رواية ضحية لمن لايرحم الفصل الحادي وسبعون 71 - بقلم زهراء الحسناوي

البارت 53

ضحيه لمن لايرحم
،،،،،،،،،،،،،،،،،،،،،،،،،،،،،،،

وكت خله الغرب تسألني عنك
يماتدري شكثر مغثوث منك
متيه وجهي من تشوف الجوه
عرف والحلوة ماشايفني چنك
شكثر شايلك وماشايل اعليك
جروحي ستغربن من باوعنك
گبل لارايح اتذكرهن وياي
العطش كسرة وجوه السمعة الماي
چنت غيمه وادور يمك افياي
رحت ودموعي بفراگگ قرنك
يالمبتعد عني ابتعد مني
شثگلهن ذكرياتك تعبني
كلشي يشبهك يبچيني مرات
بحيث هدومي بعدك يوجعني
عفتك والقصايد رجعني
مامعقوله صفناتك نسني
چنتلك زين وانت بكلشي موزين
مليت عيونك ومليت مني 💔

ذياب

،،،،،،،،،،،،
مساء الخير بنات
ذني البارتين ذكرت بيهن تفاصيل بسيطه
حتى مايضل شي مبهم
البارتين الاخيرات حيكونن اطول من سور الصين العظيم 🤦‍♀️
وبيهن كل الجلطات 😁
،،،،،،،،،،،،،،،،،،،،،،،،

زينب،، تحسه كارهن ومتاكد منهن هنه المسويات عمل

بعدها سألته على ام سجاد
لان ابد لاااتصلت بيه بذيج
الفتره كلها ولاحتى سألت عني

حسن،، ام سجاد عدها جان بناء
وهم امتحانات سجاد ورفل وانوب
واگعه ومتاذي الحوض
حتى من مات ابن حسين اجت يومين
وحدها ورجعت بس من خابرتني
وره فتره گالت وكعت ومااگدر اتحرك
رحتلها قبل كم يوم اخذت رقمج
مني لان خطها محترگ

وهم فشلانه منج اتگول ماتوقعت لواء هيج يسوي

واصلن مو بس هي حتى اني ماتوقعت لواء ينفذ كلامه وياخذ ثار حسين
وياريت اخونه

زينب،، سكت ادري راد يگول وياريت اخونه يسوه
احسه كلش متاذي ومجروح منهم كلهم
مرات يگلي كله صوجج انتي نقذتيني
لوميت جان هسه انه مرتاح منهم
انوب حجه على لواء شنو سبب منعه اشوف بنتي
اعرف غرضه يريدني ارجع

سحبت نفس طويل
ردت اغير الموضوع مااحب اسمع طاري لواء صرت اكره حتى اسمه

نهيت المكالمه ويه حسن
دخلت ع الصور اباوع لعين فطومه
اذا سوت عمليه
تطلع حلوه من يشيلون الورم
حايره بيها وخايفه عليها
كل خوفي اذا تسجلت بالمدرسه الاطفال راح يتنمرون عليها ويمكن يخلوها تكره حتى الدراسه

الحمدالله عدها عم مثل حسن
حاير بيها وشايل همها
حلفته قبل ماانهي المكالمه
گتله بداعة فاطمه اذا تحبها
من تريد تاخذها للدكتور بوقت عمليتها

اخذني وياك لاتخليني اهنا افكر وتخلي بنتي وحدها
ماكو مره وياها

گال لتخافين منا الذاك الوكت الله كريم
بنيتي حرموني منها وشلعو گلبي بيها
لاهي الضاله بحضني اشبع منها
ولاهي الماخذيها فد مره ومخليني اتعود على فراگها

مامصبرني غير صورها وفديوهات الها اضل اباوع عليهن بتالي الليل واشبع بجي

وره كم يوم اتصل حسن كلش ضايج سألته شبيك
تحسه صاير اعصاب

حسن،، ولج زينب راح اتخبل
جبت السيد للبيت وقره ايات
وافتر داير مداير البيت يرقي بالقرآن
ورش ملح وخل اخر شي گال بيتكم
محطوطلكم والحاطلكم منكم وبيكم

سألته منو الحاط السحر سيد منو حدد؟
گال مااگدر احدد بس الحاط منكم وبيكم

احس فقدت اعصابي ماقبل يحجي
حلفته ماقبل گال مااگدر حرام
افضح بس بيتكم مليان عمل شيطاني

ولج زينب وجوهن صارت صفر خافن لاينفضحن
والسيد ماقبل يحجيلي بس انطانه ماي مقري علي
خلاني اتخبل بالزايد لان ردته يكشفهن
تالي راح لو ادري ماجايبه حرگ روحي بالزايد

گلبت البيت على راسهن
حتى منهل اتعارك وياي يگلي منين تجيب هاي السوالف انت ومنو يحطلنه سحر؟؟
گتله اسأل الشيطان المخلفهااا
نذيره من تشوفني تشرد تخاف تصيحلي قباض الارواح
كون صدگ واقبض روحها وانعل سلفه سلفاها

زينب،، حسن يفرفح متاكد منهن بس مابيده شي
والسيد مبين خاف يحجي ويسبب مشكله

وره فتره سمعت حنان جايبه وطفلها عنده ضمور بالدماغ
ابد ماتشمتت بيها بس اهلي گالو الله اخذ ابنها الصاحي لان شافها ماتستاهله

مااهتميت ل اخبارهم ابد بس ادري الله سبحانه وتعاله گاعد على كرسي حق لابد ياخذ حقي منهم واحد واحد

عمي بهاي الفتره عرض گاعنه وگاعه للبيع
قطعة امي جابت 50مليون
حتى ماجنه متوقعين هيج راح تجيب مبلغ

عمي صار يدور على بيوت بالولايه حتى ننتقل
بس جانت اسعار طابو الصرف غاليه كلش
عمي ابو مثنئ يعرف دلال بالمنطقه
كلفه بالسالفة گاله اريد بيت بصف بيت حتى لو مو واحد بصف الثاني بس المهم يكونن قريبات وبنفس الشارع

وره كم يوم اتصل حسن
ينطيني فطومه اسمع صوتها وتردلي عافيتي
بنيتي جاي تكبر بعيد عن عيني
ابسط احلامي من تضحك اصورها لو من تشاكس اصورها
عايشه بس ع الصور اليدزهن حسن

كتله حسن الله يخليك جيبها والله احس على ساعه اموت خلوني اشبع من ريحتها قبل مااموت
شو صار شهور ماشايفتها ليش ماتجيبها يمي يومين

حسن،، اسم الله لتحجين هيج
زينب راح احجيلج شي لواء متخربط فد نوب
مانعرف شبي بس يتقيئ
عزلنا بغرفه وحده لان مايريد صوت يمه

حالته كلش تعبانه اگله خل اخذك للساده مايقبل
اگله خل اخذك لهل البيت مايقصرون هم مايقبل
موطفل هو حتى اخذه غصب عنه
تعبت ومااعرف شسوي

ساعه من اگله اخذ فاطمه ل امها تشوفها
يگلي اخذها وره شويه يغير رأيه يكول لاتاخذها

زينب،، ومرته وين عنه؟؟

حسن،، مرته حايره ب ابنها
تبجي ليل نهار والطفل كلساع يموت موته
يخليها تركض تهمش

وغير طلايبهن هي والسعلوه نذيره
ادري وحده لازمه ع الثانيه سالفه
بس مايگدرن يحجن لان وحده راح تفضح الثانيه

زينب،، الله سبحانه وتعالى من ينطينه نعمه
ويشوفنه مامقدريها ولاشاكرينه عليها راح يسحبها منه ويسويلنه جره اذن حتى نذكر رحمته ونعمته
حنان طغت وبسبب طغيانه خسرت نعمتها
خسرت ابنها الصاحي وانشلع گلبها باالطفل الجديد

حسن كل كم يوم يالله يتصل
ويفهمني وضع لواء كلش مدهور حتى اكل ماياكل
وحايرين بي بالمستشفيات

بليل كاعده اني وامي نسولف اتصل حسن
جاوبت
سالني منو يمج؟؟
جاوبته بس امي

حسن،، من تصيرين وحدج بس رمشيلي اني اتصل

زينب،، وفعلا وره شويه امي دخلت لغرفتها اتنام
رمشتله اتصل

حسن،، زينب راح احجيلج شي اتمنى تسمعيني

زينب،، لزمت گلبي كل ضني يگلي فاطمه بيها شي
كتله احجي حسن شبيها فطومه؟؟

حسن،، والله موفاطمه وكلشي مابيها اخذتها غفران توكلها
بس ابو فاطمه منتهي زينب وضعه حيل تعبان
مرتين گال اريد اشوف زينب

زينب،، الله يشفي

حسن،، زينب ادري السواه موقليل بس لواء منتهي
ع الاقل احجيلج كلمه وياه

زينب،، انت اخوي واحترمك واقدرك ولو تطلب عيوني مااعزهن عليك بس مال تكلي احجي وياه اعذرني يمكن لو اسمع بي ميت مايهمني

حسن،، زينب انتي ام گلب الطيب
واكيد راح تغيرين رأيج الخاطري

زينب،، سكتت ماحجيت وبنفس الوقت مستحيل احجي ويه لواء
لان الشفته يمه موقليل
لواء واهله دمروني دمار

وره كم يوم اتصل حسن لان صار يوصلي اخبارهم
الافتهمته منه لواء ماخذيله ناظور لمعدته
دزالي صوره الناضور يخوف
معدته بيها مثل وغف التايت والجدار مال المعده عبالك بي حروق مجوي

حسن گال انطو علاجات وبعد فتره ناخذله ناظور ثاني نشوف الوضع اشلونه
خايف لان وضعه مايبشر بخير

يوم عن يوم وضع لواء يصعب اتمرض كلش
الدرجة صار يفقد حسن يخابرني يبجي يگلي راح اخسر اخوي
بس العجيب ابد ماانقهر على حالته كانه الجاي يحجولي عنه انسان غريب
مولواء الجنت اشوفه كلشي بنظري

اسمع الوادم كلها تسولف بلواء لان منطقه ريفيه وبسرعه السالفه اطش
ناس تگول حوبة اليتيمه وناس تندعيله بالشفاء

كلها اتگول داخل مستشفى وضعه منتهي
صرت اتخيل على ساعه اسمع صوت صايح يوصلني خبر وفاته

ايام وهو على وضعه ساعه يفقد وساعه ينتبه
عايش ع المغذيات
حسن بليل يتصل يحجيلي عن وضع اخو
شكد حاول يخليني احجي وياه بس رفضت

وره يومين جنه كاعدين اباب الحوش العصر
كلها الوادم كل واحد يكعد ابابه لان ريف وعرب
موشارع ماكو سيارات
فننجمع اباب الحوش وتجي يمنه كم وحده من جاراتنه

اجت غصون وره شويه صارت مجموعه مال نسوان
اثناء الحديث فتحن موضوع بيت الشيخ
وحده منهن گالت اليوم الصبح رحنه البيت شيخ منهل اني وزلمتي نشوف لواء
خطيه صاير فد مره عازلي وحده بغرفه من الباب شفنا وطلعنه ساعه يفقد وساعه ينتبه

زينب،، سكتت ماحجيت
يمكن كل السواه بيه هو واهله اكدر اسامحهم على سواياتهم بس الا سالفتين الأولى جتل احمد بعد مااخذو فصلهم نفذو دگتهم بااخوي
والسالفه الثانيه سجل فاطمه بأسم حنان
من اذكر ذني الشغلتين لويحترگون ال منهل جدامي
هم ماارتاح ولاتخمد نار گلبي

غصون،، اني وزينب وحده تسند الثانيه
وحده نفسيتها تعبانه اكثر من الثانيه
اني اليشوفني يگول قويه مامهتمه للوضع
بس داخلي حطام

وره فتره اتصلت بيه ساره
گالت تعبت مااتحمل بعد ومرت حماي وحتى عمتي صارن يعيرني ويحاولن يقنعن زوجي ياخذ
مره عليه لان يشوفنه مرتاحين بيتنه وحدنه وماعدنه مشاكل يحاولن يخربنه

بس زوجي سحب فلوسه من المصرف
وحجزلنه على دكتور خارج العراق نروح نسوي طفل انابيب
بلكت تنجح العمليه لان اذا فشلت راح يدمرني بكلامهن شگد يحاول يردعهن بس هنه مستمرات
ومرت اخو مره جبيره يستحي منها يگول فشله من اخوي اذا احجي وياها خاف اخوي يزعل

وعلئ هلحاله لازم نسمع ونسكت
انقهرت عليها لان ماتستاهل
ودخيل الله لازم بكل بيت اكو حية مزروعه
تخرب الوادم بيناتهم

وصدگ وره كم يوم كملت جوازاتهم وسافرت ساره هي ورجلها
طول الوكت اندعيلها بلكت الله تنجح العمليه وينترس حضنها بطفل لان تستاهل
وغير هيج حتى تسكت حلوگ عيالها

ساره ذهب صافي عكس اختها الاتحسها راضعه ويه بليس من خباثتها

ساره بس تحجيلي عن عذراء اشلون هي ورجلها مشاكل لان تغار من مرته الزغيره وهو هم مدلل الجديده وعذراء يگلها تردين ترحين لهلج روحي محد مانعج الله وياج

يخليها تشيل روحها وترگعها بالگاع من القهر

شهر كامل ساره مسافره كملت العمليه ونجحت بس كالو ممنوع ترجع للعراق ع الاقل اربع شهور بين مايثبتون الاطفال ابطنها

بهذا الوقت انگطعت عني اخبار ذياب نهائيا لان ساره محتاره بوضعها
حتى ماعدت ادخل الحسابه لان اريد انسئ واعيش حياتي ذياب صار ماضي وصفحه مطويه
لازم انسئ حتى اگدر اكمل

مثنئ سوه صفحه لزينب حتى لتضوج وعلمها اشلون تدخل على كروبات مال طبخ وخياطه حتى تلهي روحها بدل ما النهار كله تبجي وتنعئ على بتها

صرت اتمنى اشوفها تضحك لو مبتسمه براحه
كانه موفقط بيت منهل اخذو عافيتها
لاهمه حتى روحها سلبوها

شگد يحاول ابوي وياها يريدها تطلع لو تغير جو بس هي معتزله داخل قوقعتها ماتريد تطلع ابد

محد من اهلي يدري عندي فيس
وهم مامعتبره السالفه مهمه حتى احجي بيها
مرات من افتح الرسائل التوصلني من ساره
اشوفهن مقريات عبالي قديمات
يعني عبالك اني قاريتهن وناسيه
ردت اگل المثنى يغير اسم الحساب ويشوف
ليش الگه الرسائل مفتوحه بس نسيت

يوميه ابوي يجي يكول لكيت بيت واحد زين والثاني بنائه قديم اريد كون بيتين يعجبني خو ماادفع فلوس والبناء تعبان وهم فتره ولازم ينهد

وره صلاة الظهر گاعدين ابوي گال

ابو مثنئ،، حضرو نفسكم اخذكم نزور الامام علي عليه السلام

غصون،، گال لخوي مرتضئ روح العمامك انطيهم علم گلهم ساعه ونطلع
راح مرتضئ ورجع گال يابه عمتي ماتروح وزينب هم ماقبلت بس مريم تروح

طفرت من مكاني ادردم على مريم اكلهم هاي بكل عزا لطامه اول مايكولون اكو طلعه تلگاها قبل الكل واكفه بالباب جاهزه
واني اريد زينب تروح تغير من نفسيتها

لبست عباتي ورحتلها لگيتها متمدده
داخله ع اليوتيوب مطلعه لطميه لباسم الكربلائي
اسمها ي جابر كلش حلوه مغمضه ودموعها تجري بهدوء كسرت خاطري
وبگلبي ادعي على ال منهل كون دمعة زينب تحرگهم لان دمعة يتيمه مكسور خاطرها منهم

گعدت يمها ردت اسحب الموبايل جرته مني

زينب،، عوفيني غصون

غصون،، زنوبه لاتضلين حابسه روحج كومي ويانه نروح نزور ونغير جو

زينب،، مابيه حيل ومالي خلگ اطلع خلوني براحتي

غصون،، ماكو شي اسمه خلوني براحتي كافي مااختنگتني من الغرفه حابسه روحج بيها النهار كله
احجي وياها وسحبت ايدها خليتها تعدل كعدتها

زينب،، غصون والله مالي خلگ اخذو مريم وياكم وروحو

غصون،،مانروح اذا ماانتي وابوي كال اذا مارحت زينب مانروح وناجل روحتنه منا الدورة السنه مال احمد بعد شهر

دگومي يمعوده والله ضايجين خل نطلع بجالج

زينب،، گوة گمت بدشداشتي لابدلت ولا شي بس توضيت ولبست حجابي وعباتي
امي گالت مااروح راسي يوجعني واذا رحت بالزايد اتخربط

ضلت يمها زينه واني ومريم طلعنه العمامي
من بعيد عمي شافني ضحك

ابو مثنئ،، هله بزنوبه تدرين لو مارايحه انتي
جان ذوله الگشونطيه كلهم نزلتهم تره رايحين بسريبتج لوماانتي محد يروح

زينب،، ابتسمت العمي وصعدت كعدت يمي غصون
وصلنه للامام مختنگه
نزلنه مسافه بعيده نتمشئ منا لمن دخلنه للامام احس گلبي يلهث تعبانه

عمتي ومريم جدامنه وعمي ومثنئ واولاد عمامي الزغار دخلو من جهة الرجال

اول مادخلت كدامي الشباج ونسوان هوسه صاير مدافع بفلس مااكدر ادخل ويخنگني

كعدت يم الباب الخشب
خليت راسي ع الباب وعيني للشباج بدن دموعي يتسابقن وصوتي يرجف همست

ياااعلللي
يبوو الايتاام علللي
دخيلتك اني يبوو الحسن لوتريح گلبي وتردلي بنيتي لو بجاهك عند ربك ياخذ عمري ويريحني

غمضت عيوني منتجيه راسي ع الباب ماابيه اگوم
گلبي وروحي يشكن لله ظيم وظلم عباده
مريض وحارمني من بنتي يفكر يلوي ذراعي بيها وارجعله سجينتك غرزتها بروحي لليوم جرحها ماشفئ ولااندمل ولاراح يندمل

حسيت ايد تندسني التفتت ورفعت راسي شفتها غصون

غصون،، كومي زوري الزمي الشباك

زينب،، ماتشوفيها مدافع صايره مااكدر

غصون،، دكومي وياي

زينب،، نهضت وغصون جدامي تدفع بالنسوان وتصيح وخرن مريضه مسويه عمليه لگلبها
بس تريد تاخذ مراد وخرن

وفعلا النسوان سولي مجال بس زرت وطلعت
لگينه عمي منتضرنه بره اباب الخروج
هو وعمتي ومريم

ابو مثنئ،، مقبوله الزياره للجميع يالله هسه خل نروح نفتر شويه شوفو شنو تردون وبعدين نكعدلنه بمطعم نتعشئ بي

زينب،، هو ومثنئ يمشون جدامنه واحنه وراهم
عمي وكف ورجعلي مد ايده الجيبه طلع فلوس حط بيدي
ردت اسحب ايدي مااريد عندي اليدزهن حسن

كتله عمي والله شايله فلوس عندي
ابو مثنئ،، ميخالف بويه اخذيهن واسكتي

زينب،، اخذتهن فشله اردهن بيده
بس كتله اني ومريم بيهن لان عندي جايبه وياي
سكت ماحجه

غصون،،افترينه شويه لان ماهونه بزينب نخليها تفتر وهي تعبانه موزين عليها تمشي اهواي
كملنه اشترينه كم شغله وابوي مررنه بمحل يبيع دهين ابو علي جابلنه كارتونتين وحده النه والثانيه للبنات

كملنه وكعدنه بمطعم اني وزينب وجهنا للباب صاير الجام گدامنه نشوف الوادم تمشي بالشارع

وابوي وامي كاعدين كدامنه ضهرهم منطي لباب المطعم ومثنئ دخل يمهم راح جاب الاكل واجه
كعد بجهة امي وابوي
خلينه الاكل جاي ناكل توني حطيت اللگمه بحلگي

رفعت راسي وجان اشوفه جدامي واكف بره
هو اواحد وياه يسولفون
احس ايدي صارت ترجف بمجرد ماشفته كدامي

صافنه للجها الواگف بيها هو منطينه ضهره
لان ضوه قوي اباب المطعم جاي اشوفه بوضوح
لابس دشداشه بيجي يسولف ويه صاحبه

دنگت مااريد احد ينتبه شلت الخاشوگه وگعت
رجعت لزمت الخبزه فلتت من ايدي

ابو مثنئ،، شبيج بابا ايدج تفلت؟؟

غصون،، بلعت الغصه الترست حنجرتي
جليت صوتي مااريد افضح روحي
كتله مابيه شي يابه

رجعت باوعت للجها الواگف بيها ماشفته
الظاهر مكتوبلي اشوفه اليوم بدون مايشوفني
لوينتبه الوجودي

زينب،، بليل كاعده لازمه موبايلي بيده اباوع الصوره فطومه مكبره الصوره واتمعن بتفاصيل وجها

دگ التليفون فزيت باوعت رقم حسن
جاوبته جان مخنوگ بمجرد ماحجه خنگته العبره.
سالته بخوف لان بنتي عدهم مايهمني غيرها

كتله شبيك خيي ليش تبجي؟؟

حسن،، زينب لواء منتهي اله بس الله حتى الطبيب كال اخذو للبيت يرتاح لان منتهي خلو يموت ابيته احسن

زينب،، ماجاي احس بشي ابد
عبالك اليحجي عنه انسان مااعرفه
من يوم الشفته بغرفة حنان الله طلعة من گلبي
نهائيا

سالته من باب المواساه لان مبين تعبان على اخو
كتله وهسه شراح تسوي؟؟

حسن،، ماعندي غير حل واحد
البارحه بليل حلمت ماخذه ازوره
الامام علي ابن الحسين عليه السلام
وشفت لواء صاحي كلشي مابي
بلكت الله واهل البيت صدك يتشافه ابوي ناذر ذبايح اذا رجعت صحة لواء

زينب،، هو يحجي واني بالي يم فاطمه
سالته كتله وفاطمه منو الها اذا انتو ملتهين بوضع اخوك؟؟

حسن،، لتخافين والله ماعليها شي
احنه يمها

زينب،، اخر شي نهيت المكالمه وياه
گلبي جمر بالي يم بنيتي
اكلت شربت نامت؟؟
وخاصتا هلفتره حسن اكثر شي محتار بلواء
ثاني يوم بليل هم اتصل حسن

حسن،، تعرفين هسه اني وين؟؟

زينب،، وين؟؟

حسن،، بالمحاويل جبت لواء
اني وابوي وذياب
خلينا نايم بالمقام جوه يم الشباك
وربطنه ايده ابيرغ
للامام املنه بالله وباهل البيت جبير انشاءالله مايقصرون

زينب،، ونعم بالله

نهيت المكالمه ويه حسن وبالي كله يم فاطمه
شاغله كل تفكيري
حسن صار فتره مويمها منو الها هسه
خاف يضربنها لو يجوعنها؟؟
اخاف عليها لان كلشي يطلع منهن

الفجر وجان يدگ تليفوني فزيت مرعوبه
جريت الموبايل رقم حسن يتصل
دخيلك ربي اخاف من اتصال تالي الليل تحس اكو مصيبه وراها
فتحت خط جاوبته اجاني صوته يصيح

حسن،، زيينب لواء تقييه
وللج تقييه زينب

زينب،، ضليت صافنه من خبصته وصوته والاصوات العاليه اليمه سد الخط بوجهي مااعرف شكو وشنو شبي لواء وشتقيه

ثاني يوم الساعه ب 10الصبح تقريبا اتصل بيه حسن
گتله خرعتني البارحه

حسن،، زينب اسكتي سالفه ماتتسولف

زينب،، خير يارب شكو؟

حسن،، احنه مو اخذنه لواء للامام وبيتنا يم الشباك؟؟

زينب،، اي

حسن،، وعلي زينب جبنا شايلي بالبطانيه منتهي گلنه مايوصل للصبح مايعيش

تالي الفجر قبل مااتصل بيج فز من نومته يأشر على حلگه
كلنه طفرنه وياه مانعرف شبي
تالي نهض وطلع يركض
اتقيئ خله الوادم صافنه علي

زينب،، گتله ليش شتقيئه؟؟

حسن،، سلابيح

يتتتبع