رواية ضحية لمن لايرحم الفصل الحادي وستون 61 - بقلم زهراء الحسناوي

البارت 45

ضحيه لمن لايرحم

بقلم زهراء الحسناوي

،،،،،،،،،،،،،

تعال وخل اسولفلك ع الانضمن
ولو هو العشگته اسوالفه يفشلن!
مع كل العتب ...خلاني #خلي وراح
ومعه كل الدمع واجفونه اجن رگصن
وحگ ألماتنام اله وتغطيني
ونه اتجيبني وونه توديني
گضت عمري الليالي اشوكت يگضن
وليه...اشموعي گبعهن بطوله الليل
والحديثات_من_يتگبعن_يحلن
چنت صافن اگوده...انده صفنته يضيع
مثل عيوني فاتحهن وبي حلمن
اريد اعتب ..أمنيتي اعتب واحاچيه
واگله يمعود انته اصورك شعملن
ماخلن رمش يابس
والاردانات يلوتدري بغيابه اشكثر ينعصرن
كترني...وانه الخليته دگ اهنود
بين الحاجب وحاجب وماسدن

مروان العنزي

،،،،،،،،،،،،،،

مساء الخير بنات
طبعا احداث هذا البارت مال اكثر من بارتين
بس جمعتهن ابارت واحد
خليت بس الاحداث المهمه مااريد اجرجر بالروايه
وهم اريدكم تفرحون شويه لان ماضل شي وتنكشف حقيقه نور وعذراء
الاحداث القادمه تحبس الانفاس
رجائا انطوني مجال اكتب كل التفاصيل بدون ترك اي شي لان مااريد الروايه تنظلم
اليحبني يتحمل التأخير لان ماضل شي ونوصل للنهايه
احبكم 💜،،،،،،،،،،،

غصون،، دخل وسد الباب بكل هدوء ردت اطلع سحبني من ايدي وكفني كدامه ضهري للحايط
مدنگه مااريد حتى اباوع بوجها

رفع ايده سندها ع الحايط يم راسي ودنگ المستواي
همس يم اذني

ذياب،، تردين ترحين تتونسين مو؟؟

غصون،، صح اخاف منه بس مومثل قبل
رفعت عيني بعينه گتله اي لان عيب مااروح
انت شتگول؟؟

ذياب،، هاا يعني هيج صار الحجي؟؟
عادي تحضرين عرسي ماتضوجين؟؟

غصون،، وليش حتى اضوج؟؟
بالعكس فرحانه لان ماضل شي واخليك تندم

ذياب،، صاير الحجي قوي
صرت اشك انتي مونفسج غصون الفاهيه
او يمكن جنتي تمثلين وتدعين البرائه

غصون،، امثل؟؟
تدري شنو اتمنى؟؟

ذياب،، شنو ست غصون؟

غصون،، يحجي عيونه ذبلانه تباوع لشفايفي
ماانطيته مجال دنگت گتله اتمنى اشوف وجهك من تندم على كلشي صار
حجيتها وانجمعت الدمعه بعيني

راد يحجي بعدته عني وطلعت دموعي تجري
مشيت سريع للغرفه مسحت عيوني ودخلت
مااسمح لدموعي تنزل عليك

بيومها للفجر يالله گدرة انام كعدت الساعه ب 10علئ صوت ساره
تگعد بيه

رفعت راسي باوعتلها

ساره،، اكعدي صحي النوم

غصون،، عدلت كعدتي صبحت عليها افرك بوجهي

ساره،، غصون لاترحين فدوه ضلي اهنا

غصون،، كتلها ليش؟؟

ساره،، والله احسن
ادري انتي ضايجه وجاي تكابرين بس روحتج غلط
ليش تردين تقهرين روحج كوه؟؟

غصون،، منو گالج اقهر روحي؟؟
اصلا اخوج مايهمني

ساره،، علمودج اني لان مااريد تضوجين

غصون،، لابالعكس اصلا يمكن راح اتونس واغير جو
حجيتها ودنگت مهضومه
ماگدرت اتحمل الحجي مو مثل التطبيق والفعل
جرت راسي حضنتني بجيت

ساره،، تره اعرفج والله لهذا السبب مااريدج ترحين

غصون،، ابتعدت عنها مسحت عيوني
كتلها اصلا اريد اروح حتى بيوم الاطلع منا مايكسر خاطري اخوج لويصبو ذهب

بعدها ساره حاولت تخليني اضحك وانسئ
گالت گومي اتريگي
گتلها لاخليني اهنا عيوني لان بجيت راح يبين كدام اخوج باجيه ومااريده يفرح ويحس بيه مقهوره

ساره،،، ضلي اجيب ريوگ اهنا بس اطلعي غسلي وتعاي تره هو گاعد بالمطبخ يتصل بجماعته يعزمهم للحنه مال الزلم

غصون،، لميت شعري كتلها بالعافيه علي
نهضت من مكاني لميت فراشي وهي طلعت للمطبخ
كملت وطلعت وراها فتحت باب غرفتي صار كدامي
دنگت وتوجهت للحمام غسلت ورجعت لگيت ساره كاعده كدامها صينيه مال الريوك
تريگنه ونضفنه البيت
ساره كالت خل اسوي شعرج ارتبه
كتلها لا لان ماراح انزع حجابي ابد

شكد حاولت بس رفضت
للساعه ب2 الضهر اجت سياره حمل نزلو الكراسي حطوهن بالحديقه شباب واكفه بره الحنه ب 4العصر
وهم زينوها نشرات ورتبوها الحديقه جبيره
شالو المرجوحه خلوها على صفحه ورتبو الكراسي

دخلت سبحت وطلعت شفته دخل من باب المطبخ مبين مزين ومرتب روحه تركته ورحت الغرفتي ساره تبدل بيها

ساره لبست فستان طويل يسحل وراها بس من فوگ صلوخ مرتب عليها
واني مشطت ولبست فستاني عبالك محاميه ورايحه ادافع عن قضيتها هيج شبهتني ساره

ضحكت عليها

ساره،، والله رايحه حنه لو تترافعين؟؟
مقفله من فوگ لجوه

غصون،، عاجبني لبسي
موشرط اروح عريانه حتى ابين الهن اني ماضايجه

لفيت حجابي وساره رتبته الي خلته كلش حلو
مكياجي كلللش خفيف
رادت اطوخه كتلها لا عوفي هيج احسن

لبست حذائي تكرمون وعباتي حطيتها على راسي وطلعت وره ساره لگيته كاعد بالمطبخ هو وعمتي
عمتي جاهزه وهو لابس دشداشه

رفع راسه باوعلي ورجع دنگ يطفي جكارته بالمنفضه

ام ذياب،، يمه والله لاترحين حتى ماتضوجين

غصون،، ردت احجي سبقني يحجي ويه امه بحده

ذياب،، شعلييج بيها خليهااا تروح تريدد تتونس

غصون،، دفع الكرسي نهض من مكانه طلع للسياره
اني هم سكتت لوشيصير مااتراجع عن قراري

ساره ضلت تحجي على عمتي كالتلها ماتشوفي
اشلون من هسه مامتحمل ورط روحه خل ياكلها
حتى يبطل يتسرع

غصون،، طلعت للسياره وراهن عمتي كعدت يمه واني وساره لوره
طول الطريق ينفخ جكاير
ابد مارفعت راسي ولاشفته يباوعلي لولا
بس من تحجي وياي ساره اضحك بهدوء لو اسولف وياها
احس بي يريد ينفجر من يشوفني مامهتمه

وصلنه البيت نور نزلنه للبيت وهو عافنه وراح
صوت الديجي واصل للشارع
اتلگتنه اختها ونسوان اخوتها
بس الابنيه مرت اخوها الدائما اشوفها
طلعت وراهن ضايجه كلش
بس مبينه حبابه دخلنه
نسوان اهواي الصاله متروسه ترس

سلمن علينه نزعت عباتي خليتها بصفي
احس الكل يباوعلي مدري شكو

ندست ساره
كتلها ساره وجهي بي شي؟؟
لبسي بي شي

ساره،، لا كلشي مابيج بس عبالهم راح تلقين نشرة الأخبار

غصون،، ضحكت كتلها شسالفه

بعدها اجن من الصالون اول وحده دخلت وهلهلت عذراء
وراها دخلو نور لابسه بدله بنفسجي

من دخلوها وخرن عنها الغشوه كلمة حق طالعه كلش حلوه كعدوها ع الكرسي عذراء من دخلت لعبت لعب
لابسه فستان الله شاهد من ادنگ يبينن ملابسها الداخليات
النسوان خربن ضحك عليها عمتي اتخبلت
جرتها من ثوبها

ام ذياب،، ترحين تبدلين لاهسه اعوف كلشي واطلع
ولج شنو هذا لبسسج؟؟

عذراء،، شبي يمه ماتشوفين كلها لابسه مثلي

ام ذياب،، منو الابسه؟
طلعيها الي خل اشوفها
وحگ الله بس انتي
كلهن لابسات بس بحدود المعقول

شوفي النسوان كل وحده لازمه موبايلها بيدها وتصور
انه متاكده باجر نلگاج مشهوره ع الجزيره والعربيه

ساره،، هههههه يمه ذني قنوات اخبار

غصون،، عذراء مااقتنعت من حجي امها عافتنه وراحت تركص وره ساعه يالله بدلت غير لبس هم فضيحه بس احسن من ثوبها الاول

التفتتلي ساره

ساره،، اليوم امي من شافتج اتذكرت قنوات الاخبار موگتلج طالعه جنج مذيعه

غصون،،بس اضحك على سوالفها صح گلبي ملجوم بس ماعندي غير ضحكتي اداري بيها الحزن المخيم على روحي
فعلا توصلت القناعه انه كل شخص يضحك هواي
هذا تلگاه من گد الحزن يضحك

نور اربع مرات بدلت وبدله احله من الثانيه
بداخلي انهضمت
شنو الفرق بيني وبينها؟

ماعشت هاي الفرحه ابد لا بدله ولاعرس ولااحترام
ولا فرحه ولاكلهن وابسط حقوقي مسلوبه

اما نور بااخر ايام عقدت محكمه وفرحت وهسه ترگص بالبدله وفرحانه
بلعت الغصه اخاف ابجي ويگولون مقهوره

صارت هوسه مال نسوان نور وامها عازمات الدنيا كلها

اجن نسوان ثلاثه اثنين منهن كل وحده شايله طفل
وحده منهن بسرعه عرفتها
نفسها الضربتني بيوم الرحنه فصليه البيت الشيخ

ماسلمت عليهن وحده منهن تباوعلي من وره خشمها
ساره شاورتني گالت هاي مرت حسين الكتله ابن عمج هسه صارت مرت لواء عقد عليها
متت قهر على زينب
بس ساره كالت سمعت من ذياب زواجهم بس ع الورق حتى يضمن اولاد اخو يتربون عده

تركناهن وگمت اني وساره وگفنه على صفحه لان صارت خنگه وحده كاعده بحضن الثانيه المكان موكلش جبير والمعزومات بيهن اكثر من100مره
اباوع عذراء ملتهيه تركص ومرت حماها توزع ماي وقايمه بالواجب

اقتربت من عدنه الابنيه قدمت النه كاسات ماي
اجت عذراء اخذت كاسه

الابنيه گالتلها عذراء كافي عوفي الرگص ساعديني شويه

عذراء،، اووي هو ماي كتلتي روحج

غصون،، عافتنه عذراء وراحت والابنيه عرفتها ضاجت حتى ساره ماقبلت على تصرف عذراء
ورادت تاخذ الصينيه منها تساعدها
بس البنت رفضت ماقبلت

ام نور جايبه ملايه تجلي العروسه جلوه يسموها جلوة الزهراء عليها السلام
كعدت نور وحطن فوگ راسها غشوه لزمن الغشوه من كل طرف وحده
طرف لزمته عذراء والطرف الثاني مرت حماها
وبنات صغار لزمن الشموع
الملا تقره بالجلوه ماحسينه غير اشتعلت الغشوه الطفله ماتدري ومقربه الشمعه وهاي نايلون بسرعه لگفت من النار
گوة طفن النار والضحك صار بفلس
نور غدت حمره من القهر حتى اني ضحكت ع الواهس
بس نور مارزلت عذراء
صبت غضبها بمرت اخوها الثانيه فشلتها كدام النسوان خلتها تبجي تالي عافتها وطلعت حتى اخذت بتها صغيرونه جرتها واخذتها وياها

وره ساعه خلصت الحنه مال نور واجه ذياب علينه
نور بعدها بالبدله
يمكن رادت تقهرني طلبت من عذراء تجيب تليفونها حتى تتصل بذياب

وفعلا اسمعها تطلب منه يفوت للبيت تريده يشوفها وهي بالبدله
امها عود تشاقه كالتلها باجر يشبع شوف بالبدله

العرفته من ملامح وجها لان ضاجت ذياب رفض يفوت للبيت
اتصل بعمتي كالها اطلعن اني بالباب

لبست عباتي وطلعت وره عمتي اني وساره نمشي
اول ماطلعت صار كدامي عيني بعينه قبل مااطلع اتعمدت احجي واضحك حتى يشوفني فرحانه مااطلعله ضايجه

من شافني هيج ضاج كلش
صعدنه بالسياره عدل الجامه الجهتي درت وجهي عنه

طول الطريق عمتي تحجي وهو ساكت
من وصلنه للبيت بسرعه بدلنه اني وساره
جهزنه الببسي والكيك مال الحنه للزلم

حتى مالحگنه نتعشه واحنه نفتر كل وحده سوتلها لفه نمشي وناكل
للساعه ب 8اجت العالم ذياب نزل مبدل لابس بنطرون اسود وقميص ابيض
عذراء اجت تحضر الحنه مال الزلم واخوات ام ذياب وبناتهن
جماعة ذياب جايبين مطرب يغني

عذراء وساره والبنات كلهن راحن للاستقبال
طفن الضوه وشويه فتحن من البرده لان الجام مومضلل ف ينشافن

ضليت بالمطبخ احضر صواني كاسات ماي
انفتح الباب دخل ذياب

احس بداخله حجي

جر نفس كلش طويل

ذياب،، غصون

تركته وطلعت من المطبخ مااريد اسمع اي شي منه
رحت يمهن عمتي كاعده بالصاله يم اخواتها

بده المطرب يغني واشتعلت الدنيا بالرمي
عمتي سدت اذانها وشتمتتهم تكول اتخبل من صوت الطلق
رحت يمهن اكو مكان مابي احد بس مااينشافون كلش بعيدين
هنه مايشوفني لان ضلمه وملتهيات يباوعن عليهم
فتحت البرده وصرت اراقبه من بعيد
واكف على صفحه هو واحد وياه

اجه صاحبه وكف كدامه صار يهوس بالرشاشه مالته
دار وجها عن ذياب وبيد وحده رمه مخلي الرشاشه ع الصلي مو ع المفرد

اول مارمه نزلت الرشاشه من ايده فلتت ع الوادم
ضجت الزلم والركضه صارت بفلس
فتحت عيوني ارجف اباوع الوادم مجطله كل ضني من نزلت الرشاشه اتكتلو

عذراء وساره طلعن يركضن يتلاطمن
عمتي من شافتهن وعرفت واحد من المعازيم
فالت السلاح منه وگعت من الخوف

جسمي يرجف البيت عباره عن صايح مال زلم
عمتي مااتحملت لبست عبايتها وطلعت نسمع بس صوت الشخطات مال السيارات

وعرفنه واحد من الحاضرين الحنه متصوب برجله
واخذو للمستشفى
عمتي فاتت تلطم تصيح كلت ماانريدد رمي غضضب
يااما زللم راحت بسبب الرمي والسلاحح

ساعه تقريبا احنه بس حاطين گلوبنه بشيشه خايفين
عمتي تبجي تصيح

ام ذياب،، طلابه وگعت على روسنه
والله من احترگت الغشوه مال العروس كلبي انقبض عرفت راح تصير كارثه
كتلله ولك ييمه لاتخلي واحد يرررمي
كال يمه لاتخافين مايصير شييي

غصون،، وره ساعتين اتصلت ساره برجلها
كالها مابي شي الولد وحتى الطلقه موبالعضم بس شاخطته وطالعه وهسه احنه وياه
ساعتين ثلاثه ونرجع

لمن سمعت عمتي يالله ارتاحت
ذياب من المغرب جاب كباب شوي وصمون وطرشي
متفق ويه مطعم يجهزهن اله بسفريات
وقبل الحنه بعشر دقايق جابوهن
ترسنه بيهن المطبخ

من صارت السالفه راحت العالم بدون مانوزع
ف ضل الاكل كله على حطيته
خربت الحنه وصارت هوسه شكبرها

للساعه 10ونص رجع ذياب من المستشفئ
تعبان كوه يحجي
كال العمتي هذا الاكل وزعي للجوارين حرامات يضل
وفعلا عمتي انطت نصه ل اخواتها وعذراء هم اخذت منه ترست الجنطه مال سياره رجلها من اجه ياخذها

يعني توزع ماضل بس عشانه ومن الخرعه محد اله نفس ياكل
شفت ذياب دخل الغرفة عمتي وسد الباب
بالصدفه عبرت اريد اروح للحمام سمعت صوته
يبجي يم عمتي ماحبيت اسمع كلامهم لان عرفته
بعده بالبدايه وراح ياكله الندم
اجذب اذا اكول انقهرت بالعكس فرحت من سمعته يبجي لان ماحاول يسمع مني ويفهمني بدل مايروح يخطب نور بساعه غضب وعصبيه

تركتهم ورجعت الغرفتي
ثاني يوم التهو بالولد المتصوب واتفقو ماكو زفه مجرد ياخذون نور من الصالون سيارتين ثلاثه ماكو ناس تروح

وهم عشه ماكو ذياب كال ثاني يوم العرس نعزم للغده

العصر دخلو اولاد عمامه صعدو وياه يبدل
نص ساعه ونزل لابس قاط
خالاته واكفات ومبينات مامقتنعات بنور من كلام ام ذياب
بس عذراء هلهلت خزرها
اني واكفه وراهن انتبهتله عيونه ادورني
من شافني صفن بعدها دنگ وطلع

سالت ساره شعجب عذراء ماراحت للصالون ويه حماتها؟؟

ساره،، والله ماادري بس يمكن لان ماكو زفه واذا راحت محد يجيبها لان عمتها تكعد بالصدر مال سياره الزفه ويه بتها

غصون،، للساعه ب6رجعو طبعا عذراء حضرت الصينيه والتمن والدجاجه ولازمه السجينه حتى يذبحون الدجاجه جوه رجل نور هاي كلها.واني بس اباوع بعيوني

فاتت نور بالبدله وعذراء كدامها تهوس

هاي الرادها وهاي التمناها

ابد مااتحملت موقف مو سهل
رجعت الغرفتي دخلت وسديت الباب
وجهي صار نار صرت اهفي الروحي
حتى ماابجي ويبينن عيوني باجيات
صرت اتعمد اذكر المواقف البشعه الصارت بيناتنه حتى اكرها واحقد علي ومااضوج

من شفت روحي هدئت طلعت يمهن
ساره تسولف وتضحك وياي ادري بيها تريدني مااضوج

حضرنه عشه ل امهاتها لان ضلن لليل
صبينه ونقلنه الاكل ونور صعدنها لغرفتها

كملن عشه وشلنه المواعين وره ساعه كالو راح يدخل العريس
انخمش گلبي لزمت صدري مختنگه

بقيت مدنگه اغسل بالمواعين مارفعت راسي حتى لايشوفون عيوني الدمعه بيهن تلمع
خفت يسالوني شبيج؟
وتالي افقد اعصابي وابجي
دخل ذياب فاتح الرباط واول دگمتين رفعت راسي واحد يباوع للثاني كانه عيونه يحجن ويتعاتبن بيناتهن كانه كل واحد بينه عرف الثاني بشنو يفكر

عذراء واگفه تهوس
ضليت على گعدتي وهو صعد لفوگ

كملت وگمت دخلت للغرفه عمتي وامها نزلن گعدن بالصاله وهمه فوگ
ماتركتهن ابد سويت جاي قدمته الهن
عمتي گالت كافي يمه تعبتي روحي ارتاحي
جنت محتاجه هاي الكلمه لان ماردت اختفي ويحسون بيه مقهوره
تركتهن ودخلت الغرفتي نار تلهب بروحي
لييش ضاايجه لليش؟؟
كعدت اعصر بوجهي بثنين اديه مااريد ابجي
جريت الكتب وكعدت اقره

اكو كتاب مفاتيح الجنان بي اهواي ادعيه
اول دعاء اجه كدامي دعاء التوسل
طلعت توضيت ورجعت فتحت الكتاب وكعدت اقره
لااراديا دموعي نزلت وخاصتا الدعاء والتوسل غصب عنك تبجي

صرت كل شويه اقره دعاء للساعه 12
سمعت صوت هلهوله عذراء غمضت عيوني حيل وكملت اقره ماطلعت عرفته نزل ونور صارت مرته

بيومها مانمت للصبح لازمه قرأني اقره
ثاني يوم هم كعدت على صوت الهلاهل
كمت لميت فراشي وطلعت
شفته لابس دشداشه بيضه وهي لابسه لبس خليجي هم ابيض ومتمكيجه

كلهم باركوله واني هم اتقدمت باركتله ضل صافن بوجهي بس نور كالت شكرا حبيبتي حجتها تجر بيها جر
مر اليوم عادي بين خطار وتحضير للغده
للساعه 3العصر يالله خلصنه هوسه الخطار اتغدت والناس راحت

صرت احاول اتجنب ذياب ومااشوفه ابد
من اشوفه يفوت للبيت اذب البيدي وادخل الغرفتي
عذراء ضلت يمنه ثلث ايام ونور تحتار شنو تلبس تستقبل النسوان

بيوم السابع سوت حفله عزمت اهلها وصديقاتها
اني ماطلعت يمهم ابد وعذراء هي اتكلفت السالفه تفتر وتجهز بس ساره ابد مامدت ايدها على شي
اجت يمي صح مبدله ومرتبه نفسها
بس اجت يمي كالت تلعب نفسي من الناس التتفيك وتشوف نفسها هي ولاغيرها احسهم تافهين

ماحجيت انفتح الباب فاتت عذراء نترت بيه وهي واكفه

عذراء،، شكوو خاتله ماتكومين تسوين جاي تتشتغلين شو مخلصتها بس خاتله

ساره،، شكو عذراء شنو هذا الحجي تره عيب
مثل ماذيج مرة اخوج هاي هم مره اخوج

عذراء،، صدك تحجين؟
تقارنين هاي بنور؟؟

ساره،، اي والله صدك ومنو نور حتى اقارن غصون بيها؟؟
اصلا فرق بين السما والگاع

غصون،، جاي نحجي انفتح الباب فاتت نور وسدته وراها
شافت الجو مشحون بين ساره وعذراء

نور،، شكو بنات شبيكم؟؟

عذراء،، ماكو شي حبيبتي بس اجيت اريد الخانم تكوم تحرك روحها بدل ماكاعده

نور،، اتركيها يمعوده اني اجي وياج

عذراء،، لاهي تكوم انتي اكعدي

غصون،، ابد مااتحركت ولاحجيت بس انتفخ گلبي منهن اريد اركعهن راس براس

تالي عذراء اخذت نور وطلعن
ساره ضلت تحجي على اختها ماتقبل على تصرفاتها

عاشر يوم ونور ماماده ايدها على اي شغله مخلصتها نوم
وذياب ابد ماله شغل بيها حتى صار يطلع مايرجع غير نص الليل
اني اكعد من الصبح ويه عمتي اشتغل وارجع افتح كتبي واكعد اقره

عمتي ضاجت من الوضع من نزلت نور كالتلها ام ذياب
ام ذياب،، عمه هسه انتي صرتي مره معرسه مو عد اهلج
والمره النادره تكعد من وكت تگضي شغلتها وترد الغرفتها محد اله شغل بيها

غصون،، نور كالتلها صار عمه تدللين بس والله صوج ابنج مايخليني انام

اني من يمي عرگت من الخجل والفشله وهي تحجيها طگ بطگ
ضليت ساكته بس عمتي كالتلها عيب هيج تحجين
كل شي يصير بين المره والرجال يضل داخل غرفتهم مايطلع لبره ابد

اترزلت باادب سكتت ماحجت
صارت تنزل تشتغل شويه وترجع الغرفتها
بس ماتطبخ بس تكنس
عمتي من شافتها هيج
كالتلي بعد لااطبخين انتي بطرك روحج
اليجوع ينزل يطبخ الروحه خل تطبخ الها والرجلها
واذا شفتج مسويه اكل اني اريد انيم الجدر براسج

صدك ضحكت ومن هذا اليوم نور صارت تسوي اكل الها ولذياب يوم محترك ويوم مالح اخر شي انفجر ذياب نزل يصيح كالها يمه ميت جوع اريد ارجع اكل لگمه زينه ماكو

ام ذياب،، جا شبيدي عليك يمه هاي مرتك جدامك تسمعك
خل تطبخلك شني امها ماعلمتها قبل لاتنطيها؟؟

غصون،، نور ابد ماحجت وذياب يدري بروحه غلطان سكت

مر شهر ع العرس زادت المشاكل كلش
وذياب على ابسط شي يرزلها

بيوم اجت ساره واكفين اني وياها نسولف ونضحك بالمطبخ اجت نور مغندبه دفعتني وفاتت من يمي
ماحجيت عبرتها الها
خذتلها شويه اني جاي اسوي غده اكلي بتيته
اجت يمي

نور،، وخري اريد اگلي

غصون،، ابتعدت عنها كتلها منو لازمج؟؟

نور،، اتادبي واحجي عدل

غصون،، عرفتها تريد تتعارك كتلها الحمدالله مؤدبه غصب عنج

شو هاي بسرعه دفعتني لزمتها ساره كالتلها مااتجاوزت عليج انتي البديتي

نور،، ادري ضايجه لان ذياب فضلني عليهاا
راح تموت من القهرر

غصون،، ابتسمت كتلها وعليش اموت؟؟
شو كدام عيني اخذج ليش مامتت؟؟

نور،، والله مبينه من شكلج وحده حقيره اليشوفج عباله فقيره بس انتي شيطاانه

غصون،، صدگ ضحكت كتلها خايبه شبيج تخوطين بصف الاستكان بس تردين تتعاركين؟؟
وبعدين اني سامعه البشر مايكدر يشوف الشيطان
بس الحمار يشوفه

ساره دارتلي وجها كوه كاتمه ضحكتها تريد تسكتني ونور عيونها صارت بكصتها صدك عجبني اراددها
هي تفرفح واني احجي بكل هدوء

اجت عمتي رزلتنه اثنينه كالت بدت سوالف الشرايج؟؟
مره جبيره اني مالي خلگ للمشاكل

نور عافتنه وصعدت شايطه وساره طكتها ضحكه
بصوت ناصي
كالت ولج منين جبتي هاي السالفه خليتيني صافنه عليج

كتلها اذا تردين تعاي اعلمج وبالخدمه

ساره،، هو وكتنه صاير اغبر طاحضه لان راح يخليني اتعلم منج بس صدك حبابه علميني

غصون،، كتلها هسه انتي ترزلين لو تردين تتعلمين؟؟
كعدنه نسولف نسينه العركه مال نور
من اجه ذياب سمعناها تشكيله بس زمخ بيها ماقبل كالها اجي تعبان لاتتلگيني بالمشاكل

صارت يوميه نور تتحرش بيه كوه تريدني اتعارك وياها بس جنت اسيطر على اعصابي حتى اعرف اشلون اجاوبها

الضهر عمتي كالت يمه اشتره ذياب سمج زغار
اشويلي منهن كم وحده ع الطباخ وانتي سوي منهم الج تغدي بيهن وجيبي ناكل اني وياج بره بالطارمه

صدك نضفت كم وحده من السمجات لان الزغار ماينشگ بطنه لازم من الصفحه تنضفه اطلع الاحشاء مالته لان كلش زغار
نضفتلي ماعون الي ولعمتي
شويتلها كو وحده وخليت الطاوه ع النار اگلي الي غده

اجت نور من شمت الريحه كالت اوووع منو ياكل سمج صغار لعبت نفسي

غصون،، غلست عنها
من شافتني موبحالها كالت ماياكل هذا الاكل بس الفگر لو يمكن انتي مسويه عزيمه للبزازين؟؟

التفتت عليها بكل هدوء كتلها اول عتوي انتي معزومه
ماحسيت غير جرتني من صدر ثوبي تريد تضربني دفعتها
على صوتنه اجت عمتي شبعتها رزايل
من ذياب موجود ماتفتح حلگها ابد
بس من طالع ادور طلايب

ثلث شهور اني شبعت قهر منها بس اسكت من اشوف عمتي ترزلها ماتقبل
مره بالصدفه سمعتها تحجي هي وعذراء بالغرفه
عذراء سالتها شعجب ماصار عندج طفل لسه؟؟

نور،، يمعوده خليني اتونس لاحگه على شلاع الگلب

عذراء،، ياااا بس لاتاخذين مانع

نور،، اسكتتتي فضحتينه اخوج مايدري خلي تصير سنه واتركه خل اشبع ونسه وطلعات وبعدين احبل وانربط بالبيت

غصون مااهتميت الحجيهن تحبل ماتحبل مشكلتها مومشكلتي

وره كم يوم نور راحت لهلها بعد ماعمتي كالتلها روحي لان ابد ماتروح تخاف ذياب يحجي وياي
امها وابوها كل كم يوم يجون بليل يشوفوها

عمتي كالتلها فشله روحي. لهلج خاف عبالهم احنه مانعيج

نور،، لا عمه مايكولون هيج وبعدين شسوي رايحه وهمه كل اسبوع يجون يمي
وهم مااكدر اترك ذياب مايعرف يكعد اذا اني ماموجوده

غصون،، بكلبي كلت اي كلش منجرمن ياخذه النهار ويرده الليل من يوم العرس ماينشاف
يطلع من الصبح للدوام يرجع الضهر ينامله ساعتين والعصر يطلع مايرجع لليل

نور شلعت گلبي النهار كله تسمع حجي واغلس عنها
تريد بس اتعارك وياها بس ابد مااخليها تحقق مبتغاها

رجعت داومت تروح للدوام من الساعه 7الصبح ترجع الضهر تنام ماتكعد غير العصر وماتشتغل تكعد تلكه الاكل جاهز كم مره رزلها ذياب وفشلها بس ولاجن يومين تجر عدل وباقي الايام ترجع تغلس

عمتي صارت تغلس عنها اتكول خليها بغرفتها المهم مرتاحين منها ومن هوستها

ذياب من يشوفني صدفه احسه مهموم ومقهور بس على گوله عمتي هو الجابها النفسه

نور تخلق مشاكل من جوه الگاع تتمنه نتعارك اني وياها وتصير مكافش تريد ذياب يرزلني لو يضربني
اخر شي كالتلي انتي ماعندج دم ماتحسين من ارزلج واغلط عليج

التفتت الها كتلها خلي ابالج شغله لااني خرسه
ولامااعرف اسولف
ولا اخاف منج ومااكدر اجاوبج
تدرين اني ليش مغلسه عنج؟؟

ضلت صافنه بوجهي
كتلها لان كلامي غالي والهدف رخيص
ماتسوين اتعب روحي بسببج

تركتها ومشيت احسها مصدومه
ماتعرف شنو تجاوبني وحتى اني صرت اتفنن برزالتها لان مااينرفزني كلامها بالعكس هي المقهوره مني واني المغلسه عنها

مر على زواجهم خمس شهور

نور قبلها بكم يوم راحت لهلها بس من رجعت لونها مخطوف ماتحجي ابد هادئه بشكل
حتى كلنه انتبهنه عليها بليل كاعده يمنه حاطه اصبعها بحلكها مرتبكه تكرض بااضافرها

حسيت بيها شي واكو سالفه مخوفتها
ثاني يوم قبل الغده هي وذياب فوگ
اندگ الباب عمتي تصلي
لبست عباتي وطلعت فتحت الباب تفاجئت
بحماة عذراء شايله ابنها الزغير بيدها وتبجي

سالتني عن ذياب كتلها موجود اتفضلي
دخلتها للاستقبال
ورجعت اريد اگل العمتي تصيحله شفته نزل من الدرج ونور وراه
عمتي طلعت من غرفتها
وهو واكف من شافني اريد احجي
كتلها عمه حماة عذراء مدري شبيها تبجي
بالاستقبال

اباوع نور فتحت عيونها مصدومه
اتاكدت اكو مصيبه وره جيت مرت اخوها

يتتتتبع