رواية ضحية لمن لايرحم الفصل الرابع عشر 14 - بقلم زهراء الحسناوي

مابيه حيل ارفع جفن
ذبلان جسمي من الحزن
والدمع من گد مانزل
ماخله لون برمشي
محتار ب احلامي البقن
شو مارضن يتحققن؟
مثل اليشوف ابنه البچر
كبران بس مايمشي 💔
،،،،،،،،،،،،،،

ضحيه لمن لايرحم

بقلم زهراء الحسناوي

⭐التقدر تعبي ادوسها

،،،،،،،،،،،،،،،،،

زينب،، لواء راد ينهض يسكت حسن بس لزمه الشيخ كاله

ابو لواء،، عوفه بعد ابوك اخوك مستوي

زينب،، ام لواء اتعضله شفه الرجلها بمعنئ لايسمعك ويطبگن عنده
ومدري اشلون لمح امه وهي تغامز كالها

حسن، عليمن اتغامزين؟
ادري سمعته يكول عني مستوي ابوي ويسحك علئ راسي ميخالف مرات مايعرف شيسولف انعبرله عادي

زينب،، اني بالمطبخ واسمع كلام حسن النزل ع الترابي وبهذل احوال ابو تبهذل كدام الخطار

ابو لواء شمايريد يسد السالفه حسن يطلع صفح خله الوادم كوه ساده حلكها لاتضحك
لعب فنون بحوال ابو

تالي ماراحو الخطار اله والشيخ صاير قرقوز يم حسن

من راحت الوادم لواء كاله فشله هيج تحجي علئ ابوك كدام العالم

حسن،، يحترمني احترمه مايحترمني مااحترمه

لواء،، ولك فشششله ابوك هذااا

حسن،، واني متبري منه

شيخ منهل،، هسه صارت انته متبري مني؟
لو اني الاتبره منك؟

زينب، كوه كاتمه ضحكتي ومسويه نفسي ملتهيه اغسل بالاستكانات

شويه وصعد حسن الغرفته وضلت بس ام لواء
ولواء والشيخ

لواء،، يابه بعد يومين التحق راح يصير شهر مامداوم

شيخ منهل، بكيفك بويه بس اني اشوفها لوتترك الحشد افضل شفت انته لو مالله ستر جان هسه انته ميت

لواء،، اليلتحق بالحشد شيتوقع حجي؟
اكيد لو النصر لوالشهاده
واني ماابطل ولااترك الحشد اله واني محقق وحدة منهن لو النصر لو التحق بجماعتي الشهداء

ولتنسه قول الله تعالى
(بسم الله الرحمن الرحيم)
(ولا تحسبن الذين قتلوا في سبيل الله أموات بل أحياء عند ربهم يرزقون)
صدق الله العظيم

ابو لواء،، ونعم بالله

ام لواء،، يمه اكعد لاتروح والله كلبي موحمل شوغات بعد

لواء،، كولي يالله حجيه ادعيلي انتصر وارد ليج سالم

ام لواء،، الله يحفظك وليدي

زينب،، مرت يومين والتحق لواء
بس هلمره نذيره وبناتها شبعني ضيم
صارن يقفلن الثلاجه عني
هو اني من جنت قبل لايقفلنها ماامد ايدي وافتحها لان مايقبلن
عايشه ع اليزود منهم

بهاي الفتره اشتاقيت لهلي مواشلون ماجان كلش اشتاقيتلهم صار شهر ماشايفتهم

بكلبي اكول كون يمر ابوي علئ باب بيت الشيخ واشوفه يرتاح كلبي عاد احس عندي اهل وعائله انتميلها مو وحيده لااب ولاام ولااي شخص

كمت يوميه من ينامون الضهر اتسحب اروح افتح باب البيت لان اعرف شوكت يرجع ابوي من الشغل
كل ضني اشوفه وارتاح

تعبت نفسيتي وصرت اتمنئ الموت اتغيرت حالتي وصفيت عضم وجلد من قله الاكل

لوسي وجاكي يعاملوهم احسن من معاملتي وشبعانات احسن مني
بشر عجيب امرهم يشفقون ع الحيوان ويحتقرون البشر المثلهم هم عنده دم ولحم حاله حالهم

اكعد من الصبح شغل وطبخ وتنضيف
من ياذن الفجر لحد اذان المغرب اني افتر

سويت جاي الهم ودخلت العصر اكعد يم الباب واصب الهم بصينيه ويجي جود يوزع الهم

صرت موزينب القديمه الترادد اوكحه لاهاي زينب الخرسه الجبانه التخاف من كلشي

،،،،،،،،،،،،،،،

غصون،، مرت الايام وصرت اهتم بااصغر تفاصيل ذياب غرفته ملابسه اكله اصغر شي اني اهتم بي بس اكثر المرات قبل مايجي اختل مااخلي يشوفني كل هذا مااعتبره واجب ك زوجه لا وانما داارد الهم جزء من جميلهم وياي
ولاكان اني فصليه ام ذياب تحتار شنو تجيبلي وشنو تفصلي
هذا غير الجهاز الكامل الي اشترته الي بس كلشي ب اللون الاسود لان حزنانين

مامقصره وياي ابد وحتئ ذياب دوم اسمعه يسأل امه يكلها شوفيها شنو محتاجه مامحتاجه؟

بس ماجنت اطلب اي شي لان خيرهم مغرگني
بالصدفه اشوفه لان من يجي مااطلع كدامه

هذا غير عمتي يوميه توصيني انقل ملابسي الغرفته بس جنت ارفض ومن تريد تفهم السبب ابوس ايدها تخليني علئ راحتي

بيوم صادف خميس وام ذياب مسجله كل خميس تورح تزور الامام الحسين ويه جيرانها

ضليت بس اني وذياب طالع ويه لواء
مرات اشوفه يباوعلي بس اكول يمكن صدفه

صار المغرب طلعت لحم من المجمده حتئ اسوي عشه
جاي اكص باللحم انكصت ايدي بس جرحها غميج عبالك كطعت شريان

اني من جماعت من شاف الدم ماعت روحه

ضليت اباوع الايدي وارجف خليت وصله عليها بعدها تنزف اشلون طلابه يالحمه الگشره

انفتح باب المطبخ دخل ذياب

ذياب،، السلام عليكم

غصون،، درت وجهي واني مدنكه لازمه ايدي رديت السلام

راد يعبر انتبهلي عاقجه وجهي

ذياب،، شبيها ايدج؟

غصون،، م مابيها شي

ذياب،، وهذا الدم شنو؟؟

غصون،، عوره بسيطه مابيها شي

ذياب،، شو خل اشوف

غصون،، بقيت مدنگه ولازمه ايدي عاصرتها اتقرب مني جرها وخر قطعه الاقماش عنها

ذياب،، هاي مابيها شي؟؟

غصون ضليت ساكته وهو لازم ايدي اول مره يصير هيج موقف بيناتنه حتئ نسيت ايدي لان عطره ترس خشمي يمكن سبحان بالشيشه

مشه واني وراه ابد ماترك ايدي فتح المجر طلع شاش وتعقيم
كعد ع القنفه واني بصفه

ذياب،، راح الفها موقتا بين مانروح للمستشفئ يخيطوها

غصون، هاا؟

ذياب،، شبيج صرتي صفره
يبنجوج لتخافين

غصون،، لا لامااروح هسه اصير زينه

ذياب،، ليش دائما تنهزمين مني؟؟

غصون،، احس كلبي راح يطلع من حلكي علئ سرعه دكاته سكتت ماجاوبت وهو هم سكت بعدها كال

ذياب،، ضلي ضاغطه ع الجرح اذا ماتوقف النزف حتئ اخذج يخيطوها

غصون،، لا هسه يتوقف

عافني ونهض صعد للغرفه
احس اول مره انتبه الملامحه وشكله
رغم صار شهرين عدهم بس وين مايكون موجود اني انهزم

رجعت للمطبخ ضليت محتاره اشلون اكمل العشه شويه ونزل مبدل لابس اتراك بيجي

ذياب،، اتركي كلشي طالع اجيب عشه جاهز كرت عين امي بيج

غصون،، ماعرفت شنو يقصد اني سامعه هذا المثل ينكال للجنه بس اني مامحسوبه جنه باجر عكبه يكول اريد اتزوج حبيبتي
واروح اني بالرجلين خو من هسه ماافكر بي ولاتقرب منه افضل واحسن الي لان اخته كالت هو يحب نور ويريدها من زمان

نص ساعه ورجع جايب عشه كباب شوي ومقبلات
حطهن ع الميز وهو صار يرتب بدون صوت

ذياب،، اكعدي اتعشي

غصون،، م مااشتهي شكرا
كلتها واني جوعانه بس استحي اكابله ع الاكل وامه ماموجوده هو هم عرفني استحي اخذ لفه ونهض كال صاعد الغرفتي

عافني وراح اتذكرت من اجيت فصليه جنت مرعوبه اكثر من زينب
زينب تدعي القوه حتئ لوبداخلها ضعف عكسي تماما من الداخل والخارج هشه وضعيفه

لان مجرد اسم فصليه يعيشني برعب
كنت صف ثاني متوسط وكانت وياي طالبه اسمها سلوئ
شاطره كلش اعله وحده بالمدرسه درجاتها كلها 100
غير جمالها الياخذ الروح احنه بنات بس من تجي سلوئ نضل صافنين عليها وعلئ حسنها
بس كانت عائلتها كلش فقيره وابوها واخوها ضالمين الابعد الحدود
كانت محرومه من كلشي ابسط شي ملابسها نفسهن تلبسهن بكل سنه
لكن طموحها جانت تنجح وتتخرج وتتوضف وتعتمد علئ نفسها وتحقق كل احلامها الانحرمت منهن
كان استاذ الرياضيات يسميها العملاقه لان درجتها كامله بالماده ومرات تشرح بصوره تختلف عن المدرس بحيث تبسطلك الدرس
كلنه نحبها
مره ابوها بطلها قبل الامتحانات بسبوعين
ماقبل تمتحن امتحانات

يكلها المدرسه مصرف ثاني
بس المدرسين كلهم راحو لبوها وبالتواسيل ياالله اقتنع تكمل وتمتحن

امتحنت سلوئ ونجحت وكلعاده طلعت معدل عالي جدا
اقوه وحده بالمدارس الموجوده بمنطقتنه هي
جانت تضحك وتحشش اتكول بس اكمل اعداديه اروح كليه طب واصير دكتوره بس موتجن بدون كشفه بذاك الوكت مااعرفجن اهم شي الافلوس

هذا كان حلمها
انتهت العطله وداومنه صف ثالث بس سلوئ ماكانت موجوده ويانه استغربنه اسبوعين مر ع الدوام وهي ماكو
اجت جيرانهم كالت اخو سلوئ ساحكله واحد بسيارته قبل شهر وصار شهر الطلابه عد اهلها وناس رايحه وناس جايه وهسه اتقرر تروح سلوئ فصليه غير الافلوس ويشيلون اهلها من المنطقه

كلنه انقهرنه علليها وبيومها متت قهر من اذكر كلامها بتحقيق احلامها

صرنه ناخذ اخبارها من جيرانها وعرفنه انو صار اسبوع من اخذوها الواحد متزوج وميته مرته عنده اثنين اطفال

احتركت اعصابي عليها
بليل ولحد الان اذكر ذيج الليله وهذاك اليوم وماانسا طول عمري

بليل بطني موتتني من العصر تلويني وابوي كال خاف مصران اعور خل اخذج للمستشفئ
عاندت لان اخاف كتله مااروح
بس بليل هاجت كلش مااتحملت وقبلت اروح للمستشفئ

اول مادخلنه كعدنه ننتضر الطبيب الخفر بالطوارئ
وجان تدخل عالم مخبوصين دخلو سديه عليها مره متمدده

كلها مخبوصه وصايح وهوسه بس ماادري ليش رجليه شالني الصوب مكان المره

رغم الدكاتره التمت وعالم داير مدايرها بس كدرت المح وجها واشوفها وريتني لاشفتها

شفت سلوئ متمددت والدم تارس راسها بس عيونها مفتحتهن عيونها خضر يخبلن قبل جانت البنات تتشاقه وياها يسالنها اشلون تشوفين الدنيا؟؟
خضره لوسوده؟؟
تجاوبهن خضره تضحك عليهن

شهكت وادنيت يمها دفعني الدكتور جابو الجهاز يركضون لان قاسو نبضها مصفر
سولها رجات كهربائيه ماكو استجابه وعلن الدكتور ساعه وفاتها وماتت سلوئ وماتن احلام سلوئ وياها

انكلبت المستشفئ بالصريخ اهلها والناس الاخذوها فصليه هم موجودين ورجلها يبجي يصيح عثرت وانفشخت
كوه طلعتني امي وابوي لان فقدت اعصابي ابجي وارجف منضرها ترس راسي كانه كاعده ماميته مفتحه عيونها وتباوع لفوك كتلهم ماميته والله بس ارجعو شوفوهه لكن محد سمع

رجعنه للبيت لان حتئ ماقبلت افوت اكشف روحي نسيت حتئ المي بموت صاحبتي

اسبوع يوميه يوصل خبر شكل وكل شويه تطلع اشاعه شكل ساعه عثرت وانفشخت وساعه عمتها اتكول لكينه واحد وياها

بس مستحييييل دم مسلم بريئ يروح هدر
بعد اسبوعين مرت حماها اعترفت كالت زوجها فشخها بالنفاضه الفخار (منفضه جكاير)

والسبب امه اتكله مرتك ماتشتغل ومطلعه عليها اهواي شغلات
ماتت سلوئ بيوم السابع من روحتها فصليه

من هذا الشي خفت ومااتوقعت يجي يوم ويطبق نفس قانون العشائر عليه وهم اروح ضحيه اخرئ حالي حال مئات ضحايا العادات والتقاليد والسناين العشائريه الي صادرو حقوقهن باان يعيشن حياه مابيها ذل واذيه

فزيت من صفنني ودمعتي بعيني علئ ذكرئ سلوئ

ذياب،، ليش تبجين؟
اذا تاذيج انهضي اخذج يضمدوها الج ولاتصيرين جبانه

غصون،، دنكت كتله مابيها شي اتوقف النزف
تركته ورحت للمطبخ الحمدالله وكعت بناس تخاف الله بس خوفي علئ زينب الي نكطعت اخبارها وام ذياب حلفت ماتروح من يوم سالفه حسن من راد يشنق نفسه اجت مخنوكه المره وماتكدر تحجي ومن سالتها علئ زينب كالت مابيها شي وخلف الله عليها نقذته بااخر. لحضه
حسيت اكو احد وراي اول مالتفتت صار ذياب بوجهي بحيث مايفصلنه شي

،،،،،،،،،،،،،،،،،،،،،،

زينب،، يوم يجر يوم وصار شهرين ابيت الشيخ معاملتي انگس معامله بحيث يعاملون كلابهم افضل من معاملتي

مرات يتاخر العشه وهنه معلمات يجن ع الوقت ينبحن بالباب ف ينطوهن من راس الجدر قبل لاياكلون همه يخلون للكلاب اكل
اتعلمن عليه وصرت مااخاف منهن ويوميه اني فوك ضيمهم ضيم الجلاب اخذ ريوك وغده وعشه عوزهن بس انيمهن بحضني

مرات اضحك علَئ لوسي من اشوفها اشلون دايره وجها عن جاكي وتعزز علي
اكلها والله يلوسي بيج انوثه اكثر مني
اني من القهر والتعب والضيم نسيت روحي انثئ

الكلاب معلميهن ينطوهن وجبه جبيره بحيث بعد مايدكن الباب اله يجي وقت الوجبه الثانيه

العصر كملت تنضيف البيت وصادف كانت موعد ال (ش) فكنت حيل مريضه وتعبانه مابيه حيل اكوم انطي روحي ماي
مريضه واشتغل واركض منا واجي منا وكل شويه تكفخني لونذيره لوجنه
لواء ابد ماشفته صار شهر يرفض ينزل مجاز كل مايتصلون بي يكلهم خلوني مرتاح اهنا

وتنمر جنه زاد عن حده حتئ من امر من يمها تكفخني علئ راسي

اجت شافتني متمدده بالمخزن ولازمه بطني موتتني

جنه،، اطفري عزلي بيتنه ونضفي زين وبعدها امي اتكول خل تسوي تمن ومرگ تبسي

زينب، كتلها واني اعصر ابطني فدوة والله مريضه باجر اصحئ وانضف بيتكم وعشه انتي سوي اليوم لان مريضه

جنه،، هلووووو عيدي عيدي
كومي للج البيت اريده يلمع كون جهرتج اشوفها بي
والعشه انتي تسوي لاتضلين تمثلين عوود مريضه
يااااللله اطفرييي

زينب،، خليت ايدي بالكاع وسندت نفسي عنت روحي حتئ انهض هو اني صايره مومياء لان اكلي قليل وانوب تجيني المهجومه واطيح حضي فوگ. ماهو طايح وهاي اول مره هيج يصير بيه لان اكيد عندي فقر دم

طلعت جنه كدامي واني وراها رحت البيتهم كوه امشي كل شويه اريد اوكع

بس عيوني ادور علئ شي اريد ارتاح
اول ماطلعت جنه للحديقه فتحت الجرار اخذت بندول وهاي اول مره امد ايدي واخذ شغله بدون علم راعيها
ركضت للمطبخ بحجه اعزل شربت ماي وره الحبايه

اخذتلي نص ساعه يالله شويه سكن الالم الساعه تقريبا 5العصر صيف والجو حار
ماصدكت شوكت اكمل وارجع للبيت

توني حطيت الجدر بي ماي للتمن وجان اسمع صوت صايح قريب موكلش بعيد

انلجم گلبي هذا الصوت عررف رجليه وحدهن يمشن الصوب الباب
الصايح دوه بالمنطقه امشي واردد لا لا ماكو شي مو اهلي موصوت امي هذا

رجعت للمخزن امشي موعلكاع من السرعه ونفسي مختنك لكفت عباتي وطلعت اركض الصوب الصوت الخمش كلبي امشي واردد دخيلك ربييي دخيلللك ربيييي

جنت فاقده فاصله ماكو شي ابالي غير الصوت الاسمعه يفرفح

ركضت الصوب بيتنه وكع كلبي من شفت الوادم ملتمه
بدون مااعرف شكو ومنو المات صحت يبووووووووو بعلو صوتي وركضت دفعت العالم وفتت للبيت
هااي امي كاعده تلطم بالحوش
وذني اخواتي اثنينهن اتلكني يتباجن حتئ زينه المخبله تبجي وتاشر ع البيت
اخوي امير بالعربانه مالته.
صرت كل ماافوت اشوف واحد من اهلي كدامي

بس واحد ماموجود،،،

بس شمعة بيتنه ماطلع واتلكاني صارلي شهرين ماشايفته وعطشان كلبي علئ شوفته مشتاقه ل ايده اليحطها فوك راسي مشتاقه لكلمه ال بويه

عيوني غوشن امسح دموعي وافتح بعيوني حيييل اريد اشوف
فتحت الباب وفتت لكيته مغطه وعمامي اثنينهم يمه يبجون

اشرتلهم وحلكي يرجف
هذا ابوي المغطينه مو؟

مااعرف شنو سويت وشصيحت وشلطمت لان مااذكر احس روحي فصلت
كل الاذكره رفعت الغطه صرت اشمشم بدشداشته
عمت عيني حتئ وهو ميت رجلي مرفوعه من مكان الركبه لان مايكدر ينام مثلنه بسبب فقرات ضهره المتهشمه رجلي مايمدهن

دكيت ولطمت وفقدت
بس يرجع؟
مايرجع
راح وراحت روحي وياه
وضلت بنفسي اشم عطره
ضلت بنفسي كعداتنه وسوالفنه ولمتنه العصريات سوه

اخذو لان هو ميت بالبيت وماجنت اعرف بي مريض
لليل واني يم اهلي محتاره بمصيبتنه

عمامي والجيران راحو وياه يغسلو ويزوروه الامام الحسين عليه السلام وبعدين يرجعونه للامام علي يزورونه ويرجعو للبيت الصبح ياالله يدفنو عمي ابو مثنئ ماقبل گالهم ماادفنه بليل بدون تششيع الصبح الساعه ب8نبلغ العالم وانشيعه

كاعده مكابله امي ومريم مخليه راسها بحضني تبجي
سالت امي واني افرفح يمممه اشبي ابوووي مرييض؟

ام احمدد،، ابووج من يوم الانطاج اتمرض ومانعرف شنو علته لان مايرضه يروح للطبيب
لاياكل ويانه ولا يكعد ويانه وبليل ينام ع الكاع يكوول بنيتي يمكن منيميهاا. ع الكاشي
وكطع الاكل ماياكل والنهار كله يبجي يكول اشلون وبياوجه اقابل الله عز وجل واني ضالم بنتي

مااات وهو محمل روحه الذنب ماات ومانعرف شنو علتتتته

زينب،، لطمت علئ وجهي
كتلهاا انييييي عللته انييييي علتتتته

للساعه 12بليل جابو دخلو للغرفه وعمي ابو مثني كعد يم راسه يقره قران

اتقربت يمه وعيوني يجرن وصوتي مبحوح كتله عمي كشفه خل اشوفه والله مشتاقتله

ابو مثنئ،، لابنيتي مايصير خلي لاتشلعين گلبه فوك ماهو مشلوع

زينب،، جريت ايده بستها عمييي فدوه بس اشوفه لاتخلي شوفته بكلبي

هز راسه وبجئ امي كعدت من الجهئ الثانيه للتابوت واني واخواتي من الجها المقابيلها
التمينه كلنه داير مدايره بااخر ليله نلتم بيها سوه

جر البطانيه وخرها بمجرد ماشافته امي مكفن اغمئ عليها واني فقدت ملخت راسي
عمي راد يغطي كتله بس ابوسه والله بس ابوسه
فتحلي شويه من وجها صاير بس اعضام مثل حالي ضعفان بسته بخده
وكتله وداعت الله يبويه

غطا عمي وطلعنه بره كال اليريد يقراله قران يضل اهنا واليبجي يطلع بره الغرفه

اني كعدت يم رجلي وعمي يم راسه نقراله قراان
طبعا احمد مااجه ولاشفنا ولاندري وين
مثنئ رجع عادي بس من رجع كال احمد راح يصيدون سمج ويبيعون بالهور مدري وين هو وكم واحد وياه

بيومها مانمنه سهرنه ويه دموعنه الصبح شيعو واخذو
نسيت بيت الشيخ ونسيت كلشي وحرت بمصيبه بفقدان ابوي لان فگد الابو موشي هين

صارت تجي النسوان تلطم وتعزي صوت ماعندي من التفرفح والصايح افقد وارجع الطم

ثلاث ايام اني يم اهلي وماادري شنو منتضرني ابيت الشيخ من ارجع

بيوم الرابع امي كالت ييمه ردي لعيالج لايسوون بيج شي صارلج ثلاث ايام يمنه والناس لااجو ولادزو عليج عبنهم خوش اوادم
بكلبي كتلها اي كلش خوش اوادم بعد كلام طويل حضرت كم شغله حطيتهن بعلاكه واخذتهن وياي اخذني عمي ابو مثنئ مشي طول الطريق يبجي علئ غصون ويردد اني هم اموت مثل ابوج اعله بنيتي
سالني عليها اشرتله ودوب يفهم مني كتله زينه

فتح جود الباب شافني فرح والضحكه ترست حلكه صااح

جود،، اجتتتتت زيييينب

زينب،، طلع الشيخ منهل سلم علئ عمي واخذ مابخاطرة والرجال هم فاجئني من كال العمي ليش جبتها ماخليتها الباجر يمكن الشيخ يريد يموت وهيج يحجي

عمي راح واني دخلت وره الشيخ هو راح للمضيف واني رحت للمخزن
اول مادخلت دخلت وراي نذيره

نذيره،، اجت السااايبه للاتكول كاعده ويه بشر واكلهم رايحه موليه
لبست عبايتها وطلعت ولاجن واحد بعينها

ردت اكلها من يموت ابوج تحسين بيه بس سكتت فاتت بتها المسمومه وراها

جنه،، اشرقت وانورت ست زينب زين اجيتي
يالله عيني صارلج ثلث ايام يم اهلج والبيتين ينتضرنج
اريد هسه تنضفيهن

زينب،، احس ثوبي ثگيل علگ جسمي روحي ماطايقتها بسبب موت ابوي مواانوب يجن يتعنطزن فوك راسي
نعلت الشيطان ورحت وراهن حتئ استلم المكناسه

عزلت البيت الجبير ورجعت البيت نذيره حتئ انضفه
توني بديت انضف اجت جنه

جنه،، كملي وكويلي الجبه مالتي

زينب،، شمرت الجبه يمي باوعتلها اقماشها مثل النايلون تلمع ومبينه ماتنكوي يموعها الاوتي

كلت يمكن كاويتها قبل وعادي تنكوي

انطتني الاوتي وشكلته هي ع الكهرباء

جنه،، لاتكوين هسه خل يحَمه

زينب،، انتضرته شويه واني اصلا مااعرف اكوي كلش جان عدنه اوتي اذا تحطه علئ جسمك مايجويك لان انطته النه مرت عمي قديم

اول ماخليت الاوتي ع الجبه لزگ
رفعته بسرعه شفت القماش مايع

ماحسيت غير الكفخه علئ راسي

جنه،، الگبررررر ادبسسزز حرگتيهاااا

زينب،، ردت احجي صوتي مايطلع احجي كلمه ويرجع يختفي
شو هاي بسرعه جرتني من شعري مبينه متحاميه للكتله

شاغت روحي احس فروه راسي انشلعت بيدها
فاض بيه الصبر وياها وتعبت منها ومن سوالفها
بذيج الساعه الله نزل عليه قوه مدري منين اجتني
يمكن اريد افرغ نار گلبي علئ موت ابوي بيها

مالگيت روحي غير دفعتهاا ورگعت
راسها بالحايط،،،،،، يتبع

هاي حياة الفصليه الجانت مصوريها النه
تعيش ملكه
للاسف تعبت نفسيتي بسبب هاي الروايه
رجائا النشر بين يوم ويوم
دمتم في امان الله
اختكم زهراء الحسناوي

الكاتبه زهراء امجد رجعت تنشر روايتها
(انت القدر الذي كتب)
بعد مانزلتها بكتاب بالأسواق رجعت تكملها ع الواتباد تابعوها

Zahra_Amjed12اذكر المستخدم