رواية ضحية لمن لايرحم الفصل الأربعون 40 - بقلم زهراء الحسناوي

البارت 29

ضحيه لمن لايرحم

بقلم زهراء الحسناوي

،،،،،،،،،،

ردناكم ومامش فرص
حتى الحلم يمكم خلص
شلت ايدي بس دگ الجرس
اني ودمعتي نريدكم 💔

،،،،،،،،،،،،،،،،،،،

غصون،، نور فزت شمرت الموبايل على عذراء بس عذراء ولاكان اني اجيت
مدت ايدها حطت الموبايل ع المييز

عذراء،، تره مصطفى ابني جان يلعب واخذناه منه عبالنه متصل على احد

غصون،، ماحجيت وكل ضني صدك
اتقدمت عليهن اخذت الجهاز ورجعت للغرفه سديت الباب فتحته كلشي مابي

تالي تركته ع الميز ومشطت طلعت الساحبه مال الشعر شكلتها ع الكهرباء وگعدت اسحب بشعري

تاخرت بالغرفه لان طويل وبي كسره شلع گلبي

بعدها بدلت اتراك تركوازي رتبت شعري رفعت اطرافه خليت مكياج بس شويه خليته يبين مومثل كل مره خفيف

باوعت على روحي توب خل ست نور تنقهر عبالها بس هي تعرف ترتب روحها

فتحت الباب وطلعت شافتني حطت ايدها على حلگها تضحك وتشاور بعذراء
بسرعه شكيت بروحي خاف بيه شي وذني يتمضحكن

رحت العمتي سالتها گالت جنج العافيه كلشي مابيج

عرفتهن ناصبات عليه حتئ اضوج
عمتي صاحتلي الغرفتها لحگتها

لزمتني من ايدي وسدت الباب

ام ذياب،، اريدج تسودنيها لاتخليها تقهرج لوتضوجج تره طالعه تخبلين سولفي واضحكي ولاتهتمين بيها خلها تموت بقهرها وين الله واهل البيت يكفونه شرها

غصون،، عمتي ضلت توصي تالي عافتني وطلعت لحگتها لگيتهن كاعدات يگلبن بموبايل نور يسولفن بصوت ناصي
من دخلنه اني وعمتي سكتن

عذراء،، اگلج يمه شو ذياب فد مره مدري شبي

ام ذياب،، اسم الله شبي ولج؟؟

عذراء،، لايمه مو بي شي اسم الله علئ اسمه
بس شو من يوم الخطب نور لاطلعو سوه لاعزمها لا شي كلشي ماكو غير هاي فتره الخطوبه احلى فتره وهم واحد يفهم الثاني

ام ذياب،، لتخافين عليهم كلشي يفتهمون بس مالج شغل بيهم انتي واخوج دربه ماشايفه يجي من الدوام يذب روحه وينام من التعب

جا هذا الزلمه شعرفتن عنه؟؟
النهار كله يفرفر؟؟

غصون،، درت وجهي گوه كاتمه ضحكتي ام ذياب كبستهن اثنينهن بعد ماحجن حتئ انتبهت العمتي تسمع نور حجي بس هي ثاولتها
مره گالتلها اتخبل من المره التاخذ الزلمه من بيته ومرته عايفه الزلم كلها وتركض وره المعرس عبن محد يگلب سلعتها

نور تسمع وتغلس وعذراء تطلع صفح بسالفه ثانيه حتئ عمتي تسكت

شويه ودخل استاذ غضاب نور طفرت تسلم علي شو هاي طگي بحبه گدامي ردت افترسها وامعش عفشتها بس درت وجهي عنهم صار ماينسمع غير صوت الطاب والطيب مال المواعين من حرگه گلبي اتمنئ انيم الجدر براسه وبراسها

تركنه وصعد يبدل
نور طلبت من عذراء تاخذها للحمام
نهضن اثنينهن راحن شويه ورجعت نويره ضاربه تخم معدله خلقتها من اجت حاطه خفيف بس من شافت ذياب مدري غارت مني ركضت لبخت وجها من جديد

اباوع الروحي لابسه زي هندي التيشيرت مالته واصل للركبه مال رجلي وهاي لابسه قميص ابيض اذا تگح تطلع صرتها
والبنطرون حصر مبينه من وراه فضايح عباد الله

من طلعت عمتي اسمعها تحجي ويه عذراء

نور،، اوووي منو يلبس زي هندي موديله مال معدان

عذراء،، هههههه هم صدگ هم زين مااشتريت منه

غصون،، اسمع وساكته ماجاوبت دخل ذياب لابس اتراك نيلي والعطر يهف باوعتله ودرت وجهي عنه
اسمع نور تسولف وياه وتتنغوص وهو هم منطلق وياها سوالف وضحك كالتله حبي ليش مانطلع اني وياك؟؟
بگلبي كلت طلعت روحج يالصفيره والله ماتنلام عمتي من سمتج بهذا الاسم

جاوبها

ذياب،، مشغول ماعندي مجال

غصون،، اجت عمتي بيدها موبايلها گالت

ام ذياب،، يمه خابرت اختك سويره تريد تجي ورجلها طالع روح جيبها بدل ماجاعده وحيدها

غصون،، اخذ السويج وطلع

بقيت اني واكفه اساعد عمتي هنه كاعدات ماتحركن
درت وجهي عذراء مطلعه صور بجهاز امها وتگلب بيهن

نور،، منو ذوله الصاكين؟؟

عذراء،، ذوله اولاد عمي

هذا لواء الجبير ماخذ الفصليه الثانيه

نور،، ييمه ولج هذا الهيبه ماخذ فصلليه؟؟

عذراء،، انضلم مثل اخوي الله يساعدهم

غصون،، اسمعهن وصامه حلگي هنه اكبر مني بنضرهن اني طفله
وهم اخاف احجي لو اجادلهن ف اسمع واسكت

نور،، وهذوله منو؟؟

عذراء،، هذا حسين الانقتل
وهذا حسن

نور،، عزااا شياكلون وهيج حلوين؟؟
اكول حبيبي ذياب عليمن طالع؟؟
طلعت العائله كلهم حلوين

غصون،، بگلبي گتلها لابوج لابو عشيرت حبيبج وياج
صارلها ساعه تتغزل بالحلوين وهسه تكول حبيبي

شويه واجه حبيبيها المغندب يمكن مايضحك بس بالمناسبات مخلصها عاقج الوجه ويتنافخ تكول تنين

اجت ساره سلمت عليها واني مبتسمه دخل هو وراها صارت عيني بعينه درت وجهي
كعدت ساره احسها جيتها نعمه لان احرگ گلبه اضل اضحك مامهتمه الوجوده

كعدنه كلنه بالصاله وهو عينه بموبايله

ساره،، باجر العقد مال حماتي وعمتي گالت اعزمي امج ومرت اخوج

نور،، اني مااجي عندي دوام

ساره،، قصدها غصون

غصون،، ياگاع انشگي وطميني
نور غدت حمره من الفشله

اني تعالو سكتوني ساره تحجي وياي حجي عادي واني بس اكركر ضحك
نور انطعنت وجها صار احمر

ذياب،، بس امي تروح

ام ذياب،، ياا ليش يمه ماتخلي مريتك تمشي تتونس محبوسه من دشت هذا الحوش لسه لايوم طلعناها ولايوم اخذنها زياره
خلها تمشي وياي

غصون،، سكت ماحجه وساره تلعب بحواجبها لان عرفت اخوها من يسكت معناها بي مجال يقتنع

بعدها صبينه الغده وكعدنه نتغده نور تتحرش بي گوه تريده يضحك وياها
وهو ساعه يبتسم ساعه يغلس عنها

كملنه غده وساره كالت راح اسوي جاي
عفتهم ورحت الغرفتي لحگتني ساره

ساره،، غصون اني شويه واروح البيتي اتصل رجلي من اوصل راح احضرلج فستان يخبل متاكده يجي على قياسج فيت
اريدج كون يتعجبن بيج نسوان حمويني
گتلهن مرة ذياك صاكه وزغيره صار نفهسن يشوفنج

غصون،، وفعلا شويه واجه رجلها اخذها قبل ماتطلع مااعرف شنو شاورت ذياب وطلعت

صار العصر وذني بعدهن احسهن گاعدات على گلبي
ذياب صعد الغرفته ساعه ياالله نزل مبين سابح ولابس الدشداشه البيضه كاشخ بيها والشعر مرتب واللحيه محدده العطر سبقه

نور عيونها كصته كص

ذياب،، حجيه اني طالع محتاجه شي؟؟

ام ذياب،، سلامتك وليدي

نور،، حبيبي اخذنه وياك للبيت

غصون،، من تكول حبيبي اريد اعضها
تالي عفتهم ودخلت للغرفه هي بسرعه طفرت لبست عباتها وطلعت وراه لحگتها

بليل كاعدين اني وعمتي بغرفتها
سالتها عن اولاد الشيخ لان سمعت عذراء تحجي بيهم گتلها عمه اريد اشوف رجل زينب لان سمعت ام مصطفى اليوم تحجي ويه نور تگلها هذا رجل الفصليه الثانيه

عمتي فتحت موبايلها طلعتلي صور لذياب واكف ويه ولد عمه
اشرت على واحد منهم

ام ذياب،، هذا رجل بت عمج

غصون،، بيوم العقدلنه السيد من الخوف ماشفت شي

ام ذياب،، الله يساعدج ويساعدها انه من شفتجن خايفات وتترجفن انكسر گلبي عليجن

غصون،، سويتها بضحك كتلها اكول عليمن ذياب طالع

ام ذياب،، اي الله يرحم ابو ذياب جان هيبه وشخصيه وحلو بس مو احلى من ابو لواء
ابو لواء جان بشبابه احلى شاب بعشيرتنه

سمعت منهم قبل جانو يخطبوله بس يرفض مايقبل يتزوج كبر عمره وهو مامعرس
تالي عمتي راحت خطبتله مره من وادمهم اليعرفوها الي هي ام لواء

تحلف امي اتگول بيوم العرس من شفنه مرت منهل انصدمنه جانت قبل حيل ضعيفه عكس هسه سمينه وجها سمين
اتگول قبل من الضعف تخوف وهي عدها سنون عاليه طالعه لگدام

اتكول كل النسوان لامن ام منهل على اختيارها المرة ابنها لان ضلمته بهذا الاختيار وهو حلو كل بنات السلف يحلمن يرتبطن بي
عندي صور اله هو وابو ذياب ضامتهن قديمات

غصون،، كامت عمتي فتحت كنتورها طلعت علبه جابتها واجت صارت ادور بالصور طلعت اهواي بس كلهن قديمات
حطت وحده كدامي بيها اثنين شباب لابسين بناطير كلاسك من جوه والصوره حيييل قديمه
بس مبينه ملامحهم واحد احلى من الثاني
اشرت على ابو لواء گالت هذا الشيخ منهل

رجعت كملت كلامها

ام ذياب،، بيوم الزفه اخت عمتي اجت تحضر عرس اين اختها منهل وهي ماشايفه العروس وقبل جانت العروس تتغشه من تگعد
تكول امي كامت اختها رفعت الغشوه من شافت (بسهن) اسم ام لواء
جدام النسوان صاحت فلك فلكج ولج منين جبتي هاي العروس جنها شلج فاطس (سمجه ميته)
ضالمه ابنج بيها وهو جنه فلعه گمر

والله من عرست وفتت البيت عيالي دوم مشاكل هي ورجلها ودائما يبسطها جان اذا اجه كلنه نسكت ماينسمع صوت بالبيت
شو الرجال بعد فتره اتمرض ومنها وصار اخرس ماله شغل وحتي هي بعد ماتخاف منه مدري شسوتله الله اعلم
بس ويلاده طلعو حلوين علي بس نذيره تشبه امها بالشكل والتصرفات سبحان الله نسخه ثانيه من امها

غصون،، جاي نحجي
سمعت صوت سيارته انفتح الباب ودخل بيده علاكه

اجه يمنه وكف بالباب حط العلاكه بالكاع

ذياب،، يمه ذني غراض دزتهن ساره

غصون،، عافنه وصعد الغرفته طفرت سديت الباب وجريت العلاكه فتحتها طلعت منها فستان من شكله فتحت حلگي يخبل الفستان من فوگ حصر ومن جوه منفوش قصير للركبه ودازتلي وياه حذاء كعب عالي

صدگ عجبني

ام ذياب،، حلوات باجر رتبي روحج الحفله بس نسوان ناخذ راحتنه

غصون،، الساعه تقريبا ب 10ونص
اخذت الملابس ورحت الغرفتي
طلعته ولبسته جاي فيت على جسمي
طرت من الفرح لان بعد فتره طويله راح اطلع واشوف بشر حتى بسجن زاويرا هم ماكو هيج حبسه

جريت الموبايل فتحت الفيس دزيت رساله لساره
بالبدايه دزيتلها لايك بسرعه دزتلي

ساره،، عجبج الفستان؟؟

غصون،، يجننن بس فضيحه

ساره،، الكل هيج تلبس بمناسباتنه لان بس بنات والحفله بالبيت مال عيالي والزلم راح يجون البيتي
حتئ ناخذ راحتنه

غصون،، خاف اخوج المعقد مايقبل

ساره،، اسكتي غصون استري على ريشاتج

غصون،، مافهمت شنو قصدها
نهت المحادثه واني ضليت اباوع الروحي
واتمايز الفستان
ماحسيت غير انفتح الباب ودخل ذياب
جمدت بمكاني لان اني واكفه ابدايه الغرفه يم الباب
رجليه لزگن بالكاع اريد اركض استر روحي مااكدر تيهت دربي

سد الباب وعينه عليه وكل مايتقدم خطوه معدتي تنمغص اكثر
وكف مقابليلي مايفصلنه شي

ذياب،، باجر هيج تردين ترحين؟؟

غصون،، هاا؟؟

ذياب،، بهذا لبسج؟؟

غصون،، يحجي وياشر على صدري بعيونه

من الارتباك والخجل ردت اوگع لان گلبي فضحني دگاته صرت اسمعهن من الخوف

رفع ايده حطها على رگبتي جوه اذني غمضت
حسيت انفاسه قريبه من وجهي غمضت بقوه
احس انفاسه مضطربه
اتقرب باسني جسمي كله يرجف همس

ذياب،، ليش اضعف يمج؟؟

غصون،، ماعادت رجليه تحملني ردت اوگع لزم ضهري قربني الصدره من حسيت بده يتعمق ابوسته دفعته سحبني اله بقوه

ذياب،، ولج مرره وحدده حسسيني بيها رايدتني

غصون،، دنگت نزلت دموعي رفع راسي عاصر حنكي لازمه بقوه احسه نكسر بيده

ذياب،، جااوبي
ولج دائمااا احلف ماارجع ولاانزل كراامتي الج اكثر
ويجيبني گلبي الج ردود ناااسي كل رفضج وصدج
طفللله طفلللله ودوهنتيني
كل مره ارجعلج نااسي كلللشي بسبب سوالفج وهذااا رفضج ورطتت روحي اورطتتت بنت العاالم وياااي

غصون،، مااعرف ليش من يبوسني روحي تنفر منه وتلعب نفسي تلزمني دوخه واريد بس انهزم منه
مااعرف شنو يريد مني بالضبط
دفعني فتح الباب وطلع

كعدت بالكاع جسمي يرجف حتى اختنگت من الفستان نزعته ولبست دشداشتي ضليت اتگلب بمكاني وعيوني يجرن مابطلن دموع احس روحي احبه بس ليش من يتقرب مني هيج تكون ردت فعلي؟؟

ثاني صبحت مالي خلگ ولا الي نفس اروح
وحتى ماطلعت من سمعت صوته بالبيت

اجتني رساله من ساره كاتبه الساعه ب1الضهر تعاي انتي وامي

دزيتلها ماادري يمكن مااجي

ساره،، ليش مو گلت للبنات حتجي مرت ذياب
تعاي تونسي

غصون،، ماادري منا للضهر الله كريم اذا صرت زينه اجي

نهيت المحادثه وياها نهضت لميت فراشي وطلعت الساعه تقريبا 11ونص الضهر

لگيت عمتي بالمطبخ وهو يمها گاعد جگارته بيده

ام ذياب،، بنيتي شبيج اليوم؟؟

غصون،، جاوبتها بصوت دوب تسمعه مابيه شي

ام ذياب،، جا يالله حضري روحج هم ياالله تسبحين وتبدلين

ذياب،، ماتروح

ام ذياب،، ياااا امس من كالتلك اختك ماحجيت جا شكو اليوم

غصون،، عرفته هيج يسوي ع الصار بيناتنه البارحه
كتلها عمه اعتذريلي من ساره وكليلها مريضه

ذياب،، شايفتلج معقد يخلي مرته تطلع؟؟

غصون،، ماطخت براسي حجايتي على شنو ابد
عافنه وصعد الغرفته

وفعلا عمتي بالوحده هو اخذها وداها واني مارحت
خلصت اليوم كله راسي يريد ينفجر من التفكير
شنو اليريده ذياب مني؟؟

اهواي افكار مااعرف شنو جوابها وفهمها بعيد عن تفكيري كل البعد
والله من يبوسني اخذلي فتره كل شويه اباوع على بطني اكول شوكت تكبر كل ضني حامل

خو اول مره باسني بيها متت خوف
اذكر مانمت من خوفي ضليت يوميه اباوع البطني انتضرها تكبر لان شايفه بالافلام البطل من يبوس البطله باللقطه الثانيه طفل بيدهم
كل تفكيري انو الطفل يصير من البوسه

قررت احجي الساره اريد افهم صح استحي بس ع الاقل اعرف تفسير التصرفاته وياي

وفعلا ثاني يوم اتصلت بساره كتلها عندي شغله وياج تكدرين تجين؟؟
كالت شويه واجي

ضليت كاعده على نار انتضرها شوكت تجي
الساعه ب 2الضهر اجت فتحت الباب عليه فرحت بجيتها بس بنفس الوقت ترددت خجلانه مااعرف من وين ابدي

ساره،، احجي شبيج خوفتيني

غصون،، ضليت مدنگه افرك ايد ب ايد طار الحجي استحي منها
تالي ضلت تلح تريد تعرف شكو كتلها

راح احجيلج شي
اني مرتين ثلث مرات باسني ذياب بس ماحبلت ليش؟؟

اباوعلها ضلت صافنه بوجهي

ساره،، شنو؟؟

غصون،، احس الحجي صار يصعب اكثر واكثر
كتلها ذ ذياب باسني شو ماحبلت؟؟

ساره،، بس باسج؟؟

غصون،، هزيت راسي بمعنى اي
شو هاي لطمت على وجها

ساره،، صخااام. الصخمج ولج لسسه انتي وذياب ماصاير بينكم شييي؟؟

غصون،، مافهمت ليش هيج ردت فعلها
كتلها لاصار

ساره،، شصار؟؟

غصون،، باسني وحضني
صرت كوه اجر بالحجايه

ساره،، غصون انتي تحجين صدك لو تتشاقين؟؟

غصون،، وداعة ابوي هيج سوه بس

ساره،، بس شنو؟؟

غصون،، مااعرف شيريد مني ومن اشوفه هيج يسوي مالكه روحي غير اصده وانهزم خايفه

ساره،، غصون راح اسالج وانتي جاوبي لان حلگي يبس راح انجلط
انتي شتعرفين عن الزواج؟؟

غصون،، الاعرفه اذا الرجال باس مرته تحبل

ساره،، بس؟؟

غصون،، هزيت راسي بمعنى اي

ساره،، ليش ماحجيتيله وهو يفهمج؟؟

غصون،، ساره من اوكف كدامه ينعگد الساني والخوف يتمكن مني مااعرف احجي
واستحي اكله وين تريد توصل بالضبط؟؟

ساره، عجيب يعني امج مافهمتج صديقاتج؟؟
من انطوج فصليه ماحاولت امج تفهمج؟؟

غصون،، هزيت راسي بمعنى لا كتلها امي وابوي جانو ابد مايتشاقون كدامنه ودائما واحد يحترم الثاني
ومانشوف ابوي يبوس امي غير بالعيد تسلم سلام عادي حالنه حالها

واني دائما ماعندي صديقات غير زينب بنت عمي
بديت احجي الساره كلشي بالتفصيل بس ماجبت طاري السالفه ابن عمي لان نسيت السالفه اصلا ومو ابالي فحجيتلها فقط الجاي يصير بيني وبين ذياب

ساره،، هسه فهمت ليش ذياب ورط روحه وي نور رغم هو ادري ومتاكده مايحبها بس من شافج ترفضي شمر روحه هلشمره هاي لان اخوي واعرفه دائما متسرع من يضوج يفقد التركيز يصير يتصرف بدون وعي وتفكير

من شافج رافضته يحضي وماكو زلمه يقبل مرته عنده كل هاي المده ومامتقربلها والمصيبه تصده لو واحد غير ذياب جان كفشج من راسج واتقربلج غصب عنج لان الزلمه من توصل السالفه الهاي النقطه راح عقله يالف الف فكره ليش رفضتني وليش ماتريدني اكيد راح يفكر بيها شي ورافضته

بس اتعجب اخوي ليش ساكت عنج كل هاي المده ع الاقل جان كعدتو وكل واحد بيكم حاول يفهم الثاني موضوعه

غصون،، يعني شيريد مني يالضبط؟؟

ساره،، يريد تخلفون صبيان وبنات

غصون،، ماصار جا شسويله؟؟

ساره،، اي مو هو يصير من الهوى
لو حبايه بيدج تكبر ويطك منها طفل
حبيبتي مو هيج الموضوع

غصون،، كعدت تشرحلي بالتفصيل الممل العلاقه الزوجيه وكل ماهي كانت تحجي اني جسمي كله يرجف ريگي يبس وجمدت اطرافي سديت اذني مااريد اسمع

كاافي ساره الله يخليج كافي اسكتي شنو هل اللاستهتار هذا مستحيل اسوي هيج

ساره،، جا اشلون ياغصون هي هاي سنه الحياه
بالبدايه كلنه خفنه بس بيوم الزواج الله يرفع غشاء الخجل بين الزوج والزوجه لان لو كلها مثلج تستحي جان من زمان انقرضنه وانتهت السلاله البشريه

من بدايه الخلايق هيج كان التكاثر

غصون،، صارت تقره ايات قرانيه تثبتلي صحه كلامها
وانو لازم يصير تقارب بين الزوج والزوجه حتى يصير اطفال

جنت اسمع وارتجف احس سن يطگ بس

ساره،، ليش خايفه ياحبيبتي؟؟
كل شخصين متزوجين هيج يصير وياهم
لعد امج وابوج اشلون جابوج للدنيه غير بهاي الطريقه؟؟

غصون،، مستحيل افكر انو حتى امي وابوي هيج يسوون كتلها لا ابوي وامي مايسوون هيج شي ابد مستحيل

ساره،، اي مو ربهم وحد وجابوج وهمه فاتحين بلوتوث بينهم

غصون،، اهواي حجت وقنعتيني وفهمتني بس النتيجه تخربطت وصخنت كلش وهي تحجي وياي احس نفسي اتمرضت

نصحتني احجي لذياب بس رفضت وحلفتها هي ماتحجيله عن الموضوع وماتجيبله طاري كالت مستحيل افتح هيج موضوع ويه اخوي لان استحي منه وحرام ومشاكلكم حاولو تحلوها بهدوء وتفاهم مو بهوسه وعدم فهم

للعصر راحت بس واني بمكاني احس الصخونه صعدت فول
جسمي تكسر مغطايه بطانيتين وارجف
فاتت عمتي تحجي وياي مااسمعها من كشفت الغطه عني ولزمت راسي

ام ذياب،، يمه اسم الله ولج مشتعله نار
خل اشوفلج ذياب ياخذج للطبيب

غصون لزمت ايدها امنعها لان سبب صخونتي بسبب المصيبه العرفتها من ساره كتلها مابيه شي لاتصيحيله كانه بعد العرفته جزت روحي منه وكرهته

راح عمتي جابتلي حب مدري ماليش اخذته بس ماصرت زينه والصخونه زادت مانقصت

بعدها عمتي طلعت دقايق وانفتح الباب دخلت وذياب وراها بمجرد ماشفته لعبت نفسي رفعت الغطه غطيت حتئ راسي مااريد اشوفه

ذياب،، كعديها اخذها للمستشفى

ام ذياب،، دكومي يايمه لا يصير بيج شي صخونتج عاليه

ذياب،، لاتنشمر

ام ذياب،، اسم الله ويمكن الاكبار ماينشمرون؟؟

ذياب،، منو الاكبار؟؟
قصدج غصون؟؟
ليش محسوبه ع الاكبار؟؟

ام ذياب،، مالك شغل بغصون هاي بنيتي اطردك وهي تضل يمي

ذياب،، شكلنه حجيه تره صدك طفله ماجذبت

غصون،، عمتي مدت ايدها برگبتي تشوف حرارتي اسمعها تگله ييمه مصخنه حيل ومعانده ماتقبل تكوم

غصون،، مدثره روحي بس اسمع حجيهم
احس ايد انمدت من جوه الغطه انحطت بركبتي وتريد تنزل الصدري بالبدايه عرفتها عمتي تركتها بس هسه احس الايد خشنه
لزمتها بسرعه سمعت ضحك

ام ذياب،، ميل عنها فااسد البت مورثه من الصخونه وهو حاير بسوالفه

ذياب،، شجاج حجيه ماتخلين وليدج يتكمكش

يتتتبع

اعتذر ع التاخير بس والله بنتي مريضه
ومصخنه ومن تصخن تنشمر ويغمئ عليها لان عدها هبوط بالسكر اعذروني ع التاخير بالله موبيدي
حاليا دااكتب بارت الزينب بس يكمل بااذن الله انشره وتدللون