رواية ضحية لمن لايرحم الفصل الحادي وأربعون 41 - بقلم زهراء الحسناوي

البارت 30

ضحيه لمن لايرحم

بقلم زهراء الحسناوي

،،،،،،،،،،،،،،،،،،،،،،،،،
اثاري انت
سفر دنيا.. وحلم مبيوگ
مر صدفه وخلص وكته 💔

،،،،،،،،

زينب،، احس روحي فقدت امي تريد تلزمني دفعتها وكمت اريد اطلع حافيه بطرك ثوبي بس امي لازمتني وبس اسمه بلساني من شوغه گلبي ماكو بلساني غير اسمه تحاجيني امي واخواتي واني اگلهم لواااااء ولكم لوااااااء

ركضت مريم جابتلي عبايه حطتها على راسي
امي لازمتني ومريم دنگت لبستني نعالي تكرمون

طلعت باب الحوش ارجف امي لازمتني بيد والايد الثاني تلبس عبايتها

وصلنه باب الحوش اتلگاني عمي طلع يركض من بيتهم من شافنه اجه بااتجاهنه لزمت ايده وانحنيت حيلي مهدود مااكدر اعدل ضهري رفعت ايدي ااشرله على بيت الشيخ كتله بصوت متقطع بنفس مخنوگ

ع عمي ل لوااااء

ابو مثنئ،، گولي ياالله بويه
اررركض ولك جيييبلي السوويج

زينب،، التتفت ل ابنه زمخ بي راح الطفل يركض جاب السويج واجه عمي ماقبل اروح مشي كال اصعدي واني رايح وياج وانشاءالله ماكو شي

امي خطيه ماراحت بقت واكفه صعدتني وتردد الله يلتفتله الله يلتفتله

درب مسافته دقيقتين احس صار شطولهَ
وصلت ومن بعيد اشوف هوسه نسوان جاي تفوت للبيت والزلم كل واحد صعد سيارته وشخطها

نزلت وعمي ضل بره وكف يم واحد يساله
دخلت وجان اشوف نذيره كاعده بالكاع تلطم وتصيح بعلوو صوتها يبااااااو

صوتها اخترق گلبي مو بس اذني
حيلي انتهئ واحس فصلت عنهم عيوني تشوف واسمع بس مااكدر اسوي شي

اباوعلها مستمره بصياحها مالگيت روحي غير دفعتها صحت صوت كلها سكتت

ووولج كااافي اسكككتي لاتصيييحييييين
ماميتتت مايعوفنني مايمووووت
نذيره دفعتني لزمني النسوان

التفتت للمره اليمها گتلها خاااله سكتنهاااا لاتخلنها تفاول علي مايمووت لواء مايعوفنيييي سكتنهااا لاتخلنهااا تصيييح

النسوان عافن نذيره واجن لزمني صرت اضرب على وجهي بثنين اديه وكع حجابي معشت راسي فاقده
مااتخيل دنيه مابيها لواء مااتخيل حياتي وهو ماموجود
عمري ماحسيت بالاحتواء غير من عنده مو بس زوج لاهو صارلي اب وام وزوج بنفس الوقت

كل وحده تحجي شكل ولسه مايعرفون ميت لو عدل كل اليعرفو مداهمين بيت ومايدون بي ملغم ومن داخلين مفجور بيهم
اسمع وحده تكول اذا بيت ومفجور بيهم منو راح يطلع عايش؟؟

والثانيه اتكلها اذا لگوله اثر ابن اخوي انفجرت عليهم عبوه ماجابو غير اصبعه

سديت اذاناتي حيل مااريد اسمع صوت احس الاصوات تزرف اذني اريدهم كلهم يسكتون
صحت بيهن اسككتتتن گتلجن ماايمووت

صار الليل وماكو خبر والبيت والمنطقه صفت بس نسوان الزلم كلها راحت لحگت لواء

كل شويه ورفعت راسي بس عيوني يسولفن ويه خالقهن ربي دخيلك لاتفجعني بي
وصلت مرحله كتله ربي فدوتك البطني بس كون ابو كلشي مابي

كلهن فاتن للبيت بس اني ضليت بره بالطارمه مااريد افوت كاعده بالكاع دمعتي شاطت ماتنزل
وريجي يابس
صارت گدامي الشجره مال النبگ
نهضت من مكاني اسحل بروحي سحل رحت كعدت جوها لزمت خرص منها وهزيتها

كتلها ياسدره المنتههههههئ بجاهج عند ربج
اكيد الج منزله عضيمه لان ذكرج بالقران
بجاه منزلتج عنده كون لواء عايش حتى لو ادي ورجلي مگطمات حتى لوبس عيونه يتحركن قاابله واعيش كل عمري اوفي نذور في سبيل الله بس يردلي وكون مايمووت

اهواي ضليت ابجي واحجي ويه الشجره للساعه 12بليل سمعت صوت ام سجاد تصيح
التفتت شفتها فاتت للبيت رافعه اديها وتضرب على وجها رفل وراها تبجي رفعت ايدي ااشرلها ااني اهنااا
شافتني اجت شايطه كعدت على اركبها بالكاع
كتلها واني اشهگ بس ماكو دموع
خااله لوااااء

ام سجاد،، صخاام بوجه خالتج الله ياخذ خالتج ولاايصير بااخوهاا شي يمممه ولك خووويه يبووو طوول الحلوو يالهيبببه
ولك بعددنه گلوبنه ماطابت من موت حسين
انوووب تلحگه انتتتت؟؟؟

رفل،، يمه كافي ماتشوفيهاا راح تموت

زينب،، سندتني رفل وام سجاد خطيه رغم انهيارها ودموعها التعبر بيهن عن قهرها عكسي تماما دموعي ماينزلن ابد احس عيوني يابسات
لزمتني ويه رفل فتنه للبيت
فتت كلها كاعده تبجي ام لواء تندعي وتنذر ذبيحه لوجه الله بس كون يطلع ماميت دگ تليفون ام لواء جاوبت غفران ضحكت باست ايدها وحطتها على راسها
كالت خاالي توه طالع من العمليااات ماميت عددل عددل

شوصف شحجي وشگول؟؟
كل الوصف مايشرح فرحتي
مدري اسجد لله سجده شكر مدري ابوس ايدي واحطها على گصتي من فرحتي حرت شسوي

بيومها محد نام وحتى جارات ام لواء ماعافنه مگابلاتنه وگاعدات

اتمنئ روحي طير عندي اجناح واطير للمكان البي لواء اروح اشوفه ويرتاح گلبي
من احس بي جاي يتالم انقهر ومن اذكر هو عايش اضحك صرت بين الوعي والاوعي مثل المخبله

ثاني يوم يالله عرفنه شنو المتاذي بجسمه
شضيه من الشضايا مخترقه فخذ رجله مسببه كسر عضم الفخذ وشضيه بخاصرته مسببتله نزف بس كدرو يوقفون النزف ويستخرجوها بس الشضيه البرجله مهشمه العظم لذلك حاطيله بلاتين
واهواي جروح براسه وبوجها وبرجلي وايده

بكلبي اكول كللشي يرجع بس كون يتعده مرحله الخطر ويردلي سالم كلشي مااريد من الدنيا

اسبوع لواء داخل بالمستشفى وحسن وذياب داخلين وياه بس عمي رجع لان الوادم رايحه راده اوكف من الصبح لليل اسوي جاي اني ورفل بس احس روحي قويه فرحانه هو عايش

ام سجاد هي ورفل يمنه مارجعت البيتها ورجلها وابنها لازمين نوبه ويه حسن وذياب ناس تنام وناس تسهر ويه لواء

احسب يوم يوم وساعه ساعه ودقيقة دقيقه لرجعته
ثامن يوم كالو باجر يطلع لان جان داخل مستشفى خاص وضعه تحسن بس راح يبقى بعربانه 6شهور لان بس يوگف على حيله قبل نهايه ال6اشهر راح يصير انحراف بالرجل

بيومها ابو لواء اشتره اثنين عجول وجاب طباخات كبار واتفق ويه رجال من الفجر يجي يذبح العجول ويطبخ الغده لان عازم الوادم مسوي ثواب لوجه الله على سلامه لواء

شگد اشتغلت بس مااهتميت ونسيت حتى الطفل الابطني لان فرحانه راح اشوفه باجر

اتمنيت اغمض افتح الكه باجر جاي ولواء جدامي اكحل عيوني بشوفته

اجه الليل وخلص واني عيوني مامغمضتهن اريد النهار يجي ويحيبو
اتذكرت بيوم التحاقه من تسوگ لهلي بيومها شگد فرحن اخواتي
بگلبي گلت سبحانك يارب صدگ الصدقه تدفع البلاء
اخواتي يتيمات ولواء فرحهن حتى لو هو مايعتبرها صدقه بس الله سجلها اله رغم صدقته بسيطه بس دفعت عنه بلاء عظيم

الطباخ من الصبح ذبح ونصب الجدور يطبخ
بالحديقه وصايره هوسه مال زلم
اني ابد ماطلعت كل شويه ام سجاد تكعدني تريدني ارتاح بس من فرحتي مااكدر اكعد اريد اشتغل حتى يخلص الوكت بسرعه ويجي هلالي

للساعه 11الصبح سمعت هورنات مال السيارات كلهن محضرات جكليت كل وحده لازمه علاكه بيدها
انفتح باب الحوش الرئيسي ودخلت اول سياره
دموعي نزلن لاول مره بعد الحادث
النسوان كلها وكفت جدامي يردن يشوفن لان منعونه نطلع لذلك نحصرنه اباب المطبخ لان زلم غربه واكفه بره

حسن فتح باب اول سياره ونزل يركض اجه علينه
النسوان تلگنه صاح

حسن،، انطني اسلااح ابوووي

زينب،، ركضت غفران جابتله رشاشه اخذها منها واكف يمي سحب اقسام ختلت وره ام سجاد وكف اباب المطبخ ورمه بالجو

فرررحه مايتسعها صدري
اتقربت السياره والباقيات وكفن اباب المضيف

نزل ذياب وحسن وابو سجاد
حسن فتح الجنطه مال السياره نزل عربانه دفع

حطها بالكاع فتحو الباب وعيوني تترقب اريد اشوفه اريد اركض اشمر روحي بحضنه اريد اشم عطره المشتاقتله بكد رحمه الله

فتحوله الباب وقربو العربانه انحنه ذياب وحسن حتئ يطلعو اشوف بس ادي نحطت على متونهم
نزل وشفت وجه هلال عيدي

اختنگت ماتوقعت هيج اشوفه راسه ملفوفه وجروح تارسه وجها وايده مصبوبه عباره عن شاش ولفاف من فوگ لجوه
كعدو بالعربانه والجكليت صار بفلس كلهن صارن كدامي وماعدت اشوفه
ام سجاد حطت بيدي علاكتها ودفعتني الصوبه حتى يشوفني وكفت جدامه مديت ايدي للعلاكه طلعت صم جكليت نثرته على راسه ابجي واضحك باوعلي مبتسم بتعب

امه تتعكز اتلكته بوسته والنسوان داير مدايره يتحمدله ع السلامه زمخ بيهن حسن

حسن،، وخرررن وكت تحبحب زلمه مسكررب
روحه خلصانه وانتن واكفات تمطگن

ذياب،، الله يطيح حضك حسن

زينب،، كلهن استقبلن الزمخه بروح رياضيه يضحكن
احنه قبل مايطلع بيوم الشيخ منهل گال نفرش الواء بالغرفه الجوه بصف غرفة امه نرتبها اله حتى ينام بيها لان فوك مايكدر يصعد وبالمضيف مانكدر انخلي لان نريده يرتاح لان الخطار رايح جاي

دخله ذياب يدفع بي للغرفه احنه كلنه نمشي وراه
دخلو للغرفه هم حسن وذياب انحنو انسند عليهم نهض روحه من العربانه كعد ع السرير

دخلن اخواته وامه يسلمن ويتحمدالله ع السلامه
ذياب شال رجلين لواء حطهن ع السرير وحط مخاد وره ضهره كاله اتمدد لاتضل كاعد

اني واكفه بالباب دموعي يجرن حسن كالهن رحم الله والدي من زار وخفف يالله اطلعن هذا زلمه مصوب مو مره جايبه ومگابلاتها

لواء حط ايده على عمليته مبتسم وذياب خربان ضحك مدنگ كلهن طلعن واني من ضمنهن لان ردت يرتاح رحت للمطبخ اجت ام سجاد

ام سجاد،، گرت عينج زنوبه الحمدالله على سلامتة رجلج

زينب،، الضحكه شاكه حلگي كتلها الله يسلمج خاله

ام سجاد،، سلمتي علي؟؟

زينب،، دنكت هزيت راسي بمعنى لا

ام سجاد،، يااا ليش ولج؟؟
اكو وحده زلمتها طالع من الموت ماتمشي تسلم اعلي؟؟

زينب،، خاله فشله كلهن واكفات وهم محد انطتني مجال

نحجي اجه حسن

حسن،، زينب رجلج خبصنه عليج اليسمعه يكول مفطوم

زينب،، حسن يرمي رمي ولايستحي ام سجاد تضحك واني تعالو دوروني استحيت
رحت اريد اعثر بالمشي

فتحت الباب ودخلت رفع راسه ذياب يمه علاجات ينطيهن اله ويفهمه اوقاتهن

كمل كاله موتنسه كلهن مكتوب عليهن وحسن يمك يعرفلهن واني هم بليل ابات يمك

ذياب،، فوتي يابه طالع اني

زينب،، ابتسم ايده المصوبه حاطها على صدره والثانيه مادها عدلها واشرلي بااصابيعه تعاي

ابوسك وين؟؟
لو مره اني اشوفك
گلي ابوسك وين؟؟
ع الخدين؟؟
مااضن تطفه ناري ابوسه الخدين
ابوس العين؟؟
صدگ انتهي لو صرنه عين بعين
واشمك وين؟؟
شعرك لو رگبتك لو من الچفين؟
لومن الشفايف لو من الرمشين؟؟
لايازين صدگني المفارگ مواطباع الزين

يتتبع

اكثركم طلب بارت حتى يطمن على لواء
وماكدرت اتركم رغم وضعي
انشاءالله التعويض بالبارتات القادمه