البارت 46
ضحيه لمن لايرحم
بقلم زهراء الحسناوي
،،،،،،،،،،،،،،،،،
أجيت وگلبي ماجبته
مااضعف ردت ولهل سبب عفته
وشفت عيونك بسكته
گتلي اشلونك وگتلك
انه مشتاگلك وانت؟؟؟
،،،،،،،،،،،،،،،،
زينب،، احس رجليه انصلخت صلخ
من شوغه گلبي صرت اهمش مثل الغرگان المصيبه اريد اصيح مااكدر زلم بره واكفه بالجها الثانيه من البيت طبيت اركض صامه حلگي
من صرت بالصاله بجيت بصوت عالي
مرات من ينجوي اصبعي بحراره بسيطه
ياخذله شويه ينگد بكلبي
مو انوب انهلطت من منطقة الركبه لجوه
نسيت اني وين ومنو يمي احس گلبي نجوه مو جسمي
من شوغت روحي رفعت ثوبي اباوع الرجليه مهلوطات من فوگ لجوه الجلد صاير مثل النايلون. المايع
اجه لواء وحسن يركضون سامعين بيه مجويه
ولا حسيت بوجودهم الطم على راسي
الم ماينحمل
لواء،، بس اركددي خل اشووف
زينب،، ولااسمعه محتاره بالسعير البرجليه
كعدت بالكاع صفگت خدي بقوه
رفعت راسي كتله رببييي اخذهاااا مروتتك اخذهاا
قصدت روحي ياخذها لان تعبت
حتى صرت احسد الينام مرتاح بليل
اجن نذيره وحنان وكفن بالباب نذيره كالت هي مالزمت الگدر عدل وفلت منها
باوعتلها بقهر مااگدر اجاوبها كتلني الالم
اتگلب بالگعاع مثل الطير المذبوح
حتى مااكدر اصيح ساعه اسد حلگي بيدي وساعه اعضها
زمخ ببيهن حسن
حسن،، ماتووولن تجيبن الها عبابه وهدووم ماتشوفنها تتگلب؟؟
زينب،، صعدت غفران ركض من زمخ بيهن حسن جابتلي عباتي وثوبي
حسن طلع وسد الباب وراه ولواء كعد يمي
ماحجه بس كال غير تنتبهين لو دايره الجدر على گلبج جان احتركتي فد مره
الزم الثوب اريد البس يوگع من ايدي اديه يرجفن مدري اشلون نزعت ثوبي ولبست غيره
حطيت اديه بالگاع گوه گمت اتمنيت اغمض افتح الگه روحي بالمستشفئ
الطريق من الغرفه للسياره احسه صار شبعده
لواء مايكدر يشيلني لان رجله بعدها موكلش يمشي عليها مثل قبل
والمصيبه الوادم تارسه الطريق
حسن ركض فر السياره من الباب الثاني مال الحديقه باب زغير نطلع منه ع البستان
امشي واوصي بيهن اگلهن بنيتي امانة الله ورسوله لاتخلنها تبجي
تالي لواء صاح ولج امشي ماعليها شي بنتج
اخذوني للمستشفئ خوف والم فضيع
وصلنه للمستشفى
حولونه لقسم الحروق گال الدكتور لازم نسلخ الجلد لان منتهي
هو حجه هيج لو اني اخذني الرجيف والبجي سن يطگ بسن
بدو يسلخون الجلد روحي طلعت حتى من ولدت موهيج الالم ماسيطرت على روحي كمت اصيح
حسن مادخل ويانه
بس لواء مثبت رجليه ماخلصت اله واني منتهيه مابيه حتى ابجي
الدكتور،، راح اكتبلها عصاره امريكيه مرهم للحروق ماراح تلگاها اهنا ولابكل صيدليات الموجوده بالناحيه مالتنه بس. اكو صيدليه متوفره عدهم هاي النوعيه وجدا زينه ماتترك اثر للحرق كلش بس غاليه
لواء،، اكتبها دكتور المهم ترتاح
زينب،، نايمه اون حطولهن مرهم
كال الدكتور لازم يوميه تجيبوها نسلخ الجلد الميت
كملنه ورجعنه للبيت اريد اتقيئه كتلني الوجع وصخنت
بالي يم بنيتي صارلنه ب الاربع ساعات بالمستشفئ
مارضعت من الفجر من نامت اكيد هسه گعدت تبجي
بلكت الله يحنن گلوبهن وينطنها حليبه
رجعنه للبيت الوادم متغديه ومخلصه بس بعد اكو زلم بالمضيف
حسن قبل ماننزل كال لاتنزلين رايح اجيبلج عربانه لواء وارجع
وصدگ خطيه نزل يركض جابها واجه كوه نزلت
لواء انطه الحسن اسم العصاره كاله روح جيبيها
وتعال
اخذ الوصفه حسن وراح ولواء دخلني يدفع بيه مااكدر ادوس ع الگاع
دخلنه للبيت وجان اسمع صوت فطيم فحطانه صوتها خله گلبي يفز عليها ماصدگت اوصل يمها
والله گلبي حس شامراتها بالگاع بس يمكن من عرفن بينه رجعنه شالنها جدام لواء
لگيت نذيره شايلتها اباوع لبنيتي مفتحه تك عين تبجي عيونها يجرن وخشمها كذلك
اخذها لواء شالها يسكتها ريگي ناشف من الصايح
اشرتله بيدي كتله جيبها
لواء،، ماعليج بيها هسه تسكت
زينب،، حجيت بصوت تعبان كتله اسالهن رضعت؟؟
نذيره،، شربت اثنين ممات بس هي تبجي لان امها ماهي يمها
زينب،، لواء گال شيصعدج فوگ؟
ضلي بالغرفه الجنت انام بيها جوه
كتله لا مااعرف ارتاح اذا موبغرفتي
وفعلا كوه صعدت بايه اصعدها وبايه اجر نفس ودموعي تجري
لواء شايل فطومه خبصتنه بالبجي
من دخلت غرفتي كعدت ع الجربايه انتبهت الممه نفس مكانها مامتحركه ونضيفه مومال واحد مسوي بيها حليب اني متعوده من تكمل شرب اغسلها بماي حار واخلي الغلگ مالتها عليها
عرفت نذيره تجذب ومامسويه للطفله ممه تشربها
اخذتها من ايد ابوها تشمشم بثوبي ادور ع الصدر تريد ترضع
اول ماننطيته الها اخذته بسرعه سكتت دميعاتها بعينها
هي ترضع واني الوجع ذبحني افر براسي اريد ارگع راسي بالحايط
سعير ذبحني تحس الالم موبرجلك لا عبالك ينگد بگلبك
اول ماشبعت نامت بگلبي گلت شنو من بشر ذني؟
حتى ويه الطفله انجلبن؟؟
وره اكثر من ساعه اندگ الباب عرفته حسن من دگته
دائما من يدگ ع الباب بطرف اصبعه
عدلت حجابي وشمرت عباتي على رجليه
صحت تعال خيي فوت
فتح الباب ودخل بيده علاگه
حسن،، جبتلج عصارتين بدل الوحده
وهم كاتبلج كبسول مال التهابات ومسكن مال الم اكلي واخذي علاجج حتى ترتاحين
زينب،، فطومه نايمه بحضني مااكدر اكوم انيمها بفراشها
اخذها مني يسمي بالرحمن شالها يبوس بعينها الوارمه نيمها بفراشها سألني
حسن،، تغديتي؟؟
زينب،، عباله من راح يجيب العلاج كلفن نفسهن وانطني خبزه اكلها
كتله لاخيي وحتى مالي نفس اكل كتلني الالم
حسن،، جا اشلون يخف الالم غير تاكلين وتاخذين علاج؟؟
زينب،، انفتح الباب دخل لواء
حسن،، اني مرتي تنجوي واعوفها؟؟
لواء،، اي كابلها واكعد
حسن،، وداعت منهل اگابلها واگعد اوكلها بيدي
زينب،، لواء ساله ع العصاره كاله اي جبت اثنين بدل الوحده لان مالگيت بس ذني عنده وخاف عصاره وحده ماتكفي فجبتهن اثنينهن
بيومها اذا السمج بالشط نام اني نمت
للصبح اصيح دخيلك ربي ارحمني
برحمتك الواسعه ياالله
يوميه يجي المضمد يجيبه لواء اعرگ من الفشله لان مطلعه رجليه جدام الزلمه
ينضفهن اكوم امعش بوجهي روحي تطلع منا لمن يكمل اني روحي خلصانه وگلبي خلصان
من يسلخ الجلد يحط الهن من العصاره الجابها حسن ويلفهن
ماارتاح اله اخذ مسكن يالله يخف الوجع
هاي غير الابر الاضربهن
اسبوع كامل شبعت قهر بنيتي تبهذلت ابوها مرات يصعد يمي بس من يجيب المضمد ومن يريد ينام بليل وحسن متكلفني ريوگ وغده وعشه اكثر وكت اتعب واشبع بجي من يجي المضمد ينضفهن
سابع يوم مو راح المضمد بعدني الشوغه بيه
بجت فاطمه والله حطيتها بحضني ابجي وياها
من ينضفون رجلي اريد مكان هادئ مابي بشر مااتحمل الصوت
فاطمه بس تبجي احس صوتها يدگ براسي
زمخت بيها مافاد زادت مانقصت
حطيتها بحضني بس تبجي صرت افر براسي
اريدها تسكت اعصابي تلفت مالگيت روحي غير ضربتها راجدي
فحطت انكتم صوتها بس. فاتحه حلگها ماكو صوت اريدها تشهگ ماكو
نسيت وجع رجليه طفرت وهي بحضني اهز بيها اريدها تبجي ماكو نفخت بوجها يالله بجت
صرت افتر بيها بالغرفه
اسممم الله يمه بنيتي اسم الله ييمه
ريت ايدي انكسرت امدداني
اريد اسكتها بس تبجي صرت ابجي وياها حيل
اخذتلها شوط هي تبجي من سكتت بوستها
مسحت دموعها متندمه على ضربي الها وهاي اول مره بگلبي گلت صخم الله وجهي
لو ميته بنيتي من الفحطه مالتها؟؟
مسحت دموعها گتلها دميعاتج غسلني يبنيتي
جريت اديها بستهن كتلها وريت ادياتج
جفنني وبلحدي وسدني
بليل حسن جاب عشه خطيه شيجيب اكل الروحه يجيبلي وياه
كتله خي مااكدر اكعد بالكاع اثني رجليه من اصلي
اريدك تجيبلي الكرسي. مال الصلاه
وفعلا نزل جابه واجه حطه الي بالغرفه
الساعه ب 12لواء وفاطمه نامو
رحت توضيت ورجعت لفيت ححابي ولبست عباتي
كعدت ع الكرسي صار اسبوع مامصليه احس حمل ثگيل على متوني
رفعت اديه بالدعاء
بمجرد ماارفع راسي لله عز وجل تنزل دموعي لان احسه يسمعني
لان مامنه بقوه تعالى (ونحن أقرب إليه من حبل الوريد)
رفعت اديه بالدعاء فصلت عن العالم
صرت احجي كلام مااعرف منين جبته وشگلت وشحجيت لان احجي وابجي
وكلت امري لله ورجعت نمت
مرت الايام ويوم عن يوم يشفه الحرگ مال رجليه بس الاثر باقي
15يوم ونذيره كامت تصيح نايمات المسعدات
واحنه نخدمهن
وهي والله خبزه ماانطتني ولاصعدتلي ولاغسلت هدوم بنتي
فقط ملابس لواء سمعت بحنان تغسلهن لو تخبلت
من صعد اتعاركت وياه كتله اروح للحمام ازحف زحوف اغسل ملابسك ولاتنطيهن لحنان
لواء،، كاافي زينب موزين قايمه بواجبي
زينب،، كعدت ابجي تالي عافني وطلع
صار اذا يكول جوعان ترركض قبلي تسويله اكل
واذا دخل للحمام دخلت وراه غسلت هدومه
بس يصيح اريد استكان جاي مرات تصادف بنتي بحضني ترضع لو اشتغل
مالگاها غير راحت بسرعه سوتله جاي واجت
تعبت من الوضع كلش ونذيره وعمتي صافات وياها
رجعت لزمت نوبه من جديد
خبز وطبخ وتنضيف
انوب نذيره گالت الحديقه يوميه على وحده تنضفها وتكنس باب الحوش وياها
يوم على زينب ويوم على حنان
بيوم نوبتي اگعد من. الصبح اكنس الحديقه كلش جبيره. اشيل الحطب اليابس اخلي على صفحه اسفطه
اكملها وارجع الباب البيت اكنسه
منا لمن اكمل الشمس ساطرتني سطر
ادخل للبيت ميته تعب لان كلش كبار
وايتعبن يرادلهن اثنين يتگابلن عليهن يكنسنهن
احنه نكنس بمشواف(عثگ تمر يابس)
والمشواف مرات ثگيل تحس ايدك تخدر
ثاني يوم يصادف نوبه حنان ماتكنس
ومحد تحجي وياها
تتعمد تسمعني حجي
حنان،، طلعت اريد اكنس الحديقه وشفتها نضيفه من كنس البارحه كلت عليش اتعب روحي
زينب،، تحجي هيج حتى تقهرني
مره مرتين عشر مرات نفس الحاله بيوم نوبتي انضفهن وبيوم نوبتها ماتمد ايدها ابد
من شفتها هيج بعنادها بطلت مااكنس
كلت اليوم اله هي تطلع
ثاني يوم الصبح نزلت افور ماي لفاطمه
اريد اسويلها حليبه
اجت نذيره
نذيره،، شو لسه ماطلعتي كنستي؟؟
زينب،، بدون مااباوع الها كتلها خل حنان تكنسها
نذيره،، لا شو انتي التطلعين ورجلج فوگ راسج
زينب،، درت وجهي ردت اعوفها واصعد جرتني من ثوبي من جهة متني
نذيره،، من احجي وياج لاتنطيني ضهرج وتولين
كلج خلگ فصليه نخدم عليج اهنا
نريد نكنس نريد مانكنس بكيفنه
باليعجبنه
بس انتي تنضفين وغصبا عليج واطلع وراج اذا الگه وصخايه ماارحمج
زينب،، هي تحجي دخلت حنان تتمضحك
تباوعلي وتضحك
نذيره،، دقيقتين الج الكاج جدامي تكنسين
اذا مالگيتج اكسر المشواف على متونج
زينب،، مااكدر احجي شي
اذا هو اخوها صاف وياهن ضدي المن اشكي؟؟
صعدت دموعي تجري سويت ممه لبنتي وهي نايمه رضعتها ورجعت نامت سديت الباب
تحزمت بعباتي ونزلت
طلعت كنست الحديقه وباب الحوش طلعت غفران
غفران،، اتكول امي خل تنضف المضيف وياها
زينب،، حجت وفاتت
المضيف شينضفه؟؟
اكبر من الحديقه انوب تعبت
سلمت امري لله ودخلت فتحت شبابيجه وسعفت الحايط عن ابو العنكبوت وكنسته خليته نضيف وطلعت
صار يوميه يذبن براسي شغله شكل خلني مثل المجديه من التعب
والمصيبه هدومي اتمزگن لان كشمير ومن اجت ام سجاد ماوصيتها تشتريلي لان اخوها ضل بس يشكيلها مني
وكرامتي ماهانت عليه يفشلني واكله انطيني افلوس
حطيت هدومي بالكاع اخيط بيهن مفتگات كلهن وصارن باهت لونهن كلش حتى الشال الالبسه قديم
اباوع الحنان تلمع من فوگ لجوه حافه ومرتبه واللبس جديد
واني وجهي متروس شعر واهدومي اليكعد يمي ماياكل تلعب روحه لان تحسهن لان قديمات عبالك وصخات
العصر طلعت اخبز بالتنور الطين اخذت المعجانه بيها عجين ورجعت اخذت صينيه وديتها يم التنور ورجعت اخذت فطومه هي وحجلتها من اخبز اضل اضحك واسولف وياها
بس شوفتها تنسيني ضيم گلبي
من كملت لميت الخبز تركته كلت اروح اودي بنتي للبيت وارجع اخذ الخبز
صدك وديتها ورجعت شفت نذيره واكفه يم الخبز تصيح
نذيره،، الفااهيه عاايفه خبززج ولوسي وجاكي يشمشمن لگيتهن بالخبزز نجسنه
زينب،، كتلها النهار كله الجلاب مربطات بالحديقه
شدخلهن للبيت؟؟
نذيره،، وشمددرريني وتساليني
هسه باالله شنااكل؟؟
حضرتج عايفه خبزج تشمشم بي الجلاب
ياالله امشي ولي عقاب الج هذا الخبز كله تحطي بالگونيه مال الخبز اليابس وترجعين من جديد تعجنين وتخبزين حتى ماتعوفين خبزج مره الثانيه
زينب،، عافتتي وفاتت صدگ انهضمت الدنيه راح تصير المغرب شوكت الحگ اعجن وانتضره يختمر واخبزه؟؟
رجعت للبيت بسرعه بسرعه حطيت المعجانه خليت بيها كم طاسه طحين گلت عاد بس يتعشون بيهن حتى لو اخبز قليل عود الصبح اكعد من وكت اعجن
عجنتها ركض ركض ودثرتها حتى تختمر
نص ساعه اختمرت بس صارت المغرب
ركضت للتنور وبنيتي تركتها بحجلتها بالصاله
حطيت حطبات بالتنور وشعلتهن منا لمن حمه صارت الدنيه ضلمه
رجعت صعدت الغرفتي جبت الايت ونزلت اخذت الصينيه ورحت. للتنور الدنيه ضلمه واخاف
خبزت اتلفت كلساع خايفه
مدري اشلون خلصت
تمنيت حسن يطلع يوكف يمي حتى مااخاف وحدي
بس اتذكرت حسن راح لكربلاء يزور يتاخر يالله يرجع
ولواء طلع من العصر مدري وين راح
من دخلت سمعت صوت بنتي تبجي حطيت الخبز
ع الكاونتر بسرعه وفتت اركض
وجان اشوف بنيتي بالكاع حاطاتها منزلاتها عن حجلتها
ونايمين فوگاها جهال حسين يبسطون بيها ويمعشون براسها
وحنان خربانه ضحك عليهم
بنيتي تصرخ وهنه عبالك متابعات مسلسل يضحكن علي
احس صعدت النار براسي
مالگيت روحي غير ركضتلهم بسرعه دفعتهم عنها
بعدهم توهم يوگفون على حيلهم ويوگعون
من دفعتهم وگعو
صحت الله ااكبر شجااجن حتى الطفلله ماسلمت منجننن؟؟
نهضتلي حنان دفعتني
حنان،، كسر بيدج لليش دفعتيهم حيووانه؟؟
زينب،، جزت حدها وياها حجايه مني حجايه منها
گبت العركه نزلت بنتي من ايدي لاتضربني وتوگع بفاطمه
اول ماخليتها بالكاع ردت اعدل وكفتي ماحسيت غير انجريت من حجابي
اتگابلن عليه ثلاثتهن ادفع وحده تمعشني الثانيه
مدري اشلون حنان حطت ايدها بصدر ثوبي شگته
من الطول للطول دفتها ضربتني نذيره
ولني وليه دخل حسن من بعيد صاح بيهن
بطلت مااريد اضربهن اريد استر روحي صدري كله طالع
اول ماوصل يمهن حسن ضرب غفران والتفت النذيره ضربها رد الحنان راد يضربها صاح بيها بصوت عالي خنست
لميت روحي وكعدت جريت بنتي حطيتها بحضني استر بيها صدري
حسن رد بسط غفران گالها شنو جسارتج اطگين مرت عمج
گبت الهوسه حسن خبصهن خبص
واني كاعده مااكدر اكوم ثوبي امزگ
حاضنه بنتي وابجي متاكده حسن شافني اتمنيت الگاع تبلعني من الفشله
شعري منفوش طالع من الحجاب
حسن،، وولجن براببيج شفتنها بطرگ روحهااا وليتنهاا گ...... بس موصوجن صوج زلمتهاا انطاجن مجااال
زينب،، مدنگه ضامه وجهي بضهر فاطمه سمعت صوت لواء
لواء،، شكووو شصاير
نذيره،، اسأل ذذيج الجلبه شسوت بالجهال
زينب،، ساكته مااكدر احجي بس ابجي
حنان هم بجت
حنان،، ترضاها لان يتامه الفصليه اطگهم لان يلعبون ويه بتها
زينب،، مااتحملت. رفعت راسي كتلها لااتجذبين
حجيتها واني خانگتني العبره
كتلها لاتجذبين رحت اخبز اجيت لگيت جهالج حاطين بنتي يبسطون بيها تبجي وانتن اتضحكن اعليهاااا
حنان،، شووف اشلوون كلبت السالفه ولج مو يلعبون واجيتي هااده بسطتي جهالي وغلطتي علينه؟؟
زينب،، نذيره وغفران ايدنها ردت احجي زمخ بيه لواء
لواء،، اسكتتي
زينب،، سكتت عرفن اشلون يخلنه يصدك بيهن واصلا من يوم الانجويت بالفوح هنه يوكلنه اكيد ترسن بطنه من سحورتهن
خلنه مايفرق بين الجذب والصدگ ولابين الحگ والباطل
حسن ماقبل بتصرف لواء گاله ماتشوفهن شمسويات بيها؟؟
لواء،، تستاهل يكسرنها حييل بيها
زعاطيط بينهم اانتي شكووو؟؟
زينب،، حسن اتعارك وياه ماقبل بحجي اخو
يمه البرده مال الصاله مد ايده جرها بقوه وگعت هي والحديده مالتها جابها مدها الي اخذتها منه خليتها عله متني استر روحي مااكدر اكوم خاف يشوفني
تركتتهم اخذت بنيتي وكمت اتعثر بذيال البرده
صعدت الغرفتي ابجي
لحگني لواء اول مادخل قفل الباب
لواء،، ماتبطلين سوالفج؟؟
زينب،، التفتتله كتله انت كدرتك عليه؟؟
فضحني جدام اخووك شگن ثووبي
بدل ماتحميني منهن ترزلني جداامهن
صرت اتحامه بحسسسن
حجيتها وبجيت ماخله شغله بالغرفه ماكسرها بنيتي اتسودنت بس تبجي ماتسكت من المغرب لسه بس طلايب بسببهن الله لايوفقهن
تالي عافنه وطلع
يوم وره يوم لواء يزود ماينقصد حجايه والثانيه مايتفاهم يطگني
انزل جوه اسمع امه تحشي براسه
صارن كلهن يحاولن يخلنه يشوفني وصخه ومونضيفه وصدگ ماعندي هدوم كلساع اخيط بيهن ونفتگن حتى الاقماش تعب من كثر الخياط
امه من تشوفه يريد اكله تصخر حنان تكلها كومي سوي لزلمتج اكل لاتخلين ذيج الوصخه تنطي لايتسمم
نذيره تكله اشلون اتنام يمها بالغرفه واني من تمر من يمي اريد ازوع من ريحتها
خلنه يموت مني كلساع يصيحلي الوصخه
تعبت ونفسيتي ادمرت
الوصخ يلبس هدوم جديده يصير نضيف
بس اني منين اجيب هدوم وهنه نفس الجرود ابدل بيهن
بيوم جاي اشتغل واكنس بالمطبخ وبعدها لازم اطلع اكنس الحوش
حنان واكفه تسوي لفه الها تريد تاكل
باب المطبخ اليودي للحديقه بي درجات لازم تنزلهن
ردت اطلع بعدني اباب المطبخ مدتلي رجلها
الباب مفتوح
وگعتي صارت على بطني ع الدرجات
احس النفس انگطع رجليه لفوگ اباب المطبخ وراسي بااخر درجه
گوه عدلت روحي احس جسمي انرض رض
باوعتلها ابتسمت وراحت تاكل بلفتها ولاجن اذتلها بشر
سحلت روحي عدلت گعدتي اديه مزلغه والم فضيع باايدي واصبع رجلي الجبير
سحبت رجلي لزمتها بجيت اصبعي بسرعه انتفخ
وايدي ماذيتني واحس صدري انكسر لان الوكعه صارت علي وعلى بطني
كوه نهضت صعدت الغرفتي ابجي
اعرج من رجلي كعدت بالكاع لزمت اصبعي ورم صار شكبره والوجع ماينحمل
صارن يتفنن اشلون يعذبني لان شافن محد الي ويدافعلي
دخل لواء
لواء،، شكوو شبيج تره جزعتيني
زينب،، كتله واني ابجي حنان ذبتلي رجل وكعتني من الدرج
لواء،، يووميه مطلعتلج ساالفه جديده ماطلعت هااي
زينب،، سكتت مدنگه ابجي فتح الباب طلع وركعه وراه
ضليت بمكاني الوب وبنتي تبجي جوعانه مااكدر ارضعها حايره بمصيبتي تالي مااتحملت گمت اعرج
فتحت الباب وطلعت رحت الغرفه حسن اول مادگيته طلعلي
مااتحملت بجيت گتله خييي الحگني اصبعي مكسور
خطيه كلشي ماحجه دخل الغرفته بسرعه جاب السويج وراح الغرفتي شال فاطمه گال البسي عباتج والحگيني انتضرج بالسياره
رجعت للغرفه لفيت ححابي ولبست عباتي
نزلت اعرج ماشفت اي وحده منهن
طلعت للسياره صعدت شفت فطومه بحضن عمها
التفتلي شالها انطانياها كال اريد اسوق الزميها
وصلنه للمستشفئ وهم كالو لازم ناخذلها اشعه
انطيت بنتي العمها ودخلت اخذو اشعه الرجلي
لكو فطر بالعضم مو كسر حتى حسن من طلعت وسالني كال فطر ولاكسر
صبو اصبعي روحي شاغت يمكن مكتوبلي يوميه وجعه جديده
كملت ورجعنه للبيت بالطريق حسن سالني حجيتله الصار
حسن،، المشكله مااكدر اطگ حنان لان لارجلها والي حگ اطگها ولااني اخوها والله كارها مثل دم اسنوني لان نفس حقاره نذيره
والله باقي الخاطرج بالبيت لان من زمان مفكر اسافر واخلص منهم
بليل ردت انام ماگدرت كل الوجع هاج صدري ورجلي وايدي
وخاصتا اصبعي من الالم عبالك واحد لازم بسمار وجاكوج ويدگ برجلي
اسبوع كامل اني هيج كوه امشي بس اشتغل لان ماكو رحمه بگلوبهم حتى زلمتي من يشوفني اكعد من غبشه لليل افتر مايكول اكعدي ارتاحي
مرات بنيتي اشيلها واشتغل بالايد الثانيه
وره كم يوم الساعه ب 3تقريبا جاي اعجن اسمع نذيره تكل الحنان راح الوكت كومي اخذج للصالون حفي وجهج
غلست عنهن واذا حفن شلي غرض بيهن
ماجنت اضن وره روحتهن راح يسلبن روحي مني
كملت عجين نزلن كاشخات عافن الجهال يم ام لواء وراحن
وره ماطلعن نضفت البيت وعزلت حطيت جدورتي ع الطباخ اسوي عشه اكيد راح يتاخرن ويوكع العشه براسي كلت خل اخلصه من وكت قبل مااخبز حتئ من اكمل خبز العشه جاهز ماينشلع گلبي اضل اركض وماملحگه
كملت طبخ تمن ومرگ طفيت النار عنهن شفت العجين مختمر
نيمت فطومه واخذت المعجانه شجرت التنور انتضرته يحمئ خبزت بسرعه بسرعه قبل ماتگعد بنتي
كملت ودخلت للبيت اسمع ام لواء تصيح وين صارن دنيه مغرب وهنه بعدهن نامن خو مانامن
وصدك هنه كلش اتاخرن صارت الساعه فوگ ال 6
يالله رجعن بس حنان حافه وجها يلمع
انتبهت لواء مو بالبيت ماشفته من دخل يم عمي الضهر ومن وكتها طلع مارجع للبيت
تركتهن وصعدت بعدها بنيتي نايمه اخذت هدوم وطلعت على كيف اسبح قبل ماتكعد لان عرگت من حراره التنور وانترست هدومي طحين
رحت للحمام ترست الطشت ماي اباوع الدشداشتي
خرگه صايره عود هاي احسن وحده بيهن اذا الزمها تنفتك
دمعت عيوني جريت حسره حقهم يصيحولي الجايفه والوصخه اذا ثوب مثل البشر ماعندي
سبحت وطلعت اتلگتني حنان لابسه دشداشه كشمير مبينه خياط جديد كلش حلوه وهي سمينه تارستها مومثلي عضم وجلد ضايع جسمي بالدشداشه
باوعتلي وابتسمت مدري شبيها
تركتها وفتت الغرفتي مشطت ولبست حجابي ونزلت
لگيتهن كلهن بالمطبخ يصبن عشه اني ابد مااكعد يمهم لو اتعشه بالمطبخ لواصعد عشاي الغرفتي
اباوع نذيره مدري شتحجي وتضحك وحنان هم نفس الشي مااهتميتلهن
نذيره،، جيبي جهالج اليوم يمي
حنان،، اخذيهم خلصيني منهم
زينب،، حجتها وضحكت ولاافتهمت اشبيهن
وليش حنان تخلي نذيره تاخذ جهالها
خليتهن يكملن صب عشه صبيت الروحي اخذته وصعدت الغرفتي
للساعه 10
ولواء بعده ماجاي للبيت
كم مره اتصل يطلع مغلق
گلت خل اسأل عمي هسه هم يكولون زلمتها من الضهر طالع وماسألت علي
نزلت شفت باب غرفة عمي مفتوح حجابي على راسي
من الباب سألته كتله عمي وين لواء شو اتاخر؟؟
جاوبني بدون مايباوعلي عينه بموبايله
ابو لواء،، يبات يم عمامه
زينب،، تفاجئت لان لواء مو من عوايده يبات يم ذياب
تركتهم وصعدت الغرفتي ولان تعبانه من الشغل اول ماخليت راسي ع المخده غفيت
اهناااك وجان اشوف لواء نايم بصف حنان وبعنادي تبوس بي
روحي احترگت اريد الزمها ابرد نار گلبي
فزيت مخترعه افر براسي منا ومنا مامصدكه هذا حلم عبالك حقيقه
اخذتلي كم دقيقه اديه يرجفن بعدني الخوفه مال الحلم بجسمي
باوعت للساعه ب1
جريت حجابي اريد انزل للتواليت
فتحت الباب على كيف وطلعت خاف تكعد فطومه
طلعت امشي بالممر صننته ماكو صوت كلها نايمه
وصلت يم باب غرفة حنان ردت اعبر استوقفني صوتها تحجي بصوت ناصي
رجعني الفضول وگفت يم الباب حاطه اذني اريد اسمعها شتحجي
الكون شگد جبير اواسع؟؟
بس من سمعت صوت لواء يمها احسه صار بگد علبة الشخاطه اختنگت وبداخلي اكول ربي كون جذب
ربي كلشي ولاهاي الشغله امووت اذا صارت
مااتحملت دگيت الباب باادين ترجف
ادگ محد يفتحلي اتهسترت صرت ادگ بقوه
انفتح الباب طلعت حنان لافه روحها بعبايتها
مالگيت روحي غير دفعتها ودخلت
انصدمت من شفته واگف يم الجربايه يلبس بدشداشته
،،،،،،،،،،،،،،،،،،،،،،،
أطوي صفحتكم
وأرد اقراها
هيَّ گوه عيونكم ننساها
شلون بيكم ؟
فوگ عيني مَددين
وآنه وگلبي نسكت ونرضاها
ليش ما يبچون من نبعد حرام
ويمهم أحنه عيونه أنسيناها .
ذياب
،،،،،،،،،،،،،
غصون،، نور ضلت صافنه جامده بمكانها
ذياب نزل راح للاستقبال وعمتي لحگته
صوت الابنيه مسموع
سلم عليها ذياب وسألها شنو السالفه وليش تبجي؟؟
علياء،، خيي صيحلي مرتك وانت تفهم
ذياب،، نور؟؟
غصون،، هزت راسها الابنيه بمعنى اي
ذياب صاح بأسم نور گالها تعاي
عبرت من يمي وفاتت للاستقبال احس بيها گوه تمشي
ذياب،، اكعدي خل افهم احجي خويه شنو الموضوع؟؟
وشعدها نور وياج؟؟
علياء،، خيي موبس نور اني جايتك على اختك هم
ذياب،، اشبيها اختي؟؟
قبل كلشي منو اجه وياج لهنا؟؟
علياء،، اخوي جابني واگف بره
خيي عندي كلمتين وياك وامشي
اني صارلي 7سنوات متزوجه واختك شوفتني نجوم الضهر
والله ياخويه ساگمتني سگم ولاجن احنه جناين بالبيت
واذا احجي وياها اتگلك اني مرت الجبير اشتغلي واسكتي
ياخويه الجبير الله مو اختك والله مرات احس راح يصير بيه مرض خبيث بسبب القهر منها
اتصور تدخل حتى
غصون،، حجتها وسكتت دموعها عشره عشره ونور ساكته مافتحت حلگها مدنگه تريد تبجي من الخوف
ذياب،، كملي خويه بشنو تدخل؟؟
علياء،، والله تدخل حتى بشقانه اني وزوجي
نتشاقه شقه عادي هي ادخل روحها وتخلي الشقه ينگلب عركه بيني وبينه
قبل كم يوم اتعاركت وياي وبسببها رجلي بسطني
اتحملت الخاطر اطفالي وسكتت
صارت يوميه اطلعلها سالفه جديده تخلي يرزلني
قبل كم يوم من اجت نور يمنه
هنه كعدن بغرفة عذراء واني بغرفتي
بنتي اخذت موبايلي وراحت تلعب يم ابن اختك
جنت بيومها مريضه وتعبانه رجع زوجي من الدوام
مالگاني محضرتله غده
كتله هسه اسويلك نزلنه اني وياها
اختك كالتله مرتك النادره عايفتك بدون اكل لسه؟؟
كتلها عذراء لاتدخلين ليش دائما تتعمدين تخلينه نتعارك؟؟
عذراء،، منين جبتي هاي السالفه؟
وشعندي وياكم قابل بس رجلج خطيه جاي تعبان المفروض يلگه اكله جاهز حجينه ابتلينه خو ماابتلينه؟؟
علياء،،ماكدرت اسكتلها لان صارت ادخل روحها بامور ماتخصها حجايه مني وحجايه منها وصلت بينه وحده تغلط ع الثانيه
زوجي بسطني ولان مرت اخو ماكدر يحجي وياها
اني مااتحملت ابقه كل ساعه مبسوطه بسبب اختك
لميت ملابسي وملابس اطفالي اتصلت ب اخوي اجه اخذني وتركت البيت ل اختك
من رحت لهلي وره يومين بالصدفه جاي احذف بالفيديوهات لان بنتي بيها سوله تاخذ موبايلي النهار كله تصور
اتفاجئت بوجود فيديو بس ماواضح التصوير بس الصوت واضح
ذياب،، فيديو مال شنو؟؟
غصون،، الابنيه مدت ايدها الجنطتها طلعت جهازها فتحته وشغلت المقطع مدت ايدها انطت الجهاز لذياب
اني واكفه بالباب اسمعهم
شغل ذياب المقطع كلها صفنت تستمع واثر الصدمه بانت على وجوه الكل واولهم ذياب
جان المقطع كلام بين نور وعذراء ع الولد اليتصل
على خطي والافتهمنا الولد جاي يبتز نور كل فتره واجاها يريد فلوس واذا ماانطته يجي لذياب
اسمعهن اشلون وحده اتكل للثانيه عندي مبلغ
على اساس عذراء تدفع نص الافلوس والنص الثاني على نور
ماكدرت اتحمل دموعي نزلت اتقربت وكفت يم الباب اشوفهم كلهم انتبهت ذياب لازم الجهاز ايده ترجف
رفع راسه النور
ذياب،، يعني طلعتن انتن وره السالفه؟؟
غصون،، سكتت نور ماحجت
علياء،، خيي الله راد يكشفهن اني مال ارجع لعيالي. مستحيل
وهاي شردنه اني وجهالي بسبب اختك مااكول غير حسبي الله ونعم الوكيل عليهن
انشاءالله مايضيع حقي عندالله
قبل يومين اتصلت بيهن ودزيتلهن التصوير حتى اعيشهن بقلق بسبب نفسيتهن المريضه
غصون،، الابنيه كامت من مكانها عمتي بس تضرب على وجها ساكته ماحجت كل شويه وكالت الله يصخم وجهجن مثل ماصخمتن وجوهنه
الابنيه راحت اخوها ينتضرها ونور على كعدتها ترجف ذياب كاعد بمكانه احسه يريد ينفجر
جر موبايله اتصل بعذراء كالها دقايق وجايج اذا ماطلعتي افوت البيت عيالج اطلعج سحول
سده بوجها نور كامت تريد تلزمه دفعها كالها شويه واثنيجن تفهمني كلشي
طلع وصاح العمتي كالها اطلعي خليها وحدها اجيب ذيج الجلبه الثانيه واجي
طلع ذياب وقفل عليها الباب من بره وأخذ المفتاح وياه
اني حيل ماعندي اوكف كعدت على بدايه الدرج وعمتي طلعت كعدت بره اباب الاستقبال تبجي وتندعي على نور وعذراء لان السالفه صارت واضحه بعد مابيها مجال ينكرن
نور وره ماطلع صارت ادگ ب الباب تريد تطلع ماكدرت
تبجي بصوت عالي
ربع ساعه واجت عذراء سمعنه بس باب الحوش الرئيسي اندفر فات ذياب لازم عذراء من عبايتها
اتحسه من عصبيته مايشوف كدامه
طلع المفتاح فتح باب الاستقبال ودفع عذراء
كامت عمتي فاتت يمهم واني نهضت من مكاني اريد اشوف اشلون خططن ودبرن كلشي اورطني
زمخ بيهن ذياب بصوت عالي طلب منهن يكعدن اثنينهن
كعدن مثل المذنبات وحده بصف الثانيه نور اكثر شي انتهت من البجي بس عذراء عينها صلفه
ذياب،، احجيلي كلشي بالتفصيل الممل
والا وحگ رسول الله هسه اجلخ واير من الكهرباء والماتحجي اكهربها منا لمن تكت الاول والتالي
سووولفن
منييين جبتن رقممم غصون؟؟
وشووصلله هو والصوررر بيد زلمه غررريب؟؟
غصون،، نور بجت رادت تحجي خزرتها عذراء
عذراء،، وشمدرينه منين جاابهن خو اسال مرتك ليش تسألنه؟؟
غصون،، بكل صلافه نكرت
دار وجها النور
حجه بكل هدوء عكس العصبيه التحسها واضحه علي من عروگ گصته البارزه
ذياب،، احجي نور مال منو هذا الرقم ومنين عرفتي ومنين جاب الصور؟؟
ااحجيييي
غصون،، سكتن من شافهن ساكتات اتخبل اول ماطفر لزم نور من شعرها صار يضربها راشديات على وجها بقوه
عمتي كامت تريد توخره ماتكدر كطع نور تكطع
تالي كتت الاول والتالي
تحجي وتبجي
نور،، اابن خ خالتي عنده محل م موبايلات اتفقت وياه اريد خ خط بس كون مو باسمي حتى محد يكتشف السالفه
ا اقترح عليه يجيبلي خط مامسجل ب اسم ك كلك
من شفته ب بي مجال يتعاون و وياي
اتفقت وياه اجيبله رقم غصون
قبل بس بشرط ندفعله فلوس
ذياب،، ومنو اخذت الرقم؟؟
عذراء،، نور خذته موو اني
نور،، والله هي اخذته جانت غصون تغسل بالفراش ويه عمتي عذراء لگت موبايلها بالاستقبال اخذته واقترحت ناخذ رقمها هي الخلت الفكره براسي
ذياب،، والصور؟؟
نور،، هم عذراء اخذتهن بحجه تخلي غصون تلتهي تسوي غده لمصطفئ وتروح تنقل الصور من جهاز غصون لجهازها
ذياب،، انطيني عنوان ابن خالج
غصون،، نور سكتت بس تبجي وعذراء وجها صار اصفر من الخوف لان كل ااسالفه انفضحت مايفيدها تنكر
نور انطت عنوان المحل والبيت لذياب
نهض من مكانه
ذياب،، كومي يمه اطلعي
غصون،، عمتي خطيه ابد ماحجت ساعه تصفك بديها وساعه ادگ على راسها مامصدكه بتها وره كل الطلابه
اني تراجعت صارت عيني بعينه سد الباب سمعنه بس طگه القفل
بعدها صرنه نسمع بس صوت صياحهن يتصارخن
مبين گطعهن اثنينهن
عمتي كامت ادك بالباب مايفتحلها نص ساعه وهو صوته يرج بالبيت يفرفح عليهن
انفتح الباب كل وحده خاتله بجها كفشتها شكبرها اكثر شي مبين ضارب عذراء لان حلگها يجري دم
اخذ موبايله اتصل برجل عذراء گاله جيب ابوك وتعال بسرعه
كعد ع القنفه لازم راسه بثنين ادي
رفع راسه العذراء الجانت ضامه راسها تبجي
ذياب،، شسويتلج حتى استاهل هيج تسوين وياي؟؟
يوم زعلتج؟؟
يوم رفعت صوتي عليج؟؟
يوم طالبه مني شي ومقصر عنج؟؟
احجي
ولج سوايتج العدو مايسويلها
شحال اني وياج شالتنه بطن وحده
غصون،، يحجي وياها اعصابه ترجف
اندگ الباب ضليت واكفه بمكاني يم الباب حجابي لافته على راسي مااريد تفوتني سالفه وحده اريد اسمع كل حرف يحجو لان فرحتي بضهور برائتي ماتنوصف
طلع ذياب راح فتح الباب دخلو ابوها واخوها ابوها من شاف بنته اشلون مبسوطه راد يتعارك
بس ذياب كاله اكعد واسولفلك سوالف بنتك حتى من تروح تاخذها بيدك لان من اليوم تحرم عليه اليوم الدين
كعد ذياب يحجيله كل السالفه اهلها نصدمو ورجل عذراء صافن على مرته مايعرف شيحجي
ذياب زمخ بنور كالها احجي كلشي لبوج خل يسمع
بالبدايه ماقبلت بس ابوها كالها اذا ماحجيتي بعد لااعرفج ولاتعرفيني رجعت نور حجت نفس الكلام لبوها واخوها ضلو صافنين
نهض ذياب لزم اخوها گاله
ذياب،، اختك اخذها وياك ادبها يمك
واختي تضل يمي اريد اعيد تربيتها من جديد
غصون،، نهضت نور بس تبجي ماحطت عينها بعيني ابد
عبرتني وصعدت الغرفتها
اباوع ل ابوها اخذه العرگ الرجال گصته عرگت متفشل
اكيد المثله يتعب على بنته ويوصلها الهيج مستوه وخاصتا نور شهادتها عاليه المفروض ماتتصرف تصرفات مال وحده همجيه
عشر دقايق ونزلت بيدها جنطه صغيره اخذوها اهلها وراحو
عمتي دخلت يم عذراء شبعتها كتل لمن جرها ذياب كالها لاتموتين بسبب هاي الناقصه
خليها اهنا مثل الجلبه حتى مااخلي رجلها يجيب ابنها تشوفه خلي يم ابو احسن
بعدها ذياب اخذ سويجه وطلع شايط
عمتي كامت تلطم لان سمعته يريد يروح للولد الاتفقن وياه
من شافته طلع رجعت على عذراء ملختها
بس مافاد وياها مبينه صلفه تبجي بس ماسكتت تصيح على امها
عفتهم ورجعت الغرفتي حلو الشعور بالانتصار وخاصتا اذا اثبتت برائتك كدام الكل
سمعت صوت عمتي تصيح تندعي على عذراء لان اخوها راح يصير بي شي من وراها
فتحت الباب وطلعت الافتهمته ذياب رايح متعارك ويه الولد مكسره تكسر ومفلش جام المحل مالته
گوه مفاككتهم العالم
وذياب رايح لهله نافض عليهم گوامه وراح يسويها گعده عشاير
مارجع لليل من سمعت صوت سيارته بره رجعت الغرفتي
اسمع يصيح الله لاينطيج فضحتني جدام الوادم
ولجن عصاابه خوماعصاابه؟؟
اسمعه اشلون يفرفح عمتي تريده يسكت مايسكت
بليل ابد محد نام عمتي اتلوب وعذراء خاتله بالغرفه الثانيه حلف كل مايشوفها يبسطها
ثاني يوم الساعه ب 9اجتنه مشيه مال زلم
ابو الولد وشيخهم وعمامه
استغليت الفرصه مال انشغال عمتي تسمع حجي الوادم
رحت الغرفتها اخذت موبايلها
اتصلت ب ابوي
اول ماجاوب بجيت كتله يابه تعال اخذني
ابو مثنئ،، رايتج بيضه؟؟
غصون،، باذن الله حجيتها وخنگتني العبره
رجعت للغرفه حطيت كتبي باعلاكه وكلشي مااخذت غير الكتب وموبايلي وبس
حضرتهن وطلعت يم عمتي اريد اروح قبل مايعتذر ويحاول يرجع لان مستحيل ارجع لو مهما يكون
نص ساعه وسمعت صوت الهورن مال سياره ابوي
رجعت للغرفه لبست عباتي شلت غراضي وطلعت
عمتي ضلت صافنه سالتني
ام ذياب،، وين تردين؟؟
غصون،، كتلها لهلي راده عمه هذا حدي وياكم
بست راسها وطلعت هي عافتني وركضت دكت باب الاستقبال على ذياب تصيحله
ماانطيتها مجال تحجي ولا اني حجيت شي
لان اذا بقيت راح يحاول يصالحني واني مااريد هذا الشي
طلعت بره شفت ابوي واكف يم سيارته ابتسملي
نزلت دمعتي
سمعت صوته وراي ولاجن سمعته
فتحت الباب وصعدت يم ابوي بالصدر اجه يركض وكف يم ابوي
ذياب،، وين تريد غصون؟؟
ابو مثنئ،، انطيتك چلمه كتلك بيوم التثبت برائتها اسحبها منك
غصون،، اباوعله صار مثل طير المذبوح يريد يتفاهم ويه ابوي
بس ابوي ماانطا مجال كاله
ابو مثنئ،، انطيتك بنتي بطرك ثوبها وطلعتها من بيتك بطرك ثوبها
كتلك بيوم التكلي بويه رايتي بيضه
لو تترس مضيفي شيوخ مااردها الك
غصون،، ابوي صعد للسياره وذياب عينه الي عيونه يلمعن يريد يبجي
كانه كتله خسرتني ومستحيل يشفعلك دموعك يمي
ابوي شغل السياره اباوعله كعد ع الرصيف ادي على راسه
غصب عني بجيت ابوي جر راسي باسه
ابو مثنئ،، لاتبجين بنيتي وداعت دموعج يحلم ارجعج اله
غصون،، وصلنه للبيت امي واخواني تلكوني
شبكت امي وبجيت خطيه تبجي وياي
وره ساعه اندگ الباب
راح ابوي يفتحه سمعت صوت عمتي عرفته مااتحمل جابها واجه
ابوي استقبلهم بكل احترام دخلهم للمضيف
امي راحت كعدت يمهم فشله من عمتي
صار عندي فضول اسمع كلامهم
وكفت يم الشباج اتصنت
ذياب،، حجي اجيت ارجعها وياي وشتأمر اني حاضر
ابو مثنئ،، وواني مااريد شي منك غير اطلگها
غصون،، ذياب من سمع ابوي يگله طلكها اتخبل
كام يصيح مااطلك مرتي واخذها غصب عنها
ابوي جاوبه بكل هدوء كاله مره انطيتها الك غصب عنها
وهلمره مستحيل ارجع اعيد نفس الغلط مرتين
اجمع عمامك وجيبهم واني اجمع عمامي اهنا
واريدهم يقدرون شكد الفصل مال بنتي
ادفعلك افلوس الديه وطلگها
لو اعرف ابيع مالي وحلالي مااخليها تردلك
ذياب،، وانه مارايد فلوس مال فصل مرتي ورايد اردها
تريد اسويلها عرس من جديد وعقد محكمه وحاضر وغايب اني جاهز بس طلاگ مااطلگ
غصون،، اسمعه يفرفح وعمتي تريده يسكت مايسكت تالي عافهم وطلع لحكته عمتي حتى ماطلعت يمهم
ولا انقهرت علي ابد ولاحسيت روحي ضايجه
بالعكس كانه شخص عادي
كرهته من جانت تنزل نور وتسولف بعلاقتهم الحميميه جدامي حتى تقهرني
كرهته من يوم الكتلني قبل مايفهم مني
كرهته من يوم الاخذها كدام عيني
كانه كلشي جان يسوي يخليني اكرها اكثر واكثر
قمة سعادتي من اسمعه يفرفح ومحترگه روحه
اتمنئ بعد وبعد ياكله الندم
جهازي غالقته ادري راح يتصل
يومين مافاتحه الموبايل اريد ينقهر بالزايد
ثالث يوم بليل اول مافتحت الجهاز اجتني كوومه رسائل ع الماسنجر
وكلهن كاتب جاوبي
بس احجي وياج
بس نتفاهم
شتردين اني حاضر
وااهوااي رسائل غيرهن
اخر شي داز جاوبي راح انجلط
قريت الرسائل ماجاوبت
بسرعه دز
ذياب،، الهاي الدرجه كارهتني؟؟
غصون،، بدون تردد كتبتله واكثر من ماتتصور
ذياب،، ارجعي وكلشي ينحل وشتردين اني حاضر
غصون،، طلگني وكلشي مااريد
ذياب،، انجبي ولاتعيديها ولو تطلع نخله براسج مااطلگج
غصون،، ساره علمتني اشلون انطي حضر بسرعه حضرته طفيت الشبكه وتركت الموبايل
ثاني يوم فتحت الجهاز تفاجئت جايتني رساله منه كاتب
ذياب،، ماتكدرين تحضريني
غصون،، مافهمت قصده وماعرفت اشلون كدر يدز رساله
وهم لگيت رسائل من ساره بسرعه دزيتلها لايك
شويه وجاوبتني
ساره،، اشلونج غصونه
غصون،، الحمدالله انتي شخبارج؟؟
ساره،، غصون ليش سويتي هيج؟؟
غصون،، شنو سويت؟؟
ساره،، رحتي بدون ماتتفاهمون جان انطيتي مجال ليش بسرعه رحتي؟؟
غصون،، على شنو نتفاهم؟؟
زين اني اسالج سؤال
تقبلين زوجج ياخذ غيرج ويجيبها كدام عينج
؟؟
تقبلين تشوفي يدخللها ويطلع وانتي تاركج على صفحه عود شوكت تبين برأئتج عود ذيج الساعه يرجعلج ندمان؟؟
ساره،، اكيد مااقبل بس انتو تختلف سالفتكم
غصون،، بشنو تختلف؟؟
قصدج لان فصليه؟؟
تره الفصليه بشر مو جماد
وخلي ابالج قسما بالله اذا فكر ارجعله عندي احرگ روحي ولاارجع
لان اخوج اهواي ذلني وهاني بدون مايفهم مني
اكو يوم گعد وياي وحاول يفهم مني؟؟
ليش سكتي جاوبي
لا ماكو لان دائما يتسرع بقراراته
هو الجاب نور اذا يتحمل نتيجه افعاله
يمكن ارجعله اذا رجعت غصون الفقيره الغبيه الماتفهم
شي
بس بفضل اخوج ذيج غصون ماتت اليوم اني قويه بسبب الخذلان والضربات الاتعرضتلها بسببه
ساره،، ارجعيله غصون ذياب مستعد يتغير الخاطرج
غصون،، ابو طبع مايبدل طبعه ابد
وخاصتا الرجل اذا مد ايده على مرته مره
راح تصير السالفه عنده زلاطه يضل يوميه يكفخ بيها
وبكل الاحوال ماراح ينجح زواجنه لان اساسه هش موقوي بنائه لان ماانبنه ع الموده والرحمه
انبنه ع الدم والحقد
ساره،، تره ذياب من يوم الرحتي مريض
غصون،، الله يشفي
ساره،، غصون ليش هلگد قاسيه انطي مجال فرصه يصلح غلطه
غصون،، قاسيه؟؟
سامعه بالمثل اليگول الضربه الماتموتك تقويك؟؟
اني من كثر ضرباتي قويت
ساره،، غصون لتعاندين تره هو لان غلطان جاي يحاول يرجعج اذا وصلت حدها وياه يجي البيتكم ياخذج
غصون،، شگد حاولت ساره تقنعني بس كنت قافله اخر شي نهت المحادثه وراحت
وره كم يوم ابوي كال راح يجي ذياب
وفعلا العصر اجه دخله ابوي للمضيف
اسمعهم يحجون شويه شويه اشتد النقاش
ذياب يصيح خل تجي واسمع منها اتكول مااريده بلسانها
طلع ابوي كلش عصبي كال فوتي يمنه
بالبدايه ماخفت بس بمجرد مادخلت وصارت عيني بعينه خفت صاير وجها تعبان
كعدت بصف ابوي وهو كدامي
ذياب،، غصون جدام ابوج جاي اكلج
نعقد محكمه وادفع حاضر وغايب والمبلغ الابوج يحدده واسويلج احلى عرس شتكولين؟؟
غصون،، مدنگه واسمعه رفعت راسي لبوي والتفتت لذياب
كتله مااريد ارجع حجيتها ودنگت
ابو مثنئ،، ابني ليش اتعب روحك واتعبني
بنتي مااردها وكتلك شكد يحدد شيخكم فلوس الديه مالتها ابيع گاعي وادفعهن بمكانها
وحلت فلت
والله لو واحد غيري جان سواها كعدت عشاير
بس اشوف نحلها بالحسنئ افضل الك والي
غصون،، ذياب ابد ماحجه تحسه راح ينفجر تالي عافنه وطلع بدون كلام
صار كل كم يوم يدز عمتي يحاول يرجعني بس ابد مااقتنعت وكل مره ارفض
وره اكثر من شهر ابوي دز علي كاله تعال عندي حجي وياك
هو كيف عباله ابوي راح يكله اخذها وياك
من اجه دخلو للمضيف وكفت يم الشباك اتصنت عليهم
ابو مثنئ،، بويه انت جاي تماطل والسالفه منتهيه
ذياب،، مااطلگ
ابو مثنئ،، براحتك لااطلگ بس انه راح اجمع اهلي وعشيرتي وادز على شيوخكم اكعدهم بمضيفي
لان ماخليت عندي غير هذا الحل
ترضاها جدام الوادم ينجاب طاري اختك بنص الديوان؟؟
غصون،، ذياب سكت ماحجه
ابو مثئ،، اطلك بدون هوسه خير على خير
تريد ادفعلك حگ فصلها؟؟
هم ماعندي مانع لو ابيع عيوني هم مااخليها ترجعلك
غصون،، اهواي حاول وياه ابوي بس من شافه قافل مايقبل يطلگ گاله
ابو مثنئ،، تريد يلتمون بني اجوادك وجدامهم افتح موضوع اختك وحرمتك الثانيه واتفاقهن ويه زلمه غريب يدزله صور بنتي؟؟
بكيفك اختار وحده منهن واني خادم
يتتتبع
نلتقي الاسبوع القادم
اخر حلقات قصه (ضحيه لمن لايرحم)
تابعو حساب الورده وئام الشيخلي تنقل كل مايخص رواية ضحيه لمن لايرحم
Wyaam1990
الكاتبه المبدعه الاعباديه
حاليا تنشر رواية حكاية زمزم الجزء الثاني
بهذا الحساب تابعوها
abodea-loloa
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!