رواية ضحية لمن لايرحم الفصل السبعون 70 - بقلم زهراء الحسناوي

البارت 52

ضحيه لمن لايرحم

بقلم زهراء الحسناوي
،،،،،،،،،،،،،،،،،،،
مساءالورد
هذا بارت والصبح بارت
،،،،،،،،،،

نحنُ المُهمَّشون، نحنُ البدائِل،
نحنُ المُساء بنا الظن دوماً،
نحنُ أصحاب الإعتذرات
على الأشياء التي لم نفعلها،
نحنُ تبريرات على أخطاء لم نرتكبها
، نحنُ الجانب السهل والطريق
المُمهد والشمَّاعات المُهملة،
نحنُ المُنتَهزون كالفُرص والضائعون بلا ملجأ والمُتهمون بلا إعترافات أو براهين
، نحن الشعور بالذنب والندم ومنتصف الطُرق، نحنُ العتمة المُصطنعة، نحنُ الأيادي المتروكة والقلوب المخذولة، نحنُ الصُدور التي لا يعلم بزحام الألم فيها إلَّا اللَّه

غصون،، قريت كلامه وطلعت من المحادثه
بدون مااجاوبه احتراماً لثقة ابوي
لان ذياب رجع غريب مثل ماكان قبل مااروحله فصليه

اكو نار بداخلي شعور الغيره موسهل
اني غلطت بسبب غبائي بس جان يگدر يگعد ويفهم مني
الف مره حاولت افهمه وردعني بصوره بشعه
داس على كرامتي جنت اسكت لان انتظر تتحقق عداله الله سبحانه وتعالى واردله الصاع صاعين

مرت الايام واني وساره على تواصل تحجي عن يومها واحجيلها عن يومي لان اعتبرها صديقه واخت
ساره فطيره وفقيره مثلي وكلامها ويه الكل قليل اليشوفها يگول هاي غثيثه ماتتحاجه ورافعه خشمها
بس اليعاشرها راح يكتشف حلاوة روحها الطيبه

كل ماتفتح موضوع ذياب اكلها رجائا سدي الموضوع اخوج صفحه وانطوت من حياتي

ساره،، زين غصون اني هذا الحساب
راح اطلع منه وسويت حساب جديد
راح ادزلج طلب هسه احجي وياج منه

غصون،، دزتلي الطلب وافقت
مااعرف شي بالفيس ومو من اولوياتي
ماادخل للبرنامج اله من اريد احجي وياها
يعني مامتعمقه بالبرنامج وكلش افهم بي
حتى الإسم نفسه ماغيرته

مره ساره گالت غيري گتلها مااعرف
تضحك تكلي صدك دهن الثول
گتلها قبل جنت دهن الثول من جنت يم اخوج
هسه لا اني انسانه ثانيه
بس مخليه الاسم ماغيرته لان اريد اشوف روحي شگد جنت غبيه قبل
هلشي يزيدني قوه

نهيت المحادثه وياها ثاني يوم اجتني رساله من الحساب الجديد
مرات نحجي بالرسائل ومرات مابيه اكتب ادز بصمات

ساره دزتلي رساله كتلها زينه انتي اشلونج؟

ساره،، موزينه

غصون،، عگدت حواجبي ادري بيها تضوج من تسمع كلمه من مرت حماها كتلها ليش شبيج؟؟

ساره،، ذياب موزين بدونج والله

غصون،، دزيتلها هو الجابها النفسه

ساره،، لان غبييي

غصون،، ضليت صافنه اول مره ساره تتجاوز على اخوها
گتلها المهم ماينفع الحجي بعد

ساره،، انتي بس انطي مجال وكلشي يتصلح

غصون،، كتلها ساره تره الطلابه زادت بين العشيرتين
حتى لو قبل اكو امل هسه بعد مااخذتو ثاركم مستحيل

ساره،، ماكو شي مستحيل انتي بس اقبلي كلشي يهون

غصون،، كتلج صفحه وانطوت مامستعده اثق مره ثانيه وانطعن بطعنه اقوئ
يمكن اذا رجعت من اول عركه اخوج يروح يجيبلي مره فوگي

ساره،، وداعتج ابد لان العيون التشوفج ماتشوف غيررج

غصون،، ابد ماانتبهت ومندمجه بالحجي

ساره،، من زمان ماشايفتج دزيلي صورتج

غصون،، دزيتلها ضحكه گتلها ولج الكفشه صايره قضيه شتسوين بصورتي وعطوبي مفجوره بيهن عبوة

ساره،، بكل اوضاعج حلوه
دزيلي صوره

غصون،، رفعت الجهاز والشمس المشرقه منثوره
اخذت صوره ودزيتها

اتاخرت بالرد دزيتلها ها انصدمتي تره ماكو ساده هسه الوادم نايمه وين نوديج من الخرعه؟؟

سكتت ماجاوبت تقره ومتجاوب
دزيتلها بصمه واني اضحك

اجتني رساله خلتني صافنه

ساره،، احبج

غصون،، بسرعة شكيت بيها موساره
ايدي كامت ترجف
دزيتلها دزيلي بصمه

ثواني واجتني بصمه خلتني اجمد بمكاني
كلشي بيه ارتعد من سمعت صوته
يحجي بعبره خانگته

ذياب،، غصون

غصون،، حجاها وسكت اتحسه يريد يبجي
كلمتين حجيتهن وسديته
گتله عتبي على اختك وبس
سديته اديه يرجفن

جريت الموبايل دزيت رساله الساره ع الخط
كتبتلها للاسف خنتي ثقتي بيج

الف مره اتصلت ماجاوبتها
ضجت من تصرفها لان مااريد كلام بيني وبينه لان الجرح عميق كلش موسهله تشوف شخص تحبه
وخاصتا المراة واذا كان الشخص هذا زوجها بغض النظر عن نوع الزواج اذا كان عن حب لوتقليدي لو فصليه
يبقى نفس الشعور المؤلم يدمرك من تشوفه يخونك گدام عينك ومابيدك شي تسوي
ذياب بيده غيرني خلق مني انسانه ثانيه غير مباليه بمشاعره ولا تعبه وحزنه نهائيا

دائما افكر بنفسي القديمه قبل مااتغير
افكر بغصون الجانت تثق بالكل
بس ع الاقل جنت احس گلبي مامكسور مثل هسه
خسرت نفسي بمرور الوقت بسبب المصايب المأساويه المريت بيها

قبل جنت شگد فرحانه احس روحي كلي طاقه ايجابيه ماكو شي بداخلي فارغه ماكو حزن وقهر عكس هسه

اسبوع كامل ساره تحاول تحجي وياي بس جنت ضايجه من تصرفها تالي استخطيتها وجاوبتها

ساره،، خطيه ذياب صارله شهور يريد يسمع صوتج انطي فرصه الله بعظمته ويسامح ليش انتي مجاي تسامحي؟؟

غصون،، سؤال تكدرين تشوفين زوجج ياخذ عليج مره بدون مايكعد وياج ويفهم منج السالفه؟؟

سكتت ماحجت

ليش تسكتين؟؟
تره اصعب موقف صار بحياتي هو زواج اخوج
جابها واجه وكدام عيني راح يمها
خمس شهور اني احترگ بناري ومامبينه هذا الشي

كل السوته عذراء بصفحة وزواجه من نور بصفحه
ماعدت اثق بي نهائيا
الزواج بدون ثقه وتفاهم واحترام مايكمل ساره

ساره،، انتي هم الغلط منج
اثنينكم غلطانين موبس واحد
بس اخوي عرف غلطه ورايد يصلحه انطي فرصه

غصون،، ساره ليش مستهزئه بالوضع تره احنه عشيرتين بيناتنه ثار
اني اعزج واحترمج لان انتي الوحيده الي ساعدتيني
اذا الي خاطر يمج مااريد تجيبين طاري اخوج مره ثانيه

نهيت المكالمه وياها من اذكر كلمته وصوته بالبصمه احس راسي ينتفخ
اعصر بعيوني ماسمعت البصمه غير مره وحده
مااريد اسمع شي منه

مرت الايام والاشهر واني وساره على تواصل
عرفت منها عذراء راجعه الرجلها والمصيبه هي وشريجتها ابيت واحد بس كل وحده الها طابق بالبيت

بداخلي اگول سبحانك ياالله
شمهما تعمل تجازه وشسوت وياي عذراء
ربي شربها من نفس الكاس
وراح تضل طول عمرها تعيش القهر من تشوف رجلها يدخل يم مرته الثانيه گدام عيونها

مااعرف هي ونذيره شنو من گلب عدهن؟؟
الدرجة ياذن اخوهن
نذيرة دمرة لواء كرهتها من كلام زينب من يوم الدخلنه بي بيت الشيخ اول يوم هي الضربتنه عرفتها انسانه خبيثه بس ماتوقعت خباثتها حتى ويه اهلها

وعذراء كذلك يگولون العرگ نداس اكيد طالعه على بيت عمها ابو لواء تجري بدمهم الخباثه والحقد

ابوي اشتره لمثنئ سياره يشتغل بيها على باب الله
بليل يرجع متاخر لان يلزم كراوي مت محافظه لمحافظه ابقى كاعده انتظره لمن يجي اسويله خبيزه ياكلها

ومعتنيه بي بلبسه بااكله بكلشي يخصه
مرات يگلي بيش اجازيج؟؟
اتشاقه وياه اگله بس عرس وكفيني شرك وكلشي مااريد

وذني نذيره وحنان احتارن اشلون ياذن اخوتهن اتعجب عليهن وعلى كمية الحقد العدهن

بليل كملت طبخ عشه ويه امي
اتعشينه وغسلت المواعين
للعشره تقريبا احنه كاعدين نتابع مسلسل
بعدها كلها طشت كل واحد دخل الغرفته
واني هم دخلت الغرفتي جريت كتابي وكعدت اقره

ابوي اقترح عليه ادرس خارجي
اني ناجحه من الثالث متوسط
يعني گبل ادرس سادس
بس استصعبتها ما بيه اكعد اقره واحفظ

صح اقره كتب اهواي بس ماملنزمه بالحفظ
مثل الدرس وخاصتا السادس صعب يرادله تركيز

ابوي گال اني احطلج مدرسين خصوصي
كتله مااريد يابه عود من اشوف نفسي جاهزه اني اجي اگلك اريد ادرس

زينب،، قبل من جنت اشوفه احس گلبي يضحك قبل وجهي يتلگاه
هسه من شفته ماجاي اشوف بي غير شخص مابگلبه
كل رحمه
ماجنت متوقعه اشوفه جدامي ولا جنت مستعده للمواجهة لان كلشي بيه تعبان

درت وجهي مادايره هم الصوته يصيح باسمي وراي
غمضت عيوني واريد اشرد اتمنى اختفي
بلحظه وگف جدامي يمنعني اكمل طريقي

لواء،، زينب بس احجي وياج

زينب، رفعت راسي اباوع بوجها
شگد جنت احس بالامان يمه عكس هسه احسه وحش مايتأمن بي

مابيناتنه حجي ينگال
حجيتها وردت امشي رجع منع عليه طريقي

لواء،، بس اسمعيني چلمتين وداعتج

زينب،، ضحكت
وداعتي؟؟
هو شبقة مني حتى تحلف بيه؟؟

وخر من جدامي لاافظحك مابيناتنه حجي
انت جتال اخوي بيناتنه كره وعداوه وبسس

حجه بصوت ناصي

لواء،، وفاطمه؟؟

زينب،، الله يصبرني على فراگها وحسبي الله ونعم الوكيل بيكم
وخلي ابالكم يا ال منهل
كل قوي اكو الله سبحانه وتعالى الأقوى منه
اذا ماعندي سند لا اب ولااخ فسندي الله ياخذ حيفي منكم لانه سند الماعنده سند وراح ياخذ حق كل فقير ومظلوم بهاي الدنيا

قبل مايحجي تركته ومشيت بمجرد شوفتي اله هيجت كل الجروح اتمنيت لاطالعه ولاشايفته

رديت للحوش گلبي يوجعني
طلعت مختنگه رديت بخنگه اكبر منها
صرت اتمنى اموت اتمنى اروح اسكن يم اهل الگبور تعبت من كلشي

امي دوم اسمعها تبجي من تكون وحدها
فراگ ابوي واخوي هد حيلها
من ادخل عليها للغرفه الگاها لازمه شماغ ابوي
بي ثقوب لان قديم عود هذا اليطلع بي
لان ماعنده يشتري

تلزم الشماغ تحضنه وتبجي
تصيح مات تعبان مات متعوب لبس مثل البشر مالابس
يتعب ويجد وحارم روحه والله فالينته مشگگه
مرات مريم تتشاقه وياه اتگله يابه شبيها فالينتك؟
يگلها عاضها الجلب

تشوف امي جدامي ماتبجي بس بالختلات الگاها لازمه شماغ ابوي ومحفظه احمد بيهن فلوسه واثر دمه عليهن يابس تلمنهن الصدرها
تشمشم بيهن

صاحت المريم

ام احمد،، يمه باجر جمعه وصار ثلاث جمع ماماشين لعزازنه روحي العمج گليليه اذا يگدر الفجر ياخذنه للمگبره

زينب،، مريم لبست عباتها وراحت تحاجي عمي
شويه ورجعت
گالت عمي يگول هو ردت اگلكم نمشي باجر
وكال حضرن روحجن من الفجر نمشي بس زينب ماتروح

ام احمد،، اي يمه زنيبه لاتمشين يبعد امج
انتي مريظه لاترحين خاف اتعبين

زينب،، كتلها يمه گلبي وارم اريد اروح اشوف ابوي واخوي لومكتوبلي اموت جان متت من كثر المصايب الوگعن على راسي
لاتخافين كلشي مابيه

شگد حاولت تقنعني مااروح بس دگيت رجلي
مشتاقه ل ابوي
وانوب امي وزينه ومريم يرحون حتى امير ياخذو بالعربانه وياهم يعني بس اني ابقى
گتلها رجلي على رجلكم

الليل مر مرور الكرام مانمت ابد مشتاقه لبوي. عبالك من اروح راح يگعد يتلگاني
ناسيه من اروح مااشوف غير طابوگ مبني فوگاهم

للصبح الغصه ابلعومي ماصدگت
يطر الفجر نهضت صليت وامي واخواتي گعدن
زينه تصلي بس حافظه الله اكبر

تقلدنه رغم جنونها والمجنون ماعلي حرج
بس امي معلمتها تصلي هلتعرفه لوكلمتين
تتوجه بيهن لله

لبسنه وطلعنه عمي قبل فتره بدل سيارته
باع الخصوصي الزغيره اشتره بمكانها ستاركس
جبيره ينطيها لمثنئ يشتغل بيها على باب الله يلم عبريه

بس الجمعه مايطلع للشغل يرتاح بيها
طلعنه كلنه عمي شافني

ابو مثنئ،، شتسوين رايحه يابويه؟؟

زينب،، عمي خليني اروح والله مشتاقتلهم
سكت ماحجه مشه جدامي صعد بالسدر يم مثنئ
واحنه كل احنه بالوره عمتي مااجت مريضه بس غصون اجت ويانه قبط بينه مثنئ
رايحين نشوف الاعزاز

امي تون وحدها تباوع للطريق تون بصوت ناصي
وتبجي حاطه شيلتها على حلگها
وصلنه للمقبره نزلنه كلنه

نتمشه بالفتحه المدفون بيها ابوي واحمد
من بعيد شافت صورهم امي صاحت

ام احمد،، وصلنه المگبره والله وصلنه
هاي المگبرة وذولاك اهلنه

زينب،، كلنه ضجينه بالبجي مثل السبايه
واحد وره الثاني وصلنه يم الگبور
احمد وابوي دافنيهم واحد بصف الثاني
بس بيناتهم مكان فارغ
گعدت امي بينهم يم روسهم

تبوس گبر ابوي وتنحب
وترجع تبوس گبر احمد اتشم بالحجار تصيح افييش يااريحتك ياوليدي

لسان حال ام احمد وحال كل ام شهيد
وفاگده ولدها

ساكنين المگبرة
وعايفين دياركم
اشلونكم يحبابنه
ننشد اعله اخباركم
محد المنكم رجع
يبات بالعين الدمع
اشلونكم يحبابنه
ننشد اعله اخباركم
اشلونكم مالونكم؟
يالسكنتو بالتراب
والمباني اخلافكم
البين خربهن خراب
مشتهين انشوفكم
النه وياكم عتاب
صوبانه اغيابكم
بالگلب هذا الصواب
اصوابكم جوه الظلع
يسعر ويوجع وجع
كون ينباع العمر
نشتريها اعماركم
كون ينباع العمر
نشتريكم مشتره
انتم اعزاز الگلب
ماكو اعز منكم تره
داركم جانت زهيه
هسه ظلمه مكدره
بس صوركم بيها ظلت
والرسوم مسطره
ماتحاچينه الصور
نشوفها ونشبع قهر
نار فرگاكم چوتنه
ماطفت ياناركم
جمر فرگاكم لبد
يسعر ابين الظلوع
داركم ظلمه وحزينه
تصرخ وچنها تنوح
انتم الچنتو ضواها
وانتم الچنتو شموع
ليش عفتونه يتامه
ماتفارگنه الدموع
والسوالف والمحنه
شالن وياكم يهلنه

زينب،، امي تفقد من تجي ساعه تحاجي ابوي
وترد تلتفت لحمد

ام احمد،، ولكم نمتو اثنينكم ماگلتو ذني
نسوان وحدهن؟؟
يزلم حووشي
يززلم بيتتي
يشَمعة دارري
ولكم صدگ جذب اشلون اتغمض عيونكم
وماكو زلمه بداركم؟؟

ولك يمه حميد حاجيني يبعد امك
ولك يمه والله مانايمه ولامغمضه عيني

حلمت اعرسنك وافرح بويلادك يييمممه
ولك خلصت عمري مهضوومه ومتعووبه
گلت ارتااح بجالك ي احمددد ييييمه

زينب،، گوه غصون ومثنئ گوموها
عمي يبجي كاعد بعيد علينه يخليها براحتها
تبجي حتى ترتاح

اني كلش تعبت لازمه گلبي ياذيني
ماادري ابجي على منو؟؟
ابوي؟
اخوي؟
لو امي الصبرها خلص؟

كلمه وحده تتردد بلساني
حسبي الله ونعم الوكيل على كل ظالم

رجعنه للبيت امي منتجيه على جامة السيارة
اني واخواتي كلنه محتاجين امي تسندنه وتقوينه
وتربت علينه
بس بالحقيقه امي اكثر شخص بينه محتاج اليواسي ويصبره على بلوته
ماعدنه زلمه بالبيت بس نسوان
قبل جان صوت ابوي يملي علينه البيت
وحتى طلايب احمد جانت مسويه روح بالبيت
هسه صفينه كلشي ماكو

الظهر محد اتغده مريم صبت اكل بس لزينه وامير
امير خطيه يرادله عنايه واحنه كلنه تعبانين
عمره صار 11سنه جبير من ترفعه مريم بطولها
تنحثل بي تحطه بالعربانه مالته

قبل لااروح فصليه جان احمد يشيله
يحطه بالعربانه ويوميه يسبحه
مرات ياخذه يدفع بي بره الحوش
يكول خطيه هم بشر ويضوج

مرت الايام وفاطمه ماشفتها ابد
بس حسن يدزلي صورها
انتبهت الورم البعينها زغران ولون الوحمه صاير بنفسجي جانت وردي

وحتى جفن عينها مرفوع مبين شويه من فص العين قبل جانت مسدوده تمامه ومن تباوع ترفع راسها لفوگ لان تحس بثگل على عينها

اتصلت بحسن سالته على فطومه

حسن، زينه والله هاي جنيتج اطارد خابصتني

زينب،، فتح سبيكر وصاحلها گالها تعاي هاي ماما
اجت كلشي ماينفهم منها بس ترطن غو ماغو
اسمع وابجي صوتها بلسم لجروحي
بلعت عبرتي
گتلها بصوت يرجف اشلونج فطيم بنيتي

اسمعها تسولف بس ماافهم حسن اخذ الموبايل يضحك

حسن،، اتگلج عيني اواا

زينب،، ييمه شبيها عينهاا؟؟
حسن بروح الحسن شبيها عينها؟؟

حسن،، هوبج يمعوده والله كلشي مابيها
بس بنتج مفضوحه من هسه ماتعرف تضم السالفه

زينب،، ياسالفه؟؟

حسن،، مودزيتلج صورها ماانتبهتي العينها؟؟

زينب،، بسرعه گتله اي انتهت اكو شي بعين فاطمه
لان شويه مرفوع الجفن

حسن،، بيوم الاخذتها منج وره يومين اخذتها لدكتور اختصاص تجميل

زينب،، گلبي زادن دگاته مديت ايدي خليتها على مكان البطاريه همست اي وبعد؟؟

حسن،، الدكتور حددلي موعد بنفس الاسبوع
گال جيبها اضربها ابره بالوحمه ابره توقف نزيف الدم
يعني توقف ضخ الدم للعين حتى ماتكبر الوحمه
وهم يتقلص حجمها بمرور الوقت

وفعلا اخذتها انطاها بنج قليل خدرها وضربها الابره
وانطانه موعد بعد 7شهور يكون عمرها سنتين
اخذها نسويلها العمليه
لان منا الذاك الوقت الابره تكون ماخذه مفعولها ومزغره الوحمه كلش

زينب،، گلبي يرجف كتله اي وبعد

حسن،، حددلها ثلاث عمليات قلع لان احنه نشوفها وحمه جبيره لان مختلطات بس هنه ثلاث وحمات
بنفس المكان وحده بصف الثانيه
كبرانات وصايرات شكلهن بنفس المستوئ

بعد سبع شهور يسويلها قلع لثنين

وبعدها بكم شهر يقلع الثاالثه

ومن يصير عمرها 4سنوات ناخذها نسويلها عملية ترقيع

واخر عمليتين تجميل وترجع عينها طبيعيه نفس عينها الصاحيه

زينب،، بجيت طفله من زغرها راح تاكل شوغة العمليات والالم ورهبة المستشفيات
يعني راح تسوي عمليتين قلع وعملية ترقيع
وعمليتين تجميل يعني خمس عمليات اذا مو اكثر

حسن،، لتخافين زينب والله مابيها شي
وابوها راح وياي يعني مووحدي
مااخطي خطوه بدون علم لواء
مهما يكون هاي بنته واذا صار شي اني المسؤؤل

ف انطيته علم احسن

زينب،، خيي اروحلك فدوه جيبها يمي كم يوم والله گلبي راح يسكت عليها

حسن،، سلامتج بعد اخوج
والله ردت اجيبها الج بس ابوها ماقبل
لواء متغير وضعه بلكت الله يرجع مثل
قبل

اكو سيد يعرفه ولد صاحبي راح اجيبه للبيت بدون علمهم اريد اصدمهن
وسمعت بي يعرف وينطي اسم المسويه سحر
يابويه كون صدگ من اجيبه يگلي افلانه
اله اشنقها اباب البيت وحگ الله

يتتتبع