رواية ضحية لمن لايرحم الفصل الثامن وستون 68 - بقلم زهراء الحسناوي

البارت 51

ضحيه لمن لايرحم

بقلم زهراء الحسناوي

،،،،،،،،،،،،،،،،،،،،،،،،،،،،،،،،،،،

لا أشتهي الحديث مع أحد
أريد الجلوس وحدي بعيداً عن ضجة البشر
أريد انا افهم ماذا يحدث لي؟؟
شيء ما بداخلي يصرخ وكأنه جندي اصيب بقذيفة
.ما هي هذه الاشياء في داخلي
.أهي حربٌ؟؟
أهو اختبار من الله؟؟
أريد أنا أفهم ما هي تلك الأشياء.؟؟
لقدتعبت.
أهلكني الضجيج في داخلي...
سئمت أن اتحدث مع الناس على غير عادتي.
الجميع يلاحظ مدى تغيّري
.وأنا لا أستطيع أن أشرح لاحد ما يحدث لي
أهرب دوماً من سؤال..(ما بك)؟؟
أستنجد بالتعب و النوم لعله إجابة صريحة
تقنع من حولي

،،،،،،،،،،

زينب،، بمجرد سمعت الخبر ضربت على رجلي
غمضت عيوني وبجيت
طفل شنو ذنبه؟
مالگيت روحي غير احجي ويه روحي وابجي وجسمي يرجف

الله لايوفقج حناان الله لايوفقج حناان
تيهتت الطفل ويين عاايفته وخاانسه الحقييره؟؟

مااكدرت اسيطر على اعصابي ارجف وابجي
اهذي لوفطومه عدهم ومتيهاتها جان هسه بنيتي الميته

التمن عليه غصون وعمتي

غصون،، زينب اهدي شو اهدي
موزين علليج تتتقهرين؟؟

زينب،، بجيت بصوت عالي كتلهن طفلل شنو ذننبه؟؟

على صوتي اجه عمي يركض حط ايده على راسي

ابو مثنئ،، اسم الله بويه گومي فوتي جوه ارتاحي
هذا امر الله بعد ولا اعتراض على حكمه
طفل طير من طيور الجنة
كلنه نموت يالله گومي

زينب،، گمت وجسمي يرعش اذكر الطفل شكله مايروح من بالي
اخر مره شفته قبل مااجي لهلي بيوم جنت گاعده اسفط بالخبز بالمطبخ اجه يزحف كعد جدامي ثلمت خبزه انطيته زغيرونه خبزه يعلس بيها

يباوع بوجهي الطفل شكله مايروح من بالي
دخلت للغرفه فطومه بحضن عمتي شايلتها
كعدت وكعد يمي عمي
حط مخاد اثنين عاليات وكال اتمددي
لان من يوم السويت العمليه لازم نومتي تصير عاليه اله اثنين مخاد وره ضهري لان اذا نمت
على مخده وحده ناصيه اختنگ تخنگني البطاريه

عمي صاح بغصون گالها جيبيلها مااي بسرعه
خطيه ارتبكت لان فقدت جسمي وحلگي وشفايفي يرعشن وابجي عيوني مايرضن يبطلن دموع

جابتلي غصون ماي اخذ الكلاص من ايدها دار بيده شويه ماي غسل وجهي والبقه كال اخذي اشربي

اخذته ايدي ترجف وعيني على فاطمه اتخيلها هي بمكان ابن حنان
مديت ايدي العمتي كتلها انطيني فطيم

جابتها حطتها بحضني لميتها الصدري ابوس براسها
يربي ماكو شي اعز من الضنه تحسه مخلوق من روحك اذا صار بي شي انت تنتهي

الليل كله مانمت عيون الطفل ابالي
صارت كل ذكره تخصه تمر بدماغي ردت انام ماكدرت
انقهرت ع الطفل وبس كلهم مايهموني لو يحترگون مااضوج عليهم

ثاني يوم سووله ترحيم فقط لان بعده صغير
نسوان المنطقه تروح تترحمله وترجع
اكو جاراتنه العصر يجن يم عمتي يسيرن
لو يلتمن بالباب لان حديقه وشجر عالي داير مداير الحديقه ماننشاف كلش

اجن جاراتنه من الفاتحه يم عمتي
كعدن بره بالصاله سمعت صوت نسوان كتلها غصون اخذيلي الكرسي اكعد يمهن

غصون طلعت بيدها فاطمه محد اجه اخذها اكيد التهو بسالفه ابن حنان
نهضت من مكاني مالي خلگ الكلشي احس هدومي اثگال عليه

طلعت يمهن اسمعهن يسولفن بحال حنان

سلمت عليهن وكعدت كدامهن بمسافه ع الكرسي وفطومه تفتر جدامهن تمشي وتوگع

المره،، يخاله لوتشوفين شريجتج تكسر خاطر المابگلبه رحمه ملخت روحها حاطه الممه مالته وتفتر
تحسها راح تتخبل الطفل من امس دفنو بليل
لان جده مارده مرد وام لواء واگعه من شايفه ابن ابنها هيج صاير بي

يگولون من امس فاقده بالمستشفئ وضعها تعبان
هم خطيه راح ابنها وفرحت بحفيدها الله عوضها بي
تالي حتى هو راح

زينب،، اسمع وانقهر بس ع الطفل
اتخيل منضره جوه التاير روحي تشوغ

المره،، سمعت امه البطنها ولد بلكت الله من تجيب وينترس حضنها تنسه ابنها المات

ام مثنئ،، لوتجيب عشره ماتنسئ البزر عزيز ام شاكر

المره،، اي والله عزيز اني وليدي الجبير عمره ثلاث سنين غرگ بالبحيره مال السمج وخلفت سبعه فوگه بس مانسيته لسه ماكلني الندم على وليدي

ام مثنئ،، الطفل الزغير لتخافين علي من يموت لان روحه بالجنه خوفج علينه احنه الكبار
المتروسين ذنوب ترس

المره،، اي والله ياخيتي

زينب،، حجت الثانيه گالت
والله يخاله يازينب امس نسولف بيج نكول
لو بنيتها عد جدادها جان هسه بنت زينب الميته مو ابن حسين
سكتت ماحجيت عيني على فطومه
سبحان الله يمكن لو ماجايبها حسن جان هسه بنيتي بمكانه
رجعت استغفرت الله لان محد يموت ناقص عمر كلمن يموت بساعته

النسوان اترخصن وراحن بس ضليت اتذكر احجايتهن حنان حامل بولد

رجعت للغرفه وفطومه وكلتها غصون خبز وجاي تثردلها بالطاسه تحب الخبز والجاي
شبعت ونامت بحضن غصون
شالتها غصون تبوس بيها
جرتلها مخده وبطانيه نيمتها وغطتها

ردت اتصل بحسن بس استحيت يمكن هسه حسن ملتهي بالوادم التجيهم تاخذ مابخاطرهم

انتضرت بليل اتصلت بي جاوب صوته تعبان
سلمت علي واخذت مابخاطره

ردت انهي المكالمه گال

حسن،، تدرين زينب مامقهور بس ع الطفل
لان خطيه لكن ربج راد يحرگ گلبهم بالطفل البري
لان النجس كلشي مايصير بي الحوبه توگع بالنضيف
النجس الله يعلعله بالدنيا قبل الاخره
يحرگ گلبه بعزازه

هسه احجيلي فطومتي اشلونها؟؟

زينب ديري بالج عليها گلبي يمها والله
تدرين صرت اخاف عليها اكثر من قبل
واذا صار بيها شي وهي يمج اشنقج
تدرين بيه مخبل واسويها

زينب،، ابتسمت من بين دموعي لان انقهرت علئ ابن حسين گتله الحافظ الله

حسن،، ونعم بالله وهي هم راح تضل فتره يمج لان الوضع تعبان تدرين لارحت ل امي للمستشفى
ولا نزلت يمهم

من اريد اطلع من البيت تتلگاني الوادم بره كاعدين لان المظيف جاي يصبغون بي

زينب،، حجتلي غصون عن سالفه حسن واشلون حارگ مضيف ابو
گتله اشلون حرگت المضيف؟؟

حسن،، زينب تره لسه من اذكر كلامج بخصوص موضوع حسين الشيطان يتربع براسي يوزني حتى اروح اجمعهم بغرفه واحرگهم وهمه عدلين وانعل ابهاتهم

يمكن لو ماواگعه انتي بساعتها جان رميتهم
بس وگعتج الله خلاها سبب الي حتى ماابتلي بيهم

يالله زنوبه عطلتج ديري بالج على فطيم
لاتخليني بالي يمها تره صرت اخاف عليها

زينب،، الحافض الله خيي دير بالك على نفسك

حسن،، فداج حسن يبعد اخوج يالله في امان الله

زينب نهيت المكالمه ردت انام مااگدر
تعبت من النومه على ضهري
بس هسه مااكدر انام صفح وخاصتا ع الجهة اليسره

وره يومين سمعت ام لواء ضاربتها جلطه وشالتها وهلمره ايدها ورجلها وحلگها صاير صفح
بسبب الصدمه

هي من مات حسين انشلت بس بمرور الوقت والعلاج صارت تمشي خطوتين وتكعد ماتكدر وانوب اجتها موتت ابن حسين صفح كملتها عليها وانشلت فد مره

ابد ماسألت على وضع لواء ولاردت اعرف شي عنه
كانه الله سبحانه وتعالى مثل مازرع حبه بگلبي
شاله نهائيا من گلبي كانه شخص غريب مااعرفه
ولاتأثر بااخباره
مااحس اتجاها غير بالاشمئزاز والكره وحقد دفين
يمكن لو اشوفه يموت جدامي ماايرفلي جفن ولاانقهر علي

وره يومين گتله عمي كافي خلوني اروح يم اهلي
وامي هم خطيه دام فطومه يمي خل تشبع شوف منها

ابو مثنئ،، بكيفج بنيتي واذا اهنا واهناك ماكو فرق هم كلساع تلگينه يمج وشتحتاجين اني ابوج

زينب،، جريت ايده ردت ابوسها سحبها وجر راسي باسه

عمتي قبل يومين راحت للسوگ اخذها عمي
جابت اهواي ملابس لفطومه حتى هدوم الي جابت
غرگوني بكرمهم بحيث احسهم يعاملوني بحنيه اكثر من غصون متعاطفين وياي

هدوم فطومه كلش حلوات من فرحتي كلساع اريد البسها شكل
غصون تاخذلها صور وتحتفض بيهن لازمه گلبي خاف يجي لواء ياخذها وساعتها مااراح اكدر انام براحه لان گلبي وعقلي راح يضلن يمها
لان ابنهن مادارن اله بال انوب يخلن بالهن من بنتي؟؟

رجعت لهلي امي خطيه كيفت صح تجيني يوميه تشوفني بس مومثل مااكون يمها وجدام عينها

امي شويه شويه بده وضعها يتحسن
اويمكن تحاول تبين انو هيه قويه حتى ماتأثر على نفسيتي واتعب

شهرين فطومه يمي نشنشت وصارت اتخبل حتى سمنت كل شويه امي لو مريم لوغصون يوكلنها
صارت وكحه موگعه رجلين مريم تركض وراها

حسن كل كم يوم يجي بليل كلش بدون محد يدري يجي محمل الها غراض اگله لتجيب يگول عود لاتاكلين منهن ماجايبهن الج
امي ماتقبل وتضوج لان اهلي واهله بينهم دم وعداوه تشوفها صعبه
بس حسن مايعتبر روحه من ال منهل

مرات يگلي احس بيتكم كتله مال محنه
تحسه من بعيد بي ريحة محنه وطيبه
المحنه الماحسيتها يم امي وابوي
صرت اشك انه موابنهم لان مااكو اهل هيج ظالمين

اهله دورو مصلحتهم الشخصيه اعتبرو حالة اهل العلويه وفقرهم راح يفشلهم هذا الشي جدام الوادم ف اتخلصو من الساده بصوره بشعه ولانهم ساده وعدهم بخت وناس فقره بختها عثرهم
وكملوها بضلمي حتى الحوبه تغسلهم غسل

من كملت الشهرين اتصل حسن گال لواء يريد فاطمه
وگال باجر جيبها لان ذيج الفتره جنه تعبانين بسبب موت ابن حسين

من سمعت كلام حسن بجيت مااريد انطيها
گتله حسن دخيلك اني بشاربك گله خلي يبقيها يمي

حسن،، زينب بس لاتبجين تره كسرتي باب گلبي
وهو هم ابوها تره راح تخبلون الطفله
خليها فتره يمه واني هم فتره واجيبها يمج اخذيها من شاربي والله

زينب،، نهيت المكالمه بس روحي تفرفح
حاطه فطومه وابوس بيها
احس گلبي تعب غصون صاحت العمي لان انتهيت من البجي
اجه عمي حاول يسكتني لويهديني ماكدر

احسهم يردون ينتزعون جزء مني
رجعت عليه نفس اللحظه الاخذها مني لواء من اجيت لهلي

لامه فطيم الحضني وابجي بوست وجها
عيونها دنگت اشم برگبتها اريد اترس ريتي من عطرها

بس ماجاي اشبع
حضرت مريم جنطتها تبجي كل اهلي وبيت عمي اتعلمو عليها خابصه البيتين
كلها تركض وراها اجت تمشي وتوگع
شهرين صارت تركض وشابعه وگعات وفشخات
كل شويه وانضربت بشغله

كلها تخاف عليها توگع على عينها وتتاذه
مريم لازمه الجنطه حسن اتصل العصر
گال حضريها جيت اخذها
عبالك گال اجيت اخذ روحج

رادت مريم تشيلها كتلها عوفيها اني اسلمها بيده
اتصل حسن گال اني بالباب اطلعو

اخذتها وطلعت حاضنتها ودموعي تجري
ابوس بديها
طلعت صار بوجهي حسن واگف يم باب سيارته
باوعتله انهضمت جر حسره

حسن،، كافي زينب لاتبجين موزين عليج.
تره لواء ابوها هم گلبه نار عليها
بس لان جان الوضع موتمام خلاها يمج
لتبجين والله فتره واجيبها

زينب،، خيي بنيتي
امانة الله ورسوله حسن

اخذها من ايدي مااريد انطيها اخاف يهذرنها وتالي تتكهرب لو تغرگ هنه ابنهن مادارله بال انوب يتنوعن لبنيتي؟؟

بحضن عمها بجت ومدت ادياتها الصوبي تريد تشمر روحها بحضني
گلبي نغزني احس دگاته صارن 1000من القهر اختنگت حسن صعد وحطها بحضنه وكفت يمه عيني ليها
شگد حاول يطمني بس ماسكتت
تالي اخذها وراح گعدت بالتراب بالگاع وعيني الصوب السياره
ابجي بصوت عالي وگلب محروگ
اندب حضي واصيح اهنااا يفطييم ييمه
،،،،،،
روحي الفرح بجفاك ضل بنفسها
فصليه وبعاشور صادف عرسها
،،،،،،
غصون،، طول الفتره الجانت بيها زينب يمنه مااتصلت بساره ولاحتى فتحت شبكه بالجهاز لان ملتهيه بزنوبه وانوب اجت فاطمه اخذو كل وقتي واتعلمت عليهم زينب نصي الثاني
كانه اني وياها توم بكلشي حتى بمصايبنه متشاركات

بيوم الراحت زينب لهلها ضليت بس اني بالغرفه
جريت الموبايل اول مافتحت الواي فاي اجتني اهواي رسائل من ساره

دزيتلها لايك دقايق وضهر مرئي
جاوبتني

ساره،، هله بالبذاته

غصون،، كتلها تدرين بيه ملتهيه ويه زينب والله وكلش مشتاقتلج

اشلونج انتي وعمتي اشلونها؟؟

ساره،، كلنه موزينين واكثرنه ذياب تعبان

غصون،، سكتت ماحجيت

ساره،، تدرين غصون صرنه نشتاق نشوف ضحكته
وانوب اجتنه مصيبة ابن حسين يادوب نشوفه لان يخلص الوكت يم عمامي

والمصيبه عذراء رجعت لعيالها ويوميه مشاكل وطلايب هي ورجلها تتعارك ونور انگلبت ضدها
هسه اكثر مشاكلها ويه نور النهار كله يتمالخن

وذياب مايحجي ويه عذراء يكول لو يذبحها رجلها مالي شغل بيها ولاادخل بشي يخصها

من يوم الرحتي وحالنه انگلب بيتنه تحسه موحش لاضحكه ولاسالفه اني اجي الخاطر امي
اغسل ملابسها انضفلها اطبخ واروح تعبت بين بيتي وبيت اهلي
تحسهم غربه وعايشين بنفس البيت

غصون،، ماقاهرني غير ساره خطيه خمس سنوات متزوجه وماعدها اطفال من حللت طلعت هي نسبتها ضعيفه مرت حماها عدها 6جهال ودوم تحجي كدام ساره ماصار عندج؟
خطيه رجلج هم نفسه بطفل
لومرات اتگلها رجلج كبر وماعنده ولد

هذا كلام حماتها تخلي ساره تموت قهر وتبجي رجلها خوش انسان وحباب يعرف بسوالف مرت اخو
فيجيب ساره يم اهلها من يروح للدوام من الصبح خاف تضوج وحدها بالبيت ويرجع ياخذها بليل
ومن يكون خفر يخليها اتبات يم امها

غصون،،گتلها الله يصلح حالكم
حجيتها وسكتت
نهيت المحادثه ويه ساره
لگيت روحي وحدي بدون تفكير دخلت على حسابه

ناشر منشورين واحد صورة الطفل وعرفته ابن حسين لان كاتب عليها اسمه وكلام ويه الصوره الناس تترحمله

نزلت ع المنشور الثاني قريته احس كل حرف بي يقصدني

ذياب،، أني افتقدك أكثر من أي وقتٍ مضى إلى ذلك الحد الذي لا تصورهُ المشاعر ولا تورخه الكلمات
لقد انتهى نوفمبر ولم أشعر ببرودته بقدر ماشعرت ببرودةأفتقادك
ليتكَِ تدرين كم هو كئيبٌ ذاك الصباح بدون ضحكة صوتك، وكم هو ناقصٌ ذاك اليوم الذي يخلو منك،
حتى الاماكن تبدو باهته يعتريها الاشتياق، وينقصها دفئ الحنين إليك، وكأنّ شتاء بعدكِ قد أصابها بصفعة برد، تسببت لها بحمى فقدٍ وهذيان
ليت خاطري يستطيع البوح عن ما يجول في مكنونه ليت خلجات روحي تعبر عن غفيرُ مشاعرٍ قد فاض بها الحنين فكل التفاصيل من دونك يعتريها النقصان

غصون،، قريت وبجيت طلعت من الحساب بسرعه گلبي يدگ احسه واگف كدامي ويحجي
من ابجي ماانطي مجال للحزن يسيطر عليه اكثر
بسرعه انهض الزملي شغله اشتغلها لو اطبخ لو انضف البيت لو الزم كتبي اقره بيهن

مرت الايام والوضع نفسه مخلصتها يم زينب لان من رجعو اخذو فاطمه تعبت نفسيتها وكل شويه توگع تتخربط واكثر شي اول ايام خلصتها لاتاكل ولاتشرب

تبجي لمن تتعب يالله تنام
اباوعلها وهي نايمه اليشوفها يخاف حتى شعر البراسها ينحسب احساب
وجها فجوجها مبينه عمتي تحجي عليها تكلها من تمشين اكول راح تنگطم ولج يمه الله يساعد گلبي وليدي دفنته بيدي
والله يساعد الراحولها اثنين واثلاثه
انتي بنيتج يم ابوها
لابد يجي يوم ربج يردها الحضنج

كل كلام المواساة مايصبر گلب زينب علئ بنتها
كل ماتسمع صوت تطفر تخاف عبالها يجيها خبر فاطمه انسحگت كل خوفها وتعبها ودمار نفسيتها على بتها

ابوي جابلي خط جديد محد يعرفه غير بس اهلي وساره وحلفتها ماتنطي لذياب ولان اثق بيها واحبها امنت بيها

وره شهرين اتصلت بيها العصر اسمع هوسه يمها كلشي ماافتهمت بس الاسمعه بكل وضوح صوت عذراء تفرفح

ساره،، غصون بليل اتصل بيج

غصون،، خير خوماكو شي

ساره،، بليل افهمج سالفه تخص عذراء

غصون،، ماشي

نهيت المكالمه وبالي يم عذراء شبيها وهيج مبينه من صوتها فاقده اعصابها؟؟
وفعلا بليل اتصلت بيه ساره وانصدمت من گالت

ساره،، عذراء صارلها كم يوم عند اهلي زعلانه

غصون،، سالتها ليش؟؟

ساره،، لاگيه عقد زواج محكمه بجيب الستره مال رجلها اكتشفت متزوج عليها ماخذله وحده موضفه وياه بالدوام ومأجرلها بيت وحدها
عاقد سيد ومحكمه ومحد يدري بي
وهسه عدنه زعلانه

غصون،، بگلبي گلت سبحانك يارب صدگ من حفر حفره لاخيه وقع فيها
شگد حفرتلي عذراء تالي هي الوگعت والله سبحانه وتعالى شربها من نفس كاس اللوعه والقهر الشربتني منهن
فعلا الدنيا دواره وكما تدين تدان
حتى لو طال الزمان لابد يجي يون الله ينصرك وياخذ حقك
دائما ابوي يگلي ربج ياخذ حقج وحق زينب حتى لو بعد حين
لان الدنيا دوراه وراح تصيب الظالم بما ظلم
والشامت بما شمت والمسيئ بما اساء
الله سبحانه وتعالى ينطي كل شخص حسب عمله اليقدمه اذا كان ظالم يجي يوم ينظلم
واذا ستر علئ عرض الناس بدون مايشهر بيهم يجي يوم ربي يستره
الكل شي او عمل في الدنيا اله مقابل
احترم تحترم
اعطي تاخذ
اصبر تنول
هاي هي الدنيا لكل شي مقابل
سوي زين وانسئ ولاتضل تسولف بزينك للناس
حتى الله ماينساك (وماكان ربك نسيا)
الله ماينسه خير قدمته
اوهما افرجته
لان الدنيا راح ادور ويلقي كل فاعل فعله
الزمان راح يثبتلك هذا الشي

وره يومين رجعت بليل من عمامي دخلت للغرفه لان من ارجع اجي متاخره مريم. وعمتي يوگفلي بالباب منا لمن افوت البيتنه الگه اهلي نايمين

فرشت فراشي واتمددت جريت موبايلي شفت
ذياب ناشر منشور

ذياب،، هل تراقبني كما افعل انا؟؟
لا اعتقد ذلك فاانا دائما من يبالغ بمراقبتك

غصون،، فجاة اجتني رساله منه

ذياب،، حبيبتي لازال فراك يبكيني ك الأطفال

زينب،، ثلث شهور واني ماشايفه فاطمه گلبي يلهب نار على بنيتي
اذا احط لگمه بحلگي اشوفها جدامي اغمض تجيني بااحلامي
لامن كاعده ارتاح ولامن انام مثل البشر ارتاح

بالي دوم يمها
اختنگت من البيت اريد اهج اريد اشرد
اتمنيت ماجايبه فاطمه تمنيتها ميته ابطني ولا شلعان الگلب هذا

اتصل بحسن يگلي زينه والنهار كله يمي
فعلا احس حسن صارلها أم واب
مرات اگول مستحيل يكون بشر مثلنه
حسن ملاك الله سخره الي والبنتي
ماكو اب يسوي السواه حسن
موانوب هو عمها مو ابوها

بليل كاعده كلت خل اتصل بي اريد اسمع صوت فطيم ماينفهم منها شي بس تغوغي يم راسه وهو يخرب ضحك عليها
تلفي يمه اكثر ماتروح لبوها حتى حسن يكول تصيحلي ابا وتنهزم من لواء تخاف تروح يمه
حتى هو يموت قهر من يشوفها ماتريده
رغم ياخذها يشيلها ويفتر بيها
تخلصها بجي ماتريده

حسن كلشي يحجيلي عنهم احسه اخوي الماجابته امي حتى الاخو مايسوي سوايته

حجالي اشلون صايره معاين بالشغل بين نذيره وحنان
ذيج تصيح حامل ونفسيتي تعبانه من مات ابني
ونذيره اتگلها اني هم مات ابني وماختلت مثلج
واثنينهن تاركات الشغل البيت صاير وصخ
وحتى اكل يتعاينن ع الغده يتعاركن
وبالعشه يتعاركن
بس همزين اني اسمعهن وفرحان لان راح يتخاربن بيناتهن
لواء ماله شغل بيهم اليشوفه يگول هذا بوادي ثاني موويانه
ومنهل واگع بيها ومن يحجي حنان تبينله انو هو السبب بدمار نفسيتها تخلي يسكت

اما غفران محتاره باام لواء لان صارو ياخذون الحاجتين من جواها مشلوله شلل تام

حسن يگول عدها سكر وابو السكر لازم ياكل وياخذ علاج حتى يستقر وضعه وهنه ناسيات امي بدون اكل ريوگ مامنطاتها تتريگ لاگيها فاقده الوعي هابط سكرها ماخذيها للمستشفى يركضون
بيها لواء مقسم عليهن نوبه ثلاثتهن يهتمن باامه

وصايره معارك بينهن لان تعبن منها وهي ماصارلها كم شهر من انتكست حالتها وانجلطت

ثاني يوم ا صرت الوب بالغرفه اريد بس اشرد
العصر لبست عباتي وردت اطلع احس الحوش صار مثل التابوت يخنگني

ام احمد،، وين تردين بنيتي؟؟

زينب،، يمه اريد اطلع اختنگت
ماادري المن عايشه كون اموت وارتاح

ام احمد،، اسم الله يايمه والله مابيه بعد حيل للقهر
اوگفي وين تردين؟

زينب،، نازله للبستان اتمشئ بلكت ترتاح نفسيتي

ام احمد،، لاتنزلين وحدج اخذي اختج وياج

زينب،، تركت امي وطلعت مااريد احد وياي
اريد اطلع وحدي مااريد صوت بشر يمي
صرت احب العزله بشكل موطبيعي حتى اكثر وقتي اخلصه ساكته مااحجي

نزلت للبستان مال جيرانه ننزل بي ونطلع على گاعنه الانطيناها للشيخ
وبصفها من ذيج الجها كاع ال منهل

بس من انزل للبستان اشوف بيتهم اشوف باب الحوش مالتهم من بعيد
اتذكرت اخر مره جنت حامل بفاطمه ونزلت ويه لواء
شگد جنت فرحانه بي احسه بيده بناني وبيده هدمني الدرجه صرت ارض غير صالحه الكلشي
حتى ماينفع ينبني بيها بناء جديد
امشي واجر حسرات
اتمنيت ارجع انام بذيج الغرفه البارده الجامعتنه اني واخواني بس ع الاقل جنه انام براحه مومثل هسه انام والف غصه بروحي

دايره وجهي ملتفته البابهم اتمنى اشوف حسن شايل فطومه احس فاض بيه الصبر ماعندي طاقه حتى اصبر

البستان اهواي بي نخل وشجر جنت امشي وملتفته البيت الشيخ
درت وجهي اباوع الدربي تفاجئت بلواء جدامي بمسافه يتمشئ بالگاع
جاي من جهة گاعهم الصوبي

يتتبع

بنات بعد بارتين وتنختم القصه
بس ماانشرهن اذا ماانطي للقصه حقها
من اشوف روحي نقلت كل الاحداث وماتركت
سؤال وراي اوحدث ناسيته
بذيح الساعه يالله ابدي بالنشر