رواية ضحية لمن لايرحم الفصل الستون 60 - بقلم زهراء الحسناوي

البارت 44

ضحيه لمن لايرحم

بقلم زهراء الحسناوي

،،،،،،،،،،،،،،

بسچ ياعين وكافي تبچين
بسچ ياعين الراح فدوة
بس دمعه ضلت بيچ ياعين
تبچيها المن ياهو يسوه؟؟

،،،،،،،،،،،،،

زينب،، شلتها من كاروكها الدم تارس وجها
من خوفي وخرعتي فضحت الدنيا بالصايح
گعدت بالگاع وهي بحضني امسح دمها بطرف عباتي المحزمه بيها احجي وياها بهستيريه

ووولج ييمممه بنننيتتيي فططومه
ولكمممم الحگووني
بنيتي ييمه دخيلك ربيييي لوااااااااء

اول شخص فتح الباب ركضلي هو حسن لان غرفته فوك يمكن موجود من عطت اخذها مني
يمسح بوجها
رجلين ماعندي حتى اوگف على حيلي
كل قوتي راحت بس فاتحه عيوني مادتله ايدي بمعنى انطيها الي اريدها
احس حلگي يبس راح انجلط
بعدها كلهم اجو يركضون

لواء من شافها بيد حسن غرگانه دم گعد مايگدر ينهض
فعلا الضنه عزيز وغالي بحيث اني وابوها مانكدر نتحرك عمي وحسن يمسحون بوجها
حسن گلبها على وجها لان حلگها يطلع منه دم

صوت ماعندي احس نفسي صار سريع اريد احجي مااكدر حطيت ايدي بالكاع سندت روحي
كتله جيب جيبهاا انطينياهاا

حسن،، مابيها شي والله لتخافين كلشي مابيهاا
عينها مجروحه ونازفه

زينب،، بجيت كتله خييي انطيني بنيتيي

حسن،، شوفي اشلون ترجفين هسه توكعيها
بس خل انضف وجها
شوفي لان نازفه عينها داخل الدم بحلگها ونازل على بلعومها واذنها

زينب،، يمسح بوجها شال الحضينه مالتها حطها على عينها دقايق حتى يسد النزف
لواء وجها صار اصفر واني احس گلبي راح يوگف من قوة ضرباته صار يوجعني

نذيره واكفه ماتحركت ولاحجت وحنان من الباب تباوع مافاتت يمنه لازمه جهالها اثنينهم

لمن توقف النزف بالربع ساعه حسن حاطها بحضنه
رفع الوصله اكو شخط بالوحمه

حسن،، كومي جيبي شاش ولاسق خل احطه عليها

زينب،، باوع اللواء

حسن،، وانت گوم شجاكم اثنينكم اتمدتو بالگاع
هاي عود انت بالجيش وماره عليك اكثر من هاي المصايب

زينب،، لواء حجه بصوت يرجف

لواء،، بنتي هاي حسن يمها اتربط حيلي يموت
خل ناخذها للمسشفئ

حسن،، كلشي مابيها ياخويه
والله مجرد شخط بنتك وكحه مصلفه بيدها شاخطه عينها
مو عموو؟؟

زينب،، بس صافنه بوجها مفتحه تك عين والثانيه سادها حسن بالوصله

عمي ونذيره وحنان طلعو لواء نهض كعد ع الجربايه مد ايده اخذها من حسن يشم بهدومها
دمعته بعينه فعلا البزر غالي ماكو اعز منه

حسن تركنه وطلع واني كعدت يمه عيني عليها
مااحجي ويه لواء من صار يضربني صارت فجوه بيناتنه
مديت ايدي اريد اخذها

لواء،، عوفيها

زينب،، اريد اغسللها
جسمي يرجف من الهبطه بس كلها ريحه زفاره مال دم ماانطاها الي
حاطها بحضنه

تركتهم وگمت اسحل بروحي اللحضه فكرت خسرتها
احس جاي اشوفها تندفن كدامي من شفت منضرها والدم الينگط منها

شلت فراشها كله فرشتلها غيره
ررجعت مديت ايدي انطانياها
اخذت بطانيه صغيره واخذتها للحمام الفوگ
فتحت الماي ب الطشت غسلت الها
ورجعتها للغرفه عينها مضمديها

لواء علئ گعدته ع الجربايه واني انطيت ضهري للكاروك ارضع بيها عينه علينه
غمض بتعب عافنه وطلع
مااعرف شنو الغيره
صح السحر مذكور بالقران بس لان اجيت من بيت نضيف مابي اعمال شيطان وذني السوالف ف اشوف السالفه ماتدخل للعقل وماافكر بي لوماحسن يحط الفكره براسي
وخاصتا نذيره هذا اخوج احزام ضهرج
شنو من گلب عندج حتى تحاولين تاذي
ياما ناس وشباب بعمر الورد ماتت بسبب اعمال الشعوذه والشياطين

لليل كله اني اباوع لفطومه وهي نايمه كل شويه ابوسها ابلعومها على كيف خاف تگعد ادمنت ريحتها اشمها بقوه عبالك ادخل النفس الروحي

ثاني يوم اخذتها للحمام اغسللها
اشيلها بحضني لان كلش صغيره ماكملت الشهرين
من اريد اسبحها ينشلع كلبي اخاف توگع مني بس شويه شويه تعلمت جاي اغسللها
انتبهت الشخط غميج لان الجرح ناشف صاير خيط يابس
مومال اضفر
بعدين استغفرت الله كلت محد ينطي گلبه ياذي طفل اله اذا جان ماكو بگلبه رحمه

وره كم يوم جنت انضف بالصاله وبنتي يمي مخليتها بلگاع لان محد يشيلها بس من لواء موجود ياخذها يحطها بحضنه بين مااكمل تنضيف
الشباك مال الصاله صاير بجهة باب الحوش يعني اليدخل اشوفه
انفتح الباب دخلت غفران شايله جنطه مال ملابس شكبرها
والثانيه جنطه تسحل بيها وراها
فاتت تبجي راحت البيت امها

مبينه من شكلها زعلانه
صارلها اكثر من اربع اشهر من تزوجت
وابد مااجت لهلها من يوم عرسها
ماادري شكو

يومين البيت مخبوص بس محد تحجي جدامي اي شي
اسمع نذيره تبجي وتندعي على رجل غفران
بس السالفه مومال باسطها لان سمعتها تحجي ويه امها اتكلها ياريت مبسوطه ولاهاي الفشله

اخر شي كل البيت عرفو بسالفتها لان ماينسكت عليها واسمع نذيره تصيح حسها يلعلع بالبيت
تصيح اخلي اكبر محامي ويطلگها غصبا عنه المايع المخنث

تالي لمن وصلتني السالفه والافتهمته منهم انو غفران لسه بنيه زوجها ماتقرب الها وطول هاي الفتره جانو اهله ياخذو للساده وللدكاتره اهله يصيحون ابنه مسحور

تالي عمي رفع دعوه علي حتى يطلگها
بس القاضي رفض لازم ينفحصون الطرفين

وفعلا بعد الفحص اتاكدو هي بعدها بنيه وهو
مامتقربلها يعني الكلام صح ماعنده رجوله

شهر كامل احنه مامرتاحين ونذيره تفرفح
كل شويه يصعد ضغطها
تصيح مامرتاحه وحده رجلها مسويها خدامه والثانيه اربع شهور ورجعت على گلبي مطلگه

صارت فضيحة شكبرها ونذيره احتارت اشلون تسكت احلوگ النسوان
كلها اتگلها اتوازيتي شمرتي بنتج الهاذا المايع من شكله مبين بنيه موولد

سبحانك يالله كل الصار بيها وابد مااتعضت لو بطلت بالعكس تزود ماتنقص

تخليني اكعد من غبشه لليل افتر
احط بنيتي جدامي واشتغل وين مااروح هي بحضني
والله مرات اذا اسوي عشه وهي تبجي اشيلها واطبخ
ومحد تگلي جيبيها اني اشيلها بين ماتكملين
يعاملون جهال حسين معامله تختلف
النهار كله شايلليهم
مرات حسن من يشوفها تبجي ياخذها مني بين مااكمل

بعد رجعت لواء من السفر بفتره صدفه سمعتهم يحجون بزواج ذياب
انصدمت اووف ياحضج ياغصون نفس حضي
بجيت عليها من كل گلبي

نذيره وحنان يحجن يسمعني

نذيره،، سبع ذياب كسر خشمها بمره ثانيه
يوم اللواء ويكسر خشم هاي بنت الفگر

زينب،، تحجي وتباوعلي سكتت عنها. روحي خلصانه افكر بغصون اشلون بيها هسه؟
ساعه اكول اذا تحبه تنقهر واذا ماتحبه ماتنقهر
لان مااعرف شي عن غصون فقط الاسمعه من اهلي
عمامي مايحجون شي عنها من اروح يمهم فقط يگولون زينه مابيها شي

بيوم الحنه مالت ذياب راحن كلهن حنان بدعت باللبس كشخت واتمكيجت وطلعت هي ونذيره
وغفران ام لواء ماراحت ماتكدر هي اذا تكوم من العربانه تمشي خطوتين تتعب وترجع تكعد

راحن للحنه مال النسوان للمغرب ياالله رجعن سمعت منهن غصون رايحه للحنه مال رجلها دموعي وحدهن نزلن عفه گلب عدها واتحملت تشوف رجلها ياخذ عليها مره
يمكن اني اموت بساعتها اذا لواء سواها ودخل يم حنان

المغرب لواء وحسن راحو للحنه مارجعو غير نص الليل
اسمع سوالفهم بالممر يحجون واحد يگل للثاني كارثه الله ستر
انخمش گلبي اكيد صايره مصيبه

اني مااحجي ويه لواء من يضربني ابتعد عنه ومالي شغل بي لااسأله ولااحجي وياه
ردت اسأل حسن گلت باجر افهم منه

ثاني يوم كعدت الصبح مالگيت لا لواء ولاحسن رايحين من غبشه لبيت ذياب
احس اكو مصيبه صايره ردت اعرف السالفه ضلت ابالي

تالي لمن رجعو بليل سألت حسن حجالي لطمت على وجهي من الخوف

مرت الايام ونذيره وغفران وحنان لعبن بيه لعب
ذابات كل الشغل براسي وهنه كاعدات حرت بين بنتي اليوميه تفحط من البجي لمن تتعب تنام دمعتها بعينها وبين الشغل وسوي ذيج ونضفي هاي

مره صادف ماكو خبز من الصبح كالن اليوم نوبتج اعجني واخبزي
وصدك ترست المعجانه طحين وعجنتها الساعه ب9الصبح
انتضرتها بين ماتختمر صارت ب10ونص

ردت اخبز بتنور الغاز لمن شنگت العجين ورحت اريد اخبز تفاجئت القنينه فارغه مابيها غاز

رجعت للبيت شفت نذيره بالمطبخ كتلها القنينه فارغه اشلون اخبز؟؟

نذيره،، معلمج ابوج تخبزين بتنور غاز؟؟
روحي اخبزي بتنور الطين

زينب،، العجين من زمان شنگته سال لان اتاخر
ماحجيت وياها رحت للتنور الطين وره البيت ترسته حطب وشغلت بي نار انتضرته لمن يحمه اتذكرت بنتي تركتها بالكاع بالصاله
تركت التنور ورجعت طايره اركض
صوت بواجيها واصل لبره وحنان ونذيره كاعدات يمها بالجذب وحده منهن حطتها بحضنها وسكتتها

تالي شلتها اخذتها وياي اخذتلها فراش
ابوها نايم فوگ اخاف اكعده يبسطني لان صار كلمه والثانيه يضربني جدامهن

اخذت بنيتي ورجعت للتنور فرشتلها بالكاع على صفحه
وبديت اخبز الشمس صارت قويه بحيث وصلت الها رجليها بالشمس وراسها بالفي
عين للتنور وعين الها اخبز بسرعه حتى اشيلها وافوت
والله العظيم من اصفگ الخبزه يطير الطحين عليها
انترست طحين دمعتي تجري ع التنور شنو من بشر ماكو بگلبهم رحمه ع. الطفله
سمعت صوت حسن وراي التفتت اجه بسرعه شالها ينكث بالطحين عن وجها

حسن،، صدگ تحجين زينب مخليتها بالشمس وجها كله طحين؟؟

زينب،، انهضمت واني ابجي
كتله خيي والله ماتت بجي محد شالها جا شسوي؟؟
شو فطومه بنت اخو نذيره
اذا ماتحبني عادي بس احترمي اخوج شنو ذنبها طفله تفرفح محد تشيلها

اني احجي وهو ساكت كملت خبز سفطته وهو لازمها يمي يناغيها ويسولف وياها
انتضرني بين مااشيل الخبز ونفوت سوه
اول مادخلنه هنه بالصاله كاعدات حسن صاح

حسن،، وينهن المگرمااات؟؟

زينب،، اخذ بنتي وراح يمهن

حسن،، نذيرره ادييج مكسرره لو بيج شللل؟؟

نذيره،، شكوو

حسن،، وشكه تنااام برااسج طفله تبجي يمج طرشه خو ماطررشه؟؟
بس كون صدگ طررشه ومگررمه ياابويه يرادلهاا بختت

نذيره،، روحي مالي خلگهاا انوب اشييل الزعاطيط؟؟

حسن،، شالوو جنازتج كوون وخلصنه منج
بوووز مهاانه

زينب،، سكتت مافتحت حلگها من طلع من يمهن يالله اسمعها تبسبس اكيد تحجي على حسن
هو هم مابحالها اخذ فطومه وصعد لفوگ

تركت الخبز ع الكاونتر وطلعت من المطبخ اريد اصعد صارن گبالي

نذيره،، گبر لفج اتعبين بااذنه حجي تخلي يثور علينه اني اعلمج بسيطه هاانت

زينب. ماحجيت لان محد الي
قبل جان لواء مايخليهن يحجن وياي
هسه اليشوف لواء يگول عنه اعمئ مايشوف تصرفات اخته
صرت متاكده لو يجي يشوفهن يكتلني هم مايحجي

مرات بليل يضل يحلف مامتقصد هيج يعاملني
وره ساعه ينگلب يشبعني كتل
صرنه يوميه عركه ويوميه انام مكتوله ودمعتي بعيني

مرات اخذ بنيتي واطلع شارده اگعد اباب غرفتي بالممر اخذلي ساعه لمن احس بي نام يالله افوت افرش البنتي بالكاع انام يمها بس بعيده عني شويه لان اتعب من الشغل انام ماادري بروحي من التعب اخاف انگلب عليها واكتلها تالي اموت وراها
مااتحمل بدونها
شكد اتعب واركض واشتغل بس من اشوف ضحكتها واشوفها تناغيني يروح التعب كله

رجعت غفران صفت ويه امها ومرت عمها
هنه يگعدن واني اكرب
لواء يشوف ويسكت مايحجي

ومن اشكيله يضربني يگلي كلج خلگ فصليه مخليج خدامه يمنه
ياخذله فتره يرجع يتوسل وهم يحلف صرت مااعرف الصدگ من الجذب

بنيتي صار عمرها خمس شهور وكم يوم بالسادس
ام سجاد من اجت جابتلها حجله وياها
حتى هي انتبهت لواء متغير وياي

جنت اسوي عشه صعدت الغرفتي لگيتها گاعده يم لواء

ام سجاد،، فوتي بنيتي وسدي الباب

زينب،، دخلت وسديت الباب وراي اتقدمت صرت يمهم

ام سجاد،، احجولي شكو شبيكم النهار كله تتمالخون

زينب،، سكتت دمعتي بعيني
صدمني لواء من گالها

لواء،، كرهتها النهار كله تتشكه هاي حجت وذيج گالت صرت اكره البيت بسببها

ام سجاد،، يااا سمو برحمانكم شجاكم

زينب،، ابد ماحجيت وهو شكو حجايه حجاها ل ام سجاد وكل كلمه تحفر بروحي مصدومه بي يوم عن يوم نضرتي بي تتغير واشوفه اختلف اختلاف جذري

اخته سكتت من شافته هيج يحجي
تالي عافنه وطلع

ام سجاد،، صدك جذب شبيكم يحضي؟؟

زينب،، ماكدرت اسكت اكثر حجيتلها كلشي حتى عن الدهن والاثر الموجود بالحايط
اني احجي وهي صافنه اخر شي كالت

ام سجاد،، استغفرالله يمه منو يسوي هاي الاعمال؛؟؟
ناس تصلي وتقره قران حرام تتهمين احد

زينب،، بجيت كتلها خاله والله مااتهم كومي اشوفج الاثر بالحايط موجود

كمت جدامها وكفت يم المكان اشرتلها بيدي
لان من زمان باقي اثر كلللش خفيف حتى مامبين
وصدمتني من كالت ماكو هيج حجي الناس وينها وين هاي السوالف؟
والموجودين امي واختي يعني انتي جاي تتهمين اهلي؟؟

كتلها خاله والله من يوم الشفتهن لليوم ماارتاحيت يوميه عركه ويوميه انضرب
تعبت والله لومابنتي جان سويت وحده من الاثنين لو انتحر لو اشرد

ام سجاد،، بنيتي كولي يالله والله يايمه صعبه اصدك لان ذوله اهلي
هسه اني اكلج اختج شفتها تسوي سحر تصدگين؟؟

زينب،، هزيت راسي بمعنى لا

ام سجاد،، جا هذا هو بنيتي انسي سالفه السحر
وحاولي تصلحين بينج وبين اخوي
وكلشي يصير انتن نسوان حلن السالفه بيناتجن لاتوصلنها للزلم حتى ماتصير عركه وهوسه

الزلمه راحته ابيته اذا انتي تتلگي هاي حجت وذيج گالت طبعا يشرد ويصير يدور مشاكل

زينب،، سكتت ماحجيت لان محد يصدگني
ردت احجي. الحسن اتراجعت ادري بي يثور ويتعارك وراح تصير عركه وهوسه وساعتها لواء يضربني وهنه يتناصبن وياي
لان صعبه حماي صاف وياي وزلمتي. ضدي

وره ماراحت ام سجاد رجعت البيتها
العصر جنت اكنس بالطارمه وفطومه حاطتها بالحجله مالتها دخلت شهر السادس الطارمه كلها كاشي ونصها صبابه
بصفها الحديقه صايره نزله من تريد تنزل للحديقه
يعني الكاشي مال الطارمه اعلئ من الحديقه

ملتهيه جاي اكنس وفاطمه توها تدفع برجليها لوره
تايها بزماني جسمي من الكتل تعبان وحيلي تعبان وفكري تعبان
مدنگه اكنس سمعت الهبده مال الوگعه التفتت وجان اشوف فطومه هي والحجله مالتها واگعه بالحديقه راسها لجوه ورجليها لفوگ فحطت بجي ركضت عدلتها

اباوعلها جوه عينها انشخطت جره دمها ولان طالعلها اربع سنون عاضه السانها وشفايفها وهم حلگها بي دم

حطيتها بحضني وكعدت ابجي وياها
صدگ جزعت روحي
رفعت راسي للسما
گتله رببببي اذاا جاان هذاا امتحان
ف امتحاانك صعب ياالله
وماعندي بعد حيل ولاطاقه حتى اكمل

احجي وابجي تعبت كلش
تالي استغفرت ربي شلت بنيتي وصعدت الغرفتي

غسلت وجها الجروح مو غميجه بس شخوط
عندي تنجرح باي مكان ولابعينها بمكان الوحمه
لان ساعتها شيوگف النزف؟؟

اغير ملابسها واحجي وياها بدموع تجري
انفتح الباب دخل لواء باوعلي

لواء،، شكوو كل مااصعد الكاج تنعيين؟؟

زينب،، هوو انت كدرتك بس على زينب
كاافي ارحمووني بشرر والله بشررر حالي حالكممم

اجه يمي لزمني من صدر ثوبي ضربني راجدي على وجهي ودفعني
كعدت بالكاع لميت روحي ابجي

رغم كل الضرب اليضربه الي بس ولامره اندعيت علي لان ادري يتيمه ودعوتي مستجابه واذا اندعيت علي وشكيته لله راح يتاذه

من هذا اليوم بطلت بعد لاشكيت الواحد ولاحجيت الشخص
دائما اشكي ال انيسي في وحشتي
اشكي لله وحده
ابجي واشكيله ضعفي وخوفي
اشكيله ضلم عباده
اشكيله تعب روحي
لان الله خير من يسمع الك
واكرم من يعطيك سؤلك
وهو من يجيب دعائك
وان ظلمك احد فهو حسبك
ختمت الدعاء بحسبي الله ونعم الوكيل

صرت من انزل اشوف حنان تحاول تمشي جدام لواء ملابسها لازگه وهي سمينه لاطشه عليها
اموووت اشتعل وانطفي اريد اكلها بسنوني
لان احبه احس بي غصب عنه هيج يتصرف وياي ف عاذرته ومرات لا من يضربني ويقسئ وياي مااحطله اي عذر

مرات اسمعها تشكي العمتي لان لواء ماله شغل بيها ومايفوت يمها
حتى وصلت بيها السالفه رادت تروح لهلها بس عمي كوه قنعها تبقى اسمعها تگله

حنان،، شكوو مخليني اهنااا
اخذ اطفالي واروح يم اهلي ولاهل ذله هاي
عليش جبرتوني وجبرتو يعقد عليه؟؟

زينب،، اسمعها وفاتحه حلگي ردت اروح اگلها منو الجانت كل يومين جايبه جهالها وجايه شبعتيهم دولمه خليتيهم وهمه يمشون يصيحون بااسمج بسبب سوالفج التعبانه
بس سكتت مااريد اتعارك وتالي اني الانبسط

ام لواء،، اصبري يايمه تدرين صعبه علي انطي فرصه فتره واول وتالي يصير البالج

زينب،، نار شبت بروحي

تركتهن وصعدت الغرفتي جريت بنيتي حطيتها بحضني اباوع بوجها عين وحده مفتحه والثانيه نسدت نهائيا لان الوحمه ثگيله انسد الجفن
تباوعلي وتضحك بستها بحلگها
ااوف ييبنيتي مبين ماعندج حض مثل امج
وراح تشبعج الدنيا تكفخ مثل ماشبعتني
مبين هلشي من اول يوم جبتج بي

ضليت اسولف وياها اريد انسه نار گلبي
شفتها نامت رجعتها لفراشها اخذت ملابس وطلعت
للحمام اسبح سويتلهم عشه سمج وطابگ (خبز تمن)
شويت السمج شوي ع الحطب وانترست هدومي ريحة دخان
لان خميس ليله جمعه يسوون ثواب لحسين وجود سمج

سبحت وكملت وگفت جدام المرايه اباوع الروحي عضم وجلد صايره
وجهي اصفر من الركض والتعب

والمصيبه باجر ورانه ركضه من الصبح لليل عمي عازم كم شيخ وناس بالدوله ع الغده واكيد نگعد من الفجر
لان هو العصر راح هو ولواء تسوگو مسواگ وجاب
ذبيحتين الفجر يذبحوهن وجاب علاگتين لحم مگطع نطبخه ويه الذبايح

كملت تمشيط لفيت شعراتي صايرات ينحسبن حساب لان انقهر يوگع احس روحي راح اصير گرعه وخاصتا من اسبح اباوع اشلون ينشلع خصل خصل متت قهر
جريت موبايلي وقته ب 6الصبح اكعد وياهن
نطبخ الغده

انفتح الباب دخل لواء صايره من اشوفه ماعندي اله لهفه مثل قبل لان مخلصها ايده والضرب

درت وجهي عنه رحت للكاروك غطيت بنتي
توجهت لفراشي رفعت الغطه واتمددت تعبانه الهط النهار كله محد راحمني
اجه نام يمي مد ايده حضني ماانطيت اي ردت فعل
مهضووومه منه كلش
كتله لواء اريد انام

لواء،، تعاي نامي بحضني

زينب، هيج مرتاحه اريد انام
ماحسيت غير جرني من ايدي قربنه منه

لواء،، من اگلج تعاي تعااي

زينب،،ضل يحلف ك العاده تعبان ومايدري بروحه سكتت ماحجيت تركته براحته

رجعت سبحت وردت انام كعدت فاطمه ومن تكعد تتاخر يالله تنام والساعه صارت ب1بليل
كعدت وياها رضعتها هي ترضع من صدري وممه امي كالت لاتعوديها بس على صدرج يجوز مره انتي ماموجوده عاد من تجوع ابوها يسويلها ممه

مانامت فاطمه غير لساعه 3 الفجر واني موقته ب6
يعني راح انام بس 3ساعات
ذبيت روحي ماادري تعبانه دگ المنبه فزيت النعسه بعيني گوه گمت
رحت توضيت ورجعت صليت ونزلت يمهن شفتهن يتريگن بالمطبخ

گاعدات قبلي
توني صبيت كوب جاي واخذتلي خبزه وقشطه خليتها بالماعون گعدت اتريگ
لگمه والثانيه توني اكل بيها نذيره گامت گالت ياالله فضنها هم يالله انحط الجدور ع النار
والگصاب بره ذبح الطليان
بس يروح نطلع نترس الجدور مال التمن ماي

احنه من المغرب غسلناهن ونضفناهن
طلعنه الطباخات الكبار حطيناهن بالطارمه وحطينه فوگاهن الجدور
مديت الصونده ترستهن ثلاثتهن

كبار كلش وعمي كال نصب التمن بصواني كبار يعني نص الذبيحه يحطوها فوگ الصينيه مال التمن

نذيره،، غفران يمه انتي وذيج العوبه نگعن التمن هم يالله

زينب،، تقصد عليه اني العوبه
ماحجيت اخذت المعاجن ذني مخليهن للتمن ينگعون بيهن
اخذتلي اثنين ترستهن تمن ورحت غسلته

وغفران هم ترست اثنين واجت يمي بالطارمه نغسل بالتمن اول معجانه جاي تغسل بيها امها كالتلها كومي
حضري البدنجان والطماطه حطي بالصواني خل نگشره بين مايفورن الجدور

التفتتلي كالت انتي كملي غسل التمن
ماگلت لا كملت غسل كل التمن وخليته على صفحه
رجعت يمهن للمطبخ لگيتهن يگشرن وحده لازمه البيدنجان والثانيه الطماطه والثالثه الفلفل الاخضر
ومخلياتلي قفص مال بصل

جبت جدر وسجينه وكعدت اكشر بصل عيوني ورمت لان البصل حار
هنه كملن قبلي واني وراهن ماخلصت اله روحي طالعه

سمعت صوت لواء من فوگ يصيح زينب
غسلت وصعدت اركض لگيته شايل فطومه تبجي لان اكثر شي متعلقه بيه مو باابوها

اخذتها منه سويتلها ممه لان من احطها على صدري تتاخر بالرضاعه وذني اذا اتاخرت الف كلمه يسمعني

ابوها نزل يمهم لان راح يبدون يطبخون اللحم
كملت رضاعتها لبستها واني ابوس بيها واشاقه وياها
يوميه اموت الف موته من اشوف عينها اشلون مسدوده
اغم روحي كل شويه وگول ريتني مااشتهيت الشوندر بذاك اليوم الاگشر

بسبب تنساتي دمرت عين بنتي
لو ولد يمكن ماانقهر علي بگدها بس هاي بنيه
والابنيه رقيقه مومثل الولد ياخذ حگه من حلگ السبع من اليتنمر علي
احس من هسه شايله همها اشلون بيها اذا تسجلت بالمدرسه؟؟
منو يرحمها؟؟
اكو اطفال من زغرهم يتعلمون الحقد والتنمر

اخذتها بيدي شايلتها والايد الثانيه شلت الحجله مالتها
نزلت يمهم خليتها بالحجله يم جهال حسين حاطتهم ام لواء وگاعده گلت بلكت من تشوفهم تسكت

ماحجيت ويه عمتي بس من شافت بنتي
گالت مره جبيره ذابات زعاطيطتج على گلبي
سكتت عفتها ورحت اشتغل لان اذا اطلعها يمي
الجدور مال التمن تفور ع الطباخات واخاف تروح يمهن وتنجوي
اتحمل كلشي ولاتنجوي بنيتي

رحت يمهن نذيره بيدها الجفجير الجبير
حطت ملح للماي
وكالت

نذيره،، يالله جيبن التمن كل جدر معجانتين ذبن بي

زينب،، شلت معجانه وحنان معجانه حطيناهن بالماي اليفور

رحنه جبنه جدرين كبار فارغات
وحطينه فوگاهن كل واحد مصفا نبزل بيهن التمن من يستوي

من شافت نذيره التمن استوه صاحت ابزلن بسرعه لايعجن التمن

بسرعه بسرعه بزلنه بالكدور اني وحنام وغفران كل وحده معجانه نغرف ونحط بالمصفا لمن كمل وهدرنه

بعدها طبخنه الجدر الثانيه

واخر شي الجدر الثالث صارت الساعه ب10احنه طابخين اثنين جدور تمن والثالث
بعده نذيره لازم جفجيرها اواكفه يمه
من تشوفه استوه تكول ابزلن

اللحم استوه وتركنا على صفحه على نار هادئة
والمرگ بعده بس مجهزينه نكبسه بالجدر

صاحت نذيره بسررعه ابزلن
اني اخذت معجانتي وياي حنان هم تبزل
من كملنه وهدرنه الجدر

ضلن الجدور البزلنه بيهن مليانات ماي حار الفوح مال التمن بعده حار

نذيره،، زينب انتي وحنان اخذن معاجن اغرفن بيهن الفوح وشمرنه بالمجره

زينب،، اخذت معجانتي وحنان وياي نشيل
فوح بالمعاجن ونذب بالمجرئ
ضل نص الجدر متروس يسمط من الحراره

نذيره،، كافي تتنعوصن كتلتني
عوفن المعاجن وشيلن الجدر اثنينجن
اتگابلن علي بدنه بالمجرئ

وانتي روحي جيبيلي ماي عطشت

زينب،، رحت جبت ماي واجيت شفت حنان يم الجدر بيدها بطل الزاهي

تركته بالگاع وراحت وگفت بالجها الثانيه دنگت لزمت طرف الجدر

نذيره،، وانتي روحي وياها شيلي من الطرف الثاني

زينب،، رحت حطيت ايدي الكدر بي اقل النص مو ثگيل
ماحسيت بشي ابد
اول ماشلت الجدر وهي وياي من الجها الثانيه

فلت الجدر من ايدي من جهتي الازمتها اني
ماحسيت غير حنان دفعته بقوه الصوبي
هو والفوح الحار

يتتبع

مساءالورد بنات
ذني البارتين دااسرع بالاحداث
بارت غصون يتاخر لان دااكتب بي وربي ايدي فد مره ماذيتني اكتب وارتاح وارجع اكتب
حتى القصه راح تنظلم لان اسردها بسرعه
اذا تاخر بارت غصون باجر انشره لان بي اهواي احداث

دمتم بخير 🌹🌹
كلش احبكم 🌹🌹