رواية ضحية لمن لايرحم الفصل الثالث عشر 13 - بقلم زهراء الحسناوي

چنت مثل الورد مزروع ومعطر
وگلبي بنص هلي بستان ومخضر
جنت امشي وحش بالزرع موبالناس
ونواعير النهر بدياري تتعمر
صح بيتي مو كلش جبير
وصح السگف منخول والحايط مفطر
ويوميه تعب واصراخ ويه الهوش
ويوميه وجع كل يوم هليكبر
بس ضحكة ابوي وريحة امي الهيل

تخليني مثل سكران ومخدر
وفجاة يبدي الحلم ينزاح يتبخر
واشوف الطلق والحايط مدمر
واشوف الزلم هادوده تتذمر
وابوي يكول دم الولد يقهر
شنهو الصار وحياتي بلحضه تدمر؟
واصير بنص سلف مايرحم ويعذر
واصير اني الضحيه وراسي يتكسر
واصير الفصل لخبال اخوي العاق
والفصليه يسموني،، واسكت روحي حتئ مااذكر
////////////////////
الشاعره بنت اعگاب Jood-ali-Aljnabi
الشعر اهداء من احدئ المتابعات جزيل الشكر
/////\/////////////

/////ضحيه لمن لايرحم//////

بقلم زهراء الحسناوي

//////////////

زينب،، مالگيت روحي غير ركضتله حضنته من رجلي ورفعته هو همزين موضخم ضعيف

سبحان ربي العالمين من يصادفك هيج موقف ردت فعلك تكون عجيبه
اني عمري وحياتي مامصيحه بصوت عالي بس من شفت هذا المنضر صرت ارگع اصوات مدري منين يطلعن

ورغم صريخي وعياطي ماتركته شايلته من رجلي رافعه راسي وجها غدة ازرك وركبته صارت شطولها حتئ شفايفه مدري اشلون صارن

علئ صوت صريخي اندفر الباب دخل لواء يركض
من شاف اخو معلگ ضل مخبوص صحت بي راااح يموووت

بسرعه جر الكرسي وصعد حل الحبل من ركبه حسن وكع بحضن لواء خرگه لايحرك ايد ولارجل بس اسبال يوكع من حلكه

اني فقدت احس جسمي يختض مثل السعفه
لواء احتار شيسوي هي ثواني او يمكن مايتجاوزن الدقايق بس عشت بيهن رهبه فضيعه

حط ادي جوه اخو وراد يشيله وعلئ صوت خبصتنه
اسمع من جوه اصواتهم اجو من المقبرة ثواني وصعد ابو لواء ونذيرة وجنه وكلهم اجو يتراكضون

نذيرة اول ماشافت اخوها امدد صاحت يبووووو كتلته الفصليه

لواء بلحضه شاله ونزل يركض شفته اول ماطلع من الباب ايده انشكت بيده الباب بس مااهتم ولاحتئ يمكن يدري بروحه

انبخص البيت بالصريخ وفزعت العالم علئ صوت صايح نذيرة وام لواء

وكفت السيارات بالباب اخذو حسن نقلو للمستشفئ
اني علئ كعدتي وهنه نزلن وره اخوهن من راحو اسمع ام لواء اتلكهن

ام لواء،، اااصعدددن نزلنهااا الي هاااي الكح،،،،،،،،

زينب،، احس نفسي ضاك اتمنيت انهزم بس وين انهزم؟
اجن نذيرة وبناتها مثل العاصفه دخلن يتلاطمن
اول ماسحلني من شعري
مااعرف منين الضربات تجيني
وبعدها سحلني طلعني من الغرفه ونزلني يسحلن بيه سحول

رفعت راسي شفت ام لواء جوه تاشرلهن بديها بمعني جيبنها الي وتبجي

وصلني يمها بالدفرات صاحت

ام لواد، داااازيج تهجميين بيتي وتكتلللين اولاااادي

زينب،، وااالله موواننني هووو هووو

بس ولاجن يسمعن دنني يمها ولازماتني معشن راسي والراجدايات مدري منين تجيني كلهن التمن عليه

اسمع صوت جود يبجي ويبعد بيهن بس احس روحي شاغت وقربت افقد بديهن حتئ من ادفعهن مايندفعن ضخمات واهواي واني بطرك روحي

ام لواء،، ولجن مابرررد كلبي هدنها خل اكطعهااا

زينب،، كل هذا وماكتفت ضربت جنه علئ متنها ودزتها تجيب الجداحه

ارتديت للخلف كتلها والله خاله مو اني هوو هوو شنق رووحه

ام لواء،، گربنهاااا ليييه

زينب،، جرتني ام جنه وبتها نذيرة كتفتني وجنه ثبتت ايدي بحضن بيبيتها
وصارت اتجويني بالجداحه ام الهيتر كل چويه تصعد روحي الربها تشكيله وترد مفرفحه

كل ماتجويني اتكلي بهاااي ايدج خنكتي وليدي؟
ماعافتني لمن فقدت بيدها
سحلني وشمرني يم الدرج لابيه احرك ايد ولارجل بس دموعي تصب بسكوت بدون صوت

قسما بذات الله شي واحد يتردد براسي
من كميه الضلم الشفتها منها صرت ارددد

الغوث ياصاحب الغووث
الغوث يااصاحب الزماان الغووث

صرت استنجد باالله واهل بيت النبوه وخصوصا بالحجه عجل الله فرجه
لان ماعندي اخو يدافعلي
هو اخوي صاحب الذنب واني الي دفعة ديه هاذا الذنب واني الرحت ضحيه لعادات وتقاليد تبجل الرجل وتحط من قيمه المراه
ليش؟
بس لانه هو رجال واني مره
المراه الي متصادره كل حقوقها بس لان هي مره
نسو قول الرسول عليه افضل الصلاه والسلام
قوله رفقا بالقوارير

بين الوعي ولاوعي افتح واغمض وهنه يتصلن محد يجاوبهن
وكل ماتمر وحدة منهن بصفي يتفلن عليه

ماحجيت بس عيوني جانن يحجن لله عز وجل ضلم عباده الي نسو مخافة الله

من الصبح للضهر اني علئ وضعي يمهن عدلت كعدتي وانتجيت ع الحايط
والله حتئ سبال وكع من حلكي بدون مااحس ومااشعر صعب اشرح هيج شي ماينشر لابكتاب ولابقاموس

مرة فترة من الوقت كلش طويله دك الموبايل رفعنه ملهوفات

كان جاوب المتصل فقط ادعوله لان وضعه حرج

الناس تروح وتجي وكل وحدة تجي نذيرة تحجيلهم مقتل ماشافته بعينها وحملتني الذنب بدون ماتشوف

للعصر جنه اتصلت بيهم واجت حجت بصوت مسموع كدام النسوان كالت

جنه،، خالي حسن فاقد واله بس الله لان الاوكسجين مايصعد للدماغ وحاليا اكو دكتور فرنسي جاي بعثه وهو الي راح يشرف علئ وضعه

زينب،، كلهم رفعو اديهم بالدعاء واني هم ادعي وياهم اريد اثبت برائتي
حتئ لو ابنهم لواءكان موجود ماراح اخلص منهن

اجت ام ذياب المره شايطه باوعتلي مامفتهمه شي
كالتلهم جنت بكربلاء وهسه اجيت

حسن شبي وهاي الابنيه شبيها منو هيج مسوي بيها

جاوبتها نذيره

نذيره،، هاااي هيي واهلها يردون ينفوونه
اخوهاا العار كتل حسسيين الشاب الحلوه اليسواه ويسوه عمررره
وهاي الساقطه خانكه حسسسسن

ام ذياب،، كولي ياالله نذيره شنو هلحجي هذا عود انتي مرة جبيره
حسن موزعطوط حتئ تخنه مره ولاهو مگرم ومايحرك ايد ولارجل حتئ تجي هلمسكينه تخنكه

اخوج من زمان هذا وضعه وكلنه نعرف ليش وشنو السبب ف لاتذبين الصوج برراس المكروودة

واخوها كتل اخوج هذا قضاء الله وقدرة وكلمن يموت بحد يومه بس كل واحد اله سبب
تعددت الاسباب والموت واحد
الله راده والله اخذه بس فهميني شنو كلب عندج وهيج مسويات بيها؟
خاافي الله لابختها يعثرج ابنااتج

نذيره، اانتي ويانه عللينه جايه هادوده
بس حققج كلبج بارد ابنج يمج وماشايفه اللوعه
والادي بالثلج مومثل الادي بالنار

ام ذياب،، والله ماخايفه بس علئ اخوتج لاحوبت هاي المكرودة اطيح بيهم
لان تدرين الحاقد والنگس والعار كلشي مايصير بي

نذيرة،، والله لومامره جبيره جان سحلتج بره بس احترم شيباتج عود مرة عمنه وهيج تسوين

زينب،، انوب كبت العركه بين نذيرة وام ذياب تالي طلعت المره زعلانه والغريب ام لواء ابد ماحجت ولاجنها موجودة محتارة تتصل بيهم محد يجاوبها

لليل وكل شويه واحد ينطي خبر جديد
اخر شي كالولهم انو بعده فاقد وكل شويه تلزمه نومه مثل الصرع رابطي بالسديه وهو فاقد ويرعش لان الاوكسيجين مايوصل للدماغ بصوره صحيحه

بيومها ماكو احد نام هنه بليل سون لفات اكلن بس ام لواء ماحطت شي بحلها بس تبجي
وكل مااصير كدام عينها تشتمني وتشتم اهلي

ماماكله من الصبح اكلت خبزه واني اركض وانضف كلت خبيزه واستكان جاي بارد مالحكت احمي

بليل كلهن نامن بالصاله لان ام لواء كلساع وطلعت بره تبجي وتندعي وكل شويه تنذر نذر شكل بس كون ابنها يتشافه

حتئ اني نمت ع الكاع بدون لاغطه ولافراش
كلشي اتحمل بس كون يصير زين وميبلني بموت حسن

لليل كله كاعده وايدي تسعر بگلبي انفخ عليها تهدئ
من اتعب من النفخ ترجع تسعر
دعيت الله ياخذ عمري من كل كلبي حتئ ارتاح

للصبح اني ماشايفه النوم ماهجعت ابد ايدي وجسمي يونن

الساعه ب9الصبح اتصلو بيهم كالو وضعه تقريبا شويه زين والطبيب يمه هسه ومايطلعو لمن يصحه ويسترد وعيه

ثلاث ايام شفت بيهم النجوم بعز الضهر
والزلم كلها نايمه بالمستشفئ
بيوم الثالث حسن فتح عيونه بس ماعرف شنو صار وشوداه للمستشفئ الافتهمته من انقطع الأوكسجين بدماغه صار عنده فقدان ذاكره موقت

الطبيب طمنهم كالهم هلشي طبيعي وبمرور الوقت يتذكر وحاولو تخلو يروح يتعالج يم دكتور نفسي

كتبلهم رابع يوم خروج وهم الشيخ ذبح ذبايح وعزم الناس
وكلها وكعت براسي انضف بيد وحدة اغسل مواعين بيد وحده اعزل بيد وحده
والثانيه بس تبز ماي وجراحه وماذيتني الجلد ملتهب

جابو حسن للبيت وكلها مخبوصه وكلساع واحد يدخل يوصيهن لتحسسنه بشي ولاتبجن كدامه لان نفسيته تعبانه

فرشله بغرفه امه حطن سرير وجهزنه
طلعن وسدن الباب عافنه يرتاح

جمعهن ابو لواء بغرفه وكالهن احمدن الله الفصليه موجوده ونقذته ضلت رافعته حتئ مايخنگه الحبل اكثر والله كتبله عمر جديد والفضل للفصليه
طبعا اسمي نسيته من كثر مايلقبوني بالفصليه

بداخلي كلت الحمدالله من عرفو مالي ذنب تركتهم ورجعت اشتغل

جنت بالمطبخ دخل لواء وجها مبين تعبان من السهر
كال السلام عليكم باوعلي ودار وجها رجع باوعلي متفاجئ
تحت عيني زراگ من ضربهن وايدي شايلتها حتئ ماتنلچم وتاذيني كلهن واكفات
اجه وكف بصفي سال نذيره

لواء،، منو مسوي بيها هيج؟

زينب،، نذيره تتخازر وياي كالتله هي وكعت

لواء،، بس رايح انطي حسن علاجه وارجع افهم السالفه

زينب،، اول ماطلع جرتني للمخزن من ايدي

دفعتني وسدت الباب

نذيره،، اسمعي ولج
وروح حسين اذا فتحتي حلكج وحجيتي شي
اشوفج اكثر من هذا فهمتي؟؟

زينب،، هزيت راسي بمعنئ اي لان اعرف صدك حجيها اذا حجيت راح تتكابل وياي

نذيره،، اذا سالج كولي عثرت فهمتتي؟؟

زينب،، رجعت هزيت راسي
شكلها وضخامتها وصوتها يخوفن يجبرنك تخضعلها وتخضع التهديدها
وحتئ لوحجيت الحقيقه فتره يزعلون وياها وبعدين يسامحوها واني الاوكع بيها لان تضل تتناكر وياي دائما

خزرتني ورجعت حذرتني اذا حجيت يكون هاي الي الله كتبها عليه
عافتني وطلعت شويه وطلعت وراها لان كالت الحكيني كملي شغلج

رجع فات للمطبخ اني مدنكه احط شكر بالاستكانات

لواء،، عوفي البيدج منو هيج مسوي بيج؟

زينب،، صارت كدامي نذيره خزرتني كتله عثرت
باوع ل ايدي

لواء،، ايدج شبيها؟

زينب،، ا اتبده عليه الجاي

لواء،، تعاي ام جنه صدك متبدي عليها الجاي؟

نذيره،، اي خويه صدك هي خوثه ماتنتبه

لواء،، ام جنه اني زلمه اخاف الله ولاغاضبه ولاعاصي
ف لاتخلوني اتحمل ذنبها اذا واحد ماذيها احجن

نذيره،، يااا خويه شجاك ومنو ياذيها؟

زينب،، باوعلها مضيك عيونه ورجع باوعلي مبين مامقتنع
تالي عافنه وراح دخل يم حسن

لزمتني نذيرة

ام جنه،، والله لوحاجيه يبووو يمكن اشرب من دمج

زينب،، عافتني وراحت ضليت مختنكه لان واكعه بين وحوش موبشر حشه لله يكونون ذوله بشر

،،،،،،،،،،،،،،،،،،،،،،،،،،،،،

غصون،، يوم بعد يوم يزيد تعلقي ب ام ذياب ولاجن اني غريبه واجيتهم فصليه
كل شويه وكالت بس كون ادور السنه مال حسين والله اسويلج احلئ عرس

اضل اضحك علئ سوالفها لان مقتنعه اكون اني كنتها
صارت تدفعني اهتم بملابس ذياب وبغرفته وبااكله
حتئ من يسالها علئ شي اتگله روح اسأل غصون

صادف بيت الشيخ مسوين جمعه لحسين وعمتي. راحت ردت اروح وياها ماقبلت كالت لاترحين ماتعرفين تذيره وشرها ومااريدها تسببلج اذيه

رغم اشتياقي لزينب بس مارحت لان خفت من كلام ام اذياب وفعلا هي الي ضربتنه بيوم الدخلنه بيتهم

عرفتها مره شرانيه وماينوخذ منها لاحگ ولاباطل

راحت ام ذياب اخذها ابنها ضليت وحدي وصتني قبل ماتطلع

ام ذياب،، يمه غصون احنه رايحين اقفلي الباب ورانه ولاتفتحين الواحد الباب اله تسالي منو خاف وحدة من بناتي يجن

اني هم سويت نفس ماطلبت مني وره ساعه اندك الباب فتحت جام المطبخ صحت منووو؟

عذراء،، اني افتحي الباب

غصون، لفيت حجابي عدل وطلعت فتحتها دخلت هي وابنها بدون متباوعلي سالت عن امها

جاوبتها معزومه ابيت الشيخ

عذراء،، هااا لعد همزين ماهي عندي كلمتين وياج

غصون،، استغربت كلامها فاتت كدامي واني وراها ذبت عبايتها وكعدت ع التخم

عذراء،، اسمعيني زين حبيبتي ادري بيج تفهمين كلامي وراح تتفهمين الوضع ماشي؟؟
اولا اني مااكرهج ولاعندي عداوه وياج

بس راح احجيلج كلام افهمي

اني من زمان مقررة اخذ حماتي لذياب لان ذياب مثقف وتعبان علئ نفسه مهندس ماناقصه شي حتئ يرتبط بهيج وضع
واني اعرف اخوي كلش زين هو يحب نور ونور تحبه ومقررين يرتبطون بس تتخرج بس من صارت سالفه موت حسين كلشي تغير
من الاول اني حابه حماتي اتكون لخوي لان هي هم ماناقصها شي تدرس صيدله ومثقفه وتعبانه علئ نفسها
يعني بين قوسين هي هاي المره الي يكدر ذياب يكمل حياته وياها ويتباها بيها موانتي لاشهاده ولاعلم ولاثقافه وانوب فصليه وتعرفين وسامعه بالفصليه شنو؟
الفصليه خدامه بالحلال

الفصليه زنا محلل يعني اخوي يكدر يتقرب منج ينفذ الشرع لكن يطلع وياج امام المجتمع هاي اشوفها واكفه يمكن واني مااتوقع ذياب يسويها ويتقرب منح الا اذا جبرته امي علئ ابو حرام ومايصير ومو هذا الباب راح ينجبر عليج

غصون، غرغرن عيوني وبلحضتها كنت ثوله وغبيه وماعندي فهم الي يخليني اجاوبها
فماكان عندي جواب الكلامها غير دموعي الي نزلن مااعرف علئ شنو

عذراء،،عفيه حبيبتي تره احجي المصلحتج اني ومااريدج تتاذين لان ذياب دائما يكول من اتزوح اخذ موضفه مثقفه

غصون،، هواي حجت حجي وكلامها بكل هدوئ صح يجرح واني اخوها احجايه ماحاجيه وياه
ومن خلال كلامها خلتني افهم ذياب ونور واحد يحب الثاني بس اني الاجيت وخربت كلشي

بعدها ضلت تسولف كلام عادي لليل رجعت ام ذياب جايبه عشه وياها
مااتعشيت لان نفسي انسدت مدري شبيه

،،،،،،،،،،،،،،،،،،،،،،،

زينب،، بليل كملت شغل تعبانه من الهوسه مال الخطار كملت وفتت للمخزن شويه ودخل جود بيده عصاره وكبسول مال التهابات كال هذا خالي دزه الج يكول خل تاكل وتاخذ حبايه وهسه تدهن ايدها بالمرهم

اني هم ماجذبت الخبر بسرعه ملغطت ايدي
بالدهن
ماعندي مشاعر اتجاها لان اني انسانه ميته علئ قيد الحياه انسانه مسلوبه من كلشي حتئ روحها انسلبت

يوم بعد يوم حسن يتشافه بس بقئ الاثر مال الحبل بركبته والدكتور كالهم هذا من شنق نفسه مكان الحبل الجلد مات وراح يضل الاثر احمر دائما

مرت الايام وحسن وضعه صار زين بس مايحترم اي واحد والكل ساكت عنه يخافون يجادلو وتتعب نفسيته ف مخلي علئ راحته

بيوم من الايام جان اكو خطار جايهم زلم ونسوان گرايبهم ومنجمعين كلهم بالصاله يسولفون
ابو لواء كاعد بصف حسن

حجه حسن

حسن،، اني بس لو ابوي يقتنع ويخليني اهج منا جان ارتاحيت

ابو لواء،، وين تهج يابويه؟

حسن،، اسافر الالمانيه اهناك ينطون شقه وافلوس ومواد غذائية وانته كاعد وهمه يصرفون عليك

ابو لواء،، اي كثر خيرهم يشتغلون ويصرفون عليك وانته كاعد
هي غير هاي افلوسنه احنه العراقيين غصبن ع الدوله تدفع افلوس للدول اليعيشون بيها الالجئين
العراقيين وباجر بس تتوضف يطردوك من الشقه يكلولك روح اعتمد علئ نفسك مو كاعد وتريد راتب اوضيفه

حسن،، بويه انته ليش ماتفتهم؟

جاي اكلك همه يصرفون وشسوي بالوضيفه اريد اهج منكم

لواء،، عيب هلحجي حسن احترم ابوك

حسن،، واني مامتجاوز
صح ابوي كلب ابن كلب بس يشلع گلبي من يستفهم براسي

يتتبع

الاغنيه مشاركه من احدئ المتابعات الوردة noorali6602