثنئ ومريم وعمتي انطلقن گدامي يشترن واني امشي وراهن بطيئه اباوع للمحلات ومايلفت نظري غير ملابس الاطفال

اشوفهن وينعصر گلبي اتمنى اشتري لبسه والبسها لفطومه والمها بحضني لو امشطلها ومن اكمل ضفر شعرها ابوسها واشم ريحتها انحرمت من ابسط الاشياء بسببهم

واني امشي دايره وجهي للملابس سمعت صوت الصوت اعرف صاحبه كلش زين جمدت وجمد كلشي بيه حتى احس الدنيا وگفت خفت ادير وجهي اتاكد من صاحب الصوت

مااريد اشوفه ولااريده يشوفني نهائيا
ردت اكمل طريقي بس عيوني غصب عنهن التفتن
شفته واگف منطيني ضهره على بعد كم متر يحجي ويه شرطي ماانتبهلي لان هوسه مال ناس
اختنگت ودرت وجهي امشي سريع مااريده يشوفني ابد
امشي بكل سرعتي حسبالك واحد يركض وراي كل شويه احس راح يشوفني وهذا الشي الي مااريده
خلي بحسره شوفتي

شكد حسن يتوسل يريدني بس احجي ويه اخو لو مره نحاول نرجع الخاطر بتنه بس الانكسر مستحيل يتصلح الشرخ البيني وبين لواء صار بعد السما عن الارض مستحيل يلتقن بيوم من الايام

وصلت يم عمتي ومريم كتلهن راح اسبقجن للسياره مااكدر اضل امشي تعبت وگلبي صار يوجعني
عمتي ماقبلت گلت يالله كلنه نمشي وخطيه حتى البنات مااشترن غير حاجه حاجه مااهتميت لان بس اريد انهزم من المكان لان كل مكان يكون لواء بي اختگ اكثر واكثر

رجعنه للبيت وصورته قبل شويه ماتطلع من بالي
اتعمد اذكره لحظه الكتل اخوي حتى اطرده باابشع طريقه من تفكيري

اجيت بهم رجعت بهم اكبر اتمنيت ماجايه ولاشايفته كانه شوفته هيجت الجروح الجنت مضمدتها كوه

رجعت للبيت گبل دخلت للغرفه ذبيت عباتي وكعدت عيوني جرن وحدهن امسح دمعه تنزل الثانيه
ماجنت اتوقع يجي يوم ويكون لواء اكثر شخص اكرها بحياتي

تذكرت ملابس الأطفال الشفتهن وحن گلبي لبنتي الانحرمت منها تمنيت اشوفها كدامي واكحل عيوني بشوفتها

ثاني يوم اتصلت بحسن اسأل عليها
نصدمت من گالي راح اجيبها يمج كم يوم لان مودائما يجيبوها تجي يمي
سالته شبيها؟؟

حسن،، لتخافين مابيها شي شويه مصخنه

زينب،، مديت ايدي الصدري احس دكاته تسارعت
رجعت حلفته بالعلويه وادري بي مايحلف بيها جذب

حسن،، والله مصخنه صخونه بسيطه من البارحه اخذها ابوها للدكتور البارحه انطاها علاجات بس يمكن عدها التهاب قوي لان ساعه تفكها الصخونه وساعه ترجع

وحنان وضعها هم تعبان صار فتره لواء محتار بيها من طبيب الطبيب ف شفت اجيب فطومه يمج احسن

زينب،، غمضت عيوني وبدون تفكير سألته جا ابوها وين عايفها اذا بنته مريضه؟؟

حسن،، والله ماعايفها الرجال البارحه العصر اول مارجع من الدكتور الاخذله فطومه اتصل بي صاحبه علمود بيع وشره مال سياره

زينب،، تذكرت من شفته يحجي ويه الشرطي يم الإمام
گتله حسن جيبها هسه الله يخليك گلبي غده نار

حسن،، صار والله العصر اجيبها يمج

زينب،، نهيت الاتصال وصرت افتر بالغرفه يامن يجيب العصر واحضن بنتي واشبع من ريحتها

وفعلا جابها عمها لبست عباتي وطلعته جايب جنطه بيها ملابسها نزلت بنتي الوجه احمر وعينها الصاحيه حمره دم انخمش گلبي بدون وعي ركضتلها انثنيت كدامها وحضنتها بدون ماتبادلني لوتحضني كانه مره غريبه عنها مو امها الشالتها تسع شهور بااحشائها وشبعت ضيم ومرار من ال منهل حتى اشبع خبزه اسد جوعتي بيها واني حامل

فطومه التفتت العمها تريد ترجع ويا بس هو دنگ شالها يبوس بيها

حسن،، فطم عمها ابقي اهنا يم ماما حتى تصيرين زينه واجي اخذج حتى نروح للالعاب

زينب،، سكتت وضمت وجها برگبته مامقتنعه
همست بصوت مبحوح اثر العبره السدت مجره التنفس والحرگه الشبت بصدري

ماما حبيبتي مشتاقتلج انتي ما مشتاقه لماما؟؟

ضلت على نفس وضعها ماتتحرك دافنه وجها برگبة حسن
تمنيت اني التحضني هاي الحضنه
انتبهتلها تهمس بكلام مااكدر اسمعه لحسن وهو يكلهاا عييب عموو تره ازعل منج
سالته شبيها وشجاي تحجي؟؟
كال مابيها شي
عمها ضل يحجي وياها يقنع بيها مد ايده لجيبه انطاها فلوس كالها اشتري هواي جبس بالبتيته من التحبي انتي
رجع همسلها عدهم محل بي اشكال والوان
واخيرا اقتنعت وهزت راسها قابله

نزلها وباس راسها رجع مد ايده الجيبه طلع فلوس مبينات هواي مد ايده الي
سالته ماكافي المبلغ التنطي كل شهر؟؟

حسن،، هسه شمنطيج اني اعتبريهن راتب رعايه

زينب،، ابتسمت كتله والله عندي من احتاج اول واحد اطلب منه انت

حسن،، ليش كل ماانطيج تشلعين گلبي ليش ماتاخذين وتسكتين؟؟

زينب،، ماكدرت ارده اخذتهن حسن وگفاته ماينسن وياي والمبلغ الينطي الي كل شهر نوفر بي حاجيات المحل والنواقص لان اكثر الجيران ياخذون بالدين ونصهم شهرين ثلاثه مايدفعون

لان اعرف الفلوس من حسن اخذهن بس لو من لواء مستحيل اخذهن شكد حاول يدزلي ويه حسن بس جنت ارفض وحلفت حسن مايجيلبي فلوس من اخو ولااي شي من عنده

قبل لايروح انطاني علاكه بيها علاج فطيم وادويتها
علمني عليهن وشنو اوقااتهن نبهني اي شي يصير اتصل بي
بعدها راح واني وفطومه دخلنه للبيت بوسنها امي ومريم تجاوبت بس ويه مريم لكن اني وامي ولا حتى تباوع بوجهنا

مريم،، زينب تره بعدها گصتها محرحره بيها صخونه

زينب،، راح اسويلها شوربه وانطيها علاج بلكت تصير زينه
وصدك رحت للمطبخ بكل نشاط حسبالك عندي عزيمه وفرحانه
ولاجن هي شوربه اسويها

فرحانه بوجود بنتي يمي
نگعت التمن وثرمت البصل والكرفس بين ماذبلن ذبيت التمن وشويه معجونه اعرفها تحب الشوربه حمره من جانت صغيره اسويها الها تاكلها مره ماكو معجون سويت الشوربه بيضه ابد ماكلتها

انتضرتها تفور وتستوي حتى اوكلها تركت الجدر ع النار ورحت يمها متمدده بالكاع بس عيونها تفتر
كعدت يمها جريتها اريد احطها بحضني انيمها ماقبلت رجعت تمددت بالكاع ردت احاول وياها مريم غمزتلي بمعنى عوفيها

كل ماتسوي هيج احسها تحط خنجر بنص روحي
تركتها ورجعت للمطبخ افتر من كتر الكتر الهي روحي ودموعي تجري وگلبي والساني يرددن
حسبي الله ونعم الوكيل
حسبي الله ونعم الوكيل

هدرت الشوربه بعدها صبيتلها طاسه وحطيتها بصينيه واخذتها يمها مريم اخذتها مني

مريم،، المن هاي الشورربه؟؟
الفطومه الشوربه
يالله اكعدي حتى تنترس بطونتج وتاخذين علاج حتى اطيبين بسرعه

زينب،، كعدت فاطمه وانتجت بعكس ايدها على رجل مريم وبدت مريم توكلها بعد اكلت كم خاشوكه وبطلت حاولت مريم وياها ماقبلت رجعت تمددت بمكانها

جبت العلاج وانطيته المريم تنطي الها
اول ماشربته اتقيت طفرت من مكاني واحس گلبي سبقني الها

امي تصيح اسم الله ومريم تمسح على ضهرها واني جامده كدامها خايفه عليها

راحت مريم جابت طشت وخاولي وياهن كلنس
غسلت وجه فاطمه وحلكها وبالخاولي مال المسح مسحت الاكل الاتقيته فاطمه

اتقربت منها اتلمس گصتها بردت مو مصخنه بارده
ارتاح گلبي گلت الحمدلله فكتها الصخونه

وره اذان المغرب صليت وكملت وهي نايمه بالصاله تباوع للتلفزيون بدون صوت
نزعت جادر الصلاه ورحت المريم كتلها اقنعيها اصبلها اكل تاكل لان معدتها فرغت من اتقيت

مريم حجت وياها عمرها حتدخل 7سنوات تفتهم
هزت راسها رافضه ماتريد

شويه ونهضت من مكانها بدون وعي طفرت وياها
ها ماما بيج شي وين تردين؟؟
همست هي بصوت ناصي وعيونها على مريم

فاطمه،، للحمام

رادت تاخذها مريم للحمام نص الطريق وكفت كالت اريد مي عطشانه

رحت بسرعه جبتلها كلاص مي اخذته من ايدي شربته
اول مادخل معدتها ركضت للحمام واني ومريم وراها
ذبت المي الدخل معدتها زواعها عباره عن ماي وبس

خفت وردت اتصل بحسن امي گالت غسللها. وارجعن انطنها شوربه خل تاكل وتاخذ علاج بلكت ينفعها

مريم،، يمه هو غير الاكل يستقر بمعدتها ماتشوفيها تاكل اللگمه منا تركض تتقياها منا؟

زينب،، فطومه مدنكه واني واكفه يمها اغسل بوجها
واسمي عليها واقره ايات
اتلمسلت گصتها ماكو حراره بارده مابيها صخونه من اشوفها هيج ارتاح اكول كلشي ولاتصخن ماادري بالمصيبه الراح توگع على راسي

بعدت ايدي عنها عافتني ورجعت تمشي للصاله ومريم تغسل اباب الحمام عن التقيئ وامي مدري وين راحت ورجعت بعد دقيقه بيدها موبايلي يرن والمتصل حسن توني التفتت المريم اريد اگلها اقنعيها خل تاكل والموبايل بيدي فتحت الخط على حسن بعدني ماحجيت وياه

مانسمع غير الضربه القويه عقلي طار وركضت للصاله ومريم وراي تركض وجان اشوف بنيتي امدده على الكاشي كل حركه بجسمها ماكو وبس عيونها مفتحه

اطرافي انشلن واني اشوفها بهذا الوضع الساني ثگل ورجليه ماعادن يحملني كعدت بالكاع والتليفون بيدي اريد احجي مااكدر مريم كعدت تهز بيها وامي مكابلتها اثنينهن يحاولن يصحنها وهي بس مفتحه عيونها جنها جثه
امي واختي صوتهن صار عالي اشبه للصايح

ماحسيت روحي غير صحت صوت احسه هز الكره الارضيه من قوته

فااااااااطممممه

ماادري اشلون زحفت زحوف الها البيت نخبص حتى مااعرف منين اجتني القوه شلتها وطلعت للشارع اركض حافيه

تاركه امي واختي يصيحن وراي حطيتها بحضني وكعدت اباب الحوش فاقده اعصابي ومنهاره

وبس اسم بنتي على الساني

فااااطمه بنيتييي فطووومه

ولج ييمه فتحيي عيونج فااااااطمه

اضرب بيدي على وجها عيونها جامده مايرمشن ابد صحت بيها
فطوومه فططيم يممه بنيتي شوو فتحي عيوونج
فتحي عيونج يبعد امج ييمه
فطوومه فطوووومه

التمت الوادم عمامي طلعو يركضون اني حافيه لانعال برجلي تكرمون ولا لابسه عبايه بس الحجاب مشكل براسي

اخذها مثنئ من ايدي وعمي صاح بصوت عالي مااي جيبوو بطلل مااي
مريم دخلت تركض جابت ماي انطته العمي الازم مثنئ غسل وجها عمي وهي مفتحه عيونها ابد ماترمش مثنئ صااح بعمي كاله خل ناخذها للمستشفى

اكو مستشفى بنفس الناحيه الاحنه بيها ساكنين بس احنه بالبدايه والمستشفى بالنهايه وهي هاي المستشفى الوحيده الموجوده يمنه

نهضت من مكاني لازمتني غصون مريم لبستني عبايتها ولحگتهم بكل قوتي اركض للسياره حافيه

اني وعمتي بالوره صعدنه وبنتي بحضني ومثنئ يسوق طاير بين السماء والگاع وعمي بصفه كاعد
كل شويه يلتفتلي يفرك بديها

نفسي يصعد وينزل مااكدر لااحجي ولااصرخ
الساني شكلت بي كلمتين يمه بنيتي
يمه بنيتي
يمه بنيتي

ادنگ الگصتها ابوسها واشمشم بيها اباوع بعيونها بس صافنه ماترمش وارجع المها الحضني احس روحي فقدتها

عمتي تصيح دخيلك ياالله
وعمي يصح ياساتر يارب
ومثنئ طاير طيور بينه بالسياره

الطريق للمستشفى نص ساعه مثنئ سواهن دقايق بس احسهن دهر كامل وصلنه للمستشفى نزل مثنئ بسرعه فتح الباب واخذها من ايدي

عمتي وعمي نزلو ورا يركضون واني كوه نزلت مااكدر رجليه جامدات اهمش تهمش وراهم اريد اني اشيلها واني حتى روحي ماشايلتها

دخلت للطوارء من بعيد اشوف لمه مال ناس والأطباء يسون رجات كهربائية انشليت
وجحضت عيوني نفسي ضاك والساني ثكل ورجليه كوه تمشيني لجهة الناس الملتمه قبل مااوصلهم بكم متر شفت رجلين مال طفل مبينات بس. نص جسمه الفوك مامبين لان هواي عالم

ماحسيت بروحي غير ضربت وجهي بثنين اديه وصحت

ماااااتت بنتيييييي

گلبت المستشفى بالصايح فقدت وانهارت اعصابي كل ضني الطفل المات هو بنتي ماحسيت غير احد لمني لحضنه دفعته وصحت فطوووومه

مثنئ،، مووفاطمه والنبي موفاطمه هاي طفله غرگانه
بنتج يم دكتور الاطفال جاي يعاينها

زينب،، ماصدكت الساني يلهج باسم فاطمه مثنئ يجر بيه جر لازمني من عباتي وعيوني تباوع لوره للطفل الميت امشي وراه حافيه وعباتي تسحل وراي
اسمع الوادم تكول شبيها هاي خطيه اكيد ميتلها عزيز

مثنئ لازمني يسحل بيه سحول ورغم المستشفى ملوثه وبيها مصابين كورونا امشي بدون عقل استند ع الحيطان وصلنه لغرفة الدكتور الخفر مخلي فطومه يكشف عليها تحركت عيونها باوعلي الدكتور كتله واني كوه احجي مختنكه بالكلمه

ب بنتي ب بنتي الله يخليك
احجي وحلگي يرجف مااسيطر علي

صاح الدكتور بسرعه لغرفة التحليلات
شالها مثنئ وراح يركض وعمي ومرته وراه عمتي تنخه الله واهل البيت واني بس عيوني تفتر وره بنتي والساني يلهج بأسمها

دخلوها لغرفة التحيلات الباب مفتوح مثنئ حطها ع السديه واكف يمها واحنه ماخلونه لان الغرفه كلش صغيره فخلونه واكفين بالباب نباوع
الدكتور سحب دم من ايديها وهي ساكته شبه فاقده لاحس ولانفس

قاسو حرارتها كلش مرتفعه الدكتور كال مصخنه كلش ومشموره ليش مامسويتلها كمادات؟؟

جاوبته بصوت يرجف ب بارد جسمها م مومصخنه

الدكتور،، بابا حرارتها داخليه لذلك من بره تحسيها بارده بس امعائها حاره لذلك نشمرت
هاي اول مره تنشمر؟؟

زينب،، ضليت صافنه مااعرف بشنو اجاوبه لان ماادري يم ابوها مشموره قبل بساع وحسن ماكايلي؟؟
لوهاي اول مره تنشمر يمي؟؟

فجأه حسيت بألم فضيع بصدري
من خوفي على بنتي سجاجين احسهن يطعنن بگلبي
انحنيت وايدي على صدري

عمتي لزمتني لزمت ايدها بقوه اخاف اوگع لان احس الگاع تفتر بيه

عيني على بنتي المضمد لازم ايدها يشدلها كانونه وهي ماتصدر منها اي حركه
زاد الألم بصدري وانحنيت اكثر

كانه ماكو هوئ اريد اتنفس مااكدر ومثل الساجاجين تضرب بالقفص الصدري
اجه عمي لزمني من ايدي

ابو مثنئ،، بويه استهدي برحمانج راح تموتين
كولي يالله

زينب،، لزمت ايد عمي اخاف اوكع
طلعو فطيم لغرفه خاصه للاطفال مابيها احد فارغه تقريبا بيها 8اسره وكلهن فارغات حطوها ع السديه واجه الممرض حطلها بطل المغذي وضربها ابره بي

شويه واجت عائله ثانيه بيدهم طفل مبين عمره شهور مختنك الطفل واهله مخبوصين سمعتهم يكولون عنده ربو التمت علي الدكاتره

اباوع لروحي حافيه مالابسه نعال برجلي وحالتي حاله
اليشوفني يكول هاي جاي تنازع الموت وذني لحضاتها الاخيره ايدي على صدري النغزات وحده وره الثانيه صارن وقويات يخلني انحني

ابو مثنئ،، بنيتي ارفعي رجليج ع السديه نامي لان الكاع كلها ملوثه وناس مصابه وانتي اجيتي حافيه

زينب،، عمي التفت المثنى كاله روح اطلع خارج المستشفى جيب باكيت كمامات

فطومه بدت تفتح بعيونها بس مامنتبها
رغم هلشي بعدني ميته خوف عليها وفكره خسارتها مسيطره على تفكيري

بلحضه مر كدامي شريط موت احمد ودفنته وخسارته وصوت المله وهي تقره وصوت صريخ مريم وامي واحس الصريخ ترس راسي واذني واتخيلت نفسي واكفه الطم بس هلمره الميت بنتي
مو اخوي

هي كدام عيوني بس على المنظر الشفتها بي
حسيت روحي فقدتها

نفسي ضاك

عمي ومرته انتبهولي اثنينهم لازميني من الجهتين
واني حتى الساني ثكل اباوع بعيون عمي ودموعي تجري
الساني وحده يردد

ع عمي ع عمي بنيتي

باب الردهه كدامي دخل حسن ولواء يمشي وراه

كلشي داير مدايري صار اسود
احس دكات گلبي عبرن الالف دكه بالثانيه
لزمني مثل الخفقان عقلي فصل عنهم
وبين الوعي والاوعي
اخر صوت سمعته كان صوت لواء وهو يصيح بأسمي

يتتبع