رواية ضحية لمن لايرحم الفصل الخمسون 50 - بقلم زهراء الحسناوي

البارت 36

ضحيه لمن لايرحم

بقلم زهراء الحسناوي
،،،،،،،،،،،،،،،،،

تركنه ارواحنه المايرضن نروح
بالدمعه العزيزه نريد نسلم
كسرنه الحچي البعيونه بماي
حتى اليقره يلگه المعنى مبهم
اصعب موقف بلحضات الوداع
من تشوف الچنت تبني يتهدم
من تقوي گلبك وانت مجروح
مامهتم تبين وانت مهتم
من تبتسم،، بس بداخلك نوح
والدموع اباب عينك سكته تلتم
تضطر تمشي،، لكن وانت مكسور
عزة نفسك تبررلك الهم
وراها تعيش،، لكن گلبك يموت
واحساسك الطيب يبدي يفهم
لاتحزن بعد بالعنك يروح
ومامسموحلك يوميه تندم
كل جروحنه وكل المعاناة
من ماوره الناس البيها نحلم 💔

زينب
،،،،،،،،،،،،،،،،،،،

زينب،، ضليت صافنه لواء ابتسملي ونذيره خزرتني عافتنه وطلعت

لواء،، وين جنتي؟؟

زينب،، صعدت اصلي
ردت اگله ليش اكلت الدولمه بس سكتت
خاف اگله بسالفه السحر ويعتبرني اتهم اهله

لواء،، تعشيتي؟؟

زينب،، هزيت راسي بمعنى لا

لواء،، خوش دولمه روحي صبي واكلي

زينب،گتله مااحب الدولمه مشتهيه جبن وجاي
تركته وطلعت خدرت جاي وخليت شويه جبن بالماعون ورجعت يم لواء

فتحت الباب ودخلت شفته مغمض سديت الباب على كيف خاف يگعد
فتت حطيت الصينيه بالگاع وگعدت اكل
طبعي بطيئه من اكل يبرد الجاي ويصير ببسي واني بعدني مامكمله

سمعت صوت لواء فزيت كل ضني گاعد
نهضت تقربت منه غافي والساعه تقريبا 10بليل

اسمعه يحجي مثل اليهذي وهو نايم دنگت علي اريد افهم شجاي يگول انتبهتله جاي يگول بسم الله ويسكت ويرجع يكول بسم الله الرحمن الرحيم

صرت قريبه من وجها اريد اگعده يمكن حلمان
ماحسيت غير فز فاتح عيونه على وسعهن عيونه حمر دم مخنزر بوجهي
حطيت ايدي على متنه گتله اسم الله لواء شبيك؟؟

رجع مدد وغمض عيونه گصته عرگانه

لواء،، كابوس زينب كابوس خنگني خنگ
كانه اني بالحديقه مالتنه وذيب يركض وراي وياه جلاب يردن يعضني

زينب،، گتله اسم الله ماكو شي
اباوعله غمض عيونه حيل ولزم معدته

لواء،، احس نار اشتعلت بمعدتي

زينب،، مدلي ايده حتى بس يعدل نفسه
رفع روحه سند ضهره للجربايه وجها ينطي الوان

گتله لواء شبيك اصيحلك عمي ياخذك للمستشفى؟؟

رفع ايده اشرلي اسكتي وهو مغمض ورجع
اشرلي على حلگه بمعنى اريد اتقيئ

حرت بي وين اخذه كون حسن يجي يساعدني كتله لواء بس اصيحلك حسن دقيقه

جر الصولجان مالته وعدل روحه نهض من مكانه بسرعه روحي صارت بي خاف يوگع وينفتح جرحه
بوجها للحمام بعده بالباب اسمع بس صوته يتقيئ
وگفت يمه وهو گاعد ع كرسي الحمام خاص بي من يريد يسبح حاطيله كرسي يگعد علي

شافني واگفه يمه اشرلي روحي
عمي سمع صوت لواء يتقيئ بصوت عالي

شيخ منهل،، يارب دخيلك شبيك بويه شتهيس؟؟

زينب،، لواء مايحجي كمل غسل وجها ومد ايده لبو يطلعه من الحمام

لواء،، مابيه شي يابه بس يمكن من الدولمه اتخربطت معدتي يمكن لان دسمه

زينب،، من البدايه كشتني روحي منها والله لو موجوده مااخلي ياكلها بس رحت اصلي واجيت لگيت اخته الحيه منطيته ماعون

عمي راح الغرفته ورجع بيده حب مال معده انطا اللواء جبتله ماي اخذ العلاج واتمدد

نص ساعه عمي گاعد يمه ماطلع بعدها لواء گاله روح حجي نام مابيه شي خذت حبايه هسه ارتاح

طلع ابو وهو لزم معدته يعصر بيها بيده حيل
گتله ليش تعاند خل ياخذوك للمستشفى

لواء،، گتلج مابيه شي

زينب،، تركته براحته بس لاهو نام ولااني گدرت انام واعوفه يلوج من الالم

للفجر وكت الصلاه نهض للحمام رحت وياه توضه ورجع للغرفه قربتله كرسي الصلاه الخشب
گعد يصلي كمل صلاه الصبح حسبالي راح يرجع ينام
شو رجع عاد الصلاه

من كمل سالته شنو مطلوب صلاه وجاي تقضي؟؟

لواء،، لا عمري مانطلبت بس شو احس صلاتي بيها غلط وعدتها
شو انطيني القرأن خل اقره شويه

زينب،، نهضت انطيته القران حطه بيده باسه وفتحه
قره شويه اني كاعده على جربايته اباوعله
صار يفتح بعيونه على وسعهن مثل الماجاي يشوف الكلمات بوضوح بس ماترك القران ابد
صار يقره ويتثاوب حلگه مفتوح
على كثر ماتثاوب اثناء قرائته حسيت حلگه شكل بعد ماينسد
ساعه كامله هو يقره تالي سده وباسه انطانياه رجعته المكانه وهو رجع لفراشه ينام

ماكدرت انام اخاف يتخربط تالي لمن طلعت الشمس عيوني وحدهن غمضن لان نعسانه مانمت

لهنااك وجان افز على صوته يحجي ويه نذيره

لواء،، كتلتني الدولمه البارحه مانمت ولسه مغثوث منها

نذيره،، ياا شو كلنه اكلنه وياك ماواحد بينه تخربط
خاف معدتك متخربطه من العلاجات التاخذهن؟؟

لواء،، لا يمكن لان بيها دسم وحموضه اذت معدتي

نذيره،، اي مواگول شو احنه ماتخربطنه ليش بس انت؟؟

زينب،، بگلبي حجي بس استحيت احجي ويزعل لواء لان مهما يكون هاي اخته ف سكتت اشرفلي

يوم عن يوم حالة لواء تتغير بس من يشوف روحه تعبان يگلي انطيني القران اقره
ياخذه ويتاخر بالقرائه بس مايتركه

وصلاته دائما يعيدها مره ومرتين الدرجه صرت اوكف جدامه من يصلي وكل مايكمل ركعتين ااشرله بااصبعي احسبله عدد الركعات لمن يكمل

معدته يوميه يتقيئه منها عمي من شافه هيج گاله حجزتلك يم دكتور اخذك اله العصر خل يچيك وضعك
وفعلا العصر راح لواء للدكتور ومن رجع عرفنه عنده بدايه قرحه

يومين وضعه اتحسن ع العلاج بس بعدها رجع وضعه نفس الشي اقل شغله ياكلها يتقيئ وبليل بس يتحلم ويفز

وره كم يوم تفاجئنه بجية المره الشافنها بالفاتحه مال الشهيد وعرفتها جايه تخطب غفران ل ابنها

نذيره من شافتها انخبصت احتارت شتسوي
دفعت غفران تروح البيتهم ترتب روحها لان المره جايه هي وامها ومرت اخوها يخطبن
زمخت بيه نذيره بصوت مكتوم

نذيره،، بسرررعه جهزي صينيه ماي وحضري جاي وهسه غفران تجيبلج كليجه من بيتنه وزعيها. بمواعين وانطيها لغفران تقدمها

زينب،، تركتني وراحت شويه واجت غفران ضاربه دقله بالترتيب لابسه ثوب اسود بس مرتبه شعرها وخلقتها

انطيتها الصينيه وراحت مبتسمه ماادري عليمن مبتسمه يمكن للوكت الاغبر مدري العريس الغفله اليخرخش

زلمه عباره عن خرخش خرخش من كثر الگلايد والسوارات والمفاتيح الشايلهن يمكن شايل مفاتيح الكناتير مال بيت اهله كلهن

ساعه ونص هنه يمنه رحت يم لواء اسمع ام الولد تگول النذيره
سبحان الله هاي سابع خطبه نخطبله ويبطل مايقبل يمكن القسمه رادت ناخذ من عدكم

والله بگلبي گلت اگص ايدي اذا هو الماقابل
اذا ماطلعت كل الخطبهن رفضنه من شافنه يمشي يتماوع ويشمر بگذلته

بعدها راحن ونذيره شاگه الحلگ اليشوفها يكول العريس جاي عليها موعلئ بتها

لليل اجه عمي وفتحت ام لواء ونذيره وياه الموضوع يأخذن رأيه گالهن خل نسأل

ام لواء،، يمعود البنيه مايسترها غير الرجل نطيها ولاتوگف بقسمتها شو ناس معروفين الهم صيتهم وسمعتهم ومضروب بيهم المثل
ابوهم صايغ معروف والمره هم جارتنه من زمان ونعرفه والمثل يگول الشين النعرفه احسن من الزين المانعرفه

زينب،، نذيره هم جابت صبغ وگعدت تصبغ بأهل الولد لمن اقتنع عمي وهو ماشاءالله اسد ماتهزه الكلمه بحيث بكلمتين الاسد يصير بزون ويگدرن يمشنه بحجايتهن

كاعدين اني ولواء توني جبتله عشه وفات حسن
طگ اصبعتين وهز جتف لواء ضحك

لواء،، ياساتر يارب ولك شكوو

حسن،، وزفووني مااريد العششه زفووني

زينب،، ضحك لواء گاله ولك انت بس بوخه مال حجي اذا بيك حض اشر واني اروح اخطبلك

حسن،، وروح العزيز العريس مااعرس اهنا لو اضل اعزب طول عمري ويمكن انتضر منا لمن الله يسهل ل امك وابوك وبعدين اعرس واني مرتاح

لواء،، طاحض اخلاقك ولك اذا ماتو ماراضين عنك تضل طول عمرك تعضعض بااصابيعك ندم لان رضاهم من رضا الله

حسن،، والله محسسني منهل الدثو شخصيه دينيه واني ماادري

لواء،، انجببب ازماال تره اگومللك بالنعاال

حسن،، بداعه سيد منهل اگعد تره بنفخه اوگعك وانت صاير سكراب

زينب،، لواء گوه كاتم ضحكته جر الصولجان مالته گاله اگوم اكسرك بهااي

حسن،، سمعت اختك المن راح تنطي بتها؟؟

لواء،، ادري ومالي غرض بزرها وهي حره ومن زمان گلت ماادخل بيها المن تنطي خل تنطي

حسن،، ولك شلوون عطيه؟؟

لواء،، ليش شبي الولد سامع عنه شي؟؟

حسن،، وحتى لو اشوف بعيني هم مااحجي موبس اسمع عنه
اصلا اكيف لان كل هذا غضب من الله علئ نزيره

زينب،، يقلد على اسم اخته ومبين يعرف شغله ومايحجي

لواء،، حسن مهما يكون السالفه مردها علينه لان احنه خوالها واحنه المربيها
اذا الولد بي شي احجي من هسه
صح گلت مالي شغل بنذيره بس قصدي اذا انطتها الواحد جوعان لوشبعان هذا الشي مايهمني
بس موتنطيها الواحد علي سمعه موزينه

حسن،، انه اخوووك ومنو گالك الولد علي سمعه موزينه؟؟
اصلا يصلوون وراه جماعه

زينب،، حسن يحجي وكوه كاتم روحه لايضحك لواء مضيگ عيونه مامقتنع بكلام حسن

تالي من اجه عمي لواء گاله يابه اسأل عن الولد لاتخلي نذيره تشمر بتها عليش مستعجله

شيخ منهل،، خل تنطيها بويه
بنات اختك وكحات شوفت عينك ذيج شسوت بينه زلم مشوربه خلتنه مانندل دربه بسوايتها
تزوجت ماراضين عنها وهم ذبت روحها عد وادم ماحترمتها بسبب فعلتها
خل ننطيها احسن شو امها تحمد بالولد واخلاقه

لواء،، انت الجبير حجي روح واستفسر حتى مانوگع بالسالفه بعدين

زينب،، ثاني يوم عمي راد يروح سمعت ام لواء تگله فشله ناس معروفين وعافو كل البنات واجو خطبو بنت بنتك لان يردون يناسبوك عبن شيخ والك صيتك فشله تروح تسأل عن ابنهم وبعدين توصللهم السالفه ويزعلون

وفعلا منهل الاسد بسرعه دفعته عمتي خلته يگعد ويسكت مرات اضحك على حسن من يگول شيخ جيس روبه ابوي بطلياني مااسرحه مو انوب اسلمه عشيره هو يقودها

بالنسبه الواء مرات اشوفه زين مابي شي
ومرات عصبي على ابسط شي

الضهر گالي سويلي بيضه وگليها بزيت الزيتون ولاتكثرين خلي خاشوكه مال زيت وحده لان معدتي لسه تاذيني

وفعلا رحت سويتله بيضتين طگيتهن بزيت الزيتون وجهزتله صينيه جبتها واجيت

والله ماخليت غير خاشوكه زيت وحده من شافها خزرني ودفع الصينيه
نذيره كاعده هي وعمي يسولفون وحسن فوك بغرفته لان من يكعدون اهله يصعد فوك مايكعد يمهم

لواء،، موگتلج لاتكثررين دهننن جبتيهاا نگعانه دهن صايرره خووثه

زينب،، انهضمت لان فشلني رفعت راسي نذيره مبتسمه وعمي ماقبل گاله مايستوجب تصير عصبي روحي بويه سويله غيرها

ردت اخذ الصينيه لواء گال ماريد شبعت

رجعت للمطبخ اهفي على وجهي
مختنگه اريد ابجي
اول مره لواء يزمخ بيه صارلي 11شهر يمهم
مامره فشلني لابيناتنه ولاجدام احد

ضليت خانسه بالمطبخ مارحت يمهم
شويه وعمي راح الغرفته يصلي ونذيره عبرت من يمي رايحه البيتها تضحك مااعرف على شنو

سمعت صوت لواء رحت يمه بس مبينه ضايجه
فتحت الباب وگفت لازمه يده الباب ماداخله للغرفه

سمعتك تصيحلي رايد شي؟؟

لواء،، تعاي يمي

زينب،، دنگت گتله لواء اريد اروح اشتغل احجي شتريد؟؟

لواء،، گتلج سددي الباب وتعاي

زينب،، سديت الباب ورحت وگفت جدامه لزم ايدي گعدني يمه

لواء،، بوسيني

زينب،، نزلت دمعتي واني مدنگه مد ايده مسحها
لواء،، اعتذر والله اعتذر وداعة وليدي البطنج ماادري بروحي صاير مدوهن مدري شبيه روحي ماطايقها
اذا ماتتحمليني انتي جا منو يتحملني؟؟

زينب،، جر ايدي قربني منه رفع وجهي باسني واني بعدني مطنگره لان احبه شفتها صعبه يهيني

همس

لواء،، بادليني خل اشوفج رضيتي

زينب،، صوته ولمسته كفيله تخلي گلبي يلين ويستسلم بدون مقدمات
بادلته بكل حب ولهفه كانه موجه من المشاعر احتلتنه احنه الاثنين

بعدني عنه

لواء،، زينب دخيلج تره السالفه حمت اطفري واستري علينه

زينب،، ضحكت ومسحت وجهي مثل الجان بحلم حلو وگعد على جلاق من الحلم

لواء،، انتي قبل مخلصتها وياي استحي واستحي بس من شفتيني مفلش كل شويه واجيتي دحستي روحج يمي

زينب،، فتحت عيونه ضربت على صدري بيدي
گتله يااا هااي انيي؟؟

لواء،، احترگت عشيرتج ولج لاتسوين هاي الحركه بنت الاوادم

زينب،، مافهمت شيقصد عفته وكمت اضحك حيال عرف اشلون يرضيني

وره يومين صادف اربعاء سمعت راح تجي مشيه الجمعه مال زلم يخطبون غفران
بس العرفته يجيبون سيد وياهم يعقدلهم هاي موده جديده صايره
اني سامعه المشيه تجي ومن يقبلوون اهل البنت ثاني يوم يعقدون بس شو ذوله جنهم مستعجلين جايبين سيدهم وياهم

يومين احنه مخبوصين اليشوفنه يكول عدنه زلمه راح نزفه مو مومشيه بنيه
نذيره خلت غفران تذب الاسود راحت اشترتلها فستان ابيض تعقد بي واخذتها للصالون بس حفت وجها ورتبتها

الجمعه اجت المشيه واجت النسوان وياهم بس
عمي ماقبل لاصفگه ولاكلشي لان حزنانين
اني مشكلتي وي نذيره الماعرف شنو من گلب عدها بحيث بناتها اثنينهن انطتهن وابنها الوحيد ماطالعه دوره السنه مالته

بيومها نربطت بالمطبخ ولواء راح يمهم بالعربانه مالته لان كال فشله بس ابوي يستقبل الوادم
صارت الگعده بالمضيف
والنسوان بالصاله مال بيت الشيخ غفران لابسه وگاعده الخجل يخر من اذاناتها من ومنا

عمي اجه گال راح يعقدلهم السيد
نذيره اخذت بتها كعدتها يم الباب
ام لواء ونذيره متفقات بينهن الغايب مال غفران
20مليون
من قره السيد نذيره گالت ل ام الولد تره الغايب عشرين مليون المره فتحت حلگها گالتلها اذا عشرين هسه ابطل
وشدعوه عشرين خليهن خمس ملايين الغايب مالتها
حجايه من نذيره واحجايه من ام الولد رادن يتعاركن من بدايتها بس نذيره صارت مثل بلاع الموس لان هي الانطت للمره مجال
وقبلت بالخمس ملايين وهي الممنونه
تم العقد ونذيره نفخت روحها نفخ لان ضاجت لان غايب بتها قليل

اتفقو بعد شهر العرس بين مايجهزون نفسهم ويشترون خشاب وغراض

عمي گالهم حتى اذا شهر ونص بعد احسن منا الذاك الوكت دايره السنه مال حسين

اني بالمطبخ اسوي جاي وماي احس رجليه غدن خيوط من التعب لواء لوشايفني وحدي مايقبل بس هو راح يم الخطار

ماصدگت شوكت تخلص المشيه ويرحون
من راحن نذيره نزلت دوسه ونص عليهم
مبينه كوه جانت ساده حلگها ماتحجي جدامهن

ثاني يوم العصر اجت ام حنان وياها حنان والجهال بحجة يباركن البت نذيره

همزين مادخلن يم لواء لان نايم وگال لحد يگعدني
انتبهت الحنان عينها الغرفة لواء
لان احنه من يجي خطار نگعد بالصاله والصاله مابيها قنفات مجرد مفروشه ديوانيه كلش جبيره

واكيد اني الاضيفهن واخذ الهن جاي
ف عرفتها جيتها موخاليه
شويه وگامن هي ونذيره راحن البيت نذيره على اساس تشوف البيت مال نذيره لان من زمان حنان مارايحه لهناك
راحن اثنينهن والجهال ضلو بحضن ام لواء تحبحب بيهم

نص ساعه ورجعن شو نذيره بسرعه راحت دخلت الغرفه لواء شويه وطلعت مدري شبيها احسهن اثنينهن موراحه

نهضت من مكاني عفتهن ورحت للغرفه شفته نايم غافي
باوعت بالغرفه كلشي ماكو اخاف منهن ابد موراحه لانذيره ولا ذيج الثانيه
تالي ماطلعت ضليت يمه كاعده

سمعتهم يردون يروحون بگلبي گلت
دفعة مردي وهوئ شرجي كون بعد ماتلفون لهنا

للمغرب گعد لواء اتمشيت وياه للحمام لان يمشي على كيف توضه ورجع
اتذكرت الملابس مالته غسلتهن الضهر
طلعت للحديقه لميتهن انتبهت الفالينه مال لواء ماموجوده ويه ملابسه الباقيات
دورت بالگاع خاف واگعه هم ماكو
فتريت بالحديقه يم الوردات يم الشجر ماكو ولا الها ذكر مختفيه
گلت يمكن اني ماغسلتها ونسيت متوهمه بيها

اني حاطه سله بالغرفه مال لواء لملابسي وملابسه اعلگهم وره الباب مااحطهم بالسله

تركته يكمل صلاه ورحت سويت عشه وجهزته نواشف
عمي وعمتي اشويهم طماطه وبيذنجان لومرات اشويلهم سيخ لحم ولواء اكله وحده بدون دهونات اذا يشتهي قلي اسويله اكل بزيت الزيتون وحسن خطيه شسوي ياكل مرات يگلي لوخبزه وجاي من ايدج طيبات
احسه اخوي وخاصتا علاقتي بي جاي تقوه وبسرعه ياخذ ميانه بس بحدود الأدب

وره العشه لواء گال جهزيلي الحمام وشغلي الصوبه حطيها بالغرفه اسبح واطلع ادفه عليها

راح يسبح واني شغلت الصوبه كمل واجه يتعكز بالصولجانات والخاولي على راسه
دخل للغرفه

كتله نعيما وضحكت

لواء،، الله ينعم عليج بس على شنو تضحكين؟؟

زينب،، تذكر مره من گتلي نعيما وجاوبتك نعنع الله ضلوعك؟؟

لواء،، جفصاتج اهواي وحده اثنين حتى اذكرهن
ام التبقبق كلشي اتوقع منج

زينب،، ههههههه لسه ذاكرها؟؟

لواء،، كل مره اذكرها واضحك
رايحه تعزين تبقبقين؟؟

زينب،، نسولف ونضحك سوه اشرلي اجيبله المشاطه مالته فرجه الشعر

دورت عليها ع الميز مال المرايه ماكو مالها ذكر

لواء،، وين المشاطه مالتي؟؟

زينب،، اهنا خليتها شو ماكو مالها اثر

لواء،، دشوفيها وين خاف واگعه جوه الميز

زينب،، دورت ماكو هم مثل الفالينه تاكدت مشيولات شيلت ايد

تالي رحت جبتله مشط مشط بي
ماگدرت اضم علي وسولفتله على سالفه الفالينه والمشاطه

لواء،، حرام تتهمين احد زينب التحجين عنها اختي ماتوصل بيها السالفه تاذي اخوها وقبل لاتتهمين احد وبعدين تتندمين تاكدي من اغراضي وين تخليهن

زينب،، ماصدگني لان صدك منو يشك بأخته
هاي اخته موياهو الجان وخاصتا نذيره تصلي وتصوم وسبحتها بيدها

تالي ثاني يوم العصر جاي اعزل بالغرفه وجان الگه المشاطه جوه جربايه لواء شافها رفع حاجبه

لواء،، موگتلج لتتهمين احد؟؟
لومدنگه جوه الجربايه جان لگيتيها بدل ماتتهمين العالم

زينب،، فشلني بكلامه ماحجيت تركته وطلعت
يومين مرن عاديات ماكو شي
ثالث يوم لواء تغير بس عصبي يزمخ على ابسط شي

يگلي سوي هاي الشغله ومن اسويها يضل يزمخ يكلي ماتفتهمين لو خوثه لوغبيه
واكثر كلامه جدام اهله يفشلني

صرت احسه عصبي وعصبيته ماتنطاق
حتى صلاته اختلفت عن قبل احسه مجرد واجب يصلي اشلون ماجان وقرأن ماعاد يقره مثل قبل واذا قره يضل يتثاوب ويعرگ وتتخربط احواله

غير نذيره التتأمر وام لواء المايعجبها العجب
احس الكل يضغطون عليه

وره اسبوع ولواء نفس وضعه يزيد ماينقص
صرت اشوف شغلات من اغراضه تختفي
لامره ولااثنين يتكرر هذا الشي
وصلت بينه نتعارك على ابسط شغله

بيوم جنت توني مكمله غسل مواعين مال العشه لواء صاحلي يريد يسبح متعلم يسبح بليل قبل ماينام

هو راح للحمام وگال حضريلي اتراكي الاسود
اجيت احضر الاتراك مالگيت البجامه بس التيشيرت

سمعت صوته يصيحلي من الحمام اخذتله غير بجامه ورحت

من اجه للغرفه گتله دورت بجامتك مالگيتها

لواء،، ليش انتي شنو التدرين بي؟؟
كلساع مضيعتلج شغله وگلتلي فلانه اخذتها

زينب،، مااتحملت لان الشغله احطها بيدي بمكانها اجي الگاها مختفيه نهضت وكفت كدامه
كتله والله رااح اتخبل ومتاكده هاي سوالف اختك الجاي تسوي هيج

لواء،، زيينب

زينب،، كافي كله زينب زيينب محمليني ذنب كلشي
والله اشيائك الجاي تختفيي هااي اختك السحااره تاخذهن
ماحسيت غير رفع ايده ولاول مره يضربني

،،،،،،،،،،،،،،،،،،،،،،،

ماكلفت نفسك بالحلم مريت
ورد بيه الضعف ردت حمام البيت
انه مقرر.. وناسي.. وكارهك مرات
وچم مره اعله ذكرى تخصك نغثيت
شمدريني اعله غفله ويگعد المضموم
انه دورة سنه ودورة محب سويت
وانت اشبيك؟؟ لاحققت حلم وياي
ولاحتى بمنامي بالحلم ظليت
من ضايگ صبح وحشة المغرب بي؟؟
ويليل الشته شمالك للضحئ ورديت؟؟
وصحئ بگلبي حنين يرجع المكتول
بس ريحة مذله برجعتي اشتميت
وجهي اشاف منك غير سدت الباب
وانه بعشرتك موضوع ماسديت
وطحت ياما بعتبته طيحة المصيوب
لمن يوصل اهله وباب مافكيت
يل دگيت صدرك جاي ادگ بالباب
موجارك طلع من كثر مادگيت 💔

ذياب

،،،،،،،،،،،،،،،

غصون،، فتحت الباب شفته متمدد ع الجربايه ومكتف ادي بمجرد مادخلت فتح عيونه

سديت الباب ورحت يمه وكل خطوه اخطيها احس راح اوگع من الخوف
عيونه بعيونه يباوعلي بكل هدوء همس بصوت ناصي

ذياب،، ليش اجيتي؟؟

غصون،، صدري يصعد وينزل نفسي صار سريع خانتني دمعتي دنگت گتله والله مو اني الدزيت الصور ومااعرف الرقم

نهض من مكانه بهدوء احسه هدوئه يعذبني من خوفي تراجعت لوره هو يتقدم واني ارجع صفيت ويه الكنتور رفع ايده حطها يم راسي

ذياب،،، اثبتيلي

غصون،، دنگت وبجيت

ذياب،، اثبتيلي غصون
انطيني دليل واحد يخليني اصدگ
انطيني دليل ماتحبين ابن عمج
انطيني دليل مامتصله
انطيني دليل مادازه صورج
انطيني دليل ماتعرفين صاحب الرقم

غصون،، يحجي ونبرته تحتد وعيونه تحسهن انگلبن دم

ذياب،، شفتي شكثر اغلاطج؟؟
وولج مثل المخبل صار اسبوع اريد اطلع صااحب الرقم بس اريد خيط يوصللني اله
بس ماكووو لان الخط مامسجل بأسم
ضرب الكنتور بيده بقوه فزيت غمضت وبدون وعي رفعت اديه كل ضني راح يضربني

ذياب،، لتخافين مااضربج اصلا ماتسوين اتعب روحي وگلبي الخاطرج

من ذاك اليوم الشفت غيري يتغزل بجسمج لعبت روحي منج ولو واحد غيري شايف هيج شي ابسط شغله يسويها يطلگج
بس راح اخليج اهناا خدامه ل امي

غصون،، دموعي من عيني للگاع
مد ايده الصدر ثوبي رفعت عيوني بعيونه
همس

ذياب،، خاف اجيتي تردين نعيد الصار قبل كم يوم

غصون،، حجاها وغمز عرفت قصده بسرعه دفعته ردت اطلع لزم ايدي سحبني
اريد اسحب ايدي لازمني بقوه
حاول يبوسني دفعته ادري يلعب بااعصابي لان لويريد يقترب مني جان بسهوله كدر بس هو يتعمد يحقرني بنفسي

همست بصوت خانگتني العبره كافي تكرهني بيك

ذياب،، ليش انتي من شوكت حبيتيني؟؟

لان بالحلال تمنعيني بس اابن عممج العار ادزيله صورج بالحرام مووو؟؟

غصون،، رجع ضرب الكنتور بيده حيييل
من خوفي كعدت بالگاع لميت رجليه ودفنت راسي بينهم

لزمني من زندي رفعني عن الگاع جرني الباب الغرفه فتح الباب ودفعني حيل
رفع اصبعه بوجهي

ذياب،، اذا صعدتي رجلج اكسرهاا

غصون،، حجاها وسد الباب بوجهي
اتمنيت ميته ولاهلفشله هاي نزلت اركض فتحت باب غرفتي ودخلت ابجي بحرگه شلت ايدي كتمت صوت شهگاتي

اهواي بجيت احس عيوني غوشن من كد البجي ومن يوم الصار بيناتنه وسالفه الرقم مانمت براحه دائما ابقئ كاعده للفجر يالله اتعب وانام
مرت ايام لا اني احجي وياه ولاهو يحجي وياي واصلا مااخلي يشوفني من يجي اختل
عمتي بذني الكم يوم ساكته مالها شغل بيه
اختنگت لان كلها معاديتني وماتحجي وياي

شفتها وحدها بغرفتها تصلي المغرب وذياب فوگ بغرفته

رحت يمها گعدت بصفها دنگت تسبح بالسبحه
دنگت على ايدها ردت ابوسها سحبتها ورفعتها لفوگ عني
دموعي نزلت كملت صلاة
گتلها عمه وحق كل حرف بالقران وداعة صومي وصلاتي ماجاي اجذب عليكم

جريت التربه لزمتها كتلها وهاي تربه الحسين مااعرف صاحب الرقم ولادازه صوري ولاحتئ اعرف منين جابهن
ليش محد يصدگني؟؟

شفتها عيونها كلها دموع بمجرد ماشفتها هيج خليت راسي على رجلها

شالت ايدها حطتها على راسي لو احس الدنيا ضحكتلي

ام ذياب،، والله يعمه مانايمه ولاشايفه النوم من يوم سالفتكم الهذا اليوم ضاعت عليه السالفه وماعرفت البركه بياحبايه
انتي تحلفيت وذاك متسودن مايتفاهم
مااريد غير الله يبين الحقيقه وكل ذي حق ياخذ حقه

يعمه تره موهينه زلمه يشوف واحد يدزله صور مرته
اي واحد غيره مايقبلها على عرضه
انه اكولها جدامج اوراج اذا انتي العايله اريد الله يتنوع ل ابني
واذا مالج ذنب ومضلومه اريد الله يطلع حگج ويبين حوبتج

غصون،، بست راسها ماكدر احجي دموعي خانگتني تركتها ورجعت للغرفه

من هذا اليوم عمتي شويه صار تعاملها احسن من فتره الزعلت بيها بس مومثل تعاملها وياي اول بدايه جانت تختلف نسولف ونضحك وتكعد تنصح احسها امي
بس من يوم الصار انخلقت فجوه كلش جبيره بين الكل

وره يومين اجت ساره هي الوحيده الي تفرحني تنطيني طاقه ايجابيه تخليني اصبر على بلوتي

بليل كاعده بالغرفه اسمعهم يتعشون انفتح الباب ودخلت ساره بيدها صينيه

خلتها كدامي وكعدت

ساره،، يالله اكلي

غصون،، اتقربت اتعشه وهي هم تاكل وياي سالتها ليش مامتعشيه؟؟

ساره،، لاااكلت شويه يم امي واجيت اكمل يمج حتى محد بيكم يزعل ههههه

غصون،، ابتسمتلها كتلها ساره مشتاقه ل امي وابوي صار 17يوم مامتصله بيهم

ساره،، غصون سالفه التليفون والمخابره اتركيهن هاي الفتره تره ذياب صاير ماينجرع
يروحي انعل ابو التليفون اليجيبلي ويسببلي المشاكل ويهجم بيتي
خل يولي وابد لا تبينين تردين جهازج
كدام ذياب
هسه اجيب رقم امج من تليفون امي واتصلي بيها
وكل مااجي خابريهم من رقمي

زين غصون سؤال انتي شاكه ب احد؟؟

غصون،، شنو يعني؟؟

ساره،، شاكه احد ماخذ موبايلج وماخذ صورج؟؟

غصون،، صفنت استرجع ذاكرتي كتلها اي مره شفت جهازي بيد عذراء ونور وقبل مااسألهن كالن مصطفى ماخذه يلعب بي

ساره،، والله ماابعدها عن الصفيره على گوله امي بس مانگدر نتهمها بدون دليل باجر يجن هي وعذراء عرفت من عذراء هذا الشي اتصلت بيه قبل شويه عبالها ابيتي حتى تگلي باجر تعاي لهلي حتئ نجي سوه

بس باجر اني هم اجي من وكت لان رجلي عنده روحه للسماوه ويبات يم عمامه عدهم طلابه
همزين اجت الروحه من صالحي باجر لوبالهدف لو بالنجف يممممه اذا صدگ نور الماخذه رقمج اله اسحلها سحول والله

صارلي فتره راسي موتني من التفكير بيكم منين مااجيبها انتي غبائج نصدره للدول مومال خيانه وذني السولف

طبعا البارحه شفت منشور بالفيس اخذتله سكرين حسيته عليج انتي وذياب

غصون،، ابتسمت كتلها اقري خل اسمعج
طلعت جهازها وبدت تقرالي

ساره،، اكو رجال ضرب زوجته لان شاك بيها تخونه
فگالتله وهي تبجي
سأذهب لاشتكيك
رد عليها زوجها ومن قال انني سأسمح لكي بالخروج؟
قالت،، اتظن أنك ستمنعني؟؟
اتعجب رجلها بجوابها فگالها افعلي ماشئتي
فأتجهت نحو الحمام وحين دخلت فكر باانها قد تهرب من النافذه
فجرئ إلى الخارج وانتظر عند النافذه فلم تفعل
فعاد إلى الداخل ووقف عند الباب
فوجدها قد خرجت وهي مبتله من أثار الوضوء
وقالت،، ساشتكيك عند من جعلني ملك لك فلا نوافذك ولاابوابك ولاهواتفي التي حجبتها عني
ستحجبني عنه ف ابوابه لاتنغلق
انصرف عنها وجلس صامتا يفكر
ذهبت هي وصلت وأطالت في السجود
وحين فرغت ورفعت يدها خطئ نحوها وامسك بيديها
وقال لها اما كفاك دعائك علي في سجودك؟؟
والله لحظه غضب لم اقصدها
فقالت ولهذا لم اكتفي من الدعاء لك
فاانا دعوت على الشيطان الذي سبب المشكله بيني وبينك

حبيت المنشور فدوه غصون لتندعين على ذياب اذا مضلومه تره والله يحبج ومن غيرته هيج تصرف وياج اعذري

غصون،طول ماكانت تحجي اني ابجي مدنگه بدون صوت تالي ماتركتني اله ضحكتني ونستني حزني للساعه عشره يالله راحت ساره اخذها ذياب
رحت يم عمتي ع الاقل شويه تسولف وياي راح يصير بيه توحد من كد مااختل وحدي بالغرفه

شويه وعمتي غفت نهضت من مكاني انفتح الباب صار بوجهي ذياب صار ايام ماشايفته
لازم يده الباب واكف وعينه بعيني طالت نضرته الي غمض عيونه وطلع بدون ولاحرف كانه نضرته بيها عتب بيها اهواي كلام صعب ينشرح

اتذكرت كلام ساره بخصوص المنشور
رحت توضيت ورجعت الغرفتي فرشت سجادتي وكعدت بكل خشوع
بمجرد مارفعت راسي احس ربي جاي يباوعلي بجيت وجسمي رجف گتله ياحبيبي يالله ماخاب من تمسك بك يارب
اني مضلومه واعرف نفسي مامسويه شي غلط
انضلمت اهواي ياربي واريد تاخذ حقي بحق حبيبك المصطفى
اهواي كلام بساعتها طلع من كل گلبي

نمت واني كلي يقين انو يجي يوم وتنكشف الحقيقه
وربي العالمين راح يفضح الظالم

ثاني يوم اجت ساره قبل صلاة الضهر
احس كاعده على نار اول مره اتمنى الوقت يمشي وتجي نور وعذراء

للعصر ياالله اتصلت ساره بعذراء گالتلها هسه نجي
لان عمي ماقبل نور تجي وياي من الضهر ف خليناها للعصر حتى نتاخر يمكم لليل

ذياب قبل لايجن طلع وعمتي تسوي عشه ساره طگتها ركضه لفوگ ادور على موبايلي لان گالت
لازم اتصل من رقمج على رقم نور اريد اشوفها حافضه الرقم يمها
واذا حافضته منين جابته وانتي مامطيته الها

نص ساعه ونزلت الضحكه شاگه حلگها
فتحت الجاكيت مالتها طلعت جهازي

ساره،، ماتجيبها اله نسوانها ههههه
لگيته ضامه بالكنتور ويه الكتب مالته

غصون،، صدگ فرحت وبداخلي ادعي بلكت تثبت برائتي وساعتها تكون دليل اقدمه لذياب

وره ساعه اجن اثنينهن اني بالغرفه
ساره كالت لااطلعين اله لمن يجن ويكعدن ويكعد ذياب يالله تعاي اكعدي اريد اشوف رده فعل الكل من اتصل ويرن موبايل نور

وفعلا ماطلعت اله لمن سمعت صوتهم گاعدين بالاستقبال فتحت الباب وطلعت رحت يمهم بمجرد مادخلت ذياب باوعلي رافع حاجبه
يمكن متفاجئ بيه
مااهتميت النضراته لان اريد اشوفه شنو يسوي من يعرف نور وره السالفه

باوعتلها كاشخه طالعه عروس كاعده بنفس القنفه الكاعد عليها ذياب

ساره غمزتلي ونهضت عرفتها اجت اللحظه الحاسمه وراح تنكشف الحقيقه كدام الكل

يتتتتتبع