رواية ضحية لمن لايرحم الفصل الخامس عشر 15 - بقلم زهراء الحسناوي

تمشي احچايتي لوردت امشيها
الاباله سوالف يستلذ بيها
وانه ابالي سوالف لاح بيهن شيب
يطلع راسها ومستحئ مغطيها
مسودن بالحجي بس عاقل من العيب
وين الگه المسودن مثلي واحجيها؟
ينراد الحجي الموزين للموزين
ينراد وگلتها ومامسويها
مرات الطفل ينطيك حل وراي
ومرات الشوارب ماتثق بيها
يعجبني النخل مادنگ الفلاح
سلتك فارغه اصعد وحط بيها
الماعنده جرح،، لايلچلم المجروح
العين الماتقدر الكحله تعميها
الشالت راسها من اول المركاب
تدري الفوگها معدل وراعيها
بديلك نهر واضحك اذا عطشان
وگطرة مستحاتك لاتبديها

،،،،،،،،،،،،

ضحيه لمن لايرحم

بقلم زهراء الحسناوي

،،،،،،،،،،،،
زينب،، فقدت لزمت راسها ضربته بالحايط اني اضخم منها وهي مثل عصفور يطفر
انفشخت مااهتميت
فرغت سمسمه كلبي بيها حطيتها بالكاع ونمت فوكها والله حتئ عضيتها احس سنوني طبگن سن علئ سن بيدها

علئ صوت صريخها ماحسيت غير دفره بخاصرتي حسيت نفسي اختنكت لان اجت الضربه بكليتي

لزمت صفحتي مختنكه اباوع نذيره صاحت

نذيره،، تكتللللين بننتتتي؟

زينب، صارت الدفرات والراجديات عليه مثل المطر
انوب جنه وغفران كامن ويه امهن ادفع وحده تهد الثانيه عبالك مسلم وكع بيد يهود

معشتني نذيره من راسي وبحركات سريعه تضرب علئ وجهي انطيتها ضربه ابطنها من حلاه روحي
الروح عزيزه

وبلحضه اجتني لطمه علئ خشمي منها واختل توازني دخت واحس ماي بارد ينزل من خشمي
باوعت علئ روحي غركان صدري دم

ماهدني منا لمن تعبت اديهن
صرت اشوفهن واسمعهن بس مااكدر احجي واحس وجهي انتفخ

شالتني نذيره من ياخة ثوبي تسحل بيه اكوم واوكع جرتني البيتهم وخشمي يقطر كدامي بالكاع
دخلتني للبيت ماكو احد فتحت غرفة امها وشمرتني بيها يم ام لواء الفزت ماتعرف شكو

من حجتلها نذيره عضت اصبعها اتكلهن ولللجن ماكسرتن اديها
جرت العوجيه مالتها ضربتني علئ ضهري احس عمود الفقري اتهشم

ورجعت ضربتني علئ رجلي ضربه وره ضربه
من الالم الم بروحي اتلوه كدامها وهي مستمره
زحفت ختلت بزويه مال الغرفه

وهنه يفرفحن ويعدن ويصفن فجاه وسمعت اصوات زلم لان البيت انخبص بالصريخ والهوسه والغلط

دخل ابو لواء ولواء وراه اسمع صوتهم بس مدنكه ضامه راسي بين رجليه

ابو لواء،، ياساتر ياررب ولجن شكووو

نذيره،، بوويه هااي الادب سزز فشخة جننه ركعت راسها بالحايط وذيج وينها اختها تعقم براسها

زينب،، اجت جنه لازمه راسها وتبجي وغفران وراها
واشتغلن بالحجي ثلاثتهن يحجن سوه وبصوت عالي عاط بيهن

لواء، بسسسس وحده منجن ترطن موووكلجن

زينب،، جنه كالتله خالي اني احجيلك
وكعدت تحجيله اتكله حركه الجبه مالتي واني بس حجيت وياها كلمه ركعت راسي بالحايط

كملت كلامها ودنكت تشوف لواء راسها

لواء،، روحي جيبي الجبه

زينب،، جنه ضلت صافنه

لواء،، شجاي احجي؟
روحي جيبيها

زينب،، هي وامها وحدة تباوع للثانيه راحت جابتها واجت انطتها ال لواء رفعها

لواء،، لتكولين حركتها
گولي انتي متعمده تكويها حتئ تحترك

جنه،، لالا خالي والعباس

لواء،، لتحلفين تره موطفل جدامج ومايفهم

زينب،، التفتت لمه كمل كلامه
حجيه اني مامن اكول امي مره خيره وتامن بقضاء الله وقدره
تالي ماادري عايفلي عصابه تهتك حق المضلوم حتئ الله يهجم بيتي فوك ماهو مهجوم

وانتي جنه خالي جبه احتركت يطبها مرض اجيبلج عشره بمكانها ماتسوه تسويلج هوسه عليها وشوفي شمسويه بيها وجها خريطه واكيد مو وحدج ضاربتها مو؟

زينب،، نذيره ضل وجها ينطي الوان رادت تحجي رفع ايده سكتها

لواء،، مع الاسف عليج يبنت ابوي جنت متوقعج غير شي

زينب،، نذيره ضلت فاتحه حلكها اجه يمي رفع راسي وجهي بس دم من خشمي
ولاول مره كومني من زندي نهضني وياه
ردت اوكع بس هو شد علئ لزمه ايدي

طلع من الغرفه واني وراه كوه امشي
وكفنه كدام المغسله

لواء،، غسلي وجهج ونومه بالمخزن بعد ماكو غراضج كلها تنقليها فوك الغرفتي

زينب،، انوب اني الانصدمت ضليت فاتحه حلكي

لواء،، يالله بويه فضيها

زينب،، غسلت وجهي خشمي احسه وارم رفعت راسي للمرايه اي والله وارم مااكدر الزمه

ردت ادعي عليهن بس استغفرت الله لان ثلثين الدعاوي ترجع ع الداعي

لواء،، راح للمخزن كملت ولحكته بس مستحيه منه اول مره يصير بيناتنه هيج موقف كل مواقفي وياه قبل مجرد اشوفه من بعيد فقط

دخلت لكيته يباوع للكنتور التفتلي

لواء،، يالله اخذي بس ملابسج

زينب، دنكت كتله ل لاابقئ اهنا

لواء،، بيج بعد تنكتلين؟

زينب،، رفعت راسي كتله لا

لواء،، ادري بشنو تفكرين
بس اني اريد اخذج يمي حتئ مايحجن وياج بعد لان ساعتها يدرن انتي بحماي
جنه بنت اختي بس اني مومن الفضاء وغريبات عني حتئ مااعرفهن حافضهن حفض

زينب،، احس فشله اروح وياه اهنا بالمخزن ماخذه راحتي حتئ لو هو يعتبر رجلي وحلال بس رجليش؟
زواج حتئ اخاف انزع حجابي كدامه اكول خاف حرام
لان سامعه زواج ب الاجبار حرام لان يعتبر بدون موافقه العروس واني هم هذا الزواج كله جان غصب فما مقتنعه بالفكره
رفضت اصعد وياه للغرفه
هو من شافني رافضه ماحجه كال بكيفج

،،،،،،،،،،،،،،،،،،،،،،،،

لواء،، التحقت لللوحده مالتي بس هلمره نزلنه وحده جديده مااعرف واحد بيهم لان جماعتي كلهم استشهدو والعجيب كل واحد بيهم جاي ياخذ ثار العزيز عنده
وكل واحد بينه حالف مايتراجع اذا ماياخذ بثار صاحبه لو اخو لو ابو لو كرايبه

رجعنه الجرف الصخر بس كانت المعارك طاحنه
بين الحشد والدواعش
مامخلين شي صاحي زارعين عبوات بكل مكان حتئ بالبساتين

شهر كامل اني مانازل ومتعمد ماانزل مجاز كل ماتجي اجازتي اخلي واحد من الشباب ينزل بمكاني لهله
كاره البيت والمشاكل عندي اضل يم صوت المدافع والرشاش ولاارجع واسمع الهوسه مال النسوان

مرات قليله الي شفت بيهن زينب حتئ ماجنت اعرف شيصير بالبيت
حتئ بايام تواجدي بالبيت اطلع مااضل وارجع متاخر

بيوم النزلت مجاز تفاجئت بالمعاره الصايره
جنه مفشوخه وتبجي وزينب ماينعرف شكلها من الدم خاتله ترجف بالزويه
جنه حسها يلعلع وزينب حتئ من تبجي بدون صوت

من كثر ماشايف مصايب بحياتي صرت اعرف الصدك من الجذب واعرف الشخص الماكول حگه من الشخص الباطل اليريد بصوته العالي يثبت. برائته وحسن نيته
وجنه اعرفها من هي زغيره وكحه وشالعه كلوبنه بمشاكلها بالمدرسه كلها تشكي منها ومن تنمرها ع البنات
برج من راسي طار من شفت زينب شصاير بحالها عرفت جنه الغلطانه
زينب حتئ لو فصليه بس حلالي ملكي اني الاتحكم بيها وبس شي تابع الي ومامسموح ال اي شخص ياذيها مهما كان السبب

هذا الشي من الله عز وجل من يوم اليعقد السيد عقد الزواج بين شخصين الله ينزل ع الطرفين محبه وموده حتئ لوكان بينهم ثار

لان موهي الكتلت حسين هي مره لالها حول ولاقوه
ومن زمان اني كاره العادات والتقاليد والسناين العشائريه الي لحد يومنه هذا مطبقين هاي الاعراف الي تخص الفصليه والنهوه والديه

جنت دائما من اشوف الطلايب التجي لبوي واشلون تنساق المره بدون رحمه وتروح ضحيه بدون ذنب
اكره وامقت هاي العادات بداخلي اكول اذا لاسامح الله بيوم نحطيت اني بهيج موقف ورادو اختي فصليه
ماانطيها لو علئ كص رگبتي
اذا اني وكح وسبع واكتل ابن العالم
ف اكمل مشكلتي واروح غصب عني اسلم نفسي لعائلته بدل مااتحامه وره اختي وانطيها فصليه حتئ تدفع ثمن غلطه اني المرتكب مالتها

من شفت زينب والحال الوصلتله ويه جنه
مالكيت روحي غير طلبت منها تنتقل بغرفتي حتئ جنه ماتكدر تحجي وياها بعد

قبل جنت ازمخ بيها لو اعاقبها بس امها تزعل
وامها اختي الجبيره ومره مكسوره زلمتها استشهد
ومالها غيرنه ف اضطر اسكت الخاطر امها واعبرلها
بس غلطاتها كثرت

فاجئتني زينب برفضها جنت كل نيتي اخلصها
بس هي فهمت طلبي منها غلط
كل ضنها اريد اطبق عليها حقوقي

تركتها من شفتها متردده وخايفه بس جنت متاكد راح بيوم الكاها وحدها صاعده الغرفتي بدون مااطلب منها
من تشوف ضاق عليها الخناق بسبب تصرفات جنه
من كيفها راح تجيني مهزومه

،،،،،،،،،،،،،،،،،،،،،،،،،،،،،
غصون

ضليت صافنه بوجه ذياب قريب مني كلش
رجعت ضهري لوره استندت ع الكاونتر
حط ادي من الجهتين ع الكاونتر حاجزني بالنص

ردت يغمه عليه من الخوف
دكات كلبي عبالك داخله سباق

ذياب،، سالتج ليش تنهزمين مني؟؟

غصون،، ا ان اني م مهزومه؟

اباوعله ابتسم وميل راسه رجع باوعلي

ذياب،، لاابوي

شنوعبالج مامنتبه عليج؟
كل مااجي تنهزمين وحتئ من ننجمع ع الاكل تختلين

غصون،، ضليت بس ابلع بريكي
اتقرب مني همس يم اذني

ذياب،، تره مرتي انتي

غصون. بمجرد ماحجاها دفعته وركضت للغرفه
فتت وسديت الباب قفلته بس جسمي كله يختض من الخوف احس انفاسه بعدهن ب اذني

خررب هو مويحب حماه عذراء لعد شكو يحب ذيج وعينه مني؟؟

ضليت فتره طويله من الوقت بالغرفه
فزيت علئ صوت الباب عبالي هو بس ارتاح كلبي من سمعت صوت امه
نهضت فتحتلها الباب
شحجت المره وياي ماسمعتها ولا افتهمت منها شي
وكل ماتحجي كلمه اكلها اي

رفعت راسي شفته وراها يم الدرج مكتف ادي ومبتسم

تالي هو عافنه وصعد يدندن
ابن الاوادم ولاجن قبل شويه هبطني احس كلبي صار برجليه من الخوف

،،،،،،،،،،،،،،،،،،،،

زينب،، عافني وراح ضليت محتاره مااعرف تصرفي صح لوغلط
رحت سديت الباب بدلت ثوبي كله دم اخاف اطلع ويصيرن كبالي

غده مااتغديت خانسه بالمخزن ضهر وحاره الدنيه مابي لامبرده ولامروحه سقفيه
اكو مروحه ارضيه صغيره من انام احطها يم راسي
اطرطر الليل كله صوتها عالي لان وحده من الريش عوجه واطخ بالشبجه مالتها

للمغرب اني ماطالعه
اجه جود وهاذا اعتبره الوحيد بيهم الكلبه نضيف ويخاف عليه

جود،، ليش امي وجنه يضربنج؟
لتضوجين تره حتئ مرات ماما وجنه يضربني وماازعل
وانتي هم لتزعلين منهن حبابه

زينب،، ابتسمت رغم المي كتله مازعلانه منهن حبيبي
بكلبي كلت طفل ويتعذر دون امه واخواته يريد يبرر فعلتهن الشنيعه لان كلبه ابيض مابي حقد

جريته كرصت خده دخلت غفران كالتله امي مومحذرتك متفوت لهنا
الطفل خطيه بسرعه طلع لان يخاف من امه

طلع جود مددت اريد بس انام جسمي يون
وريحه الزفر مال الدم تارس خشمي
كلت خل اكوم افوت اسبح
طلعت ملابس اخذتهن كوه امشي جسمي يوجعني من الضرب

رحت للحمام ردت اسبح اباوع جسمي مليان كدمات ازرك وبنفسجي من ضرباتهن بديت اسبح وكل مااصب ماي علئ راسي احس توكع دموع بكد الماي ترست البريج وخليته يمي بين مااكمل اليف
كملت وجريته سبحت فتحت البوري اريد اترسه واكمل سبح لكيت ماكو ماي

لعنت حضي خلص الماي واني بعدني احس كلي وغف مال صابون نهضت ضليت محتاره تالي نشفت وبدلت وطلعت
رحت للمخزن رجعت ملابسي الجنت لابستهن
دخلت جنه

جنه،، يالله يالمسعده تعاي جهزي العشه
ولاعبالج خالي دافعلج شفتي نفسج علينه
تره مادام حطيتج اهنا مااطلعين ابد

زينب،، تحجي وتاشر علئ راسها بمعنى خلتني ابالها
هي راحت واني لفيت حجابي بدون تمشيط كلت انتضر شويه بلكت يجي الماي واكمل سبح احس روحي مدبگه من الشامبو

وصلت قريب ع المطبخ سمعت جنه خربانه ضحك وتحجي ويه امها اتكلها سديت عليها كاك المي

متت قهر واني اشوف الاي درجه وصلت بيها النذاله والحقاره
دخلت للمطبخ شافتنيز اتخصرت باايد والايد الثانيه حاطتها ع الكاونتر تضرب ب اضافيرها اطلع صوت

نذيره يالله يالمسعده سوي عشه بلكت كتلت اليوم تسويلج درس
قسما بالله لوفاتحه حلكج اعبي تبن

يروح لواء. لومايروح؟
اكيد يروح للدوام ويخليج اهنا تحت رحمتي اكفخ بيج ادبسزز

زينب،، اسمع واشتغل بدون صوت

كملت عشه وصبيتلهم ردت اصب النفسي

نذيره،، اتركيي انتضرينه من نكمل اكلي ورانه

زينب،، اني هم وخرت وعيني ع الجدر ميته من الجوع ريوك مامتريكه وغده اتغديت كتله منهن
وهذا عشه واني ماحاطه لكمه بحلكي
واني مو حايط هم بشر دم ولحم اجوع واشتهي اكل مثلهن

من اجيت اليوم امي حطت 15 الف بجيبي كالت يفيدنج
ردت ارجعهن بس ماقبلت كالت خاف تردين شي بيهن ولوعندي انطيج بعد بس ماعندي

بلعت الغصه وكعدت يم الطباخ انتضرهن بين مايكملن

نص ساعه وكملو رحت نقلت الاكل بس لواء ماموجود اسمعهن يكولن نايم

نقلت الاكل ونذيره تلم بالزاد من الاماعين خلتلي علئ صفحه بالله العضيم مابي الماعون خاشوكتين تمن الاكل قليييل كلش
خليت المواعين بالسنك حتئ اغسلهم
وهنه راحن وكالن سويلنه جاي
حطيت القوري ورجعت كعدت بالكاع
فتحت السفره الجابنها بيها الزاد الواكع

طلعت قطع خبز صغار خليتهن ويه التمن وكلتهن بس مهضومه ابلع بالعبره يالله تنبلع اللكمه

كملت واخذتلهن الجاي بس بعدني ماشبعانه

الساعه تقريبا ب10راحن البيتهن گلت همزين راحن حتئ افتح الثلاجه واخذلي طماطايه وخبزه

من تاكدت منهن ماهنه ردت افتح الثلاجه ماتنفتح
عرفتهن قافلاتها دورت علئ جدر الخبز ماكو هم ماهوه
سلمت امري لله ورجعت للمخزن للصبح اتكلب اتكلب من الجوع

ثاني يوم هم بديت من الفجر اشتغل واتريكت نص كرصه خبز واستكان جاي

بالغده سويت تمن ومرك باميه
من ردت اصب اجت نذيره

نذيره،، اسمعي ولج خاف اخوي يطلب منج تجين تكعدين ويانه موتجين تره اموتج
اذا صاحلج وطلب منج كولي لااتغديت قبلكم فهمتي؟؟

زينب،، ويه حجايتها لدغتني بكرصه
وفعلا من صبيت صاحلي
رحت وكفت اباب الصاله

لواء،، تعاي يابه تغدي ليش عازله روحج

زينب،، دنكت كتله اتغديت قبلكم حجيتها ودخلت للمطبخ

من كملو انطتني جنه سله مليانه ملابس وسخه

جنه،، روحي اخذيهن اغسليهن بيدج بصابونه لان ذني قمصان بيض مالات جود ماتنضفهن الغساله

زينب،، عفت المواعين ورحت بسطت بيهن بالحمام وكعدت اغسل ساعه كامله اني اجلف بيهن
ماكملت اله روحي طلعت من بوخه الحمام

وروحي انمردت من الجوع رحت للمطبخ شفت طاسه مرك بس مغطايه بماعون بي شويه تمن
فرحت كلت يمكن انكسر خاطرهن ومكثراتلي تمن ومرك الطاسه مليانه مرك ويمها كرصه خبز

اخذتهن ورحت طايره للمخزن من جوعي گلت مااوصل واشبع واترس معدتي اكل
حطيتهن ونزلت دوسه ونص بيهن
بقت ربع الطاسه مركه ولكمه خبز بيدي
خليت الخبزه بالمرگه ورفعتها وجان اشوف صرصر
منگع مرگ

احس الاكل الاكلته راح يطلع من خشمي
لعبت روحي
كمت اركض مالحكت اتقيئت اباب المخزن
روحي روحي احسها طلعت

رفعت راسي جنه رفعت حاجبها
حجتلها كلمه وراحت

جنه،، الف عافيه

زينب،، وحگ هو ابو الحسن علي اشكد اتقيئت واحس معدتي مليانه بعدها
من حقارتها كاتله الصرصر ومخليته بجعب الطاسه بنهايه المركه حتئ من اكل مااشوفه لمن اشبع

رجعت كوه كمت رحت للتواليت جبت ماي
وطلعت وصله قديمه غسلت المكان

ورجعت اخذت ملابسي ورحت سبحت من جديد
لان دمرت هدومي

يومين مرت من يجي لواء يخنسن مايحجن وياي بس يذبن سمهن من جوه لجوه
لكن من يطلع يرجعن يخبثن لويضربني

اسبوع وجهي بعده بي اثار ضربهن ولواء كال باجر التحق

الضهر جنت بالمطبخ اغسل مواعين الغده دخل الشيخ بيده موبايله حطه ع الميز وشكل الشاحنه يشحنه تركه وراح للمضيف هو متعود ينام بالمضيف الضهر يكول هدوء

ونذيره وبناتها راحن البيتهن مدري شعدهن هو بيتهن مخلياته بس النومه الليل
يجن من غبشه البيت الشيخ مايرجعن اله من ينامون بليل

دااكمل المواعين نزل حسن من غرفته شفته من نزل من الدرج
راد يطلع باوعتله رجع شال موبايل ابو

كعد ع القنفه واتمدد وضل مدري شيسوي بالموبايل بس يضحك

ربع ساعه هو بيده تالي عافه ورجع صعد الغرفته

ضليت اني انضف بالكاشي وامسح بالطباخ
لان محرمات عليه انام الضهر مثل البشر
ساعه ودخل الشيخ شايط عباره عن كتله غضب

وراه دخل لواء الشيخ ركض علئ موبايله اسمعه يگول

شيخ منهل،، مقفول ماكووو غيره هاي سوالفه التعبان

زينب،، مافهمت شكو علئ صوتهم والشيخ يفرفح يصيح حسسسسسن انزل ابن الكلب

نزل حسن بكل هدوء وكف بنص الدرج كاله

حسن،، غلط لاتغلط خليني محترمك

شيخ منهل،، ولك اكووول خطيه منطيك مجال
بس انييي صدك كلب ابن سطعش كلبببب انطيتك مجااال فضحتني جدااام امه محمد ياسربوووت

زينب،، اجت نذيره وبناتها يركضن وام لواء طلعت بعربانتها تريد تفهم شكو تليفون لواء كل شويه واحد يتصل ولسه مافهمنه شنو السالفه

ام لواء،، يمممه شبي ابووك فهمممنه

شيخ منهل،، ببببيه مرررض من وره ابنج رباالي عله شكوووول ع الفصليه نقذته لوميييت موو اشرفلي ولاهاي الفضيححححه

ام لواء،، هسه غييير نفهم حسن شمسوي؟

شيخ منهل،، ااابنج المخبل ماخذ موبايلي واني مطمور وداخل علئ صفحتي مال اعلام العشيره

المصيبه كل العشاير داخله وياي عندي اصدقاء

كاتب اني حسن ابن شيخ منهل
ابوي انسان دكتاتوري وضالم كلش
لكن بس اني الضالمني ومطيح حضي
حتئ اكل ماينطيني وقبل فتره اعترفلي كالي انته موابني انته لقيط
وبيومها اني شنقت نفسي بسبب كلامه
لان مااتحملت الصدمه
مااحجيلكم شلون يرفعني فلقه ويضربني
ولتنغرون بي لانه انسان مايخاف الله وسكير

يتتببببببع